(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

240/2023 FORU DEKRETUA, AZAROAREN 15EKOA, EUSKARABIDEA-EUSKARAREN NAFAR INSTITUTUA ERAKUNDE AUTONOMOAREN ESTATUTUAK ONESTEN DITUENA

BON N.º 244 - 23/11/2023

  ERANSKINA. EUSKARABIDEAEUSKARAREN NAFAR INSTITUTUA ERAKUNDE AUTONOMOAREN ESTATUTUAK

  I. TITULUA. IZAERA, ATXIKIPENA ETA ESKUMENAK

  II. TITULUA. EGITURA ORGANIKOA

  I. KAPITULUA. ZUZENDARITZA ORGANOAK

  II. KAPITULUA. GOBERNU KONTSEILUA

  III. KAPITULUA. KUDEAKETAKO ZUZENDARITZA

  IV. KAPITULUA. ZERBITZUAK ETA ATALAK

  1. ATALA. EUSKARA ADMINISTRAZIO PUBLIKOETAN GARATZEKO ZERBITZUA

  2. ATALA. HIZKUNTZA BALIABIDEEN ZERBITZUA

  3. ATALA. EUSKARAREN SUSTAPENAREN ETA PLANGINTZAREN ZERBITZUA

  III. TITULUA. EUSKARAREN NAFAR KONTSEILUA

  IV. TITULUA. ONDAREA, BALIABIDEAK, AURREKONTUAK ETA KONTROLA

  V. TITULUA. LANGILEAK

  VI. TITULUA. EGINTZEN ARAUBIDE JURIDIKOA

ATARIKOA

Espainiako Konstituzioak atariko tituluaren 3. artikuluan xedatzen duenez, Espainia aberatsa izanik mintzaira-moldez, bereziki errespetatu eta zainduko da kultura-ondare hori. Era berean, Europar Batasuneko Oinarrizko Eskubideen Gutunak 22. artikuluan aitortzen du Batasunak aniztasun kulturala, erlijiosoa eta linguistikoa errespetatzen dituela.

Ildo berean, Europako Kontseiluaren baitan eginiko Hizkuntza Erregional edo Gutxituen Europako Gutunak (Espainiak 1992ko azaroaren 5ean sinatu zuen Estrasburgon eta 2001eko otsailaren 2an berretsi zuen) ezartzen duenez, hizkuntza erregional edo gutxituak babesteak Europako kulturaren aberastasuna eta tradizioak mantentzen eta garatzen laguntzen du.

Espainiak gutun hori berresteko tresnan aitortzen du hizkuntza erregional edo gutxitutzat hartzen direla zenbait autonomia erkidegotako -tartean Nafarroa- autonomia estatutuek ofizialtzat jotakoak eta horiei aplikatuko zaizkiela Gutunaren III. ataleko xedapenak, hain zuzen ere, hizkuntza erregional edo gutxituen erabilera bizitza publikoan sustatzeari buruzkoak. Era berean, Espainiak aitortzen du hizkuntza erregional edo gutxitutzat hartzen direla autonomia estatutuek tradizioz mintzatzen diren lurraldeetan babestutakoak.

Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoak ezartzen du gaztelania dela Nafarroako hizkuntza ofiziala eta euskarak ere hizkuntza ofizialaren izaera izanen duela Nafarroako eremu euskaldunetan. Euskarari buruzko abenduaren 15eko 18/1986 Foru Legearen bidez arautzen da euskararen erabilera arrunta eta ofiziala bizikidetza sozialaren eta irakaskuntzaren esparruetan. Foru lege horrek 2. artikuluan adierazten duenaren arabera, gaztelania eta euskara dira Nafarroako berezko hizkuntzak, eta ondorioz, herritar orok du hizkuntza horiek ezagutzeko eta erabiltzeko eskubidea.

Euskarabidea-Euskararen Nafar Institutua erakundea irailaren 10eko 183/2007 Foru Dekretuaren bidez sortu zen erakunde autonomo gisa, zertarako eta euskara berreskuratzera, sustatzera eta garatzera bideraturiko langileak eta baliabide ekonomikoak modu positibo eta integratzaile batez kudeatzeko. Ordutik hona estatutuek erregulazio bat baino gehiago izan dituzte.

Nafarroako Foru Komunitateko Lehendakariaren abuztuaren 30eko 10/2023 Foru Dekretuaren bitartez ezarri zen Nafarroako Foru Komunitateko Administrazioaren departamentuen egitura. Foru dekretu horrek Memoria eta Bizikidetzako, Kanpo Ekintzako eta Euskarako Departamentuari esleitzen dizkio Nafarroako Foru Komunitateko Administrazioak hizkuntza politikaren alorrean dituen eskumenak.

Abuztuaren 30eko 65/2023 Foru Dekretuaren bidez, Memoria eta Bizikidetzako, Kanpo Ekintzako eta Euskarako Departamentuaren oinarrizko egitura ezarri zen, eta departamentu horretara atxikirik gelditu zen Euskarabidea-Euskararen Nafar Institutua erakunde autonomoa.

Erakunde autonomo hau abian egon den urteetan izandako esperientziak erakutsi du honako bi alderdi hauek hartu behar direla kontuan: batetik, administrazio publikoetan euskararen garapenari tratamendu organiko desberdindua eman behar zaiola Euskararen Plan Estrategikoaren eskakizunak behar bezala betetzeko, eta, bestetik, estatutu arauetan bildu behar direla Nafarroako Gobernuaren departamentu-egitura berrian izan diren aldaketak.

Hala xedatzen baitu bere 48. eta 49. artikuluetan martxoaren 11ko 11/2019 Foru Legeak, Nafarroako Foru Komunitateko Administrazioari eta foru-sektore publiko instituzionalari buruzkoak, erakunde autonomoak sortuko dira eta haien estatutuak aldatuko dira Nafarroako Gobernuak emandako foru dekretu bidez, erakundea atxikia duen departamentuko titularrak proposaturik.

Horrenbestez, foru dekretu honen xedea da Euskarabidea-Euskararen Nafar Institutua erakunde autonomoaren eskudantziak eta egitura organiko berria finkatu eta garatzea.

Hori horrela, Memoria eta Bizikidetzako, Kanpo Ekintzako eta Euskarako kontseilariak proposaturik, eta Nafarroako Gobernuak bi mila eta hogeita hiruko azaroaren hamabostean egindako bilkuran hartutako erabakiarekin bat,

DEKRETATZEN DUT:

Artikulu bakarra. Estatutuak onestea.

Euskarabidea-Euskararen Nafar Institutua erakunde autonomoaren estatutuak onesten dira; estatutuen testua foru dekretu honetan erantsi da.

Lehen xedapen gehigarria. Kudeaketa esleipenak.

Euskarabidea-Euskararen Nafar Institutuak ahalmena izanen du departamentu bereko edo beste bateko organo edo erakunde publikoei agintzeko hark dituen helburu eta eginkizunak betetzeko beharrezkoak diren jarduera materialak, teknikoak edo zerbitzu arlokoak, gai hori arautzen duen legedian xedatutakoari jarraikiz.

Bigarren xedapen gehigarria. Izendapenak berrestea.

Berretsi egiten dira foru dekretu honetan ezarritako egituraren arabera izen berari eusten dioten zerbitzuetako zuzendaritzen eta ataletako burutzen izendapenak, haiek egin zireneko baldintza berberetan betiere.

Xedapen indargabetzaile bakarra. Arauak indargabetzea.

Indargabetzen dira foru dekretu honetan ezartzen denari kontra egiten dioten maila bereko edo apalagoko xedapen guztiak, eta, zehazki, azaroaren 6ko 303/2019 Foru Dekretuaren bidez onetsi ziren estatutuak. Foru dekretu horren bidez onetsi ziren Euskarabidea-Euskararen Nafar Institutua erakunde autonomoaren estatutuak.

Azken xedapenetako lehena. Aurrekontu aldaketak.

