LEXNAVARRA
76/2016 FORU AGINDUA, EKAINAREN 27KOA, HEZKUNTZAKO KONTSEILARIAK EMANA, LANBIDE HEZIKETAKO TITULU OFIZIALAK LORTZEKO PROBEN DEIALDIAK EGITEKO BALDINTZA OROKORRAK EZARTZEN DITUENA
BON N.º 142 - 22/07/2016
1. ERANSKINA. OINARRIAK
2. ERANSKINA
3. ERANSKINA
Hezkuntzari buruzko maiatzaren 3ko 2/2006 Lege Organikoak, bere 69.4 artikuluan, eskumena ematen die hezkuntza administrazioei Lanbide Heziketako tituluak lortzeko probak antolatzeko aldian behin, betiere 40. artikuluan ezarritako helburuak betetzen direla frogatuz gero.
Lanbide Kualifikazioei eta Lanbide Heziketari buruzko ekainaren 19ko 5/2002 Lege Organikoak, bere 8. artikuluan, ezartzen du Lanbide Heziketako tituluak ofizialak eta baliogarriak izanen direla Espainia osoan, eta kasuan kasuko lanbide kualifikazioak frogatzen dizkietela haiek eskuratzen dituztenei.
Hezkuntza sistemako Lanbide Heziketaren antolamendu orokorra ezartzen duen uztailaren 29ko 1147/2011 Errege Dekretuak, bere 36. artikuluan, xedatzen du hezkuntza administrazioei dagokiela proba horiek aldian behin antolatzea, eta, beren eskumenen esparruan, haien deialdia egitea gutxienez urtean behin, eta, orobat, zehaztea zein diren proba horien xedeko heziketa zikloetako lanbide moduluak, noiz den matrikulazio epea, zein egunetan eta zein ikastetxe publikotan eginen diren eta zein izanen diren proben edukiei dagozkien curriculumak. Era berean, 37. artikuluan zehazten du zein diren probetan parte hartzeko baldintzak eta adinari buruzko betebeharrak.
Lan merkatuaren bilakaera ikusita, gero eta beharrezkoagoak dira kualifikazioa eta egiaztapena. Izan ere, zenbait lanbide jardueratan aritzeko, oso ohikoa da lanbide heziketako titulu ofizialak edo lanbide ziurtagiriak eduki beharra eskatzea. Nafarroako enpresa, instituzio eta elkarteetan, hainbat eta hainbat langilek ez dute beren lanbide kualifikazioaren egiaztapenik. Hori dela eta, Lanbide Heziketako teknikari tituluak eta goi mailako teknikari tituluak lortzeko proben deialdia egitea Hezkuntza Departamentuaren beste ekarpen bat da langile horien lanbide kualifikazioa egiaztatzen duten titulazio ofizialak emateko.
Egoera horretan, gomendagarria da proba libreak arautzeko arau-esparru berri bat ezartzea, non berariazko deialdiak aurreikusiko baitira eremu edo kolektibo jakin batzuentzat, hots, Nafarroako Komunitatearentzat duten interes bereziagatik edo kasuan kasuko lanbide jarduera arautzen duten inguruabar bereziengatik, besteak beste, deialdian arreta berezia behar dutenentzat.
Lanbide Heziketako titulu ofizialak lortzeko proba libreak arautzeari buruz Lanbide Heziketaren Zerbitzuak emandako adostasun txostena ikusirik, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1.d) artikuluak emandako ahalmenak erabiliz,
AGINDU DUT:
1. Lanbide Heziketako titulu ofizialak lortzeko proben deialdiak egiteko baldintza orokorrak ezartzea, 1. eranskineko oinarrietan xedatzen denari jarraikiz.
