LEXNAVARRA
11/2026 FORU LEGEA, UZTAILAREN 2KOA, LOGELA-ERRENTAMENDUA ARAUTZEKOA
BON N.º 135 - 13/07/2026
I. TITULUA. XEDAPEN OROKORRAK
- 1. artikulua. Aplikazioeremua.
- 2. artikulua. Xedea.
- 3. artikulua. Nafarroako Etxebizitza Errentamenduko Kontratuen Erregistroa.
II. TITULUA. OHIKO ETXEBIZITZATARAKO LOGELAERRENTAMENDUA
- 4. artikulua. Kontzeptua.
- 5. artikulua. Iraupena.
- 6. artikulua. Errenta.
- 7. artikulua. Elkarlaguntzaerkidegoak.
- 8. artikulua. Arauen izaera.
III. TITULUA. DENBORALDIRAKO LOGELAERRENTAMENDUA
- 9. artikulua. Kontzeptua.
- 10. artikulua. Araubide juridikoa.
IV. TITULUA. OSTATATZEKONTRATUA
- 11. artikulua. Kontzeptua.
- 12. artikulua. Araubide juridikoa.
- Lehenengo Xedapen Gehigarria. Aldatzea Nafarroan Etxebizitza Izateko Eskubideari buruzko maiatzaren 10eko 10/2010 Foru Legea.
- Bigarren xedapen gehigarria. Denboraldirako etxebizitzaz bestelako erabilerarako errentamendukontratuak.
- Azken xedapenetako lehenengoa. Erregelamenduzko garapena egiteko gaikuntza.
- Azken xedapenetako bigarrena. Indarra hartzea.
Nafarroak eskumen esklusiboa du etxebizitza-alorrean, Foru Hobetzearen 44.1 artikuluak ezartzen duenez. Halaber, eskumen horrek Foru Komunitateari ahalmena ematen dio politika horrekin lotura duten figura zibilak arautu eta ezartzeko, Konstituzio Auzitegiak jadanik ezarri zuenez.
Bestalde, Nafarroako Foru Komunitateak eskumen esklusibo historikoa du zuzenbide zibil foralaren arloan eta, beraz, hura mantendu, aldatu eta garatzekoa, baita zuzenbide substantibo horretatik eratorritako prozesu-arauak tankeratzekoa ere, hala xedaturik dagoenez Espainiako Konstituzioaren lehen xedapen gehigarrian eta 149.1.6 eta 149.1.8 artikuluetan, bai eta Nafarroako Foru Eraentza Berrezarri eta Hobetzeari buruzko Lege Organikoaren 48.1 eta 48.2 artikuluetan ere.
Martxoaren 1eko 1/1973 Legearen bitartez onetsi zen Nafarroako Zuzenbide Zibil Foralaren Konpilazioa. Testu hori, bertako zioen azalpenaren arabera, bere onespen-garaian indarrean zegoen zuzenbide zibilaren irudi leiala izan zen, Nafarroako zuzenbidearen jarraipen historiko gisakoa, eta ez berezitasun juridiko gutxi batzuen bilduma gisakoa.
Gauzen errentamendua jasota zegoen jadanik lege horretan, ondasunei buruzkoa zen III. liburuko XV. tituluan ("Gauzen errentamendua"), 588. legetik 596. legera bitartean.
Gaur egun, gauzen errentamendua IV. liburuko ("Betebeharrak, estipulazioak eta kontratuak") III. tituluaren ("Kontratuak") VIII. kapituluan ("Gauzen errentamendua") arautzen da; zehazki, 587. legetik 596. legera bitartean, zeinak idatzi baitziren Nafarroako Zuzenbide Zibilaren Konpilazioa edo Foru Berria aldatu eta gaurkotzeko apirilaren 4ko 21/2019 Foru Legeak indarra hartu ondoren.
