LEXNAVARRA
43/2010 FORU DEKRETUA, ABUZTUAREN 9KOA, BATERAKO JARDUKETA PLANEN, HITZARMENEN ETA AKORDIOEN ERREGISTROA ARAUTZEN DUENA 
-
BON 30/08/2010
I. KAPITULUA. XEDAPEN OROKORRAK
- 1. artikulua. Xedea.
- 2. artikulua. Hitzarmenen arloko jarduna eta tipologia.
- 3. artikulua. Inskribatzen ahal diren baterako jarduketa planak, hitzarmenak eta akordioak .
II. KAPITULUA. ERREGISTROAREN ATXIKIPENA ETA ANTOLAKETA
- 4. artikulua. Atxikipena .
- 5. artikulua. Erregistroaren antolaketa.
III. KAPITULUA. ERREGISTROAN INSKRIBATZEKO PROZEDURA
- 6. artikulua. Aurretiko jarduketak.
- 7. artikulua. Inskripzioa .
IV. KAPITULUA. ERREGISTROAREN PUBLIKOTASUNA ETA KONTSULTA
- 8. artikulua. Publizitatearen eta irispidearen araubidea .
- 9. artikulua. Ziurtagiriak eta kopiak luzatzea .
V. KAPITULUA. KONTROLA ETA JARRAIPENA
- 10. artikulua. Kontrola eta jarraipena .
- 11. artikulua. Hitzarmenen Erregistroa eguneratzea.
- Xedapen gehigarri bakarra. Erreferentziak .
- Lehenengo xedapen iragankorra. Tramitatzen ari diren hitzarmen eta itunak .
- Bigarren xedapen iragankorra. Foru dekretu honen aurretik izenpetutako hitzarmen eta itunen inskripzioa .
- Azken xedapenetan lehena. Garatzeko eta betearazteko gaikuntza .
- Azken xedapenetan bigarrena. Indarra hartzea.
Administrazio publikoek elkarri lagundu beharra bide ezberdinetatik gauza daiteke. Nafarroako Foru Komunitateko Administrazioari buruzko abenduaren 3ko 15/2004 Foru Legearen 87.2 artikuluak aurreikusten du legeetan jasota dauden lankidetza, koordinazio eta elkarlanerako baliabide eta teknikak erabiltzea, elkarlanaren eta leialtasun instituzionalaren printzipioei jarraikiz. Lankidetzarako bideen askatasunaren printzipiotik haratago, esperientziak erakutsi du Nafarroako Foru Komunitateko Administrazioak eta beste administrazio publiko batzuek elkarri laguntzeko harremanak ezartzeko tresna erabilgarrienak lankidetza hitzarmen eta itunak direla.
Nafarroako Foru Komunitateko Administrazioari buruzko abenduaren 3ko 15/2004 Foru Lege berak 92. artikuluan Hitzarmenen eta Itunen Erregistroa sortu zuen, hitzarmenen eta itunen publikotasun, gardentasun eta kontrolerako tresna gisa. Agindu horrek berak ezartzen du geroko erregelamendu batek erregistroaren araubide juridikoa, funtzionamendua eta atxikipen organikoa finkatuko dituela.
