LEXNAVARRA
54/1998 LEGEGINTZAKO FORU DEKRETUA, otsailaren 16koa, Nekazaritzako Finantzaketari buruzko lege mailako xedapenen Testu Bategina onesten dueña 
BON N.º 30 - 11/03/1998
NEKAZARITZAKO FINANTZAKETARI BURUZKO LEGE MAILAKO XEDAPENEN TESTU BATEGINA. I. TITULUA
- NEKAZARITZAKO FINANTZAKETARI BURUZKO LEGE MAILAKO XEDAPENEN TESTU BATEGINA
- 1. artikulua. Xedea.
- 2. artikulua. Edukia.
II. TITULUA. Nekazaritzako egituren eragina hobetzea
- 3. artikulua. Xedea .
- 4. artikulua. Onurak.
- 5. artikulua. Onuradunak .
III. TITULUA. Ureztaketalurren gaineko ekimenak
- 6. artikulua. Ureztatzeetan inbertsioak egiteko laguntzak .
- 7. artikulua. Onurak .
- 8. artikulua. Onuradunak .
IV. TITULUA. Herriondasunen babesa
- 9. artikulua. Kontzeptua.
- 10. artikulua. Onurak.
- 11. artikulua. Onuradunak.
V. TITULUA. Hondamenezko kalteak
- 12. artikulua. Kontzeptua .
- 13. artikulua. Mozkinak .
- 14. artikulua. Onuradunak.
VI. TITULUA. Nekazaritza eta Abeltzaintzako asegurusarietarako laguntzak
I. KAPITULUA. Xedapen orokorrak
- 15. artikulua. Xedea.
- 16. artikulua. Laguntzamotak.
- 17. artikulua. Bateraezintasuna.
II. KAPITULUA. Nafarroan aplikatzekoa den unean uneko nekazaritzako aseguru konbinatuen planaren barrenean hitzartutako aseguruen kostuaren ordainketa
- 18. artikulua. Helburua .
- 19. artikulua. Asegurulerroak onetsi eta argitaratzea .
- 20. artikulua. Laguntzak emateko prozedura .
- 21. artikulua. Dirulaguntzaren zenbatekoa .
III. KAPITULUA. Nafarroan aplikatzekoa den nekazaritzako aseguru konbinatuen planaren barrenean sarturik ez dauden laboreen eta abeltzaintzako ekoizpenen arriskuak aseguratzeko, entitate pribatuekin hitzartutako aseguruen kostua ordaintzea
- 22. artikulua. Helburua.
- 23. artikulua. Asegurulerroak onetsi eta argitaratzea .
- 24. artikulua. Laguntzak eskatzeko prozedura.
- 25. artikulua. Dirulaguntzaren kopurua.
VII. TITULUA. Guztientzako xedapenak
- 26. artikulua. Onurak emateko prozedura.
- 27. artikulua. Kontzesiorako ebazpen administratiboa.
- 28. artikulua. Onuradunen betebeharrak .
- XEDAPEN IRAGANKORRAK
- Lehenbizikoa
- Bigarrena
- Hirugarrena
- XEDAPEN INDARGABETZAILEA
- AZKEN XEDAPENAK
- Lehenbizikoa
- Bigarrena
- Hirugarrena
- Laugarrena
1998ko ekitaldirako Nafarroako Aurrekontu Orokorrei buruzko abenduaren 30eko 21/1997 Foru Legeko hogeitamalaugarren xedapen gehigarrian, Nafarroako Gobernuari baimena ematen zaio prestatu eta onets dezan Nekazaritzako Finantzaketaz gaur egun indarrean dauden xedapenen testu bategina, beti ere, Nafarroako Foru Eraentza Berrezarri eta Hobetzeari buruzko Lege Organikoaren 21. artikuluan xedatutakoaren babesean eta Legegintzako Foru Dekretuaren bidez.
Horren ondorioz, aipatu baimenak eragina izan dezan Testu Bategin hau prestatu da, bere baitan bildurik gaur egun nekazaritzako finantzaketan manatzen duten lege mailako arau iraunkor eta orokorrak, Foru Komunitateak onetsitako zenbait testu araugiletan sakabanaturik zeudenak.
