LEXNAVARRA
33/2019 FORU DEKRETUA, MARTXOAREN 27KOA, NAFARROAKO HIGIEZINETAKO AGENTEEN ERREGISTROA SORTU ETA HAREN FUNTZIONAMENDUA ARAUTZEN DITUENA.
BON N.º 92 - 14/05/2019
I. KAPITULUA. XEDAPEN OROKORRAK
- 1. artikulua. Xedea.
- 2. artikulua Helburua.
- 3. artikulua Aplikazio eremua.
II. KAPITULUA. NAFARROAKO HIGIEZINEN AGENTEEN ERREGISTROA SORTZEA
- 4. artikulua. Izaera juridikoa eta atxikipena.
- 5. artikulua. Nafarroako Higiezinetako Agenteen Erregistroaren helburuak.
- 6. artikulua. Nafarroako Higiezinetako Agenteen Erregistroaren funtzionamendua eta kudeaketa.
III. KAPITULUA. NAFARROAKO HIGIEZINETAKO AGENTEEN ERREGISTROAN INSKRIBATZEKO BALDINTZAK
- 7. artikulua. Jardueraeremu geografikoaren eta kokapenaren arloko baldintzak.
- 8. artikulua. Gaikuntzarako baldintzak.
- 9. artikulua. Kaudimenari dagozkion betekizunak.
IV. KAPITULUA. NAFARROAKO HIGIEZINETAKO AGENTEEN ERREGISTROAN INSKRIBATZEA
- 10. artikulua. Inskripzioa.
- 11. artikulua. Inskripzioaren ondorioak.
- 12. artikulua. Ikuskapena.
- 13. artikulua. Nafarroako Higiezinetako Agenteen Erregistroan inskribatuta dauden agenteen lanbidejokaera.
- 14. artikulua. Inskripzioa berritzea.
- 15. artikulua. Inskripzioa ezereztea.
- 16. artikulua. Datuen aldaketa.
- 17. artikulua Datuen babesa.
- Xedapen Iragankor Bakarra. Foru dekretu honek indarra hartu aurretik lanjardunean ari diren higiezinetako agenteei aplikatuko zaizkien gaikuntzaeskakizunak.
- Azken Xedapenetako Lehena. Arau garapena.
- Azken Xedapenetako Bigarrena. Zenbatekoak, logotipoa eta plakak eguneratzea.
- Azken Xedapenetako Hirugarrena. Indarra hartzea.
I. ERANSKINA
Abenduaren 28ko 2018ko Aurrekontu Orokorrei buruzko 20/2017 Foru Legearen hogeita bosgarren xedapen gehigarriak xedatzen duenez, higiezinetako agentea zer den definitu ondoren, urtebeteko epean Nafarroako Gobernuak Nafarroako Higiezinen Agenteen Erregistroa sortuko duela, eta bertan izena emateko eskakizunak zehaztuko dituela.
Nafarroako Foru Komunitateak etxebizitzaren gaineko eskumen osoa eta esklusiboa du, Nafarroako Foru Eraentza Berrezarri eta Hobetzeari buruzko Lege Organikoaren 44.1 artikuluaren arabera. Eta haren 56.1.d) artikuluaren arabera, kontsumitzailearen eta erabiltzailearen defentsaren gaineko eskumen esklusiboa ere badu, jarduera ekonomiko orokorraren oinarriekin eta antolamenduarekin bat.
Erregistro hori sortu beharra eta haren eraginkortasuna justifikatzen dituen arrazoi nagusia argia da: gaurko egunean, paradoxikoa bada ere, zenbait lanbideren jardueraren liberalizazioa dela eta, kontsumitzaileak eta profesionalak beraiek hasi dira eskatzen araubide bat, kontsumitzaileak beraien legezko eskubideen defentsarako, eta profesionalak, berriz, sektore gisa duten ospe onaren defentsan.
Hala gertatzen da higiezinetako agenteen kasuan. Higiezinetako agente lanbidean aritzeko, 2000tik hona, (4/2000 Errege Dekretua eta ondorengo 10/2003 Legea, higiezinen sektorea liberalizatzeari buruzkoa), ez da beharrezkoa goi-mailako titulurik (ez eta bestelakorik ere) izatea, eta egoitza fisikorik ere ez, ez eta erantzukizun zibileko asegururik ere.
