(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

56/2006 FORU DEKRETUA, ABUZTUAREN 16KOA, MAHASTIZAINTZA ETA ARDOGINTZA ARAUTZEARI BURUZKO ABENDUAREN 5EKO 16/2005 FORU LEGEA GARATZEN DUENA.

BON N.º 106 - 04/09/2006

  ATARIKO TITULUA. XEDAPEN OROKORRAK

  I. TITULUA. LANDAKETARAKO ETA BIRLANDAKETARAKO ESKUBIDEAK

  I. KAPITULUA. LANDAKETARAKO ESKUBIDEEN ERRESERBA

  II. KAPITULUA. MAHASTIAK BIRLANDAKETARAKO ESKUBIDEAK

  II. TITULUA. LANDAKETEN BAIMENA

  III. TITULUA. MAHASTIA UREZTATZEA

  IV. TITULUA. MAHASTIEN ERREGISTROA

  V. TITULUA. BABES MAILAK

  I. KAPITULUA. "LURRALDEKO ARDOA" OHIKO DEITURA IZATEKO ESKUBIDEA DUTEN MAHAIKO ARDOAK

  II. KAPITULUA. "NAFARROA" JATORRIZKO DEITURA DUTEN ARDOAK

  III. KAPITULUA. LUREREMUKO ARDOAK

  VI. TITULUA. ARDOEN KONTROLA

Atariko

I

Mahastizaintza eta ardogintza arautzeari buruzko abenduaren 5eko 16/2005 Foru Legeak Nafarroako Foru Komunitateko mahastizaintza eta ardogintza sektorea garatuko deneko esparrua ezarri du, Nafarroan onduriko ardoen kalitatea eta haien merkaturatzea sustatzeko eta kontsumitzaileei ardorik hoberenen betebehar teknikoekin eginiko produktuak erosi eta gozatzea bermatzeko.

Foru lege hark agindu batzuetan ondorengo erregelamenduzko garapena aipatzen du eta azken xedapenetariko lehenean eskumena ematen dio Nafarroako Gobernuari garatu eta betearazteko behar diren erregelamenduzko xedapen guztiak eman ditzan.

Beraz, beharrezkoa da foru legearen erregulazioa osatzea, Europar Batasuneko arautegia eta aplikatzekoak diren beste arautegiak kontuan hartuz, hala nola, mahastiak landaketarako eta birlandaketarako eskubideei, mahastien arriskuei, Mahastien Erregistroari eta ardoen babes maila eta kontrolari dagokienez.

II

Foru dekretu honek mahastizaintzari eta ardogintzari buruzko legezko esparrua garatzen du, begirune osoz, eragileei behar dituzten tresnak emateko, gero eta zorrotzagoa den merkatu batean baldintza egokiekin lehian aritu ahal daitezen. Hemengo arauak Mahastizaintza eta ardogintza arautzeari buruzko abenduaren 5eko 16/2005 Foru Legean aipatzen diren irizpideekin bat datoz. Irizpide horiek honako hauek dira: ardoen kalitatea eta aniztasuna bermatzea, eragileei lehia zintzoaz aritzeko baldintzak ematea, kontsumitzaileen babesa bermatzea, ardoei aurrera egiteko (gero eta betebehar zorrotzagoekin) bide ematea eta foru lege honetan aipatzen den kontrol sistema edukitzea. Printzipio horiek eragileek babes mailei atxikitzeko duten askatasunarekin bat datoz, eskatzen diren betebeharrak betetzen badituzte. Funtsean, eragileei aukera eman nahi zaie askatasunez aritu ahal izateko, merkatuetara ailegatzeko eta horrela haien eta Nafarroako mahastizaintza eta ardogintza sektorearen geroa bermatzeko. Hori dena ardoen kalitatea eta kontsumitzaileei zor zaizkien bermeak ahantzi gabe.

III

Atariko Tituluak arauko orotariko xedapenak biltzen ditu. Haren xedea adierazi, definizioak ezarri eta prozedurako orotariko arauak ematen ditu.

I. Tituluak landaketarako eta birlandaketarako eskubideak arautzen ditu. I. kapituluan honako kontu hauek arautzen dira: Nafarroako Foru Komunitatearen eskubideen erreserba, haren kontura eskubideen kontzesiorako lehentasun irizpideak eta ukatzeko zergatikoak eta kontzesioaren onuradunen eginbeharrak. II. kapituluan birlandaketarako eskubideak erabiltzeko eta garaia baino lehenagoko birlandaketarako eskubidea onartzeko modua eta eskubide horiek eskualdatzeko kasuak arautzen dira.

II. Tituluak mahastia landatzeko baimenerako xedapenak biltzen ditu.

III. Tituluak mahastiak ureztatzeko baldintzak ezartzen ditu.

IV. Tituluak Mahastien Erregistroa antolatzen du. Erregistro horren barruan Eskubideen Atala eta Landaketen Atala bereizten dira.

V. Tituluak babes mailak arautzen ditu: "lurraldeko ardoa" ohiko deitura erabiltzeko eskubidea duten mahaiko ardoak, "Nafarroa" Jatorrizko Deitura duten ardoak eta lur-eremuko ardoak.

Azkenik, VI. Tituluak ardoak kontrolatzeko organoa eta horrek bere eginkizunak egiteko modua arautzen ditu.