Ahalmena ematen zaio Ekonomia eta Ogasun Departamentuko titularrari foru dekretu honetan ezarritakoa betetzeko beharrezkoak diren aurrekontu-aldaketak egin ditzan.

Azken xedapenetako bigarrena. Arau garapena.

Ahalmena ematen zaio Memoria eta Bizikidetzako, Kanpo Ekintzako eta Euskarako Departamentuko titularrari foru dekretu honetan ezarritakoa garatzeko eta betearazteko beharrezkoak diren xedapenak eman ditzan.

Azken xedapenetako hirugarrena. Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

I. TITULUA. IZAERA, ATXIKIPENA ETA ESKUMENAK

1. artikulua . Izaera.

Euskarabidea-Euskararen Nafar Institutua erakunde autonomoa da, berezko nortasun juridikoa du eta jarduteko ahalmen osoa du bere helburuak bete ahal izateko.

Euskarabidea-Euskararen Nafar Institutua zeharkakotasunez arituko da Nafarroako Foru Komunitateko Administrazio Publikoetan, indarra duen araudiari jarraikiz.

2. artikulua . Atxikipena eta babesa.

Euskarabidea-Euskararen Nafar Institutua, bere helburuak betetzeko, hizkuntza politikaren arloan ardura duen departamentuaren plangintza eta politika orokorrerako arauen mende egonen da, hari atxikita baitago; departamentu horrek estatutuek, foru legeek eta antolamendu juridikoak esleitzen dizkioten kontrolerako eta zaintzarako ahalmenak erabiliko ditu Euskarabidean.

3. artikulua . Eskumenak eta eginkizunak.

1. Euskarabidea-Euskararen Nafar Institutuari dagozkio euskararen erabilera ofizialaren araudia garatzeko ikerketa- eta aholkularitza-eskumenak, eta euskararen baliabideak planifikatu, sustatu eta kudeatzea Nafarroako Foru Komunitatean.

2. Eskumen horiek garatzeko eta haien esparru materialaren barnean, Euskarabidea-Euskararen Nafar Institutuak eginkizun hauek izanen ditu:

a) Nafarroako Foru Komunitateko Administrazio Publikoetako jarduketak aztertzea eta ebaluatzea, jarduketa horiek euskararen tratamenduari eragiten diotenean hizkuntza politikaren eskumen-esparruetan, eta jarduketa horien gaineko txostenak egitea.

b) Nafarroako Gobernuaren xedapen orokorretako proiektuen nahitaezko txostenak egitea, indarrean den hizkuntzaren alorreko legeriari egokitzeari dagokionez.

c) Euskarari buruzko Foru Legearen eta berau garatzen duten arauen aplikazioari dagozkien erregelamendu eta planen proposamenak egitea, bere ekimenez zein hala eskatzen zaionean.

d) Nafarroako Gobernuko departamentuei aholku ematea eta haiekin lankidetzan aritzea, jarduketa irizpideak proposatuz, bermatzeko betetzen direla Euskarari buruzko Foru Legea eta berau garatzen duten arauak.

e) Nafarroako Gobernuko sozietate publikoei aholku ematea eta haiekin lankidetzan aritzea, Euskarari buruzko Foru Legea eta berau garatzen duten arauak aplikatzeari dagokionez.

f) Nafarroako toki-entitateei eta udal izaerako beste entitate publiko batzuei aholku ematea eta haiekin lankidetzan aritzea, Euskarari buruzko Foru Legea eta berau garatzen duten arauak aplikatzeari dagokionez.

g) Nafarroan den Estatuko Administrazioari aholku ematea, bi administrazioek hala adosten badute, eta lankidetzan aritzea Euskarari buruzko Foru Legea eta berau garatzen duten arauak aplikatzeko orduan.

h) Euskararen Nafar Kontseiluaren jarduera koordinatzea.

i) Europar Batasuneko hizkuntza erregional edo gutxituen arloko legeen eta jarduketen gaineko txostenak aztertu eta prestatzea, bereziki, Hizkuntza Erregional edo Gutxituen Europako Gutunaren aplikazioari dagokionez.

j) Nafarroako Administrazio Publikoen zerbitzuko langileek euskara ikasteko eta hobetzeko prestakuntza antolatu eta kudeatzea, eta euskararen ezagutza egiaztatzea.

k) Euskararen ezagutza egiaztatzeko probak egitea, prestakuntzara edo hautatze prozesuetara loturik, eta egiaztagirien erregistroa mantentzea.

l) Helduei euskara irakastera bideraturiko laguntzak kudeatu eta irakaskuntza mota hori ematen duten entitateekin lankidetza hitzarmenak proposatzea, gaur egungo eta etorkizuneko eskariari erantzuten zaiola bermatzeko.

m) Nafarroako Aldizkari Ofizialaren ediziorako xedapen orokorren, administrazio ebazpenen eta gainerako egintza eta dokumentuen itzulpen ofiziala egitea.

n) Nafarroako Administrazio Publikoek eskatzen dizkioten euskara-gaztelania itzulpen lan ofizialak bi norabideetan egitea, Euskarari buruzko Foru Legeak eta berau garatzen duten arauek xedaturikoarekin bat.

ñ) Administrazio publikoei aholku ematea euskara-gaztelania zein gaztelania-euskara itzulpen ofizialen arloan.

o) Irizpideak prestatzea euskararen eta gaztelaniaren presentzia bermatzeko Nafarroako Foru Komunitateko Administrazioaren ekitaldi publikoetan, komunikazioetan eta irudi korporatiboan.

p) Terminologiaren arloan esku hartzea eta euskararen hizkuntza baliabideekin eta terminologiarekin loturiko gaietan lan egiten duten entitate publiko eta pribatuekiko lankidetza sustatzea.

q) Nafarroako Foru Komunitateko toponimiaren esparruan esku hartzea, indarra duen legeriari jarraikiz, hura eguneratu eta mantentzeko beharrezkoak diren jarduketak egitea eta haiek erabiltzeko irizpideen proposamena egitea.

r) Euskaltzaindiarekiko akordio proposamenak prestatzea eta horien izenpetzea kudeatzea, baita akordio horien ondoriozko jarduketen jarraipena egitea ere.

s) Nafarroako euskalkiak zaindu, garatu eta hedatzeko jarduketa planak onestea.

t) Euskarak Nafarroan duen errealitate soziolinguistikoaren gaineko azterlanak, ikerketak eta estatistikak proposatu, koordinatu, egin eta zabaltzea, ebaluazio-sistemak eta adierazleak ezartzea eta, hala behar denean, beste erakunde edo entitate batzuek garatutako proiektuetan lankidetzan aritzea.

u) Euskara sustatu eta erabiltzeko Plan Estrategikoaren proposamena egitea eta beroni jarraipena egiteko, ebaluatu eta eguneratzeko nahitaezkoak diren azterlan eta ikerketak egitea.

v) Euskararen presentzia bultzatzea Foru Komunitateak kanpoan hedatzeko egiten dituen kanpainetan.

w) Hizkuntza aniztasuna zaintzen duten foro, sare eta erakunde jakinetako parte-hartzea kudeatzea.

x) Hizkuntza politikaren alorrean eskumenak dituzten erakundeekiko harremanak koordinatzea.

y) Foru Komunitatetik kanpo bizi diren euskaldunen beste talde batzuekin harremanak sustatzea.

z) Euskara bizitza sozialeko esparruetan agertu eta erabiltzeko informazio- eta sentsibilizazio-programak gauzatzea eta helburu hori bera duten entitate publiko eta pribatuekin lankidetzan aritzea.

aa) Herritarren hizkuntza eskubideak bermatuko dituzten zeharkako politikak sustatu eta garatzea.

ab) Herritarrei hizkuntza eskubideen berri ematea.

ac) Euskarazko edo euskarari buruzko zeinahi jarduera sustatzea eta antolatzea, barnean direla agerraldi kultural eta artistikoak, liburuen argitalpenak eta ikus-entzunezko ekoizpenak, eta herritarren elkarteekin lankidetzan aritzea xede horretarako.

ad) Euskarak Nafarroako hedabide sozial publiko eta pribatuetan izan behar duen presentzia progresiboa sustatu eta laguntza ekonomiko eta materialeko plan eta hitzarmenak prestatzea.

ae) Euskararen presentzia eta erabilera informazioaren eta komunikazioaren teknologietan eta sare sozialetan sustatzeko proposamenak egitea eta Nafarroan garatzeko programak martxan jartzea.

af) Esparru sozioekonomikoan euskararen presentzia eta erabilera bultzatzeko proposamenak egitea eta Nafarroan garatzeko programak martxan jartzea.

ag) Indarra duten xedapenek esleitutako edo agindutako gainerako eginkizunak.

