(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

14/2026 FORU DEKRETUA, OTSAILAREN 25EKOA, ZEINAREN BIDEZ ARAUTZEN BAITA NAFARROAKO FORU KOMUNITATEKO IKASTETXE PUBLIKOEN ANTOLAKETA ETA FUNTZIONAMENDU ERREGELAMENDUA, ZEHAZKI IKASKETA HAUEK EMATEN DITUZTENENA: HAUR HEZKUNTZA, LEHEN HEZKUNTZA, DERRIGORREZKO BIGARREN HEZKUNTZA, BATXILERGOA, LANBIDE HEZIKETA, ARTE IRAKASKUNTZAK, HIZKUNTZAK, KIROL IRAKASKUNTZAK, HELDUEN HEZKUNTZA ETA HEZKUNTZA BEREZIA

BON N.º 74 - 17/04/2026

  ATARIKO TITULUA. XEDAPEN OROKORRAK

  I TITULUA. ANTOLATZEKO AUTONOMIA

  I KAPITULUA. IKASTETXEEN ANTOLAKETA ETA FUNTZIONAMENDUA

  II. KAPITULUA. IKASTETXEEN GOBERNUA

  III. KAPITULUA. IKASTETXEETAKO ZUZENDARITZATALDEA

  IV. KAPITULUA. KIDE ANITZEKO GOBERNUORGANOAK ETA KIDE ANITZEKO PARTAIDETZAORGANOAK

  1. ATALA. IKASTETXEKO ESKOLAKONTSEILUA

  2. ATALA. IKASTETXEKO IRAKASLEEN KLAUSTROA

  3. ATALA. GOIMAILAKO ARTEIKASKETAK EMATEN DITUZTEN IKASTETXEETAKO KONTSEILUA

  4. ATALA. LANBIDE HEZIKETAREN SISTEMAKO IKASTETXEETAKO GIZARTEKONTSEILUA

  V. KAPITULUA. IKASTETXEETAKO IRAKASKUNTZA KOORDINATZEKO ORGANOAK

  1. ATALA. TALDEKO IRAKASLETALDEA

  2. ATALA. ZIKLOKO IRAKASLETALDEA

  3. ATALA. HEZIKETAZIKLOKO IRAKASLETALDEA

  4. ATALA. KOORDINAZIO DIDAKTIKOKO DEPARTAMENTUAK

  5. ATALA. HEZKUNTZALAGUNTZAKO UNITATEA

  6. ATALA. HEZKUNTZA ETA LANBIDEORIENTAZIOKO DEPARTAMENTUA

  7. ATALA. KOORDINAZIO PEDAGOGIKORAKO BATZORDEA

  8. ATALA. TUTORETZA

  9. ATALA. IKASTETXEETAKO BESTE BATZORDE, TALDE ETA KOORDINAZIOFIGURA BATZUK

  VI. KAPITULUA. IRAKASLEAK

  VII. KAPITULUA. IRAKASLE EZ DIREN IKASTETXEKO LANGILEAK

  VIII. KAPITULUA. FAMILIEN ETA IKASLEEN PARTEHARTZEA

  1. ATALA. FAMILIEN PARTEHARTZEA IKASTETXEEN FUNTZIONAMENDUAN ETA GOBERNUAN

  2. ATALA. IKASLEEN PARTEHARTZEA IKASTETXEEN FUNTZIONAMENDUAN ETA GOBERNUAN

  IX. KAPITULUA. ESKUBIDEAK, BETEBEHARRAK, BIZIKIDETZA ETA BERDINTASUNA

  X. KAPITULUA. IKASTETXEEN ORDUTEGI OROKORRA

  II. TITULUA. AUTONOMIA PEDAGOGIKOA

  I. KAPITULUA. IKASTETXEEN ANTOLAKETA PEDAGOGIKOA

  II. KAPITULUA. IKASTETXEEN PLANGINTZA PEDAGOGIKOA

  1. ATALA. PLANGINTZA PEDAGOGIKOA

  2. ATALA. HEZKUNTZAPROIEKTUA

  3. ATALA. URTEKO PROGRAMAZIO OROKORRA

  III. KAPITULUA. AUTONOMIA PEDAGOGIKOA BALIATZEA

  1. ATALA. CURRICULUMA ZEHAZTEA ETA EGOKITZEA

  2. ATALA. IRAKASKUNTZAREN PROGRAMAZIOA

  3. ATALA. CURRICULUMEKO BESTE ELEMENTU BATZUK

  4. ATALA. JARDUERA OSAGARRIAK ETA ESKOLAZ KANPOKOAK

  IV. KAPITULUA. HEZKUNTZAPROZESUAK

  III. TITULUA. KUDEATZEKO AUTONOMIA

  I. KAPITULUA. IKASTETXEEN KUDEAKETA

  II. KAPITULUA. IKASTETXEETAKO KUDEAKETA EKONOMIKOA

  III. KAPITULUA. PERTSONEN KUDEAKETA

  IV. KAPITULUA. BALIABIDE MATERIALEN KUDEAKETA

  V. KAPITULUA. KUDEAKETAKO BESTE ELEMENTU BATZUK

  IV. TITULUA. EMAITZAK NEURTZEA ETA EBALUATZEA

  I. KAPITULUA. HEZKUNTZAHELBURUAK, NEURKETA ETA JARRAIPENA

  II. KAPITULUA. IKASTETXEEN JARDUNAREN EBALUAZIOA

  III. KAPITULUA. EBALUAZIO DIAGNOSTIKOAK

ZIOEN AZALPENA

Ikastetxeetako parte-hartzeari, ebaluazioari eta gobernuari buruzko azaroaren 20ko 9/1995 Lege Organikoan ezarritako printzipioak betez, foru dekretu hauek eman ziren: 24/1997 Foru Dekretua, otsailaren 10ekoa, Nafarroako Foru Komunitateko lurraldean dauden Haur Hezkuntzako eskola publikoen, Lehen Hezkuntzako ikastetxe publikoen eta Haur eta Lehen Hezkuntzako ikastetxe publikoen Erregelamendu Organikoa onesten duena, eta 25/1997 Foru Dekretua, otsailaren 10ekoa, Nafarroako Foru Komunitateko lurraldean dauden Bigarren Hezkuntzako Institutuen Erregelamendu Organikoa onesten duena. Era berean, otsailaren 10eko 25/1997 Foru Dekretuaren bosgarren xedapen iragankorrak ezarri zuen erregelamendu organiko hori ordezko gisa erabiliko zela Hezkuntza Sistemaren Antolamendu Orokorrerako urriaren 3ko 1/1990 Legean ezarritako ikasketetako edozein ematen zuten Nafarroako Foru Komunitateko ikastetxe publikoetan, haientzat izaera bereko araudi espezifikoa garatzen ez zen bitartean.

Bi foru dekretu horiek berme eraginkorra izan badira ere aurreko lege organikoetan ezarritako eskubide arautzaileak betetzeko, abenduaren 29ko 3/2020 Lege Organikoak Hezkuntzari buruzko maiatzaren 3ko 2/2006 Lege Organikoan egindako aldaketen ondorioz sortutako testu berria dela eta, ezinbestekoa da Nafarroako Foru Komunitatean ikasketa hauek ematen dituzten ikastetxe publikoetako antolaketa- eta funtzionamendu-araudiak eguneratzea: Haur Hezkuntza, Lehen Hezkuntza, Derrigorrezko Bigarren Hezkuntza, Batxilergoa, Lanbide Heziketa, Arte Irakaskuntzak, Hizkuntzak, Kirol Irakaskuntzak, Helduen Hezkuntza eta Hezkuntza Berezia. Hori, hezkuntza-sistema XXI. mendeko erronka eta desafioetara egokitzeko, Europar Batasunak eta UNESCOk 2020-2030 hamarkadarako ezarritako helburuen arabera.

Hezkuntzari buruzko maiatzaren 3ko 2/2006 Lege Organikoak, lehen aipatutako abenduaren 29ko 3/2020 Lege Organikoak finkatutako testuaren arabera, aitortzen du hezkuntza-komunitateak ikastetxeen gobernuan parte hartzeak oinarrizko balioa duela, eta arreta berezia jartzen du ikastetxeen autonomian. Hala, lege organiko horren V. tituluko II. kapituluak dio ikastetxeek autonomia pedagogikoa eta antolatzeko eta kudeatzeko autonomia izanen dutela, beren funtzionamendu-ereduak eratuz. Bestalde, III. kapituluak indartu egiten du ikastetxe publikoetako kide anitzeko kontrol- eta gobernu-organoen eta irakaskuntza koordinatzeko organoen zeregina. Azkenik, IV. kapituluak ikastetxe publikoen zuzendaritzari buruzko funtsezko alderdiak arautzen ditu. Aipatutako lege organikoaren VI. titulua hezkuntza-sistemaren ebaluazioari buruzkoa da.

Ikastetxeen antolaketa oinarrizko tresna da Nafarroako Foru Komunitateko hezkuntza-sistemak dituen helburuak lortzeko, hau da, ikastetxeetako gobernu-organo eta irakaskuntza koordinatzeko organo guztiak batera eta modu koordinatuan antolatzen direla eta esku hartzen dutela ziurtatzeko.

Ikastetxeen autonomia eta hezkuntza-komunitateko sektore guztien parte-hartzea bultzatzea lagungarri da ikastetxeek berrikuntzaren eta aldaketaren ardatz gisa duten zeregina indartzeko eta hezkuntza-arrakasta lortze aldera adosten eta onesten diren plan, programa eta proiektu guztiak ezartzeko eta garatzeko.

Gizarte- eta lege-errealitate berri bat eratu denez, ezinbestekoa da esparru arautzaile berri bat lantzea, eskola beste era batera antolatuz ikastetxeek erantzun egokiagoa eman diezaieten gaur egungo ikasleen eta gizartearen premiei. Hartara, Nafarroako Foru Komunitateko hezkuntza-sistemaren bilakaerari eta arestian aipatutako aldaketa normatiboei erantzunen zaie. Hori, ikastetxeen autonomia pedagogikoaren eta antolatzeko eta kudeatzeko autonomiaren oinarriak finkatzeko, eta beren antolaketa- eta funtzionamendu-arauak, beren hezkuntza-proiektua eta beren kudeaketa-proiektua egin ahal izan ditzaten.

