LEXNAVARRA
298/1998 FORU DEKRETUA, URRIAREN 13KOA, NAFARROAKO FORU KOMUNITATEAN UNIBERTSITATE IKASTETXEAK SORTU EDO AITORTZEKO, ETA GOI-IKASKETAK BAIMENTZEKO PROZEDURA FINKATZEN DUENA 
BON N.º 134 - 09/11/1998
I. KAPITULUA. UNIBERTSITATEAK NOLA SORTU ETA NOLA HAIEI AITORMENA EMAN
II. KAPITULUA. IKASTETXEAK SORTU, AITORTU ETA DESEGITEA, ETA ESPAINIA GUZTIAN BALIOZKO DIREN IKASKETA OFIZIALAK BAIMENDU ETA DESEGITEA
III. KAPITULUA. IKASTETXEEN ATXIKIPENA
- 10. artikulua
- 11. artikulua
- 12. artikulua
- 13. artikulua
- 14. artikulua
- 15. artikulua
- 16. artikulua
- 17. artikulua
- 18. artikulua
- 19. artikulua
- 20. artikulua
IV. KAPITULUA. ATZERRIKO IKASTETXEAK NAFARROAN EZARTZEA ETA HAIEN IKASKETAK EMATEKO BAIMENA
1. ATALA. ESPAINIAKO TITULU OFIZALEKIN HOMOLOGAGARRIAK DIREN UNIBERTSITATE IKASKETAK EMATEN DITUZTEN ATZERRIKO IKASTETXEAK
2. ATALA. ESPAINIAKO TITULU OFIZIALEKIN HOMOLOGAGARRIAK EZ DIREN UNIBERTSITATE IKASKETAK EMATEN DITUZTEN ATZERRIKO IKASTETXEAK
- 28. artikulua
- 29. artikulua
- 30. artikulua
- 31. artikulua
- 32. artikulua
- 33. artikulua
- 34. artikulua
- 35. artikulua
- 36. artikulua
- 37. artikulua
- 38. artikulua
XEDAPEN GEHIGARRIAK
AZKEN XEDAPENAK
Apirilaren 12ko Errege Dekretuak oinarrizko baldintzak arautu zituen Unibertsitateak edo Unibertsitate Ikastetxeak sortzeko, ikastetxe publiko nahiz pribatuak Unibertsitate publikoei atxikitzea onesteko, haien ikasketak zabaltzeko, ikastetxe edo ikasketa horiek abian jartzea baimentzeko eta gutxieneko marko juridiko bat ezartzeko Espainian ezarri eta unibertsitate mailako ikasketak atzerrietan erabiltzen diren sistemen arabera eman nahi dituzten ikastetxe atzerritarrei aitormena emateko, haien tituluak Espainiako titulu ofizialekin homologagarriak izan ala ez. Oinarrizko baldintza hauen izaera bera dela medio, kasuko Hezkuntza Administrazioak xeheroagoko tratamendua behar die.
Halatan, MEC-ek apirilaren 12ko 557/1991 Errege Dekretua garatu zuen, hartarako 1993ko maiatzaren 26ko Agindua emanaz, estatuaren administrazio orokorraren menpeko Unibertsitate publikoei ei ikastetxeak nola atxiki eta haren beraren menpeko ikastetxe atzerritarrak nola baimendu arautzen zuena.
Abuztuaren 25eko Unibertsitatearen Erreformari buruzko 11/1983 Legeak, Komunitate Autonomoen eskumentzat jotzen du ikasketak baimentzea eta Unibertsitate Ikastetxeak sortu eta desegitea, kasuko unibertsitatearen Gizarte Kontseiluak hala proposatuta eta aurrez Unibertsitateen Kontseiluak txostena eman duelarik.
Nafarroako Foru Eraentza Berrezarri eta Hobeagotzeari buruzko abuztuaren 10eko 13/1982 Lege Organikoaren 17. artikuluak xedatzen duenarekin bat, Nafarroak eskumen osoa du Irakaskuntzaren hedadura, maila, gradu, modalitate eta espezialitate guztietan arautu eta administratzeko.
