LEXNAVARRA
294/2004 FORU DEKRETUA, IRAILAREN 6KOA, OSASUNBIDEA-NAFARROAKO OSASUN ZERBITZUKO OINARRIZKO OSASUN LAGUNTZAKO TALDEETAKO OSASUN-LANGILEEI ESLEITUTAKO KAPITAZIO OSAGARRIA ETA DISPERTSIO GEOGRAFIKOKO OSAGARRIA ARAUTZEN DITUENA
BON N.º 116 - 27/09/2004
I. KAPITULUA. XEDEA
- 1. artikulua. Xedea.
II. KAPITULUA. KAPITAZIO OSAGARRIA
- 2. artikulua. Aplikazio eremua.
- 3. artikulua. A mailako osasun langileentzako kalkuluak.
- 4. artikulua. Erizainentzako kalkulua.
- 5. artikulua. Kupoa esleiturik ez duten A mailako osasunlangileentzako edo Oinarrizko Osasun Laguntzako sendagile edo pediatrarekin oinarrizko unitatea osatzen ez duten erizainentzako kalkulua.
III. KAPITULUA. DISPERTSIO GEOGRAFIKOKO OSAGARRIA
- 6. artikulua. Aplikazio eremua.
- 7. artikulua. Guardiak, lantokian bertan edo lokalizaturik egitekoak.
- 8. artikulua. A mailako osasun langileentzako kalkulua.
- 9. artikulua. Erizainentzako kalkulua.
- 10. artikulua. Kupoa esleiturik ez duten A mailako osasunlangileentzako edo Oinarrizko Osasun Laguntzako sendagile edo pediatrarekin oinarrizko unitatea osatzen ez duten erizainentzako kalkulua.
IV. KAPITULUA. GARAPENERAKO ARAU KOMUNAK
- 11. artikulua. Populazio esleitua zer den.
- 12. artikulua. Norbanakoaren Osasun Txartelen konputua.
- 13. artikulua. Norbanakoaren Osasun Txartel berregituratuen kopurua zehaztea.
- 14. artikulua. Lan zama eta dispertsioko koefizientea.
- 15. artikulua. Dispertsio koefizientearen esleipena.
- 16. artikulua. Kapitazio osagarria eta dispertsio geografikoko osagarria ordaintzea.
- 17. artikulua. Lanaldi orokorra ez bezalako beste bat duten langileen osagarriaren zenbatekoa.
XEDAPEN IRAGANKORRAK
- Lehenbizikoa. Kapitazio osagarriaren atzeraeragineko aplikazioa.
- Bigarrena. Dispertsio geografikoko osagarriaren atzeraeragineko aplikazioa.
- Xedapen Indargabetzailea
- Azken Xedapena
1. ERANSKINA. NORBANAKOAREN OSASUN TXARTELEKO KAPITAZIO OSAGARRIAREN ZENBATEKOAK 2002. URTEAN
2. ERANSKINA. ETENGABEKO LAGUNTZAKO ZERBITZUAK EMATEAGATIK DISPERTSIO GEOGRAFIKOKO OSAGARRIAREN ZENBATEKOAK 2003. URTEAN
3. ERANSKINA. OHIKO LANALDIA BETETZEAGATIK, NORBANAKOAREN OSASUN TXARTELAGATIKO DISPERTSIO GEOGRAFIKOKO OSAGARRIAREN ZENBATEKOAK 2003. URTEAN
Osasunbidea-Nafarroako Osasun Zerbitzuari atxikitako langileen araubidea erregulatzen duen urriaren 20ko 11/1992 Foru Legearen 12. artikuluari jarraikiz, oinarrizko osasun laguntzako taldeetako osasun-langileek zilegi izanen dute kapitazio osagarri bat kobratzea, beren jarduera eremuen denborazko luzeraren eta luzera pertsonalaren arabera; osagarri horren zenbatekoa eta aplikazio sistema finkatzeko dagozkion arauak ezarriko direla dio lege horrek, eta zehazten du hori egiteko koefiziente aldakorreko sistema bat erabiliko dela, jarduera eremuei atxikitako osasun laguntzarako eskubidearen titularren kopuruaren araberakoa, Norbanakoaren Osasun Txartelaren bitartez.
