LEXNAVARRA
8/2026 FORU AGINDUA, OTSAILAREN 8KOA, HEZKUNTZAKO KONTSEILARIAK EMANA, ZEINAREN BIDEZ ARAUTZEN BAITA NAFARROAKO FORU KOMUNITATEAN HEMEZORTZI URTETIK GORAKO PERTSONEK DERRIGORREZKO BIGARREN HEZKUNTZAKO GRADUATU TITULUA ZUZENEAN ESKURATZEKO PROBA LIBREA
BON N.º 44 - 02/03/2026
- ZIOEN AZALPENA
- 1. artikulua. Xedea eta aplikazio eremua.
- 2. artikulua. Deialdia.
- 3. artikulua. Proban parte hartzeko betekizunak.
- 4. artikulua. Probaren egitura, eta nola eginen den.
- 5. artikulua. Inskripzioa eta matrikulazioa.
- 6. artikulua. Baliozkotzeak.
- 7. artikulua. Ebaluatzea eta kalifikatzea.
- 8. artikulua. Emaitzak argitaratzea eta erreklamazioak.
- 9. artikulua. Ebaluazio akta.
- 10. artikulua. Titulua ziurtatzea eta ematea.
- 11. artikulua. Epaimahaia.
- 12. artikulua. Epaimahaiaren eginkizunak.
- Lehenengo xedapen gehigarria. Espedienteen arteko lehia.
- Bigarren xedapen gehigarria. Beste kalifikazio termino batzuk.
- Xedapen indargabetzaile bakarra. Arauak indargabetzea.
- Azken xedapenetako lehenengoa. Aldaketa, Hezkuntza kontseilariaren uztailaren 3ko 54/2025 Foru Aginduan, Nafarroako Foru Komunitatean Helduentzako Oinarrizko Hezkuntzari dagozkion irakaskuntzen antolaketa, ezarpena eta ordutegia, eta irakaskuntza horietako ikasleen ebaluazioa, maila igoera eta titulazioa arautzen dituenean.
- Azken xedapenetako bigarrena. Aldaketa, Hezkuntza kontseilariaren apirilaren 11ko 40/2024 Foru Aginduan, ikasleak Nafarroako Foru Komunitateko ikastetxe publiko eta pribatu itunduetan onartzeko prozesua arautu eta garatzen duenean, funts publikoen bidezko irakaskuntzak egiteko, aurrez aurreko modalitatean, Lanbide Heziketako Sistemaren D eta E graduei eta Arte Plastikoetako eta Diseinuko lanbide ikasketei dagozkienak, eta orobat, ikastetxe publikoetan, ikastetxe pribatuetan eta entitateetan, Nafarroako Foru Komunitatean baimenduetan, aurrez aurreko modalitatean, Hezkuntza Departamentuak kudeatzen duen Lanbide Heziketako Sistemako A, B, eta C graduei dagozkien irakaskuntzak egiteko.
- Azken xedapenetako hirugarrena. Indarra hartzea.
I. ERANSKINA. HEZKUNTZA SISTEMA DESBERDINETAKO HELDUEN BIGARREN HEZKUNTZAREN (HBH) ETA DBHKO GRADUATU TITULUA ZUZENEAN LORTZEKO PROBAREN (GZLP) ARTEKO BALIOKIDETASUNEN TAULA
II. ERANSKINA. HEZKUNTZA SISTEMA DESBERDINETAKO DBHKO GRADUATU TITULUA ZUZENEAN LORTZEKO PROBAREN ETA HLOALOREN ARABERAKO DBHKO GRADUATU TITULUA ZUZENEAN LORTZEKO PROBAREN ARTEKO BALIOKIDETASUNAK
III. ERANSKINA. HEZKUNTZA SISTEMA DESBERDINETAKO IRAKASKUNTZEN ETA DBHKO GRADUATU TITULUA ZUZENEAN LORTZEKO PROBAREN (GZLP) ARTEKO BALIOKIDETASUNEN TAULA
IV. ERANSKINA. ZENBAKIZKO KALIFIKAZIOAK KALIFIKAZIO KUALITATIBO BIHURTZEKO TAULA
V. ERANSKINA. KALIFIKAZIO KUALITATIBOAK ZENBAKIZKO KALIFIKAZIO BIHURTZEKO TAULA
Ekainaren 21eko 19/2002 Foru Legearen xedea da Nafarroako Foru Komunitateko helduentzako hezkuntza arautzea, eta hura egituratu, garatu, koordinatu eta ebaluatzeko mekanismo eta instrumentuak ezartzea.
