LEXNAVARRA
1/1997 FORU DEKRETUA, URTARRILAREN 7KOA, NAFARROAKO GOBERNUKO KIDEEN ETA NAFARROAKO FORU KOMUNITATEKO ADMINISTRAZIOKO GOI KARGUDUNEN BATERAEZINTASUNEI BURUZKO AZAROAREN 4KO 19/1996 FORU LEGEAN AIPATURIKO ZEHAPEN PROZEDURAREN ERREGELAMENDUA ONESTEN DUENA.
BON N.º 20 - 14/02/1997
I. KAPITULUA. XEDAPEN OROKORRAK
II. KAPITULUA. ARAUHAUSTE ARINEI DAGOKIEN ZEHAPEN PROZEDURA
III. KAPITULUA. ARAUHAUSTE LARRI ETA OSO LARRIEI DAGOKIEN ZEHAPEN PROZEDURA
LEHENENGO ATALA. AURREKO JARDUKETAK ETA PROZEDURAREN HASIERA
BIGARREN ATALA. INSTRUKZIOA
- 12. artikulua
- 13. artikulua
- 14. artikulua
- 15. artikulua
- 16. artikulua
- 17. artikulua
- 18. artikulua
- 19. artikulua
- 20. artikulua
HIRUGARREN ATALA. AMAIERA
Nafarroako Foru Komunitateko Administrazioaren funtzionamendu zehatz eta objetiboa lortzen lagundu nahirik, azaroaren 4ko 19/1996 Foru Legearen bidez Nafarroako Gobernuko kideen eta Nafarroako Foru Komunitateko Administrazioko goi kargudunen bateraezintasunen araubidea ezarri da.
Foru Lege horren V. kapitulua zehatzeko ahalmenaren ingurukoa da eta bertan agertzen diren arauek bide ematen dute, Legean agindutakoa hausteagatik zehapenak jartzeko orduan, zorroztasun handiena erabiltzeko. Prozedurak ebazteko eskumena duten organoen independentzia ere aldarrikatzen da eta 18. artikuluak zehazten du kasuan kasuko zehapen prozedura Foru Dekretu bidez ezarriko dela, indarreko lege-hastapenekin bat etorriz eta Foru Lege horrek ezartzen dituen xedapenen arabera.
Hortaz, Foru Dekretu honen helburua artikulu horretan agindutakoa betearaztea da eta, horretarako, Nafarroako Gobernuko kideen eta Foru Komunitateko Administrazioko goi kargudunendako zehapen prozedura onetsi da, aipatu Bateraezintasunei buruzko Foru Legean agindutakoa betetzen ez duten kasuetarako.
Horrenbestez, Lehendakaritza eta Barne kontseilariak proposaturik, Nafarroako Gobernuak mila bederatziehun eta laurogeita hamazazpiko urtarrilaren zazpian egindako bilkuran harturiko erabakiarekin bat etorriz,
DEKRETATU DUT:
I. KAPITULUA. XEDAPEN OROKORRAK
Erregelamendu honen helburua da Nafarroako Gobernuko kide eta Foru Komunitateko Administrazioko goi kargudunendako zehapen prozedura zehaztea, Nafarroako Gobernuko kideen eta Nafarroako Foru Komunitateko Administrazioko goi kargudunen bateraezintasunei buruzko azaroaren 4ko 19/1996 Foru Legean agindutakoa betetzen ez duten kasuetarako.
Nafarroako Gobernuko eta Nafarroako Foru Komunitateko Administrazioko goi kargudunei ezin zaie inolako zehapenik jarri, ez eta azaroaren 4ko 19/1996 Foru Legean aurreikusitako neurri bakar bat ere hartu, Erregelamendu honetan ezarritako prozedurari jarraikiz ez bada.
Zehapen prozedurak izaera irekia izanen du fase guztietan. Hori horrela, prozeduraren aldi guztietan goi kargudunak eskubidea izanen du tramitazioaren egoera ezagutzeko eta bertan dauden agiriak ikusi eta horien kopiak eramateko.