Bestalde, Osasunbidea-Nafarroako Osasun Zerbitzuko lanpostuei zegozkien ordainsari osagarriak zehazten duen azaroaren 2ko 350/1992 Foru Dekretuan finkatuta dago ezen Norbanakoaren Osasun Txartela Foru Komunitate osoan ezarri arte, langileek kontzeptu horrengatik batez besteko bat kobratuko zutela, alegia, 1992ko lehenbiziko seihilekoan lanpostuari ondoko aldagai hauengatik zegozkion zenbatekoen batez bestekoa: produktibitate finkoa, zerbitzuak hartzen duen biztanle kopurua, herritarren artean 65 urte baino gehiagokoen eta adin pediatrikoko haurren portzentajea, zenbat Osasun Eskualde Oinarrizkotan ematen duten zerbitzua, eta bolada baterako bertaratzen direnei laguntza ematea. Behin-behineko sistema hori aplikatzearen ondorioz jasotako zenbatekoek ez zuten eskubide eskuraturik sortuko kapitazio osagarria behin betikoz ezarri ondoren gerta zitezkeen balorazio edo estimazioekiko.
Bestalde, urriaren 20ko 11/1992 Foru Legearen 19. artikuluan ezarritakoaren arabera, oinarrizko osasun laguntzako taldeetako osasun-langileek zilegi izanen dute dispertsio geografikoko osagarri bat kobratzea, herritarren sakabanaketa geografikoaren araberakoa; halaber, legean ezarrita dago haren zenbatekoa arau bide ezarriko dela, eta haren helburua dela langileak atikirik dauden eskualdeko herritarrei etxez etxeko osasun laguntza emateko joan-etorriak egin beharra konpentsatzea. Osagarri horrek legezko izaera du zerbitzuagatik egin beharreko joan-etorrien gastuak konpentsatzeko ondorio guztietarako, eta bateraezina da kasu horretarako ezarritako kalte-ordain orokorrekin.
Lege aurreikuspen hori garatzen hasteko, Osasunbidea-Nafarroako Osasun Zerbitzuko lanpostuei dagozkien ordainsari osagarriak zehaztu eta esleitzen dituen 350/1992 Foru Dekretua eman zen azaroaren 2an, eta haren idazketa uztailaren 19ko 219/1993 Foru Dekretuaren bidez aldatu zen.
Bestalde, Administrazioak eta sindikatuek Nafarroako Administrazio Publikoen zerbitzuko langileen enplegu-baldintzei buruz 2002 eta 2003 urteetarako sinatutako Akordioaren 2, klausularen C) atalean, hartutako konpromisoen artean sartzen ditu Osasunbidea-Nafarroako Osasun Zerbitzuko oinarrizko osasun laguntzako taldeetako mediku eta erizainen kapitazio osagarriaren berrikuspena eta egokitzapena, baita langile horiek kobratzen duten dispertsio geografikoko osagarriarenak ere.
Foru dekretu honek, aipatutako konpromisoa gauzatzeko, kapitazio osagarria eta dispertsio geografikoko osagarria arautzen ditu. Bi kontzeptu horiei, ezaugarri aski desberdinak badituzte ere, baterako tratamendua emanen zaie, batez ere aplikatzeko irizpide berberak dituztelako, izan ere, osasun laguntzarako eskubidearen titularren kopuruak eta biztanleriaren sakabanaketa geografikoaren mailak eragina dute bai esleitutako populazioak sortzen duen lan zamaren zehaztapenaren gainean (kaptazio osagarriaren oinarria), bai joan-etorriak egiteko beharraren gainean (sakabanaketa geografikoaren osagarria emateko oinarria); horrek guztiak sortu du bientzako zehaztapen arau berdinak ezartzea.
Administrazioak eta sindikatuek Nafarroako Administrazio Publikoen zerbitzuko langileen enplegu-baldintzei buruz 2002 eta 2003 urteetarako sinatutako Akordioaren 19. klausulan aurreikusitako Batzorde Paritarioak foru dekretu honetan ezarritako arauak aztertu eta negoziatu ditu, Akordioaren jarraipena eta garapena egiteko aipatutako organoari eman zaizkion eginkizunak betetzeko.