Era berean, Hezkuntzari buruzko maiatzaren 3ko 2/2006 Lege Organikoak helduentzako hezkuntza arautzen du I. tituluko IX. kapituluan, eta 68. artikuluan ezartzen du Oinarrizko Hezkuntzari dagozkion gaitasunak eta ezagutzak eskuratu nahi dituzten helduek beren baldintzetara eta premietara egokitutako eskaintza izanen dutela.
Derrigorrezko Bigarren Hezkuntzako gutxieneko irakaskuntzak eta haien antolamendua ezartzen dituen martxoaren 29ko 217/2022 Errege Dekretua argitaratu ondoren, Nafarroako Gobernuak, lege organikoak berak emandako erantzukizuna bere gain hartuta, Nafarroako Foru Komunitateko Derrigorrezko Bigarren Hezkuntzaren etapako irakaskuntzen curriculuma ezarri zuen ekainaren 29ko 71/2022 Foru Dekretuaren bidez, eta dekretu horren laugarren xedapen gehigarrian zehaztu zituen Nafarroako Foru Komunitatean helduentzako Oinarrizko Hezkuntza eraenduko duten ildo nagusiak.
Era berean, Nafarroako Gobernuak, maiatzaren 14ko 51/2025 Foru Dekretuaren bidez, Nafarroako Foru Komunitateko helduentzako Oinarrizko Hezkuntzaren antolamendua arautu, eta curriculuma ezartzen du. Foru dekretu horren lehen xedapen gehigarrian ezartzen denez, Hezkuntza Departamentuaren betebeharra da aldian-aldian proba egokiak antolatzea hemezortzi urtetik gorako pertsonek Derrigorrezko Bigarren Hezkuntzako graduatu titulua zuzenean eskuratu ahal izan dezaten, diskriminaziorik eza eta irisgarritasun unibertsala bermatuz. Era berean, foru dekretu horren azken xedapenetako hirugarrenean baimena ematen zaio hezkuntza arloko eskumena duen kontseilariari arau horretan ezarritakoa bete eta garatzeko beharrezkoak diren xedapen guztiak eman ditzan.
Hori guztia kontutan hartuta, hortaz, bidezkoa da proba horiek arautzea foru agindu honen bidez, 18 urtez gorako pertsonek Nafarroako Foru Komunitatean Derrigorrezko Bigarren Hezkuntzako graduatu titulua zuzenean eskuratzeko aukera izan dezaten.
Horregatik guztiagatik, eta Nafarroako Eskola Kontseiluak nahitaezko txostena eman ondoren, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1.g) artikuluak ematen dizkidan ahalmenak baliatuta,
AGINTZEN DUT:
1. artikulua. Xedea eta aplikazio eremua.
1. Foru agindu honen xedea da hemezortzi urtetik gorakoek edo Nafarroako Foru Komunitatean proba egiten den urte naturalean adin hori betetzen dutenek Derrigorrezko Bigarren Hezkuntzako (DBH) graduatu titulua zuzenean lortzeko proba arautzea.
2. Derrigorrezko Bigarren Hezkuntzako graduatu titulua lortuko dute foru agindu honen 4. artikuluan aipatzen diren probaren hiru zatiak gainditzen dituztenek.
1. Hezkuntza Departamentuak, urtero, Helduentzako Oinarrizko Hezkuntzako irakaskuntzetan eskumena duen zuzendaritza nagusiaren ebazpen bidez, bi proba deituko ditu, oro har, hemezortzi urtetik gorako pertsonek edo adin hori proba egiten den urte naturalean betetzen dutenek aukera izan dezaten Derrigorrezko Bigarren Hezkuntzako graduatu titulua zuzenean lortzeko.
2. Nafarroako Aldizkari Ofizialean ez ezik, deialdiaren izapideen fitxan ere argitaratuko da ebazpen hori.
3. artikulua. Proban parte hartzeko betekizunak.
1. Derrigorrezko Bigarren Hezkuntzako graduatu titulua zuzenean eskuratzeko proba librean parte hartzeko, beharrezkoa izanen da hemezortzi urtetik gora izatea, edo proba egiten den urte naturalean adin hori betetzea.
2. Ez da proba librean izena ematen ahalko, une horretan jada Derrigorrezko Bigarren Hezkuntzako graduatu titulua lortzeko beste irakaskuntza batzuetan matrikulatuta egonez gero.
4. artikulua. Probaren egitura, eta nola eginen den.
1. Probak hiru atal bereiz izanen ditu, Komunikazio Esparrukoa, Gizarte Esparrukoa eta Zientzia-Teknologiaren Esparrukoa. Esparruok Nafarroako Foru Komunitatean helduentzako Oinarrizko Hezkuntzaren antolamendua eta curriculuma arautzen dituen maiatzaren 14ko 51/2025 Foru Dekretuaren 21. artikuluan aipatuta daude.
