(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

248/2011 FORU DEKRETUA, ABENDUAREN 28KOA, NAFARROAKO FORU KOMUNITATEAN ARAUBIDE BEREZIKO KIROL IKASKETEN ANTOLAMENDUA ETA GARAPENA ARAUTZEN DITUENA Nota de Vigencia.

BON N.º 21 - 31/01/2012

  I. KAPITULUA. ARAUBIDE BEREZIKO KIROL IKASKETAK

  II. KAPITULUA. ARAUBIDE BEREZIKO KIROL IKASKETEN ANTOLAMENDU AKADEMIKO OROKORRA

  III. KAPITULUA. TITULUEN CURRICULUMAREN DISEINUA, ANTOLAKETA, GARAPENA ETA BANAKETA

  IV. KAPITULUA. ARAUBIDE BEREZIKO KIROL IKASKETAK ETA KIROL ETA LANBIDE ESPARRUA

  V. KAPITULUA. ARAUBIDE BEREZIKO KIROL IKASKETEN ILDO ESTRATEGIKOAK.

  VI. KAPITULUA. ARAUBIDE BEREZIKO KIROL IKASKETAK EMATEN DITUZTEN IKASTETXEAK

Zioen azalpena

1. Kirolari buruzko urriaren 15eko 10/1990 Legeak kirolaren antolamendua ezartzen du, eta 55.1 artikuluan zehazten du ezen, Gobernuak, Hezkuntza Ministerioak proposaturik, kirol teknikarien ikasketak arautuko dituela, hezkuntza mailetan ageri diren betebeharren arabera eta sarbideen, programen, jarraibideen eta ikasketa planen baldintzak kontuan harturik.

Araubide bereziko kirol ikasketak Hezkuntzari buruzko maiatzaren 3ko 2/2006 Lege Organikoari lotuta daude, hain zuzen ere I. tituluko VIII. kapituluari. 63.3 artikuluan ezartzen du ikasketa horiek kirol modalitateak eta, hala denean, espezialitateak oinarri hartuta antolatuko direla, eta 64.1 artikuluan azaltzen du ikasketa horiek bi mailatan (erdi maila eta goi maila) egituratuko direla, eta Lanbide Kualifikazioen Katalogo Nazionala izan dezaketela erreferentzia.

Kualifikazioei eta Lanbide Heziketari buruzko ekainaren 19ko 5/2002 Lege Organikoak Kualifikazioen eta Lanbide Heziketaren Sistema Nazionala ezartzen du, produkzio sektorearen eskakizunei erantzutera bideratutako prestakuntza ekintzen esparruan, zeinean gorputz jarduerak eta kirolak bizitasun handiko eta hazteko gaitasun handiko elementu nabarmen bat osatzen duten.

Nafarroako Kirolari buruzko uztailaren 5eko 15/2001 Foru Legeak, II. tituluko I. kapituluaren (Foru Komunitateko Administrazioaren eskumenak arautzen ditu) 5. artikuluko h) atalean, ezartzen du Nafarroako Gobernuaren eskumena dela kirol teknikarien prestakuntza garatu eta arautzea.

Horretaz gainera, titulazioak eta prestakuntza arautzeari buruzkoa den VII. tituluaren 83. artikuluan berriz ere xedatzen du Nafarroako Gobernua dela kirol teknikarien titulu ofizialak lortzera bideratutako ikasketak antolatzearen ardura duena; halaber, aurreragoko erregelamendu bidezko garapenaren esku uzten ditu Foru Komunitateko hezkuntza administrazioari eta kirol administrazioari esparru horretan dagozkien eginkizunak eta eskumenak.

Lege horiek esparru arautzaile bat sortzen dute, eta horrek bide ematen du kirol ikasketak kirol garapenaren oinarrietako baten gisara finkatzeko eta kirol jarduera profesionala errazteko. Alde horretatik, foru dekretu hau lehen urrats beharrezko bat da, Nafarroako Gobernuak egiten duena, kirolarien hastapen, entrenamendu eta zuzendaritza eginkizunak kirol modalitate eta espezialitate desberdinetan garatuko dituzten kirol teknikariak prestatzeko. Horrela, titulu ofizialak lortzeko aukera izanen dute teknikari horiek. Kirol ikasketak abian jartzearen elementu estrategiko bat Nafarroako kirol federazioen eta hezkuntza eta kirol arloetan eskumena duten Nafarroako Gobernuko departamentuen arteko lankidetza da, Kirolari buruzko urriaren 15eko 10/1990 Legearen 33. artikuluak ezartzen duen moduan.

Araubide bereziko kirol ikasketen antolamendu orokorra ezartzen duen urriaren 24ko 1363/2007 Errege Dekretuaren bidez garatu da ikasketa horien erregulazioa eta antolamendua. Errege dekretu horrek zehazten du kirol ikasketen modalitate batzuek lanbide heziketaren kontzeptu orokorrarekin lotzen dituzten ezaugarriak dituztela, baina horrek ez dakar uko egin behar izatea kirol sistemari zuzendutako berariazko eskaintza bat izateari, hau da, Gorputz eta Kirol Jardueren lanbide arloak, hezkuntza sistemaren lanbide heziketaren barnean, sektoreko gainerakoarentzat egiten duen eskaintzatik bereizitako eskaintza bat izateari.

Araubide bereziko kirol ikasketa hauek ziklo hierarkizatuetan antolatzen dira, Kirolaren Kontseilu Nagusiak onartutako kirol modalitate eta espezialitateak oinarri hartuta. Horiek gero kirol prestakuntzako modulu eta multzoetan antolatzen dira.

Ikasketa hauek idiosinkrasia berezia dute, beren xedea baita ikasleak kirol modalitate edo espezialitate bati lotutako lanbide jarduerarako prestatzea, bai eta lan eta kirol munduaren bilakaeraren eta herritar aktiboen arabera egokitzeko erraztasunak ematea ere.

Araubide bereziko kirol ikasketen antolamenduaren funtsezko printzipioetako bat malgutasuna da, horrek aukera ematen baitu kirol modalitate eta espezialitateen ezaugarriei eta helburuei egokitzeko, baita ikasleen ezaugarri eta beharrei ere. Halaber, hezkuntza ahalik eta banakatuena emateko bidea jartzen du, ikasle guztiek hezkuntzan emaitza onak izan ditzaten.

Kirol teknikarien prestakuntzarako garatuko den antolamendu ereduaren oinarria kirol klub eta elkarteek (Nafarroako Foru Komunitatearen esparruan kirolen federezioetan bilduek) osatutako egitura izanen da, kontuan harturik Nafarroako Gobernuan kirol arloan eskuduna den departamentuak dituen eskumenak. Hezkuntza Departamentuak teknikarien prestakuntzarekin lagundu behar du, teknikariak gakoak baitira bai kirol praktikarako bai lehiaketarako. Horregatik, hezkuntzaren eta kirolaren arloetan eskudunak diren departamentuen ekintza koordinatuak, baita kirol federazioenak ere, funtsezkoa izan behar du Nafarroan kirola hobetzeko.

Aurreko oinarrizko antolamendua kontuan harturik, foru dekretu honek alderdi estrategiko eta arau berriak garatzen eta sartzen ditu. Horrela, araubide bereziko kirol ikasketetarako helburu batzuk ezarri dira, ikasketa horiek Nafarroan etorkizunean hartuko duten norabidea finkatzeko.

2. Nafarroaren esparrurako soilik garatzen diren arauei dagokienez, lehenbizi, araubide bereziko kirol ikasketetako tituluen curriculumaren diseinuari, antolaketari, garapenari eta banaketari buruzko artikuluak azpimarratu behar dira. Curriculum hori autonomia erkidegoek egin behar dute eta, Nafarroako Foru Komunitatearen kasuan, zenbait alderdi berriztatzaile sartu dira. Batetik, kirol ikasketen nahitaezko moduluak sortu dira, Estatuak titulu bakoitzerako finkatutako gutxieneko irakasgaiei Hezkuntza Departamentuak erantsiko dizkienak, eta, bestetik, aukera ematen da ikasketa horiek ematen dituzten ikastetxeek kirol ikasketen modulu osagarrien curriculuma diseinatu ahal izateko.

Kontuan hartu beharreko bigarren elementua kirol inguruneari dagokiona da, funtsezko eta oinarrizko erreferentea baita lanbideratzea helburu nagusi duten ikasketa hauentzat. Horrenbestez, ikastetxeak kirol eta lan munduari egokitzeko ezartzen diren helburuek mugatutako esparruan, jarrera ekintzailea eta kirol arloko profesionalen parte-hartzea sustatu nahi da, kirol ikasketen zikloetako irakaskuntzan laguntzaile gisa ager daitezen.