Nafarroan kokaturik dagoen etxebizitza bateko gela baten errentamendua Hiri Errentamenduen Legearen aplikaziotik salbuetsita dago, eta, ondorioz, Foru Berriko 2, 6 eta 7. legeei jarraikiz, haren araubidea dira alderdiek berariaz itundu dutena -muga bakarra izanik ituna moralaren edo ordena publikoaren aurkakoa izatea, hirugarren batentzat kaltegarri izatea edo Konpilazioko deuseztasun-zigordun debeku-arau batekin kontraesanean egotea-, ohitura, Foru Konpilazioko legeak, Nafarroako lege zibilak -halakorik balego- eta Nafarroako zuzenbidearen printzipio orokorrak; hori guztia, Kode Zibila izanik ordezko moduan aplikatu beharrekoa.
Gaur den egunean, etxebizitza duin baterako eskubide konstituzionala bermatzeko, zeina Konstituzioaren 47. artikuluan baitago jasota, funtsezko gertatzen da araugintzaz bereizketa egitea eta logela-kontratuko maizterra babestea, kontratu horren xedea denean maizterrak duen etxebizitza-premia iraunkorra asetzea, halako moldez non bereizi eginen baita xede nagusia aldi baterako premia bat asetzea den beste kasuetatik. Babes horren paradigma osatzen du kontratuaren gutxieneko iraupenaren, epeen eta luzapenen arauketak, indarreko Hiri Errentamenduen Legean ezartzen den modu berberekoa. Azken arau hori jasota dago Nafarroan etxebizitza-errentamendurako, Foru Berriaren 587. legeak gaur egun ezartzen duenaren bidetik. Hori horrela, ez dago inolako oztoporik babes-araubide horri berari maizterraren etxebizitza-premia iraunkorrari erantzuteko logela-errentamenduan abegi egiteko.
Foru-legearen I. tituluan xedapen orokorrak ezartzen dira: horietan adierazten da ezen araua Nafarroan kokatuta dauden etxebizitzen errentamendu eta erabilerarako kontratuei aplikatuko zaiela, horrenbestez araubidea ezartzeari heldurik maizterraren etxebizitza-premia iraunkorrari erantzuteko logela-errentamenduarentzat, denboraldi baterako logela-errentamenduarentzat eta ostatatze-kontratuarentzat, eta halaber ezarririk horiek Nafarroako Etxebizitza Errentamendu Kontratuen Erregistroan nahitaez inskribatzeko betebeharra.
II. tituluak ohiko etxebizitzarako logela-errentamendua arautzen du. Halakotzat jotzen da etxebizitza bateko gela bizigarri baten gaineko errentamendua, etxebizitzako beste gela batzuk errentatzailearekin edo beste maizter batzuekin batera partekatuz erabiltzeko eskubidearekin baterakoa nahiz halakorik gabekoa, eta erabilera nagusitzat izanen duena maizterraren etxebizitza-premia iraunkor edo ohikoa asetzea, iraunkortasunez nahiz aldi baterako.
Baita ere, logela-errentamendutzat jotzen dira maizterraren ohiko etxebizitza baterako premiari erantzuten dioten aldi baterako errentamenduak. Araudiaren aplikaziopera ekartzen dira, halaber, trastelekuak, garaje-tokiak, altzariak eta errentatzaile berak finkaren osagarri gisa errentan emandako beste edozein toki atxiki edo gune edo lagatako beste edozein zerbitzu. Gainera, logela-errentamenduko kontratuetaraino hedatzen da Nafarroan indarrean dagoen legediak etxebizitza-errentamenduentzat jadanik ezarritako informazio-betebeharra. Logela-errentamenduko kontratuari etxebizitza-errentamenduko kontratuaren babes-araubidea aplikatzen zaio honakoei dagokienez: kontratuaren iraupena, errenta, gutxieneko epea, luzapena, atzera-egitea, maizterraren ezkontza edo elkarbizitza, suntsiarazpena, besterentzea, haren banantze, dibortzio edo ezkon-deuseztasunaren efektuak, maizterraren heriotza, gastu orokorrak, zerbitzu indibidualak, logela kokatzen den etxebizitzaren kontserbazioa, hobetze-obrak eta fidantza.
