(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

54/2008 FORU DEKRETUA, MAIATZAREN 26KOA, NAFARROAKO FORU KOMUNITATEKO HEZKUNTZA SISTEMAREN ESPARRUAN LANBIDE HEZIKETAREN ANTOLAMENDUA ETA GARAPENA ARAUTZEN DITUENA.

BON N.º 76 - 20/06/2008

  I. KAPITULUA. LANBIDE HEZIKETA HEZKUNTZA SISTEMAN

  II. KAPITULUA. LANBIDE HEZIKETAREN ANTOLAMENDU AKADEMIKO OROKORRA

  III. KAPITULUA. TITULUEN CURRICULUMAREN DISEINUA, ANTOLAKETA ETA SEKUENTZIAZIOA

  IV. KAPITULUA. LANBIDE HEZIKETAKO IKASTETXEAK

  V. KAPITULUA. LANBIDE HEZIKETA ETA ENPRESA

  VI. KAPITULUA. LANBIDE HEZIKETAREN ILDO ESTRATEGIKOAK

Atariko

1

Lanbide heziketa ondoko lege hauek babesten dute: orokorrean, Kualifikazioei eta Lanbide Heziketari buruzko ekainaren 19ko 5/2002 Lege Organikoak, eta bereziki, hezkuntza sistemaren barruan garatzen den lanbide heziketaren esparruan, Hezkuntzari buruzko maiatzaren 3ko 2/2006 Lege Organikoak. Bi lege organiko horiek arau-esparru berritzailea eta gure herriaren egoera ekonomiko eta sozial berriari egokitutakoa taxutzen dute.

Hezkuntzako Administrazioaren mendeko lanbide heziketako sistema, hezkuntza sistemaren barruan lanbide heziketaren antolamendu orokorra ezartzen duen abenduaren 15eko 1538/2006 Errege Dekretuaren bidez arautu eta antolatu da. Horrenbestez, bidezkoa da azken arau hori Nafarroako Foru Komunitatean egokitu eta garatzea, Nafarroako Foru Eraentza Birrezarri eta Hobetzeari buruzko abuztuaren 10eko 13/1982 Lege Organikoaren 47. artikuluaren barruan Nafarroari aintzatesten zaizkion eskumenak erabilita.

Nafarroako Gobernuaren ustez, bere garapen ekonomikoko, aurrerapen sozialeko eta lurralde-orekako politiken onerako oso garrantzitsua da kalitatezko lanbide heziketa berritu, indartu eta garatzea. Alde horretan, azken urteotan, gure Komunitatean mota horretako irakaskuntza modernizatzeko prozesu biziari ekin zaio. Prozesu horren mugarri nabarmenak hauek dira: lehengo lanbide heziketatik gaur egungorako trantsizioa, Nafarroako Gobernuak "Lanbide Heziketa garatzeko 2001-2004 eperako Nafarroako Plana" onetsi izana, Nafarroako Gobernuak 2005eko apirilaren 4ko Gobernu-bileran Nafarroako Lanbide Heziketaren Kontseiluak eskatuta onetsitako "Lanbide Heziketari eta Kualifikazioen Sistema Nazional berriari buruzko Nafarroako Gobernuaren Erabakia", eta Nafarroako Foru Komunitateko lanbide heziketako ikastetxe integratuak arautzen dituen irailaren 4ko 63/2006 Foru Dekretuaren bitartez Zentro Integratuak sortu izana.

Abenduaren 15eko 1538/2006 Errege Dekretuak Lanbide Kualifikazioen Katalogo Nazionalean, Europar Batasunaren jarraibideetan eta interes sozialeko beste hainbat alderditan oinarritzen diren lanbide heziketako titulu berriak egituratzen ditu. Titulu horiek lortzeko irakaskuntza erdi mailako eta goi mailako heziketa ziklotan antolatzen da, eta Ziklo horiek lanbide-modulutan antolatzen dira. Modulu horietako gehienak, berriz, Lanbide Kualifikazioen Katalogo Nazionaleko gaitasun unitateekin lotzen dira.

Lehengo oinarrizko antolamendua kontuan hartuta, foru dekretu honek estrategia eta arau arloko alderdi berriak garatzen eta txertatzen ditu. Horrela, lanbide heziketarako, garapen-eredu baten printzipioekin batera Nafarroan mota horretako irakaskuntzarako etorkizuneko norabidea planteatzen duten helburuen multzoa ezartzen da. Norabide horren koordenatuak arau honen VI. kapituluan planteatzen diren ildo estrategikoetan biltzen dira.

2

Nafarroako esparrurako soilik garatzen diren arau arloko -eta soilik arlo horretako- elementuei dagokienez, lehenengoz nabarmendu behar dira lanbide heziketako tituluen curriculuma diseinatu, antolatu, garatu eta sekuentziatzeari buruzko artikuluak. Curriculum hori Autonomia Erkidegoek egin behar dute, eta Nafarroako Foru Komunitatearen kasuan modernizaziorako alderdi batzuk txertatu dira. Alde batetik, derrigorrezko lanbide-moduluak sortu dira, eta horiek Hezkuntza Departamentuak gehituko eginen dizkie Estatuak titulu bakoitzerako ezarri dituen gutxieneko ikasketei; beste alde batetik, lanbide heziketako ikastetxeek modulu osagarrien curriculuma diseinatzeko aukera izanen dute. Bigarren elementua, produkzio-ingurunearekin zerikusia duena da, hori baita lanbide-kualifikazioen sistemaren funtsezko eta lehen mailako erreferentzia. Ondorioz, ikastetxeak lan arloko testuingurura molda daitezela lortzeko ezartzen diren helburuek mugatutako esparruaren barruan, azpimarratu egiten dira gogo ekintzailea, baita langileei zuzendutako prestakuntza-eskaintzak ere, eta produkzio sektoreko profesionalek heziketa-zikloetan irakaskuntzan parte hartzeko aukera ere bai.

Modernizaziorako hirugarren elementuak, edo funtsezko hirugarren elementuak, irailaren 4ko 63/2006 Foru Dekretuan aurreratutako ikastetxe Integratuaren eredu berriarekin eta horri lotuta dagoen lanbide heziketako ikastetxeen sarearen kontzeptuarekin zerikusia dauka. Prestakuntzako bi egitura horiek, ikastetxea eta sarea, Nafarroako lanbide ikasketen zimendu gisa planteatzen dira, eta foru dekretu honetan bultzatzen den araupeketari esker hori guztia kudeatzen dutenek malgutasun, autonomia eta antolatzeko ahalmen handiagoak izanen dituzte.