Hirugarren elementua araubide bereziko kirol ikasketak etorkizunari begira proiektatzearekin lotuta dago, eta araubide bereziko kirol ikasketen ildo estrategikoetan xehakatuta dago, esparru hauei lotuta: kirolaren eta teknologiaren arloko berrikuntza, nazioartekotzea, lanbideari buruzko informazioa eta orientazioa, kirolaren sustapenean parte hartzea eta departamentuen eta Nafarroako kirol federazioen arteko lankidetza.

3. Araubide bereziko kirol ikasketetan kirolaren eta teknologiaren arloko berrikuntzak duen azken helburua da ikasleen artean beharrezkoak diren ezagutzak eta gaitasunak sustatzea, eskolatik kirolaren arloko lan mundurako eta kirol teknifikaziorako igarobidea arrakastatsua izan dadin. Hori horrela, ildo estrategiko honek aukera ematen du araubide bereziko kirol ikasketak lanbide ikasketen zaintza sisteman integratzeko.

Araubide bereziko kirol ikasketen nazioarteratzea proiektu eta ekintza zehatz batzuei lotuta dago, gainerako elementu estrategiko guztiak bezala. Proiektu horiek, eremu honetan, zerikusia dute ikasleen eta irakasleen nazioarteko mugigarritasunarekin eta, orobat, atzerriko entitate eta erakundeekin mota desberdinetako proiektuak egiteko interesarekin. Elementu estrategiko horren zuzeneko ondorio bat da goi mailako kirol ikasketen zikloetan atzerriko hizkuntza bat sartzea, ingelesa lehentasunez. Horrek guztiak nazioarteko informazioa eta baliabideak eskuratzeko aukera emanen du, eta ikasleak profesionalki edozein herrialdetara joateko aukera handitzen lagunduko du.

Lanbide orientazioa eta informazioa, gazteentzako eta kirol teknikarientzako prestakuntza integratzeko duen ahalmenagatik, mugigarritasun, malgutasun eta hedadura handiagoa sortuko duen tresna bat da. Hala, herritarrek lanbideari eta lanari buruzko informazio eta orientazio zerbitzua izanen dute araubide bereziko kirol ikasketak ematen dituzten ikastetxeetan.

Kirolaren sustapenean parte hartzea hiru jarduketa ardatzetan oinarrituta dago: lehenik, berariazko populazio sektoreetan sustatzea, hala nola desgaitasunak dituzten pertsonak, adineko pertsonak, 16 urtetik beherakoak eta gizartean bazterturik egoteko arriskuan daudenak. Bigarrenik, gorputz eta kirol jarduera emakumeen artean sustatzea, gizonen eta emakumeen arteko benetako berdintasuna lortzeari begira. Eta, hirugarrenik, gorputz eta kirol jardueraren sustapenean parte hartzea, osasuna mantendu eta hobetzeko elementu onuragarri bat den aldetik.

Horrenbestez, Nafarroako Eskola Kontseiluaren aldez aurreko txostena eta Nafarroako Kirol Kontseiluaren nahitaezko txostena, loteslea ez dena, ikusirik, Hezkuntzako kontseilariak proposaturik, eta Nafarroako Gobernuak bi mila eta hamaikako abenduaren hogeita zortziko bilkuran hartutako erabakiarekin bat,

DEKRETATU DUT:

I. KAPITULUA. ARAUBIDE BEREZIKO KIROL IKASKETAK

1. artikulua . Xedea eta aplikazio eremua.

Foru dekretu honen helburua da araubide bereziko kirol ikasketen egiturari eta antolaketari buruzko jarraibide orokorrak ezartzea Nafarroako Foru Komunitatearen esparruan, Hezkuntzari buruzko maiatzaren 3ko 2/2006 Lege Organikoan xedatutakoari jarraikiz eta, hala badagokio, Lanbide Kualifikazioei eta Lanbide Heziketari buruzko ekainaren 19ko 5/2002 Lege Organikoan eta araubide bereziko kirol ikasketen antolamendu orokorra ezartzen duen urriaren 24ko 1363/2007 Errege Dekretuan xedatutakoari jarraikiz.

2. artikulua . Kontzeptua eta xedea.

1. Araubide bereziko kirol ikasketak honela definitzen dira: ikasketa multzo bat, ikasleei gaikuntza ematen diena kirol modalitate edo espezialitate batekin zerikusia duten lanbideetan modu kualifikatuan aritzeko, lan munduan sartzeko, lan eta kirol munduaren bilakaerara egokitzeko, eta ezagutzan eta etengabe ikasten egoteko beharrean oinarritutako gizarte baten aldaketetara egokitzeko, horrela bizitza sozial, kultural eta ekonomikoan modu aktiboan parte hartu ahal izateko.

2. Araubide bereziko kirol ikasketetako prestakuntza ekintzak sistema ireki eta malgu batean antolatuko dira, etengabeko prestakuntza prozesu baten barrenean, bizitza osoan ikasten egon beharrari erantzuna emateko.

3. Araubide bereziko kirol ikasketen izaera ireki eta malgua antolaketa modalitateen eta prestakuntza eskaintzen askotarikotasunean zehazten da, besteak beste.

3. artikulua . Helburuak.

Urriaren 24ko 1363/2007 Errege Dekretuaren 2. artikuluan adierazitako helburuak garatu eta zehazteko, araubide bereziko kirol ikasketen funtsezko helburuak Nafarroan, aipatutakoez gain, honako hauek dira:

a) Gorputz jarduera osasungarria definitzen duten ezaugarriak ezagutzea, baita pertsonen eta taldeen osasunerako ondorio onuragarriak ere.

b) Kirolaren hezkuntza balioak eta balio etikoak bultzatzeko ezagutzak eta jarrerak izatea: bizikidetza, errespetua, elkartasuna eta ahalegina.

c) Nafarroako Foru Komunitateko araubide bereziko kirol ikasketak Europako esparruari egokitzen laguntzea, ikasleek nazioarteko mugigarritasun ekintzetan parte hartzea sustatuz.

d) Ikasleei lan esperientziak ematea kirol eta lanbide arloan.

e) Etengabeko prestakuntzarako ingurune egokiak sortzea, informazioaren eta komunikazioaren teknologien bidezko ikaskuntza eta autoikaskuntza errazten dituzten ikuspegi didaktikoak garatuz.

f) Irakasleen gaitasunen etengabeko garapena eta eguneratzea sustatzea, beren lanbidean gertatzen diren aldaketak aintzat hartuz.

g) Desgaitasuna duten pertsonei kirol arloko lanbide kualifikazio motibagarri bat lortzeko aukera ematea, kirolaren lan esparruan sartu ahal daitezen.

h) Nafarroako Foru Komunitateko natur ondarea ezagutu, baloratu eta errespetatzea, eta ondare hori hobetzeko lankidetzan aritzea.

i) Nafarroako Foru Komunitateko kirol modalitate eta espezialitateen errealitatea eta berezitasunak ezagutzea.

4. artikulua . Araubide bereziko kirol ikasketen printzipioak.

Urriaren 24ko 1363/2007 Errege Dekretuaren 3. artikuluan ezarritako printzipioez gainera, ikasketa hauek, Nafarroako Foru Komunitatean, printzipio hauetan oinarrituta daude:

a) Ikasketa hauen eskaintza Nafarroako Foru Komunitateko bai pertsonen bai kirol sektoreen prestakuntza eta lanbide beharrei egokitzea.

b) Malgutasuna eta irisgarritasuna, bizitzan zehar izaten den ikaskuntza erraztuz eskaintza mota desberdinen eta ikasketa horien antolaketa malguaren bitartez.

c) Ikastetxeek, ikasleek eta irakasleek hezkuntza programa europarretan parte hartzea eta curriculumean atzerriko hizkuntzak erabiltzea.

d) Ikerketa eta berrikuntza sustatzea hezkuntzaren eta kirolaren arloetan.

e) Lanbideari eta lanari buruzko informazioa eta orientazioa, eta ekimenaren kultura sustatzea.

II. KAPITULUA. ARAUBIDE BEREZIKO KIROL IKASKETEN ANTOLAMENDU AKADEMIKO OROKORRA

5. artikulua . Kirol ikasketen oinarrizko antolaketa eta egitura.

1. Araubide bereziko kirol ikasketak bi mailatan egituratuta daude: erdi maila, derrigorrezkoaren ondoko bigarren hezkuntzaren barnean, eta, goi maila, goi mailako hezkuntzaren barnean.

2. Ikasketa hauek, Kirolaren Kontseilu Nagusiak onartutako kirol modalitate eta, hala bada, espezialitateak oinarri hartuta, kirol ikasketen zikloetan antolatzen dira:

a) Erdi mailako kirol ikasketak bi ziklotan antolatuta daude: erdi mailako hasierako zikloa eta erdi mailako bukaerako zikloa.

b) Goi mailako kirol ikasketak goi mailako ziklo bakar batean antolatuta daude.

6. artikulua . Kirol ikasketen zikloak, multzoak eta moduluak antolatzea.

