(ir al contenido)

navarra.es

Castellano | Euskara | Français | English

LEXNAVARRA


Versión para imprimir

Versión en castellano

129/2015 FORU DEKRETUA, ABUZTUAREN 28KOA, HERRITARREKIKO ETA ERAKUNDEEKIKO HARREMANETAKO DEPARTAMENTUAREN EGITURA ORGANIKOA EZARTZEN DUENA Nota de Vigencia

BON N.º 170 - 31/08/2015; corr. err., BON 16/09/2015



  I. KAPITULUA. XEDAPEN OROKORRAK


  II. KAPITULUA. KOMUNIKAZIOKO ETA ERAKUNDEEKIKO HARREMANETAKO ZUZENDARITZA NAGUSIA

  1. ATALA. ESKUMENEN ESPARRU MATERIALA ETA EGITURA

  2. ATALA. KOMUNIKAZIO ZERBITZUA

  3. ATALA. ERAKUNDEEN PROIEKZIOAREN ZERBITZUA

  4. ATALA. HERRITARREN ARRETARAKO ETA PARTAIDETZARAKO ZERBITZUA


  III. KAPITULUA. Bakearen, Bizikidetzaren eta Giza Eskubideen Zuzendaritza Nagusia Nota de Vigencia

  1. ATALA. Eskumenen esparrua eta egitura

  2. ATALA. Bizikidetzaren eta Giza Eskubideen Zerbitzua

  3. ATALA. Memoriaren Nafarroako Institutua


  IV. KAPITULUA. NAFARROAKO GOBERNUAREN BRUSELAKO ORDEZKARITZA


  V. KAPITULUA. IDAZKARITZA TEKNIKO NAGUSIA


Atariko

Nafarroako Foru Komunitateko lehendakariaren uztailaren 22ko 8/2015 Foru Dekretuaren bidez (142. Nafarroako Aldizkari Ofizialean argitaratua, uztailaren 23an), Nafarroako Foru Komunitateko departamentuen egitura ezarri zen, baita departamentu bakoitzari zegokion eskumen esparrua ere. Foru dekretu hori lehendakariaren abuztuaren 10eko 23/2015 Foru Dekretuak aldatu zuen (156. Nafarroako Aldizkari Ofizialean argitaratua, abuztuaren 12an).

Orobat, abuztuaren 12ko 55/2015 Foru Dekretuaren bidez, Herritarrekiko eta Erakundeekiko Harremanetako Departamentuaren oinarrizko egitura erabaki zen, haren garapena galarazi gabe. Foru dekretu hori 157. Nafarroako Aldizkari Ofizialean argitaratu zen, abuztuaren 13an.

Beraz, foru dekretu honek bi xede ditu: Herritarrekiko eta Erakundeekiko Harremanetako Departamentuaren egitura organiko berria finkatzea eta garatzea.

Horrenbestez, Herritarrekiko eta Erakundeekiko Harremanetako kontseilariak proposaturik, eta Nafarroako Gobernuak 2015eko abuztuaren 28an egindako bilkuran harturiko erabakiarekin bat,

DEKRETATU DUT:

I. KAPITULUA. XEDAPEN OROKORRAK

1. artikulua. Herritarrekiko eta Erakundeekiko Harremanetako Departamentuaren eskumenen esparrua Nota de Vigencia.

Herritarrekiko eta Erakundeekiko Harremanetako Departamentuari dagokio Nafarroako Foru Komunitateko Administrazioak honako arlo hauetan bereganatuak dituen eskumenez baliatzea: hizkuntza politika; gizon eta emakumeen arteko berdintasun politikak; bakeari, bizikidetzari eta giza eskubideei buruzko politikak; ikerlan estrategiakoak; herritarren parte-hartzea bultzatzeko politikak; lehendakariari laguntzea; Parlamentuarekiko eta Foru Komunitateko, autonomia erkidegoetako, Espainiako eta Europako beste erakunde batzuekiko harremanak; Nafarroako Gobernuaren erakunde irudia babestu, garatu eta sustatzea; Europar Batasuneko erakundeetan parte hartzea; Nafarroako Gobernuaren Bruselako delegazioa; informazio politika koordinatzea; herritarrentzako arreta; komunikabideak; Nafarroako Gobernuaren agerpena Interneten eta sare sozialetan; Foru Komunitatetik kanpo bizi diren nafarrekiko eta Nafarroako Etxe eta Zentroekiko koordinazioa; bai eta indarra duten xedapenetan emandako gainerako eskudantziak ere.

2. artikulua. Herritarrekiko eta Erakundeekiko Harremanetako Departamentuko titularra Nota de Vigencia.

1. Herritarrekiko eta Erakundeekiko Harremanetako Departamentuko titularrak, foru dekretu honen 1. artikuluan zehaztutako eskumen esparruari loturik, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluan ezarritako eskudantziak izanen ditu.

2. Bereziki, eskudantzia hauek erabiltzea dagokio:

a) Diru-laguntza deialdiak eta haien oinarri arautzaileak onestea.

b) Lankidetza hitzarmenak eta elkarlanerako hitzarmenak eta akordioak sinatzea Estatuarekin, autonomia erkidegoekin eta beste administrazio publiko batzuekin.

c) Bere eskumenen esparruan beste administrazio batzuekin batera jarduteko planak onestea.

3. Herritarrekiko eta Erakundeekiko Harremanetako Departamentuko titularrari dagokio, halaber, Euskararen Nafar Kontseiluko lehendakaritza.

4. Herritarrekiko eta Erakundeekiko Harremanetako Departamentuko titularrari sostengu politiko eta teknikoa emateko unitate gisa, departamentuan Kabinetea dago, Nafarroako Gobernuari eta Lehendakariari buruzko abenduaren 3ko 14/2004 Foru Legearen 19. artikuluari lotua dagoena, zuzenean Departamentuko titularraren mende.

3. artikulua . Herritarrekiko eta Erakundeekiko Harremanetako Departamentuaren antolaketa orokorra.

1. Herritarrekiko eta Erakundeekiko Harremanetako Departamentuak, bere titularraren goi zuzendaritzapean, honako organo hauek izanen ditu bere egituran:

a) Komunikazioko eta Erakundeekiko Harremanetako Zuzendaritza Nagusia.

b) Bakearen, Bizikidetzaren eta Giza Eskubideen Zuzendaritza Nagusia.

c) Nafarroako Gobernuaren Bruselako Ordezkaritza.

d) Departamentuko Idazkaritza Tekniko Nagusia.

