LEXNAVARRA
718/2003 FORU DEKRETUA, ABENDUAREN 29KOA, NAFARROAKO POLIZIA KIDEGOETAKO LANGILEEN ERREGELAMENDUA ONESTEN DUENA.
BON N.º 13 - 30/01/2004
ATARIKO TITULUA
I. TITULUA. POLIZI KIDEGOETAN SARTZEKO MODUA ETA HAUTAPEN PROZESUA
I. KAPITULUA. ARAU OROKORRAK
II. KAPITULUA. DEIALDIA
III. KAPITULUA. HAUTATZEKO SISTEMA
IV. KAPITULUA. EPAIMAHAIA
V. KAPITULUA. HAUTAPEN PROZEDURA
- 14. artikulua.
- 15. artikulua.
- 16. artikulua.
- 17. artikulua.
- 18. artikulua.
- 19. artikulua.
- 20. artikulua.
- 21. artikulua.
II. TITULUA. LANPOSTUAK BETETZEKO ETA GORA EGITEKO BIDEA
I. KAPITULUA. ARAU OROKORRAK
II. KAPITULUA. KABO, SARJENTU, INSPEKTOREORDE ETA INSPEKTORE IZATEKO PROZESUAK
III. KAPITULUA. OFIZIAL LANPOSTUAK
III. TITULUA. NAFARROAKO POLIZIA KIDEGOETAKO KIDEEN ESKUBIDE ETA BETEBEHARRAK
I. KAPITULUA. XEDAPEN OROKORRAK
II. KAPITULUA. BETEBEHARRAK
III. KAPITULUA. ESKUBIDEAK
IV. KAPITULUA. ORDAINSARIAK
IV. TITULUA. DIZIPLINA ARAUBIDEA
I. KAPITULUA. ORGANO ZEHATZAILEAK ETA ERANTZUN BEHARRA DUTENAK
II. KAPITULUA. DIZIPLINA ZEHAPENAK
III. KAPITULUA. ERANTZUKIZUNAZ SALBUESTEA
IV. KAPITULUA. DIZIPLINA PROZEDURA
1. ATALA. XEDAPEN OROKORRAK
2. ATALA. HUTSEGITE ARINETAN SEGITU BEHARREKO PROZEDURA
3. ATALA. HUTSEGITE LARRI ETA OSO LARRIETAN SEGITU BEHARREKO PROZEDURA
- 68. artikulua.
- 69. artikulua.
- 70. artikulua.
- 71. artikulua.
- 72. artikulua.
- 73. artikulua.
- 74. artikulua.
- 75. artikulua.
- 76. artikulua.
- 77. artikulua.
- 78. artikulua.
- 79. artikulua.
- 80. artikulua.
- 81. artikulua.
- 82. artikulua.
- 83. artikulua.
- 84. artikulua.
V. KAPITULUA. DIZIPLINA ZEHAPENEN BETEARAZPENA
V. TITULUA. OHOREAK ETA ORDAINSARIAK
XEDAPEN GEHIGARRIAK
AZKEN XEDAPENAK
I. ERANSKINA. NAFARROAKO POLIZIA KIDEGOETAN SARTZEKO BAZTERKETA MEDIKOEN TAULA
II. ERANSKINA. GORA EGITEKO LEHIAKETETARAKO MEREZIMENDUEN BAREMOA
Apirilaren 27ko 101/1989 Foru Dekretuaren bidez Nafarroako polizia Kidegoetako Langileen Erregelamendua onetsi zen, garai hartan indarra zuen otsailaren 13ko 1/1987 Foru Legea garatzearren. Horren arabera, Nafarroako Polizia Kidegoak Nafarroako Foruzaingoa eta herrietako Udaltzaingoak dira. Foru dekretu haren bidez Nafarroako polizia kidegoetako langileen estatutuaren hainbat alderdi arautu ziren, Nafarroako Foru Komunitateko Administrazio Publikoetako funtzionario guztientzat ezarritako ildo orokorrei jarraikiz, baina polizia lanaren ezaugarri bereziak direla-eta sartu beharreko aldaketak eginda.
Aipatutako Nafarroako Polizi Kidegoei buruzko foru lege horri hainbat aldaketa egin zaizkio, maiatzaren 24ko 10/2001, uztailaren 5eko19/2001 eta apirilaren 3ko 8/2002 foru legeen bidez. Aldaketa horiek batez ere kidegoen antolamenduari buruzkoak izan dira, inspektore eta inspektoreordeen lanpostuak sortu baitziren, eta kidego horietako langileen estatutu-araubideari buruzkoak, zehazki, kidegoan sartu eta gora egiteko moduari eta lansarien sistemari dagokienez. Arau horiek guztiak arautegi bakar batean bildu ziren, urriaren 14ko 213/2002 Legegintzako Foru Dekretuaren bidez, Nafarroako Polizi Kidegoei buruzko Foru Legearen Testu Bategina onetsi baitzen. Gero, apirilaren 4ko 30/2003 Foru Legearen bidez zenbait aldaketa egin zitzaizkion testu bategin horri, polizia kidego horietan gora egiteko sistema ezartzeko.
Foru dekretu honen bidez Foruzaingoko eta Nafarroako Udaltzaingoetako Langileen Estatutua garatzen da, Nafarroako Polizi Kidegoei buruzko Foru Legearen III. tituluan ezarritako oinarrizko eta funtsezko marko juridiko orokorra aldatu gabe, foru lege horren azken xedapenetan lehenean ezarritako agindua betez.
Nafarroako Kontseiluak, 2003ko azaroaren 10ean egindako bilkuran, horren inguruko irizpena eman du eta Erregelamendua haren aholkuetara egokitu da.
Horiek horrela, Lehendakaritza, Justizia eta Barne kontseilariak proposaturik, eta Nafarroako Gobernuak bi mila eta hiruko abenduaren hogeita bederatzian egindako bilkuran hartutako Erabakiarekin bat,
DEKRETATU DUT:
ATARIKO TITULUA
Erregelamendu hau nafarroako polizi kidegoei buruzko foru legearen testu bategineko arauen pean dauden nafarroako polizia kidegoei aplikatuko zaie. aipatu testu bategin hori urriaren 14ko 213/2002 legegintzako foru dekretuaren bidez onetsi zen.
Erregelamendu honetan xedaturik ez dagoen guztian, Nafarroako Administrazio Publikoetako Langileen Estatutuari buruzko arau orokorretan xedaturikoa aplikatuko zaie Nafarroako polizia kidegoetako kideei.
I. TITULUA. POLIZI KIDEGOETAN SARTZEKO MODUA ETA HAUTAPEN PROZESUA
I. KAPITULUA. ARAU OROKORRAK
Nafarroako polizia kidegoetan funtzionario gisa sartzeko hautapena deialdi publikoaren bidez iragarriko da. Hautapena oposizio bidez edo oposizio-lehiaketa bidez eginen da, merezimendu eta gaitasun irizpideei jarraituz.
1. Nafarroako Administrazio Publikoek kasuko polizia kidegoko plantillan betegabe egon eta deialdi publikora atera nahi dituzten lanpostuak lan eskaintza publikoan iragarriko dituzte.
2. Deialdi publikoan iragartzeko, lanpostuek baldintza hauek bete beharko dituzte:
a) Kasuko plantilla organikoan egotea.
b) Bete gabe egotea.
c) Aurrekontuetan horretarako dirua izatea.
d) Kasuko lan eskaintza publikoan egotea.
1. Nafarroako polizia kidegoetan sartzeko probetan onartua izateko, izangaiek betebehar hauek bete behar dituzte:
a) Espainiako nazionalitatea izatea.
b) Adinez nagusia izatea eta, foruzain edo udaltzain lanpostuetarako, 35 urtetik beherakoa izatea, eta ofizial lanpostuetarako, deialdian ezarritako adinetik beherakoa.
c) Kasuko lanposturako eskatzen den ikasketa edo lanbide titulua izatea.
d) Eginkizunak betetzeko behar diren gaitasun fisiko eta psikikoak izatea eta foru dekretu honen I. eranskinean zehazten diren baztertzeko arrazoi medikoen taulan ez egotea.
e) Gizasemeek 1,70 metroko garaiera bederen izatea eta emakumezkoek 1,65 metrokoa.
f) Eginkizun publikoetan aritzeko desgaitua edo gabetua ez egotea eta inongo administrazio publikoren zerbitzutik baztertua ez izana.
g) Deialdian aipatzen den ibilgailu mota gidatzeko baimena edukitzea.
2. Betebehar horiek eskabideak aurkezteko epea bukatu aitzin bete behar dira, g) atalekoa izan ezik, Foru Dekretu honen 18. artikuluan aipatzen den prestakuntza ikastaroan onarturiko hautagaien zerrenda argitaratzen den egunean bete beharko baita.
II. KAPITULUA. DEIALDIA
1. Nafarroako polizia kidegoetan sartzeko deialdiak Nafarroako Polizi Kidegoei buruzko Foru Legean eta foru dekretu honetan ezarritakoaren araberakoak izanen dira, hala nola eskumena duen kontseilariak, arau horiek garatzeko, eman ditzakeen oinarri orokorren arabera.
2. Nafarroako polizia kidegoetan sartzeko hautapen proben deialdia kasuan kasuko administrazio publikoan horretarako eskumena duen organoak onetsiko du eta Nafarroako ALDIZKARI OFIZIALean argitaratu beharko da.
Toki entitateek beraiek eskatuz gero, Nafarroako Gobernuko Administrazioan horretarako eskumena duen departamentuari egokituko zaio deialdia onestea eta Udaltzainen Kidegoan sartzeko hautapen prozeduraz arduratzea.
Aurreko lerroaldean ezarritakoaren ondorioetarako, toki entitateek deialdi proposamenak igorriko dizkiote kontseilariari.
Deialdietan, gutxienez, honako alderdi hauek jaso beharko dira:
a) Bete nahi diren lanpostuen kopurua eta bakoitzaren ezaugarriak.
b) Eskabideak nora bidali behar diren.
c) Eskabideak aurkezteko epea.
d) Izangaiek bete beharreko baldintzak.
e) Hautapen sistema.
f) Eginen diren hautapen probak eta, kasua bada, lehiaketaldian baloratuko diren merezimenduak.
g) Epamaikideak, titularrak eta ordezkoak.
h) Probak eta merezimenduak kalifikatzeko modua.
i) Hautapen probei dagokien programa.
j) Probak egiteko egutegia, hasteko urtea eta hilabetea bederen.
k) Prestakuntza ikastaroaren gutxieneko iraupena.
l) Deialdiaren, oinarrien eta deialdiaren aplikazio egintzen kontra zilegi diren helegiteak.
m) Eskabide eredua.
n) Baztertzeko moduko patologiak eta ezintasunak.
III. KAPITULUA. HAUTATZEKO SISTEMA
1. Foruzain edo udaltzain lanpostuetarako, kidegoan sartzeko hautapen probak oposizio bidez eginen dira.
2. Ofizial lanpostuetarako, kidegoan sartzeko hautapen probak oposizio-lehiaketa bidez eginen dira.
1. Oposizio sistema proba teoriko eta/edo praktiko batzuk egitean datza, norgehiagoka, izangaien gaitasuna neurtzeko eta haien ordena finkatzeko.
