(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

17/2025 FORU LEGEA, ABENDUAREN 22KOA, ZENBAIT ZERGA ALDATU ETA BESTE TRIBUTU-NEURRI BATZUK HARTZEN DITUENA

BON N.º 260 - 31/12/2025

Eranskina

NAFARROAKO FORU KOMUNITATEKO LEHENDAKARIA NAIZEN HONEK.

Aditzera ematen dut Nafarroako Parlamentuak onetsi duela honako:

ZENBAIT ZERGA ALDATU ETA BESTE TRIBUTU-NEURRI BATZUK HARTZEKO FORU LEGEA.

HITZAURREA

Foru lege honen xedea da honako arau hauek aldatzea: Pertsona Fisikoen Errentaren gaineko Zergari buruzko Foru Legearen testu bategina, Ondarearen gaineko Zergari buruzko Foru Legea, Sozietateen gaineko Zergari buruzko Foru Legea, Oinordetza eta Dohaintzen gaineko Zergaren xedapenak biltzen dituen Testu Bategina, Ondare-eskualdaketen eta Egintza Juridiko Dokumentatuen gaineko Zergaren xedapenak biltzen dituen Testu Bategina, Tributuei buruzko Foru Lege Orokorra, Nafarroako Foru Komunitateko Administrazioaren eta haren Erakunde Autonomoen Tasa eta Prezio Publikoei buruzko Foru Legea, Nafarroako Toki Ogasunei buruzko Foru Legea, Nafarroako Ogasun Publikoari buruzko Foru Legea eta Kooperatiben Zerga-araubidea arautzen duen Foru Legea.

Aldaketa honekin, aurreko ekitaldietan bezala, egungo errealitate ekonomiko eta sozialera egokitu nahi da zerga-sistema; horretarako, batetik, zenbait neurri hartzen ditu, xede dutenak justizia fiskal handiagoa lortzea, ekonomia-jarduera suspertzea eta enpresaren gizarte-erantzukizuna sustatzea, eta, bestetik, zenbait hobekuntza tekniko egiten ditu zergen kudeaketan segurtasun juridikoa eta efizientzia sendotze aldera.

Zenbait ardatz nagusiren inguruan antolatu dira aldaketak. Lehenik eta behin, zergapetze zuzenaren esparruan, munta handiko aldaketak egin dira pertsona fisikoen errentaren gaineko zergan, errenta txikienen karga fiskala arintzeko eta betebehar formalak sinplifikatzeko xedez. Bigarrenik, sozietateen gaineko zergan, pizgarri fiskal garrantzitsua ezarri da enpleguari eusteko eta berdintasunaren eta lan-arriskuen prebentzioaren arloko araudia betetzeko benetako konpromisoa dutela frogatzen duten enpresentzat.

Azkenik, hainbat doikuntza tekniko egin dira zerga-figura batean baino gehiagotan, haiek hobeki aplikatu ahal izateko, beren edukia argiagoa izan dadin eta foru araudia testuinguru ekonomiko eta arauemaile berrietara egokitzeko, hala nola kriptoaktiboekin lotutakoetara.

Hauxe da foru legearen egitura: hamar artikulu, bi xedapen gehigarri, xedapen indargabetzaile bat eta lau azken xedapen.

Pertsona fisikoen errentaren gaineko zergan, aitorpena egiteko betebeharrari dagokiona da irismen handieneko aldaketa. Sistemaren progresibitatean aurrera egin eta ahalmen ekonomiko txikieneko zergadunek duten karga fiskala murrizte aldera, igo egin da aitorpena egiteko betebeharretik salbuesten duen lan-etekin osoen atalasea, urteko 17.000 eurora arte igo ere.

Helburu hori lortzeko, bi neurri osagarri eratu dira. Alde batetik, handitu egin da lan-etekinengatiko kenkariaren zenbatekoa 17.500 eurotik beherako etekin garbiak dituzten zergadunentzat. Eta, beste alde batetik, eta helburu berarekin, handitu egin da gutxieneko pertsonalarengatiko kenkariaren zenbatekoa 32.000 eurotik beherako errentak dituzten zergadunentzat; horrek eragin handiagoa izanen du errenta-tarte txikienetan. Aldaketa bikoitz horrek zerga-justiziazko helburu argia du: soldata xumeenak dituzten langileen tributazio efektiboa murriztea, eta, horrez gain, aitorpena aurkeztearekin lotutako betebehar formaletatik libratzea haiek, Zerga Administrazioarekin eduki beharko duten harremana sinplifikatze aldera.

Pentsio txikienen, hots, urteko 15.400 eurotik beherakoen, karga fiskala murrizte aldera, handitu egin da alarguntza-pentsioengatiko eta erretiro-pentsioengatiko kenkariaren zenbatekoa.

Gainera, beste aldaketa garrantzitsu batzuk ere egin dira. Salbuespen berriak sortu dira egoera sozial ahuleko errealitateei erantzuteko, hala nola talidomidaren eta amiantoaren biktimentzako kalte-ordainen eta Eliza Katolikoaren esparruko abusuen biktimentzako konpentsazio ekonomikoen kasuetarako. Salbuespena ezarri da, orobat, garraiolariei emandako laguntza batzuetarako, 20.000 euroko mugarekin. Halaber, doikuntza tekniko hauek egin dira, esate baterako: LIFO metodoa aplikatuko da langileei emandako partaidetza-eskualdatze salbuetsietan; ehuneko 10eko muga kendu da enplegatzaileak alokairuan emandako etxebizitzagatiko gauzazko ordainsariaren baloraziorako; zilegi izanen da 2025ean nekazaritzako aseguruetatik jasotako kalte-ordainak 2025eko edo 2026ko zergaldiari egoztea, eta dagoeneko ematen ez diren laguntzen salbuespenak kendu dira.

Kontseiluaren 2023ko urriaren 17ko 2023/2226 (EB) Zuzentarauaren (DAC 8) transposizioa eginez, finantza-kontuei buruzko informazioa emateko betebeharra hedatu da, eta informazioa emateko eta arretaz jokatzeko betebeharrak ezarri dira "informazioa komunikatzera behartuta dauden kriptoaktibo-zerbitzuen hornitzaileen" aitorpen informatiboari dagokionez, elkarlaguntzaren esparruan.

Bestalde, betebehar formalak sinplifikatu dira errenta-eratxikitzeko araubidean dauden entitateentzat.

Sozietateen gaineko zergan, berritasun nagusia da ehuneko 25eko karga-tasa murriztu bat ezarri dela, ehuneko 28ko tasa orokorraren aldean, gizarte- eta enplegu-arloarekiko konpromiso nabarmena erakusten duten baldintza jakin batzuk betetzen dituzten entitateentzat. Hauek dira aipatutako baldintzak: plantillari eustea, zergaldian ABEEErik aplikatu ez izana arrazoi ekonomikoak direla-eta, zehapenik jaso ez izana lan-arriskuen prebentzioaren arloko arau-hauste astun edo oso astunengatik eta emakumeen eta gizonen berdintasunaren alorreko arauak bete izana modu egiaztagarrian.

Neurri horren asmoa da zerga-sistema trakzio-tresna gisa erabiltzea interes publikoko helburuak lortzeko bidean. Izan ere, pizgarriak eman nahi zaizkie aberastasun ekonomikoa sortzeaz gain gizarte-kohesioaren aldeko lan aktiboa egiten duten enpresei. Ulertzen da halako lana egiten dutela kalitate oneko enplegua sortzen eta mantentzen dutenean, lan-inguru segurua bermatzen dutenean eta benetako berdintasuna sustatzen dutenean. Hala, zerga-politika lerrokatuta gelditzen da Foru Komunitateak sozialki arduratsua den garapen ekonomiko jasangarriaren arloan dituen helburu estrategikoekin.

Neurri horrekin batera, beste zenbait jarduketa egin dira. Batetik, hobetu egin da ibilgailu elektriko industrialetan (kamioiak barne) inbertitzeagatiko kenkaria. Bestalde, garapen jasangarriko proiektuekin eta ingurumena babesteko eta hobetzeko proiektuekin lotutako material ibilgetu berrian egindako inbertsioen kenkariari dagokionez, egokitu egin da Batzordearen 651/2014 (EB) Erregelamenduaren aldaketetara doitzeko -Batzordearen 651/2014 (EB) Erregelamendua, 2014ko ekainaren 17koa, laguntza-kategoria jakin batzuk barne-merkatuarekin bateragarri izendatzeari buruzkoa-. Eta, gainera, ikus-entzunezko ekoizpenetan egindako inbertsioengatiko kenkaria indartu da, animazio-lanetarako laguntzen intentsitatea handituz eta koprodukzioetan nola aplikatu argituz.

Era berean, enpresetan deskarbonizazio handiagoa lortze aldera, kenkari bat ezarri da jarduera ekonomikoari atxikitako ibilgetu materialeko elementu berrietan egindako inbertsioetarako, baldin eta energia-aurrezpen igorgarri bat sortzeko moduko murrizketa eragiten badute halako moldez non energia-aurrezpenaren ziurtagiriak (EAZ) ematen ahal diren.

Bestalde, mugak ezarri zaizkio gutxieneko tributazioari, enpresen benetako ekarpen bat bermatze aldera.

2026ko zergaldi osora luzatu da enpresa handien likidazio-oinarri negatiboen konpentsazioari ezarritako muga, negozio zifraren zenbateko garbia 20 milioikoa edo gehiagokoa dutenentzat ezarritakoa zehazki, eta, bestalde, muga handiagoa aurreikusten da negozio zifra 60 milioikoa edo gehiagokoa dutenentzat.

Azkenik, epe luzeko inbertsioen bidez (10 urte) enpresa-sarearen kapitalizazioa handitze aldera, araubide berezi bat ezarri da enpresa-partaidetzak dituzten sozietateentzat.

Ondarearen gaineko zergan, oinordetzen eta dohaintzen gaineko zergan eta ondare eskualdaketen eta egintza juridiko dokumentatuen gaineko zergan, aldaketak teknikoak dira nagusiki. Nabarmentzekoa da aldi baterako eta biziarteko errentak baloratzeko arauak harmonizatu direla hiru zergetan, eta horrek koherentzia handiagoa ematen dio sistemari eta segurtasun juridikoa ematen dio zergadunari. Era berean, maila jaso zaie eta lege-mailakotzat jo dira zenbait betebehar formal eta elkarlaguntzako, hala nola Katastroko langileenak, eta prozedurak egokitu dira autolikidazio-sistema orokortze aldera.

Horrez gain, ondarearen gaineko zergan, 2026 osora luzatu da 2025eko zergaldian aplikatzekoa zen tarifa.

Bestalde, ondare-eskualdaketen eta egintza juridiko dokumentatuen gaineko zergan, salbuetsitzat jo dira abenduaren 2ko 92/2020 Foru Dekretuaren araberako pertsona nagusientzako bizitoki kolaboratiboekin lotutako zerga-egitate jakin batzuk. Xedea da gisa horretako etxebizitza-eredu sozial berriak sustatzea, ohiturazko joerarekiko alternatiba diren heinean.

Tributuei buruzko Foru Lege Orokorrari berrazterketa handia egin zaio, xede hartuta kudeaketa-tresnak eta iruzurraren aurka borrokatzekoak indartzea eta prozedurak modernizatzea. Horri dagokionez, informazio-betebeharrak egokitu egin dira Europako araudiarekin (DAC 8) bat etor daitezen, halako moldez non zabaldu egin baita finantza-kontuei eta kriptoaktiboei buruz informazioa emateko betebeharra. Garrantzi handiko berritasun gisa, kriptoaktiboak berariaz jo dira ondasun bahigarri gisa, eta eskudiruaren ondorengo postuan kokatu dira lehentasun-ordenan.

Era berean, erantzukizun-deklarazioaren prozedurari dagokionez, berariazko gaikuntza bat ezarri da deklarazio horren aurretiko jarduketetarako.

Beste alde batetik, zerga-betebeharrak beteta izateari eta dagokien indarraldian zehar horrela mantentzeari buruzko atzerapenak emateko eskakizuna hedatu egin da, eta, aurrerantzean, aplikagarri izanen zaie Nafarroako Foru Ogasunak kudeatutako gainerako zorrei ere. Horrenbestez, zergaz besteko zor bat ez ordaintzea nahikoa arrazoi izanen da zerga-zorraren atzerapena ukatzeko edo, hala badagokio, bertan behera utzia izateko.

Azkenik, bikote egonkorrei dagokienez, Tributuei buruzko Foru Legearen xedapen gehigarri bakarrean zentralizatu da haien arauketa; hala, zehaztu da bikote egonkorrak erregistroan inskribatzeko eskaera aurkeztu zuen egunera atzera eramanen direla ezkondutako bikoteekiko parekatzearen ondorioak, interesdunek ez dezaten kalterik pairatu atzerapen administratiboak direla-eta.

Nafarroako Ogasun Publikoari buruzko Foru Legean, zuzenbide publikoko zorren geroratzeen arauketa osatu da, eta ezarri da ez dela eskaerarik onartuko trafiko- eta garraio-arloko zehapenen ondoriozko zorretarako.

Nafarroako Foru Komunitateko Administrazioko eta haren erakunde autonomoetako tasa eta prezio publikoei buruzko Foru Legeari dagokionez, eguneratu eta egokitu egin dira hor ezarritako tasak erabilera, errealitate eta arau berrietara egokituta egon daitezen, eta zuzenketa tekniko txikiren bat ere egin da.

Jokoaren jarduerak eragindako tasen esparruan, bereziki azpimarratzekoa da izapide administratibo berriak ezarri direla, zeinak arauturik baitaude Nafarroako Foru Komunitateko Joko eta Apustuen Erregelamendu Orokor berrian (otsailaren 26ko 15/2025 Foru Dekretuaren bidez onetsi zen).

Nafarroako Toki Ogasunei buruzko Foru Legean, eguneratu egin dira izaera urbanoko terrenoen balio gehikuntzaren gaineko zergaren oinarria kalkulatzeko 2026ko urtarrilaren 1etik aurrera aplikatu beharreko gehieneko koefizienteak, 175.2 artikuluan jasotakoak. Toki Ogasunei buruzko Foru Legean xedatutakoaren arabera, urtero eguneratu behar dira koefiziente horiek. Eguneratzea ezartzean, aintzat hartu da Nafarroan pisuen batez besteko prezioek izandako bilakaera.

Orobat, 2026ko urtarrilaren 1etik aintzinerako, eguneratu egin dira trakzio mekanikoko ibilgailuen gaineko zergaren tarifak; ehuneko 2,7 zehazki.

Kooperatiben Zerga Araubidea arautzen duen Foru Legean, administrazio-emakiden eraketara hedatu da ondare-eskualdaketen gaineko zergaren salbuespen-eremua. Aldaketa horren bidez, arindu egin nahi da kontsumitzaile- eta erabiltzaile-kooperatibek sustatutako etxebizitza- eta bizitoki-proiektuek jasaten duten zama fiskala.

Kontuan hartuta datozen urteotan garrantzi kultural, sozial eta ekonomiko handiko bi gertakari izanen direla -Jakuetar Urte Santua 2027an, eta Iruñeko Topaketak 2026an-, lehenengo xedapen gehigarrian xedatzen da lehentasuna emanen zaiela bi gertakizun horiekin lotutako jarduera eta proiektuei, halako moldez non horietara bideratutako ekarpenetan murrizketa-ehuneko eta -muga handiagoak aplikatuko baitira pertsona fisikoen errentaren gaineko zergan edo sozietateen gaineko zergan, kasuan-kasuan dagokionaren arabera.