2. Euskarabidea-Euskararen Nafar Institutua izeneko erakunde autonomoa Herritarrekiko eta Erakundeekiko Harremanetako Departamentuari atxikita dago, eta bere estatutuen bidez arautuko da.

3. Nafarroako Administrazio Publikoaren Institutua (NAPI) izeneko erakunde autonomoa Herritarrekiko eta Erakundeekiko Harremanetako Departamentuari atxikita dago, eta bere estatutuen bidez arautuko da.

4. artikulua . Zuzendaritza nagusien eskudantziak.

Foru dekretu honen 2.2 artikuluan ezarritakoa galarazi gabe, Herritarrekiko eta Erakundeekiko Harremanetako Departamentuko zuzendaritza nagusiek, departamentuko titularraren goi zuzendaritzapean eta foru dekretu honetan bakoitzari esleitutako esparruan, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluan eta azken xedapenetako lehenbizikoan ezarritako eskudantziak izanen dituzte eta, horietaz gainera, indarra duten xedapenek esleitzen dieten edo Herritarrekiko eta Erakundeekiko Harremanetako Departamentuko titularrak agintzen dien beste edozein.

5. artikulua . Idazkaritza Tekniko Nagusiaren eskudantziak.

Herritarrekiko eta Erakundeekiko Harremanetako Departamentuko Idazkaritza Tekniko Nagusiak, foru dekretu honen 1. artikuluan zehaztu den eskumen-esparruaren barruan, Nafarroako Foru Komunitateko Administrazioari buruzko abenduaren 3ko 15/2004 Foru Legearen 23. artikuluan eta Idazkaritza tekniko nagusiak arautzen dituen otsailaren 21eko 29/2005 Foru Dekretuan ezarritako eskudantziak (8. artikuluan aurreikusten direnak barne) erabiliko ditu Herritarrekiko eta Erakundeekiko Harremanetako Departamentuko titularraren goi-zuzendaritzapean, berari atxikita baitago zuzenean, bai eta indarra duten xedapenek emandakoak eta Herritarrekiko eta Erakundeekiko Harremanetako Departamentuko titularrak agintzen dizkion guztiak ere, eta horretarako behar diren ebazpenak emanen ditu.

6. artikulua . Zerbitzuen eskudantziak.

Zerbitzuek, departamentuko goragoko organoen zuzendaritzapean eta foru dekretu honetan bakoitzari esleitutako esparru materialean, ondoko eginkizunak izanen dituzte: beren menpeko atalak edo unitate organikoak planifikatu, koordinatu, zuzendu eta kontrolatzea; prozedurak arindu, arrazionalizatu eta errazteko printzipioak bultzatu eta sustatzea; indarra duten xedapenek berariaz ezarritakoak eta departamentuko organo eskudunek banatzen edo eskuordetzen dizkietenak.

7. artikulua . Atalen eskudantziak.

Atalek, departamentuko goragoko organoen zuzendaritzapean eta foru dekretu honetan bakoitzari esleitutako esparru materialean, ondoko eginkizunak izanen dituzte: beren eskumenen esparruko lanak gauzatzea eta gainean duten buruarentzako txostenak eta proposamenak egitea, haien menpeko unitateek edo bulegoek egiten dituzten lanak koordinatu, zuzendu eta kontrolatzea eta departamentuko organo eskudunek agintzen dizkieten gainerako guztiak.

II. KAPITULUA. KOMUNIKAZIOKO ETA ERAKUNDEEKIKO HARREMANETAKO ZUZENDARITZA NAGUSIA

1. ATALA. ESKUMENEN ESPARRU MATERIALA ETA EGITURA

8. artikulua. Komunikazioko eta Erakundeekiko Harremanetako Zuzendaritza Nagusiaren eskumenen esparru materiala Nota de Vigencia.

Komunikazioko eta Erakundeekiko Harremanetako Zuzendaritza Nagusiak foru dekretu honetan aipatzen diren eskudantziak izanen ditu arlo hauetan:

a) Nafarroako Foru Komunitateko Administrazioaren departamentuetako politika informatiboak koordinatzea.

b) Nafarroako Gobernuaren eledunari bere eginkizunetan laguntzea.

c) Komunikabideekiko harremanez arduratzea.

d) Ikus-entzunezko komunikazio zerbitzua.

e) Nafarroako Gobernuaren eta Nafarroako Foru Komunitateko Administrazioaren agerpena Interneten.

f) Nafarroako Gobernuaren eta Nafarroako Foru Komunitateko Administrazioaren agerpena sare sozialetan eta komunikazioaren teknologien bidezko beste bide batzuetan.

g) Herritarrendako informazioa eta arreta, eta haien partaidetza.

h) Nafarroako Foru Komunitateko Administrazioaren tramite eta zerbitzuen katalogoa.

i) Nafarroako nortasuna hedatzea.

j) Erakundeen publizitatea.

k) Ordainketak agintzea.

l) Nafarroako Parlamentuarekin eta Foru Komunitateko, beste autonomia erkidego batzuetako, Espainiako edo nazioarteko beste erakunde batzuekin harremanak artikulatu eta sustatzea.

m) Nafarroako Foru Komunitatea ordezkatzea Espainiako eta Europako foro, batzorde, biltzar eta erakundeetan, deusetan galarazi gabe Estatuko Administrazio Orokorraren eta Nafarroako Gobernuko gainerako departamentuen eskumenak.

n) Departamentuetako titularren kabineteen arteko harremanak koordinatzea.

o) Nafarroako Gobernuaren protokoloa eta zeremoniala.

p) Gobernuak beste erakunde eta entitate batzuekin eta beste erkidego batzuetako biltoki eta etxeekin dituen harremanetan segitu beharreko ildoak zehaztea.

q) Nafarroako Gobernuaren argitalpenez eta paperezko materialez arduratzea.

r) Indarra duten xedapenek Herritarrekiko eta Erakundeekiko Harremanetako Departamentuari esleitzen dizkiotenak, zuzendaritza nagusiak bere duen esparruan.

9. artikulua . Komunikazioko eta Erakundeekiko Harremanetako Zuzendaritza Nagusiaren egitura.