Horrenbestez, xedapen honek osatu egiten du aipatu 557/1991 Errege Dekretua, eta berariazko tresna ematen dio Nafarroari Nafarroako Foru Komunitateko Goi-irakaskuntzaren plangintza egiteko eta gai horien gaineko eskumenei eusteko asmozko artezpide propioak arautzeko.
Hori horrela delarik, Hezkuntza eta Kultura kontseilariak hala proposatuta eta Nafarroako Gobernuak mila bederatziehun eta laurogeita hemezortziko urriaren hamahiruan hartutako Erabakiarekin bat,
AGINDU DUT:
I. KAPITULUA. UNIBERTSITATEAK NOLA SORTU ETA NOLA HAIEI AITORMENA EMAN
Nafarroan unibertsitate publikoak sortzeko, Nafarroako Foru Parlamentuak lege bat eman beharko du, abuztuaren 25eko 11/1983 Lege Organikoaren 5.1. a) artikuluak agintzen duenarekin bat.
Nafarroan unibertsitate pribatuei aitormena emateko, Nafarroako Foru Parlamentuak lege bat eman beharko du abuztuaren 25eko 11/1983 Lege Organikoaren 58.1. a) artikuluak agintzen duenarekin bat.
Unibertsitateak sortu edo aitormena emateko prozedura honela izanen da:
1. Unibertsitate publiko bat sortu edo unibertsitate pribatuei aitormena emateko espedienteek zeharo bete beharko dituzte apirilaren 12ko 557/1991 Errege Dekretuko II. kapituluaren 1.tik 5.era bitarteko ataletan berariaz aipatzen diren baldintza guztiak, eta hala justifikatu eta dokumentatu beharko dute berariazko txosten batean.
2. Unibertsitateak sortu edo aitormena emateko espedientea, kasuan kasu, erakunde bultzatzaileak aurkeztu behar du Nafarroako Gobernuan, Hezkuntza eta Kultura Departamentuaren bidez, ondoren Unibertsitateen Kontseiluan tramitatzeko.
Espediente horrek apirilaren 12ko 557/1991 E.D.ko 13.2. artikuluak aipatzen duen dokumentazioa bildu beharko du.
3. Unibertsitateak abian jartzeko Errege Dekretu horrexen 14 eta 15. artikuluetan finkatzen denari kasu eginen zaio.
II. KAPITULUA. IKASTETXEAK SORTU, AITORTU ETA DESEGITEA, ETA ESPAINIA GUZTIAN BALIOZKO DIREN IKASKETA OFIZIALAK BAIMENDU ETA DESEGITEA
Fakultateak, Goi Mailako Eskola Teknikoak, Unibertsitate Eskolak eta Unibertsitate Institutuak eta antzeko beste zentro batzuk foru dekretu bidez sortu, aitortu eta kenduko dira, Gizarte Kontseiluak edo, pribatuen kasuan, unibertsitateak berak proposatuta eta Unibertsitate Kontseiluak txostena egin ondoren.
Sortzeko edo aitortzeko espedientea Nafarroako Gobernuan aurkeztu beharko da, unibertsitateen gaietan eskumena duen departamentuaren bidez, eta apirilaren 12ko 557/1991 Errege Dekretuaren II. kapituluko 6. atalean ezarritako baldintzak bete beharko dituzte. Unibertsitateen gaietan eskumena duen departamentuak txosten bat eginen du, espedientea baldintza horietara egokitzen den baloratzeko.
