LEXNAVARRA
59/2003 FORU DEKRETUA, MARTXOAREN 24KOA, NEKAZARITZA AZPIEGITUREI BURUZKO MARTXOAREN 7KO 1/2002 FORU LEGEA GARATZEKO ERREGELAMENDUA ONESTEN DUENA 
.
BON N.º 44 - 09/04/2003
I. KAPITULUA. XEDEA
- 1. artikulua. Xedea.
II. KAPITULUA. JARDUKETAK NEKAZARITZA AZPIEGITURETAN
- 2. artikulua. Nekazaritza azpiegituretan jarduteko prozeduraren hastapena, onuradun izan daitezkeenek egindako eskaera arrazoituaren ondorioz.
- 3. artikulua. Berrantolamenduko eremuaren hasierako perimetroaren aldaketa, oinarrietan, eta baztertzeak.
- 4. artikulua. Batzorde Aholkuemailearen osaera.
III. KAPITULUA. ADMINISTRAZIO NEURRI LAGUNGARRIAK
- 5. artikulua. Nekazaritza ustiategien batasunak bultzatzeko laguntzak.
- 6. artikulua. Lurren Funtsa adjudikatzeko arauak.
- 7. artikulua. Nekazaritza sozietateak eratzeko laguntzen araubidea.
- 8. artikulua. Onuradunek bete beharreko baldintzak labore iraunkorretan izandako galeraren kalteordaina jasotzeko .
IV. KAPITULUA. ADMINISTRAZIO NEURRI BABESGARRIAK
- 9. artikulua. Eraldatu ondorengo lursail ureztagarriak eskualdatzeko jarraitu beharreko prozedurak.
- 10. artikulua. Nekazaritza azpiegituretako jarduketen onuradunek obrak burutu aurretik bete beharreko baldintzak .
- 11. artikulua. Dirulaguntzaren portzentajea ezartzeko irizpideak, herrilurretan presioko ureztatze sareak, barne banaketakoak, finantzatzeko, nekazaritza azpiegituren xedeko eremuetan ureztalurrak ezarri edo modernizatzen direnean.
- 12. artikulua. Dirulaguntzaren portzentajea ezartzeko irizpideak, interesatuak bere ustiategian zuzenean egindako nekazaritza interes pribatuko obrak finantzatzeko, Nekazaritza Azpiegituren xedeko eremuetan ureztalurrak ezarri edo presioko sareen bidez modernizatzen direnean.
Nekazaritza Azpiegiturei buruzko martxoaren 7ko 1/2002 Foru Legearen hainbat agindutan hura garatuko duen araudiaren beharra aipatzen da, ondorio juridikoak osatuko badira eta aurreikuspenak beteko.
Horrela gertatzen da kasu hauetan: onuradun izan daitezkeenek egindako eskaera arrazoituaren ondorioz nekazaritza azpiegituretan ekintzak hasteko (Foru Legearen 6.2 artikulua); berrantolatu beharreko eremuaren hasierako perimetroa aldatzeko, oinarrietan, eta baztertzeko (17.a artikulua); Batzorde Aholku-emailearen osaeran (18. artikulua); nekazaritza ustiategien batasunak bultzatzeko laguntzetan (41.2 artikulua); Lurren Funtsa adjudikatzeko arauetan (42.4 artikulua); nekazaritza sozietateak eratzeko laguntzen araubidean (44.5 artikulua); labore iraunkorretan galerak daudenean, kalte-ordainak hartzeko onuradurek bete beharreko baldintzetan (46.3 artikulua); eraldatu ondorengo lursail ureztagarriak eskualdatzeko jarraitu beharreko prozeduren xehetasunetan (50.6 artikulua); nekazaritza azpiegituretako jarduketen onuradunek bete beharreko baldintzetan (68.3 artikulua); ureztalurrak ezartzeko edo modernizatzeko finantzaketan diru-laguntzaren portzentajea ezartzeko irizpideetan, herrilurretako barne banaketa denean (73.4 artikulua); eta nekazaritza interes pribatuko obrak, interesatuak bere ustiategian zuzenean egin beharrekoak, finantzatzeko diru-laguntzaren portzentajea ezartzeko irizpideetan (74.2 artikulua).
Horretarako, Erregelamendu hau prestatu da garapena behar duten legezko agindu horiek aurrera eramatearren.