2027ko Jakuetar Urte Santuari dagokionez, neurri horren bidez elkarlana sustatu nahi da sektore pribatuaren eta Nafarroako erakunde kultural eta turistikoen artean, bultzada emateko jakuetar ondarearekin eta Done Jakueren bideko herrien garapen kultural eta sozialarekin lotutako proiektuei.

Bestalde, Baluarte Fundazioak antolatutako Iruñeko Topaketen hirugarren edizioa eginen da 2026ko urriaren 2tik 12ra, eta, hala, jardunaldi horiek nazioarteko erreferente gisa errotuko dira sorkuntza garaikidearen, pentsamendu artistikoaren eta kultura-berrikuntzaren eremuetan. Hartutako neurriarekin sustatu nahi da sektore pribatuak ekitaldiaren finantzaketan parte hartzea, eta, horrela, Nafarroako ekosistema kultural garaikidea indartzea eta Nafarroak topagune artistikorako eta pentsamendu kritikorako gune gisa nazioartean duen proiekzioari laguntzea.

Bigarren xedapen gehigarrian ezarri da Nafarroako Gobernuaren betebeharra izanen dela hirugarren artikuluaren bigarren eta hirugarren apartatuetan jasotako neurrien ondoriozko zerga-bilketaren inpaktuaren ebaluazioa egitea, behin foru lege hau indarrean jarri eta lau urte iragandakoan.

Azken xedapenetako lehenengoan, eguneratu egin dira, 2026ko urtarrilaren 1etik aurrerako ondorioekin, Nafarroako Hondakin Uren Saneamenduari buruzko Foru Legean ezarritako saneamendu-kanonaren tarifak. Tarifak igotzeko arrazoia da Hiri erabilerarako uraren ziklo osoaren plan gidarian integratutako Nafarroako Ibaien Saneamendurako Plan Gidariaren bidez epe luzerako oreka lortu nahi dela progresiboki.

Azken xedapenetako bigarrenean, lege-aldaketa bat jasotzen da, Nafarroako Gobernuak 2025eko irailaren 3an onetsitako Iruzur Fiskalaren aurka Borrokatzeko 2025-2027 Planean aurreikusita zegoena, hain zuzen ere.

Azken xedapenetako hirugarrenak, bere aldetik, ahalmena ematen dio Nafarroako Gobernuari foru lege hau garatu eta aplikatzeko eman beharreko xedapenak emateko. Eta, bukatzeko, azken xedapenetako laugarrenak arautzen du foru legea indarrean jarriko dela Nafarroako Aldizkari Ofizialean argitaratu eta biharamunean, legean bertan aurreikusitako ondorioekin.

Proiektu hau egitean aintzat hartu dira arauketa onaren printzipioak, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 129. artikuluan ezarritakoak. Hori horrela, eta lehen adierazitako arrazoiengatik, foru lege honek betetzen ditu beharrezkotasun- eta eraginkortasun-printzipioak: justifikatuta dago interes orokorreko arrazoiengatik, zenbait zerga-arau aldatzen baititu; legearen bidez lortu nahi diren eta aurreko paragrafoetan azaldu diren helburuen zehaztapen argia du oinarri; eta, azkenik, helburuok lortzeko tresna egokia da, hala agintzen baitu zerga-arloan nagusi den lege-erreserbak, Tributuei buruzko abenduaren 14ko 13/2000 Foru Lege Orokorraren 11. artikuluan ezarritakoak.

Foru lege honek beste foru lege batzuen zenbait artikulu aldatzen ditu, eta ahalik eta zehaztasun handienarekin aldatu ere; beraz, proportzionaltasun-printzipioa ere betetzen da. Eta, arrazoi horrexegatik beragatik, segurtasun juridikoaren printzipioa ere betetzen da. Izan ere, zorrozki zaindu dira ordenamendu juridikoaren gainerakoarekiko koherentzia, egonkortasuna eta pertsona nahiz enpresentzako aurreikusgarritasuna eta zalantzagarritasunik eza, oreka egokia lortze aldera legegilearen borondatearen eta gainerako errealitate juridikoaren artean, barne harturik jurisprudentziarik berriena ere. Orobat, foru lege honekin lortu nahi diren zenbait helburu erdieste aldera, oso kontuan hartua izan da sinpletasun- eta efizientzia-printzipioa, zeinaren xedeak baitira karga administratibo ez-beharrezkorik edo osagarririk ez egotea eta baliabide publikoen kudeaketa zentzuzkoa izatea.

Gardentasun-printzipioari eta irisgarritasun-printzipioari dagokienez, horiek betetze aldera argitaratuko da foru legea Nafarroako Parlamentuko Aldizkari Ofizialean, Nafarroako Aldizkari Ofizialean eta www.nafarroa.eus webgunean.

Bukatzeko, kontuan izan da gizonezkoen eta emakumezkoen berdintasunaren printzipioa, eta aldaketak egin dira arauetan hizkera inklusiboa eta ez-sexista erabiltzearren.

Lehenengo artikulua. Pertsona Fisikoen Errentaren gaineko Zergari buruzko Foru Legearen testu bategina.

Pertsona Fisikoen Errentaren gaineko Zergari buruzko Foru Legearen testu bateginaren honako manu hauek (ekainaren 2ko 4/2008 Legegintzako Foru Dekretuaren bidez onetsi zen testu bategina) testu hau izanen dute:

Bat. 7.o) artikulua, bigarren paragrafoa, eta hirugarren paragrafoa gehitzea, 2025eko urtarrilaren 1etik aurrerako eraginarekin.

"Halaber, 14/2002 Legearen 2. artikuluan araututako laguntza ekonomikoak -14/2002 Legea, ekainaren 5ekoa, Hemofilia edo bestelako sortzetiko koagulopatiak izan eta osasun sistema publikoan koagulazio faktoreen kontzentratuen tratamenduak jasotzearen ondorioz C hepatitisa garatu duten pertsonentzako gizarte laguntzak eta beste zenbait zerga-araua ezartzen dituena-; eta uztailaren 4ko 574/2023 Errege Dekretuan ezarritako laguntzak -574/2023 Errege Dekretua, uztailaren 4koa, Espainian 1950-1985 aldian talidomidaren ondorioz kaltetutakoei laguntzak emateko prozedura arautzen duena-.

Salbuetsirik egonen da, era berean, 21/2022 Legean ezarritako konpentsazio ekonomikoa -21/2022 Legea, urriaren 19koa, Amiantoaren Biktimentzako Konpentsazio Funts bat sortzekoa-".

Bi. 7.t) artikulua, paragrafo bat gehitzea, 2025eko urtarrilaren 1etik aurrerako eraginarekin.

"Salbuetsirik egonen dira, orobat, Elizaren esparruan egindako sexu-abusuen biktimei Eliza Katolikoak ordaindutako konpentsazio ekonomikoak".

Hiru. 7.v) artikulua, bigarren paragrafoa kentzea.

Lau. 7.z) artikulua; "Bigarrena" ordinala gehitzen da, eta, beraz, z) letraren lehenengo hiru paragrafoak "Lehenengoa" ordinalaren pean geldituko dira. 2025eko urtarrilaren 1etik aurrera izanen du eragina.

"Bigarrena. Errepide bidezko garraio-zerbitzua ematen duten enpresa pribatuek bidaiari- eta salgai-garraiorako flotak eraldatzeko laguntzak, zeinak azaroaren 16ko 983/2021 Errege Dekretuaren babesean eman baitziren; eta, halaber, bidaiari-garraioko enpresak eta errepide bidezko salgai-garraioan esku hartzen duten enpresak modernizatzeko laguntzak, urriaren 25eko 902/2022 Errege Dekretuaren babesean emanak.

Aurreko paragrafoan aipatutako laguntzei dagokien salbuespenaren gehieneko zenbateko bateratua 20.000 eurokoa izanen da".

Bost. 15.3.e) hirugarrena artikulua, 2026ko urtarrilaren 1etik aurrerako eraginarekin.

"Hirugarrena. Baloreak gutxienez hiru urtez mantentzea, salbu eta langilea hiltzen bada, kaleratzen badute edo konkurtso-prozedura baten ondorioz entitatea likidatzen bada. Baloreak eskualdatzen badira enpresa beraren akzioak edo partaidetzak edo Merkataritza Kodearen 42. artikuluaren arabera taldea osatzen duten sozietateetako edozeinenak eskuratu edo harpidetu ondoren, betiere aurreko hiru urteetan eskuratuak edo harpidetuak aintzat hartuta, ulertuko da eskuratutako azkenak eskualdatu direla lehenbizi".

Sei. 16.1.a) artikulua, 2026ko urtarrilaren 1etik aurrerako eraginarekin.

"a) a) letrakoak:

Etxebizitza pertsona edo entitate ordaintzailearen jabetzakoa bada, lurraren kontribuzioaren edo ondasun higiezinen gaineko zergaren ondorioetarako etxebizitza horrek duen katastro-balioari ehuneko 2 aplikatuta lortzen den zenbatekoaren arabera. Etxebizitzak ez badu katastro-baliorik ezarrita, eskuratze-balioari aplikatuko zaio aipatutako portzentaje hori.

Kasu horretan, balorazioaren gehieneko muga subjektu pasiboak bere kargu edo lanpostuagatik jasotzen dituen gainerako lan-kontraprestazioen ehuneko 10 izanen da.

Etxebizitza errentapekoa bada, eta ez bada pertsona edo entitate ordaintzailearen jabetzakoa, harentzat dakarren kostuaren arabera, barne harturik eragiketa kargatzen duten tributuak eta gastuak, bai eta etxebizitza erabiltzearen ondorioz sortzen diren eta berak ordaintzen dituen gastuak ere. Balorazioa ezin izanen da izan aurreko paragrafoetan xedatutakoa aplikatuta lortzen den zenbatekoa baino txikiagoa".

Zazpi. 25.2 artikulua, azken-aurreko paragrafoa, 2025eko urtarrilaren 1etik aurrerako eraginarekin.

"Bigarren apartatu honetan ezarritako murriztapenak aplikatu ahal izateko, beharrezkoa izanen da zerga sortzen den egunean errentamendu-kontratua behar bezala erregistratuta egotea Nafarroako Etxebizitza Errentamenduko Kontratuen Erregistroan, zeina aurreikusita baitago Nafarroan Etxebizitza Izateko Eskubideari buruzko maiatzaren 10eko 10/2010 Foru Legearen 90. artikuluan".

Zortzi. 32.1.a) artikulua, 2. paragrafoa.

"Ondorio horietarako, administrazio- eta gordailu-gastutzat hartuko dira inbertsio-zerbitzuen enpresek, kreditu-entitateek edo bestelako finantza-entitateek jasanarazten dituzten diru-zenbatekoak, helburu dutenak, Balore Merkatuari eta Inbertsio Zerbitzuei buruzko martxoaren 17ko 6/2023 Legearen arabera, titularrek gauzatutako titulu bidezko baloreen gordailu-zerbitzua edo kontuko idatzoharretan adierazitako baloreen administrazioa ordaintzea titularren kontura".

Bederatzi. 36.B) 1.b) artikulua, 2026ko urtarrilaren 1etik aurrerako eraginarekin.

"b) Baliokidetasun-errekarguaren araubide berezia edo balio erantsiaren zergaren araubide berezi erraztua aplikatzen zaizkien enpresa-jarduerak egiten dituzten subjektu pasiboek, haien negozio-zifraren zenbateko garbia ez bada aurre-aurreko urtean 250.000 euro baino handiagoa izan".

Hamar. 43.1.c) artikulua, b’) eta n).

"b’) Finantza-tresnen merkatuari buruzko Europako Parlamentuaren eta Kontseiluaren 2014ko maiatzaren 15eko 2014/65/EB Zuzentarauan definitutako baloreen merkatu arautuetako kotizazio-balioa eta, bereziki, Balore Merkatuei eta Inbertsio Zerbitzuei buruzko 6/2023 Legearen 43.3 artikuluan aurreikusitakoaren arabera baimendutako balore-negoziazioko sistema antolatuetako kotizazio-balioa, eskualdatzea egin den datakoa".

"n) Balore Merkatuari eta Inbertsio Zerbitzuei buruzko 6/2023 Legean eta hura garatzen duen araudian araututako gerokoen eta aukeren merkatuetan eta beste finantza-tresna batzuetan egindako eragiketei dagokienez, lortutako zenbatekoa ondare-gehikuntza edo -gutxitzetzat hartuko da, baldin eta subjektu pasiboak egindako enpresa-jarduerak garatzeko itundu den beste eragiketa nagusi bat estaltzea ez badakar eragiketak; izan ere, kasu horretan, kapitulu honen 3. atalean ezarritakoaren arabera ordainduko dituzte zergak".

Hamaika. 55.1.7.a) b’).1 artikulua, azken paragrafoa, 2025eko urtarrilaren 1etik aurrerako eraginarekin.

"Lehenengo paragrafoan adierazitako muga gehigarria 4.250 eurokoa izanen da, baldin eta enpresaren kontribuzioak edo langilearen ekarpenak egiten badira pentsioengatiko konpromisoak bideratzen dituzten aseguru kolektiboetara, enpresako bazkideak bai baina enpresako gainerako langileak hartzen ez dituztenetara".

Hamabi. 62.2 artikulua, hirugarren eta laugarren paragrafoak, 2026ko urtarrilaren 1etik aurrerako eraginarekin.

"a) Subjektu pasiboak ez izatea 30.000 euro baino gehiagoko errentarik zergaldian.

b) Alokairu gisa ordaindutako diru-kopuruek subjektu pasiboaren zergaldiko errenten ehuneko 10 gainditzea".

Hamahiru. 62.5.Lehenengoa artikulua, a) eta b) letrak, eta azken paragrafoa, 2026ko urtarrilaren 1etik aurrerako eraginarekin.

"a) 12.500 euroko edo gutxiagoko lan-etekin garbiak dituzten subjektu pasiboak: 1.400 euro.

b) 12.500,01 eta 17.500 euro arteko lan-etekin garbiak dituzten subjektu pasiboak: 1.400 euro ken eragiketa honen emaitza: etekin garbi horien zenbatekoa ken 12.500 euro, eta horren emaitza bider 0,14".

"Ordinal honen ondorioetarako soil-soilik, lan-etekin garbiak kalkulatzeko, lan-etekin oso guztien batura eginen da, salbuespenik edo prestazioen integrazio partzialik aplikatu gabe, ez eta 17.2 artikuluan aurreikusitako murriztapenik ere; eta zerga-ondorioetarako kengarriak diren gastuak kenduko zaizkio kopuru horri".

Hamalau. 62.9.a) artikuluaren c’) azpiletra, eta d’) eta e’) azpiletrak gehitzea, 2026ko urtarrilaren 1etik aurrerako eraginarekin.

"c’) 1.280 euro, zergaldian gehienez ere 17.500 euroko errentak dituzten subjektu pasiboentzat.

d’) 1.280 euro ken eragiketa honen emaitza: subjektu pasiboaren errentak ken 17.500, eta horren emaitza bider 0,0904; hori zergaldian 17.500,01 eta 30.000 euro arteko errentak dituzten subjektu pasiboentzat.

e’) 150 euro ken eragiketa honen emaitza: subjektu pasiboaren errentak ken 30.000, eta horren emaitza bider 0,075; hori zergaldian 30.000,01 eta 32.000 euro arteko errentak dituzten subjektu pasiboentzat".

Hamabost. 64. artikulua, 5. apartatua gehitzea, 2026ko urtarrilaren 1etik aurrerako eraginarekin.

"5. 62.2, 62.9.a), 62.9.b).b’).Bigarrena, 62.13, 68. eta 68 quater artikuluetan aipatzen diren errenten kontzeptupean sartuko dira lanaren, kapitalaren eta jarduera enpresarial edo profesionalen etekin garbiak, ondarearen gehikuntzak eta gutxitzeak eta errenta-eratxikitze eta -egozpenak, salbuespenik edo prestazioen integrazio partzialik aplikatu gabe, ez eta 17.2, 25.2 eta 3, 32.2 eta 34.6 artikuluetan eta Sozietateen gaineko Zergari buruzko 26/2016 Foru Legearen hirugarren xedapen gehigarrian ezarritako murriztapenik ere".

