(ir al contenido)

navarra.es

Castellano | Euskara | Français | English

LEXNAVARRA


Versión para imprimir

Versión en castellano

297/2001 FORU DEKRETUA, URRIAREN 15EKOA, HILETA-OSASUNARI BURUZKO ERREGELAMENDUA ONESTEN DUENA.

BON N.º 143 - 26/11/2001



  I. TITULUA. GORPUAK, MANIPULAZIOA ETA AMAIERAKO LEKUA

  I. KAPITULUA. XEDAPEN OROKORRAK

  II. KAPITULUA. TANATOPRAXIAKO PRAKTIKAK ETA LEKUALDATZEAK

  III. KAPITULUA. AMAIERAKO LEKUA


  II. TITULUA. HILETAENPRESAK. BEILATOKIAK ETA TANATORIOAK

  I. KAPITULUA. HILETAENPRESAK

  II. KAPITULUA. BEILATOKIAK ETA TANATORIOAK


  III. TITULUA. HILERRIAK ETA ERRAUSKETALABEAK

  I. KAPITULUA. HILERRIAK

  II. KAPITULUA. ERRAUSKETALABEAK


  IV. TITULUA. IKERKETA ETA ZEHAPENARAUBIDEA

  ERANSKINA. Lekualdatzea komunikatzeko dokumentua


Atariko

Nafarroako Foru Eraentza Birrezarri eta Hobetzeari buruzko abuztuaren 10eko 13/1982 Lege Organikoko 53. artikuluak ezarri zuen Foru Komunitateari dagozkiola barne-osasunaren arloko lege-garapena eta legeen exekuzioa. Eskumen horiek 1985ean eskuratu zituen Nafarroak, arlo horretako zerbitzu eta eginkizunak transferitu baitziren orduan.

Hileta-Osasuneko Poliziari buruzko Erregelamendua onetsi zuen uztailaren 20ko 2263/1974 Dekretua eta arlo berari buruzko maiatzaren 9ko 123/1986 Foru Dekretua argitaratu zirenetik iragan den denboran, aldaketa garrantzitsuak izan dira gizartearen ohituretan eta osasun publikoa bermatzeko ezinbestekoak diren arreta-neurrietan. Beharrezkotzat jo dugu, horrenbestez, gaur arte indarra izan duten arauak sakon berrikustea, jada anakronikoak diren xedapenak identifikatu eta arlo honi buruzko gaurko errealitate sozialari eta ezagutzei egokituriko aldaketak egiteko.

Bi dira foru dekretu honen funtsezko helburuak. Alde batetik, hileta-osasunari buruz indarra duten arauak gaurko errealitateari egokitu eta arau horiek gaurkotzea, bai heriotzari buruzko usadio eta ohiturei dagokienez, bai tekniken aurrerapenari eta gaixotasun kutsakorren egoera epidemiologikoari dagokienez ere. Bestalde, gure komunitatean lehendik hileta-osasunari buruzko araurik, partzialki bada ere, eman izan denean bezala, behar diren administrazio-prozedurak ahal den guztian arindu eta erraztu nahi dira, baina osasun publikoa zaintzeko bermeetan inolako galerarik izan gabe.

Foru Dekretuak hileta-osasunari buruzko funtsezko alderdi batzuk ditu langai, lau titulutan. Lehenbiziko tituluak gorpu eta gorpu-hondakinak manipulatu eta lekuz aldatu eta haiei amaierako lekua emateko betekizun eta baldintzak aipatzen ditu. Bigarren titulua hileta-enpresei buruzkoa da -hain zuzen ere, haien baimen eta erregistro araubidea ezartzen du-, eta enpresa horien instalazioek bete beharreko baldintzak zehazten ditu, arreta berezia jarriz tanatorio eta beilatokietan. Hirugarren tituluak errausketa-labeak, hilerriak eta hildakoak ehorzteko bestelako leku baimenduak arautzen ditu, eta haiek gaurko eraikuntza-tekniken arabera eraiki, berritu eta ixteko baldintzak ezartzen ditu. Azkenik, laugarren tituluak ikuskaritzari eta zehapen araubideari buruzko zenbait alderdi lantzen ditu, eta Osasunari buruzko Foru Legeak orokorrean ezarritakoaren araberakoak izanen direla ezartzen du.

Gainera, logikoa denez, azken urte hauetan aipatu foru arauetan sarturiko zenbait aldaketa sartu dira testuan, oraindik ere gaurkotasuna dutelakoan: alde batetik, organo edo ehun emaileen gorpuen edo autopsia egin zaien gorpuen manipulazioari, leku-aldatzeari eta amaierako lekuari buruzkoak; bestetik, hilerrien eta bizilekuen edo industri instalazio edo zerbitzuetako instalazioen artean egon beharreko distantziak.

Toki entitateei dagokienez, foru dekretuak Nafarroako Toki Administrazioari buruzko uztailaren 2ko 6/1990 Foru Legeak eta Osasunari buruzko azaroaren 23ko 10/1990 Foru Legeak udalen esku utzitako eskumenak errespetatzen ditu.

Foru dekretuaren proiektua Nafarroako Kontseiluari aurkeztu zitzaion, azter zezan. 2001eko irailaren 24an irizpena eman zuen Kontseiluak, eta haren ondorioa da antolamendu juridikoarekin bat datorrela.

Horrenbestez, Osasun kontseilariak proposaturik, eta Nafarroako Gobernuak bi mila eta bateko urriaren hamabostean eginiko bilkuran hartutako erabakiari jarraituz,

DEKRETATU DUT:

I. TITULUA. GORPUAK, MANIPULAZIOA ETA AMAIERAKO LEKUA

I. KAPITULUA. XEDAPEN OROKORRAK

1. artikulua. Helburua.

Nafarroako Foru Komunitatearen lurralde eremuan hileta-osasuna arautzea da erregelamendu honen helburua.

2. artikulua. Aplikazio eremua.

1. Hileta-osasunak ondoko arloak biltzen ditu:

a) Gorpuekin, gorpu-hondakinekin eta entitate nahikoa duten gorpuzkiekin egiten diren osasun-praktika guztiak arautzea.

b) Hileta-enpresa eta -zerbitzuen eta hileta-instalazio guztien baldintza tekniko eta osasunezkoak, beilatoki, tanatorio, errausketa-labe eta hilerrienak barne.

2. Erregelamendu honetatik kanpo gelditzen dira organo, ehun eta atal anatomikoak lortzeko praktikak.

3. artikulua. Definizioak.

Erregelamendu honen ondorioetarako, hona definizio batzuk:

Gorpua: Gizaki baten gorpua hil ondoko bost urteetan, Erregistro Zibilean haren heriotza inskribatu zen egun eta ordutik kontatzen hasita.

