(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

246/2023 FORU DEKRETUA, AZAROAREN 15EKOA, OSASUN DEPARTAMENTUAREN EGITURA ORGANIKOA EZARTZEN DUENA

BON N.º 244 - 23/11/2023

  I. KAPITULUA. XEDAPEN OROKORRAK

  II. KAPITULUA. OSASUN ZUZENDARITZA NAGUSIA

  1. ATALA. ESKUMENEN ESPARRU MATERIALA ETA EGITURA

  2. ATALA. HUMANIZAZIO, ASEGURAMENDU ETA DEPARTAMENTUARTEKO KOORDINAZIO ZERBITZUA

  3. ATALA. OSASUN ETA FARMAZIA ANTOLAMENDUAREN ETA IKUSKAPENAREN ZERBITZUAREN EGITURA

  4. ATALA. OSASUN PLANGINTZA, ESTRATEGIA ETA IKERKETARAKO ZERBITZUA

  III. KAPITULUA. IDAZKARITZA TEKNIKO NAGUSIA

Zioen azalpena

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean xedatutakoari jarraikiz, Nafarroako Gobernuari dagokio departamentu bakoitzaren egitura organikoa onestea.

Nafarroako Foru Komunitateko Lehendakariaren abuztuaren 17ko 10/2023 Foru Dekretuaren bidez, Nafarroako Foru Komunitateko Administrazioaren departamentuen egitura ezarri zen.

Era berean, abuztuaren 30eko 68/2023 Foru Dekretuaren bidez, Osasun Departamentuaren oinarrizko egitura ezarri zen.

Egokia da, orain, behar bezala garatzea Foru Komunitateko Administrazioaren departamentu bakoitzaren egitura.

Foru dekretu honen xedea da Osasun Departamentuaren egitura organiko berria garatzea.

Horrenbestez, Osasuneko kontseilariak proposaturik, eta Nafarroako Gobernuak bi mila eta hogeita hiruko azaroaren hamabostean egindako bilkuran harturiko erabakiarekin bat.

DEKRETATZEN DUT:

I. KAPITULUA. XEDAPEN OROKORRAK

1. artikulua . Osasun Departamentuaren eskumenen esparrua.

Osasun Departamentuak beteko ditu Nafarroako Foru Komunitateko Administrazioak gai hauetan esleituak dituen eskumenak:

a) Osasun publikoa.

b) Lan osasuna.

c) Osasun laguntza.

d) Osasuna babesteko eskubideak bermatzea.

e) Indarra duten xedapenek ematen dizkioten gainerako eskudantziak.

2. artikulua . Osasun Departamentua.

1. Osasun Departamentuko titularrak, foru dekretu honen 1. artikuluan zehaztutako eskumen esparruari loturik, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluan ezarritako eskudantziak izanen ditu, baita indarreko araudiak esleitzen dizkion beste eskumen guztiak ere.

2. Era berean, Osasun Departamentuko titularrari dagokio kide anitzeko organo hauetako buru izatea:

a) Nafarroako Osasunaren Kontseilua

b) Osasunbidea-Nafarroako Osasun Zerbitzuko Gobernu Kontseilua.

c) Nafarroako Osasun Publikoaren eta Lan Osasunaren Institutuko Gobernu Kontseilua.

3. Osasun Departamentuko titularrari sostengu politiko eta teknikoa emateko unitate gisa, eta zuzenean haren mende, kabinete bat dago departamentuan, Nafarroako Gobernuari eta Lehendakariari buruzko abenduaren 3ko 14/2004 Foru Legearen 19. artikuluari lotua dagoena.

3. artikulua . Osasun Departamentuaren antolaketa orokorra.

1. Osasun Departamentuak, bere titularraren goi zuzendaritzapean, honako organo hauek izanen ditu bere egituran:

a) Osasun Zuzendaritza Nagusia.

b) Idazkaritza Tekniko Nagusia.

2. Halaber, Osasun Departamentuari honako erakunde autonomo hauek atxikitzen zaizkio, eta bakoitza bere estatutuen bidez arautuko da:

a) Osasunbidea-Nafarroako Osasun Zerbitzua.

b) Nafarroako Osasun Publikoaren eta Lan Osasunaren Institutua; Osasun Zuzendaritza Nagusiari atxikitzen zaio.

3. Miguel Servet Fundazioa bere estatutuen bidez arautuko da. Nafarroako Foru Komunitateko Osasun Administrazioari sostengu zientifiko eta teknikoa emateko erakundea da, osasunaren arloko ezagutza sortu eta hedatzeko, ikerketa eta berrikuntza sustatu, bultzatu eta garatzeko, eta prestakuntza jardueretan laguntzeko.

4. Era berean, Osasun Departamentua arduratuko da Nafarroako Osasun Ikerketarako Institutuaren ikerketa egituren antolamenduaz eta koordinazio funtzionalaz. Institutu hori lankidetza publiko-pribatuko erakunde bat da, haren parte da Miguel Servet Fundazioa, eta Nafarroako Ospitale Unibertsitarioa da haren gune nagusia.

4. artikulua . Osasun Zuzendaritza Nagusiaren eskudantziak.

Foru dekretu honen 2. artikuluan ezarritakoa galarazi gabe, Osasun Zuzendaritza Nagusiak, departamentuko titularraren goi zuzendaritzapean eta foru dekretu honetan bakoitzari esleitutako esparru materialean, Nafarroako Foru Komunitateko Administrazioari buruzko eta foru-sektore publiko instituzionalari buruzko martxoaren 11ko 11/2019 Foru Legearen 31. eta 32. artikuluetan eta azken xedapenetako lehenbizikoan ezarritako eskudantziak izanen ditu eta, horietaz gainera, indarra duten xedapenek esleitzen dioten edo Ekonomia eta Ogasun Departamentuko titularrak agintzen dion beste edozein.

5. artikulua . Idazkaritza Tekniko Nagusiaren eskudantziak.

