LEXNAVARRA
230/2015 FORU AGINDUA, EKAINAREN 5EKOA, LANDA GARAPENEKO, INGURUMENEKO ETA TOKI ADMINISTRAZIOKO KONTSEILARIAK EMANA, ABEREEN GAITZAK PREBENITU ETA DESAGERRARAZTEKO ETA HAIEN AURKA BORROKATZEKO OSASUN PROGRAMAK EGITEAGATIK, ABELTZAINTZAREN OSASUN DEFENTSARAKO ELKARTEEI LAGUNTZAK EMATEKO ARAUAK ONETSI, ABELTZAINTZAREN OSASUN DEFENTSARAKO ELKARTEEN OSASUN PROGRAMEN GUTXIENEKO EDUKIA FINKATU ETA 2015EKO LAGUNTZEN DEIALDIA ONESTEN DUENA 
BON N.º 125 - 30/06/2015
- Atariko
- Artikulu Bakarra. Arauak onestea.
- Lehen Xedapen Gehigarria. 2015erako laguntzen deialdia.
- Bigarren Xedapen Gehigarria. Aurrekontuko kredituak.
- Hirugarren Xedapen Gehigarria. Aplikatzeko baldintza.
- Laugarren Xedapen Gehigarria. Deialdiaren aurkako errekurtsoak.
- Xedapen Indargabetzaile Bakarra. Arauak indargabetzea.
- Azken Xedapen Bakarra. Indarra hartzea.
I. ERANSKINA. ABEREEN GAITZAK PREBENITU ETA DESAGERRARAZTEKO ETA HAIEN AURKA BORROKATZEKO OSASUN PROGRAMAK EGITEAGATIK, ABELTZAINTZAREN OSASUN DEFENTSARAKO NAFARROAKO ELKARTEEI LAGUNTZAK EMATEKO ARAUAK
- 1. artikulua. Xedea eta helburua.
- 2. artikulua. Definizioak.
- 3. artikulua. Onuradunak.
- 4. artikulua. Betekizunak eta konpromisoak.
- 5. artikulua. Diruz lagungarriak diren kontzeptuak eta dirulaguntzaren zenbatekoa.
- 6. artikulua. Eskaerak non eta noiz aurkeztu.
- 7. artikulua. Dirulaguntza emateko modua, lehentasunak eta irizpide objektiboak.
- 9. artikulua. Ebaluazio organoa.
- 10. artikulua. Deialdiaren antolamendua, instrukzioa eta ebazpena.
- 11. artikulua. Onuradunaren betebeharrak.
- 12. artikulua. Ordaintzeko modua eta epeak eta betebeharren justifikazioa.
- 13. artikulua. Laguntzaren bateragarritasuna eta metaketa.
- 14. artikulua. Ezarritako baldintzak ez betetzea.
- 15. artikulua. Onuradunaren gardentasunerako betebeharrak.
- 16. artikulua. Emandako dirulaguntzen publizitatea.
II. ERANSKINA. ABELTZAINTZAREN OSASUN DEFENTSARAKO ELKARTEETAKO OSASUN PROGRAMEN GUTXIENEKO EDUKIAK
III. ERANSKINA. OTSAGABIKO ESKUALDEKO BULEGOKO UDALERRIAK
IV. ERANSKINA. GARDENTASUN BETEBEHARRARI BURUZKO AITORPENA
ESKATZAILEARENTZAKO ARGIBIDE INTERESGARRIAK
Nafarroan urtarrilaren 27ko 17/1997 Foru Dekretuaren bidez arautzen dira abeltzaintzaren osasun defentsarako elkarteak. Elkarte horiek ezinbesteko lana egiten dute abereen osasuna mantentzeko eta, ondorioz, jarduera horretatik lortzen diren produktuen osasungarritasuna bermatzeko.
Funtsezkoa da elkarte horien jarduera diruz laguntzea, lanean segi dezaten bermatzeko. Foru dekretu horren 6. artikuluak ahalmena ematen dio Landa Garapeneko, Ingurumeneko eta Toki Administrazioko Departamentuari abeltzaintzaren osasun defentsarako elkarte aitortuei laguntzak emateko aurrekontuan dagoen diruaren arabera.
Otsailaren 13ko 81/2015 Errege Dekretuaren bidez, abeltzaintzaren osasun defentsarako elkarteentzako Estatuko diru-laguntzak arautzen dituzten oinarriak ezartzen dira.
Nafarroak, bere foru araubideari esker, eskumen osoa du nekazaritza eta abeltzaintza gaietan, ekonomiaren antolamendu orokorrarekin bat, Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 50.1.a) artikuluak ezartzen duenez.
Foru agindu honi Diru-laguntzei buruzko azaroaren 9ko 11/2005 Foru Legea aplikatuko zaio.
Azaldutakoarekin bat, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1.g) artikuluak ematen dizkidan eskudantziak erabiliz, AGINDU DUT:
Artikulu Bakarra. Arauak onestea.
1. Abereen gaitzak prebenitu eta desagerrarazteko eta haien aurka borrokatzeko osasun programak egiteagatik, abeltzaintzaren osasun defentsarako Nafarroako elkarteei laguntzak emateko arauak onesten dira, foru agindu honen I. eranskinean eta arau honen II., III. eta IV. eranskinetan ageri den moduan.
2. Laguntzetarako araubide honek 2020ko abenduaren 31 arte iraunen du.
Lehen Xedapen Gehigarria. 2015erako laguntzen deialdia.
1. Abereen gaitzak prebenitu eta desagerrarazteko eta haien aurka borrokatzeko osasun programak egiteagatik, abeltzaintzaren osasun defentsarako Nafarroako elkarteei laguntzak emateko 2015eko deialdia onesten da.
2. Hilabeteko epea dago 2015ean laguntza eskaerak aurkezteko, foru agindu hau Nafarroako Aldizkari Ofizialean argitaratzen denetik hasita.
Bigarren Xedapen Gehigarria. Aurrekontuko kredituak.
Laguntza hauek aplikatzearen ondoriozko gastuetarako, 67.500 euroko gastua baimentzen da, 2015era luzatutako 2012ko aurrekontu orokorretako “Zenbait espezieren osasun defentsarako elkarteen sustapena” izeneko 710004 71320 4819 412200 kontu-sailaren kargura.
Hirugarren Xedapen Gehigarria. Aplikatzeko baldintza.
Foru agindu honetan arautzen diren laguntzak emateko, salbuespen eskaera argitaratu beharko da Europako Batzordearen Nekazaritzako eta Landa Garapeneko Zuzendaritza Nagusiaren web-orrialdean, Batzordearen 702/2014 (EB) Erregelamenduaren 9.1 artikuluaren arabera.
Laugarren Xedapen Gehigarria. Deialdiaren aurkako errekurtsoak.
Deialdiaren aurka gora jotzeko errekurtsoa jartzen ahal da, Nafarroako Gobernuari zuzendua, Nafarroako Aldizkari Ofizialean argitaratu eta biharamunetik hilabeteko epean.
Xedapen Indargabetzaile Bakarra. Arauak indargabetzea.
Indarrik gabe uzten da Landa Garapeneko eta Ingurumeneko kontseilariaren uztailaren 2ko 329/2010 Foru Agindua; alegia, abelburuen gaitzak prebenitu eta desagerrarazteko eta haien aurka borrokatzeko osasun programak egiteagatik, abeltzaintzaren osasun defentsarako elkarteei laguntzak emateko arauak onetsi zituena eta abeltzaintzaren osasun defentsarako elkarteen osasun programen gutxieneko edukia finkatu zuena; orobat, aurrekoa aldatu zuten irailaren 22ko 430/2010 Foru Agindua eta maiatzaren 14ko 151/2013 Foru Agindua.
Azken Xedapen Bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
I. ERANSKINA. ABEREEN GAITZAK PREBENITU ETA DESAGERRARAZTEKO ETA HAIEN AURKA BORROKATZEKO OSASUN PROGRAMAK EGITEAGATIK, ABELTZAINTZAREN OSASUN DEFENTSARAKO NAFARROAKO ELKARTEEI LAGUNTZAK EMATEKO ARAUAK
1. artikulua . Xedea eta helburua.