Berariazko lege igorpen horrek justifikatzen du Hitzarmenen eta Itunen Erregistroaren erregelamenduzko arauketa publikotasunaren eta gardentasunaren printzipioetan oinarrituta egitea, horiek baitira administrazio jarduera guztien printzipioak, baita erregistroaren beraren sorrerakoak ere, administrazioak hitzarmenen arloan duen jardueraren arrazionalizazio eta kontrolerako baliabide gisa. Erregistroak egin dezakeen kontrol lanak izenpetuko diren hitzarmen eta itunen eraginkortasuna eta eragimena handituko du, zalantzarik gabe. Nafarroako Foru Komunitateko Administrazioak hitzarmenen arloan duen jarduera erregistratzeak une bakoitzean indarra duten hitzarmen eta itunak ezagutzeko balioko du. Horrekin, idazpen berriak egiten direnean kontraesanak eta bikoiztasunak saihestuko dira. Gainera, hitzarmenek eta itunek indarra duten bitartean eta iraungitzen direnean gertatzen diren aldaketak, etendurak, luzapenak eta gainerako inguruabarrak islatzeko balioko du. Are gehiago, haien ondoriozko konpromisoak edo eskubideak noiz baliatu behar diren zehazteko balio dezake. Gainera, foru dekretu honen asmoa da sinatzen diren hitzarmen eta itunei neurri bateko homogeneotasun bat ematea, definizio eta tipologia bat ezarriz, haiei ematen zaizkien izen ezberdinak murrizteko asmoz. Horrez gainera, Nafarroako Gobernuaren Interneteko atariaren bidez, jende guztiaren eskura izanen diren datuak finkatuko dira.
Helburuak horiek direla, foru dekretu honek Nafarroako Foru Komunitateko Administrazioaren Erregistroaren antolamendua, funtzionamendua eta kontsulta arautzen ditu, hamaika artikulutan (bost kapitulutan bilduak), bi xedapen iragankorretan eta bi azken xedapenetan.
I. kapituluan xedapen orokorrak jasotzen dira, non erregistroan inskriba daitezkeen hitzarmen eta itunak definitu, sailkatu eta zehazten baitira.
Nafarroako Foru Komunitateko Administrazioari buruzko abenduaren 3ko 15/2004 Foru Legeak ezartzen du Hitzarmenen eta Itunen Erregistroan Foru Komunitateko Administrazioak berak edo bere erakunde publikoek beste edozein administrazio edo entitate publikorekin sinatzen dituzten hitzarmen eta itunak, bederen, inskribatuko direla. Foru dekretu honek lege aurreikuspen hori garatzen du, bi aldetatik. Batetik, entitate publikoa zer den zehazten du, inskriba daitezkeen hitzarmen eta itunak zeintzuk diren finkatzearen ondorioetarako. Zehazki, ezartzen da honako hauek inskribatu behar direla: lurraldeko administrazio publikoekin eta beren erakunde publikoekin izenpetzen dituztenak, organo konstituzionalekin eta estatutu-organoekin sinatzen direnak eta, azkenik, beste estatu batzuetako entitate publikoekin edo nazioarteko erakundeekin hitzartzen direnak.
Beste alde batetik, inskriba daitezkeen hitzarmenen eremu subjektiboa handitzen da, entitate edo pertsona pribatuekin izenpetzen direnak ere sartzen baitira. Partikularrekin sinatzen diren hitzarmen horien inskripzioa bereziki beharrezkoa da Nafarroako Foru Komunitateko Administrazioaren jardunaren gainean izan litekeen partzialtasun edo bereizkeria izpirik txikiena ere uxatzeko.
Bazter uzten dira, hala ere, berariazko araudi sektoriala duten hitzarmenak, arau horietan erregistro honen helburuak bermatzen badira. Horregatik, erregistrotik kanpo gelditzen dira Estatuarekiko Hitzarmen Ekonomikoa, kudeaketa esleipenak egiteko hitzarmenak, hirigintzako hitzarmenak, diru-laguntzak arautzeko hitzarmenak eta Segurtasun Batzordearen hitzarmenak.
II. kapituluan erregistroaren atxikipena eta antolaketa arautzen dira. Nafarroako Foru Komunitateko Administrazioaren Hitzarmenen eta Itunen Erregistroaren antolaketa, zuzendaritza eta kontrola erakunde-harremanen arloan eskumena duen zuzendari nagusiari esleitzen zaizkio. Erregistroaren antolaketari dagokionez, hitzarmena edo ituna izenpetzen duten erakundeek beren atalak egituratzeko duten irizpidea erabiltzen da.