Espedienteek honako dokumentu eta justifikazioak izan beharko dituzte:
1. Unibertsitate Publikoko Gizarte Kontseiluaren proposamena edo unibertsitate pribatuaren beraren proposamena.
2. Txosten bat, proposatzen den ikastetxe edo titulazio bakoitzerako honakoak jasotzen dituena:
a) Datu demografikoak: populazio datuak. Hazkunde aurreikuspenak. Unibertsitate ikasketa horien benetako eskaera. Zenbateko matrikula aurreikusten den eta unibertsitate berean kideko beste ikasketarik dagoen.
b) Eremu hartako azpiegiturak: Ikastetxea non dagoen. Ikastetxearekin lotura duten garapen guneak. Ikastetxea sortzeak ekarriko dituen onurak (ikastetxeko titulazio zehatzaren eskaera benetakoa, titulazio horretako langabezi tasak). Hurbileko unibertsitateetan halako ikasketarik ematen den.
c) Unibertsitateak zer giza eta material baliabide dituen sortu beharreko ikastetxearen edo baimendu beharreko titulazioaren esku jartzeko.
c).1. Azpiegitura materiala.
- Orain dagoena.
- Sortzekoa, eraikinak, altzariak, bibliotekak.
c).2. Bide azpiegitura: errepideak, garraiabideak, ikastetxeen arteko distantzia.
c).3. Finantzazio bideak.
c).4. Unibertsitateak zer departamentu egitura duen ikastetxearen esku jartzeko eta ea departamentu berririk sortu beharko den.
c).5. Irakasleak.
c).6. Administrazio et zerbitzuetako langileak.
d) Material gaitasuna:
d).1. Osotara zer azalera dagoen eta horretatik zenbat den eraikinduna.
d).2. Gelak, laboratorioak, bibliotekak.
d).3. Josteta eremuak.
d).4. Ekipamendua.
3. 557/1991 Errege Dekretutik zein kalitate-indize betetzen diren.
4. Zer titulazio eta ikasketa plan eman asmo diren ikastetxean, homologazioa baimentzen bada.
Ikastetxeak abian jartzeko 557/1991 Errege Dekretuko 15. artikuluak agintzen duenari kasu egingo zaio.
Hezkuntza eta Kultura Departamentuaren txostenak gutxienekoan honako gaien memoria justifikatzailea eduki beharko du:
1. Zer ondorio izanen diren Nafarroako goi hezkuntzaren gainean.
2. Zer giza baliabide dauden edo hartarako zeintzuk berrantola litezkeen.
3. Kasuko kostuak zenbatekoak izanen diren.
Ikastetxeak edo ikastetxe horietan ematen diren ikasketak kentzeko espedienteek bi baldintzok bete beharko dituzte:
1. Organo eskudunak ikastetxe edo titulazio hori kentzeko hartu duen erabakia.
2. Ikastetxea martxan edukitzeko konpromisoa edo, titulazioak kendu nahi direnean, titulazio horiek ematen segitzeko konpromisoa harik eta ikastetxean edo ikasketa horretan hasi eta aprobetxamendu akademiko normala duten ikasle guztiek bukatu arte.
III. KAPITULUA. IKASTETXEEN ATXIKIPENA
Ikastetxe edo unibertsitate institutu publiko nahi pribatuak Nafarroako Foru Komunitatearen agintepeko unibertsitate publiko bati atxikitzeko, Foru Dekretu bat eman beharko da kasuko Gizarte Kontseiluak hala eskatuta eta aurrez Unibertsitateen Kontseiluak eta Hezkuntza eta Kultura Departamentuak derrigorrezko txosten bana emanik.
Atxikitze horretarako, beti ere beharrezkoa izango da, aurrez, kasuko unibertsitatearekin hitzarmen bat sinaturik egotea, kasuko unibertsitate estatutuetan eta Foru Dekretu honetan agintzen denarekin bat.
Ikastetxe edo Institutu horiek Unibertsitatearen Erreformari buruzko abuztuaren 25eko 11/1983 Legearen 6. artikuluak aipatzen dituen arauak izanen dituzte gobernabide, eta bai unibertsitate publikoak eta ikastetxearen titularra den erakundeak sinatzen duten hitzarmena eta ikastetxearen beraren antolamendu eta funtzionamendu arauak ere.
Ikastetxe bat Nafarroako Foru Komunitatearen agintepeko unibertsitate publiko bati atxikitzeko espedienteak honako dokumentazioa eduki beharko du:
1. Kasuko unibertsitatearen Gizarte Kontseiluak delako ikastetxea atxikitzea onesteko hartu duen erabakiaren egiaztagiria.
