(ir al contenido)

navarra.es

Castellano | Euskara | Français | English

LEXNAVARRA

Versión en castellano

227/2023 FORU DEKRETUA, URRIAREN 25EKOA, NAFARROAKO FORUZAINGOAREN LANALDI, ORDUTEGI ETA ORDAINSARIEN ERREGELAMENDUA ONESTEN DUENA

BON N.º 240 - 20/11/2023

  NAFARROAKO FORUZAINGOAREN LANALDI, ORDUTEGI ETA ORDAINSARIEN ERREGELAMENDUA

  I. KAPITULUA. XEDAPEN OROKORRAK

  II. KAPITULUA. LANALDIAK ETA ORDUTEGIAK

  III. KAPITULUA. ORDAINSARIAK

  V. KAPITULUA. PROBA FISIKOAK GAINDITZEAGATIKO KONPENTSAZIOA

  1. ERANSKINA. GUARDIA LOKALIZATUEN ORDAINSARI EKONOMIKOAK

  2. ERANSKINA. NAFARROAKO FORUZAINGOAREN ZEIN UNITATETAN APLIKATUKO DEN ORDUTEGI MALGUKO ARAUBIDEA

  3. ERANSKINA. LANPOSTUEN AZTERKETA: BALORAZIOESKULIBURUA ETA ONDORIOZKO PUNTUAZIOAK (PDFa).

  4. ERANSKINA. EGINKIZUN ESPEZIFIKOAK DITUZTEN FORUZAINGOKO ENPLEGU ETA UNITATEAK, PRESTASUN BEREZIKO OSAGARRIA APLIKATUKO ZAIENAK

  5. ERANSKINA. APARTEKO ORDUAK ATSEDENAREKIN KONPENTSATZEA

ATARIKOA

Apirilaren 10eko 15/2015 Foru Legearen bidez Nafarroako Poliziei buruzko martxoaren 23ko 8/2007 Foru Legean egindako erreformaren babesean, irailaren 28ko 79/2016 Foru Dekretua eman zen, Nafarroako Foruzaingoaren lanaldi, ordutegi eta ordainsarien erregelamendua onetsi zuena.

Erregelamendu horretan ahalegina egin zen Foruzaingoko lanpostuen artean zeuden soldata-aldeak murrizten, polizia-erakundeari zegokion soldata-masa banatuz. Erregelamendu hura, ordea, deusez deklaratu zuen Nafarroako Justizia Auzitegi Nagusiko Administrazioarekiko Auzien Salak 2018ko 225., 226., 227. eta 228. epaietan.

Aldi berean, Nafarroako Poliziei buruzko azaroaren 19ko 23/2018 Foru Legea onetsi zen, Nafarroako Foruzaingoarentzat ordainsari-esparru berria ezartzen duen lege-testua; horrekin batera, lanpostuak baloratzeko azterketa berri bat egitea exijitzen zuen, esparru hori garatzeko oinarri izan behar zuena.

23/2018 Foru Legeak azken xedapenetako lehenean hauxe ezarri zuen: "foru lege hau indarrean sartzen denetik urtebeteko epean, Nafarroako Gobernuak legea erregelamendu bidez garatzeko beharrezkoak diren xedapenak emanen ditu; batez ere, Nafarroako Foruzaingoko langileen prestakuntzari, lanpostu-betetzeari, bigarren jarduerari, lanaldiei, ordutegiei eta ordainsariei buruzkoak". Erregelamendu bidezko garapen horrek, ordainsariei dagokienez, bete beharko du foru lege horren beraren seigarren xedapen gehigarrian Foruzaingoko langileen soldata-baldintzak mantentzeaz eta berreskuratzeaz ezarritakoa.

Aipatutako deuseztatze-epaien aurka irekitako kasazio-prozedura judizialak amaitu ondoren, eta legez agindutako erregelamendu-garapena oraindik gauzatu gabe zegoenez, Nafarroako Foruzaingoaren ordainsari-sistema Foruzaingoaren lanaldiak, ordutegiak eta ordainsariak arautzeko martxoaren 26ko 3/2021 Foru Legearen bidez egituratu zen. Lege-testu horrek indarraldi mugatua ezarri zuen, zehazki "Nafarroako Poliziei buruzko azaroaren 19ko 23/2018 Foru Legean jasotako araudi berriak, Nafarroako Foruzaingoko kideen lanaldi eta ordainsariei buruzko araudia garatzeko onetsi behar zenak, indarra hartu arte".

Erregelamendu honek, Nafarroako Foru Komunitateko Administrazioaren zerbitzuko langile guztientzako xedapen komunak aplikatzetik abiatuta, hala nola Foruzaingoko kideen urteko lanaldia finkatzea, poliziaren zerbitzu publikoak berezko dituen alderdi espezifiko guztiak arautzen ditu.

Ordutegiei dagokienez, hiru mota bereizten dira, Foruzaingoko unitateei esleitutako eginkizunen arabera: ordutegi orokorra, ordutegi malgua eta egunetan zenbatzeko ordutegia. Araubide bakoitzaren mende dauden unitateak egokitu eta eguneratzen ahalko dira, barne gaietako eskumena duen departamentuko titularraren foru agindu bidez, betiere Foruzaingoaren mahai sektorialean negoziatu ondoren.

Bai lanaldien atalean, bai ordutegien atalean, funtsezko zerbitzu bat hartzen da abiapuntutzat, urtean 365 egunetan eman behar dena, eguneko 24 orduetan. Hori dela eta, zerbitzuak betetzeko sistema espezifikoak ezartzen dira, deien edo zerbitzua etengabe ematea ahalbidetzen duten beste figura batzuen bidez, hargatik eragotzi gabe langileen atseden-arauak betetzea edo oporraldiak, lizentziak, baimenak edo gerora sortutako beste edozein egoera bermatzea.

Azkenik, erregelamendu testuko hogeita hamaika artikuluetatik hemezortzik Nafarroako Foruzaingoaren ordainsariak garatzen dituzte, Nafarroako Poliziei buruzko azaroaren 19ko 23/2018 Foru Legearen 57. artikuluan eta hurrengoetan ezarritako parametroen barruan, eta bereziki arautzen dituzte erakunde mota honen berezko ordainsari osagarriak. Kolektibo osoarentzako osagarri orokorren esparrua da abiapuntua, berariazko osagarria, mailaren hasierako soldataren %45 egiten duena eta langile guztiei dagokiena, polizia-bateraezintasuna izenekoa eta lanbidearen arrisku bereziko ehunekoa barne. Ondoren, ordainsari-kontzeptu aldakorrak arautzen dira, polizia-erakundearen barruan betetzen diren enpleguaren, lanpostuaren edo eginkizunen arabera, lanpostuko osagarria, prestasun berezikoa edo burutzakoa. Horri guztiari gehitzen zaizkio polizia-zerbitzuaren berezko ordainsarien kasu espezifikoak, edo zerbitzu honetan garrantzi handiagoa hartzen dutenak, esate baterako izapide judizialetara joatea edo herriko jaietako operatiboetan lan egitea herrietan, langileek bete behar dituztenak edozein dela ere beren atxikipen geografiko arrunta, ezinezkoa baita jarduera handiena dagoenean hura langileak kontratatuz betetzea. Gainera, aurreko araudietan jada ezarritako errealitateen baldintzak arautzen dira, hala nola proba fisikoak gainditzeagatiko konpentsazioa edo beste batzuk, berriagoak, "ordu-poltsa" deritzona, adibidez, zerbitzua kudeatzeko tresna bat, borondatez erabiltzen ahalko dutena testu honetan xedatutako baldintzak betetzen dituzten langileek.