Horiek horrela, Nekazaritza, Abeltzaintza eta Elikadura kontseilariak Nafarroako Kontseiluarekin ados dagoela proposaturik, eta Nafarroako Gobernuak 2006ko abuztuaren 16an harturiko Erabakiarekin bat,

DEKRETATU DUT:

ATARIKO TITULUA. XEDAPEN OROKORRAK

1. artikulua. Xedea.

Foru dekretu honen xedea Mahastizaintza eta ardogintza arautzeari buruzko abenduaren 5eko 16/2005 Foru Legea garatzea da, baimen eta eskubideen, mahastiko lan teknikoen, mahasti eta ardoen erregistroen, babes mailen eta kontrol eginkizunen arloetan.

2. artikulua. Definizioak.

Foru dekretu honi dagokionez, Europako legeen barruan, definizio hauek aplikatzen dira:

a) Landaketa mahats landareak, edo mahats landareen zatiak, txertatuak edo ez, behin betikoz landatzea, mahatsa ekoizteko edo txertaketarako mahatsondoak lantzeko.

b) Mahatsondoak erauztea: mahasti bateko mahatsondoak erabat kentzea.

c) Birlandaketarako eskubideak eskualdatzea: birlandaketarako eskubideak eskuratzeko legezko prozedura.

d) Landaketarako eskubideak: Nafarroako Foru Komunitateko mahasti landaketarako eskubideen Erreserbatik lorturiko eskubide baten arabera mahastiak landatzea baimentzen dutenak.

e) Birlandaketarako eskubideak: azalera baliokide batean mahatsondoak landatzeko eskubideak, ustiapen berean mahasti bat erauztearen edo eskualdatze bidez lorturiko eskubideen ondorioz sortuak.

f) Mahastien legez kanpoko landaketak: beharrezkoa den legezko baimena izan gabe egindakoak.

3. artikulua. Prozedurako orotariko arauak.

1. Eskabideen gainean ebatzi eta haiek eta foru dekretu honetan aipatzen diren baimenak jakinarazteko epea sei hilabetekoa da.

2. Epe hori espresuki ebazpenik jakinarazi gabe bukatzeak eskubidea ematen die interesatuei ulertzeko beren eskabidea onartu dela. Hala ere, babes mailak aitortzeko eskabidea ulertuko da ezetsi dela, abenduaren 5eko 16/2005 Foru Legeko 25. artikuluko 2. idatz-zatian xedaturikoarekin bat.

3. Mahastizaintza eta ardogintzari buruzko eskabide, baimen eta beste prozeduren gainean ebazteko organo eskuduna, baita zehapen prozeduren gainean ere, Nafarroako Mahastizaintza eta Enologia Zentroa da. Hala ere, Nekazaritza, Abeltzaintza eta Elikadura kontseilariak ebatziko du babes mailak aitortzeko eskabidearen gainean.

I. TITULUA. LANDAKETARAKO ETA BIRLANDAKETARAKO ESKUBIDEAK

I. KAPITULUA. LANDAKETARAKO ESKUBIDEEN ERRESERBA

4. artikulua. Landaketarako eskubideak erreserbari atxikitzea.

1. Mahastia landaketarako eskubideen erreserbak, hemendik aurrera "Erreserba" iritziko dionak, mahastizaintzaren gaitasunaren kudeatzea eta haren galera saihestea du xede, mahastia landatzeko eskubideak behin eta berriro banatuz.

2. Erreserba iturri hauetatik elikatzen da:

a) Mahastia landaketarako eskubideetatik, haien indarraldia edo erabiltzeko epea bukatu denean.

b) Lurzati berrantolamendu baten ondorioz indarraldian berriro landatzeko erabili ez ziren eskubideetatik. Erreserbara pasatuko dira eta lurzati berrantolamendua bukatu ondoren jatorrizko titularri ematen ahalko zaizkio, bere ustiategian bi uztalditan landa ahal dezan.

c) Beren titular legitimoek erreserbari utzi edo salduriko mahasti indardunak birlandaketarako eskubideetatik.

d) Autonomia erkideetako administrazioek elkarri utzi edo salduriko mahasti indardunak landatzeko eskubideetatik.

e) Legez kanpoko mahatsondoen legeztatzearen ondorioz mahastiak landatzeko eskubideetatik.

f) Zentzuzko laborantzatik utziriko mahastien eskubideetatik, azken hiru uztaldietan uztarik sortu ez badute.

g) Nafarroako Foru Komunitateari landatzeko ematen zaizkion eskubideetatik.

h) Erreserbaren kontu landatzeko emaniko eskubideetatik, onuradunak betebeharrak ez betetzeagatik hartara itzuli direnean.

5. artikulua. Erreserbaren kontu eskubideak ematea.

1. Erreserbarako eskubideak eskatzaileari bakarrik eskaturiko lurzatirako, onarturiko eremurako eta onarpen horren xedeetarako ematen ahal zaizkio.

2. Nekazaritza, Abeltzaintza eta Elikadura kontseilariak, foru agindu baten bidez, erreserbaren kontu eskubideak emateko deialdiak eta haiei buruzko arauak emanen ditu, eskubideak emateko foru dekretu honetako 6. artikuluan adierazten diren irizpideekin bat.