Dena dela, nekazaritza ustiategi bideragarriak eratzeko laguntza publikoen kasuan (Foru Legearen 41.4 artikuluan aurreikusia), Estatuak Foru Komunitateko nekazaritza sektoreari emandako laguntzak biltzen dituen foru araudian ezarritakora jotzen da, nahigabeko errepikapenik izan ez dadin. Aldiz, arau orokorrak ezarri dira, gero foru agindu bidez garatuko direnak, nekazaritza ustiategien batasuna bultzatzeko nekazaritza azpiegiturak ezartzen diren eremuetan edo kooperatiba, eraldaketako nekazaritza-sozietate edo beste elkarte mota bateko bihurtzeko, Foru Legearen 41.2 eta 44.5 artikuluetan aurreikusi bezala; orobat, diru-laguntzaren portzentajerako irizpideak finkatzeko, interesatuak bere ustiategian zuzenean egindako nekazaritza interes pribatuko obrak finantzatzen direnean, aipatu Foru Legearen 74.2 artikuluan arautu bezala.
Bestalde, nekazaritza azpiegiturei buruzko orain arteko antolamendu juridikoa oro har berrikustean, ikusi da ona dela onestea indarrik gabe utzi diren eta indarrean dirauten Foru Komunitateko arauzko xedapenen taula. Berrikuste horrek ekarri du Nekazaritza Azpiegiturei buruzko martxoaren 7ko 1/2002 Foru Legea aldarrikatzea eta Foru Lege hori garatzen duen Erregelamendu hau onestea.
Foru Lege horren Azken Xedapenetetako lehenak ahalmena ematen dio Nafarroako Gobernuari behar adina arauzko xedapen emateko hura garatu eta aplikatzeko.
Horiek horrela, Nekazaritza, Abeltzaintza eta Elikadura kontseilariak proposaturik, eta Nafarroako Gobernuak bi mila eta hiruko martxoaren hogeita lauan egindako bilkuran hartutako Erabakiarekin bat,
Dekretatu dut:
Onetsi egin da Nekazaritza Azpiegiturei buruzko martxoaren 7ko 1/2002 Foru Legea garatzen duen Erregelamendua, eta testua Foru Dekretu honen ondotik erantsi.
1. Nekazaritza Azpiegiturei buruzko martxoaren 7ko 1/2002 Foru Legea garatzen duen Erregelamenduak indarrik gabe utzitako xedapenen taula hauxe onetsi da, baita indarrean dirautenena ere:
A) Indarrik gabe utzi dira:
Otsailaren 19ko 124/1996 Foru Dekretua, lurzati berrantolamenduak eragindako labore iraunkorreko ustiategiei laguntzak emateko arauak ezartzen dituena.
Apirilaren 1eko 173/1996 Foru Dekretua, "oinarrizko ustiatze azalera" deritzona lortzearren lurzatiak berrantolatzeko eremuetan ustiategiei eman beharreko laguntzak arautzen dituena.
Nekazaritza, Abeltzaintza eta Elikadura kontseilariak 1996ko azaroaren 28an emandako foru agindua, lurzati berrantolamenduko eremuetan, oinarrizko ustiatze azalera deritzana erdiesteko ustiategiei laguntza emateko prozedura arautzen duena.
Maiatzaren 6ko 205/1996 Foru Dekretua, gutxieneko labore unitateak ezartzen dituena Nafarroako Foru Komunitatearen lurraldean.
Otsailaren 6ko 28/1995 Foru Dekretua, Nekazaritzako Azpiegituren Batzorde Teknikoa sortu eta eta bere osaera eta funtzionamendua arautzen dituena.
Martxoaren 20ko 74/1995 Foru Dekretua, lurren funtseko ondasun eta eskubideak kudeatu, administratu, defendatu eta erreibindikatzeko erakunde arduraduna zehazten duena, Nekazaritza Azpiegituren Erreformari buruzko abenduaren 9ko 18/1994 Foru Legean xedatutakoaren arabera.
B) Indarrean diraute:
Ekainaren 10eko 242/1996 Foru Dekretua, ureztalurrak hobetzeko eta ezartzeko espedienteen finantzaketa berriaren prozedura arautzen duena.
1996ko uztailaren 15eko foru agindua, tramite, epe eta baldintzak ezartzen dituena ureztalurrak hobetzeko eta ezartzeko finantzaketa espedienteentzat.