Gorpu-hondakinak: Gizaki baten gorputik hil ondoren bost urte igaro eta gero gelditzen dena

Gorpuzkiak: Abortu, mozketa, ebakuntza kirurgiko, autopsia kliniko edo judizial eta irakaskuntza eta ikerketa jardueren ondoren gizaki gorpu batetik gelditzen diren entitate nahikoko zatiak.

Tanatopraxia: Aldi baterako kontserbazio, izozte eta baltsamatze praktiken bitartez, usteltze fenomenoak atzeratu edo eragozteko, gorpuari aplikatzen zaizkion tekniken multzoa.

a) Aldi baterako kontserbazioa: Substantzia kimikoak aplikatuz, usteltze prozesua geroratzeko metodoa.

b) Izoztea: Gorpua hotzaren bitartez kontserbatzeko metodoa. Horretarako Osasun Departamentuak baimendutako instalazio bat behar da; gehieneko tenperatura 18°ree. C izanen da.

c) Baltsamatzea: usteltze fenomenoak agertzea eragozten duen metodoa.

Gorpuen estetika: Itxura hobetzeko xedez, gorpua kosmetika eta modelatu tekniken bitartez egokitzeko tekniken multzoa.

Lekualdatzeak: Gorpuak, gorpu-hondakinak edo entitate nahikoko gorpuzkiak amaierako lekura garraiatzea; garraio hori hilkutxa egokian eginen da, heriotzari buruzko behar den ziurtagiri mediko edo judizialarekin.

Erregelamendu honen ondorioetarako, ez da gorpuen garraiotzat hartuko Foru Komunitatearen lurraldearen barruan egiten direnak, gorpua heriotza gertatu den lekutik beilatokira eramatekoak, ez eta agindu judizialaz gorpua altxatzeko lekutik Nafarroako Auzitegiko Medikuntzaren Institutuaren lokaletara eramatekoak edo lokal horietatik beilatokira eramatekoak ere. Lekualdatze horiek gorpua estaltzeko behin betiko baliabideak erabili gabe egin beharko dira.

Errausketa: Gorpuak, gorpu-hondakinak edo gorpuzkiak suntsitzea, errauts bihurtu arte, beroa medio.

4. artikulua. Gorpuen osasunsailkapena.

Erregelamendu honen ondorioetarako, gorpuak bi taldetan sailkatzen dira:

I. taldea-Ondokoak biltzen ditu:

1. Heriotzaren arrazoia ondotik aipatzen direnen arteko bat izan denean:

a) Sukar horia.

b) Kolera.

c) Izurria.

d) Paludismoa.

e) Poliomielitis paralitikoa.

f) Amorrua.

g) Antrax edo karbunkoa.

h) Creutzfeldt-Jakoben erako entzefalopatia eta gizakien bestelako entzefalopatia kutsakorrak.

i) Sukar hemorragiko birikoak.

2. Produktu erradioaktiboek kutsaturiko gorpuak.

3. Osasun Departamentuak berariaz zehatz ditzakeen beste gorpu batzuk.

II. taldea-Beste edozein arrazoirengatik hildako pertsonen gorpuak.

II. KAPITULUA. TANATOPRAXIAKO PRAKTIKAK ETA LEKUALDATZEAK

II. KAPITULUA

LEHEN ATALA

TANATOPRAXIAKO ETA GORPUEN ESTETIKAKO PRAKTIKAK

5. artikulua. I. taldeko gorpuen tanatopraxia.

Ezin izanen da tanatopraxia edo gorpuen estetikako praktikarik egin I. taldeko arrazoien arteko batengatik hildakoen gorpuekin, salbu Osasun Departamentuak horretarako baimena ematen badu.

6. artikulua. Tanatopraxiako praktikak egiteko betekizunak.

1. Tanatopraxiako praktikak baimendutako lekuetan eginen dira, hildakoaren heriotza ziurtagiria eta ehorzteko lizentzia lortu ondoren, zendua hil eta hogeita lau ordu iragan ondoren eta berrogeita zortzi ordu iragan baino lehen, Erregelamendu honetan ezarritako salbuespenetan salbu.

2. Aldi baterako kontserbazio, izozte eta baltsamatze praktikak autopsiak egin eta berehala egin ahal izenen dira; bestela, transplanteetarako organo, ehun edo atal anatomikoak erauzi ondoren egin ahal izanen dira.

3. Praktika horiek medikuntzako eta kirurgiako lizentziatuek egin edo gainbegiratu beharko dituzte. Aipatu lizentziatuek beren jarduketari buruzko ziurtagiria eginen dute, txosten bat eginez; txostenean, erabili dituzten teknikak adieraziko dituzte.

7. artikulua. Nahitaez gorpua aldi baterako kontserbatu eta baltsamatzeko beharra.

1. Gorpua, nahitaez, ondoko kasuetan kontserbatu beharko da aldi baterako:

a) Gorpua heriotza gertatu zenetik berrogeita zortzi ordu iragan ondoren eta hirurogeita hamabi ordu iragan baino lehen eraman behar denean bere amaierako lekura.

b) Gorpua leku publikoetan erakutsi behar denean eta heriotza gertatzen den unetik 72 ordu iragan baino lehen eraman behar denean bere amaierako lekura.

2. Baltsamatzea ondoko kasuetan izanen da nahitaezkoa:

a) Gorpua bere amaierako lekura heriotza gertatu zen unetik hirurogeita hamabi ordu baino gehiago iragan direnean eraman behar deneko kasuetan.

b) Atzerrira eraman behar denean.

c) Aire eta itsas bidezko lekualdatzeetan.

d) Kripta batean egin beharreko errausketen kasuan.

3. 1.a) eta 2.a) idatz-zatietan aurreikusitako betebeharrak ez dira aplikatuko gorpu izoztua izozkailuetatik erretiratu eta hurrengo 24 ordutan eraman behar baldin bada bere amaierako lekura, salbu eta egoera klimatologikoa dela-eta hala jokatzea gomendagarria denean.

BIGARREN ATALA

HILKUTXAK

8. artikulua. Hilkutxak erabiltzea.

1. Gorpuen lekualdatzea eta erraustea ondoko artikuluan adierazten diren ezaugarrien araberako hilkutxa batean egin beharko da. Hilkutxa bakoitzak gorpu bat baizik ez du hartuko, salbu eta une berean hildako ama eta abortuen kasuan.

2. Osasun Departamentuak, aparteko kasuetan, hilkutxak erabiltzeko bestelako baldintza batzuk ezarri ahal izanen ditu.

3. Oro har, debekatuta dago hilkutxak behin baino gehiagotan erabiltzea, gorpuak jasotzeko erabiltzen direnak alde batera utzita.

9. artikulua. Hilkutxen ezaugarriak.