Hamasei. 68. artikulua, 2026ko urtarrilaren 1etik aurrerako eraginarekin.

"68. artikulua. Alarguntza-pentsioengatiko eta kotizaziopeko erretiro-pentsioengatiko kenkariak.

A) Alarguntza-pentsioengatiko kenkariak.

1. Gutxieneko osagarrietarako eskubidea duten alarguntza-pentsioengatiko kenkaria.

Lehenengoa. Dagokion kuota diferentziala zehaztua izan ondoren, alarguntza-pentsioa jasotzen duten eta urriaren 30eko 8/2015 Legegintzako Errege Dekretuaren bidez onetsitako Gizarte Segurantzari buruzko Lege Orokorraren testu bateginaren 59. artikuluan aipatutako gutxieneko osagarriak jasotzeko eskubidea duten subjektu pasiboek zilegi izanen dute kenkari bat aplikatzea, honako hauen arteko alde negatiboa adinakoa: batetik, kasuan kasuko pentsio-motarentzat finkatutako urteko gutxieneko zenbatekoa, zeinari gehituko baitzaio, kasua bada, testu bategin horren 60. artikuluan arautzen den amatasunagatiko osagarria eta hogeita hamahirugarren xedapen iragankorrean arautzen den genero-arrakala murriztera bideratutako osagarria, eta, bestetik, 15.400 euroko zenbatekoa.

Bigarrena. Alarguntza-pentsioarekin batera beste pentsioren bat kobratzen bada, kenkariaren zenbatekoa izanen da honako hauen arteko alde negatiboa adinakoa: jasotako pentsioen zenbatekoen batura, barne hartuta genero-arrakala murriztera bideratutako osagarria eta amatasunagatiko osagarria, halakorik bada, eta 15.400 euroko zenbatekoa.

Hirugarrena. Zilegi izanen da eskubide sozialen arloko eskumena duen departamentuari eskatzea garaiz aurretik ordain dezala kenkaria. Kasu horretan ez da zergako kuota diferentzialaren gaineko kenkaririk eginen.

Erregelamendu bidez arautuko da kenkari hori egiteko prozedura, bai eta garaiz aurretiko abonua eskatzeko eta eskuratzeko prozedura ere. Erregelamendu horretan, kudeaketa efizienterako irizpideei jarraikiz, gutxieneko bat ezartzen ahalko da, zeinaren azpitik ez baita kenkariaren garaiz aurretiko ordainketarik jasoko.

2. Gutxieneko osagarrietarako eskubiderik ez duten alarguntza-pentsioengatiko kenkaria.

Lehenengoa. Dagokion kuota diferentziala zehaztua izan ondoren, Gizarte Segurantzarengandik kotizaziopeko alarguntza-pentsioa jasotzen dutenek, baldin eta jasotzen duten pentsioa handiagoa bada dagokion pentsio-motarako finkatutako urteko gutxieneko zenbatekoa baino eta txikiagoa 15.400 euro baino, zilegi izanen dute kenkaria egitea, zeina izanen baita honako hauen arteko alde negatiboa adinakoa: batetik, jasotako pentsioaren urteko zenbatekoa, barne hartuta Gizarte Segurantzari buruzko Lege Orokorraren testu bateginaren 60. artikuluan arautzen den amatasunagatiko osagarria eta hogeita hamahirugarren xedapen iragankorrean arautzen den genero-arrakala murriztera bideratutako osagarria, halakorik bada, eta, bestetik, aipatutako 15.400 euroko zenbatekoa.

Bigarrena. Alarguntza-pentsioarekin batera beste pentsioren bat kobratzen bada, kenkariaren zenbatekoa izanen da honako hauen arteko alde negatiboa adinakoa: jasotako pentsioen zenbatekoen batura, barne hartuta genero-arrakala murriztera bideratutako osagarria eta amatasunagatiko osagarria, halakorik bada, eta 15.400 euroko zenbatekoa.

Hirugarrena. Bigarren apartatu honetan araututako kenkaria ezin izanen da garaiz aurretik ordaindu.

Erregelamendu bidez ezarriko da kenkari hori baliatzeko prozedura.

3. SOVI-Zahartzaroko eta baliaezintasuneko nahitaezko aseguruko alarguntza-pentsioengatiko kenkaria.

Lehenengoa. Dagokion kuota diferentziala zehaztua izan ondoren, SOVI-Zahartzaroko eta baliaezintasuneko nahitaezko aseguruko alarguntza-pentsioa jasotzen duten subjektu pasiboek zilegi izanen dute kenkaria egitea, zeina izanen baita honako hauen arteko alde negatiboa adinakoa: batetik, jasotako pentsioaren urteko zenbatekoa, barne hartuta Gizarte Segurantzari buruzko Lege Orokorraren testu bateginaren 60. artikuluan arautzen den amatasunagatiko osagarria eta hogeita hamahirugarren xedapen iragankorrean arautzen den genero-arrakala murriztera bideratutako osagarria, halakorik bada, eta, bestetik, 15.400 euroko zenbatekoa.

Bigarrena. SOVI-Zahartzaroko eta baliaezintasuneko nahitaezko aseguruko alarguntza-pentsioarekin batera beste pentsioren bat kobratzen bada, kenkariaren zenbatekoa izanen da honako hauen arteko alde negatiboa adinakoa: jasotako pentsioen zenbatekoen batura, barne hartuta genero-arrakala murriztera bideratutako osagarria eta amatasunagatiko osagarria, halakorik bada, eta 15.400 euroko zenbatekoa.

Hirugarrena. Zilegi izanen da eskubide sozialen arloko eskumena duen departamentuari eskatzea garaiz aurretik ordain dezala kenkaria. Kasu horretan ez da zergako kuota diferentzialaren gaineko kenkaririk eginen.

Erregelamendu bidez arautuko da kenkari hori egiteko prozedura, bai eta garaiz aurretiko abonua eskatzeko eta eskuratzeko prozedura ere. Erregelamendu horretan, kudeaketa efizienterako irizpideei jarraikiz, gutxieneko bat ezartzen ahalko da, zeinaren azpitik ez baita kenkariaren garaiz aurretiko ordainketarik jasoko.

B) Kotizaziopeko erretiro-pentsioengatiko ondoriozko kenkariak.

1. Gutxieneko osagarrietarako eskubidea duten kotizaziopeko erretiro-pentsioengatiko kenkariak.

Lehenengoa. Dagokion kuota diferentziala zehaztuta dagoelarik, Gizarte Segurantzaren kotizaziopeko erretiro-pentsioa jasotzen duten eta Gizarte Segurantzari buruzko Lege Orokorraren Testu Bateginaren 59. artikuluan ezarritako gutxieneko osagarriak jasotzeko eskubidea duten subjektu pasiboek, kenkaria aplikatzen ahalko dute, honako hauen arteko alde negatiboa adinakoa: kasuan kasuko pentsio-motarentzat finkatutako urteko gutxieneko zenbatekoa, zeinari batuko baitzaizkio testu bategin horren 60. artikuluan arautzen den amatasunagatiko osagarria eta hogeita hamahirugarren xedapen iragankorrean arautzen den genero-arrakala murriztera bideratutako osagarria, halakorik bada, eta 15.400 euroko zenbatekoa.

Bigarrena. Erretiro-pentsioarekin batera beste pentsioren bat kobratzen bada, kenkariaren zenbatekoa izanen da honako hauen arteko alde negatiboa adinakoa: jasotako pentsioen zenbatekoen batura, barne hartuta genero-arrakala murriztera bideratutako osagarria eta amatasunagatiko osagarria, halakorik bada, eta 15.400 euroko zenbatekoa.

Hirugarrena. Apartatu honetan araututako kenkariak ezin izanen dira aldez aurretik ordaindu.

2. Gutxieneko osagarrietarako eskubiderik ez duten kotizaziopeko erretiro-pentsioengatiko kenkariak.

Lehenengoa. Dagokion kuota diferentziala zehaztua izan ondoren, Gizarte Segurantzarengandik kotizaziopeko erretiro-pentsioa jasotzen dutenek, baldin eta jasotzen duten pentsioa handiagoa bada dagokion pentsio-motarako finkatutako urteko gutxieneko zenbatekoa baino eta txikiagoa 15.400 euro baino, zilegi izanen dute kenkaria egitea, zeina izanen baita honako hauen arteko alde negatiboa adinakoa: batetik, jasotako pentsioaren urteko zenbatekoa, barne hartuta Gizarte Segurantzari buruzko Lege Orokorraren testu bateginaren 60. artikuluan arautzen den amatasunagatiko osagarria eta hogeita hamahirugarren xedapen iragankorrean arautzen den genero-arrakala murriztera bideratutako osagarria, halakorik bada, eta, bestetik, aipatutako 15.400 euroko zenbatekoa.

Bigarrena. Erretiro-pentsioarekin batera beste pentsioren bat kobratzen bada, kenkariaren zenbatekoa izanen da honako hauen arteko alde negatiboa adinakoa: jasotako pentsioen zenbatekoen batura, barne hartuta genero-arrakala murriztera bideratutako osagarria eta amatasunagatiko osagarria, halakorik bada, eta 15.400 euroko zenbatekoa.

Hirugarrena. Apartatu honetan araututako kenkariak ezin izanen dira aldez aurretik ordaindu.

3. SOVI-Zahartzaroko eta baliaezintasuneko nahitaezko aseguruko zahartzaro-pentsioengatiko kenkariak.

Lehenengoa. Dagokion kuota diferentziala zehaztua izan ondoren, SOVI-Zahartzaroko eta baliaezintasuneko nahitaezko aseguruko zahartzaro-pentsioa jasotzen duten subjektu pasiboek zilegi izanen dute kenkaria egitea, zeina izanen baita honako hauen arteko alde negatiboa adinakoa: batetik, jasotako pentsioaren urteko zenbatekoa, barne hartuta Gizarte Segurantzari buruzko Lege Orokorraren testu bateginaren 60. artikuluan arautzen den amatasunagatiko osagarria eta hogeita hamahirugarren xedapen iragankorrean arautzen den genero-arrakala murriztera bideratutako osagarria, halakorik bada, eta, bestetik, 15.400 euroko zenbatekoa.

Bigarrena. SOVI-Zahartzaroko eta baliaezintasuneko nahitaezko aseguruko zahartzaro-pentsioarekin batera beste pentsioren bat kobratzen bada, kenkariaren zenbatekoa izanen da honako hauen arteko alde negatiboa adinakoa: jasotako pentsioen zenbatekoen batura, barne hartuta genero-arrakala murriztera bideratutako osagarria eta amatasunagatiko osagarria, halakorik bada, eta 15.400 euroko zenbatekoa.

Hirugarrena. Apartatu honetan araututako kenkariak ezin izanen dira garaiz aurretik ordaindu.

C) Artikulu honetako kenkariei aplikatu beharreko arau orokorrak.

1. Artikulu honetako kenkariak egin ahal izateko, beharrezkoa izanen da subjektu pasiboa beharturik ez egotea ondarearen gaineko zergaren aitorpena aurkeztera; eta, horrekin batera, hark beste errentarik jaso ez izana zergaldian, jasotako pentsioei eta kenkariari berari baturik 21.619,59 euro baino gehiagoko guztizko zenbatekoa egiten duenik.

Aipatutako errentek muga hori gaindituz gero, gaindikinak kenkariaren zenbatekoa gutxituko du behar den kopuruan, ezereztu arte, kasua bada.

Subjektu pasiboa familia-unitate bateko kide denean, kenkariak egin ahal izateko beharrezkoa izanen da familia-unitate horretako ezein kide beharturik ez egotea ondarearen gaineko zergaren aitorpena aurkeztera; eta, horrekin batera, lehenengo paragrafoan ezarritako errenta-muga 30.800 eurokoa izanen da eta familia-unitatearen multzo osoa hartuko du barne. Kasua bada, kenkaria gutxituko da bigarren paragrafoan ezarritako moduan.

Aurreko paragrafoetan ezarritako errenta-muga zehazteko, ez dira kontuan hartuko pobrezia energetikoa edo etxebizitzaren galera ekiditeko laguntza publikoak, ahulezia ekonomiko berezia edo gizarte-bazterketarako arriskua duten etxeetan jasotzen direnak.

2. Artikulu honetan araututako kenkariak kalkulatzeko, erretiro- edo alarguntza-pentsioa edo aintzat hartzen den beste edozein pentsio ez bada zergaldi osoan zehar jaso, urte osoko zenbatekora hedatuta hartuko dira kontuan. Kasu horretan, kenkaria kalkulatuko da zergaldian zehar pentsioa jasotzeko eskubidea edukitako egun-kopuruaren proportzioan.

3. Artikulu honetan araututako kenkariak bateraezinak izanen dira errenta bermatuko prestazioekin eta bizitzeko gutxieneko diru-sarrerarekin, zeinak araututa baitaude Inklusio sozialerako eta errenta bermaturako eskubideak arautzen dituen azaroaren 11ko 15/2016 Foru Legean eta abenduaren 20ko 19/2021 Legean, hurrenez hurren.

Hori hala izanik ere, prestazio horiek ez badira zergaldi osoan zehar jaso, prestazioak zenbat egunez ez diren jaso, horren proportzioan kalkulatuko dira kenkariak".

Hamazazpi. 68 quinquies C.7 artikulua.

"7. Emantzipaziorako errentamenduagatiko kenkari bakarra ematen ahalko da etxebizitza bakoitzeko. Hala eta guztiz ere, errentamendu-kontratuaren titular diren eskatzaile bat baino gehiago dauden kasuetan banakako zenbatekoa zehazteko, kasuko kenkariaren zenbatekoa horien guztien artean hainbanatuko da, hileko errentaren ehuneko berrogeita hamar, edo, kasua bada, 280 euroko muga, kontratuaren titular guztien artean zatituz, haiek kenkari hau aplikatzeko eskakizunak bete ala ez".

Hemezortzi. 88. artikulua, 3. apartatua indargabetzea, eta 4. apartatua, 3. apartatua izanen dena, aldatzea, 2026ko urtarrilaren 1etik aurrerako eraginarekin.

"3. Tributu-arloan eskumena duen departamentuko titularrak ezarriko du artikulu honetan aipatzen den aitorpen informatiboa aurkezteko eredua, bai eta hura aurkezteko epea, tokia eta modua ere".

Hemeretzi. Bigarren xedapen gehigarria, indargabetzea.

Hogei. Laugarren xedapen gehigarria, 8. puntua, 2026ko urtarrilaren 1etik aurrerako eraginarekin.

"8. Egoitza Espainiako lurraldean duten pertsonek eta entitateek, bai eta egoitza atzerrian izanik Espainiako lurraldean establezimendu iraunkorrek dituzten pertsonek edo entitateek ere, hirugarrenen izenean dauden pasahitz kriptografiko pribatuak gordetzeko zerbitzuak ematen badituzte, kriptoaktiboak mantentzeko, biltegiratzeko eta eskualdatzeko, izan zerbitzu hori izaera nagusikoa edo beste jarduera batekin lotua, beharturik egonen dira zaintzen dituzten kriptoaktibo guztiei buruzko informazioa ematera zerga-administrazioari. Eman beharreko informazio horretan sartzen dira kriptoaktibo bakoitzean eta, kasua bada, legezko dirutan dauden saldoak, eta saldo horien titularren edo onuradunen identifikazio-datuak.