1. Erdi eta goi mailako tituluak lortzera bideratutako ikasketen iraupena curriculuma Nafarroan garatzen duen araudian ezarriko da, urriaren 24ko 1363/2007 Errege Dekretuaren 7. artikuluan xedatutakoari jarraikiz.

2. Kirol ikasketen zikloak kirol ikasketen moduluetan, iraupen aldakorrekoetan, antolatzen dira; modulu horiek gaitasun unitate bati edo batzuei lotuta daude edo, bestela, tituluari dagozkion lanbide, gizarte-hezkuntza eta kirol helburuei.

3. Honela sailkatzen dira moduluak:

a) Kirol ikasketen berariazko moduluak. Kirol modalitate edo espezialitateari zuzenean lotutako prestakuntza.

b) Kirol ikasketen modulu komunak. "Kirol hastapena", "Kirol teknifikazioa" eta "Goi errendimendua" izeneko prozesuei dagozkien lanbide gaitasunei lotutako prestakuntza, kirol modalitate edo espezialitatea bat ala beste izan. Ikasketa hauen beren helburuak ere biltzen dira.

c) Prestakuntza praktikoko modulua. Benetako kirol eta lanbide ingurunean osatu beharrekoa den prestakuntza.

d) Bukaerako proiektuko modulua, goi mailako kirol ikasketen zikloen kasuan.

4. Kirol ikasketen moduluak multzo hauetan biltzen dira:

a) Kirol ikasketen multzo komuna: kirol ikasketen modulu komunek osatzen dute. Kirol modalitate eta espezialitate guztietarako berbera eta nahitaezkoa da, zikloetako bakoitzean.

b) Kirol ikasketen berariazko multzoa: kirol ikasketen berariazko moduluek, prestakuntza praktikoko moduluak eta, hala denean, bukaerako proiektuko moduluak osatzen dute.

7. artikulua . Modalitateak eta eskaintza motak.

1. Araubide bereziko kirol ikasketak, norentzat diren kontuan hartuta, modalitate hauetan sailkatzen dira:

a) Orokorra. Batez ere gazteei zuzentzen zaiena da, eta aurrez aurreko eskola ordutegian antolatzen daNota de Vigencia.

b) Berezia. Batez ere goi mailako, goi errendimenduko eta hobekuntzako kirolariei zuzentzen zaiena da, izaera hori arautzen duen estatuko edo Nafarroako araudiaren arabera, baita beste kolektibo batzuei zuzentzen zaiena ere, eskariaren zirkunstantziek hori gomendatzen duteneanNota de Vigencia.

c) Urrutikoa. Norberaren eginkizun, behar edo interesengatik ikasketa hauek aurreko modalitateetan egiteko arazoak dituzten pertsonentzat da bereziki. Ez da beharrezkoa ikastetxera erregulartasunez joatea prestakuntza jarduera programatuak egitera. Ikastetxean laguntzarako jarduerak garatzen ahalko dira.

2. Ikasketa hauek, eskaintzaren hedadurari dagokionez, mota hauetan sailkatzen dira:

a) Osoa. Matrikula kasuan kasuko kirol ikasketen zikloko curriculuma osatzen duten kirol ikasketen modulu guztietan eginen da.

b) Partziala, multzoen arabera. Matrikula kasuan kasuko kirol modalitate edo espezialitateko ziklo bateko multzoen arabera eginen da.

c) Partziala, moduluen arabera. Matrikula kirol ikasketetako moduluen arabera eginen da.

3. Ikasketa hauek, kirol ikasketetako moduluen denbora banaketa kontuan harturik, mota hauetan sailkatzen dira:

a) Denboraren banaketa arrunta. Eskaintza mota hau ikasketa hauen modalitate orokorrerako ezarritako egutegiaren eta ordutegiaren arabera eginen da.

b) Denboraren banaketa berezia. Eskaintza mota honek, berariazko multzoko moduluetarako eta/edo multzo arrunterako oro har, ikasketa hauen modalitate orokorrerako ezarritako egutegi eta ordutegiaz aparteko beste bat ezarriko du, hori areagotuz, kirol modalitate edo espezialitatearen ezaugarriak kontuan harturik.

4. Hezkuntza Departamentuak ezartzen ahalko du multzo komuneko ikasketak ikastetxe batean eskaintzea, edozein dela ere ematen duen kirol modalitate edo espezialitatea, eta berariazko multzokoak beste hezkuntza edo kirol zentro bateanNota de Vigencia.

5. Urriaren 24ko 1363/2007 Errege Dekretuaren 25.2 artikuluan xedatuaren arabera, berariazko blokearen prestakuntza, prestakuntza praktikoko modulua barne, Nafarroako Foru Komunitatearen lurralde esparrutik kanpo egiten ahalko da, kontuan harturik kirol irakaskuntzen berezitasunak eta kirol modalitate eta espezialitateetako batzuetan eragina duten urtarokotasuna eta denborazkotasunaNota de Vigencia.

6. Urriaren 24ko 1363/2007 Errege Dekretuaren 24. artikuluan ezarritakoa gara dadin, Hezkuntza Departamentuak egokitzat jotzen dituen malgutasun neurri guztiak ezartzen ahalko ditu, ikasketa horiek egiten dituzten pertsonei horiek eta beste jarduera batzuk bateratzen laguntzekoNota de Vigencia.

8. artikulua . Araubide bereziko kirol ikasketetan sartzea.

1. Araubide bereziko kirol ikasketetan zuzenean sartzeko eskatzen diren betebehar akademikoak, urriaren 24ko 1363/2007 Errege Dekretuaren 29. artikuluan ezarritakoari jarraikiz, honako hauek izanen dira, oro har:

a) Erdi mailako ikasketen hasierako zikloan, Derrigorrezko Bigarren Hezkuntzako gradudun titulua edo ondorio akademikoetarako baliokidea dena.

b) Erdi mailako ikasketen bukaerako zikloan, kasuan kasuko kirol modalitate edo espezialitateari dagokion erdi mailako hasierako zikloa gainditu izanaren egiaztagiria.

c) Goi mailako zikloan, Batxilergoko titulua edo ondorio akademikoetarako baliokidea dena, baita kasuan kasuko kirol modalitate edo espezialitateko kirol teknikariaren titulua ere.

Ikasketa hauetan sartzeko titulu baliokideei dagokienez, urriaren 24ko 1363/2007 Errege Dekretuaren hamabigarren xedapen gehigarrian adierazitakoari jarraituko zaio.

2. Era berean, urriaren 24ko 1363/2007 Errege Dekretuaren 31. artikuluan aipatzen diren erdi eta goi mailarako sarrera probak gaindituz ere sartzen ahalko da ikasketa horietan.

Erdi mailako kirol ikasketetan sartzeko proba erdi mailako heziketa zikloetan sartzeko proba izanen da. Goi mailako kirol ikasketetan sartzeko proba goi mailako heziketa zikloetan sartzeko probaren zati komunak eratuko du, Nafarroan proba horiek arautzen dituen araudiak zehazten duen moduan. Hezkuntza Departamentuak urtero arautu eta deituko ditu sarrera proba horiek.

Hezkuntza Departamentuak ezarriko du zenbat postu erreserbatuko diren erdi edo goi mailako araubide bereziko kirol ikasketetan proba bidez sartzen direnentzat.

3. Araubide bereziko kirol ikasketan sartzeko eskatzen ahalko diren berariazko baldintzak, aurreko 1. eta 2. ataletan ezarritakoez gainera, urriaren 24ko 1363/2007 Errege Dekretuaren 30. artikuluan ezarritakoari jarraikiz, honako hauek izanen dira:

a) Hezkuntza Departamentuak antolatu eta kontrolatutako berariazko proba bat gainditzea, edo

b) Kirol merezimendu bat frogatzea.

Berariazko proben ezaugarriei dagokienez, baita eskatzen diren kirol merezimenduei dagokienez ere, titulu bakoitza eta gutxieneko ikasketak ezartzen dituen errege dekretuan xedatutakoari jarraituko zaio.

4. Urriaren 24ko 1363/2007 Errege Dekretuaren 33. artikuluarekin bat, goi mailako kirolari edo goi errendimenduko kirolari izaera frogatzen dutenak berariazko baldintzak betetzetik salbuetsiko dira, dagokien modalitate edo espezialitateko kirol ikasketetan sartzerakoan.

5. Halaber, salbuespenez, titulua eta gutxieneko ikasketak arautzen dituen errege dekretuak gutxieneko adin bat ezartzen ahalko du erdi mailako ikasketetan sartzeko.

6. Hezkuntza Departamentuak erreserbatutako postuen portzentaje bat ezarriko du kirol ikasketetan, urriaren 24ko 1363/2007 Errege Dekretuaren 34.2 artikuluan xedatutakoarekin bat.