Horiek horrela, Lehendakaritza, Justizia eta Barne kontseilariak proposaturik, eta Nafarroako Gobernuak bi mila eta lauko irailaren seian egindako bilkuran hartutako Erabakiarekin bat,
DEKRETATU DUT:
I. KAPITULUA. XEDEA
Foru dekretu honetan Osasunbidea-Nafarroako Osasun Zerbitzuko Oinarrizko Osasun Laguntzako taldeetako osasun-langileei esleitutako kapitazio osagarria eta dispertsio geografikoko osagarria erregulatzeko arauak ematen dira, ezertan galarazi gabe esleiturik ez dituzten herritarrei ere, aplikatu beharreko arauetan aurreikusitako kasuetan osasun laguntza emateko beharra.
II. KAPITULUA. KAPITAZIO OSAGARRIA
2. artikulua . Aplikazio eremua.
Osasunbidea-Nafarroako Osasun Zerbitzuko Oinarrizko Osasun Laguntzako taldeetako langile fakultatiboek eta erizainek kapitazio osagarri bat jasoko dute; haren zenbatekoa hilero finkatuko da profesional bakoitzarentzat, foru dekretu honetan ezarritako irizpideei jarraikiz.
3. artikulua . A mailako osasun langileentzako kalkuluak.
1. Osasunbidea-Nafarroako Osasun Zerbitzuko Oinarrizko Osasun Laguntzako taldeetako A mailako osasun-langileek, populazio jakin bat esleiturik izanik, kobratuko duten kapitazio osagarriaren zenbatekoa kalkulatzeko, biderketa eginen da foru dekretu honen 1. eranskinean aipatutako zenbatekoaren eta profesional bakoitzari dagokion Norbanakoaren Osasun Txartel berregituratuen kopuruaren artean.
Urteko zenbatekoa = kapitazioko Norbanakoaren Osasun Txartel berregituratuen kopurua X sendagile bakoitzaren kapitazioko Norbanakoaren Osasun Txartel bakoitzeko zenbatekoa.
2. Ondorio horietarako, Norbanakoaren Osasun Txartel berregituratuen kopurua kalkulatuko da atxikitako osasun laguntzarako eskubidearen titularren kopuruaren arabera, eta adin tarte bakoitzak sortutako lan zamaren eta lanpostu bakoitzari esleitutako sakabanatze koefizientearen arabera ponderatuko da, foru dekretu honen 13. artikuluan ezarritako arauei jarraikiz.
4. artikulua . Erizainentzako kalkulua.
Oinarrizko Osasun Laguntzako taldeetako erizainek kobratuko duten kapitazio osagarriaren zenbatekoa kalkulatzeko biderketa eginen da foru dekretu honen 1. eranskinean ezarritako zenbatekoaren eta, fakultatiboari esleitutako populazioari osasun laguntza emateko oinarrizko unitatea zein sendagile edo pediatrarekin osatzen duen, hari dagozkion Norbanakoaren Osasun Txartel berregituratuen kopuruaren artean.
Urteko zenbatekoa = Oinarrizko unitatearen kapitazioko Norbanakoaren Osasun Txartel berregituratuen kopurua X erizain bakoitzaren kapitazioko Norbanakoaren Osasun Txartel bakoitzeko zenbatekoa.
5. artikulua . Kupoa esleiturik ez duten A mailako osasunlangileentzako edo Oinarrizko Osasun Laguntzako sendagile edo pediatrarekin oinarrizko unitatea osatzen ez duten erizainentzako kalkulua.
1. Kupoa esleiturik ez duten A mailako osasun-langileek edo Oinarrizko Osasun Laguntzako sendagile edo pediatrarekin oinarrizko unitatea osatzen ez duten erizainenek hilero jasoko duten zenbatekoa kalkulatzeko biderketa eginen da foru dekretu honen 1. eranskinean aipatutako indizearen eta dagokion Oinarrizko Osasun Laguntzako Taldean estamentu eta espezialitate bakoitzaren Norbanakoaren Osasun Txartel berregituratuen batez bestekoaren artean.
