LEXNAVARRA
237/1999 FORU DEKRETUA, EKAINAREN 21EKOA, LURZATI BERRANTOLAMENDUKO PROZESUETAN INGURUGIROAREN GAINEKO ERAGINAREN EBALUAZIOA ARAUTZEN DUENA.
BON N.º 99 - 09/08/1999
I. KAPITULUA. XEDAPEN OROKORRAK
II. KAPITULUA. INGURUGIROARI DAGOZKION ALDERDIAK LURZATI BERRANTOLAMENDUKO PROIEKTUEN ERREDAKZIOAN SARTZEA
III. KAPITULUA. INGURUGIROAREN GAINEKO ERAGINAREN EBALUAZIORAKO PROZEDURAK LURZATI BERRANTOLAMENDUETAN
LEHEN ATALA. LURZATI BERRANTOLAMENDU PUBLIKO BERRIAK.
2. ATALA. TRAMITAZIOAN DAUDEN LURZATI BERRANTOLAMENDU PUBLIKOAK
HIRUGARREN ATALA. LURZATI BERRANTOLAMENDU PRIBATUAK
IV. KAPITULUA. XEDAPEN KOMUNAK
XEDAPEN IRAGANKORRAK
AZKEN XEDAPENAK
Nafarroako Foru Komunitateak kezka nabarmena agertu du lurzati berrantolamenduek nekazaritza eremuan dituzten ondorioak gutxitzeari dagokionez. Lehenbiziko pausuak martxoaren 21eko 98/1991 Foru Dekretuaren bidez eman ziren, beronek lurzati berrantolamenduko proiektuek ingurugiroaren arloan aurreikusi beharreko alderdiak zehaztu baitzituen, lurraldearen babes eta erabilerarako Eskualdeko Hirigintza Arauei buruzko apirilaren 10eko 6/1987 Foru Legea garatzeko xedeaz.
Basa fauna eta haren habitatak babestu eta kudeatzeari buruzko martxoaren 5eko 2/1993 Foru Legeak ordezkatu zuen lege eta erregelamenduzko hastapeneko arautze hori. Foru Lege horren 33. artikuluak bi betebehar ezarri zituen lurzati berrantolamenduko lanetarako, ureztaketarako edo lehorreko lurrak ureztalur bihurtzeko: batetik, jarduketa horiek ingurugiroan dituzten ukipenen gaineko azterlan bat egitea, neurri zuzentzaile egokiak barne, eta bestetik, Ingurugiro, Lurraldearen Antolamendu eta Etxebizitza Departamentuak aginduzko txosten bat luzatzea. Foru Lege hori garatzeko, hain zuzen, uztailaren 19ko 229/1993 Foru Dekretuak natur ingurunean egin beharreko plan eta proiektuen Ingurugiroaren gaineko Ukipenen Azterlanen edukia arautu zuen. Azterlan horiek egitea, beste batzuen artean, nahitaezkoa zen lurzati berrantolamendu bakoitzaren lan planetarako, ureztakerako eta ureztalurren edo lehorreko lurren transformazioetarako, beti ere hogeita hamar hektareatik gorako azaleretan. Ingurugiroari buruzko txostenaren araubidetik kanpo gelditu ziren, berriz, indarra duen legeriaren arabera Ingurugiroaren gaineko Eraginaren Ebaluazioaren menpean dauden lan planak eta proiektuak, besteak beste.
Azkenik, Nekazaritzako Azpiegituren Erreformari buruzko abenduaren 9ko 18/1994 Foru Legeak, 100 eta 101. artikuluetan, lurzati berrantolamenduko prozeduran sartu zuen garai hartan indarra zuen araubidea, Ingurugiro, Lurraldearen Antolamendu eta Etxebizitza Departamentuak luzatu beharreko aginduzko txostenarena, alegia.
