(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

251/2023 FORU DEKRETUA, AZAROAREN 15EKOA, ESKUBIDE SOZIALETAKO, EKONOMIA SOZIALEKO ETA ENPLEGUKO DEPARTAMENTUAREN EGITURA ORGANIKOA EZARTZEN DUENA

BON N.º 244 - 23/11/2023

  I. KAPITULUA. XEDAPEN OROKORRAK

  II. KAPITULUA. BABES SOZIALAREN ETA GARAPENERAKO LANKIDETZAREN ZUZENDARITZA NAGUSIA

  1. ATALA. ESKUMENEN ESPARRU MATERIALA ETA EGITURA

  2. ATALA. OINARRIZKO LAGUNTZAREN ETA GIZARTE INKLUSIOAREN ZERBITZUA

  3. ATALA. DIRUSARREREN BERMEAREN ETA GARAPENERAKO LANKIDETZAREN ZERBITZUA

  III. KAPITULUA. EKONOMIA SOZIALEKO ETA LANEKO ZUZENDARITZA NAGUSIA

  1. ATALA. ESKUMENEN ESPARRU MATERIALA ETA EGITURA

  2. ATALA. LAN ZERBITZUA

  IV. KAPITULUA. SUSTAPEN ETA ERALDAKETA DIGITALAREN ZERBITZUA

  V. KAPITULUA. PERTSONARENGAN ZENTRATUTAKO ARRETAREN ATALA

  VI. KAPITULUA. IDAZKARITZA TEKNIKO NAGUSIA

Atariko

Nafarroako Gobernuari dagokio departamentu bakoitzaren egitura organikoa onestea, martxoaren 11ko 11/2019 Foru Legeari jarraikiz (foru lege horrek hizpide ditu Nafarroako Foru Komunitateko Administrazioa eta foru-sektore publiko instituzionala).

Nafarroako Foru Komunitateko Lehendakariaren abuztuaren 17ko 10/2023 Foru Dekretuaren bidez, Nafarroako Foru Komunitateko Administrazioaren departamentuen egitura ezarri zen.

Era berean, abuztuaren 30eko 71/2023 Foru Dekretuaren bidez, Eskubide Sozialetako, Ekonomia Sozialeko eta Enpleguko Departamentuaren oinarrizko egitura ezarri zen.

Egokia da, orain, behar bezala garatzea Foru Komunitateko Administrazioaren departamentu bakoitzaren egitura.

Foru dekretu honen xedea da Eskubide Sozialetako, Ekonomia Sozialeko eta Enpleguko Departamentuaren egitura organiko berria garatzea.

Hori horrela, Eskubide Sozialetako, Ekonomia Sozialeko eta Enpleguko kontseilariak proposaturik, eta Nafarroako Gobernuak bi mila eta hogeita hiruko azaroaren hamabostean egindako bilkuran hartutako erabakiarekin bat,

DEKRETATZEN DUT:

I. KAPITULUA. XEDAPEN OROKORRAK

1. artikulua . Eskubide Sozialetako, Ekonomia Sozialeko eta Enpleguko Departamentuaren eskumenen esparrua.

Eskubide Sozialetako, Ekonomia Sozialeko eta Enpleguko Departamentuari dagokio Nafarroako Foru Komunitateko Administrazioari esleitutako eskumenak baliatzea honako gai hauetan: gizarte zerbitzuak; familiak; haur eta nerabeen arreta; pertsonen autonomia sustatzea, eguneroko bizitzako erabaki eta jardueretarako eta familia- edo komunitate-izaerako lehen mailako harremanetarako autonomia osatzeko edo hobetzeko behar dituzten zaintzak eta laguntzak eskaintzeko; adinekoen, desgaitasuna duten pertsonen eta gaixotasun mental larria dutenen beharrei erantzutea; gizarteratzeko eta diru-sarrerak bermatzeko eskubidea; garapenerako eta ekintza humanitariorako nazioarteko lankidetza; enplegu-politika aktiboak sustatzea; informazioa, orientazioa, prestakuntza, laguntza eta laneratzea; enplegu-eskaintzaren eta -eskariaren arteko bitartekaritza; lan-harremanak antolatzea eta elkarrizketa soziala bultzatzea; lanean eta erantzukizun sozialean segurtasun- eta osasun-baldintzak sustatzea; ekonomia soziala eta lan autonomoa bultzatzea; eta indarrean dauden xedapenetan emandako gainerako eskudantziak.

2. artikulua . Eskubide Sozialetako Departamentuko titularra.

1. Eskubide Sozialetako, Ekonomia Sozialeko eta Enpleguko Departamentuko titularrak, foru dekretu honen 1. artikuluan zehaztutako eskumen esparruari loturik, izanen ditu Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluan ezarritako eskudantziak.

2. Bereziki, eskudantzia hauek dagozkio:

a) Eskubide Sozialetako, Ekonomia Sozialeko eta Enpleguko Departamentuaren aurrekontuen kontura emanen diren dirulaguntzen deialdiak onestea.

b) Gizarte zerbitzuen arloko baimen, homologazio eta erregistroen arloko prozedurak ebaztea.

3. Era berean, Eskubide Sozialetako, Ekonomia Sozialeko eta Enpleguko Departamentuko titularrari dagokio kide anitzeko organo hauetako buru izatea:

a) Nafarroako Gizarte Ongizatearen Kontseilua.

b) Nafarroako Adinekoen Kontseilua.

c) Nafarroako Desgaitasunaren Kontseilua.

d) Gizarte Zerbitzuen Administrazioen arteko Kontseilua.

e) Nafarroako Garapenerako Lankidetzaren Kontseilua.

f) Haur eta Nerabeen Nafarroako Kontseilua.

4. Eskubide Sozialetako, Ekonomia Sozialeko eta Enpleguko Departamentuko titularrari sostengu politiko eta teknikoa emateko unitate gisa, eta zuzenean haren mende, kabinete bat dago departamentuan, Nafarroako Gobernuari eta Lehendakariari buruzko abenduaren 3ko 14/2004 Foru Legearen 19. artikuluan xedatuari lotua dagoena.

3. artikulua . Eskubide Sozialetako, Ekonomia Sozialeko eta Enpleguko Departamentuaren antolamendu orokorra.

1. Eskubide Sozialetako, Ekonomia Sozialeko eta Enpleguko Departamentuak, bere titularraren goi-zuzendaritzapean, honako organo hauek izanen ditu bere egituran:

a) Babes Sozialaren eta Garapenerako Lankidetzaren Zuzendaritza Nagusia.

b) Ekonomia Sozialeko eta Laneko Zuzendaritza Nagusia.

c) Idazkaritza Tekniko Nagusia.

d) Sustapen eta Eraldaketa Digitalaren Zerbitzua.

e) Pertsonarengan Zentratutako Arretaren Atala.