Osasun Departamentuko Idazkaritza Tekniko Nagusiak, foru dekretu honen 1. artikuluan zehaztu den eskumen esparruan, eta Osasun Departamentuko titularraren goi zuzendaritzapean, berari atxikita baitago zuzenean, honako eskudantzia hauek izanen ditu:

a) Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 33. artikuluan eta Idazkaritza Tekniko Nagusiak arautzen dituen otsailaren 21eko 29/2005 Foru Dekretuan ezarritakoak.

b) Genero ikuspegiaren zeharkakotasuna aplikatzea Osasun Departamentuaren politikak planifikatu, kudeatu eta ebaluatzean, bat etorriz Emakumeen eta Gizonen arteko Berdintasunari buruzko apirilaren 4ko 17/2019 Foru Legearekin.

c) Nafarroan desgaitasuna dutenei arreta emateari eta beren eskubideak bermatzeari buruzko azaroaren 28ko 31/2022 Foru Legearen arabera aritzea.

d) Informazio publikoa kudeatzea, Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen arabera.

e) Herritarren parte-hartzea, Nafarroako Parte-hartze Demokratikoari buruzko martxoaren 22ko 12/2019 Foru Legearen arabera.

f) Departamentuko gainerako organoei laguntzea informazioaren segurtasunari buruzko araudia aplikatzen, Nafarroako Foru Komunitateko Administrazioaren Datuak Babesteko eta Informazioaren Segurtasunerako Politikan zehaztutakoa betetzeko.

g) Departamentuko zerbitzuko zuzendaritzen eta burutzen titularren jabetza hartzeak tramitatzen laguntzea.

h) Indarrean dauden xedapenek esleitzen dizkioten edo Osasun Departamentuko titularrak agintzen dion beste edozein, eta horretarako behar diren ebazpenak emanen ditu.

6. artikulua . Zerbitzuen eskudantziak.

Zerbitzuek, departamentuko goragoko organoen zuzendaritzapean eta foru dekretu honetan bakoitzari esleitutako esparru materialean, bat etorriz martxoaren 11ko 11/2019 Foru Legearen 35. artikuluarekin, eginkizun hauek izanen dituzte: beren menpeko atalak edo unitate organikoak planifikatu, koordinatu, zuzendu eta kontrolatzea; prozedurak arindu, arrazionalizatu eta sinplifikatzeko printzipioak bultzatu eta sustatzea; eta, halaber, indarra duten xedapenek berariaz esleitzen dizkieten edo Departamentuko organo eskudunek haietan deskontzentratzen edo eskuordetzen dituzten beste edozein.

7. artikulua . Atalen eskudantziak.

Atalek, departamentuko goragoko organoen zuzendaritzapean eta foru dekretu honetan bakoitzari esleitutako esparru materialean, bat etorriz martxoaren 11ko 11/2019 Foru Legearen 37. artikuluarekin, eginkizun hauek izanen dituzte: beren eskumenen esparruko lanak gauzatzea eta goragoko nagusientzako txostenak eta proposamenak egitea; beren mendeko bulegoek eta unitateek egiten dituzten lanak koordinatzea, zuzentzea eta kontrolatzea; eta, halaber, departamentuko organo eskudunek agintzen dizkieten gainerako eginkizun guztiak betetzea.

II. KAPITULUA. OSASUN ZUZENDARITZA NAGUSIA

1. ATALA. ESKUMENEN ESPARRU MATERIALA ETA EGITURA

8. artikulua . Osasun Zuzendaritza Nagusiaren eskumenen esparru material eta funtzionala.

Osasun Zuzendaritza Nagusiak, bere kudeaketa esparruko gaietan, foru dekretu honetan ezarritako eskudantziak izanen ditu eta, berariaz, honako eginkizun hauek beteko ditu:

a) Bere eskumenen esparruan osasun agintea erabiltzea eta, norbanakoaren eta ororen osasunari doakionean, esku-hartze publikoko eginkizunak betetzea.

b) Plangintza eta ebaluazio estrategikoa, eta, bereziki, Osasun Plana, Osasun Departamentuaren Plan Estrategikoa eta izaera estrategikoko laguntza planak formulatzea.

c) Osasun baliabideen lurralde plangintza egitea.

d) Departamentuari atxikitako erakunde autonomoak eta Miguel Servet Fundazioa gainbegiratu eta kontrolatzea.

e) Osasunbidea-Nafarroako Osasun Zerbitzuarekin eta Nafarroako Osasun Publikoaren eta Lan Osasunaren Institutuarekin helburuen araberako kudeaketa-itunak proposatu, kontrolatu eta ebaluatzea, baita Miguel Servet Fundazioari eta Bidean enpresa publikoari eginkizunak esleitzea ere.

f) Osasun laguntza beste entitate pribatu eta publiko batzuekin ituntzeko politika orokorra ezartzea.

g) Osasun laguntza publikoa jasotzeko eskubidea aitortzea eta Osasun Prestazio Publikoen Katalogoa baliatzeko baldintzak kontrolatzea.

h) Nafarroako Gobernuak edo Osasun Departamentuak neurri mediko prebentiboen arloan ezartzen dituen osasun programa eta prestazioak zuzendu eta gainbegiratzea.

i) Herritarrek eta entitate publiko nahiz pribatuek osasunari dagokionez dituzten eskubideak eta betebeharrak bermatu eta zaintzeko sistemak garatzea.

j) Gizarteak eta profesionalek osasun sistema publikoan parte har dezaten sustatzea.

k) Pazientearen segurtasunerako eta osasun zentro eta zerbitzuetako prestazioen kalitaterako politikak bultzatzea.

l) Osasun zentroak, zerbitzuak, establezimenduak eta jarduerak -publikoak nahiz pribatuak- baimentzea.

m) Osasunaren zainketa eta esku-hartze publikoa osasunaren gainean eragina duten zentro eta jarduera publiko nahiz pribatuetan.

n) Kontrolatzea medikamentuen, produktu sanitarioen eta parekoen arloko jarduerak, zentroak, zerbitzuak, establezimenduak eta programak, barne hartuta publizitatea, saiakuntza klinikoak eta farmakozaintza.