2. Probaren atal horiek erreferentziatzat izanen dituzte aipatutako 51/2025 Foru Dekretuaren III. eranskinean jasotako esparruetako curriculumak.
3. Ikasleak proba euskaraz egitea erabakitzen badu, hizkuntza horretan eginen ditu Zientzia-Teknologiaren Esparrukoa eta Gizarte Esparrukoa. Komunikazio Esparrukoan, berriz, Gaztelania eta Literatura, Euskara eta Literatura, eta Atzerriko Hizkuntzako ariketak sartuko dira, eta foru dekretu horretako D ereduko curriculuma izanen da erreferentea.
4. Proba egitean, irisgarritasun unibertsaleko neurriak eta hezkuntza laguntzaren berariazko premia duten ikasle guztiek behar dituzten egokitzapenak hartuko dira kontuan. Egokitzapen horiek ez dira inola ere kontuan hartuko lortutako kalifikazioak jaisteko.
5. artikulua. Inskripzioa eta matrikulazioa.
1. Derrigorrezko Bigarren Hezkuntzako graduatu titulua zuzenean eskuratzeko proban izena ematean, ikasleek foru agindu honen 2. artikuluan aipatutako urteko ebazpenean ezarritakoa beteko dute.
2. Ikasleak inskripzioan aurkeztutako datuetatik eta dokumentazioetatik abiatuta, ikastetxeak matrikula formalizatuko du.
3. Probarako matrikula egiteko unean, hala badagokio, adierazi eginen da zer esparru baliozkotu zaizkion ikasleari, foru agindu honen 6. artikuluan ezarritakoaren arabera.
4. Baldin eta ikasle batek aukera badu foru agindu honen 6.2.c) artikuluan ezarritakoaren arabera probaren hiru esparruak "BAL" terminoaren bidez baliozkotzeko, gutxienez probaren esparruetako batean izena eman beharko du, berak aukeratutakoan, DBHko graduatu titulua lortu ahal izateko, izena emandako esparruetan kalifikazio positiboa lortuz gero.
1. Ikasleek, izena emateko unean, esparru jakin batzuk baliozkotzea eskatzen ahal dute, foru agindu honen I., II. eta III. eranskinetan ageri diren baliokidetasunak aitortzeko koadroak aplikatuz. Horretarako, ikasleek baliozkotzea ekarriko duen dokumentazioa aurkeztu beharko dute.
2. Baliozkotzeak ikaslearen espediente akademikoan erregistratuko dira, aurretik gainditutako esparru edo jakintzagai hauek kontuan hartuta:
a) Helduentzako Bigarren Hezkuntzan gainditutako esparruak (HBH): baldin eta ikasleari I. eranskinean aipatutako baliokidetasunak aplikatzen bazaizkio, inguruabar horietan baliozkotutzat erregistratuko da "BALHBH" siglen bidez, dagokion kalifikazio kualitatiboarekin batera, artikulu honen 3. apartatuan xedatutakoaren arabera.
b) DBHko gradua zuzenean lortzeko proban gainditutako esparruak (GZLP): baldin eta ikasleari II. eranskinean aipatutako baliokidetasunak aplikatzen bazaizkio, uneko deialdiaren aurreko probei dagozkienak, inguruabar horietan baliozkotutzat erregistratuko da "BALGZLP" siglen bidez, dagokion kalifikazio kualitatiboarekin batera, artikulu honen 3. apartatuan xedatutakoaren arabera.
c) Espainiako hezkuntza sistemako beste irakaskuntza batzuetan gainditutako esparruak edo jakintzagaiak: baldin eta ikasleari III. eranskinean aipatutako baliokidetasunak aplikatzen bazaizkio, inguruabar horietan baliozkotutzat erregistratuko da "BAL" siglen bidez, kalifikaziorik gabe.
3. "BALGZLP" eta "BALHBH" motako baliozkotzeekin batera zer kalifikazio kualitatibo jarri behar den zehazteko, honela jokatu beharko da:
a) Baldin eta baliozkotzea ahalbidetu duten atal, modulu edo esparruen kalifikazioak zenbakizkoak badira, edo zenbakizko baliokidea duten kalifikazio kualitatiboak, kalifikazio kualitatibo bat adieraziko da "BALGZLP" edo "BALHBH" terminoekin batera, honela kalkulatua: dagozkion zenbakizko kalifikazioen batezbesteko aritmetikoa eginez, eta, gero, emaitza horri foru agindu honen VII. eranskinean ezarritako baliokidetza aplikatuz.
b) Baldin eta baliozkotzea ahalbidetu duten atal, modulu edo esparruen kalifikazioak kualitatiboak badira eta ez badute zenbakizko baliokiderik, kalifikazio kualitatibo bat adieraziko da "BALGZLP" edo "BALHBH" terminoekin batera, honela kalkulatua:
- Kalifikazio kualitatiboak kuantitatibo bihurtuko dira, oinarri harturik foru agindu honen VIII. eranskineko taulan ezarritako baliokidetza.
