(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

383/1997 FORU DEKRETUA, ABENDUAREN 22KOA, NAFARROAN IZURRITEAK GALARAZTEKO SISTEMA EZARRI ETA HURA ARAUTZEN DUENA Nota de Vigencia

BON N.º 10 - 23/01/1998

  I. KAPITULUA. XEDAPEN OROKORRAK

  II. KAPITULUA. IZURRITEAK GALARAZTEKO OINARRIZKO AZPISISTEMA, EGOERA EPIDEMIKOAK ETA AGERRALDIAK

  1. ATALA. IZURRITEAK GALARAZTEKO OINARRIZKO AZPISISTEMA

  2. ATALA. EGOERA EPIDEMIKOAK ETA AGERRALDIAK

  3. ATALA. INFORMAZIO MIKROBIOLOGIKOA

  III. KAPITULUA. ZAINTZA EPIDEMIOLOGIKOAREN AZPISISTEMA ESPEZIFIKOAK

  IV. KAPITULUA. ARAUHAUSTEAK ETA ZEHAPENAK

  I. ERANSKINA. ZENBAKIZKO ETA BANAKAKO NAHITAEZ AITORTU BEHARREKO ERITASUNAK Nota de Vigencia

  II. ERANSKINA. PRESAZ DEKLARATU BEHARREKO ERITASUNAK Nota de Vigencia

Atariko

Espainiako Konstituzioaren 43. artikuluak osasuna babesteko eskubidea onartzen du, eta botere publikoei ematen die osasun publikoa prebentzio neurrien bidez eta zerbitzuen bidez antolatu eta zaintzeko ahalmena.

Apirilaren 14ko 3/1986 Lege Organikoak, osasun publikoko neurri bereziei buruzkoak, osasungintzako agintariei zenbait neurri hartzeko ahalmena ematen die osasun arloko larrialdiak edo premiak daudenean.

Bestetik, apirilaren 25eko apirilaren 14/1986 Osasungintzari buruzko Lege Orokorrak ezinbestetzat jotzen du Osasun Sisteman osasunerako arriskuak ahalik eraginkortasun haundienaz galarazteko ikerketa epidemiologikoak egitea, baita osasun plangintza eta ebaluazioa. Horrek guztiak bere oinarrian antolamendu-sistema bat izan behar du izurritei buruzko informaziorako, eta horietarako zaintza eta ekintzarako. Lege honen 40. artikuluko 12. atalak ezartzen duenez, Estatuko Administrazioak burutuko ditu izurritei buruzko zaintza eta ikerketa zerbitzuei buruzko jarduketak.

Osasunari buruzko azaroaren 23ko 10/1990 Foru Legearen 13.b) artikuluak ezartzen duenez hauxe da Foru Komunitateko Osasun Administrazioek garatu beharreko jarduketetako bat: agerraldi epidemikoen aurrean eta eritasun kutsagarri eta ez-kutsagarriak kutsatzeko arrisku-egoeren aurrean izurriteak galaraztea eta eskuhartzea, eta gainera datuak bildu, horiekin bizi-estatistikak eta eritasunen erregistroak egin eta horiek aztertzea.

Lege beraren 23.a) artikuluak ezartzen du, beste aldetik, Foru Komunitateko Osasun Administrazioak informazioa aztertzeko behar diren erregistro eta metodoak ezarriko dituela ondorioz esku hartu beharra dakarten egoerak ezagutzeko.

Osasungintzari buruzko Lege Orokorraren aipatu artikuluak garatzeko asmoz, 2.210 Errege Dekretua onetsi zen, abenduaren 28an hain xuxen. Horren bitartez Izurriteak Galarazteko Sare Nazionala sortu zen. Erregelamendu hori da oinarrizko araua, Konstituzioaren 149.1 artikuluak ezartzen duenez.