Aldi baterako kontratuetan ezartzen da ezen iraupena alderdiek askatasunez itundurikoa izanen dela, eta kontratuan adierazitako aldibaterakotasun-kausak zehaztutakoa, ezin izanen delarik urtebete baino gehiagokoa izan. Xedatzen da ezen, denbora-muga hori baino gehiagokoa izanez gero, ulertuko dela maizterraren ohiko etxebizitza iraunkorrerako adostu dela kontratua betiere. Horrez gain, aldi baterako kontratuen luzatze-araubidea ezartzen da.
Ildo horretan, iraunkorra nahiz aldi baterakoa den logela-errentamenduko kontratu horietaraino eramaten dira etxebizitza-alorrean ezarritako babes-araubidea eta etxebizitza-errentamenduei buruzko xedapenetatik fidantzari, errenta-zehaztapen, -mugatze eta -eguneratzeari, hobekuntzen ondoriozko igoerari, gastu orokorren zama hartzeari eta zerbitzu indibidualei dagozkien haiek. Horrez gain, tentsiopeko etxebizitza-merkatuaren zonatzat deklaratuak izan direnetan aplikatzekoa den gehienezko errentaren mugapena ezartzen da, eta azalera erabilgarriaren arabera errenta banatzeko arauak zehazten dira. Araubidea halaber osaturik dago okerreko kopuruak erreklamatzeko aukerari buruzko xedapenekin, bai eta errentarik ez ordaintzeagatiko utzarazpen-kasuan horiek konpentsatzeari eta akzioaren preskripzioari (5 urte) buruzkoekin ere.
Azkenik, kasu horietarako arautzen dira elkarlaguntza-erkidegoak. Erkidego horiek Foru Berriaren 117tik 119ra bitarteko legeetan jasotzen dira, eta etxebizitza bererako elkarbizitza-itunak aurreikusten dituzte, diruzko kontraprestaziorik gabekoak, xedetzat dutenak bizikideek elkarri laguntza ematea, gastu amankomunak eta etxeko zereginak partekaturik. Itunetan jaso ahalko dira haien arteko harreman- nahiz sorospen-harremanak, elkarbizitzak iraun bitartean ezartzen dituzten eskubide eta betebeharrak, edo bizikide bakoitzak gastu amankomunetara eta etxeko zereginetara egin beharreko ekarpen berdina nahiz desberdina.
Titulua amaitzen da xedatuz ezen deusezak direla foru-lege honetan araututakoarekin kontraesanean egonik maizterrarentzat kaltegarriak diren klausulak.
Bestetik, III. tituluak arautzen eta definitzen du denboraldi baterako eginiko logela-errentamendua, zeina izanen baita huts-hutsean xedetzat izanen duena foru-lege honetako aurreko ataletan deskribatzen direnez bestelakoa den etxebizitza-premia bat asetzea. Esaten du ezen, betiere, denboraldi baterakotzat joko dela opor, turismo, zeregin ludiko nahiz jostetarakoa den logela-errentamendua. Mota horretako errentamenduak, ukazioz definituak, arautuko dira itundutakoaren, tokiko usadio eta ohituren eta, ordezko moduan, eta Nafarroan jasotako lege bereziekin kontraesanean ez dauden heinean, Nafarroako Zuzenbide Zibil Foralaren Konpilazioko xedapenen bitartez, ostatatze-kontratuak bezala, zeinak arau honen IV. tituluan definituta baitaude.
Araubidea bi xedapen gehigarrirekin osotzen da. Horiekin, araudi honek ezartzen duenera doitzen dira Nafarroan Etxebizitza Izateko Eskubideari buruzko maiatzaren 10eko 10/2010 Foru Legeko apartatu eta xedapenak, eta ezartzen da zer baldintza bete behar dituzten denboraldi baterako etxebizitzaz bestelako erabilerarako errentamendu-kontratuek.