II. TITULUA. EGITURA ORGANIKOA

I. KAPITULUA. ZUZENDARITZA ORGANOAK

4. artikulua . Zuzendaritza organoak.

Euskarabidea-Euskararen Nafar Institutuaren zuzendaritza organoak dira:

a) Gobernu Kontseilua.

b) Kudeaketako Zuzendaritza.

II. KAPITULUA. GOBERNU KONTSEILUA

5. artikulua . Osaera.

1. Honako kide hauek osatzen dute Euskarabidea-Euskararen Nafar Institutuaren Gobernu Kontseilua:

a) Kontseiluburua: hizkuntza politikaren arloan eskumena duen departamentuko titularra.

b) Kontseiluburuordea: Euskarabidea-Euskararen Nafar Institutuko zuzendari kudeatzailea.

c) Bokalak: departamentu bakoitzaren ordezkari gisa arituko den pertsona bat; kasuan kasuko departamentuko titularrak izendatuko du zuzendari nagusien artean edo, erakunde autonomoei dagokienez, zuzendari kudeatzaileen artean.

d) Idazkaria: Euskararen Sustapenaren eta Plangintzaren Zerbitzuko zuzendaria.

2. Hutsuneren bat gertatzen bada Gobernu Kontseiluan kide moduan sartzen diren departamentuetako zuzendaritza karguetan, departamentuko titularrak, behin-behinekoz, bokal moduan ordeztuko dituzten pertsonak izendatuko ditu, behin betiko izendapenak egin arte.

6. artikulua . Gobernu Kontseiluaren ahalmenak.

Honako ahalmen hauek dagozkio Gobernu Kontseiluari:

a) Urtero, erakunde autonomoaren aurrekonturako aurreproiektuaren proposamena onestea.

b) Urteko kudeaketa plana eta prestatzen diren urteko txostenak onestea.

c) Plan Estrategikoak onestea, Kontseiluak erabakitzen duen aldizkakotasunarekin.

d) Erakunde autonomoaren zuzendaritza funtzioak kontrolatu eta gainbegiratzea.

e) Nafarroako Gobernuko departamentuetan aplikatuko den hizkuntza politikaren arau bidezko garapena koordinatzea.

7. artikulua . Kontseiluburuaren ahalmenak.

1. Honako ahalmen hauek ditu kontseiluburuak:

a) Gobernu Kontseilua ordezkatzea.

b) Kontseiluaren bilkuretarako deia egitea eta haietarako gai-zerrenda jartzea, eta bilkuretako buru eta zuzendari izatea.

c) Jarraipena egitea Gobernu Kontseiluko erabakien eta Euskarabidea-Euskararen Nafar Institutuaren funtzionamendua erregulatzen duten arauen betetze-mailari.

2. Kargua hutsik dagoenean, kontseiluburua kanpoan edo eri dagoenean edo justifikatutako gainerako kasuetan, kontseiluburuordea arituko da haren ordez.

8. artikulua . Idazkaria.

1. Euskararen Sustapenaren eta Plangintzaren Zerbitzuko zuzendariak Kontseiluko bilkuretan parte hartuko du, hizpidearekin eta botoarekin, eta eginkizun hauek izanen ditu:

a) Kontseiluburuaren aginduz, Kontseiluko bileretara joateko deia egitea.

b) Kontseiluko lanak prestatzea, Euskarabidea-Euskararen Nafar Institutuko zuzendari kudeatzailearekin batera, eta erabakien exekuzioa tramitatzea.

c) Kontseiluko bileren akta egitea, hartutako erabakien fede ematea, eskatzen zaizkion egiaztagiriak egitea eta Gobernu Kontseiluko liburu eta agiriak zaintzea.

d) Agintzen zaizkion gainerako eginkizunak betetzea.

2. Kontseiluko bilkuretan, idazkariari hizkuntza politikaren arloan ardura duen departamentuko funtzionarioek laguntzen ahal diote, bilkuretara joanen baitira, hizpidearekin baina botorik gabe.

9. artikulua . Funtzionamendua.

1. Kontseilua urtean behin bilduko da, gutxienez, ohiko bilkuran, eta ezohiko bilkurak eginen dira kontseiluburuak haietarako deia egiten duenean.

2. Gobernu Kontseiluak edozein unetan eskatzen ahalko du beste pertsona batzuen aholkua, daukaten ezagutza, prestakuntza, izen ona edo beste zergatiko bat dela kausa haien esku-hartzea egokitzat jotzen baldin badu. Kasu horretan, dei berezia eginen zaie horretarako.

3. Foru dekretu honetan ezarri ez den orotan, martxoaren 11ko 11/2019 Foru Legean kide anitzeko organoendako xedatutakoari jarraituko zaio (foru lege hori Nafarroako Foru Komunitateko Administrazioari eta foru-sektore publiko instituzionalari buruzkoa da).

III. KAPITULUA. KUDEAKETAKO ZUZENDARITZA

10. artikulua . Izendatzea, kargutik kentzea eta ordeztea.

1. Nafarroako Gobernuak libreki izendatu eta kargutik kenduko du Euskarabidea-Euskararen Nafar Institutuko zuzendari kudeatzailea, hizkuntza politikaren arloan ardura duen departamentuko titularrak proposaturik.

2. Kargua hutsik dagoenean, titularra kanpoan edo eri denean, edo beste arrazoi batzuengatik beharrezkoa denean, Euskararen Sustapenaren eta Plangintzaren Zerbitzuko zuzendariak ordeztuko du edo, hori kanpoan bada, Hizkuntza Baliabideen Zerbitzuko zuzendariak edo, hori kanpoan bada, Euskara Administrazio Publikoetan Garatzeko Zerbitzuko zuzendariak.

11. artikulua . Eginkizunak.

Honako eginkizun hauek ditu Euskarabidea-Euskararen Nafar Institutuko zuzendari kudeatzaileak:

a) Euskarabidea-Euskararen Nafar Institutuaren ordezkaririk gorena izatea.

b) Euskarabidearen eta bere organoen jarduna zuzentzea.

c) Erakunde autonomoaren funtzionamenduaren erantzukizun gorena bere gain hartzea.

d) Jarduketa ildoak proposatzea, eta urteko kudeaketa plana prestatzea eta Kontseilura eramatea, onets dezan.

e) Bere eskumenen arloko urteko txostenak egitea, bai eta plan estrategiko bat prestatzea eta aurkeztea ere, hala eskatzen zaionean.

f) Kudeaketarako helburu orokorrak ezartzea.

g) Gobernu Kontseiluko erabakiak eta haren buruarenak betetzea eta jarraipena egitea.

h) Erakunde autonomoaren aurrekontuen aurreproiektuaren proposamena prestatzea eta Kontseilura eramatea, onets dezan.

i) Erakunde autonomoak jarduteko behar dituen administrazio ebazpenak ematea eta administrazio egintzak bete daitezen agintzea.

j) Erakunde autonomoko giza eta finantza baliabideak, bai eta fisikoak ere, osoki kudeatzea, zerbitzu eraginkorrak eta kalitatekoak eman ahal izateko.

k) Kontratazio administratiboaren arloan indarra duen araudiak erakunde autonomoen ordezkariei kontratuak egiteko esleitzen dizkien ahalmenak erabiltzea.

l) Erakunde autonomoaren funtzionamendurako beharrezkoak diren gastu txikiak baimentzeko ahalmenak gauzatzea, aurrekontuen eta ekonomiaren arloko araudian zuzendari nagusiei ahalmen horiek ematen zaizkien heinean.

m) Euskarabideko jarduketa programak eta urteko memoria prestatzea eta horiek guztiak Gobernu Kontseiluari aurkeztea, onets ditzan.

n) Euskarabidearen funtzionamendurako beharrezkoak diren ordainketak eta gastuak baimentzea, indarreko araudiaren arabera.