Laugarren elementua, lanbide heziketa etorkizunerantz proiektatzeko eragilea da, eta lanbide heziketaren ildo estrategikoetan banakatuta dago. Ildo horiek eremu hauei dagozkie: berrikuntza teknologiko eta didaktikoari, nazioartekotzeari, lanbide arloko informazio eta orientazioari eta lehiakortasunaren ebaluazioari.

3

Lanbide heziketako berrikuntza teknologiko eta didaktikoaren azken helburua merkatu lehiakor eta globalizatuan murgildutako enpresen bitartez eskolatik lan-mundura igarotzeko beharrezkoak diren ezagutza eta gaitasunak ikasleen artean sustatzea da, hain zuzen ere merkatu horretan teknologiaren eta berrikuntza teknologikoaren garrantziak erakundeen hazkundeari nahiz langileen enplegagarritasunari eragiten baitiote. Alde horretan, lanbide heziketaren ildo estrategiko horrek zaintza teknologiko eta didaktikoko sistema egituratzen du irakaskuntza horien testuinguruan, eta aintzat hartzen ditu Nafarroako Gobernuak azken urteotan onetsi eta burutu dituen plan teknologikoak.

Lanbide heziketako irakaskuntza nazioartera ateratzea, ildo estrategikoaren izaera hartzen duen beste helburu bat da. Beste guztiak bezala, ildo estrategiko hori proiektu eta ekintza zehatzekin lotzen da. Eremu honetan, proiektu horiek ikasle nahiz irakasleen nazioarteko mugikortasunarekin zerikusia dute, baina ez horrekin bakarrik, baizik eta atzerriko entitate eta erakundeekin mota askotariko proiektuak egiteko interesarekin ere bai. Ildo estrategiko horren ondorio zuzenetako bat goi mailako heziketa zikloetan atzerriko hizkuntza bat -ahal dela ingelesa- sartzea da. Goi mailako heziketa ziklo bat amaitzen duten ikasleek zeharo espezializatutako kualifikazioa eta gaitasun pertsonal eta sozialen garapenean oinarritutako heldutasun profesionala lortuko dituzte, eta horretaz gain beren mugikortasun profesionala edozein herritara hedatzeko gai izanen dira, eta horrela nazioarteko informazioa eta baliabideak eskuratu ahal izanen dituzte, egoera praktikoetan atzerriko hizkuntza bat erabiliz.

Lanbide arloko informazio eta orientazioa Kualifikazioen eta Lanbide Heziketaren Sistema Nazionalaren ondoriozko beharrizanetako bat da. Sistema berri horrek gazte eta langileentzako informazioa integratzeko ahalmena du, eta horri esker mugikortasun, malgutasun eta zabaltasun handiagoa sorraraziko ditu. Modu horretan, herritarrak lanbide heziketako ikastetxeetan lanbide eta lan arloko informazio eta orientazio zerbitzua izan beharko du.

Foru dekretu honek lehia ebaluatu eta egiaztatzeko prozedura ere ildo estrategiko gisa definitzen du. Ekainaren 19ko 5/2002 Lege Organikoaren 8. artikuluko 3. puntuak eta abenduaren 15eko 1538/2006 Errege Dekretuaren 35. artikuluko 4. puntuak adierazten duten bezala, pertsonek ikasketako sistema antolatu eta arautuetatik kanpo eskuratutako gaitasunak aintzatetsi eginen dira. Hori oso beharrezkoa da lanbide batean jardun bitartean zenbait ezagutza eta trebetasun eskuratu dituzten pertsonentzat; hain zuzen ere, lanbide heziketako tituluetan ezagutza eta trebetasun horiek gaitasun ofizial gisa definituta egonen dira.

Azaldutakoaren arabera, Lanbide Heziketaren Kontseiluaren iritzia entzundakoan, eta Nafarroako Eskola Kontseiluak txostena eman ondoren, Hezkuntza kontseilariak proposaturik, Nafarroako Gobernuak bi mila eta zortziko maiatzaren hogeita seiko bilkuran hartutako erabakiarekin bat,

DEKRETATU DUT:

I. KAPITULUA. LANBIDE HEZIKETA HEZKUNTZA SISTEMAN

1. artikulua . Helburua eta aplikazio eremua.

Foru dekretu honen helburua Nafarroako Foru Komunitateko hezkuntza sistemaren esparruan lanbide heziketaren egiturari eta antolamenduari buruzko jarraibide orokorrak ezartzea da, Kualifikazioei eta Lanbide Heziketari buruzko ekainaren 19ko 5/2002 Lege Organikoan, Hezkuntzari buruzko maiatzaren 3ko 2/2006 Lege Organikoan eta hezkuntza sistemaren barruan lanbide heziketaren antolamendu orokorra ezartzen duen abenduaren 15eko 1538/2006 Errege Dekretuan.

2. artikulua . Kontzeptua eta xedea.

1. Lanbide heziketa hezkuntza sistemaren barruan ikasleei hainbat gaitasun ematen dieten ikasketen multzo gisa definitzen da. Gaitasun horiei esker ikasleak lanbide batzuetan zein besteetan jarduteko eta enplegua eskuratzeko gauza izanen dira, bai eta eremu pertsonalean zein lanbide eremuan beren kabuz moldatzeko eta gizartearen aldaketetara egokitzeko, gizarte honen oinarriak jakintza eta etengabeko ikasketa baitira, bizitza sozial, kultural eta ekonomikoan modu aktiboan parte hartu ahal izateko.

2. Lanbide heziketako irakaskuntzen prestakuntza-ekintzak sistema ireki eta malgu batean egituratuta egonen dira, bizitzan ikasteko beharrizanari erantzuna emanen dion etengabeko prestakuntza-prozesu baten barruan.

3. Lanbide heziketa ireki eta malgu hori ondoko alderdi hauetan gauzatuko da, besteak beste: antolakuntza-modalitateen, prestakuntza-eskaintzen eta titulazioak eskuratzeko sarbideen aniztasuna. Horretarako, bere ingurunera irekitako lanbide heziketako ikastetxe baten eredua landuko da. Ikastetxe horrek erantzun zehatzak, berritzaileak eta produkzio sistemarako egokiak emanen ditu, pertsonen beharrizanak eta egoerak kontuan hartuta.

3. artikulua . Helburuak.