Ekainaren 21eko 237/1999 Foru Dekretua, lurzati berrantolamendu prozesuetako ingurumenaren gaineko eraginaren ebaluazioa arautzen duena.
2. Indarrik gabe gelditzen dira Foru Dekretu honetan xedatutakoari aurka egiten dioten maila bereko edo apalagoko xedapen guztiak.
Ahalmena ematen zaio Nekazaritza, Abeltzaintza eta Elikadura kontseilariari Foru Dekretu hau garatzeko behar diren xedapenak eman ditzan.
Foru Dekretu honek Nafarroako ALDIZKARI OFIZIALean argitaratu eta biharamunean hartuko du indarra.
I. KAPITULUA. XEDEA
Nekazaritza Azpiegiturei buruzko martxoaren 7ko 1/2002 Foru Legearen alderdi hauek garatzen ditu Erregelamendu honek:
1. Nekazaritza azpiegituren arloko jarduketa hauei buruzkoak:
a) Nekazaritza azpiegituretan jarduteko prozedura abiatzea, onuradun izan daitezkeenek egindako eskaera arrazoituaren ondorioz (Foru Legearen 6.2 artikulua).
b) Berrantolamenduko eremuaren hasierako perimetroaren aldaketa, oinarrietan, eta baztertzeak (17.a artikulua).
c) Batzorde Aholku-emailearen osaera eta funtzionamendua (18. artikulua).
2. Administrazio neurri lagungarriei buruzkoak:
a) Nekazaritza ustiategien batasunak bultzatzeko laguntzak (41.2 artikulua).
b) Lurren Funtsa adjudikatzeko arauak (42.4 artikulua).
c) Nekazaritza sozietateak eratzeko laguntzen araubidea (44.5 artikulua).
d) Onuradunek bete beharreko baldintzak labore iraunkorretan izandako galeraren kalte-ordaina jasotzeko (56.3 artikulua).
3. Administrazio neurri babesgarriei buruzkoak:
a) Eraldatu ondorengo lursail ureztagarriak eskualdatzeko jarraitu beharreko prozedurak (50.6 artikulua).
b) Nekazaritza azpiegituretako jarduketen onuradunek obrak burutu aurretik bete beharreko baldintzak (68.3 artikulua).
c) Diru-laguntzaren portzentajea ezartzeko irizpideak, ureztalurrak ezartzeko edo modernizateko obren finantzaketan, herrilurretako barne banaketa denean (73.4 artikulua).
d) Diru-laguntzaren portzentajea ezartzeko irizpideak, nekazaritza interes pribatuko obrak, interesatuak bere ustiategian zuzenean egindakoak, finantzatzeko (74.2 artikulua).
II. KAPITULUA. JARDUKETAK NEKAZARITZA AZPIEGITURETAN
2. artikulua . Nekazaritza azpiegituretan jarduteko prozeduraren hastapena, onuradun izan daitezkeenek egindako eskaera arrazoituaren ondorioz.
Nekazaritza, Abeltzaintza eta Elikadura kontseilariak foru agindu baten bidez nekazaritza azpiegituretako jarduketa hasteko baimena eman aurretik, onuradunek beren borondatea adierazi beharko dute nekazaritza azpiegituretako jarduketa burutzeko, eduki honetako eskaera aurkeztuz:
a) Eremu batean lurzati berrantolamendua egin behar denean, bertako nekazaritza ustiategien titularren % 70ek bederen egin beharko dute eskaera, Nekazaritza, Abeltzaintza eta Elikadura Departamentuaren menpeko Nafarroako Nekazaritza Ustiategien Erregistroan inskribatuta daudela. Eskaerari txosten bat erantsiko zaio, nekazaritza azpiegituren jarduketa eremuan sartutako udalek prestatua, egin gogo den jarduketaz duten jarrera azaltzeko.
b) Eremu batean lurzati berrantolamendua egin behar denean eta, gainera, erabat edo parte batean, lursail bat ureztalur bihurtu edo ureztalurra zena modernizatzen denean, eremu horretako nekazaritza ustiategien titularren % 70ek bederen egin beharko dute eskaera, Nekazaritza, Abeltzaintza eta Elikadura Departamentuaren menpeko Nafarroako Nekazaritza Ustiategien Erregistroan inskribatuta daudela. Eskaerari, lehenik eta behin, txosten bat erantsiko zaio, nekazaritza azpiegituren jarduketa eremuan sartutako udalek prestatua, egin gogo den jarduketaz duten jarrera azaltzeko, eta, bigarrenik, Ureztatzaile Elkartea eratuta badago, nekazaritza azpiegitura egiteko eskaera, Elkartearen estatutu eta ordenantzek eskatzen duten moduan onetsia.
