(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

239/2023 FORU DEKRETUA, AZAROAREN 15EKOA, MEMORIA ETA BIZIKIDETZAKO, KANPO EKINTZAKO ETA EUSKARAKO DEPARTAMENTUAREN EGITURA ORGANIKOA EZARTZEN DUENA

BON N.º 244 - 23/11/2023

  I. KAPITULUA. XEDAPEN OROKORRAK

  II. KAPITULUA. MEMORIA ETA BIZIKIDETZA ZUZENDARITZA NAGUSIA

  1. ATALA. ESKUMENEN ESPARRU MATERIAL ETA EGITURA

  2. ATALA. BIZIKIDETZAREN ETA GIZA ESKUBIDEEN ZERBITZUA

  3. ATALA. NAFARROAKO MEMORIAREN INSTITUTUA

  III. KAPITULUA. KANPO EKINTZARAKO ZUZENDARITZA NAGUSIA

  1. ATALA. ESKUMENEN ESPARRU MATERIAL ETA EGITURA

  2. ATALA. ESKUALDEEN ARTEKO LANKIDETZAREN ETA KANPOKO HERRITARREN ZERBITZUA

  3. ATALA. EUROPAKO PROIEKTUEN BULEGOAREN ZERBITZUA

  IV. KAPITULUA. IDAZKARITZA TEKNIKO NAGUSIA

Zioen azalpena

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean xedatutakoari jarraikiz, Nafarroako Gobernuari dagokio departamentu bakoitzaren egitura organikoa onestea.

Nafarroako Foru Komunitateko Lehendakariaren abuztuaren 17ko 10/2023 Foru Dekretuaren bidez, Nafarroako Foru Komunitateko Administrazioaren departamentuen egitura ezarri zen.

Era berean, abuztuaren 30eko 65/2023 Foru Dekretuaren bidez, Memoria eta Bizikidetzako, Kanpo Ekintzako eta Euskarako Departamentuaren oinarrizko egitura ezarri zen.

Egokia da, orain, behar bezala garatzea Foru Komunitateko Administrazioaren departamentu bakoitzaren egitura.

Foru dekretu honen xedea da Memoria eta Bizikidetzako, Kanpo Ekintzako eta Euskarako Departamentuaren egitura organiko berria garatzea.

Hori horrela, Memoria eta Bizikidetzako, Kanpo Ekintzako eta Euskarako kontseilariak proposaturik, eta Nafarroako Gobernuak bi mila eta hogeita hiruko azaroaren hamabostean egindako bilkuran hartutako erabakiarekin bat,

DEKRETATZEN DUT:

I. KAPITULUA. XEDAPEN OROKORRAK

1. artikulua . Memoria eta Bizikidetzako, Kanpo Ekintzako eta Euskarako Departamentuaren eskumenen esparrua.

Memoria eta Bizikidetzako, Kanpo Ekintzako eta Euskarako Departamentuak beteko ditu Nafarroako Foru Komunitateko Administrazioak gai hauetan esleituak dituen eskumenak: hizkuntza politika; euskararen berreskurapena eta garapena; hizkuntza politikaren arloko erakunde eta entitateekiko harremanak; Nafarroako Foru Komunitateko Administrazioaren hizkuntza planen koordinazioa; bakeari, bizikidetzari eta giza eskubideei buruzko politikak; Europar Batasunaren erakundeetan Foru Komunitatearen interesen ordezkaritza, babesa eta sustapena; parte-hartzea Europar Batasunaren gaineko aferetan eta erakundeetan; Nafarroako Gobernuaren ordezkaritza Europar Batasunean; mugaz gaindiko eta eskualdeen arteko lankidetza; kanpoan bizi diren herritar nafarrekiko harremanak eta haientzako arreta; Europar Batasunaren 2021-2027 aldirako Urte Anitzeko Finantza Esparruko proiektuen koordinazioa eta sustapena; eta indarra duten xedapenetan ematen zaizkion gainerako eskudantziak.

2. artikulua . Memoria eta Bizikidetzako, Kanpo Ekintzako eta Euskarako Departamentuko titularra.

1. Memoria eta Bizikidetzako, Kanpo Ekintzako eta Euskarako Departamentuko titularrak, foru dekretu honen 1. artikuluan zehaztutako eskumenen esparruari loturik, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluan ezarritako eskudantziak izanen ditu.

2. Bereziki, eskudantzia hauek dagozkio:

a) Dirulaguntza deialdiak eta haien oinarri arautzaileak onestea.

b) Elkarlanerako hitzarmenak eta lankidetza hitzarmenak eta akordioak sinatzea Estatuarekin, autonomia erkidegoekin eta beste administrazio publiko batzuekin.

c) Bere eskumenen esparruan beste administrazio batzuekin batera jarduteko planak onestea.

3. Era berean, Memoria eta Bizikidetzako, Kanpo Ekintzako eta Euskarako Departamentuko titularrari dagokio kide anitzeko organo hauetako buru izatea:

- Euskararen Nafar Kontseilua.

- Terrorismoaren Biktimei Laguntzeko Nafarroako Batzordea.

- Memoria Historikoaren arloko Koordinazio Batzorde Teknikoa.

4. Memoria eta Bizikidetzako, Kanpo Ekintzako eta Euskarako Departamentuko titularrari sostengu politiko eta teknikoa emateko unitate gisa, eta zuzenean haren mende, kabinete bat dago departamentuan, Nafarroako Gobernuari eta Lehendakariari buruzko abenduaren 3ko 14/2004 Foru Legearen 19. artikuluari lotua dagoena.

3. artikulua . Memoria eta Bizikidetzako, Kanpo Ekintzako eta Euskarako Departamentuaren antolamendu orokorra.

1. Memoria eta Bizikidetzako, Kanpo Ekintzako eta Euskarako Departamentuak, bere titularraren goi-zuzendaritzapean, honako organo hauek ditu bere egituran:

a) Memoria eta Bizikidetza Zuzendaritza Nagusia.

b) Kanpo Ekintzarako Zuzendaritza Nagusia.

c) Departamentuko Idazkaritza Tekniko Nagusia.

