LEXNAVARRA
37/2009 FORU DEKRETUA, APIRILAREN 20KOA, NAFARROAKO UNIBERTSITATE PUBLIKOKO IRAKASLE ETA IKERTZAILE FUNTZIONARIOEN BANAKAKO MEREZIMENDUEI DAGOZKIEN ORDAINSARI OSAGARRIEN ESLEIPENA ARAUTZEN DUENA 
BON N.º 57 - 11/05/2009
- Atariko
- 1. artikulua. Xedea eta aplikazio eremua .
- 2. artikulua. Osagarrien izaera.
- 3. artikulua. Osagarri motak .
- 4. artikulua. Egitura.
- 5. artikulua. Zenbatekoa eta sorrarazpena .
- 6. artikulua. Irakaskuntzaosagarria .
- 7. artikulua. Ikerkuntzako osagarria.
- 8. artikulua. Erakundekudeaketako osagarria.
- 9. artikulua. Laguntzak emateko prozedura .
- XEDAPEN GEHIGARRIAK
- Lehen xedapen gehigarria. Ordainsari osagarriak finkatzea.
- Bigarren xedapen osagarria. Ebaluazio organoa.
- Hirugarren xedapen gehigarria. Aurrekontua.
- Laugarren xedapen gehigarria. Hitzarmenak sinatzea.
- Bosgarren xedapen gehigarria. Kontratupeko irakasle eta ikertzaileei hedatzea .
- AZKEN XEDAPENAK
- Azken xedapenetan lehena. Arauen garapena.
- Azken xedapenetan bigarrena. Indarra hartzea.
Unibertsitatearen Erreformari buruzko abuztuaren 25eko 11/1983 Lege Organikoak 46. artikuluan ezartzen duenez, unibertsitateetako gizarte kontseiluek, Gobernu Batzordearen proposamenez, irakaskuntza nahiz ikerketa lanei edo merezimendu nabarmenei dagozkien banakako ordainsariak esleitzea erabaki dezakete.
Ondorioz, Nafarroako Unibertsitate Publikoko Irakasleen Ordainsariei buruzko abenduaren 1eko 19/1998 Foru Legeak, 1. artikuluan, Nafarroako Unibertsitate Publikoko Gizarte Kontseiluari baimena eman zion banakako ordainsariak esleitzeko, Gobernu Batzordeak hala proposatuz gero, Unibertsitatearen Erreformari buruzko Lege Organikoaren 33. kapituluan ezarritako kidegoetako irakasle funtzionarioei.
Unibertsitateei buruzko abenduaren 21eko 6/2001 Lege Organikoa argitaratu zenez geroztik autonomia erkidegoen eskumena da ordainsari osagarriak esleitzea. Lege hark irakasle eta ikertzaile funtzionarioen banakako merezimenduei lotutako ordainsari osagarriak ezartzen ditu.
Horregatik, Nafarroako Foru Eraentza Birrezarri eta Hobetzeari buruzko abuztuaren 10eko 13/1982 Lege Organikoaren 47. artikuluak Nafarroako Foru Komunitateari ematen dion eskumena erabiliz, foru dekretu hau egin da. Foru dekretu honek ezartzen du Nafarroako Unibertsitate Publikoan lanaldi osoan aritzen diren irakasle eta ikertzaile funtzionarioei irakaskuntzaren, ikerketaren eta kudeaketaren alorretan dituzten banakako merezimenduengatik ordainsari osagarriak esleitzeko arau-esparrua.
Horiek horrela, Hezkuntzako kontseilariak proposaturik, Nafarroako Kontseiluaren irizpenarekin bat eta Nafarroako Gobernuak 2009ko apirilaren 20ko bilkuran hartutako Erabakiarekin bat,
DEKRETATZEN DUT:
1. artikulua . Xedea eta aplikazio eremua .