3. artikulua . Berrantolamenduko eremuaren hasierako perimetroaren aldaketa, oinarrietan, eta baztertzeak.
1. Nekazaritza, Abeltzaintza eta Elikadura Departamentuak hasierako perimetroa aldatzen ahal du nekazaritza azpiegituren jarduketa eremuan, jabetzaren egoera edo egin beharreko obren beharrak kontuan hartuta. Inguruko lursailak jarduketa eremuaren barrenean sartzea ere bere esku izanen du.
2. Aurreko atalean xedatutakoak bere ondorioak izan ditzan, Nekazaritza, Abeltzaintza eta Elikadura Departamentuak nekazaritza azpiegituretako jarduketa eremuaren perimetroa handitzen ahal du kasu hauetako edozeinetan:
a) Handitu beharreko eremuko nekazaritza ustiategietako titular gehienak hasieran aurreikusitako eremuko titular ere direnean.
b) Gehitutako eremua nahitaezkoa denean obrak egiteko, edo funtsezko hobekuntza dakarrenean nekazaritza azpiegituretako jarduketan.
3. Nekazaritza, Abeltzaintza eta Elikadura Departamentuak nekazaritza azpiegituretako jarduketatik kentzen ahal ditu haren onurarik ezin jaso duten lurzatiak, haien kokaera, inguruabar bereziak edo erantsita dituzten obra edo hobekuntzak direla medio. Dena dela, kanpoan uztearen ondorioz ezin badira aurreikusitako mozkinak eskuratu, ez dira baztertuko, nahiz eta lehen aipatu inguruabarrak izan.
4. Aldaketak eta bazterketak Oinarriei erantsiko zaizkie.
4. artikulua . Batzorde Aholkuemailearen osaera.
Kide hauek osatuko dute Lurzati Berrantolamenduaren Batzorde Aholku-emailea:
a) Lurzati Berrantolamenduak ukitutako toki entitateetako alkate eta presidenteak, edo haien eskumena hartua dutenak. Jarduketak azalera gehien ukitutako toki entitateko presidentea ariko da batzordeburu lanetan.
b) Ureztatzaile Elkarte(eta)ko burua(k), Ureztatze Sindikatuetakoak, Erabiltzaile Elkarteetakoak edo legez eratutako ureztalurren eremuetako beste elkarteetakoak.
c) Hori ezean, lurzati antolamendua eta ureztalur bihurtzea eremu berean gertatuz gero, kudeaketa batzordeko burua Batzordeko kide izaten ahal da, gaur egungo Ur Legeak agintzen duen moduan hautatua.
d) Lurzati antolamenduko lau parte-hartzaile gutxienez, eta hamabi gehienez, Nekazaritza, Abeltzaintza eta Elikadura Departamentuak dei egindako batzarrean hautatuak, eta hark izendatuak. Ukitutako azalera ikusita, Nekazaritza, Abeltzaintza eta Elikadura Departamentuak kide kopurua, jabe edo laborari, finkatuko du. Hautetsi horien eginkizuna izanen da Nekazaritza, Abeltzaintza eta Elikadura Departamentuari laguntza ematea lurzati motak eta sailkapen koefizienteak erabakitzen, baita lurrak sailkatzeko lanak ere.
e) Bi teknikari, Nekazaritza, Abeltzaintza eta Elikadura Departamentuak izendatuak. Haietako bat idazkari lanetan ariko da.
f) Teknikari bat, Ingurumen, Lurraldearen Antolamendu eta Etxebizitza Departamentuak proposatua eta Nekazaritza, Abeltzaintza eta Elikadura Departamentuak izendatua.
III. KAPITULUA. ADMINISTRAZIO NEURRI LAGUNGARRIAK
5. artikulua . Nekazaritza ustiategien batasunak bultzatzeko laguntzak.