2. Oposizioaren barrenean, lehenbizi hautapen fase bat eginen da, prestakuntza ikastaroan sartuko diren izangaiak aukeratzeko. Fase hartan, nahitaez, honako proba baztergarri hauek sartuko dira:
a) Gaitasun fisikoa neurtzeko probak.
b) Orotariko ezaupideetako edo kulturako probak, eskaturiko ikasketa mailarekin bat.
c) Proba psikoteknikoak, izangaiak lanpostuaren ezaugarri profesiografikoari nola egokitzen zaizkion neurtzeko.
d) Proba medikoak.
3. Deialdian proba psikoteknikoak eginen dituzten izangaiak mugatzeko gehieneko kopuru jakin bat finkatzen ahalko da, izangai asko espero bada, edo eraginkortasun administratiboari begira.
4. Hautapen prozesuan epamaiahaiarekin egin beharreko elkarrizketa bat sartzen bada, proba hori ez da baztertzailea izanen eta horren puntuazioa ezin izanen da hautapen prozesu osoan lor daitekeen gehieneko puntuazioaren % 10 baino handiagoa.
5. Hautapen prozesu hori gainditzen duten izangaiek prestakuntza ikastaro bat egin beharko dute Nafarroako Segurtasun Eskolan. Kasuko polizia kidegoan sartzeko prestakuntza ikastaroa ere gainditu beharko da, nahitaez.
6. Hautapen prozesuan egiten diren proba medikoak gaindituta ere, prestakuntza ikastaroa bitartean edo bukatutakoan, kidego horietatik baztertzeko ezarritako patologia edo ezintasun medikoetatik bat ere ez dutela egiaztatzeko beharrezko diren proba medikoak egiten ahalko zaizkie izangaiei. Proba horien bidez frogatzen bada baztertzeko arrazoirik badela, organo arduradunak proposatzen ahalko du, eritasunaren edo ezintasun fisikoaren mailaren arabera, izangaia hautapen prozesutik baztertzea. Kasu horretan, izendapena egin behar duen organo eskudunari egokituko zaio bidezko den ebazpena ematea.
1. Oposizio-lehiaketaren bidezko prozesuek bi fase izanen dituzte, bata bestearen atzetik. Lehiaketaldian izangaiek azaldu eta frogatutako merezimenduak kalifikatuko dira, deialdian ezartzen den baremoaren arabera. Oposizioaldian aurreko artikuluan ezarritakoari segituko zaio.
2. Lehiaketaldiaren balorazioa bi faseetan batera lor daitekeen gehieneko puntuazioaren % 30ekoa izanen da gehienez, alde batera utzita prestakuntza ikastaroaren puntuazioa. Lehiaketaldian baloratu beharreko merezimenduak honela neurtuko dira:
a) Titulu akademikoak.
b) Polizi kidegoetan edo Administrazio Publikoetako bestelako organoetan emandako zerbitzuak.
c) Bete beharreko lanpostuari loturiko beste merezimendu batzuk.
IV. KAPITULUA. EPAIMAHAIA
1. Epaimahaia hautapena egiteko ardura izanen duen organoa da, teknikariez osatua egonen da, mahaiburua izan ezik, eta bere jardunean burujabe izanen da.
2. Epaimahaiari hautapen prozesuko probak prestatu eta ebaluatzea dagokio, foru dekretu honetan ezartzen diren salbuespen kasuetan izan ezik, hala nola prozeduraren objektibotasuna begiratzea eta deialdiko oinarriak betearaztea.
3. Epaimahaian mahaiburu bat, idazkari bat eta zenbait mahaikide izanen dira.
Mahaikideen kopurua bakoitia izanen da, hiru edo gehiago betiere. Horietako bat kasuan kasuko langileen ordezkaritza duen organoak izendatuko du.
4. Mahaikide titularren eta horien guztien ordezkoen izendapena deialdian berean jakinaraziko da.
5. Mahaikide guztiek, mahaiburua izan ezik, deialdian eskatzen den maila bereko edo goragoko titulu akademikoa eduki beharko dute, edo horrelakorik ezean, maila bereko edo goragoko lanpostua.
Deialdiaren xedeko lanpostu berdinean polizia kidego berean lanean ari diren funtzionarioek ezin izanen dute epaimahaiaren gehiengoa osatu.
1. Epaimahaia hautapen probak egiten hasi aurretik eratuko da.
2. Epaimahaia ezin izanen da eratu, ezta aritu ere, gutxienez ere kideen gehiengo osoa bertan ez bada.
3. Epaimahaiak gehiengoz erabakiko ditu deialdiaren oinarriak ulertu eta aplikatzerakoan sor daitezkeen afera guztiak.
4. Epaimahaiak aholkulari adituen laguntza eska dezake, proba batzuetan nahiz guztietan laguntzeko. Aholkulari horiek beren espezialitate teknikoetan baizik ez dira ariko eta horietan bakarrik emanen diote laguntza epaimahaiari.
V. KAPITULUA. HAUTAPEN PROZEDURA
1. Nafarroako polizia kidegoetan sartzeko hautapen probetan parte hartu ahal izateko eskabideak aurkezteko epea hogeita hamar egun naturalekoa izanen da, deialdia Nafarroako ALDIZKARI OFIZIALean argitaratu eta biharamunetik hasita.
2. Hautapen probetan onartuak izateko, aski izanen da izangaiak adieraztea, eskabideak aurkezteko epea bukatzen den egunean, deialdian eskatutako baldintza guztiak betetzen dituela, gida-baimena eduki beharrarena izan ezik.
3. Hautapena oposizio-lehiaketa bidez egiten bada, izangaiek lehiaketaldian baloratu beharreko merezimenduen egiaztagiriak aurkeztu beharko dituzte eskabidearekin batera.
1. Eskabideak aurkezteko epea amaiturik, deialdia egin duen organoak onartu eta baztertuen behin-behineko zerrenda onetsiko du eta Nafarroako ALDIZKARI OFIZIALean argitara dadila aginduko. Halaber, hamar egun balioduneko epea ezarriko du, baztertuek erreklamazioak egiteko eta, akatsik egin badute, haiek zuzentzeko.
2. Erreklamazioak egiteko epea amaitu eta horiek ebatzirik, aurreko atalean aipatutako organoak onartu eta baztertuen behin betiko zerrenda onetsiko du eta Nafarroako ALDIZKARI OFIZIALean argitara eman dadila aginduko.
3. Onartu eta baztertuen behin betiko zerrenda onesteko ebazpenean berean adieraziko da probak zein toki, egun eta ordutan hasiko diren.
Deialdia argitaratzen denetik probak hasi arte, bi hilabeteko tartea utzi beharko da, gutxienez.
Administrazio prozeduraren arauetan aipaturiko arrazoiren bat gertatzen denean, epaimahaiko kideek parte hartzeari uko egin beharko diote, eta horren berri eman deialdia egin duen organoari. Halaber, izangaiek epaimahaiak errefusa ditzakete, arrazoi horietako bat gertatzen denean. Horrelako kasuetan, mahaikide horien partez kasuko ordezkariak arituko dira.
Behin hautapen probak hasita, Epaimahaiak proba bakoitzaren emaitzak eta hurrengoak egiteko iragarkiak jarriko ditu jendaurrean, dela ariketak egiten diren tokietan, dela aukeratzen diren beste iragarki ohol batzuetan, deialdian finkatzen diren epeak gordeaz.
Halaber, lehiatzaile asko izateagatik gomendagarria denean, proben emaitzak eta probak egiteko iragarkiak hedabideetan edo informatika edo telematika prozeduren bidez ere argitaratzen ahalko dira.
1. Proba psikoteknikoak bukatuta, epaimahaiak behar diren neurriak hartuko ditu izangaiek eginkizunetan aritzeko behar diren gaitasun psikofisikoak dituztela eta foru dekretu honen I. eranskinean baztertzeko ezarrita dauden arrazoi bakar bat ere ez dutela egiaztatzeko proba medikoak egin ditzaten. Proba horiek, zenbat lanpostu iragarri diren, horrenbeste izangairi eginen zaizkie.
2. Prestakuntza ikastaroa egin aurreko hautapen proben kalifikazioa bukatutakoan, epaimahaiak prozesua gainditu duten izangaien zerrenda argitara emanen du, lortutako puntuazioaren arabera, gehienekotik gutxienekora ordenatua, eta, orobat, prestakuntza ikastaroa egiteko onartu diren izangaien behin-behineko zerrenda, zenbat lanpostu bete nahi diren horrenbeste izangaik osatuko dutena.
3. Aurreko atalean adierazitako zerrendak argitaratu eta biharamunetik hasita hamar egun naturaleko epean, prestakuntza ikastaroa egiteko onartu diren izangaiek deialdian eskatzen diren baldintzak eta betebeharrak betetzen dituztela frogatzeko agiriak aurkeztu beharko dituzte deialdia egin duen Administrazioari.
4. Aurreko izapideak beteta, epaimahaiak jendaurrera aterako du prestakuntza ikastaroan onartuak izan direnen behin betiko zerrenda. Behin-behinekoz onartutako izangairen batek ez badu betetzen artikulu honetako 3. atalean xedatutakoa, prozesua gainditu bai baina prestakuntza ikastaroa egitera onartua izan ez zirenen artetik puntuaziorik altuena lortu zuen izangaiak ordezkatuko du behin betiko zerrendan.
1. Prestakuntza Ikastaroa Nafarroako Gobernuaren Segurtasun Eskolak emanen du. Ikastaro horretako araubidea kasuko erregelamenduetan ezarritakoa izanen da.
2. Prestakuntza ikastaroa bukatutakoan, Nafarroako Administrazio Publikoaren Institutuko zuzendari kudeatzaileak, Nafarroako Segurtasun Eskola organo horren barrenean baita, ikastaroko azkeneko kalifikazioak onartuko ditu eta epamahaiari igorriko dizkio. Kalifikazio horiek lotzaileak izanen dira epaimahaiarentzat, administrazioan eta epaitegietan bidezko diren helegiteak deusetan galarazi gabe.
3. Nafarroako polizia kidegoetan sartzeko prestakuntza ikastaroa egin bitartean, izangaiak kasuan kasuko administrazioaren praktiketako funtzionarioak izanen dira eta kasu horietarako ezarrita dauden erregelamenduzko xedapenen menpe egonen dira.
1. Epaimahaiak izangaien azkeneko kalifikazioa onartu eta prozesua gainditu duten izangaiak izendatzeko proposamena bidaliko dio deialdia egin duen organoari, lortu duten puntuazioaren arabera ordenaturik.
2. Deialdia egin duen organoak, edo deialdian ezartzen denak, kasuan kasuko polizia kidegoko funtzionario izendatuko ditu izangai horiek eta izendapena Nafarroako ALDIZKARI OFIZIALean argitara dadila aginduko du.
1. Izendapena jakinarazi ondoren, izendatzen diren izangaiek Nafarroako Foru Araubidea errespetatu, Konstituzioari eta legeei men egin eta karguari dagozkion betebeharrak zintzoki betetzeko promesa edo zin-hitza eman beharko dute eta karguaren jabetza hartu beharko dute, deialdia egin duen organoak finkatzen duen egunean.
2. Epe horretan promes edo zin egiten ez dutenek edo lanpostua hartzen ez dutenek polizia kidegoan sartzeko eskubide guztiak galduko dituzte, deialdia egin duen organoak aintzat hartzen dituen ezinbesteko kasuetan izan ezik.
