(ir al contenido)

navarra.es

Castellano | Euskara | Français | English

LEXNAVARRA


Versión para imprimir

Versión en castellano

272/2019 FORU DEKRETUA, URRIAREN 30EKOA, UNIBERTSITATEKO, BERRIKUNTZAKO ETA ERALDAKETA DIGITALEKO DEPARTAMENTUAREN EGITURA ORGANIKOA EZARTZEN DUENA Nota de Vigencia

BON N.º 220 - 07/11/2019



  I. KAPITULUA. XEDAPEN OROKORRAK


  II. KAPITULUA. UNIBERTSITATEKO ZUZENDARITZA NAGUSIA

  1. ATALA. ESKUMEN MATERIALEN ESPARRUA ETA EGITURA

  2. ATALA. UNIBERTSITATEKO ZERBITZUA


  III. KAPITULUA. BERRIKUNTZAKO ZUZENDARITZA NAGUSIA

  1. ATALA. ESKUMEN MATERIALEN ESPARRUA ETA EGITURA

  2. ATALA. I+G+B ZERBITZUA

  3. ATALA. EROSKETA PUBLIKO BERRITZAILEAREN ATALA


  IV. KAPITULUA. ERALDAKETA DIGITALEKO ZUZENDARITZA NAGUSIA

  1. ATALA. ESKUMEN MATERIALEN ESPARRUA ETA EGITURA

  2. ATALA. AZPIEGITURA TEKNOLOGIKOEN ETA EUSKARRI ZENTROAREN ZERBITZUA

  3. ATALA. DEPARTAMENTUETAKO INFORMAZIO SISTEMEN ZERBITZUA

  4. ATALA. OSASUN TEKNOLOGIEN ZERBITZUA

  5. ATALA. ADMINISTRAZIO ELEKTRONIKOKO, OGASUNEKO, GIZA BALIABIDEETAKO ETA SITNAKO ZERBITZUA

  6. ATALA. AURRERAPEN DIGITALERAKO ZERBITZUA

  7. ATALA. ARAUBIDE JURIDIKOAREN ATALA

  8. ATALA. LAGUNTZA ADMINISTRATIBOAREN ETA DIGITALIZAZIOAREN ATALA


  V. KAPITULUA. IDAZKARITZA TEKNIKO NAGUSIA


Atariko

Nafarroako Foru Komunitateko Lehendakariaren abuztuaren 6ko 22/2019 Foru Dekretuaren bidez, Nafarroako Foru Komunitateko Administrazioaren departamentuen egitura eta departamentu bakoitzaren eskumenen esparrua ezarri ziren.

Halaber, abuztuaren 14ko 95/2019 Foru Dekretuaren bidez, Unibertsitateko, Berrikuntzako eta Eraldaketa Digitaleko Departamentuaren oinarrizko egitura ezarri zen, galarazi gabe gero garatu ahal izatea.

Unibertsitateko, Berrikuntzako eta Eraldaketa Digitaleko Departamentuaren egitura organiko berria finkatu eta garatzea du xede foru dekretu honek.

Horrenbestez, Unibertsitateko, Berrikuntzako eta Eraldaketa Digitaleko kontseilariak proposaturik, eta Nafarroako Gobernuak 2019ko urriaren 30ean egindako bilkuran hartutako erabakiarekin bat,

DEKRETATZEN DUT:

I. KAPITULUA. XEDAPEN OROKORRAK

1. artikulua . Unibertsitateko, Berrikuntzako eta Eraldaketa Digitaleko Departamentuaren eskumenen esparrua.

Unibertsitateko, Berrikuntzako eta Eraldaketa Digitaleko Departamentuak beteko ditu Nafarroako Foru Komunitateko Administrazioak honako arlo hauetan eskuratuak dituen eskumenak: unibertsitateko jarduera planifikatu eta programatzea; ikerketa zientifikoa, garapen teknologikoa eta berrikuntza bultzatu, planifikatu, gauzatu eta ebaluatzea; egoitza Nafarroan duten unibertsitateen nazioartekotzea eta Foru Komunitateko jarduera berritzailea sustatzea; Europar Batasunaren zientzia, ikerketa, garapen eta berrikuntzako politiken jarraipena egitea; erosketa publiko berritzailearen prozedurak bultzatu, planifikatu eta koordinatzea; aipatu jarduerek sortzen dituzten kalitatea eta lehiakortasuna sustatu, planifikatu eta ebaluatzea; Foru Komunitateko Administrazioaren sistema informatikoak eta telekomunikazioak bultzatu, sustatu, modernizatu, berritu eta garatzea; eta indarra duten xedapenetan emandako gainerako eskudantziak.

2. artikulua . Departamentuko titularra.

1. Unibertsitateko, Berrikuntzako eta Eraldaketa Digitaleko Departamentuko titularrari dagokio Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluan eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen azken xedapenetako lehenean ezarritako eskudantziak erabiltzea, foru dekretu honen 1. artikuluan zehaztu den eskumenen esparruaren barnean.

2. Orobat, Unibertsitateko, Berrikuntzako eta Eraldaketa Digitaleko kontseilariaren zeregina da, departamentuko titularra den aldetik, kide anitzeko organo hauetan parte hartzea:

- Unibertsitate partzuergoaren zuzendaritza batzordea, Urrutiko Hezkuntzarako Unibertsitate Nazionalaren Iruñeko Zentro Elkartuan.

- Unibertsitate partzuergoaren zuzendaritza batzordea, Urrutiko Hezkuntzarako Unibertsitate Nazionalaren Tuterako Zentro Elkartuan.

3. Unibertsitateko, Berrikuntzako eta Eraldaketa Digitaleko kontseilariaren laguntza politiko eta teknikorako unitate gisa, departamentuan Kontseilariaren Kabinetea dago, zuzen-zuzenean haren menpean eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 19. artikuluan ezarritakoari loturik.

3. artikulua . Unibertsitateko, Berrikuntzako eta Eraldaketa Digitaleko Departamentuaren antolaketa orokorra.

1. Unibertsitateko, Berrikuntzako eta Eraldaketa Digitaleko Departamentuak, bere titularraren goi-zuzendaritzapean, honako organo hauek ditu bere egituran:

a) Unibertsitateko Zuzendaritza Nagusia.

b) Berrikuntzako Zuzendaritza Nagusia.

c) Eraldaketa Digitaleko Zuzendaritza Nagusia.

d) Departamentuko Idazkaritza Tekniko Nagusia.

4. artikulua . Zuzendaritza nagusien eskudantziak.

1. Unibertsitateko, Berrikuntzako eta Eraldaketa Digitaleko Departamentuko zuzendaritza nagusiek, departamentuko kontseilariaren goi-zuzendaritzapean eta foru dekretu honetan bakoitzari esleitutako esparruan, izanen dituzte arau hauetan ezarritako eskudantziak: Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikulua eta foru lege beraren azken xedapenetako lehena. Horietaz gainera, indarra duten xedapenek esleitzen dieten beste edozein.

2. Zuzendaritza nagusiek, haien zerbitzuen bidez, bertako langileekin egindako jarduketak zuzenean kudeatuko dituzte, eta enkargatutako edo kontratatutako jardueren jarraipena eta kontrola eginen dituzte. Bidezko denean, kontratazio espedienteak eta enkarguak kudeatuko dituzte, eta kontratazio eta enkarguetarako preskripzio teknikoen agiriak prestatuko dituzte, esleitutako giza baliabideen koordinazioa barne.

5. artikulua . Idazkaritza Tekniko Nagusiaren eskudantziak.

Idazkaritza Tekniko Nagusiak, foru dekretu honen 1. artikuluan zehaztu den eskumenen esparruan, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 33. artikuluan ezarritako eskudantziak izanen ditu departamentuko titularraren goi-zuzendaritzapean, berari atxikita baitago zuzenean, bai eta Idazkaritza Tekniko Nagusiak arautzen dituen otsailaren 21eko 29/2005 Foru Dekretuan ezarritakoak ere (ekonomia eta aurrekontu arlokoak barne), indarra duten xedapenek ematen dizkiotenak eta departamentuko titularrak agintzen dizkion guztiak ere, eta horretarako behar diren ebazpenak emanen ditu.

Idazkaritza Tekniko Nagusiaren ardura izanen da genero ikuspegiaren zeharkakotasuna aplikatzea departamentuko politikak planifikatu, kudeatu eta ebaluatzean, bat etorrita Emakumeen eta Gizonen arteko Berdintasunari buruzko apirilaren 4ko 17/2019 Foru Legearekin.

6. artikulua . Zerbitzuen eskudantziak.

Zerbitzuek, departamentuko goi-organoen zuzendaritzapean eta foru dekretu honetan bakoitzari esleitutako esparru materialean, eginkizun hauek izanen dituzte: beren menpeko atalak edo unitate organikoak planifikatu, koordinatu, zuzendu eta kontrolatzea; prozedurak arindu, arrazionalizatu eta sinplifikatzeko printzipioak bultzatu eta sustatzea; indarra duten xedapenek berariaz esleitzen dizkietenak eta departamentuko organo eskudunek deskontzentratzen edo eskuordetzen dizkietenak.

7. artikulua . Atalen eskudantziak.

Atalei dagokie, departamentuko goragoko organoen zuzendaritzapean eta foru dekretu honetan bakoitzari esleitutako esparru materialean, honako eginkizun hauek betetzea: beren esparru materialeko lanak gauzatzea eta goragoko nagusientzako txostenak eta proposamenak egitea; eta haien menpeko bulegoek eta unitateek egiten dituzten lanak koordinatu, zuzendu eta kontrolatzea. Halaber, departamentuko organo eskudunek agintzen dizkieten gainerako eginkizun guztiak beteko dituzte.

II. KAPITULUA. UNIBERTSITATEKO ZUZENDARITZA NAGUSIA

1. ATALA. ESKUMEN MATERIALEN ESPARRUA ETA EGITURA

8. artikulua . Unibertsitateko Zuzendaritza Nagusiaren eskumenen esparru materiala.

1. Unibertsitateko Zuzendaritza Nagusiak foru dekretu honetan aipatzen diren eskudantziak izanen ditu, ondoko arlo hauetan:

a) Unibertsitateen esparruko berezko jarduera estrategikoki planifikatu, koordinatu, kontrolatu eta gainbegiratzea.

b) Behar diren jarduketak programatu eta gauzatzea unibertsitateetan ematen den hezkuntza zerbitzua eraginkorra izan dadin.

c) Nafarroako Unibertsitateko Hezkuntza Sistema diseinatu eta garatzea bere eskumenen berezko esparruan.

d) Bere eskumenen esparruko dirulaguntzak eta laguntzak planifikatu, eman, kudeatu eta kontrolatzea.

e) Ikerketa eta berrikuntza (I+G+b) bultzatu, babestu eta sostengatzea unibertsitateen esparruan, Berrikuntzako Zuzendaritza Nagusiarekin elkarlanean.

f) Nafarroako Gobernuaren beste departamentuekin lankidetzan aritzea Nafarroako unibertsitateetako irakaskuntza planifikatu eta garatzeko.

g) Indarrean dauden xedapenek Unibertsitateko, Berrikuntzako eta Eraldaketa Digitaleko Departamentuari ematen dizkioten gainerako eginkizunak, zuzendaritza nagusi honen berezko esparruan.

9. artikulua . Unibertsitateko Zuzendaritza Nagusiaren egitura.

Unibertsitateko Zuzendaritza Nagusiak zerbitzu hau du bere egituran:

- Unibertsitateko Zerbitzua.

2. ATALA. UNIBERTSITATEKO ZERBITZUA

10. artikulua . Unibertsitateko Zerbitzuaren eginkizunak.