Aurreko atalean aipatzen den batez bestekoa ezartzeko ondoko bi datu hauek aterako dira lehenbizi: alde batetik Oinarrizko Osasun Laguntzako Taldean zenbat Norbanakoaren Osasun Txartel berregituratu dauden, eta bestetik 11. artikuluan aipatutako profesionaletatik zenbat dauden Oinarrizko Osasun Laguntzako Taldean; gero biderketa eginen da bi kopuru horien artean. Horretarako, hala bada, lanaldi partziala duten aldi baterako kontratatutako langileak proportzionalki kontatuko dira.
2. Urriaren 20ko 11/1992 Foru Legearen 29.1.b) artikuluaren babesean aldi aldi baterako kontratatutako langileei ez zaie aurreko atalean ezarritakoa aplikatuko baldin eta kontratuaren xedea profesional bakar bat ordezkatzea bada, lanaldi osoan nahiz partzialean. Langile horien kapitazio osagarria ordezten duten profesionalari dagokzion Norbanakoaren Osasun Txartel berregituratuen kopuruaren araberakoa izanen da, eta, lanaldi patzialean aritzen badira, dagokion portzentajea kenduko zaio.
III. KAPITULUA. DISPERTSIO GEOGRAFIKOKO OSAGARRIA
6. artikulua . Aplikazio eremua.
1. Osasunbidea-Nafarroako Osasun Zerbitzuko Oinarrizko Osasun Laguntzako taldeetako langile fakultatiboek eta erizainek dispertsio geografikoko osagarri bat jasoko dute; haren zenbatekoa hilero finkatuko da profesional bakoitzarentzat, foru dekretu honetan ezarritako irizpideei jarraikiz.
2. Aurreko atalean aipatutako langileek dispertsio geografikoko osagarria kobratzeko kontuan hartuko dira bi alderdi, desberdinak baina bateragarriak, alde batetik ohiko lanaldian zerbitzuak ematea, eta, bestetik, laguntza etengabeko zerbitzuak ematea.
7. artikulua . Guardiak, lantokian bertan edo lokalizaturik egitekoak.
1. Oinarrizko Osasun Laguntzako taldeetako osasun-langileek, lantokian bertan edo lokalizaturik egoteko guardiak egiten badituzte, hilabetea bukatutakoan kobratuko dute dispertsio geografikoko osagarria, eta haren zenbatekoa kalkulatzeko foru dekretu honetako 2. eranskinean ezarritako zenbatekoa aplikatuko zaio etengabeko laguntzan benetan emandako ordu kopuruari.
Hileko zenbatekoa = etengabeko laguntzako orduaren zenbatekoa X ordu kopurua.
2. Horretarako, berdin kontatuko dira bertan egon beharreko guardiak eta lokalizaturik egon beharrekak.
8. artikulua . A mailako osasun langileentzako kalkulua.
1. Osasunbidea-Nafarroako Osasun Zerbitzuko Oinarrizko Osasun Laguntzako taldeetako A mailako osasun-langileek, ohiko lanaldian zerbitzuak emateagatik kobratuko duten dispertsio geografikoko zenbatekoa kalkulatzeko, biderketa eginen da foru dekretu honen 3. eranskinean aipatutako zenbatekoaren eta profesional bakoitzari dagokion Norbanakoaren Osasun Txartel berregituratuen kopuruaren artean.
Urteko zenbatekoa = dispertsioko NOT berregituratuen kopurua X dispertsioko NOT bakoitzaren zenbatekoa.
2. Ondorio horietarako, Norbanakoaren Osasun Txartel berregituratuen kopurua kalkulatuko da atxikitako osasun laguntzarako eskubidearen titularren kopuruaren arabera, eta adin tarte bakoitzak sortutako lan zamaren eta lanpostu bakoitzari esleitutako sakabanatze koefizientearen arabera ponderatuko da, foru dekretu honen 13. eta 14. artikuluetan ezarritako arauei jarraikiz.
9. artikulua . Erizainentzako kalkulua.