Komunikazioko eta Erakundeekiko Harremanetako Zuzendaritza Nagusiak zerbitzu hauek ditu bere egituran:

a) Komunikazio Zerbitzua.

b) Erakundeen Proiekzioaren Zerbitzua.

c) Herritarren Arretarako eta Partaidetzarako Zerbitzua.

2. ATALA. KOMUNIKAZIO ZERBITZUA

10. artikulua. Komunikazio Zerbitzuaren eginkizunak Nota de Vigencia.

Komunikazio Zerbitzuak foru dekretu honetan ezarritako eskudantziak ditu ondoko arlo hauetan:

a) Nafarroako Gobernuak komunikabideekin dituen harremanen arloan finkatzen den politika sustatu eta betearaztea, Nafarroako Gobernuaren eledunarekin koordinatuta.

b) Nafarroako Gobernuak hartutako erabakiei eta Gobernuko kideen jardunari buruzko informazioa koordinatzea eta komunikabideek egiten dituzten informazio eskaerei erantzutea.

c) Departamentuei informazioa ematea.

d) Nafarroako Foru Komunitateko Administrazioaren zerbitzu eta tramiteen katalogoa zuzentzea.

e) Zuzentzea Nafarroako Gobernuak eta Nafarroako Foru Komunitateko Administrazioak Interneten duten agerpena, herritarrei zuzendua.

f) Informazioaren arloko lanbide-elkarteekiko harremanez arduratzea.

g) Nafarroako Foru Komunitateko Administrazioan ikus-entzunezko komunikazioko zerbitzuak ematea.

h) Ikus-entzunezko sektorea sustatzeko laguntzak kudeatzea.

i) Foru Komunitateko Administrazioak eta haren menpeko erakunde nahiz entitateek sustaturiko publizitate korporatiboaren arloan, kudeaketa, aholkularitza eta koordinazio lanak egitea.

j) Aurrekoen antzekoa edo osagarria izanik, Komunikazioko eta Erakundeekiko Harremanetako Zuzendaritza Nagusiak agintzen dion beste edozein eginkizun.

11. artikulua. Komunikazio Zerbitzuaren egitura Nota de Vigencia.

Komunikazio Zerbitzuaren egituran ondoko atalak daude:

a) Prentsa Bulegoaren Atala.

b) Navarra.es Atariaren Atala.

12. artikulua. Prentsa Bulegoaren Atalaren eginkizunak Nota de Vigencia.

Prentsa Bulegoaren Atalak foru dekretu honetan ezarritako eskudantziak ditu ondoko arlo hauetan:

a) Nafarroako Gobernuaren eledunari laguntzea komunikabideei Nafarroako Gobernuaren eta Nafarroako Foru Komunitatearen Administrazioaren jarduerei buruz ematen zaien informazioaren arloan.

b) Nafarroako Gobernuari eta departamentuei aholku teknikoak ematea komunikabideen arloan.

c) Nafarroari buruz edo Nafarroako Gobernuaren jardunari buruz idatzizko, ikus-entzunezko edo Interneten bidezko komunikabideetan argitaratzen edo agertzen diren informazioak jaso eta antolatzea.

d) Nafarroako Gobernuaren jardunari buruzko politika informatiboaren eraginkortasuna ebaluatzea.

e) Nafarroako Gobernuari buruzko berriak zabaltzea “nafarroa.eus” Interneteko Atariaren eta gizarte sareen bidez.

f) Nafarroako Jauregiko Prentsa Aretoa kudeatzea.

g) Nafarroako Gobernuaren Irudien Funtsa kudeatu eta zabaltzea.

h) Aurrekoen antzekoa edo osagarria izanik, Komunikazio Zerbitzuak agintzen dion beste edozein eginkizun.

13. artikulua . Navarra.es Atariaren Atalaren eginkizunak.

Navarra.es Atariaren Atalak foru dekretu honetan ezarritako eskudantziak ditu ondoko arlo hauetan:

a) Nafarroako Gobernuaren Interneteko atarian (navarra.es) dauden informazioak eta zerbitzuen edukiak sustatu, homogeneizatu eta gainbegiratzea.

b) Navarra.es atarian eleaniztasuna sustatu eta bultzatzea.

c) Nafarroako Foru Komunitateko Administrazioaren tramite eta zerbitzuen katalogoa kudeatu eta sustatzea.

d) Navarra.es atariko zuzendaritzak atarirako onesten dituen ekintza planak gauzatzea.

e) Navarra.es atariko zuzendaritzari eta atariaren sektoreetako egileei eta editoreei laguntza teknikoa ematea.

f) Navarra.es atariaren erabilera-datuak eta herritarren interakzioari buruz jaso direnak aztertzea, eta hobetzeko ekintzak proposatzea.

g) Navarra.es atariaren antolaketa eredua eta eredu horren aplikazioa nahiz ezarpena diseinatzea.

h) Aurrekoen antzekoa edo osagarria izanik, Komunikazio Zerbitzuak agintzen dion beste edozein eginkizun.

3. ATALA. ERAKUNDEEN PROIEKZIOAREN ZERBITZUA

14. artikulua . Erakundeen Proiekzioaren Zerbitzuaren eginkizunak.

Erakundeen Proiekzioaren Zerbitzuak foru dekretu honetan ezarritako eskudantziak izanen ditu, honako arlo hauetan:

a) Nafarroako Gobernuaren protokoloa eta zeremoniala.

b) Gobernuak erakundeekin, entitateekin eta pertsonekin dituen harreman sozialak.

c) Laguntza eta lankidetza harremanak beste eskualde eta herrialde batzuetan ezarritako Nafarroako zentroekin eta Nafarroan dauden eskualde etxeekin.

d) Nafarroaren errealitatea ezagutarazteko ekimenak antolatzea eta ohiz kanpoko ekitaldietan parte hartzea.

e) Nafarroako Foru Komunitateko Administrazioko departamentuek euskarri inprimatuan, ikus-entzunezkoan eta digitalean egiten dituzten argitalpenen plangintza eta edizioa koordinatzea, sustatzea eta banatzea.

f) Nafarroako Gobernuaren Argitalpenen Katalogoa jendeari saltzeko prezioak baimen ditzala proposatzea Nafarroako Gobernuari.

g) Edizio prozesuarekin lotutako edozein alderdiri buruzko aholkuak ematea Nafarroako Foru Komunitateko Administrazioko departamentuei.

h) Nafarroako Foru Komunitatea ordezkatzen duten adierazpen grafikoen identitateari buruzko arauak proposatu, garatu, aplikatu eta kontrolatzea.

i) Nafarroako Gobernuaren argitalpenak sustatzeko diren eta garrantzi berezia duten jarduerak antolatzea, inprimatuak izan, ikus-entzunezkoak, digitalak zein euskarri berezietan eginak.

j) Nafarroako Foru Komunitatearen iragana, oraina eta etorkizuna ezagutzeko garrantzi berezia duten lanak argitaratzeko proposamenak egitea Nafarroako Gobernuari, euskarri inprimatuan, ikus-entzunezkoan zein digitalean.

k) Aurrekoen antzekoa edo osagarria izanik, Komunikazioko eta Erakundeekiko Harremanetako Zuzendaritza Nagusiak agintzen dion beste edozein eginkizun.