ñ) Euskarabidean lan egiteko metodoak hobetzen laguntzea.

o) Euskarabidea-Euskararen Nafar Institutuari dagozkion ondarearen gaineko erantzukizuneko prozedurak eta auzibide zibilera eta lan-auzibidera jo aurreko erreklamazioak ebaztea, langileei dagozkien erreklamazioak izan ezik.

p) Hizkuntza politikaren arloan ardura duen departamentuko titularrari proposatzea bitarte baterako izenda ditzala atalburuak, bulegoburuak edo erakunde autonomoari atxikita dauden eta atala baino maila beheragokoak diren unitateburuak, funtzio publikoaren gaian eskumena duen departamentuak aldeko txostena eman ondoren.

q) Euskarabidea-Euskararen Nafar Institutuko langileen buru izatea.

r) Langileriaren arloko araudiak erakunde autonomoei langileriaren arloan ematen dizkien eskudantziak gauzatzea.

s) Erakunde autonomoko zerbitzuko zuzendariak eta atalburuak aldi baterako ordeztuko dituztenak ebazpen bidez izendatzea, haien karguak hutsik geratzen direnean, lanean ez daudenean, gaixo daudenean edo aldi baterako ezintasuna dutenean.

t) Nafarroako Foru Komunitateko Administrazioa ordezkatzea Eusko Ikaskuntzako Zuzendaritza Kontseiluan.

u) Hizkuntza politikaren arloan ardura duen departamentuko titularrak agintzen ahal dion beste edozein eginkizun.

12. artikulua . Eginkizunak eskuordetzea.

Zuzendari kudeatzaileak bere eskudantzietako batzuk Euskararen Sustapenaren eta Plangintzaren Zerbitzuko zuzendariaren esku uzten ahalko ditu, indarra duten legeetan ezarritakoarekin bat.

IV. KAPITULUA. ZERBITZUAK ETA ATALAK

13. artikulua . EuskarabideaEuskararen Nafar Institutuko zerbitzuak.

Honako zerbitzu hauek ditu egituran Euskarabidea-Euskararen Nafar Institutuak:

a) Euskara Administrazio Publikoetan Garatzeko Zerbitzua.

b) Hizkuntza Baliabideen Zerbitzua.

c) Euskararen Sustapenaren eta Plangintzaren Zerbitzua.

14. artikulua . Zerbitzuko zuzendaritzak.

Nafarroako Gobernuak, hizkuntza politikaren arloan eskumena duen departamentuko titularrak proposaturik, libreki izendatu eta kargutik kenduko ditu zerbitzuetako zuzendariak; horiek funtzionarioak izanen dira, Nafarroako Foru Komunitateko Administraziokoak edo haren erakunde publikoetakoak edo haiei atxikirik daudenak. Horien araubide juridikoa izanen da martxoaren 11ko 11/2019 Foru Legean zerbitzuko zuzendariei ezarritako berbera (foru lege hori Nafarroako Foru Komunitateko Administrazioari eta foru-sektore publiko instituzionalari buruzkoa da).

1. ATALA. EUSKARA ADMINISTRAZIO PUBLIKOETAN GARATZEKO ZERBITZUA

15. artikulua . Euskara Administrazio Publikoetan Garatzeko Zerbitzuaren esparru material eta funtzionala.

Honako eginkizun hauek izanen ditu Euskara Administrazio Publikoetan Garatzeko Zerbitzuak:

a) Herritarren hizkuntza eskubideak bermatzen dituzten zeharkako politikak sustatu eta garatzea.

b) Neurriak proposatzea euskararen gainean indarrean dagoen araudia garatzeko.

c) Euskarak administrazioan duen erabileraren gaineko txostenak prestatzea, plantillaren gaineko diagnostikoa egitea eta ele biko zirkuituak abian jartzea.

d) Europar Batasuneko hizkuntza erregional edo gutxituen arloko legeen eta jarduketen gaineko txostenak presta daitezen bultzatzea, bereziki, Hizkuntza Erregional edo Gutxituen Europako Gutunaren aplikazioari dagokionez.

e) Euskararen presentzia egokia bermatzea ekitaldi publiko guztietan, komunikazioetan, protokolozko ekitaldietan eta, oro har, administrazio publikoen irudi korporatiboan.

f) Aholkularitza ematea Nafarroako Gobernuko departamentuei eta Nafarroako gainerako administrazio publikoei, eta haiekin elkarlanean aritzea, Euskarari buruzko Foru Legearen eta hura garatzen duen araudiaren garapenean, eta jarduketa-irizpideak proposatzea eta horiek betetzen diren jakiteko jarraipena egitea eta ebaluatzea.

g) Tresnak ezar daitezen bultzatzea, batetik, administrazio publikoen zerbitzuan ari diren langileek euskara errazago erabil dezaten, eta, bestetik, herritarrak administrazio horietara euskaraz errazago zuzen daitezen.

h) Toki-administrazioekin lankidetza hitzarmenak bultzatzea.

i) Programak eta baliabideak sustatzea Nafarroako Administrazio Publikoen zerbitzuko langileek euskara ikasteko eta hobetzeko.

j) Administrazio publikoetan euskararen prestakuntzarako eta haren erabilera sustatzeko planak prestatzea.

k) Euskararen ezagutza egiaztatzea eta Egiaztagirien Erregistroa mantentzea.

l) Indarra duten xedapenek esleitutako edo agindutako gainerako eginkizunak.

16. artikulua . Euskara Administrazio Publikoetan Garatzeko Zerbitzuaren egitura.

Honako atal hauek ditu egituran Euskara Administrazio Publikoetan Garatzeko Zerbitzuak:

a) Euskararen Egiaztapenen eta Prestakuntzaren Atala.

b) Aholkularitza Atala.

17. artikulua . Euskararen Egiaztapenen eta Prestakuntzaren Atalaren esparru material eta funtzionala.

Honako eginkizun hauek ditu Euskararen Egiaztapenen eta Prestakuntzaren Atalak:

a) Euskara helduei irakasteko behar diren langileak, baliabide teknikoak, materialak eta ekonomikoak kudeatzea.

b) Nafarroako Administrazio Publikoen zerbitzuko langileek euskara ikasteko eta hobetzeko prestakuntza kudeatzea.

c) Euskararen ezagutza egiaztatzeko probak egitea, prestakuntzara edo hautatze prozesuetara loturik, eta Egiaztagirien Erregistroa mantentzea.

d) Helduei euskara irakasteko curriculum edukiak eta material didaktikoa prestatzea, eguneratzea eta ikertzea, Hizkuntzetarako Europako Erreferentzia Esparru Bateratuaren baitan eta irakaskuntza hori ematen duten gizarte ekimeneko entitateekin koordinaturik.

e) Unibertsitateekin lankidetzan aritzea, soziolinguistikaren eta hizkuntzalaritzaren arloetako ikasleen eta tituludunen prestakuntzan.

f) Nafarroako Foru Komunitatetik kanpoko entitateekin lankidetzan aritzea, helduen euskararen erabilera eta irakaskuntza sustatzeko.

g) Euskararen Liburutegi Espezializatua kudeatzea eta euskarazko funts bibliografikoak eta ikus-entzunezkoak eskuratzea, horiek bildu eta kontsultarako uzteko.

h) Indarra duten xedapenek esleitutako edo agindutako gainerako eginkizunak.

18. artikulua . Aholkularitza Atalaren esparru material eta funtzionala.