- Kalifikazio kuantitatibo horien batezbesteko aritmetikoa eginen da.
- Lortutako batezbestekoa kalifikazio kualitatibo bihurtuko da, foru agindu honen VII. eranskinean ezarritako baliokidetza aplikatuz.
7. artikulua. Ebaluatzea eta kalifikatzea.
1. Kalifikazio egintzaren bidez, ikasleei kategoria bat esleitzen zaie eskala baten barruan, ebaluazio prozesuetan lortutako emaitzak kontuan hartuta.
2. Ikasle bakoitzari dagokionez, Komunikazio Esparrua, Gizarte Esparrua eta Zientzia-Teknologiaren Esparrua ebaluatu ondoren, epaimahaiko kideek esparru horietako bakoitzaren kalifikazioa zehaztuko dute.
3. Esparru bakoitzean lortutako emaitza ebaluazio aktan adieraziko da, kalifikazio eskala honen arabera: Gutxiegi (G), kalifikazio negatiboetarako; Nahikoa (N), Ongi (O), Oso ongi (OO) edo Bikain (B), kalifikazio positiboetarako.
4. Era berean, baldin eta ikaslea esparruren batera aurkezten ez bada, "EA" siglen bidez adieraziko da (Ez aurkeztua). Ondorio guztietarako, "EA" kalifikazioa negatibotzat hartuko da.
8. artikulua. Emaitzak argitaratzea eta erreklamazioak.
1. Kalifikazioak esleitu ondoren, epaimahaiak deialdiaren izapideen fitxan argitaratuko ditu emaitzak.
2. Esparruetako kalifikazioekin ados ez badaude, ikasleek idatziz aurkezten ahalko dute erreklamazioa, foru agindu honen 2. artikuluan aipatzen den ebazpenean ezarritako baldintzen arabera, epaimahaiburuaren aurrean, ebazpen horretan bertan zehaztutako epean.
1. Ebaluazio akta agiri ofiziala da, eta, gutxienez, honako hauek jasoko ditu: ikastetxearen identifikazio datuak, proba noiz egin den, proba horretan izena eman duten pertsonen identifikazio datuak, esparruen behin betiko kalifikazioak eta onartutako baliozkotzeak, bai eta titulazioari buruzko azken erabakia ere.
2. Probaren ebaluazio aktak artxibatu eginen dira, proba egin den ikastetxeko idazkaritzan.
3. Proban parte hartzen duten pertsonek egindako ariketak ikastetxean artxibatuko dira, indarrean dagoen araudiak ebaluazio tresnen kontserbazioari buruz ezarritako denboran.
10. artikulua. Titulua ziurtatzea eta ematea.
1. Derrigorrezko Bigarren Hezkuntzako graduatu titulua zuzenean lortzeko proba gainditutzat joko da kalifikazio positiboa lortzen bada titulu hori osatzen duten esparruetako bakoitzean foru agindu honetako 7.3 artikuluan ezarritakoaren arabera, bai eta ebaluazio aktan "BAL", "BALHBH" edo "BALGZLP" siglekin erregistratuta badaude ere (lehen kasuan, kalifikaziorik gabe, eta, beste bietan, kalifikazioarekin).
2. Proba egin den ikastetxeko zuzendaritzak kudeatuko eta izapidetuko du proba gainditu duten ikasleei Derrigorrezko Bigarren Hezkuntzako graduatu titulua emateko proposamena.
3. Proban parte hartu eta titulua lortzeko proposatuak izateko moduan dauden pertsona guztiek lortzen ahalko dute inguruabar hori jasotzen duen behin-behineko ziurtagiri indibidual bat, proba egin den ikastetxeko zuzendaritzari aldez aurretik eskatuta.
4. Era berean, beste ziurtagiri bat ere lortzen ahalko dute proban parte hartu duten pertsonek, proba egin den ikastetxeko zuzendaritzari aldez aurretik eskatuta. Ziurtagiri horretan, esparru bakoitzeko ebaluazio aktan erregistratutakoa jasoko da.