Unibertsitateko Zerbitzuak foru dekretu honetan ezarritako eginkizunak izanen ditu, honako arlo hauetan:

a) Unibertsitateko ikerketa zientifikoa Nafarroako gizartearen benetako beharrei aplikatzera bideratzen diren ekintzei laguntza ematea.

b) Unibertsitateen esparruko planak eta programak prestatu eta gauzatzea.

c) Nafarroako unibertsitateen goi mailako irakaskuntzako eta ikerketako proiektuak eta jarduketak kudeatu eta gauzatzea.

d) Agintzen zaizkion jarduketak bultzatu eta garatzea unibertsitateen esparruan ikerketa bultzatu, sustatu eta koordinatzeko.

e) Nafarroako komunitate zientifikoaren partaidetza sustatu eta babestea unibertsitateen esparruko prestakuntza eta ikerketa zientifiko eta teknikorako programetan, Estatukoak, Europar Batasunekoak zein nazioartekoak izan.

f) Foru Komunitateko unibertsitateen jarduera zientifikoak sustatu, jakinarazi eta haien jarraipena egitea, eta Estatuko eta nazioarteko beste erakunde batzuekin koordinatzea, Berrikuntzako Zuzendaritza Nagusiarekin elkarlanean.

g) Nafarroako unibertsitateetako zientzialari gazteen prestakuntza, kualifikazioa eta garapena sustatzea, eta Europar Batasunean beren gisakoak direnekin profesionalki parekatzea.

h) Unibertsitateko goi mailako irakaskuntzaren arloan Estatuko gainerako administrazio, erakunde publiko eta entitateekiko harremanetan parte hartzea, bai eta Nafarroako unibertsitateekiko harremanetan ere; ikerketa zientifiko eta teknikoko jarduerak erabakitzen, jarraitzen eta ebaluatzen dituzten organoetan parte hartuz.

i) Unibertsitateko goi mailako irakaskuntzaren Esparru Europarra garatzeko balorazio batzordeetan eta lantaldeetan parte hartzea, Estatukoak zein nazioartekoak izan.

j) Unibertsitateen esparruan zientzia sustatu eta bultzatzeko (I+G+b) batzorde edo taldeetan parte hartzea, nazioartekoak, Europar Batasunekoak, Estatukoak zein Nafarroakoak izan, hala eskatzen zaionean.

k) Azterlan eta txostenak egitea Nafarroako Foru Komunitateko goi mailako irakaskuntzaren plangintzari buruz eta unibertsitateen ekonomia eta finantza araubideari buruz, kudeatzen duen esparruan.

l) Unibertsitateak, unibertsitate zentroak eta unibertsitate ikasketa ofizialak sortu edo kentzeari buruz eskatzen zaizkion azterlanak egitea, kudeatzen duen esparruan.

m) Nafarroako Foru Komunitateak unibertsitateen arteko programetan parte har dezan sustatzea, Estatukoak, Europakoak zein nazioartekoak izan.

n) Kudeatzen duen esparruko laguntzen eta dirulaguntzen deialdiak prestatu, kudeatu eta kontrolatzea, eta unibertsitateekin lankidetzan aritzeko proposamenak egitea.

o) Indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.

11. artikulua . Unibertsitateko Zerbitzuaren egitura.

Unibertsitateko Zerbitzuak Unibertsitateko Atala dauka atxikita.

12. artikulua . Unibertsitateko Atalaren eginkizunak.

Unibertsitateko Atalak, kudeatzen duen esparruko gaietan, foru dekretu honetan esleitzen zaizkion eginkizunak izanen ditu, eta, berariaz, honako hauek:

a) Indarra duen hezkuntza sistemak araudiaren aldetik behar duen garapena aztertu eta proposatzea, unibertsitateko goi mailako irakaskuntzari dagokionez.

b) Nafarroako Foru Komunitatean unibertsitateko goi mailako irakaskuntzaren arloan egiten diren dirulaguntzen deialdiak, laguntzak eta hitzarmenak proposatu, kudeatu eta kontrolatzea.

c) Unibertsitateko goi mailako irakaskuntzaren gainean eskatzen zaizkion txosten teknikoak eta azterlanak egitea.

d) Nafarroako unibertsitate zentroak eta unibertsitate ikasketak baimentzeko espedienteak tramitatzea, eta unibertsitate zentroen erregistroa eguneratu eta haren jarraipena egitea.

e) Nafarroako unibertsitateen unibertsitate-hedapeneko jarduerak garatzeko lankidetzarako esparru-akordioaren eta berariazko hitzarmenen proposamena prestatzea, Nafarroako sustatzaile, antolatzaile eta laguntzaileen arteko koordinazioa gauzatzea, eta jarduera horien kudeaketa administratiboa eta finantzarioa egitea, Foru Komunitateko Administrazioari dagokionez.

f) Nafarroako unibertsitateei (berariaz Nafarroako Unibertsitate Publikoari) egin beharreko transferentzia ekonomikoak kudeatzea, eta horien jarraipena eta kontrol administratiboa egitea.

g) Unibertsitateko Informazio Sistema Integratuan laguntzea, Nafarroako Unibertsitate Publikoko datuak emanez eta baliozkotuz, eta unibertsitateetako adierazleak eta datu estatistikoak prestatzean parte hartuz, Unibertsitateko Zuzendaritza Nagusiaren eskumenen esparruan.

h) Departamentuak ikerketa arloan unibertsitateekin sinatzen dituen lankidetza hitzarmenak kudeatzea.

i) Hezkuntza Departamentuarekin lankidetzan aritzea ikastetxeetako irakasleek unibertsitateko ikasleen praktiketan tutore gisa izandako parte-hartzearen aitorpena kudeatzeko.

j) Helburuak egoki betetzeko agintzen zaizkion gainerako eginkizunak, kudeatzen duen esparruan.

III. KAPITULUA. BERRIKUNTZAKO ZUZENDARITZA NAGUSIA

1. ATALA. ESKUMEN MATERIALEN ESPARRUA ETA EGITURA

13. artikulua . Berrikuntzako Zuzendaritza Nagusiaren eskumenen esparru materiala.

1. Berrikuntzako Zuzendaritza Nagusiak foru dekretu honetan aurreikusitako eskudantziak beteko ditu, honako hauekin loturik:

a) Ikerketaren, garapen teknologikoaren eta berrikuntzaren sustapena.

b) Nafarroako Zientzia eta Teknologiaren Legeko atal guztiak erregelamenduz garatzeko ekintzak planifikatu eta gauzatzea.

c) Nafarroako Zientzia eta Teknologia Plana prestatu, koordinatu eta haren jarraipena egitea.

d) Zentro teknologikoak eta ikerketa zentroak koordinatzea, zentro horien bikaintasuna sustatzea eta baliabideak optimizatzea.

e) Administrazioaren ekintzen garapena, ezarpena, koordinazioa eta ebaluazioa sustatzea erosketa publiko berritzailearen prozesuetan eta jarduera parekagarrietan.

f) Dirulaguntzen deialdia egitea eta dirulaguntzak ematea bere eskumenen esparruarekin lotutako jardueretarako.

g) Zehapen prozedurak bere eskumenen esparru materialean; zuzendaritza nagusiko titularrari dagokio prozedura hastea eta ebaztea.

h) Europako proiektu eta foroetan parte hartzea bere eskumenen esparruan.

i) Indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.

14. artikulua . Berrikuntzako Zuzendaritza Nagusiaren egitura.

Berrikuntzako Zuzendaritza Nagusiak zerbitzu bat eta atal bat ditu bere egituran:

a) I+G+b Zerbitzua.

b) Erosketa Publiko Berritzailearen Atala.

2. ATALA. I+G+B ZERBITZUA

15. artikulua . artikulua. I+G+b Zerbitzuaren eginkizunak Nota de Vigencia.

I+G+b Zerbitzuak foru dekretu honetan ezarritako eginkizunak izanen ditu, honako arlo hauetan:

a) Nafarroako Zientzia eta Teknologiaren Legeko puntu guztiak erregelamenduz garatzea.

b) Nafarroako Zientzia eta Teknologia Plana eta Foru Komunitateko ikerketa eta berrikuntza arloan espezializazio adimendunaren estrategia (RIS3) prestatu, koordinatu eta haien jarraipena egitea.

c) Ikerketa, garapen teknologikoa eta berrikuntza sustatzeko neurriak bultzatzea.

d) Zentro teknologikoak eta ikerketa zentroak baimendu eta erregistratzea, eta haiei esleitutako baliabideak kudeatzea.

e) Sustapen neurriak bultzatzea zentro teknologikoek sortutako ezagutza enpresei transferitzeko, enpresek erabil dezaten.

f) Dirulaguntzen eta laguntzen deialdiak eta ebazpenak kudeatu eta tramitatzea bere eskumenen esparruarekin lotutako jardueretarako.

g) Ikerketa, garapen teknologikoa eta berrikuntza sustatzea unibertsitateetan, zentro teknologikoetan eta ikerketa zentroetan, eta enpresa jarduerari transferitzea, bere eskumenen esparruan, arlo hauetan: osasuna, asistentzia, medikuntzako ekipamendua, farmazia eta medikuntza pertsonalizatua.

h) Indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.

16. artikulua . I+G+b Zerbitzuaren egitura Nota de Vigencia.

I+G+b Zerbitzuak atal hauek ditu egituran:

a) Nafarroako Berrikuntzaren Behatokiaren Atala.

b) Automozioaren, Mekatronikaren, Sorkuntza Industrien eta Industria Digitalen arloetako I+G+b Atala.

c) Energiaren arloko I+G+b Atala.

d) Elikakatearen arloko I+G+b Atala.

17. artikulua . Nafarroako Berrikuntzaren Behatokiaren Atalaren eginkizunak Nota de Vigencia.

Honako eginkizun hauek ditu Nafarroako Berrikuntzaren Behatokiaren Atalak:

a) Nafarroako Berrikuntzaren Behatokia ezartzea eta kudeatzea.

b) Nafarroako Berrikuntzaren Behatokiko talde tekniko aholkularia koordinatzea.

c) Datuen bilketarako eta adierazleetarako metodologia bat egin eta argitaratzea, bat etorriz Zientzia eta Teknologiari buruzko ekainaren 27ko 15/2018 Foru Legean eta haren plangintza-tresnetan ezarritakoarekin, eta Nafarroako Estatistika Institutuarekin (NASTAT) lankidetzan.

d) Zientzia, Teknologia eta Berrikuntza Planaren adierazleen jarraipena eta ebaluazioa.

e) Nafarroako Berrikuntzaren Behatokiaren jardueren urteko memoria egitea eta argitaratzea.

f) Ikerketa, garapen eta berrikuntzako politikei buruzko informazio zientifikoa, teknologikoa eta ekonomikoa biltzea eta argitaratzea.

g) Ezagutza-sareak sortzea, ikerketa, garapena eta berrikuntza neurtu, aztertu eta sustatzearekin lotutako beste erakunde batzuekin lankidetzan, naziokoak zein nazioartekoak izan.

h) Indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.

18. artikulua . Automozioaren, Mekatronikaren, Sorkuntza Industrien eta Industria Digitalen arloetako I+G+b Atalaren eginkizunak.

Automozioaren, Mekatronikaren, Sorkuntza Industrien eta Industria Digitalen arloetako I+G+b Atalak eginkizun hauek izanen ditu:

a) Ikerketa, garapen teknologikoa eta berrikuntza sustatzea unibertsitateetan, zentro teknologikoetan eta ikerketa zentroetan, eta enpresa jarduerari transferitzea, bere eskumenen esparruan, arlo hauetan: automozioa, mekatronika, sorkuntza industriak, industria digitalak (bereziki 4.0 industria), robotika, adimen artifiziala, automatizazioa, errealitate areagotua, gauzen Internet (IoT), datuen kudeaketa (datu masiboak) eta aplikazio digitalak.

b) Indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.

19. artikulua . Energiaren arloko I+G+b Atalaren eginkizunak.