ñ) Hileta-osasuna.

o) Toki entitateek osasun arloko udal eskumenetan jardutean, haiekin elkarlanean aritu eta, hala behar izanez gero, subsidiarioki esku hartzea.

p) Departamentuen arteko koordinazioa, baita osasun arloan diharduten erakundeekin eta entitate publiko eta pribatuekin ere.

q) Transplante, odol, organo eta ehun zentroak baimentzea eta kontrolatzea.

r) Nafarroan egiten diren organo transplanteen koordinazioarekin lotura duten eginkizunei elkarlana eskaintzea eta laguntza ematea.

s) Osasun arloko informazio eta inteligentzia sistemen plangintza estrategikoa, Osasunbidea-Nafarroako Osasun Zerbitzuarekin elkarlanean.

t) Prestakuntzaren eta ikerketaren arloko, eta oro har, osasunarekin lotutako gaien arloko laguntzak, hitzarmenak eta dirulaguntzak deitzea eta ematea.

u) Osasun zientzien arloko etengabeko prestakuntzako planak onestea, eta jarduerak, programak eta ikastetxeak egiaztatzea.

v) Graduaurreko, graduondoko eta espezializazioko prestakuntza, osasun sare publikoa erabiliko duten beste irakaskuntza-instituzio batzuekin koordinaturik.

w) Beharrak planifikatzea eta lanbide-gaitasunak egiaztatu eta ebaluatzeko sistemak garatzea.

x) Ezagutzaren kudeaketa, argitalpenen edizioa, osasun zientzien liburutegia eta informazio zientifikoaren beste iturri batzuk, osasun sistema publikoan ebidentzia zientifikoa, berrikuntza eta jardunbide egokienak sustatzeko.

y) Osasun zientzien arloko ikerketa, garapena eta berrikuntza, baimena ematea halakorik behar duten proiektuei eta erakundeekin eta entitateekin elkarlanean aritzea ikerketaren arloan.

z) Ordenamendu juridikoak Osasun Departamentuari esleitzen dizkion gainerako guztiak.

9. artikulua . Osasun Zuzendaritza Nagusiaren egitura.

Osasun Zuzendaritza Nagusiak zerbitzu hauek ditu bere egituran:

1. Humanizazio, Aseguramendu eta Departamentuarteko Koordinazio Zerbitzua.

2. Osasun eta Farmazia Antolamenduaren eta Ikuskapenaren Zerbitzua.

3. Osasun Plangintza, Estrategia eta Ikerketarako Zerbitzua.

2. ATALA. HUMANIZAZIO, ASEGURAMENDU ETA DEPARTAMENTUARTEKO KOORDINAZIO ZERBITZUA

10. artikulua . Humanizazio, Aseguramendu eta Departamentuarteko Koordinazio Zerbitzuaren eskumenen esparru materiala.

Humanizazio, Aseguramendu eta Departamentuarteko Koordinazio Zerbitzuak eginkizun hauek izanen ditu:

a) Herritarrek osasun arloan eta osasun zerbitzuen erabileran dituzten eskubide eta betebeharren bermea sustatzea, baita gardentasuneko eta gobernu oneko politikak ere.

b) Osasun sistema publikoa humanizatzeko plan eta estrategiak diseinatzea eta gauzatzea, Humanizazio Batzordearen esparruan.

c) Bizitzaren amaierako arretari buruzko plan eta estrategiak bultzatzea eta koordinatzea, eta Heriotza Duinaren Behatokia koordinatzea.

d) Gizarteak eta profesionalek osasun sistema publikoan parte hartzeko bideak garatzea.

e) Osasun laguntza publikoa jasotzeko eskubidearen gaineko aitortza kudeatzea.

f) Departamentuarteko koordinazioa, Osasun Departamentuaren ekintzak herritarrekin harremana duten gainerako departamentuen plan eta estrategiekin koordinatzeko.

g) Osasuna helburu duten elkarte eta erakunde publiko zein pribatuen ekintzak eta pazienteei eta haien familiei zuzendutako osasun programak garatzen dituzten gobernuz kanpoko erakundeen ekintzak koordinatzea.

h) Indarrean den ordenamenduak ezarri edo agintzen dion beste edozein eginkizun.

11. artikulua . Humanizazio, Aseguramendu eta Departamentuarteko Koordinazio Zerbitzuaren egitura.

1. Humanizazio, Aseguramendu eta Departamentuarteko Koordinazio Zerbitzuak atal hauek ditu bere egituran:

a) Humanizazio, Aseguramendu eta Parte-hartze Atala.

2. Orobat, aipatu zerbitzuari atxikiko zaio koordinazio soziosanitarioa.

12. artikulua . Humanizazio, Aseguramendu eta Partehartze Atalaren eskumenen esparru materiala.

Humanizazio, Aseguramendu eta Parte-hartze Atalak foru dekretu honetan ezarritako eginkizunak izanen ditu, honako arlo hauetan:

a) Osasun sistema publikoa humanizatzeko plan eta estrategiak bultzatzen eta kudeatzen laguntzea.

b) Heriotza Duinaren Behatokia eta bizitzaren amaierako arretari buruzko plan eta estrategiak koordinatzen laguntzea.

c) Aurretiazko borondateen erregistroa kudeatzea.

d) Herritarren parte-hartze soziala bideratzea, osasun zerbitzuen laguntza berritzeko eta antolamendua aldatzeko proiektuak diseinatzeko garaian, Osasunbidea-Nafarroako Osasun Zerbitzuarekin eta Nafarroako Osasun Publikoaren eta Lan Osasunaren Institutuarekin elkarlanean.

e) Pazienteei eta haien familiei zuzendutako osasun programak egiten dituzten elkarteekiko harremanekin loturiko eginkizunak betetzea.

f) Osasun laguntza emateko hitzarmen bereziak izapidetzea.

g) Gainerako departamentuen plan eta estrategietan eragiten duten ekintzak kudeatzen laguntzea.

h) Araudiak esleitzen dizkion edo Osasun Departamentuko titularrak agintzen dizkion beste batzuk.

13. artikulua . Koordinazio soziosanitarioa.

