LEXNAVARRA
29/2024 FORU AGINDUA, MARTXOAREN 1EKOA, EKONOMIA ETA OGASUNEKO KONTSEILARIAK EMANA, EKONOMIA ETA OGASUN DEPARTAMENTUAREN EGITURA ORGANIKOA EZARTZEN DUENA BULEGOEN MAILAN
BON N.º 51 - 11/03/2024
I. KAPITULUA. EKONOMIA NEXT GENERATION ZUZENDARITZA NAGUSIA
1. ATALA. EKONOMIA ETA FINANTZA ZERBITZUA
- 1. artikulua. Kobrantza eta Ordainketa Bulegoa.
2. ATALA. SUSPERTZE PLANAREN KOORDINAZIOAREN ETA KONTABILITATE NAZIONALAREN ZERBITZUA
- 2. artikulua. Suspertze Planaren Kudeaketan Laguntzeko Bulegoa.
II. KAPITULUA. AURREKONTUEN ETA ONDAREAREN ZUZENDARITZA NAGUSIA
1. ATALA. AURREKONTUEN ETA PROGRAMAZIO EKONOMIKOAREN ZERBITZUA
- 3. artikulua. Kudeaketa Administratiboaren Bulegoa.
2. ATALA. ONDARE ZERBITZUA
- 4. artikulua. Inbentario Orokorraren Bulegoa.
- 5. artikulua. Administrazio Laguntzako Bulegoa.
- 6. artikulua. Proiektu eta Obren Bulegoa.
- 7. artikulua. Erosketa Bulegoa.
- 8. artikulua. Erregistro eta Aseguruen Bulegoa.
- 9. artikulua. Laguntza Juridikoaren Bulegoa.
- 10. artikulua. Ekonomia Aferetarako Bulegoa.
III. KAPITULUA. KONTUHARTZAILETZAKO ZUZENDARITZA NAGUSIA
1. ATALA. FINANTZA KONTROLERAKO ETA AUDITORETZAKO ZERBITZUA
- 11. artikulua. Zuzeneko Laguntzen Kontrolerako Bulegoa.
2. ATALA. KONTABILITATE OROKORRAREN ETA AURREKONTUETAKOAREN ZERBITZUA
- 12. artikulua. Kontabilitate Zentroaren Bulegoa.
IV. KAPITULUA. IDAZKARITZA TEKNIKO NAGUSIA
- 13. artikulua. Mantentzelanen Bulegoa.
- Lehen xedapen gehigarria. Izendapenak.
- Bigarren xedapen gehigarria. Bulegoa kentzea.
- Xedapen indargabetzaile bakarra. Arauak indargabetzea.
- Azken xedapen bakarra. Indarra hartzea.
Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legeak 34.4 artikuluan ezartzen du zuzendaritza nagusietako eta idazkaritza tekniko nagusietako bulegoak eta ataletatik beherako unitateak sortu, aldatu eta kentzeko, unitate horiek zein departamentutan sartuko diren, hango departamentuko titularraren foru agindua beharko dela.
Azaroaren 15eko 243/2023 Foru Dekretuaren bidez, Ekonomia eta Ogasun Departamentuaren zerbitzu eta atalen mailako egitura organikoa ezarri zen. Xedapen iragankor bakarrean adierazten du atalez azpiko maila duten unitate organikoek indarrean dirautela eta gaur egungo izendapenari eta eginkizunei eutsiko dietela, harik eta foru dekretua garatzeko neurriak hartu arte; behin-behinean, egitura berriko organoei atxikiko zaizkie betetzen ari ziren eginkizunen arabera.
Horrenbestez, bidezkoa da Ekonomia eta Ogasun Departamentuaren egitura bulegoen mailan garatzea.