9. artikulua . Araubide bereziko kirol ikasketen ebaluazioa eta ziurtapena.

1. Kirol ikasketen zikloetako ikasleen ikaskuntzaren ebaluazioa kirol ikasketetako moduluen arabera eginen da, eta horietako bakoitza batetik hamarrera kalifikatuko da, hamarrenik gabe, prestakuntza praktikoaren modulua eta bukaerako proiektuaren modulua izan ezik, Gai edo Ez gai kalifikatuko baitira.

2. Erdi mailako kirol ikasketen hasierako eta bukaerako zikloen azken kalifikazioa 1etik 10erako zenbaki eskalaren araberakoa izanen da, bi hamarren eta guzti. Azken kalifikazio hori batez besteko nota haztatua izanen da, ikastorduen eta kasuan kasuko moduluetan lortutako noten arabera, prestakuntza praktikoaren modulua izan ezik.

Erdi mailako tituluak lortzera bideratutako ikasketen azken kalifikazioa, bi hamarrenekin adierazia, batez besteko nota haztatua izanen da, ikastorduen eta erdi mailako hasierako zikloan eta bukaerako zikloan lortutako noten arabera.

3. Goi mailako kirol ikasketen goi mailako zikloaren azken kalifikazioa 1etik 10erako zenbaki eskalaren araberakoa izanen da, bi hamarren eta guzti. Azken kalifikazio hori batez besteko nota haztatua izanen da, ikastorduen eta kasuan kasuko moduluetan lortutako noten arabera, prestakuntza praktikoaren modulua eta bukaerako proiektuarena izan ezik.

4. Kirol ikasketetako zikloen helburu orokorren esparruan, ebaluazioa etengabea izanen da, eta modulu bakoitzaren helburuak eta kirol ikasketetako modulu bakoitzaren ebaluazio irizpideak kontuan harturik eginen da.

Kontuan hartuko da ea gaitasun egokiak lortu diren kirol hastapenari, kirol teknifikazioari eta kirol jarduera edo praktika gidatzeari dagozkien eginkizunak betetzeko, erdi mailako ikasketen hasierako eta bukaerako zikloen kasuan, eta entrenamenduari, goi errendimenduko taldeen eta kirolarien zuzendaritzari eta zailtasun maila handiko gidatzeari dagozkien eginkizunak betetzeko, goi mailako ikasketen kasuan.

5. Erdi mailako kirol ikasketen hasierako eta bukaerako zikloak gainditzen dituenak kasuan kasuko kirol teknikariaren titulua eskuratuko du, eta kirol ikasketen goi mailako ziklo bat gainditzen duenak goi mailako kirol teknikariaren titulua. Titulu horiek ofizialak dira eta Estatu osoan dute balio akademiko eta profesionala.

6. Erdi mailako kirol ikasketen hasierako zikloa gainditzen duenak ziurtagiri akademiko ofizial bat lortuko du, eta horrek aukera emanen dio kirol modalitate edo espezialitate bereko erdi mailako bukaerako zikloan ikasketak jarraitzeko. Horrek, lortutako lanbide gaitasunak egiaztatuko ditu.

7. Kirol ikasketen ziklo bat osatzen duten kirol ikasketen modulu bat edo batzuk gainditzen dituenak, baina ez ziklo osoa, ziurtagiri akademiko partzial bat lortuko du.

8. Hezkuntza Departamentuak araubide bereziko kirol ikasketen ebaluazio prozesuaren araudia garatuko du Nafarroako Foru Komunitatearen esparrurako.

III. KAPITULUA. TITULUEN CURRICULUMAREN DISEINUA, ANTOLAKETA, GARAPENA ETA BANAKETA

10. artikulua . Curriculum jarraibide orokorrak.

1. Hezkuntza Departamentuak araubide bereziko kirol ikasketen tituluen katalogoari dagozkion tituluen curriculuma garatuko du, Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 47. artikuluaren indarrez Nafarroako Foru Komunitatearen eskumenekoak diren alderdiak osatzeko.

2. Tituluen curriculum garapenaren orientazioak, titulu bakoitzaren lanbide profilari erantzuteaz gainera, Foru Komunitateko kirol sistemaren egoera ere kontuan hartuko du, eta Nafarroako Gobernuak bere eskumenen esparruan ezarritako politikei estrategikoki erantzunen die.

3. Ikasketa hauei dagozkien alderdi zientifikoak, teknikoak, praktikoak, teknologikoak eta antolaketakoak bateratzen dituen metodologia didaktikoa aplikatzeak aukera emanen die ikastetxeei, antolaketarako eta curriculuma garatzeko dituzten eskumenen esparruan, behar diren erabakiak hartzeko, horrela ikasleen ezaugarrietara hobeki moldatzeko eta kirol sistemaren beharrei hobeki erantzuteko.

4. Araubide bereziko kirol ikasketei dagozkien zikloek, beren antolaketari, sekuentziazioari eta edukiei dagokienez, foru dekretu honen V. kapituluan ikasketa horietarako ezartzen diren ildo estrategikoei erantzuna emanen diete.

5. Goi mailako heziketa zikloetan atzerriko hizkuntzaren prestakuntza modulu bat jartzen ahalko da, bereziki ingelesekoa. Modulu horren helburuak, edukiak eta ebaluazio irizpideak, ahal delarik, Hizkuntzen Europako Erreferentzia Esparru Bateratuan ezarritako bost trebetasunen arabera xehakatuko dira: ahozko eta idatzizko adierazpena, ahozkoaren eta idatziaren ulermena eta elkarreragin komunikatiboa. Trebetasun horiek Nafarroan ezarritako kirol modalitateei eta, hala denean, espezialitateei egokituko zaizkie. Moduluaren orientazio didaktikoa batez ere praktikoa izanen da, eta informazioaren bilaketarekin, jarraibideen interpretazio eta betetzearekin, kiroleko lanbide praktikako egoera erreal edo asmatuetan sortzen diren lanekin, informazioaren ekoizpenarekin eta hizkuntz gaitasunak aplikatzeko beste jarduera batzuekin lotuta egonen da.

11. artikulua . Tituluen egituraNota de Vigencia.

Araubide bereziko kirol irakaskuntzen tituluak urriaren 24ko 1363/2007 Errege Dekretuaren 19. artikuluan zehaztutako egiturari egokituko zaizkio.

12. artikulua . Ikasketen antolaketa.

1. Kirol ikasketetako zikloen irakaskuntza honela antolatuko da: helburu orokorrak, multzo komuneko kirol ikasketen moduluak eta berariazko multzoko kirol ikasketen moduluak. Kirol ikasketen moduluak, multzo bakoitzean, tipologia honen arabera sailkatuko dira:

a) Nagusiak, Estatuak zehaztuak kirol ikasketen zikloko moduluen multzo bakoitzerako.

b) Nahitaezkoak, Nafarroako Foru Komunitateko Administrazioak Hezkuntza Departamentuaren eskumenen eta araudiaren esparruan zehaztuak, kirol ikasketen zikloko moduluen multzo bakoitzerako.

c) Osagarriak, kirol ikasketen zikloa ematen duen ikastetxeak zehaztuak, foru dekretu honen esparruan eta Hezkuntza Departamentuak horretarako ezartzen duen araudiari jarraikiz.

2. Kirol ikasketen modulu guztiak ezagutza teoriko-praktikoko eremuez osatuta egonen dira, Lanbide Kualifikazioen Katalogo Nazionaleko gaitasun unitateei loturik ala ez, edo tituluari dagozkion lanbide, gizarte-hezkuntza eta kirol helburuei.

13. artikulua . Kirol ikasketen nahitaezko moduluak.

1. Kirol ikasketen nahitaezko moduluen egitura eta diseinua Hezkuntza Departamentuak prestatuko ditu, kirolaren arloan eskumena duen Nafarroako Gobernuko departamentuarekin batera, eta kirol ikasketetako modulu nagusien ezaugarri formalen antzekoak izanen dituzte.

2. Kirol ikasketen nahitaezko moduluek, oinarrizko araudiaren esparruan, Nafarroako Foru Komunitatean onartuko den balio akademikoa izanen dute.

14. artikulua . Kirol ikasketen modulu osagarriak.

1. Curriculum autonomia aplikatuz, araubide bereziko kirol ikasketak ematen dituzten ikastetxeek ahalmena izanen dute, Hezkuntza Departamentuak aldez aurretik baimendurik, kirol ikasketen modulu osagarri bat, gehienez ere 60 ordukoa, ezartzeko.

2. Hezkuntza Departamentuak finkatuko du zein den ikastetxeei baimena emateko prozedura, kirol ikasketen modulu osagarriaren diseinua eta curriculuma prestatzeko.

15. artikulua . Kirol ikasketen moduluen banaketa.