Ondoko ezaugarriak izanen dituzte hilkutxek:

a) Hilkutxa arrunta: Gorpua sartzeko adinako tamaina izanen du; hura fabrikatzeko material eta ezaugarriek gutxienez ere UNE 11-031-93 arauan ezarritakoak edo haien ordez etorkizunean ezartzen direnak bete beharko dituzte.

b) Lekualdatzerako hilkutxa berezia. Bi kutxek osatua izanen da. Kanpokoak aurreko idatz-zatian adierazitako ezaugarriak izanen ditu; barrukoak elkarrekin soldatutako zinkezko edo iragazgaiztasun baldintzak betetzen dituen beste material batez eginiko xaflez eginda egonen da. Ixteko bestelako produktu eta teknikak erabiltzeko, Osasun Departamentuaren baimena beharko da aldez aurretik. Lekualdatzeetarako hilkutxa bereziak halako moduan egokitu beharko dira non barneko gasen presioaren eraginak saihestuko dituzten, hain zuzen ere haiek iragazteko balbulez edo bestelako gailu egoki batzuez jarriz.

c) Gorpuzkien kutxa: Metalezkoa edo bestelako material iragazgaitz edo iragazkaiztutako material batez eginikoa izanen da.

d) Gorpuzkien boltsa: Material iragazgaitz batez eginikoa izanen da; materialak erabiltzen den xederako behar adina erresistentzia izanen du.

HIRUGARREN ATALA

GORPUA BEILATZEA ETA LEKU PUBLIKO BATEAN ERAKUSTEA

10. artikulua. Gorpua beilatzea.

1. Gorpuak horretarako baimendutako lekuetan beilatuko dira, bai eta etxebizitza partikularretan ere; azken kasu horretan, behar diren neurri higieniko eta sanitarioak hartuko dira kasuan kasuko inguruabarren arabera.

2. Baimena eman ahal izanen da gorpua bestelako leku publiko batzuetan erakusteko.

LAUGARREN ATALA

LEKUALDATZEAK

11. artikulua. Lekualdatzeetarako baimenak eta horiei buruzko komunikazioak.

1. Erregelamendu honetako 4. artikuluko I. taldean sarturiko gorpu eta gorpu-hondakinak lekualdatzeko, aldez aurretik Osasun Departamentuaren baimena beharko da; Departamentuak kasuan kasu hartu beharreko aparteko neurriak zehaztuko ditu.

2. II. taldeko gorpu eta gorpu-hondakinak beste autonomia erkidego batera eramateko, aldez aurretik Osasun Departamentuari jakinaraziko zaio hori, Foru Dekretu honetako eranskinean jasotako komunikazio-eredua erabiliz.

Komunikazioarekin batera, heriotzari buruzko ziurtagiri medikoa aurkeztu beharko da; baldin eta gorpuari tanatopraxiako teknikak aplikatu bazaizkio, teknika horiek erabili direla ziurtatuko duen txosten medikoaren kopia ere beharko da.

3. II. taldeko gorpu eta gorpu-hondakinak Nafarroako Foru Komunitateko lurraldearen barruan lekualdatzeko, ez da ez inolako baimenik, ez komunikaziorik beharko.

12. artikulua. Lekualdatzeetarako hilkutxa motak.

1. Gorpuak lekualdatzeko, lekualdatzeetarako hilkutxa berezi bat erabili beharko da, hain zuzen ere 9. artikuluan azaldutako ezaugarrien araberakoa. Halakorik ondoko kasuetan beharko da:

a) I. taldeko gorpuen kasuan.

b) Lekualdatzea Nafarroako Foru Komunitatetik erkidego horrekin mugakidea ez den beste edozein lurraldetarakoa denean.

c) Aldi baterako kontserbazio, izozte edo baltsamatze teknikak aplikatu zaizkien gorpuen kasuan.

d) Hobitik atera eta hilerritik kanpora lekualdatu behar diren gorpuen kasuan.

2. Gorpuak lekualdatzeko gainerako kasuetan, hilkutxa arrunta erabili beharko da, hain zuzen ere 9. artikuluan azaldutako ezaugarrien araberakoa.

3. Gorpuzkietarako kutxa erabili beharko da gorpu-hondakinak edo entitate nahikoa duten gorpuzkiak Nafarroatik kanpora garraiatu behar direnean.

4. Gorpuzkietarako poltsa erabili ahalko da gorpu-hondakinak edo entitate nahikoa duten gorpuzkiak Nafarroaren barruan lekuz aldatu behar direnean.

13. artikulua. Tarteko egonaldietarako etapak.

Lekualdatzeko ibilbidean zehar, tarteko egonaldietarako etapak ezarri ahal izanen dira, ondoko kasuetan:

a) Amaierako lekurako bidean dauden beilatoki edo tanatorioetan.

b) Erlijio zerbitzu edo zeremonia laikoak ospatzeko.

c) Osasun Departamentuak berariaz baimentzen badu gorpua leku publikoetan erakustea.

14. artikulua. Lekualdatze bideak.

1. Gorpuen lekualdatzeak, betiere, hileta-enpresa baimendunek egin beharko dituzte, Erregelamendu honetan ezarritako baldintzetan.

2. Lekualdatzeak ondoko bitartekoak erabiliz egin ahal izanen dira:

a) Xede horretarako erabilera esklusiboa duten hileta-autoak; betiere, ondoko artikuluan zehaztutako baldintzak bete beharko dituzte.

b) Tren furgoi, itsasontzi edo hegazkinak, aplikatzekoak diren arauak betez.

c) Osasun Departamentuak kasuan kasu baimen ditzakeen bestelako bitartekoak.

15. artikulua. Hiletaautoen ezaugarriak.

Hileta-autoek, gutxienez ere, ondoko ezaugarri teknikoak bete beharko dituzte:

a) Ibilgailu automobilak izatea, hilkutxa eramateko eta hura erraz manipulatu ahal izateko adinako tamainakoak.

b) Kabina eta hilkutxa eramateko lekua bereizirik egonen dira.

c) Hilkutxa eramateko lekua material iragazgaitzez jantzirik egonen da, erraz garbitu eta desinfektatu ahal izateko moduan.

16. artikulua. Errepide bidezko lurreko garraiorako hiletaibilgailuak baimentzea.

Hileta-autoek hileta-garraiorako behar diren baimenak eduki beharko dituzte, hain zuzen ere lurreko garraioaren antolamenduari buruzko indarreko arauei jarraituz.

17. artikulua. Ehunak erauzteko garraioa.

Gorpu bat ehunak erauzteko baimena duen Nafarroako Foru Komunitateko osasun zentro batera garraiatzeko, osasun-garraioko ibilgailuak erabili ahal izanen dira, baldin eta heriotza gertatu eta zortzi ordu baino gutxiago iragan badira.

Halako kasuetan, baldintza higienikoak areagotu egin behako dira: gorpua material iragazgaitzez egokitu eta garraioa egin ondoren ibilgailua garbitu eta desinfektatu beharko da.

18. artikulua. Nazioarteko lekualdatzeak.