1. Abenduaren 15eko 1538/2006 Errege Dekretuaren 3. artikuluan azaldutako helburuak garatu eta zehazteko, Nafarroako hezkuntza sistemako lanbide heziketaren funtsezko helburuak - dekretuan azaldutakoez gain- hauek izanen dira:

a) Pertsonen zein Nafarroako Foru Komunitateko produkzio sektoreen prestakuntza eta lanbide arloko beharrizanak betetzea.

b) Pertsona helduei prestakuntza eskuratzeko aukera ematea, beren gaitasun profesionala eta enplegagarritasuna hobetzeko.

c) Foru Komunitatean egiten den lanbide heziketa Europako eremura molda dadila erraztea.

d) Lanbide heziketa egiten duten ikasleei nahiz bizitzako une batean edo bestean lanbide heziketako hezkuntza sisteman sartu nahi diren pertsonei lanbide eta lan arloko informazio eta orientazioa ematea.

e) Pertsona ezgaituei, behartsuei edo gizartean bazterturik geratzeko arriskua dutenei lanbide kualifikazioa ematea, lan-munduan sartzeko pizgarria eduki dezaten.

f) Prestakuntzako eta lanbide arloko ibilbide malguak aukeratzeko erraztasuna ematea, pertsonek beren lan-esperientziaren bidez edo ikasteko sistema informalen edo ez-formalen bitartez eskuratutako lanbide-gaitasunak aintzat har daitezela lortuz.

g) Ikasleek nazioarteko mugikortasuneko jardueretan parte har dezatela lortzea.

h) Ikasleei lan arloko esperientziak ematea, ahal dela Nafarroako enpresetan, gerora lana errazago lor dezaten.

i) Mota honetako irakaskuntzarako lortu nahi diren helburuen araberako antolakuntza eta funtzionamendua dauzkan lanbide heziketako ikastetxe eredua ezarri eta garatzea.

j) Sistemaren modernizazioa sustatzea baliabide materialei, giza baliabideei eta baliabide didaktikoei dagokienez, lan-merkatuaren gaur egungo egoera kontuan hartuta.

k) Berrikuntza teknologiko eta didaktikoa sustatzea, baita ikastetxeek berrikuntza eta ikerketa proiektuetan parte har dezatela sustatzea ere.

l) Etengabeko prestakuntza bideratzeko inguruneak sorraraztea, teknologia berriek lagundutako ikasketa eta autoikasketa bideratzen duten ikuspegi didaktikoak landuz.

m) Irakasle eta prestatzaileen gaitasunen garapena eta etengabeko eguneratzea sustatzea, beren lanbidean eragina duten aldaketak kontuan hartuta.

2. Aldi berean lanbide heziketak gizonen eta emakumeen arteko benetako aukera berdintasuna bultzatuko du, estereotiporik eta genero-aurreiritzirik gabeko prestakuntza eskuratzeko aukera emanda.

4. artikulua . Lanbide heziketa Nafarroan garatzeko eredua.

1. Nafarroan kualifikazioen eta Lanbide Heziketaren sistema berria ezarriz gero, orain Hezkuntza Departamentuaren mendean dagoen eta heziketa zikloetan antolatzen den lanbide heziketaren oinarrizko ezaugarriak kalitatea, enpresen eskarietarako egokitasuna eta bizialdian ingurune ekonomiko eta soziala kontuan hartzen duen ikasketa-eredurako erantzuna izanen dira.

2. Lanbide irakaskuntzaren garapen prozesuan ukatu ezin den beste alderdi bat prestakuntza eta enplegua bateratzearena da; horregatik, gazteen hasierako prestakuntza nahiz langileen etengabeko prestakuntza modu koordinatuan artatu behar dira. Eta eskaintza mota biek bide ez-formal edo informaletatik eskuratutako gaitasuna egiaztatzeko prozedurarekin zerikusia izanen dute, bereziki pertsonen jarduera profesionalean eskuratutako gaitasunarekin.

3. Hezkuntza Departamentuak, bere eskumenen eremuan, berrikuntza teknologiko eta didaktikoa bultzatuko du.

4. Lanbide heziketako irakaskuntzak ingurune ekonomiko eta soziala aintzat hartuko du, baita nazioarteko testuingurua ere, bereziki Europako herriena. Horretarako, zikloen curriculumean nazioarteko ikuspegia indartuko da, ikasle zein irakasleen mugikortasunerako proiektuak eginen dira, atzerriko hizkuntza batean emandako moduluak dituzten heziketa zikloak eskainiko dira, berrikuntzako proiektuetan parte hartuko da eta beste herri batzuetako erakunde eta zentroekiko harreman egonkorrak sustatuko dira.

5. Azkenik, Kualifikazioen Sistema Nazionala gazteentzako prestakuntza eta langileentzako prestakuntza integratzen dituen helmen handiko tresna dela kontuan hartuta, ezinbestekoa da pertsonei lanbide eta lan arloko informazio eta orientaziorako sistema baten bitartez laguntza ematea. Sistema horrek, gainera, ekainaren 19ko 5/2002 Lege Organikoak aurreikusitako gaitasunen ebaluazio eta onarpenerako prozedura erabili nahi dutenentzako laguntza ekarriko du.

II. KAPITULUA. LANBIDE HEZIKETAREN ANTOLAMENDU AKADEMIKO OROKORRA

5. artikulua . Modalitateak eta eskaintza motak.

1. Lanbide heziketako irakaskuntza heziketa ziklotan antolatzen da abenduaren 15eko 1538/2006 Errege Dekretuaren 8. artikuluan adierazten den bezala, eta hartzaileak nor diren kontuan hartuta modalitate hauetan sailkatzen da:

a) Orokorra. Batez ere eskola-adinean dauden gazteei eskaintzen zaie, hau da, Derrigorrezko Bigarren Hezkuntza, Batxilergoa edo Hasierako Kualifikazio Profesionaleko Programak amaitu dituzten pertsonei; ikastetxean egon beharreko eskola-orduetan antolatzen da.

b) Berezia. Batez ere pertsona helduei eskaintzen zaie eta lan-ordutegien eta antzeko beste alderdi batzuen arabera antolatzen da.

c) Urrutikoa. Programatutako prestakuntza-jarduerak egiteko ez da ikastetxera aldian-aldian joan behar. Ikastetxean laguntzarako jarduerak egin ahal izanen dira.

d) Lana-prestakuntza. Jardunean dauden langileentzako modalitate honetan lanbide ikasketa horiek osatzen dituzten moduluetako eduki teoriko eta praktikoak laneko jarduerarekin uztartzen dira.

2. Eskaintzaren hedadura kontuan hartuta, ikasketa hauek ondoko mota hauetan sailkatzen dira:

a) Osoa. Dagokion heziketa zikloaren curriculuma osatzen duten lanbide-modulu guztietan eginen da matrikula.

b) Partziala. Lanbide-moduluka eginen da matrikula.

6. artikulua . Lanbide heziketako tituluak lortzeko bideak.