Foru dekretuaren III. kapituluan Erregistroan inskripzioak egiteko prozedura arautzen da. Hitzarmena edo ituna sinatu aurretik, indarra dutenak ez bizkoizteko, erregistroaren ardura duen zuzendaritza nagusiari aginduzko txosten bat eskatzea aurreikusten da, izenpetu nahi den hitzarmen edo itunaren eduki edo xede berdina duen edo inskripzioagatik ukitua izan daitekeen beste hitzarmen edo itun bat indarrean ba ote dagoen jakiteko. Txosten hori aukerakoa da eta ez da lotzailea, baina sinatzearen kontrakoa baldin bada, organo, erakunde edo entitate sustatzaileak espedientean adierazi beharko ditu txostenetik aldentzeko arrazoiak eta berariaz justifikatu beharko du indarreko beste hitzarmen edo itun batzuekin bikoiztasunik ez dagoela.
Inskribatzeko prozedurari berari dagokionez, hitzarmena edo ituna sustatu duen departamentuko idazkaritza tekniko nagusiak izanen du inskripzioa sustatzeko beharra, Hitzarmenen eta Itunen Erregistroari haren kopia bat eta hura onetsi edo baimendu zuen egintza juridikoaren kopia bat bidaliz. Dena dela, sinatzaileak erakunde publikoak edo kudeaketarako erakunde pertsonifikatuak direnean, betebehar hori kasuan kasuko idazkaritzak izanen du. Bidalitako dokumentazioa ikusirik, Erregistroko inskripzioa egiteko orri bat irekiko da hitzarmen edo itun bakoitzeko. Inskripzioa elektronika bidez baliozkotuko da eta alderdi sinatzaileei jakinaraziko zaie.
Erregistroaren publikotasuna eta kontsulta IV. kapituluan arautzen dira. Abiapuntua da erregistroa publikoa eta doakoa dela. Inskribatutako hitzarmen eta itunetako daturik esanguratsuenak telematika bidez kontsultatzeko aukera egonen da. Bestalde, 8. artikuluan aipatzen diren organo eta pertsona legeztatuei Erregistroa kontsultatzeko aukera bermatzen zaie. Era berean, subjektu horiek Erregistroko idazpenen edo agirien ziurtapenak edo kopia bakunak eskatu eta lortzeko aukera aurreikusten da.
Foru dekretuaren V. kapituluak hitzarmenen eta itunen kontrola eta segimendua arautzen ditu. Nafarroako Foru Komunitateko idazkaritza tekniko nagusiei eginkizunak esleitu zizkion otsailaren 21eko 29/2005 Foru Dekretuari jarraikiz, hitzarmen eta itunen jatorrizko agiria artxibatu eta gordetzea haiei esleitzen zaie, edo bestela, erakunde publikoetan edo kudeaketarako erakunde pertsonalizatuetan, idazkaritza lanak egiten dituztenei. Organo horiek Erregistroari jakinarazi beharko diote hitzarmenetan edo itunetan gertatzen diren aldaketa edo gorabehera guztien berri, Erregistroan inskriba daitezen. Eskumen horiek galarazi gabe, Erregistroaren ardura duen zuzendaritza nagusiari gaikuntza ematen zaio hitzarmenen edo itunen indarraldiari edo haien edukiari buruzko informazioa eskatzeko, Erregistroa eguneraturik izateko.
Azkenik, xedapen iragankorretan foru dekretu honek indarra hartzen duenean sinatuak dauden edo tramitazio bidean dauden hitzarmen edo itunak inskribatzeko aplikatu beharreko araubidea ezartzen da.