Kriptoaktiboen kontzeptua erregelamendu honen 3.1.5) artikuluan ematen den definizioaren arabera ulertuko da: Europako Parlamentuaren eta Kontseiluaren 2023ko maiatzaren 31ko 2023/1114 (EB) Erregelamendua, kriptoaktiboen merkatuei buruzkoa, eta aldatzen dituena 1093/2010 (EB) eta 1095/2010 (EB) erregelamenduak eta 2013/36/EB eta 2019/1937 (EB) zuzentarauak.

Tributu-arloan eskumena duen departamentuko titularrak foru agindu bidez ezarriko ditu apartatu honetan aipatzen den aitorpena aurkezteko eredua, epea, modua eta edukia".

Hogeita bat. Laugarren xedapen gehigarria, 9. puntua, indargabetzea; 2026ko urtarrilaren 1etik aurrera egiten diren eragiketetarako izanen du eragina.

Hogeita bi. Zortzigarren xedapen gehigarria, 1.e), 2026ko urtarrilaren 1etik aurrerako eraginarekin.

"e) Abereak nahitaez hiltzeagatik kalte-ordain publikoak jasotzea abereen izurri edo gaitzen kontrako jarduketetan".

Hogeita hiru. Berrogeita hamabosgarren xedapen gehigarria, 1. apartatua, 2026ko urtarrilaren 1etik aurrerako eraginarekin.

"1. Salbuetsirik egonen dira Nafarroako Foru Komunitateko Administrazioak birgaitze babestuko obretarako emandako dirulaguntza publikoak, Etxebizitzaren arloko jarduketa babesgarriak arautzen dituen irailaren 18ko 61/2013 Foru Dekretuan xedatuaren indarrez, bai eta kontzeptu berengatik beste administrazio publiko batzuengandik jasotzen diren dirulaguntzak ere, baldin eta dirulaguntza horiek esleitzen bazaizkie zergaldian 30.000 eurotik gorako errentarik ez duten subjektu pasiboei.

Aurreko paragrafoan aipatzen den errenta kontzeptua 64.5 artikuluan ezarritakoaren arabera ulertuko da.

Hala ere, dirulaguntza horiek salbuetsita egonen dira 2023ko urtarrilaren 1etik 2026ko abenduaren 31ra arte, aurreko paragrafoan ezarritako errenta-mugarik aplikatu gabe".

Hogeita lau.-Hirurogeita hamaikagarren xedapen gehigarria; 2025eko zergaldian izanen du eragina.

"Hirurogeita hamaikagarren xedapen gehigarria. Denbora-egozpena egitea, jardueraren diru-sarreretan izandako galerak konpentsatze aldera nekazaritza-aseguruetatik 2025ean jasotako kalte-ordainena.

Beren jardueraren diru-sarreretan izandako galerak konpentsatze aldera 2025ean nekazaritza-aseguruetatik kalte-ordainak jaso dituzten subjektu pasiboek hautatzen ahalko dute kalte-ordain gisa jasotako kopuru guztiak 2025eko zergaldiari ala 2026ko zergaldiari egoztea, zein ere den diru-sarreretarako eta gastuetarako aplikatzen duten edo aplikatu izan duten denbora-egozpeneko irizpidea.

Aukera hori baliatuko da pertsona fisikoen errentaren gaineko zergaren 2025eko zergaldiko autolikidazioan, zeina aurkeztuko baita pertsona fisikoen errentaren gaineko zergaren eta ondarearen gaineko zergaren 2025eko zergaldiko autolikidazio-ereduak onetsi eta horiek aurkeztu eta diru-sarrera egiteko arauak xedatzen dituen foru aginduak ezartzen duen epean, eta ezin izanen da aldatu epe hori igarota dagoenean".

Hogeita bost. Zazpigarren xedapen iragankorra, 2. puntua, c) letra.

"c) Ezertan galarazi gabe b) letran xedatutakoa, eta ondasun higiezinak, horien gaineko eskubideak edo Balore Merkatuari eta Inbertsio Zerbitzuei buruzko martxoaren 17ko 6/2023 Legearen 338. artikuluan ageri diren entitateen baloreak direnean, salbu eta ondasun higiezinen inbertsiorako sozietateen edo funtsen kapital soziala edo ondarea ordezkatzen duten akzioak edo partaidetzak direnean, ondare gehikuntza 100eko 11,11 murriztuko da lehenengo bi urteez gaineko iraupen-urte bakoitzeko".

Hogeita sei. Hogeita hamahirugarren xedapen iragankorra gehitzea, 2026ko urtarrilaren 1etik aurrerako eraginarekin.

"Hogeita hamahirugarren xedapen iragankorra. 2026rako zuzeneko zenbatespen bereziari uko egiteko ohiz kanpoko epea.

"Baliokidetasun-errekarguaren araubide berezia edo balio erantsiaren gaineko zergaren araubide berezi erraztua aplikatzen zaien enpresa-jarduerak egiten dituzten subjektu pasiboek zilegi izanen dute uko egitea 2026rako zuzeneko zenbatespen berezia aplikatzeari, 2026ko urtarrilean zehar, erregelamenduz ezarritako ondorioekin, baldin eta haien negozio-zifraren zenbateko garbia 200.000 eurotik gorakoa eta gehienez ere 250.000 euro artekoa izan bada 2025ean".

Bigarren artikulua. Ondarearen gaineko Zergari buruzko Foru Legea.

Ondarearen gaineko Zergari buruzko azaroaren 19ko 13/1992 Foru Legearen manu hauek testu hau izanen dute:

Bat. 17.2 artikulua:

"2. Aldi baterako edo biziarteko errentak, dirutan edo ondasun higigarritan edo higiezinetan kapitala ematearen ondorioz eratutakoak, zerga sortzen den egunean duten kapitalizazio-balioaren arabera konputatuko dira, diruaren legezko interesarekin, eta, errenta biziartekoa bada, gozamenak baloratzeari dagokionez 19.1 artikuluan ezarritako arauen arabera errentadunaren adinari dagokion zatia hartuz atera den ondoriozko kapital horretatik, edo, errenta aldi baterakoa bada, errentaren iraupenari dagokion zatia hartuz. Errentaren zenbatekoa diru-unitatetan gauzatzen ez denean, atera den kapitalaren balioa kalkulatzeko, ondorio askotarako errenta-adierazle publikoaren (OAEAP) urteko kopurua kapitalizatuko da".

Bi. Lehenengo xedapen gehigarria; 2026ko zergaldian izanen du eragina.

"Lehenengo xedapen gehigarria. Ondarearen gaineko Zergaren 2026ko eskala.

2026ko zergaldian, honako eskala honetan adierazten diren karga-tasak aplikatuko zaizkio zergaren likidazio-oinarriari:

Likidazio-oinarria, zenbateraino (eurotan)Kuota osoa (eurotan)Likidazio-oinarriaren gainerakoa, zenbateraino (eurotan)Tasa aplikagarria (ehunekoa)
0,000,00155.511,880,16
155.511,88248,82155.511,880,24
311.023,76622,04311.023,760,40
622.047,531.866,13622.047,530,72
1.244.095,066.344,871.244.095,061,04
2.488.190,1119.283,462.488.190,111,36
4.976.380,2253.122,844.976.380,221,68
9.952.760,45136.726,021.051.024,052,00
11.003.784,50157.746,50Hortik gora3,50

Hiru. Bosgarren xedapen gehigarria, indargabetzea.

Hirugarren artikulua. Sozietateen gaineko Zergari buruzko Foru Legea.

Sozietateen gaineko Zergari buruzko abenduaren 28ko 26/2016 Foru Legearen honako manu hauek jarraian azaltzen den testua izanen dute:

Bat. 40.1.e) artikulua; 2026ko urtarrilaren 1etik aurrera hasten diren zergaldietan izanen du eragina.

"e) Abereak nahitaez hiltzeagatik kalte-ordain publikoak jasotzea abereen izurri edo gaitzen kontrako jarduketetan".

Bi. 51.1.a) artikulua; 2026ko urtarrilaren 1etik aurrera hasten diren zergaldietan izanen du eragina.

"a) Ehuneko 28.

Edonola ere, entitateak ehuneko 25eko zerga-tasa aplikatzen ahalko du honako baldintza hauek betetzen badira:

i) Zergaldia amaitutakoan lan-kontratua duten langileen kopurua ez bada txikiagoa aurre-aurreko hiru zergaldiak amaitu ostean zeuden langile lan-kontratudunen batez bestekoa baino.

ii) Entitateak ez badu aldi baterako enplegu-erregulazioko espedienterik aplikatu zergaldian arrazoi ekonomikoak direla-eta, lan-kontratuak etetekorik edo lanaldia murriztekorik (urriaren 23ko 2/2015 Legegintzako Errege Dekretu bidez onetsitako Langileen Estatutuaren Legearen testu bateginaren 47. artikuluan dago araututa hori).

iii) Entitateak ez badu ebazpen irmo bidezko zehapenik jaso zergaldian lan-arriskuen prebentzioaren arloko arau-hauste astun edo oso astunengatik.

iv) Zerga sortzen den egunerako entitateak beteta badu berdintasun plan bat prestatu eta hura Berdintasunerako Planen Erregistroan inskribatzeko betebeharra, Berdintasun planak eta haien erregistroa arautzen dituen urriaren 13ko 901/2020 Errege Dekretuan xedaturikoarekin bat".

Hiru. 53.2 artikulua; ‘Laugarrena’ ordinala gehitzea; 2026ko urtarrilaren 1etik aurrera hasten diren zergaldietan izanen du eragina.

"Laugarrena. Hirugarren ordinalaren b) eta c) letretan aipatzen diren minorazioak aplikatzearen ondoriozko gutxieneko tributazioak ezin du izan lehenengo ordinalean ateratako zenbatekoari honako portzentaje hauek aplikatuz ateratzen diren emaitzak baino txikiagoa:

a) Ehuneko 13, 51.1.a) artikuluan ezarritako karga-tasaren arabera tributatzen duten zergadunen kasuan,

b) Ehuneko 11, 51.1.b) artikuluaren lehenengo paragrafoan edo 51.2 artikuluan ezarritako karga-tasaren arabera tributatzen duten zergadunen kasuan,

c) Ehuneko 10, 51.1.b) artikuluaren bigarren paragrafoan ezarritako karga-tasaren arabera tributatzen duten zergadunen kasuan".

Lau. 63.5 artikulua:

"5. Artikulu honetan ezarritako kenkaria aplikatzeko, babesletza kontratuaren ondoriozko publizitate-gastuen balorazioen berri eman beharko diote entitate edo pertsona babes-hartzaileek Zerga Administrazioari, zerga-araudian ezarritako ereduen bidez".

Bost. 64.B) 1. artikulua, a) apartatuari ‘Zortzigarrena’ ordinala gehitzea, eta b) apartatuari ‘Bosgarrena’ ordinala gehitzea; 2026ko urtarrilaren 1etik aurrera hasten diren zergaldietan izanen du eragina.

"Zortzigarrena.-N2 eta N3 kategoriak: nagusiki edo bakar-bakarrik salgaiak garraiatzeko diseinatu eta fabrikatutako ibilgailuak, 3,5 tonatik gorako gehieneko masa dutenak".

"Bosgarrena.-N2 eta N3 kategorietako ibilgailuei dagokienez: 150.000 euro".

Sei. 64. artikulua, izenburua eta C) letra, C) letraren edukia D) letra berri batera pasatuta, 2026ko urtarrilaren 1etik aurrera hasten diren zergaldietatik aurrerako ondorioekin:

"64. artikulua. Energia berriztagarrien instalazioetan, mugikortasun elektrikoan eta deskarbonizazioan eginiko inbertsioengatiko kenkariak".

"C) Deskarbonizazioan inbertitzeagatiko kenkaria.

1. Jarduera ekonomikoari atxikitako ibilgetu materialaren elementu berrietan egiten diren inbertsioek amaierako energia-kontsumoa gutxienez 30.000 kW orduko urteko murriztea lortzen badute, % 15eko kenkaria egiteko eskubidea emanen dute.

Kenkariaren oinarria kalkulatzeko, inbertsioaren zenbatekoari inbertsioak eragindako energia-aurrezkiaren transmisioaren ondorioz jasotako zenbatekoa kenduko zaio.

Tributuen arloan eskumena duen departamentuaren titularraren foru agindu bidez zehazten ahalko dira kenkariaren oinarriaren parte diren gastuak.

Kenkaria egiteko eskubidea sortzen den unea Energia Plangintza eta Koordinazioko Zuzendaritza Nagusiaren ebazpenaren datak zehaztuko du. Ebazpen horren bidez inskribatzen dira energia-aurrezpenaren ziurtagiriak Energia Aurrezteko Ziurtagirien Erregistro Nazionalean.

2. Energiaren arloan eskumena duen Nafarroako Gobernuko organoak txosten bat emanen du honako hauek egiaztatzeko: egindako inbertsioak deskarbonizaziora bideratzen direla, kenkariaren oinarria eta kenkaria egiteko eskubidea noiz sortzen den.

3. Kenkariaren zenbatekoa ez da 1.500.000 eurotik gorakoa izanen".

Zazpi. 64 bis.5 artikulua.

"5. Artikulu honetan araututako kenkariaren zenbatekoak, zergadunak proiektu bakoitzeko jasotako gainerako laguntza publikoekin batera, ezin izanen ditu gainditu laguntza-intentsitateko portzentaje hauek:

a) 2. apartatuko a) letran jasotako jardueraren bat xede duten proiektuen kasuan, Batzordearen 651/2014 (EB) Erregelamenduaren 47. artikuluan ezarritako intentsitate-portzentajeak.

b) 2. apartatuko b) eta c) letretan adierazitako jardueraren bat xede duten proiektuen kasuan, Batzordearen 651/2014 (EB) Erregelamenduaren 41. artikuluan aurreikusitako intentsitate-portzentajeak".

Zortzi. 65.1.a) artikulua; 2025ko urtarrilaren 1etik aurrera hasten diren zergaldietan izanen du eragina.

"1.a) Pelikula zinematografikoen eta ikus-entzunezko beste lan batzuen (fikziokoak, animaziokoak edo dokumentalak) espainiar ekoizpenetan egindako inbertsioek, jendearenganatuak izan aurretik euskarri fisiko bat sortzea ahalbidetzen dutenek, kuota likidoan ehuneko 45eko kenkaria egiteko eskubidea emanen diote ekoizleari.

Kenkariaren oinarria, zeina Nafarroako Gobernuan kultura-arloko eskumena duen organoaren ebazpen bidez zehaztuko baita, ekoizlearen inbertsioak osatuko du, baldin eta Nafarroako lurraldean egindako gastuak inbertsioaren ehuneko 40ra iristen badira. Bestela, kenkariaren oinarria izanen da Nafarroako lurraldean eginiko gastuak 0,4rekin zatitzearen emaitza.

Tributuen arloan eskumena duen departamentuaren titularraren foru agindu bidez zehaztuko dira kenkariaren oinarriaren parte izaten ahal diren gastuak, bai eta gastuak Nafarroako lurraldean egindakotzat hartzeko irizpideak ere.

a) letra honen lehenengo paragrafoan ezarritako kenkari-portzentajea ehuneko 50ekoa izanen da kenkariaren oinarriko lehen hiru milioi euroen gainean, honako hauen kasuan:

1. Jatorrizko bertsio bakarra euskarazkoa duten ekoizpenak.

2. Emakumeek esklusiboki zuzendutako ekoizpenak.

3. Ekoizpen dokumentalak.

4. Animazio-ekoizpenak.

5. Inolako film luze zinematografikorik edo fikzio-, animazio- edo dokumental-alorrekoa den ikus-entzunezko serierik zuzendu edo kozuzendu ez duen pertsona batek zuzendutako ekoizpenak.