Azkenik, autonomia baliatuz gero nahitaezkoa denez emaitzak eta prozesuak ebaluatzea, foru dekretu honek gai hauek ere jasotzen ditu: emaitzen neurketa, jarraipena eta ebaluazioa; ikastetxeen jardueraren ebaluazioa; eta diagnostikoa egiteko ebaluazioak.

Horrenbestez, kontuan harturik Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 47. artikuluan ezarritakoa, bai eta abuztuaren 31ko 1070/1990 Errege Dekretuan ezarritakoa ere (horren bidez onetsi zen unibertsitateaz kanpoko irakaskuntzaren arloko Estatuaren funtzioen eta zerbitzuen eskualdatzea), egokia da Nafarroako Gobernuak Nafarroako Foru Komunitateko ikastetxe publikoen Antolaketa eta Funtzionamendu Erregelamendua onestea, zehazki ikasketa hauek ematen dituztenena: Haur Hezkuntza, Lehen Hezkuntza, Derrigorrezko Bigarren Hezkuntza, Batxilergoa, Lanbide Heziketa, Arte Irakaskuntzak, Hizkuntzak, Kirol Irakaskuntzak, Helduen Hezkuntza eta Hezkuntza Berezia.

Foru dekretu honek atariko titulu bat, lau titulu, zortzi xedapen gehigarri, xedapen iragankor bat, xedapen indargabetzaile bat eta bost azken xedapen ditu.

Atariko tituluan, "xedapen orokorrak" izenburupean, honako hauek zehazten dira: xedea eta aplikazio-eremua, ikastetxe publikoen izaera eta ikasketak, ikastetxe horien izendapen orokorra eta espezifikoa, eta ikastetxeen autonomia, dagozkion hiru alderdietan: antolaketa, pedagogia eta kudeaketa.

I. titulua ikastetxeen antolatzeko autonomiari buruzkoa da, eta hamar kapitulu ditu.

I. eta II. kapituluek honako hauek arautzen dituzte, hurrenez hurren: ikastetxeen antolaketa eta funtzionamendua (beren antolaketa- eta funtzionamendu-arauen bitartez), eta haien gobernua, gobernu-organoak eta organo horietan jarduteko printzipioak adierazita.

III. kapituluak ikastetxeetako zuzendaritza-taldearekin zerikusia duten alderdiak arautzen ditu: haien eskumenak ezartzen ditu, bai zuzendaritza-taldearenak berarenak, bai hura osatzen duten kideetako bakoitzarenak. Eta arautzen ditu, baita ere, ikastetxeetako antolaketa-egituran pertsona bakarreko gobernu-organorik ez egotearekin eta zuzendaritza-taldea osatzen duten pertsonen ordezkapen-arauekin zerikusia duten gaiak.

IV. kapituluak lau atal ditu, eta ikastetxeetako kide anitzeko gobernu- eta partaidetza-organoak arautzen ditu. Horretarako, atal horietan gai hauek daude zehaztuta, hurrenez hurren: goi-mailako arte-ikasketak ematen dituzten ikastetxeetako eskola-kontseiluaren, irakasleen klaustroaren eta ikastetxe-kontseiluaren osaera, eskumenak eta funtzionamendua; eta Lanbide Heziketako ikastetxeetako gizarte-kontseilua.

V. kapituluak, berriz, bederatzi atal ditu, eta irakaskuntza koordinatzeko organoak arautzen ditu, bai taldeko, zikloko eta heziketa-zikloko irakasle-taldeak, bai koordinazio didaktikoko departamentuak, hezkuntza-laguntzako unitatea, hezkuntza- eta lanbide-orientazioko departamentua, koordinazio pedagogikorako batzordea eta tutoretza; eta, horietako bakoitzerako, alderdi hauek zehazten ditu: osaera, eskumenak, funtzionamendua eta, hala badagokio, zikloaren edo departamentuko burutzaren koordinazioa beren gain hartzeko ardura duten pertsonak eta dagozkien eskumenak. Bederatzigarren atalean beste batzorde, talde eta koordinazio-irudi batzuei buruzko gaiak daude zehaztuta.

VI. kapituluan irakasleei buruzko gaiak daude jasota, bai titulazio-eskakizunei buruzkoak, bai beren eginkizunei buruzkoak.

VII. kapitulua irakasleak ez diren ikastetxeetako langileei eta haiek ikastetxeen gobernuan duten partaidetzari buruzkoa da.

VIII. kapituluak bi atal ditu, eta ikastetxeen funtzionamenduan familiek eta ikasleek duten partaidetza arautzen du. Hala, lehen atalak familiek eta gurasoen eta legezko ordezkarien elkarteek parte hartzeko dituzten bideei buruzko kontuak jasotzen ditu, eta baita haien eginkizunak ere. Era berean, bigarren atalean ikasleek parte hartzeko dituzten moduak daude zehaztuta: taldeko ordezkariak, ordezkarien batzordeak eta ikasleen elkarteak, dagozkien zereginekin.

Azkenik, I. titulua IX. eta X. kapituluekin burutzen da. Horien bidez arautzen dira, batetik, ikasleen eskubideei eta betebeharrei buruzko gaiak, bizikidetza eta berdintasuna barne; eta bestetik, ikastetxeko ordutegi orokorrari buruzko kontuak.

II. titulua ikastetxeen autonomia pedagogikoari buruzkoa da, eta lau kapitulu ditu.

I. kapituluak ikastetxeen antolaketa pedagogikoari buruzko alderdiak arautu, eta antolaketa horren gaineko xedapen orokorrak ezartzen ditu.

II. kapituluak, hiru atalen bitartez, ikastetxeen plangintza pedagogikoa arautzen du. Lehen atalean plangintza pedagogikoko dokumentuei buruzko alderdiak daude jasota. Alderdi horiek hurrengo bi ataletan lantzen dira: bigarrena ikastetxearen hezkuntza-proiektuari buruzkoa da, eta hirugarrena urteko programazio orokorrari buruzkoa. Bietan ere, plangintza pedagogikoko bi dokumentu horien edukiari, lanketari, onespenari eta ebaluazioari buruzko gaiak daude jasota.

III. kapituluak lau atal ditu, eta ikastetxeen autonomia pedagogikoa arautzen du. Horretarako, lehen atalean curriculuma zehazten eta egokitzen du, eta bigarren atalean irakaskuntzaren programazioaren bi alderdiak: programazio didaktikoa eta ikasgelako programazioa. Horrez gain, hirugarren atalean beste curriculum-elementu batzuk daude jasota, hala nola hizkuntzen tratamendua; arlo, jakintzagai, modulu eta irakasgaien antolaketa; hautazkotasuna; eta proiektuak, programak eta planak. Kapituluaren laugarren atalak jarduera osagarriak eta eskolaz kanpokoak lantzen ditu: zehazteaz gain, nola programatu eta gauzatu ezartzen du.

Azkenik, IV. kapituluak hezkuntza-prozesuei buruzko alderdiak arautzen ditu, hala nola eskolak ematea, ikasleak ebaluatzea, tutoretza-lana eta ikasleen desberdintasun indibidualei arreta jartzea.

III. titulua ikastetxeen kudeatzeko autonomiari buruzkoa da, eta bost kapitulu ditu.

I. kapituluak ikastetxeen kudeaketari buruzko xedapen orokor batzuk ditu. Alde horretatik, kapituluak dio ikastetxeek kudeaketa-proiektu bat eduki behar dutela, eta proiektu horrek ikastetxearen hezkuntza-proiektuaren eta antolaketa- eta funtzionamendu-arauen zerbitzura egon behar duela.

II. kapituluak kudeaketa ekonomikoari buruzko alderdiak arautzen ditu, hala nola ikastetxearen urteko aurrekontua, kudeaketa-kontuak eta tasak.

III. kapitulua pertsonen kudeaketari buruzkoa da, eta irakasle-taldeari, haren jardunari eta ikastetxeko prestakuntzaren plangintzari buruzko gaiak zehazten ditu.

IV. kapituluan, ikastetxeen baliabide materialen kudeaketa arautzen da: eraikina mantentzea eta zaintzea; ekipamendua eta obrak, zerbitzuak eta hornidurak kontratatzea; baliabide eta bitarteko digitalak; hezkuntzari buruzko informazioaren kudeaketa; eta ikastetxeen webguneak.

Azkenik, V. kapituluan beste kudeaketa-elementu batzuk zehazten eta arautzen dira: ikastetxeetarako sarbidea, zerbitzu osagarriak, ikasleen osasuna eta segurtasuna, datuak babestea, kalitatea kudeatzeko sistemak, arriskuen prebentzioa, larrialdietarako plana eta ikastetxeen gizarte-erabilera.

IV. titulua emaitzak neurtzeari eta ebaluatzeari buruzkoa da, eta hiru kapitulu ditu.

I. kapituluak hezkuntza-helburuak, neurketa eta jarraipena lantzen ditu. Alde horretatik, azaltzen du ikastetxeek hainbat plan eta proiekturen bidez bultzatuko dituztela beren hezkuntza-helburuak, eta plan eta proiektu horien jarraipena egin eta emaitzak jaso beharko dituztela, ondorioak ateratzeko eta jarduna etengabeko hobekuntzaren ikuspegitik bideratzeko.

II. kapitulua ikastetxeen jardunaren ebaluazioari buruzkoa da, eta adierazten du jardun hori bi ikuspegi bateratu eta osagarriren bidez bultzatuko dutela, barne-ebaluazio edo autoebaluazioaren eta kanpo-ebaluazioaren bidez, alegia. Ebaluazio horiek, gainera, beharrak hauteman ondoren beren hobekuntza-plana egiteko balioko diete ikastetxeei.

III. kapituluak diagnostikoa egiteko ebaluazioei buruzko alderdiak arautzen ditu. Ebaluazio horien emaitzak, aztertu ondoren, hobekuntza-planean sartzeko proposamenak egiteko erabiltzen ahalko dituzte.