Nazioarteko lekualdatzeetan, aplikatzekoak diren Estatuko nahiz nazioarteko arauak ezarritakoari jarraituko zaio.

III. KAPITULUA. AMAIERAKO LEKUA

19. artikulua. Amaierako lekua.

1. Transplanteetarako organo, ehun eta atal anatomikoak lortzeari buruz indarreko arauetan ezarritakoa ezertan kendu gabe, honakoa izanen da gorpu ororen amaiera:

a) Errausketa.

b) Ehorztea.

c) Azterketa zientifikoetarako eta irakaskuntzarako erabiltzea.

d) Osasun Departamentuak arau bidez zehazten duen beste edozein.

2. Aurreko atalean adierazitako amaiera bera izanen dute ere entitate nahikoko gorpuzkiak; haien jatorria ziurtatuko duen sendagile agiria beste osasun baldintzarik ez da eskatuko.

3. Halaber, 1. atalean adierazitako amaieretako bat izanen dute ere hobitik ateratako gorpu-hondakinek.

4. Fakultatibo batek I. taldeko gorpuren batean kutsadura edo/eta irradiazio arrisku balizkoak daudela uste badu, berehala jakinaraziko dio hori Osasun Departamentuari, behar diren neurriak har ditzan.

20. artikulua. Epeak.

1. Oro har, ezin izanen zaio gorpu bati amaierako lekua eman heriotza gertatu eta hogeita lau ordu iragan baino lehen edo berrogeita zortzi ordu iragan ondoren.

2. Autopsiak egin diren kasuetan edo transplanteetarako organo, ehun edo atal anatomikoak erauzi diren kasuetan, gorpuei heriotza gertatu eta hogeita lau ordu iragan baino lehen eman ahal izanen zaie amaierako lekua.

3. Aldi baterako kontserbaturiko gorpuak heriotza gertatu eta hirurogeita hamabi ordu iragan baino lehen eraman beharko dira bere amaierako lekura.

4. Izoztu edo/eta baltsamaturiko gorpuak heriotza gertatu eta laurogeita hamasei ordu iragan baino lehen eraman beharko dira amaierako lekura.

LEHEN ATALA

ERRAUSKETA

21. artikulua. Gorpuak errausteko bete beharrekoak.

1. I. taldean sarturiko gorpu guztiak horretarako baimendutako instalazioetan erraustu ahal izanen dira, salbu eta erradiazio ionizatzaileek kutsaturikoak edo Osasun Departamentuak adierazten dituenak.

2. Gorpua erraustu baino lehen, errausketa-labearen erantzukizuna duen entitateak heriotzari buruzko sendagilearen ziurtagiria eta ehorzteko lizentzia eta exijitu beharko ditu. Judizialki esku harturiko gorpuen kasuan, kasuaren ardura duen epailearen ebazpena ere eskatu beharko da; hartan, berariaz adieraziko du gorpua erraustearen aurka ez dagoela.

3. Errausketaren ondoriozko errautsak kutxetan sartuko dira; kutxaren kanpoko aldean hildakoaren izena ageriko da. Kutxa familiari edo haren legezko ordezkariari emanen zaio. Kutxaren garraioari edo geroko deposituari buruz ez dago inongo osasun-betekizunik.

BIGARREN ATALA

EHORZTEA

22. artikulua. Ehorzketarako bete beharrekoak.

1. Gorpuak, gorpu-hondakinak eta gorpuzkiak hilerrietan edo ehorzketarako baimendutako bestelako lekuetan ehortziko dira.

2. Ehorzketa baino lehen, hilerriaren ardura duen entitateak heriotzari buruzko sendagilearen agiriaren kopia eta ehorzketarako lizentzia eskatu beharko ditu.

23. artikulua. I. taldeko gorpuen ehorzketak. I. taldeko gorpuen ehorzketak.

1. I. taldeko gorpuak ahal bezain laster ehortzi beharko dira, heriotza gertatu eta 24 ordu iragan eta gero, heriotza gertatu deneko herriko hilerrian ehortzi beharko dira, salbu eta Osasun Departamentuak kasuan kasu bestelako neurriak hartzeko baimena ematen badu.

2. Produktu erradioaktiboekin kutsaturiko gorpuei tratamendu berezia emanen zaie, Osasun Departamentuak kasuan kasu ezarritakoaren arabera.

HIRUGARREN ATALA

DESEHORZTEA ETA BERREHORZTEA

24. artikulua. Gorpuak desehorztea.

1. Oro har, ezin izanen da inongo gorpurik desehortzi, ehortzi zenetik bost urte iragan bitartean; salbu eta epaile baten aginduzko edo Erregelamendu honetako 49.2 artikuluan ezarritako kasuetan.

2. Aparteko kasuetan, Osasun Departamentuak gorpuak desehorzteko baimena ematen ahal izanen du.

3. Desehortzitako gorpuak, berehala hilerri berean berrehortzi edo erraustu behar direnak, hilkutxa komun batean berrehortzi edo errausten ahalko dira.

4. Beste hilerri batera eraman behar diren desehortzitako gorpuek beti lekualdatzeetarako hilkutxa berezia beharko dute. Osasun Departamentuak, kasuan kasuko inguruabarrak kontuan hartuta, desehorzketa egiteko neurri higieniko eta sanitario egokiak zehaztuko ditu; halaber, hilkutxa edo kanpoko kutxa ordeztea erabaki ahal izanen du, hain zuzen ere hilkutxa berezietan ehortzitako gorpuen kasuan, baldin eta hilkutxa hori egoera onean ez baldin badago.

5. Betiere, gorpu bat desehorzten denetik berrehorzten den arte ezin izanen dira berrogeita zortzi ordu baino gehiago iraun.

25. artikulua. Gorpuak desehorzteko baimena.

1. Gorpuak desehorzteko baimenerako eskaria Osasun Departamentuan aurkeztu beharko da; harekin batera, Erregistro Zibilak heriotzari buruz eginiko inskripzioari buruzko hitzez hitzeko ziurtagiria aurkeztu beharko da.

2. Interesdunek, desehorzketarako baimena jaso ondoren, Osasun Departamentuari jakinaraziko diote, pertsonalki nahiz hileta-zerbitzu baten bitartez, desehorzketa egiteko aurreikusitako eguna eta ordua.

26. artikulua. Gorpuhondakinak desehorztea.

1. I. taldeko gorpu-hondakinak desehorzteko aldez aurretik Osasun Departamentuaren baimena eduki beharko da.

2. II. taldeko gorpu-hondakinak desehorzteko ez da inongo osasun-baimenik beharko.

27. artikulua. Epaile baten aginduzko desehorzketak.