1. Abeltzaintzaren osasun defentsarako Nafarroako elkarteei laguntzak emateko arauak ezartzea du xede foru agindu honek, behi-aziendaren, ardi eta ahuntz aziendaren, zaldi-aziendaren eta untxien gaitzak prebenitzeko, kontrolatzeko, desagerrarazteko eta haien aurka borrokatzeko lanak egiteagatik, abeltzaintzako ustiategien osasun estatusa hobetzeko asmoz .
2. Abereen gaitzak prebenitu, kontrolatu, desagerrarazi eta haien aurka borrokatzeko osasun jarduketa edo programetako kostuak konpentsatzea dute xede laguntza hauek.
3. Batzordearen ekainaren 25eko 702/2014 (EB) Erregelamenduaren 26. artikuluan jasotako salbuespen baldintzak eta laguntza kategoriak aplikatzeko esparruan kokatzen da laguntza araubide hau; erregelamendu horrek barne merkatuan bateragarriak diren zenbait laguntza kategoria deklaratzen ditu nekazaritza eta basogintza sektoreetan eta landa eremuetan, Europar Batasunaren Funtzionamenduari buruzko Tratatuaren 107. eta 108. artikuluak aplikatuta.
4. Laguntza horiek Batzordearen ekainaren 25eko 702/2014 (EB) Erregelamenduaren aplikazio eremutik baztertuta daude kasu hauetan:
a) Batzordeak laguntza legez kanpokotzat eta barne merkatuarekin bateraezintzat jo eta berreskuratze agindu baten zain dauden enpresentzako banakako laguntzak ematen diren kasuan.
b) Batzordearen ekainaren 25eko 702/2014 (EB) Erregelamenduaren 2. artikuluan definitzen diren moduan krisiak jota dauden enpresentzako laguntzak direnean.
Foru agindu honen ondorioetarako, hurrengo definizioak aplikatuko dira: Abeltzaintzako ustiategia. Abeltzaintzako Ustiategien Erregistro Orokorra (REGA) ezarri eta arautu zuen martxoaren 26ko 479/2004 Errege Dekretuan definitzen den moduan. Ustiategiek eskaeraren urteko urtarrilaren 1ean egon beharko dute inskribatuta.
Abeltzaintzaren osasun defentsarako elkarte diruz lagungarria. Abeltzaintzaren osasun defentsarako elkarteak Nafarroan arautzen dituen urtarrilaren 27ko 17/1997 Foru Dekretuan definitzen den moduan, eta 1.000 AzLU edo umetarako 10.000 untxi eme baino gehiago dituena.
AzLU. Azienda Larriko Unitatea, hau da, behi-aziendako ale heldu bat (24 hilabetetik gorakoa), ekainaren 23ko 148/2003 Foru Dekretuaren VI. eranskineko baliokidetza taulen arabera. Dekretu horrek abeltzaintzako instalazioek Nafarroako Foru Komunitatean ingurumenaren aldetik bete beharreko baldintza teknikoak ezarri zituen.
1. Laguntza hauek eskatzeko, abeltzaintzaren osasun defentsarako elkarteek ETEak izan beharko dute, Batzordearen ekainaren 25eko 702/2014 (EB) Erregelamenduaren 1. eranskinaren arabera, Abeltzaintzaren Osasun Defentsarako Elkarteen Nafarroako Erregistroan inskribatuta beharko dute egon, Abeltzaintzaren osasun defentsarako elkarteak Nafarroako Foru Komunitatean arautzen dituen urtarrilaren 27ko 17/1997 Foru Dekretuan ezarritakoaren arabera, eta otsailaren 13ko 81/2015 Errege Dekretuaren 3. artikuluan ezarritako baldintzak beharko dituzte bete. Errege dekretu horren bidez, abeltzaintzaren osasun defentsarako elkarteentzako Estatuko diru-laguntzen oinarri arautzaileak ezarri ziren.
2. Hauek dira laguntzen azkeneko onuradunak: Nafarroako Foru Komunitateak ofizialki onartutako abeltzaintzaren osasun defentsarako elkarte batean sartutako nekazaritzako ustiategi txiki eta ertainak.
4. artikulua . Betekizunak eta konpromisoak.
Foru agindu honetan araututako laguntzak jaso ahal izateko, abeltzaintzaren osasun defentsarako elkarteek betekizun hauek dituzte:
a) Abeltzaintzaren Osasun Defentsarako Elkarteen Erregistroan onartua eta inskribatuta egotea, urteko deialdiari dagozkion laguntzen eskaera aurkezteko epea bukatu baino lehen.
b) Abeltzaintzaren osasun defentsarako elkarteko abeltzainei eskatzea ezartzen den osasun programa erkidean jasotzen diren jarduketak egiteko, elkartea osatzen duten abere-espezieen arabera, eta foru agindu honen II. eranskinean ezarritakoarekin bat, bertan garatzen baitira osasun programen gutxieneko edukiak.
c) Gaitzak desagerrarazteko programa nazionalen esparruan Estatuko araudiak edo ezarrita dauden programek nahiz ezarriko direnek nahitaezkotzat dituzten osasun kontrol eta jarduketa guztiak egitea Nafarroako Foru Komunitatearen eremuan; zein den abere espeziea, hari dagozkionak.
d) Abeltzaintzaren osasun defentsarako elkarteari dagozkion jarduketak betetzea Nafarroako Foru Komunitatearen esparruan, abenduaren 20ko 2611/1966 Errege Dekretuan aurreikusitako gaitzak desagerrarazteko programei dagokienez, dekretu horretan arautzen baitira abereen gaitzak desagerrarazteko programa nazionalak.
5. artikulua . Diruz lagungarriak diren kontzeptuak eta dirulaguntzaren zenbatekoa.
1. Eskaera aurkezten denetik egindako jarduerentzat bakarrik emanen dira laguntzak, Abere Osasunaren Mundu Erakundearen (OIE) abereen gaitzen zerrendan jasotako gaitzei edo Europako Parlamentuaren eta Kontseiluaren maiatzaren 15eko 652/2014 (EB) Erregelamenduaren I. eta II. eranskinetan aipatzen diren abereen gaitzei eta zoonosiei loturik; erregelamendu horrek elikakateari, abere osasunari eta abereen ongizateari buruzko gastuak kudeatzeko xedapenak ezartzen ditu, baita landare osasunari eta landare ugalketako materialei buruzkoak ere, eta honako hauek aldatzen ditu: Kontseiluaren 98/56/EE, 2000/29/EE eta 2008/90/EE zuzentarauak, Europako Parlamentuaren eta Kontseiluaren 178/2002 (EE), 882/2004 (EE), 396/2005 (EE) eta 1107/2009 (EE) Erregelamenduak eta Europako Parlamentuaren eta Kontseiluaren 2009/128/EE zuzentaraua; gainera, indarrik gabe uzten ditu Kontseiluaren 66/399/EEE, 76/894/EEE eta 2009/470/EE Erabakiak; orobat, albaitaritza sektoreko zenbait gasturi buruzko Kontseiluaren ekainaren 26ko 90/424/EEE Erabakiaren eranskinean, kontzeptu hauei buruz:
a) Osasun kontrolak, proba diagnostikoak, laborategiko analisiak edo abereen gaitzak detektatzeko beste neurri batzuk, barne harturik abeltzaintzaren osasun defentsarako elkarteetako albaitarien jarduketa profesionalari dagozkionak. Diru-laguntza honetatik kanpo egonen dira abeltzaintzaren osasun defentsarako elkarteetako albaitarien jarduketa profesionaletik eratorritako gastuak, baldin eta laginak hartzeagatik edo diagnostikoak egiteagatik izan badira, abereen gaitzak desagerrarazteko diren eta Europar Batasunak lagundutako finantzaketa jasotzen duten programa nazionalen esparruaren barnean.
b) Txertoak, albaitaritzako botikak, biozidak edo beste produktu zoosanitario batzuk erostea eta aplikatzea, barne direla abeltzaintzaren osasun defentsarako elkarteetako albaitarien jarduketa profesionaleko gastuak.
c) Gaixorik dauden edo hala uste diren abereak hiltzea edo erlauntzak suntsitzea, barne direla abeltzaintzaren osasun defentsarako elkarteko albaitarien jarduketa profesionalaren gastuak.