1. Nekazaritza azpiegituretako jarduketa eremuetan nekazaritza ustiategi bideragarrien batasunak bultzatzearren eta kooperatibak, eraldaketako nekazaritza sozietateak edo beste elkarte mota batzuk osa ditzaten, helburu nagusia lurren ustiatze bateratua egitea izanik, Nekazaritza, Abeltzaintza eta Elikadura kontseilariak laguntza publikoak arautzen dituen foru agindua onesten ahal du xede hauekin:
a) Eratzeak eta funtzionamendu administratiboak sortutako gastu errealei diru-laguntza ematea.
b) Batasunaren urteko kontuen kontabilitate eta auditoria gastuei diru-laguntza ematea.
2. Laguntza horiek eskuratzeko, batasunaren lurren azalera ez da lehorreko ustiategiaren oinarrizko ustiategiaren gutxieneko azalera baino txikiagoa izanen edo, lur ureztatuetakoa.
3. Aurreko zenbakietan aipatutako diru-laguntzek nekazaritza sektorerako laguntza nazionalei buruzko Europako araudiaz gain, ekainaren 9ko 8/1997 Foru Legea bete beharko dute, Nafarroako Foru Komunitateko Administrazioaren eta haren erakunde autonomoen diru-laguntzak eman, kudeatu eta kontrolatzeko araubide orokorra ezartzen duena, alegia.
6. artikulua . Lurren Funtsa adjudikatzeko arauak.
Lehiaketa bidez adjudikatuko dira Lurren Funtseko lurrak, eta Nafarroako ALDIZKARI OFIZIALean eta Foru Komunitatean hedakunde handiena duten bi egunkarietan emanen da argitara. Nekazaritza azpiegituretako jarduketa onesten duen Foru Dekretuan finkatuko da interesatuek eremuan ordaindu beharreko prezioa, horretarako ezarritako modulei jarraituz.
7. artikulua . Nekazaritza sozietateak eratzeko laguntzen araubidea.
1. Nekazaritza, Abeltzaintza eta Elikadura Departamentuak laguntzak emanen ditu Nekazaritza Sozietateak eratzeko, haien helburu nagusia oinarrizko ureztatze azalera duten lurrak elkarren artean ustiatzea bada, Nekazaritza Azpiegiturei buruzko martxoaren 7ko 1/2002 Foru Legean ureztatze unitateen araubidean eskatu bezala. Horretarako, Nekazaritza, Abeltzaintza eta Elikadura kontseilariak laguntzak arautzen dituen foru agindua onesten ahal du, oinarri hauekin:
a) Diru-laguntza kalkulatzeko, kontuan hartuko da sozietatea osatzen duten bazkideen jarduketa eremuko lurren balioa. Horrela kalkulatutako azalerari Nekazaritza, Abeltzaintza eta Elikadura Departamentuak jarduketa aurretik ezarritako moduluen balioa aplikatuko zaio; betiere, azalera ez da ureztalurreko oinarrizko ustiatze azaleraren gehienekoa halako bi baino handiagoa izanen.
b) Portzentajearen arabera igoko da diru-laguntza, nekazaritza sozietatea ureztalurraren oinarrizko azalera halako bi bederen izatera iristen bada.
c) Gainera, portzentajearen arabera igoko da diru-laguntza, sozietatea eratu aurretik, Nafarroako Nekazaritza Ustiategien Erregistroan baja hartzen duen jabe bakoitzeko.
d) Betiere, diru-laguntza ez da Nekazaritza, Abeltzaintza eta Elikadura Departamentuak bere moduluak aplikatuz ateratako balorazioaren % 25 baino handiagoa izanen.
2. Aurreko zenbakian aipatutako diru-laguntzek nekazaritza sektorerako laguntza nazionalei buruzko Europako araudiaz gain, ekainaren 9ko 8/1997 Foru Legea bete beharko dute, Nafarroako Foru Komunitateko Administrazioaren eta haren erakunde autonomoen diru-laguntzak eman, kudeatu eta kontrolatzeko araubide orokorra ezartzen duena, alegia.
8. artikulua . Onuradunek bete beharreko baldintzak labore iraunkorretan izandako galeraren kalteordaina jasotzeko .