Epaile baten aginduz egin beharreko desehorzketek Erregelamendu honetan zehazten diren baldintza sanitario guztiak bete beharko dituzte. Hala eta guztiz ere, 24.5 artikuluaren arabera desehorzketatik berrehorzketara gorde beharreko epea luzatu ahal izanen da, baldin eta ikerketa judizialerako hala behar bada. Agintari judizialek Osasun Departamentuari jakinarazi beharko diote inguruabar hori.

LAUGARREN ATALA

ERABILERA ZIENTIFIKOA ETA IRAKASKUNTZAKOA

28. artikulua. Autopsiak eta ikerketa.

Autopsiak egiteko eta gorpuak helburu zientifikoetarako eta irakaskuntzako helburuetarako erabiltzeko horri buruz ezarritakoak bete beharko dira.

II. TITULUA. HILETA-ENPRESAK. BEILATOKIAK ETA TANATORIOAK

I. KAPITULUA. HILETA-ENPRESAK

29. artikulua. Hiletaenpresa.

Hileta-enpresa pertsona baten heriotza gertatzen denetik amaierako lekura eramaten den arte eman beharreko hileta-zerbitzuak emateko baimena duen entitatea da.

30. artikulua. Hiletaenpresek bete beharreko baldintzak.

Hileta-enpresak:

1. Jarduera horretan aritzeko behar diren gauza eta giza baliabideak eduki beharko dituzte, bai eta erabiltzen dituzten ibilgailu, gauza, jantzi eta gainerako materialak garbitu eta desinfektatzeko behar diren elementuak ere.

2. Erregistro bat eduki beharko dute, non agindu bakoitzaren zenbakia, zerbitzuen data, lekualdatzea nondik eta nora egiten den eta gorpuari aplikatzen zaizkion tanatopraxia praktika guztien aipamena jasoko den.

31. artikulua. Hiletaenpresetarako baimena.

Hileta-enpresak ezartzeko baimena haiek kokatuta dauden udalek eman beharko dute.

32. artikulua. Osasun Departamentuaren hiletaenpresen erregistroa.

1. Osasun Departamentuaren hileta enpresen erregistroa sortzen da; hartan, Nafarroako Foru komunitateko udalek baimendutako hileta-enpresa, -instalazio eta -zerbitzu guztiak inskribatu beharko dira.

2. Horretarako, Nafarroan legez ezarritako hileta-enpresek ondoko datuak igorri beharko dizkiote Osasun Departamentuari, baimena jaso eta hilabeteko epean:

a) Izena eta helbide soziala.

b) Enpresaren titularra edo titularrak.

c) Identifikazio Fiskaleko Zenbakia.

d) Jardueren zerrenda.

e) Gauza eta giza baliabideen deskribapena.

3. Osasun Departamentuaren Hileta-enpresen Erregistroari aurreko datuen aldaketa guztien berri eman beharko zaio.

33. artikulua. Pertsona behartsuei hiletazerbitzuak ematea.

Nafarroako udalek beren gain hartuko dituzte dagokien udalerrian hiltzen diren pertsona behartsuentzako hileta-zerbitzuen kostuak.

II. KAPITULUA. BEILATOKIAK ETA TANATORIOAK

34. artikulua. Beilatokiak.

Beilatokitzat hartuko da gorpuei estetika praktika egiteko, hura jendaurrean erakusteko eta hari beila egiteko establezimendu oro.

35. artikulua. Beilatokiek bete beharrekoak.

1. Xede duten jarduerarako behar adina tamainako leku bereiziak edukiko dituzte; leku horiek, gutxienez ere, ondoren aipatzen diren baldintzak bete beharko dituzte:

a) Gorpuak erakusteko areto bat edo areto gehiago. Guztiak besteetatik independenteak izanen dira eta bi gela elkarrekin komunikatuak izanen dituzte: batean gorpua egonen da eta bestean hildakoaren ahaideak eta gainerako jendea. Gorpuaren gelak aireztatze sistema independente eta nahitaezkoa izanen du. Erakusten den gorpua hotz mantentzen dela bermatuko duen sistema bat edukiko du.

b) Gorpuei estetika praktikak aplikatzeko aretoa; gainazal liso, iragazgaitz, talkak jasateko erresistentea eta erraz garbitu eta desinfektatzeko modukoak izanen ditu. Eskuak garbitzeko ur korronteko konketa bat edukiko du, langileentzat.

c) Jendeak erabiltzeko komun bat, konketa eta komun-ontziarekin.

2. Ahaideentzako eta jende ororentzako gela eta aretoek sarbide eta zirkulazio independenteak izanen dituzte gorpuak mugitu eta zirkulatzeko.

36. artikulua. Tanatorioak.

Tanatoriotzat jotzen da beilatokitarako baldintza guztiak bete eta, gainera, tanatopraxiako praktikak egiteko baimena duen establezimendu oro.

37. artikulua. Tanatorioek bete beharrekoak.

1. Xede duten jarduerarako behar adina tamainako leku bereiziak edukiko dituzte; leku horiek, gutxienez ere, ondoren aipatzen diren baldintzak bete beharko dituzte:

a) Harrera lekua eta administrazio lanetarako edo jendeari arreta egiteko lekua.

b) Hilkutxen eta gainerako hileta-materialen biltegi eta erakusketarako lekua.

c) Gorpuak erakusteko areto bat edo areto gehiago. Guztiak besteetatik independenteak izanen dira eta bi gela elkarrekin komunikatuak izanen dituzte: batean gorpua egonen da eta bestean hildakoaren ahaideak eta gainerako jendea. Gorpuaren gelak aireztatze sistema independente eta nahitaezkoa izanen du. Erakusten den gorpua hotz mantentzen dela bermatuko duen sistema bat edukiko du.

d) Gorpuei estetika praktikak aplikatzeko aretoa; gainazal liso, iragazgaitz, talkak jasateko erresistentea eta erraz garbitu eta desinfektatzeko modukoak izanen ditu. Eskuak garbitzeko eskuzkoa ez den konketa bat edukiko du.

Bi gorpu hotz mantentzea bideratuko duten hozkailu bat edo hozkailu gehiago eduki beharko ditu, bai eta altzairu herdoilgaitzezko mahai bat, barruko hornidura eta saneamendu sareekin konektatua.

e) Tanatopraxiako aretoei erantsitako komuna, soilik langileek erabiltzekoak; komun-ontzia, konketa eta dutxa izanen ditu.

f) Jendearentzako komuna, konketa eta komun-ontziarekin.

2. Ahaideentzako eta jende ororentzako gela eta aretoek sarbide eta zirkulazio independenteak izanen dituzte gorpuak mugitu eta zirkulatzeko.

38. artikulua. Beilatokiek eta tanatorioek funtzionatzeko baldintzak.

1. Gorpuei estetika praktikak eta tanatopraxiako praktikak aplikatzeko tresnak, ahal dela, erabili eta botatzekoa izanen da. Erabiltzen den materiala erabili eta botatzekoa ez bada, garbiketa eta esterilizazio sistema egokia eduki beharko da.

