navarra.es

Kontsumitzaileak eta erabiltzaileak babesteari buruzko ekainaren 20ko 7/2006 Foru Legearen 25.3 artikuluak aurreikusten du Nafarroako Gobernuak, foru dekretu bidez, Nafarroako Kontsumoaren Kontseilua sortuko duela, eta haren egitura, osaera eta funtzioak zehaztuko dituela.

Aipatutako artikuluan xedatzen den moduan, Nafarroako Kontsumoaren Kontseilua kontsumoari buruzko ordezkaritza, kontsulta eta parte-hartze organo gisa eratuko da.

Kontsumitzaileen erakundeek, enpresaburuen elkarteek, Merkataritza eta Industria Ganbera Ofizialak eta Nafarroako administrazio publikoek ordezkariak izanen dituzte kontseilu horretan.

Organo horren eginkizuna izanen da, besteak beste, aipatutako entitateen parte-hartzea bideratzea, kontsumoari buruz egiten diren xedapen orokorrak prestatzeko, dagokion aginduzko txostena emanez, hala ezartzen baitute ekainaren 20ko 7/2006 Foru Legearen 21.2 eta 25.2 artikuluek.

Horiek horrela, Nafarroako Kontseiluarekin bat, Familia, Gazteria, Kirol eta Gizarte Gaietako kontseilariak proposaturik eta Nafarroako Gobernuak 2007ko azaroaren 5eko bilkuran hartutako erabakiari jarraikiz,

DEKRETATU DUT:

I. KAPITULUA. XEDAPEN OROKORRAK

1. artikulua . Xedea.

Foru dekretu honek helburu du Nafarroako Kontsumoaren Kontseilua sortu eta osaera, antolamendua eta funtzionamendua arautzea.

2. artikulua . Izaera eta atxikipena.

1. Nafarroako Kontsumoaren Kontseilua kontsumoaren arloko ordezkaritza, kontsulta eta parte-hartze organo gisa eratu da. Ukitutako gizarte eragileek eta Nafarroan eskumena duten administrazio publikoek hartuko dute parte.

2. Unean-unean kontsumoari buruzko gaietan eskumena duen Nafarroako Foru Komunitateko administrazioaren departamentuari atxikiko zaio Nafarroako Kontsumoaren Kontseilua. Departamentu horrek behar den laguntza emanen dio Kontseiluari, esleitu zaizkion eginkizunak betetzeko.

3. artikulua . Kontseiluaren eginkizunak

Nafarroako Kontsumoaren Kontseiluak eginkizun hauek ditu:

1. Kontsumoaren arloan informazioa eta aholkua ematea.

2. Elkarrizketa, koordinazioa eta laguntza sustatzea kontsumitzaile elkarteen eta enpresa erakundeen artean, kontsumoaren arloan ukitutako gizarte sektoreen arteko eztabaidagunea izatea eta sustapena egitea erabakiak har daitezen kontsumitzaile elkarte, enpresa erakunde eta gai horietan eskumena duten Nafarroako administrazio publikoen artean.

3. Aginduzko txostenak egitea kontsumoaren arloko xedapen orokorrei buruz ematen diren proiektuen gainean. Ondorio horietarako, xedapenak ez dira kontsumoaren arloko xedapen orokortzat hartuko baldin eta soilik arautzen badituzte eskumena duten administrazio publikoen antolakuntzako alderdiak eta kontsumitzaileen eskubideei zuzenean eragiten ez badiete.

4. Kontsumitzaileen defentsarako ekintzak, programak, antolamendu neurriak, azterketak eta ikerketa lanak sustatzea eta administrazio publiko eskudunei proposatzea.

5. Kontsumitzaileak defendatzeko eta haiei informazioa emateko Nafarroako administrazio publikoek dituzten neurri, plan eta jarduteko proiektuak ezagutzea, horien inguruko proposamenak egin ahal izateko, eta arlo horri buruzko azterketa eta txosten interesgarriak ezagutzea.

6. Organo eskudunei beharrezkotzat jotzen diren txostenak eskatzea, haren iritzipean jarritako gaiei konponbidea emateko.

7. Nafarroan kontsumoaren arloan dauden arazoei buruz urtero txostena ematea.

8. Herritarrak kontsumitzaile izateko presta daitezela bultzatzea.

II. KAPITULUA. OSAERA

4. artikulua . Osaera.