6. Film laburrak.

Ikus-entzunezko serieen kasuan, denboraldi bakoitzeko zehaztuko da kenkaria.

Apartatu honetan araututako kenkariaren zenbatekoa ez da bost milioi euro baino gehiagokoa izanen".

Bederatzi. 65.1 artikulua, f) letra gehitzea; 2025eko urtarrilaren 1etik aurrera hasten diren zergaldietan izanen du eragina.

"f) Koprodukzioen kasuan, ekoiztetxe bakoitzarentzat banaka zehaztuko da kenkaria, honako arau hauen arabera:

1. Kenkariaren oinarria koproduktorearen inbertsioaren zenbatekoa izanen da, baldin eta Nafarroako lurraldean egindako gastuak inbertsioaren ehuneko 40ra iristen badira. Bestela, kenkariaren oinarria izanen da Nafarroako lurraldean egindako gastuak 0,4rekin zatitzearen emaitza.

2. a) letraren laugarren paragrafoan ezarritako kenkari-portzentaje handitua aplikatzeko, kenkariaren oinarriaren lehen hiru milioi euroren atalasea koproduktore bakoitzeko hainbanatuko da, ikus-entzunezko lanaren guztizko kostuan izan duen partaidetza-portzentajearen arabera.

3. a) letraren azken paragrafoan jasotako kenkariaren gehieneko muga ere hainbanatuko da kontuan izanda zer partaidetza portzentaje izan duen koproduktore bakoitzak ikus-entzunezko lanaren guztizko kostuan".

Hamar. 65.2 artikulua, zazpigarren paragrafoa aldatzea eta azken paragrafoa kentzea; 2025eko urtarrilaren 1etik aurrera hasten diren zergaldietan izanen du eragina.

"Kenkariaren oinarria ez da izanen ikus-entzunezko lanaren guztizko kostuaren ehuneko 80 baino gehiagokoa".

Hamaika. 65.3 artikulua, b) eta h) letrak aldatzea; 2026ko urtarrilaren 1etik aurrera hasten diren zergaldietan izanen du eragina.

"b) Ehuneko 80raino, zinema-aretoen bitartezko ustiapen komertzialerako kalifikazioa duten bi film luze baino gehiago zuzendu edo kozuzendu ez dituen pertsona baten zuzendaritzapekoak izanik ekoizpen-kostua gehienez ere 1.500.000 eurokoa duten ekoizpenak direnean".

"h) Ehuneko 80raino, ekoizpen-kostua gehienez ere 5.000.000 eurokoa duten animazio lanak direnean".

Hamabi. 65.6.c) artikulua; 2025ko urtarrilaren 1etik aurrera hasten diren zergaldietan izanen du eragina.

"c) Produkzio edo koprodukzio nazionalen kasuan, ekoizleak produkzioaren kopia bat eman beharko dio Nafarroako Filmotekari, naziotasun-ziurtagiria eskatzen denetik 6 hilabeteko epean".

Hamahiru. 65. artikulua, apartatu bat gehitzea 9. apartatu gisa, eta ondorioz, orain arte 9. apartatua zenaren edukia 10. apartatu berrian egonen da; 2025eko urtarrilaren 1etik aurrera hasten diren zergaldietan izanen du eragina.

"9. Artikulu honetan araututako kenkarien ondorioetarako, ikus-entzunezko lanaren guztizko kostutzat hartuko da hauen guztien batura, denbora- edo kopuru-mugarik aintzat hartu gabe: ekoizpenaren kostua, kopia estandarra edo master digitala lortu artekoa; publizitate- eta sustapen-gastuak; lanaren emanaldi edo emankizunerako egokitzapen gastuak; lana zaintzeko gastuak; kopiak lortzeko gastuak eta ikus-entzunezko lanaren guztizko kostua egiaztatzeko auditoretza-txosten berezia lortzekoak.

10. Nafarroako Gobernuak kenkari fiskal hau garatu eta aplikatzeko behar diren xedapen guztiak emanen ditu".

Hamalau. 65 ter artikulua, 1. apartatuari azken paragrafo bat gehitzea; 2026ko urtarrilaren 1etik aurrera hasten diren zergaldietan izanen du eragina.

"Muga hori kalkulatzeko, kontuan hartuko dira bai zergadunak berak sortutako kenkariak, bai errenta-eratxikitze edo -egozpenagatik dagozkionak, kasua bada".

Hamabost. VIII. titulua, XI. kapitulua eta 136. artikulua gehitzea; 2026ko urtarrilaren 1etik aurrera hasten diren zergaldietan izanen du eragina:

"XI. KAPITULUA.-ENPRESA-PARTAIDETZAK DITUZTEN SOZIETATEAK

136. artikulua. Enpresa-partaidetzak dituzten sozietateak.

1. Enpresa-partaidetzak dituzten sozietatetzat hartuko dira honako baldintza hauek betetzen dituztenak:

a) Gutxienez 1.200.000 euroko kapital propio ordaindua izatea.

b) Xede sozial esklusiboa enpresak sustatzea edo bultzatzea izatea, haien kapitalean edo funts propioetan parte hartuz. Enpresa horiek ez dute loturarik izanen enpresa-partaidetzak dituen sozietatearekin, eta jarduera ekonomiko bat garatuko dute.

Ezin izanen dute, inola ere, inbertsio kolektiboko erakundeetan edo arrisku-kapitaleko entitateetan parte hartu, ezta jarduera nagusia ondare higigarriaren edo higiezinaren kudeaketa duten sozietateetan ere.

c) Gutxienez 6 enpresatan parte hartzea, zuzeneko partaidetza gutxienez ehuneko 10ekoa eta ehuneko 25 baino txikiagoa delarik, araubideari atxiki eta 6 urteko epean.

Partaidetza horrek izan behar du partaidetzapeko enpresen kapitala handitzeko prozesuetan akzioak edo partaidetzak harpidetzearen ondorio, diruz soilik ordainduta horiek.

d) Enpresa horietako parte hartzeari eustea 10 urtez jarraian.

2. Enpresa-partaidetzak dituzten sozietateen kapitalari edo funts propioei egindako diru-ekarpenen zenbatekoaren ehuneko 10 adinako kenkaria egiten ahalko dute zergadunek kuota likidoan. Ekarpen horrek erabat ordainduta egon beharko du, eta hamar urtez iraun beharko du zergadunaren aktiboan.

3. Artikulu honetan ezarritako araubidea aplikatu nahi izanez gero, Nafarroako Foru Ogasunari jakinarazi beharko zaio 1. apartatuan aipatutako partaidetzak eskuratu baino lehen.

Egindako aukera hori jakinarazi ondoren, enpresa-partaidetzak dituen sozietatea araubide berezi horri loturik geldituko da lehenbiziko zergaldi horretarako eta hurrengo hamarretarako.

4. Enpresa-partaidetzak dituzten sozietateek artikulu honetan araututako araubideari heltzen badiote, ez dute zergarik ordainduko arrisku-kapitaleko entitateen zerga-araubidean.

5. Ez bada betetzen 1. eta 2. apartatuetan aipatutako baldintzaren bat, artikulu honetako araubidea galduko da, eta zergadunak kenkaria aplikatu badu, hori erregularizatu beharko du, 76.3 artikuluan ezarritakoarekin bat".

Hamasei. Hamazazpigarren xedapen gehigarria, izenburua; 2026an hasten diren zergaldietan izanen du eragina.

"Hamazazpigarren xedapen gehigarria. 2026an hasten diren zergaldietan likidazio oinarri negatiboak murrizteko mugak".

Hamazazpi. Hogeita laugarren xedapen gehigarria gehitzea.

"Hogeita laugarren xedapen gehigarria. Zerga-pizgarriak kentzea.

Zigor Kodearen 424. eta 286 ter artikuluetan aurreikusitako delituengatik epai irmoan kondenatutako entitateek ez dute eskubiderik izanen foru lege honetan ezarritako onura edo pizgarri fiskalak aplikatzeko, epaiak ezartzen duen aldian".

Laugarren artikulua. Oinordetzen eta dohaintzen gaineko zergaren xedapenak biltzen dituen testu bategina.

Abenduaren 16ko 250/2002 Legegintzako Foru Dekretuaren bidez onetsitako oinordetzen eta dohaintzen gaineko zergaren xedapenen testu bategineko manu hauek testu hau izanen dute:

Bat. 3.4) artikulua, indargabetzea.

Bi. 9.a) artikulua.

"a) Pentsio-planen onuradunek jasotako diru-zenbatekoak, eta ezta bizitza-aseguruen onuradunek jasotakoak ere kontratu-egilea onuraduna ez beste pertsona bat denean, ekainaren 2ko 4/2008 Legegintzako Foru Dekretuaren bidez onetsi zen Pertsona Fisikoen Errentaren gaineko Zergari buruzko Foru Legearen Testu Bategineko 14.2. a) artikuluan araututako kasuetan, hartan araututa bezala".

Hiru. 23.4 artikulua.

"4. Ondorio horietarako, pentsioen balioa kalkulatzeko, diruaren legezko interes-tasaren arabera kapitalizatu behar dira, eta hortik ateratzen den kapitaletik hartu, gozamenak baloratzeko arauen arabera, pentsiodunaren adinari dagokion zatia pentsioa biziartekoa bada, edo pentsioaren iraupenari dagokiona pentsioa aldi baterakoa bada. Pentsioaren zenbatekoa diru-unitatetan gauzatzen ez denean, ondorio askotarako errenta-adierazle publikoaren urteko zenbatekoaren arabera kalkulatuko da balio hori (OAEAP)".

Lau. 55. artikulua, 7. apartatua aldatzea. Horren ondorioz, orain 7. apartatuaren edukia dena, 8. apartatu berriarena izanen da aurrerantzean.

"7. Katastroak mantentzeaz arduratzen diren langileek tributu-arloan eskumena duen departamentuari bidaliko diote kasuan kasuko ordainketa, zerga-salbuespena edo zerga-loturarik eza egiaztatzen duen oharrik ez duten dokumentuen kopia, haien jakitun izanez gero".

Bost. 59. artikulua, e) letra gehitzea.

"e) Zergaren zerga-egitatearekin lotutako egintza edo kontratuen gainean auzi judiziala sustatzen denean, erregelamenduz ezartzen diren baldintzetan".

Sei. 61. artikulua.

"61. artikulua. Ordainketa geroratzea eta zatikatzea.

Ordainketa geroratzeari eta zatikatzeari dagokionez, Tributuei buruzko Foru Lege Orokorrean eta hura garatzeko araudian ezarritako arauak aplikatuko dira".

Bosgarren artikulua. Ondare eskualdaketen eta egintza juridiko dokumentatuen gaineko zergaren xedapenak biltzen dituen testu bategina.

Apirilaren 26ko 129/1999 Legegintzako Foru Dekretuaren bidez onetsitako ondare-eskualdaketen eta egintza juridiko dokumentatuen gaineko zergari buruzko xedapenen testu bateginaren manu hauek testu hau izanen dute:

Bat. Zazpigarrena.2.f) artikulua:

"f) Aldi baterako edo biziarteko pentsioen zerga-oinarria honela kalkulatuko da: pentsioak diruaren legezko interes-tasaren arabera kapitalizatuko dira, eta hortik ateratzen den kapitaletik hartu, gozamenak baloratzeko arauen arabera, pentsiodunaren adinari dagokion zatia pentsioa biziartekoa bada, edo pentsioaren iraupenari dagokiona pentsioa aldi baterakoa bada. Pentsioaren zenbatekoa diru-unitatetan gauzatzen ez denean, ondorio askotarako errenta-adierazle publikoaren urteko zenbatekoaren arabera kalkulatuko da balio hori (OAEAP)".

Bi. 35.I.B) artikulua, 36. apartatua gehitzea:

"36. Abenduaren 2ko 92/2020 Foru Dekretuari atxikitako adinekoentzako elkarlaneko bizitokietan:

-Abenduaren 2ko 92/2020 Foru Dekretuari atxikitako adinekoentzako elkarlaneko bizitokietarako lurzorua, eraikina edo instalazioak erostea, eraikitzea, egokitzea edo birgaitzea.

-Abenduaren 2ko 92/2020 Foru Dekretuari atxikitako adinekoentzako elkarlaneko bizitokien eraikina edo bizitegi-multzoa obra berrikoa deklaratzea.

-Hipoteka-maileguak, abenduaren 2ko 92/2020 Foru Dekretuari atxikitako adinekoentzako elkarlaneko bizitokietarako eraikina erosi, eraiki edo birgaitzea finantzatzeko erabiltzen direnak".

Hiru. 40 bis artikulua, 6. apartatua gehitzea.

"6. Katastroak mantentzeaz arduratzen diren langileek tributu-arloan eskumena duen departamentuari bidaliko diote kasuan kasuko ordainketa, zerga-salbuespena edo zerga-loturarik eza egiaztatzen duen oharrik ez duten dokumentuen kopia, haien jakitun izanez gero".

Lau. 43. artikulua.

"43 artikulua.

Subjektu pasiboek, zergaren aitorpena aurkeztean, dagokion tributu-zorra zehaztu beharko dute, eta haren autolikidazioa egin eta erregelamenduz ezarritako moduan eta epeetan ordaindu.

Administrazioak egiten dituen likidazioen ordainketa egin beharko da Nafarroako Foru Komunitateko Diru-bilketaren Erregelamenduak ezartzen dituen epeetan."

Seigarren artikulua. Tributuei buruzko Foru Lege Orokorra.

Tributuei buruzko abenduaren 14ko 13/2000 Foru Lege Orokorraren manu hauek honako testu hau izanen dute:

Bat. 29.4 artikulua, lehenengo paragrafoa.

"4. Betiere, erantzuleei tributu-zorraren ordainketa exijitzeko administrazio-ekintza deribatzeko, administrazioaren egintza bat beharko da, zeinetan, interesdunari entzunaldia eman ondoren, erantzukizuna eta haren mota deklaratuko baitira, eta zenbaterainokoa zehaztuko. Hori deklaratu baino lehen, zilegi izanen da administrazio eskudunak 118. artikuluko kautelazko neurriak hartzea, bai eta ikerketak egitea ere, 123. eta 131. artikuluetan aurreikusitako ahalmenekin bat".

Bi. 51.4 artikulua, hirugarren paragrafoa gehitzea; 2026ko urtarrilaren 1etik aurrera aurkezten diren eskaeretan izanen du eragina.

"Ezin izanen dira gauzatan ordaindu 52 bis artikuluarekin bat geroraezinak diren tributu-zorrak. Apartatu honetan aipatzen den gauzazko ordainketarako eskaerak ez dira onartuko".

Hiru. 52 bis. 1 artikulua, bigarren paragrafoa.

"Geroratzea edo zatikatzea onetsiz gero, eskatzaileak egunean izan beharko ditu bere zerga-betebeharrak eta Nafarroako Foru Ogasunak kudeatzen dituen gainerako zor publikoak. Egoera horri eutsi beharko dio geroratze edo zatikatze horrek iraun bitartean".

Lau. 52 bis. 2 artikulua; 2026ko urtarrilaren 1etik aurrera aurkezten diren eskaeretan izanen du eragina.