Esparru juridiko horrek aldaketa handiak eta funtsezkoak izan ditu, Kontseiluak 1997ko martxoaren 3an 97/11/EE Zuzentaraua eman zuenetik, honek zenbait proiektu publiko eta pribatuk ingurugiroan dituzten ondorioen ebaluazioari buruzko 85/337/EEE Zuzentaraua aldatu baitzuen. Zuzentarau berriak, II. eranskinean, lurzati berrantolamenduko proiektuak ingurugiroaren gaineko eraginaren ebaluazioaren menpean egonen direla aurreikusten du. Horrez gain, 3.1 artikuluak ezartzen du Estatu kideak beharturik daudela Zuzentarau hori 1999ko martxoaren 14an, beranduenez, bete dadin, beharrezkoak diren lege, erregelamendu eta administrazio xedapenak indarrean jartzera.
Horrela, elkarteko arauen ondorioz, egun horretatik aurrera, lurzati berrantolamenduko lanen planak, publikoak zein pribatuak, Ingurugiroaren gaineko Eraginaren Ebaluazioaren menpean egonen dira, eta horrek arestian aipatutako uztailaren 19ko 229/1993 Foru Dekretuan subsumitzetik baztertzen ditu, haren 1.2 artikuluarekin bat.
Kontseiluak 1997ko martxoaren 3an emaniko 97/11/EE Zuzentaraua nahitaez bete beharrak, Elkarteko Zuzenbidea gidatzen duten zuzeneko ondorioaren eta lehentasunaren irizpideetatik heldu denak, luzamendutan ibili gabe eskatzen du elkarteko arauak dituen helburuak adierazitako egunetik aurrera eraginkortasunez lortzea ziurtatuko duten administrazio xedapenak ematea.
Xedapen hau argitara emanik, segurtasun eta ziurtasun juridikoak eskainiko zaizkie lurzati berrantolamenduekin, eskatutakoekin nahiz eginkizun daudenekin, lotutako operadore publiko eta pribatuei, Zuzentarau hori egiaz aplikatzen hasi baitaiteke, dagoeneko, Nafarroako Foru Komunitateko lurraldean. Horri esker lortuko da, halaber, testu bakar batean harmonikoki bateratzea lurzati berrantolamendu hauei eskatzen zaien ingurugiroaren gaineko eraginaren ebaluazio prozedurarekin lotutako aurreikuspenak, bai estatukoak bai elkartekoak, bai eta Nekazaritzako Azpiegituren Erreformari buruzko abenduaren 9ko 18/1994 Foru Legetik heldu direnak ere.
Foru Dekretuak hiru araubide bereizten ditu. Lehenbizi, lurzati berrantolamendu publiko berriena; hauei ingurugiroaren gaineko ebaluazioaren prozedura "ab initio", hau da, Nafarroako Gobernuak bidezkoak diren ala ez erabaki aurretik ezarri beharko zaie. Bigarrenez, 1999ko martxoaren 14an tramitazioan zeuden lurzati berrantolamenduena. Kasu honetan, egoki ikusten da ingurugiroaren gaineko ebaluazioa eskatzea bi lurzati berrantolamendu motatarako: abenduaren 9ko 18/1994 Foru Legeak aipatzen duen Ingurugiro, Lurraldearen Antolamendu eta Etxebizitza Departamentuak ingurugiroari dagokionez luzatu beharreko txostena eskatua ez dutenak data horretan, eta behin betiko oinarriak onetsirik ez dutenak. Azkenik, lurzati berrantolamendu pribatuak; kasu honetan aipagarriena da Nekazaritza, Abeltzaintza eta Elikadura Departamentuarentzat loteslea dela lurzati berrantolamendua, ingurugiroaren ikuspuntutik, bideraezina dela zehazten duen Ingurugiroaren gaineko Eraginaren Deklarazioa, basa fauna babestu eta kudeatzeari buruzko martxoaren 5eko 2/1993 Foru Legeak ere, lurzati berrantolamendurako proiektu pribatuen kasuan, aurreikusten zuen bezala.
Amaitzeko, aipatu beharra dago ez dela espreski inolako muga edo irizpiderik ezarri ingurugiroaren gaineko ebaluazioa eskatzeko gutxieneko azaleraren inguruan. Aurrerantzean Nafarroan eskatzen diren lurzati berrantolamendu guztiek, publikoek zein pribatuek, ingurugiroaren gaineko eraginaren ebaluazioaren prozedura bete beharko dute Foru Dekretu honi jarraikiz, ziurtatzeko, horrela, elkarteko arauen eraginkortasuna erabatekoa dela.