Foru Dekretu honek aipatu 2.210/1995 Errege Dekretua garatzen du, eta aldatu egiten du gaur eguneko Eritasunen Nahitaezko Deklarazio sistema. Horretaz aparte zaintza epidemiologikoaren esparrua zabaldu eta Nafarroako Izurriteak Galarazteko Sistema eratzeko oinarriak jartzen ditu, Sare Nazionalari egokituaz.

Urriaren 29ko 5/1992 Lege Organikoak, datu pertsonalen tratamendu informatikoa arautzen duenak, bere 8 eta 11.2.f) artikuluetan baimena ematen die Osasun Erakunde eta Zentroei osasunari buruzko datuen tratamendu informatizaturako, eta bide ematen du osasunari buruzko datuak uzteko, larrialdiei aurre egiteko edo ikerketa epidemiologikoak egiteko beharrezkoak direnean.

Hori horrela, Osasun kontseilariak proposaturik, eta Nafarroako Gobernuak mila bederatziehun eta laurogeita hamazazpiko abenduaren hogeita bian hartutako erabakiarekin bat,

DEKRETATU DUT:

I. KAPITULUA. XEDAPEN OROKORRAK

1. artikulua . Eratzea.

Eratu egiten da Nafarroan, Osasun Departamentuaren menpean, Izurriteak Galarazteko Sistema. Sistema horren barrenean hauek daude:

a) Zaintzarako Azpisistema Oinarrizkoa, honela osatua: nahitaez deklaratu beharreko eritasunen erregistroa, agerraldi eta egoera epidemikoen jakinarazpena eta informazio mikrobiologikoa.

b) Izurriteak Galarazteko Azpisistema Espezifikoak (infekzio erregistroak, gaixotze-tasen erregistroak, seroprebalentziari buruzko inkestak, mediku zelatariak...).

2. artikulua . Xedea.

Nafarroako Izurriteak Galarazteko Sistemak eritasunei aurrea hartzea du xede. Horretarako kontrol neurri indibidual edo kolektiboak hartuko ditu. Hori egin ahal izateko, noski, osasun problemak eta horiek eragiten dituzten faktoreak zein diren ikertuko du, baita gaixotutako jende multzoaren banaketa, joerak eta ezaugarriak ere, informazio epidemiologikoa bilduz, aztertuz eta zabalduz.

3. artikulua . Helburuak.

Nafarroako Izurriteak Galarazteko Sistemak honako helburu hauek ditu:

a) Osasun arazoez jabetzea (epidemia, endemia eta arriskuei loturikoak).

b) Osasun arazoen kontrol indibidual eta kolektiboa.

c) Egoera epidemiologikoa hobeki ezagutzeko behar diren ikerketak proposatu edo egitea.

d) Osasungintzako esku hartzearen eraginkortasuna ebaluatzea.

e) Plangintzari buruzko informazio operatiboa ematea.

4. artikulua . Jarduerak.

Nafarroako Izurriteak Galarazteko Sistemak ondoko jarduerak burutuko ditu:

a) Informazio epidemiologiko sistematiko eta puntuala bildu.

b) Informazio hori aztertu.

c) Informazioa eta gomendioak ematea.

5. artikulua . Ezaugarriak.

Nafarroako Izurriteak Galarazteko Sistemaren ezaugarri nagusiak hauek dira:

a) Metodo, kontzeptu eta jarduerei buruzko homogeneotasuna.

b) Informazio iturri, horretarako epe, eduki eta formatoak egokituak.

c) Informazioa bildu eta zabaltzeko lanaren eraginkortasuna, lan bera bi aldiz egin ez dadin. Informazioaren estaldura unibertsala izanen da, edo laginen bidezkoa, arazoaren ezaugarrien arabera.

d) Egoera epidemiologiko berrietara egokitzeko ahalmena.

e) Sortutako informazioa eta horren ondoriozko gomendioak aldian-aldian ematea.

f) Izurriteak Galarazteko Batzorde Tekniko Aholku-emailearen bidez osasun arloko langileek parte hartzea.