1. Titulu bakoitzaren curriculumari buruzko araudian zikloko kirol ikasketen moduluen banaketa zehaztuko da, eta ziurtatuko da prestakuntza praktikoaren modulua zikloaren azken fasean egonen dela, oro har. Urriaren 24ko 1363/2007 Errege Dekretuaren 12. artikuluan ezarritakoarekin bat, bukaerako proiektuaren modulua, goi mailako zikloetan, kirol ikasketen gainerako modulu komunak eta berariazkoak amaitutakoan aurkeztuko da.

2. Titulu bakoitzak kirol ikasketetako moduluen ordutegi eta banaketa bat izanen ditu, ziklo hori ematen duten ikastetxe guztietan erreferentzia gisa erabiliko direnak. Dena dela, Hezkuntza Departamentuak, ikastetxeek aldez aurretik eskatuz gero, moduluen banaketa eta, hala badagokio, modulu osagarrien proposamena aldatu edo baimentzen ahalko ditu, ezarten dituen baldintzei eta prozedurari jarraikiz.

16. artikulua . Espezializazio ikastaroak.

1. Hezkuntza Departamentuak, urriaren 24ko 1363/2007 Errege Dekretuaren hamalaugarren xedapen gehigarrian ezarritakoarekin bat, espezializazio ikastaroak ezartzeko baimena ematen ahalko du, araubide bereziko kirol irakaskuntzei lotuak, horrela, kirol modalitate eta espezialitate batzuetan beharrezkoa den sakontzeari erantzuna ematekoNota de Vigencia.

2. Espezializazio ikastaro horien ziurtagiria ematen ahalko da, jasotako prestakuntzaren berri emateko. Ziurtagirian ikastaroa gainditu dela eta emandako ordu kopurua adieraziko da, baita ikastaroek zenbat kredituren balioa duten ere.

3. Espezializazio ikastaroen egitura, curriculum ezaugarriak eta antolaketa arauak kirol ikasketen zikloetakoen antzekoak izanen dira, oro har.

4. Espezializazio ikastaro horiek prestakuntza jasotzea eta, aldi berean, kirolean eta lanbidean aritzea ahalbidetzen duten prestakuntza modalitateetan eskainiko dira. Hortaz, prestakuntza bizitza osoan jaso ahal izateko hezkuntza sistemak ematen dituen aukeretako bat dira.

5. Araubide bereziko kirol ikasketak ematen dituzten ikastetxeek jardunean ari diren kirolarientzako prestakuntza jarduerak ere egin ditzakete, baita araubide bereziko kirol ikasketetan titulua duten pertsonen lanbide gaitasunak etengabe eguneratzeko jarduerak ere.

IV. KAPITULUA. ARAUBIDE BEREZIKO KIROL IKASKETAK ETA KIROL ETA LANBIDE ESPARRUA

17. artikulua . Araubide bereziko kirol ikasketak eta kirol sistema.

1. Araubide bereziko kirol ikasketak Nafarroako Foru Komunitatean lurralde, kirol, gizarte, ekonomia eta kultur ingurunea kontuan hartuz antolatuko dira. Horretarako, uztailaren 5eko 15/2001 Foru Legearen 73. artikuluan xedatutakoa aplikatuz, Nafarroako Kirolaren Azterlan, Ikerketa eta Medikuntzako Zentroak aholkularitza lana eginen du kirol teknikarien titulazio ofizialen eta kirol jardueren esparruko prestakuntzaren arloan.

2. Ikasketa hauek ematen dituzten ikastetxeak bereziki arduratuko dira lanbide esparruari egokitzeaz, honako alderdi hauetan:

a) Ikastetxeetako prestakuntza jardueretan erabiltzen diren baliabide eta metodologiak ikaslearen etorkizuneko kirol lanbidearekin lotuak egonen dira.

b) Prestakuntza praktikoko modulua egiteari begira, ikasleei prestakuntzarako eta ikaskuntzarako aukera interesgarriak eskaintzen dizkieten erakundeen, kirol kluben, kirol federazioen, sektoreko enpresen eta beste entitate batzuen katalogoa prestatuko da.

c) Prestakuntza zentroari kirol sistemaren errealitatearen berri emateko, bide hauek erabiliko dira: bisitak antolatzea, profesional espezialistek prestakuntzan parte hartzea, informazio hitzaldiak antolatzea eta gisa horretako bestelako ekimenak.

d) Kirol ikasketak ematen dituzten ikastetxeen eta kiroleko erakunde, klub, federazio eta bestelako entitateen artean proiektu bateratuak egitea.

18. artikulua . Prestakuntza praktikoko modulua.

1. Nafarroan ezarrita dauden kirol ikasketetako zikloen curriculumak prestakuntza praktikoko modulu bat izanen du; ez du lan izaerarik izanik, eta kiroleko erakundeen, kluben, federazioen eta bestelako entitateen benetako esparruan garatuko da.

2. Ahal dela, modulu hori Nafarroako Foru Komunitatean kokatutako erakunde, klub, federazio eta bestelako kirol entitateetan gauzatuko da. Hala ere, kirol arloko modalitate edo espezialitate bakoitzaren ezaugarriak eta inguruabarrak kontuan harturik, modulu hau Komunitatearen lurralde esparrutik kanpo ere egiten ahalko daNota de Vigencia.

3. Prestakuntza praktikoko moduluak, urriaren 24ko 1363/2007 Errege Dekretuaren 11. artikuluan ezarritakoa galarazi gabe, helburu hauek izanen ditu:

a) Egiazko lan ingurune batean osatu behar diren gizarte eta lan arloko gaitasunen garapena erraztea, baita ikastetxeetan eskuratutako lanbide gaitasunak osatzeko behar direnena ere.

b) Ikastetxeetan titulu bakoitzerako eskuratutako lanbide gaitasunak eta lan metodo propioak aplikatzea kirolaren arloko egiazko ekoizpen egoera batean.

c) Kirol hastapeneko eta teknifikazioko prozesuen, merkaturatzearen, kudeaketa ekonomikoaren eta kirol entitateen gizarte eta lan harremanen ikuspegi osoa eskuratzea.

d) Heldutasun profesionala lortu eta ingurune berrietara egokitzen laguntzea.

e) Ikasleen gaitasuna ebaluatu eta egiaztatzea egiazko lan egoeretan, kirol enpresen partaidetzarekin.

f) Tituludunei laneratzen laguntzea.

g) Ikastetxeen eta kirol entitateen arteko lankidetza hobetzea.

4. Hezkuntza Departamentuak, urriaren 24ko 1363/2007 Errege Dekretuaren 11. artikuluan ezarritakoari jarraikiz, ikasleak prestakuntza praktikoaren fase honetan sartzeko baldintzak arautuko ditu, baita ikaskuntza prozesuaren barrenean noiz emanen den ere, kirol ikasketen ziklo bakoitzaren ezaugarrien arabera.

19. artikulua . Jarrera ekintzailea.

1. Araubide bereziko kirol ikasketek jarrera ekintzaileak sustatuko dituzte, baita kirol eta lan ingurunearen ezagutza ere. Horretarako bi bide hauek ezarriko dira:

a) Jarrera ekintzailearekin lotuta dauden edukiak sartzea eta norberaren konturako lana garatzea erdi eta goi mailako kirol ikasketen multzo komunean.

b) Eduki horiek biltzen dituzten moduluak indartu, osatu eta laguntzeko, ikastetxeek jarrera ekintzailearen sustapenarekin lotuta dauden jarduerak garatuko dituzte edo horrelakoetan parte hartuko dute. Horretarako, kiroleko negozio plan eta ideiekin lotutako aholkularitza eta prestakuntza espezializatu osagarria garatuko dira.

2. Araubide bereziko kirol ikasketetako irakasleen prestakuntza planetan jarrera ekintzailearen garapenarekin zerikusia duten prestakuntza jarduera berariazkoak edo zeharkakoak sartuko dira.

3. Jarduera horiek egiteko, Hezkuntza Departamentua eta ikastetxeak jarrera ekintzailea hedatu eta sustatzearen ardura duten erakunde eta entitateekin lankidetzan arituko dira, edo kirol erakunde, klub, federazio eta bestelako entitateekin.

20. artikulua . IrakasleakNota de Vigencia.

1. Kirol irakaskuntzako moduluak ikastetxe publikoetan emateko, urriaren 24ko 1363/2007 Errege Dekretuaren 49., 50. eta 51. artikuluetan horien irakasteko eskumenari buruz xedatuari jarraikiko zaio.

2. Berariazko blokeko moduluen irakasteko eskumena irakasle espezialistei eta Bigarren Hezkuntzako Katedradunen kidegoan eta Bigarren Hezkuntzako Irakasleen kidegoan Gorputz Hezkuntzako espezialitatea duten kideei dagokie, dagokion kirol modalitatean edo espezialitatean onetsitako maila goreneko titulua badute.