Horrenbestez, Erakundeekiko Harremanetarako kontseilari eta Gobernuaren eledunak proposatuta, Nafarroako Kontseiluarekin bat, eta Nafarroako Gobernuak 2010eko abuztuaren 9an egindako bilkuran hartutako erabakiarekin bat,
DEKRETATU DUT:
I. KAPITULUA. XEDAPEN OROKORRAK
Foru dekretu honen xedea da Nafarroako Foru Komunitateko Administrazioaren Hitzarmenen eta Itunen Erregistroaren antolaketa, funtzionamendua eta kontsulta arautzea, Nafarroako Foru Komunitateko Administrazioak eta haren erakunde autonomoek hitzarmenen arloan duten jardunaren publikotasuna, gardentasuna eta kontrola bermatzeko baliabide gisa.
2. artikulua. Hitzarmenen arloko jarduna eta tipologia.
1. Foru agindu honetan xedatutakoaren ondorioetarako, hitzarmenen arloko jarduna da borondateen arteko akordio bat, kontratu publikoen arloko legediari lotuta ez dagoena, interes komuneko helburuak lortzearren Nafarroako Foru Komunitateko Administrazioak eta haren erakunde autonomoek beste administrazio publiko batzuekin, Estatuko botereekin eta, oro har, pertsona fisiko edo juridiko publiko edo pribatuekin izenpetzen dutena. Jardun hori edozein arlori buruzkoa izan daiteke, indarreko araudia errespetatuz eta Nafarroako Foru Komunitateak bereganatu dituen eskumenen esparruaren barrenean.
2. Aurreko idatz-zatian aipatutako hitzarmenen arloko jarduna formalizatzeko baliabideek hauetako izen bat izanen dute:
a) Protokolo orokorrak: interes komuneko aferetan, administrazio publiko bakoitzaren jarduketaren gainean orientabide batzuk ezartzera mugatzen direnak, edo sinatzaileen intereserako gai batean edo haien eskumeneko arlo batean elkarlana garatzeko esparru orokorra eta metodologia finkatzera.
b) Lankidetza hitzarmenak: hitzarmenaren gorputzean berean edo gehigarri edo eranskinetan, alderdi bakoitzaren betebehar zehatzak eta ongi mugatuak, zuzenean eta berehalakoan galdagarriak, ezartzen dituztenak.
c) Lankidetzarako esparru-hitzarmenak: alderdi sinatzaileei betebehar juridikoak sortzen ahal dizkietenak, baina, eraginkorrak izateko, hitzarmen edo itun berariazkoak formalizatzea eskatzen dutenak espresuki. Hitzarmen edo itun berariazko horietan betebeharrak zehaztuko dira, esparru-hitzarmenetan finkatutako edukia eta mugak errespetatuz.
d) Lankidetzarako hitzarmen berariazkoak: esparru-hitzarmenak garatzea helburu dutenak, betebehar zehatzak, eta zuzenean galdagarriak, finkatuz.
e) Sektoreko batzarraren hitzarmenak: sektoreko batzar baten barruan hartutako akordioak arautzen dituztenak. Horien barruan daude sektoreko batzarrek, nork bere sektorearen eremuan, hartutakoak, jarduketa plan edo programa bateratu baten akordioak osatzeko helburua dutenak.
f) Nafarroako Foru Komunitateko Administrazioari buruzko abenduaren 3ko 15/2004 Foru Legearen 93. artikuluan aipatzen diren elkarrekin jarduteko planak.
g) Estatuarekiko eta autonomia erkidegoekiko lankidetza hitzarmen eta itunak, Nafarroako Foru Komunitateko Administrazioari buruzko abenduaren 3ko 15/2004 Foru Legearen 89. artikuluan aipatzen direnak. Eta orobat toki entitateekiko lankidetza hitzarmenak, Nafarroako Toki Administrazioari buruzko Foru Legearen 63. artikuluan aurreikusita daudenak.
h) Beste herrialde batzuetako erakunde publikoekin sinatzen diren lankidetza itunak, kanpoko proiekzioari buruzkoak, mugaz gaindiko eskualde arteko lankidetzari buruzkoak eta garapenerako laguntzari buruzkoak.