6. artikulua . Segurtasuna eta isilpekotasuna.

1. Foru Dekretu honen garapenaren ondorioz ateratzen den informazio pertsonalaren tratamendua Osasunari buruzko Foru Legearen 5.1 eta 5.3 artikuletan eta Osasungintzari buruzko Lege Orokorraren 8.1 eta 23. artikuluetan ezarritakoari segituz eginen da.

2. Izurriteak Galarazteko Sistemaren maila guztietan, behar diren neurriak hartuko dira lortutako datuen segurtasuna ziurtatzeko. Datu horiek isilpean gorde beharra dute beren eskumenak direla-eta horietara iristen diren guztiek.

3. Foru Dekretu honen ondorioz hartzen diren datu pertsonalen titularrek ondoko bi lege hauetan xedatutakoaren araberako eskubideak dituzte: urriaren 29ko 5/1992 Lege Organikoaren III. Titulua (datu pertsonalen tratamendu informatizatua arautzen duena) eta apirilaren 25eko 1471986 Lege Orokorra (Osasungintzari buruzkoa).

7. artikulua . Egitura funtzionala.

Foru Komunitateko Osasun Sare osoa da Nafarroako Izurriteak Galarazteko Sistemaren osagai, bai sare publikoa bai pribatua, helburua zeinnahi izanik ere.

8. artikulua . Antolamenduaren egitura.

Nafarroako Izurriteak Galarazteko Sistemaren eginkizunak honako osasun unitate eta zentroetan garatuko dira:

1. Osasun Publikoaren Zerbitzuko Zuzendaritza.

2. Izurriteak Galarazi eta Kontrolatzeko Atala.

3. Osasun Eskualde Oinarrizkoak.

4. Ospitaleak.

9. artikulua . Osasun Publikoaren Zuzendaritzaren eginkizunak.

Osasun Publikoaren Zuzendaritzari eginkizun hauek dagozkio:

1. Izurriteak galarazteko jarduerak antolatu, zuzendu eta ebaluatzea, baita horien lehentasunak erabakitzea.

2. Osasun Zuzendaritza Nagusiarekin koordinatzea.

3. Zaintza epidemiologikoaren arloan Estatuko Administrazioak, beste Komunitate Autonomoek eta beste erakunde eta instituzio publiko eta pribatuek dituzten organo eskudunekiko koordinazioa, baita Osasungintza eta Kontsumo Ministerioarekikoa ere.

4. Nafarroako Foru Komunitatearen esparruan osasun publikoaren arloko neurri bereziak har daitezela proposatzea.

5. Arazoak antzematurik, zaintza-programak garatzea eta ikerketa epidemiologiko espezifikoak proposatu edo egitea.

10. artikulua . Osasun Publikoaren Institutuko Izurriteak Galarazi eta Kontrolatzeko Atalaren eginkizunak.

Osasun Publikoaren Institutuko Izurriteak Galarazi eta Kontrolatzeko Atalari eginkizun hauek dagozkio:

1. Izurriteen agerraldi eta arrisku-egoerak antzematea.

2. Ospitaleetako, oinarrizko osasun eskualde oinarrizkoetako eta osasun zentro pribatu zein publikoetako zaintza epidemiologiko jarduerak koordinatu eta integratzea.

3. Eskuhartze epidemiologikoari laguntzea prebentzio eta kontrol neurri indibidual eta kolektiboak hartzeko orduan.

4. Osasun publikoaren arloko neurri bereziak hartzeko lanean parte hartzea.

5. Nafarroako osasun egoera aztertzea, Zaintza Epidemiologikoaren emaitzen arabera, eta bidezko gomendioak ematea.

6. Osasun Publikoaren Zuzendaritzari jakinaraztea beharrezkotzat jotzen dena.

7. Aldian-aldian azterketen emaitzak eta gomendioak zabaltzea Foru Komunitatearen esparruan.

11. artikulua . Osasun Eskualde Oinarrizkoen eginkizunak.