1. Nekazaritzako Azpiegiturei buruzko martxoaren 7ko 1/2002 Foru Legearen 2. artikuluan adierazten diren nekazaritza azpiegituretako jarduketek ukitzen dituzten pertsonek, baldin eta, interes orokorreko obrak amaitu ondoren, ordezko loteetan lehen adinako labore iraunkorreko produkziorik ez badute, kalte-ordainerako eskubidea izanen dute, artikulu honetan aipatu bezala.
2. Interesdunek eskaera Landa Garapeneko eta Ingurumeneko Departamentura bidali beharko dute, hurrengo epeen barnean:
a) Lehorreko lurzati berrantolamenduei dagokienez, obrak jaso eta hurrengo urtearen barnean.
b) Ureztalur bihurtzeari dagokionez, ureztatzea abiatzeko deklarazioa egin eta hurrengo urtearen barnean.
c) Ureztalurrak modernizatzeari dagokionez, obrak jaso eta hurrengo urtearen barnean.
3. Landa Garapeneko eta Ingurumeneko Departamentuak baloratuko du zenbateko kaltea egin zaion eskatzaile bakoitzari ordezko lursailak adjudikatzean, lurzati berrantolamenduko obrak egitean edo interes orokorreko obrak egitean, lurrak ureztalur bihurtu eta modernizatzen diren kasuetan.
4. Produkzio galera zehaztutakoan, dagokion kalte-ordaina finkatuko da: gehienez ere, urteko produkzio gordinaren ehuneko berrogei, hiru urteko epean.
5. Kalte-ordaina jasotzeko, labore iraunkorraren jabeek landareak errotik atera, eta motzondoak kendu beharko dituzte, lurzatia laborantzarako moduan utzita, Landa Garapeneko eta Ingurumeneko Departamentuak laboreei ordezko lursailetan eutsi behar zaiela berariaz jakinarazi ezik.
6. Landa Garapeneko eta Ingurumeneko Departamentuko estatistika zerbitzuek ezarriko dituzte laboreen produkzioari eta prezioei buruzko datuak, Foru Komunitateak eta Nekazaritza, Arrantza eta Elikadura Ministerioak sinatutako hitzarmenaren barrenean, eta aplikatzeko, honako hau hartuko da kontuan:
a) Alde batetik, laborearen batez besteko produkzioa azken bost kanpainetatik hirutan, handiena eta txikiena kenduta.
b) Bestetik, batez besteko prezioa, azken bost kanpainetatik hirutan, handiena eta txikiena kenduta.
7. Kalte-ordain horietarako, belarki laboreak ez dira labore iraunkortzat hartuko.
IV. KAPITULUA. ADMINISTRAZIO NEURRI BABESGARRIAK
9. artikulua . Eraldatu ondorengo lursail ureztagarriak eskualdatzeko jarraitu beharreko prozedurak.
Hauxe da partikularrek jarraitu beharreko administrazio prozedura arrunta eraldatu ondorengo lursail ureztagarrien araubideari loturiko lurrak borondatez eskualdatzeko:
a) Eskualdatzaileak modu sinesgarrian jakinarazi beharko dio Nekazaritza, Abeltzaintza eta Elikadura Departamentuari lursailak eskuz aldatzeko borondatea eta hartarako baldintzak; eskuratzaile nor den ere frogatu beharko du.
b) Nekazaritza, Abeltzaintza eta Elikadura Departamentuak, jakinarazpenaren ondoko hiru hilabeteko epean, lehentasunez erosteko legezko eskubidea erabiltzen ahal du. Epe hori ebazpena jakinarazi gabe iragandakoan, modu librean egin ahal izanen da eskualdaketa. Beti ere, eskuratzaileak jakinarazi beharko dizkio Nekazaritza, Abeltzaintza eta Elikadura Departamentuari zer baldintza funtsezkotan egin den eskualdaketa, eskrituraren kopia aurkeztuta.
c) Jakinarazpen fede-emailea egiten ez denean, Nekazaritza, Abeltzaintza eta Elikadura Departamentuak atzera eskuratzeko eskubidea erabiltzen ahal du hiru hilabeteko epean, eskualdaketaren berri duen egunetik aurrera. Zilegi da, halaber, atzera eskuratzeko eskubideaz epe horretan berean baliatzea, baldin eta eskualdatzea jakinarazitako prezio eta baldintzei lotu gabe egin bada.
d) Eskualdatzea dohainik edo lursailaren baliokoa ez den negozio juridikoaren bitartez egiten bada, Nekazaritza, Abeltzaintza eta Elikadura Departamentuak lehentasunez erosteko eskubide horietako edozein erabiltzen badu, lursailaren balioaren prezioa ordaindu beharko du. Kalkulu hori egiteko, lehorreko lur gisa duen balioari (Departamentuak berak zehaztuko du) interes orokorreko obrek eta lurzatiko instalazio finkoak onuradunarentzat duten kostua gehituko zaio.