2. Atxikipen hitzarmena, zeinean kontuan hartuko baitira ekainaren 14ko 1005/1991 Errege Dekretuaren aurreikuspenak, unibertsitatera sartzeari buruz indarrean diren legeek eskatzen dituzten baldintzak betetzen dituzten ikasleak onartzeko prozedurari dagokionez. Atzerriko ikastetxeek, berriz, kasuko ikastetxeak nagusi duen atzerriko unibertsitatearen arauak izanen dituzte gobernabide.
3. Datuok jasotzen dituen memoria bat:
a) Zer ikasketa emanen diren, 557/1991 Errege Dekretuko 5. artikuluak agintzen duenarekin bat, eta zer ezartze egutegi dagoen.
b) Kapazitatea: Ikasturte bakoitzeko postuak, titulazio osokoak osatu arte.
c) Datu demografikoak eta proposatzen diren ikasketen eskaera- eta matrikula-hazkundearen aurreikuspenak.
d) Azpiegitura materiala: Eraikinak eta espazioak deskribitzen dituzten plano eta txostenak, eta behar diren altzariak eta ekipamendu teknikoa.
e) Irakasleak eta administrazio eta zerbitzuetako langileak.
f) Departamentu egitura.
g) Finantzazio bideak.
h) 557/1991 Errege Dekretutik zer kalitate indize betetzen diren.
i) Zein titulazio eta ikasketa plan eman asmo diren.
j) Zer ikerketa lan egin asmo diren.
k) Atxikitako ikastetxea martxan edukitzeko konpromisoa atxikipen hitzarmenak irauten duen guztian, eta beti ere ikasle guztiek ikasketak bukatu ahal izateko bezain luze.
Ikastetxeak atxikitzeko espedienteak Nafarroako Gobernuaren Hezkuntza eta Kultura Departamentuan aurkeztu behar ditu ikastetxe interesatuaren titularrak kasuko unibertsitatearen Gizarte Kontseiluaren bidez, lege den bezala hauteman dadin ea ikastetxea apirilaren 12ko 557/1991 Errege Dekretuaren 6. artikulutik 9.era bitartean eskatzen denaren araberakoa den eta bertan xedatu gainerako baldintzak betetzen dituen.
Hala tokatzen bada, Departamentu horrek aditzera emanen dio unibertsitateari ikastetxearen titularrak informazioa edo dokumentazioa osatu behar duela, edo espedientean aldaketak egin, Administrazio Araubide Juridikoari eta Guztientzako Administrazio Prozedurari buruzko azaroaren 26ko 30/1992 Legearen 71. artikuluak xedatzen duenarekin bat (hemendik aurrera (AAJ eta GAPL).
Espedientea osatu eta esandako moldaketak egin zaizkiolarik, Unibertsitateen Kontseilura bidaliko da, hark behar den txostena egin dezan delako atxikipenari buruz eta ikastetxean eman asmo diren ikasketei buruz.
Unibertsitateen Kontseiluak txosten hori eman duelarik, Hezkuntza eta Kultura Departamentuak Nafarroako Gobernuari bidaliko dio ikastetxea kasuko unibertsitate publikoari atxikitzea eta ikastetxe horretan eman asmo diren ikasketen titulu ofiziala homologatzea onesteko Foru Dekretu proiektua. Bertan atxikipen espedientean hartu diren konpromisoak zein epetan bete beharko diren ere seinalatuko da.
Atxikipena onesteko epea ez da sei hilabete baino gehiagokoa izanen Hezkuntza eta Kultura Departamentuan kasuko unibertsitatearen Gizarte Kontseiluak egindako proposamena aurkeztu zenetik. Epe hori joan delarik, proposamena ukatutzat joko da.
Atxikipena onetsi delarik, atxikitako ikastetxearen titularra, aurreko aginduek aipatzen dituzten konpromiso eta betekizunak kunplitu ondoren, Hezkuntza eta Kultura Departamentuari eskatuko dio, kasuko unibertsitatearen bidez, lege den bezala onetsi dezala ikastetxearen abiatzea.