II. TITULUA. LANPOSTUAK BETETZEKO ETA GORA EGITEKO BIDEA
I. KAPITULUA. ARAU OROKORRAK
1. Nafarroako polizia kidegoetako funtzionarioen gora egiteko modua bitakoa da: lanpostuz igotzea, hurrengo kapituluan ezartzen diren prozeduren bitartez, edo graduz igotzea, Nafarroako Administrazio Publikoetako gainerako funtzionarioentzat ezarrita dauden arau orokorretan agindutakoaren bidez.
2. Nafarroako polizia kidegoetako kideek Nafarroako Administrazio Publikoetako langileek gora egiteko txanda murriztuko prozeduretan parte hartzen ahalko dute, kidego horietan egiazki zortzi urteko zerbitzualdia emana dutenez geroztik, betiere kasuko deialdian eskatzen diren betebehar guztiak betetzen badituzte.
1. Nafarroako polizia kidegoetako kideek gora egiteko antolatzen diren prestakuntza ikastaroek iraun bitartean, izangaiak zerbitzu berezietan egonen dira.
2. Aurreko atalean aipatutako ikastaroa bukatutakoan, langilea jarduneko egoerara itzuliko da berehala, zerbitzu berezien egoeran deklaratu zenean zuen lanpostura.
3. Zerbitzu berezien egoeran deklaratzeak ez du aldaketarik sortuko izangaiaren gizarte aurreikuspeneko erregimenean, jatorriko lanpostuan zuenarekin segituko baitu.
4. Egoera horretan deklaratzen diren izangaiei deitutako lanpostuari dagozkion oinarrizko lansariak eta berariazko osagarria ordainduko dizkie administrazio publiko dei-egileak, hala nola jatorrizko lanpostuan aitorturik zituen gradu eta antzinatasun sariak eta famili laguntza.
5. Zerbitzu berezien egoera bukatzearekin batera aurreko atalean aipaturiko lansarien erregimena lehengora aldatuko da. Zerbitzualdi horrek ez du eskubiderik ekarriko, ez eskubide pasiborik sortuko, ez eta deitutako lanpostua betetzeko inolako eskubiderik ere.
Nafarroako polizia kidegoetan destinoak kasuan kasuko erregelamendu organikoak xedatzen duenarekin bat beteko dira.
II. KAPITULUA. KABO, SARJENTU, INSPEKTOREORDE ETA INSPEKTORE IZATEKO PROZESUAK
1. Nafarrorako polizia kidegoetan bete gabe dauden kabo, sarjentu, inspektoreorde eta inspektore lanpostuak gora egiteko barne prozesu baten bitartez beteko dira, aurre-aurreko mailan dauden izangaien arteko oposizio-lehiaketa bidez, kapitulu honetan xedatzen denaren arabera.
2. Aurreko atalean aipatu diren lanpostuak betetzeko deialdia egiteko, baldintza hauek bete beharko dira:
a) Lanpostuak plantilla organikoan aurreikusita eta hutsik egotea.
b) Aurrekontuetan horretarako dirua izatea.
c) Kasuko lan eskaintza publikoan egotea.
3. Kabo, sarjentu, inspektoreorde eta inspektore lanpostu hutsak betetzeko bi txanda eginen dira: batetik, polizia kidego horretako kideendako barne igoerarako txanda murriztua, eta bestetik, ezartzen diren betebeharrak betetzen dituzten Nafarroako polizia kidegoetako kide guztiendako txanda irekia. Horren ondorioetarako, hiru lanpostu hutsetik lehendabizikoa eta hirugarrena barne igoera txandakoak izanen dira eta bigarrena txanda irekikoa.
Barne igoerarako txandan betetzen ez diren lanpostuak betegabe deklaratuko dira, txanda irekian bete gabe gelditu direnekin batera, horrelakorik baldin bada.
Kabo lanpostuak betetzeko oposizio-lehiaketan parte hartzeko bi urteko antzinatasuna eskatuko da udaltzain edo foruzain lanetan.
Sarjentu lanpostuak betetzeko oposizio-lehiaketan parte hartzeko, honako baldintza hauek bete beharko dira:
a) Kabo lanetan, gutxienez, bi urteko antzinatasuna izatea.
b) Unibertsitateko diplomatuaren, ingeniari teknikoaren, arkitekto teknikoaren edo Hirugarren mailako Lanbide Heziketaren titulua edo horren baliokide den besteren bat edukitzea, edo lizentziatura bateko lehen hiru kurtsoak osorik gaindituak izatea.
Atal honen ondorioetarako, kabo lanetan bost urteko antzinatasuna izatea titulazio horren baliokidea izanen da.
Inspektoreordeen lanpostuak betetzeko oposizio-lehiaketan parte hartzeko bi urteko antzinatasuna eskatuko da udaltzain edo sarjentu lanetan.
Inspektore lanpostuak betetzeko oposizio-lehiaketan parte hartzeko, honako hauek bete beharko dira:
a) Inspektoreorde lanetan, gutxienez, bi urteko antzinatasuna izatea.
b) Lizentziatu, ingeniari edo arkitektoaren unibertsitate-titulua izatea.
Atal honen ondorioetarako, inspektoreorde lanetan bost urteko antzinatasuna izatea titulazio horren baliokidea izanen da.
1. Kabo, sarjentu, inspektoreorde eta inspektore lanpostuetara igotzeko oposizio-lehiaketak fase hauek izanen ditu:
a) Merezimenduak baloratzea.
b) Ezagupenen gaineko probak.
c) Proba psikoteknikoak.
d) Gora egiteko gaitasun ikastaroa.
2. Lehiaketaldian, izangaiek alegatu eta behar bezala frogaturiko merezimenduak kalifikatuko dira, foru dekretu honen II. eranskinean azaltzen den baremoaren arabera.
3. Oposizioaldiak honako proba baztergarri hauek izanen ditu:
a) Ezaupideak neurtzeko proba teoriko-praktikoak, eskatzen den ikasketa mailaren eta deitutako lanpostuaren eginkizunen araberakoak: ehun eta berrogeita hamar puntu.
b) Izangaiak lanpostuaren ezaugarri profesiografikoari nola egokitzen zaizkion neurtzeko proba psikoteknikoak: hirurogeita hamar puntu.
c) Kasuan kasuko lanposturako gaitasun ikastaro bat gainditzea, Nafarroako Segurtasun Eskolak emana: berrehun puntu.
1. Oposizio-lehiaketaren dealdia eskumena duen organoak onetsi beharko du eta Nafarroako ALDIZKARI OFIZIALean argitaratu beharko da.
2. Deialdian honako hauek jaso beharko dira, gutxienez:
a) Deialdiaren xede diren lanpostuak zeintzuk diren.
b) Eskabideak nora bidali behar diren.
c) Eskabideak aurkezteko epea.
d) Izangaiek bete beharreko baldintzak.
e) Erabiliko den merezimenduen baremoa.
f) Epaimahaia.
g) Oposizioaren gai-zerrenda.
h) Deialdiaren, oinarrien eta deialdiaren aplikazio egintzen kontra zilegi diren helegiteak.
i) Eskabide eredua.
3. Epaimahaiari foru dekretu honen 11., 12., 13. eta 16. artikuluetan jaso diren arauak aplikatuko zaizkio.
4. Oposizio-lehiaketan parte hartzeko eskabideak aurkezteko epea hogeita hamar egun naturalekoa izanen da, deialdia Nafarroako ALDIZKARI OFIZIALean argitaratu eta biharamunetik hasita.
5. Eskabidearekin batera, izangaiek deialdian parte hartzeko eskatzen diren baldintzen eta baloratu beharreko merezimenduen egiaztagiriak aurkeztu beharko dituzte.
6. Eskabideak aurkezteko epea amaiturik, eskumena duen organoak onartu eta baztertuen behin-behineko zerrenda onetsiko du eta Nafarroako ALDIZKARI OFIZIALean argitara dadila aginduko, eta ohartaraziko du hurrengo hamar egun balioduneko epean baztertuek erreklamazioak egiten ahalko dituztela eta, akatsik egin badute, haiek zuzendu. Ezarritako epean eskabiderik aurkezten ez bada, deialdia onetsi zuen organo berak oposizio-lehiaketa hutsik gelditu dela adierazteko ebazpena emanen du. Ebazpen hori Nafarroako ALDIZKARI OFIZIALean argitaratu beharko da.
7. Erreklamazioak egiteko epea amaitu eta horiek ebatzirik, organo eskudunak onartu eta baztertuen behin betiko zerrenda onetsi eta Nafarroako ALDIZKARI OFIZIALean argitara eman dadila aginduko du.
8. Onartu eta baztertuen behin betiko zerrenda onesteko ebazpenean bertan adieraziko da oposizioa zein toki, egun eta ordutan hasiko den. Nolanahi ere, lehiaketaldiaren kalifikazioa oposizioaldia hasi baino lehenago egin eta jakinarazi beharko da.
9. Izangaien kalifikazioa bukatutakoan, epaimahaiak deialdia egin duen organoari prozesua gainditu duten izangaien zerrenda igorriko dio, txandaz txanda eta lortutako puntuazio altuenetik baxuenera ordenatuta, eta, horrekin batera, deitutako plazak betetzeko adina izangai izendatzeko proposamena.
10. Eskumena duen organoak, edo deialdian ezartzen denak, behar diren izendapenak eginen ditu. Izendapenak Nafarroako ALDIZKARI OFIZIALean argitaratu beharko dira.
11. Izendatzen diren izangaiek deialdia egin duen organoak finkatzen duen egunean hartu beharko dute dagozkien lanpostuen jabetza. Horrela egin ezean, lanpostuan gora egiteko eskubidea galduko dute, deialdia egiten duen organoak aintzat hartzen dituen ezinbesteko kasuetan izan ezik.
12. Artikulu honetan aipatu diren Nafarroako ALDIZKARI OFIZIALaren argitalpenetan, zilegi izanen da izangaien datu pertsonalen ordez agente-zenbakia eta kidegoa agertzea.
III. KAPITULUA. OFIZIAL LANPOSTUAK
Nafarroako polizia kidegoetako ofizial lanpostuak betetzeko deialdia egiteko, 25. artikuluko 2. atalean ezarritako baldintzak bete beharko dira.
1. Udaltzaingoetako ofizialen postuak oposizio-lehiaketen bidez beteko dira, hurrengo ataletan ezartzen denari jarraikiz. Oposizio-lehiaketak bi txanda izanen ditu, bata barne igoerarakoa eta bestea irekia. Horren ondorioetarako, eskaintzen diren bi lanpostu hutsetik lehena barne-igoerarako gordeko da eta bestea txanda irekirako.
2. Barne igoerako txandan parte hartzeko, baldintza hauek bete beharko dira:
a) Nafarroako polizia kidego bateko kidea izatea.
b) Inspektore lanetan hiru urteko antzinatasuna izatea egiazki emandako zerbitzuetan.
3. Barne igoerarako txandako lanpostu hutsak gora egiteko oposizio-lehiaketa bidez beteko dira, foru dekretu honetako 30. eta 31. artikuluetan ezarritakoari jarraikiz.
4. Txanda irekiko lanpostu hutsak kidegoan sartzeko oposizio-lehiaketa bidez beteko dira, foru dekretu honen I. Tituluan aurreikusitako prozeduraren arabera.