3. Hezkuntzaren, Lanbide Heziketaren eta Unibertsitateen zuzendari nagusiaren ebazpenaren bidez, Hezkuntza Departamentuak baimena ematen ahalko die Bigarren Hezkuntzako Katedradunen kidegoan eta Bigarren Hezkuntzako Irakasleen kidegoan Gorputz Hezkuntzako espezialitatea duten kideei irakasle espezialistei esleitutako kirol irakaskuntzako moduluak emateko, bai departamendu horrek ondorio horretarako diseinatu eta aintzatetsi duen prestakuntzaren bidez bai dagokion kirol modalitateko eta/edo espezialitateko lanbide eskumenei lotutako lanbide edo kirol esperientziaren bidez horretarako gaituta badaude.

4. Hezkuntza Departamentuak irakasle espezialistak gehitzen ahalko ditu kirol irakaskuntzako zenbait modulutako irakasle jardun dezaten, urriaren 24ko 1363/2007 Errege Dekretuaren 51. artikuluan ezarri bezala. Horretarako, kirol irakaskuntzetako irakasle espezialista izendatzeko edo aldi baterako kontratatzeko izangaien zerrendak osatzeko deialdiak onesten ahalko dira. Deialdi horietan frogatu beharko dira urriaren 24ko 1363/2007 Errege Dekretuak eskatzen dituen baldintzak, baita kirol espezialitate eta modalitate guztietako kirol teknikarien eta goi mailako kirol teknikarien tituluak ezartzen dituzten eta haien gutxieneko irakaskuntzak finkatzen dituzten errege dekretuek eskatutakoak ere.

5. Urriaren 24ko 1363/2007 Errege Dekretuaren 51. artikuluaren a), b) eta c) atalek aipatzen dituzten pertsonek irakasle jardunen dute lan edo administrazio araubidean, aplikatu beharreko araudiarekin bat, eta ez da inoiz egonen irakasle espezialistako eta ikasturteko eman beharreko irakastorduen gehieneko kopururik.

V. KAPITULUA. ARAUBIDE BEREZIKO KIROL IKASKETEN ILDO ESTRATEGIKOAK.

21. artikulua . Kirolaren eta teknologiaren arloko berrikuntza.

Kirolaren eta teknologiaren arloko berrikuntzak helburu hauek ditu:

a) Araubide bereziko kirol ikasketetan kasuan kasuko kirol eta lanbide esparruetan garatutako kirol teknifikazioko prozesuak sartzea.

b) Kirol teknikariei zuzendutako espezializazio ikastaroak diseinatu eta garatzea.

c) Kirol teknifikazioa berritu eta hobetzeko proiektuak garatzea kirol arloko ikastetxeen, erakundeen, kluben, federazioen eta beste entitate batzuen laguntzarekin.

d) Ikastetxeetan berrikuntza didaktikoa bultzatzea, kirol modalitate edo espezialitate bakoitzerako berariazko irakaskuntza metodologiak garatuz, horretarako baliabide teknologiko egokienak erabiliz.

e) Araubide bereziko kirol ikasketen urrutiko modalitatea garatzeko prestakuntza plataforma batean parte hartzea.

22. artikulua . Araubide bereziko kirol ikasketen nazioartekotzea.

1. Araubide bereziko kirol ikasketak ematen dituzten ikastetxeek honako helburu hauek lortzen laguntzen duten nazioarteko proiektuak garatuko dituzte edo horietan parte hartuko dute:

a) Ikasleei beste herrialde batzuetako kirol sistemetako lan esperientziak eskaintzea.

b) Nazioarteko lan merkatuan lana lortzeko aukerak eskaintzea.

c) Nafarroako irakasle eta ikastetxeen eta Europar Batasuneko beste herrialde batzuetako ikastetxe, entitate eta profesionalen arteko lankidetza sustatzea.

d) Kirol teknifikazioko eta berrikuntza teknologiko edo didaktikoko proiektu instituzionalak garatzea, bi alderdientzat interesgarriak direnean.

2. Ikasleen eta irakasleen Europan barnako mugigarritasuna sustatuko da, bereziki bide hauen bitartez:

a) Nazioarteko egonaldi edo trukeak beste herrialde batzuetako kirol erakunde, klub, federazio eta bestelako entitateetan edo prestakuntza zentroetan, araubide bereziko kirol ikasketetako ikasleentzat.

b) Nazioarteko egonaldi edo trukeak araubide bereziko kirol ikasketen ikastetxeetako irakasle eta arduradunen lanbide eta kirol garapenerako.

3. Helburuak lortzeko eta aurreko puntuan adierazitako mugigarritasuna bermatzeko, Hezkuntza Departamentuak Europako beste erregio eta herrialde batzuekin harreman egonkorrak izatea sustatuko du.

4. Kirol ikasketak ematen dituzten ikastetxeek behar den aholkularitza eta laguntza izanen dute nazioarteko proiektuen modalitate batzuk eta besteak gauzatzeko.

23. artikulua . Lanbiderako informazioa eta orientazioa.

1. Araubide bereziko kirol ikasketen tituluak eskaintzen dituzten ikastetxe guztiek prestakuntzarako aukerei buruzko informazioa emanen diete ikasleei, ikasleen beren eskarietatik abiatuta edo, betiere, kasu bakoitzean egokiena den ibilbide pertsonala kontuan hartuz.

2. Hezkuntza Departamentuak zehaztuko du zein baldintza behar diren ikastetxeetan lan eta lanbide orientazioaren arduradun bat izateko, zeina, prestakuntza eta homologazio prozesu baten ondotik, bete beharreko eginkizunetan espezializatuko baita. Lanpostu horiek betetzerakoan, lehentasuna izanen dute ikastetxean behin betiko destinoa duten irakasleek, betiere ezartzen diren betebeharrak betetzen badituzte.

24. artikulua . Kirolaren sustapenean parte hartzea.

1. Hezkuntza Departamentuak kirol ikasketak ematen dituzten ikastetxeek herritarren artean kirol praktika sustatzeko zereginean parte har dezatela bultzatuko du, bereziki desgaitasunen bat edo gaixotasunen bat duten pertsonen, adineko pertsonen, 16 urtetik beherakoen eta gizartean bazterturik egoteko arriskuan daudenen artean.

Beren jarduera Nafarroako kirol esparruan garatzen duten entitateen eta erakunde sozial eta kulturalen lankidetza bultzatuko da. Horretarako, honako hauek sustatuko dira:

a) Ikastetxeen eta beren jarduera aipatu berariazko taldeekin garatzen duten erakunde eta entitateen arteko akordioak, aldez aurretik Hezkuntza Departamentuak baimenduak.

b) Kirol teknikarien prestakuntza espezializaturako egiten diren eskaintzak, aipatu taldeetako pertsonekin profesionalki esku hartzeko.

c) Herritarren sektore horientzat berariaz egiten diren beste prestakuntza eskaintza batzuk.

2. Hezkuntza Departamentuak parte hartuko du gorputz eta kirol jarduera emakumeen artean sustatzeko zereginean, gizonen eta emakumeen arteko benetako berdintasuna lortzeari begira.

Horretarako, honako hauek sustatuko ditu:

a) Ikastetxeen eta beren jarduera emakume taldeekin garatzen duten erakunde eta entitateen arteko akordioak, aldez aurretik Hezkuntza Departamentuak baimenduak.

b) Emakumearen eta kirolaren arloko ikerketa, gorputz eta kirol jarduera geroz eta bidezkoagoa lortzeko.

c) Kirolaren esparruan dauden diziplina anitzeko sare eta taldeetan parte hartzea, kirolaren eta berdintasunaren arloko profesionalen, teknikarien eta adituen artean ezagutzak eta esperientziak trukatzeko.

3. Hezkuntza Departamentuak kirol ikasketak ematen dituzten ikastetxeek kirola osasuna mantendu eta hobetzeko jarduera gisa sustatzeko zereginean parte har dezatela bultzatuko du.

Horretarako, honako hauek sustatuko ditu:

a) Osasun Departamentuarekin lankidetza hitzarmenak egitea.

b) Ikasketa hauek ematen dituzten ikastetxeen eta beren jarduera esparru horretan garatzen duten erakunde eta entitateen arteko lankidetza hitzarmenak.

c) Kirolaren eta osasunaren arteko ikerketa.

d) Osasunaren esparruan dauden diziplina anitzeko sare eta taldeetan parte hartzea, kirolaren eta osasunaren arloko profesionalen, teknikarien eta adituen artean ezagutzak eta esperientziak trukatzeko.

25. artikulua . Departamentuekin eta Nafarroako federazioekin lankidetzan aritzea.

Nafarroan araubide bereziko kirol ikasketak ezartzeak berarekin dakar hezkuntzan eta kirolean eskudunak diren Nafarroako Gobernuko departamentuekin eta Nafarroako kirol federazioekin eratzen den lankidetzan oinarritutako garapen eredu baten alde egitea.