Koordinazio soziosanitarioak eginkizun hauek izanen ditu:

a) Baliabide soziosanitarioen sarea koordinatzea, hots, Osasun Departamentuaren eta Osasunbidea-Nafarroako Osasun Zerbitzua eta Nafarroako Osasun Publikoaren eta Lan Osasunaren Institutua erakunde autonomoen baliabide guztiek osatzen dutena.

b) Arreta soziosanitarioaren koordinazio estrategikoa, Eskubide Sozialetako, Ekonomia Sozialeko eta Enpleguko Departamentuarekin koordinatuta.

c) Antolamendu aldaketak bultzatzea, pertsonarengan zentratutako arretan oinarrituta, Osasunbidea-Nafarroako Osasun Zerbitzuarekin eta Nafarroako Osasun Publikoaren eta Lan Osasunaren Institutuarekin batera.

d) Araudiak esleitzen dizkion edo Osasun Departamentuko titularrak agintzen dizkion beste batzuk.

Koordinazio soziosanitarioaren lanpostua betetzen duen pertsona Osasun Departamentuko titularrak izendatu eta kargutik kenduko du, foru agindu bidez, Osasun Zuzendaritza Nagusiak proposatuta.

3. ATALA. OSASUN ETA FARMAZIA ANTOLAMENDUAREN ETA IKUSKAPENAREN ZERBITZUAREN EGITURA

14. artikulua . Osasun eta Farmazia Antolamenduaren eta Ikuskapenaren Zerbitzuaren eskumenen esparru materiala.

Osasun eta Farmazia Antolamenduaren eta Ikuskapenaren Zerbitzuak eginkizun hauek izanen ditu:

a) Pazientearen segurtasunerako eta osasun zentro eta zerbitzuetako prestazioen kalitaterako politikak garatzea.

b) Proposamenak egitea Osasun zentroak, zerbitzuak, establezimenduak eta jarduerak -publikoak nahiz pribatuak- baimentzeko, erregistratzeko, egiaztatzeko eta ikuskatzeko.

c) Osasun zentroak, zerbitzuak, establezimenduak eta jarduerak -publikoak nahiz pribatuak- ikuskatzea.

d) Osasunaren zainketa eta esku-hartze publikoa osasunaren gainean eragina duten zentro eta jarduera publiko nahiz pribatuetan.

e) Arautzea medikamentuen, produktu sanitarioen eta parekoen arloko jarduerak, zentroak, zerbitzuak, establezimenduak eta programak, barne hartuta publizitatea eta saiakuntza klinikoak.

f) Farmazia antolamenduaren arloko plangintza eta ekintzak.

g) Farmazia zerbitzuak, osasun establezimenduak, gizakientzako eta albaitaritzarako medikamentuak banatzen dituzten entitateak eta osasun produktuen fabrikatzaileak eta banatzaileak antolatzea, ikuskatzea, haiek baimentzeko eta egiaztatzeko proposamenak egitea, eta haiei buruzko informazio sistemak, eta, orobat, farmazia laborategiak eta farmazia erabilera duten printzipio aktiboak fabrikatzen dituzten enpresak ikuskatzea eta kontrolatzea.

h) Gizakientzako medikamentuen gaineko farmakozaintzarekin loturiko jarduketak, barne hartuta medikamentuen ondorio kaltegarrien jarraipena eta jakinarazpena eta osasun produktuen zaintza, baita gai horrekin loturik ezartzen diren programa eta jarduketen jarraipena egitea ere.

i) Indarrean den ordenamenduak ezarri edo agintzen dion beste edozein eginkizun.

15. artikulua . Osasun eta Farmazia Antolamenduaren eta Ikuskapenaren Zerbitzuaren egitura.

Osasun eta Farmazia Antolamenduaren eta Ikuskapenaren Zerbitzuak atal hauek ditu bere egituran:

a) Osasun Jardueren Ikuskapenerako Atala.

b) Farmazia Antolamendu eta Ikuskapenaren Atala.

c) Farmakozaintzaren Kontrolerako Atala.

16. artikulua . Osasun Jardueren Ikuskapenerako Atalaren eskumenen esparru materiala.

Osasun Jardueren Ikuskapenerako Atalak foru dekretu honetan ezarritako eginkizunak izanen ditu entitate publiko nahiz pribatuen osasun zentro, zerbitzu, establezimendu eta jarduerei dagokienez, osasunaren eta osasun prestazioaren arloan; hauek, bereziki:

a) Osasun zentro, zerbitzu eta jarduerak ikuskatzea eta baimentzeko eta egiaztatzeko proposamenak egitea, aintzat hartuta zer betekizun ezarri ziren haiek sortzeko, funtzionatzeko, lekualdatzeko edo, kasua denean, ixteko eta, orobat, haien egitura edo osasun jarduera aldatzeko.

b) Eguneratuta mantentzea Osasun Departamentuko Osasun Zentro, Zerbitzu eta Establezimenduen Erregistroa, osasun zentro eta zerbitzuei dagokienez, bat eta zentro eta zerbitzu horiei loturiko Osasuneko Profesionalen Erregistroa ere.

c) Asistentziaren etikako batzordeen eta ikerketaren etikako batzordeen egiaztapena egitea.

d) Ziurtagiri tekniko sanitarioak ematea Nafarroan osasun garraioan aritzen diren ibilgailuei.

e) Baimenak ematea hilotzak lekualdatzeko eta, hala dagokionean, desobiratzeko, hileta osasunari dagokionez.

f) Txostenak egitea beilatokiak, tanatorioak eta errausketa labeak ezartzeari eta hilerriak eraberritu eta ixteari buruz eta, halaber, Nafarroako Hileta Enpresen Erregistroa mantendu eta eguneratzea.

g) Osasun zentro eta zerbitzuen eta, orobat, osasun jardueren publizitatea kontrolatzea eta, hala badagokio, baimentzea.

h) Herritarrek eta erakunde publiko eta pribatuek dituzten eskubideak eta betebeharrak zaintzea, osasun zentro eta zerbitzuek egiten dituzten osasun jarduerei dagokienez.

i) Desfibriladore automatikoa duten entitateen erregistroa eta gailu horiek erabiltzeko prestakuntza ematen duten entitateen erregistroa mantentzea, indarreko araudiari jarraituz.

j) Lanbideetan aritzeko gaikuntza ematea, dagokion eskumenen esparruan.

k) Arreta espezializatuari buruzko informazio sistemak, Ministerioak eskatzen dituenak, kudeatu eta mantentzea.

l) Indarrean den ordenamenduak ezarri edo agintzen dion beste edozein eginkizun.