Azkenik, azken xedapenetako lehenak etxebizitza-alorrean eskudun den departamentuari ahalmena ematen dio arauaren erregelamenduzko garapena egiteko; eta azken xedapenetako bigarrenak ezartzen du arauak indar hartuko duela Nafarroako Aldizkari Ofizialean argitaratua izan eta biharamunean, salbu eta Etxebizitza Errentamenduko Kontratuen Erregistroa ukitzen duten arauak, zeinek 2027ko urtarrilaren 1ean hartuko baitute indarra.
I. TITULUA. XEDAPEN OROKORRAK
1. artikulua. Aplikazioeremua.
Foru-lege hau aplikatuko zaie Nafarroan kokatuta dauden etxebizitzen errentamendu-kontratuei eta haien erabilera lagatzeko bestelako kontratuei.
Foru-lege honen xedea da araubidea ezartzea maizterrak ohiko etxebizitza baterako duen premia asetzeko logela-errentamenduarentzat, denboraldi baterako logela-errentamenduarentzat eta ostatatzearentzat.
3. artikulua. Nafarroako Etxebizitza Errentamenduko Kontratuen Erregistroa.
Nafarroako Etxebizitza Errentamenduko Kontratuen Erregistroan inskribatu beharrekoak izanen dira logela-kontratuak, dela ohiko etxebizitzarako dela denboraldi baterako eginikoak, bai eta ostatatze-kontratuak ere, etxebizitza-alorreko foru-araudian ezarritako zertzeladen arabera.
II. TITULUA. OHIKO ETXEBIZITZATARAKO LOGELA-ERRENTAMENDUA
1. Ohiko etxebizitzatarako logela-errentamendutzat jotzen da harako hura zeinetan pertsona batek etxebizitza bateko gela bizigarri baten erabilera lagatzen baitu, beste gela batzuk errentatzailearekin edo beste maizter batzuekin batera partekatuz erabiltzeko eskubidearekin batera nahiz halakorik gabe, xede delarik maizterrak duen ohiko etxebizitzarako premia asetzea, modu iraunkorrean nahiz aldi baterako.
Azken kasu horretan, aldi baterako errentamendutzat jotzen da harako hura zeinak zio gisa baitauzka arrazoi profesionalak, lanekoak, ikasketa- edo prestakuntza- arlokoak, sanitarioak edo medikoak, etxebizitza entregatzen dioten arteko itxaronaldiari dagozkionak, ohiko etxebizitzara itzultzeko itxaronaldiari dagozkionak edo etxebizitza-premiarekin lotura duen antzeko beste edozein zirkunstantzia.
Halaber, errentamendua iraunkorra izatearen presuntzioa aplikatuko da kontratuan ez direnean esanbidez adierazten logela-erabileraren aldibaterakotasunaren zergatia eta helburua.
2. Logela-errentamenduaren eskaintzan eta horretarako kontratuetan nahitaezkoa izanen da maizterrari eskueran ipintzea, eta haietan adieraztea, Nafarroan indarrean dagoen araudiak etxebizitza-errentamenduarentzat eskatzen dituen informazio eta dokumentazio berberak.
Horrez gain, aldi baterakoak diren ohiko etxebizitzarako logela-kontratuetan, esanbidez adieraziko da haien aldibaterakotasunaren eragilea den zio zehatza, kasu bakoitzari dagozkion frogagiriak erantsita, bai eta kontratuan aurreikusten den iraupenarekin horrek duen zerikusia.
3. Foru-lege honek logela-errentamenduari buruz jasotzen dituen arauak halaber aplikatuko zaizkie trastelekuei, garaje-tokiei, altzariei eta beste edozein toki atxiki edo errentan emandako guneri edo finkaren osagarri gisa errentatzaile berak lagatako zerbitzuei.
