LEXNAVARRA
98/2017 FORU AGINDUA, EKAINAREN 23KOA, LEHENDAKARITZAKO, FUNTZIO PUBLIKOKO, BARNEKO ETA JUSTIZIAKO KONTSEILARIAK EMANA, JOKOAREN ETA IKUSKIZUN PUBLIKOEN ARLOKO I. IKUSKAPEN ETA KONTROL PLANA ONESTEN DUENA, 2017-2020 ALDIRAKO
BON N.º 154 - 10/08/2017
ERANSKINA. I. KONTROL ETA IKUSKAPEN PLANA JOKOAREN ETA IKUSKIZUN PUBLIKOEN ARLOAN, 20172020 ALDIRAKO
- 1. Planaren justifikazioa.
- 2. Eskumenak eta eginkizunak.
- 3. Ardatz estrategikoak, jarduketa lerroak eta neurriak.
- 4. Jarduketaprograma.
- 5. Ikuskapenak.
- 6. Planaren jarraipena.
- 7. Administrazioen arteko koordinazioa.
- 8. Zehatzailea.
- 9. Ikuskapen eta Kontrol Planaren indarraldia.
- 10. Ikuskapen eta Kontrol Plana eguneratzea.
Jokoaren eta ikuskizun publikoen arloko arauek, Jokoari buruzko abenduaren 14ko 16/2006 Foru Legeak eta Nafarroako Ikuskizun Publikoak eta Josteta Jarduerak arautzen dituen martxoaren 13ko 2/1989 Foru Legeak, hurrenez hurren, eta haiek garatzen dituen araudiak bertan ezarritakoak ez betetzeagatik sortzen diren arau-hausteak eta zehapenak biltzen dituzte.
Esku-hartze publikoa bultzatu eta eragin behar duten jarduteko printzipioak kontuan harturik, hala nola objektibotasuna interes orokorrak gauzatzeko orduan, eragingarritasuna eta efizientzia haren jardunean eta administrazioen arteko lankidetza eta elkarlana (Espainiako Konstituzioaren 103.1 artikulua eta Sektore Publikoaren Araubide Juridikoari buruzko urriaren 1eko Legearen 3. artikulua), beharrezkoa da tresnez hornitzea gai horien inguruko kontrol, ikuskapen eta zehapen prozesuen koordinazioa eta plangintza. Horretarako, eskumen horiek egituratu, bideratu eta antolatuko dituen Ikuskapen eta Kontrol Plan bat onetsiko da, zeinak helburuak definitu eta haiek lortzeko eta ebaluaziorako baliabideak inplementatzeko beharrezkoak diren ekintzak ezarriko dituen. Horrela, esku-hartzeak orientatzea eta antolatzea lortzeaz gain, Administrazioko baliabideak erabil daitezke herritarrentzako jokabide kaltegarrienak desagerrarazteko eta baita interes orokorra edo garrantzi edo eragin juridiko, sozial eta ekonomikorik handiena duena lortzeko ere, esku-hartze publikoaren bidez pertsuasiorako eta prebentzio orokorrerako efektua sustatuz, batez ere arau-hausteei dagokienez.
Kontseilari honek Nafarroako Parlamentuaren aurrean adierazi zuen bezala, Departamentu honek 2015-2019 legegintzaldirako dituen helburu eta lan ildoen artean, zezen ikuskizunak egiten diren instalazio guztiak ikuskatzeko epe laburreko eta ertaineko plan bat aurreikusita dago. Helburua pertsonen segurtasunean eragiten duten akatsak hautematea eta zuzentzea da.