Orain arte azaldu den guztiarengatik, Barneko, Funtzio Publikoko eta Justiziako kontseilariak proposaturik, Nafarroako Kontseiluarekin bat etorrita, eta Nafarroako Gobernuak 2023ko urriaren 25eko bilkuran hartutako erabakiarekin bat,

DEKRETATZEN DUT:

Artikulu bakarra. Nafarroako Foruzaingoaren lanaldi eta ordainsarien Erregelamendua onestea.

Onetsi egiten da Nafarroako Foruzaingoaren lanaldi eta ordainsarien Erregelamendua. Testu hori foru dekretu honi erantsi zaio.

Lehen xedapen gehigarria. Lanpostuko osagarriaren ehunekoak eguneratzea.

Foru dekretu honek indarra hartu ondoren, lanpostu bakoitzari lanpostuko osagarri gisa esleitutako portzentajeak eguneratuko dira barne gaietako eskumena duen departamentuaren titularraren foru agindu baten bidez, betiere ordezkari sindikalekin negoziatu ondoren, eta, beti aplikatu beharko dira erregelamendu honen 3. eranskinean jasotako balorazio irizpideak.

Bigarren xedapen gehigarria. Nafarroako Foruzaingoko langileen aparteko orduen urteko muga.

Barne gaietako eskumena duen departamentuko titularrari ahalmena ematen zaio foru agindu bidez ezar dezan, erakunde sindikalekin negoziatu ondoren, langile bakoitzak urtean egin ditzakeen aparteko orduen gehieneko kopurua, bai eta zein diren muga hori gainditu ahal izateko salbuespenezko kasuan, behar bezala justifikatuta dagoenean.

Xedapen iragankor bakarra. Proba fisikoak egiteagatiko konpentsazioari buruzko aukera.

Nafarroako Foruzaingoko langileek, 2022an edo foru dekretu honek indarra hartu arte, ez badute erabaki proba fisikoak konpentsatzeko aukeretatik zein hautatu, ulertuko da ordura arte baliatzen ari zirena hobesten dutela isilbidez, eta, ordutik aurrera, erregelamendu honen 30. eta 31. artikuluetan azaldutako epeak eta ondorioak aplikatuko zaizkie.

Azken xedapen bakarra. Indarra hartzea.

Foru dekretu honek Nafarroako Aldizkari Ofizialean argitaratu eta hurrengo egunean hartuko du indarra, ukatu gabe Nafarroako Poliziei buruzko azaroaren 19ko 23/2018 Foru Legearen lehen xedapen iragankorrean ezarritakoa, ez eta, hala badagokio, erregelamendu hau onetsi aurretik ordu-poltsa abian jartzea ere.

NAFARROAKO FORUZAINGOAREN LANALDI, ORDUTEGI ETA ORDAINSARIEN ERREGELAMENDUA

I. KAPITULUA. XEDAPEN OROKORRAK

1. artikulua. Xedea.

Erregelamendu honen xedea da Nafarroako Foruzaingoko langileen lanaldiak, ordutegiak eta ordainsari-araubidea arautzea.

II. KAPITULUA. LANALDIAK ETA ORDUTEGIAK

2. artikulua. Lanaldia eta lanordutegiak.

1. Nafarroako Foruzaingoko langileek benetan lan egindako 1.592 orduko lanaldia izanen dute urteko zenbaketan, eta unitate bakoitzeko goizeko, arratsaldeko eta gaueko txandak definituko dituzten lan-ordutegiak ezarri beharko dira, burutzak kasuan kasuko jarraibidea onetsita.

2. Benetako lanorduak edo presentzia erreala da ohiko lantokian zerbitzua ematen hasten den ordutik hura bukatzen den ordura bitarteko denbora. Zerbitzua destinoko herriaz bestelako batean ematen bada, benetako lanorduak hasiko dira kontatzen ohiko lantokian sartzen denetik hartara itzuli eta zerbitzua bukatu arte. Zerbitzua dela eta, gaua destinoko herritik kanpo eman behar denean, dagokion unitateko burutzari zerbitzua bukatu dela jakinarazteak ohiko lantokira itzultzearen ondorio bera izanen du, eta ulertuko da hortik aurrera egiazko zerbitzua eta lanaldia bukatuta daudela.

3. Artikulu honen lehen apartatuan finkatutako urteko lanordu-kopuruaren gainean behar den konpentsazioa aplikatu ondoren, jarraian aipatzen diren txanda-araubideetako batean lan egiten duten Nafarroako Foruzaingoko langileek presentzia errealeko lanaldi hau izanen dute:

a) Goizeko, arratsaldeko eta gaueko txanda: 1.457 ordu urtean.

b) Gaueko txanda finkoa: 1.535 ordu urtean.

c) Goizeko eta arratsaldeko txanda, igande eta jaiegunetan lan eginda: 1.554 ordu urtean.

d) Lanaldi zatitua, igande eta jaiegunetan lan eginda: 1.569 ordu urtean.

4. Aurreko apartatuan ezarritako lan txandetan, gaueko lanaldiek 8 ordu iraunen dute gehienez. Hala ere, gaueko txandaren iraupena aldatzen ahalko da, Foruzaingoaren Mahai Sektorialean negoziatu ondoren.

3. artikulua. Ordutegi motak.

Foruzaingoan ordutegi mota hauek ezartzen dira:

a) Ordutegi orokorraren araubidea.

b) Ordutegi malguaren araubidea.

c) Egunetan zenbatzeko ordutegi-araubidea.

4. artikulua. Atsedenaldien araubidea.

1. Orokorrean, 24 orduko aldi bakoitzari gutxienez 11 ordu jarraituko atsedenaldia dagokio egunean.

2. Zazpi lanegun jarraituko aldi bakoitzari gutxienez 24 orduko atsedenaldi etengabea dagokio, eta horiei gehituko zaizkie aurreko paragrafoan eguneko atsedenaldirako aipatzen diren 11 orduak.

3. Sindikatuekin negoziatu ondoren, atsedenaldien araubide propioa ezartzen ahalko da, baldin eta pareko konpentsazio atsedenaldiak edo pareko babesa ematen bada eta araubide horri lotutako langileen segurtasuna eta osasuna behar bezala zaindu eta babesten badira.

4. Aurrekoa gorabehera, Nafarroako Foruzaingoko langileen ordutegia arau orokorretatik bereizten ahalko da, beharrezkoa denean zerbitzua ematea eta/edo egiten ari diren operazioen jarraipena ziurtatzeko.

5. artikulua. Txanda aldaketak.

1. Antolaketa unitate berekoak direnek baino ezin diote elkarri eskatu txanda edo zerbitzua aldatzeko.

2. Idatziz eginen dira eskaerak, ukitutako bi txandetako lehena hasi baino lehenago.

3. Txanda aldaketek ez dute eraginik izanen eskatzaileen urteko ordu-zenbaketan.

4. Edozein txanda aldatzeko, eskatzaileak zer antolaketa unitateri dauden atxikita, unitate horretako buruak eman beharko du baimena aurretik. Baimen hori, edonola ere, zerbitzuaren beharren menpe egonen da.