Hamabi kidek osatuko dute Nafarroako Kontsumoaren Kontseilua: kontsumoan eskudun diren Nafarroako administrazio publikoen izenean lau, kontsumitzaile eta erabiltzaileen erakundeen izenean beste lau, eta enpresa edo profesionalen erakundeen izenean beste lau.

5. artikulua . Administrazio publikoen ordezkariak.

Administrazio publikoen izenean hauek egonen dira Kontseiluan:

1. Lehendakaria: kontsumoaren arloan eskuduna den departamentuko kontseilaria.

2. Lehendakariordea: kontsumoaren arloan eskuduna den zuzendari nagusia.

3. Kontsumo Zerbitzuko zuzendaria.

4. Nafarroako toki entitateen ordezkari bat, Nafarroako Udal eta Kontzejuen Federazioarioak proposatua. Udal ordezkari bat izanen da.

6. artikulua . Kontsumitzaile eta erabiltzaileen erakundeetako ordezkariak.

Kontsumitzaile eta erabiltzaileen erakundeen izenean lau mahaikide egonen dira Kontseiluan. Nafarroako Foru Komunitateko Administrazioaren Elkarteen Erregistroan izen emandako entitateek proposatu beharko dituzte, honako irizpide hauen arabera:

1. Mahaikide bat dagokio Erregistroan izena emandako erakunde bakoitzari, ordezkaritza handiena duenetik txikiena duenera, Erregistroko datuetan ageri den bazkideen kopurua kontuan hartuta.

2. Gainerako mahaikideak, hala behar bada, izena emandako entitate bakoitzak proposatuko ditu, batak bestearen atzetik, arestiko irizpidearen arabera.

7. artikulua . Enpresa edo profesionalen erakundeen ordezkariak.

Enpresa edo profesionalen erakundeen izenean lau mahaikide egonen dira Kontseiluan, eta honela izendatuko dira:

1. Bi ordezkari, Nafarroako Merkataritza eta Industria Ganberak proposatuta.

2. Bi ordezkari, Nafarroako Enpresaburuen Konfederazioak proposatuta.

III. KAPITULUA. IZENDAPENA, KARGU UZTEA ETA ORDEZTEA

8. artikulua . Izendapena.

1. Kontsumoaren arloan eskumena duen departamentuko kontseilari titularrak izendatuko ditu, foru agindu bidez, Nafarroako Kontsumoaren Kontseiluko kideak.

2. Nafarroako Foru Komunitateko Administrazioaren zuzendaritzako kargu titular gisa Kontseiluan parte hartzen duten kideak bestela izendatuko dira, arestiko atalean xedatutako moduan ez bezala. Izendapen horiek zuzendaritzako karguaren izendapenarekin lotuta egonen dira.

9. artikulua . Kargu uztea.

1. Kontsumoaren arloan eskumena duen kontseilariaren foru agindu bidez utziko dute kargua mahaikideek, ondoko kasuetan:

a) Uko egitea.

b) Izendapena egin zuen entitateak hala eskatuta.

c) Karguan aritzeko ezintasun iraunkorra.

d) Betebeharrak larriki ez betetzea.

e) Mahaikideak proposatu zituen erakundea desegitea.

f) Kontsumitzaileen elkarteen ordezkarien kasuan, mahaikideak proposatu zituen elkarteak Erregistroan baja hartzea, behin-behinekoz edo behin betikoz.

2. Aurreko ataleko c) eta d) letretan aurreikusitako kasuetan, Osoko Bilkuran gehiengo soilez gauzatuko da kargu uztea.

3. Nafarroako Foru Komunitateko Administrazioaren zuzendaritzako kargu titular gisa Kontseiluan parte hartzen duten kideak bestela kenduko dira kargutik, arestiko atalean xedatutako moduan ez bezala. Kargu uzte horiek zuzendaritzako kargua uztearekin lotuta egonen dira.

4. Karguak uzten direnean, aurreko artikuluetan aurreikusitakoarekin bat izendatuko dira kide berriak.

10. artikulua . Ordezkoak.

Proposatzeko ahalmena duten entitateek edo erakundeek ordezko mahaikideak izendatuko dituzte, bileraren batean parte hartu ezin duten kideak ordezteko.

IV. KAPITULUA. KONTSEILUKO KIDEEN ESKUBIDE ETA BETEBEHARRAK

11. artikulua . Eskubideak.

Kontseiluko kideen eskubideak hauek dira:

1. Bilera bat prestatzeko aldez aurreko ahalik eta epe handiena izatea, 48 ordu gutxienez, eta eguneko gaien zerrenda eta beharrezko dokumentazioa ere izatea.

