LEXNAVARRA
72/2010 FORU DEKRETUA, AZAROAREN 15EKOA, JOKO MAKINEN ERREGELAMENDUA ONETSI DUEN UZTAILAREN 31KO 181/1990 FORU DEKRETUA ETA JOKO ARETOEN ERREGELAMENDUA ONESTEN DUEN ABUZTUAREN 30EKO 270/1999 FORU DEKRETUA ALDATZEN DITUENA ETA NAFARROAKO FORU KOMUNITATEAN JOKO MAKINEN EZAUGARRIAK ETA INSTALAZIO BALDINTZAK ARAUTZEN DITUENA.
BON N.º 147 - 03/12/2010
I. KAPITULUA. JOKO MAKINEN ERREGELAMENDUA ONETSI DUEN UZTAILAREN 31KO 181/1990 FORU DEKRETUA ETA JOKO ARETOEN ERREGELAMENDUA ONESTEN DUEN ABUZTUAREN 30EKO 270/1999 FORU DEKRETUA ALDATZEA
- 1. artikulua. Uztailaren 31ko 181/1990 Foru Dekretuak onetsitako Joko Makinen Erregelamendua aldatzea.
- 2. artikulua. Joko Aretoen Erregelamendua onesten duen abuztuaren 30eko 270/1999 Foru Dekretua aldatzea.
II. KAPITULUA. JOKO MAKINEN EZAUGARRIAK ETA INSTALAZIO BALDINTZAK
- 3. artikulua. BG motako joko makinak.
- 4. artikulua. Sistemaren elementuak eta funtzionaltasunak.
- 5. artikulua. BG motako makinen interkonexioa.
- 6. artikulua. BR eta BS motako joko makinak.
- 7. artikulua. Kontagailuak.
- 8. artikulua. Homologazioa.
- XEDAPEN GEHIGARRIAK
- Lehenbiziko xedapen gehigarria. Sarien ordainketa.
- Bigarren xedapen gehigarria. Zirkulazio gidak.
- Hirugarren xedapen gehigarria. Hartutako neurrien eragina.
- Laugarren xedapen gehigarria. IKTak eta prozeduren telematizazioa gehitzea.
- XEDAPEN IRAGANKORRAK
- Lehenbiziko xedapen iragankorra. Baimenen balioa.
- Bigarren xedapen gehigarria. Joko makinen planifikazioa.
- Hirugarren xedapen iragankorra. Kokaleku komunikazioa.
- Laugarren xedapen iragankorra. Interkonektatutako sarien mugak.
- Xedapen indargabetzaile bakarra. Indargabetutako arauak.
- Azken xedapen bakarra. Indarra hartzea.
I. ERANSKINA. JOKO MAKINAK INSTALATZEKO BAIMENAREN ESKAERA
II. ERANSKINA. JOKO MAKINEN KOKALEKU KOMUNIKAZIOA
Nafarroako Foru Komunitatean joko makinen baimena, instalazioa eta ustiapena arautzen dituen arau esparrua honako hauek osatzen dute: 16/2006 Foru Legea, abenduaren 14koa, Jokoari buruzkoa; 181/1990 Foru Dekretua, uztailaren 31koa, Joko Makinen Erregelamendua onetsi duena; 95/1991 Foru Dekretua, martxoaren 21ekoa, Jokoen eta Apustuen Katalogoa onetsi duena; 28/1998 Foru Dekretua, otsailaren 9koa, joko makinen eredu homologatuen erregistroa arautzen duena; 270/1999 Foru Dekretua, abuztuaren 30ekoa, Joko Aretoen Erregelamendua onesten duena; eta 68/2006 Foru Dekretua, urriaren 9koa, joko makinak homologatu, baimendu eta instalatzeari eta joko aretoen araubideari buruzko zenbait neurri onesten dituena.
Autonomia Erkidego gehienetan bingoetan eta joko aretoetan egon den bilakaerak, modeloak erregistratuta ez egoteagatik edo egungo esparru erregulatzaileak establezimendu horietan joko makinak instalatzeko ezartzen dituen mugengatik, gaur egun Nafarroan baimendu ezin diren joko makina berezien instalazioa eta ustiapena barne hartzen ditu. Beraz, uztailaren 31ko 181/1990 Foru Dekretuak onetsitako Joko Makinen Erregelamendua aldatu behar da. Horretarako, joko makinaren kontzeptua berriro definituko da, eta, dauden modeloen konplexutasuna kontuan hartuta, horiek sailkatuko dira eta instalazio eta ustiapen araubidea berriztatuko da. Halaber, Joko Aretoen Erregelamendua onesten duen abuztuaren 30eko 270/1999 Foru Dekretua aldatu behar da. Horretarako, horietan joko makinak ez ezik, baimenduriko beste jolas aukera batzuk ere izateko aukera xedatuko da, instalatzen ahal diren makinak eta horien interkonexio aukerak eta mugak zehaztuta eta baimen araubideari buruzko zenbait alderdi berriztatuta. Nolanahi ere, beharrezko aldaketak dira, erregelamendu horiek Jokoari buruzko abenduaren 14ko 16/2006 Foru Legearen determinazioetara egokitzeko.
Nafarroan baimentzen ahal diren makinen modeloen baldintza teknikoak eta haien instalazio araubidea eguneratu behar dira.
Azkenik, joko makinen operadoreen sektorearen egoera dela-eta, komenigarria da zenbait establezimendutan joko makinak ustiatzeko baimenak emateari uztea bi urteko epean, horiek ordezteko izan ezik. Epe horretan, harturiko neurrien aplikazioak jokoaren eta apustuen sektorean izaten ahal duen eraginaren berariazko jarraipena egin, eta planifikazio neurriak hartzeko behin-behinekotasunari eta aukerari buruzko azterlana gauzatuko da.