Ez zaio, beraz, inongo eskakizunik egiten bitartekaritza eginen duen agenteari, jardun behar duelarik edozein pertsonak bere bizitzan hartzen duen erabaki nagusietako batean, alegia, bere etxea, herritar gisa dituen eskubideen egoitza, non kokatuko duen erabakitzeko unean. Askotan, gainera, erabaki horrek bizitzako inbertsiorik handiena egitea ere ekarriko die: etxebizitza erostea.
Arautze falta horren ondorioz:
-Higiezinetako agenteek beraiek eskatzen dute nolabaiteko arautzea.
-Inongo prestakuntzarik eta higiezinen ezagutzarik ez duten bitartekariak sartzea sektorean, eta horiek zigorgabetasun osoz aritzea lanean. Horren ondorioz, kontsumitzaileak nahasita daude, eta, higiezinen arloan dagoen berpiztea lagun eta askotan teknologia berriez baliatuz, gertatutako gehiegikeriak, iruzurrak, herritarra kaltetzen duten akatsak eta halakoen gaineko salaketak ugaltzen ari dira.
Foru dekretu honen helburua, azken finean, merkatu fidagarri bat sortzea da. Merkatu baten liberalizazioaren funtsa da eskaintzaren eta eskaeraren arteko konkurrentzia askearen eragozpenak kentzea, erosteko prezioak hobetzeko eta kudeaketaren kostuak murrizteko. Helburu hori ez da lortzen merkatuaren atea edozein operadoreri irekiz. Herritarrari eman behar zaio aukeratzeko askatasun handiagoa, baina segurtasun juridiko eta ekonomiko bera mantenduz. Lanbidea itsu-itsu defendatzearen eta erabateko arau faltaren artean, Nafarroako Foru Komunitateak bermatzaile gisa esku hartzea aukeratu du, horretarako Nafarroako Higiezinetako Agenteen Erregistroa sortuz. Helburua da konfiantza handiagoa zabaltzea herritarren artean, gardentasunaren bidea errazteko eta kontsumitzaileen babes handiagoa bermatzeko.
Hala ere, kontuan izan behar da foru dekretu honetan ez dela arautzen higiezinetako agenteen lanbide-jarduera, baizik eta agente horiek erregistroan inskribatzeko bete behar dituzten baldintzak eta betebeharrak, bai eta erregistroaren beraren funtzionamendua ere. Erregistroan inskribatzea borondatezkoa da eta haren helburua informazioa ematea da, kontsumitzaileen eta erabiltzaileen babes egokia lortzeko. Beraz, ez da jardueran aritzea baldintzatzen, eta helburu bakarra da gaikuntza zehatz baten eskakizunak betetzen dituzten operadoreak identifikatzea, kontsumitzaileek informazio hori eskura izan dezaten.
Foru dekretua 17 artikulutan garatzen da, eta horiek jasotzen dituzten 4 kapitulu, xedapen iragankor bat, hiru azken xedapen eta eranskin bat ditu.
Horrenbestez, Eskubide Sozialetako kontseilariak proposaturik, Nafarroako Kontseiluaren txostenaren arabera, eta Nafarroako Gobernuak 2019ko martxoaren 27ko bilkuran hartutako Erabakiarekin bat,
DEKRETATZEN DUT:
I. KAPITULUA. XEDAPEN OROKORRAK
Foru dekretu honen xedea da Nafarroako Higiezinetako Agenteen Erregistroa sortzea eta funtzionamendua arautzea.
Nafarroako Higiezinetako Agenteen Erregistroa sortzearen helburua da gardentasuna areagotzea etxebizitzen sektorean eta kontsumitzaileen babesa bermatzea, higiezinen arloan kalitateko zerbitzua eskainiz.
3. artikulua Aplikazio eremua.
1. Foru dekretu hau aplikatuko zaie Nafarroako Foru Komunitatearen lurraldean jardun ohi duten edo jarduteko asmoa duten higiezinetako agenteei.
2. Foru dekretu honen ondorioetarako, higiezinetako agentea izanen da higiezinen arloko bitartekaritza eta aholkularitza zerbitzuak eskuarki eta kontraprestazio baten truke ematen dituen pertsona fisiko edo juridikoa; halako zerbitzutzat joko dira ondasun higiezinen salerosketa, errentamendua, erosteko aukera, eta higiezinen gaineko eskubideak sortzeko edo lagatzeko operazioetan parte hartzea.