Osasun Eskualde Oinarrizkoei ondoko eginkizunak dagozkie:

1. Oinarrizko eskualdeetako profesionalek burututako zaintza epidemiologikoko jarduerak antolatu, zuzendu eta koordinatzea.

2. Kasuen atentzio indibidualizatua, eta Izurriteak Galarazi eta Kontrolatzeko Atalarekin batera eritasunei aurrea hartu eta kontrolatzeko neurri kolektiboak hartzea.

3. Osasun publikoarentzako arrisku-egoerak eta izurriteen agerraldiak antzematea, lehenbailehen jakinaraztea eta Osasun Publikoaren Institutuko Izurriteak Galarazi eta Kontrolatzeko Atalarekin batera horiek ikertzea.

12. artikulua . Ospitaleen eginkizunak.

Ospitaleei eginkizun hauek dagozkie:

1. Ospitaleetako eta horien menpeko zentro periferikoetako zerbitzuetan zaintza epidemiologikoko jarduerak antolatu eta koordinatzea.

2. Kasu bakoitzaren tratamendua, gaixoarentzako isolamendu eta kontrol neurriak hartuaz.

3. Izurriteen agerraldi eta arrisku-egoerak antzematea, lehenbailehen jakinaraztea eta Izurriteak Galarazi eta Kontrolatzeko Atalarekin batera horiek ikertzea.

II. KAPITULUA. IZURRITEAK GALARAZTEKO OINARRIZKO AZPISISTEMA, EGOERA EPIDEMIKOAK ETA AGERRALDIAK

1. ATALA. IZURRITEAK GALARAZTEKO OINARRIZKO AZPISISTEMA

13. artikulua . Nahitaez deklaratu beharreko eritasunak.

1. Foru Komunitatean Foru Dekretu honetako I. eranskineko zerrendan dauden eritasunak dira nahitaez deklaratu beharreko eritasunak.

2. Nahitaez deklaratu beharra astean agertzen diren kasu berriei buruzkoa da, diagnostikoaren susmoa dagoenean. Deklarazioa medikuek egin behar dute, sektore publikokoek zein pribatukoek.

14. artikulua . Deklarazio motak.

1. Hiru deklarazio mota ezartzen dira:

a) Zenbakizko deklarazioa egin beharreko eritasunak. I. eranskineeko zerrendan azaltzen direnak dira.

b) Gaixoaren izena ere deklaratu beharreko eritasunak. II. eranskineko zerrendan azaltzen direnak dira. Zenbakizko deklarazioaz gain, eritasunaren oinarrizko datu epidemiologikoak jakinarazi behar dira.

c) Lehenbailehen deklaratu beharreko eritasunak. Foru Dekretu honetako III. eranskineko zerrendan azaltzen direnak dira, agerraldi epidemikoak eta arriskuzko egoerak, etiologia edozein dutelarik ere.

2. Izenezko deklarazioak ez du esan nahi zenbakizkoa egin behar ez denik. Lehenbailehen egin beharreko deklarazioak ez du esan nahi egin behar ez denik izenezkoa eta zenbakizkoa.

3. Lehenbailehen egin beharreko deklarazioa honela eginen da: pertsona azalduta, telefonoz edo telefaxez, diagnostikoaren susmoa izan eta 24 orduko epean, Osasun Publikoaren Institutuko Izurriteak Galarazi eta Kontrolatzeko Atalari. Lehenbailehen egin beharreko deklarazioa arratsaldeko 3etatik goizeko 8ak bitartean, asteburuetan edo jai-egunetan suertatzen bada, SOS-Nafarroaren bitartez eginen da (Tel: 112).