Energiaren arloko I+G+b Atalak honako eginkizun hauek izanen ditu:

a) Ikerketa, garapen teknologikoa eta berrikuntza sustatzea unibertsitateetan, zentro teknologikoetan eta ikerketa zentroetan, eta enpresa jarduerari transferitzea, bere eskumenen esparruan, arlo hauetan: energia berriztagarrien sorkuntza, biltegiratzea, garraioa eta erabilera, mugikortasun elektrikoa, ekonomia zirkularra, turismoa eta energiaren eta baliabideen zentzuzko erabilera jasangarria teknologia digitalen aplikazioaren bidez.

b) Indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.

20. artikulua . Elikakatearen arloko I+G+b Atalaren eginkizunak.

Elikakatearen arloko I+G+b Atalak honako eginkizun hauek izanen ditu:

a) Ikerketa, garapen teknologikoa eta berrikuntza sustatzea unibertsitateetan, zentro teknologikoetan eta ikerketa zentroetan, eta enpresa jarduerari transferitzea, bere eskumenen esparruan, arlo hauetan: nekazaritza, basogintza, ekipamendua, teknologia berriak, elikagaien industria, elikagaien segurtasuna eta nutrizio propietateak, eta bioekonomia.

b) Indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.

3. ATALA. EROSKETA PUBLIKO BERRITZAILEAREN ATALA

21. artikulua . Erosketa Publiko Berritzailearen Atalaren eginkizunak.

Erosketa Publiko Berritzailearen Atalak foru dekretu honetan ezarritako eginkizunak izanen ditu, honako arlo hauetan:

a) Zerbitzu publikoen hobekuntza sustatzea, ondasun edo zerbitzu berritzaileak sortuz eta enpresa berrikuntza garatzen lagunduz, eta berrikuntzaren nazioartekotzea bultzatzea, tokiko merkatu publikoa abiapuntuko edo erreferentziako bezero gisa erabiliz.

b) Departamentu eskudunekin elkarlanean eta Nafarroako Zientzia eta Teknologia Planarekin eta Nafarroako Foru Komunitateko RIS3 estrategiarekin koordinaturik, kontratazio publikoaren arau egokiak sustatzea, berrikuntza arloan lizitazio prozesuak garatzeko tarte aproposa uzteko, eta eskaera publikotik berrikuntza sustatzeko trabak kentzea: arrisku banaketaren antolaketa, jabetza intelektual eta industrialaren eskubideei lotutako alderdiak, edo jarduera berritzaile honen finantzaketa aukerak, besteak beste.

c) Neurriak sustatzea ikerketa zentroek eta zentro teknologikoek sortutako ezagutza enpresei transferitzeko, enpresek erabil dezaten, eta enpresek erosketa publiko berritzailearen prozesuetan eta jarduera parekagarrietan parte hartzeko.

d) Indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.

IV. KAPITULUA. ERALDAKETA DIGITALEKO ZUZENDARITZA NAGUSIA

1. ATALA. ESKUMEN MATERIALEN ESPARRUA ETA EGITURA

22. artikulua . Eraldaketa Digitaleko Zuzendaritza Nagusiaren eskumenen esparru materiala.

Eraldaketa Digitaleko Zuzendaritza Nagusiak foru dekretu honetan aurreikusitako eskudantziak beteko ditu, honako hauekin loturik:

a) Eraldaketa digitalari lotutako jarduketa administratibo guztien zeharkako plangintza koordinatu, sostengatu eta haren jarraipena egitea, indarrak batzeko eta Nafarroaren lehiakortasuna eta herritarren ongizatea ahalik eta gorenera eramateko.

b) Aldaketa transformatzaileak aztertzea administrazioan, enpresetan, hezkuntza zentroetan eta gainerako eragileetan, hemengo eta eskualde aitzinatuetako aurrerapenak alderatuz.

c) Lerro estrategikoak ezartzea Nafarroako Foru Komunitatearentzat berrikuntza publikoaren arloan eta informazioaren eta komunikazioen teknologien aplikazioan.

d) Foru Komunitateko Administrazioaren eta haren erakunde autonomoen berrikuntza.

e) Informazioaren teknologia berriak eta informatikako eta telekomunikazioetako azpiegiturak garatzea Foru Komunitateko Administrazioan eta haren erakunde autonomoetan.

f) Azpiegitura teknologikoak eta erabiltzaileei eman beharreko laguntza.

g) Informazio sistemetako segurtasuna.

h) Eraldaketa Digitaleko Zuzendaritza Nagusiaren barne proiektuak garatzea, departamentuei ematen dizkien zerbitzuen kalitatea eta eraginkortasuna hobetzeko.

i) Indarrean dauden xedapenek Unibertsitateko, Berrikuntzako eta Eraldaketa Digitaleko Departamentuari ematen dizkioten gainerako eginkizunak, zuzendaritza nagusi honen berezko esparruan.

23. artikulua . Eraldaketa Digitaleko Zuzendaritza Nagusiaren egitura.

1. Eraldaketa Digitaleko Zuzendaritza Nagusiaren egituran zerbitzu hauek daude:

a) Azpiegitura Teknologikoen eta Euskarri Zentroaren Zerbitzua.

b) Departamentuetako Informazio Sistemen Zerbitzua.

c) Osasun Teknologien Zerbitzua.

d) Administrazio Elektronikoko, Ogasuneko, Giza Baliabideetako eta SITNAko Zerbitzua.

e) Aurrerapen Digitalerako Zerbitzua.

2. Zuzendaritza Nagusiak Araubide Juridikoaren Atala eta Laguntza Administratiboaren eta Digitalizazioaren Atala izanen ditu, zuzenean bere mende.

2. ATALA. AZPIEGITURA TEKNOLOGIKOEN ETA EUSKARRI ZENTROAREN ZERBITZUA

24. artikulua . Azpiegitura Teknologikoen eta Euskarri Zentroaren Zerbitzuaren esparru materiala eta eginkizunak.

Azpiegitura Teknologikoen eta Euskarri Zentroaren Zerbitzuak foru dekretu honetan arlo hauen gainean adierazten diren eginkizunak izanen ditu:

a) Zuzendaritza nagusiari atxikiriko azpiegituren eta ingurune teknologikoen zerbitzu maila zehaztu, proposatu, gauzatu, koordinatu, mantendu, eboluzionatu eta kudeatzea, Foru Komunitateko Administrazioak eta haren erakunde autonomoek erabilitako informazio sistemei laguntza ematen diotenak. Orobat, une bakoitzean hautatzen diren azpiegitura eta inguruneei dagokienez, behar diren estandar eta arau teknikoak zehaztu eta haiek mantendu eta eboluzionatzea.

b) Arkitektura teknologikoaren arloan zehazturiko ildo estrategikoak abian jartzeko behar diren proiektu guztiak zehaztu, proposatu, garatu, kontrolatu eta begiratzea.

c) Foru Komunitateko Administrazioak eta haren erakunde autonomoek erabilitako informazio sistemen bidez zerbitzua emateko zerbitzu mailak zehazten, ezartzen, kontrolatzen eta begiratzen laguntzea.

d) Foru Komunitateko Administrazioko eta haren erakunde autonomoetako informazio sistemen erabiltzaileei lehen mailako laguntza ematea.

e) Foru Komunitateko Administrazioarentzako eta haren erakunde autonomoentzako azken erabiltzailearen ekipo informatikoak eta oinarrizko softwarea zehaztu, erosi eta mantentzea.

f) Ikus-entzunezko hedapen zerbitzua eta telekomunikazioetako azpiegitura, sare, sistema eta zerbitzuen zerbitzu maila zehaztu, proposatu, gauzatu, koordinatu, mantendu, eboluzionatu eta kudeatzea, eremu guztietan.

g) Foru Komunitateko Administrazioak eta haren erakunde autonomoek bereganatzen ahal dituzten sistemen arloko teknologia berriak ikertu eta garatzea.

h) Informazioaren segurtasunaren arloko politikak eta jarraibideak zehaztu, koordinatu eta hedatzea eta haien gaineko aholkularitza ematea.

i) Ekoizpen fasean dauden aplikazio eta azpiegituren erabilgarritasuna, errendimendua eta segurtasuna monitorizatzea.

j) Azpiegiturei dagokienez, haien ahalmena planifikatzea, gorabehera masibo larriak kudeatzea eta aldaketak edo garapenak ebaluatzea.

k) Segurtasun arloan eskumena duten Estatuko Administrazioko unitateekin harremanak izatea, Nafarroako Foru Komunitateko Administrazioko eta haren erakunde autonomoetako gainerako unitateekin koordinaturik.

l) Eraldaketa Digitaleko Zuzendaritza Nagusiko unitateekin koordinatzea, behar denean, bere eskumenen esparruan jasotako eskaerei dagokienez.

m) Indarrean dagoen legeriak esleitzen dion beste edozein edo Eraldaketa Digitaleko Zuzendaritza Nagusiak agintzen dizkionak.

25. artikulua . Azpiegitura Teknologikoen eta Euskarri Zentroaren Zerbitzuaren egitura.

Azpiegitura Teknologikoen eta Euskarri Zentroaren Zerbitzuak atal hauek ditu bere egituran:

a) Azpiegitura Teknologikoen Atala.

b) Telekomunikazio Sistemen Atala.

c) Ekoizpen Atala.

d) IKT Aktiboak Kudeatzeko Atala.

e) Errendimenduaren Kudeaketarako eta Segurtasunerako Atala.

f) Euskarri Zentroaren Atala.

26. artikulua . Azpiegitura Teknologikoen Atala.

Azpiegitura Teknologikoen Atalak foru dekretu honetan aipatzen diren eginkizunak beteko ditu arlo hauetan: azpiegitura teknologikoen zerbitzu maila zehaztu, ezarri, mantendu, eboluzionatu eta kudeatzea; azpiegitura arloan estandarrak eta ildo estrategikoak zehaztea; azken erabiltzailearen ekipo informatikoak eta oinarrizko softwarea homologatzea; eta datuen segurtasuna bermatzeko behar diren neurri teknikoak hartzea.

27. artikulua . Telekomunikazio Sistemen Atala.

Telekomunikazio Sistemen Atalak foru dekretu honetan aipatzen diren eginkizunak beteko ditu arlo hauetan: telekomunikazioen azpiegitura, sare, sistema eta zerbitzuen kudeaketa, numerazio telefonikorako planak eta IP numerazioa.

28. artikulua . Ekoizpen Atala.

Ekoizpen Atalak foru dekretu honetan aipatzen diren eginkizunak beteko ditu arlo hauetan: erabilitako informazio sistemei eta haien ereduari loturiko zerbitzu mailak zehaztea, eta Administrazioari egiten zaizkion zerbitzu batzuk ekoizten hastearen ondoriozko operazio lanak.

29. artikulua . IKT Aktiboak Kudeatzeko Atala.

IKT Aktiboak Kudeatzeko Atalak foru dekretu honetan aipatzen diren eginkizunak beteko ditu arlo hauetan: hardware eta software aktiboak kontrolatzea; lizentziek ezarritakoa betetzen dela kudeatzea; lanposturako eta zerbitzarien plataformarako ekipamendu informatikoaren erosketa kudeatzea; esparru-akordioak egin eta kudeatzea; espedienteen tramitazioa optimizatzea; eta behar diren lan administratiboak sinplifikatzea.

30. artikulua . Errendimenduaren Kudeaketarako eta Segurtasunerako Atala Nota de Vigencia.

Errendimenduaren Kudeaketarako eta Segurtasunerako Atalak dekretu honetan aipatzen diren eginkizunak beteko ditu arlo hauetan: segurtasuna, errendimenduaren kudeaketa, ahalmenaren monitorizazioa eta kudeaketa, informazio-sistemetan gertatzen diren gorabehera masibo edo larrien jarraipena eta haietan egindako aldaketen ebaluazioa.