10. artikulua . Nekazaritza azpiegituretako jarduketen onuradunek obrak burutu aurretik bete beharreko baldintzak .
Nafarroako Foru Komuniteak, zuzenean edo bere sozietate publikoen bitartez, nekazaritza azpiegituretan sartutako obrak egiteko, baldintza hauek bete beharko dira aldez aurretik:
a) Obrak egiteko kontratua sinatu baino lehen, Ureztatzaile Elkarteek, legez onartu edo parekatutako elkarteek eta toki entitateek dagokien zenbatekoa ordaindu beharko dute. Hori kalkulatzeko, Nekazaritzako Azpiegiturei buruzko martxoaren 7ko 1/2002 Foru Legearen 73. artikuluari jarrraituko zaio, Landa Garapeneko eta Ingurumeneko kontseilariak obra horien finantzaketa onetsi ondoren, edo Nafarroako Gobernuak, bestela. Foru Komunitateko Administrazioaren edo sozietate publiko kontratugilearen kontuan sartuko da dirua.
b) Toki entitate eskudunak araudi berezi bat aldez aurretik onestea; hain zuzen, azpiegituretako jarduketaren xedeko labore lote komunalen aprobetxamendua arautzen duena, Nafarroako Toki Administrazioari buruzko uztailaren 2ko 6/1990 Foru Legearen 174. artikuluari jarraituz.
Toki entitateak onetsitako araudian loteak adjudikatzeko lehentasun ordena, Nekazaritza Azpiegiturei buruzko martxoaren 2ko 1/2002 Foru Legearen 40. artikuluko 5b) idatz-zatian ezarritakoa, jasotzen denean bakarrik burutuko du Nafarroako Foru Komunitateko Administrazioak azpiegituretako jarduketa.
Orobat, 1/2002 Foru Legearen 68. artikuluko d letra aplikatuz, toki entitateei dokumentu bat eskatuko zaie, Nekazaritza, Abeltzaintza eta Elikadura Departamentua ureztalurreko instalazioen erabilera okerrak sor lezakeen kaltearen erantzukizunetik libratuko duena.
c) Gainera, herrilur batzuk ureztalur bihurtu edo haien ureztatzea modernizatzen denean, barne banaketako obrak kontratatzeko, Nafarroako toki entitateek konpromisoa hartu beharko dute inbertsioaren xedeko loteek eremuko oinarrizko ureztatze azalera bederen hartuko dutela bermatzeko, eta lote horiek hamabost urtean bederen azalera horrekin jarraituko dutela ureztatzea abiatzeko deklarazioa egiten denetik.
d) Lursaila ureztalur bihurtzen denean edo presioko ureztatze sistema ezarriz modernizatzen denean, obrak kontratatu baino lehen, honako hau eskatuko zaie Ureztatzaile Elkarteei edo legez onartu edo parekatutako beste elkarteei:
Barne araubideko estatutu eta ordenantzetan honelako tarifa egitura hartu izana agertzea: oinarri finko bat eta bi bloke, kontsumo unitarioarekin zerikusia dutenak, halako moduz non erreferentziako balio bat gainditzen duten hektarea eta kanpaina bakoitzeko kontsumoei zehapena ezarriko baitzaie; balio horren gainetik dagoena metro kubikoak duen balio arrunta halako hiru, bederen, ordainduz. Eremu bakoitzean, Nekazaritza, Abeltzaintza eta Elikadura Departamentuak ezarriko du erreferentziako balio hori, "Nafarroako Ureztalurrak" sozietate publikoak proposatuta.
Ureztatzaile Elkarteak edo dagokion beste elkarte batek kanpainaz kanpaina ureztalurretan ezarritako laboreei buruzko datu aipagarriak ematea Nekazaritza, Abeltzaintza eta Elikadura Departamentuari edo bere sozietate publikoei, estatistika kontuetarako eta nekazaritzako elikagai eta energia industriek informazio hobea izan dezaten.