15. artikulua . Erakundeen Proiekzioaren Zerbitzuaren egitura.

Erakundeen Proiekzioaren Zerbitzuak atal hauek ditu bere egituran:

a) Protokolo Atala.

b) Argitalpen Atala.

16. artikulua . Protokolo Atalaren eginkizunak.

Protokolo Atalak foru dekretu honetan ezarritako eskudantziak ditu ondoko arlo hauetan:

a) Nafarroako Gobernuak, lehendakariak edo departamentuetako titularrek, edo Foru Komunitateko Administrazioaren departamentuek sustatzen dituzten ekitaldi ofizialak antolatzea.

b) Gobernu taldeari laguntzea egin behar dituen bisitetan eta bestelako jarduera ofizialetan.

c) Gobernuari, Administrazioko beste organo batzuei eta toki entitateei protokoloaren, zeremonialaren eta ekitaldi ofizialak antolatzearen gaineko aholkuak ematea.

d) Nafarroako Jauregian, hots, Gobernuaren egoitzan, egiten diren jarduerak eta bertako bisitak koordinatzea.

e) Erakundeen Proiekzioaren Zerbitzuak esleitzen dion beste edozein eginkizun.

17. artikulua . Argitalpen Atalaren eginkizunak.

Argitalpen Atalak foru dekretu honetan ezarritako eskudantziak ditu ondoko arlo hauetan:

a) Nafarroako Gobernuaren eta haren departamentuen argitalpen inprimatu, ikus-entzunezko eta digital guztien plangintza eta edizioa koordinatzea.

b) Nafarroako Gobernuaren Argitalpenen Katalogoa jendeari saltzeko prezioak baimen ditzala proposatzea Nafarroako Gobernuari.

c) Nafarroako Gobernuko departamentuei edizio prozesuari buruzko aholku teknikoak ematea.

d) Nafarroako Foru Komunitatea ordezkatzen duten adierazpen grafikoen identitateari buruzko arauak proposatu, garatu, aplikatu eta kontrolatzea.

e) Nafarroako Gobernuaren Argitalpen Funtsaren obren edizio prozesuaren tramitazio administratiboa eta segimendu teknikoa.

f) Nafarroako Gobernuaren Argitalpen Funtsa gordetzea, sustatzea, argitalpenak erakundeetan eta saltokietan banatzea eta saltzea.

g) Nafarroako Gobernua ordezkatzen duten adierazpen grafikoak jasotzen dituzten paper-gauza arruntak inprimatzea.

h) Erakundeen Proiekzioaren Zerbitzuak esleitzen dion beste edozein eginkizun.

4. ATALA. HERRITARREN ARRETARAKO ETA PARTAIDETZARAKO ZERBITZUA

18. artikulua . Herritarren Arretarako eta Partaidetzarako Zerbitzuaren eginkizunak.

Herritarren Arretarako eta Partaidetzarako Zerbitzuak foru dekretu honetan ezarritako eskudantziak izanen ditu, honako arlo hauetan:

a) Herritarren arreta eta partaidetza zuzentzea Foru Komunitateko Administrazioan eta haren menpeko erakunde eta entitateetan.

b) Zuzentzea Nafarroako Gobernuak eta Nafarroako Foru Komunitateko Administrazioak herritarrendako sare sozialetan duten agerpena.

c) Aurrekoen antzekoa edo osagarria izanik, Komunikazioko eta Erakundeekiko Harremanetako Zuzendaritza Nagusiak agintzen dion beste edozein eginkizun.

19. artikulua . Herritarren Arretarako eta Partaidetzarako Zerbitzuaren egitura.

Herritarren Arretarako eta Partaidetzarako Zerbitzuak atal hauek ditu bere egituran:

a) Herritarren Arretarako Atala.

b) Herritarren Partaidetzarako Atala.

20. artikulua . Herritarren Arretarako Atalaren eginkizunak.

Herritarren Arretarako Atalak foru dekretu honetan ezarritako eskudantziak ditu ondoko arlo hauetan:

a) Nafarroako Gobernuak herritarrentzako arretarako dituen zerbitzuak ematea, aurrez aurrekoak, telefonokoak nahiz telematikoak izanik, Nafarroako Gobernuaren Interneteko ataria barne.

b) Sare sozialen bidez herritarrei ematen zaien arreta kudeatu eta koordinatzea.

c) Nafarroako Gobernuak sare sozialetan eskaintzen dituen edukiak sustatu, homogeneizatu eta gainbegiratzea.

d) Aurrekoen antzekoa edo osagarria izanik, Herritarren Arretarako eta Partaidetzarako Zerbitzuak agintzen dion beste edozein eginkizun.

21. artikulua . Herritarren Partaidetzarako Atalaren eginkizunak.

Herritarren Partaidetzarako Atalak foru dekretu honetan ezarritako eskudantziak ditu ondoko arlo hauetan:

a) Herritarren partaidetza planifikatu, koordinatu eta sustatzea, politika publikoak diseinatu, gauzatu eta horiei jarraipena egiteko orduan.

b) Gobernuak zein toki entitateek sustatzen dituzten herritarren partaidetzarako ekintzei aholkularitza eta euskarria ematea.

c) Herritarren partaidetza bultzatzeko arau-esparrua aztertu eta proposatzea.

d) Partaidetzaren arloan sentsibilizazioa eta prestakuntza sustatzea Funtzio Publikoan eta gizartean, oro har.

e) Arlo horretan behar diren ikerketak sustatzea.

f) Aurrekoen antzekoa edo osagarria izanik, Herritarren Arretarako eta Partaidetzarako Zerbitzuak agintzen dion beste edozein eginkizun.