2. Foru agindu hau eta eranskinak Nafarroako Aldizkari Ofizialean argitaratzea.
3. Ebazpen hau eta eranskinak igortzea Hezkuntzako Ikuskapen Zerbitzuari, Lanbide Heziketaren Zerbitzuari; Lanbide Gaitasunak Egiaztatzeko eta Iturrondo Zentroaren Atalari eta Programak Garatzeko Atalari, biak Nafar Lansare-Nafarroako Enplegu Zerbitzukoak baitira; Lanbide Heziketaren Plangintza, Antolamendu eta Garapenerako Atalari eta Lanbide Kualifikazioen Atalari; Eskolatze Bulegoari eta Argibide eta Agiri Bulegoari, behar diren ondorioak izan ditzaten.
1. ERANSKINA. OINARRIAK
1. Xedea.
Deialdi honen xedea da Lanbide Heziketako titulu ofizialak lortzeko proben deialdiak egiteko baldintza orokorrak ezartzea.
2. Proben deialdia.
2.1. Proben deialdiak aldian behin eginen ditu Hezkuntza Zuzendaritza Nagusiak. Deialdi bakoitzean honako hauek zehaztuko dira: xedeko heziketa zikloak, matrikulatzeko epea, probak egiteko egunak eta zein ikastetxe publikotan eginen diren.
2.2. Deialdiak orokorrak izan daitezke, hau da, interesaturik egon daitezkeen pertsona guztientzat, edo berariazkoak, hots, Nafarroako Komunitatearentzat duten interes bereziagatik edo kasuan kasuko lanbide jarduera arautzen duten inguruabar bereziengatik, besteak beste, deialdian arreta berezia behar duten eremu edo kolektibo jakin batzuentzat.
3. Probetan izena emateko bete beharrekoak.
3.1. Oinarrizko lanbide titulua lortzeko probetan izena emateko, proba egiten den unean gutxienez hemezortzi urte izatea eskatuko da, eta, orobat, oinarrizko araudian ezartzen diren baldintzak betetzea.
3.2. Lanbide Heziketako teknikari tituluak lortzeko probetan izena emateko, baldintza hauek bete beharko dira:
a) 18 urte izatea, eta gainera:
b) Ondoren zehazten diren titulazio edo prestakuntzetako bat izatea:
- Derrigorrezko Bigarren Hezkuntzako graduatu titulua edo maila goragoko beste ikasketa titulu bat izatea.
- Teknikari titulua izatea.
- Teknikari laguntzailearen titulua izatea.
- Goi mailako batxiler titulua izatea.
- Gainditua izatea ikastetxe publikoetan edo hezkuntza administrazioak baimendutako ikastetxe pribatuetan erdi mailako heziketa zikloetara sartzeko berariazko prestakuntza ikastaroa.
- Gaindituak izatea Batxilergo Bateratu Balioaniztuneko lehenengo bi kurtsoak, gehienez bi ikasgai utzita gainditu gabe.
- Gainditua izatea erdi mailako irakaskuntzen erreforma esperimentaleko lehen zikloko bigarren maila.
- Gainditua izatea Arte Aplikatuen eta Lanbide Artistikoen irakaskuntzen 1963ko Planeko hirugarren maila, edo plan esperimentaleko guztientzako ikasmailetatik bigarrena.
- Gaindituak izatea ondorio akademikoetarako aurreko horietako baten baliokide diren beste ikasketa batzuk edo prestakuntza ikastaro batzuk.
- Gainditua izatea erdi mailako edo goi mailako heziketa zikloetan sartzeko proba.
- Gainditua izatea 25 urtetik gorakoak unibertsitatean sartzeko proba.
3.3. Lanbide Heziketako goi mailako teknikari tituluak lortzeko probetan izena emateko, baldintza hauek bete beharko dira:
a) 20 urte izatea, edo hemeretzi urte eta teknikari titulua izatea, eta gainera:
b) Ondoren zehazten diren titulazio edo prestakuntzetako bat izatea:
- Batxiler titulua edo maila goragoko beste ikasketa titulu bat izatea.