2. Organoen transplanteen koordinazioaren gaineko eginkizunei dagokienez, Osasun Departamentuko titularrak esleitzen ahalko dizkie ataleko langileei edo Osasunbidea-Nafarroako Osasun Zerbitzuari atxikitakoei, dagokion foru agindua onetsita.

17. artikulua . Farmazia Antolamendu eta Ikuskapenaren Atalaren eskumenen esparru materiala.

Farmazia Antolamendu eta Ikuskapenaren Atalak foru dekretu honetan ezarritako eginkizunak izanen ditu, farmazia zentro, zerbitzu eta establezimendu publiko eta pribatuei eta osasun produktuei dagokienez, bai eta medikamentuen, osasun produktuen, produktu kosmetikoen eta norberaren zainketarako produktuen arloan ere, honako honen arabera:

a) Farmazia zerbitzuak eta osasun establezimenduak antolatzea, ikuskatzea, haiek baimentzeko eta egiaztatzeko proposamenak egitea, eta haiei buruzko informazio sistemak.

b) Gizakientzako eta albaitaritzarako medikamentuak banatzen dituzten entitateak eta osasun produktuen fabrikatzaileak eta banatzaileak antolatzea, ikuskatzea eta haiek baimentzeko proposamenak egitea, eta, orobat, farmazia laborategiak ikuskatzea eta kontrolatzea.

c) Medikamentuen, osasun produktuen, produktu kosmetikoen eta norberaren zainketarako produktuen merkatua ikuskatzea eta kontrolatzea.

d) Medikamentuen, osasun produktuen eta produktu kosmetikoen arloan jardunbide egokiak betetzen direla egiaztatzeko ikuskapena.

e) Osasun produktuak zaintzea eta kosmetozaintza. Osasun produktuekin eta produktu kosmetikoekin lotutako gorabehera kaltegarrien jakinarazpenak kudeatzea.

f) Medikamentuen segurtasunarekin, kalitatearekin, hornidura arazoekin edo bestelakoekin lotutako farmazia alertak kudeatzea eta zabaltzea, bai eta osasun produktuekin, produktu kosmetikoekin eta norberaren zainketarekin lotutakoak ere.

g) Farmazia establezimenduen, medikamentuen eta osasun produktuen publizitatea kontrolatzea eta, hala badagokio, baimentzea.

h) Osasun Zentro, Zerbitzu eta Establezimenduen Erregistro Ofiziala kudeatzea, farmazia zerbitzuei eta osasun establezimenduei dagokienez, bai eta Osasuneko Profesionalen Erregistro Ofiziala ere, zerbitzu eta establezimendu horiei dagokienez.

i) Etengabeko farmazia arreta programatzea eta jarraipena egitea.

j) Indarrean den ordenamenduak ezarri edo agintzen dion beste edozein eginkizun.

18. artikulua . Farmakozaintzaren Kontrolerako Atalaren eskumenen esparru materiala.

Farmakozaintzaren Kontrolerako Atalak eginkizun hauek izanen ditu:

a) Medikamentuen ondorio kaltegarrien susmoei buruzko jakinarazpenak kudeatzea eta ebaluatzea.

b) Medikamentuekin loturiko arriskuak prebenitzera zuzendutako ekintzak, azterlanak edo programak sustatzea eta gauzatzea.

c) FEDRA datu-basea eta ondorio kaltegarrien susmoekin loturiko beste datu-base batzuk kudeatzea, segurtasun seinaleak atzemateko eskura daudenak.

d) Osasuneko profesionalen prestakuntza sustatzea eta bultzatzea, farmakozaintza eta farmakoepidemilogia gaietan.

e) Medikamentuen eta Osasun Produktuen Espainiako Agentziarekin (AEMPS) lankidetzan aritzea medikamentuen arriskuen ebaluazioari eta kudeaketari buruzko programa eta azterlanak ezartzeko eta garatzeko, Gizakientzako Medikamentuen Segurtasunaren Batzordeak hartutako erabakiekin bat etorriz.

f) Indarrean den ordenamenduak ezartzen duen edo agintzen zaion beste edozein eginkizun betetzea.

4. ATALA. OSASUN PLANGINTZA, ESTRATEGIA ETA IKERKETARAKO ZERBITZUA

19. artikulua . Osasun Plangintza, Estrategia eta Ikerketarako Zerbitzuaren eskumenen esparru materiala.

1. Osasun Plangintza, Estrategia eta Ikerketarako Zerbitzuak eginkizun hauek izanen ditu:

a) Osasun sistema publikoko zentroen eta eremuen prestakuntza plan koordinatuaren plangintza estrategikoa.

b) Osasun esperientzien zentroa kudeatzea eta koordinatzea, osasun kultura segurua, gizatiarra eta pazientearengan zentratua sustatzeko.

c) Osasun Departamentuaren etengabeko prestakuntzako irakaskuntza-plana planifikatzea, kudeatzea eta ebaluatzea.

d) Osasun prestakuntzaren arloko laguntzen eta dirulaguntzen deialdiak kudeatzea.

e) Osasuneko lanbideen jarduerak, programak eta etengabeko prestakuntzako zentroak egiaztatze arloan indarra duten legeek Nafarroako Foru Komunitateari ematen dizkioten eskumenak bere gain hartzea, eta Nafarroako Etengabeko Prestakuntzarako Batzordeari behar duen laguntza ematea.

f) Osasun zientzietako prestakuntza espezializatuaren arloan, indarra duten legeek Nafarroako Foru Komunitateari ematen dizkioten eskumenak bere gain hartzea. Prestakuntza espezializatuko zentroen, unitateen eta postuen plangintza; egiaztapen eskaeren txostena eta izapidetzea; eta irakaskuntza batzordeekin eta egiaztatutako zentroekin koordinatzea.

g) Osasun Departamentuaren mendeko osasun antolamenduen lankidetza sustatzea eta koordinatzea, unibertsitateko gradu eta graduondoko irakaskuntza praktikoan eta osasun arloko heziketa zikloetan (lanbide heziketa).