III. KAPITULUA. Bakearen, Bizikidetzaren eta Giza Eskubideen Zuzendaritza Nagusia Nota de Vigencia

1. ATALA. Eskumenen esparrua eta egitura

22. artikulua. Bakearen, Bizikidetzaren eta Giza Eskubideen Zuzendaritza Nagusiaren eskumenen esparrua.

Bakearen, Bizikidetzaren eta Giza Eskubideen Zuzendaritza Nagusiak foru dekretu honetan aipatzen diren eskudantziak izanen ditu, arlo hauetan:

a) Bakearen eta bizikidetzaren aldeko kultura bultzatzeko politikak sustatu eta koordinatzea, betiere giza duintasunean eta giza eskubideekiko konpromisoan oinarriturik.

b) Memoria Historikoari eta Memoria Hurbilari buruzko politika publikoak zehaztea.

c) Biktima guztientzako elkartasun, aintzatespen eta arretarako politikak garatzea.

d) Politika horiek garatzeko eta aplikatzeko bidea ematen duten proiektu, plan eta programak bultzatzea, horiek gauzatzean buru aritzea eta behar bezala betetzen direla kontrolatzea.

e) Gainerako departamentuekin eta entitate, elkarte eta erakunde publiko edo pribatuekin batera –bereziki, Nafarroako Parlamentuarekin– lan egin eta elkarri eragitea, helburu berak garatzeko.

f) Onesten ahal diren eta, gaia dela eta, Zuzendaritza Nagusiaren eskumenen arloari dagozkion diru-laguntzen deialdiak proposatu eta ebaztea.

g) Indarra duten xedapenek Herritarrekiko eta Erakundeekiko Harremanetako Departamentuari esleitzen dizkiotenak, betiere Bakearen, Bizikidetzaren eta Giza Eskubideen Zuzendaritza Nagusiaren berezko esparruan.

23. artikulua. Bakearen, Bizikidetzaren eta Giza Eskubideen Zuzendaritza Nagusiaren egitura.

Bakearen, Bizikidetzaren eta Giza Eskubideen Zuzendaritza Nagusiak zerbitzu hauek ditu bere egituran:

a) Bizikidetzaren eta Giza Eskubideen Zerbitzua.

b) Nafarroako Memoriaren Institutua.

2. ATALA. Bizikidetzaren eta Giza Eskubideen Zerbitzua

24. artikulua. Bizikidetzaren eta Giza Eskubideen Zerbitzuaren eginkizunak.

Bizikidetzaren eta Giza Eskubideen Zerbitzuak foru dekretu honetan aipatzen diren eskudantziak izanen ditu, arlo hauetan:

a) Bakearen, normaltasunaren eta bizikidetza demokratikoaren aldeko plana prestatzea. Plan hori memoriaren kudeaketa integralaren ikuspuntutik sortuko da, eta, helburu politikoei begira indarkeria mota guztiak erabiltzeari uko egiteaz gain, bakea eta bizikidetza soziala eta politikoa ezartzen lagunduko du.

b) Bakearen aldeko politika, Egia, Memoria, Justizia eta biktima guztiei –inolako salbuespenik gabe– eragindako kaltea konpontzea oinarri dituena.

c) Terrorismoaren biktimak babestu eta aintzatestea, eta horiei kalte-ordainak ematea.

d) Motibazio politikoko ekintzen biktimak aintzatesteko eta horiei kalte-ordainak emateko prozesuak garatzea, apirilaren 10eko 16/2015 Foru Legean aurreikusita baitaude.

e) Lankidetza harremanak izatea administrazio publiko, erakunde eta entitate sozialekin, biktimei laguntza integrala eta egokia emateko asmoz.

f) Indarkeriari eta haren ondorio sozialei buruzko ikerlan eta argitalpenak sustatzea.

g) Alde batetik, herritarren partaidetza eta, beste aldetik, giza eskubideekin eta bizikidetza demokratikoaren balioekin bat egiten duten elkarteen eta fundazioen lankidetza sustatzea.

h) Sentsibilizazio sozialeko eta prestakuntzako ekimenak bultzatzea, honako hauekiko errespetuan oinarritzen den bizikidetzaren aldeko kultura sustatu nahi dutenak: giza duintasuna, giza eskubideak, oinarri demokratikoak, biktimekiko elkartasuna eta gatazken konponbide baketsua.

i) Giza eskubideen urraketaren bat jasan duten biktimak aintzatesteko jardunaldiak antolatzea.

j) Aurrekoen antzekoa edo osagarria izanik, Bakearen, Bizikidetzaren eta Giza Eskubideen Zuzendaritza Nagusiak agintzen dion beste edozein eginkizun.

25. artikulua. Bizikidetzaren eta Giza Eskubideen Zerbitzuaren egitura.

Bizikidetzaren eta Giza Eskubideen Zerbitzuak atal hauek ditu bere egituran:

a) Biktimen Arretarako Bulegoa.

b) Bizikidetza Atala.

26. artikulua. Biktimen Arretarako Bulegoaren eginkizunak.

Biktimen Arretarako Bulegoak foru dekretu honetan ezarritako eskudantziak izanen ditu, ondoko arlo hauetan:

a) Biktimekiko elkartasuna eta horiek jendaurrean zein gizartean aintzatesteko lana sustatzea.

b) Biktimek egia jakiteko, justizia eskuratzeko eta jasandako kaltearen ordaina izateko dituzten eskubideak gauzatzen laguntzea.

c) Guneak bilatzea arlo honetan esku hartzen duten erakunde eta entitate sozial guztiekin batera lan egiteko.

d) Giza eskubideen urraketa jasan duten pertsona guztien errolda antolatzea.

e) Biktimei zuzeneko arreta ematea, haiei eskubideen eta, indarreko legeriaren arabera, eskura dituzten baliabideen berri emanez.

h) Aurrekoen antzekoa edo osagarria izanik, Bizikidetzaren eta Giza Eskubideen Zerbitzuak agintzen dion beste edozein eginkizun.

27. artikulua. Bizikidetza Atalaren eginkizunak.