- Erdi mailako teknikari titulu bat edukitzea eta gainditua izatea ikastetxe publikoetan edo hezkuntza administrazioak baimendutako ikastetxe pribatuetan goi mailako zikloetan sartzeko berariazko prestakuntza ikastaro bat.
- Gainditua izatea goi mailako heziketa zikloetan sartzeko proba edo 25 urtetik gorakoak unibertsitatean sartzeko proba.
- Hezkuntza Sistemaren Antolamendu Orokorrerako urriaren 3ko 1/1990 Lege Organikoak araututako Batxilergo titulua edukitzea.
- Batxilergo Esperimentaleko edozein modalitatetako bigarren maila gainditua izatea.
- Unibertsitatera Bideratzeko Ikasturtea edo unibertsitate aurrekoa gainditua izatea.
- Teknikari espezialisten titulua, goi mailako teknikari titulua edo ondorio akademikoetarako horien baliokidea den beste titulu bat izatea.
- Unibertsitate titulu bat edo horren baliokide bat izatea.
3.4. Baldintza horietako bat bete ezean edo hurrengo oinarrian zehazten diren bateraezintasun egoeretan egonez gero, proben deialdiko matrikula eta, hala badagokio, probetan lortutako emaitza akademikoak deuseztatuko dira.
4. Prozeduren bateraezintasuna.
4.1. Uztailaren 29ko 1147/2011 Errege Dekretuaren 37.4 artikuluak ezartzen duen bezala, ikasle bat ezin da matrikulaturik egon ikasturte batean lanbide modulu berean autonomia erkidego batean baino gehiagotan, eta, halaber, ezin da batera matrikulaturik egon lanbide modulu berean presentziazko eta urrutiko modalitateetan.
Bestalde, Hezkuntzari buruzko maiatzaren 3ko 2/2006 Lege Organikoaren arabera Lanbide Heziketaren kasuan kasuko tituluaren baliokidetzat hartzen den Lanbide Heziketako tituluren bat dutenak ere ezin izanen dira matrikulatu proba horietan.
Bateraezina izanen da, orobat, ebazpen honetan araututako probetan matrikulatzea eta, aldi berean, zer modulutan matrikulatzen den, haiei dagozkien gaitasun unitateetako lanbide gaitasunak ebaluatu eta egiaztatzeko prozedura bateko ebaluazio fasean parte hartzea.
4.2. Oinarrizko lanbide titulua, teknikari titulua edo goi mailako titulua lortzeko asmoz ebazpen honetan araututako probetan matrikulatzeak eta, aldi berean, 4. oinarrian aipatutako egoeretan matrikulatua egoteak edo parte hartzeak berarekin ekarriko du ofizioz deuseztatzea dagokion moduluko matrikula.
5. Probetan parte hartzeko inskripzioa.
5.1. Lanbide Heziketako tituluak lortzeko probetan parte hartzeko eskaera zein epetan eta zein ikastetxetan egin behar den deialdi bakoitzean ezarriko da. Horrez gainera, deialdi bakoitzean aplikatuko diren onarpen irizpideak zehaztuko dira, baita onarpen prozesuaren emaitzak argitaratzeko prozedurak eta datak ere.
5.2. Probetan parte hartzea eskatzen duten pertsonek eskabide bakarra aurkeztuko dute, kasuan kasuko deialdian ezartzen den ereduaren araberakoa, eta bertan adieraziko dute zein modulutan inskribatu nahi diren. Eskabidearen eredua Nafarroako Gobernuaren Zerbitzuen Katalogoaren fitxa honetan eskuratzen ahalko da: “Lanbide Heziketako tituluak lortzeko proba libreak”. Pertsona batek eskabide bat baino gehiago aurkezten badu, haietako bat ere ez da kontuan hartuko, eta prozesutik kanpo geldituko da.
5.3. Honako kasu hauetan, ez da beharrezkoa izanen baliozkotzen ahal diren moduluetan inskribatzea:
- Heziketa zikloetako lanbide moduluak gaitasun unitateak frogatuz baliozkotzen ahal direnean.