Foru dekretu honek zortzi xedapen gehigarri ditu, honako hauei buruzkoak: ikastetxeen berezko ikasketa eta ezaugarrietara egokitzea; ingurukoekin elkarlanean aritzea eta erretiroa hartutako irakasleek, hezkuntza-komunitateko pertsonek eta kanpoko jendeak ikastetxean parte hartzea; helduentzako oinarrizko hezkuntzako gelak; ikastetxe publikoen publizitatea eta hezkuntza-eskaintza; Nafarroako Dantza Eskola; itunpeko ikastetxe pribatuak; eta Hezkuntzako Ikuskapen Zerbitzua, zeina dekretu honetan ezarritakoa betearazteaz arduratuko baita.

Azkenik, foru dekretuak honako hauek ditu: xedapen iragankor bat, dekretuaren aplikazioari buruzkoa; xedapen indargabetzaile bat, orain arte aplikatzen zen araudia indargabetzen duena; eta bost azken xedapen. Azken xedapenei dagokienez, lehenengo hirurek hainbat arau-aldaketa ezartzen dituzte, eta azken biak dekretua lantzeko eskumenari eta dekretua indarrean jartzeari eta aplikatzeari buruzkoak dira, hurrenez hurren.

­Horiek horrela, Nafarroako Eskola Kontseiluaren aldez aurreko txostena ikusirik eta Nafarroako Kontseiluarekin bat, Hezkuntzako kontseilariak proposaturik eta Nafarroako Gobernuak 2026ko otsailaren 25ean eginiko bilkuran hartutako erabakiarekin bat,

DEKRETATZEN DUT:

ATARIKO TITULUA. XEDAPEN OROKORRAK

1. artikulua. Xedea eta aplikazio eremua.

1. Foru dekretu honen xedea da artikulu honen 2. apartatuan jasotako unibertsitatez kanpoko ikasketak ematen dituzten ikastetxe publikoen antolaketa- eta funtzionamendu-araudia erregulatzea, eta, horretarako, ikastetxe horien autonomia pedagogikoaren eta antolatzeko eta kudeatzeko autonomiaren esparrua ezartzea.

2. Foru dekretu hau Nafarroako Foru Komunitatean ikasketa hauek ematen dituzten ikastetxe publikoetan aplikatuko da: Haur Hezkuntza, Lehen Hezkuntza, Derrigorrezko Bigarren Hezkuntza, Batxilergoa, Lanbide Heziketa, Arte Irakaskuntzak, Hizkuntzak, Kirol Irakaskuntzak, Helduen Hezkuntza eta Hezkuntza Berezia.

2. artikulua. Ikastetxe publikoen izaera eta ikasketak.

1. Ikastetxe publikoak eskola-erakundeak dira, eta Hezkuntza Departamentua da haien titularra. Erakunde horietan gauzatzen dira, batetik, ikasleen irakaskuntza, ikaskuntza eta prestakuntza osoko prozesua; eta, bestetik, hezkuntza-jardunbidea ikertzeko eta berritzeko eta irakasleen lana hobetzeko jarduerak; prozesu eta jarduera horietan, gainera, hezkuntza-komunitate osoak parte hartzen du.

2. Ikastetxe publikoen ateak inguruko komunitatearentzat zabalik egonen dira, eta autonomia izanen dute antolaketari, pedagogiari eta kudeaketari dagokienez, indarrean dagoen legeriaren esparruan. Horretarako, hezkuntza-proiektua, kudeaketa-proiektua eta antolaketa- eta funtzionamendu-arauak eduki beharko dituzte, hezkuntza publikoa kalitatezkoa, bidezkoa, doakoa, partaidetzazkoa, demokratikoa, eleaniztuna, kulturartekoa, inklusiboa, hezkidetzazkoa eta berdinzalea izan dadin ikasle guztientzat.

3. Foru dekretu honen aplikazio-eremuan jasotako ikasketak emateko baimena Hezkuntza Departamentuak emanen du, eta hark zehaztuko du ikasketa horiek emateko araubidea; izan daiteke egunekoa edo gauekoa, eta presentziala, erdipresentziala edo urrutikoa.

3. artikulua. Ikastetxeen izen orokorrak.

1. Haur Hezkuntzako ikasketak bakarrik ematen dituzten ikastetxe publikoei haur-eskola deituko zaie; sigla: HH.

2. Lehen Hezkuntzako ikasketak bakarrik ematen dituzten ikastetxe publikoei Lehen Hezkuntzako ikastetxe deituko zaie; sigla: LHI.

3. Haur Hezkuntzako eta Lehen Hezkuntzako ikasketak ematen dituzten ikastetxe publikoei Haur eta Lehen Hezkuntzako ikastetxe deituko zaie; sigla: HLHI.

4. Lehen Hezkuntzako eta Derrigorrezko Bigarren Hezkuntzako ikasketak ematen dituzten ikastetxe publikoei Oinarrizko Hezkuntzako ikastetxe deituko zaie; sigla: OHI. Aurreko horietaz gain, Haur Hezkuntzako ikasketak eta/edo oinarrizko mailako heziketa-zikloak ematen dituzten ikastetxeek ere izen hori bera izanen dute.

5. Derrigorrezko Bigarren Hezkuntzako ikasketak soilik ematen dituzten ikastetxe publikoei Derrigorrezko Bigarren Hezkuntzako institutu deituko zaie; sigla: DBHI. Oinarrizko mailako heziketa-zikloak ere eskaintzen badituzte, izen bera izanen dute.

6. Derrigorrezko Bigarren Hezkuntzako, Batxilergoko eta Lanbide Heziketako ikasketak ematen dituzten ikastetxe publikoei Bigarren Hezkuntzako institutu deituko zaie; sigla: BHI. Derrigorrezko Bigarren Hezkuntzako edo Lanbide Heziketako ikasketak ematen ez dituztenean ere, izen bera izanen dute.

7. Lanbide Heziketako ikasketak soilik ematen dituzten ikastetxe publikoei Lanbide Heziketako institutu deituko zaie; sigla: LHI. Lanbide Heziketako prestakuntza-eskaintza guztiak dituzten ikastetxe publikoei ikastetxe bateratu deituko zaie; sigla: IB.

8. Nagusiki arte plastikoko eta diseinuko ikasketak ematen dituzten ikastetxe publikoei arte-eskola deituko zaie; sigla: AE. Goi-mailako arte-ikasketak ere ematen badituzte, arte- eta dagokion espezialitateko goi-eskola deituko zaie; sigla: AGE. Goi-mailako arte-ikasketak bakarrik ematen dituzten ikastetxeei dagokien espezialitateko goi-eskola deituko zaie; sigla: GE.

9. Musika-ikasketa profesionalak ematen dituzten ikastetxe publikoei musika-kontserbatorio profesional deituko zaie; sigla: MKP. Dantza-ikasketa profesionalak ematen dituzten ikastetxe publikoei dantza-kontserbatorio profesional deituko zaie; sigla: DKP. Musika- eta dantza-ikasketa profesionalak ematen dituzten ikastetxe publikoei musika- eta dantza-kontserbatorio profesional deituko zaie; sigla: MDKP. Goi-mailako musika-ikasketak ematen dituzten ikastetxe publikoei goi-mailako musika-kontserbatorio deituko zaie; sigla: GMK. Goi-mailako dantza-ikasketak ematen dituzten ikastetxe publikoei goi-mailako dantza-kontserbatorio deituko zaie; sigla: GDK. Goi-mailako musika- eta dantza-ikasketak ematen dituzten ikastetxe publikoei goi-mailako musika- eta dantza-kontserbatorio deituko zaie; sigla: GMDK.

10. Hizkuntzak irakasten dituzten ikastetxe publikoei hizkuntza-eskola ofizial deituko zaie; sigla: HEO.

11. Nagusiki kirol-ikasketak ematen dituzten ikastetxe publikoei kirol-ikasketetako ikastetxe publiko deituko zaie; sigla: KIIP.

12. Nagusiki helduentzako oinarrizko hezkuntzako ikasketak ematen dituzten ikastetxe publikoei helduentzako Oinarrizko Hezkuntzako ikastetxe deituko zaie; sigla: HOHI.

13. Nagusiki helduentzako Bigarren Hezkuntzako eta Batxilergoko ikasketak ematen dituzten ikastetxe publikoei helduentzako Bigarren Hezkuntzako institutu deituko zaie; sigla: HBHI.

14. Ikastetxe arruntetan aniztasunari erantzuteko neurriekin erantzun ezin diren hezkuntza-premia bereziak dituzten ikasleentzako ikasketak ematen dituzten ikastetxe publikoei Hezkuntza Bereziko ikastetxe deituko zaie; sigla: HBI.

15. Landa-eremuen ezaugarri geografiko eta demografiko bereziak direla-eta, eremu horietan dauden ikastetxe publikoen izenean landa-izaera hori jasoko da, siglan "L" jarrita. Hezkuntza Departamentuak zehaztuko du landa-eremu horien zonakatzea, arau bidez.

16. Hezkuntza Departamentuak landa-ikastetxe bateratuak sortzea proposatzen ahalko du; sigla: LIB.

17. Hezkuntza Departamentuak artikulu honetako aurreko apartatuetan ezarritakoaz bestela bateratzen edo banatzen ahalko ditu ikasketak. Ondoriozko ikastetxearen izena Hezkuntza Departamentuak jarriko du.

18. Kasu guztietan, ikastetxeen izen orokorra euskaraz ere adieraziko da, Nafarroako administrazio publikoetako euskararen erabilera arautzen duen araudiak hala ezartzen duenean.

4. artikulua. Ikastetxeen izen espezifikoa.

1. Ikastetxe publikoaren titularra Hezkuntza Departamentua bada, hark onetsitako izen espezifikoa izanen du, ikastetxeko eskola-kontseiluak proposaturik. Ikastetxea dagoen eraikinak toki-erakunde bat edo gehiago baditu titular, toki-erakunde horien aldeko txostena beharko da.

2. Ikastetxe publiko sortu berriei dagokienez, titularra Hezkuntza Departamentua bada, izen espezifikoa Hezkuntza Departamentuak berak jarriko du.

3. Ikastetxe publiko sortu berrien titularra toki-erakunde bat bada, berariazko izena erakundearen korporazioak adostuko du.

4. Ikastetxe publikoen izen espezifikoak aldatu nahi izanez gero, aurreko ataletan ezarritako baldintzak bete beharko dira. Aldatzeko eskaeran, ikastetxeari zein izen jarri nahi zaion azaldu eta izen hori jartzea komeni dela justifikatzen duen txostena aurkeztu beharko da.