5. Txanda horietariko batean betetzen ez diren postuak besteari gehituko zaizkio.
1. Foruzaingoko ofizial lanpostuak oposizio-lehiaketa bidez beteko dira, hurrengo ataletan ezartzen denari jarraikiz. Hiru txanda bereiziko dira: bat, barne igoerarako, beste bat Estatuko Segurtasun Indar eta Kidegoetako buru, ofizial eta agintariendako eta, hirugarrenik, txanda irekia. Horren ondorioetarako, eskaintzen diren hamar lanpostu hutsetik lehena, bigarrena, bosgarrena eta zortzigarrena barne igoerako txandarako gordeko dira; hirugarrena, seigarrena eta bederatzigarrena Estatuko Segurtasun Indar eta Kidegoetako buru, ofizial eta agintariendako; eta laugarrena, zazpigarrena eta hamargarrena, txanda irekirako.
2. Barne igoerako txandan parte hartzeko, baldintza hauek bete beharko dira:
a) Nafarroako polizia kidego bateko kidea izatea.
b) Inspektore lanetan hiru urteko antzinatasuna izatea egiazki emandako zebitzuetan.
3. Estatuko Segurtasun Indar eta Kidegoetako buru, ofizial eta agintariendako txanda irekian parte hartzeko, honako baldintza hauek bete beharko dira:
a) Jardunean edo zerbitzu berezietan egotea.
b) Bost urteko antzinatasuna izatea egiazki zerbitzu ematen c) eta d) ataletan aipatzen diren eskaletako lanpostu edo kategoria batean.
c) Guardia Zibileko langileek ondoko eskaletakoak izan beharko dute: ofizialen buruak, ofizialak, goi mailako langileak edo goi mailako teknikariak.
d) Polizia Nazionaleko langileek ondoko eskaletakoak izan beharko dute: goi mailako eskala edo eskala exekutiboa.
4. Barne igoerako txandako lanpostu hutsak gora egiteko oposizio-lehiaketa bidez beteko dira, foru dekretu honetako 30. eta 31. artikuluetan ezarritakoari jarraikiz.
5. Estatuko Segurtasun Indar eta Kidegoetako buru, ofizial eta agintariendako txanda irekiko lanpostu hutsak oposizio-lehiaketa bidez beteko dira, foru dekretu honen I. Tituluan ezarritakoaren arabera, baina aldaketa hauek eginda:
a) Deialdia Nafarroako ALDIZKARI OFIZIALean eta Estatuko Aldizkari Ofizialean argitaratuko da.
b) 9.2.a) artikuluan adierazitako proba fisikoak ez dira egin beharko.
c) Nafarroako Segurtasun Eskolak eman beharreko gaitasun ikastaroa Segurtasun Indar eta Kidegoei buruzko Lege Organikoaren 43.4 artikuluan adierazitako ikastaroarekin ordezkatzen ahal da, deialdian hala jasoz gero.
d) Izendapenak Nafarroako ALDIZKARI OFIZIALean eta Estatuko Aldizkari Ofizialean argitaratuko dira.
e) Izangai izendatuek hilabeteko epea izanen dute lanpostuaren jabetza hartzeko, izendapena jakinarazi edo Estatuko Aldizkari Ofizialean argitaratzen denetik hasita.
6. Txanda irekiko lanpostu hutsak kidegoan sartzeko oposizio-lehiaketa bidez beteko dira, I. Erregelamenduko I. Tituluan ezarritakoaren arabera, A mailari dagokion ikasketa titulua dutenen artean.
7. Artikulu honetako 4. eta 5. ataletan adierazitako txandetan betetzen ez diren lanpostu hutsak txanda irekian beteko dira.
III. TITULUA. NAFARROAKO POLIZIA KIDEGOETAKO KIDEEN ESKUBIDE ETA BETEBEHARRAK
I. KAPITULUA. XEDAPEN OROKORRAK
Nafarroako polizia kidegoetako kideek Nafarroako Administrazio Publikoetako gainerako funtzionarioek dituzten eskubide eta betebehar berberak izanen dituzte, foru dekretu honetan ezartzen diren berezitasunak izan ezik.
II. KAPITULUA. BETEBEHARRAK
Nafarroako polizia kidegoetako kideek, bere jardunean, honako hauek bete beharko dituzte:
a) Konstituzioak, Nafarroako Foru Eraentza Berrezarri eta Hobetzeari buruzko Lege Organikoak eta antolamendu juridikoak agintzen dutenari zintzoki errespetatuz jokatzea.
b) Erabateko neutraltasun politikoz eta inpartzialtasunez jokatzea eta, horrenbestez, arraza, erlijioa, iritzia, sexua, hizkuntza, jaioterria, bizitokia edo beste edozein gizarte-egoera edo inguruabar pertsonal dela-kausa inolako bazterketarik egin gabe.
c) Betiere osotasunez eta duintasunez jokatzea, Kidegoarekiko edo Administrazioarekiko konfiantza galarazi edo organo horiek gutxiesteko bide eman dezaketen jokabideak saihestuz. Bereziki, ustelkeriatik itzuri eta tinko aurre egin beharko diote.
d) Hierarkia eta menpekotasun printzipioei men egitea eguneroko lan jardunean. Dena dela, beharrezko obedientzia hori ezin izanen da baliatu delitua dakarren edo nabarmen Konstituzioaren edo legeen kontra doan zerbait egiteko aginduren bat babesteko.
e) Justizi administrazioarekin kolaboratzea eta laguntzea, legeak ezarrita dagoen bezala.
f) Lan jardunean abusua, arbitrariotasuna edo bazterkeria dakarten jokabideak galaraztea, horretarako indarkeria fisiko edo morala erabili baldin bada.
g) Herritarrekiko tratuan egoki eta adeitasunez jokatzea beti eta beharrezkoa denean edo herritarrek eskatzen dutenetan haiek laguntzen eta babesten ahalegintzea. Esku hartu beharra duten guztietan, ahalik eta informaziorik zabalena eta osatuena ematea esku-hartzearen zergati eta helburuen gainean.
h) Lan jardueran kementsu eta azkar jokatzea, jokabide hori kalte larri, berehalako edo konponezin bat saihesteko beharrezkoa denean. Horrelakoetan, koherentzia, egokitasun eta proportzionaltasun printzipioen arabera erabiliko ditu eskura dituen baliabideak.
i) Armak bere edo beste pertsona batzuen bizia edo osotasun fisikoa benetan arrisku larrian dagoenean baino ez erabiltzea, edo herritarren segurtasunerako arrisku larria dagoen egoeretan, betiere aurreko atalean ezarritako printzipioei jarraikiz.
j) Atxiloketa bat egiten duenean, bere burua agintaritzako agente gisa identifikatzea.
k) Atxilotzen dituen edo zaintzapean dituen pertsonen bizia eta osotasun fisikoa begiratzea eta haien ohorea eta duintasuna errespetatzea.
l) Pertsona bat atxilotzen den kasuetarako, antolamendu juridikoak ezartzen dituen izapide, epe eta betebeharrak behar bezala bete eta begiratuko ditu.
m) Lan dedikazioari dagokionez, dedikazio osoz arituko dira eta beti legeen eta herritarren segurtasunaren defentsan jardun behar dute, noiznahi eta nonahi, zerbitzualdian izan ala ez.
n) Laneko jarduna dela-bide eskuratzen duten informazioa isilpean gordetzea zorrozki, informazio-iturrien berri eman beharrik gabe, salbu eta laneko jardunaren gorabeherek edo lege-xedapenek bestela jokatzera behartzen baldin badituzte.
Nafarroako polizia kidegoetako kideek ezin izanen dute diru bidezko beste jarduerarik egin, ez sektore publikoan, ez pribatuan, honako hauek izan ezik:
a) Unibertsitateko zentroetan irakasle lana.
b) Norberaren edo familiaren ondarea administratzea.
c) Lan zientifiko eta teknikoak edo literatur eta arte lanak ekoiztu eta sortzea, hala nola horien ondoriozko argitalpenak egitea, baldin eta enplegu edo zerbitzu-emate baten ondorioz sortu ez badira.
d) Hedabideetako eztabaida eta programetan noizean behin parte hartzea.
e) Biltzar, mintegi, hitzaldi edo lanbide ikastaroetan noizean behin laguntzea eta parte hartzea.
1. Polizia kidegoetako funtzionarioek destinoko herrian bizi beharko dute, salbu eta espresuki beste herri batean bizitzeko baimena ematen bazaie, horrek ez badie eragozten karguaren eginbehar eta eginkizunak betetzea.
2. Foruzaingoaren kasuan, kontseilari eskudunari dagokio baimen hori ematea, eta udaltzaingoen kasuan, alkateari.
Nafarroako polizia kidegoetako kideek aldian behin azterketa mediko psikofisiko bat egin beharko dute, lan baldintzek haien osasunean izan duten eragina baloratzeko eta osasun egoera poliziarentzat berarentzat edo beste batzuentzat arriskugarria ote den ikusteko.
III. KAPITULUA. ESKUBIDEAK
Polizia kidegoetako kideek dagozkien lansariak jasotzeko eskubidea izanen dute, hurrengo kapituluan xedatutakoarekin bat.
Greba eskubideari dagokionez, Segurtasun Indar eta Kidegoei buruzko Lege Organikoan xedatutakoari jarraikiko zaio.
Nafarroako polizia kidegoetako kideei behar bezalako lanbide prestakuntza eta gaitasuna emanen zaie, eginkizunak egoki beteko dituztela bermatzeko modukoa, objektibotasun eta aukera-berdintasunaren printzipioen arabera. Hori helburu, zenbait prestakuntza jardueratara nahitaez joan beharra ezartzen ahalko da.
1. Nafarroako polizia kidegoetako kideen urteko lanaldia Nafarroako Administrazio Publikoetako gainerako funtzionarioena bezalakoa izanen da.
2. Administrazio bakoitzean horretarako eskumena duen organoak lanpostu bakoitzaren lan ordutegia ezarriko du, zerbitzuaren beharren arabera.
3. Lanaldia txandaka betetzea ezar daiteke.
4. Funtzionario bakoitzari dagozkion ordutegia eta txandak garaiz jakinarazi beharko zaio.
5. Nahitaez egin beharreko etengabeko prestakuntza edo espezializazio ikastaroetan ematen den denbora lanaldian sartuko da. Nahitaezkoak ez diren ikastaroetan ematen den denbora ere lanaldian sartzen ahalko da, den-dena edo zati bat, zerbitzuaren beharren arabera, eskumena duen organoak hala erabakitzen badu.
6. Funtzionario guztiek asteko atsedenaldi bat egiteko eskubidea dute, gutxienez 24 ordu jarraian.
1. Opor-egun, lizentzia eta baimenei dagokienez, Nafarroako polizia kidegoetako kideek beren administrazio publikoko gainerako funtzionarioek dituzten eskubide berberak izanen dituzte.
2. Oporrak kasuan kasuko urte naturalean hartu beharko dira, denak jarraian nahiz zatika. Beraz, oporrak hartzeko eskubidea urteko abenduaren 31n iraungiko da.
3. Zerbitzuen beharrak direla eta opor-egun guztiak hartzen ez dituzten funtzionarioei jaiegunetan aparteko orduak egiteagatik ezarrita dauden ordainsariak emanen zaizkie.