1. Ohiko etxebizitza iraunkorreko erabilerarako logela-errentamenduari aplikatzekoak izanen zaizkio etxebizitza-errentamenduei buruzko arauak, honako hauei dagokienez: kontratuaren iraupena, errentaren zehaztapena, gutxieneko epea, luzapena, kontratuko atzera-egitea, maizterraren ezkontza- edo elkarbizitza-kasuaren efektuak, suntsiarazpena, etxebizitzaren besterentzea, maizterraren ezkon-banantze, dibortzio edo ezkon-deuseztasun edo heriotza kasuak, gastu orokorrak, zerbitzu indibidualak, logela kokatuta dagoen etxebizitzaren kontserbazioa, hobekuntza-obrak egitea eta fidantza.
2. Aldi baterako logela-kontratuetan, alderdiek libreki adosturikoa izanen da iraupena, eta kontratuan adierazitako aldibaterakotasun-zioaren araberakoa. Ezein kasutan ez da izanen urtebete baino gehiagokoa. Baldin kontratuan adierazitako iraupena urtebete baino gehiagokoa bada, betiere ulertuko da maizterrak ohiko etxebizitza iraunkor baterako duen premia asetzeko sinatu dela.
Baldin eta kontratuan adierazitako iraupena urtebete baino gutxiagokoa bada, eta amaiera iristean bere horretan segitzen badu aldibaterakotasunaren zioak, kontratua nahitaez luzatuko da hilabeteko epeka, harik eta errentamenduak urtebeteko gehieneko iraupena iritsi arte edo zio hori amaitzen den arte, azken hori lehenago gertatuz gero.
3. Aldi baterako logela-errentamenduko kontratuetan, maizterrak zilegi izanen du kontratuan atzera egitea, gutxienez ere hilabete iragan denean sinatu zenetik. Horretarako, errentatzaileari horren berri eman beharko dio hamar eguneko gutxieneko aurredenboraz. Errentatzaileari ez zaio kalte-ordainik eman beharko.
1. Logela-errentamenduari, hala ohiko etxebizitzatarako nola aldi baterako denean, aplikatzekoak izanen zaizkio etxebizitza-errentamendua arautzen duten xedapenak, honako hauei dagokienez: fidantza, errentaren zehaztapen, mugaketa eta eguneratzea, hobekuntzen ondoriozko errenta-igoera, bai eta gastu orokorren eta zerbitzu indibidualen jasanarazpena ere, hiri-errentamenduen alorreko araudi indardunaren arabera.
2. Tentsiopeko etxebizitza-merkatuaren zona deklaratuak izan direnetan kokatuta dauden etxebizitzen kasuan, etxebizitza berean eta aldi berean indarrean dauden logela-errentamenduko zenbait kontratutan itunduriko errenten batura ezin izanen da handiagoa izan etxebizitza osoaren errentamenduari aplikatzekoa zaion gehieneko errenta baino.
3. Tentsiopeko etxebizitza-merkatuaren zona deklaratuak izan direnetan dagoen logela bakoitzaren errentamenduari aplika dakiokeen gehieneko errenta zehaztuko da kontratuaren xede den gelak etxebizitzaren guztizko azalera erabilgarriarekiko duen azalera erabilgarriaren proportzioan.
4. Maizterrak zilegi izanen du errentatzaileari erreklamatzea oker ordaindutako kopuruak eta legez sorturiko interesak, bai eta horien konpentsazioa eskatzea ere, edo horien ordainketa alegatzea errentarik ez ordaintzeagatiko etxe-utzarazpeneko prozeduran.
5. Errentatzaileari oker ordaindutako kopuruak erreklamatzeko akzioa bost urtean preskribatuko da.
7. artikulua. Elkarlaguntzaerkidegoak.
Etxebizitza bereko logelen maizterrek zilegi izanen dute beren artean elkarlaguntza-erkidego bat eratzea.
Erkidego hori idatzizko itun bidez formalizatu beharko da, zeinetan arautuko baitira erkideek gastu amankomunetara eta etxeko zereginetara eginen duten ekarpen berdin nahiz desberdina, bai eta, kasua bada, beren arterako adosten dituzten sorospen-prestazioak ere.