Hori horrela, Ingurugiro, Lurraldearen Antolamendu eta Etxebizitza kontseilariak eta Nekazaritza, Abeltzaintza eta Elikadura kontseilariak proposaturik eta Nafarroako Gobernuak ekainaren hogeita batean eginiko bilkuran hartu zuen Erabakiarekin bat,
DEKRETATU DUT:
I. KAPITULUA. XEDAPEN OROKORRAK
Foru Dekretu honen xedea da lurzati berrantolamenduaren proiektuen erredakzioan ingurugiroari dagozkion aldagaiak sartzeko prozesua arautzea.
1. Nekazaritza, Abeltzaintza eta Elikadura Departamentuak, lurzati berrantolamenduaren arloko eduki-organoa den aldetik, ingurugiroaren arlokoa lurzati berrantolamenduko prozesuetan integratzea sustatuko du.
2. Ingurugiro, Lurraldearen Antolamendu eta Etxebizitza Departamentuaren eginkizuna da ingurugiroari dagozkion alderdien integrazioaren eta Ingurugiroaren gaineko Eraginaren Deklarazioaren inguruko irizpen arrazoituak luzatzea.
II. KAPITULUA. INGURUGIROARI DAGOZKION ALDERDIAK LURZATI BERRANTOLAMENDUKO PROIEKTUEN ERREDAKZIOAN SARTZEA
Ingurugiroari dagozkion alderdien integrazioa ondotik azaltzen dena kontuan hartuz gauzatuko da:
a) Lurzati berrantolamenduaren bidez bete gogo diren beharrak justifikatzen dituen azterketa bat egitea eta ingurugiroari dagozkion baldintzak berrantolamenduaren diseinuan sartzea hasierako planteamendutik bertatik.
b) Lurzati berrantolamenduak ingurugiro aldagaietan (gizakia, fauna, flora, lurzorua, ura, airea, klima, paisajea, ondasun materialak, kultur ondarea eta bestelakoak) izan ditzakeen ondorio zuzenak eta zeharkakoak identifikatu, deskribitu eta ebaluatzea, modu egokian eta kasu bakoitzean, bai eta faktore hauen arteko elkarrekintza.
c) Nekazaritza, Abeltzaintza eta Elikadura Departamentuak eskatzea Ingurugiro, Lurraldearen Antolamendu eta Etxebizitza Departamentuari ingurugiroko alderdi garrantzitsuei buruz eta jarduteko alternatibei buruz behar duen informazioa.
d) Elementu adierazgarriak definitzea aurreko puntuan aipatutako informazioa oinarritzat hartuta eta, horren ondorioz, ingurugiroaren gaineko azterketa eta ebaluazioa proposatzea, bai eta justifikatu daitezkeen beharrei erantzun diezaieketen irtenbide alternatiboak, dimentsioa eta kokapena ere.
e) Alternatiba guztien banakako azterketa egitea, proiektua baztertzeko aukera ere barne, lor daitezkeen helburuak, ingurugiroan eragin ditzaketen ondorioak eta ondorio negatiboei aurre egiteko ekintzak aztertuz.
f) Irtenbide alternatiboek ingurugiroan izan ditzaketen ondorioak ebaluatu eta konparatzea eta ingurugiroari begira irtenbide egokiena identifikatzea, ondorioak atera eta erabakiak hartzeko aintzat hartu beharreko garrantzizko informazioa, ingurugiroari buruzkoa, prestatzea.
g) Aurreko puntuan deskribitutako azterlanetatik heldu den dokumentazioa jendaurrean jartzea, eta epe horretan aurkezten diren alegazioei erantzun arrazoitua ematea, ingurugiroari buruzko eduki garrantzizkoa dutenak, lurzati berrantolamenduaren diseinuan izan ditzaketen ondorioekin batera, kontuan hartuta, eta besteak aintzat ez hartzeko zioak azaltzea.
h) Lurzati berrantolamenduaren jarraipena eta zainketa egitea lanen exekuzio aldian, bai eta ondorioz ateratzen diren finken esleipenean ere, guztia Ingurugiroaren gaineko Eraginaren Deklarazioan ezarritakoarekin bat.