5. Kasu guztietan, titularra edozein dela, ikastetxearen izen espezifikoa Hezkuntza Departamentuak baimendu beharko du, espresuki; baimen hori ikastetxeen erregistroaren arloan eskumena duen zuzendaritza nagusiak emanen du.

6. Udal-mugarte berean ezin da izan izen espezifiko bereko ikastetxe publiko bat baino gehiago.

7. Ikastetxearen izen osoa (ikastetxearen izen orokorra eta baimen-erregistroan jasota dagoen izen espezifikoa) eraikinaren fatxadan jarriko da, ongi ikusteko moduko toki batean, Nafarroako administrazio publikoetako hizkuntza ofizialen, logotipoen eta legenden erabileraren gainean indarrean dagoen araudian ezarritakoaren arabera. Ikastetxeek erregistroan ageri den izen osoa besterik ez dute erabiltzen ahalko.

5. artikulua. Ikastetxeen autonomia.

Ikastetxeek autonomia izanen dute antolaketari, pedagogiari eta kudeaketari dagokienez, indarrean dagoen legeriaren esparruan eta foru dekretu honetan eta dekretua garatzen duten arauetan ezarritako moduan.

I TITULUA. ANTOLATZEKO AUTONOMIA

I KAPITULUA. IKASTETXEEN ANTOLAKETA ETA FUNTZIONAMENDUA

6. artikulua. Ikastetxeen antolaketari eta funtzionamenduari buruzko xedapen orokorrak.

1. Ikastetxeek antolatzeko eta funtzionatzeko autonomia izanen dute, ikasketa bakoitzerako indarrean dagoen legerian, foru dekretu honetan eta dekretua garatzen duten arauetan ezarritako moduan.

2. Antolatzeko eta funtzionatzeko autonomia ikastetxeek gai hauen inguruan erabakiak hartzeko duten gaitasuna da: gobernu-organoen eta irakaskuntza koordinatzeko organoen hautaketa eta funtzionamendua, irakasleen eta irakasle ez diren langileen antolaketa, ikasleen multzokatzea, bizikidetza, inguruko zerbitzu eta erakundeekiko elkarlana, ikastetxeko egutegia eta ordutegia, eta barne-funtzionamenduko beste zenbait gai.

3. Antolatzeko eta jarduteko duten autonomia baliatuz, eta dituzten zeregin normatiboen, helburuen eta lehentasunen arabera, ikastetxeek honako hauek egiten ahalko dituzte, indarrean dagoen araudian ezarritako baldintzetan:

a) Ikastetxeko kide anitzeko eta pertsona bakarreko gobernu-organoen funtzionamendu-araubidea zehaztea, organo horien lan-planak ezartzea eta beren eskumeneko jardunean erabakiak hartzea.

b) Ikastetxeko irakaskuntza koordinatzeko organoetako arduradunak izendatzea, haien funtzionamendu-araubidea zehaztea, organo horien lan-planak ezartzea eta beren eskumeneko jardunean erabakiak hartzea.

c) Koordinazio-langileak, batzordeak eta lantalde bereziak ezartzea.

d) Gurasoen eta ikasleen elkarteak abian jartzea erraztea.

e) Ikastetxeko irakasleak eta irakasle ez diren langileak antolatzea, zuzentzea eta koordinatzea.

f) Ikasleak multzokatzea eta ikasleen desberdintasun indibidualen arreta nola antolatu adostea.

g) Inguruko osasun-, gizarte- eta kultura-zerbitzuekin eta beste erakundeekin elkarlanean nola aritu adostea.

h) Hezkuntza-komunitateko kideen bizikidetza antolatzea.

i) Eskola-egutegia eta eskola-jardueren eta jarduera osagarri eta eskolaz kanpokoen ordutegi orokorra zehaztea.

j) Barne- eta kanpo-ebaluazioak antolatzea.

k) Sarrerak, irteerak eta jolas-orduak arautzea.

l) Familiekin komunikatzeko prozedurak ezartzea.

4. Nolanahi ere, titulu honetan ikastetxeetako gobernu-organoen eta irakaskuntza koordinatzeko organoen zehaztapenari, izenari, osaerari eta eskumenei buruz ezarritakoa ikastetxeen ezaugarrietara, oinarrizko araudira eta ikasketa bakoitzaren arauetara egokitu beharko da, baita Hezkuntza Departamentuak arau bidez ezartzen duen horretara ere.

7. artikulua. Antolamendu eta funtzionamenduarauak.

1. Ikastetxeen antolaketa- eta funtzionamendu-arauak erakundea antolatzeko agiria dira, eta ikastetxearen hezkuntza-proiektuan proposatutako helburuak lortzeko ezinbestekoak diren antolaketari eta funtzionamenduari buruzko gaiak jasotzen dituzte.

2. Oro har, antolaketa- eta funtzionamendu-arauek honako hauek jasoko dituzte:

a) Ikastetxeko gobernuaren antolaketaren egitura: kide anitzeko eta pertsona bakarreko organoak, eta organo horietako kideak, eskumenak eta funtzionamendu-araubidea.

b) Ikastetxeko irakaskuntza koordinatzeko egitura: organoak eta organo horietako kideak, eskumenak eta funtzionamendu-araubidea.

c) Irakasleen eta irakasle ez diren langileen antolaketa, arduren banaketa eta zereginak.

d) Guraso-elkarteak eta ikasle-elkarteak.

e) Ikasle-taldeak eratzeko irizpideak eta ikasleen desberdintasun indibidualak aintzat hartu ahal izateko antolatzeko modua.

f) Tutoretzak esleitzeko eta ikastaroak eta taldeak hautatzeko irizpideak.

g) Antolaketa akademikoa zehaztea, besteak beste: ebaluazioen egutegia, azterketak edo testuliburuak.

h) Ingurunearekiko elkarlana: osasun-, gizarte- eta kultura-zerbitzuak, tokiko erakundeak eta beste erakunde eta instituzio batzuk.

i) Ikastetxeko bizikidetzaren antolaketa.

j) Eskola-egutegia eta ikastetxearen ordutegi orokorra egiteko irizpideak.

k) Irakasleen eta ikasleen ordutegiak egiteko irizpideak.

l) Irakasleak ez daudenean ikasleei arreta emateko irizpideak.

m) Kanpo-ebaluazioen antolaketa eta laguntza: diagnostikoa egiteko ebaluazioak, jardunaren ebaluazioa eta beste batzuk.

n) Ikasleen ebaluazioen gainean erreklamazioak egiteko prozesua.

ñ) Ikastetxeko sarrera-irteerak eta jolas-orduak antolatzea.

o) Bulego, ikasgela eta guneetara sartzeko protokolo espezifikoak.

3. Nolanahi ere, antolaketa- eta funtzionamendu-arauen edukia ikasketen antolamenduaren berezitasunera eta ikastetxe bakoitzaren ezaugarrietara egokituko da. Halaber, ikastetxeek behar adina atal gehitzen ahalko dituzte, ikastetxearen antolaketa eta funtzionamendua egokiak izan daitezen.

8. artikulua. Antolaketa eta funtzionamenduarauak prestatu, onetsi eta ebaluatzea.

1. Ikastetxearen antolaketa- eta funtzionamendu-arauak zehazteko lana zuzendaritza-taldeak koordinatuko du, eta hura arduratuko da, halaber, arau horiek eta egiten diren aldaketak idazteaz. Horretarako, ikastetxeko kide anitzeko gobernu-organoek edo koordinazio pedagogikorako batzordeak beren eskumen-esparruetan aurrez onetsitako proposamenak baloratuko dituzte, baita hezkuntza-komunitateko beste edozeinek egindako proposamenak ere.

2. Zuzendaritza-taldeak, antolaketa- eta funtzionamendu-arauak zehazteko, lagun diezaien eta parte har dezaten eskatzen ahalko die koordinazio pedagogikorako batzordeari, irakaskuntza koordinatzeko beste batzorde batzuei eta koordinazio-batzorde edo -taldeei.

3. Ikastetxearen antolaketa- eta funtzionamendu-arauak eta arau horien aldaketak eskola-kontseiluak onetsiko ditu. Hari dagokio ebaluatzea ere.

4. Antolaketa- eta funtzionamendu-arauek ikastetxeko langile guztiak behartuko dituzte betetzera, eta ikastetxeko hezkuntza-komunitatea lotetsiko dute.

5. Ikastetxeek beren antolaketa- eta funtzionamendu-arauak argitaratuko dituzte, hezkuntza-komunitateko kide guztiek ezagut eta kontsultatu ditzaten; eta eskura egotea ziurtatuko dute, ahal izanez gero baliabide elektroniko edo telematikoen bidez.

II. KAPITULUA. IKASTETXEEN GOBERNUA

9. artikulua. Gobernuorganoak.

1. Pertsona bakarreko gobernu-organoek eta kide anitzeko gobernu-organoek osatuko dituzte ikastetxeko gobernu-organoak.

2. Pertsona bakarreko gobernu-organoak hauek izanen dira (ikasketen antolaketa espezifikora eta ikastetxearen ezaugarrietara egokitzen ahalko dira):

a) Ikastetxeko zuzendaria.

b) Ikastetxeko zuzendariordea.

c) Ikastetxeko ikasketaburua.

d) Ikastetxeko idazkaria.

e) Hezkuntza Departamentuak zehaztu dezakeen pertsona bakarreko beste edozein gobernu-organo.

Pertsona bakarreko gobernu-organo horietako bakoitzerako izendatutako pertsonek osatuko dute ikastetxeko zuzendaritza-taldea.

Ikastetxe guztiek izan behar dute zuzendaria.

Zuzendaritza-taldeko gainerako kideak zehazteko, kontuan hartuko dira ikasle-kopurua, funtzionamendu-unitateak eta bestelako egoera bereziak.

3. Kide anitzeko gobernu-organoak izanen dira, gutxienez, eskola-kontseilua eta irakasleen klaustroa; nolanahi ere, ikasketen antolaketa espezifikora eta ikastetxearen ezaugarrietara egokitzen ahalko dira. Ikasketen araudi espezifikoan ezarritakoaren arabera, eskola-kontseiluak beste izen bat izaten ahalko du, baita foru dekretu honen 23. artikuluan ezarritakoez bestelako eskumenak ere.