Hori horrela, Lehendakaritza, Justizia eta Barneko kontseilariak proposatuta, Nafarroako Kontseiluarekin bat eta Nafarroako Gobernuak 2010eko azaroaren 15eko bilkuran hartutako erabakiari jarraikiz,
DEKRETATU DUT:
I. KAPITULUA. JOKO MAKINEN ERREGELAMENDUA ONETSI DUEN UZTAILAREN 31KO 181/1990 FORU DEKRETUA ETA JOKO ARETOEN ERREGELAMENDUA ONESTEN DUEN ABUZTUAREN 30EKO 270/1999 FORU DEKRETUA ALDATZEA
1. artikulua. Uztailaren 31ko 181/1990 Foru Dekretuak onetsitako Joko Makinen Erregelamendua aldatzea.
Uztailaren 31ko 181/1990 Foru Dekretuak onetsitako Joko Makinen Erregelamenduaren 1., 2., 3., 4., 7., 8., 9., 10., 11., 12. eta 13. artikuluak aldatu dira, eta honela idatzita geratuko dira:
"1. artikulua. Xedea eta aplikazio esparrua.
Erregelamendu honen xedea Jokoari buruzko abenduaren 14ko 16/2006 Foru Legearen 18. artikuluak aipatzen dituen joko makinak erabiliz garatzen den jokoa eta horri lotutako jarduera ekonomikoak, enpresa operadoreak eta jokorako establezimenduak arautzea da."
"2. artikulua. Joko makinak: kontzeptua eta sailkapena.
1. Joko makinak.
Joko makinak dira, prezio baten truke, joko programa baten edo zoriaren arabera noizean behin saria zuzenean edo zeharka lortzea ahalbidetzen dutenak.
Gainera, Jokoari buruzko abenduaren 14ko 16/2006 Foru Legearen 18. artikuluaren 3. idatz-zatian aipatutako bazterketei kalterik egin gabe, joko makinatzat joko dira joko, loteria eta apustu zerbitzarietan sartzeko erabat edo zati batean konfiguratuta daudenak edo horietan parte hartu izana adierazten duten txartelak, frogagiriak, tiketak edo egiaztagiriak ematen dituztenak, baita oro har joko, apustu, eskaintza edo zori aukerak zuzenean edo zeharka ematen dituzten elementuak edo mekanismoak eta sariak lortzeko behin-behinekotasuna barne hartzen dituzten guztiak ere.
2. Joko makinak honela sailkatuko dira:
a) Sari programatua duten joko makinak edo B motakoak.
Josteta izaera izan arren, joko programa edukita, partidaren prezio mugatu baten truke, erabiltzen edo jokatzen denboraldi zehatz bat ematea eta noizean behin sari mugatu bat dirutan lortzea ahalbidetzen dutenak dira, baimenduriko sarien planaren eta gutxieneko itzulketa portzentajearen arabera.
b) Ausazko jokorako makinak edo C motakoak.
Saria zuzenean edo zeharka lortzea zoriaren esku bakarrik uzten dutenak dira.
c) Saria jenerotan duten joko makinak.
Josteta izaera nagusia bada ere, partidaren prezio mugatu baten truke, erabiltzen edo jokatzen denboraldi zehatz bat ematea eta noizean behin sari mugatu bat jenerotan lortzea ahalbidetzen dutenak dira.
d) Beste joko mota batzuen makina osagarriak.
Eskuzkoak edo automatikoak diren eta, ezarritako baldintzak eta betekizunak beteta, prezio baten truke erabiltzaileari beste joko mota batzuetan zuzenean edo zeharka parte hartzea ahalbidetzen dioten makinak dira. Jokoari buruzko abenduaren 14ko 16/2006 Foru Legean ezarritakoaren arabera, beste joko mota batzuen ustiapena joko enpresa bati baimendu behar zaio aldez aurretik.
3. Aldi berean, sari programatua duten joko makinak edo B motakoak honelakoak izan daitezke:
a) BR motako joko makinak.
Sari programatua duten oinarrizko josteta makinak, jokalari bakarrekoak, jolas edo josteta izaerari apustuaren zenbatekoari baino garrantzi handiagoa ematen diotenak.
b) BS motako joko makinak.
BR motako makinen antzeko ezaugarriak izanda, sari handiagoak ematen dituzten joko makinak.
c) BG motako joko makinak.
Bingoaren jokoan oinarritutako joko makina bereziak.
d) BM motako joko makinak edo postu anitzekoak.
Joko programa bakarra izanda eta altzari bakar batean konfiguratuta egonda, hainbat jokalari postu dituzten joko makinak. Horrela, bi pertsonak edo gehiagok bereizita edo batera jokoan aldi berean parte hartzeko aukera egonen da.
4. Beste joko mota batzuen makina osagarrien artean, honako hauek sartuko dira:
a) Txartelak edo loteriak saltzeko makinak.
Joko zehatzaren ezaugarrien, baimen baldintzen eta joko arauen arabera noizean behin sari bat dirutan edo jenerotan berehala edo beranduago lortzea ahalbidetzen duten txartelak, kupoiak, billeteak edo antzeko joko euskarriak bete, balioztatu, erregistratu edo ematen dituzten makinak.
b) Apustu makinak.
Apustu makinak dira apustuen makina osagarriak eta apustuak saltzeko terminalak, erabiltzaileari apustua egitea ahalbidetzen diotenak."
"3. artikulua. Definizioa eta ezaugarriak.