3. Landaketak kontzesioa egin eta hurrengo mahatsondo-uztaldia bukatu baino lehen egin beharko dira. Epe hori bukatzean, eskubideak Erreserbara itzuliko dira.

6. artikulua. Erreserbaren kontu eskubideak emateko irizpideak.

1. Erreserbaren kontu eskubideak emateko arauetan lehentasun irizpide hauek hartuko dira kontuan:

a) Ardandegiekin hornidurarako harreman luze bat egotea edo eskatzailea ardo ontziratuaren portzentaje nabarmen bat daukaten kooperatibetako kidea izatea.

b) Nekazari gaztea izatea.

c) Nekazaritzako lehentasunezko ustiategiaren titularra izatea.

d) Ogibide nagusia nekazaritza izatea.

e) Eskualde zehatz batzuetan ekoitziriko kalitateko ardoak ekoizteko alorrak landatzea.

f) Teknika, landaketa edo sozioekonomiaren aldetik inguruabar bereziak gertatzea, kalitate bereziko ardoak ontzeko edo ustitategien bideragarritasuna bermatzeko bide ematen dutenak.

2. Aurreko irizpideak ez dira erabiliko lurzati berrantolamenduetan eskubideak emateko, desjabetze neurrietarako eta txertaketarako mahatsondoak landatzeko.

7. artikulua. Erreserbaren kontu eskubideak ez emateko arrazoiak.

Honako hauek dira erreserbaren kontu eskubideak ez emateko arrazoiak:

1. Eskatzaileek eta lurzatiaren jabeek mahastizaintzari eta ardogintzari buruz indarra duen arautegia ez betetzea.

2. Eskatzaileek eta lurzatien jabeek eskabidearen uztaldia baino lehenagoko bost uztaldietan birlandaketarako eskubideak eskualdatu izana, salbu eta lehen mailako ahaideei eskualdatzen zaizkienean.

3. Eskatzaileak eta lurzatien jabeak eskabidearen uztaldia baino lehenagoko bost uztaldietan mahastia behin betikoz uzteko sariagatik dirulaguntzen onuradunak izan izana.

4. Eskubideen xede diren lurzatiak lurzati berrantolamendua egiten ari diren udalerrietan egotea, salbu eta lurzati berrantolamendutik kanpo dauden lurzatiak edo eskabidearekin batera Nekazaritzako Azpiegituren Zerbitzuak landaketaren alde luzaturiko txostena aurkezten dutenak izan ezik.

5. Dirulaguntzen xede diren lurzatiak "hiriko lurzorua" edo "lurzoru urbanizagarria" izeneko sailetan egotea.

6. Eskaturiko lurzatia kontzesioa baino lehen landaturik egotea.

8. artikulua. Erreserbarako eskubideak emateko betebeharrak.

Erreserbarako eskubideak emateko, betebehar hauek bete beharko dira:

1. Ondoriozko alorraren gutxieneko eremua 1 hektareakoa izanen da.

2. Eskatzaileak eta jabeak ez dute birlandaketarako eskubiderik izanen indarrean edo 4. artikuluko b) idatz-zatiaren arabera eskubideak berenganatzeko aukerarik, salbu eta eskaturiko eremuak osatzeko behar direnak ez dituztenean.

3. Birlandaketarako eskubideak emateko eskabide bat bakarrik onartuko da lurzatiko.

9. artikulua. Onuradunen betebeharrak.

1. Erreserbarako kontu landatzeko eskubideen onuradunek eginbehar hauek izanen dituzte:

a) Emaniko eskubideen arabera landatu den mahastia landatu eta gutxienez ere hurrengo hamar uztaldietan zuzenean landatzea. Behin ere ezin izanen da eskualdatu, ezinbesteko arrazoiak gertatzen direnean izan ezik. Epe horretan mahastia ezin izanen da erauzi, nahitaezko arrazoiak gertatzen direnean izan ezik, baldin eta mahastiaren eremua berriro landatzen bada.

b) Ardandegiaren gainerakoa, mahastiko lurzatiak eta berriro landatzeko bere dituen eskubideak ezin izanen dituzte inolaz ere eskualdatu, errentan utzi edo laga landatu eta hurrengo bost uztaldietan, salbu eta lehen mailako ahaideei eskualdatu, errentan eman edo lagaz gero edo nahitaezko arrazoiak gertatzen direnean.

2. Aurreko idatz-zatian aipatzen diren eginbeharrak bete ezik, kasuan kasuko espedientea tramitatu ondoren, landatzeko emaniko eskubideak galduko dira. Eskubide horiek Erreserbara itzuliko dira.

II. KAPITULUA. MAHASTIAK BIRLANDAKETARAKO ESKUBIDEAK

10. artikulua. Birlandaketarako eskubideak:

1. Ustiategi berean mahatsondo landaketa bat erauzteagatik berriro landatzeko sorturiko eskubideak erauzketa hura egiten denetik zortzigarren uztaldia bukatu baino lehen erabili beharko dira.

2. Berriro landatzeko eskuraturiko eskubideak bigarren uztaldia bukatu baino lehen erabili beharko dira, eskualdatzearen baimenaren xede izan den uztaldia bukatzen denetik hasita. Aurreko idatz-zatian ezarririko epea ezin izanen da behin ere gainditu.