3. Dena dela, Estatuko administrazio orokorrarekin edo autonomia erkidegoekin, organo konstituzionalekin edo estatutu-organoekin eta beste estatu batzuetako entitate publikoekin edo nazioarteko erakundeekin izenpetzen diren lankidetza hitzarmen edo itunetan, aurreko idatz-zatian ezarritako izenetako bat jartzerik ez badago, sinatzaileen artean aukeratutako beste izen bat jartzen ahalko zaio.
3. artikulua. Inskribatzen ahal diren baterako jarduketa planak, hitzarmenak eta akordioak .
1. Nafarroako Foru Komunitateko Administrazioak eta haren erakunde publikoek honako hauekin izenpetzen dituen baterako jarduketa planak, hitzarmenak eta akordioak inskribatuko dira erregistroan: Estatuko administrazio orokorra, autonomia erkidegoak, toki entitateak, administrazio horien mendeko edo haiei lotutako erakunde publikoak, organo konstituzional eta estatutu-organoak, beste estatu batzuetako entitate publikoak edo nazioarteko erakundeak eta beste edozein entitate edo pertsona fisiko edo juridiko, bai zuzenbide publikokoak, bai zuzenbide pribatukoak.
2. Inskripziotik kanpo gelditzen dira:
a) Estatuarekiko hitzarmen ekonomikoak eta horien aldaketak.
b) Kudeaketa esleipenak egiteko hitzarmenak.
c) Hirigintzako hitzarmenak.
d) Nafarroako Segurtasun Batzordearen hitzarmenak.
e) Dirulaguntzak arautzen dituzten hitzarmenak.
f) Kontratuen berezko prestazioak xede dituzten hitzarmenak, haien izaera eta araubide juridikoa egokituko baita kontratu publikoei buruzko foru legerian ezarritakora.
II. KAPITULUA. ERREGISTROAREN ATXIKIPENA ETA ANTOLAKETA
Lehendakaritzaren arloan eskumena duen zuzendaritza nagusiari dagokio Baterako Jarduketa Planen, Hitzarmenen eta Akordioen Erregistroa antolatzea, zuzentzea eta kontrolatzea.
5. artikulua. Erregistroaren antolaketa.
Nafarroako Foru Komunitateko Hitzarmenen eta Itunen Erregistroa atal hauetan egituratzen da:
a) Lehenengo atala: Estatuko administrazio orokorrarekin eta haren erakunde publikoekin edo Estatuari lotutako edo haren menpeko gainerako entitate publikoekin sinatutako hitzarmen eta itunak.
b) Bigarren atala: autonomia erkidegoekin, haien erakunde publikoekin edo haiei lotutako edo haien menpeko gainerako entitate publikoekin sinatutako hitzarmen eta itunak.
c) Hirugarren atala: toki entitateekin sinatutako hitzarmen eta itunak.
d) Laugarren atala: Estatuko organo konstituzionalekin eta autonomia erkidegoetako estatutu-organoekin sinatutako hitzarmen eta itunak.
e) Bosgarren atala: beste estatu batzuekin edo beste estatu batzuetako eskualdeekin, haiei lotutako edo haien menpeko erakunde edo entitateekin eta nazioarteko erakundeekin sinatutako hitzarmen eta itunak.
f) Seigarren atala: beste hitzarmen eta itun batzuk.
III. KAPITULUA. ERREGISTROAN INSKRIBATZEKO PROZEDURA
6. artikulua. Aurretiko jarduketak.
1. Baterako jarduketa planak, hitzarmenak eta akordioak izapidetu aurretik, Nafarroako Foru Komunitateko Administrazioaren organoak edo haiek sustatzen dituen erakunde publikoak erregistroaren txostena eskatzen ahalko du, haien edukiak bikoiztasunik edo kontraesanik sor ez dezan inskribatuta eta indarrean daudenekin. Txosten hori egiteko, lankidetza eskatzen ahalko zaie edukiak edo indarraldiak ukitutako hitzarmen eta akordioez arduratzen diren unitateei .