Horiek denak horrela, Nekazaritza, Abeltzaintza eta Elikadura kontseilariak proposaturik eta Nafarroako Gobernuak mila bederatziehun eta laurogeita hemezortziko otsailaren hamaseian egindako bilkuran hartutako erabakiarekin bat,
DEKRETATU DUT:
Nekazaritzako Finantzaketari buruzko lege mailako xedapenen Testu Bategina onesten da, horrela betetzen delarik 1998ko ekitaldirako Nafarroako Aurrekontu Orokorrei buruzko abenduaren 30eko 21/1997 Foru Legeko hogeitamalaugarren xedapen gehigarria, honen eranskin gisa datorrena.
Legegintzako Foru Dekretu hau Nafarroako Parlamentuari igorriko zaio, haren Erregelamenduko 158. artikulua betetzeko.
NEKAZARITZAKO FINANTZAKETARI BURUZKO LEGE MAILAKO XEDAPENEN TESTU BATEGINA. I. TITULUA
NEKAZARITZAKO FINANTZAKETARI BURUZKO LEGE MAILAKO XEDAPENEN TESTU BATEGINA
Xedea eta edukia
Nafarroako Gobernuak, Legegintzako Foru Dekretu honetan ezartzen diren laguntzen bitartez:
a) Nafarroako nekazaritza eta abeltzaintzako egituren garapena eta ekoizpeneko baliabideen hobekuntza sustatuko ditu, egitura aldetik edo une jakinetan aipatu helburuak lortzeko beharrezkotzat jotzen diren inbertsioak, ekoizpen-ondasun oinarrizkoetan egiten direnak, finantzatuz.
b) Asegurupean sar daitezkeen nekazaritzako ekoizpen eta arriskuen aseguru egitea bultzatuko du.
c) Asegurupean sartzen ez diren nekazaritzako ondasunetan gertatzen diren galerak arinduko ditu.
1. Aurreko artikuluan aipatzen diren helburuen esparruan, Legegintzako Foru Dekretu honetan aipatzen diren Nafarroako Gobernuaren ekimenek honako xede hauek izanen dituzten jomugan:
a) Nekazaritzako egituren eragina hobetzea.
b) Ureztaketa-lur berrietarako eta lehendik daudenak hobetzeko inbertsioak.
c) Herri-ondasunak babestu eta hobetzea, horretarako larreak sortu, herrilurrak mugatu, eskuratu, menpekotzak kendu, eskriturak egin eta Jabetzaren Erregistroan sartzeko bidea emanen duelarik.
d) Laboreek eta abereek jasandako hondamenezko kalteez arduratzea.
e) Nekazaritzako ondasunen gaineko aseguruak kontratatzeko kostuan esku hartzea.
2. Aurreko zenbakian aipatu xedeetara zuzendutako jarduerak finantzatzeko, Nafarroako Foru Komunitateko Administrazioak, Legegintzako Foru Dekretu honetan ezarritako baldintzetan, honako onura hauek ematen ahalko ditu:
a) Dirulaguntzak.
b) Maileguak, Nafarroako Aurrekontu Orokorren kargura edo finantza-entitateekin sinatutako lankidetza hitzarmenenera.
c) Finantza entitateek emandako mailegu edo kredituak bermatzeko abalak.
II. TITULUA. Nekazaritzako egituren eragina hobetzea
Nekazaritzako egituren eraginkortasuna hobetzeko xedea duten laguntza hauek titulu honetan sarturik daudela ulertuko da:
1. Kontseiluaren irailaren 20ko 1698/2005 Erregelamenduari jarraikiz landa garapenerako ezarritako laguntzak. Erregelamendu hori nekazaritza aldeen garapenerako Nekazaritzaren Europako Funtsaren bidezko landa garapeneko laguntzei buruzkoa da.
2. Nafarroako aurrekontu orokorren kargura finantzaturiko estatuko laguntzak, horien xedea baldin bada nekazaritzako egituren eraginkortasuna hobetzea.
1. Nafarroako Foru Komunitateko administrazioak kasuan kasuko oinarriekin ezarritako onurak kapital dirulaguntza izaerakoak izan ahalko dira, horien baliokidea interes hobaritan edo bien arteko nahasketa bat, aplikatzekoak diren Europako xedapenetan jasotako gehieneko mugen barrenean .