2. Euskarabidea-Euskararen Nafar Institutua erakunde autonomoa Memoria eta Bizikidetzako, Kanpo Ekintzako eta Euskarako Departamentuari atxikita gelditzen da, eta bere estatutuen arabera arautuko da.

4. artikulua . Zuzendaritza nagusien eskudantziak.

Foru dekretu honen 2. artikuluan ezarritakoa galarazi gabe, Memoria eta Bizikidetzako, Kanpo Ekintzako eta Euskarako Departamentuko zuzendari nagusiei dagokie, departamentuko titularraren goi-zuzendaritzapean eta foru dekretu honetan bakoitzari esleitutako esparruan, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 31. eta 32. artikuluetan eta azken xedapenetako lehenbizikoan ezarritako eskudantziak erabiltzea eta, horiez gainera, indarrean dauden xedapenek esleitzen dieten edo Memoria eta Bizikidetzako, Kanpo Ekintzako eta Euskarako Departamentuko titularrak agintzen dien beste edozein.

5. artikulua . Idazkaritza Tekniko Nagusiaren eskudantziak.

Memoria eta Bizikidetzako, Kanpo Ekintzako eta Euskarako Departamentuko Idazkaritza Tekniko Nagusiak, foru dekretu honen 1. artikuluan zehaztutako eskumenen esparruan, eta Memoria eta Bizikidetzako, Kanpo Ekintzako eta Euskarako Departamentuko titularraren goi-zuzendaritzapean, berari atxikita baitago zuzenean Idazkaritza Tekniko Nagusia, honako eskudantzia hauek beteko ditu:

a) Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 33. artikuluan zehazturikoak.

b) Idazkaritza Tekniko Nagusiak arautzen dituen otsailaren 21eko 29/2005 Foru Dekretuan ezarritakoak, baita langileriaren arloko eskudantziak zehazten dituen otsailaren 21eko 30/2005 Foru Dekretuaren 6. artikuluan ezarritakoak ere.

c) Memoria eta Bizikidetzako, Kanpo Ekintzako eta Euskarako Departamentuko gainerako organoei laguntzea genero ikuspegiaren zeharkakotasuna aplikatzen departamentuaren esparruko politikak planifikatu, kudeatu eta ebaluatzean, bat eginik Emakumeen eta Gizonen arteko Berdintasunari buruzko apirilaren 4ko 17/2019 Foru Legearekin.

d) Departamentuko gainerako organoei laguntzea, bere eskumeneko politikak gauzatzean, azaroaren 28ko 31/2022 Foru Legera doitzeko egokitzapenak egin daitezen (31/2022 Foru Legea, Nafarroan desgaitasuna dutenei arreta emateari eta beren eskubideak bermatzeari buruzkoa).

e) Informazio publikoa kudeatzea, Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen arabera.

f) Herritarren parte-hartzea, Nafarroako Parte-hartze Demokratikoari buruzko martxoaren 22ko 12/2019 Foru Legearen arabera.

g) Departamentuko gainerako organoei laguntzea informazioaren segurtasunari buruzko araudia aplikatzen, Nafarroako Foru Komunitateko Administrazioaren Datuak Babesteko eta Informazioaren Segurtasunerako Politikan zehaztutakoa betetzeko.

h) Esleitzen zaizkion fundazioen babesle-lana betetzea, Nafarroako Fundazioei buruzko ekainaren 30eko 13/2021 Foru Legearen arabera.

i) Indarrean dauden xedapenek esleitzen dioten beste edozein, edo Memoria eta Bizikidetzako, Kanpo Ekintzako eta Euskarako Departamentuko titularrak agintzen dion beste edozein, eta horretarako behar diren ebazpenak emanen ditu.

6. artikulua . Zerbitzuen eskudantziak.

Zerbitzuek, departamentuko goragoko organoen zuzendaritzapean eta foru dekretu honetan bakoitzari esleitutako esparru materialean, bat etorriz martxoaren 11ko 11/2019 Foru Legearen 35. artikuluarekin, eginkizun hauek izanen dituzte: beren mendeko atalak edo unitate organikoak planifikatu, koordinatu, zuzendu eta kontrolatzea; prozedurak arindu, arrazionalizatu eta sinplifikatzeko printzipioak bultzatu eta sustatzea; eta, halaber, indarra duten xedapenek berariaz esleitzen dieten edo departamentuko organo eskudunek haietan deskontzentratzen edo eskuordetzen duten beste edozein.

7. artikulua . Atalen eskudantziak.

Atalek, departamentuko goragoko organoen zuzendaritzapean eta foru dekretu honetan bakoitzari esleitutako esparru materialean, bat etorriz martxoaren 11ko 11/2019 Foru Legearen 37. artikuluarekin, eginkizun hauek izanen dituzte: beren eskumenen esparruko lanak gauzatzea eta goragoko nagusientzako txostenak eta proposamenak egitea; beren mendeko bulegoek eta unitateek egiten dituzten lanak koordinatzea, zuzentzea eta kontrolatzea; eta, halaber, Departamentuko organo eskudunek agintzen dizkieten gainerako eginkizun guztiak betetzea.

II. KAPITULUA. MEMORIA ETA BIZIKIDETZA ZUZENDARITZA NAGUSIA

1. ATALA. ESKUMENEN ESPARRU MATERIAL ETA EGITURA

8. artikulua . Memoria eta Bizikidetza Zuzendaritza Nagusiaren eskumenen esparru material eta funtzionala.