Foru dekretu honen xedea da behar den arau-esparrua ezartzea Nafarroako Unibertsitate Publikoan lanaldi osoan aritzen diren irakasle eta ikertzaile funtzionarioei irakaskuntzaren, ikerketaren eta kudeaketaren alorretan dituzten banakako merezimenduengatik ordainsari osagarriak esleitzeko, Unibertsitateei buruzko abenduaren 21eko 6/2001 Lege Organikoaren 69. artikuluan ezarritakoaren arabera, eta Nafarroako Unibertsitate Publikoko kontratupeko irakasle eta ikertzaileei (Kontratupeko Irakasle Doktorea, Kontratupeko Bitarteko Irakasle Doktorea eta Irakasle Laguntzaile Doktorea modalitateetan) merezimendu horiengatik ordainsari horiek esleitzeko, Unibertsitateei buruzko abenduaren 21eko 6/2001 Lege Organikoaren 55. artikuluan ezarritakoaren arabera.
2. artikulua . Osagarrien izaera.
1. Osagarri pertsonal eta banakakoak izanen dira, beren artean bateragarriak eta metagarriak, foru dekretu honetan ezarritako mugen barnean.
2. Interesdunek eskaturik esleituko dira, bakoitzaren merezimenduen arabera, eta kategorien artean bereizi gabe. Sustapen kasuetan, metatutako tarteak mantendu eginen dira .
3. Merezimenduen balorazio positiboaren ondoren esleituko dira ordainsari osagarriak.
4. Nafarroako Unibertsitate Publikoko Gizarte Kontseiluak, unibertsitate horretako Gobernu Kontseiluaren proposamenez, ordainsari osagarri horiek esleitzea erabaki ahalko du, banakako merezimenduen arabera, foru dekretu honetan aurreikusi bezala.
3. artikulua . Osagarri motak .
Nafarroako Unibertsitate Publikoan lanaldi osoan aritzen diren irakasle eta ikertzaileen ordainsari osagarriak honako hauek dira:
a) Irakaskuntzako osagarria, banakako merezimenduen saritzat ematen dena, egindako irakaslanaren balorazioaren arabera.
b) Ikerkuntzako osagarria, banakako merezimenduen saritzat ematen dena, egindako ikerketa lanaren balorazioaren arabera.
c) Erakunde-kudeaketako osagarria, banakako merezimenduen saritzat ematen dena, Nafarroako Unibertsitate Publikoaren kudeaketan hartutako arduren balorazioaren arabera.
1. Ordainsari osagarriak tarteetan egituratuko dira, foru dekretu honetan ezarritakoarekin bat.
2. Gehienez ere zazpi tarte onar daitezke osagarri guztietarako. Salbuespenez zortzigarren tarte bat eskuratu ahalko da, ikerkuntzako osagarriaren laugarren tartea, hain zuzen ere. Tarte horri bikaintasunekoa deritzo eta foru dekretu honen 7. artikuluan ezarrita dago.
5. artikulua . Zenbatekoa eta sorrarazpena .
1. 2009an 1.904,74 euro jasoko dira tarte bakoitzeko. Ondorengo urteetan zenbatekoa eguneratu eginen da, Nafarroako administrazio publikoen zerbitzuko langileen ordainsariak igotzen diren neurrian. Igoera urtero ezartzen da Nafarroako Aurrekontu Orokorrei buruzko foru legean.
2. Foru dekretu honetan arautzen diren ordainsari osagarrien gehieneko zenbatekoa, urtean, Nafarroako Unibertsitate Publikoko Gizarte Kontseiluak aitortutako tarteei artikulu honen 1. puntuan tarte bakoitzeko ezarritako zenbatekoa aplikatzean ateratzen dena izanen da.
3. Foru dekretu honetan ezarritakoari jarraituz aitortzen diren ordainsari osagarriak hurrengo urteko urtarrilaren 1etik hasita ordainduko dira. Ondorio ekonomikoetarako ez da kontuan hartuko aitorpenetik urtarrilaren 1era arte igarotako denbora.