Foru agindu honen bidez onesten den Ikuskapen eta Kontrol Planean, agindutako helburua dago, eta gehiago ditu jomugan. Izan ere, eraginkortasun handiko tresna da, eta bertan hainbat jarduketa modu sistematikoan eta koordinatuan definitzen dira, alde batetik joko eta apustuen alorrean fede onez parte hartzen duten pertsonentzat iruzurrezko egoerak sor ditzaketen legez kanpoko jarduerak desagerrarazteko, eta bestetik ikuskizunak eta josteta jarduerak direla-eta beren ezaugarriengatik edo egiten diren lokalen eta instalazioen baldintzengatik arriskuan jar daitezkeen pertsonen osotasun fisikoa eta segurtasuna bermatzeko.
Ikuskapenaren helburu nagusia definitutako gaietan izandako ustezko arau-hausteen aurrean proaktiboki esku hartzea da, haien jarraipena eta finkapena eragotziz, eta esku hartzeko lehentasunak aginduz eta esleituz. Hala ere, aintzat hartzen dira, baztertu gabe, bai jarduketa programetatik kanpo egiten diren salaketez, eskaerez edo erreklamazioez ere arduratu beharra, bai horiek plan hau ezartzeko prozesuan sartzea, aurretik kontuan izanda, betiere, larriak ote diren eta plan honek ezarritako lehentasunen sailkapenean non kokatzen diren.
Horretaz gain, tresna honek informazio hau eman beharko dio Administrazioari: egungo araudiak ezarritako eskakizunak zenbateraino betetzen diren eta gaurko errealitateari egokitzen ote zaion. Horren xedea atzematen diren gabeziak zuzendu ahal izatea da, eta, dagokionean, bidezkoak diren zehapenak eta neurri zuzentzaileak ezartzea.
Herritarren parte-hartze prozesu bat egin da proiektuaren inguruan, Gobernu Irekiaren Atarian argitaratu baita.
Aurreko guztiagatik, Nafarroako Foru Komunitateko Administrazioari buruzko abenduaren 3ko 15/2004 Foru Legean eta Lehendakaritzako, Funtzio Publikoko, Barneko eta Justiziako Departamentuaren egitura organikoa ezartzen duen irailaren 9ko 198/2015 Foru Dekretuan xedatutakoari jarraikiz,
AGINDU DUT:
1.º Jokoaren eta ikuskizun publikoen arloko I. Kontrol, Ikuskapen eta Zehapen plana onestea 2017-2020 urterako. Foru agindu honen eranskinean dago.
2.º Foru Agindu hau jakinaraztea Barneko zuzendari nagusiari, Segurtasun Politikak Garatzeko Zerbitzuari, Barneko Araubide Juridikoaren Zerbitzuari eta Nafarroako Foruzaingoari, eta Nafarroako Aldizkari Ofizialean argitaratzeko agintzea, behar diren ondorioak izan ditzan.
Iruñean, 2017ko ekainaren 23an.-Lehendakaritzako, Funtzio Publikoko, Barneko eta Justiziako kontseilaria, María José Beaumont Aristu.
ERANSKINA. I. KONTROL ETA IKUSKAPEN PLANA JOKOAREN ETA IKUSKIZUN PUBLIKOEN ARLOAN, 2017-2020 ALDIRAKO
Plan honen helburua da, era iraunkor eta ordenatuan, kontrol administratiboko eta ikuskapeneko jarduketak ezartzea, Administrazioak, batetik, ezagutu ahal dezan zein den inplikatutako sektoreen egoera legezkotasunari begira eta, bestetik, ez-betetzeak zuzendu ahal ditzan, Administrazioak duen zehapen lanari kalterik egin gabe. Ikuskapeneko jarduketen planifikazioak jarrera arduratsuak sustatzen ditu; hauen eraginez, ikuskizun publikoak eta josteta jarduerak hartzen dituzten instalazioek eta establezimenduek hobeki funtzionatzen dute, horien titularrek hobeki mantentzen dituzte eta, gainera, ahalbidetzen da alor hauetan epe zehatz baterako lortu nahi diren helburu orokorrak diseinatzea.