- Lanerako Prestakuntza eta Orientabideak modulua baliozkotzen ahal denean.
LOEko heziketa zikloetako lanbide moduluak baliozkotzen ahal direnean LOGSEko zikloetako zenbait lanbide modulu gainditu direla frogatuz (LOEko IV. eranskinean sartutako moduluak).
- Enpresa eta Ekimen Sortzailea modulua baliozkotzen ahal denean.
- Deialdian ezartzen diren beste baliozkotze kasu batzuetan.
Onartua izanez gero, matrikula egitearekin batera eskatuko dira kasuan kasuko baliozkotzeak, 7. oinarrian zehazten den prozeduraren bidez.
5.4. Izena emateko eskabidearekin batera agiri hauek aurkeztuko dira:
a) Nortasun agiri nazionalaren fotokopia, pasaportearena, nortasuna frogatzen duen bidaia agiri batena, bisarena edo atzerritarren identifikazio txartelarena.
b) Titulazio edo prestakuntza akademikoa frogatzen duen egiaztagiriaren fotokopia.
c) Ikasketa espedientearen fotokopia.
d) Hala badagokio, laneko esperientzia frogatzea, agiri hauek aurkeztuta:
d.1) Soldatapeko langileen eta langile autonomoen edo bere kontura ari direnen kasuan:
- Lantoki izandako enpresaren edo erakundearen ziurtagiria, datu hauek berariaz adierazita: kontratuaren iraupena, egindako jarduera eta zenbat denbora egin duen lan horretan. Bere kontura ari diren langileen kasuan, tributupekoen zentsuan izena emanak daudela frogatzea, urtebeteko antzinatasunarekin gutxienez, eta egindako jarduera adierazgarrienei buruz interesdunak egindako aitorpena.
Gizarte Segurantzako Diruzaintza Orokorraren edo Lan Mutualitatearen ziurtagiria, non enpresa, lanbide kategoria, kotizazio taldea eta kontratazioaldia adieraziko baitira, edo, betiere, Langile Autonomoen Araubide Berezian izandako kotizazioaldia, edo, bestela, zuzenbidearen araberakoa den beste edozein frogabide.
d.2) Boluntario gisa, bekadun gisa edo antzeko modu batean lan egin dutenen kasuan:
- Zerbitzuak zer erakundetan eman diren, hark emandako ziurtagiria, berariaz adierazita honako hauek, urte natural bakoitzerako zerrendatuak: egindako jarduerak eta eginkizunak, zer urtetan egin diren eta horietan emandako orduen kopuru zehatza.
e) Desgaitasunen bat duela edo goi mailako edo errendimendu handiko kirolaria dela frogatzeko agiriak, hala dagokionean.
6. Matrikula.
6.1. Foru agindu honetan araututako probak egiteko matrikula kasuan kasuko deialdian ezartzen diren ikastetxeetan eta egunetan egin beharko da.
6.2. Lanbide moduluka edo ziklo osoa hartuta egiten ahalko da matrikula, deialdian ezartzen denari jarraikiz. Ziklo osoaren matrikula egiteko aukera izanez gero, Lantokiko Prestakuntza modulua sartuta egonen da, nahiz eta modulu horretan ez den eskatuko proba bat gainditzea.
6.3. Modulu guztietan, erreserba hauek eginen dira eskaintzen diren 60 plazako:
- 2 toki desgaitasunen bat dutenentzat.
- 2 toki goi mailako edo errendimendu handiko kirolarientzat, Goi mailako eta errendimendu handiko kirolariei buruzko uztailaren 13ko 971/2007 Errege Dekretuan aurreikusitakoaren arabera.