Deusezak izanen dira maizterraren kaltetan ezartzen diren edo titulu honetan xedatuarekin kontraesanean dauden estipulazioak, salbu eta indarreko araudiak kontrakoa espresuki baimentzen duenean.
III. TITULUA. DENBORALDIRAKO LOGELA-ERRENTAMENDUA
1. Denboraldirako logela-errentamendutzat jotzen da harako hura, zeinean errentatzaileak etxebizitza baten gela baten erabilera lagatzen baitu, maizterraren bizileku-premia puntual, esporadiko edo iragankor bat, ohiko etxebizitzarakoaz bestelakoa, asetze aldera.
2. Denboraldirako logela-errentamenduak xede bakar izanen du foru-lege honen 4. artikuluaren 1. apartatuaren arabera ohiko etxebizitzarakoak diren premiekin zerikusirik ez duten bizileku-premiak asetzea.
Betiere joko dira denboraldirako logela-errentamendutzat harakoak zeinek helburutzat oporrak, turismoa, zeregin ludikoak edo josteta baitituzte.
10. artikulua. Araubide juridikoa.
Denboraldirako logela-errentamenduak araubide izanen ditu alderdien artean itundutakoa, tokiko usadio eta ohiturak, eta, ordezko moduan, eta Nafarroan aplikatzekoak diren lege bereziekin kontraesanean ez dauden heinean, Nafarroako Zuzenbide Zibil Foralaren Konpilazioko xedapenak.
IV. TITULUA. OSTATATZE-KONTRATUA
Ostatatze-kontratutzat jotzen da harako hura zeinean alderdietako batek etxebizitza baten edo etxebizitza horren gela baten erabilera lagatzen baitu, bizilekuari loturiko zerbitzu-emate gehigarriarekin batera -zerbitzu-emate horretan sartuta dauden gutxieneko zerbitzuak dira garbiketa, hornidurak eta, kasua bada, zaintza- edo gordailutze-zerbitzuak-, prezio zehatz baten truke.
12. artikulua. Araubide juridikoa.
Ostatatzeak araubide izanen ditu alderdiek beren artean itundutakoa, tokiko usadio eta ohiturak, eta, ordezko moduan, Nafarroako Zuzenbide Zibil Foralaren Konpilazioko xedapenak.
Lehenengo Xedapen Gehigarria. Aldatzea Nafarroan Etxebizitza Izateko Eskubideari buruzko maiatzaren 10eko 10/2010 Foru Legea.
Aldaketak edo gehikuntzak egiten dira Nafarroan Etxebizitza Izateko Eskubideari buruzko maiatzaren 10eko 10/2010 Foru Legearen honako artikulu eta xedapen hauetan:
Bat. 40. artikuluko 1. eta 2. apartatuak aldatzen dira, eta hauxe izanen dute testu berria:
"1. Ohiko etxebizitzaren errentamenduetan, denboraldirako errentamenduan eta logela-errentamenduetan, berdin delarik azken horien izaera ohiko etxebizitzarena nahiz denboraldirakoarena izatea, errentatzailea behartuta egonen da hartzaileari kontratuaren formalizazioaren aurretik ematera etxebizitzaren eta/edo logelaren funtsezko baldintzei buruzko behar adinako informazioa, hala fisikoena nola juridikoena, bai eta kontratuaren oinarrizko baldintzei buruzkoa ere.