Plan honen helburu nagusi eta funtsezkoa da interes behinenak eta nabarmenenak zainduko direla bermatzea, eta ahalbidetzen du, batetik, jarduketa esparru hauetako parte hartzerik kaltegarrienak desagerraraztea eta, bestetik, horiek egiteko asmoa kentzea. Horretarako, elementu funtsezko, beharrezko eta saihestezina da esku hartzeko eta lehenesteko irizpideak ezartzea. Antolamendu administratiboari eta haren mugei dagokienez, ahalbidetuko du giza baliabideak eta baliabide ekonomikoak eskura izatea eta haiek bideratzea bere helburuak eraginkortasunez eta efizientziaz lortzera.
Administrazio Publikoen Administrazio Prozedura Erkideari buruzko urriaren 1eko 39/2015 Legearen 71. artikuluak babestu egiten du esku-hartzeak arrazionalki eta txukun lehenestea. Izan ere, artikulu horrek aukera ematen dio administrazio unitateari, arrazoiak emanda, espedienteak lantzeko hurrenkera alda dezan; hala, esku-hartzea diseinatu ahalko du egindako arau-haustearen eta babestu beharreko ondasunaren garrantzian eta izaeran oinarrituta, horri bezainbesteko garrantzia eman gabe salaketen eta espedienteen hasieraren hurrenkera hertsiari, horiek munta, izaera eta motibazio oso desberdinak baitituzte.
Ikuskapenaren helburu nagusia definitutako gaietan izandako ustezko arau-hausteen aurrean proaktiboki esku hartzea da, haien jarraipena eta finkapena eragotziz, eta esku hartzeko lehentasunak aginduz eta esleituz. Hala ere, aintzat hartzen dira, baztertu gabe, bai jarduketa programetatik kanpo egiten diren salaketez, eskaerez edo erreklamazioez ere arduratu beharra, bai horiek plan hau ezartzeko prozesuan sartzea, aurretik kontuan izanda, betiere, larriak ote diren eta plan honek ezarritako lehentasunen sailkapenean non kokatzen diren.
Horretaz gain, tresna honek informazio hau eman beharko dio Administrazioari: egungo araudiak ezarritako eskakizunak zenbateraino betetzen diren eta gaurko errealitateari egokitzen ote zaion. Horren xedea atzematen diren gabeziak zuzendu ahal izatea da, eta, dagokionean, bidezkoak diren zehapenak eta neurri zuzentzaileak ezartzea.
Eskuhartze material eta denborazko honen antolamenduan, eskuhartze publikoaren egitura diseinatu beharko da, segurtasun juridikoa bermatzeko, bai lan hauetan diharduten operadore publikoena bai administratuena bere eskubideak gauzatzen ari direnean.
Plan honen egituran bi ardatz edo jarduketa eremu handi daude: jokoa eta ikuskizun publikoak.
Plan honek, ardatz hauetako bakoitzean, bereziki jorratzen ditu establezimendu publikoen segurtasunaren eta alderdi teknikoen azterketa eta ebaluazioa, eta jardueren garapenaren jarraipena. Alderdi horiek batera baloratuko dira, establezimenduen eta jardueraren izaera eta ezaugarriak kontuan izanda.
Jokoaren alorrean, Jokoari buruzko abenduaren 14ko 16/2006 Foru Legearen 34. eta 36. artikuluek Lehendakaritzako, Funtzio Publikoko, Barneko eta Justiziako Departamentuari ematen dizkiote, batetik, jokoarekin eta apustuekin lotutako jarduerak ikuskatzeko eta kontrolatzeko, eta ikertzeko eta egiaztatzeko eginkizunak, eta, bestetik, gai horiekin lotutako zehapen ahalmena.