Oinarrizko Osasun Laguntzako taldeetako erizainek ohiko lanaldian zerbitzuak emateagatik kobratuko duten dispertsio geografikoko osagarriaren zenbatekoa kalkulatzeko biderketa eginen da foru dekretu honen 3. eranskinean ezarritako zenbatekoaren eta, fakultatiboari esleitutako populazioari osasun laguntza emateko oinarrizko unitatea zein sendagile edo pediatrarekin osatzen duen, hari dagozkion Norbanakoaren Osasun Txartel berregituratuen kopuruaren artean.
Urteko zenbatekoa = O. unitateko dispertsioko NOT berregituratuen kopurua X dispertsioko NOT bakoitzaren zenbatekoa.
10. artikulua . Kupoa esleiturik ez duten A mailako osasunlangileentzako edo Oinarrizko Osasun Laguntzako sendagile edo pediatrarekin oinarrizko unitatea osatzen ez duten erizainentzako kalkulua.
1. Kupoa esleiturik ez duten A mailako osasun-langileek edo Oinarrizko Osasun Laguntzako sendagile edo pediatrarekin oinarrizko unitatea osatzen ez duten erizainenek ohiko lanaldian zerbitzuak emateagatik dispertsio geografikoko osagarri bat jasoko dute hilero; haren zenbatekoa kalkulatzeko biderketa eginen da foru dekretu honen 3. eranskinean aipatutako zenbatekoaren eta dagokion Oinarrizko Osasun Laguntzako Taldean estamentu eta espezialitate bakoitzaren Norbanakoaren Osasun Txartel berregituratuen batez bestekoaren artean.
Aurreko atalean aipatzen den batez bestekoa ezartzeko ondoko bi datu hauek aterako dira lehenbizi: alde batetik Oinarrizko Osasun Laguntzako Taldean zenbat Norbanakoaren Osasun Txartel berregituratu dauden, foru dekretu honen 13. artikuluan ezarritako arauei jarraikiz zehaztuak, eta bestetik 11. artikuluan aipatutako profesionaletatik zenbat dauden Oinarrizko Osasun Laguntzako Taldean; gero biderketa eginen da bi kopuru horien artean. Horretarako, hala bada, lanaldi partziala duten aldi baterako kontratatutako langileak proportzionalki kontatuko dira.
2. Urriaren 20ko 11/1992 Foru Legearen 29.1.b) artikuluaren babesean aldi aldi baterako kontratatutako langileei ez zaie aurreko atalean ezarritakoa aplikatuko baldin eta kontratuaren xedea profesional bakar bat ordezkatzea bada, lanaldi osoan nahiz partzialean. Langile horiek ohiko lanaldian zerbitzuak emateagatik dispertsio geografikoko osagarri bat kobratuko dute ordezten duten profesionalari dagozkion Norbanakoaren Osasun Txartel berregituratuen kopuruaren araberakoa izanen da, eta, lanaldi patzialean aritzen badira, dagokion portzentajea kenduko zaio.
IV. KAPITULUA. GARAPENERAKO ARAU KOMUNAK
11. artikulua . Populazio esleitua zer den.
Foru dekretu honen 3.1 eta 8.1 artikuluetan ezarritakoa aplikatzeko, populazioa esleitua duen sendagile edo erizaintzat hartuko da ondoko egoeretako batean dagoen profesionala:
1. Oinarrizko Osasun Taldean lanpostu bat jabetzan betetzen duena.
2. Oinarrizko Osasun Taldean lanpostu huts bat betetzeko aldi baterako kontratatzen den langilea.
3. Etorkizunean kontsolidatutzat har daitezkeen premiak asetzeko, urriaren 20ko 11/1992 Foru Legearen 29.1.b) artikuluaren babesean aldi aldi baterako kontratatutako langilea.
12. artikulua . Norbanakoaren Osasun Txartelen konputua.