Horretarako, honako hauek sustatuko dira:

a) Hezkuntza Departamentuaren mendeko ikastetxe publikoak ikasketa hauek emateko baimentzea.

b) Nafarroako Gobernuan kirolaren arloko eskumenak dituen departamentuaren mendeko ikastetxe publikoak ikasketa hauek emateko baimentzea.

c) Kirol federazioekin eratzen diren lankidetza akordioak, kasuan kasuko kirol modalitate edo espezialitateko berariazko multzoa ematen laguntzeko.

VI. KAPITULUA. ARAUBIDE BEREZIKO KIROL IKASKETAK EMATEN DITUZTEN IKASTETXEAK

26. artikulua . Gutxieneko baldintzak.

Araubide bereziko kirol ikasketak ematen dituzten ikastetxeek araudian ageri diren gutxieneko baldintzak bete beharko dituzte.

27. artikulua . Ikastetxeak.

1. Urriaren 24ko 1363/2007 Errege Dekretuaren 45.1 artikuluan ezarritakoa galarazi gabe, araubide bereziko kirol ikasketak honako ikastetxe hauetan ematen ahalko dira:

a) Hezkuntza Departamentuaren mendeko ikastetxe publikoak: Bigarren Hezkuntzako institutuak, ikastetxe bateratuak eta araubide bereziko kirol ikasketak soilik ematen dituzten ikastetxeak.

b) Hezkuntza Departamentuak araubide bereziko kirol ikasketak emateko baimendutako ikastetxe publikoak, Nafarroako kirol administrazioaren mendekoak.

c) Hezkuntza Departamentuak araubide bereziko kirol ikasketak emateko baimendutako ikastetxe pribatuak.

2. Kirol ikasketak ematen dituzten ikastetxeak lanbide heziketako ikastetxeen sarean sartzen ahalko dira. Sarean prestakuntza eskaintzak koordinatuko dira, erabiltzaileen interesak eta erabiltzen diren baliabide publikoen eragimena hobetzeko.

28. artikulua . Baimenaren printzipioa.

1. Araubide bereziko kirol ikasketak ematen dituzten ikastetxe pribatuak ireki eta funtzionatzen hasteko administrazio baimenaren printzipioari lotu beharko zaio.

2. Ikastetxeak baimentzeko araubide juridikoa, aurreko atalean aipatzen dena, foru dekretu honetan ezarritakoaren bidez arautuko da.

3. Ikastetxeak ireki eta funtzionatzen hasteko baimena emateko ezinbestekoa izanen da ikastetxe pribatuek araudian ageri diren gutxieneko baldintzak betetzea, eta baliogabetu eginen da ikastetxeek baldintza horiek betetzeari uzten diotenean.

4. Hezkuntza Departamentuak baimendutako ikastetxeak Nafarroako unibertsitatez kanpoko ikastetxeen erregistroan eta Estatuko unibertsitatez kanpoko ikastetxeen erregistroan inskribatuko dira.

29. artikulua . Izendapena.

1. Oro har, foru dekretu honek arautzen dituen araubide bereziko kirol ikasketak soilik ematen dituzten ikastetxeek "Kirol ikastetxeak" izen orokorra izanen dute.

2. Horretaz gainera, ikastetxe bakoitzak berariazko izen bat izanen du, identifikatuko duena, eta horixe agertuko da erregistroko inskripzioan. Izen hori ezin da beste ikastetxe batena bezalakoa izan.

30. artikulua . Baimena lortzeko eskaera.

1. Ikastetxe pribatu bat ireki eta funtzionatzen hasteko administrazio baimenaren espedientea sustatzaileak edo haren legezko ordezkariak eskaturik irekiko da, Hezkuntza Departamentura bidalitako eskaera baten bidez. Eskaera hori ohiko bideak erabiliz edo Nafarroako Foru Komunitateko Erregistro Orokor Elektronikoaren bidezko bide elektronikoak erabiliz aurkezten ahalko da.

2. Honako hauek ezin izanen dira ikastetxe pribatuetako titular izan, eta ezin izanen dute, beraz, ireki eta funtzionatzen hasteko administrazio baimena eskatu:

a) Estatuko, autonomia erkidego bateko edo toki erakunde bateko hezkuntza administrazioan lanean ari diren pertsonak.

b) Dolozko delituengatik aurrekari penalak dituztenak.

c) Epai judizial irmo baten ondorioz eskubide hori berariaz galdu duten pertsona fisiko edo juridikoak.

d) Pertsona juridikoak, baldin eta horietan sartzen diren eta aurreko ataletan aipatu diren pertsonek zuzendaritza karguak badituzte edo sozietatearen kapitalaren %20aren edo gehiagoren titularrak badira.

3. Eskaerarekin batera honako agiri hauek aurkeztu beharko dira:

a) Ikastetxea sustatzen duen pertsona fisiko edo juridikoa.

b) Proposatzen den berariazko izena.

c) Ikastetxearen kokapen geografikoa.

d) Zein kirol ikasketetarako eskatzen den baimena, modalitatea eta, hala denean, espezialitatea adierazita.

e) Sortu nahi diren unitateen eta ikaspostuen kopurua.

f) Aitorpen edo adierazpen bat, zeinean azalduko baita ikastetxearen sustatzailea ez dagoela foru dekretu honen 30.2 artikuluan aurreikusten diren kasuetako bakar batean ere.

g) Ikastetxea eraikitzeko egin beharreko obren proiektua. Proiektuak, instalazioei eta baldintzei dagokienez, araubide bereziko kirol ikasketak ematen dituzten ikastetxeen gutxieneko baldintzak ezartzen dituen oinarrizko araudian ageri dena bete beharko du beti.

Lehendik eginda dauden eraikinak badira, instalazioek gaur egun dituzten planoak aurkeztu beharko dira eta, hala izanez gero, egokitzeko egin nahi diren obren proiektua.

h) Kasuan kasuko eraikinak erabiltzeko aukera justifikatzen duen titulu juridikoa, eta noiz arte erabiltzen ahalko diren.

Urriaren 24ko 1363/2007 Errege Dekretuaren 45. artikuluko 4. eta 5. idatz-zatietan eta/edo 46. artikuluan ezarritako baldintzen arabera eskatzen bada baimena, eskaerako alderdi bakoitza frogatzen duen dokumentazioa.

i) Zein kirol ekipamendu dagoen erabilgarri; ekipamendu horrek araubide bereziko kirol ikasketak ematen dituzten ikastetxeen gutxieneko baldintzak ezartzen dituen oinarrizko araudian ageri dena bete beharko du beti.

j) Gutxieneko baldintzak ezartzen dituen oinarrizko araudiak eskatzen ahal dituen segurtasun eta erantzukizuneko baldintzei buruzko frogagiriak.

k) Ikastetxeko irakasleen zerrenda, zein titulazio duten adierazita.

4. Aurkeztutako eskaeran eta agirietan okerren bat baldin badago edo osorik ez baldin badaude, interesatuari 10 egun balioduneko epea emanen zaio, gutxienez, okerra zuzendu edo behar diren agiriak aurkez ditzan; ohartaraziko zaio hala egin ezean bere eskaera bertan behera geldituko dela, horren gaineko ebazpena eman ondotik.

31. artikulua . Txostenak.

1. Obren eta Mantentze-lanen Zerbitzuak eta Hezkuntzako Ikuskapen Zerbitzuak gutxieneko baldintzak 26. artikuluan aipatu araudiarekin bat datozen azaltzeko egin dituzten txostenak ikusirik, eta Lanbide Heziketaren Zerbitzuak ikasketa hauek Nafarroan plangintza orokorrari egokitzen zaizkion azaltzekoa ere ikusirik, Ikastetxeen eta Ikasketetarako Laguntzen Zerbitzuak, unibertsitatez kanpoko ikastetxeak sortzeko baimenen arloko eskuduna baita, ebazpen proposamena aurkeztuko dio Ikuskapenaren eta Zerbitzuen zuzendari nagusiari.

2. Hezkuntza Departamentuak txostenak eskatzen ahalko dizkie beste departamentu batzuetako zerbitzu teknikoei, batez ere kirolaren arloan eskuduna den departamentukoei. Zerbitzu tekniko horiek, halakoetan, Hezkuntza Departamentuak eskatutako txostenak egin beharko dituzte.

32. artikulua . Ebazpena.

1. Ikustaldiaren eta entzunaldiaren tramitatea, hala denean, beterik, Ikuskapenaren eta Zerbitzuen zuzendari nagusiak eman edo ukatu eginen du, ebazpen arrazoitu baten bidez, ikastetxea ireki eta funtzionamenduan jartzeko baimena. Ebazpen hori hiru hilabeteko epean eman eta jakinaraziko da, ikastetxearen sustatzaileak 30. artikuluan aipatutako dokumentazioa osatzen duen egunetik hasita.