III. KAPITULUA. INGURUGIROAREN GAINEKO ERAGINAREN EBALUAZIORAKO PROZEDURAK LURZATI BERRANTOLAMENDUETAN
LEHEN ATALA. LURZATI BERRANTOLAMENDU PUBLIKO BERRIAK.
Nekazaritza, Abeltzaintza eta Elikadura Departamentuak sustatuko dituen lurzati berrantolamendu berriek Ingurugiroaren gaineko Eraginaren Ebaluazioa egin beharko dute Atal honetako xedapenei jarraikiz, Nafarroako Gobernuak onetsi aurretik.
Nekazaritza, Abeltzaintza eta Elikadura Departamentuak Ingurugiro, Lurraldearen Antolamendu eta Etxebizitza Departamentuan Nekazaritzako Azpiegituren Erreformari buruzko abenduaren 9ko 18/1994 Foru Legearen 19. artikuluak aipatzen duen Bideragarritasun Azterlana aurkeztean hasiko da prozedura.
2. Ingurugiro, Lurraldearen Antolamendu eta Etxebizitza Departamentuak irizpen bat emanen du Bideragarritasun Azterlanaren edukiaren egokitasunaz eta lurzati berrantolamenduko prozeduran aztertu beharreko ingurugiro aldagaiez.
1. Nekazaritza, Abeltzaintza eta Elikadura Departamentuak, Ingurugiro, Lurraldearen Antolamendu eta Etxebizitza Departamentuak emandako irizpena ikusirik, lurzati berrantolamenduaren Ingurugiroaren gaineko Eraginaren Azterlana erredaktatuko du.
2. Ingurugiroaren gaineko Eraginaren Azterlana Ingurugiro, Lurraldearen Antolamendu eta Etxebizitza Departamentuari igorriko zaio, honek tramita dezan.
Ingurugiro, Lurraldearen Antolamendu eta Etxebizitza Departamentuak Ingurugiroaren gaineko Eraginaren azterlana jendaurrean jarriko du, hilabetean, gutxienez, Nafarroako ALDIZKARI OFIZIALean eta Nafarroako Foru Komunitateko egunkarietan argitaratuko den iragarki baten bidez.
1. Ingurugiro, Lurraldearen Antolamendu eta Etxebizitza Departamentuak Ingurugiroaren gaineko Eraginaren Azterlanean sartuko du jendaurreako epean gertatutakoa eta Ingurugiroaren gaineko Eraginaren Deklarazioa luzatuko du. Deklarazio honek agertarazi beharko du lurzatiaren berrantolamenduaren hasierako planteamenduetatik sartu direla ingurugiro aldagaiak eta Nafarroako Gobernuak lurzati berrantolamendua onesteko ingurugiroari dagokionez behar den informazio guztia eskura dagoela. Era berean, ebaluatutako irtenbide alternatiboek ingurugiroan dituzten ondorioak baloratuko ditu.
2. Ingurugiroaren gaineko Eraginaren Deklarazioa Nafarroako ALDIZKARI OFIZIALean eta Nafarroako Foru Komunitateko egunkarietan emanen da argitara.
1. Ingurugiro, Lurraldearen Antolamendu eta Etxebizitza Departamentuak egindako Ingurugiroaren gaineko Eraginaren Deklarazioak lurzati berrantolamendua bideragarria dela ezarriz gero, Nekazaritza, Abeltzaintza eta Elikadura Departamentuak dagokion aldeko lurzati berrantolamendua, ingurugiroaren arloan behar diren eskakizunekin, Foru Dekretu bidez onestea proposatuko dio Nafarroako Gobernuari.
2. Ingurugiroaren gaineko Eraginaren Deklarazioa ezezkoa izan eta lurzati berrantolamendua, ingurugiroari dagokionez, bideraezina dela ezarriz gero, Foru Dekretu honen 18. artikuluan xedatutakoa aplikatuko da.