6. artikulua. Guardia lokalizatuen araubidea.

1. Nafarroako Foruzaingoko unitate jakin batzuetan etengabeko zerbitzua emateko beharrari erantzuten dio guardia lokalizatuen araubideak.

Buruak emandako jarraibide baten bidez zehaztu beharko da zer unitate edo zerbitzuri esleitzen zaizkien guardia lokalizatuak.

2. Guardia lokalizatua da Nafarroako Foruzaingoko langileek kasuan kasuko lanpostutik kanpo egindako zerbitzua, baldin eta zerbitzu horretan langileak lokalizatuta eta destinatuta dagoen unitatearekin harremanetan egoteko betebeharra badu, edozein bidetatik egiten zaizkion errekerimendu guztiei erantzuteko eta zerbitzuan fisikoki hasteko moduan, eskatzen zaionetik ordubetera.

3. Guardia lokalizatuen araubidean lan egiten duten Nafarroako Foruzaingoko langileek 1. eranskinean ezarritako ordainsari ekonomikoak jasoko dituzte benetan egindako guardia-ordu bakoitzeko, langile bakoitzaren kokapen-mailaren arabera. Eranskin hori aldian-aldian eguneratuko da.

4. Zaintza lokalizatuak egitea bateraezina izanen da aparteko orduak egiteagatiko beste osagarri batzuk jasotzearekin, gaueko ordutegian edo jaiegunetan.

5. Langilea guardia lokalizatu bat egiten ari den bitartean lanpostura bertaratzen bada, urteko lanaldiari txanda oso gisa egotziko zaio, edo, txanda hori gainditzen denean, benetan egindako ordu kopuruari, eta egindako lan-txandari dagozkion ordainsariak jasoko dira.

6. Guardia lokalizatuak egutegian planifikatzen ahalko dira, eta dagozkien zerbitzu-karteldegietan zehaztu beharko dira. Era berean, txandaketa bat arautu beharko da, unitate bakoitzeko funtzionarioen artean orekatzeko.

Salbuespen gisa, dagokion karteldegian zehaztu gabeko guardia lokalizatuak programatzen ahalko dira.

7. Era berean, eta salbuespen gisa, guardia lokalizatuak baimentzen ahalko dira zerbitzua dela-eta gaua destinoko herritik kanpo eman behar denean, zerbitzu-arrazoiengatik prestasun-egoeran dagoenean.

7. artikulua. Egutegiak.

1. Lan-egutegiak organo eskudunak ezarriko ditu, administrazio-egintza bidez, urte bakoitzeko azaroaren 20a baino lehen, negoziazio kolektiboa egin ondoren, eta Barne Zuzendaritza Nagusiko titularraren ebazpen bidez onetsi beharko dira. Egutegi horietan jasoko dira bete beharreko urteko lanaldi osoa eta horren banaketa, eta zerbitzua emateko egunak adieraziko dira, eta guardia lokalizatuak eta jaiegunetako lana ere jasotzen ahalko dira.

Egutegiak eta karteldegiak egiteko oinarri gisa erabiltzen den urteko lanaldia modu orekatuan banatuko da urtean zehar, betiere zerbitzuaren beharrak errespetatuta.

2. Lan-txandak, guardia lokalizatuak eta jaiegunetako lana zehazteko, karteldegiak argitaratuko dira, egutegia argitaratzeko gaitutako tresnen bidez eta kasuan kasuko aldia hasi baino 15 egun natural lehenago gutxienez. Karteldegiak hiru alditan banatuko dira:

- Urtarrilaren 1etik maiatzaren 31ra (lehen karteldegia).

- Ekainaren 1etik irailaren 30era (bigarren karteldegia).

- Urriaren 1etik abenduaren 31ra (hirugarren karteldegia).

3. Salbuespen gisa, eta behar bezala arrazoituta badago, lan-egutegia eta zerbitzu-karteldegiak aldatzen ahalko dira sortzen diren larrialdiko eta/edo prestakuntzako beharren arabera, eta gainerako beharrak Nafarroako Foru Foruzaingoaren mahai sektorialak horretarako hartutako erabakietan eta dagokion tresnan jasoko dira. Aldaketa hori ezin da arbitrarioa izan, eta dagokion arloko buruak arrazoitu beharko du, eta idatziz helarazi beharko zaie interesdunei.

4. Lan-egutegiaren eta zerbitzu-karteldegien balizko aldaketa hori, aurreko paragrafoan aipatutakoa, unitate batean gauzatu ahal izateko, aldaketa horrek atseden-egun gisa aurreikusitako egun batean zerbitzua ematea dakarrenean, ezinbesteko baldintza izanen da sindikatuekin sinatutako akordioetatik abiatuta ezarri eta arautu daitezkeen lanaldi gehigarriak agortuta izatea unitate horretako kideek.

5. Larrialdi-premiarik edo prestakuntza-premiarik ez dagoenean, lan-egutegia urtean zenbat lanalditan, gehienez, aldatzen ahalko den Foruzaingoaren Mahai Sektorialean erabakiko da, lan-egutegien urteko negoziazioarekin batera.

6. Urteko azken karteldegian beharrezkoak diren doikuntzak eginen dira, Nafarroako Foruzaingoko langileek ez dezaten urtea bukatu zenbaketan gehiegizko kopuruak edo akatsak daudela. Hori dela eta, funtzionarioek hartu gabe dituzten opor-egun guztiak eta gehiegizko zenbaketa eragin dezaketen gainerako egoerak eskatu beharko dituzte, eta, bestela, nahitaez programatuko dizkiete dagokien antolaketa-unitateko arduradunek. Zerbitzuaren beharrek ahalbidetzen dutenean, oporraldia luzatzen ahalko da, gehienez ere, Nafarroako Administrazio Publikoetako gainerako funtzionarioentzat oro har aurreikusitako datara arte.

Azken karteldegian ere doituko dira, hala badagokio, erregelamendu honen 23. artikuluan eta hurrengoetan araututako poltsa-orduak, aurreko aldietan aplikatu ez badira.

8. artikulua. Ordutegi malguaren araubidea.

1. Ordutegi malguaren araubidea araudi honen 2. eranskinean zerrendatutako unitateei aplikatuko zaie; izan ere, unitate horietan, esleituta dituzten polizia-eginkizunen arabera, eguneko lanaldia eginkizun horiek betetzearen mende geratzen da, eta, beraz, ezinezkoa da aldez aurretik zehaztea.

Eranskin hori aldatzen ahalko da, barne-gaietako eskumena duen departamentuko titularraren foru agindu bidez, Foruzaingoaren mahai sektorialean negoziatu ondoren.

2. Eguneko lanaldiak Nafarroako Foru Komunitateko Administrazioaren eta haren erakunde autonomoen zerbitzuko langileentzat oro har ezarritako gutxieneko iraupena izanen du, eta etenik gabekoa 10 ordukoa izanen da gehienez ere. Ohiko lanalditik gora lan egindako orduak urteko lanaldiari egotziko zaizkio, eta hamargarrenetik aurrera lan egindako orduak aparteko ordutzat hartuko dira.

3. Langile bakoitzak gehienez 25 lanaldi izanen ditu urtean, eta dagokion buruak programatzen ahalko du eguneko lanaldia, lanaldiaren hasiera aurreratuz edo bukaera atzeratuz hiru ordu. Nolanahi ere, planifikatutako lan-txanda mantenduko da, eta txanda horren ohiko ordutegia errespetatuko da.