Bizikidetza Atalak foru dekretu honetan ezarritako eskudantziak izanen ditu, ondoko arlo hauetan:

a) Terrorismoaren, indarkeriaren eta giza eskubideen urraketen biktima guztiak oroitzeko eta aintzat hartzeko jarduerak sustatzea udalen esparruan.

b) Ikastetxeekiko lankidetza bultzatzea ikasleak gaiotan prestatu eta hezteko: giza eskubideak, biktimekiko elkartasuna, gatazken konponbide baketsua eta bizikidetza.

c) Jarduketa lerro berariazkoak sustatzea gazteriaren, kulturaren eta hezkuntza ez formalaren esparruan, arlo horietan eskumena duten erakundeekin bat.

d) Laguntza eta bultzada ematea bizikidetzaren eta giza eskubideen defentsaren kultura sustatzeko hezkuntzako ekimenei eta ekimen sozialei.

e) Herritarrek bakearen, bizikidetzaren eta giza eskubideen errespetuaren arloan parte har dezatela sustatzea.

f) Sentsibilizazio sozioedukatiboko ekimenak bultzatzea indarkeriaren kontrako eta giza eskubideen eta bizikidetza demokratikoaren balioen aldeko kontzientzia sozial kritikoa bizkortzeko.

g) Zikloak, ikastaroak, mintegiak edo kongresuak antolatzea, gizarte osoari informazioa emateko eta hausnarketa egiteko, gai honi buruz: motibazio politikoko indarkeria dela-eta giza eskubideen alorrean izandako urraketen larritasuna eta garrantzia.

h) Aurrekoen antzekoa edo osagarria izanik, Bizikidetzaren eta Giza Eskubideen Zerbitzuak agintzen dion beste edozein eginkizun.

3. ATALA. Memoriaren Nafarroako Institutua

28. artikulua. Nafarroako Memoriaren Institutuaren eginkizunak.

1. Nafarroako Memoriaren Institutua Bakearen, Bizikidetzaren eta Giza Eskubideen Zuzendaritza Nagusiaren menpeko zerbitzu baten maila izanen du, eta foru dekretu honetan aipatzen diren eskudantziak izanen ditu, arlo hauetan:

a) Memoriaren ondarea kontserbatzea Nafarroan, euskarri desberdinetan.

b) Erakunde publiko eta pribatuekin eta asoziazioekin elkarlanean, memoria historikoari eta memoria hurbilari buruzko ikerketak sustatzea.

c) Memoria oinarri harturik, giza eskubideen balioa eta bakearen kultura sustatzea, batik bat geroko belaunaldiak aintzat harturik.

d) Nafarroako herritar guztiei ematea Nafarroako memoria demokratikoaren berri. Horri dagokionez, Nafarroako Memoriaren Institutuaren lana izanen da herritarrei ondare memorialistarako irispidea ematea zenbait Institutuak biltzen dituen tresnen bitartez: iturriak, bibliografia, ikus-entzunezko baliabideak eta beste edozein bitarteko.

e) Nafarroako Memoriaren Institutuaren helburu berekin lan egiten duten erakunde eta elkarte publiko eta pribatuekiko parte-hartze eta lankidetza sustatzea.

f) Terrorismoaren eta indarkeriaren biktimei aintzatespen eta ordain morala ematea, biktima bakoitzaren memoria bere testuinguru biktimologikoan aintzat hartuz.

g) Iragan hurbilean bakeari eta bizikidetzari egindako ekarpenagatik gogoratzeko modukoak diren gertakariak ospatzea edo pertsona edo taldeak omentzea, horretarako ekitaldi, argitalpen, jardunaldiak eta beste eginez.

2. Nafarroako Memoriaren Institutua Memoria Atalaz baliatuko da bere eginkizunak betetzeko.

28. bis artikulua. Memoria Atalaren eginkizunak.

Memoria Atalak foru dekretu honetan ezarritako eskudantziak izanen ditu, honako arlo hauetan:

a) Dokumentazioa eta testigantzak biltzeko programak garatzea, Nafarroako memoriaren ondarea euskarri desberdinetan kontserbatzeko.

b) Beste erakunde publiko eta pribatuekin batera eta elkarteekin lankidetzan, memoria historikoarekin eta memoria hurbilarekin zerikusia duten ikerlanak egiteko programa egitea urtero.

c) Jarduerak egitea, gehienbat datozen belaunaldiei begira, giza eskubideen balioa eta memorian oinarritutako bake-kulturaren garrantzia nabarmentzeko.

d) Ondare memorialista herritarrei hurbiltzeko zabalkuntza eta sentsibilizazio proiektuak egitea, erakusketen bidez eta jendearentzako ekimen irekien bidez, bide emanen baitute institutuak biltzen dituen iturriak, bibliografia, ikus-entzunezko tresna eta baliabideak eta bestelako bitartekoak ezagutarazteko.

e) Nafarroako Memoriaren Institutuaren helburu berekin lan egiten duten erakunde eta elkarte publiko eta pribatuekiko parte-hartze eta lankidetza ezarri eta haien funtzionamendua antolatzea.

f) Terrorismoaren eta indarkeriaren biktimei aintzatespen eta ordain morala emateko jarduketak antolatzea, biktima bakoitzaren memoria bere testuinguru biktimologikoan aintzat hartuz.

g) Antolamenduan laguntzea, iragan hurbilean bakeari eta bizikidetzari egindako ekarpenagatik edo errespetuan, bakean eta giza eskubideen oinarritutako kultura demokratikoaren aldeko lanagatik gogoratzeko modukoak diren gertakariak ospatzeko edo pertsona edo taldeak omentzeko ekitaldi, argitalpen, jardunaldiak-eta egiteko.

h) Aurrekoen antzekoa edo osagarria izanik, Nafarroako Memoriaren Institutuak agintzen dion beste edozein eginkizun.

IV. KAPITULUA. NAFARROAKO GOBERNUAREN BRUSELAKO ORDEZKARITZA

29. artikulua . Nafarroako Gobernuaren Bruselako Ordezkaritzaren eskumenen esparru materiala.