6.4. Nafarroako Foru Komunitateko Administrazioaren eta haren erakunde autonomoen tasei eta prezio publikoei buruzko martxoaren 27ko 7/2001 Foru Legearen 99. artikuluan xedatutakoari jarraituz (lege hori tributu arloko neurriei buruzko abenduaren 24ko 28/2014 Foru Legearen bidez aldatu egin zen, abenduaren 30eko 1621/2005 Errege Dekretuari dagokionez, zeinaren bidez Familia Ugariak Babesteko azaroaren 18ko 40/2003 Legearen Erregelamendua onetsi zen), honako hauek dira Lanbide Heziketako oinarrizko lanbide titulua, teknikari titulua edo goi mailako teknikari titulua lortzeko proba libreetan matrikulatzeko tasak modulu bakoitzeko:
- Tarifa arrunta: 10 euro.
- 1. kategoriako familia ugariko kideak (kategoria orokorra): 5 euro.
- 2. kategoriako familia ugariko kideak (kategoria berezia): doan.
7. Gainditutako moduluak baliozkotzea eta aitortzea.
7.1. Kasuan kasuko ebazpenaren bidez onesten den deialdiko probei dagokien moduluren batean matrikulaturik daudenek eska dezakete gainditutako moduluak baliozkotu edo aitortzea, hala badagokie, indarreko araudian ezarritakoa betez.
7.2. Baliozkotzea prozesu akademiko eta administratibo bat da, zeinaren bidez, ikasleak eskatuta, zehazten baita ikasleak matrikulatua dagoen modulu bat edo gehiago ez dituela egin behar, ulertzen baita modulu horiek gainditutako beste modulu batzuen, beste ikasketa batzuen edo beste bide batzuetatik eskuratutako gaitasun-unitate batzuen berdinak direla edukien eta irakastorduen aldetik, indarrean den araudiaren arabera.
Honako hau izanen da moduluak baliozkotzeko prozedura:
- Moduluak baliozkotzeko eskaera guztiak ikastetxeko zuzendaritzari igorriko zaizkio, 2. eranskineko ereduarekin bat, eta kasuan kasuko deialdian adierazten den epean aurkeztuko dira.
- Eskaerak ikastetxeko zuzendaritzak ebatziko ditu.
- Moduluak baliozkotzeko aldeko ebazpenak eragina izateko, ikasleak modulu horien matrikulazioa egin beharko du. Hura “Baliozkotua” bezala erregistratuko da ikaslearen ikasketa-espedientean, ebaluazio aktetan eta ikasketen ziurtagirian. Modulu horiek 5eko puntuazioa izanen dute zikloko batez besteko nota zehaztearen ondorioetarako.
7.3. Gainditutako moduluak aitortzea prozesu akademiko eta administratibo bat da, zeinaren bidez, ikasleek eskatuta, erabakitzen baita ikasleak matrikulatua dagoen heziketa zikloko modulu bat edo gehiago ez dituela egin behar aurretik egindako beste batzuen berdin-berdinak direlako eta horien azken kalifikazioa positiboa izan delako, hau da, 5 edo gehiago.
Honako hau izanen da gainditutako moduluak aitortzeko prozedura:
- Gainditutako moduluak aitortzeko eskaera guztiak ikastetxeko zuzendaritzari igorriko zaizkio, 3. eranskineko ereduarekin bat, eta kasuan kasuko deialdian adierazten den epean aurkeztuko dira.
- Eskaerak ikastetxeko zuzendaritzak ebatziko ditu.
- Gainditutako moduluak aitortzearen aldeko ebazpenak eragina izateko, ez da beharrezkoa izanen modulu horiei dagokien matrikula egitea. Gainditutako moduluen kalifikazioa ikaslearen ikasketa-espedientera eramanen da. Horrenbestez, batez besteko nota ateratzearen ondorioetarako, modulu horiek kalifikatuko dira egin eta gainditu diren heziketa zikloetan lortutako azken notarekin.
Halaber, gainditutako moduluen baliozkotzea eta aitorpena eskatzeko prozedura eta haiek ebazteko eskumena indarreko araudian ezarritakoak izanen dira.