2. Ondoriozko mailegu edo kredituei, hobaria aplikatutakoan, gutxienez ere 100eko 1,5eko korritu tasa ezarriko zaie. Gehienez ere, mailegu edo kredituen korrituen ehuneko 8 finantzatuko da. Maileguek gehienez ere hamabost urteko epea izanen dute .
Aplikatzekoak diren Europako xedapenetan eta laguntzak arautzen dituzten oinarrietan ezarritako baldintzak betetzen dituzten pertsona fisiko eta juridikoak izan ahalko dira onuradunak.
III. TITULUA. Ureztaketa-lurren gaineko ekimenak
6. artikulua. Ureztatzeetan inbertsioak egiteko laguntzak .
Ureztalur bihurtzeko edo ureztalurrak hobetzeko inbertsioetarako laguntzak Nekazaritzako Azpiegiturei buruzko martxoaren 7ko 1/2002 Foru Legean, hori garatzeko arauetan eta kasuan kasuko oinarrietan ezarritakoak zuzenduko ditu, aplikatzekoak diren Europako xedapenetan ezarritako gehieneko mugen barrenean.
1. Aurreko artikuluan aipatzen diren inbertsioetarako, Nafarroako Foru Komunitateko Administrazioak haien kostuaren ehuneko berrogeita bosteko dirulaguntza ematen ahalko du, 75/268/EEK Zuzentarauko 2. eta 3. artikuluetan aipatzen diren eskualdeen kasuan, eta kostuaren ehuneko hogeita hamabosta gainerako kasuetan.
2. Dena dela, aurreko idazatian ezarritako dirulaguntzak mugatuko dituzte Nekazaritza, Abeltzaintza eta Elikadura Departamentuaren inbertsio babesgarri gehienekoaren moduluek.
3. Onura hauekin batera beste administrazio publiko batzuetatik lortzen den gainerako edozein jaso daiteke, baina horrelakoetan Nafarroako Foru Komunitateko Administrazioaren finantzaketa soil-soilik aplikatuko da beste administrazioak finantzatzen ez duen zatiaren gainean.
Aurreko artikuluan ezartzen den finantzaketaren onuradun izaten ahalko dira nekazariak edo nekazaritzako ustiategien titularren batasunak, titular direla edo lurrak badituztela behar bezala egiaztatzen dutenak, baldin eta laguntzaren xedea den lur-azalera sartzen bada Legegintzako Foru Dekretu honetako 6.2 artikuluan ezartzen diren mugen barrenean eta finantzaketa eskatzen badute, bai bakarka, bai ureztatzaile-elkarteren baten bidez edo helburu honetarako sustatzen den bestelako elkarketa-modu legezkoren baten bitartez.
IV. TITULUA. Herri-ondasunen babesa
Titulu honen barrenean sartzen dira:
1. Honako xede hauetarako egiten diren inbertsio eta gastuak: herrilurrak eskuratu, mugatu eta mugarritzea, menpekotzak, bazkatokiak edo jabariaren bestelako muga batzuk kentzea, bai eta ondasun horien eskriturak egin eta Jabetzaren Erregistroan sartzea.
2. Larreak sortu eta hobetzeko asmoz egiten diren inbertsio eta gastuak .
Aurreko artikuluan aipatzen diren jardueretarako honako onura hauek ematen ahalko dira:
1. Herri-ondasunak mugatzeagatik sortzen den gastuaren ehuneko 100eko dirulaguntza.
2. Zortasunak eta bazkalekuak berrerosteak eta herrilurretako ondasunak eta partikularren ondasunak kargatzen dituzten beste karga batzuek ekarritako gastuen %20 eta %40 arteko diru-laguntza .
3. Ehuneko 20tik 40ra bitarteko dirulaguntza, herrilur berriak eskuratzeko, eta korrituen 4tik 8 puntura bitarteko laguntza, gastuen gainerakoa finantzatzeko lortzen diren maileguen gainean. Mailegu horiek amortizatzeko epea 12tik 20 urtera bitartekoa izanen da. Laguntza hauek jasotzeko eskubidea izateko, Nafarroako udalek edo kontzejuek Nafarroako Gobernuari eskatu eta lortu beharko dute kasuan kasuko ondasunak eskuratzea interes publikokoa dela deklaratzea.