2. Eman daitekeen gehieneko laguntza, eskaera egiten duen abeltzaintzaren osasun defentsarako elkarteak, artikulu honen 1. puntuan xedatutakoaren arabera, aurkeztu eta justifikatzen duen aurrekontu finantzagarriaren ehuneko ehunera artekoa izan daiteke.
3. Artikulu honetako 1. puntuan ezarritako epearen barrenean eratutako abeltzaintzaren osasun defentsarako elkarteen kasuan, 2. puntuan azaldutako gehieneko diru-kopurua benetan lanean izan diren hilabeteen arabera murriztuko da; erreferentzia gisa abeltzaintzaren osasun defentsarako elkarte gisa erregistratu zen egunetik eskaeraren urteko irailaren 30era arte igarotako hilabete osoak hartuko dira, urtarrilaren 27ko 17/1997 Foru Dekretuan xedatutakoaren arabera.
4. Balio erantsiaren gaineko zerga laguntza izan dezakeen gastutzat hartuko da, bakar-bakarrik, onuradunak berreskuratu edo konpentsatzerik ez duenean.
5. Europar Batasuneko araudiak gaitz batzuen aurkako borrokarako berariazko ordainarazpenak ezartzen baldin baditu, ez da gaitz horietarako laguntzarik emanen. Europar Batasuneko araudian ezarritakoaren arabera nekazaritzako ustiategiek ordaindu beharreko neurriak ere ez dira laguntzaren xede, non eta laguntzeko neurri horien kostua ez den osotara konpentsatzen ekoizleek ordaindu beharreko nahitaezko ordainarazpenekin. Laguntzarako eskubidea ematen duten kostu edo galeren gehieneko zenbatekotik aseguramendu araubideetatik jasotako zenbatekoak kendu beharko dira.
6. artikulua . Eskaerak non eta noiz aurkeztu.
1. Abeltzaintzaren osasun defentsarako elkarteek Landa Garapeneko, Ingurumeneko eta Toki Administrazioko Departamentuko Nekazaritza Zerbitzura igorriko dituzte eskaerak, eta departamentu horren Erregistroan aurkeztuko (González Tablas kalea, 9, Iruñea), edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan aipatzen diren tokietako edozeinetan (urtarrilaren 13ko 4/1999 Legeak aldatu zuen lege hori).
Eskaerak telematika bidez ere aurkez daitezke, Nafarroako Gobernuak Interneten duen Atariko zerbitzuen katalogoko fitxa erabiliz (http://www.navarra.es/home_es/Servicios/). Fitxa horretan, Nafarroako Foru Komunitatearen Administrazioko Erregistro Orokor Elektronikoan sartzeko esteka izanen da. Identifikatzeko, ziurtagiri digitala beharko da.
2. Hilabeteko epea dago eskaerak aurkezteko, deialdia Nafarroako Aldizkari Ofizialean argitaratzen denetik hasita.
3. Eskaera eskabide orokorrean eginen da. Horrekin batera, artikulu honen 5. artikuluan adierazten diren dokumentuak aurkeztu beharko dira.
4. Onuradunak lehenbizikoz eskatzen badu laguntza edo hura ordaintzeko kontua aldatu nahi badu, diru-laguntzaren eskabidearekin batera, laguntza transferentzia bidez ordaintzeko inprimakia aurkeztu beharko du, behar bezala betea.
5. Laguntza eskaerarekin batera, dokumentazio hau aurkeztu beharko da:
5.1. Elkartearen IFZren kopia.
5.2. Osasun defentsarako elkartearen estatutuen fotokopia konpultsatua.
5.3. Eskaera egiten den unean elkartean dauden abeltzaintzako ustiategien zerrenda, ustiategi bakoitzeko titularrak edo ordezkariak eta abeltzaintzaren osasun defentsarako elkartearen ordezkariak sinatua. Bertan, baldintza hauek betetzen dituztela adieraziko dute:
a) Zerga betebeharrik eta Gizarte Segurantzarekikorik ez dutela, eta Diru-laguntzei buruzko azaroaren 17ko 38/2003 Lege Orokorraren 13. artikuluan aurreikusitako gainerako baldintzak betetzen dituztela.
b) Jardueran ari diren abeltzaintzako ekoizleen ustiategiak direla eta ustiategi horiek ETEak direla, Batzordearen ekainaren 25eko 702/2014 (EB) Erregelamenduaren 1. eranskinaren arabera.
c) Ustiategia Abeltzaintzako Ustiategien Erregistro Orokorrean inskribatuta egotea.
d) Ustiategiak ez daudela betetzeke dagoen berreskuratze agindu baten mende, Batzordeak laguntza legez kanpokotzat eta barneko merkatuarekin bateraezintzat jo ondoren.
e) Ez dela krisian dagoen enpresa bat, Batzordearen ekainaren 25eko 702/2014 (EB) Erregelamenduaren 2. artikuluan eta krisian dauden enpresak salbatu eta berregituratzeko Estatuko laguntzei buruzko Europar Batasuneko jarraibideetan definitzen den moduan, krisian dauden finantzaz bestelako enpresak salbatu eta berregituratzeko Estatuko laguntzei buruzko jarraibideen arabera (Batzordearen uztailaren 31ko 2014/C 249/01 Komunikazioa).
Datu-base bat ere aurkeztuko da euskarri informatikoan, non, gutxienez ere datu hauek agertuko baitira: sozietatearen izena, IFZ/IFK, ustiategiaren zenbakia, herria eta espezie bakoitzeko abereen zentsua.
Abeltegiak bete beharreko baldintzak egiaztatu ondoren, deialdi honetan parte hartzen duten ustiategien zerrendan sartuko da abeltzaintzaren osasun defentsarako elkarteko kide gisa. Abeltzaintzaren osasun defentsarako elkarte baten baino gehiagoren ustiategien zerrendan agertzen bada, azkena aurkezten den abeltzaintzaren osasun defentsarako elkarteari dagokion eskaera bakarrik hartuko da kontuan.
5.4. Laguntza eskaeraren urtean garatu nahi den osasun programa erkidea, II. eranskinean ezartzen denaren arabera, albaitari arduradunak eta abeltzaintzaren osasun defentsarako elkarteko lehendakariak sinatua. Abeltzaintzaren osasun defentsarako elkarteko albaitariak prestatutako txostena erantsiko da, Abeltzaintza Zerbitzuak onetsitako osasun programa bete dela deskribatzen duena. Dokumentua euskarri digitalean aurkeztuko da.
5.5. Albaitarien kontratuak. Elkartearen eta urte honetan osasun defentsarako elkartean lanean ari d(ir)en albaitari arduradun(ar)en arteko kontratu-harremana egiaztatzen duen dokumentua. Izen-abizenak, IFK, elkargokide zenbakia, helbidea, telefonoa eta helbide elektronikoa adieraziko dira. Dokumentu horretako klausuletan ezarriko da kontratuaren arrazoia dela laguntza eskatzen den urterako onetsitako osasun programa diseinatu, garatu eta betearaztea abeltzaintzaren osasun defentsarako elkartearen ustiategietan.
5.6. Diru-laguntzei buruzko azaroaren 9ko 11/2005 Foru Legearen 13. artikuluan onuradun izateko ezarritako debekurik urratzen ez dela dioen erantzukizuneko aitorpena.
5.7. Zerga arloko eta Gizarte Segurantzarekiko eginbeharrak egiaztatzeko baimena, hitzez hitz honako hau dioena: “Nik,............... jaunak/andreak,...................... ordezkatuz, baimena ematen diot Landa Garapeneko eta Ingurumeneko Departamentuari,..... urtean, abereen gaitzak prebenitu eta desagerrarazteko eta haien aurka borrokatzeko osasun programak egiteagatik, abeltzaintzaren osasun defentsarako elkarteentzat ematen diren diru-laguntzak tramitatzeko prozeduraren barrenean, ordezten dudan entitateak zerga guztiak eta Gizarte Segurantzarekiko eginbehar guztiak eguneratuak dituela egiaztatzeko.”