4. Opor-egunak, lizentziak eta baimenak onartzea kasuko administrazio publikoan eskumena duen organoari dagokio, interesatuak aldez aurretik eskatuta, baina betiere zerbitzu behar justifikatuak bete eta gero.
5. Aurreko atalean adierazitako eskaera, ahal delarik, astebete lehenago aurkeztu beharko da gutxienez.
1. Lan jardunean lege edo erregelamenduzko arauak hautsiz edo urratuz gero, Nafarroako polizia kidegoko kideak beren egintzen erantzule zuzenak dira, nor bere egintzena, deusetan galarazi gabe horien ondorioz Administrazioari legokiokeen ondare erantzukizuna.
2. Dena dela, dagozkien zereginetan jardutean egindakoengatik erantzukizunak eskatzen zaizkien jarduketa judizial orotan, Nafarroako polizia kidegoetako kideek eskubidea izanen dute kide diren administrazio publikoak izendatutako profesionalek defendi eta ordezka ditzaten, administrazioaren beraren kargura.
Epaitegiko ebazpen irmoak egiaztatzen badu erantzun beharraren xedeko egintzak polizia jardunaren arauen kontra jokatuz egin zirela, Administrazioak ahalmena izanen du atzerabidezko ekintza baliatzeko.
IV. KAPITULUA. ORDAINSARIAK
Nafarroako polizia kidegoetako funtzionarioek zergati hauengatik kobratuko dituzte ordainsariak:
1. Bakoitzaren oinarrizko ordainsariak:
a) Maila bakoitzari dagokion hasierako soldata.
b) Graduari dagokion ordainsaria.
c) Antzinatasun saria.
2. Ordainsari osagarriak:
a) Berariazko osagarria.
b) Lanpostuko osagarria.
c) Burutzako osagarria.
3. Bestelako ordansariak, Nafarroako Administrazio Publikoen gainerako funtzionarioei oro har aplikatzekoak zaizkien arauen arabera.
1. Berariazko osagarria Nafarroako polizia kidegoetako lanpostu guztiei esleituko zaie, bakoitzari dagozkion eginkizunen arabera.
2. Berariazko osagarria langileari dagokion mailako hasierako soldataren gaineko ehuneko jakin bat izanen da, inoiz ere % 55 baino handiagoa izanen ez dena.
1. Lanpostuaren osagarria eginkizun bereziak dituzten unitateei atxikitako lanpostu batzuei esleituko zaie, unitate bakoitzari esleitutako eginkizunen zailtasunaren, dedikazioaren, erantzukizunaren edo behar den prestakuntza tekniko bereziaren arabera.
2. Lanpostuaren osagarria langileari dagokion mailako hasierako soldataren gaineko ehuneko jakin bat izanen da, inoiz ere % 75 baino handiagoa izanen ez dena.
1. Burutzako osagarria unitate organiko baten burutza atxikia duten lanpostuei esleituko zaie.
2. Burutzako osagarria langileari dagokion mailako hasierako soldataren gaineko ehuneko jakin bat izanen da, inoiz ere % 30 baino handiagoa izanen ez dena.
1. Bidezko diren ordansari osagarrien zenbatekoa administrazio publiko bakoitzaren plantilla organikoan adieraziko dira.
2. Dena dela, Nafarroako Gobernuak, Nafarroako Udaltzaingoak Koordinatzeko Batzordeak adostasun txostena eman ondoren, erregelamendu bidez zehazten ahalko ditu Nafarroako Udaltzaingoetako kideei ordaindu beharreko ordainsari osagarriak, foru lege honetako xedapenekin bat.
Erregelamendu honetan xedatutakoa ez dagoen orotan, polizia kidegoetako funtzionarioen ordainsarien araubidea Nafarroako Administrazio Publikoetako gainerako funtzioarioei oro har aplikatzen zaien berbera izanen da.
IV. TITULUA. DIZIPLINA ARAUBIDEA
I. KAPITULUA. ORGANO ZEHATZAILEAK ETA ERANTZUN BEHARRA DUTENAK
Foruzaingoan zehapenak jartzeko eskumena honako organo hauek izanen dute:
1. Nafarroako Gobernua, zehapenak langilea zerbitzutik kentzea baldin badakar.
2. Eskumena duen kontseilaria, hura ez gainerako arau-hauste larri eta oso larrietan.
3. Foruzainen burua, arau-hauste arinetan.
Toki entitateen menpeko polizia kidegoetan zehapenak jartzeko eskumena honako organo hauei dagokie:
1. Alkatea, arau-hauste larri eta oso larrietan.
2. Udaltzainen burua, arau-hauste arinetan.
1. Polizia kidegoko funtzionarioek diziplinazko erantzukina izanen dute lehenengo lanpostuaren edo destinoaren jabetza hartzen duten unetik beretik.
2. Kasuko polizia kidegoko funtzionario izaera utzi ondoren egindako egintzen ondorioz, ezin izanen da diziplinazko erantzukizunik eskatu.
3. Kasuko polizia kidegoan funtzionario izaera galtzea ez da nahiko izanen langilea funtzionario zen garaian egindako arau-hausteen ondoriozko erantzukizun zibil edo penaletatik salbuesteko.
1. Diziplinazko erantzukizuna izanen dute, arau-hausteen egileez gainera, arau-hausteak onartzen dituzten buruek eta estaltzen dituzten funtzionarioek, hala nola horrelakoak egitera xaxatu dituztenek.
2. Aurreko atalean adierazitako buruei eta funtzionarioei egilearen arau-hauste berbera egotziko zaie.
II. KAPITULUA. DIZIPLINA ZEHAPENAK
Zehapenak organo eskudunek mailakatu eta ezarriko dituzte, inguruabar hauek aintzat hartuta:
a) Arau-haustearen nolakotasuna.
b) Arduradunen parte-hartze maila.
c) Zerbitzuari egin zaion kaltea.
d) Administrazioari edo herritarrei eragindako kaltea.
e) Arduradunak berregileak ote diren.
1. Bidezko zehapenak gorabehera, berandu iristeagatiko edo lanera ez joateagatiko hutsegiteen kasuan eta lanaldi osoa betetzen ez denean, lan egin gabe utzitako denborari dagozkion ordainsariak deskontatuko dira zuzen-zuzenean. Ordainsarien murrizketa hori aplikatuko da, orobat, berandu iristeagatiko hutsegite justifikatu gabeetan, baldin eta beharrezko diren baldintzak ez betetzeagatik, diziplina arau-haustetzat ezin badira hartu. Horrelako kasuetan, murrizketa hori ez da diziplina zehapentzat hartuko eta ez da interesatuen espedientean jasoko.
2. Aurreko lerroaldean ezarritakoaren ondorioetarako, arau hauek hartuko dira aintzat:
a) Lanera berandu iristeagatiko edo lanaldi osoa ez betetzegatiko hutsegiteak direnean, dagokion murrizketa funtzionarioaren eguneko ordainsarietatik abiatuta eginen da, famili laguntza kontuan hartu gabe.
b) Lanera ez agertzeagatiko hutsegiteak direnean, dagokion murrizketa funtzionarioaren hilabeteko ordainsarietatik abiatuta eginen da, famili laguntza kontuan hartu gabe.
III. KAPITULUA. ERANTZUKIZUNAZ SALBUESTEA
Diziplina erantzukizuna ondoko arrazoiengatik iraungiko da:
a) Titularraren heriotzagatik.
b) Zehapena bete delako.
c) Amnistia edo indultu bidez.
d) Hutsegitearen preskripzioa dela kausa.
e) Zehapenen preskripzioa dela kausa.
1. Diziplina prozeduraren tramitazioaldian inkulpatutako funtzionarioa hilko balitz, prozedura bukatutzat emateko ebazpena emanen litzateke, arrazoiak aipatuta. Ordura arte egindako jarduketa guztiak artxibatzea ere aginduko litzateke, alderdi interesatuak espedientea aurrera eramatea erabakitzen ez badu behinik behin. Horrez gainera, inkulpatutako funtzionarioaren gainean hartutako behin-behineko neurri guztiak baliorik gabe utziko lirateke.
2. Administrazio zehapenaren amnistia edo indultua kasu hauetan emanen da:
a) Foruzaingoan, Nafarroako Gobernuak erabakita, kontseiluari eskudunak proposatuta.
b) Nafarroako toki entitateen menpeko udaltzaingoetan, Udalaren osoko bilkurak hala erabakita.
Administrazio zehapenen indultu eta amnistien hedadura, ondorioak eta baldintzak haiek hartzeko erabakietan beretan finkatuko dira.
1. Hutsegite arinek hilabetera preskribatuko dute; larriek, urtebetera; eta oso larriek, hiru urtera. Hutsegiteen preskripzio epea hutsegitea egin den egunetik hasten da kontatzen.
2. Preskripzioa prozedura hastea erabakitzen den unean berean etengo da. Hortaz, kasuko ebazpena behar bezala erregistratu beharko da, eta epea berriz ere kontatzen hasiko da baldin eta espedientea bi hilabete baino gehiago egoten bada geldirik, prozeduraren menpeko funtzioarioari ezin egotz dakizkiokeen arrazoiengatik.
1. Hutsegite arinengatik jarritako zehapenek hilabetera preskribatuko dute; hutsegite larrien ondoriozkoek, urtebetera; eta oso larrien ondoriozkoek, hiru urtera.
2. Preskripzio epea zehapena ezartzeko ebazpenak indarra hartzen duen egunaren biharamunetik aurrera hasiko da kontatzen, edo zehapena betetzeko agindua urratzen denetik aurrera, epe hura hasi baldin bada.
IV. KAPITULUA. DIZIPLINA PROZEDURA
1. ATALA. XEDAPEN OROKORRAK
Nafarroako polizia kidegoetako funtzionarioei diziplina zehapena ezartzeko, foru dekretu honetan ezarritako prozedura erabiliko da, ez besterik.
Prozedura bitartean instruktoreak sumatzen badu hutsegitea delitutzat har daitekeela, espedientea irekitzeko agindua eman zuen organoari jakinaraziko dio, Ministerio Fiskalari horren berri eman diezaion. Hori, hala ere, ez da oztopo izanen diziplina espedientea tramitatzen segitzeko, erabakia hartu eta, bidezkoa bada, zehapena jarri arte.
1. Diziplina prozedura ofizioz hasiko da, tramite guzti-guztietan.
2. Tramitazioari, komunikazioei eta jakinarazpenei dagokienez, Administrazio Publikoen Araubide Juridikoari eta Guztiendako Administrazio Prozedurari buruzko Legean eta, kasua bada, foru lege bidez onesten den beste administrazio prozedura batean xedatzen denari jarraikiko zaio.
3. Diziplina espedienteak ezin izanen du sei hilabete baino gehiago iraun, hasten denetik hasita.
Langileen ordezkaritza organoetako kideei irekitzen zaizkien diziplina espedienteetan, interesatuari eta, orobat, kasuko organoari eman beharko zaie entzutea.
2. ATALA. HUTSEGITE ARINETAN SEGITU BEHARREKO PROZEDURA
1. Funtzionarioren batek, kidegoko buruaren iritziz, hutsegite arintzat har daitekeen zerbait eginez gero, buruak espediente sumarioa irekiko du, litezkeen diziplina erantzukinak finkatzeko.