4. Ehuneko 12tik 25era bitarteko dirulaguntza, herri-ondasunak eskrituratu eta Jabetzaren Erregistroan sartzeagatik sortu gastuen gainean.
5. Korriturik eragiten ez duten maileguak, Nafarroako Aurrekontu Orokorren kargura, herri-larreak sortzeko egiten diren inbertsioetarako, inbertsioaren pareko diru-kopurua hartzen dutenak, amortizatzeko epea 12tik 20 urtera bitartekoa delarik .
Aurreko artikuluan aipatzen diren onurak bakar-bakarrik ematen ahalko zaizkie Nafarroako udal, kontzeju eta gainerako administrazio-entitateei.
V. TITULUA. Hondamenezko kalteak
1. Titulu honetan aipatzen diren onurak jasotzen ahalko dira nekazaritzako edo abeltzaintzako ondasunetan izandako galerengatik, baldin eta arriskuak ez badaude sartuta Nafarroan aplikatzekoak diren Nekazaritzako Aseguruen planetan, eta Nafarroako Gobernuak berariaz deklaratzen badu arrisku horiek babesgarriak direla legegintzako foru dekretu honen ondorioetarako.
2. Kalte horiei aurre egiteko ezarritako laguntza-araubideen onuradunentzat Nafarroako Foru Komunitateko Administrazioak egiten dituen ekarpenak zuzenean emanen dira, azaroaren 9ko 11/2005 Foru Legearen 17.2.b) artikuluan ezarritakoari jarraikiz, non arautzen baita dirulaguntzak emateko prozedura.
Aurreko artikuluan aipatzen diren galerak konpentsatzeko laguntzak zuzeneko laguntza gisa edo interes puntuentzako dirulaguntzarekin eman ahalko dira; bigarren kasuan, onuradunak ordaindu beharreko interes tasa ez da 100eko 1,5 baino txikiagoa izanen, eta ez dira gaindituko aplikatzekoak diren Europako xedapenetan ezarritako gehieneko mugak.
Titulu honetan aipatzen diren onurak eskuratzen ahalko ditu edozein nekazari, abeltzain edo landa-finken jabek, baldin eta kaltetutako ondasunak Nafarroan badaude.
Nekazari edo abeltzainek zer nahiago duten hautatzen ahalko dute, 13. artikuluan ezarritako laguntza edo haren balio bereko dirulaguntza zuzena .
VI. TITULUA. Nekazaritza eta Abeltzaintzako aseguru-sarietarako laguntzak
I. KAPITULUA. Xedapen orokorrak
Nafarroako Foru Komunitateko Administrazioak, Legegintzako Foru Dekretu honetan oinarriturik, laguntzak ematen ahalko dizkie Nafarroako Foru Komunitateko lurraldean kokatutako nekazaritzako ondasunen gainean aseguruak hitzartzen dituzten nekazari eta abeltzainei.
Titulu honetan ezarritako laguntzak mota hauetakoak izan daitezke:
a) Nafarroan aplikatzekoa den unean uneko nekazaritzako aseguru konbinatuen planaren barrenean hitzartutako aseguruen kostua ordaintzea.
b) Laboreen, abeltzaintzako ekoizpenen eta berotegietako egitura nahiz instalazioen arriskuak aseguratzen dituzten entitate pribatuekin hitzartutako aseguruen kostua ordaintzea, baldin eta aseguru horiek ez badaude sarturik Nafarroan aplikatzekoa den nekazaritzako aseguru konbinatuen planaren barrenean.
17. artikulua. Bateraezintasuna.
Aurreko artikuluko a) eta b) letretan aipatzen diren laguntzak emanen dira mota bakoitzerako dagokien kapituluetan zehazten den moduan, eta bata bestearekin bateraezinak izanen dira labore edo abeltzaintzako ekoizpen bererako.