31. artikulua . Euskarri Zentroaren Atala.

Foru dekretu honetan aurreikusitako eginkizunak beteko ditu Euskarri Zentroaren Atalak, hain zuzen ere honako hauekin lotutakoak: Nafarroako Foru Komunitateko Administrazioaren eta haren erakunde autonomoen informatika sistemen erabiltzaileentzako lehen mailako laguntza, CAU zerbitzuaren kudeaketa eta eboluzioa, parke informatikoaren hardwarearen mantentze-lanen kudeaketa eta eboluzioa, eta ematen diren laguntza zerbitzuen kalitate kontrola eta etengabeko hobekuntza.

3. ATALA. DEPARTAMENTUETAKO INFORMAZIO SISTEMEN ZERBITZUA

32. artikulua . Departamentuetako Informazio Sistemen Zerbitzuaren esparru materiala eta eginkizunak.

Foru dekretu honetan ezarritako eginkizunak izanen ditu, honako arlo hauetan, Departamentuetako Informazio Sistemen Zerbitzuak:

a) Foru Komunitateko Administrazioko eta haren erakunde autonomoetako informazio sistema eta aplikazio informatiko guztiak, bertikalak edo departamentukoak, planifikatu, proiektatu, analizatu, garatu, gauzatu, mantendu eta kudeatzea eta haien bideragarritasuna aztertzea, bere eskumenen esparruan.

b) Informazio sistema bertikalen edo departamentukoen arlo teknologikoan eboluzioaren ildo estrategikoak ezartzea, bere eskumenen esparruan.

c) Departamentuetako informazio sistemen unitateak koordinatzea.

d) Informazioaren eta aplikazioen estandar teknologikoak erabiltzeko hedapena, aholkularitza eta lankidetza, bere eskumenen esparruan.

e) Informazio sistema bertikalen edo departamentukoen estandarizazioa sustatzea, bere eskumenen esparruan.

f) Eraldaketa Digitaleko Zuzendaritza Nagusiko unitateekin koordinatzea, behar denean, bere eskumenen esparruan jasotako eskaerei dagokienez.

g) Indarrean dagoen legeriak esleitzen dion beste edozein edo Eraldaketa Digitaleko Zuzendaritza Nagusiak agintzen dizkionak.

33. artikulua . Departamentuetako Informazio Sistemen Zerbitzuaren egitura.

Departamentuetako Informazio Sistemen Zerbitzuak atal hauek ditu bere egituran:

a) Lehendakaritzako, Justizia eta Migrazio Politiketako eta Eskubide Sozialetako arloetako Proiektuen Atala.

b) Garapen Ekonomiko eta Enpresarialeko, Herritarrekiko Harremanetako, Kultura eta Kiroleko eta Enpleguko arloetako Proiektuen Atala.

c) Lurralde Antolamenduko, Lurralde Kohesioko, Landa Garapen eta Ingurumeneko eta Unibertsitate eta Berrikuntzako arloetako Proiektuen Atala.

34. artikulua . Lehendakaritzako, Justizia eta Migrazio Politiketako eta Eskubide Sozialetako arloetako Proiektuen Atala.

Lehendakaritzako, Justizia eta Migrazio Politiketako eta Eskubide Sozialetako arloetako Proiektuen Atalak foru dekretu honetan aipatzen diren eginkizunak beteko ditu arlo hauetan: informazio sistema eta aplikazio informatiko bertikaletarako proiektuak planifikatu eta kudeatzea eta haien bideragarritasuna aztertzea, bai eta haiek aztertzea eta garatzea eta haien ezarpena prestatzea ere. Halaber, departamentuetako informazio sistemen unitateekin koordinatuko da eta informazioaren eta aplikazioen estandar teknologikoak erabiltzeko eta informazio sistemak estandarizatzeko hedapena, aholkularitza eta lankidetza eginen ditu. Hori guztia, kasuan kasuko eskumenen esparruan; Eskubide Sozialetako arloan ez dira sartzen enpleguko gaiak.

35. artikulua . Garapen Ekonomiko eta Enpresarialeko, Herritarrekiko Harremanetako, Kultura eta Kiroleko eta Enpleguko arloetako Proiektuen Atala.

Garapen Ekonomiko eta Enpresarialeko, Herritarrekiko Harremanetako, Kultura eta Kiroleko eta Enpleguko arloetako Proiektuen Atalak foru dekretu honetan aipatzen diren eginkizunak beteko ditu arlo hauetan: informazio sistema eta aplikazio informatiko bertikaletarako proiektuak planifikatu eta kudeatzea eta haien bideragarritasuna aztertzea, bai eta haiek aztertzea eta garatzea eta haien ezarpena prestatzea ere. Halaber, departamentuetako informazio sistemen unitateekin koordinatuko da eta informazioaren eta aplikazioen estandar teknologikoak erabiltzeko eta informazio sistemak estandarizatzeko hedapena, aholkularitza eta lankidetza eginen ditu. Hori guztia, bere eskumenen esparruan.

36. artikulua . Lurralde Antolamenduko, Lurralde Kohesioko, Landa Garapen eta Ingurumeneko eta Unibertsitate eta Berrikuntzako arloetako Proiektuen Atala.

Lurralde Antolamenduko, Lurralde Kohesioko, Landa Garapen eta Ingurumeneko eta Unibertsitate eta Berrikuntzako arloetako Proiektuen Atalak foru dekretu honetan aipatzen diren eginkizunak beteko ditu arlo hauetan: informazio sistema eta aplikazio informatiko bertikaletarako proiektuak planifikatu eta kudeatzea eta haien bideragarritasuna aztertzea, bai eta haiek aztertzea eta garatzea eta haien ezarpena prestatzea ere. Halaber, departamentuetako informazio sistemen unitateekin koordinatuko da eta informazioaren eta aplikazioen estandar teknologikoak erabiltzeko eta informazio sistemak estandarizatzeko hedapena, aholkularitza eta lankidetza eginen ditu. Hori guztia, bere eskumenen esparruan.

4. ATALA. OSASUN TEKNOLOGIEN ZERBITZUA

37. artikulua . Osasun Teknologien Zerbitzuaren esparru materiala eta eginkizunak.

Foru dekretu honetan ezarritako eginkizunak izanen ditu, honako arlo hauetan, Osasun Teknologien Zerbitzuak:

a) Osasun Departamentuko eta haren erakunde autonomoetako informazio sistema eta aplikazio informatiko guztiak, bertikalak edo departamentukoak, planifikatu, proiektatu, analizatu, garatu, gauzatu, mantendu eta kudeatzea eta haien bideragarritasuna aztertzea.

b) Osasun Departamentuko eta haren erakunde autonomoetako informazio sistemen arlo teknologikoan eboluzioaren ildo estrategikoak ezartzea.

c) Departamentuetako informazio sistemen unitateekin koordinatzea.

d) Osasun Departamentuan eta haren erakunde autonomoetan informazioaren eta aplikazioen estandar teknologikoak erabiltzeko hedapena, aholkularitza eta lankidetza.

e) Osasun Departamentuko eta haren erakunde autonomoetako informazio sistemen estandarizazioa sustatzea.

f) Garapen, produktu, integrazio eta informazioko beharrezko arkitekturak zehaztu eta ezartzea, osasun arloko produktuak eta haien integrazioak modu eraginkor eta jasangarrian eraikitzen direla bermatzeko.

g) Osasun arloko produktuen eguneratze teknologikoa.

h) Eraldaketa Digitaleko Zuzendaritza Nagusiko unitateekin koordinatzea, behar denean, bere eskumenen esparruan jasotako eskaerei dagokienez.

i) Bulkada teknologikoa koordinatzea, Osasun Departamentuko eraldaketa digitala eta aldaketa kulturala gidatzeko.

j) Estrategia teknologikoa gidatzea Osasun Plan Estrategikoa sostengatzeko, berrikuntza eta ikerketa bultzatuz.

k) Indarrean dagoen legeriak esleitzen dion beste edozein edo Eraldaketa Digitaleko Zuzendaritza Nagusiak agintzen dizkionak.

38. artikulua . Osasun Teknologien Zerbitzuaren egitura Nota de Vigencia.

Osasun Teknologien Zerbitzuak honako atal hauek ditu bere egituran:

a) Osasun Antolamenduaren Atala.

b) Osasun Historia Elektronikoaren Atala.

c) Arreta Espezializatuko Informazio Sistema Administratiboen Atala.

d) Osasun Sistemetarako Software Arkitekturaren Atala.

e) Osasun Teknologien Atala.

f) Osasun Ekipamenduaren Atala.

39. artikulua . Osasun Antolamenduaren Atalaren esparru materiala eta eginkizunak.

Osasun Antolamenduaren Atalak foru dekretu honetan aipatzen diren eginkizunak beteko ditu arlo hauetan: informazio sistemetarako eta aplikazio informatikoetarako proiektuak, bertikalak edo departamentuarenak direnak, Nafarroako osasun sistema publikoaren osasun arloa antolatzea xede dutenak, planifikatu eta kudeatzea eta haien bideragarritasuna aztertzea, aztertu, garatu eta haien ezarpena prestatu ahal izateko.

Orobat, foru dekretu honetan aipatzen diren eginkizunak beteko ditu arlo hauetan: Osasun Zuzendaritza Nagusiko eta Nafarroako Osasun Publikoaren eta Lan Osasunaren Institutua erakunde autonomoko informazio sistemetarako eta aplikazio informatikoetarako proiektuak, bertikalak edo departamentuarenak, planifikatu eta kudeatzea eta haien bideragarritasuna aztertzea, analizatu, garatu eta haien ezarpena prestatu ahal izateko.

40. artikulua . Osasun Historia Elektronikoaren Atalaren esparru materiala eta eginkizunak.

Osasun Historia Elektronikoaren Atalak foru dekretu honetan aipatzen diren eginkizunak beteko ditu arlo hauetan: informazio sistemetarako eta aplikazio informatikoetarako proiektuak, bertikalak edo departamentuarenak direnak, Oinarrizko Osasun Laguntza jarduera administratibo eta klinikoa eta Arreta Espezializatuaren jarduera klinikoa sostengatzen dituztenak, planifikatu eta kudeatzea eta haien bideragarritasuna aztertzea, aztertu, garatu eta haien ezarpena prestatu ahal izateko.

41. artikulua . Arreta Espezializatuko Informazio Sistema Administratiboen Atalaren esparru materiala eta eginkizunak.

Arreta Espezializatuko Informazio Sistema Administratiboen Atalak foru dekretu honetan aipatzen diren eginkizunak beteko ditu arlo hauetan: informazio sistemetarako eta aplikazio informatikoetarako proiektuak, bertikalak edo departamentuarenak direnak, Arreta Espezializatuaren jarduera administratiboa sostengatzen dutenak, planifikatu eta kudeatzea eta haien bideragarritasuna aztertzea, aztertu, garatu eta haien ezarpena prestatu ahal izateko.

42. artikulua . Osasun Sistemetarako Software Arkitektura Atalaren esparru materiala eta eginkizunak.

Osasun Sistemetarako Software Arkitektura Atalak foru dekretu honetan aipatzen diren eginkizunak beteko ditu arlo hauetan: osasun arloko produktuak eta haien integrazioak modu homogeneoan eraikitzen direla bermatzeko beharrezkoak diren software arkitekturen zehaztapena eta ezarpena, haien eraikuntza eta mantentze-lana sinplifikatzea, eta elkarreragingarritasuna, berrerabilgarritasuna, segurtasuna, auditagarritasuna, errendimendua eta eskalagarritasuna bermatzea.

Besteak beste, produktuen arkitektura lanak eginen ditu, eta irizpideak ezarriko, zehazteko zer diren produktu eta gobernu tresna egokiak produktuen ekosistema ezagutu, sailkatu eta aztertzeko. Orobat, garapen eta integrazioko arkitektura lanak eginen ditu, software hedagarri eta mantengarria modu homogeneoan eraiki dadin.