2. Ustezko egintza horren berri salaketa bidez jaso bada, kidegoko buruak, espedientea ireki aurretik, salaketa argitzeko eta, bidezkoa bada, espedientea irekitzeko egoki iruditzen zaizkion egiaztapenak egin eta beharrezko diren datu osagarriak jasoko ditu, hiru eguneko epean.
1. Espedientea irekitzeko ebazpen berean, karguen plegua jakitera emanen da. Honako hauek bildu beharko ditu: egozten zaizkion egintzak, ustezko hutsegitea, funtzionarioaren erantzukizuna eta aurreikusita dagoen zehapena, hutsegitearen arabera.
2. Ebazpen hori inkulpatutako funtzionarioari jakinaraziko zaio, bost eguneko epean bere burua defendatzeko nahi duena alegatu eta erabili nahi dituen frogabideak proposa ditzan.
3. Bidezkotzat hartzen diren frogen eginbideak bost eguneko epean eginen dira. Dena dela, beharrezkoa bada, epe hori luza daiteke.
4. Frogarik proposatzen ez bada edo, baldin badago, frogak egin ondoren, buruak hiru eguneko epean behar den ebazpena emanen du.
5. Atal honetan jasota ez dauden kasuei hurrengo atalean dauden aginduak aplikatuko zaizkie.
3. ATALA. HUTSEGITE LARRI ETA OSO LARRIETAN SEGITU BEHARREKO PROZEDURA
Prozedura, beti, ofizioz hasiko da, organo eskudunaren ebazpenaren bidez, dela organoaren beraren ekimenez, dela menpekoen arrazoibidezko mozioaren edo salaketaren bitartez.
1. Eskumena duen organoak zilegi izanen du isilpeko informazioa biltzea, diziplina espedientea hasteko erabakia eman edo, hala tokatzen bada, egintzak artxibatzea erabaki baino lehen.
2. Jarduketak artxibatzeko ebazpena hartuz gero, arrazoiak eman beharko dira.
3. Prozedura organo eskudunaren ebazpenaren bidez hasiko da, non instruktorea eta idazkaria ere izendatuko baitira. Espedientearen tramitazioaren arduraduna idazkaria izanen da.
1. Instruktorea inkulpatuaren administrazio publiko bereko funtzionario bat izanen da, enplegu edo maila berekoa edo goragokoa.
Toki entitateen udaltzaingoetan, izendapena egiteko baldintza hori ezin bada bete, instruktorea entitate horretako hautetsi bat izanen da.
2. Idazkaria inkulpaturiko funtzionarioaren administrazio publiko bereko edozein funtzionario izan daiteke.
1. Prozeduraren hasiera eta instruktorearen eta idazkariaren izendapena espedientearen xedeko funtzionarioari jakinaraziko zaizkio, hortik aurrerako jarduketa guztietan, nahi izanez gero, legelari baten laguntza izan dezan.
2. Instruktorearen eta idazkariaren izendapena kargu horietan aritzeko izendatzen direnei ere jakinarazi beharko zaie. Kargu horiek nahitaez onartu beharko dituzte, uko egiteko arrazoietakoren bat ez badago.
1. Honako inguruabarren bat gertatzen bada, instruktorea eta/edo idazkariak prozeduran parte hartzeari uko eginen dute eta halaxe jakinaraziko diote izendapena egin duenari:
a) Afera horretan interes pertsonala izatea.
b) Espedientearen xedeko funtzionarioaren edo horri laguntzen dion legelariaren familiakoa izatea, odol berekoen kasuan laugarren mailara bitarte, eta ezkontza-ahaideen kasuan, bigarren mailara bitarte.
c) Adiskidantza mina edo ageriko etsaitasuna izatea aurreko atalean aipatuetako batekin.
d) Espedientearen xede diren egintzen lekuko izatea.
2. Aurreko atalean karguari uko egiteko ezarritako beharra betetzen ez bada, organo eskudunak berak instruktorea edo idazkaria ordezkatuko du.
3. Karguari uko egin beharra ez betetzeak, betiere, diziplina erantzukizuna ekarriko du.
4. Karguari uko egin beharko liokeen funtzionario baten jarduketak (abstentzioaren arrazoiak biltzen direnean) ez du nahitaez ekarriko parte hartu dueneko egintzen baliogabetasuna.
1. Goiko artikuluan ezarritako kasuetan, interesatuek funtzionarioak errefusa ditzakete, prozeduraren tramitazioaren edozein unetan.
2. Errefusatzea eskatzen den idazkian horretarako arrazoiak azaldu beharko dira.
3. Biharamunean, errefusatuak izendapena egin duen organoari jakinaraziko dio alegaturikoa egia ote den. Egia bada, agintariak ordezko bat izendatuko du berehalakoan. Errefusatuak adierazten badu alegaturiko arrazoia ez dela egia, izendapena egin duen organoak beharrezko diren txosten eta egiaztapenak eginen ditu, eta hiru eguneko epean behar den ebazpena emanen du.
4. Arlo honen gainean harturiko ebazpenen aurka ezin izanen da helegiterik jarri; hala eta guztiz ere, errefusa alegatzeko aukera egonen da, prozedurari bukaera ematen dion egintzaren aurka administrazio helegitea edo administrazioarekiko auzi-helegitea jarriz gero.
1. Prozedura behin hasita, hasiera ematea erabaki duen organoak beharrezko diren behin-behineko neurriak hartzen ahalko ditu, geroko ebazpenaren eragingarritasuna bermatzearren.
2. Ezin izanen da interesatuei konponezinezko kalteak lekarzkieketen behin-behineko neurriak hartu, ez eta legeak babestutako eskubideen urraketa dakartenak ere.
3. Diziplina espedientearen tramitazioaldian, zilegi izanen da inkulpatua eginkizunetatik gabetzeko behin-behineko erabakia hartzea, Nafarroako Administrazio Publikoen zerbitzuko langileen Estatutuaren 29.1 artikuluan azaldutako moduan eta bertan azaltzen diren ondorioekin.
4. Egokia bada, behin-behineko eginkizun-gabetzea diziplina prozedura hasi aurretik erabaki dezake kasuko polizia kidegoko buruak, aurreko atalean adierazitako moduan eta ondorioekin.
Instruktoreak, idazkariaren laguntzarekin, gero ebazpena emateko oinarri izanen diren datuak egiaztatu, ezagutu eta zehazteko egoki diren instrukzio egintza guztiak egitea aginduko du, eta bereziki, egintzak argitzeko eta zehapena jaso dezaketen erantzukizunak zehazteko behar beste froga eta jarduketa egitea.
1. Betiere, lehenbiziko jarduketak instruktoreak ustezko inkulpatuaren aitormena jasotzeko izanen dira, inkulpatu jakin bat baldin badago, eta menpekoen mozio arrazoitutik edo espedientea irekitzea ekarri duen salaketatik eta inkulpatuaren beraren aitormenetik datozen eginbideak bideratzeko.
2. Diziplina espedientearen peko funtzionarioari ezarrita dagoen moduan deituko zaio. Agertzen ez bada ere, espedienteko jarduketek aurrera eginen dute.
1. Instruktoreak erabaki eta ebazteko beharrezkotzat hartzen dituen txostenak eskatuko ditu, arrazoiak emanez.
2. Txostenak eskatzean, insktruktoreak finkatu beharko du irizpena zeren gainekoa izanen den.
Behar diren jarduketak eginda, instruktoreak, bidezkoa bada, behar den kargu plegua eginen du, non aipatuko baitira egozten zaizkion egitateak eta horien oinarriak, baita prozeduraren peko funtzionarioari legokiokeen erantzukizuna ere.
1. Karguen plegua argi eta garbi idatzi beharko da, funtzionarioari egozten zaizkion egitate bakoitzarentzat lerroalde zenbakitu bat erabiliz.
2. Karguen plegua interesatuei jakinaraziko zaie. Hortik aurrera, hamabost eguneko epea emanen zaie erantzuteko eta beren burua defendatzeko nahi dutena alega dezaten.
1. Karguen pleguari erantzuna emanda edo horretarako epea bukatuta, instruktoreak, dela ofizioz, dela alderdi batek eskatuta, frogak aurkezteko epe bat ireki lezake, hamabost eta hogeita hamar egun bitartekoa, egokiak diren frogak proposatu eta egin daitezen. Dena dela, beharrezkoa bada, instruktoreak epe hori luzatzea erabaki lezake.
2. Frogetarako epea ezarriz gero, prozeduaren xede den funtzionarioari jakinaraziko zaio.
1. Prozedura erabakitzeko gertakari nabarmenak zuzenbidean baliagarri den edozein bide erabiliz egiaztatzen ahal dira.
2. Inkulpatutako funtzionarioak egoki iruditzen zaizkion frogak egitea proposa dezake. Horretarako, frogetarako epea bukatu baino hiru egun lehenago gutxienez, eztabaidatzen ari den afera ebazteko interesgarriak diren agiri guztiak aurkezten ahalko ditu.
3. Instruktoreak jarduketa frogagarri batzuk ez onartu eta ez egiteko erabakia hartzeko ahalmena izanen du, azaleko kontuak edo ez-beharrezkoak direla uste badu, are deskargurako aurkezten badira ere. Horrelakoetan, ezespena arrazoi bidez azaldu beharko du.
4. Funtzionarioari jakinarazi beharko zaio berak proposatutako frogak non eta zein egun eta ordutan eginen diren.
1. Frogak egiten bukatu ondoko hamabost egunetan, instruktoreak ebazpen proposamena eginen du. Proposamenean egintza guztiak zehatz-mehatz azalduko dira, horien balorazio juridikoa eginen da -gero hutsegitea nolakoa den finkatzeari begira-, inkulpaturiko funtzionarioaren erantzukizuna zenbatekoa den finkatuko da eta ezarri beharreko zehapena adieraziko.
2. Instruktoreak ebazpen proposamenaren berri emanen die interesatuei, hamar eguneko epean egoki iruditzen zaiena alega dezaten.
Interesatuari entzutea eman ondoren edo, alegaziorik ez badago, epea bukatuta, Instruktoreak langileen ordezkaritzarako organoari igorriko dio espedientea, horrek hamar eguneko epean txostena eman dezan.
Txostena jasotakoan edo horretarako epea -txostena egin gabe ere-bukatutakoan, instruktoreak prozedura hastea erabaki zuen organoari bidaliko dio espedientea, espedientea aztertu eta, beharrezkoa bada, behar diren jarduketa osagarriak egin ondoren, dagokion ebazpena eman dezan, horretarako eskumena baldin badu. Eskumenik ez badu, espedientea ebazteko eskumena duen organoari igorriko dio.
V. KAPITULUA. DIZIPLINA ZEHAPENEN BETEARAZPENA
Diziplina zehapenak horiek ezartzeko ebazpenean adierazten den bezala betearaziko dira, administrazio bidean irmo bilakatu eta gero.
1. Funtzionarioei ezartzen zaizkien diziplinazko zehapenak langile bakoitzaren espedientean jasoko dira, oinarrian izan den hutsegitea ere adieraziz.
2. Idazpen horiek interesatuak eskatuta deuseztuko dira, zehapena betetzen denetik epe hauek igaro ondoan:
a) Sei hilabete, hutsegite arinetan.
b) Bi urte, hutsegite larrietan.
b) Sei urte, hutsegite oso larrietan.