3. Birlandaketarako eskubideak ezarririko epean erabili ezik, Erreserbara itzuliko dira.

11. artikulua. Birlandaketa aurreratua.

1. Eremu zehatz batean landatzeko birlandaketa aurreraturako eskubideak ematen ahalko zaizkie landatu eta bigarren uztaldia bukatu baino lehen idatziz mahatsondo eremu landatu baliokidea errazteko konpromisoa aurkezten duten ekoizleei.

2. Konpromisoarekin batera banku-abal bat aurkeztu beharko da, egin beharreko landaketa berriaren eta birlandaketarako eskubidearen balioa baino txikiagoa ezin izanen den zenbatekoan. Nafarroako Mahastizaintza eta Enologia Zentroak zehaztuko du abala egiteko balioa, uztaldi eta babes-maila bakoitzerako.

3. Erauzi beharra epe horretan bete ezik, abala kobratu eta kasuan kasuko zehapena ezarriko da, erauzi beharra subsidiarioki gauzatzeko aukera deusetan galarazi gabe.

12. artikulua. Birlandaketarako eskubideak eskualdatzea.

1. Birlandaketarako eskubideak osorik edo hein batean kasu hauetan eskualdatzen ahalko dira:

a) Lurzatia edozein intervivos edo mortis causa negozio juridikoren ondoriozko eskubideekin batera eskualdatzen denean.

b) Lurzati batetik bestera bakarrik eskualdatzen direnean, eskuratzailearen lurzatia babes mailetako ardoak ekoizteko erabiliz gero.

2. Nafarroako Foru Komunitateak baimena emanen du Nafarroako Foru Komunitatean dauden lurzatien titularren eskubideak eskualdatzeko, lurralde horretatik kanpoko titularrei eskubideak eskualdatzeko baimena emateko dagozkion eskumenak deusetan galarazi gabe.

13. artikulua. Eskubideak eskualdatzeko baldintzak.

1. Birlandaketarako eskubideen eskualdatzeak eskatu ahal izateko, eskuratzaileek baldintza hauek bete beharko dituzte:

a) Mahastizaintza ustiategi osoa mahastizaintzari eta ardogintzari buruz indarra duen arautegiarekin bat edukitzea.

b) Azken bost mahats uztaldietan birlandaketarako eskubiderik erabili ez izana (eskabidea aurkezten denekoa barne), foru dekretu honetako 9. artikuluan aipatzen diren salbuespenak galarazi gabe.

c) Azken bost uztaldietan (eskabidea aurkezten denekoa barne) mahastiak behin betikoz uzteko sariagatik dirulaguntzarik kobratu ez izana.

2. Birlandaketarako eskubideak eskualdatu ahal izateko, lagatzaileak betebehar hauek bete beharko ditu:

a) Mahastizaintza ustiategi osoa mahastizaintzari eta ardogintzari buruz indarra duen arautegiarekin bat edukitzea.

b) Eskualdatzeko eskubidea indarrean edukitzea.

c) Erreserbatik eskabidea aurkezten deneko uztaldia baino lehenagoko bostetan landaketarako eskubiderik hartu ez izana. Landaketa berrirako eskubiderik hartu bada, Erreserbara itzuli beharko da.

d) Eskabidea aurkezten deneko uztaldia baino lehenagoko bostetan mahatsondorik erregularizatu ez izana.

3. Ezin izanen da eskubideen eskualdatzerik baimendu eskualdatze horrek mahastizaintza sektorearen lurralde antolaketan desoreka nabarmenak sortzen ahal dituenean.

II. TITULUA. LANDAKETEN BAIMENA

14. artikulua. Mahasti landaketen baimena.

1. Nafarroako Lurralde Aberastasunaren Erregistro Fiskalean ureztaketa lurtzat jo diren nekazaritza lurzatietan ezin izanen da mahastirik landatu, salbu eta, indarra duen arautegiarekin bat, presioko ureztaketa mugatuko sistema bat instalaturik badaukate edo instalatzeko konpromisoa hartzen badute edo mahatsaren kimuak ateraz geroztik mahats uzta bildu arteko aldian ureztatzeko urik ez bada.

2. Betiere, landatzeko baimenaren eskubideak behar diren baldintza edafiko, ekologiko edo teknikoak gertatzen ez direnean ukatzen ahalko dira.

3. Artikulu honetan xedaturik dagoenak ez ditu ukatzen babes mailei buruzko erregelamenduek ezar ditzaketen neurri zorrotzagoak.

III. TITULUA. MAHASTIA UREZTATZEA

15. artikulua. Ureztatzeko baldintzak.

Ureztaketak lurraren oreka hidrikoa eta mahastiaren baldintza ekologikoak errespetatu beharko ditu, babes mailei buruzko erregelamenduetan ezarririko mugak kontuan hartuz.

IV. TITULUA. MAHASTIEN ERREGISTROA

16. artikulua. Antolaketa.

Nafarroako Mahastien Erregistroak bi atal dauzka: Eskubideen Atala eta Mahastien Landaketen Atala.

17. artikulua. Eskubideen Atala.

Eskubideen Atalean Erreserbarako eskubideak, birlandaketarakoak eta beste autonomia erkidego batzuei utziak inskribatuko dira.