II. KAPITULUA. NAFARROAKO HIGIEZINEN AGENTEEN ERREGISTROA SORTZEA
4. artikulua . Izaera juridikoa eta atxikipena.
1. Nafarroako Higiezinetako Agenteen Erregistroa sortzen da, borondatezkoa, publikoa, eta doakoa, administratiboa izatez, etxebizitzen arloan eskuduna den departamentuari atxikia.
2. Erregistroa eskura egonen da etxebizitzaren arloan eskuduna den Departamentuaren webgune informatiboan, www.vivienda.navarra.es helbidean, edo haren ordez antolatuko den egoitza elektroniko instituzionalean.
5. artikulua . Nafarroako Higiezinetako Agenteen Erregistroaren helburuak.
Hauek dira Erregistroaren helburuak:
a) Higiezinetako agenteen zerbitzua emateko jardueran autorregulazioa sustatzea eta bikaintasuna lortzea.
b) Nafarroako Foru Komunitateko Administrazioaren kontrola erraztea, kontsumitzaileen eta erabiltzaileen defentsaren inguruko legeriari dagokionez.
c) Informazio baliagarria ematea higiezinetako agente baten zerbitzuak kontratatzeko interesa duten herritarrei.
d) Gardentasuna bultzatzea higiezinen merkatuan, eta aurre egitea kontsumitzaile edo erabiltzaile direnen babes gabeziari eta lanbide horretan aritzeko ez gaitasunik ez prestakuntzarik ez duten pertsonen jarduerari.
6. artikulua . Nafarroako Higiezinetako Agenteen Erregistroaren funtzionamendua eta kudeaketa.
Nafarroako Higiezinetako Agenteen Erregistroaren kudeaketa etxebizitzen arloan eskumena duen zuzendaritza nagusiaren esku egonen da, eta honako eginkizun hauek izanen ditu hari dagokionez:
a) Inskribatu beharreko datuen inskripzioa, berriztapena, aldaketa eta deuseztapena kudeatzea.
b) Behar den kasuan, inskripzioa egiteko behar diren baldintza eta betebeharrak betetzen direla egiaztatzea, hala nola betebehar horiek gero ere mantentzen direla, inskripzioak indarra duen bitartean.
c) Erregistroan jasotzen diren datuen inguruko informazioa ematea, egiaztatzea eta publikoaren eskura jartzea. Horretarako, etengabe eguneratuko da higiezinetako agente inskribatuen zerrenda, eta eskuragarri egonen da foru dekretu honen 4.2. artikuluan aipatzen den etxebizitza arloko web atari telematikoan.
III. KAPITULUA. NAFARROAKO HIGIEZINETAKO AGENTEEN ERREGISTROAN INSKRIBATZEKO BALDINTZAK
7. artikulua . Jardueraeremu geografikoaren eta kokapenaren arloko baldintzak.
1. Higiezinen inguruko bitartekaritza eta aholkularitza zerbitzuak Nafarroako Foru Komunitatean emanen dira, publikoari zabaldutako establezimendu batetik, dela merkataritza-lokal batetik, bulego nahiz lanbide-egoitza batetik.
2. Zerbitzu ematea urrundik egiten denean, telematika edo antzeko bideak erabiliz, egoitza fisiko bat eduki beharko da Nafarroako Foru Komunitateko lurraldean.
8. artikulua . Gaikuntzarako baldintzak.
1. Erregistroan inskribatu ahal izateko higiezinetako agenteek ondoko baldintza hauetako bat bederen bete behar dute:
a) Higiezinen Jabetzako Agente elkargokidea izatea. Elkargoaren egiaztagiria aurkeztu behar da.
b) Higiezinen bitartekaritza eta aholkularitza zerbitzuen jardueran esperientzia izatea inskripzioa eskatzen den urtearen aurreko lau urteetan. Zuzenbidean balioa duen edozein frogabide erabiliko da egiaztatzeko.
c) Gizarte Zientziak eta Juridikoak, Ingeniaritza edo Arkitektura unibertsitate-ikasketen titulazioa. Unibertsitate-titulua aurkeztu behar da.
d) Prestakuntza izatea higiezinen arloan, gutxienez 200 ordukoa. Bertaratze eta aprobetxamendu egiaztagiriak erakutsi behar dira.