Memoria eta Bizikidetza Zuzendaritza Nagusiak, bere kudeaketa esparruko gaietan, foru dekretu honetan ezarritako eskudantziak izanen ditu, eta, berariaz, honako eginkizun hauek beteko ditu:

a) Oraingo etapa historikoa (hots, indarkeria terroristaren, motibazio politikoari lotutako indarkeriaren eta jazarpenezko indarkeriaren ondokoa) kudeatzera bideratutako politika publikoak diseinatzea, zuzentzea eta ezartzea.

b) Memoria historikoari, memoria demokratikoari eta memoria hurbilari buruzko politika publikoak definitzea.

c) Indarkeria terroristaren eta politikoaren biktima guztiei elkartasuna adierazteko, aitortza egiteko eta arreta emateko politikak garatzea.

d) Politika horiek garatzeko eta aplikatzeko bidea ematen duten proiektu, plan eta programak bultzatzea, horiek gauzatzean buru aritzea eta behar bezala betetzen direla kontrolatzea.

e) Gainerako departamentuekin eta entitate, elkarte eta erakunde publiko edo pribatuekin batera -bereziki, Nafarroako Parlamentuarekin- lan egitea eta elkarri eragitea, helburu berak garatzeko.

f) Gaia dela eta, zuzendaritza nagusiaren eskumeneko arloei dagozkien dirulaguntza-deialdiak proposatzea eta ebaztea.

g) Indarra duten xedapenek Memoria eta Bizikidetzako, Kanpo Ekintzako eta Euskarako Departamentuari esleitzen dizkioten beste batzuk, zuzendaritza nagusiaren esparrukoak, bai eta bere jardueraren esparruan agintzen zaizkionak ere.

9. artikulua . Memoria eta Bizikidetza Zuzendaritza Nagusiaren egitura.

Memoria eta Bizikidetza Zuzendaritza Nagusiak zerbitzu hauek ditu bere egituran:

a) Bizikidetzaren eta Giza Eskubideen Zerbitzua.

b) Nafarroako Memoriaren Institutua.

2. ATALA. BIZIKIDETZAREN ETA GIZA ESKUBIDEEN ZERBITZUA

10. artikulua . Bizikidetzaren eta Giza Eskubideen Zerbitzuaren esparru material eta funtzionala.

Bizikidetzaren eta Giza Eskubideen Zerbitzuak honako eginkizun hauek beteko ditu:

a) Nafarroako Gobernuaren bizikidetzarako plan estrategikoak egitea, zuzentzea eta ebaluatzea.

b) Biktima zeinahi dela ere, egian, memorian, justizian eta eragindako kaltearen erreparazioan oinarritzen den ekintza politikoa egitea.

c) Terrorismoaren biktimak babestu eta aintzatestea, eta horiei kalte-ordainak ematea.

d) Motibazio politikoko ekintzen biktimak aintzatesteko eta horiei kalte-ordainak emateko prozesuak garatzea, martxoaren 26ko 16/2019 Foru Legean aurreikusiak baitaude.

e) Lankidetza harremanak izatea administrazio publiko, erakunde eta entitate sozialekin, biktimei laguntza integrala eta egokia emateko asmoz.

f) Indarkeriari eta haren ondorio sozialei buruzko ikerlan eta argitalpenak sustatzea.

g) Alde batetik, herritarren partaidetza eta, beste aldetik, giza eskubideekin eta bizikidetza demokratikoaren balioekin bat egiten duten elkarteen eta fundazioen lankidetza sustatzea.

h) Sentsibilizazio sozialeko eta prestakuntzako ekimenak bultzatzea, honako balio hauekiko errespetuan oinarritzen den bizikidetzaren aldeko kultura sustatzeko asmoz: giza duintasuna, giza eskubideak, printzipio demokratikoak, biktimekiko elkartasuna eta gatazken konponbide baketsua.

i) Giza eskubideen urraketaren bat jasan duten biktimak aintzatesteko jardunaldiak antolatzea.

j) Indarra duten xedapenek esleitzen dizkioten beste batzuk, bai eta bere jardueraren esparruan agintzen zaizkionak ere.

11. artikulua . Bizikidetzaren eta Giza Eskubideen Zerbitzuaren egitura.

Bizikidetzaren eta Giza Eskubideen Zerbitzuak atal hauek ditu bere egituran:

a) Biktimen Arretarako Bulegoa.

b) Bizikidetza Atala.

12. artikulua . Biktimen Arretarako Bulegoaren esparru material eta funtzionala.

Biktimen Arretarako Bulegoak honako eginkizun hauek beteko ditu:

a) Terrorismoaren eta motibazio politikoaren ondoriozko biktimekiko elkartasuna sustatzea eta haien aitortza publiko eta soziala egitea.

b) Biktimen kasuan, egia jakiteko, justizia izateko eta jasandako kaltearen erreparazioa izateko eskubideak bete daitezen laguntzea.

c) Lankidetza-guneak bilatzea arlo honetan esku hartzen duten erakunde eta entitate sozial guztiekin batera lan egiteko.

d) Giza eskubideen urraketa jasan duten pertsona guztien errolda antolatzea.

e) Biktimei arreta zuzena ematea, lagun eginez eta dituzten eskubideei eta baliabideei buruzko informazioa emanez, indarrean dagoen legeriaren arabera.

f) Biktimek hezkuntza-programetan parte har dezaten bultzatzea, beren sufrimendu-testigantza jaso ahal izateko.

g) Terrorismoaren, motibazio politikoko indarkeriaren eta giza eskubideen urraketen ondoriozko biktima guztiak oroitzeko eta aintzat hartzeko jarduerak sustatzea udal esparruan.

h) Zikloak, ikastaroak, mintegiak edo biltzarrak antolatzea, gizarte osoari informazioa emateko eta hausnarketa egiteko, gai honi buruz: terrorismoa eta motibazio politikoko indarkeria dela kausa giza eskubideen alorrean izandako urraketen larritasuna eta garrantzia.

i) Haren esku uzten den beste edozein eginkizun, aipatutakoen antzekoa edo osagarria bada.

13. artikulua . Bizikidetza Atalaren esparru material eta funtzionala.