Zehapen prozedura ahalik eta azkarren tramitatuko da, ofizioz tramite guztietan.
1. Zehapen prozeduraren aldiren batean, arau-haustea delitutzat har daitekeela uste bada, Nafarroako Gobernuak Ministerio Fiskalari igorriko dio erru lekukoa, horri buruzko erabakia hartu ondoren, eta organo eskudunak prozeduran segitzeari utziko dio harik eta agintari judizialek auzibidea amaitzeko ebazpena eman arte.
2. Nolanahi ere, epaileen zigor ebazpen irmoaren bidez frogatutzat hartzen diren egitate horiek lotetsi eginen dute organo eskuduna, bideratzen den zehapen prozedurari dagokionez.
II. KAPITULUA. ARAU-HAUSTE ARINEI DAGOKIEN ZEHAPEN PROZEDURA
1. Organo eskudunak arau-hauste arina egin dela uste eta prozedura ireki behar dela irizten badu, zehatzeko ahalmena erabiltzeko kapitulu honetan arautzen den prozedura tramitatuko da.
2. Kapitulu honetan berariaz aipatzen ez den orotan, hurrengo kapituluan ezarritako aginduak aplikatuko dira.
1. Prozedura organo eskudunaren erabakiaz irekiko da eta bertan zehaztuko da prozedurak izaera laburra izanen duela. Erabaki horren berri emanen zaie prozeduraren instruktoreari eta goi kargudunari.
2. Instruktoreak lehenbailehen egin beharko du karguen plegua, honakoak bilduko dituena: egozten zaion egitatea, ustez egin duen arau-haustea eta horri legokiokeen zehapena.
3. Karguen plegua goi kargudunari igorriko zaio, bost eguneko epearen barruan defentsarako egoki juzkatzen duena azal dezan eta baliatu nahi dituen frogak proposa ditzan.
4. Bidezko frogei dagozkien eginbideak hurrengo bost eguneko epearen barruan eginen dira. Edonola ere, instruktoreak hala iritzita, epe hori luza liteke.
5. Hala frogarik proposatzen ez den kasuetan, nola aurkezten direnean haiek aztertu eta gero, organo eskudunak hiru eguneko epean emanen du behar den ebazpena.
III. KAPITULUA. ARAU-HAUSTE LARRI ETA OSO LARRIEI DAGOKIEN ZEHAPEN PROZEDURA
LEHENENGO ATALA. AURREKO JARDUKETAK ETA PROZEDURAREN HASIERA
1. Zehapen prozedura ofizioz hasiko da kasu guztietan, organo eskudunaren erabakiaren bidez, berak hala erabakita edo salaketa baten ondorioz.
2. Funtzio Publikoaren Zuzendaritza Nagusiari jakinarazi beharko zaio salaketaren edukina, honako datu hauek bildu beharko baititu: aurkezten duten pertsonen nortasun datuak, ustezko arau-haustearen azalpena, noiz egin zen eta ustezko erantzulearen identifikazioa.
3. Salatzaileak hala eskatzen badu, bere nortasuna isilik mantenduko da.
4. Salaketa aurkezten den guztietan, salatzaileari jakinarazi beharko zaio prozedura irekitzeko erabakia hartu den ala ez.
1. Zehapen espedientea hasi aurretik, Funtzio Publikoaren Zuzendaritza Nagusiak jarduketa zenbait egin ahalko ditu, hari hasiera emateko inguruabar aski ote dagoen zehazteko. Jarduketa horien berri emanen dio goi kargudunari.
2. Aurretiko informazio hori bildu ondoren, Funtzio Publikoaren Zuzendaritza Nagusiak azaroaren 4ko 19/1996 Foru Legearen 19.1 artikuluan aurreikusitako organoei bidaliko die egindako jarduketei buruzko txostena.