Lanbide heziketako tituluak bide hauetatik lortzen ahal dira:

a) Bide arrunta. Ezarritako ordutegian egiten diren prestakuntza jarduerak -edo kasuan kasu urrutiko modalitatean eskatzen direnak- egin eta gainditu behar dira.

b) Proben bidez. Nafarroako Foru Komunitateko Administrazioaren Hezkuntza Departamentuak aldian-aldian Teknikari eta Goi-mailako Teknikari tituluak lortzeko probak antolatuko ditu.

7. artikulua . Hezkuntza sistemako lanbide heziketan sartzea.

1. Erdi eta goi mailako Lanbide Heziketara zuzenean eta proba bidez sartzeko, eta sartzeko proben zati batetik salbuesteko, abenduaren 15eko 1538/2006 Errege Dekretuaren 21, 22, 23, 24 eta 25. artikuluetan xedatuta dagoena bete beharko da.

2. Urrutiko lanbide heziketa norberaren betebehar, beharrizan edo gogoengatik ikasketa horiek eskola-ordu arruntetan egin ezin dituzten pertsonei eskainiko zaie batez ere.

3. Hezkuntza Departamentuak heziketa zikloen sarbide-probetarako prestatzeko ikastaroa programatu eta eskaintzen ahalko du, eta ikastaro horren aprobetxamendu-maila proba horietan kontuan hartuko da.

4. Proba bidez sartzeko, Nafarroako Foru Komunitateko Administrazioaren Hezkuntza Departamentuak erdi mailako edo goi mailako lanbide heziketako ikasketetan sartzen direnentzat erreserbatu beharreko plaza-kopurua ezarriko du.

8. artikulua . Pertsona helduentzako lanbide heziketako irakaskuntza.

1. Bizitza osoan etengabeko prestakuntza, gizarteratzea eta pertsona edo talde behartsuak lan-merkatuan sar daitezela errazteko helburuz, Foru Komunitateko Administrazioaren Hezkuntza Departamentuak prestakuntza pertsona helduei eskaintzen ahalko die, batez ere modalitate berezian eta urrutiko modalitatean.

2. Irakaskuntza hori hartzaile diren pertsona helduen talde batzuen zein besteen ezaugarrien arabera egokituko dira, eta kasuan kasu, lanbide gaitasunak ebaluatu eta egiaztatzeko lanbide sistemari lotuko zaizkie.

9. artikulua . Lanbide ikasketen ebaluazioa eta egiaztapena.

1. Heziketa zikloetako ikasleen ikasketaren ebaluazioa lanbide-moduluka eginen da, eta modulu horietako bakoitzari zenbakizko kalifikazioa emanen zaio -batetik hamarrera, zenbaki hamartarrik gabe-, Lantokietako Prestakuntzako moduluan izan ezik, horretan Gai edo Ez-Gai kalifikazioa emanen baita. Zikloko batez besteko nota zikloa osatzen duten moduluetako batez besteko aritmetikoa izanen da.

2. Heziketa zikloaren helburu orokorren eremuan, ebaluazioa etengabea izanen da eta lanbide-moduluetako bakoitzeko ikasketaren emaitzak nahiz ebaluazio-irizpideak erreferentzia gisa hartuta eginen da; halaber, lanbide-gaitasun egokiak eskuratzeaz gain beste faktore batzuk hartuko dira kontuan, adibidez lan arloko autonomia, nortasuna eta heldutasun pertsonal zein profesionala bereganatzea, beste pertsona batzuekin lankidetzan aritzea eta lana segurtasun eta osasun egoera egokietan egitea.

3. Erdi mailako heziketa ziklo bat gainditzen duenak Teknikari titulua lortuko du, eta goi mailako heziketa ziklo bat gainditzen duenak Goi Mailako Teknikari titulua lortuko du. Horiek biek estatu osoan izanen dute izaera ofiziala nahiz balio akademiko eta profesionala.

4. Heziketa ziklo bat osatzen duen lanbide-modulu bat edo gehiago gainditu arren ziklo osoa gainditzen ez duenak eskuratutako lanbide-gaitasunen egiaztagiria lortuko du. Egiaztagiri horrek balio akademikoa eta egiaztapen partzialeko ondorio metagarriak izanen ditu.

5. Era berean, lanbide-moduluen antolamenduaren oinarri diren prestakuntza-unitate laburragoak gainditzen dituztenek egiaztagiri partzial metagarria lortzen ahalko dute. Egiaztagiri horrek Nafarroako Foru Komunitatearen lurraldean soilik izanen du balio akademikoa. Lanbide-modulu bateko prestakuntza-unitate guztiak gainditzen dituenak horri buruzko egiaztagiria jasoko du.

6. Hezkuntza Departamentuak Nafarroako Foru Komunitatean lanbide heziketako irakaskuntzaren ebaluazio- eta matrikula-prozesuari dagokion araudia landuko du.

10. artikulua . Lanbide heziketaren eta unibertsitatearen arteko baliokidetasunen xehetasunak.

1. Hezkuntza Departamentuak, Nafarroako Foru Komunitatean dauden unibertsitateekiko erabakien bitartez, lanbide heziketako tituluak unibertsitate-ikasketekin baliokidetzeko aukerak zehaztuko ditu.

2. Hezkuntza Departamentuak beste herri batzuetako unibertsitate eta goi mailako ikastegiekin akordioak sina daitezela bultzatuko du. Horrela, goi mailako lanbide heziketako ziklo bat amaitzen duten ikasleek, beste herri batzuetako ikastetxeetan ikasten jarraitu nahi izanez gero, dagozkien ikasketak baliokidetzen ahalko dituzte.

III. KAPITULUA. TITULUEN CURRICULUMAREN DISEINUA, ANTOLAKETA ETA SEKUENTZIAZIOA

11. artikulua . Curriculumari buruzko jarraibide orokorrak.

1. Hezkuntza Departamentuak Lanbide Heziketako Tituluen Katalogo Nazionalari dagokion tituluen curriculuma garatuko du. Horrenbestez, abenduaren 15eko 1538/2006 Errege Dekretuaren 17. artikuluan zehaztutako alderdietatik Nafarroako Foru Komunitatearen eskumeneko alderdiak osatuko ditu, Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 47. artikuluaren arabera.

2. Tituluen curriculuma garatzean, garapen horren lanbide-ezaugarriez gain, kontuan hartuko dira Foru Komunitatearen ezaugarri sozioekonomikoak, eta arlo estrategikoan Nafarroako Gobernuak bere eskumenen barruan ezarritako politikak ere bai, abenduaren 15eko 1538/2006 Errege Dekretuaren 18. artikuluan ezarrita dagoenaren arabera.