2. Osoko Bilkuretan botoa eta hizpidea izatea, eta botoa zein izanen den eta horretarako arrazoiak adieraztea.

3. Kontseiluko zein batzorde edo lan taldetarako izendatuak izan, horietako lan eta eztabaidetan parte hartzea.

4. Kontseiluak duen dokumentazioa eskatzea eta eskuratzea, baita Kontseiluak ez duena ere, baldin eta hori eskatzea beharrezkoa bada eginkizunak betetzeko. Kasu horretan Kontseiluaren erabakia beharko da, foru dekretu honetako 19. artikuluan ezartzen denarekin bat.

5. Kontseiluaren jarduerarekin lotutako iradokizunak aurkeztea, eta Kontseiluaren eskumeneko edozein gai eguneko gaietan sartzeko eskatzea Kontseiluko buruari. Sartu beharko da baldin eta Kontseiluko kideen herenak hala babesten badu.

6. Galderak eta eskaerak egitea.

12. artikulua . Betebeharrak.

Kontseiluko kideen betebeharrak hauek dira:

1. Kontseiluaren bileretara joatea, eta egiten ari diren edo haien esku utzitako lanetan gogotik parte hartzea.

2. Osoko Bilkurak edo Kontseiluko buruak eskatutako irizpenak, txostenak, azterketak edo mozioak epe ezarrian aurkeztea.

3. Kontseiluan, eztabaidetan, erabakiak hartzean edo lanetan abstenitzea, baldin eta interes pertsonala badute, zuzenekoa edo zeharkakoa.

4. Kontseiluan, eztabaidetan eta lanetan adierazitako gogoetak isilpean gordetzea.

V. KAPITULUA. ANTOLAKETA ETA FUNTZIONAMENDUA

13. artikulua . Osoko Bilkura.

Nafarroako Kontsumoaren Kontseiluak Osoko Bilkuraren bidez funtzionatuko du. Lehendakariak, lehendakariordeak eta mahaikideek osatuko dute Osoko Bilkura, eta hainbat gai aztertzeko batzordeak edo lan taldeak eratzea erabaki dezake, gaien interesa dela eta beharrezkoa bada.

14. artikulua . Lehendakariaren funtzioak.

Lehendakariaren eginkizunak hauek dira:

1. Nafarroako Kontsumoaren Kontseiluaren ordezkari izatea.

2. Bileren deialdia erabakitzea eta eguneko gaien zerrenda finkatzea. Hala behar bada, gainerako kideen eskaerak, behar den denboraz jakinaraziak, kontuan hartuko ditu.

3. Bileretan buru izatea, eztabaidak moderatzea eta, arrazoi justifikatuak izanda, horiek bertan behera uztea. Halaber, erabakiak hartzerakoan berdinketak izaten direnean bete botoaren bidez berdinketak haustea.

4. Organoaren erabakien aktak eta ziurtagiriak ikus-onestea.

5. Kontseiluko lehendakari karguari berez dagozkion gainerako eginkizunak, edo indarreko legeriaren arabera esleitzen zaizkionak.

15. artikulua . Lehendakariordearen eginkizunak.

Lehendakariordearen eginkizunak hauek dira:

1. Lehendakaria ordeztea haren kargua hutsik dagoenean, kanpoan edo eri dagoenean edo beste arrazoi justifikaturen bat izaten denean.

2. Lehendakariak edo Kontseiluko Osoko Bilkurak haren esku utzitako eginkizun guztiak, Kontseiluaren kudeaketarako, antolaketarako eta funtzionamendu egokirako.

16. artikulua . Idazkaritza.

1. Kontsumoaren arloan eskumena duen departamentuaren Administrazio Publikoko arlo juridikoko teknikari bat izanen da Kontseiluko idazkari. Kontseiluaren bileretan parte hartuko du, botoarekin baina hizpiderik gabe.

2. Aipatu den departamentuak bere Administrazio Publikoko arlo juridikoko teknikarien artean izendatuko ditu Kontseiluko Idazkaritzaren titularra eta horren ordezkoa.

3. Idazkariaren eginkizunak hauek dira:

Kontseiluaren bileretara joatea, botoarekin baina hizpiderik gabe.

Kontseiluaren bileretarako deia egitea, lehendakariak hala aginduta, eta kideentzako zitazioak egitea.

Kontseiluaren kideen komunikazio egintzak jasotzea, hau da, jakinarazpenak, datu eskaerak, zuzenketak edo hark ezagutu behar dituen bestelako idazki guztiak.