1. Joko makinen enpresa operadoreak dira Nafarroako Jokoen eta Apustuen Erregistroan izena eman duten eta beren izenean joko makinak ustiatzeko jarduera gauzatzeko gaituta dauden pertsona fisikoak edo juridikoak.
2. Enpresa operadoreek beren titulartasuneko joko makinak ustiatzen ahalko dituzte beren edo inoren titulartasuneko lokaletan."
"4. artikulua. Enpresa operadoreen erregistroa.
Joko makinen enpresa operadoreek Nafarroako Jokoen eta Apustuen Erregistroan izena emateko eta ezabatzeko araubidea haren berariazko erregelamenduak arautuko du."
"7. artikulua. Baldintzak.
1. Joko aretoen baimena, bermeak, baldintzak eta, oro har, funtzionamendu araubidea berariazko araudiak arautuko ditu.
2. Hala ere, ezin izanen da inola ere baimendu joko areto berriak zabaltzea, haiek izaera bereko beste establezimendu batetik 400 m-tik beherako distantzian kokatzen badira, aurreko establezimendu horrek baimena eskatu badu edo hori esku artean badu, establezimendu berria ustiatzeko baimena eskatzen den unean."
"8. artikulua. Baimenaren bideragarritasunari buruzko aldez aurreko kontsulta.
1. Nafarroan joko aretoa ustiatu nahi duen edozein pertsona fisikok edo juridikok hori abiarazteko ustiapen baimena eskuratzeko aukerari buruzko kontsulta egiten ahalko du.
2. Informazio hori eskuratzeko, ondoko agiriak aurkeztu beharko ditu:
a) Kontsulta egiten duen pertsona fisikoaren edo pertsona juridikoaren legezko ordezkariaren nortasun agiri nazionalaren edo pasaportearen fotokopia.
b) Establezimenduaren aurreproiektua, teknikari eskudunak idatzi eta sinatu duena eta ondoko agiriak, gutxienez, barne hartu beharko dituena:
-Deskripzio memoria, aplikagarri duten araudian joko aretoei eskatzen zaizkien betekizunen betetze-maila edo, lokalean beharrezko egokitzapen lanak egin ondoren, betekizunak betetzeko aukera justifikatuta.
-Kokaera eta kokaleku planoak, baita establezimenduaren egungo egoeraren eta zaharberritu ondorengo egoeraren planoak ere.
3. Aurkeztu diren agiriak aztertu eta gero, Nafarroako Foru Komunitateko Administrazioko organo eskudunak eskatu den ustiapen baimena emateko aukeraren berri emanen dio interesdunari eta, hala denean, bidezkoak diren oztopoak jakinaraziko dizkio.
4. Emandako informazioak ez du inola ere ekarriko kontsultaren xede den establezimendua ustiatzeko administrazio baimenik. Nolanahi ere, baimena eskatu beharko da, hori emateko erregelamenduz ezartzen diren betekizunak egiaztatuta."
"9. artikulua. Joko aretoetan erabilgarri dagoen joko eskaintza.
Joko aretoek, horietarako baimentzen diren joko makinak ez ezik, honako jolas aukera hauek ere eskaintzen ahalko dituzte, horiek arautzen dituen araudiaren arabera:
a) Apustuak.
b) Nafarroako Foru Komunitateko Lehendakaritza, Justizia eta Barne Departamentuko kontseilariak baimentzen ahal dituen beste batzuk."
"10. artikulua. Baimenduriko lokalak.
1. Joko makinak honako hauetan baino ezin izanen dira instalatu:
a) Berariaz baimendutako establezimenduak, hala nola tabernak, taberna bereziak, kafetegiak eta ikuskizunetarako kafetegiak. Horietan BR motako joko makina bat eta beste joko mota batzuen makina osagarri bat instalatzen ahalko dira.
b) Apustuen berariazko lokalak, joko aretoak, bingoak eta kasinoak. Horietan aplikagarri duten araudi sektorialean ezartzen diren makinak instalatzen ahalko dira.
2. Joko makinak aurreko atalean aipatutako lokalen barnean eta horietarako kanpoko sarbidetik urrun baino ezin zainen dira kokatu. Era berean, ezin izanen dira inola ere instalatu adingabeek bakarrik edo lehentasunez erabiltzen dituzten lokaletan.
3. Nafarroako Foru Komunitateko Lehendakaritza, Justizia eta Barne Departamentuko kontseilariak saria jenerotan ematen duten joko makinak instalatzeko tokiak eta baldintzak zehaztuko ditu, baita haien betekizunak eta mugak ere."
"11. artikulua. Instalazio baimena.
1. Aurreko artikuluan ezarritako baldintzak eta mugak errespetatuta, joko makinen instalazioa hartuko duen establezimenduan gauzaturiko jardueraren titularrak makinak instalatzen dituzten enpresa operadore beste instalazio baimen eskatu beharko ditu.
2. Instalazio baimenaren eskaera foru dekretu honen I. eranskinean agertutako eredu ofizialaren araberako inprimakian eginen da.
3. Nafarroako Foru Komunitateko Administrazioko organo eskudunak emanen du instalazio baimena, joko makinen instalazioa hartuko duen establezimenduan gauzaturiko jarduera ekonomikoaren titularraren alde emanen da, eta enpresa operadore zehatz batek joko makinak instalatzea baimenduko du.