3. Tituluetako ikasketen antolaketa eta sekuentziazioaren bitartez, ikastetxeek, arau honetan ezartzen diren antolaketa- eta curriculum-arloko eskumenen barruan, ikasleak hobeto moldatzeko eta enpresen beharrizanak hobeto bete ahal izateko erabakiak hartzen ahalko dituzte.

4. Lanbide heziketako tituluei dagozkien heziketa zikloen antolaketa, sekuentziazio eta edukiak foru dekretu honen VI. Kapituluan lanbide heziketarako ezartzen diren ildo estrategikoen araberakoak izanen dira.

5. Goi mailako heziketa zikloetan atzerriko hizkuntzaren lanbide-modulu bat txertatzen ahalko da, ahal dela ingelesez. Horren ikasketaren emaitzak Hizkuntzen Europarako Erreferentzia Esparru Komunean ezarritako bost trebetasunen arabera banakatuko dira: Mintzamena eta idazmena, ahozko zein idatzizko ulermena eta komunikazio bidezko elkarrekintza. Trebetasun horiek sektoreari egokituko zaizkie, eta kasuan kasu, tituluaren lanbide-ezaugarriei ere. Orientazio didaktiko praktikoa izanen dute batez ere, eta zerikusia izanen dute informazioaren bilaketarekin eta jarraibideen interpretazio eta burutzapenarekin, baita lanbideko jardueretako benetako edo itxurazko egoeretan egindako lanarekin, informazio-sorrerarekin eta gaitasun linguistikoak aplikatzen direneko beste jarduera batzuekin ere.

12. artikulua . Tituluen egitura.

1. Lanbide heziketako tituluen egiturak abenduaren 15eko 1538/2006 Errege Dekretuaren 6. artikuluan definituta dagoena eta artikulu honen hurrengo puntuetan adierazita dagoena bete beharko du.

2. Nafarroarekin zerikusia daukan sektorearen (edo sektoreen) ekonomia eta lanbide inguruneak eta prospektibak estatuko testuinguruarekin alderatuta ezaugarri ezberdinak agertzen dituztenean, titulu guztietan lurraldeari buruzko informazio garrantzitsua txertatu beharko da.

3. Dagokion titulazioarekin zerikusia daukaten lanbide-jardueretan profesional gisa jarduteko baldintzak daudenean eta baldintza horiek Foru Administrazioaren mendeko organoek arautzen dituztenean, tituluari lotutako heziketa zikloaren curriculuma diseinatzerakoan baldintza horiek kontuan hartuko dira eta, ezartzen den prozeduraren arabera, dagokion eremuan lanbide-jardueretan aritzeko aukera emanen dute.

13. artikulua . Ikasketen antolamendua.

1. Heziketa zikloko ikasketak helburu nagusietan eta lanbide-modulutan antolatuko dira. Lanbide-moduluak ondoko tipologiaren arabera sailkatuko dira:

a) Ardatz-moduluak, Estatuak ziklo bakoitzerako definitzen dituenak.

b) Derrigorrezkoak, Nafarroako Foru Komunitatearen Administrazioak Hezkuntza Departamentuaren araudi eta eskumenen esparruan definitzen dituenak.

c) Osagarriak, foru dekretu honen esparruaren barruan eta Hezkuntza Departamentuak honi buruz ezarritako araudiaren arabera heziketa zikloa ematen duen ikastetxeak definitutakoak.

2. Modulu guztiak, Lantokietako Prestakuntzako modulua izan ezik, ezagutza-arlo teoriko eta praktikoek osatuko dituzte. Horien iraupenak modulua prestakuntza-unitatetan erraz zatitzeko aukera emanen du, unitate horiek prestakuntza-eskaintzak modu sekuentziatu eta malguan egiteko modukoak izanik.

3. Lanbide-modulu guztietako prestakuntza-unitateak egiaztatzen ahalko dira, langileei zuzendutako prestakuntza edo bertaratzea eskatzen duten lanbide heziketako eskaintza arrunten modalitateak kapitalizatu ahal izateko.

14. artikulua . Derrigorrezko lanbidemoduluak.

1. Tituluen derrigorrezko moduluak Hezkuntza Departamentuak diseinatuko ditu. Modulu horien egitura eta diseinuaren ezaugarri formalak ardatz-moduluen ezaugarrien antzekoak izanen dira.

2. Oinarrizko araudiaren barruan, derrigorrezko lanbide-moduluen balio akademikoa Nafarroako Foru Komunitatean aintzatetsiko da.

15. artikulua . Lanbidemodulu osagarriak.

1. Curriculum arloko autonomia aplikatuz, lanbide heziketako ikastetxeek guztira gehienez 120 ordu iraunen duen lanbide-modulu osagarri bat sartzen ahalko dituzte, Hezkuntza Departamentuak aurretiaz bamena emanda; kasuan kasu, bi lanbide-modulu sartzen ahalko dituzte.

2. Lanbide-modulu osagarriak baimentzeko, ikastetxeek modulu horien egitura eta curriculuma diseinatu beharko dituzte zehazten den eredu eta prozeduraren arabera.

16. artikulua . Lanbidemoduluen sekuentziazioa.

1. Titulu bakoitzaren curriculuma arautzen duen araudian zikloaren bi ikasturteetan lanbide-moduluak nola banatu eta sekuentziatuko diren zehaztuko da. Horrenbestez, Lantokietako Prestakuntzako modulua, Proiektukoa eta Lanerako Prestakuntza eta Orientazioko Modulua orokorrean zikloko azken ikasturtean egonen direla ziurtatuko da.

2. Titulu bakoitzaren ordutegia eta lanbide-moduluak sekuentziatzeko modua dagokion zikloa ematen duten ikastetxe guztietarako erreferentzia izanen da. Dena dela, Hezkuntza Departamentuak moduluen sekuentziazioa, edo kasuan kasu modulu osgarrien proposamena, aldatu edo -ikastetxeek aurretiaz eskatuta- baimentzen ahalko du, ezartzen diren baldintza eta prozeduren arabera. Edonola ere, ikasleen eskubideen alde eginen da ikasketa-plan zaharren eta berrien arteko trantsizioari dagokion guztian.

17. artikulua . Espezializazioak.

1. Hezkuntza Departamentuak, abenduaren 15eko 1538/2006 Errege Dekretuaren bederatzigarren xedapen gehigarrian ezarrita dagoenaren arabera, ikastarotan antolatutako espezializazio-ikasketak proposatuko ditu. Horiek erdi eta goi mailako heziketa zikloen ikasketez bestelakoak eta ikasketa horien osagarriak izanen dira, alde batetik lanbide-jarduera jakin batzuetan sakondu ahal izateko, hori beharrezkoa den aldetik; eta bestetik, agertzen diren kualifikazio profesional berriei prestakuntza arloko erantzuna berehala emateko.