9. artikulua. Egunetan zenbatzeko orduaraubidea.

1. Araubide hau aplikatuko zaie agintariak babesteaz arduratzen diren Nafarroako Foruzaingoko langileei; izan ere, esleituta dituzten eskumenak agintari babestuaren agendaren araberakoak dira, eta, beraz, ezinezkoa da ordu horiek aurreikustea.

2. Araubide honetan zerbitzuak egiten dituztenek bete beharreko urteko lanaldia 159 lanaldikoa eta/edo 1.592 ordukoa izanen da, eta bertan sartuko dira benetan egindako zerbitzuen denbora eta ordutegi honetan lan egiten duten langileen prestasuna.

3. Langile horien sarrera-orduak agintariaren jardueraren araberakoak izanen dira. Eguneko txanda bat ezartzen da, 8 eta 12 ordu bitartekoa; eta lanaldia, goizeko txandan, 06:00etatik 09:00etara bitartean hasiko da, eta arratsaldeko txandan 13:30etik 15:30era bitartean.

4. Lanaldi bakoitzean 12 ordu zenbatuko dira gehienez, etenik gabe, eta zortzigarrenaren gainetik lan egindako 4 orduak 1.592 orduko urteko lanaldiari egotziko zaizkio; hamabigarrenetik aurrera lan egindako orduak aparteko ordu gisa ordainduko dira.

Salbuespenez, araubide honen pean dagoen funtzionarioren batek urtean 1.592 ordu baino gehiago lan egiten baditu, urteko zenbaketa horretatik gorako orduak aparteko ordutzat hartuko dira, eta halakotzat ordainduko dira.

5. Agintariak babesteko ardura duten funtzionarioek proba fisikoak gainditzeagatik konpentsazio ekonomikoa izan beharko dute.

6. Egunetan zenbatzeko ordutegi-araubidea aplikatu behar zaien unitateen aldaketa, bai eta unitate berriak sartzea ere, barne-gaietako eskumena duen departamentuko titularrak emanen duen foru agindu baten bidez formalizatuko da, Foruzaingoaren mahai sektorialean negoziatu ondoren.

10. artikulua. Deitzea.

1. Zerbitzuaren beharrak direla-eta, bere atxikipeneko antolaketa-unitatean zerbitzuak bere txandatik kanpo emateko eskatzen bazaio, eta deialdiaren eta lanaldi arruntaren ondorioz lan egindako denboraren artean jarraipenik ez badago, edo dagokion egutegian atsedenerako ezarritako lanaldian lan egindako denboraren artean, langileak eskaera horri erantzun beharko dio, eta arrazoi horrengatik agintzen zaizkion eginkizun guztiak bete beharko ditu.

2. Egindako deialdia ordainduko da, gutxienez, txanda arrunt baterako adierazitako ordutegiko orduekin, laneko aparteko ordutzat hartuta, zerbitzua txandatik kanpo eta deialdiaren eta lanaldi arruntaren ondorioz lan egindako denboraren jarraipenik gabe ematen denean; edo jaiegunetako aparteko ordu gisa, dagokion egutegian atsedenerako ezarritako lanaldi batean egiten denean; betiere lanpostuak prestasun berezirik ez badakar, eta zaintza lokalizaturik programatuta ez badu.

3. Atxikitako antolaketa unitatetik kanpo zerbitzuak emateko deia salbuespenez baino ezin izanen da egin, larritasunarengatik edo ezinbesteko kasuarengatik.

11. artikulua. Asteburuak.

1. Nafarroako Foruzaingoko kide guztiek eskubidea izanen dute urteko asteburuen erdiak gozatzeko.

2. Betiere zerbitzuaren beharrek horretarako aukera ematen badute, gozatze-eskubide hori lan-egutegietan jasoko da eta asteburuak txandaka hartuko dira.

3. Urteko lan egutegietan lan egiteko 26 asteburu jaso daitezke gehienez.

4. Urtean bitan zerbitzuak hiru asteburutan ondoz ondo emateko baliabide bat ezarriko da, beharrezkoa balitz.

5. Artikulu honen ondorioetarako, larunbat eta igande osoa hartuko dira asteburutzat, edo, txandakako araubidean lan eginez gero, ostiral gaueko txandan sartzen denetik igande arratsaldeko txandatik ateratzen den bitarteko denbora.

6. Abenduaren 24ko eta 31ko eta urtarrilaren 5eko 14:00etatik 24:00etara bitarteko orduak jaiegun gisa ordainduko dira, baita larunbatetako arratsaldeko txandak ere, 14:00etatik 24:00etara bitartekoak.

12. artikulua. Kontrola.

Nafarroako Foruzaingoko langileen lanaldia eta ordutegia kontrolatzeko erantzukizun zuzena kasuan kasuko antolaketa-unitateetako buruei dagokie, hargatik eragotzi gabe Nafarroako Foruzaingoko buruaren eta agintari nagusien goi-ikuskaritza.

III. KAPITULUA. ORDAINSARIAK

13. artikulua. Ordainsarien araubidea.

1. Nafarroako Foruzaingoko kideek ondoko kontzeptu hauei dagozkien ordainsariak jasoko dituzte, ez besterik:

A. Norberaren oinarrizko ordainsariak:

a) Oinarrizko soldata, mailari dagokiona.

b) Graduari dagokion ordainsaria.

c) Antzinatasuneko saria.

Norberaren oinarrizko ordainsariek eskuratutako eskubidea osatzen dute, funtzionarioa izateari berez dagokiona.

B. Ordainsari osagarriak:

a) Berariazko osagarria.

b) Lanpostuko osagarria.

c) Prestasun bereziko osagarria.

d) Burutzako osagarria.

Ordainsari horiek norberak esleituak dituen lanpostuan jarduteari dagozkio eta, beraz, lanpostua utzi orduko ez dira gehiago jasoko.

C. Bestelako ordainsariak:

a) Zerbitzuagatik egiten diren gastuen kalte-ordaina.

b) Egindako bidaien kalte-ordaina.

c) Zerbitzurako jantziak erosteagatik ematen den kalte-ordaina, erregelamenduz ezartzen diren kopuruetan.

d) Bizilekua aldatzea dakarren nahitaezko lekualdatzeagatik ematen den kalte-ordaina.

e) Familia laguntza.

f) Bigarren jarduerako administrazio-egoeragatiko norberaren osagarri iragankorra, erregelamendu bidez ezartzen diren baldintzetan eta kopuruetan.

g) Konpentsazioa aparteko orduengatik, gauez nahiz jaiegunez, lanpostuan egin beharreko guardiengatik eta guardia lokalizatuengatik, hautapen epaimahaietan parte hartzeagatik, prestakuntza ikastaroak irakasteagatik eta herrietako festak direla eta ekintza berezietan parte hartzeagatik.

h) Konpentsazioa ordu-prestasunagatik.

2. Nafarroako Administrazio Publikoetako gainerako funtzionarioei oro har aplikatzen zaizkien arauek zuzenduko dituzte norberaren oinarrizko ordainsariak, Nafarroako Poliziei buruzko azaroaren 19ko 23/2018 Foru Legean aurreikusitako alderdi espezifikoekin.

