LEXNAVARRA
91/2019 FORU DEKRETUA, ABUZTUAREN 14KOA, HEZKUNTZA DEPARTAMENTUAREN OINARRIZKO EGITURA EZARTZEN DUENA.
BON N.º 159 - 15/08/2019; corr. err., BON 29/08/2019
- Atariko
- Artikulu bakarra. Hezkuntza Departamentuaren oinarrizko egitura.
- Xedapen indargabetzaile bakarra.Arauak indargabetzea.
- Azken xedapenetako lehena.Gaikuntzak.
- Azken xedapenetako bigarrena. Indarra hartzea.
Nafarroako Foru Komunitateko Lehendakariaren abuztuaren 6ko 22/2019 Foru Dekretuaren bidez, Nafarroako Foru Komunitateko Administrazioaren departamentuen egitura eta departamentu bakoitzaren eskumen-esparrua finkatu ziren. Hortaz, bidezkoa da departamentu bakoitzaren oinarrizko egitura organikoa ezartzea, gero gehiago garatu badaiteke ere.
Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 30.2 artikuluak ezartzen du departamentu bakoitzean zuzendaritza nagusi bat edo gehiago eta idazkaritza tekniko nagusi bat izanen direla, kasuan kasuko departamentuko titularraren menpe daudenak zuzenean. Era berean, artikulu horretako 3. apartatuak adierazten du, aurreko apartatuan xedatutakoa gorabehera, zuzen-zuzenean departamentuaren titularraren menpe beste organo batzuk ere egoten ahalko direla departamentu bakoitzean.
Bestalde, martxoaren 11ko 11/2019 Foru Legearen 31.2 artikuluak adierazten du zuzendaritza nagusiak sortu, aldatu, bateratu edo kentzea, bai eta bakoitzak eskumenean izanen dituen arloak zehaztea ere, Nafarroako Gobernuari dagokiola. Foru dekretu bidez eginen du, departamentu bakoitzaren titularrak proposaturik.
Horrenbestez, Hezkuntzako kontseilariak proposaturik, eta Nafarroako Gobernuak 2019ko abuztuaren 14an egindako bilkuran hartutako erabakiarekin bat,
DEKRETATZEN DUT:
Artikulu bakarra.- Hezkuntza Departamentuaren oinarrizko egitura.
1. Hezkuntza Departamentuak, bere titularraren goi-zuzendaritzapean, honako organo hauek ditu bere oinarrizko egituran:
a) Hezkuntza Zuzendaritza Nagusia.
b) Lanbide Heziketaren Zuzendaritza Nagusia.
c) Hezkuntza Baliabideen Zuzendaritza Nagusia.
d) Idazkaritza Tekniko Nagusia.
2. Hezkuntza Zuzendaritza Nagusiak bere gain hartzen ditu Hezkuntza Zuzendaritza Nagusiaren eskumenak, salbu eta lanbide heziketarekin lotutakoak. Bere gain hartzen ditu, orobat, Unibertsitateen eta Hezkuntza Baliabideen Zuzendaritza Nagusiak hezkuntzako teknologien eta informazio sistemen arloan zituenak.
3. Lanbide Heziketaren Zuzendaritza Nagusiak bere gain hartzen ditu Hezkuntza Zuzendaritza Nagusiak lanbide heziketaren arloan zituen eskumenak.
4. Hezkuntza Baliabideen Zuzendaritza Nagusia Unibertsitateen eta Hezkuntza Baliabideen Zuzendaritza Nagusiaren jarraipena da eta bere gain hartzen ditu haren eskumenak, salbu eta irakaskuntza unibertsitarioei eta hezkuntzako teknologiei eta informazio sistemei dagozkienak.
Xedapen indargabetzaile bakarra .Arauak indargabetzea.
Indarrik gabe uzten dira foru dekretu honetan ezarritakoari aurka egiten dioten maila bereko edo baxuagoko arau guztiak.
Azken xedapenetako lehena .Gaikuntzak.
Lehendakaritzako, Berdintasuneko, Funtzio Publikoko eta Barneko Departamentuaren eta Ekonomia eta Ogasuneko Departamentuaren titularrei gaikuntza ematen zaie behar diren xedapen guztiak eman ditzaten foru dekretu honetan xedatutakoa garatu eta betetzeko, eta bidezkoak diren langileen eta baliabide ekonomiko eta materialen esleipena eta banaketa egin dezaten.
Azken xedapenetako bigarrena.- Indarra hartzea.
Foru dekretu honek Nafarroako Aldizkari Ofizialean argitaratzen den egun berean hartuko du indarra.
Iruñean, 2019ko abuztuaren 14an.-Nafarroako Gobernuko lehendakaria, María Chivite Navascués.-Hezkuntzako kontseilaria, Carlos Gimeno Gurpegui.
Iragarkiaren kodea: F1910745