4. Instalazio baimena mugagabea izanen da, baina honako arrazoi hauengatik iraungitzen ahalko da:
a) Establezimenduan gauzaturiko jarduera ekonomikoaren titularrak uko egitea, baimenak babesten duen enpresa operadorea ados egonda edo urte naturalaren amaieran (enpresa operadore horri ukoaren aurreabisua egiten zaionetik, hiru hilabete igaro ondoren) egindakoa.
b) Establezimenduan gauzaturiko jarduera ekonomikoaren titulartasuna aldatzea, titular berriak Jarduera Ekonomikoen gaineko Zergan alta hartzen duenetik hiru hilabete igaro ondoren.
c) Titularra hiltzea edo haren nortasun juridikoa iraungitzea.
d) Establezimenduan instalatzen diren makinen titularra den enpresa operadoreak uko egitea, hori gaitasunik gabe uztea edo baja hartzea Nafarroako Jokoen eta Apustuen Erregistroan.
e) Establezimenduko jarduera ixtea edo aldatzea, bertan abiarazitako jarduera berriak joko makinak instalatzea eragozten badu edo horiek aurreko baimenaren kopuru eta tipologiarekin bat ez datozen baldintzekin instalatzea baimentzen badu.
f) Baliogabetzea eta administrazio zehapen baten ondorioz eragitea, Jokoari buruzko abenduaren 14ko 16/2006 Foru Legean xedatutakoaren arabera.
g) Epailearen epaia, hala erabakitzen bada.
5. Instalazio baimenak erabiltzaileen begi bistan jarri beharko dira, joko makinak instalatuta dauden eremuan."
"12. artikulua. Kokaleku jakinarazpena.
Joko makinak instalatzeko baimena duen lokal batean gauzaturiko jardueraren titularrak establezimendu horretan instalatu edo kendu nahi diren joko makinen motak eta datuak jakinarazi beharko dizkio Nafarroako Foru Komunitateko Administrazioko organo eskudunari, horiek instalatu edo kendu baino lehen, foru dekretu honen II. eranskinean agertutako eredu ofizialaren araberako Kokaleku Komunikazioko inprimakia erabiliz."
"13. artikulua. Makinen identifikazioa eta agiriak.
1. Baimenduriko lokaletan instalatzen diren joko makina guztiak berariazko araudian zehaztutako fabrika marken bidez identifikatu beharko dira.
2. Era berean, zirkulazio gidaren edo ustiapen baimenaren alea makinaren aurrealdean edo albo batean jarri beharko da begi bistan, nahiz eta hori eskatuko ez den, baimenaren edukia pantailan bistaratzeko aukera badago."
2. artikulua. Joko Aretoen Erregelamendua onesten duen abuztuaren 30eko 270/1999 Foru Dekretua aldatzea.
Joko Aretoen Erregelamendua onesten duen abuztuaren 30eko 270/1999 Foru Dekretuaren 2., 11., 12., 13., 14., 17., 18. eta 19. artikuluak aldatu dira, eta honela idatzita geratuko dira:
"2. artikulua. Definizioa.
Joko aretoak joko makinak ustiatzen dituzten lokalak edo espazioak dituzten eta baimenduriko beste jolas aukera batzuk garatzeko beste batzuk izan ditzaketen establezimenduak dira."
"11. artikulua. Motak.
Joko aretoetan honako hauek baino ezin izanen dira instalatu:
a) Sari programatua duten joko makinak edo BR motakoak.
b) BS eta BM motako joko makinak.
c) BG motako joko makinak (hiru, gehienez).
d) Beste joko mota batzuen makina osagarriak."
"12. artikulua. Joko makinen interkonexioa.
1. Joko aretoetan sari programatua duten eta BR, BS eta BM motakoak diren joko makinak eta BG motakoak interkonektatzen ahalko dira, baldin eta hiru baino gutxiago ez badira, ezarritako zenbatekoa duen sari metatua eman ahal izateko eta sari metatu horrek makina bakoitzerako ezarritako itzulketa portzentajea gutxitzea ez dakarrela.
2. Halaber, areto ezberdinetan instalatuta dauden, sari programatua duten eta BR, BS eta BM motakoak edo BG motakoak diren joko makinak interkonektatzen ahalko dira, aurreko idatz-zatian adierazi diren baldintzen antzekoetan, Lehendakaritza, Justizia eta Barne Departamentuko kontseilariak ezartzen duen zenbatekoa duen sari metatua eman ahal izateko."
"13. artikulua. Interkonexioaren informazioa.
Sistema interkonektatu bakoitzean karruselaren zati diren makinak identifikatu, eta honako datu hauek biltzen dituen informazio panel bat, gutxienez, egon beharko da:
a) Konektaturiko makinen kopurua.
b) Baimenduriko sariaren gehieneko zenbatekoa.
c) Interkonexio sistemak Nafarroako Jokoen eta Apustuen Erregistroan duen inskripzio zenbakia."
"14. artikulua. Makinen kopurua.
Joko aretoetan instalatutako joko makinen kopurua berariazko araudiak arautuko du, nahiz eta, nolanahi ere, 10 makina ustiatu beharko diren, gutxienez."
"17. artikulua. Indarraldia.
Joko aretoak ustiatzeko baimenek indarraldi mugagabea izanen dute."
"18. artikulua. Joko aretoak eskualdatzea.
1. Baimena indarrean duten joko aretoak eskualdatzen ahalko dira Nafarroako Jokoen eta Apustuen Erregistroan izena emanda dauden enpresa operadoreen artean, administrazio baimena izan ondoren.
2. Enpresa eskuratzaileak 20. artikuluan ezarritako fidantza eratu beharko du Nafarroako Ogasunaren alde, eskualdatzeko baimena eman baino lehen.
3. Enpresa eskuratzaileak ondoko agiriak aurkeztu beharko ditu, aretoa eskualdatzeko eskatzean:
a) Negozioa eskualdatzen dela egiaztatzen duen agiria.
b) Titular berria Jarduera Ekonomikoen gaineko Zergan alta emanda dagoela frogatzen duen agiria."