Orobat, informazioko arkitektura lanak eginen ditu, kontzeptuak eta haien produktuetako erabilera identifikatuta; horrela, osasun arloko politiken emaitzak tinko ebaluatu ahal izateko ezagutza izanen da eta informazioa ustiatzen duten sistemak sortuko dira.

Osasun sistema guztiak teknologikoki eguneratuta izatea ere atal honen eginkizuna izanen da.

43. artikulua . Osasun Teknologien Atalaren esparru materiala eta eginkizunak.

Osasun Teknologien Atalak foru dekretu honetan aipatzen diren eginkizunak beteko ditu arlo honetan: bulkada teknologikoa, Osasun Departamentuko eraldaketa digitala eta aldaketa kulturala gidatzeko. Osasun Departamentuari laguntza emanen dio gaitasun digitalen aplikazioan osasun prozesu, produktu eta zerbitzuetan, efizientzia hobetzeko, osasun profesionalei eta pazienteei balio handiagoa emateko, eta zerbitzu aukera berriak sortzeko, punta-puntako teknologien bidez, hala nola adimen artifiziala, gauzen Internet, datuen analitika, mugikortasun teknologiak eta hodei konputazioa.

Estrategia teknologikoa gidatzea Osasun Plan Estrategikoa sostengatzeko, berrikuntza eta ikerketa bultzatuz.

43 bis artikulua. Osasun Ekipamenduaren Atalaren esparru materiala eta eginkizunak Nota de Vigencia.

Osasun Ekipamenduaren Atalak foru dekretu honetan aurreikusitako eginkizunak beteko ditu errendimendu-, segurtasun- eta jasangarritasun-bermeekin ezar daitezen irudi digitaleko sistemak, pazienteak monitorizatzeko ekipamendua eta pazienteei arreta egokia ematen zaiela bermatzeko departamentuko sistemekin integratzen diren gailu eta ekipamendu guztiak. Osasun Departamentuko hornidura unitateekin lankidetzan jardun beharko du, nolabaiteko softwarea duten ekipamenduek bete behar dituzten estandar teknologiko eta funtzionalak zehazteko, erosten direnean. Elektromedikuntzako mantentze-lanen unitateekin lankidetzan aritu beharko du, ekipamenduek sostengu eta jardun egokia dutela bermatzeko. Osasun Departamentuaren ekipamenduek eta gailuek sortzen dituzten datu, irudi eta bideo guztien segurtasuna zainduko du.

5. ATALA. ADMINISTRAZIO ELEKTRONIKOKO, OGASUNEKO, GIZA BALIABIDEETAKO ETA SITNAKO ZERBITZUA

44. artikulua . Administrazio Elektronikoko, Ogasuneko, Giza Baliabideetako eta SITNAko Zerbitzuaren esparru materiala eta eginkizunak.

Administrazio Elektronikoko, Ogasuneko, Giza Baliabideetako eta SITNAko Zerbitzuak foru dekretu honetan arlo hauen gainean adierazten diren eginkizunak izanen ditu:

a) Arau legalek zein teknikoek transformazio teknologiko-administratiboa gauzatzeko finkatutako tresnak gauzatzea, zuzendaritza, kudeaketa eta tramitazio administratiboak pertsonalizatuagoak eta modernoagoak izan daitezen.

b) Foru Komunitateko Administrazioko eta haren erakunde publikoetako informazio sistema eta aplikazio informatiko horizontal guztiak planifikatu, proiektatu, analizatu, garatu, gauzatu, mantendu eta kudeatzea eta haien bideragarritasuna aztertzea. Batzuk aipatzearren, honako hauek: kudeaketa ekonomiko eta finantzarioko sistemak; giza baliabideen kudeaketako sistemak; kontratazio elektronikoko sistemak; lurralde informazioko sistemak, SITNA barne; prozedura eta zerbitzu elektronikoen kudeaketako sistemak; sinadura sistemak; jakinarazpen elektronikoko sistemak; espedienteen digitalizazio, elkarreragingarritasun, kudeaketa eta tramitazioko sistemak; komunikazio elektroniko seguruko sistemak; sarrera erregistroa; sarbideen kontrola; artxibo digitala; ordainketa zerbitzua; eta datuak egiaztatzeko eta kontsultatzeko zerbitzuak.

c) Ogasuneko eta Finantza Politikako arloetako informazio sistema eta aplikazio informatikoak, bertikalak edo departamentukoak, planifikatu, proiektatu, analizatu, garatu, gauzatu, mantendu eta kudeatzea eta haien bideragarritasuna aztertzea.

d) Barne koordinazioa Eraldaketa Digitaleko Zuzendaritza Nagusiko unitateekin, behar denean, bere eskumenen esparruan jasotako eskaerei dagokienez.

e) Informazio sistemen arlo teknologikoan eboluzioaren ildo estrategikoak ezartzea, bere eskumenen esparruan.

f) Informazioaren eta aplikazioen estandar teknologikoak erabiltzeko hedapena, aholkularitza eta lankidetza, bere eskumenen esparruan.

g) Indarra duten legeek esleitzen dioten beste edozein edo bere zuzendaritza nagusiak bere gain uzten dituenak.

45. artikulua . Administrazio Elektronikoko, Ogasuneko, Giza Baliabideetako eta SITNAko Zerbitzuaren egitura Nota de Vigencia.

Administrazio Elektronikoko, Ogasuneko, Giza Baliabideetako eta SITNAko Zerbitzuaren egituran atal hauek daude:

a) Administrazio Elektronikoko Sistemak Mantentzeko eta Eboluzionatzeko Atala.

b) Administrazio Elektronikoko Sistemak Kudeatzeko eta Sostengatzeko Atala.

c) Ekonomia, Koordinazio eta Teknologia arloko Informazio Sistema Zentralen Atala.

d) Giza Baliabideen arloko Informazio Sistema Zentralen Atala.

e) Lurraldeko Informazio Sistemen Atala.

f) Ogasuneko eta Finantza Politikako arloetako Informazio Sistemen Proiektuen Atala.

46. artikulua . Administrazio Elektronikoko Sistemak Mantentzeko eta Eboluzionatzeko Atalaren esparru materiala eta funtzionala Nota de Vigencia.

Administrazio Elektronikoko Sistemak Mantentzeko eta Eboluzionatzeko Atalak eginkizun hauek izanen ditu:

a) Arkitektura teknologikoa zehaztea Nafarroako Foru Komunitateko Administrazioko administrazio elektronikoko (Adele) informazio sistema korporatiboetarako, kontuan izanik estandar teknologikoak eta elkarreragingarritasuneko arau teknikoen betekizunak.

b) Informazio sistema korporatiboak aztertu, garatu, mantendu, eboluzionatu eta ezartzea, baldin eta tramitazio elektronikoa Administrazioan ohiko lan-modua bilakatzeko behar diren eginkizunak badituzte. Batzuk aipatzearren, jarduketa-arlo hauetako soluzioak daude:

– Interesdunen identifikazio sistema orokorrak.

– Sinadura elektronikoko plataforma.

– Egiaztapen kode segurua (EKS), dokumentu elektronikoak autentifikatzeko.

– Prozeduren katalogoa (Sian@) eta bere lotura Estatuaren Administrazio Informazioko Sistemarekin (AIS).

– Unitate organikoen direktorioa (DirNA) eta bere lotura Estatuaren DIR3 sistemarekin.

– Nafarroako Foru Komunitateko espediente elektronikoen kudeatzaile korporatiboa (Extr@).

– Jakinarazpen elektronikoko sistema. Dokumentuak digitalizatzeko sistema, EEN formatuan, elkarreragingarritasun tekniken arabera. Administrazio publikoek datuak trukatzeko plataforma. Dokumentuen gordailuak informazio sistemetarako tramitazio fasean.

c) Gainerako administrazio-unitateekin lankidetzan aritzea, Adeleren informazio sistema korporatiboak beste soluzio informatiko batzuekin integratzeko, elkarreragingarritasunaren esparruan.

d) Estatuko Administrazio Orokorrarekin lankidetzan aritzea, Nafarroako Foru Komunitateko Administrazioan administrazio elektroniko korporatiboko (Adele) soluzioak Administrazio Elektronikoaren Batzorde Sektorialak ezarritako baldintzetara egokitzeko.

e) Indarra duten legeek esleitzen dioten beste edozein edo bere zuzendaritza nagusiak bere gain uzten dituenak.

46 bis artikulua. Administrazio Elektronikoko Sistemak Kudeatzeko eta Sostengatzeko Atalaren esparru materiala eta funtzionala Nota de Vigencia.

a) Administrazio-, konfigurazio- eta sostengu-lanak egitea Nafarroako Foru Komunitateko Administrazioko administrazio elektronikoko informazio sistema korporatiboetan (Adele), baldin horien eskumena ez badagokio Nafarroako Gobernuko ezein unitateri. Batzuk aipatzearren, jarduketa-arlo hauek sartzen dira:

– Interesdunen identifikazio sistema orokorrak.

– Sinadura elektronikoko plataforma.

– Egiaztapen kode segurua (EKS), dokumentu elektronikoak autentifikatzeko.

– Jakinarazpen elektronikoko sistema.

– Prozeduren katalogoa (Sian@) eta bere lotura Estatuaren Administrazio Informazioko Sistemarekin (AIS).

– Nafarroako Foru Komunitateko espediente elektronikoen kudeatzaile korporatiboa (Extr@).

– Dokumentuak digitalizatzeko sistema, EEN formatuan, elkarreragingarritasun tekniken arabera.

– Unitate organikoen direktorioa (DirNA) eta bere lotura Estatuaren DIR3 sistemarekin.

– Administrazio publikoek datuak trukatzeko plataforma.

– Dokumentuen gordailuak informazio sistemetarako tramitazio fasean.

b) Departamentuko unitate eskudunarekin lankidetzan aritzea jarduketa-politikak eta gidalerroak definitzeko eta ezartzeko arauak eta prozedurak planifikatzen, aztertzen, lantzen eta proposatzen, eta administrazio elektronikoaren eremuan beharrezkoa den esparru juridikoa ematea Nafarroako Foru Komunitateko Administrazioarentzat eta haren erakunde autonomoentzat, administrazio elektronikoko soluzio korporatiboei dagokienez, baldin eta haien eskumena ez badagokio Nafarroako Gobernuko ezein unitateri.

c) Administrazio elektronikoko soluzio korporatiboekin lotutako hedapen-, orientazio- eta prestakuntza-jarduerak planifikatzea, eta horien erabilera sustatzea.

d) Indarra duten legeek esleitzen dioten beste edozein edo bere zuzendaritza nagusiak bere gain uzten dituenak.

47. artikulua . Ekonomia, Koordinazio eta Teknologia arloko Informazio Sistema Zentralen Atalaren esparru materiala eta funtzionala Nota de Vigencia.

Ekonomia, Koordinazio eta Teknologia arloko Informazio Sistema Zentralen Atalak foru dekretu honetan aurreikusitako eginkizunak beteko ditu kudeaketa ekonomiko-finantzarioko sistemari eta kontratazio elektronikoko sistemari dagokienez, eta, oro har, eremu horretako informazio sistema horizontal guztiei dagokienez, baita horiek aztertu, garatu eta ezarpenerako prestatzeko eginkizunak ere. Halaber, koordinazio lanak eginen ditu, beharrezkoak direnak sustapen, hedapen, aholkularitza eta lankidetzarako informazioaren eta aplikazioen estandar teknologikoen erabileran. Informazio sistemak estandarizatzeko lanak ere eginen ditu. Hori guztia, bere eskumenen esparruan.

Halaber, koordinazio orokor eta teknologikoko eginkizunak beteko ditu SAP arloan.

47 bis artikulua. Giza Baliabideen arloko Informazio Sistema Zentralen Atalaren esparru materiala eta funtzionala Nota de Vigencia.