3. Aurreko atalean adierazitako epe horien bitartean funtzionarioari beste diziplina zehapen bat jartzen bazaio, ezin izanen da idazpena deuseztatu.
4. Berregilea izanez gero, idazpena deusezteko epeek 2. atalean azaltzen dena baino bi aldiz gehiago iraungo dute.
5. Zerbitzutik behin betikoz bereizteko zehapenaren idazpena ezin izanen da deuseztu.
1. Zehapena jartzeko eskumena duen organoak espedientea instruktoreari itzultzeko ahalmena izanen du, bere iritziz azkeneko erabakia hartzeko ezinbestekotzat jotzen dituen egin gabeko eginbideak egin ditzan.
2. Horrelakoetan, instruktoreak zehapena jartzeko eskumena duen organoari espedientea itzuli aurretik, egindako jarduketen berri emanen dio inkulpatutako funtzionarioari, hamar eguneko epean bere burua defendatzeko egoki iruditzen zaiona alega dezan.
1. Erregelamendu honen 70. artikuluan ezarritakoa deusetan galarazi gabe, diziplina prozedura organo eskudunak kasuko zehapena ezartzeko ebazpenarekin bukatuko da.
2. Ebazpen horretan espedientean planteaturiko afera guztiak ebatzi beharko dira, arrazoien bidez, eta ezin izanen da erabili karguen pleguan eta ebazpen proposamenean oinarri izan ziren egintza eta oinarriak besterik, horien balorazio juridikoa bestelakoa izan badaiteke ere.
3. Era berean, diziplina prozedura bukatzeko ebazpenean zehatz-mehatz adierazi beharko da egindako hutsegitea, zein agindutan jasotzen den adieraziz, hutsegite mota, ardura duen funtzionarioa eta ezarri zaion zehapena, prozeduraren tramitazioaldian hartutako behin-behineko neurriak berariaz aipatuz.
4. Ebazpenean inkulpatutako funtzionarioak erantzukizunik ez duela edo diziplina hutsegiterik ez dagoela erabakiz gero, aurreko atalean aipatutako behin-behineko neurrien inguruko behar den deklarazioa eginen du.
V. TITULUA. OHOREAK ETA ORDAINSARIAK
Nafarroako polizia kidegoetako kideek saria jasotzen ahalko dute honako inguruabar hauetarikoren bat gertatzen bada:
a) Eginkizunen betetze-bidean bizia arriskuan jarri izana.
b) Lanbidean edo gizartean garrantzi handia izan duen edo bere unitateari izen handia ekarriko dion zerbitzu bat zuzendu edo egitea.
c) Lanbideari dagozkion eginbeharretan gaitasun eta prestutasun nabarmena erakustea.
d) Polizia lanbidearentzat garrantzi handikoak diren lanbide edo zientzia azterlanak egitea edo arlo horretako ikerkuntzan nabarmentzea.
e) Neurriz kanpoko ausardia, agintarienganako leialtasuna, adiskidetasun eta pairamena, gizalegea eta elkartasuna erakustea.
f) Oro har, saritzeko moduko bestelako egintzak antzeko modu batean egitea.
Egoera horietakoren batean dauden funtzionarioen gain-gainetik diren agintariek saritzeko moduko jokabideen berri emanen diete beren goi-buruei.
Hona hemen eman daitezkeen sariak:
a) Zerbitzu Goraipagarrien plaka.
b) Zerbitzu Goraipagarrien Domina.
c) Jendaurreko Esker Ona.
d) Pribatuki Esker Ona.
Sariok emateko eskumena organo hauei dagokie:
1. Foruzaingoan:
a) Zerbitzu Goraipagarrien Plaka, Nafarroako Gobernuari, eskumena duen kontseilariak proposatuta.
b) Zerbitzu Goraipagarrien Domina, eskumena duen kontseilariari.
c) Esker ona ematea, dela jendaurrekoa dela pribatua, Foruzaingoko buruari, ahalmen hori kontseilariak beretzat gordetzen ez badu.
2. Udaltzaingoetan:
a) Zerbitzu Goraipagarrien Plaka, Osoko Bilkurari edo organo gorenari, alkateak edo presidenteak proposatuta.
b) Zerbitzu Goraipagarrien Domina, alkateari edo presidenteari.
c) Esker Ona ematea, dela jendaurrekoa dela pribatua, Udaltzaingoko buruari, ahalmen hori alkateak edo presidenteak beretzat gordetzen ez badu.
Sari horiek funtzionario bakoitzaren espedientean jasoko dira betirako eta lanbidean gora egiteko prozeduretan merezimendu gisa puntuatuko dira.
Salbuespen gisa, Zerbitzu Goraipagarrien Plaka edo Domina polizia kidegokoak ez diren pertsonei ematen ahalko zaie, kidegoari eman dioten laguntza nabarmenagatik horrelako saria jasotzea merezi baldin badute.
XEDAPEN GEHIGARRIAK
1. Nafarroako Udaltzaingoen eta Albiente Kidegoen Erregistroa eratzen da, Lehendakaritza, Justizia eta Barne Departamentuaren menpe.
2. Erregistro horretan Nafarroako udalerrietan sortzen diren Udaltzainen kidego guztiak inskribatu beharko dira, hala nola horietako bakoitzean dauden kideak eta albienteak.
3. Erregistro horren funtzionamendua erregelamendu bidez ezarriko da.
Erregelamendu honetako 47. eta 48. artikuluetan aipatutako ordainsari osagarriak aplikatzeak ez du berekin ekarriko Nafarroako polizia kidegoetako funtzionarioek jasotzen dituzten ordainsariak murriztea.
Hirugarrena. Foru dekretu honen ondorioetarako, eskumena duen kontseilaria izanen da, Nafarroako Gobernua egitura arautzen duten arauei jarraikiz, Nafarroako Foruzaingoa Nafarroako Foru Komunitateko Administrazioaren zein departamenturen menpe dagoen, hango titularra.
Foru dekretu honetan eskatzen denaren arabera, Nafarroako polizia kidegoetan ofizial lanpostuetara gora egiteko txandan parte hartzeko behar diren baldintzak betetzen dituen inor ez dagoen artean, lanpostu horietako lanpostu hutsak txanda irekian eskaintzen ahalko dira.
Indarrik gabe geratzen da apirilaren 27ko 101/1989 Foru Dekretua eta foru dekretu honetan ezarritakoari aurka egiten dioten maila bereko nahiz beheragoko xedapen guztiak.
AZKEN XEDAPENAK
Ahalmena ematen zaio Lehendakaritza, Justizia eta Barne kontseilariari foru dekretu hau garatu eta betearazteko behar diren xedapenak eman ditzan.
Foru dekretu honek Nafarroako ALDIZKARI OFIZIALean argitara eman eta biharamunean hartuko du indarra.
I. ERANSKINA. NAFARROAKO POLIZIA KIDEGOETAN SARTZEKO BAZTERKETA MEDIKOEN TAULA
1._Ikuspegia. Begien sistema
_Zuzendu gabeko begi zolitasuna:
_4/10 bi begietan, edo
_3/10 begirik okerrenean eta 5/10 onenean, edo
_2/10 begirik okerrenean eta 6/10 onenean.
_Ikuseremu monokularra: Ezin izanen da plano horizontalean 120.º-tik beherakoa izan, eta murrizketa nabarmenik gabekoa izanen da ikuseremuko meridiano batetik bestera.
_Diplopia.
_Diskromatopsia larriak.
_Estereopsi falta.
_Keratotomia erradiala.
2._Entzumena. Entzuteko sistema
_500tik 3000 Hz bitarteko frekuentzietan belarriren batean 45 dB-ko edo gehiagoko galera.
_Orekari loturiko alterazioak, edozein etiologiatakoak.
3._Mintzamena
_Afasiak, disfoniak, disfemiak (hitz-moteltasuna), betiko disartria eta disglosiak, polizia lanetan aritzea zaildu edo galarazten dutenak.
4._Giharren eta eskeletoaren aparatua.
_Artikulazioren baten galera anatomikoa edo ankilosia, eginkizunetarako duen eraginaren arabera.
_Prozesu artikularrak, eginkizunetarako duten eraginaren arabera, zeinahi etiologiaren ondorio direla ere.
_20.º-tik gorako eskoliosia.
_30.º-tik gorako zifosia.
_Espondilolisia, espondilolistesia, ornoen bategiteak eta ornoarteko diskoaren arazoak.
_Espondilitis ankilosantea.
_Paget-en eritasuna.
_Osteoporosia eta osteomalazia (eginkizunetarako duen eraginaren arabera).
_Fibromialgia.
_Deformazio anatomikoak, eginkizunetarako duten eraginaren arabera.
5._Digestio aparatua
_Crohn-en eritasuna eta kolitis ultzeraduna.
_B eta C hepatitisa aktiboa izatea edo birusaren eramailea izatea.
_Gibeleko gutxiegitasuna, ebaluazio mahaiak baloratu beharrekoa.
_Zirrosi hepatikoa.
_Behazun-zirrosi primarioa.
_Pankreatitis kronikoa.
_Fibrosi kistikoa.
_Sabelaldeko paretako etena, ebaluazio mahaiak baloratu beharrekoa.
_Kakari eutsi ezina..
6._Bihotz-hodietako sistema
_Bihotzeko gutxiegitasuna, maila guztietan.
_Arritmia eta blokeoak: Aurre-eszitazio sindromea eta bihotzaren erritmoaren edo kondukzioaren alterazio mota guztiak, salbu eta arritmia sinusala, BGE edo BE solteak, 1. mailako blokeo AB, Eskuineko Adarraren Blokeo Osoa eta Ezkerreko Adarraren hemiblokeoak.
_Kardiopatia iskemikoa, maila guztietan.
_Balbulopatiak.
_Miokardiopatiak.
_Perikardiopatia kronikoak.
_Biriketako hipertentsio primarioa eta sekundarioa.
_Arterietako iskemia kronikoaren sindromea.
_Arterietako hipertentsioa (TAS “ 140 eta TAD “ 90).
_Arterietako hipotentsioa (TAS “ 90 eta TAD “ 45).
_Zainen eta baso linfatikoen gutxiegitasuna.
7._Arnas aparatua
_Arnas aparatuaren afekzio kronikoak (Bronkitis kronikoa, BBEK, Enfisema, Bronkiektasiak).
_Pleurako isuri berrituak.
_Berezko pneumotorax berrituak.
_Eritasun interstizialak eta/edo biriketako fibrosia.
_Asma eta bronkioetako erreaktibotasuna.
8._Nerbio-sistema
_Epilepsia.
_Esklerosi anizkoitza eta bestelako eritasun desmielinizagarriak.
_Neurona motorearen eritasunak
_Ataxiak.
_Buruko eta integrazioko funtzioen alterazioak (arrazoitze abstraktoa, oroimena, adimena eta funtzio betearazleak).
_Parkinson-en eritasuna eta bestelako alterazio estrapiramidalak.
_Odol-hodien afekzio iskemikoak, hemorragikoak edo malformazioren baten ondoriozkoak.
_Miastenia larria eta juntura neuromuskularraren bestelako arazoak.
_Bertigoak.
_Siringomielia.
_Hidrozefalia.
_Miopatiak.
_Nerbio-sistema zentralaren lesioaren ondoriozko paralisia.
_Nerbio-sistema periferikoaren lesioaren ondoriozko paralisia, funtzioetan duen eraginaren arabera.