"19. artikulua. Iraungipena eta baliogabetzea.
Ustiapen baimenak Jokoari buruzko abenduaren 14ko 16/2006 Foru Legearen 14. artikuluaren 5. idatz-zatian adierazitako kasuetan iraungiko dira.
II. KAPITULUA. JOKO MAKINEN EZAUGARRIAK ETA INSTALAZIO BALDINTZAK
3. artikulua. BG motako joko makinak.
Bingo jokoaren bertsio ezberdinetan oinarritzen diren BG motako joko makinak homologatu, eta Nafarroan instalatzeko eta ustiatzeko baimentzen ahalko dira, bideo seinalearen edo antzeko sistemaren bidez, hau da, baimenduriko establezimenduko langileek esku hartu gabe, kontrolatzen diren pantailak erabiliz informatikoki eta birtualki kudeatzen badira eta honako ezaugarri hauek badituzte:
a) Partida sinplearen gehieneko prezioa 0,20 eurokoa izanen da. Dena den, jokalariak nahi izanez gero, aldi bereko apustuak egitea onartuko da, jokalari bakoitzak partida batean egiten dituen apustu guztien baturaren balioa ezin dela sei eurotik gorakoa izan.
b) Makina bakoitzak partida batean ematen ahal duen gehieneko saria ez da izanen apustuan jokatutakoaren balioa baino mila aldiz handiagoa.
c) Balizko konbinazio guztietatik ondorioztatzen den partida estatistikaren arabera, makina bakoitzak duen sarien itzulketa portzentajea ez da izanen egindako apustu guztien %80tik beherakoa.
d) Partida bakoitzaren batez besteko iraupena ez da 3 segundotik beherakoa izanen, eta 600 partida garatzeko gutxieneko iraupena ez da 30 minututik beherakoa izanen.
e) Makinak ezin izanen ditu bertan garatzen den jokoaren kartoiak edo euskarri fisikoak saldu, jokalariak kanpoan erabiltzen ahal baditu.
f) Apustuak eta lortutako sarien ordainketa eskudirutan egiten ahalko dira legezko erabilerako billetetan edo txanponetan, makinak izan ditzakeen diru-zorroen eta ordaingailuen bidez (horiek egotekotan) edo aurreordainketako txartel elektronikoak edo beste ordainketa eta itzulketa euskarri batzuk, baimentzen direnak eta ordainketen eta kobrantzen segurtasuna bermatzen dutenak, erabiliz.
g) Makinak partidaren preziotik beherako zenbatekoak, aurreko partidetatik sobera daudenak, jokoan jartzeko aukera ematen duten eta konbinazioak ondoko partidetarako gordetzen dituzten gailuak izaten ahalko ditu. Horietaz gain, foru dekretu honetan eta jokoari eta apustuei buruzko gainerako araudian xedatutakoa hausten ez duten beste batzuk eta ohiz kanpoko sariak eskuratzeko aukera ematen dutenak izaten ahalko ditu; sari horiek ezin izanen dira b) atalean ezarritako gehieneko sariaren zenbatekotik gorakoak izan eta horiek hornitzeko ezin izanen da murriztu artikulu honen c) atalean gutxienekotzat jotako sarien itzulketa portzentajea.
h) Makinen aurrealdeko pantaila sinoptikoan honako hauek agertu beharko dira grafikoki: jokoaren arauak, sarien gutxieneko itzulketa portzentajea, konbinazio irabazleen deskripzioa eta, horren ondorioz, konbinazio irabazle bakoitzari dagokion sariaren zenbatekoa (eurotan edo egindako apustuaren multiplotan adierazitakoa) eta makina horietan jokatzeak mendekotasuna sortzen ahal duela eta adingabeek ezin dituztela erabili aipatzen duten ohartarazpenak.
4. artikulua. Sistemaren elementuak eta funtzionaltasunak.
Sistemak honako elementu eta funtzionaltasun hauek izanen ditu, gutxienez:
a) Multzoko zerbitzaria, egindako apustuei eta emandako sariei buruzko jarraibideak gauzatuko dituena eta okupaturiko makina edo terminalekin etengabeko komunikazioa ezarriko duena.
b) Zerbitzari zentrala, egindako apustuei eta emandako sariei buruzko datu guztiak artxibatuko dituena eta egindako partiden kopuruari, jokatutako zenbatekoei, konbinazio irabazleei eta emandako sariei dagozkien estatistikak eta txostenak eginen dituena, eguna eta ordua adierazita.
c) Komunikazioetako zerbitzaria, multzoko zerbitzariaren eta zerbitzari zentralaren arteko informazioa bideratu eta horren trukea bermatuko duena.
d) Kutxako sistema informatikoa, kutxazainen eginkizunak dituen terminala eta egindako transakzio ekonomiko guztiak kontrolatzeko eta kudeatzeko programa izanen dituena; programa horrek jokalariek eskatutako zenbatekoak kargatuko ditu, kobrantzak eta ordainketak egiteko egokiak diren euskarrietan, eta euskarri horien saldoa edo azken kreditua adieraziko du, jokalariei ordaintzeko.
e) Egiaztapen sistema, joko saio bakoitza hasi baino lehen, sistemak zuzen funtzionatzen duela egiaztatuko duena. Funtzionatzen duen bitartean zerbitzarietan zein makinetan matxurak edo akatsak antzematen badira, berriro hasi baino lehen, sistemak ez ezik, hori osatzen duten makina guztiek zuzen funtzionatzen dutela egiaztatuko du berriro, jokalariei jokatutako zenbatekoak eta, hala denean, une horretara arte irabazi dituzten eta kobratu ez dituzten sariak itzuli beharrari kalterik egin gabe.