Nekazaritza, Abeltzaintza eta Elikadura Departamentua kaltearen erantzukizunetik libratuko duen dokumentua, instalazioak behar ez bezala erabiltzean kalte egiten denean eta, batez ere, Nekazaritza, Abeltzaintza eta Elikadura Departamentuak "Nafarroako Ureztalurrak, S.A." sozietate publikoaren bitartez eremu horretarako eta ohiko laboreetarako erreferentzia gisa ezarritakoa baino ur gehiago aplikatzen denean.
11. artikulua . Dirulaguntzaren portzentajea ezartzeko irizpideak, herrilurretan presioko ureztatze sareak, barne banaketakoak, finantzatzeko, nekazaritza azpiegituren xedeko eremuetan ureztalurrak ezarri edo modernizatzen direnean.
1. Kontuan hartuta toki entitateen herrilurretako aprobetxamenduen izaera soziala edo Nafarroako Toki Administrazioari buruzko uztailaren 2ko 6/1990 Foru Legearen hamargarren xedapen gehigarrian aipatzen diren erakundeen ondasunena, nekazaritza azpiegituren xedeko lurrak ureztalur bihurtu edo haien ureztatzea hobetuz gero, ureztatzearen barne banaketaren finantziazioa kostuaren % 75ekoa izan daiteke, banaketa hori presioko sareen bitartez egiten bada.
Laguntza horiek arautzeko, Nekazaritza, Abeltzaintza eta Elikadura kontseilariak foru agindua onesten ahal du, oinarri hauekin:
a) Loteek oinarrizko ureztatze azalera izatea, gutxienez.
b) Toki entitateak edo Nafarroako Toki Administrazioari buruzko uztailaren 2ko 6/1990 Foru Legearen hamargarren xedapen gehigarrian aipatzen diren erakundeek inbertsioaren gaineko gutxieneko portzentaje bat jasotzea, diru-laguntza gisa, ondasunen aprobetxamenduak duen izaera soziala dela eta.
c) Erabiltzaileen prestakuntaren eta ur kontsumoaren arabera handitzen ahal da portzentajea.
2. Aurreko zenbakian aipatutako diru-laguntzek nekazaritza sektorerako laguntza nazionalei buruzko Europako araudiaz gain, ekainaren 9ko 8/1997 Foru Legea bete beharko dute, Nafarroako Foru Komunitateko Administrazioaren eta haren erakunde autonomoen diru-laguntzak eman, kudeatu eta kontrolatzeko araubide orokorra ezartzen duena, alegia.
12. artikulua . Dirulaguntzaren portzentajea ezartzeko irizpideak, interesatuak bere ustiategian zuzenean egindako nekazaritza interes pribatuko obrak finantzatzeko, Nekazaritza Azpiegituren xedeko eremuetan ureztalurrak ezarri edo presioko sareen bidez modernizatzen direnean.
1. Interesatuak bere ustiategian zuzenean egindako nekazaritza interes pribatuko obrak finantzatzearren, Nekazaritza, Abeltzaintza eta Elikadura kontseilariak behar den foru agindua onesten ahal du, oinarri hauekin:
a) Nekazaritza, Abeltzaintza eta Elikadura Departamentuak portzentaje bat ezartzen ahal du lurzatian presioko ureztatze sistemaren kostua laguntzeko, diseinu orokorraren zenbait baldintza tekniko betetzen baditu eta lurzati osoan ura aplikatzeko sistema bera bada. Portzentaje hori handitzen ahal da eremu andeatuetan, nekazaritza aldeak garatzeko Europako araudiaren arabera hala deklaratuta daudenetan.
b) Portzentajea handitzeko, erabiltzaileen prestakuntza, ur kontsumoa eta ustiategien titularren ezaugarriak hartuko dira kontuan.
2. Aurreko zenbakian aipatutako diru-laguntzek nekazaritza sektorerako laguntza nazionalei buruzko Europako araudiaz gain, ekainaren 9ko 8/1997 Foru Legea bete beharko dute, Nafarroako Foru Komunitateko Administrazioaren eta haren erakunde autonomoen diru-laguntzak eman, kudeatu eta kontrolatzeko araubide orokorra ezartzen duena, alegia.