Honako eginkizun hauek ditu Aholkularitza Atalak:

a) Nafarroako Foru Komunitateko Administrazio Publikoetako jarduketak aztertzea eta ebaluatzea, jarduketa horiek euskararen tratamenduari eragiten diotenean hizkuntza politikaren eskumen-esparruetan, eta jarduketa horien gaineko txostenak egitea.

b) Euskarari buruzko Foru Legearen eta berau garatzen duten arauen aplikazioari dagozkien erregelamendu eta planen proposamenak egitea, bere ekimenez zein hala eskatzen zaionean.

c) Europar Batasuneko hizkuntza erregional edo gutxituen arloko legeen eta jarduketen gaineko txostenak aztertu eta prestatzea, bereziki, Hizkuntza Erregional edo Gutxituen Europako Gutunaren aplikazioari dagokionez.

d) Nafarroako Foru Komunitateko Administrazioko departamentuen artean koordinazio-lana egitea, eta aholku ematea eta lankidetzan aritzea Nafarroako Gobernuak hizkuntza plangintzan ezarritako ildo estrategikoak gauzatzeko.

e) Departamentuen proposamenak aztertzen dituzten txostenak prestatzea. Txosten horietan zehaztuko da zein diren lanpostu elebidunak eta nola baloratuko den euskara lanpostuetan sartu eta haiek hornitzeko merezimendu-faseetan.

f) Nafarroako Gobernuko sozietate publikoei aholku ematea eta haiekin lankidetzan aritzea, Euskarari buruzko Foru Legea eta berau garatzen duten arauak aplikatzeari dagokionez.

g) Udalei eta udal izaerako beste entitate publiko batzuei aholku ematea eta haiekin lankidetzan aritzea, Euskarari buruzko Foru Legea eta berau garatzen duen araudia aplikatzeari dagokionez.

h) Nafarroan den Estatuko Administrazioari aholku ematea, bi administrazioek hala adosten badute, eta Euskarari buruzko Foru Legea eta berau garatzen duten arauak aplikatzeko orduan lankidetzan aritzea.

i) Tresnak ezartzea, batetik, administrazio publikoen zerbitzuan ari diren langileek euskara errazago erabil dezaten, eta, bestetik, herritarrak administrazio horietara euskaraz errazago zuzen daitezen.

j) Herritarren hizkuntza eskubideak bermatzen dituzten zeharkako politikak garatzea.

k) Arau-neurriak abian jartzea euskararen eta haren erabileraren gainean indarrean dagoen araudia garatzeko.

l) Aholkularitza-eginkizunak gauzatzea genero-ikuspegiaren zeharkakotasuna aplika dadin erakunde autonomoaren jardueraren plangintzan, kudeaketan eta ebaluazioan, departamentuko Idazkaritza Tekniko Nagusiarekin koordinatuz.

m) Indarra duten xedapenek esleitutako edo agindutako gainerako eginkizunak.

2. ATALA. HIZKUNTZA BALIABIDEEN ZERBITZUA

19. artikulua . Hizkuntza Baliabideen Zerbitzuaren esparru material eta funtzionala.

Honako eginkizun hauek ditu Hizkuntza Baliabideen Zerbitzuak:

a) Itzulpen Atalaren bidez ematen diren itzulpen zerbitzuak antolatzea.

b) Administrazio publikoei aholkularitza ematea euskara-gaztelania zein gaztelania-euskara itzulpen ofizialen arloan.

c) Entitate publikoekin eta pribatuekin lankidetzan aritzea euskara-gaztelania zein gaztelania-euskara itzulpenen arloan.

d) Entitate publikoekin eta pribatuekin lankidetzan aritzea terminologiaren eta hizkuntza baliabideen arloan.

e) Administrazio publikoei aholkularitza ematea eta haiekin lankidetzan aritzea hizkuntza baliabideen arloan.

f) Euskaltzaindiarekiko akordio proposamenak prestatzea eta haien izenpetzea kudeatzea, baita akordio horien ondoriozko jarduketen jarraipena egitea ere.

g) Nafarroako Foru Komunitateko toponimiaren esparruan jardutea, indarra duen legeriari jarraikiz, hura eguneratu eta mantentzeko beharrezkoak diren jarduketak egitea eta arlo horretan aholkularitza ematea.

h) Indarra duten xedapenek esleitutako edo agindutako gainerako eginkizunak.

20. artikulua . Hizkuntza Baliabideen Zerbitzuaren egitura.

Hizkuntza Baliabideen Zerbitzuaren egituran Itzulpen Atala dago.

21. artikulua . Itzulpen Atalaren esparru material eta funtzionala.

Honako eginkizun hauek ditu Itzulpen Atalak:

a) Nafarroako Administrazio Publikoek eskatzen dizkioten euskara-gaztelania itzulpen lan ofizialak bi norabideetan egitea, Euskarari buruzko Foru Legeak eta berau garatzen duten arauek xedaturikoarekin bat.

b) Nafarroako Aldizkari Ofiziala argitaratzeko beharrezkoak diren testuen itzulpen ofiziala egitea.

c) Nafarroako Gobernuko departamentuei itzulpen- eta interpretazio-zerbitzuak ematea euskaratik gaztelaniara eta gaztelaniatik euskarara.

d) Terminologiaren esparruan jardutea.

e) Indarra duten xedapenek esleitutako edo agindutako gainerako eginkizunak.

3. ATALA. EUSKARAREN SUSTAPENAREN ETA PLANGINTZAREN ZERBITZUA

22. artikulua . Euskararen Sustapenaren eta Plangintzaren Zerbitzuaren esparru material eta funtzionala.

Honako eginkizun hauek ditu Euskararen Sustapenaren eta Plangintzaren Zerbitzuak:

a) Euskara sustatu eta erabiltzeko Plan Estrategikoaren diagnostikoa egitea eta beroni jarraipena egiteko, ebaluatzeko eta eguneratzeko nahitaezkoak diren azterlan eta ikerketak egitea.

b) Informazio- eta sentsibilizazio-programak prestatzea euskara bizitza sozialeko esparruetan ager eta erabil dadin, eta lankidetzan aritzea helburu hori bera duten entitate publiko eta pribatuekin, bereziki gazteenei zuzendutako programetan.

c) Herritarrei hizkuntza eskubideen berri ematea.

d) Nafarroako Gobernuaren xedapen orokorretako proiektuen nahitaezko txostenak egitea, indarrean den hizkuntzaren alorreko legeriari egokitzeari dagokionez.

e) Euskarak Nafarroan duen errealitate soziolinguistikoaren gaineko azterlanak, ikerketak eta estatistikak proposatzea, koordinatzea, egitea eta zabaltzea, ebaluazio-sistemak eta adierazleak ezartzea eta beste erakunde edo entitate batzuek garatutako proiektuetan lankidetzan aritzea.

f) Zuzendari kudeatzaileari laguntzea hizkuntza politikaren alorrean eskumenak dituzten erakundeekiko hartu-emanean.

g) Euskararen Nafar Kontseiluaren jarduera koordinatzea eta idazkari-lana egitea.

h) Euskararen presentzia sustatzea Nafarroako hedabide sozial publiko eta pribatuetan.

i) Proposamenak egitea euskararen presentzia eta erabilera bultzatzeko esparru sozioekonomikoan, eta garatzeko programak martxan jartzea.

j) Euskararen presentzia eta erabilera sustatzea ingurune digitalean.

k) Helduei euskara irakastera bideraturiko laguntzak kudeatzea eta irakaskuntza mota hori ematen duten entitateekin lankidetza hitzarmenak proposatzea, gaur egungo eta etorkizuneko eskariari erantzuten zaiola bermatzeko.

l) Nafarroako euskalkiak zaindu, garatu eta hedatzeko jarduketa planak onestea.

m) Euskararen presentzia bultzatzea Foru Komunitateak kanpoan hedatzeko egiten dituen kanpainetan.

n) Hizkuntza aniztasuna zaintzen duten foro, sare eta erakunde jakinetako parte-hartzea kudeatzea.