1. Zehapen prozedurari hasiera emateko, honako datu hauek bildu beharko dira gutxienez:
a) Ustez arau-haustearen erantzule den goi karguduna identifikatzeko datuak.
b) Prozedura irekitzeko oinarri izan diren egitateen azalpen laburra eta nola kalifikatu ote litezkeen, instrukzioan erabakitzen dena gorabehera.
c) Prozeduraren instruktorearen eta, halakorik bada, idazkariaren izen-abizenak eta horiek ukatzeko araubidearen azalpen zehatza.
d) Espedientea ebazteko eskumena duen organoa eta eskumen hori eman dion araua.
e) Prozedura aldietan alegazioak aurkeztu eta entzutea izateko eskubidea adierazi beharko da eta horiek baliatzeko finkaturiko epeak.
2. Prozedura irekitzeko erabakia instruktoreari bidaliko zaio, horren inguruan egin diren jarduketa guztien azalpenarekin batera, eta goi kargudunari jakinaraziko.
3. Prozedura hasten den egunetik bi hilabeteko epean goi kargudunari horren berri ematen ez bazaio, jarduketak artxibatuko dira eta hala jakinaraziko zaio, leporatu dakiokeen erantzukizuna deusetan galarazi gabe.
Zehapen prozeduraren instruktorea zein idazkaria atzera bota edo haiek beraiek uko egiteko araubidea Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legearen II. Tituluko III. Kapituluan ezarritakoa izanen da.
BIGARREN ATALA. INSTRUKZIOA
Instruktoreak ebazpena emateko oinarritzat hartzen diren datuak zehaztu, aztertu eta frogatzeko behar diren instrukzio ekintza guztiak egiteko agindua emanen du, batez ere, egitatea argitu eta zehapenaren erantzukizuna zehazten laguntzen duten froga eta jarduketei buruzkoak.
Instruktoreak erabakiak eta ebazpenak hartzeko behar dituen txostenak eskatu ahalko ditu, baina beti ere horien beharra azaldu beharko du.
1. Egiten diren jarduketak azterturik, instruktoreak karguen plegua prestatuko du, horrelakorik behar bada, non adieraziko baitira egozten diren egitateak, horien azalpena eta ustez egindako arau- haustearen maila.
2. Karguen plegu hori goi kargudunari igorriko zaio eta hamabost eguneko epea emanen zaio defentsan erabili nahi dituen alegazioak aurkez ditzan.
Karguen pleguaren erantzuna jasotakoan edo epe hori amaitutakoan, instruktoreak, ofizioz edo alderdi batek eskatuta, frogak aztertzeko epe bat ireki ahalko du, hamabost eta hogeita hamar egun bitartekoa, egoki juzkatzen dituen frogak proposatu edo argitzeko. Dena den, instruktoreak epe hori luzatzeko eskumena izanen du, beharrezkoa baderitzo.
2. Frogak argitzeko fasearen hasiera goi kargudunari jakinarazi beharko zaio.
Prozedura ebazteko oinarrizko frogak egiaztatzeko, zuzenbidean onartzen den edozein baliabide erabili ahalko da.
1. Goi kargudunak eskubidea izanen du egoki juzkatzen dituen froga guztiak proposatzeko, baina horretarako, frogak aztertzeko epea amaitu baino hiru egun lehenago, beranduenik, auzia argitzeko lagungarri diren agiriak ekarri beharko ditu, bere esku daudenak alegia.
2. Instruktoreak ahalmena izanen du ez-beharrezkoak edo azalekoak iruditzen zaizkion frogak edo horien egiaztapen saioak egiteko eskaerak ez onartzeko, are deskargurako direnak ere, baina ezespen hori arrazoibidez azaldu beharko du.
1. Frogetarako epe hori amaitu eta hamabost eguneko epearen barruan, instruktoreak ebazpen proposamena emanen du eta bertan honakoak azalduko ditu zehatz-mehatz: egitateak, egindako arau-haustea zehazteko beharrezkoa den egitateen balorazio juridikoa eta, azaroaren 4ko 19/1996 Foru Legearen 16. artikuluan aurreikusitakoaren arabera, aplika daitezkeen zehapen eta neurri osagarriak.