2. Era berean, erakunde autonomo hauek atxikitzen zaizkio Eskubide Sozialetako, Ekonomia Sozialeko eta Enpleguko Departamentuari:

a) Nafar Lansare-Nafarroako Enplegu Zerbitzua.

b) Pertsonen Autonomiarako eta Garapenerako Nafarroako Agentzia.

4. artikulua . Zuzendaritza nagusien eskudantziak.

Foru dekretu honen 2. artikuluan ezarritakoa galarazi gabe, Eskubide Sozialetako, Ekonomia Sozialeko eta Enpleguko Departamentuko zuzendaritza nagusiei dagokie, departamentuko titularraren goi-zuzendaritzapean eta foru dekretu honetan bakoitzari esleitutako esparru materialean, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 31. eta 32. artikuluetan eta azken xedapenetako lehenbizikoan ezarritako eskudantziak erabiltzea eta, horietaz gainera, indarrean dauden xedapenek esleitzen dieten edo departamentuko titularrak agintzen dien beste edozein.

5. artikulua . Idazkaritza Tekniko Nagusiaren eskudantziak.

Eskubide Sozialetako, Ekonomia Sozialeko eta Enpleguko Departamentuko Idazkaritza Tekniko Nagusiak, foru dekretu honen 1. artikuluan zehaztutako eskumenen esparruan, eta Eskubide Sozialetako, Ekonomia Sozialeko eta Enpleguko Departamentuko titularraren goi-zuzendaritzapean, hari atxikita baitago zuzenean Idazkaritza Tekniko Nagusia, honako eskudantzia hauek izanen ditu:

a) Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 33. artikuluan eta Idazkaritza Tekniko Nagusiak arautzen dituen otsailaren 21eko 29/2005 Foru Dekretuan ezarritakoak.

b) Otsailaren 21eko 29/2005 Foru Dekretuan ezarritakoak (foru dekretu horren bidez arautu ziren idazkaritza tekniko nagusiak), barnean direla ekonomia eta aurrekontu izaera duen arau horren 8. artikuluan deskribatutakoak, eta otsailaren 21eko 30/2005 Foru Dekretuaren 6. artikuluan ezarritakoak (foru dekretu horren bidez zehaztu ziren langileriaren arloko eskudantziak).

c) Genero ikuspegiaren zeharkakotasuna aplikatzea Eskubide Sozialetako, Ekonomia Sozialeko eta Enpleguko Departamentuaren politikak planifikatu, kudeatu eta ebaluatzean, bat etorriz Emakumeen eta Gizonen arteko Berdintasunari buruzko apirilaren 4ko 17/2019 Foru Legearekin.

d) Informazio publikoa kudeatzea, jarraikiz maiatzaren 17ko 5/2018 Foru Legeari (foru lege horrek hizpide ditu gardentasuna, informazio publikoa eskuratzea eta gobernu ona).

e) Herritarren parte-hartzea, jarraikiz martxoaren 22ko 12/2019 Foru Legeari (foru lege horrek hizpide du Nafarroako parte-hartze demokratikoa).

f) Departamentuko gainerako organoei laguntzea informazioaren segurtasunari buruzko araudia aplikatzen, Nafarroako Foru Komunitateko Administrazioaren Datuak Babesteko eta Informazioaren Segurtasunerako Politikan zehaztutakoa betetzeko.

g) Departamentuko zerbitzuko zuzendaritzen eta burutzen titularren jabetza hartzeak tramitatzen laguntzea.

h) Indarrean dauden xedapenek esleitzen dioten edo Eskubide Sozialetako, Ekonomia Sozialeko eta Enpleguko Departamentuko titularrak agintzen dion beste edozein, eta horretarako behar diren ebazpenak emanen ditu.

6. artikulua . Zerbitzuen eskudantziak.

Zerbitzuek, departamentuko goragoko organoen zuzendaritzapean eta foru dekretu honetan bakoitzari esleitutako esparru materialean, bat etorriz martxoaren 11ko 11/2019 Foru Legearen 35. artikuluarekin, eginkizun hauek izanen dituzte: beren mendeko atalak edo unitate organikoak planifikatu, koordinatu, zuzendu eta kontrolatzea; prozedurak arindu, arrazionalizatu eta sinplifikatzeko printzipioak bultzatu eta sustatzea; eta, halaber, indarra duten xedapenek berariaz esleitzen dizkieten edo Departamentuko organo eskudunek haietan deskontzentratzen edo eskuordetzen dituzten beste edozein.

7. artikulua . Atalen eskudantziak.

Atalek ondotik ematen diren eginkizunak izanen dituzte, departamentuko goragoko organoen zuzendaritzapean eta foru dekretu honetan bakoitzari esleitutako esparru materialean, bat etorriz martxoaren 11ko 11/2019 Foru Legearen 37. artikuluarekin: beren eskumenen esparruko lanak gauzatzea eta goragoko nagusientzako txostenak eta proposamenak egitea; beren mendeko bulegoek eta unitateek egiten dituzten lanak koordinatzea, zuzentzea eta kontrolatzea; eta, halaber, Departamentuko organo eskudunek agintzen dizkieten gainerako eginkizun guztiak betetzea.

II. KAPITULUA. BABES SOZIALAREN ETA GARAPENERAKO LANKIDETZAREN ZUZENDARITZA NAGUSIA

1. ATALA. ESKUMENEN ESPARRU MATERIALA ETA EGITURA

8. artikulua . Babes Sozialaren eta Garapenerako Lankidetzaren Zuzendaritza Nagusiaren eremu material eta funtzionala.

Babes Sozialaren eta Garapenerako Lankidetzaren Zuzendaritza Nagusiak, bere kudeaketa esparruko gaietan, foru dekretu honetan ezarritako eskudantziak izanen ditu eta, berariaz, honako eginkizun hauek beteko ditu:

a) Gizarteratzeko eta gutxiengoei arreta emateko eskubidea sustatzea.

b) Diru-sarrerak bermatzea.

c) Gizarte zerbitzuetako oinarrizko laguntza koordinatzea eta bultzatzea.

d) Garapenerako lankidetza eta ekintza humanitarioa.

9. artikulua . Babes Sozialaren eta Garapenerako Lankidetzaren Zuzendaritza Nagusiaren egitura.

Babes Sozialaren eta Garapenerako Lankidetzaren Zuzendaritza Nagusiak zerbitzu hauek ditu bere egituran:

a) Oinarrizko Laguntzaren eta Gizarte Inklusioaren Zerbitzua.

b) Diru-sarreren Bermearen eta Garapenerako Lankidetzaren Zerbitzua.

2. ATALA. OINARRIZKO LAGUNTZAREN ETA GIZARTE INKLUSIOAREN ZERBITZUA

10. artikulua . Oinarrizko Laguntzaren eta Gizarte Inklusioaren Zerbitzuaren eremu material eta funtzionala.