Unibertsitateak Nafarroako Gobernuak atxikipenerako Foru Dekretuan seinalatzen duen epean aurkeztu beharko du eskaera hori. Bestela atxikipen baimena iraungi eginen da.
Ikastetxearen titularrari agindu zaiolarik, hala tokatzen bada, behar diren moldaketak egiteko AAJ eta GAPL delakoaren 71. artikuluak agintzen duenaren arabera, eta Hezkuntza eta Kultura Departamentuak konprobatu duelarik baldintza eta betekizunak bete direla, Administrazioaren baimen espresua beharko da ikastetxea benetan martxan jartzeko; hartarako Hezkuntza eta Kultura kontseilariak Foru Agindua emanen du. Bestela, baimena ukatuko da, eta hartara, behin ukapen hori irmoa denean, iraungi eginen da atxikipen baimena.
Ikastetxea martxan jartzea baimentzeko epea ez da sei hilabete baino gehiagokoa izanen titularrak egindako eskaera aurkeztu zuenetik. Epe hori iragan delarik, ikastetxea martxan jartzea baimentzeko eskaera ukatutzat hartuko da.
Atxikitako ikastetxearen funtzionamendua gainbegiratzea unibertsitateari dagokio, Nafarroako Gobernuaren Hezkuntza eta Kultura Departamentuaren ikuskatze ahalmenak ezertan galarazi gabe. Hartarako, ikastetxeak instalazioetara sartzea erreztu eta eskatzen zaion dokumentazioa eman eginen du. Betekizunen batean hutsegiten badu, unibertsitateak eskatu egingo dio ikastetxeari finkatzen den epean zuzentzeko egoera hori. Epe hori iragan eta eskaerari kasu egin ez bazaio, kasuko unibertsitatearen Gizarte Kontseiluak hala emanen dio aditzera Hezkuntza eta Kultura Departamentuari, eta honek, aurrez titularrari eta Unibertsitateen Kontseiluari entzute emanik, Nafarroako Gobernuari helaraziko dio kasuko ikasketak atxikitzeko eta tituluak homologatzeko baimena atzera botatzeko Foru Dekretu proiektua.
Atxikitako ikastetxe batek bere oldez bere jarduna gelditzeko, Nafarroako Gobernuaren Hezkuntza eta Kultura Departamentuaren baimena beharko da, aurrez kasuko unibertsitatearen Gizarte Kontseiluak hala proposatuta; baimen hori eman eginen da, baldin ikastetxeak arian iraun beharreko denboraz hartutako konpromisoa betetzen bada.
IV. KAPITULUA. ATZERRIKO IKASTETXEAK NAFARROAN EZARTZEA ETA HAIEN IKASKETAK EMATEKO BAIMENA
1. Nafarroan atzerriko ikastetxe bat zabaldu eta atzerrietan erabiltzen diren sistemen arabera titulu akademikoak eskuratzeko balio duten goi mailako ikasketak ematen aritzeko, titulu horiek Espainiako titulu ofizialekin homologatuta egon ala ez, Nafarroako Foru Komunitateko Administrazioaren baimena beharko da aurrez.
2. Atzerriko ikastetxe bat Nafarroako Hezkuntza Administrazioaren baimena izan gabe Nafarroan ezarri edo irakaslanean aritzea atzerrietan erabiltzen den sistema baten arabera, ez da zilegi izango akademia gisako ikastetxeak ez badira, LOGSEren 6. Xedapen Gehigarrian aurreikusi horietakoak.
3. Nafarroako Gobernuak ematen dituen baimenak behin-behinekoak izan daitezke, harik eta behin-behineko baimen horrexetan finkatzen diren baldintza eta bermeak kunplitu arte.