"2. Ez dira onartuko honako geroratzeko edo zatikatzeko eskaera hauek:

a) Autolikidazio bidez deklaratu behar diren zorrak dituzten eskaerak, baldin eta autolikidazioa ez bada aurkeztu geroratze- edo zatikatze-eskaera baino lehenago edo horrekin batera.

b) Atxikipenen, konturako diru-sarreren, zatikatutako ordainketen edo konturako ordainketen ondoriozko zorrak dituztenak, salbu eta tributuen arloan eskumena duen departamentuko titularrak ezarritako kasuetan.

c) Zozketetan, tonboletan, apustuetan, ausazko konbinazioetan eta zorizko, enbidoko edo ausazko jokoetan ezarritako tasekin zerikusia duten zorrak dituztenak.

d) Zenbait garraiobideren gaineko zerga berezitik eratorritako zorrak dituztenak.

e) Balio erantsiaren gaineko zergaren autolikidazioaren ondoriozko zorrak dituztenak, urrutiko salmentei eta barneko ondasun-emate eta zerbitzu-prestazio batzuei aplikatzekoak zaizkien araubide berezietan.

f) VI. tituluan araututako estatu-laguntzak berreskuratzeko erabakiak betetzearen ondoriozko zorrak dituztenak.

g) Geroratu edo zatikatu nahi den zorraren zenbateko osoa txikiagoa denean tributuen arloan eskumena duen departamentuko titularrak ezarritakoa baino; bada, halako zorrak dituztenak.

h) Berme-onarpena edo lekapen osoa nahiz partziala eskatzen den kasuetan, diru-bilketari buruzko araudiak galdatutako dokumentazioarekin batera aurkezten ez direnak.

i) Eteteko eskatu eta etete hori onartua duten zorrak dituztenak.

j) Etenda edo etete-izapideetan dauden zorrak dituztenak.

k) Geroratua edo zatikatua izatea eskatzen den zorrari dagokion autolikidazioa aurkeztu denean aurretiaz ikuskapen-prozedura bat hasia egon eta etenda geratu delarik 139.3.a) artikuluan aurreikusitakoaren arabera; baldin eta eskaera, betiere, etendura-kausaren eraginpeko kontzeptu eta epeei buruzkoa bada eta horien berri eman baitzaio jurisdikzio eskudunari edo Fiskaltzari.

l) Nahitaez efektu tinbredunak erabiliz ordaindu beharreko zorrak dituztenak.

m) Hartzekodun-konkurtsoan deklaratutako zordunek aurkeztuak direnak, edo funtzionamenduan dagoen enpresaren salmentarik gabeko likidazioko prozesu berezia, konkurtso-legean ezarritakoa, ireki zaien mikroenpresek aurkeztuak direnak.

n) Aurretiaz geroratzeko bermea izanda berme hori bete ez duten zorrak dituztenak.

ñ) Aurreko batean ezezkoa jaso zuten eskaerak errepikatzen dituztenak, baldin eta ez bada funtsezko aldaketarik egin aurrez ezetsitako eskaeraren aldean.

o) Bahitutako ondasunak besterentzeko erabakia interesdunari jakinarazi ostean aurkeztutakoak.

p) Epe exekutiboan aurrez geroratuta zeuden baina ondoren geroratzea edo zatikatzea bertan behera gelditu zaien zorrak dituztenak, salbu eta tributu arloan eskumena duen departamentuko titularrak ezarritako zenbatekoa ordaindu bada".

Bost. 121.2 artikulua.

"2. Ordena honi jarraituko zaio bahituran:

a) Eskudirua edo kreditu-entitateetan, ordainketa-entitateetan eta diru elektronikoko entitateetan irekitako kontuetako dirua.

b) Kriptoaktiboak, honako honen aplikazio eremuan sartutakoak: Europako Parlamentuaren eta Kontseiluaren 2023ko maiatzaren 31ko 2023/1114 (EB) Erregelamendua, kriptoaktiboen merkatuei buruzkoa, eta aldatzen dituena 1093/2010 (EB) eta 1095/2010 (EB) erregelamenduak eta 2013/36/EB eta 2019/1937 (EB) zuzentarauak.

c) Unean bertan edo epe laburrean gauzatzen ahal diren kredituak, efektuak, baloreak eta eskubideak.

d) Soldatak, lansariak eta pentsioak.

e) Ondasun higiezinak.

f) Merkataritza- edo industria-arloko establezimenduak.

g) Metal preziatuak, harri finak, bitxiak, urregintzako lanak eta antzinako gauzak.

h) Era guztietako etekinak eta errentak.

i) Ondasun higigarriak eta aziendak.

j) b) letran jasotako kriptoaktibo desberdinak.

k) Epe luzera gauzatzen ahal diren kredituak, eskubideak eta baloreak".

Sei. 122.1 artikulua.

"1. Zerga-administrazioak kreditu-entitate bateko bulego bati edo beste pertsona, ordainketa entitate, diru elektronikoko entitate edo entitate gordailuzain bati entregatu edo haien esku utzitako funts, balore eta bestelako ondasunen berri duenean, zilegi izanen du haien bahitura xedatzea bidezkoa den zenbatekoan, aipatutako pertsona edo bulegoaren esku dauden identifikazio-datuak eta kontu, gordailu, balore edo eragiketa bakoitzaren egoera zehaztu beharrik gabe".

Zazpi. Hamaseigarren xedapen gehigarria, 2026ko urtarrilaren 1etik aurrerako eraginarekin.

"Hamaseigarren xedapen gehigarria. Elkarlaguntzari buruzko zerga-araubidea.

1. Estatuaren eta Nafarroako Foru Komunitatearen arteko Hitzarmen Ekonomikoaren 5.3 artikuluan ezarritakoarekin bat, araubide berekirik ezean, Tributuei buruzko abenduaren 17ko 58/2003 Lege Orokorraren III. tituluaren VI. kapituluan elkarlaguntzari buruz aurreikusitako zerga-araubidea aplikatuko da Nafarroan, baita arau horretan arlo horri buruz dauden gainerako xedapenak ere, eta, zehazki, honako hauei buruzkoak: berandutze-interesak kobratzea, ordainketa geroratzea eta zatikatzea, preskripzio-epeak etetea, kredituen lehentasuna eta bermeak, tributu-arloko datuak lagatzea, frogen bitartekoak eta balorazioa, kautelazko neurriak hartzea eta errekarguen sortzapena epe exekutiboan.

2. Elkarlaguntzari buruz lurralde erkideko araudian funtzionarioez edo Zerga Administrazioaz egiten diren aipamenak Nafarroako funtzionarioez edo Foru Zerga Administrazioaz eginak direla ulertuko da, Hitzarmen Ekonomikoan ezarritako eskumen eta eskudantzien arabera".

Zortzi. Hamazazpigarren xedapen gehigarria gehitzea, 2026ko urtarrilaren 1etik aurrerako eraginarekin.

"Hamazazpigarren xedapen gehigarria. Informazio-betebeharra eta arrazoizko arretaren betebeharra, finantza-kontuei dagokienez, elkarlaguntzaren esparruan.

1. Finantza-erakundeek arrazoizko arretaren arauak aplikatu beharko dizkiete finantza-kontu jakin batzuen titularrei edo kontuen kontrola duten pertsonei, eta kontu horiei buruzko informazioa eman Zerga Administrazioari, bat etorriz, batetik, finantza-kontuei buruzko informazioaren truke automatikoaren gaineko Agintaritza Eskudunen arteko Akordio Aldeaniztunean eta haren gehigarrian xedatutakoarekin, eta, bestetik, Kontseiluaren 2011ko otsailaren 15eko 2011/16/EB Zuzentarauan xedatutakoarekin. Zuzentarau hori fiskalitate-esparruko lankidetza administratiboari buruzkoa da, eta honako hauek aldatu zuten: Kontseiluaren 2014ko abenduaren 9ko 2014/107/EB Zuzentaraua -fiskalitate-esparruko informazio truke automatikoaren nahitaezkotasunari dagokionez-, eta Kontseiluaren 2023ko urriaren 17ko 2023/2226 (EB) Zuzentaraua, fiskalitate-esparruko lankidetza administratiboari buruzko 2011/16/EB Zuzentaraua aldatzen duena.

Era berean, finantza-kontuen titularrek edo haien kontrola dutenek arrazoizko arretaren arauak aplikatzearen ondoriozko betebeharrak bete beharko dituzte, zehazki beren identifikazio eta egoitza fiskalari buruzkoak, kontu horiek zer finantza erakundetan ireki dituzten, horien aurrean.

Tributuen arloan eskumena duen departamentuko titularrak garatuko ditu, foru agindu bidez, arrazoizko arretaren arauak, bai eta finantza-erakundeek haietan irekitako finantza-kontuen titularrei buruz edo haien kontrola dutenei buruz eman beharreko informazioaren betebeharrak ere.

2. 1. apartatuan ezarri diren informazioa emateko betebeharrak ez betetzearen ondoriozko arau-hausteak eta zehapenak foru lege honen III. tituluko VI. kapituluan xedatutakoaren arabera arautuko dira, xedapen honetan ezarritako berezitasunekin.

3. Tributu-arloko arau-haustea izanen da arrazoizko arretaren arauen ondoriozko betebeharrak ez betetzea edo oker betetzea, honako hauei dagokienez:

a) Finantza-kontuen identifikazioa, pertsona fisikoen informazioa komunikatzeko betebeharraren menpe daudenean.

b) Finantza-kontuen identifikazioa, entitateen informazioa komunikatzeko betebeharraren menpe daudenean.

Apartatu honetan ezarritako tributu-arloko arau-haustea astuna da, eta zehapena 200 euroko isun finkoa izanen da ez-betetzeak ukitzen duen pertsona bakoitzeko.

Finantza-erakundeek kanpoko zerbitzu-emaile bat baliatzen badute informazioa eta arrazoizko arreta emateko betebeharrak betetzeko, nolanahi ere, betebeharrak erakundearen erantzukizuna izanen dira beti.

4. Tributu-arloko arau-haustea izanen da finantza-kontuen titular direnek edo haien kontrola dutenek datu faltsuak, osatugabeak edo zehaztugabeak ematea finantza-erakundeari, finantza-erakundeak betebehar jakin batzuk baititu aurreko apartatuan aipatzen diren arrazoizko arretaren arauak aplikatzearen ondorioz.

Apartatu honetan ezarritako tributu-arloko arau-haustea astuna da, eta zehapena 300 euroko isun finkoa izanen da.

5. Kontua irekitzean eskuratu beharko dira finantza kontuen titularrei edo haien kontrola dutenei exijitzen ahal zaizkien aitorpenak, 2016ko urtarrilaren 1etik aurrera ireki diren kontuen kasuan edo 2026ko urtarrilaren 1etik aurrera irekitzen direnen kasuan, 2023ko urriaren 17ko 2023/2226 (EB) Zuzentarauak ezarritako aldaketei jarraikiz finantza-kontutzat hartzen badira soilik; izan ere, aldaketa horiek identifikazio eta egoitza fiskalari buruzkoak dira, xedapen gehigarri honen ondorioetarako. Aitorpen horiek ez bazaizkio finantza-erakundeari ematen kontua irekitzea eskatzen denetik 90 eguneko epean, finantza-erakundeak ez du kontuan kargurik, ordainketarik ez eta bestelako eragiketarik ere eginen, harik eta ematen zaizkion arte.

6. Zerga-administrazioaren eskura jarrita egon beharko dute xedapen honek hizpide dituen informazioa eta arrazoizko arreta emateko betebeharra betetze aldera erabilitako frogagiriek, finantza-kontuen titularrei edo haien kontrola dutenei exijitzen ahal zaizkien aitorpenek eta gainerako informazioak, aipatutako kontuei buruzko informazioa eman behar den unearen ondorengo bosgarren urtea amaitu bitarte.

7. Xedapen honen arabera informazioaren berri emateko betebeharra duten finantza-erakundeek informazio-komunikazioaren menpe dauden pertsona fisiko guztiei jakinarazi beharko diete ezen haiei buruzko informazioa, komunikazio betebeharrak ukitzen duena, zerga-administrazioari komunikatu eta dagokion estatu kideari helaraziko zaiola, 2011/16/EB Zuzentaraua eta xedapen honetan aipaturiko nazioarteko akordioak betez. Kontua zein urtetan dagoen lehenbizikoz informazio-komunikazioaren menpe, hurrengo urteko urtarrilaren 31 baino lehen egin beharko da komunikazio hori. Era berean, finantza-erakundeak behar besteko aurrerapenaz emanen dio pertsona fisikoari eskubidez jaso behar duen informazio guztia, hark bere datu pertsonalak babesteko eskubidea baliatu ahal izan dezan, eta, betiere, berak bildutako informazioa Zerga Administrazioari eman aurretik.

8. 5. eta 6. apartatuetan xedatutakoa aplikatzekoa izanen da, halaber, finantza-kontuen gainean informazioa eta arrazoizko arreta emateko betebeharrei dagokienez, Ameriketako Estatu Batuen eta Espainiako Erresumaren arteko Akordioan xedatutakoari jarraikiz, gai fiskalak nazioartean betetzea hobetzeko eta Foreign Account Tax Compliance Act-FATCA inplementatzeko Akordioan alegia.

Era berean, 2015. urtean irekitako kontuen kasuan, 2016ko urtarrilaren primerako ez bazaizkio finantza erakundeari eman 5. apartatuan aipatzen diren aitorpenak, eta egun horretatik 60 eguneko epean ere ez bazaizkio ematen, finantza-erakundeak ez du kontuan kargurik, ordainketarik ez eta bestelako eragiketarik ere eginen, harik eta ematen zaizkion arte.

9. Apartatu honetan aipatzen diren aitorpen informatiboak tributu-arloan eskumena duen departamentuko titularrak ezartzen duen moduan, tokian eta epean aurkeztu beharko dira".

Bederatzi. Hemezortzigarren xedapen gehigarria, d) letra eta azken paragrafoa; 2026ko urtarrilaren 1etik aurrera izanen dute eragina.

"d) Erregelamenduz zehazten diren eta atzerrian kokatuta dauden kriptoaktiboei buruzko informazioa, baldin eta horien titularrak badira, edo onuradun-izaera badute edo bestela erabiltzeko ahalordea badute, eta hirugarrenen izenean pasahitz kriptografiko pribatuak gordetzeko, kriptoaktiboak mantentzeko, biltegiratzeko eta transferitzeko zerbitzuak ematen dituzten beste pertsona edo entitate batzuek zaintzen badituzte. Kriptoaktiboen kontzeptua erregelamendu honen 3.1.5) artikuluan ematen den definizioaren arabera ulertuko da: Europako Parlamentuaren eta Kontseiluaren 2023ko maiatzaren 31ko 2023/1114 (EB) Erregelamendua, kriptoaktiboen merkatuei buruzkoa, eta aldatzen dituena 1093/2010 (EB) eta 1095/2010 (EB) erregelamenduak eta 2013/36/EB eta 2019/1937 (EB) zuzentarauak.

Xedapen honetan aurreikusitako betebeharrak benetako titularrak direnentzat ere izanen dira, Kapital Zuriketari eta Terrorismoaren Finantzaketari Aurrea Hartzeko apirilaren 28ko 10/2010 Legearen 4.2 artikuluan aurreikusitakoaren arabera".

Hamar. Hogeita batgarren xedapen gehigarria; bi paragrafo gehitzea.

"Aurrekoarekin bat, tributu-arloko araudian bikote egonkorrak aipatzen direnean, soilik eraginen die xedapen honetako baldintzak betetzen dituzten bikote egonkorrei.

Xedapen honetako baldintzak beteta, parekatzeak ondorioak izanen ditu behar den erregistroan inskribatzeko eskaera egiten den egunetik aurrera".

Hamaika. Hogeita zortzigarren xedapen gehigarriaren B)1 letra, i) letra gehitzea.

"i) Operadore fidagarrien erregistroan alta emateko eskaeraren prozedura".

Hamabi. Hogeita hamahirugarren xedapen gehigarria, 2. apartatua.