Bizikidetza Atalak honako eginkizun hauek beteko ditu:

a) Udal esparruan bizikidetza bultzatzeko, indarkeria deslegitimatzeko eta giza eskubideak sustatzeko jarduketak sustatzea.

b) Ikastetxeekiko lankidetza bultzatzea ikasleak gai hauetan prestatzeko eta hezteko: giza eskubideak, biktimekiko elkartasuna, gatazken konponbide baketsua eta bizikidetza.

c) Jarduketa lerro berariazkoak sustatzea gazteriaren, kulturaren eta hezkuntza ez-formalaren esparruan, arlo horietan eskumena duten erakundeekin bat.

d) Laguntza eta bultzada ematea bizikidetzaren eta giza eskubideen defentsaren kultura sustatzeko hezkuntzako ekimenei eta ekimen sozialei.

e) Herritarrek bakearen, bizikidetzaren eta giza eskubideen errespetuaren arloan parte har dezatela sustatzea.

f) Sentsibilizazio ekimenak bultzatzea indarkeriaren kontrako eta giza eskubideen eta bizikidetza demokratikoaren balioen aldeko kontzientzia sozial kritikoa sendotzeko.

g) Zikloak, ikastaroak, mintegiak edo biltzarrak abian jartzea gogoeta egiteko eta gizarteari oro har informazioa emateko gai hauei buruz: indarkeria deslegitimatzearen garrantzia eta gai horren larritasuna, eta bizikidetza eta giza eskubideak sustatzen dituen kulturaren alde lan egin beharra.

h) Haren esku uzten den beste edozein eginkizun, aipatutakoen antzekoa edo osagarria bada.

3. ATALA. NAFARROAKO MEMORIAREN INSTITUTUA

14. artikulua . Nafarroako Memoriaren Institutuaren esparru material eta funtzionala.

Nafarroako Memoriaren Institutua Memoria eta Bizikidetza Zuzendaritza Nagusiaren mendeko zerbitzu bat izanen da, eta eginkizun hauek beteko ditu:

a) Memoriaren ondarea kontserbatzea Nafarroan, euskarri desberdinetan.

b) Nafarroako memoria demokratikoa herritar guztiei zabaltzen zaiela bermatzea, eskura dauden bitartekoen bidez eta, bereziki, Oroibidea/Camino de memoria izeneko memoria historikoaren tokia indartuz.

c) Elkarteekin eta beste erakunde publiko eta pribatu batzuekin lankidetzan, memoria historikoari eta memoria hurbilari buruzko ikerketa bultzatzea.

d) Memoria oinarri harturik, giza eskubideen balioa eta bakearen kultura sustatzea, batik bat geroko belaunaldiak aintzat harturik.

e) Nafarroako Memoriaren Institutuaren helburu berekin lan egiten duten erakunde eta elkarte publiko eta pribatuekiko parte-hartzea eta lankidetza sustatzea.

f) Errepresio frankistaren, terrorismoaren eta motibazio politikoko indarkeriaren biktimen aitortza eta erreparazio morala egitea, biktima bakoitzaren memoria bere testuinguru biktimologikoan aintzat hartuz.

g) Ekitaldiak, argitalpenak, jardunaldiak eta abar antolatuz, kultura demokratikoa defendatzen lagundu duten gertakari, pertsona edo taldeak oroitzea.

h) Nafarroako memoria historikoaren tokiak babestea eta hedatzea, arlo horretako foru legeria aplikatuz.

i) Indarra duten xedapenek esleitzen dizkioten beste batzuk, bai eta bere jardueraren esparruan agintzen zaizkionak ere.

15. artikulua . Nafarroako Memoriaren Institutuaren egitura.

Nafarroako Memoriaren Institutuak atal hauek ditu:

a) Memoria Atala.

b) Dokumentazio Atala.

16. artikulua . Memoria Atalaren esparru material eta funtzionala.

Memoria Atalak honako eginkizun hauek beteko ditu:

a) Eskolak eta Memoria izeneko programaren esparruan, giza eskubideen eta memorian oinarritutako bizikidetzaren balioa nabarmentzea helburu duten hezkuntza-jarduerak garatzea.

b) Nafarroako Memoriaren Institutuaren helburu berekin lan egiten duten erakunde eta elkarte publiko eta pribatu guztiekin parte hartzeko eta lankidetzan aritzeko esparruak ezartzea eta horien funtzionamendua antolatzea.

c) Ahaideen elkarteekin eta elkarte memorialistekin koordinatuta, Nafarroan indarkeria frankistaren biktimak hobitik ateratzeko urteko planak diseinatzea.

d) 1936ko kolpe militarraren ondoren desagertutako pertsonen ahaideen laginak eta, orobat, Desobiratze Planaren ondorioz hobitik ateratzen diren gorpuzkien laginak jasotzeaz arduratzen den DNA bankua koordinatzea.

e) Jarduketak antolatzea errepresio frankistaren, terrorismoaren eta motibazio politikoko indarkeriaren biktimen aitortza eta erreparazio morala egiteko, biktima bakoitzaren memoria bere testuinguru biktimologikoan aintzat hartuz.

f) Espazio publikoa demokratizatzeko jarduketak sustatzea, sinbologia frankista guztia behin betiko kenduz.

g) Haren esku uzten den beste edozein eginkizun, aipatutakoen antzekoa edo osagarria bada.

17. artikulua . Dokumentazio Atalaren esparru material eta funtzionala.