Bestalde, ikuskizunen alorrean, Nafarroako ikuskizun publikoak eta josteta jarduerak arautzen dituen martxoaren 13ko 2/1989 Foru Legeak hau xedatzen du 17. artikuluan: “Nafarroako Gobernuak eta polizia kidegoak dituzten toki entitateek xedatuko dute polizia kidegoek ezar ditzatela ikuskizun publikoak eta, kasua bada, josteta jarduerak babesteko eta zaintzeko zerbitzu arruntak, ohi bezala egin daitezen eta legedia bete dadin”. Zehapen eskumena aipatutako arauaren 27. artikuluan ezartzen da.
Irailaren 9ko 198/2015 Foru Dekretuak, Lehendakaritzako, Funtzio Publikoko, Barneko eta Justiziako Departamentuaren egitura organikoa ezartzen duenak, Jokoaren eta Ikuskizun Publikoen Atalaren -Segurtasun Politikak Garatzeko Zerbitzuari atxikia dagoenaren- eskuetan uzten ditu eginkizun hauek: administrazio baimenak ematea, haiek kontrolatu eta ikuskatzea, eta joko, ikuskizun publiko eta josteta jardueren arloko segurtasun publikoko politiken arau-garapena eta betearazpena.
Foru dekretu horrek berak Barneko Araubide Juridikoaren Zerbitzuaren esparru material eta funtzionalean sartzen du Barne Zuzendaritza Nagusiaren eskumenekoak diren zehapen prozedurak abiaraztea eta instruitzea eta haien jarraipena egitea.
Azkenik, Nafarroako Foruzaingoaren Antolamenduaren eta Funtzionamenduaren egungo Erregelamenduak -irailaren 21eko 72/2016 Foru Dekretuaren bidez onetsiak- 30. artikuluan ezartzen duenez, zenbait arlotan sartuta dauden unitate organikoek (kasu honetan, Joko eta Ikuskizunen Brigadak) Nafarroako Foru Komunitateko Administrazioan jokoaren eta ikuskizunen arloetan eskumena duten zerbitzuekin batera lan egin beharko dute, haiek ematen dituzten jarraibideak poliziaren lanetik atontzeko eta ezartzen diren helburuak lortzeko. Horretarako, zerbitzu horiek ematen dituzten jarraibideak betetzeko behar diren operazio eta neurriak programatu eta koordinatuko dituzte.
3. Ardatz estrategikoak, jarduketa lerroak eta neurriak.
Ardatz estrategikoak (AE) gai multzoak dira, sektoreko arauetan erregulatzen diren berariazko materien araberakoak, eta horien barnean jarduketa lerroak (L) daude. Lerro horiek bete beharra dago, ezartzen diren eta lerro horiek garatzen dituzten neurri (N) batzuk gauzatuta.
1. ardatza. Jokoaren alorra.
Jarduketa lerroak:
L1: Legez kontrako edo katalogatu gabeko jokoa.
Xedea: Antolaketa atzematea eta, badagokio, ez uztea legez kontrako edo katalogatu gabeko jokoak edo apustuak egiten eta ustiatzen. Legez kontrako jokotzat hartuko da Nafarroako Joko eta Apustuen Katalogoan ez dagoena edo arauez kanpoko baldintzetan antolatzen, ustiatzen edo egiten dena.
Jarduketa lerro hau ondoko neurri (N) hauen bidez gauzatuko da:
N1: Legez kontrako jokoak antolatzen diren edo horietan parte hartzeko aukera ematen duten lokalak eta aretoak zaintzea.
N2: Legez kontrako jokoen publizitatea argitaratu edo joko horietan parte hartzea sustatzen duten lokalei eta hedabideei segimendua egitea.
N3: Dagokionean, legez kontrako jokoak ustiatzeko edo egiteko erabiltzen diren tresnak edo materialak zigilatzea edo konfiskatzea.
L2: Baimenik gabe edo baimenduetako lokaletatik kanpo egindako jokoak.
Xedea: Antolaketa atzematea eta, kasua bada, ez uztea jokoak edo apustuak (Katalogoan sartuak) ustiatzen, Nafarroako Gobernuaren edo beste administrazio eskudun batzuen baimenik gabe egiten badira.