5.8. Txosten ekonomikoa, abeltzaintzaren osasun defentsarako elkarteko lehendakariak sinatua eta hango albaitari arduradunak ikus-onetsia. Txostenean, abeltzaintzaren osasun defentsarako elkarteak programa gauzatzeko aurreikusitako gastuen azalpena, justifikazioa eta aurrekontu xehakatua azalduko dira.
7. artikulua . Dirulaguntza emateko modua, lehentasunak eta irizpide objektiboak.
1. Foru agindu honek arautzen dituen laguntzak norgehiagokako prozeduraren bidez emanen dira. Abeltzaintzaren osasun defentsarako elkarteak 100 puntu bitarteko baremo baten arabera puntuatuko dira, ondotik azaltzen diren lehentasun irizpideen arabera:
a) 50 puntu gehienez, abeltzaintzaren osasun defentsarako elkarte bakoitzean dauden ustiategien eta abereen kopuruaren arabera; hurrengo baremoaren arabera emanen dira puntuak:
1. Elkarteko ustiategien kopurua: 0,05 puntu, Abeltzaintzako Ustiategien Erregistro Orokorrean inskribaturik dagoen ustiategi elkartu bakoitzeko.
2. Abereen zentsua eta espeziea:
- Puntu bat, deialdiaren urteko martxoaren 31n 24 hilabetetik gorakoak diren haragitarako behi-aziendako 200 abelburuko talde bakoitzeko.
- Puntu bat, deialdiaren urteko martxoaren 31n umetarako dauden 1.500 untxiko talde bakoitzeko .
b) 5 puntu, abeltzaintzaren osasun defentsarako elkarteak osasun programa garatzeko duen albaitari kreditatu bakoitzeko; gehienez ere, 15 puntu. Abeltzaintzaren osasun defentsarako elkartean ardura osoa ez duten albaitarien kasuan, justifikatu beharko dute beren lanaldiaren zein portzentaje egotzi behar zaion abeltzaintzaren osasun defentsarako elkarteko lanari, eta horren arabera puntuatuko da.
c) 20 puntu, beren ustiategiak mendialdeko udalerritan dituzten abeltzaintzaren osasun defentsarako elkarteentzat, 2002ko maiatzaren 15eko Foru Aginduaren arabera. Honako honen arabera puntuatuko da:
1. Elkarteko ustiategien kopurua: 0,05 puntu, Abeltzaintzako Ustiategien Erregistroan inskribaturik dagoen ustiategi elkartu bakoitzeko.
2. Abereen zentsua eta espeziea:
- Puntu bat, deialdiaren urteko martxoaren 31n 24 hilabetetik gorakoak diren haragitarako behi-aziendako 400 abelburuko talde bakoitzeko.
- Puntu bat, deialdiaren urteko martxoaren 31n umetarako dauden 2.000 untxiko talde bakoitzeko .
d) 15 puntu, Abeltzaintza Zerbitzuak baloratzen duenaren arabera, abeltzaintzaren osasun defentsarako elkartearen gutxieneko osasun plana nolakoa den eta II. eranskinean jasotako gaitzei aurre egiteko noraino betetzen den ikusita.
2. Laguntza emateko, batez besteko zenbateko bat kalkulatuko da puntu bakoitzeko eragiketa hau eginez: urte bakoitzean abeltzaintzaren osasun defentsarako elkarteen artean banatzeko kontu-sailean dagoen kopurua zati aurkezten diren eskaera guztiek baremoan guztira lortzen dituzten puntuen artean. Abeltzaintzaren osasun defentsarako elkarte bakoitzari dagokion guztirako kopurua lortuko da batez besteko balio hori kasuan kasuko abeltzaintzaren osasun defentsarako elkarteak lortutako puntuekin biderkatuta.
e) Salbuespenez, kontuan harturik Pirinioetan behi, ardi-ahuntz eta zaldi aziendetako abeltzaintzaren osasun defentsarako elkarte mistoak daudela, eta horiek bereziki garrantzitsuak izanik eskualde horietan osasun programa integralak mantentzeko, artikulu honetako a) eta c) ataletako puntuak bikoiztuko dira abeltzaintzaren osasun defentsarako elkarteentzat, baldin eta beren erroldaren %90 baino gehiago badute Albaitarien Otsagabiko Eskualdeko Bulegoko udalerrietan, III. eranskinarekin bat, eta baldin eta ardi-ahuntz eta zaldi azienden AzLUak (Azienda Larriko Unitateak) behien erroldakoak baino gehiago badira.
3. Abeltzaintzaren osasun defentsarako elkarte bati dagokion guztirako diru-kopuruak ezin izanen du gainditu eranskin honetako 5. artikuluaren 2. puntuan adierazitako kopurua.
9. artikulua . Ebaluazio organoa.
Abeltzaintza Zerbitzuak ebaluatuko ditu eskaerak.
10. artikulua . Deialdiaren antolamendua, instrukzioa eta ebazpena.
1. Eskaera harturik, egiaztatuko da 6. artikuluan aipatzen den dokumentazioa aurkeztu dela. Agiri guztiak ez badaude, gehienez ere 10 eguneko epean osatu ditzala eskatuko zaio eskatzaileari, eta adieraziko zaio, hala egin ezean, eskaerari uko egiten diola ondorioztatuko dela eta espedientea artxibatu eginen dela. Halaxe jakinaraziko zaio.
2. Agiri guztiak bildu ondoren, egiaztatuko da baldintza guztiak betetzen dituztela. Horretarako, bidezko diren kontrolak egiten ahalko dira.
3. Eskaerak ebaluatu ondoren, Abeltzaintza Zerbitzuak laguntza emateko ebazpenaren proposamena eginen du.
4. Nekazaritza eta Abeltzaintzako zuzendari nagusiak ebazpen arrazoitua emanen du laguntzei buruz, eta espresuki adieraziko du zer eskaera ezetsi diren.
5. Prozedura ebazteko epea sei hilabetekoa da urte bakoitzeko eskaerak aurkezteko epea bukatzen denetik hasita. Epe horretan ebazpen espresurik ematen ez bada, eskaera administrazioaren isiltasunaren bidez ezetsi egin dela ulertuko da.
11. artikulua . Onuradunaren betebeharrak.
Diru-laguntzei buruzko azaroaren 9ko 11/2005 Foru Legearen 9. artikuluan ezarritako betebeharrez gain, onuradunak honako hauek ere bete beharko ditu:
a) Osasun defentsarako elkarte bakoitzaren barruan sartzea eskatzen duten abeltzaintzako ustiategietako titularrak onartzea, kasuan-kasuan indarra duen arautegiak ezartzen dituen betebeharrak betetzen badituzte. Eskaerak unean uneko langile kopuruaren arabera erantzunen dira.
b) Landa Garapeneko, Ingurumeneko eta Toki Administrazioko Departamentuaren esku uztea bere eginkizunak egiteko behar dituen argibide guztiak, bai diru-laguntzaren kudeaketa eta kontrolari loturikoak, bai diru-laguntzaren xedeko elkartearen jarduerei loturikoak.
c) Eman edo hartutako diru-laguntzak direla eta, Landa Garapeneko, Ingurumeneko eta Toki Administrazioko Departamentuak egiten dituen egiaztapen ekintzak oro onartzea.
d) Helburu bereko beste diru-laguntza publiko batzuk eskatu izanaren berri ematea Landa Garapeneko, Ingurumeneko eta Toki Administrazioko Departamentuari.
e) Nahitaez aitortu beharreko gaitzen berri edo horiek agertu izanaren susmoen berri ematea Departamentuari, Abereen Osasunari buruzko azaroaren 16ko 11/2000 Foru Legean ezartzen denaren arabera, eta urtero eskualdeko abeltzaintzako ustiategien osasun egoerari buruzko memoria edo txosten bat egitea, nahitaez aitortu beharrekoak ez diren beste gaitz batzuen balizko agerpena ere aipatuz.
12. artikulua . Ordaintzeko modua eta epeak eta betebeharren justifikazioa.
1. Ordaintzeko ebazpena emanen da jarduera egin dela egiaztatu ondotik, eta betiere arau hauetan ezarritakoaren arabera egin bada. Ordainketak eginen dira baldin eta gaitzei buruz lege, erregelamendu edo administrazio xedapenik badago, izan nazionala nahiz Batasunekoa, eta baldin eta gaitzei aurrea hartzeko edo haiek kontrolatzeko edo desagerrarazteko programa publiko batekoak badira, izan Batasunekoa, nazionala edo eskualdekoa.