15. artikulua . Deklarazioaren erantzukizuna

1. Oinarrizko Osasun Laguntzako taldeetan sarturik ez dauden medikuek eta beren konturako medikuek Osasun Publikoaren Institutuko Izurriteak Galarazi eta Kontrolatzeko Atalari jakinarazi behar dizkiote nahitatez deklaratu beharreko eritasunak. Medikuak berak du deklarazioaren erantzukizuna.

2. Osasun Etxeetan ari diren medikuek zentroko koordinatzaileari jakinarazi behar dizkiote nahitatez deklaratu beharreko eritasunak. Sare publiko zein pribatuko ospitale eta anbulatorioetakoak Medikuntza Prebentiboaren Zerbitzuari, halakorik baldin bada, edo zentroko Zuzendari Medikoari halakorik ezean. Osasun etxeetako koordinatzaileek eta ospitaleetako zuzendari medikoek deklarazioa helarazteko erantzukizuna dute. Deklarazioa Osasun Publikoaren Institutuko Izurriteak Galarazi eta Kontrolatzeko Atalari eginen diote. Oinarrizko eskualdean udalerri bat baino gehiago daudenean, deklarazioa ongi sailkatua eginen da, diagnostikatuaren udalerri eta medikuaren araberako banaketan.

3. Deklarazioa, zenbakien bidezkoa zein izenezkoa, Osasun Publikoaren Institutuak ematen dituen inprimakietan eginen da.

16. artikulua . Deklarazioa egiteko prozedura eta aldizkakotasuna.

1. Nahitaez deklaratu beharreko eritasunak, zenbakiz adierazi beharrak, astero-astero jakinaraziko zaizkio Osasun Publikoaren Institutuko Izurriteak Galarazi eta Kontrolatzeko Atalari, astea bukatutakoan. Astea, ondorio epidemiologikoetarako, igandean hasi eta larunbat gauerdian bukatzen da. Aste horretan diagnostikatutako kasuen berri emanen da.

2. Nahitatez deklaratu beharreko eritasunak diagnostikoaren susmoa izaten den momentuan jakinaraziko dira.

3. Oinarrizko Osasun Laguntzako taldetan sarturik ez dauden medikuek eta beren konturako medikuek astero-astero eginen dute deklarazioa, zenbaki eta izenez hornitua, aste epidemiologikoa bukatu eta beranduenez 3 eguneko epean.

4. Oinarrizko Osasun Laguntzako Zentroen eta Medikuntza Prebentiboko zerbitzuen koordinatzaileek, edo horrelakorik ezean, ospitaleetako zuzendariek, astero-astero, zenbakizko eta izenezko deklarazioa bidaliko dute, aste epidemiologikoa bukatu eta beranduenez 3 eguneko epean.

5. Izurriteak Galarazi eta Kontrolatzeko Atalak informazio automatizatu gehitua aste epidemiologikoa bukatu eta handik 12 eguneko epean bidaliko dio Osasun Publikoaren Zuzendaritzari, honek Epidemiologia Zentro Nazionalera bidali dezan.

2. ATALA. EGOERA EPIDEMIKOAK ETA AGERRALDIAK

17. artikulua . Definizioa.

2.210/1995 Errege Dekretuaren 15. artikuluaren arabera, ondoren aipatzen diren hauek hartzen dira egoera epidemiko edo arriskuzko agerralditzat:

1. Eritasun baten kasuen kopuruak nabarmen gora egitea (esperatzekoa zenaren gainetik). Lurralde batean eta eritasunaren inkubazio edo sorraldiaren goreneko puntutik beherenekora bitarteko denboran kasuak gehitzea ere adierazgarritzat hartzen da.

2. Eritasun, edo osasun arazo edo arrisku bat azaltzea ordurarte horretatik libre zegoen lurralde batean.

3. Jende aunitz jotzen duen intoxikazio akutu edo kronikoa agertarazten duen prozesu bat agertzea, jatorria istripu bat, manipulazioa edo kontsumoa delarik ere.