Beilatoki eta tanatorioetan sortzen diren hondakin guztiak aplikatzekoak diren lege indardunen arabera kudeatu beharko dira.

2. Betiere, zarata eta bibrazioei buruz lege indardunetan ezarritako baldintzak betetzen direla bermatu beharko da.

39. artikulua. Beilatoki eta tanatorioentzako baimena.

Beilatoki eta tanatorioak ezartzeko baimena kokatuta dauden udalerriko udalek eman beharko dute. Aldez aurretik, Osasun Departamentuak proiektu teknikoari buruz emaniko aldeko txostena eduki beharko dute.

III. TITULUA. HILERRIAK ETA ERRAUSKETA-LABEAK

I. KAPITULUA. HILERRIAK

40. artikulua. Hilerri zerbitzua.

1. Hilerri guztiek, haien izaera juridikoa eta titularitatea zein den alde batera utzita, Erregelamendu honetan ezarritako betekizun sanitarioak bete beharko dituzte.

2. Gorpuak, gorpu-hondakinak eta gorpuzkinak hilerrietan erraustuko dira. Aparteko kasuetan, Osasun Departamentuak hilerriez bestelako ehorzketa-lekuak baimendu ahal izanen ditu.

41. artikulua. Udalen eskumenak.

Nafarroako udalek, bakoitza bere aldetik nahiz elkarturik, hilerri zerbitzua eman beharko dute, toki administrazioari buruzko lege orokorretan ezarritakoari jarraituz.

42. artikulua. Hilerriek bete beharrekoak.

1. Hilerriek ondoko betekizun orokorrak izanen dituzte:

a) Lur iragazkorretan egonen dira edo, beste aukerarik izan ezean, behar diren neurriak hartu beharko dira lur horiek iragazkorrak izateko.

b) 50 metroko zabalerako babes-zerrenda bat edukiko du, hilerriaren kanpoko perimetroaren inguru guztian neurtuta; babes-zerrenda horretan ezin izanen da inolako eraikinik egon, salbu eta hileta-zerbitzuetarakoak.

2. Aurreko lerrokadan ezarritako betekizun orokorrak bai hilerri berriak eraikitzeko bai daudenak zabaltzeko exijituko dira.

Betekizun horiek, dena den, ez dira eskatuko jada dauden hilerrietan berrikuntza-lanak egiteko.

Horri dagokionez, hilerri baten zabaltze-lantzat hartuko da haren azalera handitzea dakarren aldaketa oro. Berrikuntza-lantzat hartuko da, ordea, azalera handitzea ez dakarten aldaketa oro.

43. artikulua. Hilerriek eduki beharreko gutxieneko instalazioak.

Eraikiko diren hilerriek eta zabaltze-lanak egiten diren hilerriek ere gutxienez ere ondoko instalazioak eduki beharko dituzte:

1. Hilobi edo ehorzteko unitateak.

2. Erreferentziako populazioaren araberako lokal, zerbitzu eta instalazioak:

a) 2.000 biztanle baino gutxiagoko herriak: Gorputegiaren lokala, behar adinako tamaina izanen duena; zorua eta paretak lisoak eta iragazgaitzak izanen ditu; aireztatze sistema zuzena edo leiho erabilgarriak, metalezko ehun edo sare fina dutenak, izanen ditu.

b) 2.000 eta 10.000 biztanle bitarteko herriak: Gorputegiaren lokala, behar adinako tamaina izanen duena; gorputegi horrek gutxienez ere bi atal izanen ditu, elkarrekin komunikatuak, bata gorputegi bera izanen dena eta bestea jendea sartzekoa. Gorputegiko aretoak aurreko lerrokadan deskribaturiko ezaugarri guztiak bete beharko ditu.

c) 10.000 biztanle baino gehiagoko herriak: aurreko lerrokadan adierazitako instalazioez gainera, gorputegiaren aretoak ur korrontea eta saneamendu sare publikora doan hustubidea izanen ditu; argiztatze sistema artifiziala izanen du, hariteria elektriko bidez, eta gutxienez ere bi gorpu kontserbatzeko hozkailu bat edo gehiago. Hilerri barruan, jendeak erabiltzeko komunak ere eduki beharko dira.

3. Hilobiak hustu eta garbitzetik edo hilerria garbitzetik datozen eta giza hondakinak ez diren arropa, gauza eta bestelako hondakinak deuseztatzeko sistema egokia.

4. Abortuetatik, ebakuntza kirurgikoetatik edo mozketetatik datozen gorpu-hondakinak eta gorpuzkiak eta errausketatik datozen errautsak ehorzteko lekua.

5. Hilerrirako sarbideak eta haren instalazio eta egoitzak diseinatzerakoan, obraz eginiko itxitegi perimetral bat aurreikusiko da; itxitegiak, gutxienez ere, bi metro altu izanen ditu eta arkitektura-oztopoei buruz indarra duten arauek aplikatuko zaizkio.

44. artikulua. Hobi, hormahobi eta kolunbarioak.

Hobi, horma-hobi eta kolunbarioek gutxienez ere ondoko baldintzak beteko dituzte:

1. Hobiak: 2 metro sakon, 0,80 metro zabal eta 2,30 metro luze izanen dira; hobien artean gutxienez ere 0,50 metro egonen da.

2. Horma-hobiak:

a) Lurretik 0,25 metro altu den zokalo baten gainean ezarriko dira. 0,80 metro zabal, 0,65 metro altu eta 2,30 metro sakon izanen dira.

b) Horma-hobietako zoruak % 1eko malda bat izanen du, gutxienez, atzeko aldean dagoen hodi batera; hodi horrek putzu iragazkor batera joko du; putzu hori legarrez eta kare biziz beteta egonen da. Gainera, horma-hobi bakoitzaren gas-irteera bermatuko da; hain zuzen ere lur-arrasaren azpitik dagoen ganbera komun batera joko du gas-irteera hori; ganberak, gainera, aire-sarrera eta -irteera bat edukiko du, gutxienez re 0,15 metro koadroko zabalerarekin; ikatz aktiboz beterik egonen da.

c) Lur-arrasaren azpiko horma-hobien ilara euri eta iragazteetatik guztiz babestuta egonen da.

d) Horma-hobiak ehorzketa eta berehala itxi beharko dira.

e) Horma-hobiek gehienez ere bost ilarako altuera izanen dute.

3. Kolunbarioak:

Gutxienez ere, 0,40 metro zabal, 0,40 metro altu eta 0,60 metro sakon izanen dira. Gutxieneko dimentsio horiek ez dira beharrezkoak izanen errausketetatik datozen errautsak gordetzeko balio duten errausketa-kolunbarioen kasuan.

45. artikulua. Bestelako hiletaeraikuntza.