10. artikulua. Jardueraprintzipioak.

1. Gobernu-organoen ardura da ikastetxeetako jarduerak Konstituzioaren printzipioekin eta balioekin bat egiten direla zaintzea, hezkuntzaren helburuak lortu eta hezkuntzaren kalitatea hobetu ahal izateko.

2. Gobernu-organoek eta ikastetxeek bermatuko dute, beren eskumenen eremuan, ikasleek, irakasleek, ikasleen gurasoek, ikasleen legezko ordezkariek eta irakasle ez diren langileek aitorturik dituzten eskubideak betetzen direla, eta begiratuko dute dagozkien betebeharrak betetzen dituztela. Era berean, erraztasunak emanen dituzte hezkuntza-komunitateko kide guztiek parte har dezaten ikastetxeko bizitzan, kudeaketan eta ebaluazioan.

3. Ikastetxeek, beren gobernu-organoen bidez, jarduerak erakundearen plangintza-dokumentuetan jasotakoaren arabera egiten direla zainduko dute.

III. KAPITULUA. IKASTETXEETAKO ZUZENDARITZA-TALDEA

11. artikulua. Zuzendaritzataldea.

1. Ikastetxeko pertsona bakarreko gobernu-organoetako titularrek osatuko dute ikastetxeko zuzendaritza-taldea.

2. Ikastetxeko zuzendaritza-taldea ikastetxearen antolaketa, pedagogia eta baliabideak kudeatzeaz arduratuko da, hiru arloak bateratuz eta lankidetzan oinarrituta.

3. Zuzendaritza-taldeak modu koordinatuan beteko ditu dagozkion zereginak, zuzendariak ematen dizkion jarraibideen arabera eta legez ezarrita dauzkan zeregin espezifikoak betez.

4. Hezkuntza Departamentuak behar diren neurriak hartuko ditu ikastetxeetako zuzendaritza-taldeen prestakuntza eta jarduera hobetzeko.

5. Ikastetxeek eskola-ordu batzuk izanen dituzte, astean, zuzendaritza-taldeek beren eginkizunak bete ditzaten. Talde horiek, beren eskumenak baliatzean, autonomia izanen dute zuzendaritzako zereginak betetzeko ikastetxeari egokitutako ordu-kopurua beren kideen artean banatzeko.

12. artikulua. Zuzendaritzataldearen eginkizunak.

Zuzendaritza-taldeak eskumen hauek izanen ditu:

a) Ikastetxeak egoki funtzionatzen duela zaintzea, eta, horretarako, hezkuntza-komunitatea osatzen duten pertsona guztien arteko lan- eta errespetu-giroa sustatzea.

b) Irakastea eta ikastea ez ezik, ikasleen prestakuntza osoa bultzatzen duten jarduerak gauzatzeko bide ematen duen eskola-giroa sustatzea.

c) Irakasleen artean elkarlan aktiboa sustatzea, irakaskuntza-jardunbidea hobetzeko ezagutza, esperientzia eta baliabideak partekatzeko.

d) Hezkuntza-komunitate osoak ikastetxeko bizitzan modu koordinatuan parte har dezan errazteko eta sustatzeko proposamenak aztertzea eta irakasleen klaustroari eta eskola-kontseiluari aurkeztea.

e) Ikastetxeko jarduerak eta proiektuak ebaluatzeko prozedurak proposatzea eta ikastetxearen funtzionamenduaren kanpo-ebaluazioetan parte hartzea.

f) Irakaskuntzaren kalitatea sustatzea eta baloratzea, irakasleen talde-lana eta berrikuntza pedagogikoa sustatuz, nagusiki.

g) Hezkuntza-komunitatean prebentzioko eta esku hartzeko jarduerak egitea, pertsona guztien arteko harremanak bultzatzeko eta emakumeen eta gizonen arteko berdintasuna errespetatzea sustatzeko.

h) Behar diren neurriak hartzea eskola-kontseiluak eta irakasle-klaustroak dagozkien eskumenen alorrean hartutako erabakiak modu koordinatuan egikaritzeko.

i) Honako hauek prestatzea, baloratzea, eguneratzea eta betetzen direla zaintzea: antolaketa- eta funtzionamendu-arauak, ikastetxeko hezkuntza-proiektua eta kudeaketa-proiektua, urteko programazio orokorra eta ikasturte hondarreko memoria. Horretarako, ikastetxeko kide anitzeko gobernu-organoek edo koordinazio pedagogikorako batzordeak beren eskumen-esparruetan aurrez onetsitako proposamenak baloratuko ditu, baita hezkuntza-komunitateko beste edozeinek egindako proposamenak ere.

j) Garraio- eta jantoki-zerbitzu osagarriak kudeatzen laguntzea, zerbitzu horiek dituzten ikastetxeetan, eta behar bezala ematen direla egiaztatzea, indarrean dagoen araudiaren arabera.

k) Irakasleen klaustroari eta hezkuntza-komunitateko gainerako kideei datu pertsonalak babesteko araudiaren berri ematea.

l) Horretarako ardura duen administrazio-unitateak ezarritako lan-arriskuak prebenitzeko ildoak lantzea eta mantentzea, eta aldizkako ebaluazioetan proposatutako segurtasun-neurri eraginkorrak hartzea. Halaber, ikastetxeko irakasleen eta irakasle ez diren langileen prestakuntza kudeatzea, larrialdi-planaren edukia ezagutu dezaten.

m) Ikasleak multzokatzea eta ikasgelak eta gainerako guneak banatzea.

n) Hezkuntza-komunitateko sektore guztien parte-hartzea sustatzea eta koordinatzea, eta dagozkien eskumenak behar bezala betetzeko behar dituzten bitartekoak ematea.

ñ) Ikastetxearen kudeaketan jasangarritasuneko eta energia-eraginkortasuneko neurriak sustatzea.

o) Agintaldia burutu aurretik, sartzen den zuzendaritza-taldeari laguntzea, eta ikastetxeak behar bezala funtzionatzeko behar duen informazio guztia ematea.

p) Foru dekretu honen gainerako artikuluetan eta ikastetxearen antolaketa- eta funtzionamendu-arauetan jasota dauden eta Hezkuntza Departamentuak edo indarrean dagoen araudiak egokitzen dizkion gainerako guztiak.

13. artikulua. Ikastetxeko zuzendaritza.

1. Ikastetxeko zuzendaria izanen da ikastetxeak egiten dituen jarduera guztien arduraduna, eta ikastetxeko antolaketa, kudeaketa eta jarduera pedagogikoa zuzenduko ditu, deusetan eragotzi gabe zuzendaritza-taldeko eta kide anitzeko gobernu-organoetako gainerako kideen eskumen, funtzio eta erantzukizunak.

2. Ikastetxe publikoetako zuzendariak hautatu, izendatu, ebaluatu, berritu eta kargutik kentzeko, oinarrizko araudian eta Hezkuntza Departamentuak ikasketetarako ezartzen dituen araudi espezifikoetan jasotakoa beteko da.

3. Haur Hezkuntzako ikastetxe espezifikoetan, Lehen Hezkuntzako ikastetxe osatugabeetan, zortzi unitate baino gutxiago dituzten Bigarren Hezkuntzako ikastetxeetan, arte-ikasketa profesionalak, kirol-ikasketak eta hizkuntza-ikasketak ematen dituzten ikastetxeetan eta zortzi irakasle baino gutxiago dituzten helduentzako ikastetxeetan, salbuespenezko egoeretan eta ikastetxeak ezin badu karrerako funtzionario edo lan-kontratuko langile finkoren bat zuzendari izendatu (ikastetxean horrelakorik ez dagoelako), ikastetxean irakaskuntza- edo hezkuntza-zerbitzuak ematen dituen beste norbait izendatzen ahalko du.

14. artikulua. Ikastetxeko zuzendariaren eskumenak.

Ikastetxeko zuzendariak eskumen hauek izanen ditu:

a) Zuzendaritza-taldeari egokitutako zereginak behar bezala betetzeko parte hartzea.

b) Ikastetxearen ordezkari izatea, ikastetxean Hezkuntza Departamentua ordezkatzea eta hari hezkuntza-komunitatearen planteamendu, asmo eta beharren berri ematea.

c) Ikastetxearen jarduerak zuzentzea eta koordinatzea, irakasleen klaustroari eta eskola-kontseiluari egokitutako eskumenak eragotzi gabe, eta antolaketa, jarduera pedagogikoa eta baliabideen kudeaketa zuzentzea.

d) Ikastetxeko hezkuntza-proiektuaren helburuak lortzeko hezkuntza-programak, lan-planak, esperimentazioak eta berrikuntza pedagogikoak bultzatzea.

e) Legeak eta indarrean dauden gainerako xedapenak betetzen direla bermatzea.

f) Ikastetxeari atxikitako langile guztien buru izatea eta haien diziplinazko faltak Hezkuntzako Ikuskapen Zerbitzuari jakinaraztea.

g) Ikastetxeko aurrekontu-proiektua eta aurrekontua aldatzeko proposamena egitea eta eskola-kontseiluari aurkeztea, onets ditzan. Horretarako, ikastetxeko idazkariaren laguntza izanen du.

h) Ikastetxean bizikidetza erraztea, gatazkak konpontzeko bitartekotza bermatzea eta ikasleei dagozkien hezkuntza-neurriak ezartzea, indarrean dagoen araudia betez, eskola-kontseiluak dauzkan eskumenak eragotzi gabe.

i) Hezkuntza-komunitatea osatzen duten pertsonei kanpo-erasoen aurreko jarduera-protokoloaren eta ikastetxe barruko langileen arteko gatazka, jazarpen, sexu-jazarpen, sexuagatiko jazarpen eta bestelako indarkeria-moten aurreko jarduera-protokoloaren berri ematea, eta, horrelakorik gertatzen bada, legez aurreikusitako mekanismoak aktibatzea.

j) Familiekin, instituzioekin eta ikastetxearen eta ingurunearen arteko harremana bultzatzen duten erakundeekin elkarlana bultzatzea, eta eskola-giro egokia sustatzea, ikasleek ikas dezaten eta jakintzetan eta balioetan osoki prestatzea laguntzen duten jarduerak egin ahal izan daitezen.

k) Ikastetxearen barne-ebaluazioak bultzatzea eta kanpo-ebaluazioetan eta laguntzea, nola ikastetxearen hala irakasleen jardunari dagokionez.

l) Ekitaldi akademikoetara, ikastetxeko kide anitzeko organoen bileretara eta kide den irakaskuntza-koordinazioko organoen bileretara deitzea eta haietan buru izatea, foru dekretu honetan eta berau garatzen duen araudian ezarritakoaren arabera. Horrez gain, bere eskumenen esparruan hartutako erabakiak betearaztea.

m) Obra, zerbitzu eta hornidurak kontratatzea, ikastetxeko aurrekontuaren arabera gastuak baimentzea, ordainketak agintzea eta ikastetxeko ziurtagiri eta dokumentu ofizialak ikus-onestea. Hori guztia, indarrean dagoen araudiaren edo Hezkuntza Departamentuak ezarritakoaren arabera.

n) Ikastetxeko langileek hezkuntza-plataforma digitala erabili ahal izateko baliabideak jartzea.