18. Artikulua. Mahastien landaketen atala.

1. Titular oro beharturik dago landaketak, hauen aldaketak eta bajak jakinaraztera, erregistroan inskribatu daitezen. Halaber, kasuan kasuko babes mailetan inskribatua izateko behar diren argibideak eman beharko ditu.

2. Landaketaren inskripzioa, haien aldaketak eta haien bajak ofizioz egiten ahalko dira, kontrolak edo jarduketak ikusirik, hala erabakitzen denean.

3. Gutxienez ere hiru uztaldiz eutsi beharko zaio babes mailen inskripzioari.

4. Datu hauek inskribatuko dira:

a) Lurren jabeak, izen-deiturak eta, bidezko denean, helbidea.

b) Landaketen titularrak, izen-deiturak eta, bidezko denean, helbidea.

c) Mahastizainaren zenbakia.

d) Lurzatiaren nekazaritza datuak: katastroko datuak, eremua, barietatea, landaketaren urtea, txertaka, landaketaren esparrua, ureztaketa sistema, kondukzioa, etekina, ekoizpenaren helburua, babes mailak, eta bidezko denean, kalifikazioa (mahaiko ardoa edo nork edateko mahastia).

e) Kalifikazioa, legezko mahastia edo eskutik utzia bada.

V. TITULUA. BABES MAILAK

I. KAPITULUA. "LURRALDEKO ARDOA" OHIKO DEITURA IZATEKO ESKUBIDEA DUTEN MAHAIKO ARDOAK

19. artikulua. "Lurraldeko ardoa" ohiko deitura izateko eskubidea duten mahaiko ardoen betebeharrak.

1. "Lurraldeko ardoa" ohiko deitura izateko eskubidea duten mahaiko ardoek gutxienez betebehar hauek bete beharko dituzte:

a) 5 gr/l-tik beheitiko azukrearen hondarrak dituzten edateko ardoen sufre anhidridoaren gehieneko eduki osoak hauexek izanen dira: 200 mg/l ardo zuri eta gorrietarako eta 150 mg/l ardo beltzetarako. Ardoek 5 gr/l-tik goitiko azukrearen hondarrak badituzte, mugak honako hauek izanen dira: 250 mg/l ardo zuri eta gorrietarako eta 200 mg/l ardo beltzetarako.

b) Edateko ardoen azidotasun lurrunkorra ez da 0,8 gr/l-tik goitikoa izanen, azido azetikoan adierazirik, salbu eta zahartze prozesu batetik pasatu badira. Kasu horretan muga ez da 1 gr/l-tik goitikoa izanen, baldin eta alkohol graduazioa 10 gradukoa edo hortik beheitikoa bada. Graduazio handiagoko ardo zahartuetarako azidotasun lurrunkorraren muga 0,06 gramo gehituko da 10 gradu gainditzen duen alkohol gradu bakoitzeko. Irizpide horiek erabiliz ardo gorri eta zurietarako 1,08 gr/l edo ardo beltzetarako 1,20 gr/l gainditzen bada, zahartzea ezin izanen da bi urtetik beheitikoa izan.

2. Ardoek kasuan kasuko babes maila osatzen duen eskualdetik etorri beharko dute bakarrik eta maila horri dagozkion barietateekin prestatu beharko dira.

20. artikulua. "Lurraldeko ardoa" ohiko deitura izateko eskubidea duten mahaiko ardoak aitortzea.

1. "Lurraldeko ardoa" babes maila aitortzeko eskabidea Mahastizaintza eta ardogintza arautzeari buruzko abenduaren 5eko 16/2005 Foru Legeko 23. artikuluan ezarri bezala aurkeztuko da.

2. Arauak kontu hauek bildu beharko ditu:

a) Aipamena dagokien ardoen mota edo kategoriak.

b) Erabili beharreko eskualdearen izena.

c) Eskualde horretako muga zehatzak.

d) Mahatsondo barietate gaien adierazpena.

e) Ezaugarri organoleptikoak.

f) Aipamena erabiltzeko eskubidea duten ardo moten gutxieneko alkohol graduazio bolumetrikoa.

g) Babesturiko ardoen gehieneko azido lurrunkorra.

h) Babesturiko ardoen gehieneko sufre anhidridoa, guztira.

i) Kudeaketa organoaren estatutuak, beteak beste, haren osaera eta haren kideak hautatzeko modua arautzen dituztenak.

3. "Lurraldeko ardoa" ohiko izena erabiltzeko eskubidea duen mahaiko ardoa aitortzeko, abenduaren 5eko 16/2005 Foru Legeko 19. artikuluko 1. datz-zatian xedatu bezala, honako hauek sostengatu beharko dute eskabidea:

a) 2.000 hektareatik goitiko mahastien titularrak diren ekoizleek.

b) Eta azken uztaldi osoan gutxienez 12 milioi litro landu dituzten 5 ardandegik.

4. "Lurraldeko ardoa" ohiko izena erabiltzeko eskubidea duen beste mahaiko ardo batzuk aitortzeko, gutxienez 25 hektarearen titularrak diren ekoizleek eta ardandegi prestatzaile batek sostengatu beharko dute eskabidea.

21. artikulua. Kudeaketa organoa.