Berritasun nagusiak dira, Ekonomia eta Ogasun Departamentuaren egitura organikoa bulegoen mailan ezartzen duen Ekonomia eta Ogasuneko kontseilariaren uztailaren 17ko 91/2020 Foru Aginduan ezarritakoarekin alderatuta, Ekonomia - Next Generation Zuzendaritza Nagusiak eskatu duela Suspertze Planaren Kudeaketan Laguntzeko Bulegoa sortzeko, Suspertze Planaren Koordinaziorako Atalari atxikita, Suspertze Planaren Koordinazioaren eta Kontabilitate Nazionalaren Zerbitzuaren barruan. Horretaz gain, Ondare Zerbitzuak Planeamendu eta Balorazioen Bulegoa kentzen du, Ondarearen Kudeaketa Teknikoaren Atalari atxikita zegoena, eta haren ordez, Proiektu eta Obren Bulegoa sortzen du, atxikipen berarekin. Nafarroako Foru Komunitateko Administrazioko departamentuen eskumenetan izan diren aldaketak direla eta -Nafarroako Foru Komunitateko lehendakariaren abuztuaren 17ko 10/2023 Foru Dekretuan ezarritakoak-, Ekonomia eta Ogasun Departamentuan kentzen da Nafarroako Estatistika Institutuko bulegoen egitura ororen aipamena.
Aldeko txostenak daude espedientean, Funtzio Publikoko Zuzendaritza Nagusiarena eta Aurrekontuen eta Ondarearen Zuzendaritza Nagusiarena.
Hori dela eta, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 34.4. artikuluak ematen dizkidan eskudantziekin bat,
AGINTZEN DUT:
I. KAPITULUA. EKONOMIA - NEXT GENERATION ZUZENDARITZA NAGUSIA
1. ATALA. EKONOMIA ETA FINANTZA ZERBITZUA
1. artikulua. Kobrantza eta Ordainketa Bulegoa.
Kobrantza eta Ordainketa Bulegoak, Diruzaintza Atalari atxikirik, eginkizun hauek izanen ditu:
a) Unean-unean indarrean diren sistemen bidez, Foru Komunitateko Administrazioaren ordainketa guztiak egitea.
b) Foru Komunitateko Administrazioaren eta erakunde autonomoen izenean finantza entitateetan irekita dauden kontuen kontrola eta jarraipena.
c) Eskatzen zaizkion diruzaintza azterketak egitea.
d) Abal, berme eta gordailuen kontrola eta segimendua.
e) Indarra duten xedapenek esleitzen dizkioten gainerako eginkizunak.
2. ATALA. SUSPERTZE PLANAREN KOORDINAZIOAREN ETA KONTABILITATE NAZIONALAREN ZERBITZUA
2. artikulua. Suspertze Planaren Kudeaketan Laguntzeko Bulegoa.
Suspertze Planaren Kudeaketan Laguntzeko Bulegoak, Suspertze Planaren Koordinaziorako Atalari atxikirik, honako eginkizun hauek izanen ditu:
a) Jarduteko jarraibide eta irizpide komunak aztertzea eta proposatzea Nafarroako Foru Komunitateko Administrazioko gauzatze departamentu eta kudeaketa organoentzat, Suspertze Planaren kudeaketako zeharkako printzipioen arabera.
b) Kudeaketa- eta kontrol-prozeduren eskuliburuak eta ereduak proposatzea eta jarraipena egitea.
c) Zabalkunde, aholkularitza eta solaskidetza lanetan aritzea Suspertze Planaren azpiproiektuak gauzatzen dituzten departamentuekin, aipatutako jarraibide, irizpide, eskuliburu eta ereduei dagokienez.
d) Indarra duten xedapenek esleitzen dizkioten gainerako eginkizunak.
II. KAPITULUA. AURREKONTUEN ETA ONDAREAREN ZUZENDARITZA NAGUSIA
1. ATALA. AURREKONTUEN ETA PROGRAMAZIO EKONOMIKOAREN ZERBITZUA
3. artikulua. Kudeaketa Administratiboaren Bulegoa.