2. Txosten hori aukerakoa eta ez-lotzailea izanen da. Nolanahi ere, txostena kontrakoa bada, organo, erakunde edo entitate sustatzaileak idazpena justifikatzen duten arrazoiak erantsi beharko dizkio espedienteari, hala nola indarrean dauden beste hitzarmen edo itunekin bikoiztasunik ez dagoela adierazteko agiria.
3. Txostena 10 egun baliodunetan eginen da, hitzarmenaren edo itunaren proiektua jasotzen denetik. Txostena epe horretan egiten ez bada, aldekoa dela ulertuko da, eta hitzarmena edo akordioa sinatzeko jarduketek aurrera segitzen ahalko dute.
1. Hitzarmena, akordioa edo plana sinatu edo, hala badagokio, argitaratu eta 15 egun balioduneko epean, departamentu sustatzailearen idazkaritza tekniko nagusiak edo, hala badagokio, mendeko edo lotutako erakunde publikoan idazkaritza lanak egiten dituenak, sinatutako tresnaren kopia bat bidaliko du erregistrora, bai eta hura onetsi edo baimendu zuen administrazio-egintzaren kopia bat ere; horretarako, erregistroa kudeatzen duen aplikazio informatikoa erabiliko du. Inskripzioaren ondorio beretarako, aplikazio horretan gaitutako inprimakia ere bete beharko du.
2. Aurkeztutako dokumentazioa eta aplikazioan jasotako datuak aztertuko ditu erregistroak. Beharrezkoa izanez gero, sustatzaileari eskatuko dio igor ditzan inskripzioa egiteko beharrezkoak diren dokumentu eta/edo datuak, baldin eta falta badira, osatu edo zehaztu gabe badaude edo okerrak badira.
3. Inskripzioa egiteko, orri bat irekiko da hitzarmen, akordio edo plan bakoitzerako. Orri horretan, elektronikoki gordailutuko da aurkeztutako dokumentazioa, eta jasotako datuak agertuko dira.
4. Inskripzioaren alta egiteko, erregistroaz arduratzen den unitateari atxikitako langileen baliozkotze elektronikoa beharko da aldez aurretik.
5. Inskribatutako hitzarmen, akordio edo plan bakoitzari alta korrelatiboko zenbaki bat esleituko zaio atal bakoitzeko, eta zenbaketa urtero hasiko da. Dagokion erregistro-zenbakia bide telematikoz jakinaraziko da.
6. Erregistroaren osotasuna, segurtasuna edo koherentzia dela eta, erregistroak inskripzio baten sustatzaileari eskatzen ahalko dio egokitzat jotzen duen informazioa, dela inskribatutako egintza baten datuei eta indarraldiari buruz, dela ondoren egiten diren aldaketei eta haien edukiari buruz. Horretarako, erregistroaren aplikazioaren formularioan, sustatzaileak jakinaraziko du foru administrazio publikoko zer unitatek duen baterako jarduketa plana, hitzarmena edo akordioa betetzeko ardura.
7. Alta egoerak irauten duen bitartean, akats edo falta baten berri izanez gero, edozein dela ere bidea, erregistroak baterako jarduketa planak, hitzarmenak eta akordioak ezabatzen ahalko ditu, edo erregistro-orrietako datuak eta dokumentuak aldatu, eta jasoko du zergatik egin den aldaketa, baja edo deuseztapena ofizioz, horri buruzko kontsulta eginda kasuan kasuko unitate arduradunari.
IV. KAPITULUA. ERREGISTROAREN PUBLIKOTASUNA ETA KONTSULTA
8. artikulua. Publizitatearen eta irispidearen araubidea .