1. Kudeaketa organoak nortasun juridikoa izanen du eta izaera pribatua.

2. Kudeaketa organoaren helburuak kasuan kasuko eskualdeko deitura aldeztu, sustatu eta babestea da, araua eta haren aldaketak proposatzea eta eskualdeko deitura horretan inskribaturik dauden produktuek onartu behar dituzten gutxieneko kontrol beharrak proposatzea ere bai.

3. Eragileak, zuzenean edo erakundeen bidez, egonen dira ordezkaturik kudeaketa organoan. Ordezkaritza haietariko bakoitzaren jarduera bolumenarekiko proportzioan zehaztuko da.

4. Kudeaketa organoaren erabakiak, arauan bestela xedatu ezik, gehiengo soilaz hartu eta haren iragarki oholean argitaratu beharko dira.

II. KAPITULUA. "NAFARROA" JATORRIZKO DEITURA DUTEN ARDOAK

22. artikulua. "Nafarroa" Jatorrizko Deitura duten ardoen betebeharrak.

"Nafarroa" Jatorrizko Deitura duten ardoek betebehar hauek izanen dituzte:

a) "Nafarroa" Jatorrizko Deitura duten ardoetarako parametro analitikoek, betiere, zorrotzagoak izan beharko dute "lurraldeko ardoak" ohiko deitura erabiltzeko eskubidea duten mahaiko ardoetarako ezartzen direnak baino, abenduaren 5eko 16/2005 Foru Legeko 19. artikuluko 1. idatz-zatian aipatzen denaren arabera.

b) Baimenduriko barietateetako mahats guztiak deiturak mugatzen duen eskualdetik etorri beharko du.

23. artikulua. Kontseilu Arauemailearen eginkizunak.

"Nafarroa" Jatorrizko Deituraren Kontseilu Arauemaileari dagokio:

a) Jatorrizko deiturari buruzko erregelamendu eta haren aldaketak proposatzea.

b) Jatorrizko deituraren izen ona eta sustapena begiratzea.

c) Mahastizainen eta ondu, bildu, zahartu, ontziratu eta etiketatzeko deituran inskribaturiko ardandegien erregistroak kudeatzea.

d) Mahatsaren jatorria, jatorrizko deitura erabili nahi duten muztio eta ardoak kalifikatu edo deskalifikatzea eta, bidezko bada, ziurtagiria ematea.

e) Babesturiko ardoen jatorriaren ziurtagiriak, bermeko prezintuak eta kontraetiketak ematea.

f) Babesturiko ardoetan erabiltzen ahal diren etiketak onestea, bakar-bakarrik jatorrizko deitura ukitzen duten kontuetan.

g) Kalitatea aldeztu eta hobetzeko irizpideei jarraituz eta jatorrizko deiturari buruzko erregelamenduek ezarririko gehieneko mugetan, etekinak, ekoitzi edo eraldatzeko gehieneko mugak edo urte bakoitzeko beste edozein kontu, prozesu horietan eragina izan dezaketenak, uztaldi bakoitzerako ezartzea, aurreko urteetako ekoizpen neurriak kontuan hartuz.

h) Babesturiko produktuak ekoitzi, ondu eta merkaturatzeko estatistikak eta eskatzen zaizkion beste argibideak prestatzea eta argibide guztiak Nekazaritza, Abeltzaintza eta Elikadura Departamentuari jakinaraztea, horrek jakin ditzan.

i) Kontseilu Arauemailea finantzateko pagatu beharreko kuotak ezarri eta kudeatzea, bere erregelamenduan xedaturikoarekin bat.

j) Inskribaturiko mahasti eta ardandegien ekoizpen gaitasuna antolatzea, ekoizpen eskualdearen garapen orekatua begiratuz.

k) Barne araubideko estatutuetan ezartzen den moduan onetsi behar diren aurrekontuak prestatzea, Foru Komunitateko Administrazioak onesteko eskumena galarazi gabe, Mahastizaintza eta ardogintza arautzeari buruzko abenduaren 5eko 16/2005 Foru Legeko 20. artikuluko 7. idatz-zatian xedaturikoarekin bat.

l) Jatorrizko deiturak babesturiko produktuak aldezten, kontrolatzen, ikertzen, ontzen, merkaturatzen, sustatzen eta hedatzen diharduten enpresa publiko edo pribatuetan, merkataritza sozietateetan eta elkarte edo fundazioetan parte hartzea.

m) Urtea edo uzta kalifikatzea.

24. artikulua. Kontseilu Arauemaileko kideak hautatzea.

1. Kontseilu Arauemaileko gobernu organoetako kideak hautatzeko errolda hauek prestatu dira:

a) A errolda: Jatorrizko Deituraren Erregistroan inskribaturiko ekoizleek osatuko dute.

b) B errolda: Jatorrizko Deituraren Erregistroan inskribaturiko merkaturatzaileek osatuko dute.

2. Erroldek seina kide izanen dituzte. Kide bezainbat ordezko izendatuko dira. Ekoizleak mahasti hektareen kopuruarekiko proportzioan hautatuko dira eta merkaturatzaileak kasuan kasuko bermeko prezintuekin merkaturaturiko ardoaren balioarekikoan.