Gainerako ordainsariak Nafarroako Poliziei buruzko azaroaren 19ko 23/2018 Foru Legearen arabera arautuko dira, eta lege horretan berariaz aurreikusita ez dagoen guztian, Nafarroako Administrazio Publikoetako gainerako funtzionarioei oro har aplikatu beharreko arauen arabera.

14. artikulua. Berariazko osagarria.

1. Berariazko osagarria Nafarroako Foruzaingoko langile guztiei ordainduko zaie; haren zenbatekoa izanen da mailari dagokion hasierako soldataren %45, barnean sartuta bai polizia-bateraezintasuna (%35) bai eginkizun polizialari datxekion arrisku berezia (%10).

2. Polizia-bateraezintasuneko osagarria jasotzen bada, debeku izanen da irabazi-asmoko jarduerarik egitea, sektore publikoan zein pribatuan, baldin eta kasuko jarduera horrek eragozten edo kaltetzen badu esleitutako betebeharrak betetzea, edo inpartzialtasun edo independentzia konpromisoan jartzen baditu, betetzen den lanpostuaren mailarengatik bateraezina bada, edo oinarrizko jarduketa-printzipioen aurkakoa bada. Nolanahi ere, Barneko zuzendari nagusiaren edo kasu bakoitzean eskumena duen organoaren aldez aurreko baimena beharko da, Nafarroako Foruzaingoko buruak txosten arrazoitua egin ondoren.

15. artikulua. Lanpostuko osagarria.

1. Lanpostuko osagarriak honako hauek ordainduko ditu: eskatzen den prestakuntza tekniko eta fisiko berezia, zailtasun-maila, lanpostuari dagokion ordutegi-araubidea, nekagarritasuna, txandakako lana, arrisku berezia, dedikazio berezia, malgutasuna eta erantzukizun berezia.

2. Lanpostuko osagarriaren zenbatekoak ezin izanen du gainditu mailari dagokion hasierako soldataren %75, eta lanpostuen azterketan egindako baloraziotik ateratako ehunekoek ezarriko dute, Balorazio Eskuliburuko irizpideen eta erregelamendu honetako 3. eranskinean jasotako puntuazioen arabera.

3. Agente lehenaren lanpostuko osagarriaren balorazioaren azken emaitzak gutxienez %8ko aldea izanen du, unitate beraren barruan, agentearen enplegukoarekin.

16. artikulua. Prestasun bereziko osagarria.

1. Prestasun bereziko osagarria jasoko duten enplegu edo lanpostuak dira haien eginkizunengatik prestasun eta lokalizazio etengabea edo lanarekin bitarteko telematikoen bidez etengabe harremanetan egotea eskatzen dutenak.

2. Osagarri hori jasotzen dutenek erabateko prestasunez eta dedikazio erabateko eta osoz emanen dituzte beren zerbitzuak, eta ezin izanen dira irabazi-asmoko beste inolako jardueratan aritu, ez sektore publikoan ez pribatuan, salbu eta unibertsitateko irakaskuntzan, irakaskuntza zentroetako irakaskuntza esporadikoan eta norberaren edo familiaren ondarearen administrazioan.

3. Horren zenbatekoa mailari dagokion hasierako soldataren %20 izanen da.

4. Osagarri hori jasotzea bateraezina da aparteko orduak jasotzearekin eta guardia lokalizatuak egitearekin.

5. Nafarroako Foruzaingoko kideen lanpostuek prestasun berezia esleitua badute, kide horiek ez dituzte gaindituko, urteko zenbaketan, 1.592 orduak edo, hala badagokio, erregelamendu honen 2.3 artikuluan zerrendatutako txanda bakoitzerako finkatutako urteko zenbaketa, dagokion ordu-konpentsazioa aplikatu ondoren.

6. 4. eranskinean jasotzen dira Nafarroako Foruzaingoko enpleguak eta unitateak, eta horien gainean aplikatuko da prestasun bereziko osagarria.

Eranskin hori aldatzen ahalko da, barne-gaietako eskumena duen departamentuko titularraren foru agindu bidez.

17. artikulua. Burutzako osagarria.

1. Burutzako osagarria jasoko duten lanpostuak enplegu barruan aginte egoera berezia dutenak izanen dira, halaxe jasota baldin badago dagokion plantilla organikoan.

2. Osagarri horren zenbatekoa, mailari dagokion hasierako soldatari dagokionez, %10 izanen da.

18. artikulua. Aparteko orduen konpentsazioa.

1. Nafarroako Foruzaingoko langileei beren lanalditik kanpo egin behar dituzten zerbitzuengatik bakarrik ordainduko zaie aparteko ordu gisa, prestasun bereziko osagarria jasotzen ez badute.

2. Dagokion unitateko buruaren baimen arrazoitua beharko da aparteko orduak egiteko.

Urteko zenbaketako soberakinak, abenduaren 31 baino lehen konpentsatu ez direnak, aparteko ordu gisa ordainduko dira.

3. Prestakuntza-orduak ez dira aparteko ordutzat hartuko, ezta urteko gehiegizko kopurutzat ere, eta denborarekin konpentsatuko dira planifikatutako urteko lanaldia handitzea dakartenak.

Konpentsazio hori lanaldi osoen arabera hartuko da, interesdunak hala eskatuta, eta 3 hilabeteko epean, sortu ziren hilabeteko lehen egunetik hirugarren hilabeteko azken egunera arte, zenbaketa urte naturala baino handiagoa izan ala ez kontuan hartu gabe. Zerbitzu-beharren arabera emanen dira, eta antolaketa-unitateetako burutzek ez dute nahitaez programatu behar.

Sortutako orduak lanaldi baten iraupenera iristen ez direnean, aipatutako epea luzatzen ahalko da, horretarako behar den denbora metatu arte. Antolaketa-unitateetako buruek baimena ematen ahalko dute ordu horiek orduka hartzeko, egin beharreko lanaren ezaugarrien eta zerbitzuaren beharren arabera.

4. Sartzeko edo ateratzeko ordutegia edo biak aldatzeak lanaldia luzatzea badakar, aparteko orduak sortuko dira.

Ondorio horietarako, lanaldiaren luzapentzat hartuko da benetako lan-denbora, planifikatutako lanaldiaren iraupenaz gainekoa, etenik gabe egindakoa, lanaldiaren hasiera aurreratuz edo bukatzeko aurreikusitako ordua iritsi ondoren lanaldiari jarraipena emanez.

5. Zerbitzuaren beharrek ahalbidetzen dutenean, aparteko orduak atsedenaldiarekin konpentsatzen ahalko dira, interesdunak aldez aurretik eskatuta, eta sei hilabeteko epean hartu beharko da konpentsazioa, aparteko orduak egin diren hilaren lehenengo egunetik seigarren hilaren azken egunera arte. Sei hilabete igarotzen badira konpentsazio hori egin gabe, sortutako aparteko orduak dirutan ordainduko dira.

6. Foruzaingoko aparteko orduen prezioen zenbatekoak Nafarroako Foru Komunitateko Administrazioko langileentzat ekitaldi bakoitzean onesten direnak izanen dira.

Foruzaingoan aparteko orduak egiteagatiko atsedenaldiko konpentsazioa 5. eranskinean azaltzen da.

19. artikulua. Konpentsazioa herrietako jaiak direlaeta zerbitzu berezietan parte hartzeagatik.