2. Emandako diru-laguntza jasotzeko, abeltzaintzaren osasun defentsarako elkarte onuradunek ondotik aipatzen den dokumentazioa aurkeztu beharko dute urteko azaroaren 1a baino lehen, eskaera egiten denean aurkeztutako osasun programa erkidea nola bete den egiaztatzeko:
2.1. Osasun programa gauzatzeari buruzko urteko txostena, elkarteko lehendakariak eta abeltzaintzaren osasun defentsarako elkarteko albaitari arduradunek sinatua, egindako jarduketen gainekoa.
2.2. Egindako jarduketen egiaztagiriak:
a) Programa aplikatzeko kontratatutako albaitarien ziurtagiria, non azalduko baita abeltzaintzaren osasun defentsarako elkarteko zein ustiategik bete duten oso-osorik osasun programa.
b) Ustiategietan egindako biosegurtasunari buruzko inkesten jatorrizkoak edo fotokopia konpultsatuak.
c) Egindako prestakuntza ikastaroetako aktak eta bertaratutakoen sinadura orriak, programaren aplikazioaren ardura duen albaitari batek eta elkarteko lehendakariak edo idazkariak sinatuak, gutxienez.
d) Osasun programak ustiategi bakoitzean izan dituen emaitzen urteko laburpena, abeltzaintzaren osasun defentsarako elkarteko albaitari arduradun batek bederen sinatua.
e) Laborategietan eskatutako analisien emaitzen buletinen fotokopiak.
f) Egindako jardueren kostua egiaztatzeko txosten ekonomikoa, eskaera aurkeztu zenean aurreikusitako gastu aurrekontuaren gainekoa. Horrekin batera, egindako gastuen fakturak, nominak edo merkataritzako trafiko juridikoan balioa duten antzeko egiaztagiriak aurkeztuko dira. Fakturarekin batera fakturatzen duen enpresaren edo pertsonaren zigilua, sinadura edo hartu-agiria aurkeztuko dira, edo banku transferentziaren gordekina, non titularra, fakturatzailea eta kontzeptuak behar bezala identifikatuko diren. Nominekin batera, langilearen aldeko banku transferentziaren gordekina aurkeztuko da.
3. Laguntzaren ordainketa banku transferentziaren bidezko ordainketa bakarraren bidez eginen da, onuradunak eskaeran adierazitako kontuan.
4. Abeltzaintza Zerbitzuak behar diren ikuskapenak egiten ahalko ditu egindako inbertsioa foru agindu honetan xedatutakoaren araberakoa ote den egiaztatzeko.
5. Artikulu honen 2. atalean adierazitako dokumentazioa, laborategietako analisien emaitzak eta egindako ikuskapenak aztertuta, ikusten bada ustiategiren batean osasun programa ez dela oso-osorik bete, laguntza jaso zuten ustiategi horiei dagokien laguntza kenduko da ordaintzeko ziurtapenetik.
13. artikulua . Laguntzaren bateragarritasuna eta metaketa.
1. Foru agindu honetan aipatzen diren diru-laguntzak bateragarriak izanen dira bestelako administrazio publikoek eta Espainiako edo nazioarteko entitate publiko eta pribatuek helburu eta xede bererako ezartzen ahal dituztenekin.
2. Dena dela, diru-laguntzaren zenbatekoa, bera bakarrik edo beste edozein administraziok, ente publikok edo pertsona fisikok edo juridikok eman dezakeenari nahiz laguntza hauen xede bera duten aseguramenduko araubideetatik etor daitekeenari gehituta, ez da gastuaren %100 baino handiagoa izanen, hau da, Batzordearen ekainaren 25eko 702/2014 (EB) Erregelamenduaren 26.11 artikuluan diruz laguntzen ahal diren jarduketentzat aurreikusten den gastua baino handiagoa. Laguntza horiek ez zaizkio kostu berei dagokien “de minimis” beste laguntza bati gehituko, laguntza metaketa horrek aipatu muga baino zenbateko handiagoa duen laguntza ekartzen badu.
Laguntza hauen xede eta helburu bera duten beste administrazio edo ente publiko edo pribatu batzuek, Estatukoak edo nazioartekoak izan, emandako laguntzak edo aseguramenduko araubideek egindako ordainketak gehituz gero, onuradun bakoitzak guztira jasotzen dituen diru-laguntzen zenbatekoak jardueraren kostua gainditzen badu epe horretan garatuko den jarduerarentzat, horren proportziozko murrizketa eginen da foru agindu honek arautzen dituen diru-laguntzen zenbatekoan, aipatu muga horretaraino.
Era horretan ere, diru-laguntzen batuketa edo aseguramenduko araubideek egindako ordainketa 5. artikuluan edo Estatuko nahiz Europar Batasuneko araudian ezarritako gehieneko portzentajea baino laguntza handiagoa bada, aipatu mugaraino murriztuko da.
14. artikulua . Ezarritako baldintzak ez betetzea.
1. Laguntza hauek emateko kontuan hartu diren baldintzen edozein aldaketak laguntza emateko ebazpena aldatzea ekarriko du berarekin.
2. Foru agindu honetan eskatutako betebeharrak eta hartutako konpromisoak bete ezean, diru-laguntza itzuli egin beharko da eta, bidezkoa denean, behar diren zehapenak jarriko dira. Diru-itzultzeen, arau-hausteen eta zehapenen arloan, Diru-laguntzei buruzko azaroaren 9ko 11/2005 Foru Legearen 35., 42. eta 43. artikuluetan xedatutakoari jarraituko zaio.
3. Atal honetan xedatzen denaren arabera osasun programaren ez-betetze partzialak gertatuz gero, laguntza emateko ebazpena aldatzeko espedientea hasiko da. Horrelakoetan, interesdunei entzunaldia eman beharko zaie nahitaez. Hauek dira osasun programaren ez-betetze partzialak:
a) Indarreko lege-araudian botikekiko tratamenduen erregistro liburuaren kudeaketaren gainean ezarritako betebeharrak ez betetzea, zehazki, elkarteko osasun programaren barrenean aplikatzen diren tratamenduak liburuetan jaso beharra.
b) Kanpoko eta barruko bizkarroiak kontrolatzeko programaren aplikazioa ez betetzea elkarteko osasun programan ezarri bezala.
c) Elkarteko osasun programak kontrolatzen dituen gaitzen aurka txertaketak egiteko jarraibideak ez betetzea, txertoa egiten duen laborategiaren eta albaitari arduradunaren jarraibideen arabera.
d) Gutxieneko prestakuntza programa ez betetzea.
4. Aurreko a), b) eta c) letretan adierazitako ez-betetzeren bat gertatuz gero, onartutako laguntza gutxiagotuko da, hain zuzen, ez-betetzeak egiten diren abeltzaintzaren osasun defentsarako elkarteko ustiategien portzentajea halako bi.
5. d) puntuan adierazitako ez-betetzea eginez gero, onartutako laguntza %10 murriztuko da, programaren ez-betetze osoa egin bada, eta %5, II. eranskinean prestakuntzarako eskatutako portzentajera iristen ez bada.
15. artikulua . Onuradunaren gardentasunerako betebeharrak.
Nafarroako Aurrekontu Orokorren kargurako diru-laguntzen onuradunen gardentasunerako betebeharrak arautzen dituen 59/2013 Foru Dekretuaren 2. artikuluan aipatzen diren entitateek Gardentasunari eta Gobernu Irekiari buruzko ekainaren 21eko 11/2012 Foru Legearen bederatzigarren xedapen gehigarrian ezarritako gardentasun baldintzak bete beharko dituzte, Nafarroako Aurrekontu Orokorren kargurako diru-laguntzak jasotzen badituzte eta bi inguruabar hauek gertatzen badira:
a) Emandako diru-laguntza 20.000 eurotik gorakoa izatea urtean.
b) Emandako diru-laguntza entitate onuradunaren negozio-zifraren edo urteko aurrekontuaren %20tik gorakoa izatea.