2. Ebazpenaren edukia interesdunari jakinaraziko zaio eta, baimena emanez gero, xedapen zatia Nafarroako Aldizkari Ofizialean argitaratu eta Hezkuntza Ministeriora igorriko da, ikastetxe berria Ikastetxeen Erregistro Berezian sartzeko.

3. Ikastetxe bat ireki eta funtzionamenduan jartzeko baimena ematen duen ebazpenean datu hauek agertuko dira:

a) Ikastetxearen titularra.

b) Helbidea, herria eta udalerria.

c) Berariazko izena.

d) Baimendu diren ikasketak.

e) Baimenaren berezitasunei buruzko erreferentzia, hala denean, urriaren 24ko 1363/2007 Errege Dekretuaren 45. artikuluko 4. eta 5. idatz-zatietan eta 46. artikuluan ageri diren alderdiei dagokienez.

4. Eskaera egin eta sei hilabeteko epean berariazko ebazpenik eman ez bada, ezetsitzat joko da.

33. artikulua . Baimenaren ondorioak.

Ikastetxe bat ireki eta funtzionamenduan jartzeko baimenak ebazpen honek aipatzen duen egunaren ondoko ikasturtean hartuko du indarra. Hala ere, ikastetxearen titularrak eska dezake atzera dadila ikastetxea funtzionamenduan hasteko eguna.

34. artikulua . Aldaketak eta baimen berriak.

1. Honako egoera hauen ondorioz alda daiteke baimena:

a) Ikastetxearen berariazko izena aldatzea.

b) Instalazioak aldatzea, ondokoa ekartzen badu:

- Baimena emateko kontuan hartu ziren eremuen neurriak aldatzea.

- Eremu horien erabilera edo xedea aldatzea.

c) Ikastetxearen titulartasuna aldatzea.

2. Honako egoera hauen ondorioz eman daiteke baimen berri bat:

a) Instalazioak lekuz aldatzearen ondorioz ikastetxearen helbidea aldatzea.

b) Ikastetxearen baimenaren xede izan ziren kirol ikasketak aldatzea.

3. Aldaketaren bat egin edo baimen berri bat lortu nahi duten ikastetxeek eskaera aurkeztuko dute, arrazoiak emanez, Hezkuntza Departamentuan.

4. Obren eta Mantentze-lanen Zerbitzuak, Lanbide Heziketaren Zerbitzuak eta Hezkuntzako Ikuskapen Zerbitzuak beharrezkoak diren txostenak eginen dituzte, eskaera nolakoa den kontuan hartuta eta aurreko artikuluetan aipatu den eskumen esparruan.

5. Hezkuntza Departamentuak eskaturik, aurreko atalean aipatutako txostenekin batera beste departamentu batzuetako zerbitzu teknikoek egindako txostenak aurkezten ahalko dira, batez ere kirolaren arloan eskuduna den departamentukoek egindakoak.

6. Aldaketa edo baimen berria Ikuskapenaren eta Zerbitzuen zuzendari nagusiak onetsi beharko du, baldin eta foru dekretu honetan ezarritako baldintzak betetzen badira.

7. Ikustaldiaren eta entzunaldiaren tramitea egin ondotik, hala denean, espedienteari amaiera emanen dion ebazpena gehienez ere hiru hilabeteko epean eman eta jakinaraziko da, ikastetxearen sustatzaileak dokumentazioa osatzen duen egunetik hasita.

8. Foru dekretu honen 32.2 artikuluan ezarritako moduan jakinarazi eta argitaratuko da ematen den ebazpena.

9. Onesten den aldaketak Nafarroako Gobernuko Ikastetxeen Erregistroan ikastetxearen inskripzioa aldatzea ekarriko du, eta Hezkuntza Ministerioko ikastetxeen erregistro berezira horri buruzko jakinarazpena igorri beharko da.

35. artikulua . Baimena amaitzea.

1. Baimena amaituko da ikastetxeak bere jarduerak uzteagatik edo Ikuskapenaren eta Zerbitzuen Zuzendaritza Nagusiak berariaz baliogabetzeagatik, hurrengo artikuluetan agertzen den moduan.

2. Ikastetxeak jarduerak uztearen ondoriozko baimen amaitzea ofizioz deklaratuko du Ikuskapenaren eta Zerbitzuen Zuzendaritza Nagusiak, interesdunari entzun ondoren, ikastetxeak egitez uzten dituenean bere jarduerak.

3. Ikastetxearen titularrak eskaturik erabakitzen ahalko da baimena amaitzea.

4. Baimena baliorik gabe utziko da ikastetxeek araudiko gutxieneko baldintzaren bat betetzeari uzten diotenean edo baimendutako ikasketak ematen ez dituztenean, aplikatu beharreko hezkuntza araudiarekin bat.

5. Baimenaren amaiera Ikuskapenaren eta Zerbitzuen zuzendari nagusiaren ebazpen baten bidez emanen da, zeina foru dekretu honen 32.2 artikuluan ezarritako moduan jakinarazi eta argitaratuko baita.

6. Ikastetxe bati jarduerak uzteko baimena ematen dion eta baimena baliogabetzen duen ebazpenean onesten ahalko da ondorioak pixkanakakoak izan daitezela, bertan matrikulatutako ikasleen eskolatzeari kalterik ez egiteko.

7. Jarduerak uzteko ebazpenak berarekin ekarriko du baja ematea Nafarroako Gobernuko Ikastetxeen Erregistroan eta Hezkuntza Ministerioko ikastetxeen erregistro berezian.

Lehenbiziko Xedapen Gehigarria . Kirol administrazioaren mende dauden ikastetxe publikoakNota de Vigencia.

Kirol administrazioaren mende dauden titulartasun publikoko ikastetxeak baimentzeko, Hezkuntza Departamentuak derrigorrezko txosten loteslea prestatu beharko du. Baimen hori foru dekretu honen VI. kapituluan ezarri prozeduraren arabera tramitatuko da.

Bigarren Xedapen Gehigarria. Eskola egutegiaNota de Vigencia.

Hezkuntza Departamentuak araubide bereziko kirol irakaskuntzetarako eskola egutegia ezarriko du, hezkuntza sistemako gainerako irakaskuntzetarako ezarritakoaren aldean ezberdina izanen dena eta irakaskuntza horien berezitasunak kontuan hartzen dituena.

Hirugarren Xedapen Gehigarria. Titulu ofizialik ematen ez duten kirol ikasketakNota de Vigencia.

1. Titulu ofizialik eskuratzea ez dakarten gorputz eta kirol jardueraren esparruko ikasketak ematen dituzten entitateek men eginen diete Nafarroako Foru Komunitatean aplikatu beharreko indarreko arauei.

2. Ikasketa horiek ezin izanen dute erabili urriaren 24ko 1363/2007 Errege Dekretuan araututako kirol teknikarien edo goi mailako kirol teknikarien ziurtagiri, ziklo, gradu edo titulu ofizialetako bat ere ez, ezta ikastetxeen izenei dagozkienak edo okerra edo entitate horiekin nahastea ekar dezaketenak ere.

3. Haien publizitatearen leku nabarmenean argi eta garbi aipatu behar dira ematen diren ikasketen izaera ez-ofiziala eta, horiek amaitutakoan, emanen diren diplomak edo ziurtagiriak.

Xedapen Iragankor Bakarra. Hezkuntza Sistemaren Antolamendu Orokorrari buruzko urriaren 3ko 1/1990 Lege Organikoaren babesean onetsitako tituluetan oinarritzen diren kirol irakaskuntzak ezartzeaNota de Vigencia.

Urriaren 24ko 1363/2007 Errege Dekretuaren bigarren xedapen iragankorrean xedatua aplikatzeko, Hezkuntza Sistemaren Antolamendu Orokorrari buruzko urriaren 3ko 1/1990 Lege Organikoaren eta abenduaren 19ko 1913/1997 Errege Dekretuaren babesean onetsitako tituluetan oinarrituta Nafarroako Foru Komunitatean ezartzen diren araubide bereziko kirol irakaskuntzek bete beharko dute dagozkien tituluak eta haien gutxieneko irakaskuntzak ezartzen dituzten errege dekretuetan ezarritakoa, bigarren xedapen iragankor horretan adierazitako aldeetan izan ezik.

Azken Xedapenetako Lehena. Erregelamenduzko gaikuntza.

Hezkuntzako kontseilariari ahalmena ematen zaio foru dekretu honetan ezarritakoa garatzeko eta gauzatzeko behar diren xedapenak eman ditzan.

Azken Xedapenetan Bigarrena. Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2011ko abenduaren 28an.-Nafarroako Gobernuko lehendakaria, Yolanda Barcina Angulo.-Hezkuntzako kontseilaria, José Iribas Sánchez de Boado.

Iragarkiaren kodea: F1120990

Gobierno de Navarra

Contacte con nosotros | Accesibilidad | Aviso legal | Mapa web