ñ) Hezkuntza Departamenduari zuzendaritza-taldeko gainerako kideen izendapena eta kargu-uztea proposatzea, aldez aurretik ikastetxeko irakasleen klaustroari eta eskola-kontseiluari jakinarazita.

o) Irakasleen kualifikazioa eta prestakuntza sustatzea, bai eta ikerketa, esperimentazioa eta hezkuntza berrikuntza ere ikastetxean.

p) Urteko programazio orokorrean jasotako ikastetxearen irakaskuntza-plangintza eta -antolamendua diseinatzea eta exekutatzea.

q) Koordinazio-organoak dituzten irakasleak izendatzea eta kargutik kentzea, baldin eta hori egitea beste organo bati ez badagokio; baita koordinazio-batzorde edo -taldeetako beste langile edo arduradunak izendatzea eta kargutik kentzea ere.

r) Hezkuntza Departamentuak eskatzen dion informazioa ematea.

s) Zuzendaritza-taldeko gainerako kideekin batera lan egitea, pertsona bakarreko gobernu-organoei dagozkien zereginak behar bezala betetzeko.

t) Ikastetxeko langileen ordutegia onestea.

u) Hezkuntza-komunitateko sektoreen bilera-eskubidea bermatzea, baldin eta eskubide hori badute.

v) Ikastetxean hezkuntza-, gizarte-, kultura- eta kirol-jarduerak egiteko baimena ematea, indarrean dagoen araudiaren arabera.

w) Ikasleren bat arrisku- edo babesgabetasun-egoeran badago, oinarrizko gizarte-zerbitzuei jakinarazteaz arduratzea.

x) Ikastetxeko larrialdi-plana betetzen dela zaintzea, aldizka ebakuazio-simulazioak egitea eta unitate administratibo eskudunari emaitzaren berri ematea.

y) Foru dekretu honen gainerako artikuluetan edo ikastetxearen antolaketa- eta funtzionamendu-arauetan egokitutako gainerako eskumen guztiak, baita Hezkuntza Departamentuak eta indarrean dagoen araudiak egokitutako guztiak ere.

15. artikulua. Ikastetxeko zuzendariordearen eskumenak.

Ikastetxeko zuzendariordeak eskumen hauek izanen ditu:

a) Zuzendaritza-taldeari egokitutako zereginak behar bezala betetzeko parte hartzea.

b) Jarduera osagarrien eta eskolaz kanpoko jardueren programa prestatzeaz eta, hala badagokio, eguneratzeaz arduratzea, eta programa hori ebaluatzea. Ebaluazio hori ikasturte hondarreko memorian jaso beharko da.

c) Jarduera osagarriak eta eskolaz kanpokoak koordinatzea, egiten direla ziurtatzea eta egiten direnean ikasleek arreta egokia jasotzen dutela zaintzea.

d) Ikastetxean egiten diren jarduera osagarri eta eskolaz kanpoko jarduera guztien erregistro eguneratua eramatea.

e) Eskola-kontseiluak onetsitako baliabide ekonomikoak, hau da, jarduera osagarriak eta eskolaz kanpokoak egiteko erabiliko direnak, ikastetxearen aurrekontu-proiektuan nola banatu proposatzea.

f) Urteko programazio orokorrean jasotako irakasleen prestakuntza-plana prestatzeaz eta, hala badagokio, eguneratzeaz arduratzea, eta plan hori ebaluatzea. Ebaluazio hori ikasturte hondarreko memorian jaso beharko da.

g) Ikastetxeko zuzendariari dauzkan eskumenetan laguntzea, eta zuzendaritza-taldeko gainerako kideekin batera lan egitea, pertsona bakarreko gobernu-organoei dagozkien zereginak behar bezala betetzeko.

h) Ikastetxeko zuzendariak (dagozkion eskumenen esparruan), Hezkuntza Departamentuak eta indarrean dagoen araudiak egokitutako gainerako zereginak, eta foru dekretu honen gainerako artikuluetan eta ikastetxearen antolaketa- eta funtzionamendu-arauetan egokitutako gainerako guztiak.

16. artikulua. Ikastetxeko ikasketaburuaren eskumenak.

Ikastetxeko ikasketaburuak eskumen hauek izanen ditu.

a) Zuzendaritza-taldeari egokitutako zereginak behar bezala betetzeko parte hartzea.

b) Ikastetxeko irakasleen eta hezkuntza-zereginak betetzen dituzten langileen buru izatea, zuzendariak eskuordetuta.

c) Ikasleen eta irakasleen ordutegia prestatzea eta betetzen dela zaintzea.

d) Programazio didaktikoen lanketa gainbegiratzea eta haren berrikuspena eta jarraipena zuzentzea.

e) Irakaskuntza koordinatzeko organoek ikasketetan erabiltzea proposatutako testuliburuak eta materialak aukeratzeko prozesua koordinatzea eta gainbegiratzea.

f) Izaera akademikoko eta orientazioko jarduerak eta bilerak programatzea, eta programatutakoa betetzen dela zaintzea.

g) Ebaluazio-prozesuaren plangintza orokorra egitea, eta hiru hilez behingo azterketen, azken azterketen eta ebaluazio-saioen egutegia zehaztea.

h) Ebaluazio-saioak burutu ondoren, emaitzen, ikasleen hutsegiteen eta eman ez diren eskolen estatistikak egitea, arlo, jakintzagai, eremu, modulu edo irakasgai eta talde bakoitzeko; eta irakasle-taldeek egokitzat jotzen duten beste edozein txosten egitea.

i) Irakasle-taldeen zereginak koordinatzea eta betetzen dituztela zaintzea.

j) Ikastetxeko zuzendariari tutoretzez arduratuko diren irakasleak izendatzeko proposamena egitea.

k) Arauek hala agintzen duten ikasketetan, tutoretza- eta orientazio-ekintzak koordinatzea, ikastetxeko tutoretza-planean jasotakoaren arabera, eta horretarako zehazten diren aldizkako bileretan buru izatea.

l) Irakasleen eta hezkuntza-eginkizunak dituzten langileen lanaldia betetzen dela kontrolatzea; bajen, hutsegiteen, baimenen eta lizentzien justifikazioak kudeatzea; eta egoera horiek eta ikastetxearen ohiko funtzionamenduan eragina duten gainerako gertakariak kudeatzeko mekanismoak ezartzea.

m) Ikasleen hutsegiteak kontrolatzeko prozedura ezartzea, eta eskola-absentismoa prebenitzeko eta zuzentzeko jarduerak koordinatzea.

n) Ikasleak antola daitezen erraztea, ikastetxean parte har dezaten sustatzeko.

ñ) Taldeko ordezkariak aukeratzeko hauteskundeak antolatzea eta horietarako deialdia egitea, taldeetako tutoreekin elkarlanean; eta, hala badagokio, ordezkarien batzordeen antolaketa- eta funtzionamendu-araubidea onestea.

o) Ikasleen arreta egokia izan dadin antolatzea, ikastetxeko gune guztietan eta eskola-aldi osoan.

p) Ikasleek ebaluazioetan izan dituzten emaitza akademikoak aztertzeko prozesua antolatzea.

q) Irakasle heldu berrientzako harrera-plana egitea.

r) Zuzendaritza-taldeko gainerako kideekin batera lan egitea, pertsona bakarreko gobernu-organoei dagozkien zereginak behar bezala betetzeko.

s) Ikastetxeko zuzendariak (dagozkion eskumenen esparruan), Hezkuntza Departamentuak eta indarrean dagoen araudiak egokitutako gainerako zereginak, eta foru dekretu honen gainerako artikuluetan eta ikastetxearen antolaketa- eta funtzionamendu-arauetan egokitutako gainerako guztiak.

17. artikulua. Ikastetxeko idazkaritzaren eskumenak.

Ikastetxeko idazkariak eskumen hauek izanen ditu:

a) Zuzendaritza-taldeari egokitutako zereginak behar bezala betetzeko parte hartzea.

b) Zuzendariak eskuordetuta, administrazio eta zerbitzuetako langileen buru izatea, hezkuntza-eginkizunak dituztenena izan ezik; lanaldia betetzen dela zaintzea; bajen, hutsegiteen, baimenen eta lizentzien justifikazioak kudeatzea; eta egoera horiek eta ikastetxearen ohiko funtzionamenduan eragina duten gainerako gertakariak kudeatzeko mekanismoak ezartzea.

c) Ikastetxeko zuzendariarekin lankidetzan aritzea aurrekontuaren proiektua eta haren aldaketen proposamenak prestatzen.

d) Araubide administratibo eta ekonomikoa antolatzea, kudeaketa-proiektuaren prestaketa koordinatzea eta ikastetxearen kontabilitatea eramatea, indarrean dagoen araudiaren arabera, eta kontabilitate horri buruzko kontuak ematea eskola-kontseiluari eta, hala badagokio, Hezkuntza Departamentuari, hark berariaz eskatuz gero.

e) Ikastetxeko kide anitzeko gobernu-organoetako eta koordinazio pedagogikorako batzordeko idazkari aritzea, bilkuren aktak egitea eta hartutako erabakien fede ematea zuzendariaren oniritziarekin.

f) Ikastetxearen berezko dokumentazioa zaintzea eta datu pertsonalak babesteko araudia betetzen dela bermatzea.

g) Ikasleen dokumentazio akademikoa behar bezala bete, bideratu, erregistratu eta zaintzen dela begiratzea.

h) Hezkuntza-agintariek eta interesdunek eskatutako ziurtagiriak egitea.

i) Dokumentu administratiboak alderatzea eta konpultsatzea, eta behar diren izapideak egitea, indarrean dagoen araudiaren arabera.

j) Ikastetxeko inbentario orokorra egitea eta eguneratuta edukitzea.

k) Ikastetxean eskaintzen diren zerbitzu osagarriei dagozkien lanak koordinatzea.

l) Eskola-liburutegiaren, ikus-entzunezko baliabideen eta gainerako baliabide didaktikoen erabilera koordinatzea.

m) Ikastetxeko hezkuntza-jarduerarako behar den materiala zaintzea eta prestatzea, eta behar bezala erabiltzen eta mantentzen dela zaintzea.

n) Instalazioak eta ekipamendua behar bezala erabiltzen eta mantentzen direla zaintzea, eta, hala badagokie, mantentzeko lan eta eskaerak eta berritzeko eskaera eta erosketak kudeatzea.