Nafarroako Gobernuaren Bruselako Ordezkaritzak zuzendaritza nagusiaren maila izanen du, eta eginkizun hauek:

a) Europar Batasunaren aurrean Nafarroaren interesak ordezkatzea, eta horiek sustatu eta babestea, Nafarroako Foru Komunitateko Administrazioaren beste organo batzuei esleitutako eskumenak galarazi gabe.

b) Espainiako Erreinuak Europar Batasunean duen ordezkaritza iraunkorrarekin eta Espainiako beste autonomia erkidego batzuen bulegoekin edo beste estatu kide batzuetako antzeko entitateekin lankidetzan aritzea, Bruselan kokatuak daudenekin.

c) Nafarroako Foru Komunitateko Administrazioaren eta Batasuneko erakundeen arteko harremanak koordinatzea, Nafarroarentzat interesekoak diren proiektuen eta programen jarraipena egiteko.

d) Nafarroako Foru Komunitatea atzerrian sustatzen eta proiektatzen laguntzea.

e) Nafarroako Foru Komunitatearen interes sozioekonomikoen alde jardutea, Batasuneko ekintzek edo programek horiengan eragina badute.

f) Batasuneko politikei eta programei buruz informatzea eta aholku ematea.

g) Europar Batasuneko erakundeek erabakiak hartzeko jarraitutako prozesuaren segimendua egitea eta erakunde horiek arauak sortzeko prozesuetan informazioa lortzea, Nafarroako Foru Komunitatearen interesei eragiten dien neurrian.

h) Europar Batasuneko Eskualdeen Batzordearen lanen jarraipena.

i) Nafarroako Foru Komunitateko sektore publiko eta pribatuarentzat aukerak bilatzea enpresaren eta finantzen arloan.

j) Aholkularitzarako logistika zentroa den aldetik, Nafarroako Foru Komunitateko entitate publiko eta pribatuentzako aholku teknikoak ematea.

k) Herritarrekiko eta Erakundeekiko Harremanetako Departamentuko titularrak agindutako edo indarreko xedapenek esleitutako beste edozein zeregin.

V. KAPITULUA. IDAZKARITZA TEKNIKO NAGUSIA

30. artikulua . Idazkaritza Tekniko Nagusiaren egitura.

Departamentuko Idazkaritza Tekniko Nagusiak honako atal hauek ditu bere egituran:

a) Araubide Juridikoaren Atala.

b) Kudeaketa Administratibo eta Ekonomikorako eta Lankidetzarako Atala.

c) Foru Erakundeekiko Prozeduren Kudeaketarako Atala.

d) Europar Erakundeekiko Prozeduretarako Laguntza Teknikoaren Atala.

31. artikulua . Araubide Juridikoaren Atalaren eginkizunak.

Araubide Juridikoaren Atalak eginkizun hauek izanen ditu:

a) Aginduzko txosten juridikoak egitea beharrezko duten espedienteetan, bai eta eskatzen zaion beste edozein ere.

b) Departamentuaren egintza eta xedapenen kontra jarritako administrazio errekurtsoen ebazpen proposamenak prestatzea.

c) Departamentuaren eskumeneko arau eta xedapenen proiektuak prestatzen laguntzea eta haien gaineko txostenak egitea.

d) Departamentuko organo tekniko eta administratiboei aholku juridikoak ematea.

e) Departamentuari lotutako organoetako idazkaritzen eskumenak izan arren, esleitzen zaizkion eginkizunak betetzea.

f) Departamentua ukitzen duen eta Nafarroan aplikatu beharreko foru legeria, estatukoa zein Europar Batasunekoa, biltzea eta eguneratzea.

g) Arlo juridikoko funts bibliografikoak eratzea eta haien mantentze-lanez arduratzea.

h) Departamentuaren intereseko legedia, jurisprudentzia eta doktrina aztertzea eta haien gaineko txostenak egitea.

i) Indarra duten xedapenek esleitzen dizkioten gainerako eginkizunak edo helburuak egoki betetzeko agintzen zaizkion guztiak.

32. artikulua . Kudeaketa Administratibo eta Ekonomikorako eta Lankidetzarako Atalaren eginkizunak.

Kudeaketa Administratibo eta Ekonomikorako eta Lankidetzarako Atalak eginkizun hauek izanen ditu:

a) Departamentuko zerbitzuek proposatzen dituzten espediente guztiak tramitatu eta artxibatzea eta horien kontrol administratiboa egitea.

b) Departamentuari atxikitako giza baliabideen kudeaketa eta kontrola, eta haien egitura organikoaren segimendua.

c) Agiriak konpultsatzea.

d) Agirien sarrera-irteeren erregistroa kudeatzea.

e) Departamentuko aurrekontuen aurreproiektua egiten laguntzea eta lan hori koordinatzea.

f) Diru-sarrera eta gastuen aurrekontua nola garatzen den kontrolatzea, eta zerbitzuei zein erabiltzaileei aldian-aldian informazioa ematea, erabakitzen den maiztasunarekin.

g) Klausula ekonomikoak dituzten espedienteak tramitatzen laguntzea, eskatzen denean.

h) Eskatzen zaizkion txostenak, azterlanak edo datuak prestatzea.

i) Ogasunak departamentu honetan duen kontu-hartzailetza delegatuarekiko lankidetza.

j) Komunikazioko eta Erakundeekiko Harremanetako Zuzendaritza Nagusiari laguntzea mugaz gaindiko edo eskualdeen arteko lankidetzaren arloan.

k) Indarra duten xedapenek esleitzen dizkioten gainerako eginkizunak, eta helburuak egoki betetzeko bere esku uzten diren guztiak.

33. artikulua . Foru Erakundeekiko Prozeduren Kudeaketarako Atala.

Foru Erakundeekiko Prozeduren Kudeaketarako Atalak eginkizun hauek izanen ditu:

a) Nafarroako Parlamentuaren eta Arartekoaren jardueraren segimendua.

b) Parlamentuaren eta Arartekoaren jardueraren ondoriozko dokumentazioa eta prozedurak kudeatu eta tramitatzea.

c) Nafarroako Foru Komunitateko Administrazioaren Hitzarmen eta Akordioen Erregistroa kudeatzea.

d) Herritarrentzat interesgarriak diren estatistikak prestatzea, Nafarroako Parlamentuari, Foru Komunitateko Arartekoari eta beste foru erakunde batzuei buruz.

e) Nafarroako Parlamentuaren eta Foru Komunitateko Administrazioko departamentuen arteko harremanen ondoriozko espedienteak eta dokumentazioa artxibatzea eta kontrolatzea.

f) Nafarroako Parlamentuarekiko Harremanetarako Zerbitzuak eta beste erakunde batzuek agintzen dioten beste edozein eginkizun administratibo.

34. artikulua . Europar Erakundeekiko Prozeduretarako Laguntza Teknikoaren Atala.