4. Urtero Nafarroako Unibertsitate Publikoaren aurrekontuan zehaztuko da zenbat diru jarriko den lanaldi osoan aritzen diren irakasle eta ikertzaileei banakako merezimenduengatik ordainsari osagarriak emateko. Banakako ordainsari horiek jasoko dituzten pertsonen zerrenda ere erantsiko da, eta bakoitzak zenbat diru jasoko duen, zenbat tarte dituen eta zein motatako osagarriak aitortu zaizkion zehaztuko da.
6. artikulua . Irakaskuntzaosagarria .
1. Irakaskuntza-osagarriak, irakaskuntzako banakako merezimenduak ordaintzen dituenak, gehienez ere hiru tarte metagarri ditu.
2. Irakaskuntzako merezimenduengatiko ordainsari osagarri arruntaren lehenbiziko tartea eskatu ahal izanen da, irakaskuntzan sei urte eginez gero. Betiere, eskatzaileak bosturteko bat eduki behar du, irakasle eta ikertzaile funtzionarioen kasuan, edo haren irakaslanaren ebaluazio positiboa, kontratu mugagabea duten langileen kasuan.
3. Irakaskuntzako merezimenduengatiko ordainsari osagarri arruntaren bigarren tartea eskatu ahal izanen da, irakaskuntzan hamabi urte eginez gero. Betiere, eskatzaileak bigarren bosturteko bat eduki behar du, irakasle eta ikertzaile funtzionarioen kasuan, edo haren irakaslanaren bigarren ebaluazio positiboa, 1. artikuluak aipatzen dituen kontratupeko langileen kasuan.
4. Irakaskuntzako merezimenduengatiko ordainsari osagarri arruntaren hirugarren tartea eskatu ahal izanen da, irakaskuntzan hemezortzi urte eginez gero. Betiere, eskatzaileak hirugarren bosturteko bat eduki behar du, irakasle eta ikertzaile funtzionarioen kasuan, edo haren irakaslanaren hirugarren ebaluazio positiboa, 1. artikuluak aipatzen dituen kontratupeko langileen kasuan.
7. artikulua . Ikerkuntzako osagarria.
1. Ikerkuntzako osagarriak, ikerketari dagozkion banakako merezimenduen saritzat ematen denak, gehienez ere hiru tarte izan ditzake, metagarriak.
2. Ikerkuntzako merezimenduengatiko ordainsari osagarri arruntaren lehenbiziko tartea eskatu ahal izanen da, ikerkuntzan sei urte eginez gero. Betiere, irakasleak bere ikerketa jardueraren ebaluazio positiboa eduki behar du.
3. Ikerkuntzako merezimenduengatiko ordainsari osagarri arruntaren bigarren tartea eskatu ahal izanen da, ikerkuntzan hamabi urte eginez gero. Betiere, irakasleak bere ikerketa jardueraren bi ebaluazio positibo eduki behar ditu.
4. Ikerkuntzako merezimenduengatiko ordainsari osagarri arruntaren hirugarren tartea eskatu ahal izanen da, ikerkuntzan hemezortzi urte eginez gero. Betiere, irakasleak bere ikerketa jardueraren hiru ebaluazio positibo eduki behar ditu.
5. Salbuespen gisa, ikerkuntzako ordainsari osagarriaren laugarren tarte berezi bat eman ahalko da, bikaintasunekoa deituko zaiona, baldin eta eskatzaileak ebaluazio positiboa badu. Irakasle eta ikertzaileei tarte hori onartu ahalko zaie, baldin eta, irakaskuntzako eta ikerkuntzako gehieneko sei tarteak onartuak dituztelarik, beren ibilbide akademikoan ikerketaren arloan egindako merezimendu bereziak frogatzen badituzte.
8. artikulua . Erakundekudeaketako osagarria.
1. Erakunde-kudeaketari dagozkion merezimenduak direla-eta ordainsari osagarriak esleitu ahalko zaizkie lanaldi osoan aritzen diren irakasle eta ikertzaile funtzionarioei, beren jardueraren zati bat Nafarroako Unibertsitate Publikoaren gobernuko pertsona bakarreko kargu jakin batzuetan egiten badute.
2. Erakunde-kudeaketako osagarria gehienez bi tartetan egituratuko da, eta kargu batean baino gehiagotan aritzen direnek ezin izanen dituzte metatu.