1. Baterako Jarduketa Planen, Hitzarmenen eta Akordioen Erregistroa publikoa da, eta doan kontsultatu daiteke, artikulu honetan ezarritako baldintzetan.
2. Gobernu Irekiaren Atariaren bidez kontsultatzen ahalko dira erregistroan inskribatutako baterako jarduketa planen, hitzarmenen eta akordioen zerrenda eta aldaketak, bai eta haietako bakoitzari buruzko datu hauek ere:
a) Alderdi sinatzaileak, haien ordezkariak eta ordezkaritza horren izaera.
b) Planaren, hitzarmenaren edo akordioaren helburua, adierazita konprometitutako jarduerak, horien ardura duten organoak eta hitzartutako betebehar ekonomikoak, halakorik bada.
c) Indarraldia eta indarrean izateko baldintzak.
d) Hala badagokio, non argitaratu den.
e) Indarrean zirenean egindako aldaketek zer xede zuten, eta aldaketa horien datak.
3. Erregistroko datuak honako hauen eskura egonen dira:
a) Nafarroako Foru Parlamentuko Mahaia eta Eledunen Batzarra eta foru parlamentariak, Nafarroako Parlamentuaren Erregelamenduaren 14. artikuluan ezarrita dagoen bezala.
b) Nafarroako Foru Komunitateko Administrazioaren eta haren foru-sektore publiko instituzionalaren organoak, berekiak zaizkien edo esleituak dituzten helburuak betetzeko.
c) Herritarrak. Erregistroko datuak eskuratzen ahalko dituzte, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean ezarritako baldintzetan.
d) Justiziako Administrazioko agintari eta organoak, aplikagarria den araudiari jarraikiz.
4. Kontsultatu nahi diren datuak edo dokumentuak zehaztu beharko dira sarbide eskaeretan. Eskaera zehaztugabea, generikoa edo lausoa bada, edo ulergaitza bada, edo zaila bada informazioa aurkitzea, eskatzaileari eskatuko zaio zehazteko, eta hamar egun balioduneko epea emanen zaio horretarako. Halaber, adieraziko zaio ezen, hala egin ezean, eskaeran atzera egin duela ulertuko dela, horretarako ebazpena eman ondoren.
5. Aldekoa bada, erregistroak 15 egun balioduneko epean eman beharko du erregistroko datuetarako sarbidea.
6. Eskaera onartzen ez bada edo ukatzen bada, hura erabakitzen duen ebazpena izapidetuko da bat etorriz Gardentasunari, Informazio Publikoa Eskuratzeari eta Gobernu Onari buruzko maiatzaren 17ko 5/2018 Foru Legean xedatutakoarekin.
9. artikulua. Ziurtagiriak eta kopiak luzatzea .
1. Aurreko artikuluan aipatutako subjektuek zilegi dute erregistroko idazpenen eta agirien ziurtagiriak eta kopia bakunak eskatzea, baita planak, hitzarmenak edo akordioak sinatzen dituzten alderdiek ere.
2. Eskaerak aurreko artikuluan ezarritakoari jarraikiz egin eta ebatziko dira.
3. Lehendakaritzaren arloan eskumena duen departamentuko idazkaritza tekniko nagusiak eginen ditu ziurtagiriak.
4. Kopiak egitea erregistroari dagokio.
5. Ziurtagirian idazpenaren datu guztiak jasoko dira. Ziurtagiria orriaren kopia ziurtatu gisa ere luza daiteke.
6. Hala badagokio, legez dagokion tasa ordaindu beharko da ziurtagiriak eman aurretik.
V. KAPITULUA. KONTROLA ETA JARRAIPENA
10. artikulua. Kontrola eta jarraipena .