Aurreko idatz-zatian ezarritako mugak zehaztearen ondorioetarako, Nafarroako Foru Komunitateko Administrazioak edo haren erakunde publikoek urte naturalean emandako diru-laguntza guztien kopuruak batuko dira. Urte batzuetan ordaintzen diren diru-laguntzen kasuan, aurrekontuko ekitaldi bakoitzean emandako kopurua konputatuko da ondorio horietarako, ez guztizko batura. Erreferentziako negozio-zifra edo urteko aurrekontua honako hauen arteko txikiena izanen da:
a) Aurreko urteko negozio-zifra edo aurrekontu exekutatua.
b) Hala badagokio, negozio-zifra, edo diru-laguntza ematen den ekitaldian entitatearen organo eskudunak onartutako aurrekontua.
Aipatu diren inguruabarrak gertatzeagatik gardentasunari lotutako betebeharrak dituzten entitate onuradunek jarraian adierazten den informazioa eman beharko dute:
a) Entitatearen gobernu, administrazio eta zuzendaritza organoen osaera.
b) Organo horiek osatzen dituzten bazkideen zerrenda.
c) Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak, kontzeptutan banatuta. Sortu berriak diren entitateen kasuan, informazioa haien aurrekontuetan edo plan ekonomiko-finantzarioan bildutakoa izanen da.
d) Kargudun bakoitzak gobernuko, administrazioko eta zuzendaritzako eginkizunetan duen dedikazioaren araubidea.
e) Entitate onuradunaren urteko azken kontuen kopia bat.
Informazio hori entitate onuradunaren legezko ordezkariak sinatuta aurkeztuko da, Nafarroako Gobernuaren Erregistro Orokor Elektronikoaren bide telematikoak erabiliz, eta diru-laguntza kudeatzen duen administrazio unitateari bidaliko zaio. Informazioa bidaltzeko epea hilabete batekoa izanen da, diru-laguntza ematen duen ebazpena jakinarazten edo, hala bada, argitaratzen den egunetik hasita.
Informazio hori urtebetez egonen da aztergai Nafarroako Gobernu Irekiaren Atarian argitaratzen denetik hasita, eta gehienez 15 hilabetez utziko da bertan, informazioa kudeatzen duen organoan sartzen den egunetik hasita. Epe hori igarota, informazioa argitaratzeko ardura duen unitateak ofizioz kenduko du. Hala egin ezean, entitate onuradunak kentzeko eskatzen ahalko du, eta gehienez ere hilabeteko epean kendu beharko da, eskaera egiten denetik hasita.
Entitateak gardentasun betebeharra bete behar ez badu, aurreikusitako inguruabarrak gertatzen ez direlako, horren gaineko deklarazio bat aurkeztu beharko du.
Entitateak ekitaldi berean diru-laguntza bat baino gehiago jasotzen badu, ez du informazioa errepikatu beharko diru-laguntza bakoitzean, salbu eta hasieran eman zituen datuak aldatzen badira.
Onuradunak informaziorako betebeharrak ez betetzeak ekar ditzakeen zehapenak galarazi gabe, ez betetze horren ondorioz ezin izanen da emandako diru-laguntza ordaindu, aurrerakinak barne, eta, hala bada, kobratutako zenbatekoak itzuli beharko dira, Diru-laguntzei buruzko Foru Legearen 35.1.c) artikuluan ezarritakoari jarraikiz.
16. artikulua . Emandako dirulaguntzen publizitatea.
Deialdi honetan ezarritako laguntzen onuradunen zerrenda argitara emanen da, Nafarroako Gobernuaren web-orrialdeko zerbitzuen katalogoko fitxa garatzen duen araudian ezartzen denaren arabera.
II. ERANSKINA. ABELTZAINTZAREN OSASUN DEFENTSARAKO ELKARTEETAKO OSASUN PROGRAMEN GUTXIENEKO EDUKIAK
Abeltzaintzaren osasun defentsarako elkarteetako albaitariaren beharkizunak.
Abeltzaintzaren osasun defentsarako elkarteko albaitaritza zerbitzuak, abeltzaintzako ustiategien osasun arduraduna den aldetik, ustiategiko albaitariaren izaera hartzen du, eta ondotik aipatzen diren eginkizun generikoak izanen ditu:
–Landa Garapeneko, Ingurumeneko eta Toki Administrazioko Departamentuaren aurrean ordezkari eta bitarteko tekniko gisa aritzea, abeltzaintzako ustiategiaren osasun gaietan.
–Abenduaren 20ko 2611/1996 Errege Dekretuaren arabera, gaitzak desagerrarazteko programen gainean egin behar diren jarduketak egitea (biosegurtasun neurriak edo jarraibideak gaitzaren susmoa dagoenean eta berresten denean, simaurraren tratamendua eta erabilera, positiboak desagerrarazteko epea, abereak geldirik egoteko neurrien aplikazioa, animalia positiboak desagerrarazi ondoren desinfekziorako jarraibideak).
–Ustiategiei aholku teknikoak ematea, abereen osasunaren, ongizatearen eta ekoizpenaren arlo orokorretan. Abeltzainaren lana gainbegiratzea eta orientabideak ematea abereak identifikatu eta erregistratzeko eta ustiategiaren liburuak eta erregistroak (identifikazioa, elikadura, botikekiko tratamenduak, mindak desagerraraztea, etab.) eguneraturik eramateko dituen betebeharretan.
–Abeltzaintzaren osasun defentsarako elkarteko ustiategietan, zaldi-aziendaren identifikazioa egitea edo gainbegiratzea, baita ardi-aziendarena ere, hausnar bolodunekin identifikatzen badira.
–Nafarroako osasuna zaintzeko sarearen garapenean parte hartzea.
–Abeltzaintza Zerbitzuarekin lankidetzan aritzea abereen osasunaren eta elikaduraren segurtasunaren arloetan behar diren eginkizun guztietan, aurretik gaikuntza eta berariazko prestakuntza jaso eta gero.
–Ahal duen guztietan, abeltzaintzari lotuta dauden administrazio eginkizun telematiko guztietan parte hartzea (txertaketa-agiriak, osasun giden eskaera eta entregak, behi-azienda identifikatzeko agirien entregak, belarritakoak, etab.).
Espezie guztientzako programa orokor amankomunak.
1.–Biosegurtasun neurriak ustiategietan.
–Biosegurtasun inkestak: albaitaritza zerbitzuek biosegurtasun inkesta eginen dute abeltzaintzaren osasun defentsarako elkarteko ustiategi guztietan, Abeltzaintza Zerbitzuak ezartzen dituen ereduen arabera. Inkestetan ustiategiaren osasun azpiegitura eta abelazkuntzako ohiko praktikak jasoko dira, gaitzen gainean eragina duten biosegurtasunaren arloko alderdi kritikoak atzemateko. Albaitariek neurri zuzentzaileak ezarriko dituzte inkestetan atzematen diren akatsetarako, eta abeltzainak neurri horiek aplikatzen dituela kontrolatu beharko dute.
–Biosegurtasun inkesta, gutxienez, hiru urtean behin eginen da ustiategi guztietan. Bereziki kontrolatuko da aurrekoetan proposatutako neurri zuzentzaileak noraino aplikatu diren. Neurri zuzentzaileetan bereziki kontuan hartuko da ustiategiaren historial analitikoa, hala nola haren osasun estatusa. Hortaz, neurriak pertsonalizatuko dira osasun egoera zehatzaren arabera.
–Berrogeialdia: ustiategietan sartzen diren abereak besteetatik bereizita edukiko dira, gaitzik ez dutela egiaztatzeko beharrezkoak diren proba diagnostikoak egin arte. Ustiategian abere gehiago sartuz gero, abeltzainek abeltzaintzaren osasun defentsarako elkarteko zerbitzu teknikoei jakinarazi behar diete.
–Ustiategietan sartzen den abereren batek abeltzaintzaren osasun defentsarako elkartearen osasun planetan sartutako edozein gaitzetan emaitza positiboa ematen badu, identifikatu eginen da eta plan bat ezarriko da, gaitzaren araberakoa, kontrolatzeko edo desagerraraztea planifikatzeko, beste abere batzuk kutsatzeko aukeraren arabera.
–Abere horiek ezin izanen dira ustiategitik inola ere atera ugalketarako beste ustiategi batera, kontzentrazio zentro batera, ferietara, azienda erakusketa edo merkatuetara edo merkataritzako eragileen instalazioetara eramateko.