3. Bi tarte esleituko dira errektore karguan aritzeagatik; errektoreorde edo idazkari nagusi izateagatik, tarte bat eta erdi; eta dekano, zentroko zuzendari edo departamentuko zuzendari izateagatik, tarte bat.
4. Tarte horiek onar daitezen, artikulu honen 3. idatz-zatian aipatutako gobernu karguetako batean aritu beharra dago, bi urtean, gutxienez, eta gainera kudeaketa lanaren ebaluazio positiboa jaso behar da.
9. artikulua . Laguntzak emateko prozedura .
Nafarroako Unibertsitate Publikoko Gobernu Kontseiluak behar den prozedura ezarriko du foru dekretu honek ezarritako ordainsari osagarriak eskuratzeko eskubidea ematen duten irakasle eta ikertzaileen banakako merezimenduak aitortzeko.
Lehen xedapen gehigarria. Ordainsari osagarriak finkatzea.
Nafarroako Unibertsitate Publikoan lanaldi osoan aritzen diren irakasle eta ikertzaile funtzionarioek foru dekretu hau indarrean jartzerakoan dituzten ordainsari osagarriak finkatu eginen dira. Tarte horiek lortzeko kontuan hartu zitzaizkien merezimenduak ez dira berriz ebaluatuko tarte gehiago lortzeko.
Bigarren xedapen osagarria. Ebaluazio organoa.
Ordainsari osagarriak esleitu aurretik kanpoko ebaluazio organo batek merezimenduak baloratuko ditu. Foru lege batek zehaztuko du zein izanen den ebaluazio organoa. Berariazko izendapenik ezean, ebaluazio organoa, irakaskuntzako eta kudeaketako osagarrietarako, Kalitatea Ebaluatzeko eta Egiaztatzeko Agentzia Nazionala izanen da, berak ezarritako programen bitartez; eta ikerkuntzako osagarrietarako, Ikerketa Jarduera Ebaluatzeko Batzorde Nazionala.
Hirugarren xedapen gehigarria. Aurrekontua.
Foru dekretu hau aplikatuz irakasleei emanen zaizkien ordainsari osagarrietarako urte bakoitzean zenbat diru jarri behar den zehazteko, Nafarroako Unibertsitate Publikoko kudeatzailetzak urtero txostena bidaliko dio Nafarroako Foru Komunitateko Administrazioan arlo horretan eskumena duen departamentuari, urria baino lehen, eta bertan emanen dio hurrengo urteko osagarrien berri: tarteen kopurua, aitortutako osagarrien modalitateak eta guztizko zenbatekoa.
Laugarren xedapen gehigarria. Hitzarmenak sinatzea.
Nafarroako Unibertsitate Publikoko errektoreari baimena ematen zaio bigarren xedapen gehigarrian aipatutako ebaluazio organoekin hitzarmenak egin eta sinatzeko. Hitzarmen horiek, aldez aurretik, Nafarroako Gobernuan unibertsitate ikasketen gaineko eskumenak dituen departamentuak onetsi behar ditu.
Bosgarren xedapen gehigarria. Kontratupeko irakasle eta ikertzaileei hedatzea .
1. Berariaz ezartzen ez bada, 1. artikuluan aipatzen diren kontratupeko irakasle eta ikertzaileei funtzionarioei ezarritakoa aplikatuko zaie, betiere dagokion araudian eskatutako baldintzak betetzen badituzte.
2. Langile horien osagarrien kostuaren finantzaketak ez du ekarriko Hezkuntza Departamentuaren ekarpen ekonomikoa handitzea.
Azken xedapenetan lehena. Arauen garapena.
Baimena ematen zaio Hezkuntzako kontseilariari foru dekretu hau bete eta garatzeko behar diren xedapen guztiak eman ditzan.
Azken xedapenetan bigarrena. Indarra hartzea.
Foru dekretu honek Nafarroako Aldizkari Ofizialean argitaratutakoan hartuko du indarra, 2009ko urtarrilaren 1ean.