4. Komunitatearen osasunean eragina izan dezakeen edozein hondamendi moduko edozein gertakari agertzea.

18. artikulua . Agerraldi epidemikoaren deklarazioa

1. Agerraldi epidemikoa nahitaez eta lehenbailehen deklaratu beharrekoa da, eta hura detektatzen duten osasun langileen eta osasun zentro eta zerbitzu publiko eta pribatu guztien erantzukizuna da. Deklarazioa Osasun Publikoaren Institutuko Izurriteak Galarazi eta Kontrolatzeko Atalari eginen zaio.

2. Agerraldi epidemikoa ikastetxe, lantoki, bizi-egoitza edo ostalaritzako leku edo enpresetan edo antzeko tokiren batean sortu edo gertatu bada, zuzendari edo arduradunek horren susmoa izan eta berehala jakinarazi behar diote Osasun Publikoaren Institutuko Izurriteak Galarazi eta Kontrolatzeko Atalari, eta gainera izurritea galarazi, ikertu eta kontrolatzeko lanean laguntzera behartuak daude.

3. Agerraldi epidemikoa nahitaez deklaratu beharreko eritasunen batek sortua baldin bada, agerraldian diagnostikatutako kasuak, gainera, dagokion asteko deklarazioan (zenbakia, izena eta guzti) sartuko dira.

19. artikulua . Ikerketa eta kontrola.

1. Osasun langile tituludun guztiae, beren eskumen bereziak betetzean, parte hartu beharko dute beren lan edo lurralde eremuan eragina duen edozein agerraldi epidemikoren ikerketan eta kontrolean, beti ere Osasun Publikoaren Institutuaren laguntzarekin, horren beharrean baldin badaude.

2. Izurriteak Galarazi eta Kontrolatzeko Atalak agerraldia ikertu eta kontrolatzeko jarduerak zuzendu eta koordinatuko ditu. Bestetik, agerraldi bakoitzari buruzko txosten homogeneo bat egin eta Osasun Publikoaren Zuzendaritzari igorriko dio.

3. ATALA. INFORMAZIO MIKROBIOLOGIKOA

20. artikulua . Definizioa eta helburuak.

2.210/2995 Errege Dekretuaren 22. artikuluan ezarritakoari jarraikiz, informazio mikrobiologikoak laboratorioak konfirmatutako patologia infekziosoari buruzko datuak biltzen ditu, zaintza epidemiologiarako informazio espezifikoa izateko asmoz. Horri esker lortzen baita:

1. Agente etiologikoak eta beren ezaugarri eta aurkezteko moduak ezagutzea.

2. Izurriteen agerraldien ezaugarriak ezagutzea.

3. Agente eta patologia sortu berriak ezagutzea.

4. Zaintzarako elementu berriak gehitzea, hala nola antimikrobianoen kontrako erresistentziak eta adierazle epidemiologikoak.

5. Eskuhartze eta kontrol epidemiologikoa.

21. artikulua . Informazio iturriak.

1. Informazio iturriak diagnostiko mikrobiologikorako laboratorioak dira, osasun publikokoak zein pribatuak hala nola erreferentzia laboratorioak.

2. Osasun Departamentuko Zuzendaritza Nagusiak erabakiko du zein laboratorio sartuko diren informazio mikrobiologikorako azpisistemara Nafarroako Foru Komunitatean.

3. Erreferentzia loboratorio bat izendatzeak berekin dakar berehala azpisistemara biltzea.

22. artikulua . Deklarazioaren erantzukizuna

1. Nafarroako Izurriteak Galarazteko Sisteman laboratorio bat sartzeak jakinarazi beharra dakarkio berari.

2. Deklarazioaren erantzukina laboratorioko buru nagusiari dagokio.

23. artikulua . Deklarazioaren prozedura eta aldianaldikotasuna

1. Infekzio berriaren irizpideak betetzen dituzten kasuak jakinaraziko dira. Kasuari, denborari dagokionean, diagnostikoa egindako eguna jarriko zaio. Jakinarazpena gutxieneko datuen kopuru baten bidez eginen da, Osasun Zuzendaritza Nagusiak erabakirik horiek, bi aldiz egin dadin galarazteko.