1. Departamentuetako idazkaritza tekniko nagusiak edo Nafarroako Foru Komunitateko Administrazioari lotutako organismo publiko edo entitateetako idazkaritza lanak betetzen dituztenak arduratzen dira baterako jarduketa plana, hitzarmena edo akordioa formalizatzeko dokumentua artxibatu eta zaintzeaz eta erregistroko inskripzioa sustatzeaz.
2. Erregistro aplikazioan jasota gera dadin, aurreko zenbakian aipatutako organoek erregistroari jakinarazi beharko diote, egitate edo egintza juridikoa egin eta 15 egun balioduneko epean, zer aldaketa edo gorabehera gertatu den erregistratutako dokumentu edo datuen gainean, barne daudelarik eranskinak, luzapenak eta akordio espezifikoak edo osagarriak, bai eta salaketaren egintzak eta hitzarmenak eta akordioak ebazteko erabakiak ere.
3. Aurreko apartatuan zerrendatutako aldaketak eta gorabeherak erregistroan jasoko dira, foru dekretu honen 7. artikuluko 4. apartatuan aipatzen den balidazioa ontzat eman ondoren.
11. artikulua. Hitzarmenen Erregistroa eguneratzea.
Aurreko artikuluan ezarritako erantzukizunak galarazi gabe, Erregistroa behar bezala eguneraturik izateko, haren ardura duen zuzendaritza nagusiak hitzarmenen eta itunen indarraldiari buruzko edo haien edukiari buruzko informazioa noiznahi eska dezake.
Xedapen gehigarri bakarra. Erreferentziak .
1. Foru dekretu honetan Nafarroako Foru Komunitateko Administrazioaren Hitzarmenen eta Itunen Erregistroari egiten zaizkion aipamen guztiak ulertu behar da Baterako Jarduketa Planen, Hitzarmenen eta Akordioen Erregistroari egiten zaizkiola.
2. Foru dekretu honetan hitzarmenei eta akordioei egiten zaizkien aipamen guztiak ulertu behar da baterako jarduketa planei ere aplikatuko behar zaizkiela.
Lehenengo xedapen iragankorra. Tramitatzen ari diren hitzarmen eta itunak .
Foru dekretu honek indarra hartzean tramitatzen ari diren hitzarmen eta itunak hemen xedatutakoari egokitu beharko zaizkio.
Bigarren xedapen iragankorra. Foru dekretu honen aurretik izenpetutako hitzarmen eta itunen inskripzioa .
1. Foru dekretu honek indarra hartu eta sei hilabeteko epean, Nafarroako Foru Komunitateko Administrazioari buruzko abenduaren 3ko 15/2004 Foru Legeak indarra hartu zuenetik izenpetutako hitzarmen eta itun guztiak Erregistroan inskribatu behar dira. Horiez gainera, urtebeteko epean, lehenago sinatu ziren hitzarmenak ere inskribatu beharko dira, indarrean segitzen badute.
2. Horretarako, departamentuetako idazkaritza teknikoek edo, Nafarroako Foru Komunitateko Administrazioari eta haren erakunde autonomoei lotutako erakunde publiko edo entitateen kasuan, haietan idazkaritza lanak egiten dituztenek foru dekretu honek indarra hartzen duenetik hiru hilabeteko epea izanen dute aurreko idatz-zatian aipatutako hitzarmen eta itunak 7. artikuluan ezarritakoari jarraikiz inskribatzeko.
Azken xedapenetan lehena. Garatzeko eta betearazteko gaikuntza .
"Lehendakaritzaren arloko eskumena duen departamentuaren titularrari ahalmena ematen zaio behar diren xedapen guztiak eman ditzan foru dekretu hau garatzeko eta betearazteko.
Azken xedapenetan bigarrena. Indarra hartzea.
Foru dekretu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2010eko abuztuaren 9an.-Nafarroako Gobernuko lehen lehendakariordea, Javier Caballero Martínez.-Erakundeekiko Harremanetarako eta Gobernuaren Eledunaren Departamentuko kontseilaria, Alberto Catalán Higueras.