Kudeaketa Administratiboaren Bulegoak, Aurrekontuen Plangintzarako Atalari atxikirik, eginkizun hauek izanen ditu:
a) Urte anitzeko esparru ekonomikoa urte bakoitzean egin, ezarri eta haren segimendua zuzen egiteko prozedura administratiboak ezartzea.
b) Urte bakoitzean, hilero-hilero, Aurrekontu Egonkortasunari eta Finantza Iraunkortasunari buruzko apirilaren 27ko 2/2012 Lege Organikoan erregulatutako arau fiskalak ez betetzetik datorren arriskuaren berri ematen duten artxibo eta espedienteen informatizazioa eta horietarako sostengu administratiboa ematea.
c) Aurrekontuen Plangintzarako Atalaren agirien artxiboa kontrolatu eta kudeatzea.
d) Indarra duten xedapenek esleitzen dizkioten gainerako eginkizunak.
2. ATALA. ONDARE ZERBITZUA
4. artikulua. Inbentario Orokorraren Bulegoa.
Inbentario Orokorraren Bulegoak Ondarearen Kudeaketa Juridikoaren Atalari atxikirik, eginkizun hauek izanen ditu:
a) Foru Komunitatearen Ondareko ondasun eta eskubideen inbentario orokorra prestatu eta eguneratzea.
b) Foru Komunitatearen Ondarea osatu edo osatzen ahal duten ondasun eta eskubideak ikertzea.
c) Nafarroako Foru Komunitateko Ondareko ondasun eta eskubideak ordezkatu edo gauzatzen dituzten dokumentu, eskritura eta balore-titulu guztiak edukitzea eta gordetzea.
d) Indarra duten xedapenek esleitzen dizkioten gainerako eginkizunak.
5. artikulua. Administrazio Laguntzako Bulegoa.
Administrazio Laguntzako Bulegoak, Ondarearen Kudeaketa Juridikoaren Atalari atxikirik, eginkizun hauek izanen ditu:
a) Ondasun eta eskubideak eskuratzeko, besterentzeko eta kostu bidez kargatzeko prozedurak tramitatzea, baita ondasunen afektazio, desafektazio, atxikipen, desatxikipen eta destino aldaketaren prozedurak ere.
b) Ondare Zerbitzuari atxikitako ondasun eta eskubideak eta Foru Komunitateko jabetza pribatuko ondasunak kudeatu eta administratzea, haien erabilera edo ustiapena ez bazaie beste organo edo pertsona batzuei esleitu; orobat, haien erabilera edo ustiapena lagatzeko proposatzea.
c) Ondasun eta eskubideak doan eskuratzeko prozedurak tramitatzea, Ondarean integratzeko.
d) Ondasun higiezinen errentamendu kontratuak kudeatzea.
e) Indarra duten xedapenek esleitzen dizkioten gainerako eginkizunak.
6. artikulua. Proiektu eta Obren Bulegoa.
Proiektu eta Obren Bulegoak, Ondarearen Kudeaketa Teknikoaren Atalari atxikirik, eginkizun hauek izanen ditu:
a) Foru Komunitateko Administrazioaren higiezinei buruzko politika-planak betetzeko egiten diren obrak zuzentzea, proiektuak ikuskatzea eta gastua kontrolatzea, bai eta langile kualifikaturik ez duten departamentuentzat eta Ekonomia eta Ogasun Departamentuarentzat egiten diren obren kasuan ere.
b) Kontserbazio lanak egitea departamentu horiei atxikitako eraikin eta instalazioetan, jarduketaren izaeragatik obra zuzendaritza eta proiektua behar direnean, bai eta laguntza teknikoa ematea ere, erabilerari, egokitzapenari eta kontserbazioari dagokienez.
c) Prozedurak izapidetzea bere eginkizunak betetzeko beharrezkoak diren obra- edo zerbitzu-kontratuak adjudikatzeko, eta kontrolatzea nola gauzatzen diren, fakturak ordaintzen direla eta bermeak itzultzen direla.
d) Beste departamentu batzuei aholkularitza teknikoa ematea proiektu eta obren arloan, eta Ondare Zerbitzuaren aldez aurreko baimena behar duten kontratazioen ikuskapen teknikoa egitea.
e) Indarra duten xedapenek esleitzen dizkioten gainerako eginkizunak.