Dokumentazio Atalak honako eginkizun hauek beteko ditu:

a) Dokumentazioa eta testigantzak biltzeko programak garatzea, Nafarroako memoriaren ondarea euskarri desberdinetan kontserbatzeko.

b) Biktimen testigantzak, bizipenak eta gogoetak argitara daitezen laguntzea.

c) Memoria historikoarekin eta memoria hurbilarekin lotutako ikerketa-proiektuak diseinatzea, elkarteekin eta beste erakunde publiko eta pribatu batzuekin lankidetzan.

d) Hedapen eta sentsibilizazio proposamenak egitea memoria-ondarea herritarren eskura jartzeko asmoz, erakusketa fisiko edo birtualen bidez eta Oroibidea artxibo digitalaren bidez.

e) Nafarroako Memoria Historikoaren Tokien Erregistroa eguneratzeko lanak koordinatzea eta haien zabalkundea bultzatzea, bakerako eta bizikidetzarako gune eta balio demokratikoak ikuspegi kritikotik transmititzeko gune izan daitezen.

f) Iragan hurbilean bakeari eta bizikidetzari egindako ekarpenagatik edo errespetuan, bakean eta giza eskubideetan oinarritutako kultura demokratikoa defendatzeagatik gogoratzeko modukoak diren gertakariak oroitarazteko argitalpenak, jardunaldiak eta abar antolatzen laguntzea.

g) Haren esku uzten den beste edozein eginkizun, aipatutakoen antzekoa edo osagarria bada.

III. KAPITULUA. KANPO EKINTZARAKO ZUZENDARITZA NAGUSIA

1. ATALA. ESKUMENEN ESPARRU MATERIAL ETA EGITURA

18. artikulua . Kanpo Ekintzarako Zuzendaritza Nagusiaren eskumenen esparru material eta funtzionala.

1. Kanpo Ekintzarako Zuzendaritza Nagusiak, bere kudeaketa esparruko gaietan, foru dekretu honetan ezarritako eskudantziak beteko ditu, eta, berariaz, honako eginkizun hauek:

a) Nafarroako kanpo ekintza planifikatu, koordinatu eta bultzatzea, Nafarroako Gobernuko beste departamentu batzuekin elkarlanean.

b) Europar Batasunaren aurrean Nafarroaren interesak ordezkatzea, eta horiek sustatu eta babestea, Nafarroako Foru Komunitateko Administrazioaren beste organo batzuei esleitutako eskumenak galarazi gabe.

c) Nafarroako Foru Komunitateko Administrazioaren eta Europako eta/edo nazioarteko erakundeen arteko harremanak koordinatzea, Nafarroarentzat interesekoak diren proiektuen eta programen jarraipena egiteko.

d) Foru Komunitateko Administrazioko unitate organikoekin koordinatzea Espainiako eta nazioarteko erakundeekin hitzarmenak, akordioak eta protokoloak izenpetzeko, Nafarroako kanpo proiekzioa sendotzea helburu.

e) Nafarroako Gobernuaren 2021-2024 aldirako Kanpo Ekintzaren Plana garatzea eta hurrengo planak eguneratzea.

f) Mugaz gaindiko eta eskualdeen arteko lankidetza harremanak bultzatzea eta koordinatzea.

g) Kanpoan dauden nafar taldeekiko harreman eta arreta politika planifikatzea.

h) Nafarroaren irudia bultzatzea, hura sustatuz eta kanpo proiekzioa eginez.

i) Laguntza ematea Foru Administrazioari, enpresei, SINAIko eragileei eta Nafarroako gizarteari, Europako proiektuetan parte har dezaten eta Europako sareetan aktiboki parte har dezaten.

j) Indarra duten xedapenek Memoria eta Bizikidetzako, Kanpo Ekintzako eta Euskarako Departamentuari esleitzen dizkioten beste batzuk, zuzendaritza nagusiaren esparrukoak, bai eta bere jardueraren esparruan agintzen zaizkionak ere.

2. Kanpo Ekintzarako Zuzendaritza Nagusiaren menpe egonen da zuzenean Europar Batasuneko Gaietarako Nafarroak duen Bulego Iraunkorra, eta honako eginkizun hauek beteko ditu:

a) Europar Batasuneko Eskualdeetako Komitearen lanen jarraipena egitea, bai eta Nafarroako Foru Komunitatearentzat interesgarriak diren Europako beste erakunde eta sare batzuena ere.

b) Europar Batasuneko erakundeek erabakiak hartzeko jarraitutako prozesuaren segimendua egitea eta erakunde horiek arauak sortzeko prozesuetan informazioa lortzea, Nafarroako Foru Komunitatearen interesei eragiten zaien neurrian.

c) Seihileko europarretan laguntzea, autonomia erkidegoek Europar Batasuneko Kontseiluan parte hartzeko akordioaren esparruan.

d) Lankidetzan aritzea Espainiako Erreinuak Europar Batasunean duen ordezkaritza iraunkorrarekin eta Bruselan kokatuak dauden Espainiako beste autonomia erkidego batzuen bulegoekin edo beste estatu kide batzuetako antzeko entitateekin.

e) Nafarroako Foru Komunitateko sektore publiko eta pribaturako enpresa- eta finantza-aukeren bilaketa aktiboan laguntzea, Europako Proiektuen Bulegoarekin koordinatuta.

f) Nafarroako Foru Komunitatearentzat interesgarriak diren EBren programak eta aukerak hedatzea eta sustatzea, Europako Proiektuen Bulegoarekin koordinatuta.

g) Nafarroako Gobernuko departamentuei laguntzea Bruselara egiten dituzten misioetan eta bisitetan.

h) Indarrean dauden xedapenek esleitzen dizkioten beste batzuk, bai eta bere jardueraren esparruan agintzen zaizkionak ere.

19. artikulua . Kanpo Ekintzarako Zuzendaritza Nagusiaren egitura.

Kanpo Ekintzarako Zuzendaritza Nagusiaren egituran zerbitzu hauek daude:

a) Eskualdeen arteko Lankidetzaren eta Kanpoko Herritarren Zerbitzua.

b) Europako Proiektuen Bulegoaren Zerbitzua.

2. ATALA. ESKUALDEEN ARTEKO LANKIDETZAREN ETA KANPOKO HERRITARREN ZERBITZUA

20. artikulua . Eskualdeen arteko Lankidetzaren eta Kanpoko Herritarren Zerbitzuaren esparru material eta funtzionala.