2. Espezializazio-ikasketen egitura, curriculum-ezaugarriak eta antolamendu arauak, estatuko oinarrizko araudiaren esparruan, orokorrean, heziketa zikloenen antzekoak izanen dira.

3. Espezializazio-ikasketa horiek prestakuntza eta lanbide-jarduera bateragarri egiteko moduko prestakuntza-modalitateetan eskaintzen ahalko dira. Horrenbestez, hezkuntza-sistemak bizitza osoan lanbide heziketari emanen dizkion erantzunetako bat izanen dira ikasketa horiek.

4. Espezializazio-ikastaroek, oinarrizko araudiaren esparruan, Arazoak Konpontzeko lanbide-modulu bat edukiko dute. Modulu horren barruan ondoko ikasketa-arloak egonen dira:

a) Arlo teknikoa, espezializazio-ikastaroaren edukien integrazioari lotuta.

b) Arlo metodologikoa, proiektuen diseinu, garapen eta burutzapenari lotuta.

c) Arlo komunikatiboa, txosten, diseinu eta aurkezpenak egiteko beharrezkoak diren gaitasunei lotuta.

IV. KAPITULUA. LANBIDE HEZIKETAKO IKASTETXEAK

18. artikulua . Lanbide heziketako ikastetxeen motak.

1. Orokorrean, foru dekretu honek araututako lanbide heziketa ematen duten ikastetxeek abenduaren 15eko 1538/2006 Errege Dekretuaren 51. eta 52. artikuluetan ezartzen diren tipologia eta baldintzak bete beharko dituzte.

2. Lanbide heziketa ematen duten ikastetxeak Ikastetxe integratu gisa sailkatzen ahalko dira, ekainaren 19ko 5/2002 Lege Organikoaren 11. artikuluaren arabera. Era berean, ikastetxe horiek Nafarroako Foru Komunitateko lanbide heziketako ikastetxe integratuak arautzen dituen irailaren 4ko 63/2006 Foru Dekretuak arautuko ditu.

19. artikulua . Ikastetxe integratuak.

1. Hezkuntza Departamentuaren mendeko Ikastetxe integratuek hiru sektoreko edo gehiagoko irakaskuntzak eskaintzen badituzte - beste baldintza batzuen artean- Ikastetxe integratu politeknikoak izanen dira. Lanbide-arlo edo sektore batean espezializatzen badira, berriz, Ikastetxe integratu sektorialak izanen dira. Azken kasu horretako ikastetxeen izenak dagozkion sektore edo azpi-sektorearen izena barnean hartu beharko du.

2. Nafarroako Foru Komunitatearen Administrazioak, ekimen pribatuko ikastetxe integratuak egon zein ez, foru lurralde osoan Ikastetxe integratu publiko politekniko zein sektorialen sarea egonen dela bermatuko du.

3. Ikastetxe integratuek, irailaren 4ko 63/2006 Foru Dekretuan adierazten den bezala, zeregin espezializatuak eginen dituzte ekainaren 19ko 5/2002 Lege Organikoaren bidez arautzen den Kualifikazioen eta Lanbide Heziketaren Sistema Nazional berriaren eremuan.

20. artikulua . Lanbide heziketako ikastetxeen sarea.

1. Heziketa ziklotan antolatutako eta Nafarroako Foru Komunitatearen Administrazioaren funts publikoekin finantzatutako lanbide heziketa ematen duten ikastetxe guztiek eskaintzak koordinatzeko sarea eratuko dute, hartzaileen interesaren eta erabilitako baliabide publikoen eraginkortasunaren onerako.

2. Gaitasunaren aintzatespena eta lanbide-profil oso bat edo titulazio bat eskuratzeko aukera ematen duen prestakuntza osagarria elkarrekin integratzen diren kasuetan, lanbide heziketako ikastetxeen sareak bere prestakuntza-eskaintzak koordinatuko ditu. Horretarako, Hezkuntza Departamentuak, elkarte, erakunde eta eragile ekonomiko eta sozialekin lankidetzan, helburu horretarako azterlan eta proposamen teknikoak eginen ditu.

V. KAPITULUA. LANBIDE HEZIKETA ETA ENPRESA

21. artikulua . Lanbide heziketa eta produkziosistema

1. Lanbide heziketako ikasketek, horietan aritzen diren pertsonen arabera antolatuta egoteaz gain, beren produkzio-ingurunearekiko lotura sustatuko dute, bai sektoreen aldetik, bai lurraldeen aldetik.

2. Lanbide heziketako ikastetxeak lan arloko testuinguruari egokitzen saiatuko dira bereziki, ondoko alderdietan:

a) Ikastetxean egiten diren prestakuntza-jardueretan ikasleek etorkizunean arituko diren lanbideekin lotutako baliabide eta metodologiak erabiliko dira.

b) Lantokietako prestakuntzako modulua egitean ikasleei prestakuntzarako eta ikasketarako aukera joriak emanen dizkieten enpresen katalogoa ezarriko da.

c) Enpresaren errealitatearen berri ikastetxean ematea hainbat bide erabiliz: bisitak antolatzea, profesional adituek prestakuntzan parte hartzea, informazio-hitzaldiak antolatzea, eta ildo horretako beste hainbat ekimen egitea.

d) Ikastetxearen eta enpresa edo elkarteen artean baterako proiektuak egitea.

22. artikulua . Lantokietako prestakuntza.

1. Nafarroan ezarrita dauden heziketa zikloen curriculumaren barruan Lantokietako Prestakuntza modulua sartuko da. Modulu horrek ez du lan izaera izanen, eta ahal dela Foru Komunitatean dauden enpresen benetako produkzio-eremuan eginen da.

2. Abenduaren 15eko 1538/2006 Errege Dekretuaren 11. artikuluan ezarrita dagoena gorabehera, Lantokietako Prestakuntzako lanbide-moduluak ondoko helburu hauek izanen ditu:

a) Lanbideko gaitasunak eta lan-metodoak, ikastetxean titulu bakoitzerako eskuratu direnak, benetako produkzio-testuinguru batean aplikatzea.

b) Produkzio-prozesuen, merkaturatzearen, kudeaketa ekonomikoaren eta enpresetako lan eta gizarte arloko harreman-sistemaren ikuspegi osoa hartzea.

c) Ikasleen gaitasuna laneko benetako egoeretan ebaluatu eta egiaztatzea, horretan enpresek ere parte hartuko dutela.

d) Lanbidean heldutasuna bereganatzea eta beste ingurune batzuetara egokitzeko gai izatea.

e) Tituludun gazteak errazago laneratzea.

f) Lanbide heziketako ikastetxeen eta enpresen arteko lankidetza hobetzea.