1. ATALA. ESPAINIAKO TITULU OFIZALEKIN HOMOLOGAGARRIAK DIREN UNIBERTSITATE IKASKETAK EMATEN DITUZTEN ATZERRIKO IKASTETXEAK
Nafarroako Foru Komunitatean atzerriko ikastetxeak ezarri eta unibertsitate mailako ikasketak, Espainiakoekin homologagarriak, atzerrietan erabiltzen diren sistemen arabera emateko baimena eskuratzeko, Foru Dekretu bat beharko da, aurrez Hezkuntza eta Kultura Ministerioak, Kanpo Aferetarako Ministerioak eta Unibertsitateen Kontseiluak derrigorrezko txosten bana emanik.
Baimen hori emateko baldintza izanen da apirilaren 12ko 557/1991 Errege Dekretuko 18. artikuluak eta Foru Dekretu honetako arauek aipatzen dituzten betekizunak betetzea.
Erakunde bultzatzaileak edo atxiki nahi zaion unibertsitatearen Gizarte Kontseiluak eginen du baimen eskaera Hezkuntza eta Kultura Departamentuan.
Baimentze espedienteak ikastetxeak atxiktzeko behar den dokumentazio bera eduki beharko du, eta horrez gain:
- Atzerri horrek Espainian duen Ordezkaritza kreditatuak emandako egiaztagiria, 557/1991 Errege Dekretuaren 18.1.b/ artikulukoak aipatzen dituena.
- Kanpo Aferetarako Ministerioaren Txostena, adierazteko bide dela kasuan kasu ikastetxea edo ikasketak atxiki edo aitortzea, Espainiak sinatutako itun edo hitzarmen nazioartekoak badaudelako, edo ez dagoelarik, erreziprozitate printzipioan oin harturik.
- MEC-en txostena (557/1991 Errege Dekretuaren 18.2. artikulua).
Unibertsitateen Kontseiluak derrigorrezko txostena eman duelarik, Hezkuntza eta Kultura Departamentuak Nafarroako Gobernuari helaraziko dio unibertsitate publiko bati atxikitzeko eta atzerriko ikastetxe bat kasuko ikasketak emateko ezartzeko baimena emateko tokatzen den onespen proiektua. Ikastetxeak, baimena ematen dion Foru Dekretuak seinalatzen duen epean bete beharko ditu hartutako konpromisoak.
Baimena emateko epea ez da sei hilabete baino gehiago izanen erakunde bultzatzaileak edo unibertsitatearen Gizarte Kontseiluak proposamena Hezkuntza eta Kultura Departamentuan aurkeztu duenetik kontatuta.
Ikasketak bukatu direlarik, ikastetxeak, interesatuek hala eskatuta, proposatu eginen dio Hezkuntza eta Kultura Ministerioari kasuko titulua homologatzeko tokatzen den frogagiria luza dezala.
Ikastetxe hauek kontrolatzeko eta emandako baimena baliogabetzeko edo bere oldez gelditzeko bere jardunetik, lehenago ikastetxe atxikientzat araututa zegoenari eginen zaio men.
2. ATALA. ESPAINIAKO TITULU OFIZIALEKIN HOMOLOGAGARRIAK EZ DIREN UNIBERTSITATE IKASKETAK EMATEN DITUZTEN ATZERRIKO IKASTETXEAK
Nafarroako Gobernuaren Hezkuntza eta Kultura kontseilariaren Foru Agindu bat beharko da Nafarroako Foru Komunitatean atzerriko ikastetxe bat zabaldu, jardun eta unibertsitate mailako ikasketak eman ditzan atzerrietan erabiltzen diren sistemen arabera, zein ere modalitatetakoak diren, Espainiakoekin homologagarriak ez diren tituluak ematen badituzte.
Ikastetxe horiek apirilaren 12ko 557/1991 Errege Dekretuaren 19. artikuluak agintzen duena eta Foru Dekretu honetako arauak izanen dituzte gobernabide.
Erakunde bultzatzaileak egin beharko du Hezkuntza eta Kultura Departamentuan baimen eskaera, horrekin batera honako dokumentazioa aurkeztuz:
1. Honako jakingaiak dituen eskabidea:
a) Ikastetxea bultzatzen duen pertsona fisiko nahiz juridikoa identifikatzeko datuak.
b) Ikastetxearen izen berariazkoa.
c) Ikastetxea zein udalerri, jendegune eta helbidetan ezarriko den.
d) Zein ikasketa emanen dituen.