Eskualdeen arteko Lankidetzaren eta Kanpoko Herritarren Zerbitzuak honako eginkizun hauek beteko ditu:

a) Nafarroako Gobernuaren mugaz gaindiko eta eskualdeen arteko lankidetza-harremanak bultzatzea eta koordinatzea, hala nola Akitania Berria-Euskal Autonomia Erkidegoa-Nafarroa Euroeskualdea, Pirinioetako Lan Elkartea, Europako Itsas Eskualde Periferikoen Konferentzia eta haren batzorde geografikoa, Arku Atlantikoa eta Nafarroako Foru Komunitatearentzat interesgarritzat jo daitekeen beste edozein.

b) Kanpoan den nafar komunitatearentzako NEXT estrategia garatu, bultzatu eta koordinatzea, eta Kanpoko Nafar Herritarrekiko Harremanei buruzko buruzko otsailaren 22ko 3/2023 Foru Legea garatzea.

c) Kanpoan Nafarroaren eta nafar komunitatearen arteko lotura babestea eta sustatzea, bai eta beste eskualde eta herrialde batzuetan ezarritako nafarren biltokiekin eta Nafarroan jarduten duten erregio-etxeekin ere.

d) Nafarroa markaren kanpo irudiaren diseinuan parte hartzea eta Nafarroaren nortasuna kanpoan hedatzea.

e) Indarra duten xedapenek esleitzen dizkioten beste batzuk, bai eta bere jardueraren esparruan agintzen zaizkionak ere.

21. artikulua . Eskualdeen arteko Lankidetzaren eta Kanpoko Herritarren Zerbitzuaren egitura.

Eskualdeen arteko Lankidetzaren eta Kanpoko Herritarren Zerbitzuak atal hauek ditu bere egituran:

a) Eskualdeen Arteko eta Mugaz Gaindiko Lankidetzaren Atala.

b) Kanpoan diren Herritarrekiko Harremanetarako Atala.

22. artikulua . Eskualdeen Arteko eta Mugaz Gaindiko Lankidetzaren Atalaren esparru material eta funtzionala:

Eskualdeen arteko eta Mugaz Gaindiko Lankidetzaren Atalak honako eginkizun hauek beteko ditu:

a) Nafarroako Gobernuaren parte-hartzea eskualde askoren arteko lankidetza erakundeetan.

b) Nafarroako Gobernuari aholkularitza ematea eskualdeen arteko eta mugaz gaindiko ekintzari dagokionez.

c) Nafarroako Espezializazio Adimentsuaren Estrategiaren eta Europar Batasuneko beste eskualde batzuetakoen arteko bat-etortze eta osagarritasun puntuak identifikatzea.

d) Mugaz gaindiko lankidetzarako deialdietara aurkezten diren Nafarroako proiektuak prestatzea, kudeatzea, koordinatzea, tramitatzea, kontrolatzea eta haien jarraipena egitea, bereziki POCTEFA programakoak.

e) Haren esku uzten den beste edozein eginkizun, aipatutakoen antzekoa edo osagarria bada.

23. artikulua . Kanpoan diren Herritarrekiko Harremanetarako Atalaren esparru material eta funtzionala.

Kanpoan diren Herritarrekiko Harremanetarako Atalak eginkizun hauek beteko ditu:

a) Beste eskualde eta herrialde batzuetan ezarrita dauden nafarren biltokiekin eta Nafarroan jarduten dauden erregio-etxeekin laguntza eta lankidetza harremanak sustatzea.

b) Nafarroa kanpoan sustatzeko estrategia babestea, bereziki Nafarroa Markari dagokiona.

c) Nafarren biltokiak eta taldeak indartzen laguntzea, haien barne-kohesioa eta elkarte-ekintzen eraginkortasuna bultzatuz.

d) Nafarroaren eta kanpoan den nafar komunitatearen arteko loturak eta harremanak sustatzea, koordinatzea, ezartzea eta indartzea, batez ere lotura eta harreman sozialak, kulturalak eta ekonomikoak, NEXT estrategiaren bidez eta Kanpoko Nafar Herritarrekiko Harremanei buruzko otsailaren 22ko 3/2023 Foru Legearen bidez.

e) Haren esku uzten den beste edozein eginkizun, aipatutakoen antzekoa edo osagarria bada.

3. ATALA. EUROPAKO PROIEKTUEN BULEGOAREN ZERBITZUA

24. artikulua . Europako Proiektuen Bulegoaren Zerbitzuaren esparru material eta funtzionala.

Europako Proiektuen Bulegoaren Zerbitzuak eginkizun hauek beteko ditu:

a) Nafarroako Foru Komunitatearen interes sozioekonomikoen alde jardutea, Batasuneko ekintzek edo programek horietan eragina duten heinean.

b) Nafarroako Gobernuko beste departamentuekin informazioa trukatzea, aholku ematea eta koordinatzea EBren estrategia, politika eta programei dagokienez, baita Nafarroako Espezializazio Adimentsuaren Estrategiaren eta Europar Batasuneko beste eskualde batzuetakoen arteko bat-etortze eta osagarritasun puntuak identifikatzea ere.

c) 2021-2027 aldirako Urte Anitzeko Finantza Esparruaren bidez Europak finantzaturiko programetan Nafarroako Gobernuko departamentuek daukaten parte-hartzea koordinatzea.

d) Sektore publikoari eta pribatuari laguntzea 2021-2027 aldirako Urte Anitzeko Finantza Esparruko Europako proiektuetan parte hartzen dutenean, ahaleginak eginez Nafarroa EBren lehentasunekin lerrokatu dadin.

e) Europar Batasunaren programen mapaketa bat egitea eta eguneratua izatea, baita EBko tresnen, deialdien, foroen eta sareen mapaketa ere, eta informazio, komunikazio eta posizionamendu ekintzak egitea, aukerak atzemateko (gida-mapa) eta proiektuak aurkeztea bultzatzeko.

f) Nafarroako Gobernuko departamentuak eta Nafarroako Foru Komunitateko Administrazioaren unitate organikoak koordinatzea Europar Batasunaren edo nazioarteko beste organismo batzuen erakundeekin eta sareekin dituzten harremanetan.

g) Nafarroak EBrekin lotutako Gaietarako Konferentzian eta Komitologian duen parte-hartzea koordinatzea.

h) Nafarroako erakunde publiko eta pribatuen ikusgarritasuna eta posizionamendua bultzatzea kanpoan.

i) Indarrean dauden xedapenek esleitzen dizkioten beste batzuk, edo bere jardueraren esparruan agintzen zaizkionak.