Oinarrizko Laguntzaren eta Gizarte Inklusioaren Zerbitzuak, gizarte-gaien, oinarrizko gizarte-laguntzaren eta gizarte inklusioaren eremu materialen barruan, honako eginkizun hauek izanen ditu:

a) Gizarte zerbitzuetako oinarrizko laguntza koordinatzea eta bultzatzea.

b) Gizarte inklusiorako eskubidea sustatzea.

c) Gutxiengo etnikoei edo beste talde minoritario batzuei arreta emateko politikak koordinatzea.

d) Bere jarduera materialaren esparruan esleitzen zaizkion gainerakoak.

11. artikulua . Oinarrizko Laguntzaren eta Gizarte Inklusioaren Zerbitzuaren egitura.

Oinarrizko Laguntzaren eta Gizarte Inklusioaren Zerbitzuak atal hauek ditu bere egituran:

a) Gizarte Zerbitzuetako Oinarrizko Laguntza Koordinatzeko Atala.

b) Gizarte Inklusiorako eta Gutxiengoei Arreta Emateko Atala.

12. artikulua . Gizarte Zerbitzuetako Oinarrizko Laguntza Koordinatzeko Atalaren eremu material eta funtzionala.

Gizarte Zerbitzuetako Oinarrizko Laguntza Koordinatzeko Atalak, gizarte zerbitzuen eremuan, honako eginkizun hauek izanen ditu:

a) Oinarrizko gizarte zerbitzuen titular diren toki-erakundeekin koordinatzea eta lankidetzan aritzea, zerbitzu horiek garatzeko eta ezartzeko.

b) Gizarte zerbitzuen arloan eskumena duten departamentuko administrazio-unitatea eta gizarte zerbitzuetako oinarrizko laguntzako sarea koordinatzea eta haien artean informazioa zabaltzea.

c) Oinarrizko gizarte zerbitzuen finantzazioari buruzko espedienteak kudeatu eta tramitatzea.

d) Oinarrizko gizarte-laguntzako sarean garatu beharreko programak eta prestazioak garatzeko eta ezartzeko bultzada, koordinazioa eta lankidetza, eta, bereziki, Nafarroako Gizarte Zerbitzuei buruzko Foru Legean jasotako oinarrizko lau programen koordinazioa eta estandarizazioa.

e) Beren eskumenen esparruan, oinarrizko gizarte zerbitzuei eta horien titular diren toki-erakundeei laguntza teknikoa ematea.

f) Gizarte zerbitzuen zentroak koordinatzea eta bultzatzea, baita horien finantzaketa kudeatzea ere.

g) Oinarrizko gizarte zerbitzuetako eta gizarte zerbitzuen zentroetako langileentzako prestakuntza.

h) Oinarrizko laguntzaren arloan, departamentuen edo erakundeen arteko lantalde teknikoetan parte hartzea.

i) Bere eskumenen esparruko espedienteak kudeatzea eta artxibatzea.

j) Bere eskumenen esparruan esleitzen zaizkion gainerako eginkizunak.

13. artikulua . Gizarte Inklusiorako eta Gutxiengoei Arreta Emateko Atalaren eremu material eta funtzionala.

Gizarte Inklusiorako eta Gutxiengoei Arreta Emateko Atalak, gizarte zerbitzuen eremuan, honako eginkizun hauek beteko ditu:

a) Gizarte-inklusiorako eskubidearekin zerikusia duten eta gizarte zerbitzuen arloan departamentuan ezarrita dauden programak kudeatzea, izapidetzea, haien jarraipena egitea eta kontrolatzea.

b) Gizarteratze eta laneratze taldeak eta gizarte-inklusiorako beste talde batzuk kudeatzea eta haiekin koordinatzea.

c) Pertsona kalteberenen inklusioa hobetzeko programa berriak diseinatu, planifikatu eta abian jartzea, beste administrazio publiko eta/edo entitate batzuekin lankidetzan.

d) Migrazio-politiketan eskumena duen departamentuarekin lankidetzan aritzea, migrazio-fenomenoarekin eta gutxiengo etnikoei eta gutxiengoen beste talde batzuei arreta ematearekin lotuta, gizarte-inklusioaren eremuari eragiten dion neurrian.

e) Honako hauetan eskumena duen departamentuarekin lankidetzan aritzea: tratu-berdintasuna eta errespetuari eta tolerantziari lotutako balio eta jarrerak sustatzeko eta mota guztietako bazterketen aurka egiteko politika publikoak, planak eta programak.

f) Enplegu zerbitzuekin koordinatzea pertsona kalteberenak lan munduan sartzen laguntzeko.

g) Etxebizitza zerbitzuekin koordinatzea pertsona kalteberenek etxebizitza bat lor dezaten laguntzeko.

h) Gizarte inklusioaren arloan, departamentuen edo erakundeen arteko lantalde teknikoetan parte hartzea.

i) Bere eskumenen esparruko espedienteak kudeatzea eta artxibatzea.

j) Bere eskumenen esparruan esleitzen zaizkion gainerako eginkizunak.

3. ATALA. DIRU-SARREREN BERMEAREN ETA GARAPENERAKO LANKIDETZAREN ZERBITZUA

14. artikulua . Dirusarreren Bermearen eta Garapenerako Lankidetzaren Zerbitzuaren eremu material eta funtzionala.

Diru-sarreren Bermearen eta Garapenerako Lankidetzaren Zerbitzuak eginkizun hauek izanen ditu:

a) Pertsonentzako prestazio ekonomikoak kudeatzea, diru-sarrera egokiak bermatzeko.

b) Garapenerako lankidetza eta ekintza humanitarioa.

c) Bere jarduera materialaren eremuan esleitzen zaizkion gainerakoak.

15. artikulua . Dirusarreren Bermearen Zerbitzuaren egitura.

Egituran, honako atal hauek ditu Diru-sarreren Bermearen Zerbitzuak:

a) Errenta Bermatuaren eta Prestazio Ekonomikoen Atala.

b) Kotizazio gabeko Prestazioen eta Babes Sozialerako bestelako Neurrien Atala.

c) Garapenerako Lankidetzaren eta Ekintza Humanitarioaren Atala.

16. artikulua . Errenta Bermatuaren eta Prestazio Ekonomikoen Atalaren eremu material eta funtzionala.

Errenta Bermatuaren eta Prestazio Ekonomikoen Atalak, prestazio ekonomikoak kudeatuz diru-sarrerak bermatzearen esparruan, honako eginkizun hauek beteko ditu:

a) Errenta Bermatuaren Programa kudeatu, tramitatu, horren jarraipena egin, kontrolatu eta ebaluatzea.

b) Gizarte zerbitzuen zorroan jasotako gizarteratzeko beste prestazio ekonomiko batzuen kudeaketa, izapidetzea, jarraipena, kontrola eta ebaluazioa.

c) Babes sozialerako bestelako prestazioak aztertu, diseinatu eta ezartzea.

d) Ekonomia eta Ogasun Departamentuarekin koordinatzea, diru-sarrera txikiak dituzten biztanleen tratamendu fiskalari eta prestazioei begira.

e) Bere eskumenen esparruko espedienteak kudeatzea eta artxibatzea.

f) Bere eskumenen esparruan esleitzen zaizkion gainerako eginkizunak.