2. Bereziki, zertzelada hauek aipatu beharko dira gutxieneko informazioan:
a) Etxebizitzaren deskribapena, azalera erabilgarria adierazita; etxebizitzaren zerbitzuena, instalazioena eta hornidurena.
b) Logela-errentamenduko kontratuetan, maizterrak, kasua bada, zer gune amankomunetarako sarbidea izanen duen.
c) Errentaren guztizko prezioa, maizterrak bere gain harturiko beste kopuru batzuk, likidazioaren aldizkakotasuna adierazita, eta etxebizitza-alokairuaren prezioen erreferentzia-indizea.
d) Errentamenduaren epea.
e) Errentamenduaren epean zehar errentaren prezioa eguneratzeko modua.
f) Fidantza, eta maizterrari eskatzen zaizkion beste berme batzuk.
g) Etxebizitzaren eta horren ingurunearen irisgarritasun unibertsalaren maila eta ororentzako diseinuaren maila.
h) Etxebizitzen gain formalizatu diren azken errentamendu-kontratuetan itundutako errenta, bai eta kasu bakoitzean aplikatzekoa gertatzen den Alokairuaren Erreferentzia-prezioen Indizea ere.
i) Denboraldirako etxebizitzaz bestelako erabilerarakoak diren kontratuetan, beharrezkoa izanen da kasuko araudian aurreikusitako informazioa ematea".
Bi. Aldatu egiten da 65. artikuluaren 14. apartatua, eta testu hau izanen du aurrerantzean:
"14. Foru lege honen V. tituluko II. kapituluan etxebizitzak erosi edo errentan emateko aurreikusita dagoen informazioa ez ematea, ez-emate horrek kontratuaren funtsezko baldintzen gaineko nahasmendurik sortzen badu".
Hiru. Aldatu egiten da 90. artikuluaren 1. apartatua, eta testu hau izanen du aurrerantzean:
"1. Nafarroako Etxebizitza Errentamenduko Kontratuen Erregistroa eratzen da, izaeraz administratiboa eta deklaratiboa, eta nolakotasunez elektronikoa. Nafarroako Etxebizitza Erregistroan txertatuta egonen da, eta bertan inskribatu beharko dira Foru Komunitatearen lurraldean kokatuta dauden etxebizitzen errentamenduko kontratu guztiak, berdin delarik haiek ohiko etxebizitzarako errentamendu-kontratuak nahiz denboraldiko errentamendurakoak izatea, edo ohiko nahiz denboraldirako logela-errentamendurakoak, bai eta beste erregistro berariazko batzuetan inskribatu beharrekoa den turismo-jarduerakoak ez diren ostatatze-kontratuak ere".
Lau. Aldatu egiten da 92. artikuluaren 1. apartatua, eta testu hau izanen du aurrerantzean:
"1. Errentatzaileak kasua denean inskripzioa eskatzeko epea hilabetekoa izanen da, kontratu-formalizatzearen datatik edo kontratuaren indarraldi-hasierarenetik zenbatzen hasita, azken hori geroagokoa bada".
Bost. 93 artikulua aldarazi da; artikulu horrek hurrengo idazkera izango du:
"93. artikulua. Inskripzio-idazpena.
1. Inskripzio-idazpenean jasota utziko dira formalizaturiko errentamendu-kontratuen datuak, hala nola:
a) Finkaren kokalekua identifikatzeko datuak: udalerria, katastro-erreferentzia, kalearen izena, finkaren zenbakia, eskailera, solairua eta atea.
b) Etxebizitza-mota: kolektiboa edo familia bakarrekoa.
c) Azalpena, ohartarazten duena ea etxebizitza hori inolako babes publikoren pean dagoen, edo bitartekaritzarako nahiz etxebizitza libreak lagatzeko programa publikoren batean sartuta dagoen; eta baiezkoan, babes publikoaren mota, edo bitartekaritza- nahiz lagapen-programa publikoarena, eta kasuko identifikazio-zenbakia.
d) Errentamendu-mota: ohiko etxebizitzarena, denboraldirakoarena, edo ohiko nahiz denboraldirako logelena.
e) Kontratugileen identifikazioa: izena eta abizenak edo sozietate-izena, helbidea, identifikazio fiskaleko zenbakia, nortasun-agiriaren zenbakia edo, kasua bada, atzerritarraren identifikazio-zenbakia edo pasaporte-zenbakia.
f) Kontratu-formalizazioaren eguna.
g) Kontratu-indarraldiaren eguna.
h) Adosturiko errenta.
i) Inskripzio-eguna.
j) Kontrol-zenbakia.
k) Fidantzaren zenbatekoa.
l) Denboraldirako etxebizitzaz bestelako erabilerarakoak diren kontratuetan, beharrezkoa izanen da kasuko araudian eskaturiko informazioa jasotzea.
m) Beharrezkotzat jotzen den beste edozein.