Giza Baliabideen arloko Informazio Sistema Zentralen Atalak foru dekretu honetan aurreikusitako eginkizunak beteko ditu giza baliabideen kudeaketari dagokionez, eta, oro har, eremu horretako informazio sistema horizontal guztiei dagokienez, baita horiek aztertu, garatu eta ezarpenerako prestatzeko eginkizunak ere. Halaber, informazioaren eta aplikazioen estandar teknologikoak erabiltzeko sustapena, hedapena, aholkularitza eta lankidetza egiteko eta informazio sistemak estandarizatzeko behar diren koordinazio lanak eginen ditu. Hori guztia, bere eskumenen esparruan

48. artikulua . Lurraldeko Informazio Sistemen Atalaren esparru materiala eta eginkizunak.

Lurraldeko Informazio Sistemen Atalak foru dekretu honetan aipatzen diren eginkizunak beteko ditu arlo hauetan: Foru Komunitateko Administrazioak eta haren erakunde autonomoek lurraldeari buruz dituzten informazio sistemak eta, oro har, esparru horretako informazio sistema horizontal guztiak, bai eta sistemen azterketa eta garapena eta haiek ezartzeko prestaketa lanak ere. Halaber, informazioaren eta aplikazioen estandar teknologikoak erabiltzeko sustapena, hedapena, aholkularitza eta lankidetza egiteko eta informazio sistemak estandarizatzeko behar diren koordinazio lanak eginen ditu. Hori guztia, bere eskumenen esparruan.

Orobat, Lurraldeko Informazio Sistemen Atalak berariazko eginkizun hauek izanen ditu:

a) Nafarroako Lurraldeari buruzko Informazio Sistemaren (SITNA) Koordinaziorako Batzordearen idazkaritza.

b) Nafarroako Lurraldeko Informazio Sistemari eta horrekin zerikusia duten azpisistemei buruzko informazio eta hedapen programak eta ekintzak garatzea, horrela komunikazioa eta sistema horien eskualde, nazio eta nazioarte mailako ezagutza errazteko.

c) Lurraldeari buruzko informazio sistemekin lotutako proiektuak garatu eta haien jarraipena egitea, Espainian zein Europar Batasunean beste instituzio eta erakunde batzuek bultzatutako programetan.

d) Lankidetza eta jarduketa lerroak garatu eta haien jarraipena egitea, lurraldeari buruzko informazio sistemekin lotutako eragile publiko eta pribatuen aurrean, Foru Komunitatean hori garatzeko beharrezko baldintzak lortzeko.

49. artikulua . Ogasuneko eta Finantza Politikako arloetako Informazio Sistemen Proiektuen Atalaren esparru material eta funtzionala.

Ogasuneko eta Finantza Politikako arloetako Informazio Sistemen Proiektuen Atalak foru dekretu honetan aipatzen diren eginkizunak beteko ditu arlo hauetan: informazio sistema eta aplikazio informatiko bertikaletarako proiektuak planifikatu eta kudeatzea eta haien bideragarritasuna aztertzea, bai eta haiek aztertzea eta garatzea eta haien ezarpena prestatzea ere. Halaber, departamentuetako informazio sistemen unitateekin koordinatuko da eta informazioaren eta aplikazioen estandar teknologikoak erabiltzeko eta informazio sistemak estandarizatzeko hedapena, aholkularitza eta lankidetza eginen ditu. Hori dena, Ogasuneko eta Finantza Politikako arloetan.

6. ATALA. AURRERAPEN DIGITALERAKO ZERBITZUA

50. artikulua . Aurrerapen Digitalerako Zerbitzuaren esparru materiala eta eginkizunak Nota de Vigencia.

Aurrerapen Digitalerako Zerbitzuak foru dekretu honetan aipatzen diren eginkizunak beteko ditu arlo hauetan:

a) Eraldaketa digitala sustatzea Administrazioan eta gizartean, herritarrak, erakunde laguntzaileak, enpresak eta langile publikoak haien diseinuan, kudeaketan eta ebaluazioan engaiatuz.

b) Eten digitala murriztea Nafarroako Foru Komunitatean, edonolakoa delarik ere: geografikoa, kulturala, soziala, ekonomikoa, generokoa, etab.

c) Eraldaketa digitala zeharka garatzea Nafarroako Foru Komunitateko Administrazioko departamentu guztietan eta haren erakunde autonomoetan.

d) Nafarroako Foru Komunitateko Administrazioaren zerbitzu publiko eta prozedura administratiboen eraldaketa digitalerako estrategia lerrokatzea Europar Batasuneko eta Estatuko gomendio eta arauekin.

e) Zerbitzu publikoen eraldaketa digitalerako departamentu arteko planak prestatu, koordinatu eta bultzatzea.

f) Nafarroako Foru Komunitateko Administrazioaren eta haren erakunde autonomoen datu-base guztiak normalizatu eta biltzea, negozio adimenaren eta datu masiboen bidez ustiatuz.

g) Foru Komunitateko Administrazioaren eta haren erakunde publikoen analitika eta analitika aurreratuko sistema horizontalen plangintza, bideragarritasuna, proiektua, analisia, garapena, gauzapena, mantentzea eta kudeaketa, bai eta erakunde bertikalena edo departamentu izaerakoena ere, informazio-sistemen arloan eskumena duten departamentuetako zerbitzuekin lankidetzan.

h) Planifikazioa, bideragarritasunaren azterketa, proiektua, analisia eta sistemen kudeaketa navarra.es-en edukiak argitaratzeko, webguneak eta atariak ezartzeko eta esperientzia digitaleko plataformetan oinarritutako soluzioak emateko, baita Foru Komunitateko Administrazioaren eta haren erakunde publikoen ezagutza kudeatzeko sistemetarako ere.

i) Nafarroako Datuaren Bulegoko erabaki-organoetan parte hartzea. Plangintza, bideragarritasunaren azterketa, proiektua, analisia, ezarpena eta proiektuen kudeaketa eremu honetan.

j) Indarra duten legeek esleitzen dioten beste edozein edo Telekomunikazioetako eta Digitalizazioko Zuzendaritza Nagusiak eskatzen dizkionak.

51. artikulua . Aurrerapen Digitalerako Zerbitzuaren egitura Nota de Vigencia.

Aurrerapen Digitalerako Zerbitzuak atal hauek ditu bere egituran:

a) Konfiantzaren eta Eten Digitalaren Atala.

b) Datuen Ingeniaritzaren Atala.

c) Atariak eta Ezagutza Kudeatzeko Atala.

d) Datuaren Bulegoaren Atala.

52. artikulua. Konfiantzaren eta Eten Digitalaren Atalaren eremu material eta eginkizunak.

Konfiantzaren eta Eten Digitalaren Atalak eginkizun hauek izanen ditu:

a) Nafarroako Foru Komunitateko Administrazioaren eta haren erakunde autonomoen estrategia digitala prestatzea.

b) Nafarroako Foru Komunitateko Administrazioaren Eraldaketa Digitalerako Plan Orokorra prestatzea.

c) Eten Digitalaren aurkako Plana prestatu eta gauzatzea.

d) Lerro estrategiko berriak aztertu, bultzatu eta planifikatzea Nafarroako Foru Komunitatearentzat berrikuntza publikoaren eta informazioaren eta komunikazioen teknologien esparruan.

e) Europako eta Estatuko politika publikoak, araudia eta proiektuak Nafarroan garatzea, eraldaketa digitalaren, berrikuntza publikoaren, aurrerapen teknologikoaren eta egokitzapenaren eremuan, haien programetan parte hartuz eta haiek osatuz.

f) Azterlanak eta txostenak prestatzea Nafarroako Foru Komunitateko Administrazioko departamentu guztien eta haren erakunde autonomoen eraldaketa digitalerako.

g) Eraldaketa digitalean engaiatzeko premia jakinaraztea Nafarroako Foru Komunitateko Administrazioko departamentu guztiei eta haren erakunde autonomoei.

h) Toki entitateei, gizarte ekimenei eta Nafarroako Gobernuaren entitate laguntzaileei aholku ematea berrikuntza publikoaren eta eraldaketa digitalaren arloetan.

i) Nafarroako eten digitalaren arlo guztiak aztertzeko eta haien jarraipena egiteko lantaldea eratu, gidatu eta dinamizatzea.

j) Sozietate publikoei laguntzea haien jarduketa antolatzeko Administrazio Publikoari eragiten dion orotan, eraldaketa digitalaren esparruan.

k) Zuzendaritza nagusiak esleitzen dizkion gainerakoak.

53. artikulua . Datuen Ingeniaritzaren Atalaren eremu materiala eta eginkizunak.

Datuen Ingeniaritzaren Atalak eginkizun hauek izanen ditu:

a) Nafarroako Agenda Digitala Europako Agenda Digitalera egokitzea eta harekin lerrokatzea.

b) Datu-baseetatik negozio adimena ateratzeko erraztasunak ematea, haiek ustiatu eta analizatzeko, teknika berrien bidez, hala nola makinen ikaskuntza eta konputazio banatua.

c) Nafarroako Datu Masiboen Proiektua garatzea, Espainian eta nazioartean proiektatu eta esku jartzeko.

d) Nafarroako Foru Komunitateko Administrazioaren eta haren erakunde autonomoen datu-baseak detektatu eta erroldatzea.

e) Nafarroako Administrazio Publikoen Eraldaketa Digitalaren Behatokia sortzea.

f) Nafarroako eraldaketa digitalaren arlo guztiak aztertzeko eta haien jarraipena egiteko lantaldea eratu, gidatu eta dinamizatzea.

g) Eraldaketa digitalerako Europako proiektuetan parte hartzea.

h) Zuzendaritza nagusiak esleitzen dizkion gainerakoak.

54. artikulua . Atariak eta Ezagutza Kudeatzeko Atalaren esparru materiala eta eginkizunak.

Atariak eta Ezagutza Kudeatzeko Atalak foru dekretu honetan aipatzen diren eginkizunak izanen ditu, honako arlo hauetan:

a) Ezagutzaren kudeaketa eta Internet bidezko edukiak kudeatu, administratu eta argitaratzeko sistemak eta, oro har, esparru horretako informazio sistema guztiak, bai eta sistemen azterketa eta garapena eta haiek ezartzeko prestaketa lanak ere.

b) Informazioaren eta aplikazioen estandar teknologikoak erabiltzeko sustapena, hedapena, aholkularitza eta lankidetza egiteko eta informazio sistemak estandarizatzeko behar diren koordinazio lanak egitea, eta zuzendaritza nagusiak esleitzen dizkion gainerakoak. Hori guztia, bere eskumenen esparruan.

c) Departamentuaren jardueraren plangintza eta ebaluazioa koordinatzea arlo hauetan: irisgarritasun unibertsala, eta departamentuko webguneen eta gailu mugikorretarako aplikazioen irisgarritasun ordezkatuaren ardura duen unitatearen eginkizunak.

54 bis artikulua. Datuaren Bulegoaren Atalaren eremu materiala eta eginkizunak Nota de Vigencia.