17. artikulua . Kotizazio gabeko Prestazioen eta Babes Sozialerako bestelako Neurrien Atalaren eremu material eta funtzionala.

Kotizazio Gabeko Prestazioen eta Babes Sozialerako Bestelako Neurrien Atalak, kotizazio gabeko prestazio ekonomikoen eta babes sozialerako beste neurri batzuen kudeaketaren eremuan, honako eginkizun hauek beteko ditu:

a) Kotizazio gabeko sistemaren prestazioak (bizitzeko gutxieneko errenta eta kotizazio gabeko pentsioak) kudeatu, tramitatu, haien jarraipena egin, kontrolatu eta ebaluatzea.

b) Foru Ogasunekin eta Zerga Administrazioko Estatu Agentziarekin koordinatzea kotizazio gabeko sistemaren tratamendu fiskala eta prestazioena.

c) Estatuko Administrazio Orokorrarekin koordinatzea eskudantzia hauen arloan.

d) Gizarte bonu termikoa kudeatzea eta ordaintzea.

e) Alargun-pentsioak jasotzeagatik pertsona fisikoen errentaren gaineko zergan kenkaria aldez aurretik ordaintzeko espedienteak tramitatu, haiei jarraipena egin eta kontrolatzea.

f) Bere eskumenen esparruko espedienteak kudeatzea eta artxibatzea.

g) Bere eskumenen esparruan esleitzen zaizkion gainerako eginkizunak.

18. artikulua . Garapenerako Lankidetzaren eta Ekintza Humanitarioaren Atalaren eremu material eta funtzionala.

Garapenerako Lankidetzaren eta Ekintza Humanitarioaren Atalak, garapenerako nazioarteko lankidetzaren eta nazioarteko ekintza humanitarioaren eremu materialaren barruan, honako eginkizun hauek beteko ditu:

a) Garapenerako nazioarteko lankidetzaren, nazioarteko ekintza humanitarioaren eta garapenerako hezkuntzaren arloan jarduteko planak eta programak egitea, departamentuak adierazitako helburuetan eta jardun-ildoetan oinarrituta.

b) Garapen bidean diren herrialdeentzat Nafarroako Gobernuak ematen duen Garapenerako Laguntza Ofiziala kudeatzea.

c) Nafarroako Foru Komunitateko Administrazioak garapenerako nazioarteko lankidetzaren arloan finantzatzen dituen proiektuak ebaluatu eta haien jarraipena egiteko programak prestatu eta gauzatzea.

d) Departamentua beste departamentu eta administrazio publiko batzuekin koordinatzeko eta haiekin lankidetzan aritzeko neurriak har daitezen proposatzea, garapenerako nazioarteko lankidetzaren arloan dauden baliabideak optimizatzeko.

e) Garapenerako lankidetzaren eta ekintza humanitarioaren arloan jarduten duten gobernuz kanpoko erakundeekin koordinatzea eta haiekin lankidetzan aritzea.

f) Garapenerako nazioarteko lankidetzaren eta ekintza humanitarioaren arloan Nafarroako Aurrekontu Orokorren kargura finantzatzen diren proiektu eta ekintzak kontrolatzea eta haien jarraipena egitea.

g) Bere eskumenen esparruko espedienteak kudeatzea eta artxibatzea.

h) Bere eskumenen esparruan esleitzen zaizkion gainerako eginkizunak.

III. KAPITULUA. EKONOMIA SOZIALEKO ETA LANEKO ZUZENDARITZA NAGUSIA

1. ATALA. ESKUMENEN ESPARRU MATERIALA ETA EGITURA

19. artikulua . Ekonomia Sozialeko eta Laneko Zuzendaritza Nagusiaren eremu material eta funtzionala.

Ekonomia Sozialeko eta Laneko Zuzendaritza Nagusiak, bere kudeaketa esparruko gaietan, foru dekretu honetan ezarritako eskudantziak izanen ditu eta, berariaz, honako eginkizun hauek beteko ditu:

a) Lan-harremanak antolatzea eta elkarrizketa soziala bultzatzea, hauteskunde sindikalen, hitzarmen kolektiboen eta berdintasun-planen eremuko lan-arloko erregistro publikoak kudeatzea, eta laneko adiskidetze eta bitartekotza-ekitaldiak egitea gatazka kolektiboetan.

b) Lan-osasuna eta laneko arriskuen prebentzioa sustatzea, eta, oro har, laneko segurtasun- eta osasun-baldintzak sustatzea.

c) Gizarte-erantzukizunean, aukera-berdintasunean eta erantzunkidetasunean balioak dituzten eta haietan oinarritzen diren enpresetan eta erakundeetan kudeaketa-ereduak sustatzea, enpresa osasungarriaren kontzeptua sustatuz.

d) Lan autonomoa sustatzea, alta berriak bultzatzea eta daudenak finkatzea, eta, gainera, kolektiboaren ikusgarritasuna eta aintzatespena hobetzen laguntzea.

e) Gizarte-ekonomia oro har bultzatzea, hura osatzen duten erakundeekin lankidetzan arituz, eredu hori garatzea eta lurralde osoan jarduera-sektore berrietan aurrera egitea ahalbidetuko duten proposamenak sortzeko, hazkundea eta gizartean izanen duen eragina sendotzeko asmoz.

f) Gizarte-ekonomiaren arloko dibulgazioa.

g) Sustapen digitala eta modernizazioa.

h) Zehapen-prozedurak izapidetzea eta ebaztea, dagokion eskumen-eremu materialean.

i) Indarrean dauden xedapenek Eskubide Sozialetako, Ekonomia Sozialeko eta Enpleguko Departamentuari zuzendaritza nagusiaren berezko eremuan esleitzen dizkioten gainerako eginkizunak.

20. artikulua . Ekonomia Sozialeko eta Laneko Zuzendaritza Nagusiaren egitura.

Ekonomia Sozialeko eta Laneko Zuzendaritza Nagusiak honako zerbitzu hau du:

a) Lan Zerbitzua.

2. ATALA. LAN ZERBITZUA

21. artikulua . Lan Zerbitzuaren eremu material eta funtzionala.