3. Lurzati berrantolamendua onesten duen Foru Dekretua Nafarroako ALDIZKARI OFIZIALean emanen da argitara.
Nekazaritza, Abeltzaintza eta Elikadura Departamentuak erabakitako moduan eginen du lurzati berrantolamendua. Ingurugiro, Lurraldearen Antolamendu eta Etxebizitza Departamentuak egiaztatuko du eraikuntza proiektuari behar bezala erantsi zaizkion Ingurugiroaren gaineko Eraginaren Deklarazioan bildutako zehaztapenak eta neurri zuzentzaileak, eta hala bada, dagokion irizpena luzatuko du.
2. ATALA. TRAMITAZIOAN DAUDEN LURZATI BERRANTOLAMENDU PUBLIKOAK
1. Nekazaritza, Abeltzaintza eta Elikadura Departamentuak gaur egun sustatzen dituen lurzati berrantolamenduek, Nekazaritzako Azpiegituren Erreformari buruzko abenduaren 9ko 18/1994 Foru Legeak aipatzen duen ingurugiroaren txostena, Ingurugiro, Lurraldearen Antolamendu eta Etxebizitza Departamentuak luzatu beharrekoa, eskatuta ez badute 1999ko martxoaren 14rako, Ingurugiroaren gaineko Eraginaren Ebaluazioa egin beharko dute.
2. Aurreko zenbakian ezarritakotik kanpo daude 1999ko martxoaren 14rako behin betiko oinarriak onetsirik dauzkaten lurzati berrantolamenduak, berauek ingurugiroaren arloko aurreko legeriak zuzenduko baititu.
1. Nekazaritza, Abeltzaintza eta Elikadura Departamentuak lurzati berrantolamenduaren Obren eta Lurralde Hobekuntzen Plana prestatuko du eta Ingurugiro, Lurraldearen Antolamendu eta Etxebizitza Departamentura igorriko du, honek dagokion irizpena eman dezan.
2. Arestiko lerroaldean aipatutako irizpena ikusirik, Nekazaritza, Abeltzaintza eta Elikadura Departamentuak Ingurugiroaren gaineko Eraginaren Azterlana erredaktatu eta Ingurugiro, Lurraldearen Antolamendu eta Etxebizitza Departamentura igorriko du.
Ingurugiroaren gaineko Eraginaren Ebaluaziorako prozedura Foru Dekretu honetako 7.etik 10.era bitarteko artikuluetan ezarritakoari jarraikiz beteko da.
HIRUGARREN ATALA. LURZATI BERRANTOLAMENDU PRIBATUAK
1. Lurzati berrantolamendu pribatuei, edozein dela ere haien azalera, Ingurugiroaren gaineko Eraginaren Ebaluazioa egitea eskatuko zaie, Nekazaritza, Abeltzaintza eta Elikadura Departamentuak hasiera ematea onetsi aurretik.
2. Bete beharreko prozedura Kapitulu honen Lehenbiziko Atalean ezarritakoa izanen da. Halere, Ingurugiroaren gaineko Eraginaren Deklarazioa ezezkoa izan eta lurzati berrantolamendua, ingurugiroari dagokionez, bideraezina dela ezarriz gero, Nekazaritza, Abeltzaintza eta Elikadura Departamentuak ebazpen administratiboa emanen du lurzati berrantolamendu pribatuaren hasierari onespena ukatzeko. Ebazpen hori Nafarroako ALDIZKARI OFIZIALean emanen da argitara.
IV. KAPITULUA. XEDAPEN KOMUNAK
1. Ingurugiro, Lurraldearen Antolamendu eta Etxebizitza Departamentuak lurzati berrantolamenduaren prozeduran luzatu beharreko irizpenak dokumentazio osoa aurkezten denetik bi hilabeteko epean, gehienez, luzatuko dira.
2. Irizpena luzatzeko epea iraganik hura eman gabe, aldekoa dela ulertu ahal izanen da, prozedurak aurrera egiteko ondorioetarako.