ñ) Harremanak sustatzea Foru Komunitatetik kanpo bizi diren euskaldunen beste talde batzuekin.

o) Indarra duten xedapenek esleitutako edo agindutako gainerako eginkizunak.

23. artikulua . Euskararen Sustapenaren eta Plangintzaren Zerbitzuaren egitura.

Honako atal hauek ditu Euskararen Sustapenaren eta Plangintzaren Zerbitzuak:

a) Euskara Sustatzeko Atala.

b) Euskararen Azterlan eta Plangintza Estrategikoaren Atala.

24. artikulua . Euskara Sustatzeko Atalaren esparru material eta funtzionala.

Honako eginkizun hauek ditu Euskara Sustatzeko Atalak:

a) Informazio- eta sentsibilizazio-programak gauzatzea euskara bizitza sozialeko esparruetan ager eta erabil dadin, eta lankidetzan aritzea helburu hori bera duten entitate publiko eta pribatuekin, bereziki gazteenei zuzendutako programetan.

b) Herritarrei hizkuntza eskubideen berri ematea.

c) Euskarazko edo euskarari buruzko zeinahi jarduera sustatzea eta antolatzea, barnean direla agerraldi kultural eta artistikoak, liburuen argitalpenak edota ikus-entzunezko ekoizpenak. Lankidetza bultzatzea hala adosten duten toki-erakundeekin eta herritarren elkarteekin.

d) Nafarroako komunikabide sozial publiko eta pribatuetan euskararen presentzia progresiboa sustatzea eta Nafarroako komunikabide publiko eta pribatuetan euskara sustatzeko egiten diren deialdi eta hitzarmenak kudeatu eta ebaluatzea eta laguntza ekonomiko eta materialeko planak egitea.

e) Proposamenak egitea euskararen presentzia eta erabilera sustatzeko informazioaren eta komunikazioaren teknologietan eta sare sozialetan, eta garatzeko programak martxan jartzea.

f) Euskararen presentzia eta erabilera bultzatzea esparru sozioekonomikoan, eta garatzeko programak martxan jartzea.

g) Helduei euskara irakastera bideraturiko laguntzak kudeatzea eta irakaskuntza mota hori ematen duten entitateekin lankidetza hitzarmenak proposatzea, gaur egungo eta etorkizuneko eskariari erantzuten zaiola bermatzeko.

h) Nafarroako euskalkiak kontserbatu, garatu eta hedatzeko jarduketa planak onestea.

i) Nafarroako Euskararen Mediateka kudeatzea.

j) Indarra duten xedapenek esleitutako edo agindutako gainerako eginkizunak.

25. artikulua . Euskararen Azterlan eta Plangintza Estrategikoaren Atalaren esparru material eta funtzionala.

a) Euskara sustatzeko eta erabiltzeko Plan Estrategikoa proposatzea eta beroni jarraipena egiteko, ebaluatzeko eta eguneratzeko nahitaezkoak diren azterlan eta ikerketak egitea.

b) Nafarroako Gobernuaren xedapen orokorretako proiektuen nahitaezko txostenak egitea, indarrean den hizkuntzaren alorreko legeriari egokitzeari dagokionez.

c) Euskarak Nafarroan duen errealitate soziolinguistikoaren gaineko azterlanak, ikerketak eta estatistikak proposatzea, koordinatzea, egitea eta zabaltzea, ebaluazio-sistemak eta adierazleak ezartzea eta, hala behar denean, beste erakunde edo entitate batzuek garatutako proiektuetan lankidetzan aritzea.

d) Indarra duten xedapenek esleitutako edo agindutako gainerako eginkizunak.

4. ATALA

GAI ADMINISTRATIBOAK, LANGILERIA ETA AZPIEGITURAK KUDEATZEKO ATALA

26. Artikulua . Gai Administratiboak, Langileria eta Azpiegiturak Kudeatzeko Atalaren esparru material eta funtzionala.

Gai Administratiboak, Langileria eta Azpiegiturak Kudeatzeko Atala Kudeaketako Zuzendaritzari atxikita dago, eta honako eginkizun hauek ditu:

a) Euskarabidea-Euskararen Nafar Institutua erakunde autonomoaren eskumeneko administrazio espedienteak kudeatzea, tramitatzea eta artxibatzea.

b) Aurrekontuen exekuzioa kudeatzea, erakunde autonomo horren funtzionamendurako esleitu diren baliabideen mugen barrenean.

c) Zuzendari kudeatzaileari laguntza ematea aurrekontuen aurreproiektua prestatzeko lanetan eta aurrekontuko aldaketak proposatzea, bere eskumenen esparruan.

d) Erakunde autonomo horri atxikitako langileen kontratazioarekin, baimenekin, bajekin eta abarrekin lotutako espedienteak kudeatzea.

e) Langileen asistentziaren kontrol administratiboa.

f) Eraikinaren kudeaketarekin lotutako tramite guztien gaineko jarraipena eta kontrola egitea: eraikinaren sarrera, garbiketa eta mantentze-lanak kontrolatzea; gerta daitezkeen larrialdietarako prest egotea; lokalak prestatzea prestakuntza jardueretarako, hautatzeko prozesuetarako, ekitaldi instituzionaletarako eta abarretarako, eta lokalak erabiltzeko tokiak eta denborak kontrolatu eta banatzea.

g) Zerbitzu orokorretan aritzen diren langileen eginkizunak antolatzea.

h) Baliabide teknologiko-didaktikoen mantentze-lana egitea, eta horiek puntuan izatea prestakuntza jarduera, bilera, jardunaldi eta abarretarako.

i) Zuzendari kudeatzaileari laguntza ematea erakunde autonomoaren prebentzio- eta irisgarritasun-planak kudeatzen.

j) Erakunde autonomoak ongi jarduteko beharrezkoa den materiala erosi eta kudeatzea.

k) Euskarabidea-Euskararen Nafar Institutuaren liburutegiaren kudeaketa orokorraz arduratzea, eta hango ikus-entzunezko materiala eta funts bibliografikoa erregistratu eta sailkatzea.

l) Atalaren antolaketa eta funtzionamendua hobetzen duten txostenak eta proposamenak prestatzea.

m) Bere helburuak egoki betetzeko, agintzen zaizkion gainerako eginkizunak.

27. artikulua . Bulegoak edo antzeko unitateak.

Bulegoak edo ataletatik beherako beste administrazio unitate batzuk sortu, aldatu edo kentzea, Memoria eta Bizikidetzako, Kanpo Ekintzako eta Euskarako Departamentuko titularrak emandako foru aginduaren bidez eginen da, Euskarabidea-Euskararen Nafar Institutuko zuzendari kudeatzaileak proposaturik, aurretik funtzio publikoaren, antolamendu administratiboaren eta ekonomiaren arloetan eskumena duten departamentuek txostena emanda.

III. TITULUA. EUSKARAREN NAFAR KONTSEILUA

28. artikulua . Izaera eta atxikipena.

1. Euskararen Nafar Kontseilua Euskarabidea-Euskararen Nafar Institutuaren parte-hartze organoa da eta, euskararen plangintzan eta sustapenean, Nafarroako Gobernuaren organo aholku-emailea da.

2. Euskararen Nafar Kontseilua atxikiko zaio Nafarroako Foru Komunitateko Administrazioan hizkuntza politikaren arloan eskumena duen departamentuari, eta horrek emanen dizkio jarduteko behar dituen aholkularitza eta bitartekoak.

29. artikulua . Euskararen Nafar Kontseiluaren eginkizunak.

Honako eginkizun hauek ditu Euskararen Nafar Kontseiluak:

a) Txosten ez-lotesleak ematea hizkuntza normalizazioari buruzko xedapen orokorreko proiektuen eta arlo horretako plan orokorren gainean.

b) Euskararen Plan Estrategikoaren garapenaren eta betetze-mailaren jarraipena egitea.

c) Euskararen erabileraren eta sustapenaren gainean proposamenak eta iradokizunak egitea.

d) Arloan eskumena duten administrazioetako edozeinek eskatzen dizkion hizkuntza plangintza eta normalizazio arloko txosten eta kontsulta guztiak egin eta erantzutea.

e) Lan batzordeek egindako balizko txostenak eta proposamenak aztertzea eta, kasua bada, onestea.

f) Kontseiluak egindako jardueren urteko memoria onestea eta Nafarroako Gobernuari bidaltzea.

g) Indarrean dauden xedapenek berariaz esleitutako gainerako eginkizunak.