2. Pertsona juridikoak direnean, baldintza horiek bete beharko dituzte administratzaileek, behar bada Administrazio Kontseiluko kideek, eta betiere publikoarentzat zabalik den establezimendu bakoitzaren ardura duen pertsonak. Pertsona arduradun bakoitzak gehienez publikoari irekitako hiru establezimendu izaten ahalko ditu bere kargu.
9. artikulua . Kaudimenari dagozkion betekizunak.
1. Higiezinetako agenteek, Nafarroako Higiezinetako Agenteen Erregistroan inskribatu ahal izateko eta inskribatuta dauden denboran bete behar dituzten baldintzak:
a) Higiezinetako agenteen jardueran ari diren denboran indarra izanen duen berme bat sortu behar dute, lan-jardunean jaso dituzten kopuruen gainean erantzuteko, hartu behar dituzten pertsonen eskuetan jarri bitartean.
Berme hori izanen da kauzio-abal edo aseguru bat, eta Espainian edo Europar Batasuneko kide den edozein estatutan egoitza duten kreditu-entitateekin edo aseguru-etxeekin sortu behar da.
b) Erantzukizun zibileko aseguru-poliza bat izatea, higiezinetako agente lanean ari diren denbora guztian bermatu ahal izateko jardueraren ondorioz sor litezkeen kalte-galerak.
Poliza hori ere Espainian edo Europar Batasuneko kide den edozein estatutan egoitza duten aseguru-etxeekin sinatu beharko da.
2. Bermea eta aseguru-poliza kontratatzen ahalko dira zuzenean edo lanbide elkargo edo elkarteen bidez.
3. Bermeak estali beharko du gutxienez 30.000 euroko zenbatekoa, publikoari irekia den establezimendu bakoitzeko eta urte bakoitzeko.
Aseguratu beharreko gutxieneko kapitala 100.000 eurokoa izanen da ezbeharreko, eta 600.000 eurokoa urteko.
4. Higiezinetako agenteak bere jarduera telematika bidez bakarrik egiten duenean, kopuru horiei %50 erantsiko zaie.
IV. KAPITULUA. NAFARROAKO HIGIEZINETAKO AGENTEEN ERREGISTROAN INSKRIBATZEA
1. Nafarroako Higiezinetako Agenteen Erregistroan inskribatzeko eskabidea noiznahi egiten ahalko da, higiezinetako agente interesdunak eskatuta, eredu normalizatu baten bidez, eta hari erantsiz eskatutako baldintzak betetzearen gaineko erantzukizunpeko adierazpena.
2. Inskripzioa onartuko da etxebizitzaren arloan eskumena duen zuzendaritza nagusiaren ebazpen baten bidez, eskabidea aurkeztu eta hurrengo sei hilabeteko epean, gehienez.
3. Inskripzioak 10 urte iraunen du eta hamar urtetarako berrituko da.
11. artikulua . Inskripzioaren ondorioak.
1. Inskripzioak higiezinetako agenteari aukera ematen dio aditzera emateko Nafarroako Higiezinetako Agenteen Erregistroan inskribatuta dagoela, eta bere zerbitzuak ematean logotipoa edo baimendutako bereizgarria erakusteko, bai lan jardueran bai publizitatean, eta, halaber, baimendutako plaka bat jartzeko leku ikusgarrian, publikoari irekita dituen establezimenduan. Logotipoa eta plaka foru dekretu honen I. eranskinean ezarritako ereduaren araberakoak izanen dira.
2. Inskripzioak eta logotipoaren eta plakaren erabilerak ez dakar Nafarroako Foru Komunitatearen Administrazioaren inongo erantzukizunik, higiezinetako agenteen jarduera desegokiren bat gertatuz gero.
Etxebizitzen arloan eskumena duen zuzendaritza nagusiak noiznahi eskatzen ahalko die Erregistroan inskribatutako higiezinetako agenteei inskripziorako bete beharreko baldintzak betetzen dituztela erakusteko.
13. artikulua . Nafarroako Higiezinetako Agenteen Erregistroan inskribatuta dauden agenteen lanbidejokaera.
Nafarroako Higiezinetako Agenteen Erregistroan inskribatutako agenteek jarduera horretarako aplikagarria den kode deontologikoan jasotzen diren zehaztapenen araberako jokaera izanen dute.
14. artikulua . Inskripzioa berritzea.