Lan Zerbitzuak honako eginkizun hauek beteko ditu:

a) Elkarrizketa soziala dinamizatzea eta sostengua ematea, eta lan-harremanen antolamendua kudeatzea gizarte-eragileekin.

b) Lan merkatuaren bilakaeraren jarraipena eta Enplegu Planaren ebaluazioa.

c) Laneko arriskuen prebentzioa, laneko osasunaren eta ongizatearen aldeko ekintzak bultzatuz eta arlo horretan eskumena duten erakunde eta organismoekiko elkarrizketa kudeatuz.

d) Gizarte-ekonomia dinamizatzea, eta, bereziki, Gizarte Ekonomiako Plan Integraleko ekintzen ezarpena, koordinazioa, jarraipena eta ebaluazioa, bai eta kalitatea bultzatzen, sendotzen edo hobetzen duten programa elkartuena ere.

e) Gizarte-berrikuntza garatzea eta sustatzea, gizarte-ekonomiaren lankidetza-hazkunderako eredu gisa.

f) Lan autonomoa sustatzea, laguntzak eta euskarria kudeatzea, eta, bereziki, Lan Autonomoaren Planeko ekintzen garapena, koordinazioa, jarraipena eta ebaluazioa.

g) Sustatzea eta bultzatzea enpresaren gizarte erantzukizuna eta enpresetako berdintasun eta bateragarritasun politikak.

h) Indarrean dauden xedapenek esleitzen dizkioten beste batzuk, bai eta bere jardueraren eremuan agintzen zaizkionak ere.

22. artikulua . Lan Zerbitzuaren egitura.

Egituran, honako atal hauek ditu Lan Zerbitzuak:

a) Lan Harremanen eta Arriskuen Prebentzioaren Atala.

b) Enpresaren Gizarte Erantzukizunaren eta Enpresa Ereduaren Atala.

c) Lan Autonomoaren Atala.

d) Ekonomia Sozialaren Atala.

23. artikulua . Lan Harremanen eta Arriskuen Prebentzioaren Atalaren eremu material eta funtzionala.

Honako eginkizun hauek izanen ditu Lan Harremanen eta Arriskuen Prebentzioaren Atalak:

a) Tramitatzea enplegu erregulazioko espedienteak.

b) Bitarteko lanak egitea erregulazio eta greba espedienteetan.

c) Jasotzea greben eta ugazaben itxieren berri.

d) Baimentzea adingabeen lana eta zehaztea laneko jaiegunen egutegia.

e) Tramitatzea bide judizialaren aurreko adiskidetze-ekitaldiak, laneko adiskidetzeetarako duen zerbitzuaren bidez.

f) Jasotzea lantokiak irekitzearen jakinarazpenak eta eraikuntza obretako segurtasun eta osasun planenak.

g) Gaitzea azpikontrataziorako liburuak.

h) Erregistratzea eraikuntzaren sektorean akreditatutako enpresak eta amiantoaren arriskua duten enpresak, eta tramitatzea amiantoarekin lotutako laneko planak baimentzeko eskaerak.

i) Lanaren arloan eta laneko arriskuen prebentzioaren eremuan, zehapen prozedurak tramitatzea.

j) Inplementatzea Nafarroako Lan Osasunaren Kontseiluan erabakitako ekintzak, atal honen eskumenei dagokienez.

k) Kudeatzea laneko arriskuen prebentzioa sustatzeko laguntzak.

l) Indarrean dauden xedapenek esleitzen dizkioten beste batzuk, bai eta bere jardueraren eremuan agintzen zaizkionak ere.

24. artikulua . Enpresaren Gizarte Erantzukizunaren eta Enpresa Ereduaren Atalaren eremu material eta funtzionala.

Honako eginkizun hauek izanen ditu Gizarte Erantzukizunaren Atalak:

a) "InnovaRSE" markako metodologiak eta enpresa-eredu berria eta hori(ek) inplementatzeko gaitutako aholkularien prestakuntza eta homologazioa bultzatzea.

b) Enpresaren gizarte erantzukizunaren ikusgarritasuna sustatzea eta dinamizatzea, eta enpresa-eredu berria eraginkortasunez ezartzeko praktikak egitea.

c) Nafarroako enpresetan, sustatzea aukera berdintasuna eta erantzunkidetasuna.

d) Dinamizatzea enpresaren gizarte erantzukizuneko eragileak eta Nafarroako enpresaren gizarte erantzukizunaren web ofiziala.

e) Kudeatzea zerbitzuaren kalitate sistema.

f) Indarrean dauden xedapenek esleitzen dizkioten beste batzuk, bai eta bere jardueraren eremuan agintzen zaizkionak ere.

25. artikulua . Lan Autonomoaren Atalaren eremu material eta funtzionala.

Honako eginkizun hauek beteko ditu Lan Autonomoaren Atalak:

a) Kudeatzea langile autonomoen lanbide elkarteen erregistroa.

b) Dinamizatzea Nafarroako Lan Autonomoaren Plana.

c) Nafarroako langile autonomoen eta mikroenpresen artean enpresaren gizarte erantzukizuna sustatzea.

d) Kudeatzea belaunaldien erreleboko zorroa.

e) Langile autonomoentzako informazio zerbitzua.

f) Kudeatzea langile autonomoentzako laguntzak.

g) Autonomoen kolektiboari laguntzea eta ordezkaritza duten elkarteekiko harremanak dinamizatzea.

h) Bultzatzea Lan Autonomoaren Planaren eta honako hauen arteko komunikazioa: navarraemprende.com webgunea, Nafarroako Lan Autonomoaren Feriaren antolakuntza eta kolektiboa ikusgarri egiteko gainerako jarduketak.

i) Bultzatzea bilerak egin daitezela Nafarroako Lan Autonomoaren Kontseiluan.

j) Indarrean dauden xedapenek esleitzen dizkioten beste batzuk, bai eta bere jardueraren eremuan agintzen zaizkionak ere.

26. artikulua . Ekonomia Sozialaren Atalaren eremu material eta funtzionala.

Honako eginkizun hauek izanen ditu Ekonomia Sozialaren Atalak:

a) Kudeatzea kooperatiben, lan sozietateen eta eraldaketarako nekazaritza-sozietateen erregistroa.

b) Bere gain hartzea Nafarroako Kooperatiben Kontseiluaren idazkaritza eta jarraipena.

c) Nafarroako Gobernua ordezkatzea Ekonomia Sozialaren Europako Plataforman, eta haren jardueretan parte hartzea.

d) Koordinatzea Ekonomia Sozialeko Plan Integraleko batzorde tekniko iraunkorra.

e) Ekonomia soziala sustatzea eta sektore pribatuaren, elkarte-sarearen eta Gizarte Berrikuntzako Unitatearen arteko egituraketa bultzatzea, erakunde publiko eta pribatuen arteko lankidetza eta lurraldean gizarte-ekonomiaren printzipioek duten eragina garatuko duten programen diseinua sustatuz.

f) Ekonomia sozialaren webgunea mantentzea eta Ekonomia Sozialaren Plan Integrala dinamizatzea eta haren ekintzak bultzatzea, baita jarraipena egitea eta adierazleak aztertzea ere.

g) Ekonomia sozialeko proiektuen kalitatea eta sendotzea hobetuko duten programak diseinatzea, laguntzak kudeatzea eta sustatzea.

h) Enplegu Babestuaren Batzordea bultzatzea, Nafarroako Kontratuen Legean ezarritako %6ko erreserba betetzeko.

i) Kudeatzea laneko erregistro publikoak, honako hauei buruzkoak: hitzarmen kolektiboak, hauteskunde sindikalak, lanbide erakundeak, enpresa elkarteak, aldi baterako enpresak, eta agindutako beste batzuk.

j) Indarrean dauden xedapenek esleitzen dizkioten beste batzuk, bai eta bere jardueraren eremuan agintzen zaizkionak ere.