3. Hezkuntza Departamentuak, maiatzaren 3ko 2/2006 Lege Organikoaren 42.2 artikuluan eta abenduaren 15eko 1538/2006 Errege Dekretuaren 11. artikuluan ezarrita dagoenaren arabera, ikasleak modulu honetara sartzeko baldintzak nahiz modulua ikasketa-prozesuko zein unetan eman behar den arautuko du, ondoko hauek kontuan hartuta: heziketa ziklo bakoitzaren nahiz eskaintzen den modalitatearen ezaugarriak, eta enpresetan prestakuntza arloko postuak egoteko aukera.

23. artikulua . Ekimen ekintzailea.

1. Lanbide heziketak ekimen ekintzailea eta enpresen arloko nahiz produkzio-ingurunearen ezagutzarako jarrera eta gaitasunak sustatuko ditu. Horretarako bi bide ezarriko dira:

a) Heziketa ziklo guztietan Enpresa eta Ekimen Ekintzailea eta Lanerako Orientazio eta Prestakuntza moduluak sartzea.

b) Modulu hauek indartu, osatu eta laguntzeko, lanbide heziketa ematen duten ikastetxeek enpresak sortzeko gogoa sustatzearekin zerikusia duten jarduerak eginen dituzte, edo horietan parte hartuko dute. Horretarako, negozioei buruzko ideiekin eta enpresa-planak egitearekin lotutako aholkularitza eta prestakuntza espezializatua eginen da.

2. Lanbide heziketako irakasleen prestakuntza-planetan prestakuntza-jarduera espezifikoak edo zeharkako jarduerak sartuko dira. Jarduera horiek enpresak sortzeko gogoari buruzkoak izanen dira.

3. Jarduera horiek egiteko, Hezkuntza Departamentua eta lanbide heziketa ematen duten ikastetxeak gogo ekintzailea edo enpresak hedatzen eta bultzatzen dituzten organismo eta erakundeekin lankidetzan arituko dira.

24. artikulua . Langileen lanbide heziketa.

1. Lanbide heziketako ikastetxeek aktiboak izanik langabezian dauden langileentzat etengabeko prestakuntzako jarduerak egiten ahalko dituzte, baita titulua duten pertsonentzat graduatu ondoko prestakuntza egin ere.

2. Aplikatzen ahal den arau-esparrua kontuan izanik, etengabeko prestakuntza ondoko modalitate hauetan eskaintzen ahalko da:

a) Titulu eta egiaztagiriei lotutako prestakuntza. Prestakuntza-mota honetan foru dekretu honen 8. artikuluan ezarrita dagoena kontuan hartuko da.

b) Konfigurazio askeko prestakuntza, titulu eta egiaztagiriei lotuta ez dagoena.

3. Eskaintzaren hedadura kontuan izanik, etengabeko prestakuntzako ikastaroak bi motatakoak izaten ahalko dira:

a) Ikastetxeek programatutako eta hainbat enpresarekin edo enpresa-talderekin itundutako ikastaroak, enpresa horietako langileak prestatzeko.

b) Ikastetxeek programatutako ikastaroak, orokorrean langile guztientzat zein langabetuentzat.

4. Ikastaroak prestakuntza jasoko duten enpresen beharrizanen eta beren langileen egoeraren arabera antolatuko dira.

5. Lanbide heziketako irakasleek beren eskola-ordutegia osatzen ahalko dute etengabeko prestakuntza emanez, Unibertsitateaz kanpoko irakaskuntzak hobetzeko neurriei buruzko uztailaren 2ko 26/2002 Foru Legearen 14. artikuluan ezarrita dagoenaren arabera.

6. Eduki edo ikastaro jakin batzuk emateko, jardunean dauden profesionalak kontratatzen ahalko dira. Alde horretatik, Administrazio Publikoetan zerbitzuak ematen dituzten profesionalei buruz, etengabeko prestakuntzaren arloko zereginak egitea interes publikokotzat hartuko da, bateraezintasunei buruzko araudian xedatuta dagoenaren ondorioetarako.

7. Irakasleek lanbide heziketa arautuan urteko ordutegi osoaren pareko dedikazioa badute, etengabeko prestakuntzan urtean gehienez 150 ordu ematen ahalko dituzte. Horri buruz, zehazten den ordainsari-sistema aplikatuko da.

25. artikulua . Profesional espezialistak.

Ekainaren 19ko 5/2002 Lege Organikoaren Bigarren Xedapen Gehigarrian aurreikusitako baldintzen arabera, zikloetako lanbide-moduluen irakasle gisa ikasleei beren ezagutza eta esperientzia transmitituko dizkieten profesional espezialistek parte hartzen ahalko dute, irakasleak kontratatu eta izendatzeko une bakoitzean indarrean dagoen araubidearen arabera, edo bidezkoa bada, aplikatzen ahal zaien kontratazio publikoko araudiaren arabera.

VI. KAPITULUA. LANBIDE HEZIKETAREN ILDO ESTRATEGIKOAK

26. artikulua . Berrikuntza teknologikoa eta didaktikoa.

1. Ikerketaren helburu eta norainokoa. Lanbide heziketaren eremuan, berrikuntza honela sailkatzen da:

a) Berrikuntza teknologikoa: etengabeko prozesu honetan, sektore ekonomiko guztietako teknologiarik eraginkorrenak eta antolakuntza-sistemarik berrienak atzematen dira, eta ikastetxeetan ematen den prestakuntzan egokitzen eta txertatzen dira.

b) Berrikuntza didaktikoa: Lanbide heziketan prestakuntzako metodologiak, material didaktikoak eta instalazioak egokitu eta berritzeko prozesua da.

2. Berrikuntza teknologiko eta didaktikoaren helburuak hauek dira:

a) Enpresarik aurreratuenetan ohikoak diren teknologiekin eguneratutako lanbide heziketa lantzea.

b) Langileei zuzendutako espezializazio-ikastaroak diseinatzen eta garatzen laguntzea.

c) Prozesu teknologikoak berritu eta hobetzeko proiektuak egitea, ikastetxeen eta enpresen arteko lankidetzaren bitartez.

d) Teknologia aurreratuak lanbide heziketako ikastetxeetara transferitzen laguntzea.

e) Lanbide heziketako ikastetxeetan berrikuntza didaktikoa indartzea, sektore bakoitzerako metodologia espezifikoak garatuz eta baliabide teknologikorik egokienak erabiliz.

f) Urrutiko lanbide heziketa garatzeko prestakuntza arloko plataforma sortzea.