ñ) Zuzendaritza-taldeko gainerako kideekin batera lan egitea, pertsona bakarreko gobernu-organoei dagozkien zereginak behar bezala betetzeko.

o) Ikastetxeko zuzendariak (dagozkion eskumenen esparruan), Hezkuntza Departamentuak eta indarrean dagoen araudiak egokitutako gainerako zereginak, eta foru dekretu honen gainerako artikuluetan eta ikastetxearen antolaketa- eta funtzionamendu-arauetan egokitutako gainerako guztiak.

18. artikulua. Pertsona bakarreko gobernuorgano atxikien eskumenak.

1. Hezkuntza Departamentuak zehazten dituen pertsona bakarreko gobernu-organo atxikien eskumenak izanen dira, batetik, haien homologo den karguari dagozkionak, egokitzen zaizkien esparruetan; eta bestetik, Hezkuntza Departamentuak eta zuzendariak agintzen dizkietenak eta indarrean dagoen araudian jasota daudenak, betiere beren eskumenen esparruan.

2. Pertsona bakarreko gobernu-organo atxikiek haien homologo diren pertsona bakarreko gobernu-organoekin koordinatuta lan eginen dute.

3. Pertsona bakarreko gobernu-organo atxikiak, izendatu ondoren, zuzendaritza-taldeko kide izanen dira, eta, eskola-kontseiluko kidetzat hartzen ez badira ere, zuzendariak kide anitzeko organo horren bileretara deitzen ahalko ditu; bilera horietan hitza izanen dute, baina botorik ez.

19. artikulua. Pertsona bakarreko gobernuorganorik eza.

Ikastetxearen egitura dela eta foru dekretu honen 9.2 artikuluan aipatzen diren pertsona bakarreko gobernu-organoetakoren bat falta bada, hari dagozkion eskumenak ikastetxeko zuzendaritza-taldea osatzen duten pertsona bakarreko gobernu-organoen artean banatuko ditu ikastetxeko zuzendariak, foru dekretu honen 24.4, 28.2, 32.2 eta 36.2 artikuluetan jasotako salbuespenak kontuan hartuta.

20. artikulua. Zuzendaritzataldeko kideak ordezkatzeko araubidea.

1. Zuzendaria kanpoan edo gaixorik badago, zuzendariak berak edo, bestela, Hezkuntzako Ikuskapen Zerbitzuak erabakiko du haren eginkizunez behin-behinean nor arduratuko den; betiere, ikastetxeko zuzendaritza-taldeko kide bat edo irakasleen klaustroko irakasle bat izanen da. Zuzendaritza-taldean zuzendaria bakarrik badago, klaustroko irakasle batek hartuko ditu bere gain, behin-behinean, haren eginkizunak; irakasle hori zuzendariak berak edo, bestela, Hezkuntzako Ikuskapen Zerbitzuak izendatuko du.

2. Zuzendaritza-taldeko beste edozein kide kanpoan edo gaixorik badago, ikastetxeko zuzendariak haren eginkizunak egokituko dizkio, behin-behinean, zuzendaritza-taldeko beste pertsona bati edo klaustroko irakasle bati.

3. Zuzendariak, hamabost egun natural baino gehiago egiten baditu kanpoan edo gaixorik, eskola-kontseiluari eta Hezkuntzako Ikuskapen Zerbitzuari emanen die behin-behineko izendapenen berri.

IV. KAPITULUA. KIDE ANITZEKO GOBERNU-ORGANOAK ETA KIDE ANITZEKO PARTAIDETZA-ORGANOAK

1. ATALA. IKASTETXEKO ESKOLA-KONTSEILUA

21. artikulua. Eskolakontseilua.

1. Eskola-kontseilua kide anitzeko gobernu-organo bat da, eta haren bitartez bermatzen da hezkuntza- edo gizarte-komunitatea osatzen duten sektoreek, dagozkien ordezkarien bitartez, ikastetxearen gobernuan parte hartzea.

2. Eskola-kontseiluaren araubide juridikoa oinarrizko araudian, administrazio publikoetako kide anitzeko organoak arautzen dituen legerian, foru dekretu honetan eta berau garatzen duen araudian ezarritakoa izanen da.

22. artikulua. Eskolakontseiluaren osaera.

1. Hezkuntza Departamentuak arau bidez zehaztuko ditu eskola-kontseiluak zenbat kide izanen dituen eta nola hautatuko diren. Hori, kontuan hartuta, batetik, indarrean dagoen araudian zehaztutako osaera, eta, bestetik, ikastetxeen ezaugarriak eta ikasketa-motak. Hezkuntza Departamentuak neurriak hartuko ditu organo horretan emakumeen eta gizonen presentzia orekatua izan dadin.

2. Halaber, Hezkuntza Departamentuak eskola-kontseiluko kideak berritzeko prozesua zehaztuko du, arau bidez.

23. artikulua. Eskolakontseiluaren eskumenak.

Ikastetxeko eskola-kontseiluak eskumen hauek izanen ditu:

a) Ikastetxearen antolaketa- eta funtzionamendu-arauak, kudeaketa-proiektua eta hezkuntza-proiektua onetsi eta ebaluatzea; hori, irakasleen klaustroak hezkuntza-proiektuaren arlo hauetan dituen eskumenak eragotzi gabe: hezkuntza, pedagogia eta curriculumaren zehaztapena.

b) Ikastetxeko urteko programazio orokorra eta ikasturteko azken memoria onestea eta ebaluatzea, deusetan galarazi gabe irakasleen klaustroak arlo hauetan dituen eskumenak: hezkuntza, pedagogia eta curriculumaren zehaztapena.

c) Hautagaiek zuzendaritzarako aurkezten dituzten hautagai-zerrenden eta zuzendaritza-proiektuen berri izatea.

d) Ikastetxeko zuzendariaren hautaketan parte hartzea, indarrean dagoen araudian jasotako baldintzetan, zuzendaritza-taldeko gainerako pertsonen izendapen eta kargu-uzteen berri izatea, eta, hala badagokio, zuzendariaren izendapena atzera botatzea proposatzea; azken hori zuzendaritza-taldeko kideek adostu behar dute aurrez, bi hereneko gehiengoarekin.

e) Haurren eskubideen aitortza eta babesa sustatzen duten hezkuntzako neurriak har daitezen bultzatzea eta neurrion jarraipena egitea.

f) Honako alderdi hauek bultzatzeko neurriak eta ekimenak proposatzea: bizitzeko era osasungarriak; bizikidetza ikastetxean; emakumeen eta gizonen arteko benetako berdintasuna; diskriminaziorik eza; eskola-jazarpenaren eta genero-indarkeriaren prebentzioa eta gatazkak modu baketsuan konpontzea norberaren bizitzan, familian eta gizartean.

g) Bizikidetzaren aurkako portaeren berri izatea eta hezkuntzako eta bitartekaritzako neurriak eta neurri zuzentzaileak aplikatzea, neurriok indarrean dagoen araudiaren araberakoak direla zainduta. Zuzendariak neurri zuzentzaileak hartzen dituenean ikasleek ikastetxeko bizikidetzari kalte nabarmena kalte egiten dioten portaerak izan dituztelako, eskola-kontseiluak, gurasoek edo legezko tutoreek edo, bestela, ikasleek hala eskatuta, hartutako erabakia berrikusten ahalko du, eta hala badagokio, neurri egokiak proposatu.

h) Eskolako instalazioak, ekipamendua eta beste baliabide eta bitarteko batzuk ere zaindu eta berritu daitezen sustatzea, pixkanaka, kalitatea eta iraunkortasuna hobetzeko, eta baliabide osagarriak eskuratzea onestea, indarrean dagoen araudian jasotakoaren arabera.

i) Toki-administrazioekin eta beste ikastetxe, erakunde eta entitate batzuekin lankidetzan aritzeko irizpideak finkatzea, hezkuntza- eta kultura-arloko helburuak lortzearren.

j) Honako hauek aztertzea eta baloratzea: ikastetxearen jardun orokorra, eskola errendimenduaren bilakaera eta ebaluazioen emaitzak (ikastetxeak parte hartzen duen barneko zein kanpoko ebaluazioen emaitzak).

k) Araudiak eskola-jantokien arloan egokitutako zereginak betetzea.

l) Bere ekimenez edo Hezkuntza Departamenduak aginduta proposamenak eta txostenak egitea ikastetxearen funtzionamenduari eta kudeaketaren kalitatea hobetzeari buruz, baita kudeaketaren kalitatearekin lotutako beste alderdi batzuei buruz ere.

m) Ikastetxearen aurrekontua eta haren aldaketak onestea.

n) Foru dekretu honen gainerako artikuluetan edo ikasketen araudi espezifikoan egokitutako gainerako eskumen guztiak, baita Hezkuntza Departamentuak eta indarrean dagoen araudiak egokitutako guztiak ere.

24. artikulua. Eskolakontseiluaren funtzionamendua.