IV. KAPITULUA. SUSTAPEN ETA ERALDAKETA DIGITALAREN ZERBITZUA

27. artikulua . Sustapen eta Eraldaketa Digitalaren Zerbitzuaren eremu material eta funtzionala.

Sustapen eta Eraldaketa Digitalaren Zerbitzuak, bere kudeaketa esparruko gaietan, foru dekretu honetan ezarritako eskudantziak izanen ditu eta, berariaz, honako eginkizun hauek beteko ditu:

a) Gizarte zerbitzuen sistema publikoa digitalizatzea.

b) Gizarte zerbitzuen sistema publikoaren elkarreragingarritasuna sustatzea lotura duten beste sistema batzuekin.

28. artikulua . Sustapen eta Eraldaketa Digitalaren Zerbitzuaren egitura.

Sustapen eta Eraldaketa Digitalaren Zerbitzuak atal hauek izanen ditu:

a) Modernizazio eta Dibulgazio Atala.

b) Sistemen Kudeaketarako Atala.

29. artikulua . Modernizazio eta Dibulgazio Atalaren eremu material eta funtzionala.

Modernizazio eta Dibulgazio Atalak, gizarte zerbitzuen eta enpleguaren arloko informazioaren kudeaketaren eremuan, honako eginkizun hauek izanen ditu:

a) Herritarrei Departamentuaren jarduerez informazio orokorra emateko modua koordinatu eta bultzatzea, ikuspegi korporatibo batetik, gaur egun dauden eta geroan izan daitezkeen komunikazio-kanalen bitartez, gobernu irekiaren eta teknologia berrien arloan eskumena duten zuzendaritzekin elkarlanean eta horiek ematen dituzten jarraibideen arabera.

b) Departamentuaren informazio sistema garatu eta mantentzea, ezertan galarazi gabe horren gainean Idazkaritza Tekniko Nagusiari esleitzen zaizkion eskumenak, eta, estatutuetan, departamentuaren mendeko erakunde bakoitzari esleitzen zaizkionak.

c) Departamentuaren argibideak eta agiriak kudeatu eta koordinatzea, ezertan galarazi gabe horren gainean Idazkaritza Tekniko Nagusiari esleitzen zaizkion eskumenak eta, estatutuetan, departamentuaren mendeko erakunde autonomo bakoitzari esleitzen zaizkionak.

d) Departamentuaren informatika-programak koordinatzea.

e) Aginte-koadroa prestatu eta eguneratzea.

f) Departamentuaren urteko memoria egitea.

g) Urteko kudeaketa plan integratu bat ezarri eta haren jarraipena egitea, emaitzei eta planaren beraren ebaluazioari begira.

h) Departamentuaren web-orria egitea, mantentzea eta eguneratzea, bere mendeko erakunde autonomoekin eta gobernu irekiaren eta teknologia berrien arloan eskumena duten zuzendaritzekin elkarlanean.

i) Departamentuko zuzendaritza nagusiei eta gainerako erakunde eta unitateei laguntzea bere eskumeneko gaietan.

j) Bere eskumenen esparruko espedienteak kudeatzea eta artxibatzea.

k) Bere eskumenen esparruan agintzen zaizkion gainerakoak.

30. artikulua . Sistemen Kudeaketarako Atalaren eremu material eta funtzionala.

Sistemen Kudeaketarako Atalak honako eginkizun hauek izanen ditu:

a) Telekomunikazio eta informazio sistemen inguruan diren premiak identifikatzea, eta departamentuko unitate administratiboek gai horren gainean egiten dituzten eskaerak bideratzea.

b) Erabiltzaileen eskakizunak eta bete beharreko helburuak biltzea, definitzea eta lehenestea, hori guztia gobernu irekiaren eta teknologia berrien arloan eskumena duten zuzendaritzekin elkarlanean, informazio sistemak eta aplikazio informatikoak eratu eta ezartzeko, auditoretzarako eta kontrolerako, informazioaren segurtasunari dagokionez, bai departamentuetakoak, bai korporatiboak.

c) Enpresa kontratatuek egindako lanen kontrola eta plangintza, bere jarduketa esparrukoak direnean.

d) Ekipoak eta aplikazioak behar bezala erabiltzeko prestakuntza programak antolatzen eta garatzen parte hartzea.

e) Departamentuaren multimedia-ekipamenduaren kontrola egitea.

f) Nafarroako Foru Komunitateko Administrazioaren Datuak Babesteko eta Informazioaren Segurtasunerako Politikan definitutako informazioaren segurtasunaren arduradunaren eginkizunak betetzea, informazioaren segurtasunari buruz indarrean dagoen araudia, datu pertsonalen babesa barne, betetzen dela ziurtatzeko eta zaintzeko, departamentuaren esparruan.

g) Bere eskumenen esparruko espedienteak kudeatzea eta artxibatzea.

h) Bere eskumenen esparruan agintzen zaizkion gainerakoak.

V. KAPITULUA. PERTSONARENGAN ZENTRATUTAKO ARRETAREN ATALA

31. Artikulua . Pertsonarengan Zentratutako Arretaren Atalaren eremu material eta funtzionala.

Pertsonarengan Zentratutako Arretaren Atalak eginkizun hauek izanen ditu:

a) Gizarte zerbitzu guztien plangintzan, berrikuntzan eta funtzionamenduan pertsonarengan zentratutako arretaren ikuspegia bultzatzea.

b) Gizarte zerbitzuetako programak diseinatzea eta haien jarraipena eta ebaluazioa egitea, dagozkien unitate teknikoekin batera.

c) Gizarte zerbitzuen plan estrategikoaren, plan sektorialen eta gizarte zerbitzuen zorro orokorraren diseinua, jarraipena eta ebaluazioa egitea.

d) Gizarte zerbitzuen kudeaketa, koordinazioa, antolamendua eta arreta hobetzeko proposamenak egitea.

e) Prestakuntza beharrak identifikatu eta aztertzea, eta gizarte zerbitzuetako langileak birkualifikatzeko lankidetzako prestakuntza eskaintza konfiguratzea.

f) Zerbitzuen barnealderako ikaskuntza komunitateen garapena sustatzea, profesionalen gaitasunak handitzeko, bai eta kanporako ere, beste leku batzuetan garatutako esperientziak ikusarazteko, bereziki pertsonarengan oinarritutako arreta helburu duten esperientziak.