Foru dekretu honetan arautzen diren kapitazio osagarria eta dispertsio geografikoko osagarria hilero ordaintzeko, ordaindu behar deneko hilabetearen aurreko hilabeteko azken egunean profesional bakoitzari esleitutako Norbanakoaren Osasun Txartelen kopuruari begiratuko zaio, Osasunbidea-Nafarroako Osasun Zerbitzuko Osasun Laguntza Publikoaren Erabiltzaileen Fitxategiko datuen arabera.
13. artikulua . Norbanakoaren Osasun Txartel berregituratuen kopurua zehaztea.
1. Foru dekretu honetan ezarritakoa aplikatzeko, profesional bakoitzari dagokion Norbanakoaren Osasun Txartel berregituratuen kopurua zehazteko, artikulu honetan eta ondorengoetan finkatutako arauei jarraikiko zaie.
2. Profesional bakoitzari dagokion Norbanakoaren Osasun Txartel berregituratuen kopurua zehatzeko kontuan hartuko dira ondoko faktore hauek:
a) Adin-talde bakoitzak sortutako lan zama.
b) 11. artikuluan aipatutako lanpostuetako bakoitzak esleitua duen dispertsioko koefizientea.
14. artikulua . Lan zama eta dispertsioko koefizientea.
1. Lan zamaren ponderazioa egiteko, adin-talde bakoitzean dauden Norbanakoaren Osasun Txartel berregituratuen kopuruari Osasunbidea-Nafarroako Osasun Zerbitzuko Oinarrizko Osasun Laguntzako zuzendariaren ebazpen bidez ezartzen diren indizeak aplikatuko zaizkio.
2. Lanpostu bakoitzarentzat, 2.b) atalean aipatutako dispertsioko koefizientea kalkulatzeko, ondoko faktore hauek gehituko zaizkio 1 zenbakiari:
a) 0tik 6ra bitarte, osasun eskualde oinarrizkoko kontsultagietara joateko urteen egindako kilometro kopuruaren arabera, zuzeneko proportzioan.
b) 0tik 2ra bitarte, kontsultategirik ez duten edo, izanik ere, kontsulta astean bitan baino gutxiagotan egiten deneko osasun eskualde oinarrizkoko herrietan bizi diren osasun laguntzaren onuradunen kopuruaren arabera, zuzeneko proportzioan.
c) 0tik 2ra bitarte, udalerriko biztanleen dispertsio mailaren arabera, zuzeneko proportzioan. Urtero, Osasunbidea-Nafarroako Osasun Zerbitzuko Oinarrizko Osasun Laguntzako zuzendariaren ebazpen bidez, lanposu bakoitzari esleitutako udalerri barneko dispertsio maila ezarriko da, urte bakoitzeko urtarrilaren 1aren aurrerako ondorioekin.
d) 0tik 2ra bitarte, ondoko kozientearen arabera, zuzeneko proportzioan: profesionalaren osasun eskualde oinarrizkoan, osasun etxerik ez duten herrietan bizi diren osasun laguntzaren onuradunen kopurua zati eskualde oinarrizkoko osasun laguntzaren onuradunen kopurua.
Benetako balio eta mugak dituen zenbakizko eskala baten eta aurrez jarritako balio eta mugak dituen beste baten artean banaketa proportzionalak kalkulatzeko formula.
15. artikulua . Dispertsio koefizientearen esleipena.
Urtero, Osasunbidea-Nafarroako Osasun Zerbitzuko Oinarrizko Osasun Laguntzako zuzendariaren ebazpen bidez, lanposu bakoitzari esleitutako dispertsio koefizientea ezarriko da, urte bakoitzeko urtarrilaren 1aren aurrerako ondorioekin. Osasun eskualde oinarrizkoaren antolaketaren aldaketa baten ondorioz lanpostuen baldintzak aldatzen baldin badira, dispertsio koefizientearen esleipena aldatuko da organo bereko ebazpen bidez.
16. artikulua . Kapitazio osagarria eta dispertsio geografikoko osagarria ordaintzea.