3. Merkaturaturiko ardoaren balioa merkaturatzaile bakoitzak azken hiru urte naturaletan bermeko prezintuarekin salduriko litroen batez bestekoa kontuan hartuz zehaztuko da, ardo mota bakoitzerako Kontseilu Arauemaileari pagaturiko tasen zenbatekoarekin hainbanaturik. Merkaturatzaileak hiru urtetik beheitiko antzinatasuna badu, batez bestekoa bertan jardun duen urteekin kalkulatuko da.

4. Berariazko azpierroldak sortzen ahalko dira, eragileen ordezkaritza egokia lortzeko, bereziki kooperatibak osatzen dituztenena.

25. artikulua. Kontseilu Arauemailearen organoak.

1. Kontseilu Arauemailearen organoak hauexek dira:

a) Lehendakaria, osoko bilkurako hautetsien bi herenek hautatua.

b) Osoko bilkura, lehendakariak eta kideek osatuko dutena.

2. Lehendakaria kideen artetik hautatuz gero, parekotasunari eusteko, kide postu hori ez da beteko. Lehendakaria kideen artetik hautatzen ez denean, ekoizleen eta merkaturatzaileen arteko parekotasunari eusteko, ezin izanen da esparru horietariko batekoa izan.

3. Inskribaturiko enpresa ordezkatzeagatik hautaturiko kideek beren kargua utziko dute enpresa hori uztearekin batera, sektoreari loturik badaude ere, eta kasuan kasuko ordezkoek ordeztuko dituzte.

4. Nekazaritza, Abeltzaintza eta Elikadura Departamentuaren ordezkari bat eta Industria eta Teknologia, Merkataritza eta Lan Departamentuaren beste bat osoko bilkurara joaten ahalko dira. Hizpidea izanen dute baina botorik ez.

5. Hautatsien karguak lau urtean behin aldatuko dira, baina berriro hautatzen ahalko dira.

26. artikulua. "Nafarroa" Jatorrizko Deiturari buruzko Erregelamendua.

"Nafarroa" Jatorrizko Deiturari buruzko Erregelamenduak gutxienez kontu hauek bildu beharko ditu:

a) Ekoitzi eta ontzen deneko eskualdeko mugak.

b) Aipamena dagokien ardoen mota edo kategoriak.

c) Mahatsondo barietate gaien adierazpena.

d) Ardoen ezaugarri organoleptikoak.

e) Ardoen gutxieneko alkohol graduazio bolumetrikoa.

f) Ardoen gehieneko azido lurrunkorra.

g) Babesturiko ardoen gehieneko sufre anhidridoa, guztira.

h) Intentsitate koloratzailea, gutxienekoa edo gehienekoa, DO420, DO520 eta DO620 baturik.

i) Barietate bakoitzarentzat hektarea bakoitzeko baimendurik dagoen gehieneko etekina.

27. artikulua. Erabakiak hartzea.

Hautatsien bi herenek onetsi beharko dituzte "Nafarroa" Jatorrizko Deiturari buruzko Erregelamendua eta haren aldaketak. Osoko bilkurako beste erabakiak Deiturari buruzko Erregelamenduan ezartzen den gehiengoaz hartuko dira.

III. KAPITULUA. LUR-EREMUKO ARDOAK

28. artikulua. Lureremuen baldintzak.

1. Lur-eremuaren bakoitzaren gutxieneko azalera ez da 10 hektarea baino txikiagoa izanen.

2. Lur-eremu bat aitortzeko baldintza hauek bete beharko dira gutxienez.

a) Lur-eremuaren izena bertan ekoitziriko ardoak ezagutzeko merkatuan gutxienez ere 5 urtez maiz erabili izana.

b) Lur-eremua dagoeneko alderdi edo herria eskabidea baino lehengoko hamar urteetan kasuan kasuko jatorrizko deituran inskribatu izana. Hori Kontseilu Arauemailearen txosten batez frogatuko da.

3. Lur-eremua jatorrizko deitura baten erregistroetan inskribaturik dagoenean, ardandegian jatorrizko deituraren eta lur-eremuaren babesean ondu eta ontziraturiko ardoak elkarrekin egoten ahalko dira eta lur-eremua dagoeneko udalerrien edozein zatitan edo mugakide den udalerri batean egoten ahalko da.

4. Aurreko ataletik kanpoko kasuetan, ardandegiak lur-eremuko ardoak bakarrik ontziratuko ditu eta lur-eremuaren barruan egonen da.

29. artikulua. Lureremuko ardoen betebeharrak.

Lur-eremuko ardoek betebehar hauek bete beharko dituzte:

a) Kokaturik daudeneko ekoizpen eskualdeko jatorrizko deituran ezarririko betebeharrak baino zorrotzagoak izanen dira gehieneko eta gutxieneko parametro analitikoak lur-eremuko ardoetarako.

b) Barietate bakoitzarentzat hektarea bakoitzeko baimendurik dagoen gehieneko balioak barietate horiexetarako jatorrizko deituran ezarririkoak baino txikiagoak izanen dira.

c) Mahats guztiak lur-eremutik etorri beharko du.

30. artikulua. Lureremuko ardoak aitortzea.

1. Ardoak aitortzeko eskabidea Mahastizaintza eta ardogintza arautzeari buruzko abenduaren 5eko 16/2005 Foru Legeko 23. artikuluan ezarri bezala aurkeztuko da.