g) Topaketak, biltzarrak, jardunaldiak eta bestelako ekitaldi profesional eta/edo zientifikoak antolatzea eta haiek egiteko laguntza ematea.

h) Europako proiektuak sustatzea gizarte zerbitzuen eremuan.

i) Sozialki berritzaileak diren praktikak sustatzea eta trukatzea Europako programen esparruan.

j) Arlo soziosanitarioko txostenak idaztea, lanak gauzatzea, proposamenak egitea, sustapena eta koordinazioa.

k) Beharrezkoa den lankidetza sustatzea arlo soziosanitarioan eskumena duten administrazio publiko eta departamentuen artean.

l) Eremu geografiko guztietan bultzatzea pertsonei arreta integratua ematea, gizarte eta osasun zerbitzuen elkarlanaren bidez eta gaia zeharka lantzen duten bestelako arloen parte hartzearekin, batez ere hezkuntzarenarekin.

m) Koordinazio soziosanitarioko taldeen jarduera laguntzea eta gainbegiratzea, eta programa komunitarioen garapena bultzatzea.

n) Profesionalen arteko koordinazio soziosanitarioaren gaineko prestakuntza eta ebaluazio estrategiak garatzea.

o) Departamentuaren eskumen-eremuaren barruan sartzen diren fundazioen babesletza.

VI. KAPITULUA. IDAZKARITZA TEKNIKO NAGUSIA

32. artikulua . Idazkaritza Tekniko Nagusiaren egitura.

Egituran, honako atal hauek ditu Idazkaritza Tekniko Nagusiak:

a) Ekonomia eta Aurrekontuak Kudeatzeko Atala.

b) Mendekotasunaren Arretaren Araubide Juridikoaren, Gizarte-inklusioaren eta Garapenerako Lankidetzaren Atala.

c) Adingabeen Araubide Juridikoaren, Familiaren eta Diru-sarreren Bermearen Atala.

d) Ikuskapen Atala.

33. artikulua . Ekonomia eta Aurrekontuak Kudeatzeko Atalaren eremu material eta funtzionala.

Ekonomia eta Aurrekontuak Kudeatzeko Atalak eginkizun hauek izanen ditu:

a) Babes Sozialaren eta Garapenerako Lankidetzaren Zuzendaritza Nagusiari, Ekonomia Sozialeko eta Laneko Zuzendaritza Nagusiari, Pertsonen Autonomiarako eta Garapenerako Nafarroako Agentziari eta departamentuaren mendeko gainerako organoei aholkularitza ematea, departamentuaren epe ertaineko aurrekontuen eta plan ekonomikoaren aurreproiektua egiteko.

b) Departamentuko aurrekontuen aurreproiektua koordinatu eta tramitatzea.

c) Departamentuaren ildo estrategikoei esleitutako aurrekontuaren jarraipena egiteko koordinazioa eta lankidetza.

d) Departamentuko aurrekontuen kudeaketari buruzko informazioa beti eguneraturik edukitzea.

e) Justifikatu beharreko ordainketa-aginduen kudeaketa, jarraipena eta justifikazioa, eta Babes Sozialaren eta Garapenerako Lankidetzaren Zuzendaritza Nagusiaren, Ekonomia Sozialeko eta Laneko Zuzendaritza Nagusiaren, Pertsonen Autonomiarako eta Garapenerako Nafarroako Agentziaren eta departamentuaren mendeko gainerako organoen kutxa-aurrerakinen kontuen kudeaketa eta kontrola.

f) Babes Sozialaren eta Garapenerako Lankidetzaren Zuzendaritza Nagusiaren, Ekonomia Sozialeko eta Laneko Zuzendaritza Nagusiaren, Pertsonen Autonomiarako eta Garapenerako Nafarroako Agentziaren eta departamentuaren mendeko gainerako organoen jarduera ekonomikoen kontabilizazio orokorra eta aurrekontuei dagokiona.

g) Babes Sozialaren eta Garapenerako Lankidetzaren Zuzendaritza Nagusiari, Ekonomia Sozialeko eta Laneko Zuzendaritza Nagusiari, Pertsonen Autonomiarako eta Garapenerako Nafarroako Agentziari eta departamentuaren mendeko gainerako organoei dagozkien diru-sarreren eta gastuen espedienteak kontabilizatzea.

h) Azterlan ekonomikoak egitea.

i) Bere eskumenen esparruko espedienteak kudeatzea eta artxibatzea.

j) Idazkaritza Tekniko Nagusiko buruak bere eskumenen esparruan agintzen dizkion gainerakoak.

34. artikulua . Mendekotasunaren Arretaren Araubide Juridikoaren, Gizarteinklusioaren eta Garapenerako Lankidetzaren Atalaren eremu material eta funtzionala.

Mendekotasunaren Arretaren Araubide Juridikoaren, Gizarte-inklusioaren eta Garapenerako Lankidetzaren Atalak, pertsonen autonomia sustatzearen, adinekoen eta desgaitasuna duten pertsonen premiei arreta ematearen, gizarte-inklusioaren, oinarrizko gizarte-laguntzaren eta garapenerako nazioarteko lankidetzaren esparruan, honako eginkizun hauek izanen ditu:

a) Departamentuko titularrak ebatzi behar dituen departamentuaren eskumeneko gaien espedienteak koordinatu eta gainbegiratzea, onets daitezen.

b) Departamentuko organoei aholkua eta laguntza juridikoa ematea.

c) Nahitaezko txosten juridikoak eta departamentuko organoek eskatzen dizkioten txostenak egitea.

d) Txosten juridikoak prestatzea departamentuak ematen dituen egintzen aurka jartzen diren errekurtso administratiboei buruz.

e) Eskubide Sozialetako Departamentuko titularrak, bide jurisdikzional zibil eta sozialera jo aurretik, ebatzi behar dituen erreklamazioetan behar diren txosten juridikoak prestatzea.

f) Arauak bildu eta eguneratzea eta, orobat, interes juridikoa duen jurisprudentzia, doktrina eta informazioa bildu, hedatu eta haien jarraipena egitea.

g) Ondare-erantzukizuneko prozedurak izapidetzea.

h) Erabiltzaileek zerbitzu publikoen gainean aurkezten dituzten kexak eta aholkuak kudeatu eta izapidetzea.

i) Departamentuko gainerako organoei laguntza ematearekin lotutakoak, beren erabakiak egokitu ditzaten Irisgarritasun Unibertsalari buruzko ekainaren 14ko 12/2018 Foru Legera.

j) Bere eskumenen esparruko espedienteak kudeatzea eta artxibatzea.

k) Idazkaritza Tekniko Nagusiko buruak bere eskumenen esparruan agintzen dizkion gainerakoak.

35. artikulua . Adingabeen Araubide Juridikoaren, Familiaren eta Dirusarreren Bermearen Atalaren eremu material eta funtzionala.