_Nerbio-sistema periferikoaren eritasunak, funtzioetan duten eraginaren arabera.
_Neke kronikoaren Sindromea.
_Anosmia.
_Beste alterazio motore batzuk (tikak, estereotipia motoreak, loaren alterazioak), giza harremanetan eta lanean izan dezaketen eraginaren arabera.
9._Alterazio psikiatrikoak.
_Buruko alterazio organikoak, prozesu automugatuak eta itzulgarriak kenduta.
_Buruaren eta jokabidearen alterazioak, substantzia psikotropikoen kontsumoaren ondoriozkoak (alkohola barne).
_Eskizofrenia eta bestelako alterazio psikotikoak.
_Gogo-aldartearen alterazioak (jokabide bipolarrak, alterazio depresibo errepikariak, depresioaldi handia, alterazio distimikoak).
_Antsietate-alterazioak, ondorio kliniko nabarmena baldin badute.
_Barne-bulkaden kontrolaren eta izaeraren alterazioak, giza harremanetan eta lanean eragina dutenak.
10._Sexu eta gernu-aparatua
_Giltzurruneko gutxiegitasuna, bilakaera eta pronostikoaren arabera.
_Gernu-inkontinentzia.
_Pixari eutsi ezina.
11._Sistema endokrinologikoa
_Ardatz hipotalamo-hipofisarioaren alterazioak.
_Hipertiroidismoa eta Hipotiroidismoa, bilakaeraren eta pronostikoaren arabera.
_Addison, Cushing, Feokromozitoma eta giltzurren gaineko guruinaren bestelako alterazioak.
_Hipoaldosteronismo primarioa eta sekundarioa.
_Mellitus diabetesa.
_Adenomatosi endokrino anizkoitza.
_Hipoparatiroidismoa eta hiperparatiroidismoa, bilakaeraren eta pronostikoaren arabera.
12._Larrua, fanerak eta guruin exokrinoak
_Orbainak eta azalaren prozesu kronikoak, baldin eta haien hedadura, funtzioetan izan dezaketen eragina eta kokapena ikusirik, polizia lanetan aritzea eragozten baldin badiote.
13._Odola eta organo hematopoietikoak
_Muineko aplasia, gaueko hemoglobinuria paroxistikoa, sindrome mieloproliferatiboak, anemia hemolitiko kronikoak, ß-talasemia anemiadunak.
_Linfomak, bilakaeraren eta pronostikoaren arabera.
_Sindrome linfoproliferatibo kronikoak, bilakaeraren eta pronostikoaren arabera.
_Mieloma anizkoitza eta Waldeströmen eritasuna.
_Hemofiliak eta hemostasiaren bestelako alterazioak.
_Inmunoeskasiak.
_Esplenektomia.
_Antikoagulatzaileak (Heparinak, Sintrom), Interferon, kortikoideak edo EPO erabiltzen dituzten tratamendu kronikoak.
14._Bestelakoak
_GIB birusaren antigorputzen eramailea.
_Amiloidosia.
_Kolagenosia.
_Lupus eritematoso sistemikoa.
_Artritis erreumatoidea.
_Esklerodermia.
_Sjögrenen sindromea.
_Baskulitisa, ebaluazio mahaiak baloratu beharrekoa.
_Obesitatea (GMI “ 25).
15._Ohar orokorrak
_Baztertzeko moduko patologiak ebaluazio mahaiak baloratuko ditu funtzioetan duten ondorioen arabera eta polizia lanetan aritzeko pronostikoaren arabera.
_Prozesu neoplasikoetan eta organoen transplanteen kasuetan, ebaluazio mahaiak gaitasuna baloratuko du, bilakaeraren eta pronostikoaren arabera.
_Funtzioetan eragina duten gorputzeko bestelako aparatu edo sistemetako afekzioak, balorazio mahaiaren iritziz, polizia lanetan aritzea eragozten baldin badiote.
II. ERANSKINA. GORA EGITEKO LEHIAKETETARAKO MEREZIMENDUEN BAREMOA
a) Administrazio publikoetan egindako zerbitzuak: 35 puntu gehienez.
1) Deialdiko xede den lanpostuaren arabera, Nafarroako polizia kidegoetan ondoko lanposturen batean langile finko gisa emandako zerbitzu urte bakoitzeko:
LANPOSTUA OFIZIALA INSPEKTOREA INSPEKTOREORDEA SARJENTUA KABOA
INSPEKTOREA 1,50 _ _ _ _
INSPEKTOREORDEA 1,25 1,50 _ _ _
SARJENTUA 1,00 1,25 1,50 _ _
KABOA 0,75 1,00 1,25 1,50 _
FORUZAINA/UDALTZAINA 0,50 0,75 1,00 1,25 1,50
2) Deialdiko xede den lanpostu berean, Nafarroako polizia kidegoetan bitarteko langile gisa emandako zerbitzu urte bakoitzeko, aurreko atalean ezarritakoaren arabera, deitutako lanpostuaren azpi-azpian dagoen lanpostuari ematen zaion puntuazioa baino % 10 gehiago emanen da.
3) Administrazio publiko baten menpeko beste Segurtasun Indar eta Kidego batean langile finko gisa emandako zerbitzuak: urte bakoitzeko 0,50 eta 1,50 puntu bitarte, 1) atalean ezarritako lanpostuen banaketaren arabera edo kasuko polizia kidegoan dauden kategorien arabera.
4) Edozein administrazio publikotan langile finko gisa polizia kidegoetakoak ez diren lanpostuetan emandako zerbitzuak: 0,25 puntu urte bakoitzeko.
Oharrak:
1. Urteen kopurua osoa ez bada, zerbitzuan egindako aldiari proportzioan dagokion puntuazioa emanen zaie lehiatzaileei.
2. Lanaldi partzialean egindako zerbitzuen kasuan, behar den zatia kenduko da.
3. Deialdia argitaratu ondoan egindako zerbitzuak ez dira baloratuko.
4. Funtzionarioa zerbitzu berezietan edo eszedentzia berezian egon den edo unitate organiko bateko buru edo zuzendari lanetan aritu den aldietako zerbitzuak, egoera horietan sartzean zuen lanpostuan eman izan balitu bezala kontatuko dira.
b) Prestakuntza, irakaskuntza, ikerketa eta bestelako merezimenduak: 25 puntu gehienez.
1) Erakunde edo zentro publikoek eta unibertsitateek antolaturiko prestakuntza ekintzetan parte hartzea: 0,10 puntu kreditu akademiko bakoitzeko edo haren baliokide den eskola aldi bakoitzeko (10 ikastordu): gehienez ere, 10 puntu.
Oharrak:
1. Baloratu beharreko prestakuntza jardueretan, ikastorduen zatikiak hainbanatuko dira.
2. Ikastorduen kopurua agertzen ez duten ziurtagiriei kreditu bateko balorazioa emanen zaie.
3. Ikasturte bateko iraupena agertzen duten ziurtagiriei 12 kredituko balorazioa emanen zaie.
4. Erakunde antolatzaileari buruzko betebeharrak betetzen ez badituzte ere, Administrazioak agindurik edo oniritzirik eginak diren prestakuntza ekintzetan parte hartzea puntuazio berarekin baloratuko da. Horien artean, espresuki, sindikatuek Administrazio Publikoetako Etengabeko Prestakuntzarako Itunen barruan antolatuak sartuko dira.
2) Biltzar edo jardunaldietan ponentziak edo komunikazioak aurkeztea, beka edo saria jaso duten zientzia edo ikerketa lanak egitea eta aldizkari espezializatuetan lanak argitaratzea: 3 puntu, gehienez ere, epaimahaiak baloratu beharrekoak, kontuan hartuz lana edo jarduera bakar batek edo taldean egina den eta biltzarra edo argitalpena zein mailatakoa den (tokikoa, herrialdekoa, nazionala edo nazioartekoa).
3) Sektore publikoan prestakuntza ekintzak antolatu edo/eta horietan irakasle gisa parte hartzea: gehienez ere, 2 puntu, epaimahaiak haien iraupenaren arabera baloratu beharrekoak.
4) Titulazio eta espezialitate akademikoak, deialdian eskatutakoak ez direnak: 4 puntu gehienez.
5) Doktore edo lizentziatu maila, deialdian eskatutako titulazioari buruz: 2 puntu gehienez.
6) Bestelako merezimenduak, epaimahaiak baloratu beharrekoak: besteak beste, arlo pribatuan egindako lanak, bekak edo prestakuntzako egonaldiak, aholku, partaidetza edo ordezkaritza organoetako kide izatea: 4 puntu gehienez.
Oharrak b) atal osorako:
1. Atal honetan aipatutako merezimenduak bakarrik polizia lanarekin zerikusia izanez gero baloratuko dira. Ez dira inolaz ere baloratuko kidegoan sartzeko edo gora egiteko prestakuntza ikastaroak.
2. Honako b) atal honi dagokion puntuazioa gehienez ere 25 puntukoa izanen da.
c) Hizkuntzak jakitea. 20,50 puntu gehienez.
1) Frantsesez, ingelesez edo alemanez jakiteagatik, Europako Batasuneko hizkuntza ofizialak baitira, bosna puntu gehienez ere.
2) Euskaraz jakiteagatik emanen den puntuazioa, bidezkoa denean edo aintzat hartzen denean, hizkuntza-eremuaren arabera aldatuko da, irizpide hauetan oinarrituz:
a) Eremu euskaldunean, euskaraz jakiteagatik 5,50 puntu emanen dira, plantilla organikoaren arabera ezinbestekoa deklaratu ez bada betiere.
b) Eremu mistoan, plantilla organikoaren arabera merezimendu gisa baloratu behar den kasuetan, 5,25 puntu emanen dira euskaraz jakiteagatik.
3) Ondorio horietarako, hizkuntza eskola ofizial batek luzaturiko gaitasun agiria edo ofizialki baliokidea den titulua edukitzeagatik aurreko ataletan adierazten den gehieneko puntuazioa emanen da hizkuntza bakoitzeko.
Titulurik eduki ezik, Hizkuntza Eskola Ofizialean gaindituriko maila bakoitzagatik gehieneko puntuazioaren bosten bat emanen da. Euskararen kasuan, Nafarroako Gobernuak antolatutako ikastaroetan gainditutako urrats bakoitzeko 1/12 emanen da.
Hizkuntza horietatik bakoitzak zer dakien baloratzeko, Nafarroako Administrazio Publikoaren Institutuak espresuki antolatutako azterketak egiten ahal ditu; bost zailtasun maila izanen dira, eta hizkuntza bakoitzari gehienez ere ematen ahal zaion gehienezko balorazioaren 1/5 bat emanen zaio maila bakoitzari.
d) Sariak: 2,5 puntu gehienez.
1) Zerbitzu Goraipagarrien Plakagatik: 1,25 puntu.
2) Zerbitzu Goraipagarrien Dominagatik: 0,75 puntu.
3) Jendaurreko Esker Onagatik: 0,50 puntu.
4) Esker On pribatuagatik: 0,25 puntu.
Iruñean, bi mila eta hiruko abenduaren hogeita bederatzian._Nafarroako Gobernuko lehendakaria, Miguel Sanz Sesma._Lehendakaritza, Justizia eta Barne kontseilaria, Javier Caballero Martínez.
Iragarkiaren kodea: F0301799