1. Kapitazio osagarria ordaintzeko, dispertsioko koefizientea ezartzeko 14. artikuluaren 2. atalean aipatutako kalkulutik ateratzen diren balioak ponderatuki aplikatuko dira 1etik 2ra bitarteko eskala bati jarraikiz. Adinaren araberako lan zamen arabera doitutako Norbanakoaren Osasun Txartel kopurua eta lanpostu bakoitzari esleitutako 1etik 2ra bitarteko eskalako dispertsio koefizientea biderkatzetik ateratzen den emaitza 1.000tik 4.000ra bitarteko eskala batera egokituko da. Eskala hori aplikatzeko, aipatutako gehieneko eta gutxieneko balioak izanen dira, hurrenez hurren, hamar balio handienen batez bestekoa eta hamar balio txikienen batez bestekoa, ohiko lanaldiaren urteko konputuari buruz betiere.
2. Ohiko lanaldian zerbitzuak emateagatik dispertsio geografikoko osagarria ordaintzeko, adinaren araberako lan zamen arabera doitutako Norbanakoaren Osasun Txartel kopurua eta lanpostu bakoitzari esleitutako dispertsio koefizientea biderkatzetik ateratzen den emaitza 1.000tik 4.000ra bitarteko eskala batera egokituko da. Eskala hori aplikatzeko, aipatutako gehieneko eta gutxieneko balioak izanen dira, hurrenez hurren, hamar balio handienen batez bestekoa eta hamar balio txikienen batez bestekoa, ohiko lanaldiaren urteko konputuari buruz betiere.
3. Nolanahi ere, aurreko 2. eta 3. ataletan aipatutako eragiketen emaitza moldatuko da, Osasunbidea-Nafarroako Osasun Zerbitzuaren esparru osoan lan zamen eta dispertsioaren arabera doitutako Norbanakoaren Osasun Txartelen kopurua eta benetako Norbanakoaren Osasun Txartelena berdinak izan daitezen. Foru dekretu honen 1. eta 3. eranskinetan aurreikusitako zenbatekoak atal honetan ezarritako moldaketaren ondorioz profesional bakoitzarentzat gelditzen diren Norbanakoaren Osasun Txartelen kopuruari aplikatuko zaizkio.
Benetako balio eta mugak dituen zenbakizko eskala baten eta aurrez jarritako balio eta mugak dituen beste baten artean banaketa proportzionalak kalkulatzeko formula.
17. artikulua . Lanaldi orokorra ez bezalako beste bat duten langileen osagarriaren zenbatekoa.
1. Lanaldi orokorra ez bezalako beste bat duten Oinarrizko Osasun Laguntzako taldeetako osasun langileek ohiko lanaldia egiteko kapitazio osagarriaren eta dispertsio geografikoko osagarriaren zenbatekoa lanaldi orokorrari aplikatutako portzentaje berean txikituko da.
2. Dena den, etorkizunean kontsolidatutzat har daitezkeen premiak asetzeko, urriaren 20ko 11/1992 Foru Legearen 29.1.b) artikuluaren babesean aldi baterako kontratatutako langileei ez zaie aurreko atalean ezarritako murrizketa aplikatuko, baldin eta foru dekretu honen 11.c) artikuluari jarraikiz biztanle kopuru bat esleitzen bazaie.
XEDAPEN IRAGANKORRAK
Lehenbizikoa. Kapitazio osagarriaren atzeraeragineko aplikazioa.
1. Foru dekretu honetan ezarritako kapitazio osagarriaren arauketak atzerako ondorioak izanen ditu, 2002ko urtarrilaren 1etik aurrera, xedapen iragankor honetan ezarritako baldintzetan.
2. 2002. eta 2003. urteetako kapitazio osagarriarengatik profesional bakoitzak jaso behar dituen zenbatekoak zehazteko, foru dekretu honetako arauak aplikatuko dira, 2003ko urtarrilaren 1ean esleitutako Norbanakoaren Osasun Txartel berregituratuen kopurua oinarri hartuta, Osasunbidea-Nafarroako Osasun Zerbitzuko Osasun Laguntza Publikoaren Erabiltzaileen Fitxategiko datuen arabera.
3. 2002. eta 2003. urteetako kapitazio osagarriarengatik profesionalak jasotako zenbatekoa, urteko konputuan, aurreko 2. puntuan ezarritakoa aplikatu ondoren dagokiona baino txikiagoa bada, atera den aldea ordainduko da.