5. artikulua. BG motako makinen interkonexioa.
1. BG motako makinak taldetan interkonektatuta instalatzen ahalko dira, egindako apustuen zenbatekoen zati bat jarraian metatuz sarien poltsak osatzeko aukera ematen duten gailuen bidez. Dena den, metaketa horrek ez du inola ere ekarriko 3. artikuluaren c) atalean makina bakoitzerako ezarritako itzulketa portzentajea murriztea.
Gailu horiek metatutako sariak prozesatu eta kudeatuko dituzte, eta makina edo terminal bakoitzera horien zenbatekoa bidaliko dute, talderako ezarritako sarien planaren arabera.
2. Interkonektatutako makina talde bakoitzeko emandako sari metatuaren gehieneko zenbatekoa ezin izanen da horretan interkonektatuta dauden makina guztiek banan-banan ematen ahal dituzten gehieneko sarien baturatik gorakoa izan, ezta horiek instalatzen dituzten lokalen berariazko araudian ezartzen den mugatik gorakoa ere.
Taldearen edo karruselaren zati diren makinetan zirkunstantzia hori berariaz adieraziko da.
3. Interkonexioaren ezaugarrien arabera, sistemak tokiko zerbitzariak edo kontzentratzaileak, eta interkonexioaren zerbitzari zentralera urrundik konektatzeko sare egokiak instalatzea aurreikusten ahalko du; zerbitzari zentrala Nafarroako Foru Komunitateko lurralde esparruan kokatu beharko da. Halaber, sistemak establezimendu bakoitzaren sarera konektaturiko pantailak izan beharko ditu, sarien eta interkonektaturiko jokoaren egoeraren berri emanen dutenak.
6. artikulua. BR eta BS motako joko makinak.
1. BR motako joko makinak edo sari programatua duten josteta makinak homologatu, eta Nafarroan instalatzeko eta ustiatzeko baimentzen ahalko dira, honako ezaugarri hauek badituzte:
a) Partida sinplearen gehieneko prezioa 0,20 eurokoa izanen da eta, jokalariak nahi izanez gero, aldi berean bost partida, gehienez, egiteko aukera onartuko da.
b) Makinak partida batean ematen ahal duen gehieneko saria honen emaitza izanen da: aldi bereko bost partidaren prezioa bider bostehun.
c) Ondoz ondoko berrogei mila partidaren ziklo bateko sarien itzulketa portzentajea ez da zikloan egindako partiden balioaren %70etik beherakoa izanen.
d) Partidaren batez besteko iraupena ez da hiru segundotik beherakoa izanen, eta 600 partidaren gutxieneko iraupena 30 minutukoa edo hortik gorakoa izanen da.
e) Makinen kreditu kontagailuak ez du baimenduko metaketa partida sinplearen gehieneko prezioa baino berrogeita hamar aldiz handiagoa izatea.
f) Lortu arren, ordaindu ez diren eta sarien markagailuan metatuta dauden sarien zenbatekoa erreserbako kontagailura eramaten ahalko da edozein unetan. Horrek atera eta berriro lortzea edo kredituen kontagailura eramatea ahalbidetuko du, jokalariak nahi badu eta berariaz eskatzen badu. Bestela, kredituen kontagailura eramanen du zuzenean, jokalariak nahi badu eta berariaz eskatzen badu; kasu horretan, horretarako lehen aipatu den muga errespetatuko da.
g) Joko makinek irabazi planak adierazten ahalko dituzte partidaren prezioaren multiplotan edo eurotan.
h) Jokorako eta haren garapenerako pantaila sinoptiko serigrafiatuak erabiltzen ahalko dira, hori seinaleztatzeko elementu mekanikoak, elektrikoak edo elektronikoak baliatuz; bestela, telebista pantailak, antzeko euskarri fisikoa eta bideo seinalea erabiltzen ahalko dira.
2. Era berean, BS motako makinak, BR motako makinen ezaugarri berdinak (horietarako 1. idatz-zatiaren a) eta b) letretan ezarritakoak izan ezik) dituztenak, homologatu eta baimentzen ahalko dira, zehaztapen hauek badituzte:
a) Partida bakoitzean egindako apustuaren (sinplea zein metatua) gehieneko zenbatekoa ez da inola ere 2 eurotik gorakoa izanen.
b) Makinak partida batean ematen ahal duen gehieneko saria honen emaitza izanen da: partidaren prezioa bider mila.
3. Diru-zorroek partida metaturako edo aldi berekorako baimentzen den gehieneko zenbatekoa baino berrogeita hamar aldiz handiagoa, gehienez, den balio izendatuko txanponak edo billeteak onartzen ahalko dituzte.
4. Apustuak eta BS eta BM makinetan lortutako sarien ordainketa eskudirutan egiten ahalko dira legezko erabilerako billetetan edo txanponetan, makinak izan ditzakeen diru-zorroen eta ordaingailuen bidez edo beste baliabide batzuk (adibidez, aurreordainketako txartel elektronikoak) edo beste euskarri batzuk, baimentzen direnak eta ordainketen eta kobrantzen segurtasuna bermatzen dutenak, erabiliz.
5. Aurrekoari kalterik egin gabe, joko makinen ezaugarri teknikoei dagokienez, artikulu honetan ezarritakoa ukatzen ez badu, urriaren 2ko 2110/1998 Errege Dekretuak onetsitako Josteta eta Zorizko Makinei buruzko Erregelamendua aplikatuko da Nafarroan.