2. Bere herrian kreditatutako atzerriko unibertsitatearen eta Nafarroan aitortutako instituzio edo fundazioaren arteko hitzarmena.
3. Bultzatzaileak (atzerriko unibertsitatea eta Nafarroako erakundea) nor diren frogatzeko agiriak.
4. Honakoak dokumentatu eta frogatzen dituen memoria:
a) Zein ikasketa emanen diren eta zenbat ikasle postu izanen diren: adierazi beharko da zein ikasturtetan hasi asmo duten eta ikasketa ezarriz joateko egutegi osoa.
b) Ikasleen onarpenerako behar diren nazionalitatea eta betekizunak.
c) Ikasketa horiek ezartzea justifikatzen duten arrazoi akademiko, profesional eta eskaerakoak.
d) Ikasturte bakoitzerako langile eta irakasleak.
e) Administrazio eta zerbitzuetako langileak.
f) Instalazioak deskribatzen dituzten planoak eta memoriak, eta haien titulartasun juridikoa.
g) Ikasketa planak, irakasgaiak, antolamendu eta funtzionamendu arauak.
h) Ikastetxea arian edukitzeko konpromisoa, gutxienekoan harik eta hasitako ikasle guztiek ikasketak burutu ahal izan arte.
i) Ikasketa horretako ikasturteen sarrera-gastuen aurrekontuak, kapitulu ekonomikoen eta finantzazio bideen arabera.
5. 557/1991 Errege Dekretutik zenbat kalitate indize betetzen diren.
6. Ikasketok gobernatzen dituen hezkuntza sistema duen atzerriak Espainian duen ordezkaritza kreditatuak emandako egiaztagiria, 557/1991 Errege Dekretuak 18.1.b) artikulukoak aipatzen dituena.
Espedienteak, esandako dokumentazioaz gain honakoak eduki beharko ditu:
MECen eta Kanpo Aferetarako Ministerioaren Txostena, adierazteko bide dela ezarpena edo atxikipena egitea, Espainiak sinatutako itun edo hitzarmen nazioartekoak badaudelako, edo ez dagoelarik, erreziprozitate printzipioan oin harturik.
Behin espedienteak ikertu duelarik eta akatsik aurkitzen bada AAJ eta GAPLren 71. artikuluak agintzen duenaren arabera zuzendu direlarik, Hezkuntza eta Kultura Departamentuak baimena emanen du ikastetxea ezartzeko, eta bai finkatuko ere zein epetan bete beharko diren titularrak baimen-emate espedientean hartutako konpromisoak eta zein baldintza funtsezko izanen diren ikastetxea zabaldu eta jarduteko.
Kasuko baimena emateko epea ez da sei hilabete baino gehiago izanen eskaera Hezkuntza eta Kultura Departamentuan aurkeztu zenetik kontatuta. Epe hori iragan delarik, eskaera ukatutzat hartuko da.
Ikastetxearen titularrak, aurreko xedapenek aipatu konpromiso eta betekizunak bete dituelarik, ikastetxea baimentzeko aginduak finkatu duen epean eskatuko dio Hezkuntza eta Kultura Departamentuari ikastetxea abian jartzeko baimena.
Bestela, iraungi eginen da ezartze baimena.
Ikastetxea abian jartzea baimentzeko epea ez da izanen sei hilabete baino gehiagokoa titularrak eskaera egin zuenetik. Epe hori eten eginen da titularrari eskatzen bazaio, AAJ eta GAPLen 71. artikuluaren arabera, hartutako konpromisoak betetzeko behar diren aldaketak egin ditzala. Behar diren moldaketak egin ezean, ukatu eginen zaio baimena eta, behin uko hori bide administratiboan irmoa denean, ikastetxea ezartzeko baimena iraungi eginen da.