30. artikulua . Osaera, izendapena eta kargua uzteko arrazoiak.

1. Euskararen Nafar Kontseiluak burua, buruordea eta bokalak izanen ditu.

2. Kontseiluburua izanen da hizkuntza politikaren arloan eskumena duen departamentuko titularra.

3. Kontseiluburuordea izanen da Euskarabidea-Euskararen Nafar Institutuko zuzendari kudeatzailea.

4. Honako hauek izanen dira bokal:

- Euskararen Sustapenaren eta Plangintzaren Zerbitzuko zuzendaria.

- Komunikazioaren eta Proiekzio Instituzionalaren zuzendari nagusia.

- Kontseiluburuak izendaturiko zuzendari nagusi bat, esparru hauetako batekoa: hezkuntza, toki administrazioa, lehendakaritza eta gobernu irekia edo funtzio publikoa.

- Nafarroako Parlamentuak proposatutako bost kide.

- Erakunde eta entitate hauetako bakoitzeko ordezkari bat, nork berea:

- Euskaltzaindia,

- Nafarroako Unibertsitate Publikoa,

- Nafarroako Unibertsitatea,

- Eusko Ikaskuntza,

- Nafarroako Udal eta Kontzejuen Federazioa,

- Nafarroako Gazteriaren Kontseilua,

- Nafarroako Ikastolen Elkartea,

- Nafarroako Kazetarien Elkargoa,

- Euskalgintzaren Kontseilua.

- Beren estatutuetan euskara sustatzea helburu duten kultura elkarteek edo gizarte ekimeneko entitateek proposatutako zazpi kide.

- Euskararen eta euskal kulturaren eremuan izen ona duten pertsonen artetik izendatutako bost kide.

5. Euskararen Nafar Kontseiluko idazkaria izanen da Euskararen Sustapenaren eta Plangintzaren Zerbitzuko titularra.

6. Kontseiluko bokalak Nafarroako Gobernuaren erabakiaren bidez izendatuko dira, ordezten dituzten entitateek edo erakundeek proposatu ondoan. Bokal horiek izendatzeko kontuan hartuko da emakumezkoen eta gizonezkoen presentzia orekatuaren printzipioa, arrazoi oinarritu eta objektiboek eragozten ez badute behintzat.

Lau urteko agintaldia izanen dute bokalek, eta hura iraupen bereko epeetan berritzen ahal da. Kargualdia bukatzeagatik ez beste edozein arrazoirengatik uzten bada kargua, ordezten duen bokalaren kargualdia bukatu arte arituko da titular berria.

Orobat, honako kasuotan utzi beharko dute kargua bokalek:

- Heriotza edo ebazpen judizial irmo baten bidez deklaratutako desgaikuntza.

- Norberak eskatuta.

- Lanbidean edo politikan aritzeko desgaikuntza ekarri duen zigorra jasotzea epai irmo baten bidez.

- Ordezkaritza galtzea.

Hautatua izateko epea bukatuz gero, bokalek beren eginkizunetan jarraituko dute bokal berriak karguaz jabetzen diren arte.

Kargu hutsak betetzeko, izendapenak egiteko adierazitako prozedura berbera erabiliko da.

Euskararen Nafar Kontseiluko kide izateko izendatzen direnek, Nafarroako Gobernuaren ordezkari izendatutakoek izan ezik, konpentsazio ekonomikoa jasotzen ahal dute bileretara joateagatiko kilometraje- edo dieta-gastuetarako. Zenbatekoa kalkulatzeko, Foru Komunitateko Administrazioaren zerbitzuko langileentzat ezarritako tarifak aplikatuko dira.

31. artikulua . Ordezkoak.

1. Kontseiluburua ez dagoenean, kontseiluburuordeak ordeztuko du.

2. Idazkaria ez dagoenean, Zuzenbideko lizentziadun batek ordeztuko du, baldin eta Euskarabidea-Euskararen Nafar Institutua erakunde autonomoan titulazio hori eskatzen duen lanpostu bat betetzen badu.

3. Bokal bakoitzeko, titular bat eta ordezko bat izendatu beharko dira. Kargua hutsik dagoenean edo titularra kanpoan edo eri dagoenean arituko da ordezkoa.

32. artikulua . Antolaketa eta funtzionamendua.

1. Euskararen Nafar Kontseiluak foru dekretu honen xedapenen arabera onetsiko du bere barne-araudia.

2. Euskararen Nafar Kontseiluak sei hilean behin eginen du osoko bilkura arrunta, eta osoko bilkura berezia, berriz, kontseiluburuak hala erabakitzen duenean bere ekimenez edo hala eskatzen duenean bokalen heren batek, gutxienez.

3. Euskararen Nafar Kontseilua balioz era dadin, beharrezkoa izanen da beti kontseiluburua eta idazkaria bertan egotea, edo haiek ordezten dituztenak. Lehenbiziko deialdiak balioa izateko, kideen gehiengoak egon behar du, eta, bigarren deialdian berriz, kideen heren batek gutxienez.

4. Kontseiluak bertaratzen diren kideen gehiengoaren bidez hartuko ditu erabakiak, eta erabakitako txostenen eta irizpenen arrazoiak emanen dira. Boto partikularrak eransten ahal dira, gehiengoz hartutako erabakiaren kontrakoak badira.

Berdinketarik egonez gero, kontseiluburuaren kalitateko botoak erabakiko du.

5. Akta eginen da bilkura bakoitzean, eta hartan jasoko dira hartutako erabakiak.

6. Kontseiluko edozein kidek proposatuta eta Kontseiluak onetsi ondoan, lantaldeak eratzen ahal dira gai zehatz batzuetarako. Kontseiluaren erabakiaren bidez zehaztuko dira horien osaera, funtzionamendua eta helburua. Kontseiluari aldian-aldian emanen zaio horien lanen, ondorioen eta agirien berri. Kontseilutik kanpoko pertsonak onartzen ahalko dira osaeran, baina halakoak ez dira lantaldeko kideen erdiak baino gehiago izanen.

7. Kontseiluburuak honako eginkizun hauek ditu:

a) Euskararen Nafar Kontseiluaren ordezkari izatea.

b) Bilkuren deialdia egitea eta gai-zerrenda jartzea. Horretarako, kontuan hartuko ditu Kontseilua osatzen dutenen eskaerak, behar bezain goiz egiten badira.

c) Bilkuretako buru izatea, eztabaidak arautzea eta eztabaida horiek etetea justifikatutako arrazoiengatik. Berdinketarik gertatuz gero, bere botoaren bidez ebatziko ditu, erabakiak hartzeko.

d) Organoak hartzen dituen erabakien aktak eta ziurtagiriak ikus-onestea.

e) Adituak edo interesdunak gonbidatzea bilkuretan parte hartzera.

f) Kontseiluburua izateagatik berezko dituen edo indarreko araudiak esleitzen dizkion eginkizunak betetzea.

8. Kontseiluburuordeak honako eginkizun hauek ditu:

a) Kontseiluburua ordeztea, kargua hutsik dagoenean, hura eri edo kanpoan dagoenean, edo beste arrazoi justifikatu batzuetan.

b) Kontseiluburuak edo Kontseiluaren Osoko Bilkurak esleitzen dizkion eginkizunak betetzea, kontseiluak kudeaketa, antolaketa eta funtzionamendu ona izan ditzan.