Jarduketa lerro hau ondoko neurri (N) hauen bidez gauzatuko da:
N1: Baimenik gabe ustiatzen diren joko katalogatuak kontrolatzea eta etetea.
N2: Baimenik gabeko toki, lokal eta establezimenduetan ustiatzen diren joko katalogatuak kontrolatzea eta etetea.
N3: Dagokionean, legez kontrako jokoak ustiatzeko edo egiteko erabiltzen diren tresnak edo materialak zigilatzea edo konfiskatzea.
L3: Adingabeak eta beste talde zaurgarri batzuk.
Xedea: Eragoztea adingabeek eta Nafarroako Jokorako Sarbideko Interdikzioen Erregistroan sartuta dauden pertsonek joko eta apustuetan parte har dezaten.
Jarduketa lerro hau ondoko neurri (N) hauen bidez gauzatuko da:
N1: Joko aretoetan sartzea kontrolatzeko neurrien jarraipena eta ebaluazioa.
N2: Bereziki adingabeentzat diren lokalak kontrolatzea.
N3: Adingabeak eta Jokorako Sarbideko Interdikzioen Erregistroan inskribaturiko pertsonak joko aretoetatik botatzea.
N4: Jokoa kontrolatzea azoka-esparruetan eta jolas parkeetan.
N5: Kontrolatzea ziberzentroak eta publikoari IKT berrietan sartzeko aukera ematen dioten beste lokal batzuk.
N6: Kontrolatzea joko eta apustu makinak adingabeek eta beste talde batzuek erabiltzen ote dituzten.
L4: Baimendutako jokoak.
Xedea: Beren erregulazio esparruetan ezarritako baldintzetan ez baizik eta beste batzuetan egiten diren jokoen edo apustuen ustiaketa atzematea eta, kasua bada, etetea.
Jarduketa lerro hau ondoko neurri (N) hauen bidez gauzatuko da:
N1: Makinak eta jokoko beste material eta sistema batzuk ustiatzea homologatutako baldintzetan ez baizik eta beste baldintza tekniko batzuetan.
N2: Joko eta apustu makinak instalatzean baimendutako kopurua gainditzea.
N3: Baimendutako apustuen eta sarien mugak aldatzea.
N4: Jokoari buruzko abenduaren 14ko 16/2006 Foru Legearen aplikazio esparrutik kendutako jokoen jarraipena egitea.
N5: Baimendu gabeko pertsonek jokoan esku hartzen duten kontrolatzea.
L5: Jokatzeko eta apustuak egiteko erabiltzen diren aretoak eta elementuak.
Xedea: Egiaztatzea jokoak eta apustuak egiteko lokalek eta haiek garatzeko erabiltzen diren elementuek eusten ote dieten bete behar dituzten baldintza teknikoei.
Jarduketa lerro hau ondoko neurri (N) hauen bidez gauzatuko da:
a) Bingoen alorrean:
N1: Kartoien salmentari, ateratako bolen zenbakiei, eskuragarri dauden sariei eta horien zenbatekoari buruzko informazioa duten elementu eta gailuen funtzionaltasuna.
N2: Erabilgarri dauden joko terminalak.
N3: “Akten liburua”, “Sarien liburua” eta “Partidak egiaztatzeko eta artxibatzeko sistema” mantentzea.
b) Makinen eta jokoko beste material eta sistema batzuen alorrean:
N4: Jokoaren programa duten memorien ikuskapen teknikoa eta egiaztatzaileen irakurketa.
N5: Joko makinen kontagailuen kontrola eta irakurketa.
2. ardatza. Ikuskizun publikoen alorra.
Jarduketa lerroak:
L1: Establezimendu publikoak.
Xedea: Establezimendu, ikuskizun publiko eta josteta jardueren katalogoan -irailaren 23ko 202/2002 Foru Dekretuaren bidez onetsian- sartuta dauden establezimenduen kontrola.