8. Ebaluazio batzordeak.
8.1. Heziketa ziklo guztietan, proben xedeko lanbide moduluen ziklo bakoitzerako ebaluazio batzorde bat eratuko da azterketako ikastetxe bakoitzean. Lanbide Heziketaren Zerbitzuak batzorde bat baino gehiago edo/eta koordinazio batzorde bat eratzea baimentzen ahal du, inguruabar bereziak gertatzen direnean. Baimen horretarako eskaera prozesuan parte hartzen duten ikastetxeetako zuzendariek eginen dute, eta zehaztuko dute zer dela-eta eskatzen den.
8.2. Ebaluazio batzordeetako kideak Lanbide Heziketaren Zerbitzuko zuzendariak izendatuko ditu. Izendapen horretan, halaber, ebaluazio batzordeko kide bakoitzari esleitutako lanbide modulua jasoko da.
8.3. Ebaluazio batzordeak eginkizun hauek izanen ditu:
- Izangaiak hartzeko eta barematzeko prozesua antolatu eta kudeatzea.
- Emandako baremazioari eta, beraz, onarpen zerrendari izangaiek egiten dizkieten erreklamazioak ebaztea.
- Prozesua antolatu eta kudeatzea eta probak prestatzea, 9. oinarrian eta Lanbide Heziketaren Zerbitzutik jasotzen diren orientabideetan zehaztutako irizpideen arabera.
- Ariketak eta probak egitea.
- Izangaiek egiten dituzten ariketak eta probak kalifikatzea.
- Kalifikazioen erregistroko agiriak betetzea.
- Emandako kalifikazioei izangaiek egiten dizkieten erreklamazioak ebaztea.
- Izangaiak probak egitera joan direla egiaztatzea, haiek hala eskatzen dutenean.
- Lanbide Heziketaren Zerbitzuko zuzendariak, helburuak behar bezala betetzeko, esleitzen dion beste edozein, betiere bere jarduketa eremuaren barnean.
8.4. Ebaluazio batzordeek, oro har, kide hauek izanen dituzte:
- Buru bat, probaren xedeko heziketa zikloaren lanbide arloari dagokion departamentuko burua izanen dena.
- Behar adina kide, Bigarren Hezkuntzako katedradun eta irakasleen kidegoetakoak, Lanbide Heziketako irakasle teknikoak, bitarteko irakasleak eta espezialistak izanen direnak, probak egiten diren ikasturterako izendatuak. Batzordekideen kopuruak bermatu behar du batzordeak ebaluatu behar dituen ikasleen lanbide modulu guztietarako badagoela kide bat heziketa ziklo horretan berean irakasten duena, edo, hori posible izan ezean, indarreko araudiaren arabera hori irakasteko esleipena duen kide bat, edo irakasle espezialistei esleitutako moduluetan irakasteko gaikuntza duen kide bat. Idazkari lanetan, batzordekiderik zaharrena arituko da.
8.5. Batzordeak ahalik eta kide gutxienekin eratuko dira. Lanbide modulu bakoitza batzordeko kide bakar bati esleituko zaio. Heziketa zikloaren berezitasunagatik edo matrikulatu diren izangaien kopuruagatik komenigarria denean batzordeko kideen kopurua edo modulu bati esleitutako kideen kopurua handitzea, Lanbide Heziketaren Zerbitzuak baimentzen ahal du igoera hori, betiere ukitutako ikastetxeetako zuzendariek eskatzen badute, arrazoiak justifikatuta.
Ebaluazio batzordea ezin da eratu, inondik ere, hiru kide baino gutxiago izanik. Idazkari lanetan, batzordekideek beraiek aukeratutako kide bat arituko da, edo, hala izan ezean, irakasle gisa antzinatasun txikiena duen kidea.