II. KAPITULUA. Nafarroan aplikatzekoa den unean uneko nekazaritzako aseguru konbinatuen planaren barrenean hitzartutako aseguruen kostuaren ordainketa
Harako 16. artikuluko a) letran ezarritako laguntzak aplikatuko zaizkie nekazaritzako aseguru konbinatuen urteko planaren barrenean sartzen diren aseguru-lerroei, Nafarroako Gobernuak erabakitzen duen haiei, horretarako irizpide hau erabiliko duelarik: dirulaguntzak emanen dira aseguru-lerro berri edo lehendik errotuetarako, uste bada edo, bestela, egiaztatzen bada, sarrera txikia izan dutela aseguruaren kostua garestia delako.
19. artikulua. Asegurulerroak onetsi eta argitaratzea .
Aurreko 18. artikulu horretan ezarritakoa betetzeko, Nafarroako Gobernuak urtero onetsi eta argitaratuko ditu 16. artikuluko a) letran ezarritako laguntzak jasotzen ahal dituzten aseguru-lerroak, nekazaritzako aseguru konbinatuen urteko planean sarturik dagoen aseguru bakoitzaren ezaugarrien berri duen une berean.
20. artikulua. Laguntzak emateko prozedura .
1. Nekazaritzako aseguru konbinatuen urteko planaren barrenean, aurreko artikuluko baldintzak betetzen dituzten aseguru-lerroetan, polizak sinatzen dituen nekazariak edo abeltzainak, edo aseguru-hartzaileak, aseguruaren kostuagatik dagokion dirulaguntza eskatzen ahalko dio Nekazaritza, Abeltzaintza eta Elikadura Departamentuari, horretarako dokumentazio hau aurkeztu beharko duelarik:
a) Laguntza jasotzeko eskabidea, Nekazaritza, Abeltzaintza eta Elikadura Departamentuan ematen den ereduaren arabera betea.
b) Sinatutako polizen zerrenda. Polizak jasotzen dituen kontzeptu guztiak agertu beharko dira zerrenda horretan, aseguratu bakoitzarentzako. Euskarri magnetikoan eman beharko da zerrenda hori, erregelamenduz zehaztuko diren xedapenen arabera.
2. Laguntza jasotzeko eskabidea gehienez ere hogeita hamar eguneko epearen barrenean aurkeztu beharko da, poliza sinatzen den egunetik hasita.
3. Aurkeztutako dokumentazioa ikusirik, eta bidezkotzat jotzen diren egiaztapenak egin ondoren, Nekazaritza, Abeltzaintza eta Elikadura Departamentuak, hala erabakitzen badu, ezarrita dagoen laguntza eman eta onuradunari kontzesioaren ebazpen administratiboa jakinaraziko dio.
4. Nekazariek ordaindu beharreko primen zenbatekoa osatzeko, Nafarroako Foru Komunitateko Administrazioak egiten dituen ekarpenak nekazariei ordainduko zaizkie zuzenean, Diru-laguntzei buruzko azaroaren 17ko 38/2003 Lege Orokorraren 17.2.b) artikuluan ezarritakoari jarraikiz, non diru-laguntzak emateko prozedura finkatzen baita.
Diru-laguntza horiek emateko, beharrezkoa izanen da Nafarroako Aurrekontu Orokorretako kasuan kasuko aurrekontu-aplikazioan kreditu egokia eta behar adinakoa egotea. Dena dela, dagokion aplikazioa handitzen ahalko da onartzen diren betebeharrak berdindu arte .
21. artikulua. Dirulaguntzaren zenbatekoa .
16. artikuluko a) letran aipatzen diren laguntzak gauzatzeko, aseguruaren kostua ordaintzeko dirulaguntza emanen da, Estatuko Nekazaritza Aseguru Konbinatuetarako Entitateak xede bererako emandakoa kontuan hartuz; dirulaguntza bien batuketa ezin izanen da aseguruaren kostuaren 100eko 80tik gorakoa izan.
III. KAPITULUA. Nafarroan aplikatzekoa den nekazaritzako aseguru konbinatuen planaren barrenean sarturik ez dauden laboreen eta abeltzaintzako ekoizpenen arriskuak aseguratzeko, entitate pribatuekin hitzartutako aseguruen kostua ordaintzea
1. Harako 16. artikuluko b) letran ezarritako laguntzak aplikatuko dira, Nafarroan aplikatzekoa den urteko planean ez sartzeagatik nekazaritzako aseguru konbinatuen esparrutik kanpoan dauden aseguru-entitate pribatuekin, nekazaritza edo abeltzaintzako ekoizpenen gainean, dagokion asegurua sinatuz, babesten diren arriskuetarako.