3. Lanbide heziketako berrikuntza-sistema eratuko da. Hezkuntza Departamentuak koordinatu eta kudeatuko duen sistema horrek ondoko elementu hauek izanen ditu:

a) Nafarroako lanbide heziketako ikastetxeek eta zerikusia duten enpresek osatutako sarea.

b) Lanbide heziketa arloko zaintza teknologikoko sistema. Sistema horrek sektoreen diagnosia eginen du, eta berrikuntzarako ardatz estrategiko batzuk zehaztuko ditu, Nafarroako Gobernuak ezarritako Plan Teknologikoekin bat eginez.

c) Berrikuntzako proiektuen garapena. Proiektu horietan, ikastetxeek enpresen, teknologia zentroen edo estatu, autonomia edo nazioarte eremuko beste erakunde batzuen lankidetza eskatzen ahalko dute.

d) Berrikuntza lanbide heziketako ikastetxeen sarera transferitzeko eta zabaltzeko ekintza batzuk.

27. artikulua . Lanbide heziketa nazioartera ateratzea.

1. Lanbide heziketako ikastetxeek hainbat helburu lortzen lagunduko duten nazioarteko proiektuak eginen dituzte, baita horietan parte hartu ere. Hona hemen helburu horiek:

a) Ikasleei beste herri batzuetako produkzio-inguruneetan lan arloko esperientziak eskaintzea.

b) Nazioarteko lan-merkatuan laneratzeko aukerak eskaintzea.

c) Nafarroako irakasle eta ikastetxeak Europar Batasuneko herrietako beste ikastetxe, erakunde eta profesionalekin elkarlanean ari daitezela sustatzea.

d) Elkarrentzat interesa duten erakunde proiektuak nahiz berrikuntza teknologiko edo didaktikoko proiektuak lantzea.

e) Hizkuntza- eta lanbide-gaitasunak hobetzea.

f) Lankidetzarako eta partaidetzarako Europako esparru sozial eta profesionala sustatzea.

2. Ikasle eta irakasleak Europan mugi daitezela bultzatuko da, bereziki hauen bitartez:

a) Nazioz gaindiko egonaldiak edo trukeak beste herri batzuetako enpresa edo ikastegietan, lanbide heziketako ikasleentzat.

b) Irakasleen eta lanbide heziketako ikastetxeen arduradunen lanbide-garapenerako nazioz gaindiko egonaldiak edo trukeak.

3. Hezkuntza Departamentuak baimena eman dezake ziklo bateko lanbide-moduluen zati batean komunikazio-hizkuntzaren ordez atzerriko hizkuntza erabiltzeko, titulu honek arautzen dituen curriculumeko oinarrizko alderdietan inolako aldaketarik eragin gabe betiere. Kasu horretan, zikloak iraun bitartean ikasleak bi hizkuntzetan bereganatu beharko du irakasgai horien hiztegi espezifikoa eta berezko terminologia.

4. Aurreko puntuan azaltzen diren helburuak lortzeko eta mugikortasuna bermatzeko, Hezkuntza Departamentuak Europako beste eskualde eta herri batzuekiko harreman egonkorrak sustatuko ditu.

5. Lanbide heziketako ikastetxe publikoek nazioarteko proiektuen modalitate guztiak egiteko aholkua eta laguntza jasoko dituzte.

28. artikulua . Lanbide arloko informazio eta orientazioa.

1. Lanbide heziketako tituluak eskaintzen dituzten ikastetxe guztiek, publiko nahiz itunduek, ikasleei ingurunean prestakuntzarako edo gaitasunen aintzatespenerako dauden aukeren berri emanen diete, beren eskarietan oinarrituta, edo nolanahi ere, kasu bakoitzean komenigarriena den ibilbide pertsonala kontuan hartuta.

2. Hezkuntza Departamentuak lanbide heziketa ematen duten ikastetxe publikoetan Lan eta Lanbide arloko Orientazioko Arduraduna egoteko baldintzak zehaztuko ditu. Arduradun hori, prestakuntza- eta homologazio-prozesu baten ostean, ikastetxeen tipologia bakoitzean bete behar diren zereginetan espezializatuta egonen da. Lanpostu horiek betetzeko, ikastetxean behin betiko destinoa duten irakasleek izanen dute lehentasuna, baldin eta ezartzen diren eskakizunak betetzen badituzte.

29. artikulua . Gaitasunaren ebaluazioa.

1. Lanbide heziketako Ikastetxe integratuek ekainaren 19ko 5/2002 Lege Organikoaren 8. artikuluak eta abenduaren 15eko 1538/2006 Errege Dekretuaren 35. artikuluak aurreikusitako gaitasunen ebaluazio eta onarpenerako prozedura aplikatzen ahalko dute.

2. Hezkuntza Departamentuak prozedura horretan sartu nahi diren pertsonei informazioa eta aholkua emanen die. Horretarako, gaitasunak ebaluatu aurreko fasean baliabideak eta laguntza eman eta aholku edo gomendio konfidentziala adieraziko die.

3. Ebaluazio-fasean gaitasun aintzatetsia duten profesional jakin batzuek ebaluatzaile gisa parte hartzen ahalko dute.

XEDAPEN INDARGABETZAILEA

Bakarra. Arauak indargabetzea.

Indarrik gabe geratuko da otsailaren 13ko 35/1995 Foru Dekretua, Nafarroako Foru Komunitatearen esparruan Lanbide Heziketa eta Arte Plastikoetako eta Diseinuko Irakaskuntza egituratzeko eta antolatzeko jarraibide nagusiak ezarri dituena, arte plastikoen eta diseinuaren heziketa zikloei dagokienez izan ezik. Izan ere, horiek foru dekretu horren menean jarraituko dute, Nafarroako Foru Komunitatearen esparruan arau espezifiko berririk onartzen ez den bitartean.

Halaber, indarrik gabe utzi dira foru dekretu honetan xedatutakoari aurka egiten dioten maila bereko edo apalagoko xedapen guztiak.

AZKEN XEDAPENAK

Lehenengoa. Erregelamenduzko arauak emateko gaikuntza.

Hezkuntza kontseilariari ahalmena ematen zaio foru dekretu honetan ezarritakoa garatzeko eta gauzatzeko egokiak diren xedapenak eman ditzan.

Bigarrena. Indarra hartzea.

Foru dekretu honek Nafarroako ALDIZKARI OFIZIALean argitaratu eta biharamunean hartuko du indarra.

Gobierno de Navarra

Contacte con nosotros | Accesibilidad | Aviso legal | Mapa web