Arazoak ebazteko bidea prestatzea, bileretarako aktak idatzi eta baimentzea, eta onetsi diren kontsulta, irizpen eta erabakien ziurtagiriak ematea.

Kontseiluaren dokumentazioa zaintzea.

Kontseiluko idazkari karguari berez dagozkion gainerako eginkizunak betetzea, edo indarreko legeriaren arabera esleitzen zaizkionak.

17. artikulua . Bilerak eta horietarako deia.

1. Urtean bi ohiko Osoko Bilkura eginen dira, urte naturalaren seihileko bakoitzean bat.

2. Ezohiko Osoko Bilkurak eginen dira lehendakariak dei egiten duenean, bere kabuz edo mahaikideen herenak hala eskatzen duenean. Mahaikideen herenak eskatzen badu, eskaeran eguneko gaien zerrenda jasoko da, landuko diren gaiekin. Halakoetan lehendakariak gehienez hamabost egun naturaleko epean deitu beharko du Osoko Bilkura, Kontseilua zein departamentuari atxikia dagoen, haren Erregistroan eskaera sartu zen egunaren biharamunetik hasita.

3. Kontseilua lehenbiziko deialdian modu baliozkoan eratuko da eta, hortaz, bilerak egin, eztabaidatu eta erabakiak hartzen ahalko ditu, bertan baldin badaude lehendakaria eta idazkaria edo, hala behar izanez gero, haien ordezkoak, eta gutxienez kideen erdiak.

4. Bigarren deialdia lehenengo deialditik ordu erdira eginen da, besterik gabe. Horretarako beharrezkoa izanen da bertan egotea gutxienez lehendakaria eta idazkaria edo, bidezko bada, haien ordezkoak, eta Kontseiluko lau kide behintzat.

5. Bi kasu horietan, beharrezkoa izanen da Kontseiluan ordezkatutako gizarte sektore bakoitzeko mahaikide bat gutxienez izatea.

18. artikulua . Erabakiak hartzea.

Kontseiluaren erabakiak bileran dauden kideen gehiengo soilaz hartuko dira. Lehendakariak bere kalitate botoaz hautsiko ditu berdinketak.

19. artikulua . Bileretan parte hartzea.

1. Nafarroako Kontsumoaren Kontseiluaren bileretan parte hartuko du Nafarroako Kontsumoko Arbitraje Batzordeko buruak, hizpidea bai baina botorik ez duela. Organo horren aholkulari iraunkorra izanen da.

2. Kontseiluak, beren lanetan parte hartzeko, eguneko zerrendako gaietan jakituria ezaguna duten pertsonak gonbidatzen ahalko ditu, aditu gisa. Parte hartzen ahalko dute soilik haiek gonbidatzearen arrazoia den gaiaren eztabaidan, botorako eskubiderik gabe. Bestalde, Kontseiluak erabakitzen ahalko du ordezkatutako administrazio, elkarte edo erakundeen mahaikideak teknikariez lagundurik egotea bileraren batean. Teknikariek eztabaidan parte hartzen ahalko dute baina ez dute botorako eskubiderik izanen.

Xedapen Gehigarri Bakarra. Eraketa.

Nafarroako Kontsumoaren Kontseiluaren osaerak balioa izanen du kapitulu honetan aipatzen diren entitateetako baten batek bere ordezkaririk ez izendatuagatik ere, baldin eta Kontseiluko kideen bi heren gutxienez baldin badaude.

Xedapen Iragankor Bakarra. Izendapen proposamena.

Foru dekretu honek indarra hartzen duenetik gehienez hiru hilabeteko epean, aurreko kapituluan aipatutako entitate, erakunde eta elkarteek beren ordezkari eta ordezkoen izendapena jakinaraziko diote Nafarroako Gobernuaren Kontsumo Zerbitzuari, aipatutako epea bukatu eta hilabeteko epean izenda daitezen.

AZKEN XEDAPENAK

Lehena. Arauetarako gaitasuna.

Kontsumoaren arloan eskumena duen departamentuko kontseilariari ahalmena ematen zaio behar diren arau guztiak eman ditzan foru dekretu hau garatzeko.

Bigarrena. Indarra hartzea.

Foru dekretu honek Nafarroako ALDIZKARI OFIZIALean argitaratu eta biharamunean hartuko du indarra.

Contacte con nosotros | Accesibilidad | Aviso legal | Mapa web