Foruzaingoko langileek Iruñeko, Tuterako, Lizarrako, Tafallako, Altsasuko, Elizondoko eta Zangozako foruzain-etxeetako herriko jaiak direla-eta dispositibo berezietan parte hartzeagatik egindako benetako lanorduak foruzain-etxe horietan benetan lan egiten dutenen baldintza berberetan konpentsatuko dira.

20. artikulua. Izapide judizialetara joatea.

Nafarroako Foruzaingoko langileek, beren jardun profesionalari lotutako izapide judizialetara joan behar badute, honako konpentsazio hauek jasotzeko eskubidea izanen dute:

a) Dagokion egutegian laneguntzat ezarritako lanaldi baten barruan eta dagokion txandaren barruan joan behar badu, langileak normaltasunez eman beharko du zerbitzua, eta izapidea betetzeko behar den denbora eman beharko du bere lanpostutik kanpo.

b) Dagokion egutegian laneguntzat ezarritako lanaldi baten barruan baina dagokion txandatik kanpo joan behar badu, langileak aparteko hiru lanorduren konpentsazioa jasoko du, eta hasiera batean aurreikusitako hiru orduak gainditzen dituzten bertaratzeak kontuan hartuko dira proportzionalki aplikatzeko.

c) Dagokion egutegian atseden-egun gisa ezarritako egun batean joan behar bada izapidera, langileak izapidea bete aurretik bi aukera izanen ditu: egun horretan lanaldi osoa egitea, eta benetan lan egindako orduak aparteko ordu gisa ordainduko zaizkio, eta gainerakoan, a) letran xedatutakoaren arabera jokatuko da; edo egun horretan zerbitzurik ez ematea, eta aparteko hiru orduren konpentsazioa jasotzea.

Bi kasuetan, ukitutako langileak, zerbitzuaren beharrek ahalbidetzen badute, ordainsari ekonomikoaren ordez ordu konpentsazioa aukeratzen ahalko du.

IV. KAPITULUA

ORDUTEGI-PRESTASUNAGATIKO KONPENTSAZIOA

21. artikulua. Konpentsazioa ordutegiprestasunagatik.

1. Ordutegi-prestasunagatiko konpentsazioaren helburua izanen da erakundeak ezarritako zerbitzu-beharren ondorioz ohiko lanalditik kanpo egindako orduak konpentsatzea, eta ordu horiek Foruzaingoaren barruko aldi baterako langileek betetzea ezinezkoa denean ordainduko dira.

2. Konpentsazio hori honela ordainduko da:

a) Testu honetako 18. artikuluan ezarritako ordainsari gisa jasotako aparteko orduen osagarri gisa eta 22. artikuluan ezarritakoaren arabera.

b) 23. artikuluan eta hurrengoetatik aurrera ezarritako "Ordu-poltsan" jasotako ordu-poltsen konpentsazio gisa.

22. artikulua. Aparteko orduen osagarria.

1. Zerbitzuak hilabetea bukatutakoan ordainduko dira, eta honako zenbateko hau ordainduko da benetan lan egindako aparteko ordu bakoitzeko:

a) Nafarroako Foruzaingoko C mailako langileak:

a. Laneguneko aparteko orduaren konpentsazioa: 27,94 euroren eta aparteko ordu horrengatik ordaindutako zenbatekoaren arteko aldea.

b. Jaieguneko aparteko orduaren konpentsazioa: 34,93 euroren eta aparteko ordu horrengatik ordaindutako zenbatekoaren arteko aldea.

c. Laneguneko aparteko orduaren konpentsazioa, elurra edo izotza dagoenean: 40,51 euroren eta aparteko ordu horrengatik ordaindutako zenbatekoaren arteko aldea.

d. Jaieguneko aparteko orduaren konpentsazioa, elurra edo izotza dagoenean: 50,64 euroren eta aparteko ordu horrengatik ordaindutako zenbatekoaren arteko aldea.

b) Nafarroako Foruzaingoko B mailako langileak:

a. Laneguneko aparteko orduaren konpentsazioa: 34,98 euroren eta aparteko ordu horrengatik ordaindutako zenbatekoaren arteko aldea.

b. Jaieguneko aparteko orduaren konpentsazioa: 43,73 euroren eta aparteko ordu horrengatik ordaindutako zenbatekoaren arteko aldea.

c. Laneguneko aparteko orduaren konpentsazioa, elurra edo izotza dagoenean: 50,72 euroren eta aparteko ordu horrengatik ordaindutako zenbatekoaren arteko aldea.

d. Jaieguneko aparteko orduaren konpentsazioa elurra edo izotza dagoenean: 63,40 euroren eta aparteko ordu horrengatik ordaindutako zenbatekoaren arteko aldea.

2. Prestasun bereziko osagarria jasotzen duten langileek ez dute konpentsazio hori jasoko.

3. Zenbateko horiek ez dituzte xurgatuko Nafarroako Poliziei buruzko azaroaren 19ko 23/2018 Foru Legea aplikatzearen ondorioz sor daitezkeen igoerak, ez eta Foru Administrazioko langile guztientzat oro har ezar daitezkeen etorkizuneko igoerak ere, zehazki, oinarrizko soldataren gaineko igoerak.

4. Artikulu honetako 1. apartatuan zerrendatutako zenbatekoak sindikatuen ordezkariek administrazio publikoekin egindako akordioetan hitzartutako soldata-igoeraren arabera eguneratuko dira.

23. artikulua. Ordupoltsa. Definizioa eta izenematea.

1. Polizia-zerbitzuak hobeto kudeatzeko, "ordu-poltsa" bat eratzea aurreikusten da. Poltsa horretan, Nafarroako Foruzaingoko langile guztiek izena ematen ahalko dute urtero, beren borondatez, honako baldintza hauek betetzen badituzte:

a) Inskripzioa formalizatzea, administrazio-kudeaketako unitateari zuzenduta erregistroan aurkeztutako idatzizko komunikazio baten bidez, urte bakoitzeko irailaren 1a baino lehen. Salbuespen gisa, 2023an, foru dekretu hau onetsi eta 15 eguneko epean.

b) Behar izanez gero, errazago aurkitzeko, harremanetan jartzeko bitarteko bat adierazi beharko da.

Komisario nagusia, komisarioa eta inspektorea diren Foruzaingoko langileek ezin izanen dute poltsan izena eman.

Lan-poltsan sartzen direnek ezin izanen dute baja eskatu uneko urtea bukatu arte. 25.2 artikuluan ezarritako kasuan salbu, edo uneko urteko irailaren 1a baino lehen berariaz uko egin ezean, ordu-poltsako inskripzioa automatikoki berritutzat joko da hurrengo urterako.

2. Poltsan izena emateak berekin dakar dagokion urteko kopurua baino 40 ordu gehiago lan egiteko prest egotea. Alde batetik, atseden-egunetan programatutako zerbitzuak egiteko aplikatuko dira poltsako orduak. Egin beharreko lanaldi bakoitzak, gutxienez, pertsonari dagokion unitatearen eguneko ordu kopurua zenbatuko du.

Bestetik, ohiko lan-txandaren gainetik programatutako orduak ordu-poltsatik deskontatuko dira.

Gainera, ordu-poltsan izena emandako pertsona bakoitzak bi txanda-aldaketa egiteko prestasuna ezartzen da, urteko egutegian esleitutako lanaldiaren gainean.