"2. Kontseiluaren 2011/16/EB Zuzentarauaren 8 bis ter.5) artikuluan eta aipatutako ereduzko arauetan jasotako informazioa emateko betebeharretik salbuetsita egonen dira, sekretu profesionala dela-eta, abokatuak eta organo jurisdikzionalen aurrean epaiketetan ordezkari aritzeko gaitutako bestelako profesionalak, bitartekaritzat hartzen badira eta aholkulari lanak egin badituzte mugaz gaindiko mekanismo baten diseinuan, merkaturatzean, antolaketan, gauzatzeko eskura jartzeko, edo hura gauzatzeko kudeaketan, haien helburu bakarra izanik ebaluatzea ea mekanismoa bat datorren aplikagarria den araudiarekin, baina haren ezarpenean lagundu gabe.

Sekretu profesionalaren betebeharra duen bitartekaria betebehar horretatik libre gelditzen ahalko da interesdun den zergapekoak modu fede-emailean komunikaturik emandako baimenaren bitartez".

Hamahiru. Hogeita hamalaugarren xedapen gehigarria, 1. apartatua.

"1. Sekretu profesionalaren betebeharra dela-eta plangintza fiskalerako mugaz gaindiko mekanismoen aitorpena aurkeztetik salbuetsita dauden bitartekariak behartuta egonen dira salbuespen horren berri modu fede-emailean ematera mekanismo horietan parte hartzen duten beste bitartekariei eta interesdun diren zergapekoei. Abokatuen kasuan, beren bezero direnei baino ez diete modu fede-emailean komunikatu beharko salbuespen hori, mekanismo horietan parte hartzen duten beste bitartekari batzuk izan nahiz zergapeko interesdunak izan".

Hamalau. Berrogeigarren xedapen gehigarria gehitzea, 2026ko urtarrilaren 1etik aurrerako eraginarekin.

"Berrogeigarren xedapen gehigarria. Informazio-betebeharra eta arrazoizko arretaren betebeharra, elkarlaguntzaren esparruan "informazioa komunikatzera behartuta dauden kriptoaktibo-zerbitzuen hornitzaileen" aitorpen informatiboari dagokionez.

1. "Informazioa komunikatzera behartuta dauden kriptoaktibo-zerbitzuen hornitzaile" diren pertsona edo entitateek arrazoizko arretaren arauak aplikatu eta informazioa emateko eta, kasua bada, hura erregistratzeko betebeharrak bete beharko dituzte, honako hauetan ezarritakoarekin bat: Kontseiluaren 2011ko otsailaren 15eko 2011/16/EB Zuzentarauaren 8 bis quinquies artikulua eta VI. eranskina (fiskalitate esparruko lankidetza administratiboari buruzko zuzentaraua, 77/799/EEE Zuzentaraua indargabetu zuena, eta Kontseiluaren 2023ko urriaren 17ko 2023/2226 (EB) Zuzentarauak aldatutakoa); kriptoaktiboei buruzko informazioa trukatzeko markoarekin bat informazioa automatikoki trukatzeko Agintaritza Eskudunen arteko Akordio Aldeaniztuna; helburu berarekin hitzartutako nazioarteko beste akordio batzuk; xedapen hau, eta erregelamenduz ezartzen diren baldintzak.

Gainera, "kriptoaktibo-erabiltzaile"-tzat eta, entitateen kasuan, erabiltzaile horien "kontrola egiten duten pertsona"-tzat jotako pertsonek eta entitateek arrazoizko arretaren arauak aplikatzearen ondoriozko betebeharrak bete beharko dituzte, beren identifikazio eta egoitza fiskalari buruzkoak zehazki, aurreko paragrafoan aipatutako araudiarekin bat.

Tributu-arloan eskumena duen departamentuko titularrak garatuko ditu, foru agindu bidez, arrazoizko arretaren arauak, bai eta apartatu honetan aipatzen diren informazioa emateko eta erregistratzeko betebeharrak ere.

Xedapen gehigarri honetan eta berau garatzeko araudian erabilitako terminoek erregelamenduz ezarritako esanahia izanen dute, besterik ezarri ezean.

2. Xedapen honetan ezarritako ondorioetarako, "informazio-komunikaziora behartutako erabiltzaile" eta "informazio-komunikaziora behartutako pertsona" terminoek Espainiako egoiliarrei edo ez-egoiliarrei eginen diete erreferentzia, erregelamenduz ezartzen diren esklusioekin.

3. Ez badira betetzen informazioa emateko, eta kasua bada, hura erregistratzeko betebeharrak, 1. apartatuan ezarritakoak, ez-betetzearen ondoriozko arau-hausteak eta zehapenak foru lege honen III. tituluaren VI. kapituluan xedatutakoaren arabera arautuko dira, xedapen honetan ezarritako berezitasunekin.

4. Tributu-arloko arau-haustea izanen da arrazoizko arretaren arauen ondoriozko betebeharrak ez betetzea, oker betetzea edo epez kanpo betetzea, honako hauei dagokienez:

a) Zehaztea ea "kriptoaktibo-erabiltzaile den pertsona fisikoa" "informazio-komunikaziora behartutako erabiltzailea" den.

b) Zehaztea ea "kriptoaktibo-erabiltzaile den entitatea" "informazio-komunikaziora behartutako erabiltzailea" ala "entitatea" den, "kanpoan utzitako pertsona" edo "entitate aktibo" izan gabe, zeinetan "kontrola egiten duen pertsona" bat edo zenbait "informazio-komunikaziora behartutako pertsona" diren.

Apartatu honetan aurreikusitako tributu-arloko arau-haustea astuna izanen da, eta 200 euroko diruzko isun finko batez zehatuko da arrazoizko arretari buruzko arauak aplikatzeak eragindako betebeharrak bete ez diren pertsona bakoitzeko.

"Informazioa komunikatzera behartuta dagoen kriptoaktibo-zerbitzuen hornitzaile" batek kanpoko zerbitzu-emaile bat baliatzen badu arrazoizko arretari dagozkion betebeharrak betetzeko, betebeharrek zerbitzu-hornitzaile horren erantzukizuna izaten jarraituko dute.

5. Tributu-arloko arau-haustea da "kriptoaktibo-erabiltzaileek" edo erabiltzaile horien "kontrola egiten duten pertsonek" "informazioa komunikatzera behartuta dauden kriptoaktibo-zerbitzuen hornitzaileei" informazio faltsua, osatugabea edo zehaztu gabea komunikatzea hornitzaileek aurreko apartatuan aipatzen den arrazoizko arretaren arauak aplikatzearen ondorioz sortzen diren betebeharrak betetzean.

Apartatu honetan aurreikusitako tributu-arloko arau-haustea astuna da, eta 300 euroko diruzko isun finko batekin zehatuko da.

6. "Kriptoaktibo-erabiltzaileek" edo, entitateen kasuan, erabiltzaile horien "kontrola egiten duten pertsonek" ez badiote "informazioa komunikatzera behartuta dagoen kriptoaktibo-zerbitzuen hornitzaileari" ematen arrazoizko arretaren arauak bete beharrez exijitzen zaien informazioa, eta hornitzaileak hasierako informazio-eskaera egin zuenetik bi gogorarazpen jaso badituzte eta 60 egun natural baino gehiago iragan badira, "informazio-komunikaziora behartutako eragiketak" egitea galaraziko dio hornitzaileak "kriptoaktibo-erabiltzaileari".

7. "Informazioa komunikatzera behartutako kriptoaktiboen hornitzailea" den "kriptoaktibo-operadore" batek ez badu betetzen 1. apartatuan aipatzen den informazioa emateko betebeharra bi errekerimendu jaso ostean, zerga-administrazioak kautelaz erabakiko du operadorearen baja egitea dagokion zentsuan. Bigarren errekerimendua egin zenetik gehienez ere 90 egun naturaleko epean eginen da baja, baina inoiz ere ez bigarren errekerimendua egin zenetik 30 egun natural igaro baino lehen.

Behin baja egitea erabaki denean, operadoreak berriz alta egin ahal izateko, informazioa emateko betebeharra betetzeko konpromisoa duela erakusten duten berme egokiak eman beharko dizkio zerga-administrazioari, emateko dagoen informazioa ere barne. Ondorio horietarako, zerga-administrazioak berme egokitzat jotzen ahalko du erantzukizunpeko adierazpen bat edo tributu-arloko araudian ezarritako beste edozein berme. Zerga-administrazioak Tributuei buruzko Foru Lege Orokorrean aurreikusitako egiaztapen- eta ikerketa-jarduketen bitartez erabakitzen ahalko du berme horiek egokiak direla, haien zentsu-egoera egiaztatu ondoren, hala badagokio.

8. Zerga-administrazioak bost urtez gordeko ditu eta izanen ditu eskuragarri "kriptoaktiboen erabiltzaileei" eta, entitateen kasuan, erabiltzaile horien "kontrola egiten duten pertsonei" exijitzen ahal zaizkien aitorpenak, frogagiriak, erregistroak eta beste edozein informazio, arrazoizko arretaren arauak aplikatzeko eta xedapen gehigarri honek hizpide dituen informazioa emateko eta, kasua bada, hura erregistratzeko betebeharra betetzeko erabiliko direnak; alegia, erabiltzaile horien "informazio-komunikaziora behartutako jarduketei" buruzko informazioa noiz eman behar den, bost urte pasatakoan eta urte hori amaitu bitarte.

Foru lege honen arau orokorren arabera xedapen gehigarri honek aipatzen dituen informazioa emateko eta kasua bada, hura erregistratzeko betebeharrak egiaztatzeko eta ikertzeko ahalmenak ukatu gabe, zerga-administrazioak egiaztatu eta ikertzen ahalko du ea betetzen diren "informazioa komunikatzera behartutako kriptoaktibo-zerbitzuen hornitzaileek" aplikatu beharreko arrazoizko arretaren arauak".

9. "Informazioa komunikatzera behartutako kriptoaktibo-zerbitzuen hornitzaile" guztiek informazio-komunikaziora behartutako pertsona fisiko bakoitzari jakinarazi beharko diote ezen hari buruzko informazioa, xedapen honetan hizpide dena, zerga-administrazioari emanen zaiola eta dagokion estatuari transferituko zaiola, bat etorriz Kontseiluaren 2011ko otsailaren 15eko 2011/16/EB Zuzentarauarekin eta xedapen honetan aipatutako nazioarteko akordioekin. Era berean, "informazioa komunikatzera behartutako kriptoaktibo-zerbitzuen hornitzaileak" behar besteko aurrerapenaz emanen dio pertsona fisikoari eskubidez jaso behar duen informazio guztia, hark bere datu pertsonalak babesteko eskubidea baliatu ahal izan dezan, eta, betiere, berak bildutako informazioa zerga-administrazioari eman aurretik".

Zazpigarren artikulua. Nafarroako Foru Komunitateko administrazioko eta haren erakunde autonomoetako tasa eta prezio publikoei buruzko Foru Legea.

2026ko urtarrilaren 1etik aurrerako ondorioekin, Nafarroako Foru Komunitateko administrazioko eta haren erakunde autonomoetako tasa eta prezio publikoei buruzko otsailaren 11ko 2/2021 Foru Legearen manu hauek testu hau izanen dute:

Bat. 24.3 eta 4 artikuluak:

"3. Sortzapena.

Iragarkiak argitaratzeko eskaera aurkezten den unean sortuko da iragarkiak argitaratzeagatiko tasa. Argitaratzea gauzatu eta dagokion zenbatekoa zehaztu ondoren eginen da ordainketa. Dena dela, Nafarroako Aldizkari Ofiziala kudeatzeko eskumena duen organoak zilegi izanen du ordainketa exijitzea eskaera aurkeztearekin batera.

4. Tarifak.

Tarifa 80,00 eurokoa izanen da argitaratutako iragarki bakoitzeko".

Bi. 36.4 artikulua, 17. tarifaren izena.

"Sarrera proba, ohiz kanpoko goiztiartasuna erakusten dutenek musikako goi-mailako arte-irakaskuntzetako gradu ikasketak egiteko".

Hiru. 41.4 artikulua, 1. eta 2. tarifak.

"1. Osasun-zentroak eta -zerbitzuak:

 Euroak
A) Barneratze-zerbitzua duten zentroak 
Eraketarako eta jarduteko baimena tramitatzea500,00
Hasierako araubidea eta/edo egitura edo osasun-arduraduna aldatzeko baimena edo baliozkotze-baimena tramitatzea250,00
Ikuskapen arautua edo alderdi batek eskatua200,00
B) Barneratzerik gabeko zentroak 
Eraketarako eta jarduteko baimena tramitatzea300,00
Lekualdatzea eta jardutea300,00
Hasierako araubidea eta/edo egitura edo osasun-arduraduna aldatzeko baimena edo baliozkotze-baimena tramitatzea150,00
Ikuskapen arautua edo alderdi batek eskatua115,00
C) Osasun-garraioa 
Anbulantzien osasun-ziurtagiria tramitatzea100,00
Ikuskapen arautua edo alderdi batek eskatua115,00
D) Osasun-zentro eta -establezimenduen osasun-arloko publizitaterako baimena100,00
E) Alderdi batek eskatutako txostenak: gidariak, armak, osasun-arlokoak ez diren jarduerak115,00
F) Komunitate terapeutikoak 
Komunitate terapeutikoen akreditazioa150,00
Opiazeo bidezko ordezko tratamendurako akreditazioa150,00
Histobateragarritasuneko laborategiaren akreditazioa150,00
Asistentziaren Etikako Batzordearen akreditazioa150,00
Haurdunaldia norbere borondatez eteteko jarduerarako akreditazioa150,00
G) Organo- eta ehun-transplantea 
Organoak eta ehunak lortzeko eta/edo transplantatzeko baimena (x/c tej)200,00
Organoak eta ehunak lortzeko eta/edo transplantatzeko baimena berritzea (x/c tej)150,00
H) Ehun-establezimendua 
Ehun-establezimendurako baimena (x/c tej)200,00
Ehun-establezimendurako baimena berritzea (x/c tej)150,00
I) Laguntza bidezko Giza Ugalketako Unitatea 
Laguntza bidezko Giza Ugalketako Unitaterako baimena200,00
Laguntza bidezko Giza Ugalketako Unitaterako baimena berritzea150,00

2. Osasun-establezimenduak:

 Euroak
A) Farmazia-bulegoak 
Farmazia-bulegoa irekitzeko baimena340,00
Farmazia-bulegoa lekualdatzeko edo lokalak aldatzeko baimena225,00
Titularra aldatzeko baimena115,00
Ikuskapen arautua edo alderdi batek eskatua115,00
B) Farmazia-zerbitzuak 
Instalatzeko baimena340,00
Lokalak aldatzeko edo farmazia-zerbitzua lekualdatzeko baimena225,00
Farmazialari arduraduna aldatzeko baimena115,00
Ikuskapen arautua edo alderdi batek eskatua115,00
C) Landa-eremuko botikategiak 
Instalatzeko baimena190,00
Lokalak aldatzeko edo lekualdatzeko baimena115,00
Ikuskapen arautua edo alderdi batek eskatua115,00
D) Botika-biltegiak zentro soziosanitarioetan 
Instalatzeko baimena225,00
Lokalak aldatzeko edo lekualdatzeko baimena115,00
Jarduteko baimena baliozkotzea115,00
Ikuskapen arautua edo alderdi batek eskatua115,00
E) Gizaki eta/edo animalientzako botikak banatzeko biltegiak 
Instalatzeko baimena340,00
Biltegia lekualdatzea edo lokalak aldatzea285,00
Zuzendari teknikoa aldatzeko baimena115,00
Ikuskapen arautua edo alderdi batek eskatua115,00
F) Osasun-produktuen establezimenduak 
Optika-, audifono- eta/edo ortopedia-establezimenduetarako eta farmazia-bulegoetako atal horietarako baimena340,00
Hortz-protesien laborategirako baimena340,00
Aurreko ataletan sartu ez diren neurrirako osasun-produktuen fabrikatzaile gisa jarduteko lizentzia:340,00
Lokalak eta/edo jarduera aldatzeko baimena225,00
Jarduteko baimena baliozkotzea225,00
Ikuskapen arautua edo alderdi batek eskatua115,00
Osasun-produktuen publizitaterako baimena190,00
G) Farmazia-industria eta -laborategiak 
Banaketako, laborategiko, kliniketako eta farmakozaintzako jardunbide egokien ikuskapena eta egiaztapena, bai eta zuzen fabrikatzeko arauena ere (BPD, BPL, BPC, BPFV eta NCF).675,00 (ikuskapenean eta/edo egiaztapenean emandako egun bakoitzeko)
Ikuskapen arautua edo alderdi batek eskatua115,00
H) Kosmetikoak 
Zuzen fabrikatzeko arauen ikuskapena eta egiaztapena.675,00 (ikuskapenean eta/edo egiaztapenean emandako egun bakoitzeko)
Ikuskapen arautua edo alderdi batek eskatua115,00
I) Bestelako jarduketak 
Farmazia-zentro eta -produktuen gaineko txostenak ematea, interesdunak eskaturik190,00
Jardunbide egokiak betetzen direla frogatzen dituzten ziurtagiri naziokoak zein nazioartekoak ematea (BPD, BPL, BPC, BPFV eta NCF, eta haien pareko beste batzuk) 
150,00 (lehenengo ziurtagiria) 15,00 (eskaera berean egindako bigarren eta/edo ondorengo ziurtagiriagatik)"

Lau. 43. artikulua, izenburua.