8.6. Probak egiteko izendatzen diren ebaluazio batzordeko eta koordinazio batzordeko kideek konpentsazio ekonomikoak jasoko dituzte egindako jarduerengatik, giza baliabideak eta nominak kudeatzeko sisteman ezarrita dagoen elementu aldakorren zerrendako kontzeptuen ordainean.
9. Proben prestaketa, egitura eta edukiak.
9.1. Izendatzen diren ebaluazio batzordeek ikasle matrikulatuak dauden heziketa zikloetako lanbide modulu bakoitzerako probak prestatuko dituzte, oro har, salbu eta Lantokiko Prestakuntza moduluaren kasuan, hori ez baita gainditzen proba baten bidez.
9.2. Proben edukiari dagokionez, Nafarroako Foru Komunitatean indarra duten heziketa zikloetako ikasketa planei edo curriculumei eta haien kasuan kasuko gaitasun profesionalei buruzkoak izanen dira. Probek eduki teorikoak eta praktikoak izanen dituzte, halakoak non kasuan kasuko ebaluazio irizpideen bidez agerian gelditzen ahal baita ikasleek behar diren ikaskuntza emaitzak edo trebetasunak lortu dituztela, eta, hala dagokionean, lanbide moduluari lotutako gaitasunak.
9.3. Lanbide modulu batzuetan, haien ezaugarriengatik eta bereizgarritasunarengatik beharrezkotzat jotzen denean, ebaluazio batzordeak erabakitzen ahal du proba zati batean baino gehiagotan banatzea, eta zehazten ahal du, hala erabakiz gero, aurreko zatia gaindituta eduki behar dela hurrengo zatia egiteko. Halakoetan, matrikulatutako ikasleei horren berri emanen zaie, ondoko artikuluan xedatu bezala.
10. Probak egitea.
10.1. Probak, oro har, kasuan kasuko deialdian ezartzen den aldian eginen dira.
10.2. Ebaluazio batzordeak prestatuko du azterketaren xedeko lanbide moduluen probak egiteko egutegi zehatza.
Halako eran prestatuko da egutegia non ariketak ez baitira izanen kasuan kasuko lanbide modulua irakasteko esleipena duten irakasleen irakastorduetan. Orobat, ahaleginak eginen dira, probak direla eta, ikastetxeko gainerako ikasleei trabarik ez egiteko.
Probak egiteko egutegia eta, ebaluazio batzordearen arabera, izangaiek proben garapenari buruz aurretik ezagutu behar dituzten alderdiak ikastetxeko iragarki oholean argitaratuko dira, probak egin baino 15 egun lehenago, gutxienez.
11. Kalifikazioen ebaluazioa, erregistroa eta argitalpena.
11.1. Probak ebaluatzeko erreferentziak honako hauek izanen dira: lanbide modulu bakoitzaren gaitasunak, ikaskuntzaren emaitzak eta ebaluazio irizpideak, baita nola egiten den eta egiteko ezartzen diren irizpideak ere.
11.2. Lanbide modulu bakoitzaren ebaluazioaren zehaztapena eta, hala denean, heziketa zikloaren azken kalifikazioa apirilaren 8ko 52/2009 Foru Aginduaren 17. artikuluan ezarritako moduan eginen dira.
11.3. Lortutako kalifikazioen erregistroa apirilaren 8ko 52/2009 Foru Aginduaren 27. eta 28. artikuluetan xedatu bezala eginen da, horretan finkatutako ebaluazio agirietan.
11.4. Kalifikazioen jakinarazpen ofiziala eginen da azterketa egin duen ikastetxeko iragarki oholean argitaratuz.
Jakinarazi beharreko kalifikazioak proba bateko zati batenak direnean, eta hurrengo zatia egiteko eskatzen bada aurreko zatia gainditua izatea, bide beretik argitaratuko dira kalifikazioak, hurrengo ariketa egin baino bost egun baliodun lehenago.