2. Dena dela, aurreko idazatiak aipatzen dituen laguntzak jasotzen ahal dituzten aseguruek babestu beharko dituzte Nekazaritzako Aseguru Konbinatuen Legean eta dagokion Erregelamenduan eta 16. artikuluko b) letran aseguragarritzat hartzen diren arrisku eta ekoizpenak.
23. artikulua. Asegurulerroak onetsi eta argitaratzea .
Aurreko 22. artikulu horretan ezarritakoa betetzeko, Nafarroako Gobernuak urtero onetsi eta argitaratuko ditu 16. artikuluko b) letran ezarritako laguntzak jasotzen ahal dituzten aseguru-lerroak.
24. artikulua. Laguntzak eskatzeko prozedura.
1. Aurreko artikuluko baldintzak betetzen dituzten aseguru-lerroetan, polizak sinatzen dituen nekazariak edo abeltzainak, edo aseguru-hartzaileak, aseguruaren kostuagatik dagokion dirulaguntza eskatzen ahalko dio Nekazaritza, Abeltzaintza eta Elikadura Departamentuari, horretarako dokumentazio hau aurkeztu beharko duelarik:
a) Laguntza jasotzeko eskabidea, Nekazaritza, Abeltzaintza eta Elikadura Departamentuan ematen den ereduaren arabera betea.
b) Sinatutako polizaren fotokopia.
2. Laguntza jasotzeko eskabidea gehienez ere hilabeteko epearen barrenean aurkeztu beharko da, poliza sinatzen den egunetik hasita.
3. Aurkeztutako dokumentazioa ikusirik, Nekazaritza, Abeltzaintza eta Elikadura Departamentuak, hala erabakitzen badu, ezarrita dagoen laguntza eman eta onuradunari kontzesioaren ebazpen administratiboa jakinaraziko dio.
25. artikulua. Dirulaguntzaren kopurua.
1. Harako 16. artikuluko b) letran aipatzen diren laguntzak gauzatzeko, aseguruaren kostua ordaintzeko dirulaguntza emanen da, gehienez ere haren kostuaren 100eko 50erainokoa.
Babestutako aseguru-lerro bakoitzari dagokion dirulaguntza-portzentaia zehaztuko da 23. artikuluan aipatzen den erabakian.
2. Nafarroako Gobernuak finkatzen ahalko ditu dirulaguntzaren gehienekoak aseguratu bakoitzeko .
VII. TITULUA. Guztientzako xedapenak
26. artikulua. Onurak emateko prozedura.
1. Legegintzako Foru Dekretu honek aipatzen dituen onuretarako eskabideak Nafarroako Gobernuko Nekazaritza, Abeltzaintza eta Elikadura Departamentura zuzendu behar dira.
2. Eskatzaileek eskabidea aurkezten duten unean egiaztatu beharko dute honako baldintza hauek betetzen dituztela:
a) Bizilekua Nafarroan dutela.
b) Inbertsioak direnean, Nafarroako Foru Komunitateko lurraldean dauden ondasunetan egin direla .
3. Inbertsioak direnean, eskabidea eta gero, memoria tekniko-ekonomikoa idatziko da, bertan azaltzeko inbertsioa egin aurreko egoera, egin gogo den inbertsioa edo hobekuntza bera eta aurreikusitako azken egoera, bai eta inbertsioaren finantza-planteamendua ere.
4. Onuraduna izan daitekeenari eskatzen zaionean aurkezteko azterlanak, txostenak edo proiektuak, ez doakoak, laguntza eskabiderako osagarri direnak, haien kostuak sartuko dira, ondorio guztietarako, lagungarria den inbertsioaren zati bezala.
27. artikulua. Kontzesiorako ebazpen administratiboa.
1. Legegintzako Foru Dekretu honetan ezarritako onurak, erregelamendu bidez erabakitzen den Nafarroako Foru Komunitateko Administrazioaren organoaren eskutik jasoko dira.