1. BR, BS, BM, BG eta C motako joko makinek eta beste joko mota batzuen makina osagarriek honako funtzionaltasun hauek dituzten kontagailuak izan beharko dituzte:
a) Horiek instalatuta dituen makina identifikatzea.
b) Egindako partiden kopuruari, sartutako edo bildutako funtsei, emandako sariei eta urte naturalean bilketaren aldean dakarten portzentajeari dagozkien datuak etengabe eta lehenengo instalaziotik biltegiratzea.
c) Datuak memorian biltegiratuta izatea, nahiz eta makina deskonektatuta egon, eta makina erabiltzea eragoztea, kontagailuan matxura badago edo hori deskonektatuta badago.
d) Seriatuta eta edozein manipulazioren aurka babestuta egotea.
e) Administrazioak bere kabuz irakurtzeko aukera ematea.
2. Makina mota horri gehitutako kontagailuak arloan indarra duen araudian ezarritako Estatuko kontrol metrologikoaren pean egonen dira. Betekizun hori betetzen dela egiaztatu beharko da horretarako baimenduriko erakundeek egindako ziurtagiriaren bidez. Hala ere, Europar Batasuneko edo Europako Esparru Ekonomiko estatu kideetarako eta Turkiarako nahikoa izanen da beren araudietan biltzen diren zehaztapen baliokideak betetzen dituztela egiaztatzen duen ziurtagiria aurkeztea.
3. Artikulu honen 1. idatz-zatiak aipatzen dituen kontagailuen instalazioa ez da derrigorrezkoa izanen C motako makinetarako, horien instalazioa hartzen duen establezimenduak sistema informatiko zentral baimendua badauka, makinetara konektatuta dagoena eta datu guztiak erregistratu, eta makinen banakako kontugailuetarako idatz-zati horretan aurreikusitako funtzionaltasun guztiak egiten dituena.
4. Halaber, ez da derrigorrezkoa izanen bingoetan instalaturiko BG motako makinetan kontagailu horiek jartzea, aurreko idatz-zatian aurreikusitako sistemaren antzeko bat, baimenduta dagoena, erabiltzea hautatzen bada.
1. Foru dekretu honetan adierazten diren joko makinen ereduak Nafarroako Foru Komunitateko Administrazioko organo eskudunak inskribatu beharko ditu Nafarroako Jokoen eta Apustuen Erregistroan, homologatu, edo, indarra duen araudia betetzen dutela egiaztatzeko egokitzat jotzen dituen probak egin ondoren.
2. Ondorio horretarako, Departamentuak dokumentazioa aurkezteko edo egiaztapen hori gauzatzeko beharrezkotzat jotzen dituen probak egiteko eskatzen ahalko du. Inskripzioa eskatu duenak horiek egin beharko ditu, eta, hala denean, beharrezko laguntza eman beharko die Nafarroako Foru Komunitateko Administrazioak egiaztapen probak gauzatzeko hautatzen dituen agenteei.
Lehenbiziko xedapen gehigarria. Sarien ordainketa.
BS, BM eta BG motako makinek emandako sarien ordainketa enpresaburuak hori ordaintzeko funtsak dituen banketxearen txekea emanez egiten ahalko da, jokalariak aurretik eskatu badu edo horrekin ados badago.
Bigarren xedapen gehigarria. Zirkulazio gidak.
Foru dekretu honek indarra hartzen duenetik aurrera, joko makinak ustiatzeko ematen diren baimenek zein motatako lokaletan instalatzen ahalko diren zehaztuko dute.
Hirugarren xedapen gehigarria. Hartutako neurrien eragina.
1. Joko arloan eskuduna den Nafarroako Foru Komunitateko Administrazioko organoak foru dekretu honetan hartutako neurriek jokoaren eta apustuen sektore ezberdinetan izaten ahal duten eraginaren berariazko jarraipena eginen du.
2. Aldi berean, urtebeteko epean Nafarroako Foru Komunitatean joko motak, makinak eta establezimenduak planifikatzeko neurriak hartzeko aukerari buruzko azterlana eginen da.
Laugarren xedapen gehigarria. IKTak eta prozeduren telematizazioa gehitzea.
Pixkanaka-pixkanaka jokoaren eta apustuen kudeaketari gehituko zaizkio informazioaren eta komunikazioaren teknologien gaur egungo garapen egoerak ematen dituen alternatibak, eta sektorearen eta Nafarroako Foru Komunitateko Administrazioaren arteko baimenen eta, oro har, komunikazioen kudeaketa telematizatua ezarriko da, Nafarroako Foru Komunitateko Administrazioan administrazio elektronikoa ezartzeko apirilaren 4ko 11/2007 Foru Legean ezarritakoaren arabera.
Lehenbiziko xedapen iragankorra. Baimenen balioa.
1. Foru dekretu honek indarra hartu baino lehen joko makinak instalatzeko emandako baimenek indarraldi mugagabea izanen dute, eta Joko Makinen Erregelamendua onetsi duen uztailaren 31ko 181/1990 Foru Dekretuaren 11. artikuluan adierazitako araubidearen pean egonen dira.
2. Era berean, foru dekretu honek indarra hartu baino lehen joko aretoak ustiatzeko emandako baimenek indarraldi mugagabea izanen dute, foru dekretuak indarra hartzearekin batera.
Bigarren xedapen gehigarria. Joko makinen planifikazioa.
Foru dekretu honek indarra hartzearekin batera, bi urteko epean ez da emanen sari programatua duten BR izaera motako joko makinak ustiatzeko baimenik, honako kasu hauetan egon ezean:
a) Baimenduriko beste makina bat ordezteko alta.
b) Joko aretoetan, bingoetan, kasinoetan eta, hala denean, apustu lokaletan instalatzeko altak.
Hirugarren xedapen iragankorra. Kokaleku komunikazioa.