25. artikulua . Europako Proiektuen Bulegoaren Zerbitzuaren egitura.

Europako Proiektuen Bulegoaren Zerbitzuak, bere eginkizunak betetzeko, Europako Gaiak Koordinatzeko eta Bultzatzeko Atala izanen du mendean.

26. artikulua . Europako Gaiak Koordinatzeko eta Bultzatzeko Atalaren esparru material eta funtzionala.

Europako Gaiak Koordinatzeko eta Bultzatzeko Atalak honako eginkizun hauek beteko ditu:

a) Nafarroako Foru Komunitateko Administrazioaren plan sektorialekin koordinatzea eta Nafarroako Gobernuak eskualdeen garapenerako finkatutako estrategia bultzatzen gehien lagun dezaketen estrategiak eta proiektuak identifikatzea.

b) Programa, sariketa eta deialdiei buruzko informazioa ematea, eta, orobat, Europako beste ekimen estrategikoei buruzko informazioa.

c) Informazio publikoko kanpainak egitea Nafarroan EBren ekimenen eta lehentasunen gainean.

d) Kanpo Ekintzarako Zuzendaritza Nagusiaren online euskarriak gaurkotzea eta mantentzea.

e) Urte anitzeko finantza-esparruaren barruan finantzatzen diren EBko proiektuen erregistroa sortzea eta dinamizatzea, organismo bakoitzak oinarrizko informazioa sartu ahal izan dezan aurkeztu dituen eta/edo esleitu dizkioten proiektuei buruz.

f) Nafarroako Gobernuko beste departamentu batzuen proiektuen kudeaketa koordinatzea; laguntza ematea hautagaitza-dosierrak prestatzeko eta lagun egitea proiektuak garatzeko.

g) Haren esku uzten den beste edozein eginkizun, aipatutakoen antzekoa edo osagarria bada.

IV. KAPITULUA. IDAZKARITZA TEKNIKO NAGUSIA

27. artikulua . Idazkaritza Tekniko Nagusiaren egitura.

Departamentuko Idazkaritza Tekniko Nagusiak honako atal hauek ditu bere egituran:

a) Araubide Juridikoaren Atala.

b) Gai Administratiboak eta Langileria Kudeatzeko Atala.

c) Kudeaketa Ekonomikoaren Atala.

d) Europar Erakundeekiko Prozeduretarako Laguntza Teknikoaren Atala.

28. artikulua . Araubide Juridikoaren Atalaren esparru material eta funtzionala.

Araubide Juridikoaren Atalak honako eginkizun hauek beteko ditu:

a) Nahitaezko txosten juridikoak egitea halakorik behar duten espedienteetan, bai eta agintzen zaizkion bestelako txostenak ere.

b) Departamentuaren egintzen eta xedapenen kontra jarritako administrazio errekurtsoen ebazpen proposamenak prestatzea.

c) Departamentuaren eskumeneko arau eta xedapenen proiektuak prestatzen eta haien gaineko txostenak egiten laguntzea.

d) Laguntza juridikoa ematea departamentuko organo tekniko eta administratiboei.

e) Departamentuari lotutako organoetako idazkaritzei dagozkien eginkizunak betetzea, eginkizun horiek esleitzen zaizkienean.

f) Departamentuari eragiten dion eta Nafarroan aplikatzekoa den Nafarroako, Estatuko eta Europar Batasuneko legedia biltzea eta eguneratzea.

g) Arlo juridikoko funts bibliografikoak eratzea eta haien mantentze-lanez arduratzea.

h) Departamentuaren intereseko legedia, jurisprudentzia eta doktrina aztertzea eta haien gaineko txostenak egitea.

i) Departamentuak eskualdeen arteko edo mugaz gaindiko lankidetzaren esparruan parte hartzen duen organoetan laguntza juridikoa ematea.

j) Informazioaren segurtasunaren arduraduna izatea, Nafarroako Foru Komunitateko Administrazioak datuak babesteko eta informazioaren segurtasunerako onartutako politikan definitutakoari dagokionez.

k) Haren esku uzten den beste edozein eginkizun, aipatutakoen antzekoa edo osagarria bada.

29. artikulua . Gai Administratiboak eta Langileria Kudeatzeko Atalaren esparru material eta funtzionala.

Gai Administratiboak eta Langileria Kudeatzeko Atalak eginkizun hauek beteko ditu:

a) Behar den guztia prestatzea funtzionamendu egokia izan dezaten departamentuaren zerbitzu administratibo eta orokorrek.

b) Departamentuaren kudeaketa administratiboa koordinatzea eta kontrolatzea.

c) Idazkaritza Tekniko Nagusiaren eskumenekoak diren langileen arloko gaiak tramitatzea.

d) Antolaketa- eta kudeaketa-sistemak, administrazio elektronikoa eta aurrerapen digitala hobetzeko proiektuak koordinatzea.

e) Departamentuaren jardueraren plangintza eta ebaluazioa koordinatzea irisgarritasun unibertsalaren arloan, eta departamentuko webguneen eta gailu mugikorretarako aplikazioen erabilerraztasunerako unitate arduradun delegatuaren eginkizunak betetzea.

f) Departamentuari atxikitako fundazioen babesletzaren ondoriozko zereginen jarraipena egitea.

g) Haren esku uzten den beste edozein eginkizun, aipatutakoen antzekoa edo osagarria bada.