12. Kalifikazioen gaineko erreklamazioak.
Apirilaren 8ko 52/2009 Foru Aginduaren 18. artikuluan eta maiatzaren 21eko 49/2013 Foru Aginduan ezarritako prozeduraren arabera eginen dira kalifikazioen gaineko erreklamazioak. Foru agindu horren bidez, Nafarroako Foru Komunitateko ikastetxeetan ematen diren unibertsitateaz kanpoko irakaskuntzetako ikasleak ebaluatzeko prozesuan erreklamazioak egiteko sistema ezarri zen.
13. Dokumentazio akademikoa.
Lanbide Heziketako tituluak eskuratzeko probak egiteko ikasleak matrikulatzen dituzten ikastetxeek ikasketa-espediente bana irekiko diete ikasleei.
Ebaluazio agiriak eta ikasketen egiaztagiriak 52/2009 Foru Aginduaren VIII. kapituluan ezarritakoak izanen dira.
14. Titulazioa.
Deialdiaren xedeko probak bukatuta, heziketa ziklo jakin bateko lanbide modulu guztiak gainditzen dituztenek dagokien titulua eskatzen ahalko dute, 52/2009 Foru Aginduaren IX. kapituluan ezarri bezala.
15. Lantokiko Prestakuntza modulua.
15.1. Lantokiko Prestakuntza modulua modu presentzialean eginen da, titulu bakoitzaren curriculumeko gainerako moduluak gainditu ondoren. Nafarroako Foru Komunitatean titulua eskuratzeko bide hau erabiliz gainerako lanbide moduluak gainditzen dituztenei eskainiko zaie modulu hau.
15.2. Proben deialdiren baten xedeko moduluren batean matrikulaturik dagoenak, curriculumeko gainerako moduluak gainditu ondoren, eska eta lor dezake Lantokiko Prestakuntza modulua egitetik salbuestea, baldin eta gutxienez urtebeteko lan esperientzia frogatzen badu matrikulaturik dagoen heziketa zikloarekin zerikusia duen arlo batean, lanaldi oso bateko konputua kontuan harturik.
15.3. Lantokiko Prestakuntza modulua egitetik salbuestea eskatzen duten pertsonek, oro har, dokumentazio hau aurkeztu beharko dute:
a) Besteren konturako langileen kasuan:
- Gizarte Segurantzako Diruzaintza Orokorraren, Itsasoko Gizarte Institutuaren edo afiliatuta dauden mutualitatearen ziurtagiria (lan bizitza). Ziurtagiri horretan enpresa, lan kategoria (kotizazio taldea) eta kontratazioaldia jaso behar dira.
- Lantoki izan duen enpresaren ziurtagiria edo lan kontratua, datu hauek adierazita: kontratuen iraupena, egindako lana eta zenbat denbora eman duten lan horretan.
b) Langile autonomoen edo norberaren konturako langileen kasuan:
- Gizarte Segurantzako Diruzaintza Orokorraren edo Itsasoko Gizarte Institutuaren ziurtagiria (lan bizitza), Gizarte Segurantzan dagokion araubide berezian afiliatuta egondako aldiei buruzkoa.
- Egindako lanaren azalpena eta zenbat denbora eman den lan horretan.
c) Langile boluntarioen edo bekadunen kasuan:
- Laguntza zer erakundetan eman den, hark egindako ziurtagiria, berariaz adierazita honako hauek: egindako lanak eta eginkizunak, zer urtetan egin diren eta horietan emandako orduen kopuru zehatza.
2. ERANSKINA
<a target='_blank' href='http://www.navarra.es/appsext/DescargarFichero/default.aspx?CodigoCompleto=Portal@@@epub/BON/AEDUCACION/F1608015_Eranskina2.pdf'>MODULUAK BALIOZKOTZEKO ESKAERA>
3. ERANSKINA
<a target='_blank' href='http://www.navarra.es/appsext/DescargarFichero/default.aspx?CodigoCompleto=Portal@@@epub/BON/AEDUCACION/F1608015_Eranskina3.pdf'>Moduluak aitortzeko eskaera>