2. Deklarazio-epe unitate oinarrizkoa aste epidemiologikoa da eta larunbat gauerdian bukatzen da.

3. Informazioa Izurriteak Galarazi eta Kontrolatzeko Atalari igorriko dio, aste epidemiologikoa bukatu eta beranduenez 3 eguneko epean.

III. KAPITULUA. ZAINTZA EPIDEMIOLOGIKOAREN AZPISISTEMA ESPEZIFIKOAK

24. artikulua . Azpisistema espezifikoen sorrera

Bere ahalmenen esparruan eta indarra duen legeriarekin bat, Nafarroako Foru Komunitateak, Osasun kontseilariaren bidez, zaintza epidemiologirako azpisistema espezifikoak sor ditzake bitarteko hauek erabiliz: kasuen erregistroak, seroprebalentziari buruzko inkestak, sendagile zelatariak, eta beharrezko ikusten direnak arazo espezifikoak direla-eta edo eritasuna kontrolatzeko osasun jarduketen osagarri.

25. artikulua . Giza Inmunoeskasiaren Birusaren infekzioen erregistroa

1. GIBen infekzioen erregistroan Nafarroako Foru Komunitateko zentro eta osasun zerbitzuetako laboratorioek serologiaren bidez konfirmatzen dituzten infekzio kasu berriak jasoko dira.

2. Hiru hilabetetik behin, laboratorio horiek epe horretan konfirmatutako infekzio kasu berrien jakinarazpena bidaliko dute. Horrekin batera Foru Komunitateko Osasun Zuzendaritza Nagusiak Osasun Publikoaren Institutuaren Izurriteak Galarazi eta Kontrolatzeko Atalari esaten dizkion datuak ere eman behar dituzte laboratorioek.

3. Jakinarazteko erantzukizuna laboratorioko buruarena izanen da.

26. artikulua . HIESaren zaintza epidemiologikoa.

1. Foru Komunitateko HIESaren kasuen erregistroak Giza Inmunoeskasiaren birusaren infekzio kasuei buruzko informazioa bilduko du (Osasun eta Kontsumo Ministerioak Izurriten Zaintzararen arloan kasuari emandako definizioa betetzen duten kasuena hain zuzen).

2. Kasuen informazio iturria gaixoaren diagnostikoa egiten duten sendagileak izanen dira, sektore pribatukoak nahiz publikokoak. Deklarazioaren erantzukizuna Ospitaleko zuzendari nagusiarena izanen da.

3. Deklarazioa, nahitaez egin beharrekoa, Izurriteak galarazi eta kontrolatzeko Atalari eginen zaio, HIESaren Erregistro Nazionalaren prozedurei segituz.

IV. KAPITULUA. ARAU-HAUSTEAK ETA ZEHAPENAK

27. artikulua .Zehapen erregimena

Foru Dekretu honetan aurreikusitakoa ez betetzeak arau-hauste administratiboa dakar berekin, 10/1990 Foru Legearen I. Tituluko VII. kapituluan eta 14/1986 Osasungintzari buruzko Lege Orokorraren I. Tituluko VI. kapituluan xedatutakoari jarraikiz zehatuko dena.

Xedapen Iragankorra

Nahitaez deklaratu beharreko eritasunetarako gaur eguneko inprimakiak erabiltzen segituko dira Osasun Departamentuko Zuzendaritza Nagusiak inprimaki berriak onartzen dituen arte.

Xedapen Gehigarria

Laboratorio berriak 1998ko uztailaren lehena baino lehenago sartuko dira Nafarroako Izurriteak Galarazteko Sistemara.

Xedapen Indargabetzailea

Indarrik gabe gelditzen dira Foru Dekretu honetan xedatutakoari kontra egiten dioten lerrun bereko edo goragoko xedapen guztiak.