30. artikulua . Kudeaketa Ekonomikoaren Atalaren esparru material eta funtzionala.

a) Departamentuko aurrekontuen aurreproiektua egiten laguntzea eta lan hori koordinatzea.

b) Diru-sarrera eta gastuen aurrekontua nola garatzen den kontrolatzea, eta zerbitzuei zein erabiltzaileei aldian-aldian informazioa ematea, erabakitzen den maiztasunarekin.

c) Eskatzen zaizkion txostenak, azterlanak edo datuak prestatzea.

d) Departamentuaren estatistika-jardueraren jarraipena egitea.

e) Ogasun Departamentuak departamentu honetan duen kontu-hartzailetza delegatuarekin lankidetzan aritzea.

f) Haren esku uzten den beste edozein eginkizun, aipatutakoen antzekoa edo osagarria bada.

31. artikulua . Europar Erakundeekiko Prozeduretarako Laguntza Teknikoaren Atalaren esparru material eta funtzionala.

Europar Erakundeekiko Prozeduretarako Laguntza Teknikoaren Atalak honako eginkizun hauek beteko ditu:

a) Honako gai hauei buruzko prozedura komunitarioen gaineko kontrola, koordinazioa eta aholkularitza: laguntza publiko, kexak eta zehapen prozedurak; arau eta erregelamendu teknikoak; Solvit sarea; barne merkatuaren informazio sistema, edo Europako Batzordetik datozen antzeko beste batzuk.

b) Estatuko Administrazioaren organo eskudunekin bitartekari lana egitea eta elkarlanean aritzea goian aipatutako gaiei dagokienez, Europako erakundeen aurrean kudeatzeko.

c) Europar Batasunaren eremu juridiko eta jurisprudentzialaren barnean, Europako erakundeetatik datorren dokumentazioaren jarraipena eta sistematizazioa egitea.

d) Estatuko Administrazio Orokorrari aurretiaz jakinarazteko prozedura tramitatzea eta atzerriko lurralde-erakundeekin egiten diren mugaz gaindiko lankidetza-hitzarmenak ofizialki argitaratzea.

e) Nafarroako Foru Komunitatearen eskumenekoak diren arloen gainean Europar Batasunean dauden zuzentarauen transposizio prozesuak sustatzea.

f) Haren esku uzten den beste edozein eginkizun, aipatutakoen antzekoa edo osagarria bada.

Lehen xedapen gehigarria. Eskumenak deskontzentratzeko baldintza orokorrak.

Indarra duten arauek organo bati ematen dizkioten eskumenak hierarkian mendeko diren beste organo batzuengan deskontzentratzen ahal dira, Nafarroako Aldizkari Ofizialean argitaratuko den xedapen orokor baten bitartez, galarazi gabe eskumenak esleitzeko arauetan finkatutako baldintzak bete beharra.

Memoria eta Bizikidetzako, Kanpo Ekintzako eta Euskarako Departamentuko titularrak indarrik gabe uzten ahalko du xedapen gehigarri honetan aipatzen den eskumen deskontzentrazioa, foru agindu baten bidez. Foru agindu hori Nafarroako Aldizkari Ofizialean argitaratu beharko da.

Bigarren xedapen gehigarria. Deskontzentrazioa.

Departamentuko zuzendaritza nagusietako titularrengan deskontzentratzen dira, bakoitzari dagokion esparruan, indarrean dagoen araudian kontratazioaren eta ondare erantzukizunaren arloan Memoria eta Bizikidetzako, Kanpo Ekintzako eta Euskarako Departamentuko titularrari esleitzen zaizkion administrazio eskudantzien titulartasuna eta erabilera.

Hirugarren xedapen gehigarria. Unitateak kentzea.

Egituratik kentzen da Kudeaketa Administratibo eta Ekonomikoaren Atala, zeina departamentuko Idazkaritza Tekniko Nagusiaren mende baitzegoen.

Laugarren xedapen gehigarria. Izendapenak berrestea.

Berretsi egiten dira foru dekretu honetan ezarritako egituraren arabera izen berari eusten dioten zerbitzuetako zuzendaritzen eta ataletako burutzen izendapenak, haiek egin zireneko baldintza berberetan betiere.

Bosgarren xedapen gehigarria. Organo eta unitate administratiboak.

Foru dekretu honen bidez Herritarrekiko Harremanetako Departamentuko titularrari edo hierarkikoki haren mendean dauden organoei esleitutako eginkizunei buruz indarreko beste arau batzuetan dauden aipamen guztiak foru dekretu honen bidez araututako organo eta unitateei dagozkiela ulertuko da.

Seigarren xedapen gehigarria. Aurrekontuen aldaketak.

Ahalmena ematen zaio Ekonomia eta Ogasun Departamentuko titularrari foru dekretu honetan ezarritakoa betetzeko beharrezkoak diren aurrekontu-aldaketak egin ditzan.

Zazpigarren xedapen gehigarria. Langileen birbanaketa.

Ahalmena ematen zaio Barneko, Funtzio Publikoko eta Justiziako Departamentuko titularrari giza baliabideak esleitu eta bana ditzan foru dekretu honetan ezarritakoa betetzeko.

Xedapen indargabetzaile bakarra. Arauak indargabetzea.

Indargabetu egiten dira foru dekretu honetan xedatutakoaren kontrakoak diren maila bereko edo beheragoko xedapen guztiak.

Azken xedapenetako lehena. Garatzeko ahalmenak.

Ahalmena ematen zaio Memoria eta Bizikidetzako, Kanpo Ekintzako eta Euskarako Departamentuko titularrari foru dekretu honetan ezarritako aurreikuspenak garatzeko beharrezkoak diren xedapenak eman ditzan.

Azken xedapenetako bigarrena. Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Gobierno de Navarra

Contacte con nosotros | Accesibilidad | Aviso legal | Mapa web