Europar Erakundeekiko Prozeduretarako Laguntza Teknikoaren Atalak eginkizun hauek ditu:

a) Laguntza publikoei, kexei eta zehapen prozedurei, arau eta erregelamendu teknikoei eta Solvit sareari, barne merkatuaren informazio sistemari (MIS) eta halakoei buruzko Europar Batasuneko prozeduren gaineko kontrola, koordinazioa eta aholkularitza.

b) Estatuko Administrazioaren organo eskudunekin bitartekari lana egin eta elkarlanean aritzea, lehenago aipatutako arloen gainean, Europako erakundeen aurrean kudeatzeko.

c) Europar Batasunaren eremu juridiko eta jurisprudentzialaren barrenean, Europako erakundeetatik datorren dokumentazioaren segimendua eta sistematizazioa.

d) Nafarroako Gobernuaren erakunde-ordezkariei aholku teknikoak ematea, Eskualdeetako Lantaldean, Europar Batasunaren gaineko Aferetarako Konferentzian eta nazioez gaindiko edo nazioarteko beste edozein erakunde, batzorde eta instituziotan parte hartzearekin lotutako gaietan.

e) Nafarroako Foru Komunitatearen eskumen diren arloen gaineko Europar Batasuneko zuzentarauen transposizio prozesuak sustatzea.

f) Haren esku uzten den beste edozein eginkizun, aipatutakoen antzekoa edo osagarria bada.

Lehenbiziko Xedapen Gehigarria.-Eskumenak banatzeko betebehar orokorrak.

Indarra duten arauek organo bati ematen dizkioten eskumenak hierarkian menpeko diren beste organo batzuen artean banatzen ahal dira, Nafarroako Aldizkari Ofizialean argitaratuko den xedapen orokor baten bitartez, eskumenak esleitzeko arauetan finkatutako baldintzak bete beharra galarazi gabe.

Herritarrekiko eta Erakundeekiko Harremanetako Departamentuko titularrak eraginik gabe uzten ahalko du xedapen gehigarri honetan aipatzen den eskumenen banaketa, foru agindu baten bidez. Foru agindu hori Nafarroako Aldizkari Ofizialean argitaratu beharko da.

Bigarren Xedapen Gehigarria.-Eskumenen banaketa.

Departamentuko zuzendari nagusien artean banatuko dira, bakoitzaren eskumenen esparruan, kontratazioaren eta ondare-erantzukizunaren arloetan Herritarrekiko eta Erakundeekiko Harremanetako Departamentuko titularrari indarreko legedian esleitutako eskudantzia administratiboen titulartasuna eta erabilera.

Hirugarren Xedapen Gehigarria.-Izendapenak berrestea.

Honako izendapen hauek berresten dira, egin ziren baldintza berberetan:

a) Komunikazioko eta Erakundeekiko Harremanetako Zuzendaritza Nagusian:

- Komunikazio Zerbitzuko zuzendaria.

- Erakundeen Proiekzioaren Zerbitzuko zuzendaria.

- Prentsa Bulegoaren Ataleko burua, hemendik aurrera Prentsa Bulegoaren Atala - Eledunaren Bulegoa deitutakoarena.

- Navarra.es Atariaren Ataleko burua.

- Protokolo Ataleko burua.

- Argitalpen Ataleko burua.

b) Idazkaritza Tekniko Nagusian:

- Foru Erakunde Harremanetako eta Hitzarmenen Erregistrorako Ataleko burua, hemendik aurrera Foru Erakundeekiko Prozeduren Kudeaketarako Atala deitutakoarena.

- Europar Erakundeekiko Harremanetako Ataleko burua, hemendik aurrera Europar Erakundeekiko Prozeduretarako Laguntza Teknikoaren Atala deitutakoarena.

Laugarren Xedapen Gehigarria. Aritzeko baldintzak.

Kudeaketa Administratibo eta Ekonomikorako eta Lankidetzarako Ataleko burutza prestasun osoz eta erabateko dedikazioz beteko da.

Bosgarren Xedapen Gehigarria. Unitateen jarraipena.

Foru dekretu hau garatzeko neurriak hartu bitartean, atalak baino maila txikiagokoak diren unitate organikoek berdin jarraituko dute eta oraingo izenari eta eginkizunei eutsiko diete. Behin-behinekotasunez, egitura berriko organoei atxikiko zaizkie, orain arte izan dituzten eginkizunekin bat.

Seigarren Xedapen Gehigarria. Organo eta unitate administratiboak.

Foru dekretu honen bidez Herritarrekiko eta Erakundeekiko Harremanetako Departamentuko titularrari edo bere menpeko organoei esleitutako eginkizunei buruz indarreko beste arau batzuetan dauden aipamen guztiak foru dekretu honen bidez araututako organo eta unitateei dagozkiela ulertuko da.

Zazpigarren Xedapen Gehigarria. Aurrekontuen aldaketak.

Ahalmena eman zaio Ogasuneko eta Finantza Politikako Departamentuko titularrari foru dekretu honetan ezarritakoa betetzeko beharrezkoak diren aurrekontu aldaketak egin ditzan.

Zortzigarren Xedapen Gehigarria. Langileen birbanaketa.

Ahalmena ematen zaio Lehendakaritzako, Funtzio Publikoko, Barneko eta Justiziako Departamentuko titularrari giza baliabideak esleitu eta bana ditzan foru dekretu honetan ezarritakoa betetzeko.

Xedapen Indargabetzaile Bakarra. Arauak indargabetzea.

Indargabetu egiten dira foru dekretu honetan xedatutakoaren kontrakoak diren maila bereko edo apalagoko xedapen guztiak.

Azken Xedapenetan Iehena. Garatzeko ahalmenak.

Ahalmena ematen zaio Herritarrekiko eta Erakundeekiko Harremanetako Departamentuko titularrari foru dekretu honetan ezarritakoa garatzeko beharrezkoak diren xedapenak eman ditzan.

Azken Xedapenetan Bigarrena. Indarra hartzea.

Foru dekretu honek Nafarroako Aldizkari Ofizialean argitaratzen den egun berean hartuko du indarra.

Iruñean, 2015eko abuztuaren 28an.-Nafarroako Gobernuko lehendakaria, Uxue Barkos Berruezo.-Herritarrekiko eta Erakundeekiko Harremanetako kontseilaria, Ana Ollo Hualde.

Iragarkiaren kodea: F1511968

Gobierno de Navarra

Contacte con nosotros | Accesibilidad | Aviso legal | Mapa web