1. Oro har, epaimahai bakarra eratuko da, langileen araubide juridikoan eskumena duen zerbitzuko zuzendariaren ebazpen bidez izendatua eta helduentzako Oinarrizko Hezkuntzan eskumena duen zerbitzuko zuzendariak proposatua. Katedradunen kidegoko edo Bigarren Hezkuntzako irakasleen kidegoko karrerako irakasle funtzionarioek osatuko dute epaimahai hori. Haiekin batera, ordezkoak ere izendatuko dira.
2. Epaimahaia berbera izanen da urte bakoitzeko bi deialdietarako, lehendakari batek eta lau bokalek osatuko dute, eta haietan gazteenak eginen ditu idazkari lanak.
3. Oro har, epaimahai horretan Helduentzako Bigarren Hezkuntzako hiru esparruetako bakoitzeko irakasle bat egonen dela bermatuko da, gutxienez.
4. Hezkuntza Departamentuak erabakitzen ahalko du bi deialdietako batean epaimahai bat baino gehiago izan behar ote den. Kasu horretan, proba berbera izanen da hautagai guztientzat, zein epaimahaitarako izendatuta dauden kontuan hartu gabe, eta aldi berean eginen dute.
5. Artikulu honetako 1. apartatuan aipatzen den ebazpena deialdiaren izapideen fitxan argitaratuko da.
6. Epaimahaiak, bere ebaluazio lana ongi egiteko, aholkularien laguntza eskatzen ahalko dio Hezkuntza Departamentuari, halakorik behar duela iruditzen bazaio. Horretarako, langileen araubide juridikoan eskumena duen zerbitzuko zuzendariaren ebazpen bidez izendatuko dira, Helduentzako Oinarrizko Hezkuntzan eskumena duen zerbitzuko zuzendariak proposatuta.
12. artikulua. Epaimahaiaren eginkizunak.
Epaimahaiak honako eginkizun hauek izanen ditu:
a) Derrigorrezko Bigarren Hezkuntzako graduatu titulua zuzenean eskuratzeko probaren antolaketa, garapena, egiteko modua eta ebaluazioa koordinatzea.
b) Behar den konfidentzialtasuna gordetzea, epaimahaiko kide gisa dagozkion eginkizunak betetzean.
c) Proba prestatzea, eta proba ebaluatzeko eta kalifikatzeko irizpideak ezartzea, proba garatzeko eta kudeatzeko eskumena duen Hezkuntza Departamentuko unitateak gainbegiratuta.
d) Proba indarrean dagoen araudira egokitzen dela zaintzea.
e) Ardura hartzea deialdiko izapideen fitxan argitaratu daitezen hari buruzko informazio guztia eta onartu diren eta ez diren pertsonen behin-behineko eta behin betiko zerrendak; bai eta zerrenda horiei aurkeztutako erreklamazioak ebaztea ere.
f) Eskaera bat egitea, Hezkuntza Departamentuko unitate eskudunari, hezkuntza laguntzaren berariazko premia duten ikasle guztiek behar dituzten egokitzapenak zehaztu ditzan, eta egokitzapen horiek gauzatzea.
g) Hezkuntza laguntzaren berariazko premia duten ikasleek egindako egokitzapen eskaerei buruzko erreklamazioak ebaztea, eta, beharrezkoa denean, arlo horretan Hezkuntza Departamentuko unitate eskudunaren laguntza eskatzea.
h) Probara joan, eta hura behar bezala egiten dela zaintzea; aukera izanik proba egiten den bitartean iruzurrezko edozein jarduketa egiten dutenak proba horretatik kanpo uzteko.
i) Deialdiko izapideen fitxan komunikatzea zer datatan argitaratuko diren, zein diren erreklamazioak egiteko epeak, eta noiz eta nola jasoko diren ziurtagiriak.
j) Proba zuzentzea eta kalifikatzea, adierazitako epean, ariketak zuzentzeko ezarritako irizpideak aplikatuz.
k) Ardura hartzea probaren behin-behineko eta behin betiko emaitzak deialdiaren izapideen fitxan argitaratu daitezen, bai eta emaitza horiei aurkeztutako erreklamazioak ebaztea ere.
l) Epaimahaiak eginiko bilera guztien akta egitea.
m) Probaren emaitzei dagozkien aktak egitea.
n) Helduentzako Oinarrizko Hezkuntzan eskumena duen zuzendaritza nagusiak zehazten duen beste edozein eginkizun.
Lehenengo xedapen gehigarria. Espedienteen arteko lehia.
Nafarroako Foru Komunitatearen eskumen eremuko deialdi guztietan, Derrigorrezko Bigarren Hezkuntzako graduatu titulua zuzenean lortzeko proba egin duten ikasleen espediente akademikoak lehian sartu behar badira, eta deialdi horietan kalifikazio kualitatiboak kuantitatiboetara bihurtzeko eskalarik zehaztuta ez badago, eskala hau aplikatu beharko da: Gutxiegi (3), Nahikoa (5), Ongi (6), Oso ongi (7,5), eta Bikain (9). "BAL" terminoa ez da kontuan hartuko.