Ikastetxea zabaltzeko eta abian jartzeko baimena eman delarik, titularrak ez du zilegi izanen baimenaren baldintzak aldatzea Nafarroako Gobernuaren Hezkuntza eta Kultura Departamentuaren ezinbesteko baimena gabe.
Atzerriko ikastetxe baimenduaren funtzionamendua gainbegiratzea Hezkuntza eta Kultura Departamentuari dagokio, eta hartarako zilegi izanen du egoki iruditzen zaizkion txosten guztiak eskatzea, bai eta atzerri horrek Espanian duen Ordezkaritza kreditatuari ere.
Kasuko baimenetan onetsi ziren baldintza eta betekizunen bat bete ezean, Hezkuntza eta Kultura Departamentuak, aurrez titularrari entzute emanik, Foru Agindua emanen du emandako baimenak baliogabetzeko.
Ikastetxea bere oldez gelditzeko bere jardunetik, nahitaez beharko da Nafarroako Gobernuaren Hezkuntza eta Kultura Departamentuaren baimena; baimen hori beti emanen da, baldin eta ikastetxeak arian iraun beharreko denborari buruzko konpromisoa errespetatzen bada.
Ikastetxe batek Nafarroan ematen dituen ikasketak atzerrietako hezkuntza sistemen araberakoak badira eta tituluak ez badira Espainiakoekin homologagarriak, ikasketa horien gaineko ziurtagiri bat ematen duen bakoitzean adierazi eginen du ikasketak ez direla ofizialak eta ez dutela Unibertsitatearen Erreformari buruzko Legearen 28. artikuluak titulu homologatuei aitortzen dien baliozkotasun nazionala.
Ziurtagirion testua eta formatoak ez dute biderik emanen titulu ofizialekin nahasteko.
Orobat, ikastetxean ematen diren ikasketen gaineko publizitatean ez da inolako ofizialtasunik aipatuko, ez eta Espainiako Hezkuntza Sistemako tituluekin bat egiten duen deiturarik ere.
Ikastetxe hauek ezartzeko baimena emateak ez dakar berez ikastetxe horietan ematen diren ikasketak Espainian automatiko homologatzeko eskubiderik. Homologatzeko, hala tokatzen bada, Goi mailako hezkuntza titulu atzerrikoak homologatzeari buruzko araudi orokorrari eginen zaio men.
XEDAPEN GEHIGARRIAK
Baimendutako eta homologatutako ikasketak benetan emateko, honako arauei eginen zaie men: azaroaren 27ko 1497/1987 Errege Dekretuaren 10. artikulua, eta Errege Dekretu hori aldatu zuten beste hauek: ekainaren 10eko 1267/1994 Errege Dekretua, azaroaren 8ko 2347/1996 Errege Dekretua, apirilaren 25ko 614/1997 Errege Dekretua eta apirilaren 30eko 779/1998 Errege Dekretua, zeinek artezpide orokor amankomunak finkatzen baitituzte unibertsitate titulu ofizial eta Espainia guztian balio dutenen ikasketa planetarako, eta 557/1991 Errege Dekretuko 15. artikulua.
Foru Dekretu honek estatu mailako legerik aipatzen duen guztietan, gero batean lege horiek aldatuko dituen araudia aipatuko balu bezala ulertuko da.
Unibertsitateek beren autonomia erabiliz titulu edo diploma propioak eskuratzeko ikasketarik ematen badute, titulu eta diploma horiek azaroaren 6ko 1496/1987 Errege Dekretuak finkatzen duenaren araberakoak beharko dute.
AZKEN XEDAPENAK
Esku ematen zaio Hezkuntza eta Kultura kontseilariari Foru Dekretu hau garatu eta aplikatzeko behar diren xedapen guztiak emateko.
Foru Dekretu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, mila bederatziehun eta laurogeita hemezortziko urriaren hamahiruan.-Gobernuko Lehendakariordea, Rafael Gurrea Induráin.-Hezkuntza eta Kultura kontseilaria, Jesús Javier Marcotegui Ros.
Iragarkiaren kodea: A9809513