Artikulu honetan araututako orduen aplikazioak lehentasuna izanen du balizko deietatik sortutakoen gainean. Pertsona interesdunen unitateko buruek ahaleginak eginen dituzte poltsako orduak proportzionalki aplikatzeko poltsaren indarraldiko urtean zehar, zerbitzuaren beharrek horretarako aukera ematen badute.

24. artikulua. Poltsari egotz dakizkiokeen orduak betetzeko eta egutegian esleitutako lanaldiaren gainean txandaaldaketak egiteko errekerimenduak.

1. Poltsari egotz dakizkiokeen orduak emateko eta egutegian esleitutako lanaldiaren gaineko bi txanda-aldaketak egiteko errekerimenduak gutxienez ere bost egun natural lehenago formalizatu beharko dira, esparru bakoitzaren barruan, eta horretarako prestatuko diren zerrenden arabera, alfabetikoki ordenatuta eta zozketa eginda.

Errekerimenduak larrialdi-kasuei erantzuteko egiten direnean, ez da aplikatuko aurreikusitako gutxieneko aurrerapena.

2. Lanaldian, kasuan kasuko esparruko berezko eginkizunak betetzera mugatuko dira eman beharreko zerbitzuak, eta, salbuespen gisa, beste eginkizun batzuk betetzeko errekerimenduak egiten ahalko dira, inolako espezializaziorik eskatzen ez dutenak.

25. artikulua. Poltsari egotz dakizkiokeen orduak betetzeko eta egutegian esleitutako lanaldiaren gainean txandaaldaketak egiteko betebeharra.

1. Poltsan izena emanik dauden Nafarroako Foruzaingoko langileek uko egiten badiote eskatzen zaizkien zerbitzuak emateari, kasuan kasuko zerrendako azken tokira igaroko dira, non ez duten inguruabar hauetakoren bat gertatzen dela egiaztatzen:

a) Aldi baterako ezintasun-egoeran egotea.

b) Nafarroako Administrazio Publikoetako funtzionarioen opor, lizentzia eta baimenen erregelamendua onesten duen otsailaren 9ko 11/2009 Foru Dekretuan ezarritako oporrak, lizentziak edo baimenak baliatzen egotea.

c) Jaiegunetan eta/edo gaueko ordutegian orduak betetzeko eskatzen zaionean, eta aldez aurretik poltsari egotz dakizkiokeen ezaugarri bereko bi dei beteta izatea.

Aurrekoa gorabehera, poltsari egotz dakizkiokeen orduak edo egutegian esleitutako lanaldiaren gainean egindako bi txanda-aldaketak egiteko errekerimendua egitean ez bada errespetatzen ordu horiek formalizatzeko ezarritako gutxieneko epea, zerbitzua ematea borondatezkoa izanen da. Larrialdietan, harremanetan jartzea lortzen den eta zerbitzurako prest dagoen lehen izangaiari eskainiko zaio zerbitzua, baita eman ere, hura egitea onartzen badu.

2. Urtean zehar proposatutako zerbitzu guztiak emateari uko eginez gero, lehen apartatuan deskribatutako inguruabarretako bat ere gertatzen ez denean, ezin izanen da hurrengo urteko lan-poltsan inskribatu.

Ondorio horietarako, interesdunari egotz dakizkiokeen ez-betetzetzat hartuko dira bai deiari uko egitea, bai eskatutako zerbitzua ez egitea, artikulu honen lehen apartatuan deskribatutako egoeraren bat gertatzen denean izan ezik.

26. artikulua. Ordainsaria.

1. Zerbitzuak hilabetea bukatutakoan ordainduko dira, eta honako zenbateko hau ordainduko da benetan lan egindako aparteko ordu bakoitzeko:

- Nafarroako Foruzaingoko C mailako langileak: 34,93 euro.

- Nafarroako Foruzaingoko B mailako langileak: 43,73 euro.

Ordu-poltsa horretatik sortutako zerbitzuak elurra edo izotza dagoenean ematen badira, mota horretako aparteko orduei dagozkien ordainsariak aplikatuko dira.

Esleitutako lanaldiko txanda aldatu den bi egunetako bakoitzeko, lanaldi horrek duen guztizkoari dagokion zenbatekoa ordainduko zaie, 27,94 euro orduko, C mailako langileei, eta 34,98 euro orduko, B mailako langileei.

Zenbateko horiek ez dituzte xurgatuko Nafarroako Poliziei buruzko azaroaren 19ko 23/2018 Foru Legea aplikatzearen ondorioz sor daitezkeen igoerak, ez eta Foru Administrazioko langile guztientzat oro har ezar daitezkeen etorkizuneko igoerak ere, zehazki, oinarrizko soldataren gaineko igoerak.

Artikulu honen bigarren paragrafoan jasotako salbuespenarekin, poltsako 40 ordu horiek egitea bateraezina izanen da aparteko orduak gaueko ordutegian edo jaiegunetan egiteagatiko beste osagarri batzuk jasotzearekin.

2. Urte bukaeran poltsari egotz dakizkiokeen eta benetan lan egin ez diren orduak daudenean, ordu horiek ez dira ordainduko, Nafarroako Poliziei buruzko azaroaren 19ko 23/2018 Foru Legearen 57.3 artikuluan xedatutakoaren arabera.

3. Artikulu honetako 1. apartatuan zerrendatutako zenbatekoak sindikatuen ordezkariek administrazio publikoekin egindako akordioetan hitzartutako soldata-igoeraren arabera eguneratuko dira.

V. KAPITULUA. PROBA FISIKOAK GAINDITZEAGATIKO KONPENTSAZIOA

27. artikulua. Proba fisikoak gainditzeagatiko konpentsazioa.

Nafarroako Foruzaingoko langileei agindutako eginkizunen izaerak eta horiek behar bezala gauzatzeak eskatzen dute kideek forma fisiko egokia izatea, eta prestakuntza hori lan-denboraren kontura edo diruz konpentsatuta eman behar da, bakoitzak aukeratutakoaren arabera, hori egiaztatzen duten proba fisikoak gainditu ondoren.

Aukera hori urtero aldatzen ahalko da ordu-konpentsazioa baliatzen ari denean, edo lau urtean behin konpentsazio ekonomikoa baliatzen ari denean. Bigarren aukera horren alde egiten dutenek urtean behin erabakitzen ahalko dute aukera hori behin betikoa izatea, eta ordutik aurrera ez dute dagozkien proba fisikoak gainditzeko betebeharrik izanen.

Aukera hori ez zaie aplikatuko Nafarroako Poliziei buruzko azaroaren 19ko 23/2018 Foru Legea indarrean jarri ondoren foruzain izaera hartzen duten funtzionarioei, horiei automatikoki eta behin betiko aplikatuko baitzaie erregelamendu honen 31. artikuluan aurreikusitako konpentsazio ekonomikoa.

28. artikulua. Proba fisikoak egiteko deialdia.

Urte bakoitzeko azken hiruhilekoan, proba fisikoak egiteko deialdia eginen da, eta aparteko proba bat gaituko da deialdi nagusiaren hurrengo urteko martxoan, salbuespenezko eta justifikatutako arrazoiengatik proba horiek hasieran ezarritako egunetan egin ezin izan dituzten pertsonentzat. Nafarroako Foruzaingoko langileek proba horiek egiten emandako denbora benetako lantzat hartuko da gerta daitezkeen lesioen edo istripuen ondorioetarako.