Datuaren Bulegoaren Atalak foru dekretu honetan aipatzen diren eginkizunak beteko ditu arlo hauetan:

a) Datuaren Gobernantza Koordinatzeko Batzordeko Idazkaritza Nota de Vigencia.

b) Nafarroako Datuaren Bulegoa garatzeko beharrezkoak diren jarduerak planifikatu eta programatzea eta, bereziki, urteko jarduketa planak eta plan estrategikoak prestatu, onetsi eta ebaluatzea.

c) Estrategien definizioa koordinatzea arlo hauetan: datuen kudeaketaren eta datuen gobernantza, Espainiako Gaia-X-arekiko integrazioa eta datuak partekatzeko datu-espazioak.

d) Datuaren gobernuaren politika, prozesu eta estandarren definizioa eta horien hedapena koordinatzea. Datuaren kalitatea kudeatzea, datuen trukea, argitalpena, berrerabilpena eta banaketa kudeatzea. Datuetarako sarbidea kudeatzea, datuak anonimo bihurtzeko prozesuak eta baimenak kudeatzea. Datuaren ziurtapena kudeatzea.

e) Metadatuaren kudeaketa eta haren gobernua koordinatzea. Nafarroako Gobernuaren datu eta adierazleen hiztegia sortzea. Zeharkako datuen edo datu nagusien erakundeak definitzea eta kudeatzea.

f) Datuen eta datu-iturrien erregistro bat diseinatzea eta mantentzea.

g) Datuak modelatzeko politikak eta estandarrak diseinatzea, eta ereduen eta metaereduen erregistro bat mantentzea.

h) Politikak eta estandarrak diseinatzea Nafarroako Gobernuan datuetan oinarritutako erabaki-sistemak sortzeko, eta haiekin ekarpenak egiteko zeharkako aginte-koadroei, hiztegiei, OpenDataNavarra erakundeari, estatistika-adierazleei (Nastat) eta beste datu-espazio batzuei.

i) Politiken definizioa eta gomendioak koordinatzea algoritmoen bizi-zikloari dagokionez.

j) Nafarroako datuen plataforma definitzea, eraikitzea eta erabiltzea. Estandar teknologikoak definitzea eta bat egitea OpenDataNavarra (Nafarroako datu publikoen gunea), Nastat (Nafarroako Estatistika Institutua) eta beste datu-espazio batzuetan eta batzuekin Nota de Vigencia.

k) Beharrezko erregularizazioa koordinatzea eta sustatzea datuen elkarreragingarritasunean, gobernantzan, kalitatean eta segurtasunean aurrera egiteko.

l) Nafarroako Foru Komunitatearen Administrazioko unitateen jarduerak bultzatu eta koordinatzea datuen erabakien arloan.

m) Lankidetza eta elkarrizketa bultzatzea gobernantzaren eta datu-espazioen garapenaren arloan funtsezkoak diren eragile guztiekin, Nafarroako toki-erakunde, unibertsitate eta enpresekin, Espainiako Datuaren Bulegoarekin, Europako erakundeekin eta egokitzat jotzen diren entitate guztiekin.

n) Indarra duten legeek esleitzen dioten beste edozein edo Telekomunikazioetako eta Digitalizazioko Zuzendaritza Nagusiak eskatzen dizkionak.

7. ATALA. ARAUBIDE JURIDIKOAREN ATALA

55. artikulua . Araubide Juridikoaren Atala.

Eraldaketa Digitaleko Zuzendaritza Nagusiko Araubide Juridikoaren Atalak foru dekretu honetan aipatzen diren eginkizunak beteko ditu ondoko arlo hauetan:

a) Proposamen arau-emaileak aztertu, prestatu eta haien aplikazioa eta garapena analizatzea, telekomunikazioei, informatikari eta garapen eta eraldaketa digitalari buruzko araudiari dagokionez.

b) Proposamen arau-emaileak aztertu, prestatu eta haien aplikazioa eta garapena analizatzea, Foru Komunitateko administrazio elektronikoari, berrikuntza publikorako ekintzei eta jarduera administratiboko informazio teknologien erabilerari buruzko araudiari dagokionez.

c) Esparru juridikoan eta administratiboan zuzendaritza nagusiko unitate guztiei laguntza teknikoa ematea, haien eginkizunak garatzeko, foru dekretu honen bidez beste organo batzuen esku uzten direnak galarazi gabe.

d) Indarrean dagoen legeriak esleitzen dion beste edozein edo Eraldaketa Digitaleko Zuzendaritza Nagusiak agintzen dizkionak.

8. ATALA. LAGUNTZA ADMINISTRATIBOAREN ETA DIGITALIZAZIOAREN ATALA

56. artikulua . Laguntza Administratiboaren eta Digitalizazioaren Atala.

Laguntza Administratiboaren eta Digitalizazioaren Atalak foru dekretu honetan aipatzen diren eginkizunak beteko ditu ondoko arlo hauetan:

a) Eraldaketa Digitaleko Zuzendaritza Nagusiko espediente guztiak tramitatu, artxibatu eta haien administrazio kontrolari eta aurrekontukoari lotutako jarduerak gauzatzea, foru dekretu honetan beste unitate organiko batzuei espres lotutako tramitazioa dutenak izan ezik.

b) Kontu-hartzailetza eta aurrekontu arloekin eta departamentuko Idazkaritza Tekniko Nagusiarekin lan egitea, bere espedienteen kudeaketari lotutako jarduerak bideratzeko.

c) Aurrekontuen eta plangintza ekonomikoaren arloan eskumena duen unitatearekin lan egitea, aurrekontua prestatu, kontrolatu eta hari jarraipena egiteko jarduerak bidera daitezen.

d) Funtzio publikoaren arloan eskumena duen unitatearekin eta departamentuko Idazkaritza Tekniko Nagusiarekin lan egitea, zuzendaritza nagusiari atxikitako langileen plantilla prestatu, kudeatu, kontrolatu eta hari jarraipena egiteko jarduerak bidera daitezen, baita lotutako datu estatistikoak ere.

e) Zuzendaritza nagusiko sarrera eta irteeren erregistroa kudeatzea.

f) Atalaren jarduerei buruzko txosten eta memoriak prestatzea.

g) Prozesu eta espediente administratiboen digitalizazioa bultzatzea eta kudeatzea (bereziki Extr@ espedienteen kudeatzailea), Eraldaketa Digitaleko Zuzendaritza Nagusiaren eremuan.

h) Indarrean dagoen legeriak esleitzen dion beste edozein edo Eraldaketa Digitaleko Zuzendaritza Nagusiak agintzen dizkionak.

V. KAPITULUA. IDAZKARITZA TEKNIKO NAGUSIA

57. artikulua . Idazkaritza Tekniko Nagusiaren egitura Nota de Vigencia.

Idazkaritza Tekniko Nagusiak atal hauek ditu:

a) Araubide Juridikoaren Atala.

b) Langileriaren eta Kudeaketa Administratiboaren Atala.

c) Araubide Ekonomikoaren Atala.

58. artikulua . Araubide Juridikoaren Atala Nota de Vigencia.

Araubide Juridikoaren Atalak foru dekretu honetan aipatzen diren eskumenak erabiliko ditu, honako hauekin loturik: idazkaritza tekniko nagusiak arautzen dituen Erregelamenduaren 5. artikuluan eta 6. artikuluko a), b) eta c) apartatuetan aipatzen diren eskudantzia juridiko, tekniko eta administratiboak, Nafarroako Foru Komunitatearen Administrazioko idazkaritza tekniko nagusiak arautzen dituen Erregelamenduaren 9. artikuluan aipatzen diren eginkizunak, departamentuaren jarduketa esparruan ondareko erantzukizunagatik sortzen diren espedienteen tramitazioa, eta indarreko xedapenek esleitzen dioten beste edozein, edo agintzen zaizkionak.

Eremu hauetako eginkizunak beteko ditu berariaz: administrazio elektronikoari lotutako proiektuak aztertu, baloratu eta haien gaineko txosten juridikoak egitea; Zientzia eta Teknologiaren Legetik etorritako legezko araudia garatzea; erosketa publiko berritzailea eta antzekoak sustatzea; unibertsitateko titulazio berriak ezarri eta abiaraztea; eta unibertsitateetako ikasketen deialdiei lotutako proiektuak.

Halaber, Nafarroako Foru Komunitateko Administrazioaren datu-babeseko eta informazioaren segurtasuneko politikan zehaztutako informazioaren segurtasun arduradunaren eginkizunak betetzea, betiere Unibertsitateko, Berrikuntzako eta Eraldaketa Digitaleko Departamentuaren eremuan, informazioaren segurtasunari buruzko indarreko araudia betetzen dela segurtatzeko eta zaintzeko, barnean dela datu pertsonalen babesa.

Genero-ikuspegiaren zeharkakotasuna aplikatzeari lotutako eginkizunak gauzatzea departamentuaren politikak planifikatu, kudeatu eta ebaluatzean, bat eginik Emakumeen eta gizonen arteko berdintasunari buruzko apirilaren 4ko 17/2019 Foru Legearekin.

59. artikulua . Langileriaren eta Kudeaketa Administratiboaren Atala Nota de Vigencia.

Langileriaren eta Kudeaketa Administratiboaren Atalak foru dekretu honetan aipatzen diren eginkizunak beteko ditu arlo hauetan: Nafarroako Foru Komunitateko Administrazioaren eta haren erakunde autonomoen organoetako langileria arloko eskudantziak zehazten dituen foru dekretuan idazkaritza tekniko nagusiei langileriaren arloan esleitzen zaizkienak.

Orobat, Nafarroako Foru Komunitateko Administrazioko idazkaritza tekniko nagusiak arautzen dituen Erregelamenduaren 6. artikuluko e), g) eta h) apartatuetan aipatzen diren eginkizun administratiboak beteko ditu eta, horiekin lotuak egonik, berak kudeatzen duen esparruari dagozkionak.

Halaber, ordezkari eginkizunak betetzea departamentuan, administrazio elektronikoaren edo aurrerapen digitalaren organo eskudunak bultzatutako lantaldeetan. Administrazio elektronikorako tresna berriak erabiltzearen arloan izandako aurrerapenen berri eta jarduteko jarraibideak eta prozedurak emanen dizkie departamentuko unitateetako arduradun eta erabiltzaileei, eta, era berean, lantalde horiei igorriko dizkie unitate horiek identifikatutako behar berriak, iradokizunak edo zalantzak.

Laneko arriskuen prebentzioa planifikatu eta gainbegiratzea departamentuan eta Sarrigurengo egoitzan.

60. artikulua . Araubide Ekonomikoaren Atala.

Araubide Ekonomikoaren Atalak foru dekretu honetan aipatzen diren eginkizunak burutuko ditu, honako hauekin loturik: Nafarroako Foru Komunitateko Administrazioko idazkaritza tekniko nagusiak arautzen dituen Erregelamenduaren 8. artikuluan aurrekontuari buruz aipatzen diren eskumenak eta, aurrekoei lotuak, kudeatzen duen esparruari badagozkio. Horretaz gain, indarreko xedapenek esleitzen dioten beste edozein, edo agintzen zaizkionak.

Lehen Xedapen Gehigarria. Eskumenak deskontzentratzeko baldintza orokorrak.

Indarra duten arauek organo bati ematen dizkioten eskumenak hierarkian menpeko diren beste organo batzuen artean deskontzentratzen ahal dira, Nafarroako Aldizkari Ofizialean argitaratuko den xedapen orokor baten bitartez, galarazi gabe eskumenak esleitzeko arauetan finkatutako baldintzak bete beharra.

Bigarren Xedapen Gehigarria. Eskumenen deskontzentrazioa.

Departamentuko zuzendaritza nagusietako titularren esku uzten dira, bere eskumenen esparru materialean, indarrean dagoen araudiak departamentuko titularrari arlo hauetan esleitzen dizkion eskumen administratiboen titulartasuna eta erabilera: dirulaguntzak, kontratazioa, mandatuak, ondare-erantzukizuna eta zehapen espedienteen gainekoa, barnean direla gastuak baimentzea eta xedatzea eta ordaintzeko betebeharrak aitortzea.

Hirugarren Xedapen Gehigarria. Unitateak kentzea.

Antolaketaren eta Berrikuntza Publikoaren Zerbitzua kentzen da, bai eta bere atalak ere (Antolaketa, Ebaluazio eta Kalitate Atala; Berrikuntza Publikoaren eta Estrategia Digitalaren Atala; eta Analisi Estrategikoaren eta Plangintzaren Atala). Zerbitzu horrek betetzen zituen eginkizunak beste unitate batzuen artean banatuko dira, foru dekretu honetan eta Lehendakaritzako, Berdintasuneko, Funtzio Publikoko eta Barneko Departamentua onesten duen foru dekretuan ezarritakoaren arabera.