Bigarren xedapen gehigarria. Beste kalifikazio termino batzuk.
1. Baldin eta, probarako inskripzioa eta matrikulazioa egitean, ikasleak ziurtagiriren bat aurkezten badu, foru agindu hau ezarri baino lehenagoko datarekin, eta ziurtagiri horretan esparruren bat salbuetsita duela ageri bada, "SALB" edo antzeko terminoren batekin eta kalifikazioa kualitatibo edo zenbakizko batekin, ikasleak salbuespen hori ahalbidetu duten ikasketak egin izana ziurtatzen duen dokumentu ofiziala aurkeztu beharko du proban izena ematean, izan ikasketa horiek foru agindu honen III. eranskinean zehaztutakoak edo HBHkoak, jarraian azaldutakoaren arabera erregistratuta:
a) Salbuespenaren jatorria foru agindu honen III. eranskinean zehaztutako edozein ikasketa denean, "SALB" eta haren termino baliokideak baliozkotutzat erregistratuko dira, kalifikaziorik gabeko "BAL" terminoaz.
b) Salbuespenaren jatorria HBH denean, "SALB" eta haren termino baliokideak baliozkotutzat erregistratuko dira, "BALHGH" terminoaz, foru agindu honen 6.3 artikuluan ezarritakoaren arabera lortuko litzatekeen kalifikazio kualitatiboarekin.
2. Baldin eta, probarako inskripzioa eta matrikulazioa egitean, ikasleak ziurtagiriren bat aurkezten badu, foru agindu hau ezarri baino lehenagoko datarekin, eta ziurtagiri horretan esparruren bat salbuetsita duela ageri bada, "SALB" edo antzeko terminoren batekin, baina kalifikazioa kualitatibo edo zenbakizkorik gabe, termino horiek baliozkotutzat erregistratuko dira, kalifikaziorik gabeko "BAL" terminoaz, salbu eta ikasleak HBHn esparru horretan lorturiko kalifikazioa ageri den dokumentu ofizialen bat aurkezten badu. Kasu horretan, foru agindu honen 6.3 artikuluan xedatutakoaren arabera jokatuko da.
3. Baldin eta, probarako inskripzioa eta matrikulazioa egitean, ikasleak ziurtagiriren bat aurkezten badu, foru agindu hau ezarri baino lehenagoko datarekin, eta ziurtagiri horrek badio aurreko deialdiren batean esparruren bat gainditu duela, "ADG" edo antzeko terminoren batekin eta kalifikazio kualitatibo batekin, termino hori baliozkotutzat joko da, "BALGZLP" terminoarekin eta dagokion kalifikazio kualitatiboarekin. "ADG" terminoarekin doan kalifikazioa kuantitatiboa bada, "BALGZLP" terminoari erantsi beharko zaion kalifikazio kualitatiboa foru agindu honen IV. eranskina aplikatuz lortuko da.
4. Baldin eta, probarako inskripzioa eta matrikulazioa egitean, ikasleak ziurtagiriren bat aurkezten badu, foru agindu hau ezarri baino lehenagoko datarekin, eta ziurtagiri horrek badio aurreko deialdiren batean esparruren bat gainditu duela, "ADG" edo antzeko terminoren batekin eta kalifikazioa kualitatibo batekin, baina kalifikazioa kualitatibo edo zenbakizkorik gabe, termino hori baliozkotutzat joko da, "BALGZLP" terminoarekin eta Nahikoa (N) kalifikazioarekin, salbu eta ikasleak esparru horretan lorturiko kalifikazioa ageri den dokumentu ofizialen bat aurkezten badu. Kasu horretan, foru agindu honen 6.3 artikuluan xedatutakoaren arabera zehaztuko da "BALGZLP" terminoarekin joanen den kalifikazioa.
5. Xedapen gehigarri honetan eta foru agindu honen gainerako artikuluetan jasotzen ez diren terminoen eta baldintzen beste edozein kasutan, proba hori garatzeko eta kudeatzeko eskumena duen Hezkuntza Departamentuko unitateak zehaztuko du dagokion kalifikazio erregistroa.
Xedapen indargabetzaile bakarra. Arauak indargabetzea.
1. Indargabetuta geratzen da Hezkuntzako kontseilariaren urtarrilaren 14ko 3/2010 Foru Agindua, Nafarroako Foru Komunitatearen lurralde eremuan hemezortzi urtetik gorakoek Derrigorrezko Bigarren Hezkuntzako graduatu titulua zuzenean lortzeko proba libreak arautzen dituena.