Nafarroako Higiezinetako Agenteen Erregistroan egindako inskripzioak indarra duen epea amaitu aurretik, pertsona interesdunak berritzeko eskatu beharko du, eta inskripzioa egiteko aurreikusitako modu berean eginen da berriztapena.
15. artikulua . Inskripzioa ezereztea.
1. Inskripzioa ezereztuko da etxebizitzen arloan eskumena duen zuzendaritza nagusiaren ebazpen bidez.
2. Ezerezteko arrazoiak honako hauek izanen dira:
a) Higiezinetako agentea den pertsona fisikoa hiltzea edo higiezinetako agentea den pertsona juridikoa azkentzea.
b) Higiezinetako agenteak berak bere borondatez eskatzea.
c) Nafarroako Higiezinetako Agenteen Erregistroan inskribatzeko baldintzak ez betetzea.
d) Erregistroan inskribatzeko eskabidean aurkeztutako dokumentazioan edo adierazpenean faltsukeria aurkitzea.
e) Erregistroan inskribatzeko beharrezko baldintzak betetzen direla egiaztatzeko egindako errekerimenduari muzin egitea.
3. Inskripzioa ezerezten bada artikulu honen 2. apartatuaren c), d) eta e) letretan azaldutako arrazoiengatik, ezerezte-ebazpena eman aurretik entzunaldia emanen zaie interesdunei.
4. Inskripzioa ezereztu ondoren higiezinetako agentearen baja gauzatuko da Nafarroako Higiezinetako Agenteen Erregistroan. Ezereztea artikulu honen 2. apartatuaren d) letran aipatutako arrazoiagatik egiten bada, horrez gain, Erregistroan hurrengo bost urteetan berriz inskribatzeko debekua ekarriko dio, galarazi gabe jokabide horrek arau-hauste penala edo administratiboa ekartzea.
16. artikulua . Datuen aldaketa.
Inskribatuta dauden higiezinetako agenteek inskripzioaren datuen edozein aldaketa jakinarazi behar dute, hala nola Nafarroako Higiezinetako Agenteen Erregistroan inskribatuta egoteko bete beharreko baldintzak galtzen direnean.
Arrazoi justifikatua tartean ez badago, jakinarazpen hori aldaketa gertatu eta hilabeteko epean, gehienez, egin beharko da.
Erregistroan inskripzioa egiteko eskabidea egin dituztenek emandako datu pertsonalak dagokien datu-fitxategian sartu eta tratatuko dira, datu pertsonalen babesari buruzko indarra duten legeetan ezarritako eskakizunen arabera.
Xedapen Iragankor Bakarra. Foru dekretu honek indarra hartu aurretik lanjardunean ari diren higiezinetako agenteei aplikatuko zaizkien gaikuntzaeskakizunak.
Foru dekretu honek indarra hartu aurretik bitartekaritza eta aholkularitza zerbitzuak emateko lan-jardunean ari diren higiezinetako agenteei, 8. artikuluan ezarritako gaikuntza-eskakizunaren ordez, onartuko zaie eskabidea egin aurreko bi urteetan esperientzia izatea halako zerbitzuak ematen, betiere inskripzioa eskatzen badute foru dekretu honek indarra hartzen duen egunetik sei hilabeteko epean.
Azken Xedapenetako Lehena. Arau garapena.
Etxebizitzaren arloko eskumena duen departamentuaren titularrari ahalmena ematen zaio behar diren xedapen guztiak eman ditzan foru dekretu honetan xedatutakoa garatzeko eta betearazteko.
Azken Xedapenetako Bigarrena. Zenbatekoak, logotipoa eta plakak eguneratzea.
9. artikuluan azaldutako zenbatekoak eguneratzen ahalko dira etxebizitzaren arloan eskumena duen departamentuko titularraren foru agindu bidez.
Era berean, etxebizitzaren arloan eskumena duen departamentuko titularraren foru agindu bidez aldatzen ahalko dira I. eranskinean aipatutako logotipoa eta plaka.
Azken Xedapenetako Hirugarrena. Indarra hartzea.
Foru dekretu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2019ko martxoaren 27an.-Nafarroako Gobernuko lehendakaria, Uxue Barkos Berruezo.-Eskubide Sozialetako kontseilaria, Miguel Laparra Navarro.
I. ERANSKINA
LOGOTIPO ETA PLAKA EREDUA (PDF).
Iragarkiaren kodea: F1904354