Oro har, jardunean edo eszedentzia berezian dauden funtzionarioei baino ez zaie deituko. Nafarroako Foruzaingoko langileek, zerbitzu berezietako egoeran daudenek, Nafarroako Segurtasun eta Larrialdietako Eskolan mailaz igotzeko prestakuntza-ikastaro batean parte hartzen ari direnek izan ezik, ez dituzte probak egin beharko egoera horretan dauden bitartean, eta jardunera itzultzen direnean dagokien konpentsazioa izanen dute, zerbitzu berezietako egoerara igaro aurreko baldintza berberetan.

Nafarroako Segurtasun eta Larrialdietako Eskolan mailaz igotzeko prestakuntza-ikastaro batean parte hartzeagatik zerbitzu berezietako egoeran deklaratu direnek eskubidea izanen dute, egoera horrek irauten duen bitartean, deialdia egiten duen administrazio publikotik beren jatorrizko lanpostuan aitortuta dituzten ordainsari osoak jasotzeko, proba fisikoak gainditzeagatiko konpentsazioa barne.

Borondatezko eszedentzia baten ondoren jarduneko zerbitzura itzultzen diren funtzionarioek ez dute konpentsaziorik izanen proba fisikoengatik, haiek gainditzen ez dituzten bitartean parte hartzen duten hurrengo deialdian.

29. artikulua. Proben nondik norakoa.

1. Probak egiteko ordutegiak polizia bakoitzak bere lanalditik kanpo egin ahal izateko moduan planteatuko dira, eta hori ezinezkoa denean lan-ordutegiaren barruan programatuko da, eta, lehen kasuan, probetara joatea lan egindako bi ordu gisa zenbatuko da.

2. Lan-istripuagatik, lanbide-gaixotasunagatik, haurdunaldiagatik edo amatasunagatik proba fisikoak egin ezin dituztenek proba fisikoak gainditzeari dagozkion orduak hartzeko eskubidea izanen dute, baldin eta aurkeztu ziren azken deialdian proba fisikoak gainditu badituzte, lan-istripuaren aurretik edo lanbide-gaixotasunagatiko, haurdunaldiagatiko edo amatasunagatiko baja hasi aurretik.

30. artikulua. Proba fisikoen ordukonpentsazioa.

1. Proba fisikoen ordu-konpentsazioa aukeratzen duten Nafarroako Foruzaingoko langileei 126 orduko konpentsazioa aplikatuko zaie urtean, eta konpentsazio hori, interesdunak eskatuta, bi hilean behin eta ahalik eta modu homogeneoenean baliatuko da, betiere zerbitzuaren beharren arabera.

2. Oro har, konpentsazioa lanaldi osoen bidez eginen da, horrek ukatu gabe unitate organikoetako buruek baimena ematea, interesdunak eskatuta, lanaldi bat baino aldi laburragoetan egitea, egin beharreko lanaren ezaugarrien eta zerbitzuaren beharren arabera. Zerbitzuaren beharrak direla eta, geratzen diren orduak ezin badira ezarritako aldian baliatu, baliatu gabeko orduak hurrengo aldiari metatuko zaizkio.

3. Orduak konpentsatzeko eskaera dagokion karteldegia argitaratu aurreko hilaren 5a baino lehen egin beharko dute interesdunek, eta, hala ez bada, nahitaez programatuko dute dagokien antolaketa-unitateko arduradunek.

Funtzionario bati ezin bazaizkio eskatutako egun guztiak edo batzuk eman, horiek karteldegian argitaratuko dira, bereziki identifikatuta, egun horiek ematea posible den egunetan. Argitaratzen denetik aurrera, interesdunak 7 eguneko epea izanen du baimena beste data batzuetan hartzea eskatzeko, bere eskaerari dagokion aldi beraren barruan, betiere, eta hasieran baimendu gabeko egunak soilik aldatzen ahalko dira.

4. Aldi baterako ezintasunaren, erditzeagatiko, adopzioagatiko, adopzio-helburuko zaintzagatiko edo harreragatiko lizentziaren, haurdunaldiko arriskuaren eta edoskitze naturalaren ondoriozko arriskuaren eta hamabi hilabetetik beherako seme edo alaba baten jaiotzagatiko, adopzio-helburuko zaintzagatiko, harreragatiko edo adopzioagatiko edo lanaldi osoko edoskitzeagatiko ama biologikoa ez den gurasoaren baimenen ondorioz ordu-konpentsazioa baliatu ezin dutenek bi hilabeteko epean baliatzen ahalko dute lanera itzultzen direnetik, bi hilabeteko aldi berean edo zerbitzuaren beharrek ahalbidetzen duten lehen aldian, eta betiere hurrengo urteko urtarrilaren 31 baino lehen.

Kasu horietan, urtarrilaren 31n hartzeko dauden egunak diruz konpentsatuko dira, baldin eta, egun hori igarota, bajan segitzen badu edo, zerbitzuaren beharrengatik, egun horiek ezin izan badira orduetan konpentsatu.

5. Nafarroako Foruzaingoko langileek ordu-konpentsazioa aukeratzen badute, ezin izanen dute baliatu lanaldiaren hamabirena murrizteko aukera, Nafarroako Poliziei buruzko azaroaren 19ko 23/2018 Foru Legearen 5. xedapen gehigarrian jasotakoa.

31. artikulua. Proba fisikoen konpentsazio ekonomikoa.

Proba fisikoen konpentsazio ekonomikoa aukeratzen duten funtzionarioek mailari dagokion hasierako soldataren %17 jasoko dute.

Aukera formulatu beharko da gauzatu behar den urtearen aurreko urteko irailaren 1a baino lehen, Nafarroako Poliziei buruzko azaroaren 19ko 23/2018 Foru Legean ezarritako baldintzetan eta epe eta aldietarako.

1. ERANSKINA. GUARDIA LOKALIZATUEN ORDAINSARI EKONOMIKOAK

1. ERANSKINA

2. ERANSKINA. NAFARROAKO FORUZAINGOAREN ZEIN UNITATETAN APLIKATUKO DEN ORDUTEGI MALGUKO ARAUBIDEA

2. ERANSKINA

-Polizia Judizialaren Dibisioa eta Polizia Judizialaren Taldeak lurralde-komisarietan.

-Informazio Dibisioko Ikerketa Taldea.

-Esku Hartzeko Dibisioko Esku-hartzeetarako Taldeak.

3. ERANSKINA. LANPOSTUEN AZTERKETA: BALORAZIO-ESKULIBURUA ETA ONDORIOZKO PUNTUAZIOAK (PDFa).

3. ERANSKINA

Vínculo a objeto

4. ERANSKINA. EGINKIZUN ESPEZIFIKOAK DITUZTEN FORUZAINGOKO ENPLEGU ETA UNITATEAK, PRESTASUN BEREZIKO OSAGARRIA APLIKATUKO ZAIENAK

4. ERANSKINA

Enpleguak: komisario nagusia, komisarioa eta inspektorea.

Unitateak:

Sostengu Teknologikorako Taldea.

Esku-hartze Berezietarako Taldea.

Txakurren Gidarien Taldea.

Komunikaziorako eta Herritarren Partaidetzarako Taldea.

Barne Araubideko Brigada.

5. ERANSKINA. APARTEKO ORDUAK ATSEDENAREKIN KONPENTSATZEA

5. ERANSKINA

Gobierno de Navarra

Contacte con nosotros | Accesibilidad | Aviso legal | Mapa web