7. artikulua. Erosketa Bulegoa.
Erosketa Bulegoa, Kontratazio eta Aseguruen Atalari atxikirik, eginkizun hauek izanen ditu:
a) Ekonomia eta Ogasun Departamentuaren eskumenekoak diren hornidurak eta zerbitzuak kontratatzeko prozedurak tramitatzea, baita arreta zentralizatuko hornidurei dagokiena ere.
b) Arestian aipatutako kontratuei dagokienez, exekuzioa, fakturen ordainketa eta bermeen itzulketa kontrolatzea, eta kudeatu eta zentralizatzeko proposamenak egitea.
c) Indarra duten xedapenek esleitzen dizkioten gainerako eginkizunak.
8. artikulua. Erregistro eta Aseguruen Bulegoa.
Erregistro eta Aseguruen Bulegoak, Kontratazioaren eta Aseguruen Atalari atxikirik, eginkizun hauek izanen ditu:
a) Kontratuen Erregistroa kudeatzea.
b) Lizitatzaileen Borondatezko Erregistroa kudeatzea.
c) Aseguruen kontratazioa kudeatzea eta Ekonomia eta Ogasun Departamentuak esleitzen dituen kalte aseguruaren kontratuaren ondoriozko likidazio ekonomikoak eta prestazioak gainbegiratzea.
d) Kontratazio Publikorako Batzordeko Idazkaritzari laguntza administratiboa ematea.
e) Indarra duten xedapenek esleitzen dizkioten gainerako eginkizunak.
9. artikulua. Laguntza Juridikoaren Bulegoa.
Laguntza Juridikoaren Bulegoak, Kontratazioaren eta Aseguruen Atalari atxikirik, eginkizun hauek izanen ditu:
a) Kontratazioaren eta Aseguruen Atalari dagozkion arloetan laguntza juridikoa ematea.
b) Ondare Zerbitzuari dagozkion arloetako arauen proiektuak prestatzea, eta, beste departamentu batzuekin lankidetzan arituz, kontratazio publikoaren arlokoak ere bai.
c) Kontratuak kudeatu eta zentralizatzeko proposamenak egitea.
d) Kontratazio Publikorako Batzordeko ordezko idazkaritza.
e) Indarra duten xedapenek esleitzen dizkioten gainerako eginkizunak.
10. artikulua. Ekonomia Aferetarako Bulegoa.
Ekonomia Aferetarako Bulegoak, Sozietate Publikoen, Abalen eta Afera Ekonomikoen Atalari atxikirik, eginkizun hauek izanen ditu:
a) Ondare Zerbitzuko Kontabilitate Zentroa kudeatzea.
b) Ondare Zerbitzuaren aurrekontua kontrolatzea.
c) Ondare Zerbitzuaren kontabilitate orokorra eta aurrekontuena.
d) Ondare Zerbitzuak justifikatu beharreko funts libratuak kontrolatu eta gainbegiratzea.
e) Indarra duten xedapenek esleitzen dizkioten gainerako eginkizunak.
III. KAPITULUA. KONTU-HARTZAILETZAKO ZUZENDARITZA NAGUSIA
1. ATALA. FINANTZA KONTROLERAKO ETA AUDITORETZAKO ZERBITZUA
11. artikulua. Zuzeneko Laguntzen Kontrolerako Bulegoa.