Jarduketa lerro hau ondoko neurri (N) hauen bidez gauzatuko da:
N1: Baimendutako jarduera.
N2: Baimenduta dagoen gehieneko jende kopurua.
N3: Ebakuazio bideen, irteeren eta larrialdiko ateen egoera.
N4: Ebakuazio seinalerik badagoen eta, egonez gero, zer egoeratan dauden.
N5: Larrialdiko argien funtzionamendua.
N6: Jarduteko ordutegiak.
N7: Erreklamazio orririk ba ote dagoen.
N8: Aretoetan sartzea kontrolatzeko sistemak eta langileak.
N9: Adingaberik ba ote dagoen.
N10: Adingabeek alkohola kontsumitzen ote duten.
L2: Zezen ikuskizunak.
Xedea: Kontrolatzea zezen ikuskizunak, horiek egin aurretik eta egin bitartean, eta horiek gauzatzen direneko barrutiak.
Jarduketa lerro hau ondoko neurri (N) hauen bidez gauzatuko da:
a) Zezen ikuskizun herrikoiak:
N1: Ibilbidea edo non egiten diren.
N2: Osasun baldintzak (anbulantzia, erizaindegia, osasun arloko langileak).
N3: Zezenketako profesionalak eta laguntzaileak.
N4: Adingabeen parte hartzea.
N5: Zer abelburu mota erabiltzen diren.
N6: Abelburuen gaineko tratu txarrak.
N7: Abelburuen arriskugarritasuna.
N8: Ikuskizuna nola gauzatzen den.
b) Zezenketa duten zezen ikuskizunak:
N8: Abelburuen identifikazioa, adina eta pisua.
N9: Jarduleen identifikazioa eta profesionaltasuna.
N10: Ikuskizuna etetea.
N11: Administrazioaren ordezkariak dituen berezko egitekoak.
N12: Zezenketa nola gauzatzen den.
c) Zezen plazak:
N12: Barreren ezaugarriak.
N13: Kailejoiaren neurriak.
N14: Eustormaren ezaugarriak.
N15: Ukuiluak eta bakak: kopurua, neurriak eta baldintzak.
N16: Osasuneko instalazioak eta baliabideak.
L3: Ikuskizun eta jarduera bereziak.
Xedea: Ikuskizun publikoak eta josteta jarduerak kontrolatzea, baldin eta lokal batean normalean egiten direnak ez bezalakoak badira.
Jarduketa lerro hau ondoko neurri (N) hauen bidez gauzatuko da:
N1: Baimendutako jarduera.
N2: Baimenduta dagoen gehieneko jende kopurua.
N3: Ebakuazio bideen, irteeren eta larrialdiko ateen egoera.
N4: Ebakuazio seinalerik badagoen eta, egonez gero, zer egoeratan dauden.
N5: Larrialdiko argien funtzionamendua.
N6: Jarduteko ordutegiak.
N7: Erreklamazio orririk ba ote dagoen.
N8: Aretoetan sartzea kontrolatzeko sistemak eta langileak.
N9: Adingaberik ba ote dagoen.
N10: Adingabeek alkohola kontsumitzen ote duten.
N11: Berariazko baimena.
N12: Baimenean ezarritako baldintzak betetzen ote diren.
Ikuskapen eta Kontrol Plan hau jarduketa programen bidez gauzatuko da, eta programa horiek jarduketa lerro bakoitzaren lerro osoak edo neurri zehatzak izan eta garatu beharko dituzte.
Jarduketa programa gehienbat prebentziokoa izanen da, eta, horregatik, egin daitezkeen arau-hausteak eta legez kanpokoak prebenitzeko edo zuzentzeko jarduketak diseinatu edo aintzat hartu ahalko dira.
Honako hau izanen da jarduketa plan bakoitzaren gutxieneko edukia:
-J arduketa programaren xedea.