1. Mausoleo eta panteoietako hobiek gutxienez ere 44.2 artikuluan ezarritako dimentsioak eduki beharko dituzte.

2. Hileta-eraikuntzako sistema aurrefabrikatuak erabiliz gero, eraikuntzan erabiltzen den sistema jakin bakoitzaren ezaugarrien araberako dimentsio eta distantziak bermatu beharko dira. Sistema horiek Osasun Departamentuak aldez aurretik homologatuta egon beharko dute.

46. artikulua. Izurriteak kontrolatzea.

Baimendutako enpresa batek, aldizka, izurriteak kontrolatzeko tratamenduak aplikatuko ditu; halere, zerbitzu hori hilerria kudeatzen duen entitateak berak ere eman ahalko du, baldin eta horretarako behar den baimena baldin badauka.

47. artikulua. Erregistroa.

Hilerriek eta ehorzketa-leku baimendu guztiek erregistro bat edukiko dute, non egiten diren ehorzketa, desehorzketa eta berrehorzketa guztiak inskribatuko diren; haien data, hildakoaren edo hondakinen titularraren izena eta ehorzketaren leku zehatza adierazi beharko dira, bai eta gorpua I. taldekoa ala II. taldekoa den ere.

48. artikulua. Baimenak.

1. Hilerri berriak eraikitzeko edo hilerriak zabaldu eta berriztatzeko baimenak emateko espedienteak, edozein dela ere haien titularitatea, kokatuta dauden udalerriko udalek bideratu eta ebatzi beharko dituzte, ingurumena babesteko jarduera sailkatuei buruzko arauetan ezarritakoaren arabera, eta nahitaez Osasun Departamentuak proiektu teknikoari buruz emandako aldeko txostena eduki beharko dute.

2. Hilerriak eraikitzeko edo zabaltzeko proiektu tekniko orok bere oroit-idazkia izanen du; oroit-idazkia teknikari eskudun batek sinatuko du, eta gutxienez ere ondokoak jasoko ditu:

a) Kokapena.

b) Lurraren ezaugarri hidro-geologikoei buruzko txostena; haren ezaugarriak, geruza freatikoaren sakonera, lurrazpiko ur-korronteen norabidea eta saturatu gabeko eremuaren lodiera. Lurrazpiko uretan eragiteko izan lezakeen arriskuari buruzko epai orokor bat ere bildu beharko du.

c) Aurreikusitako zabalera eta ahalmena, egindako kalkuluen arabera; ehorzketa moduak eta haien eraikuntza-ezaugarriak ere adierazi beharko dira.

d) Hurbilen dauden biziguneetarako eta eraikinetarako dagoen lerro zuzeneko distantzia.

e) Hirigunearekin dauzkan komunikazioak.

f) Zerbitzuak, barrutiak eta eraikinak banatzeari buruzko planoa.

g) Haizeen norabidea, bizigunea kokatuta dagoen aldearekiko.

h) Erabili beharreko obra eta material motak.

i) Hondakin likido eta solidoak deuseztatzeko aurreikusitako sistema.

j) Eskabidea tramitatu eta ebazteko behar diren bestelako informazioak.

3. Berrikuntza proiektuetako oroit-idazkian, aurreko idatz-zatian exijituriko dokumentu guztiak jaso beharko dira, salbu eta txosten hidro-geologikoa eta hurbilen dauden eraikinetarako distantziei buruzko txostena.

49. artikulua. Hilerri baten xedea aldatzea.

1. Osasun baldintzek edo hirigintza planek horretarako bidea ematen dutenean, hilerri baten jabea den entitateak espediente bat abiarazten ahal izanen du lur hori edo horren zati bat beste xede batzuetarako erabiltzeko. Xede aldaketa lurraldearen antolamenduko plan eta proiektuen edo interes orokorreko obrak egitearen ondorioa baldin bada, kasuan kasuko administrazioa edo, hala bada, besterentzearen onuraduna hartuko da entitate jabetzat.

Horretarako, ezinbestekoa izanen da ondoko artikuluetan ezarritako baldintzak betetzea.

2. Ezin izanen dira itxi bost urte baino gutxiagoko antzinatasuna duten gorpu edo gorpuzkiak ehortzirik dauzkaten hilerriak, salbu eta interes publikoko arrazoiek hori gomendatzen dutenean edo interes orokorrekotzat jotako proiektu bat egiteko ezinbestekoa denean.

50. artikulua. Hilerri bateko ehorzketak etetea.

Aurreko artikuluan ezarritako helburuarekin eta osasun arrazoiengatik edo ahalmena aldi baterako nahiz behin betiko agortu zaiolako, hilerriaren jabe den entitateak bertako ehorzketak etetea erabaki ahal izanen du.

51. artikulua. Hilerriak ixteko baimena.

1. Osasun Departamentuari dagokio hilerri bat ixteko eta bertan dauden hondakin guztiak edo haien zati bat jaso eta lekualdatzeko baimena emateko ahalmena. Hilerriaren jabe den entitateak Osasun Departamentuari eskatzen ahalko dio hilerria ixteko eta hilerriko hondakinak lekuz aldatzeko baimena emateko, arrazoitutako idazki batez; idazki horrekin batera, hilerri horretako ehorzketen antzinatasunari buruzko ziurtagiriak aurkeztu beharko ditu.

2. Osasun Departamentuak, behin Foru Dekretu honetan ezarritako betekizunak betetzen direla egiaztatu ondoren, hilerria itxi eta bertan dauden hondakinak jaso eta lekuz aldatzeko baimena emanen du, indarreko legeak aplikatuz eska ditzakeen bestelako baimenak ezertan kendu gabe.

3. Hilerriaren ixtea eta hondakinen jasotze eta eskualdatzea udal jabetzapekoak ez diren hilerri batean gertatzen denean, Osasun Departamentuak, ixteko baimena eman aurretik, entzunaldia eman beharko dio hilerria kokatuta dagoen lurraldeko toki entitateari.

52. artikulua. Hondakinak jaso eta lekualdatzeko prozedura.

1. Aurreko artikuluan exijituriko baimena emanda, entitate jabeak gutxienez ere bi hilabeteko epearekin jakinaraziko dio jendeari hondakinak jasoko dituela. Horren berri eman beharko du Nafarroako Nafarroako ALDIZKARI OFIZIALean eta Foru Komunitatean zirkulazio handiena duten egunkarietan, ehortzitakoen familiek eskubide dituzten neurriak hartu ahal izan ditzaten.

2. Hilerriaren jabe den entitateak Osasun Departamentuari eta, kasua bada, behar den toki entitateari, hondakinak jaso eta lekualdatuko diren eguna eta ordua jakinaraziko dizkie.

3. Jasotako hondakinak beste hilerri batean erraustu edo ehortziko dira.

II. KAPITULUA. ERRAUSKETA-LABEAK

53. artikulua. Errausketalabeen instalazioetarako baimena.