Ingurugiroaren gaineko Eraginaren deklarazioak ordezkatuko du, ondorio guztietarako, Nekazaritzako Azpiegituren Erreformari buruzko abenduaren 9ko 18/1994 Foru Legearen 100 eta 101. artikuluetan aipatzen den aginduzko txostena, Ingurugiro, Lurraldearen Antolamendu eta Etxebizitza Departamentuak luzatu beharrekoa, ez baita aurrerantzean beharrezkoa izanen.
1. Nekazaritza, Abeltzaintza eta Elikadura Departamentuari dagokio Ingurugiroaren gaineko Eraginaren Deklarazioan ezarritakoa betetzen dela begiratu eta haren jarraipena egitea.
2. Jarraipenaren helburua da Ingurugiroaren gaineko Eraginaren Deklarazioan aurreikusitakoa eta lurzati berrantolamenduaren garapenaren eta exekuzio materialaren benetako bilakaera bat datozen aztertzea. Honakoen azterketa hartuko du barnean: ingurugiro ebaluazioaren esparrua egokia den, elementu adierazgarrien eta haien ondorioen identifikazio, deskripzio eta ebaluazioaren gaineko ziurtasuna eta ondorio nabarmenak gutxitu edo desagertarazteko zehaztutako prebentzio eta zuzenketa ekintzen eraginkortasuna.
3. Zainketaren helburua da Ingurugiroaren gaineko Eraginaren Deklarazioan ezarri diren eta lurzati berrantolamenduaren onespenari erantsi zaizkion baldintzak betetzen direla kontrolatzea.
4. Jarraipena eta zainketa Ingurugiroaren gaineko Azterlanean sartu zen jarraipen eta zainketa plana kontuan hartuta.
5. Nekazaritza, Abeltzaintza eta Elikadura Departamentuak Ingurugiro, Lurraldearen Antolamendu eta Etxebizitza Departamentuari lurzati berrantolamenduaren exekuzio aldi guztietan egindako jarraipen eta zainketaren berri eman beharko dio.
Nekazaritza, Abeltzaintza eta Elikadura Departamentuak, lurzati berrantolamenduaren arloko eduki organoa den aldetik, eta Ingurugiro, Lurraldearen Antolamendu eta Etxebizitza Departamentuak, ingurugiroaren arloko organo eskuduna den aldetik, sortu daitezkeen desadostasunak Nafarroako Gobernuak ebatziko ditu, Foru Dekretu honen 14. artikuluko 2. zenbakian xedatutakoa baztertu gabe.
XEDAPEN IRAGANKORRAK
Foru Dekretu honen III. Kapituluko Lehen eta Hirugarren ataletan dauden zehaztapenak 1999ko martxoaren 14tik aurrera eskatutako lurzati berrantolamenduetan aplikatuko dira.
Foru Dekretu honen III. Kapituluko Bigarren atalean dauden zehaztapenak dagoeneko eskaturik dauden baina Ingurugiro, Lurraldearen Antolamendu eta Etxebizitza Departamentuaren ingurugiro txostena eskatu ez duten lurzati berrantolamenduetan aplikatuko dira. Arestiko lerroaldean ezarritakotik kanpo geldituko dira 1999ko martxoaren 14an behin betiko oinarriak onetsirik izanik, ingurugiroaren arloko lehengo legeriaren menpe dauden lurzati berrantolamenduak.
AZKEN XEDAPENAK
Ahalmena ematen zaie Nekazaritza, Abeltzaintza eta Elikadura kontseilariari eta Ingurugiro, Lurraldearen Antolamendu eta Etxebizitza kontseilariari Foru Dekretu hau garatu eta betearazteko behar diren xedapenak eman eta ekintza guztiak egin ditzaten.
Foru Dekretu honetan ezarritakoaren kontra doazen maila bereko edo txikiagoko xedapen guztiak indarrik gabe gelditu dira.
Foru Dekretu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, mila bederatziehun eta lauretan hogeita hemeretziko ekainaren hogeita batean.-Nafarroako Gobernuko lehendakaria, Miguel Sanz Sesma.-Ingurugiro, Lurraldearen Antolamendu eta Etxebizitza kontseilaria, Yolanda Barcina Angulo.-Nekazaritza, Abeltzaintza eta Elikadura kontseilaria, Ignacio Martínez Alfaro.
Iragarkiaren kodea: A9906659