2.–Osasun prestakuntza:
–Abeltzaintzaren osasun defentsarako elkarteek gutxienez prestakuntza eta dibulgazio ikastaro bat eginen dute urtean. Bertara, elkartutako abeltzainen %40k joan beharko dute gutxienez. Ikastaroa abereen ongizateari buruzkoa, ustiategien biosegurtasunari buruzkoa eta abeltzaintzaren osasun defentsarako elkartearen osasun programan sartutako gaitzen prebentzio eta kontrolari buruzkoa izanen da.
–Ikastaroaren egitarau osoa eta egutegia Abeltzaintza Zerbitzuari jakinaraziko zaizkio, hasi baino 10 egun lehenago gutxienez.
–Behar bezala justifikatutako arrazoiak direla kausa, bidezkoa izanen da programazioa beste aukera batez ordeztea, betiere antzeko prestakuntza maila lortuko dela bermatzen bada.
3.–Nafarroako zaintza epidemiologikoaren sarea.
–Abeltzaintzaren osasun defentsarako elkarteetako abeltzaintzako ustiategiak, beren albaitaritza zerbitzuen bidez, albaitaritzako osasun alertaren sare batean sartuko dira, Kode Zoosanitarioaren zerrendako gaitzei aurre egiteko, Abeltzaintza Zerbitzuak ezartzen duen barne jarduketarako protokoloari jarraikiz.
4.–Abere hilak desagerrarazteko osasun arloko aholkularitza eta kontrola.
–Indarreko araudian ezarritako neurri orokorrak betetzea, baita Abeltzaintza Zerbitzuak garatzen dituen berariazko neurriak ere.
5.–Desinfektatu eta intsektuak eta arratoiak hiltzeko programak.
–Abeltzaintzaren osasun defentsarako elkarteko albaitaritza zerbitzuak desinfektatu eta intsektuak eta arratoiak hiltzeko sistema deskribatuko du. Sistema hori abeltzainak berak prestatuko du, abeltzaintzaren osasun defentsarako elkartearen gainbegiradapean, edo kontratatutako enpresa espezializatu batek.
–Programan datu hauek agertuko dira gutxienez: erabilitako produktuak, aplikatzeko tokiak eta aplikaziorako jarraibideak, ontzien bilketa, ingurumenaren babesa eta laneko segurtasun eta babeserako neurriak.
6.–Barneko zein kanpoko bizkarroiak kontrolatzeko programa.
–Aziendak tarteko edo behin betiko ostalari gisa jarduten duen kasuetan kanpo eta barne parasitosiaren hedadura saihesteko, eta txertaketa programen eragina handitzeko, abeltzaintzaren osasun defentsarako elkarteko albaitaritza zerbitzuak barneko eta kanpoko bizkarroiak kontrolatzeko programa bat ezarriko du bere menpeko ustiategietan. Programa horretan, gutxienez, hazteria, ezkabia eta programan mugatutako beste parasitosi batzuk zaindu, kontrolatu eta desagerraraztea jasoko da.
–Parasitosi mota bakoitzerako, prebentzio tratamenduak eta horien aplikaziorako jarraibideak eta maiztasuna azalduko dira, hala nola ukitutako azienda isolatu, tratatu eta geldirik edukitzeko jarduketak.
Haragitarako behi-aziendaren ustiategietarako berariazko programak.
1.–Behi-aziendaren paratuberkulosia kontrolatzeko programa, haragitarako ugalketa ustiategietan, Nafarroako abeltzaintzaren osasun defentsarako elkarteetan.
–Simaurraren eta mindaren kudeaketa egokia aurrerako abelburuentzat diren ukuiluak eta larreak kutsa ez daitezen. 12 hilabetetik beherako abereek erabiltzen dituzten larreak ezin izanen dituzte aurretik abere helduek erabili urtebetean edo abere heldu horien eginkariekin simaurtu.
–ELISA probetan seronegatiboak diren ugaltzaileetatik heldu diren abereak soilik erabiliko dira aurrerako gisa.
–Zaintza epidemiologikoaren protokoloa, paratuberkulosiarekin bat datorren sintomatologia (emaziazioa, beherakoa, eta abar) duten abelburuak errutinaz aztertu eta atzemateko.
–Paratuberkulosiaren sintomatologia duten behien kumeak, diagnostikoa baino 24 hilabete lehenago jaioak, isolatu edo desagerrarazi eginen dira.
–Herri-lur bat abeltzaintzaren osasun defentsarako elkarte bateko ustiategien %90ak gutxienez erabiliz gero. Larre horietara eramaten diren abereek seronegatiboak izan behar dute gaitz horren ELISA probetan.
2.–Paratuberkulosia kontrolatzeko planaren helburua:
–Helburu gisa ezarriko da ukitutako ustiategietan seroprebalentzia %10 murriztea 2 urteko epean.
–Aurreko puntua ez da aplikatuko seroprebalentzia %2tik beherakoa bada, betiere PCR teknikaren bidez analizatu badira abere seropositibo guztiak, eta denek emaitza negatiboa badute teknika horrekin.
–Helburua ez bada bi urte horietan betetzen, bisita ofizial bat eginen da, aurreko ataletan gaitza kontrolatzeko ezarri diren neurriak aplikatzen ari diren egiaztatzeko.
3.–Behi-aziendaren trikomonosia kontrolatzeko programa, haragitarako ugalketa ustiategietan, Nafarroako abeltzaintzaren osasun defentsarako elkarteetan.
–Ustiategietan sartzen diren hazitarako abere guztiak analizatu eginen dira.
–Bi lagin hartuko zaizkio prepuzioa marruskatuz hazitarako abere bakoitzari, hamalau egun utzita, gutxienez ere, batetik bestera. Laginaren kultiboa eginen da, eta agente etiologikoa zehaztuko da, lurreko abereentzako OIEren eskuliburuari jarraituz.
–Trikomonosiaren fokua berretsiz gero, hil eginen dira kutsatuta dauden hazitarako abereak.
4.–Behien infekziozko errinotrakeitisa (IBR) kontrolatzeko programa, haragitarako ugalketa ustiategietan, Nafarroako abeltzaintzaren osasun defentsarako elkarteetan.
–Debekatuta dago behien infekziozko errinotrakeitisa kontrolatzeko txerto markatu gabeak erabiltzea ugaltzaileen ustiategietan, Nafarroako abeltzaintzaren osasun defentsarako elkarteetan.
5.–Estatusaren jarraipena. Analitikak egitea.
–Paratuberkulosia: Abeltzaintzaren osasun defentsarako elkarteetako behi-aziendaren ustiategiek urtero eginen dute paratuberkulosiaren analisi serologikoa; serumak saneamendu ofizialaren bidez eskuratuko dira. Abeltzaintzaren osasun defentsarako elkarte batean sartzen diren behi-aziendaren ustiategi berrietan, probak saneamenduko serumekin eginen dira eta, ezin bada, laborategiak egun horretarako serumik prest ez duelako, hurrengo urtera arte itxarongo da; bestela, abeltzaintzaren osasun defentsarako elkarteko albaitariek egiten ahalko dute laginketa. Abeltzaintzaren osasun defentsarako elkarteetako albaitariek lortu beharko dituzte oraingoz hil behar ez diren abelburu positiboei egin beharreko probetarako serumak edo/eta laginak. DRMAyALaren (Abere laborategia) Nekazaritzako Elikagaien Laborategian egiten ahalko dira probak edo gaituta dagoen beste edozein laborategitan, Landa Garapeneko, Ingurumeneko eta Toki Administrazioko Departamentuko Abeltzaintza Zerbitzuak horretarako baimenduta badago.
–Abeltzaintzaren osasun defentsarako elkartearen osasun programa duten ustiategietan behi-aziendako abelburuak sartzea: Kanpaina ofizialen xedeko gaitzak kontrolatzeko indarra duen araudian ezarritakoa gorabehera. Abeltzaintzaren osasun defentsarako elkarteetako ustiategietako titularrak behartuta daude analisiak egitera ustiategian sartzen dituzten abelburuei, azienda osasun aldetik babesteko eta abeltzaintzaren osasun defentsarako elkartearen beraren osasun estatusari eusteko.