2. Kontzesiorako ebazpen administratiboan zehaztuko da noiz eta nola ordainduko diren onurak.
3. Onuradunek betetzen ez badituzte kontzesiorako ebazpen administratiboan onurak jasotzeko ezarritako baldintzak, Nafarroako Foru Komunitateko Administrazioak baliogabetu edo murriztu ditzake emandako onurak bai eta, hala egokitzen bada, jasotako dirukopuruak Nafarroako Foru Ogasunari itzularazi ere.
28. artikulua. Onuradunen betebeharrak .
Onuradunek betebehar hauek izanen dituzte: aplikatzekoak diren Europako xedapenetan, Dirulaguntzei buruzko azaroaren 9ko 11/2005 Foru Legean eta laguntzak arautzen dituzten oinarrietan ezarritakoak.
1998ko aurrekontu-ekitaldirako, indarrik gabe uzten dira lurzatiak berrantolatzeko prozesuen ondorioz aldaketak jasan dituzten laborantza-lurrak berrosatzeko inbertsioetarako laguntzak.
Indarrik gabe gelditzen da, 1998ko aurrekontua gauzatzeko, Legegintzako Foru Dekretu honetako 14. artikuluko bigarren lerroaldea.
Indarrik gabe uzten da, 1998ko aurrekontua gauzatzeko, Legegintzako Foru Dekretu honetako 26. artikuluko 2. puntuko a) letran xedatutakoa.
Indarrik gabe gelditzen dira Legegintzako Foru Dekretu honetan ezarritakoaren aurka jotzen duten xedapen guztiak, eta bereziki honako hauek:
-Nafarroako Foru Parlamentuaren 1982ko martxoaren 30eko Araua, nekazaritza eta abeltzaintzako aseguru-sarietarako laguntzak arautzen dituena.
-133/1991 Foru Dekretu Legegilea, apirilaren 4koa, Nekazal Finantzaketari buruzko lege lerruneko xedapenen Testu Birbildua onesten duena.
-2/1992 Foru Legea, martxoaren 16koa, apirilaren 4ko 133/1991 Foru Dekretu Legegilearen II. eta III. Tituluak aldatzen dituena.
-18/1992 Foru Legea, abenduaren 28koa, apirilaren 4ko 133/1991 Foru Dekretu Legegilearen 14. artikuluari bigarren lerroaldea gehitzen diona.
-Nafarroako 1994ko Aurrekontu Orokorrei buruzko abenduaren 30eko 13/1993 Foru Legeko hamahirugarren xedapen gehigarria.
-6/1994 Foru Legea, maiatzaren 31koa, apirilaren 4ko 133/1991 Foru Dekretu Legegilearen II. Tituluko 4. artikuluaren bigarren idazatia aldatzen duena.
-19/1994 Foru Legea, abenduaren 9koa, apirilaren 4ko 133/1991 Foru Dekretu Legegilearen III. Titulua aldatzen duena.
-1998ko ekitaldirako Nafarroako Aurrekontu Orokorrei buruzko abenduaren 30eko 21/1997 Foru Legeko hogeita batgarren, hogeita bigarren, hogeita hirugarren, hogeita laugarren eta hogeita bosgarren xedapen gehigarriak.
Nafarroako Gobernuari ahalmena ematen zaio Legegintzako Foru Dekretu hau betearazi eta garatzeko behar diren xedapen guztiak dikta ditzan.
Nafarroako Gobernuari ahalmena ematen zaio, laguntzen onuradunek gutxienez ordaindu beharko duten korrituaren tasa aldatu ahal izan dezan, diruaren prezioaren bilakaeraren arabera.
Legegintzako Foru Dekretu honetan ezarritako laguntzak emateko, kontuan hartu beharko dira aurrekontuetako baliabideak, eta, beraz, eskabideen onarpena eteten ahalko da aurrekontuetako kontsignazioa aski ez denean edo lotua balego bezala dagoenean.
Legegintzako Foru Dekretu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, mila bederatziehun eta laurogeita hemezortziko otsailaren hamaseian.-Nafarroako Gobernuko Lehendakaria, Miguel Sanz Sesma.-Nekazaritza, Abeltzaintza eta Elikadura kontseilaria, Ignacio Javier Martínez Alfaro.
Iragarkiaren kodea: A9801609