2. Arauak kontu hauek bildu beharko ditu:

a) Aipamena dagokien ardoen mota edo kategoriak.

b) Erabili beharreko eskualdearen izena.

c) Eskualde horretako muga zehatzak.

d) Mahatsondo barietate gaien adierazpena.

e) Ardoen ezaugarri organoleptikoak.

f) Kudeaketa sistema, foru dekretu honekin eta abenduaren 5eko 16/2005 Foru Legearekin bat.

g) Aipamena erabiltzeko eskubidea duten ardo moten gutxieneko alkohol graduazio bolumetrikoa.

h) Babesturiko ardoen gehieneko azido lurrunkorra.

i) Babesturiko ardoen gehieneko sufre anhidridoa, guztira.

j) Intentsitate koloratzailea, DO420, DO520 eta DO620 baturik.

k) Polifenol osoen indizea (DO280).

l) Barietate bakoitzarentzat hektarea bakoitzeko baimendurik dagoen gehieneko etekina.

VI. TITULUA. ARDOEN KONTROLA

31. artikulua. Kontrol organoa.

Lurraldeko, "Nafarroa" Jatorrizko Deiturako eta abenduaren 5eko 16/2005 Foru Legearen babesean aitorturiko lur-eremuko ardoen kontrola Nafarroako Nekazaritzako Elikagaien Kalitatearen Institutua izeneko sozietate publikoak eginen du.

32. artikulua. Kontrol eginkizunetan aritzea.

1. Kontrol eginkizunen xedea babes maila bakoitzerako ezarririko betebeharrak betetzen direla egiaztatzea izanen da.

2. Nafarroako Nekazaritzako Elikagaien Kalitatearen Institutuko ikuskatzaileek ezin izanen dute berez ikuskapenik egin, ikuskapen horiek agintaritza publikoa erabiltzera behartzen badute, salbu eta eginkizun horietan Administrazio Publikoko ikuskatzaileek laguntzen badiete.

3. Mahastiak eta Ardoak Kontrolatzeko Batzordeak ezartzen dituen irizpide horiekin bat eginen dira kontrol eginkizunak. Batzorde horrek kide hauek izanen ditu:

a) Lehendakaria, Nafarroako Nekazaritzako Elikagaien Kalitatearen Institutuak izendatua.

b) Kide bat, babes maila bakoitzaren ordezkari.

c) Kide bat, Nafarroako Mahastizaintza eta Enologia Zentroak izendatua.

d) Kide bat, idazkari ere badena, Nafarroako Nekazaritzako Elikagaien Kalitatearen Institutuak izendatua.

Xedapen Gehigarri Bakarra. "Nafarroa" Jatorrizko Deituraren Kontseilu Arauemailea berritzea.

Nekazaritza, Abeltzaintza eta Elikadura kontseilariak, foru agindu baten bidez, "Nafarroa" Jatorrizko Deituraren Kontseilu Arauemaile berria osatzeko hauteskundeetarako dei eginen du, foru dekretu honek indarra hartu eta sei hilabeteko epean.

Xedapen Iragankor Bakarra. Kontrol eginkizunak.

"Nafarroa" Jatorrizko Deiturarako foru dekretu honetan aurreikusiriko kontrol eginkizunak haren Kontseilu Arauemaileak eginen ditu, Nafarroako Nekazaritzako Elikagaien Kalitatearen Institutua izeneko sozietate publikoak bere gain hartu arte.

Xedapen Indargabetzaile Bakarra. Xedapen indargabetuak.

Indargabetzen dira foru dekretu honetan ezarritakoari aurka egiten dioten maila bereko nahiz apalagoko xedapen guztiak eta bereziki:

2005eko apirilaren 30eko 82/1985 Foru Dekretua, mahasti landaketen eta mahastia birlandatzeko eskubidea duten lurzatien erregistroak sortu zituena.

2002ko martxoaren 9ko Foru Agindua, Nekazaritza, Abeltzaintza eta Elikadura kontseilaria emana, Nafarroako Foru Komunitateko Landaketarako Eskubideen Erreserba osatu zuena.

2003ko urtarrilaren 7ko Foru Agindua, Nekazaritza, Abeltzaintza eta Elikadura kontseilariak emana, mahasti landaketen eta mahastia birlandatzeko eskubidea duten lurzatien erregistroak sortu zituen apirilaren 30eko 82/1985 Foru Dekretua garatzen duena.

2003ko urtarrilaren 20ko Foru Agindua, Nekazaritza, Abeltzaintza eta Elikadura kontseilariak emana, ureztaketa lurretan mahats landaketa edo birlandaketa berriak debekatzen dituena.

Azken Xedapenetariko Lehena. Garatu eta betearazteko eskumenak.

Esku ematen zaio Nekazaritza, Abeltzaintza eta Elikadura kontseilariari foru dekretu hau garatu eta betearazteko behar diren xedapenak eman ditzan, bere eskumenen barruan.

Azken Xedapenetan Bigarrena. Indarra hartzea.

Foru dekretu honek Nafarroako ALDIZKARI OFIZIALean argitaratu eta biharamunean hartuko du indarra.

Gobierno de Navarra

Contacte con nosotros | Accesibilidad | Aviso legal | Mapa web