–IBRri, IgEri, Paratuberkulosiari, Neosporari eta PIri (BVD) buruzko analisia sorburuan egitea emaitza negatiboekin; albaitari batek emandako ziurtagiriaren bidez egiaztatuko da, albaitaria ustiategiaren erantzukizuna duena izan edo abeltzaintzaren osasun defentsarako elkartean ustiategiari dagokion albaitaria izan. Arren kasuan, trikomonosi probak ere eginen dira. Probak 30 egunerako balioko du.
–Bigarren analisia egitea destinoan lehen aipatu gaitzetarako, emaitza negatiboekin; analitika hori ustiategian sartu eta, gehienez ere, 15 eguneko epean egin beharko da. Denbora horretan, abelburua isolatuta eduki beharko da ustiategian, emaitza onak jakin arte.
Untxien ustiategietarako berariazko programak.
Untxientzako osasun programan, gutxienez, honako jarduketa hauek jasoko dira:
1.–Albaitari arduradunak osasun programa prestatzea.
2.–Osasun defentsarako elkarteko albaitari arduradunak gaitza kontrolatu eta desagerrarazteko osasun programa bat prestatu eta Abereen Ekoizpen eta Osasun Atalera igorriko du. Programan gaitz hori abere-taldean zabal ez dadin ezarri beharreko biosegurtasuneko jarraibide zehatzak finkatuko dira.
3.–Orientabide gisa, honako gaitz hauei aurre egiteko osasun programan sartu beharreko gomendio batzuk proposatzen dira:
–Mixomatosia kontrolatzeko eta haren aurka borrokatzeko programa:
- Biosegurtasunerako oinarrizko neurriak ezartzea.
- Ustiategietan sintomatologia klinikoa duten abereak hiltzea edo isolatzea.
- Zaintza epidemiologikorako protokolo bat ezartzea, mixomatosiari lotutako sintomatologia klinikoak errutinaz aztertu eta atzemateko.
- Txertaketarako egutegi zorrotz bat aplikatzea (epeak, jarraibideak eta abereen adina). Txertoaren berri Landa Garapeneko eta Ingurumeneko Departamentuko Abere Osasuneko Atalari emanen zaio.
- Ustiategien kalifikazioa. Ustiategiak ekainaren 25ko 1547/2004 Errege Dekretuaren eranskinean ezarritakoaren arabera sailkatuko dira, horren bidez untxien ustiategiak antolatzeko arauak ezarri baitziren.
–Pneumonia hemorragiko birikoa kontrolatu eta haren aurka borrokatzeko programa:
- Biosegurtasunerako oinarrizko neurriak ezartzea.
- Ustiategietan sintomatologia klinikoa duten abereak hiltzea edo isolatzea.
- Zaintza epidemiologikorako protokolo bat ezartzea, gaitz hemorragiko birikoari lotutako sintomatologia klinikoak errutinaz aztertu eta atzemateko.
- Txertaketarako egutegi zorrotz bat aplikatzea (epeak, jarraibideak eta abereen adina). Txertoaren berri Landa Garapeneko eta Ingurumeneko Departamentuko Abere Osasuneko Atalari emanen zaio.
- Ustiategien kalifikazioa. Ustiategiak ekainaren 25ko 1547/2004 Errege Dekretuaren eranskinean ezarritakoaren arabera sailkatuko dira, horren bidez untxien ustiategiak antolatzeko arauak ezarri baitziren.
–Enteropatia mukoidea kontrolatu eta haren aurka borrokatzeko programa:
- Biosegurtasunerako oinarrizko neurriak ezartzea.
- Ustiategietan sintomatologia klinikoa duten abereak hiltzea edo isolatzea.
- Zaintza epidemiologikorako protokolo bat ezartzea, enteropatia mukoideari lotutako sintomatologia klinikoak errutinaz aztertu eta atzemateko.
III. ERANSKINA. OTSAGABIKO ESKUALDEKO BULEGOKO UDALERRIAK
| 003 | Abaurregaina |
| 004 | Abaurrepea |
| 033 | Aria |
| 034 | Aribe |
| 059 | Burgi |
| 071 | Gazteluberri |
| 093 | Ezkaroze |
| 095 | Espartza Zaraitzu |
| 111 | Galoze |
| 112 | Garaioa |
| 113 | Garde |
| 115 | Garralda |
| 119 | Gorza |
| 128 | Izaba |
| 133 | Itzaltzu |
| 134 | Jaurrieta |
| 181 | Nabaskoze |
| 185 | Otsagabia |
| 195 | Orbaizeta |
| 196 | Orbara |
| 198 | Orontze |
| 210 | Erronkari |
| 222 | Sartze |
| 245 | Urzainki |
| 247 | Uztarroze |
| 252 | Bidankoze |
| 256 | Hiriberri Aezkoa |
IV. ERANSKINA. GARDENTASUN BETEBEHARRARI BURUZKO AITORPENA
| Izena: | NANa/IFZ |
| Honako hau ordezkatuz: | IFK |
| Bizilekua: | |
| diru-laguntzaren onuradun naizen aldetik, aitorpen hau egiten dut (unitate kudeatzaileak bete beharrekoa): | |
Irailaren 11ko 59/2013 Foru Dekretuak Nafarroako Aurrekontu Orokorren kargurako diru-laguntzen onuradunen gardentasun betebeharrak arautzen ditu (2013ko 187. Nafarroako Aldizkari Ofiziala, irailaren 27koa).
Foru dekretu horren 3. artikuluak ezartzen duenez, diru-laguntzak jasotzen dituzten entitateak gardentasunera daude behartuta, inguruabar hauek gertatzen direnean:
a) Emandako diru-laguntza 20.000 eurotik gorakoa izatea urtean.
b) Emandako diru-laguntza entitate onuradunaren negozio-zifraren edo urteko aurrekontuaren %20tik gorakoa izatea.
(Kopuru horiek gainditzen diren kalkulatzeko, Nafarroako Foru Komunitateko Administrazioak edo haren erakunde publikoek urte naturalean emandako diru-laguntza guztien kopuruak batuko dira).
Aipatu foru dekretuaren 3. eta 4. artikuluetan xedatutakoari jarraituz, DEKLARATZEN DUT:
ρ Ez dudala gardentasun betebeharrik (aipatutako foru dekretuaren 3. artikuluan azaldutako inguruabarrak gertatzen ez direlako).
ρ.......................................................................................-k (adierazi organo-emailea) emandako....................................................................... (izena) diru-laguntza dela-eta, informazioa aurkeztu dudala beraz, ez da errepikatu beharrik, emandako datuak aldatu ez direlako.
ρ Gardentasun betebeharra dudala eta, horrenbestez, aitorpen honen eranskinean, 59/2013 Foru Dekretuaren 4. artikuluan ezarritako informazioa ematen dut, eta entitatearen urteko azken kontuen kopia eransten.
.............(e)n,........(e)ko..........aren..........(e)an
Sinadura:.......................................................
Kargua:.......................................................
ESKATZAILEARENTZAKO ARGIBIDE INTERESGARRIAK
ESKATZAILEARENTZAKO ARGIBIDE INTERESGARRIAK
1. Aitorpen hau eta kasuan-kasuan aurkezten den informazioa telematika bidez aurkeztuko dira, Nafarroako Gobernuaren Erregistro Orokor Elektronikoaren bitartez, eta diru-laguntza kudeatzen duen administrazio unitateari igorriko zaizkio.
2. Aitorpen hau igortzeko epea hilabetekoa izanen da, diru-laguntza ematen duen ebazpena jakinarazten edo argitaratzen den egunetik hasita, argitaratuz gero. Betebehar hori betetzen ez bada, emandako diru-laguntza ez da ordainduko.
3. Entitate onuradunak ematen duen informazioa Nafarroako Foru Komunitateko Administrazioaren Gobernu Irekiaren Atariko webgunean argitaratuko da. Informazio hori urtebetez eskuratzen ahalko da, argitaratzen denetik. Epe hori igarota, hura argitaratzeko ardura duen unitateak ofizioz kenduko du eta, hala egiten ez badu, entitate onuradunak kentzeko eskatzen ahalko du.
Iragarkiaren kodea: F1509094