2. Indargabetuta geratzen dira foru agindu honetan ezarritakoaren aurkako maila bereko edo apalagoko xedapen guztiak.
Azken xedapenetako lehenengoa. Aldaketa, Hezkuntza kontseilariaren uztailaren 3ko 54/2025 Foru Aginduan, Nafarroako Foru Komunitatean Helduentzako Oinarrizko Hezkuntzari dagozkion irakaskuntzen antolaketa, ezarpena eta ordutegia, eta irakaskuntza horietako ikasleen ebaluazioa, maila igoera eta titulazioa arautzen dituenean.
Apartatu bat gehitu zaio uztailaren 3ko 20ko 54/2025 Foru Aginduaren 27. artikuluari, 12.a, eta honela idatzita geldituko da:
"12. Artikulu honetan jaso ez den beste edozein termino eta baldintzatzaileri dagokionez, irakaskuntza horiek garatzeko eta kudeatzeko eskumena duen Hezkuntza Departamentuko unitateak erabakiko du nola jokatu HBHra sartzeko erregistroan eta ondorengo matrikulan."
Azken xedapenetako bigarrena. Aldaketa, Hezkuntza kontseilariaren apirilaren 11ko 40/2024 Foru Aginduan, ikasleak Nafarroako Foru Komunitateko ikastetxe publiko eta pribatu itunduetan onartzeko prozesua arautu eta garatzen duenean, funts publikoen bidezko irakaskuntzak egiteko, aurrez aurreko modalitatean, Lanbide Heziketako Sistemaren D eta E graduei eta Arte Plastikoetako eta Diseinuko lanbide ikasketei dagozkienak, eta orobat, ikastetxe publikoetan, ikastetxe pribatuetan eta entitateetan, Nafarroako Foru Komunitatean baimenduetan, aurrez aurreko modalitatean, Hezkuntza Departamentuak kudeatzen duen Lanbide Heziketako Sistemako A, B, eta C graduei dagozkien irakaskuntzak egiteko.
1. Apartatu bat aldatzen da apirilaren 11ko 40/2024 Foru Aginduaren 45. artikuluan (Oinarrizko mailako zikloetan sartzeko nota), 5. apartatua, eta honela idatzita geldituko da:
"5. Artikulu honen 2.etik 4.era bitarteko apartatuetan aipatzen diren sarbide notek ez dute aipatzen, ez DBHko ikasturtearen azken kalifikazioa, ez Lanbide Heziketa Bereziko zikloaren azken kalifikazioa, ez oinarrizko graduko zikloaren lehen ikasturtearen azken kalifikazioa. Oinarrizko mailako zikloetan onartzeko prozesu arruntean izena eman duen ikaslearen irakasle taldeak ematen duen kalifikazio bati egiten diote erreferentzia, ziklo horietan onartzeko prozesu arruntean lehiatzeko soilik, jarraian ezarritakoaren arabera:
a) Derrigorrezko Bigarren Hezkuntza egiten ari diren ikasleen kasuan, oinarrizko mailako zikloetara sartzeko nota jakintzagai edo eremu bakoitzeko irakasleek lehen bi ebaluazio saio partzialetan zehaztutako kalifikazioetatik lortzen da, aipatutako bi ebaluazio saioetan ikastaroko ebaluazio prozesua baloratzearen ondorioz. Bat etorriz ekainaren 12ko 53/2023 Foru Aginduarekin, hots, Nafarroako Foru Komunitatean Derrigorrezko Bigarren Hezkuntzan diharduten ikasleak ebaluatu, mailaz igo eta haiei tituluak emateko era arautzen duenarekin, kalifikazio horiek eta oinarrizko graduko zikloetara sartzeko notaren kalkulua ebaluazio saio espezifiko batean zehaztu eta eginen dira, eta ebaluazio horrek soilik oinarrizko graduko zikloetan izena eman duten ikasleei eraginen die.
b) Lanbide Heziketa Bereziko zikloren bat egiten ari diren ikasleen kasuan, oinarrizko mailako zikloetara sartzeko nota LHBko ziklo horretako lanbide modulu, esparru edo prestakuntzako irakasleek emaniko kalifikazioetatik lortzen da, ziklo bereko aurreko ikasturteetan eta ebaluazioko lehen bi saio partzialetan zehaztutako kalifikazioetatik, aipatutako ikasturteetan eta bi ebaluazio saioetan ikastaroko ebaluazio prozesua baloratzearen ondorioz. Kalifikazio horiek eta oinarrizko graduko zikloetara sartzeko notaren kalkulua ebaluazio saio espezifiko batean zehaztu eta eginen dira, eta ebaluazio horrek soilik oinarrizko graduko zikloetan izena eman duten ikasleei eraginen die.