Laugarren Xedapen Gehigarria. Unitateak sortzea.

Foru dekretu honetan unitate hauek sortzen dira:

a) Berrikuntzako Zuzendaritza Nagusian:

Erosketa Publiko Berritzailearen Atala sortzen da.

b) Eraldaketa Digitaleko Zuzendaritza Nagusian:

Aurrerapen Digitalerako Zerbitzua sortzen da.

c) Aurrerapen Digitalerako Zerbitzuan:

Datuen Ingeniaritzaren Atala eta Konfiantzaren eta Eten Digitalaren Atala sortzen dira.

d) Azpiegitura Teknologikoen eta Euskarri Zentroaren Zerbitzuan:

IKT Aktiboak Kudeatzeko Atala sortzen da.

e) Osasun Teknologien Zerbitzuan:

Osasun Teknologien Atala sortzen da.

f) Idazkaritza Tekniko Nagusian:

Araubide Juridikoaren Atala, Araubide Administratiboaren Atala eta Araubide Ekonomikoaren Atala sortzen dira.

Bosgarren Xedapen Gehigarria. Unitate berrien burutzetarako eskakizunak.

- Erosketa Publiko Berritzailearen Atala:

A edo B maila.

- Aurrerapen Digitalerako Zerbitzuko Datuen Ingeniaritzaren Atala:

A, B edo C maila. Ingeniariaren, ingeniari teknikoaren edo Lanbide Heziketako titulua izatea, Informatikaren edo Telekomunikazioen adarretakoak, edo hauetako baterako izendatu izana: sistema informatikoetako goi mailako teknikarien lanpostuak, sistema informatikoetako erdi mailako teknikarien lanpostuak, edo sistema informatikoetako teknikari-ofizialen lanpostuak.

- Aurrerapen Digitalerako Zerbitzuko Konfiantzaren eta Eten Digitalaren Atala:

A, B edo C maila. Ingeniariaren, ingeniari teknikoaren edo Lanbide Heziketako titulua izatea, Informatikaren edo Telekomunikazioen adarretakoak, edo hauetako baterako izendatu izana: sistema informatikoetako goi mailako teknikarien lanpostuak, sistema informatikoetako erdi mailako teknikarien lanpostuak, edo sistema informatikoetako teknikari-ofizialen lanpostuak.

- IKT Aktiboak Kudeatzeko Atala:

A, B edo C maila. Ingeniariaren, ingeniari teknikoaren edo Lanbide Heziketako titulua izatea, Informatikaren edo Telekomunikazioen adarretakoak, edo hauetako baterako izendatu izana: sistema informatikoetako goi mailako teknikarien lanpostuak, sistema informatikoetako erdi mailako teknikarien lanpostuak, edo sistema informatikoetako teknikari-ofizialen lanpostuak.

- Osasun Teknologien Atala:

A edo B maila. Sistema informatikoetako goi mailako edo erdi mailako teknikari lanpostu baten titularra izatea, edo gradu, edo ingeniaritza tekniko bat izatea Informatikan edo Telekomunikazioetan.

- Idazkaritza Tekniko Nagusiko Araubide Juridikoaren Atala:

A edo B maila, eta Zuzenbidean lizentzia edo antzeko titulu bat izatea.

- Idazkaritza Tekniko Nagusiko Araubide Administratiboaren Atala:

A, B, C edo D maila.

- Idazkaritza Tekniko Nagusiko Araubide Ekonomikoaren Atala:

A edo B maila, eta Ekonomia, EAZL, Enpresa Zientzia edo antzeko titulu bat izatea.

Seigarren Xedapen Gehigarria. Unitateak aldatzea zuzendaritza nagusi bereko zerbitzuen artean.

Informazio Sistema Korporatiboen Zerbitzuan zegoen Atariak eta Ezagutza Kudeatzeko Atala Eraldaketa Digitalerako Zerbitzuaren mende egonen da.

Zazpigarren Xedapen Gehigarria. Izena aldatzea lehendik dauden unitateei.

Unibertsitateen Zerbitzua hemendik aurrera Unibertsitateko Zerbitzua izanen da.

Unibertsitateen Atala hemendik aurrera Unibertsitateko Atala izanen da.

Informazio Sistema Korporatiboen Zerbitzua hemendik aurrera Administrazio Elektronikoko, Ogasuneko, Giza Baliabideetako eta SITNAko Zerbitzua izanen da. Esparru materiala eta eginkizunak mantenduko ditu, salbu Atariak eta Ezagutza Kudeatzeko Atalarenak, seigarren xedapen gehigarrian ezarritakoaren arabera.

Osasun Arloko Informazio Sistemen Zerbitzua hemendik aurrera Osasun Teknologien Zerbitzua izanen da. Esparru materiala eta eginkizunak mantenduko ditu.

Lehendakaritza, Funtzio Publiko, Barne eta Justiziako, Eskubide Sozialetako eta Kirol eta Gazteriako arloetako Proiektuen Atala hemendik aurrera Lehendakaritzako, Justizia eta Migrazio Politiketako eta Eskubide Sozialetako arloetako Proiektuen Atala izanen da. Esparru materiala eta eginkizunak mantenduko ditu.

Garapen Ekonomikoko, Enpleguko, Hezkuntzako, Kulturako eta Herritarrekiko eta Erakundeekiko Harremanetako arloetako Proiektuen Atala hemendik aurrera Garapen Ekonomiko eta Enpresarialeko, Herritarrekiko Harremanetako, Kultura eta Kiroleko eta Enpleguko arloetako Proiektuen Atala izanen da. Esparru materiala eta eginkizunak mantenduko ditu.

Landa Garapen, Ingurumen eta Toki Administrazioko, Herri Lanetako eta Etxebizitzako arloetako Proiektuen Atala hemendik aurrera Lurralde Antolamenduko, Lurralde Kohesioko, Landa Garapen eta Ingurumeneko eta Unibertsitate eta Berrikuntzako arloetako Proiektuen Atala izanen da. Esparru materiala eta eginkizunak mantenduko ditu.

Zortzigarren Xedapen Gehigarria. Izendapenak.

Honako izendapen hauek berresten dira, egin ziren baldintza berberetan:

- Unibertsitateen Zerbitzuko zuzendaria hemendik aurrera Unibertsitateko Zerbitzuko zuzendaria izanen da, eta eginkizunak mantenduko ditu.

- Unibertsitateen Ataleko burua hemendik aurrera Unibertsitateko Ataleko burua izanen da, eta eginkizunak mantenduko ditu.

- I+G+b Zerbitzuko zuzendariak berdin jarraituko du, zerbitzuaren izena eta eginkizunak aldatu ez baitira.

- I+G+b Zerbitzuko ataletako buruek berdin jarraituko dute, atalen izena eta eginkizunak aldatu ez baitira.

- Azpiegitura Teknologikoen eta Euskarri Zentroaren Zerbitzuko ataletako buruek berdin jarraituko dute, atalen izena eta eginkizunak aldatu ez baitira.

- Departamentuetako Informazio Sistemen Zerbitzuko ataletako buruek berdin jarraituko dute, atalen eginkizunak aldatu ez baitira (bai, ordea, haien izena, Nafarroako Gobernuko departamentuen egitura berrira egokitzeko).

- Osasun Teknologien Zerbitzuko ataletako buruek berdin jarraituko dute, atalen izena eta eginkizunak aldatu ez baitira.

- Administrazio Elektronikoko, Ogasuneko, Giza Baliabideetako eta SITNAko Zerbitzuko ataletako buruek berdin jarraituko dute, atalen izena eta eginkizunak aldatu ez baitira.

- Atariak eta Ezagutza Kudeatzeko Ataleko berdin jarraituko du, atala Informazio Sistema Korporatiboen Zerbitzutik Aurrerapen Digitalerako Zerbitzura pasatu arren, atalaren izena eta eginkizunak aldatu ez baitira.

- Eraldaketa Digitaleko Zuzendaritza Nagusiko Araubide Juridikoaren Ataleko buruak eta Laguntza Administratiboaren eta Digitalizazioaren Ataleko buruak berdin jarraituko dute, atalen izena eta eginkizunak aldatu ez baitira.

- Azpiegitura Teknologikoen eta Euskarri Zentroaren Zerbitzuko zuzendariak berdin jarraituko du, zerbitzuaren izena eta eginkizunak aldatu ez baitira.

- Departamentuetako Informazio Sistemen Zerbitzuko zuzendariak berdin jarraituko du, zerbitzuaren izena eta eginkizunak aldatu ez baitira.

- Osasun Arloko Informazio Sistemen Zerbitzuko zuzendaria hemendik aurrera Osasun Teknologien Zerbitzuko zuzendaria izanen da, eta eginkizunak mantenduko ditu.

- Informazio Sistema Korporatiboen Zerbitzuko zuzendaria hemendik aurrera Administrazio Elektronikoko, Ogasuneko, Giza Baliabideetako eta SITNAko Zerbitzuko zuzendaria izanen da, eta eginkizunak mantenduko ditu, salbu egitura organiko honen seigarren xedapen gehigarrian ezarritakoan.

- Antolaketaren eta Berrikuntza Publikoaren Zerbitzuko zuzendaria hemendik aurrera Aurrerapen Digitalerako Zerbitzuko zuzendaria izanen da, eta eginkizunak mantenduko ditu, salbu egitura organiko honen hirugarren xedapen gehigarriko lehen eta bigarren paragrafoetan ezarritakoan.

Bederatzigarren Xedapen Gehigarria. Administrazio unitateen iraupena.

Foru dekretu hau garatzeko neurriak hartu bitartean, atal mailatik beherako unitate organikoek berdin jarraituko dute eta oraingo izenari eta eginkizunei eutsiko diete. Behin-behinekoz, egitura berriko organoei atxikiko zaizkie, orain arte izan dituzten eginkizunekin bat.

Hamargarren Xedapen Gehigarria. Arauak indargabetzea.

Foru dekretu honen edukiaren kontra doazen maila bereko edota beheragoko xedapen guztiak indargabeturik geratuko dira, hurrengoak bereziki:

Lehendakaritzako, Funtzio Publikoko, Barneko eta Justiziako Departamentuaren egitura organikoa ezartzen duen irailaren 9ko 198/2015 Foru Dekretuaren VI. titulua.

Garapen Ekonomikorako Departamentuaren egitura organikoa ezartzen duen 1/2017 Foru Dekretuaren II. kapituluko 2. atala.

Hezkuntza Departamentuaren egitura organikoa ezartzen duen 5/2017 Foru Dekretuaren III. kapituluko 2. atala.

Hamaikagarren Xedapen Gehigarria. Zenbait unitate betetzeko baldintzak Nota de Vigencia.

Telekomunikazioetako eta Digitalizazioko Zuzendaritza Nagusiko ataletako burutza berriek zuzendaritza nagusi horretako gainerako atalburutzen dedikazio araubide bera izanen dute.

Azken Xedapenetako Lehena. Gaikuntzak.

Departamentuko titularrari gaikuntza ematen zaio behar diren xedapen guztiak eman ditzan foru dekretu honetan xedatutakoa garatu eta betetzeko, eta bidezkoak diren langileen eta baliabide ekonomiko eta materialen esleipena eta banaketa egiteko.

Azken Xedapenetako Bigarrena. Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2019ko urriaren 30ean.-Nafarroako Gobernuko lehendakaria, María Chivite Navascués.-Unibertsitateko, Berrikuntzako eta Eraldaketa Digitaleko kontseilaria, Juan Cruz Cigudosa García.

Iragarkiaren kodea: F1913767

Gobierno de Navarra

Contacte con nosotros | Accesibilidad | Aviso legal | Mapa web