- Garatzen duen planaren lerroak edo neurriak zein diren.
- Bere baitan hartzen duen esparru geografikoa eta/edo jarduera sektorea.
- Ikuskapenen nondik norakoa eta maiztasuna.
- Hartzen diren prebentzio neurriak.
- Ikuskapenaren ardura duten unitateak.
Jarduketa programak proposatzeko eta onesteko, lehentasun irizpide hauek hartuko dira kontuan:
a) Babesten diren interes publikoen garrantzia, honako alderdi hauek aintzat hartuta, besteak beste:
1. Interes publikoak zer mailatan ukitzen diren.
2. Gertakarien munta, garrantzia eta konzentrazioa.
3. Delitu zantzuak atzematen ote diren.
4. Administrazio egoera.
b) Ikuskatu behar den gaiaren garrantzia edo ondorio juridiko, sozial nahiz ekonomikoak.
c) Jarduketarekin lortu nahi den prebentzio orokorreko eta bereziko eragina.
d) Arau-hausteen bidez bilatutako/lortutako onura ekonomikoa.
Segurtasun Politikak Garatzeko Zerbitzuko Zuzendaritza da jarduketa programak kudeatzen dituen unitatea, eta honako eginkizun hauek ditu:
a) Jarduketa programak prestatzea eta horiek onesteko proposatzea.
b) Jarduketa programak bultzatzea, koordinatzea eta kudeatzea.
c) Ikuskapen eta Kontrol Plana betearazteko onesten diren programak direla-eta, emaitzen ebaluazioari eta helburuak betetzeari buruzko txostena prestatzea.
d) Barne Zuzendaritza Nagusiari igortzea Ikuskapen eta Kontrol Plana eguneratzeko eta aldatzeko proposamenak.
Jarduketa programek urteko indarraldia izanen dute.
Komunikabide instituzionalen eta bitarteko elektroniko egokien bidez zabalduko dira jarduketa programen ebaluazio txostenaren emaitzak.
Halaber, jokoarekin zerikusia duten jarduketa programak ebaluatzeko txostena Nafarroako Jokoaren Kontseiluari emanen zaio.
Barneko zuzendari nagusiari dagokio jarduketa programak onestea, Segurtasun Politikak Garatzeko Zerbitzuaren Zuzendaritzak proposaturik.
Jokoaren eta ikuskizunen alorreko ikuskapenak, jarduketa programa bakoitzean ezarritako esparruan eginen dira.
Honako hauek gauzatuko dituzte ikuskapen eta kontrol eginkizunak:
a) Jokoaren alorrean:
- Foruzaingoak.
- Jokoa eta apustuak ikuskatzea eta kontrolatzea bere gain duten langileek, zeinak agintaritza-agente gisa arituko diren, aplikatzekoa den araudian ezarrita dagoenaren arabera (Jokoari buruzko abenduaren 14ko 16/2006 Foru Legearen 34.2 artikulua).
b) Ikuskizun publikoen eta josteta jardueren arloan:
- Foruzainek eta udaltzainek.
- Nafarroako Gobernuak edo toki entitateek izendaturiko langileek. Langile horiek, bere egitekoetan dihardutenean, agintaritza-agente gisa arituko dira, aplikatzekoa den araudian ezarrita dagoenaren arabera (Nafarroako ikuskizun publikoak eta josteta jarduerak arautzen dituen martxoaren 13ko 2/1989 Foru Legearen 17.2 artikulua).
Administrazioak honako hauen lankidetza eta laguntza izan ahalko ditu: ikuskatzen eta kontrolatzen diren gai eta alorretako teknikari kualifikatuak, adituak eta kontrol erakundeak.
Ikuskapenari eta kontrolari lotuta dauden establezimenduen eta jardueren titular eta arduradunak behartuta daude entitate laguntzaileetako teknikariei instalazioetan sartzen uztera, jokoaren eta ikuskizun publikoen alorrean eskumena duen organoak behar bezala akreditaturik dihardutenean.