c) Oinarrizko mailako zikloren baten lehen maila egiten ari diren ikasleen kasuan, oinarrizko mailako zikloetara sartzeko nota eremu ez-profesional eta lanbide modulu bakoitzeko irakasleek lehen bi ebaluazio saio partzialetan zehaztutako kalifikazioetatik lortzen da, aipatutako bi ebaluazio saioetan ikastaroko ebaluazio prozesua baloratzearen ondorioz. Kalifikazio horiek eta oinarrizko graduko zikloetara sartzeko notaren kalkulua ebaluazio saio espezifiko batean zehaztu eta eginen dira, eta ebaluazio horrek soilik oinarrizko graduko zikloetan izena eman duten ikasleei eraginen die.
Aurreko hiru egoeretan, oinarrizko mailako zikloetara sartzeko notaren ziurtagiria eginen da, eta matrikulatuta dauden ikasleek izena emateko eskaera egiten duten ikasturteko idazkariak emana."
2. Azpiapartatu bat gehitzen da apirilaren 11ko 40/2024 Foru Aginduaren 53. artikuluan (Lanbide Heziketako erdi mailako zikloetako sarbide nota), c) eta d) azpiapartatuen artean, c bis), eta honela idatzita geldituko da:
"c bis) Derrigorrezko Bigarren Hezkuntzako graduatu titulua lortu duten ikasleen kasuan, izan Helduen Bigarren Hezkuntza (HBH) edo DBH gradua zuzenean lortzeko proba gainditu dutelako, honako hau izanen da erdi mailako heziketa zikloetara sartzeko nota:
- HBHtik iristen direnen kasuan: HBHko 3. eta 4. mailako espediente akademikoa kontuan hartuta kalkulatutako batez besteko aritmetikoa izanen da sarbide nota.
- Hemezortzi urtetik gorakoentzako DBHko titulua zuzenean lortzeko probatik iristen direnen kasuan: proba horretan lortutako kalifikazioen batez besteko aritmetikoa izanen da sarbide nota.
Bi kasuetan, kontuan hartuko dira "BALHBH" (HBHn modulu bat gainditzeagatik baliozkotua) eta "BALGZLP" (18 urtetik gorakoentzako DBHko titulua zuzenean lortzeko proban esparru bat gainditzeagatik baliozkotua) terminoekin doazen kalifikazioak. "BAL" terminoa ez da kontuan hartuko.
Kalifikazio kualitatiboak zenbakizko kalifikazio kuantitatibo bihurtzeko, artikulu honen 5.a) apartatuan aipatzen den bihurketa eskala erabiliko da.
3. Aldaketa apirilaren 11ko 40/2024 Foru Aginduaren 2. eranskinean (Onarpen irizpideen balorazioa oinarrizko mailako zikloetako onarpen prozesuetan). "Curriculum programa egokitu bat egitea izen ematearen ikasturtean" lehentasun irizpideari 8 puntuko balorazioa esleitzen zaio.
Azken xedapenetako hirugarrena. Indarra hartzea.
Foru agindu honek indarra hartuko du Nafarroako Aldizkari Ofizialean argitaratu eta biharamunean.
I. ERANSKINA. HEZKUNTZA SISTEMA DESBERDINETAKO HELDUEN BIGARREN HEZKUNTZAREN (HBH) ETA DBHKO GRADUATU TITULUA ZUZENEAN LORTZEKO PROBAREN (GZLP) ARTEKO BALIOKIDETASUNEN TAULA
II. ERANSKINA. HEZKUNTZA SISTEMA DESBERDINETAKO DBHKO GRADUATU TITULUA ZUZENEAN LORTZEKO PROBAREN ETA HLOALOREN ARABERAKO DBHKO GRADUATU TITULUA ZUZENEAN LORTZEKO PROBAREN ARTEKO BALIOKIDETASUNAK
III. ERANSKINA. HEZKUNTZA SISTEMA DESBERDINETAKO IRAKASKUNTZEN ETA DBHKO GRADUATU TITULUA ZUZENEAN LORTZEKO PROBAREN (GZLP) ARTEKO BALIOKIDETASUNEN TAULA
IV. ERANSKINA. ZENBAKIZKO KALIFIKAZIOAK KALIFIKAZIO KUALITATIBO BIHURTZEKO TAULA
V. ERANSKINA. KALIFIKAZIO KUALITATIBOAK ZENBAKIZKO KALIFIKAZIO BIHURTZEKO TAULA