4. 2002. eta 2003. urteetako kapitazio osagarriarengatik profesionalak jasotako zenbatekoa, urteko konputuan, aurreko 2. puntuan ezarritakoa aplikatu ondoren dagokiona baino handiagoa bada, atera den aldea ez da berdinduko. 2004ko urtarrilaren 1etik aurrera, atal honetan aipatzen diren langileek 2003. urtean ordaindu zitzaien zenbatekoa kobratzen segituko dute kaptazio osagarriarengatik; zenbateko hori xurgatu eginen da kontzeptu horri aplikatutako lansarien igoera orokorrarekin eta osagarri horrek izan litzakeen gainerako aldaketekin bakarrik.
Aurreko arauak aplikatzearen ondorioz ateratzen den hileko zenbatekoa foru dekretu honetako arau orokorrak aplikatzetik heldu dena baino txikiagoa bada, azken hori ordainduko da.
Bigarrena. Dispertsio geografikoko osagarriaren atzeraeragineko aplikazioa.
1. Foru dekretu honetan ezarritako dispertsio geografikoko osagarriaren arauketak atzerako ondorioak izanen ditu, 2003ko urtarrilaren 1etik aurrera, xedapen iragankor honetan ezarritako baldintzetan.
2. 2003ko urtarrilaren 1etik aurrera egindako etengabeko laguntza 2. eranskinean ezarritakoari jarraikiz ordainduko da.
3. 2003. urterako, aurreko puntuari jarraikiz ordaindutako zenbateko osoaren eta Administrazioak eta sindikatuek Nafarroako Administrazio Publikoen zerbitzuko langileen enplegu-baldintzei buruz 2002 eta 2003 urteetarako sinatutako akordioetan itundutako zenbateko osoaren arteko aldea dispertsio geografikoagatik 2003ko urtarrilaren 1etik aurrera kobratutakoari banatuko zaio proportzionalki.
4. 2004. urterako, aurreko atalean aipatutako irizpidea aplikatuko da, 2004ko urtarrilaren 1etik foru dekretu honek indarra hartu bitarteko denboraldiaren proportzioan.
Indargabetu egin dira honako xedapen hauek:
1. Osasunbidea-Nafarroako Osasun Zerbitzuko lanpostuei dagozkien ordainsari osagarriak zehaztu eta esleitzen dituen martxoaren 3ko 44/2003 Foru Dekretuaren lehenbiziko eta bigarren xedapen iragankorrak.
2. Oro har, foru dekretu honetan xedatutakoari aurka egiten dioten maila bereko edo apalagoko xedapen guztiak.
Foru dekretu honek Nafarroako ALDIZKARI OFIZIALean argitara eman eta biharamunean hartuko du indarra.
1. ERANSKINA. NORBANAKOAREN OSASUN TXARTELEKO KAPITAZIO OSAGARRIAREN ZENBATEKOAK 2002. URTEAN
Urteko zenbatekoa sendagile orokorrarentzat: 2,22 euro Norbanakoaren Osasun Txartel berregituratu bakoitzeko.
Urteko zenbatekoa pediatrarentzat: 3,11 euro Norbanakoaren Osasun Txartel berregituratu bakoitzeko.
Urteko zenbatekoa erizainarentzat: 0,72 euro Norbanakoaren Osasun Txartel berregituratu bakoitzeko.
2. ERANSKINA. ETENGABEKO LAGUNTZAKO ZERBITZUAK EMATEAGATIK DISPERTSIO GEOGRAFIKOKO OSAGARRIAREN ZENBATEKOAK 2003. URTEAN
Guardiako ordu bakoitzeko: 0,53 euro.
3. ERANSKINA. OHIKO LANALDIA BETETZEAGATIK, NORBANAKOAREN OSASUN TXARTELAGATIKO DISPERTSIO GEOGRAFIKOKO OSAGARRIAREN ZENBATEKOAK 2003. URTEAN
Urteko zenbatekoa sendagile orokorrarentzat, pediatrarentzat eta erizainarantzat: 1,21 euro Norbanakoaren Osasun Txartel berregituratu bakoitzeko.