Ikuskapen eta Kontrol Plana betearazteko onesten diren programei dagokienez, emaitzen ebaluazioari eta helburuak betetzeari buruzko txostenen bidez ondorioztatzen bada Ikuskapen eta Kontrol Planean aldaketak egin beharra dagoela, Barne Zuzendaritza Nagusiari jakinaraziko zaio, kontuan izan dezan eta, kasua bada, proposamena igorriko zaio plan hau onesteko eskumena duen organoari.
7. Administrazioen arteko koordinazioa.
Jarduketa programetan, dagokion udalari galdetu ondoan, eta bakoitzak dituen eskumenen esparruan, ikuskapeneko jarduketak aztertzen eta ituntzen ahalko dira, Nafarroako Gobernuko agintaritza-agenteen eta kasuan kasuko udalen agintaritza-agenteen artean, dauden baliabideak optimizatzeko eta, establezimendu berean edo ikuskizun nahiz jarduera beraren inguruan, beharrik gabe ikuskapen bat baino gehiago egitea ekiditeko.
Instruitzerakoan, lehentasuna emanen zaie onesten diren jarduketa programak gauzatzetik sortzen diren espediente zehatzaileei.
Jarduketa programez landa egiten diren salaketetan, eskaeretan edo erreklamazioetan aipatzen diren ustezko legez kontrakoak, ez dira lotesleak izanen instrukzioari begira, eta, arau-haustea egin delako zantzuak hautematen badira, prozedura abiatuko da, goian adierazi diren irizpideetan definitutako lehentasun hurrenkeraren arabera. Horrelakoetan, salatutako egintzak egiazkoak direla edo salatu bezala gertatu direla erakusten duten behar beste zantzu dagoela egiaztatzearren, zehapen prozedura tramitatzeko ardura duen unitateak eskatzen ahalko du idazkiaren edo deklarazioaren edukia berresteko, zabaltzeko, azaltzeko edo, eduki horri buruz, dagokion beste jarduketa bat egiteko.
Salaketa, eskaera edo erreklamazioak garbiro oinarririk gabekoak, ulertezinak edo anonimoak badira, ez dira instruituko eta artxibatu eginen dira; berdin jokatuko da susmo sendoa badago horiek aurkeztu direla planifikatuta dagoen edo gauzatzen ari den ikuskapena oztopatzeko.
Artxibatuz gero, salatzaileari jakinaraziko zaio zergatik ez den bidezkoa prozedura abiaraztea.
Aurkezten diren salaketak, eskaerak edo erreklamazioak garbiro oinarririk gabeak badira, erantzukizun ekonomikoak eskatzen ahalko zaizkio salatzaileari, Administrazioak izan dituen kostuengatik edo kalteengatik.
9. Ikuskapen eta Kontrol Planaren indarraldia.
Plan honek lau urteko indarraldia izanen du, onesten den egunetik kontatzen hasita, eta gehienez ere beste urtebeterako luzatutzat joko da, baldin eta epe hori amaitzean ez bada beste plan bat onetsi.
10. Ikuskapen eta Kontrol Plana eguneratzea.
Ikuskapen eta Kontrol Plana eguneratutzat joko da, baldin eta informazioa osatzen duten edo planaren determinazioak egoki ulertu, zehaztu edo inplementatzen laguntzen duten edukiak atxikiz gero. Bereziki, eguneratzetzat joko da lerro edo neurri berriak atxikitzea, baldin eta horiek inguruabar sozio-ekonomiko berrien ondoriozkoak badira, sektoreko legedian sartutako aldaketetatik eratorri badira edo beharrezkoak badira justizia auzitegiek hartutako erabakiak aplikatzeko.
Aurreko eguneratze horiek dagozkien jarduketa programen bidez eginen dira.
Iragarkiaren kodea: F1707790