Errausketa instalazioak eraiki, zabaldu edo berriztatzeko espedienteak, instalazio horiek kokatuta dauden udalek bideratu eta ebatziko dituzte, ingurumena babesteko jarduera sailkatuei buruzko arauetan ezarritakoari jarraituz; nolanahi ere, aldez aurretik Osasun Departamentuak proiektu teknikoari buruz emaniko aldeko txostena beharko da.

54. artikulua. Errausketa instalazioek bete beharrekoak.

Errausketa instalazioek gutxienez ere ondoko betekizunak bete beharko dituzte:

a) Kokapena: Hileta-erabileretarako baizik erabiliko ez den eraikin batean kokatuko dira. Hilerrien kasuan, distantziei buruz ezarritako betekizun berak bete beharko dituzte.

b) Egoitzak: Gutxienez ere, ondoko leku bereiziak izanen ditu:

- Gelaurre bat, itxaron-gela batekin eta jendearentzako komunekin.

- Agur egiteko gela, non hilkutxa errausketa-labean nola sartzen den ikusi ahal izanen baita.

- Gorpuak manipulatzeko areto bat, zoru eta pareta lisoekin eta gainjantzi iragazgaitzarekin.

- Langileek soilik erabiltzeko komunak, dutxak eta aldagelak.

- Erakunde eskudunak homologaturiko errausketa-labea, errauste bakoitzaren ondoriozko errautsak hildako bakarraren hondakinak direla bermatuko duena.

c) Langileak eta ekipamendua: eskaintzen dituen zerbitzuei erantzuteko behar adina langile, material eta ekipamenduak eduki beharko ditu.

d) Labearen funtzionamendua bermatuko duten mekanismo nahikoak, hain zuzen ere gasaren edo/eta elektrizitatearen hornidura erregularrak aldi baterako huts egiten duten kasuetarako.

e) Eguratsera igorritako emisioek eguratsaren ingurumena babesteko abenduaren 22ko 38/1972 Legean eta harekin bat datozen edo hura garatzen duten arauetan ezarritakoak bete beharko dituzte.

55. artikulua. Erregistroa.

Errausketa-labearen instalazioaren entitate erantzuleak gorpuen, gizaki-hondakinen eta gorpuzkien errausteari buruzko erregistro bat edukiko du. Erregistro horretan, emaniko zerbitzu guztiak jasoko dira, hildakoaren izena eta erraustu zen eguna zehaztuta. Gorpuzkien kasuan, zein atal den eta norena zen jaso beharko da, salbu eta ikerketa zentroetatik edo unibertsitateetatik datozen gorpuzkien kasuan; halakoetan, delako zentroaren organo eskudunaren horri buruzko adierazpen bat beharko da.

IV. TITULUA. IKERKETA ETA ZEHAPEN-ARAUBIDEA

56. artikulua. Ikerketa.

Osasun Departamentuak hileta-enpresa, -instalazio edo -zerbitzuak ikuskatzeko funtzioak erabili ahal izanen ditu, Osasunari buruzko azaroaren 23ko 10/1990 Foru Legeko II. tituluko VI. kapituluan ezarritakoari jarraituz.

57. artikulua. Arauhausteak eta zehapenak.

Erregelamendu honetan ezarritakoen aurkako arau-hausteengatik zehapenak ezarri ahal izanen dira, Osasunari buruzko azaroaren 23ko 10/1990 Foru Legeko II. tituluko VII. kapituluan ezarritakoari jarraituz.

58. artikulua. Kautelazko ixtea eta ixtea.

Ez du zehapen izaerarik izanen behar diren osasun baimen edo erregistroak ez dituzten hileta-enpresa, -instalazio edo -zerbitzuen ixtea, ez eta haien funtzionamendua akatsak zuzendu arte edo segurtasun edo osasun publikoaren arrazoiengatik exijituriko betekizunak bete arte etetea ere.

XEDAPEN GEHIGARRIA

Osasun Publikoaren Institutuari dagokio Osasun Departamentuari hilerriak instalatu, zabaldu eta berriztatzeko esleituriko aginduzko jarduketak egitea, bai eta 46. artikuluan aipatzen diren sistema aurrefabrikatuak homologatzekoak ere. Erregelamendu honetan Osasun Departamentuari esleituriko gainerako funtzioak Osasun Laguntzaren Zerbitzuak hartuko ditu bere gain.

XEDAPEN IRAGANKORRAK

Lehena

Urtebeteko epea ematen da hileta-enpresek, beilatokiek eta tanatorioek instalazioak foru dekretu honetan ezarritako betekizunen arabera egoki ditzaten.

Bigarrena

Arau hau argitara eman aurretik Nafarroako Foru Komunitatean ezarrita zeuden hileta-enpresa, -instalazio eta -zerbitzuek 32. artikuluan ezarritako datuak igorri beharko dizkiote Osasun Departamentuari, hain zuzen ere foru dekretu honek indarra hartu eta bi hilabeteko epean.

AZKEN XEDAPENAK

Lehena

Indarrik gabe geratu dira maiatzaren 9ko 123/1986 Foru Dekretua, apirilaren 14ko 87/1987 Foru Dekretua, urtarrilaren 27ko 37/1992 Foru Dekretua eta otsailaren 7ko 69/2000 Foru Dekretua, guztiak hiletetarako osasun poliziari buruzkoak, bai eta foru dekretu honen aurkako maila bereko edo beheragoko xedapen guztiak.

Bigarrena

Ahalmena ematen zaio Osasun kontseilariari foru dekretu hau betearazi eta garatzeko behar diren xedapenak emateko.

Hirugarrena

Foru Dekretu honek Nafarroako Nafarroako ALDIZKARI OFIZIALean argitara eman eta biharamunean hartuko du indarra.

ERANSKINA. Lekualdatzea komunikatzeko dokumentua

ERANSKINA

Eskatzailearen datuak:

Hileta-enpresa bat baldin bada:

Enpresaren izena:

Erregistro zenbakia:.........................

Partikular bat baldin bada:

Deiturak eta izena:

IFZ:.....................

Helbidea:...................................... Herria:

Telefonoa:..................

Hildakoari buruzko datuak:.

Izen-abizenak:

Lekualdatzeari buruzko datuak:

Nondik eramanen den:

Zein herri eta probintziatara eramanen den:

Garraiabidea (hileta-autoa, trenbidea, itsasontzia, hegazkina):

Amaierako lekua (erraustea, ehorztea, helburu zientifikoak):

Mota (gorpua, gorpuzkia, gorpu-hondakina):

Erabilitako hilkutxa mota (arrunta, lekualdatzeetarako hilkutxa berezia, gorpuzkietarako kutxa):

Tanatopraxia (Aldi baterako kontserbatzea, baltsamatzea, izoztea):

Data eta sinadura

Gobierno de Navarra

Contacte con nosotros | Accesibilidad | Aviso legal | Mapa web