Adingabeen Araubide Juridikoaren, Familiaren eta Diru-sarreren Bermearen Atalak, haurrak eta nerabeak babesteko, familiei laguntzeko eta diru-sarrerak bermatzeko politiken esparruan, honako eginkizun hauek izanen ditu:

a) Departamentuko titularrak Nafarroako Gobernuari igortzen dizkion departamentuko eta haren erakunde autonomoetako gaien espedienteak koordinatu eta gainbegiratzea.

b) Departamentuko titularrak ebatzi behar dituen departamentuaren eskumeneko gaien espedienteak koordinatu eta gainbegiratzea, onets daitezen.

c) Departamentuko organoei aholkua eta laguntza juridikoa ematea.

d) Nahitaezko txosten juridikoak eta departamentuko organoek eskatzen dizkioten txostenak egitea.

e) Txosten juridikoak egitea departamentuak ematen dituen egintzen aurka jartzen diren errekurtso administratiboei buruz.

f) Arauak bildu eta eguneratzea eta, orobat, interes juridikoa duen jurisprudentzia, doktrina eta informazioa bildu, hedatu eta haien jarraipena egitea.

g) Ondare-erantzukizuneko prozedurak izapidetzea.

h) Erabiltzaileek zerbitzu publikoen gainean aurkezten dituzten kexak eta aholkuak kudeatu eta izapidetzea.

i) Bere eskumenen esparruko espedienteak kudeatzea eta artxibatzea.

j) Genero ikuspegiaren zeharkakotasuna aplikatzeari lotutako eginkizunak gauzatzea Eskubide Sozialetako, Ekonomia Sozialeko eta Enpleguko Departamentuaren politikak planifikatzean, kudeatzean eta ebaluatzean, bat etorriz Emakumeen eta Gizonen arteko Berdintasunari buruzko apirilaren 4ko 17/2019 Foru Legearekin.

k) Idazkaritza Tekniko Nagusiko buruak bere eskumenen esparruan agintzen dizkion gainerakoak.

36. artikulua . Ikuskapen Atalaren eremu material eta funtzionala.

Ikuskapen Atalak, gizarte zerbitzuen, familien, haur eta nerabeen arretaren eta pertsonen autonomiaren sustapenaren esparruan, honako eginkizun hauek beteko ditu:

a) Departamentuko gainerako unitate organikoekin lankidetzan, kontrolatzea eta ikuskatzea gizarte zerbitzuen sistemako zerbitzu-emaileek betetzen dutela eta zerbitzu horien hartzaileei ematen zaien arretan betetzen direla gizarte zerbitzuen araudian eta itunetan ezarritakoa.

b) Departamentuaren unitate organiko kudeatzaileekin lankidetzan, kontrolatzea eta ikuskatzea departamentuak ematen dituen gizarte zerbitzuen sistema publikoari dagozkion laguntzak eta prestazio ekonomikoak.

c) Ikuskapen planak prestatzea, gizarte zerbitzuen sistemako zerbitzuetarako eta ikuskapen jarduera kontrolatu eta koordinatzeko.

d) Gizarte zerbitzuen sistemako zerbitzuen administrazio-baimenak eta aurretiazko komunikazioak kudeatzea eta tramitatzea.

e) Bere eskumenen esparruko espedienteak kudeatzea eta artxibatzea.

f) Gizarte Zerbitzuen Erregistroa kudeatzea.

g) Homologazio administratiboak kudeatu eta tramitatzea.

h) Bere eskumenen esparruan esleitzen zaizkion gainerako eginkizunak.

Lehen xedapen gehigarria. Eskumenak deskontzentratzeko baldintza orokorrak.

1. Indarra duten arauek organo bati ematen dizkioten eskumenak hierarkian mendeko diren beste organo batzuengan deskontzentratzen ahal dira, Nafarroako Aldizkari Ofizialean argitaratuko den xedapen orokor baten bitartez, galarazi gabe eskumenak esleitzeko arauetan finkatutako baldintzak bete beharra.

2. Eskubide Sozialetako Departamentuko titularrak indarrik gabe uzten ahalko du xedapen gehigarri honetan aipatzen diren eskumenen deskontzentrazioa, Nafarroako Aldizkari Ofizialean argitaratu beharko den foru agindu baten bidez.

Bigarren xedapen gehigarria. Unitateen jarraipena.

Foru dekretu hau garatzeko neurriak hartu bitartean, atalarena baino maila txikiagokoak diren unitate organikoek berdin segituko dute eta oraingo izenari eta eginkizunei eutsiko diete. Behin-behineko egitura berriko organoei atxikiko zaizkie, orain arte betetzen zituzten eginkizunen arabera.

Hirugarren xedapen gehigarria. Izendapenen berrespena.

Honako izendapen hauek berresten dira, egin ziren baldintza berberetan:

- Oinarrizko Laguntzaren eta Laguntza Komunitarioaren Ataleko burua, Gizarte Zerbitzuetako Oinarrizko Laguntzaren Koordinazio Ataleko buru izanen da.

- Atal Soziosanitarioko burua, Pertsonarengan Zentratutako Arretaren Ataleko buru izanen da.

- Inklusioaren, Babes Sozialaren eta Familiaren Araubide Juridikoaren Ataleko burua, Adingabeen Araubide Juridikoaren, Familiaren eta Diru-sarreren Bermearen Ataleko buru izanen da.

- Mendekotasunaren Arretaren Araubide Juridikoaren Ataleko burua, Mendekotasunaren Arretaren Araubide Juridikoaren, Gizarte-inklusioaren eta Garapenerako Lankidetzaren Ataleko buru izanen da.

Xedapen indargabetzaile bakarra. Arauak indargabetzea.

Indarrik gabe gelditzen dira Eskubide Sozialetako Departamentuaren egitura organikoa ezartzen duen urriaren 30eko 268/2019 Foru Dekretua eta foru dekretu honetan xedatutakoaren aurkakoak diren maila bereko edo apalagoko xedapen guztiak.

Azken xedapenetako lehena. Aurrekontu aldaketak.

Ahalmena ematen zaio Ekonomia eta Ogasun Departamentuko titularrari foru dekretu honetan ezarritakoa betetzeko beharrezkoak diren aurrekontu aldaketak egin ditzan.

Azken xedapenetako bigarrena. Garatzeko ahalmenak.

Ahalmena ematen zaio Eskubide Sozialetako, Ekonomia Sozialeko eta Enpleguko Departamentuko titularrari behar diren xedapenak eman ditzan foru dekretu honetan ezarritakoa garatzeko.

Azken xedapenetako hirugarrena. Indarrean jartzea.

Foru dekretu hau Nafarroako Aldizkari Ofizialean argitaratu eta biharamunean jarriko da indarrean.

Gobierno de Navarra

Contacte con nosotros | Accesibilidad | Aviso legal | Mapa web