9. Idazkariak honako eginkizun hauek ditu:

a) Bilkuretarako deia egitea, kontseiluburuak hala aginduta, eta Kontseilua osatzen dutenendako zitazioak egitea.

b) Kontseiluko kideen komunikazio egintzak jasotzea, hau da, jakinarazpenak, datu-eskaerak, zuzenketak edo haren ardurakoak diren bestelako idazki guztiak.

c) Gaiak ebazteko bidea prestatzea, bilkuren aktak egin eta baimentzea, eta onetsitako erabakien, irizpenen eta kontsulten ziurtagiriak egitea.

d) Lantaldeen zereginak koordinatzea.

e) Kontseiluak egindako jardueren urteko memoria prestatzea.

f) Kontseiluaren dokumentazioa zaintzea.

g) Idazkaria izateagatik berezko dituen edo indarreko araudiak esleitzen dizkion eginkizunak betetzea.

Kontseiluko bilkuretan, idazkariari hizkuntza politikaren arloan eskumena duen departamentuko funtzionario batek laguntzen ahal dio.

10. Jorratu edo aztertu beharreko gaien arabera, edozein kidek eskatzen ahal dio kontseiluburuari adituek edo interesdunek parte har dezaten. Horiek hizpidea izanen dute, baina botorik ez.

33. artikulua . Gardentasuna eta gizarteari irekitzea.

Euskarabidea-Euskararen Nafar Institutuak Gobernu Irekiaren Atarian edo xede horretarako sortzen diren beste plataforma batzuetan argitaratuko ditu Euskararen Nafar Kontseiluaren osaera, aplikazio araudia, gai-zerrendak, aktak, irizpenak, azterlanak, txostenak eta urteko memoriak.

IV. TITULUA. ONDAREA, BALIABIDEAK, AURREKONTUAK ETA KONTROLA

34. artikulua . Ondarea.

Euskarabidea-Euskararen Nafar Institutuaren ondare araubidea izanen da Nafarroako Ondareari buruzko araudian erakunde autonomoetarako oro har ezarritakoa.

35. artikulua . Baliabide ekonomikoak.

Euskarabidea-Euskararen Nafar Institutua ondoko baliabideez finantzatuko da:

a) Bere esku jartzen diren ondasun eta eskubideak.

b) Ondasun eta eskubide horien produktu eta errentak.

c) Kobratzen ahal dituzten ohiko eta ohiz kanpoko diru-sarrerak, arautzen dituzten xedapenen arabera.

d) Nafarroako aurrekontu orokorretan esleiturik dituen transferentzia arruntak edo kapitalekoak.

e) Administrazioek edo entitate publikoek ematen dizkioten dirulaguntzak, arruntak zein kapitalekoak.

f) Dohaintzak, legatuak eta entitate pribatuen nahiz partikularren bestelako ekarpenak.

g) Esleitzen zaizkion gainerako baliabideak.

36. artikulua . Aurrekontuen araubidea.

Euskarabidea-Euskararen Nafar Institutuaren kudeaketa urteko aurrekontuen araubidearen mendean izanen da, eta hori Nafarroako Parlamentuak onetsi beharko du.

Aurrekontuen egitura, diru-sarreren eta gastuen sailkapenari eta horien zehaztasun mailari dagokienez, Nafarroako Aurrekontu Orokorretarako ezarritako arau eta erregelei egokituko zaie, aurrekontu orokor horien barnean baitira.

Aurrekontuen exekuzioari eta likidazioari dagokienez, Nafarroako Aurrekontu Orokorrei aplikatzen zaizkien arau orokorretara joko da.

37. artikulua . Kontuhartzailea.

Euskarabidea-Euskararen Nafar Institutuaren kudeaketa ekonomikoa -kontzeptu horretan egintza, agiri eta espedienteetatik heldu diren eduki ekonomikoko eskubide eta betebeharrak sartzen dira- Nafarroako Foru Komunitateko Administrazioak dituen era eta baldintza berberetan eramanen da, dela kontu-hartzailetzaren arloan, dela kontabilitatearen arloan.

38. artikulua . Kontabilitate araubidea.

1. Euskarabidea-Euskararen Nafar Institutua kontabilitate publikorako araubidearen mendean geldituko da, Foru Komunitatearen Administrazioak dituen era eta baldintza berberetan.

2. Kontuak ematea Nafarroako Kontu Orokorretarako aurreikusitakoaren arabera formalizatu, tramitatu eta ebatziko da.

V. TITULUA. LANGILEAK

39. artikulua . Langileen araubidea.

1. Honako hauek dira Euskarabidea-Euskararen Nafar Institutuko langileak:

a) Nafarroako Gobernuak hautaturik, izendapen libreko zuzendaritza karguetan aritzen direnak.

b) Euskarabidea-Euskararen Nafar Institutuari atxikita dauden edo atxikiko zaizkion Foru Komunitateko Administrazioko funtzionarioak eta lan-kontratudunak.

c) Erakunde autonomoari berari atxikitako aldi baterako lan-kontratudunak eta administrazio-kontratudunak.

2. Euskarabidea-Euskararen Nafar Institutuaren zerbitzuko langileak funtzionarioak, estatutupekoak edo lan-kontratudunak izanen dira, Nafarroako Foru Komunitatearen Administraziorako ezarritako modu berean.

VI. TITULUA. EGINTZEN ARAUBIDE JURIDIKOA

40. artikulua . Araubide juridiko orokorra.

1. Euskarabidea-Euskararen Nafar Institutuaren egintzen araubide juridikoa da martxoaren 11ko 11/2019 Foru Legearen III. tituluko II. kapituluan erakunde autonomoetarako ezarritakoa (foru lege hori Nafarroako Foru Komunitateko Administrazioari eta foru-sektore publiko instituzionalari buruzkoa da).

2. Langileei, kontratazioei eta aurrekontuei buruzko administrazio egintzei dagokienez, Foru Komunitateko Administrazioaren araudi berariazkoari jarraituko zaio.

41. artikulua . Errekurtsoak.

1. Euskarabidea-Euskararen Nafar Institutuko zuzendari kudeatzaileak ebazpen gisa emanen ditu bere egintza administratiboak. Egintza horiek, bide judizial zibilaren eta lanekoaren aurreko erreklamazioak eta ondare-erantzukizunari buruzkoak ebazten dituztenak izan ezik, ez dute bide administratiboa amaitzen, eta gora jotzeko errekurtsoa jartzen ahal da horien aurka hizkuntza politikaren arloan ardura duen departamentuko titularrari zuzenduta.

2. Bide administratiboari amaiera ematen dioten Euskarabidea-Euskararen Nafar Institutuko organoen egintzen eta ebazpenen aurka, aukerako berraztertze-errekurtsoa jartzen ahal da egintza edo ebazpena eman duen organoari zuzenduta.

3. Bide judizial zibilaren edo lanekoaren aurreko erreklamazioen gaineko ebazpenen kontra, demanda jartzen ahal da jurisdikzio eskudunari zuzendua.

4. Euskarabidea-Euskararen Nafar Institutuko zuzendari kudeatzaileak emandako egintzei dagokienez, hizkuntza politikaren arloan ardura duen departamentuko titularrak emandako foru agindu bidez eginen da egintza deusezen ofiziozko berrikuspena, egintza deuseztagarriak kaltegarri deklaratzea eta kargak ezartzen dituztenak edo kalterako direnak ezeztatzea.

42. artikulua . Laguntza juridikoa.

Botere Judizialari buruzko Lege Organikoaren 551.3 artikuluari jarraikiz, Euskarabidea-Euskararen Nafar Institutuaren ordezkaritza eta defentsa epaiketetan Nafarroako Gobernuko Aholkularitza Juridikoan aritzen diren legelariei dagokie, ordezkatzeko eta defendatzeko elkargoko abokatua izendatzen den kasuetan salbu.

Halaber, Nafarroako Gobernuko Aholkularitza Juridikoak lege arloko aholkua ematen ahalko dio Euskarabidea-Euskararen Nafar Institutuari. Hori guztia, urtarrilaren 5eko 4/1984 Foru Dekretuak ezarritakoari jarraikiz.

Gobierno de Navarra

Contacte con nosotros | Accesibilidad | Aviso legal | Mapa web