"43. artikulua. Trafikoari eta segurtasunari dagozkion jardueren eta zerbitzuen tasa".

Bost. 43.4 artikulua, 1. tarifa eta 4.10 tarifa gehitzea.

  Euroak
"1. TARIFANafarroako Foruzaingoak zerbitzuak eman eta jarduerak egiteagatikoa 
 1. Nafarroako kirol federazioen egutegietan jaso gabeko kirol-probetako zaintza, segurtasuna eta segizioa, erregelamenduz ezartzen diren baldintzetan 
 1.1. Bizikleta-lasterketa, etapa bakoitzeko: kategoriak 
 a) Eskolak116,94
 b) Kadeteak394,96
 c) Juniorrak472,18
 d) 23 urtez azpikoak513,00
 e) Elitea551,62
 f) Masterrak551,62
 g) Beteranoak513,00
 h) Emakumeak472,18
 i) Profesionalak1.105,44
 j) Ziklokirolariak513,00
 1.2. Beste kirol-proba batzuk234,99
 2. Zaintza, segurtasuna eta segizioa zikloturisten ibilaldietan eta eremu publikoetan egiten diren beste jarduera batzuetan197,47
 3. Beren ezaugarri teknikoengatik edo daramaten zamarengatik baimendutako gehieneko masa eta neurriak gainditzen dituzten edo erregelamenduz ezarritako gutxieneko abiadura baino txikiagoan ibiltzen diren ibilgailuak eskoltatu eta kontrolatzea eta haien zirkulazioa antolatzea50,33 ordu eta foruzain bakoitzeko
 4. Kendu da 
 5. Ibilgailuak gordailuetan edukitzea, hara eraman eta 12 ordutik aurrera, eguneko 
 a) Bizikletak, ziklomotorrak2,20
 b) Motozikletak, motogurdiak eta antzeko ibilgailuak5,51
 c) Automobilak, turismoak, kamionetak, furgoiak, etab., 1.000 kg arteko tara dutenak9,93
 d) Kamioiak, traktoreak, atoiak, erdi-atoiak, kamionetak, furgonetak eta 1.000 kg baino gehiagoko tara duten bestelako ibilgailuak23,17
 6. Foruzaingoak ematen dituen txostenak47,43
 7. Trafiko zirkulazioa arautzea, bideen aprobetxamendu sozio-ekonomikoaren ondorioz50,33 ordu eta foruzain bakoitzeko

 Euroak
"4. TARIFA10. Trafiko Zerbitzuaren eskumeneko beste baimen berezi batzuk10,00

Sei. 47.4 artikulua.

4. Tarifak.

Zazpi. 51.4 artikulua, 1.5 tarifa.

  Euroak
1. TARIFA"5. Babes Baliabideen Ekoizle eta Operadoreen Erregistro Ofizialean inskripzioa berritzea (aholkularitza-sektorea)12,00

Zortzi. 57.4 artikulua, 1., 2. eta 3. tarifak.

  Euroak
"1. tarifaTxosten fitosanitarioa emateagatikoa.44,62
2. tarifaJoan-etorria eskatzen duen ikuskapen fitosanitarioagatikoa.262,91
3. tarifaJoan-etorria eta lagina hartzea eskatzen duen ikuskapen fitosanitarioagatikoa.325,31

Zortzigarren artikulua. Nafarroako Toki Ogasunei buruzko Foru Legea.

2026ko urtarrilaren 1etik aurrerako eraginarekin, Nafarroako Toki Ogasunei buruzko martxoaren 10eko 2/1995 Foru Legearen manu hauek testu hau izanen dute:

Bat. 162.1 artikulua.

"1. Zerga honako kuota hauen arabera eskatuko da:

a) Turismoak:

8 zaldi fiskal baino gutxiagokoak: 23,57.

8 zaldi fiskaletik 12ra bitartekoak: 66,28.

12 zaldi fiskaletik 16ra bitartekoak: 141,38.

16 zaldi fiskal baino gehiagokoak: 176,80.

b) Autobusak:

21 leku baino gutxiagokoak: 164,94.

21 lekutik 50era bitartekoak: 235,68.

50 leku baino gehiagokoak: 294,59.

c) Kamioiak:

1.000 kg baino gutxiagoko karga erabilgarria: 82,57.

1.000 kg-tik 2.999 kg-rainoko karga erabilgarria: 164,94.

2.999 kg-tik 9.999 kg-rainoko karga erabilgarria: 235,68.

9.999 kg baino gehiagoko karga erabilgarria: 294,59.

d) Traktoreak:

16 zaldi fiskal baino gutxiagokoak: 40,49.

16 zaldi fiskaletik 25erainokoak: 80,96.

25 zaldi fiskal baino gehiagokoak: 161,71.

e) Atoiak eta erdi-atoiak:

1.000 kg baino gutxiagoko karga erabilgarria: 41,33.

1.000 kg-tik 2.999 kg-rainoko karga erabilgarria: 82,57.

2.999 kg baino gehiagoko karga erabilgarria: 164,94.

f) Bestelako ibilgailuak:

Ziklomotorrak: 5,94.

125 cc-rainoko motozikletak: 8,91.

125 cc-tik 250 cc-ra bitarteko motozikletak: 14,78.

250 cc-tik 500 cc-ra bitarteko motozikletak: 29,13.

500 cc-tik 1.000 cc-ra bitarteko motozikletak: 58,28.

1.000 cc baino gehiagoko motozikletak: 116,56."

Bi. Honako hauek izanen dira 175.2 artikuluan ezarritako gehieneko koefizienteak:

KOEFIZIENTEASORTZE-ALDIA
0,1620 urte edo gehiago
0,0619 urte
0,0618 urte
0,1517 urte
0,2516 urte
0,2615 urte
0,3114 urte
0,3713 urte
0,4212 urte
0,5311 urte
0,5810 urte
0,529 urte
0,478 urte
0,417 urte
0,356 urte
0,375 urte
0,354 urte
0,263 urte
0,132 urte
0,161 urte
0,06Urtebete baino gutxiago

Bederatzigarren artikulua. Nafarroako Ogasun Publikoari buruzko Foru Legea.

Nafarroako Ogasun Publikoari buruzko apirilaren 4ko 13/2007 Foru Legearen 14. artikuluari 3. apartatua gehitzen zaio, 2026ko urtarrilaren 1etik aurrera aurkezten diren geroratze- edo zatikatze-eskaeretarako eragina izanen duena, eduki honekin:

"3. Ezin izanen dira zehapenak geroratu baldin eta garraioaren, trafikoaren, ibilgailu motordunen zirkulazioaren eta bide-segurtasunaren arloan egindako arau-hausteengatik ezarri badira. Halako zehapenen geroratze-eskaerak bestelako tramiterik gabe artxibatuko dira, eta ez aurkeztutzat joko dira".

Hamargarren artikulua. Kooperatiben Zerga Araubidea arautzen duen Foru Legea.

Kooperatiben Zerga Araubidea arautzen duen ekainaren 21eko 9/1994 Foru Legearen 28.1 artikuluko bigarren paragrafoa aldatzen da. Hona hemen testua:

"Salbuetsita egonen dira ondasunak eta eskubideak eskuratzeko eragiketak, baldin eta eragiketa horiek zuzenean bideratzen badira beren gizarte- eta estatutu-helburuak betetzera, bai eta Ondare-eskualdaketen eta Egintza Juridiko Dokumentatuen gaineko Zergaren xedapenak biltzen dituen Testu Bateginaren 3.1.B) artikuluan aipatzen diren administrazio-emakidak eratzekoak ere".

Lehenengo xedapen gehigarria. Kultur mezenasgoaren arloko lehentasunezko jarduerak eta proiektuak.

1. 2/2023 Legegintzako Foru Dekretuaren laugarren xedapen gehigarriarekin bat -2/2023 Legegintzako Foru Dekretua, maiatzaren 24koa, zeinaren bidez onesten baita fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bategina-, 2026an lehentasunezkoak izanen dira honako hauekin lotutako kultur mezenasgoko jarduera eta proiektuak:

a) "Iruñeko Topaketak 2026" direlakoen hirugarren edizioa.

b) Jakuetar Urte Santua (2027).

2. Aurreko apartatuan aipatzen diren jarduera eta proiektuak gizarte-interesekotzat hartu behar dira, testu bategin horren 27. eta 28. artikuluetan ezarritakoarekin bat.

3. Kultur jarduera eta proiektu horiei dagokienez, ehuneko bost puntu igoko dira testu bategin horren 30. eta 31. artikuluetan ezarritako kuota-kenkarien ehunekoak eta mugak.

Bigarren xedapen gehigarria. Aldaketen eraginaren ebaluazioa Sozietateen gaineko Zergari buruzko Foru Legean.

Foru lege hau indarrean jartzen denetik lau urte igaro ondoren, Nafarroako Gobernuak hirugarren artikuluaren bigarren eta hirugarren apartatuetan aurreikusitako aldaketek diru-bilketan izan duten eraginaren ebaluazioa eginen du, bai eta entitateei ehuneko 25eko karga-tasan tributatzeko eskatzen zaizkien baldintzen betetze-mailarena ere".

Xedapen indargabetzaile bakarra. Arauindargabetzea.

2026ko urtarrilaren 1etik aurrera aurkezten diren geroratze- edo zatikatze-eskaeren ondorioetarako, indargabetu egiten dira honako hauek:

1. Zenbait zerga aldatu eta beste tributu-neurri batzuk hartzeko abenduaren 23ko 17/2009 Foru Legearen azken xedapenetako bigarrena.

2. Zenbait zerga aldatu eta beste tributu-neurri batzuk hartzeko abenduaren 28ko 23/2010 Foru Legearen azken xedapenetako lehena.

3. Iruzur Fiskalaren Aurkako Neurriei buruzko apirilaren 17ko 14/2013 Foru Legearen bigarren artikulua.

Azken xedapenetako lehena. Nafarroako Hondakin Uren Saneamenduari buruzko Foru Legearen aldaketa.

2026ko urtarrilaren 1etik aurrerako ondorioekin, Nafarroako Hondakin Uren Saneamenduari buruzko abenduaren 29ko 10/1988 Foru Legearen 13.1 artikuluaren a), b) eta c) letrak aldatzen dira, bai eta 13.4 artikulua ere. Testu hau izanen dute:

"a) Saneamendu-sare publikoetara konektatutako etxeko ur-erabilerei aplikatu beharreko karga-tasak: 0,813 euro metro kubiko bakoitzeko.

b) Saneamendu-sare publikoetara konektatutako ur-erabilerei, etxekoak ez bestelakoei, aplikatu beharreko karga-tasak: 0,845 euro metro kubiko bakoitzeko. Karga kutsatzaileari dagokion indize zuzentzailea aplikatuko da, hala behar denean, apirilaren 5eko 82/1990 Foru Dekretuan eta abenduaren 28ko 19/2011 Foru Legearen zazpigarren xedapen gehigarrian araututako moduan.

c) Saneamendu-sare publikoetara konektatuta ez dauden baina erakunde eskudunek emandako baimen administratibo beharrezkoak dituzten erabiltzaileak: 0,097 euro metro kubiko bakoitzeko. Ibilgu publikora isurtzeko baimenean ezarritako baldintzak betetzen ez badira, kasuko tarifa aplikatuko da, a) edo b) apartatuan ezarritakoa".

"4. Arazketa-instalazio pribatuetatik datozen lohiei tarifa hauek aplikatuko zaizkie tratatuak izateagatik, baldin eta onartzen badira Nafarroako Ibaien Saneamendurako Plan Zuzendariari atxikitako hondakin-uren araztegietako lohien lerroetan:

NEURKETAPREZIOA
5 m³-ra arte54,37 euros
10 m³-ra arte108,75 euros
10 m³ baino gehiago10,88 euros/m³

Azken xedapenetako bigarrena. Nafarroako Administrazio Publikoen zerbitzuko Langileriaren Estatutuaren testu bategina.

Hogeita hamaikagarren xedapen gehigarria gehitzen zaio abuztuaren 30eko 251/1993 Legegintzako Foru Dekretuaren bidez onetsitako Nafarroako Administrazio Publikoen zerbitzuko Langileen Estatutuaren Testu Bateginari. Hona hemen testua:

"Hogeita hamaikagarren xedapen gehigarria.-Iruzur fiskalaren aurkako borrokaren berariazko osagarria.

Nafarroako Foru Ogasuna erakunde autonomoari atxikitako langile batzuek, iruzur fiskalaren aurkako borrokan konplexutasun, zailtasun eta erantzukizun handieneko eginkizunak egiten dituztenek, iruzurraren aurka borrokatzeko berariazko osagarri bat jasotzen ahalko dute, helburuak lortzearekin, emaitzekin eta errendimendu-adierazleekin lotutakoa.

Osagarri horren zenbatekoak ezin izanen du gainditu dagokion mailaren hasierako soldataren ehuneko 15. Zerbitzuetako zuzendarien eta buruen kasuan, osagarri horrek ezin gainditzen ahalko du dagokion mailaren hasierako soldataren ehuneko 25.

Tributu-arloan eskumena duen departamentuko titularrak ezarriko du bai osagarriaren gehieneko zenbatekoa, lanpostuen konplexutasun, zailtasun eta erantzukizunaren arabera, bai lortu beharreko helburuak, emaitzak eta errendimendu-adierazleak.

Epe jakin batean iruzurraren aurkako osagarriagatik jasotzen diren kopuruek ez dute eskubide eskuraturik sortuko, eta ez dute ondoriorik izanen hurrengo denboraldietako balorazio edo apreziazioei dagokienez".

Azken xedapenetako hirugarrena. Arauak emateko gaikuntza.

Nafarroako Gobernuak foru lege hau garatu eta aplikatzeko behar diren xedapen guztiak emanen ditu.

Azken xedapenetako laugarrena. Indarra hartzea.

Foru lege honek Nafarroako Aldizkari Ofizialean argitaratu eta biharamunean hartuko du indarra, legean bertan aurreikusitako ondorioekin.

Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta Estatuko Aldizkari Ofizialera igor dadila agintzen dut eta herritar eta agintariei bete eta betearaz dezatela manatzen diet.

Gobierno de Navarra

Contacte con nosotros | Accesibilidad | Aviso legal | Mapa web