h) Unibertsitateekin eta beste irakaskuntza erakunde batzuekin izenpetzen diren irakaskuntza praktikorako lankidetza-hitzarmenak kontrolatzea eta haien jarraipena egitea.

i) Lanbide gaitasunak egiaztatzeko sistemak garatzea eta osasuneko langileen etorkizuneko beharrei buruzko plangintza egitea.

j) Osasunaren, Kontsumoaren eta Gizarte Ongizatearen Ministerioarekin koordinatzea prestakuntza eta osasun lanbideen garapena.

k) Osasun ikerketa eta berrikuntzaren arloko estrategiak lantzea eta ezartzea, eta horien jarraipena egiteko helburuak eta adierazleak ezartzea.

l) Departamentuari atxikitako Medikamentuen Gaineko Ikerkuntza Batzorde Etikoaren (CEIm) funtzionamendu egokia bermatzea.

m) Ikerketa biomedikorako laguntzak kudeatzea eta Osasun Departamentuaren berariazko baimena behar duten ikerketa proiektuak ebaluatzea.

n) Berrikuntza helburuak eta ildoak zehaztea eta berrikuntza esperientziak sustatzea eta ebaluatzea, Espainiako eta nazioarteko I+G+b arloko planekin koordinatuta.

ñ) Osasun zientzien arloko berrikuntza teknologikoko helburuak eta ildoak ezartzea, Osasun Departamentuak finantzatzen dituenak eta Espainiako eta nazioarteko I+G+b planen barnean sartzen direnak.

o) Osasun sistema publikoko Osasun Zientzien Liburutegia kudeatzea, baita argitalpenak eskuratzea ere, zientziari buruzko informazio-iturriak batuz ezagutzaren hedapenari laguntzeko.

p) Osasun Departamentuak sustatutako argitalpen zientifikoen edizioa kudeatzea.

q) Nafarroako Osasun Planaren zuzendaritza, koordinazioa, jarraipena eta ebaluazioa.

r) Osasunerako eta osasun arloko esku-hartzerako estrategiak planifikatzea, barnean sartuta Osasunaren, Kontsumoaren eta Ongizatearen Ministerioaren osasun estrategien koordinazioa eta sustapena.

s) Osasun prestazio publikoen katalogoa mantentzea eta eguneratzea.

t) Osasun baliabideen lurralde banaketa eta osasun eskualdeak planifikatzea.

u) Osasun sisteman progresiboki ezartzeko laguntza-planak egiten laguntzea, departamentuko beste zuzendaritza batzuekin koordinatuta.

v) Osasunaren, Kontsumoaren eta Gizarte Ongizatearen Ministerioaren Haurdunaldien Borondatezko Etenduren Erregistroa kudeatzea eta mantentzea. Urteko txostenak eta memoriak egitea.

w) Osasun Departamentuaren jarduera estatistikoa koordinatzea. Departamentuko adierazleak zehaztu eta eguneratzea, osasun sistemaren emaitza orokorrak ebaluatzeko eta haien kontu emateko.

x) Emaitzen eta Kontu-ematearen Behatokia garatzea.

y) Nafarroako Foru Komunitateko zentro publiko eta pribatuetako datuen gutxieneko oinarrizko multzoaren koordinazioa, kontrola eta jarraipena.

z) Indarrean den ordenamenduak ezarri edo agintzen dion beste edozein eginkizun.

20. artikulua . Osasun Plangintza, Estrategia eta Ikerketarako Zerbitzua.

Osasun Plangintza, Estrategia eta Ikerketarako Zerbitzuak atal hauek ditu bere egituran:

a) Osasun Plangintza eta Estrategiarako Atala.

b) Prestakuntza Atala.

c) Ikerketa eta Berrikuntza Atala.

21. artikulua . Osasun Plangintza eta Estrategiarako Atalaren eskumenen esparru material eta funtzionala.

Osasun Plangintza eta Estrategiarako Atalak eginkizun hauek izanen ditu:

a) Osasunerako eta osasun arloko esku-hartzerako plangintza estrategikoa.

b) Osasun prestazio publikoen katalogoa mantentzea.

c) Lurralde plangintza eta antolamendua.

d) Koordinatzea departamentuaren estatistika jarduera eta osasun zentro publiko eta pribatuetako datuen gutxieneko oinarrizko multzoa.

e) Indarrean den ordenamenduak ezarri edo agintzen dion beste edozein eginkizun.

22. artikulua . Prestakuntza Atalaren esparru material eta funtzionala.

Prestakuntza Atalak foru dekretu honetan ezarritako eginkizunak izanen ditu, honako arlo hauetan:

a) Irakaskuntza-planak planifikatu, antolatu eta koordinatzea.

b) Prestakuntzaren berrikuntza, osasun esperientzien zentroa kudeatzea eta prestakuntzaren kudeaketa integratua bultzatzea.

c) Etengabeko prestakuntzaren arloko laguntzak eta dirulaguntzak kudeatzea.

d) Egiaztapena, eta prestakuntza espezializatuaren arloko eskumenak erabiltzea.

e) Graduko, graduondoko edo lanbide heziketako irakaskuntza praktikorako prestakuntza hitzarmenak kudeatzea.

f) Gaitasun profesionalak egiaztatzeko sistemak garatzea, Osasun Ministerioarekin koordinatuta.

23. artikulua . Ikerketa eta Berrikuntza Atalaren esparru material eta funtzionala.

Ikerketa eta Berrikuntza Atalak foru dekretu honetan ezarritako eginkizunak izanen ditu, honako arlo hauetan:

a) Osasun zientzien arloko ikerketaren sustapena eta orientazioa, Miguel Servet Fundazioarekiko koordinazioa barne.

b) Ezagutza eta kalitate zientifikoaren sustapena eta hedapena.

c) Osasun Zientzien Liburutegia kudeatzea.

d) Argitalpenen edizioa, eta beste departamentu batzuekiko elkarlana osasunarekin loturiko berrikuntza estrategietan.