Azken Xedapenak Lehenbizikoa

Ahalmena ematen zaio Osasun kontseilariari Foru Dekretu honetan aurreikusitakoa garatu eta aurrera eramateko arauak agindu eta neurriak har ditzan.

Azken Xedapenak Bigarrena

Ahalmena ematen zaio Osasun kontseilariari eranskinetan azaltzen diren eritasunen zerrendak Foru Agindu bidez aldatzeko, gerta daitekeen aldaketa epidemiologiei egokitzeko.

Azken Xedapenak Hirugarrena

Foru Dekretu honek Nafarroako ALDIZKARI OFIZIALean argitaratu eta biharamunean hartuko du indarra.

Iruñean, mila bederatziehun eta laurogeita hamazazpiko abenduaren hogeita bian.-Nafarroako Gobernuko lehendakaria, Miguel Sanz Sesma.-Osasun kontseilaria, Santiago Cervera Soto.

I. ERANSKINA. ZENBAKIZKO ETA BANAKAKO NAHITAEZ AITORTU BEHARREKO ERITASUNAK Nota de Vigencia

I. ERANSKINA

BOTULISMOA (edozein formetan)

EDOZEIN ETIOLOGIATAKO AGERRALDI EPIDEMIKOAK

BRUZELOSIA

LUPUA

KOLERA

DIFTERIA

BAZILO-DISENTERIA (SHIGELOSIA)

ERITASUN MENINGOKOZIKOA

ERITASUN NEUMOKOZIKO INBASIBOA

B MOTAKO HAEMOPHILUS INFLUENZAE-K SORTUTAKO ERITASUN INBASIBOA

SUKAR HORIA

SUKAR BIRIKO HEMORRAGIKOAK

Q SUKARRA

SUKAR TIFOIDEA ETA PARATIFOIDEA

GRIPEA

H5N1 GRIPEA

HIDATIDOSIA

A HEPATITISA

B HEPATITISA

C HEPATITISA

BESTE HEPATITIS BIRIKOAK

ZOSTER HERPESA

INFEKZIO GONOKOZIKOA

LEGIONELOSIA

LEISHMANIASIA

LEGENARRA

LEPTOSPIROSIA

LISTERIOSIA

PALUDISMOA

PAROTIDITISA

IZURRIA

POLIOMIELITISA

ERRABIA

ERRUBEOLA*

ELGORRIA

ARNAS APARATUKO SINDROME LARRIA

SIFILIA*

TETANOS**

EXANTEMA-TIFUSA

KUKUTXEZTULA

TOXINFEKZIOA JANARIENGATIK

TRIKINOSIA

TUBERKULOSIA

TULAREMIA

BARIZELA

(*) Sortzetiko forma barne hartuta.

(**) Jaioberriko forma barne hartuta.

II. ERANSKINA. PRESAZ DEKLARATU BEHARREKO ERITASUNAK Nota de Vigencia

II. ERANSKINA

BOTULISMOA (edozein formetan)

EDOZEIN ETIOLOGIATAKO AGERRALDI EPIDEMIKOAK

KOLERA

DIFTERIA

B MOTAKO HAEMOPHILUS INFLUENZAE-K SORTUTAKO ERITASUN INBASIBOA

ERITASUN MENINGOKOZIKOA

SUKAR HORIA

SUKAR BIRIKO HEMORRAGIKOAK

H5N1 GRIPEA

LEGIONELOSIA

IZURRIA

POLIOMIELITISA

ERRABIA

ERRUBEOLA*

ELGORRIA

ARNAS APARATUKO SINDROME LARRIA

EXANTEMA-TIFUSA

TOXINFEKZIOA JANARIENGATIK

TRIKINOSIA

TULAREMIA

(*) Sortzetiko forma barne hartuta.

Gobierno de Navarra

Contacte con nosotros | Accesibilidad | Aviso legal | Mapa web