Uztailaren 31ko 181/1990 Foru Dekretuak onetsitako Joko Makinen Erregelamenduaren 12. artikulu aldatuan ezarritako joko makinen kokaleku komunikazioen benetako ezarpena ez da eginen, zuzeneko aurkezpenari kalterik egin gabe, komunikazio hori telematikoki tramitatzea ahalbidetzen duen aplikazio informatikoa abiarazi arte.
Laugarren xedapen iragankorra. Interkonektatutako sarien mugak.
Lehendakaritza, Justizia eta Barne Departamentuko kontseilariak beste batzuk onetsi arte, joko aretoetako makinen interkonexioagatik metatzen diren sariak honako muga hauek arautuko dituzte:
a) Joko aretoan instalatutako BR, BS eta BM motako joko makinen interkonexioa: 3.000 euro.
b) Joko areto ezberdinetan instalatutako BR, BS eta BM motako joko makinen interkonexioa: 12.000 euro.
c) Joko aretoan interkonektatutako BG motako makinak: 15.000 euro.
Xedapen indargabetzaile bakarra. Indargabetutako arauak.
Honako hauek indargabetuko dira: Joko Makinen Erregelamendua onetsi duen uztailaren 31ko 181/1990 Foru Dekretuaren eranskina, Joko Aretoen Erregelamendua onesten duen abuztuaren 30eko 270/1999 Foru Dekretuaren xedapen gehigarri bakarra eta bigarren xedapen iragankorra, Joko makinak homologatu, baimendu eta instalatzeari eta joko aretoen araubideari buruzko zenbait neurri onesten dituen urriaren 9ko 68/2006 Foru Dekretua eta, oro har, foru dekretu honetan ezarritakoaren kontra dauden maila bereko edo beheragoko xedapen guztiak.
Azken xedapen bakarra. Indarra hartzea.
Foru dekretu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2010eko azaroaren 15ean.-Nafarroako Gobernuko lehendakaria, Miguel Sanz Sesma.-Lehendakaritza, Justizia eta Barneko kontseilaria, Javier Caballero Martínez.
I. ERANSKINA. JOKO MAKINAK INSTALATZEKO BAIMENAREN ESKAERA
1. Establezimenduan gauzatutako jardueraren titularraren identifikazioa.
| Jauna/Andrea: | NAN/IFZ: | ||
| Herria: | Kalea/zenbakia: | ||
| Posta kodea: | Tel. zk.: | Bere izenean/Enpresa hau ordezkatuta: (behar ez dena, ezabatu) | |
| Enpresa | NAN/IFZ: | ||
| Herria: | Kalea/zenbakia: | ||
| Posta kodea: | Tel. zk.: | ||
2. Establezimenduaren identifikazioa.
| Helbidea: | Zenbakia: | Tel. zk.: |
| Posta kodea eta herria | Izen komertziala: | |
3. Enpresa operadorearen identifikazioa.
| NAN/IFZ: | Izena eta deiturak / Sozietatearen izena: | Erregistro zk.: |
| Datu Pertsonalak Babesteari buruzko abenduaren 13ko 15/1999 Lege Organikoan ezarritakoaren arabera, enpresa eskatzaileak baimena emanen du Ekonomia eta Ogasun Departamentuak Barne Zuzendaritza Nagusiaren eskura jartzeko Jarduera Ekonomikoen gaineko Zergaren erregistro fiskalean enpresa eskatzaileari buruz dagoen informazio fiskala. Honen bidez, eta abenduaren 13ko 15/1999 Lege Organikoan xedatutakoari jarraikiz, eskatzaileari jakinaraziko zaio inprimaki honetan adierazitako datuak "Jokoaren kontrola" izeneko fitxategian sartuko direla. Haren ardura duen unitate organikoa Barne Zuzendaritza Nagusia da eta xedea Nafarroan joko jarduerak kontrolatzea da. Orobat, jakin ezazu datuak eskuratzeko, zuzentzeko, deuseztatzeko eta kontra egiteko eskubideak erabiltzen ahal dituzula Joko, Ikuskizun Publiko eta Josteta Jardueren Atalera joz (Zaragozako errepidea, 3,5 km, Cordovilla, Nafarroa; tel. zk: 848 42 69 69 eta 848 42 68 69). |
........................ (e)n,............(e)ko................................. aren......(e)(a)n
II. ERANSKINA. JOKO MAKINEN KOKALEKU KOMUNIKAZIOA
1. Establezimenduan gauzatutako jardueraren titularra.
| Izena eta deiturak edo Sozietatearen izena: | NAN edo IFZ: | |||
| Helbidea: | Herria: | Posta kodea: | ||
| Probintzia: | Tel. zk.: | Helbide elektronikoa: | ||
2. Instalatu edo kendu beharreko makina(k), enpresa operadorea eta gauzatze-eguna.
| INSTALATU BEHARREKO MAKINA | KENDU BEHARREKO MAKINA | ||||
| Mota: | Ustiapen baimenaren zenbakia: | Mota: | Ustiapen baimenaren zenbakia: | ||
| Modeloaren izen komertziala: | Modeloaren izen komertziala: | ||||
| Enpresa operadorearen izena: | Erregistro zk.: | Enpresa operadorearen izena: | Erregistro zk.: | ||
| Instalazioaren gauzatze-eguna: | Kentzearen gauzatze-eguna: | ||||
3. Establezimenduaren datuak:
| Kalea edo plaza: | Zenbakia: | Herria: | Posta kodea: |
| Establezimenduaren izen komertziala: | Instalazio baimenaren zk.: | ||
........................ (e)n,............(e)ko................................. aren......(e)(a)n
(Establezimenduan gauzatutako jardueraren titularraren sinadura)
Iragarkiaren kodea: F1018929