III. KAPITULUA. IDAZKARITZA TEKNIKO NAGUSIA

24. artikulua . Idazkaritza Tekniko Nagusiaren egitura.

Idazkaritza Tekniko Nagusiak atal hauek ditu bere egituran:

a) Araubide Juridikoaren Atala.

b) Kudeaketa Administratiboaren eta Modernizazioaren Atala.

25. artikulua . Araubide Juridikoaren Atalaren esparru material eta funtzionala.

Araubide Juridikoaren Atalak eginkizun hauek izanen ditu:

a) Nahitaezko txosten juridikoak egitea beharrezko duten espedienteetan, bai eta agintzen zaizkion bestelako txostenak ere.

b) Departamentuaren egintza eta xedapenen kontra jarritako administrazio errekurtsoen ebazpen proposamenak prestatzea.

c) Departamentuaren eskumeneko arau eta xedapenen proiektuak prestatzen eta haien gaineko txostenak egiten laguntzea.

d) Departamentuko organo tekniko eta administratiboei aholkularitza juridikoa ematea.

e) Departamentuari atxikitako kide anitzeko organoen idazkaritzei dagozkien eginkizunak betetzea.

f) Departamentuari eragiten dion eta Nafarroan aplikatzekoa den Nafarroako, Estatuko eta Europar Batasuneko legedia biltzea eta eguneratzea.

g) Arlo juridikoko funts bibliografikoak eratzea eta mantentze-lanez arduratzea.

h) Departamentuaren intereseko legedia, jurisprudentzia eta doktrina aztertzea.

i) Aholkularitza juridikoa ematea departamentuko organo tekniko eta administratiboei.

j) Departamentuko babesletzaren menean jartzen diren fundazioekin zerikusia duten izaera juridikoko eginkizunak gauzatzea.

k) Aholkularitza juridikoa ematea Nafarroako Foru Komunitateko Administrazioaren datuak babesteko eta informazioaren segurtasunerako politikaren arloan, betiere Osasun Departamentuaren eremuaren barnean, informazioaren segurtasunari buruzko indarreko araudia betetzen dela segurtatzeko eta zaintzeko, barnean dela datu pertsonalen babesa.

l) Idazkaritza Tekniko Nagusiaren arauak eta jurisprudentzia biltzen dituzten artxiboen jarraipena egin eta eguneratzea.

m) Idazkaritza Tekniko Nagusiari dagozkion eginkizunetatik, izaera juridikoa dutenak.

n) Bere helburuak egoki betetzeko agintzen zaizkion gainerako eginkizunak.

26. artikulua . Kudeaketa Administratiboaren eta Modernizazioaren Atalaren esparru material eta funtzionala.

Kudeaketa Administratiboaren eta Modernizazioaren Atalak eginkizun hauek izanen ditu:

a) Idazkaritza Tekniko Nagusiari langileen arloan esleitutako gaien kudeaketa administratiboa.

b) Aurrekontuen eta kontabilitatearen arloko kudeaketa.

c) Material suntsigarri eta inbentariagarria erostea.

d) Tresna korporatiboen definizio funtzionala.

e) Prozeduren modernizazioa, diseinua, sinplifikazioa eta hobekuntza.

f) Administrazio elektronikoaren informazio sistemak kudeatzea eta aplikatzea eta administrazioa sinplifikatzea.

g) Herritarren arreta eta parte-hartzea, hainbat kanalen bitartez.

h) Departamentuaren jardueraren plangintza eta ebaluazioa koordinatzea irisgarritasun unibertsalaren arloan, eta departamentuko webguneen eta gailu mugikorretarako aplikazioen irisgarritasunerako unitate arduradun delegatuaren eginkizunak betetzea.

i) Genero ikuspegiaren zeharkakotasuna aplikatzearekin loturiko eginkizunak gauzatzea Osasun Departamentuaren politikak planifikatu, kudeatu eta ebaluatzean, bat etorriz Emakumeen eta Gizonen arteko Berdintasunari buruzko apirilaren 4ko 17/2019 Foru Legearekin.

j) Gai tekniko-administratiboen, ekonomikoen eta kontabilitatearen gainean Idazkaritza Tekniko Nagusiari esleitzen zaizkion eginkizunak.

k) Nafarroako Arartekoaren aurrean aurkeztutako kexekin loturiko espedienteak izapidetzea, kexak osasunaren arlokoak direnean.

l) Osasunaren arloko informazio publikoa kudeatzea, Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen arabera.

m) Idazkaritza Tekniko Nagusiak agintzen dion beste edozein.

Lehen xedapen gehigarria. Eskumenak deskontzentratzeko baldintza orokorrak.

Indarrean dagoen araudiak administrazio organo bati esleitutako eskumenen titulartasuna eta erabilera hierarkikoki mendekoak diren organoetan deskontzentratzen ahalko dira, xedapen orokor baten bidez, zeina Nafarroako Aldizkari Ofizialean argitaratuko baita, hargatik eragotzi gabe eskumenak esleitzeko arauetan bertan zehaztutako betekizunak betetzea.

Bigarren xedapen gehigarria. Deskontzentrazioa.

1. Osasun Zuzendaritza Nagusiaren esku deskontzentratzen dira ondoko eskudantzia hauen titulartasuna eta erabilera:

a) Kontratu Publikoei buruzko apirilaren 13ko 2/2018 Foru Legearen zortzigarren xedapen gehigarrian xedatutakoari jarraikiz, kontratuen gainean Osasun Departamentuko titularrari dagozkion ahalmenak erabiltzea, foru lege horren bederatzigarren xedapen gehigarrian aipatzen diren kontratuen gainekoak izan ezik, horiek Nafarroako Gobernuaren baimena behar baitute.

b) Osasun arloko arau-hausteengatik zehapen espedienteak irekitzea, ebaztea eta, kasua bada, zehapenak jartzea, 30.000 eurotik beherakoak badira.

2. Osasun Departamentuko titularrak indarrik gabe uzten ahalko du xedapen gehigarri honetan aipatzen diren eskumenen deskontzentrazioa, Nafarroako Aldizkari Ofizialean argitaratu beharko den foru agindu baten bidez.