2. Instruktoreak ebazpen proposamen horren berri emanen dio goi kargudunari, hamar eguneko epearen barruan defentsarako egoki juzkatzen dituen alegazioak aurkez ditzan.
Goi kargudunari entzutea eman ondoren edo, bestela, epea alegaziorik aurkeztu gabe amaiturik, instruktoreak prozeduraren hasiera agindu duen organoari igorriko dio espedientea, aztertu eta egoki juzkatzen dituen jarduketa osagarriak egin eta gero, behar den ebazpena eman dezan.
1. Zehapena jartzeko eskumena duen organoak espedientea instruktoreari itzuli ahalko dio, azken erabakia hartzeko behar-beharrezkotzat jotzen dituen eginbideak egin ditzan.
2. Horrelako kasuetan, instruktoreak, zehapena jartzeko eskumena duen organoari espedientea berriz ere igorri baino lehen, goi kargudunari jarduketa horien berri emanen dio, defentsarako egoki juzkatzen duen guztia alega dezan hamar eguneko epearen barruan.
HIRUGARREN ATALA. AMAIERA
1. Zehapen prozedurari amaiera emateko ebazpenean espedientean planteaturiko auzi guztiak ebatzi beharko dira. Arrazoibidez azaldu beharko da hori guztia eta karguen pleguan eta ebazpen proposamenean agertu ez diren egintzak ez dira onartuko, aurreko artikuluko 1. zenbakian aurreikusitakoa aplikatzearen ondoriozkoak izan ezik, bestelako balorazio juridikoa eman arren.
2. Orobat, egintzat hartu den arau-haustea zehatz- mehatz azaldu beharko da ebazpenean eta, horrez gainera, arau-hauste hori zein testutan agertzen den, arau-hauste mota, horren erantzulea, ezarri den zehapena eta, horrelakorik bada, harturiko neurri osagarriak. Bestela, arau-hausterik ez dela izan deklaratu beharko du.
3. Prozedurari hasiera eman eta sei hilabeteko epean ebazpenik ematen ez bada, goi kargudunaren erruagatik izan daitezkeen etenaldiak eta 5. artikuluan esandakoaren indarrez gerta daitekeen prozeduraren etenaldia kontuan hartuta, Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legearen 43.4 artikuluan ezarrita dagoen iraungiteko epea kontatzen hasiko da.
4. Iraungiteko epea amaiturik, organo eskudunak, goi kargudunak hala eskatzen badu, prozedura iraungi eta jarduketak artxibatu direla adierazteko ziurtagiria emanen du.
Amaierako ebazpenaren berri goi kargudunari jakinarazi beharko zaio eta bertan adieraziko da zein helegite jar diezaiokeen, zein organotan eta noiz.
Zehapenak eta balizko neurri osagarriak ebazpenean adierazi moduan betearaziko dira, administrazio bidean irmo direnetik aurrera.
1. Zehatu den goi kargudunak, zigortu den jokabidearen ondorioz, Nafarroako Ogasun Publikoaren kontura nolabaiteko diru irabazirik izan badu, zehapen prozeduraren ebazpenean adieraziko da behar ez bezala jasotako dirua berriz ere sartzeko agindua.
2. Kopuru horiek zehazteko, beste prozedura osagarri bat eginen da, Nafarroako Gobernuaren aginduz ireki eta berak ebatzi beharko duena.
3. Prozeduraren ebazpenak amaiera emanen dio administrazio bideari eta, hortaz, berehala betearazi beharko da.
Lehendakaritza eta Barne kontseilariari ahalmena ematen zaio Erregelamendu hau garatu eta aplikatzeko behar diren xedapenak eman ditzan.
Erregelamendu honek Nafarroako ALDIZKARI OFIZIALean argitara eman eta biharamunean hartuko du indarra.
Iruñean, mila bederatziehun eta laurogeita hamazazpiko urtarrilaren zazpian.-Nafarroako Gobernuko lehendakaria, Miguel Sanz Sesma.-Lehendakaritza eta Barne kontseilaria, Rafael Gurrea Induráin.
Iragarkiaren kodea: A9700425