2. Administrazio eskudunak zilegi izanen du errentamendu-kontratuaren kopia bat aurkez dadin eskatzea, inskripzio-idazpena egiteari begira".
Bigarren xedapen gehigarria. Denboraldirako etxebizitzaz bestelako erabilerarako errentamendukontratuak.
1. Denboraldirako etxebizitzaz bestelako erabilerarako errentamendu-kontratuak, Hiri-errentamenduei buruzko azaroaren 24ko 29/1994 Legearen 3. artikuluaren 2. apartatuaren babesean eginikoak, behartuta egonen dira honako betekizun hauek betetzera:
a) Esanbidez adieraztera ezen etxebizitza bideratuko dela denboraldirako etxebizitzaz bestelakoa den erabileragatiko errentamendura.
b) Kontratua egitea erakartzen duen zio zehatza adieraztera, eta horren froga ematera. Ondorio horietarako, honako hauetako bat izan ahalko da:
1. Lan-arrazoiak: beharrezkoa izanen da kontratugile den enpresaren identifikazioa, lan-jarduera eginen den lantegiaren helbidea eta lan-kontratuaren iraupena zehaztea. Errentamendu-kontratuari lan-kontratuaren kopia bat atxiki beharko zaio.
2. Prestakuntza-arrazoiak: beharrezkoa izanen da adieraztea zer ikasketa eginen diren, zein ikastetxetan eginen diren eta zer iraupen izanen duten. Errentamendu-kontratuari ikasketa horietan matrikulatu izanaren frogagiria atxiki beharko zaio.
3. Sorospen-arrazoiak: beharrezkoa izanen da sorospen-zerbitzua ematen duen pertsona edo entitatea identifikatzea eta prestazioaren epe estimatua adieraztea.
4. Oporren, zeregin ludikoen edo jostetaren alorreko arrazoiak, maizterraren erantzukizunpeko adierazpen bitartez frogatuak.
c) Maizterraren jadaneko egoitza ohiko eta iraunkorraren helbidea zehaztera, erroldatze-ziurtagiria edo ohiko egoitzari buruzko beste frogagiri bat atxikiz.
d) Kontratuaren iraupena bat etorri beharko da kontratua egitea erakarri duen jarduera egiteko aurreikusten denarekin.
2. Etxebizitzaren lagapena edo azpierrentamendu guztizkoa nahiz partziala baimenduz gero, xedapen gehigarri honetan ezarritako betekizun guztiak bete beharko dira.
3. Errentatzaileek beren gain izanen dituzte Nafarroan Etxebizitza Izateko Eskubideari buruzko maiatzaren 10eko 10/2010 Foru Legeko 40. artikuluan ezarritako informazio-betebeharrak, eta behartuta egonen dira xedapen gehigarri honetan ezarritako zertzeladei eta betekizunei buruzko behar adinako informazioa ematera.
4. Nafarroako Etxebizitza Errentamenduko Kontratuen Erregistroko inskripzioaren idazpenetan, denboraldirako etxebizitzaz bestelako erabilerarako kontratuei dagozkienetan, jasoko dira xedapen gehigarri honetan aurreikusitako zertzeladei buruzko datuak.
Azken xedapenetako lehenengoa. Erregelamenduzko garapena egiteko gaikuntza.
Baimena ematen zaio Nafarroako Gobernuari foru-lege hau aplikatu eta garatzeko behar diren erregelamendu-mailako xedapen guztiak onesteko.
Azken xedapenetako bigarrena. Indarra hartzea.
Foru-lege honek Nafarroako Aldizkari Ofizialean argitaratu eta biharamunean hartuko du indarra.