Hirugarren xedapen gehigarria. Koordinazio soziosanitarioa.

Koordinazio soziosanitarioaren figura Humanizazio, Aseguramendu eta Departamentuarteko Koordinazio Zerbitzuari atxikitzen zaio, eta zerbitzuko zuzendari lanpostuari dagokion ordainsaria aitortuko zaio.

Laugarren xedapen gehigarria. Izendapenak.

Honako izendapen hauek berresten dira, egin ziren baldintza berberetan: Herritartasunaren, Aseguramenduaren eta Bermeen Zerbitzuko zuzendariarena, aurrerantzean Humanizazio, Aseguramendu eta Departamentuarteko Koordinazio Zerbitzua deituko baita; Osasun arloko Herritartasunaren eta Aseguramenduaren Ataleko buruarena, aurrerantzean Humanizazio, Aseguramendu eta Parte-hartze Atala deituko baita; Osasun Zerbitzuen Plangintza, Antolamendu eta Kontratazio Ataleko buruarena, aurrerantzean Osasun Plangintza eta Estrategiarako Atala deituko baita; Ikerketarako, Berrikuntzarako eta Ezagutza Kudeatzeko Ataleko buruarena, aurrerantzean Ikerketa eta Berrikuntza Atala deituko baita; eta Espedienteen Tramitazioaren eta Laguntza Juridikoaren Ataleko buruarena, aurrerantzean Araubide Juridikoaren Atala deituko baita.

Bosgarren xedapen gehigarria. Prestasun osoko eta erabateko dedikazioko araubidea.

Erabateko dedikazioko osagarria aitortuko zaie Farmazia Antolamendu eta Ikuskapenaren Atalari eta Farmakozaintzaren Kontrolerako Atalari atxikitako mediku eta farmazialarien lanpostuei, Foru Komunitateko Administrazioaren eta haren erakunde autonomoen plantilla organikoa onesten duen uztailaren 27ko 100/2005 Foru Dekretuak ezartzen duen gisan.

Seigarren xedapen gehigarria. Unitateak kentzea.

Unitate hauek kentzen dira:

Plangintzarako, Ebaluaziorako eta Ezagutza Kudeatzeko Zerbitzua amortizatzen da, Osasun Plangintza, Estrategia eta Ikerketarako Zerbitzua sortzeko.

Osasun Zerbitzuen Plangintza, Antolamendu eta Kontratazio Atala amortizatzen da, Osasun Plangintza eta Estrategiarako Atala sortzeko, eta Osasun Plangintza, Estrategia eta Ikerketarako Zerbitzuari atxikitzen zaio.

Ikerketarako, Berrikuntzarako eta Ezagutza Kudeatzeko Atala amortizatzen da, Ikerketa eta Berrikuntza Atala sortzeko, eta Osasun Plangintza, Estrategia eta Ikerketarako Zerbitzuari atxikitzen zaio.

Osasun arloko Herritartasunaren, Aseguramenduaren eta Bermeen Zerbitzua kentzen da, Humanizazio, Aseguramendu eta Departamentuarteko Koordinazio Zerbitzua sortzeko amortizatzen baita.

Osasun arloko Herritartasunaren eta Aseguramenduaren Atala kentzen da, Humanizazio, Aseguramendu eta Parte-hartze Atala sortzeko amortizatzen baita, eta Humanizazio, Aseguramendu eta Departamentuarteko Koordinazio Zerbitzuari atxikitzen zaio.

Espedienteen Tramitazioaren eta Laguntza Juridikoaren Atala kentzen da, atal berri bat sortzeko amortizatzen baita, Araubide Juridikoaren Atala izenekoa, Osasuneko Idazkaritza Tekniko Nagusiari atxikia.

Zazpigarren xedapen gehigarria. Humanizazio, Aseguramendu eta Partehartze Ataleko burutza betetzeko baldintzak.

Humanizazio, Aseguramendu eta Parte-hartze Ataleko burutza betetzeko baldintza izanen da A edo B mailak20o osasun lanbide batean aritzea gaitzen duen titulua edo gizarte laneko gradu titulua izatea edo, bestela, osasun kudeaketako teknikari lanpostu bat betetzea.

Zortzigarren xedapen gehigarria. Araubide Juridikoaren Ataleko burutza betetzeko baldintzak.

Burutza betetzeko baldintza izanen da zuzenbideko lizentziadun titulua eskatzen duen A mailako lanpostua izatea.

Xedapen iragankor bakarra. Unitateak bere horretan uztea.

Foru dekretu hau garatzeko neurriak hartu bitartean, atalarena baino maila txikiagokoak diren unitate organikoek berdin segituko dute eta oraingo izenari eta eginkizunei eutsiko diete. Behin-behinekoz egitura berriko organoei atxikiko zaizkie, orain arte betetzen zituzten eginkizunen arabera.

Administrazio Aferetarako Bulegoa Osasun eta Farmazia Antolamenduaren eta Ikuskapenaren Zerbitzuari atxikiko zaio.

Xedapen indargabetzaile bakarra. Arauak indargabetzea.

Indarrik gabe uzten dira 269/2019 Foru Dekretua, urriaren 30ekoa, Osasun Departamentuaren egitura organikoa ezartzen duena, 284/2000 Foru Dekretua, abuztuaren 21ekoa, Nafarroako Gizarte eta Osasun Laguntzako Planaren koordinatzailearen postua sortzen duena, eta foru dekretu honetan xedaturikoari aurka egiten dioten maila bereko edo beheragoko xedapen guztiak.

Azken xedapenetako lehena. Aurrekontu aldaketak.

Ahalmena ematen zaio Ekonomia eta Ogasun Departamentuko titularrari foru dekretu honetan ezarritakoa betetzeko beharrezkoak diren aurrekontu-aldaketak egin ditzan.

Azken xedapenetako bigarrena. Garatzeko ahalmenak.

Ahalmena ematen zaio Osasun Departamentuko titularrari foru dekretu honetan ezarritakoa garatzeko beharrezkoak diren xedapenak eman ditzan.

Azken xedapenetako hirugarrena. Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Gobierno de Navarra

Contacte con nosotros | Accesibilidad | Aviso legal | Mapa web