Zuzeneko Laguntzen Kontrolerako Bulegoa, NBEUF-LGENF Dirulaguntzen Finantza Kontrolerako Atalari atxikirik, eginkizun hauek izanen ditu:
a) SIGC populazioetan bertatik bertarako kontrolak berriz egiaztatzea.
b) SIGC populazioen azaleretako eta abeltzaintzako zuzeneko laguntzen eskaeren gaineko kontrol administratiboa.
c) SIGC populazioen kontrol estatistikak berrikustea.
d) Nafarroan kontrolatzea oinarrizko ordainketako eskubideen esleipena eta oinarrizko ordainketako eskubideetan dagozkion lagapenen eta erreserba nazionalaren kudeaketa eta tramitazioa.
e) Froga substantiboak egiteko hautatzen diren espedienteetan, egiaztatzea zenbateko zuzena baimendu dela kontrol administratiboak eta bertatik bertarakoak egin ondoren, kontuan hartuta murrizketak eta zehapenak, bai eta onuradunak izan ditzakeen zorrak ere.
f) Indarra duten xedapenek esleitzen dizkioten gainerako eginkizunak.
2. ATALA. KONTABILITATE OROKORRAREN ETA AURREKONTUETAKOAREN ZERBITZUA
12. artikulua. Kontabilitate Zentroaren Bulegoa.
Kontabilitate Zentroaren Bulegoak, Kontabilitate Orokorraren Atalari atxikirik, eginkizun hauek izanen ditu:
a) Ekonomia eta Ogasun Departamentuko Kontabilitate Zentroaren kudeaketa, departamentuan beste kontabilitate zentrorik izatea galarazi gabe.
b) Aurrekontuen kudeaketari buruzko eragiketen barne kontabilitatea.
c) Kontabilitateko dokumentuak tramitatzea eta diru-sarrera nahiz gastuen kontabilitatearekin zerikusia duten eragiketak egitea.
d) Ekonomia eta Ogasun Departamentuan justifikatu beharreko funts libratuak kontrolatu eta gainbegiratzea.
e) Zergapekoak ez diren zordunen kobrantzak egitea, departamentuari dagozkionean, Ondare Zerbitzuarenak izan ezik.
f) Indarra duten xedapenek esleitzen dizkioten gainerako eginkizunak.
IV. KAPITULUA. IDAZKARITZA TEKNIKO NAGUSIA
13. artikulua. Mantentzelanen Bulegoa.
Mantentze-lanen Bulegoak, Araubide Juridikoaren Atalari atxikirik, eginkizun hauek izanen ditu:
a) Ekonomia eta Ogasun Departamentuaren bulego nagusien mantentze-lan integralaz arduratzea.
b) Eraikuntzako instalazioen kudeaketa, kontrol eta egokitzapen lanak egitea.
c) Enpresa hornitzaileen hautapena, segimendua eta kontrola, baita higiezinaren, instalazioen eta materialaren kontratuena ere.
d) Higiezineko garbiketa zerbitzuaren kudeaketa, kontrol eta egokitzapen lanak egitea.
e) Eraikuntzan obrarik baldin badago, Ondare Zerbitzuko teknikariei eta, beharrezkoa bada, horretarako kontratatutako langile teknikoei laguntza eta sostengua ematea obrak egiten ari diren bitartean.
f) Departamentuaren zerbitzu orokorretako langileen lana koordinatzea.
g) Indarra duten xedapenek esleitzen dizkioten gainerako eginkizunak.
Lehen xedapen gehigarria. Izendapenak.
Foru agindu honetan ezarritako egituraren arabera izen berari eusten dioten bulegoetako buruen izendapenak berresten dira, haiek egin zireneko baldintza berberetan.
Bigarren xedapen gehigarria. Bulegoa kentzea.
Planeamendu eta Balorazioen Bulegoa kentzen da Aurrekontuen eta Ondarearen Zuzendaritza Nagusiko Ondare Zerbitzutik.
Xedapen indargabetzaile bakarra. Arauak indargabetzea.
Indarrik gabe gelditzen dira foru agindu honetan xedatutakoaren aurka joaten diren maila bereko edo beheragoko xedapen guztiak, eta, zehazki, Ekonomia eta Ogasuneko kontseilariaren uztailaren 17ko 91/2020 Foru Agindua, Ekonomia eta Ogasun Departamentuaren egitura organikoa bulegoen mailan ezarri zuena.
Azken xedapen bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