1. Eskola-kontseilua eskola-hiruhileko bakoitzaren hondarrean bilduko da, gutxienez. Era berean, zuzendariak deialdia egiten duen guztietan edo gutxienez kideen herenek eskatzen dutenean bilduko da. Betiere, ikasturte-hasieran bilera bat eginen da, nahitaez.

2. Kide guztiak bertaratzen ahal diren egun eta ordu batean bilduko da eskola-kontseilua, ahal dela. Zuzendariak deialdia bidaliko die eskola-kontseiluko kideei, bilera egin baino bost egun natural lehenago, gutxienez. Deialdian jasoko ditu, batetik, gai-zerrenda; eta bestetik, eztabaidatu eta, hala badagokio, onetsiko den dokumentazioa. Aztertu beharreko gaiak hala eskatzen badu, deialdi bereziak ere egiten ahalko ditu, bilera egin baino berrogeita zortzi ordu lehenago, gutxienez.

Era berean, zuzendariak bileran parte hartzeko baimena ematen ahalko die eskola-kontseilutik kanpoko beste pertsona batzuei; pertsona horiek hitza izanen dute bileran, baina botorik ez.

3. Eskola-kontseiluak gehiengo soilez hartuko ditu erabakiak, non eta, landu beharreko gaien izaeraren arabera, arau bidez bestelako gehiengorik ezartzen ez den.

4. Eskola-kontseiluaren bileretako burua ikastetxeko zuzendaria izanen da. Idazkari-lanak ikastetxeko idazkariak eginen ditu, hitza bai baina botorik ez duela. Kargu hori ez duten ikastetxeetan, eskola-kontseiluko irakasle batek beteko du zeregin hori. Irakasle hori zuzendariak aukeratuko du, eta, irakasleen ordezkari gisa, hitza eta botoa izaten jarraituko du.

5. Era berean, ikastetxeko eskola-kontseiluak nahi adina lan-batzorde eratzen ahalko ditu; batzorde horiek ez dira ez erabakitzaileak ez lotesleak izanen.

2. ATALA. IKASTETXEKO IRAKASLEEN KLAUSTROA

25. artikulua. Irakasleen klaustroa.

1. Irakasleen klaustroa kide anitzeko gobernu-organo bat da, irakasleek ikastetxearen gobernuan parte hartzea bermatzen duena.

2. Irakasleen klaustroa arduratzen da ikastetxearen hezkuntza-proiektuan eta urteko programazio orokorrean jasotako hezkuntza-kontu guztiei buruzko informazioa emateaz eta, hala badagokio, haien inguruko erabakiak hartzeaz.

3. Irakasleen klaustroaren araubide juridikoa oinarrizko araudian, administrazio publikoetako kide anitzeko organoak arautzen dituen legerian, foru dekretu honetan eta hau garatzen duen araudian ezarritakoa izanen da.

26. artikulua. Irakasleen klaustroaren osaera.

Klaustroa ikastetxean zerbitzua ematen duten irakasle guztiek osatuko dute.

27. artikulua. Irakasleen klaustroaren eskumenak.

Ikastetxeko klaustroak eskumen hauek izanen ditu:

a) Zuzendaritza-taldeari eta eskola-kontseiluari ikastetxeko hezkuntza-proiektua, kudeaketa-proiektua eta urteko programazio orokorra prestatzeko proposamenak egitea.

b) Curriculumaren zehaztapena eta hezkuntza-proiektuaren, urteko programazio orokorraren eta ikasturte-bukaerako memoriaren hezkuntza-alderdi eta alderdi pedagogiko guztiak onestea eta ebaluatzea.

c) Ikasleen tutoretzari, orientazioari, ebaluazioari eta errekuperazioari buruzko irizpideak finkatzea.

d) Ekimenak sustatzea esperimentazioaren eta ikerketa pedagogikoaren arloan eta ikastetxeko irakasleen prestakuntzarenean.

e) Ikastetxeko eskola-kontseiluan izanen dituzten ordezkariak aukeratzea eta zuzendaria hautatzeko prozesuan parte hartzea, indarrean dagoen araudian ezarritako baldintzetan.

f) Hautagaiek zuzendaritzarako aurkezten dituzten hautagai-zerrenden eta zuzendaritza-proiektuen berri izatea.

g) Honako hauek aztertzea eta baloratzea: ikastetxearen jardun orokorra, eskola errendimenduaren bilakaera eta ebaluazioen emaitzak (ikastetxeak parte hartzen duen barneko zein kanpoko ebaluazioen emaitzak).

h) Antolaketa- eta funtzionamendu-arauen gaineko txostenak egitea.

i) Diziplina-gatazkak nola konpondu diren eta ezarri diren zehapenak ezagutzea, eta indarrean den araudiaren araberakoak izan daitezela begiratzea.

j) Ikastetxean bizikidetza errazten duten neurriak eta ekimenak proposatzea.

k) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoan egokitutako gainerako eskumen guztiak, baita Hezkuntza Departamentuak eta indarrean dagoen araudiak egokitutako guztiak ere.

28. artikulua. Irakasleen klaustroaren funtzionamendua.

1. Irakasleen klaustroaren bileretako burua ikastetxeko zuzendaria izanen da.

2. Irakasleen klaustroaren bileretan, idazkari-lanak ikastetxeko idazkariak eginen ditu, hitza eta botoa dituela. Kargu hori ez duten ikastetxeetan, zeregin hori zuzendariak izendatutako klaustrokide batek hartuko du bere gain, orobat hitza eta botoa dituela.

3. Irakasleen klaustroa eskola-hiruhileko bakoitzaren hondarrean bilduko da, gutxienez. Era berean, zuzendariak deialdia egiten duen guztietan edo gutxienez kideen laurdenek eskatzen dutenean bilduko da. Betiere, ikasturte-hasieran bilera bat eginen da, nahitaez.

4. Irakasle-klaustroaren saioetara joatea nahitaezkoa izanen da kide guztientzat.

5. Hezkuntza-laguntzako espezialistek, haur-hezitzaileek eta antzeko langileek parte har dezaten errazte aldera, ikastetxeek baimena ematen ahalko diete klaustroko bileretara joateko. Betiere, langile horiek beren borondatez joanen dira bileretara, eta hitza izanen dute, baina botorik ez.

3. ATALA. GOI-MAILAKO ARTE-IKASKETAK EMATEN DITUZTEN IKASTETXEETAKO KONTSEILUA

29. artikulua. Ikastetxeko kontseilua.

1. Goi-mailako arte-ikasketak ematen dituzten ikastetxeetako kontseilua kide anitzeko gobernu-organo bat da, ikastetxeko hezkuntza-komunitatea osatzen duten kolektibo hauek beren ordezkarien bitartez parte har dezaten bermatzen duena: ikasleak, administrazio eta zerbitzuetako langileak, irakasleak, ikertzaileak eta, hala badagokie, ikastetxearekin lotura duten edo harekin elkarlanean aritzen diren beste erakunde batzuk.

2. Ikastetxeko kontseiluaren araubide juridikoa oinarrizko araudian, administrazio publikoetako kide anitzeko organoak arautzen dituen legerian, foru dekretu honetan eta hau garatzen duen araudian ezarritakoa izanen da.

30. artikulua. Ikastetxeko kontseiluaren osaera.

1. Hezkuntza Departamentuak finkatuko du, arau bidez, ikastetxeko kontseiluak zenbat kide izanen dituen eta nola hautatuko diren, eta indarrean dagoen araudian zehaztutako kideek organo horretan parte hartzen dutela bermatuko du. Hezkuntza Departamentuak neurriak hartuko ditu organo horretan emakumeen eta gizonen presentzia orekatua izan dadin.

2. Halaber, Hezkuntza Departamentuak ikastetxeko kontseiluko kideak berritzeko prozesua zehaztuko du, arau bidez.

31. artikulua. Ikastetxeko kontseiluaren eskumenak.

1. Ikastetxeko eskola-kontseiluak eskumen hauek izanen ditu:

a) Erakundearen proiektua, kudeaketa-proiektua, bizikidetza-arauak eta ikastetxeko kalitatea bermatzeko barne-estrategiak onestea eta ebaluatzea, erabakitzen den maiztasunarekin.

b) Zuzendaritzarako aurkeztutako hautagaiak eta zuzendaritza-proiektuak ezagutzea, eta zuzendaritza-taldearen gainerako kideen izendapenen eta kargu-uzteen berri jasotzea.

c) Hala badagokio, zuzendariaren izendapena atzera bota dadin proposatzea, bi hereneko gehiengoz onetsita.

d) Ikastetxeko zuzendaria hautatzeko prozesuan parte hartzea.

e) Goi-mailako arte-ikasketetako graduak edo arte-ikasketetako masterra eskuratzeko ikasketa-planen proposamenei buruzko txostenak egitea eta, hala badagokio, baita berezko tituluen edo ikastetxean ematen diren beste ikasketa batzuen ikasketa-planei buruzkoak ere.

f) Ikerketako, berrikuntzako eta ezagutza transferitu eta trukatzeko proiektuak abian jartzea onestea.

g) Foru dekretu honen gainerako artikuluetan edo ikasketen araudi espezifikoan egokitutako gainerako eskumen guztiak, baita Hezkuntza Departamentuak eta indarrean dagoen araudiak egokitutako guztiak ere.

2. Goi-mailako arte-ikasketez gain beste ikasketa-mota batzuk ematen dituzten ikastetxeetan, ikastetxeko kontseiluaren berezko eskumenei gehituko zaizkie foru dekretu honen 23. artikuluan jasotako eskola-kontseiluaren eskumenak.

32. artikulua. Ikastetxeko kontseiluaren funtzionamendua.

1. Hezkuntza Departamentuari dagokio ikastetxeko kontseiluaren funtzionamendua arau bidez zehaztea.

2. Ikastetxeko kontseiluaren bileren burua ikastetxeko zuzendaria izanen da beti, eta idazkari-lanak ikastetxeko idazkariak eginen ditu, hitza bai baina botorik ez duela. Kargu hori ez duten ikastetxeetan, ikastetxeko kontseiluko irakasle batek beteko du zeregin hori. Irakasle hori zuzendariak aukeratuko du eta, irakasleen ordezkari gisa, hitza eta botoa izaten jarraituko du.

4. ATALA. LANBIDE HEZIKETAREN SISTEMAKO IKASTETXEETAKO GIZARTE-KONTSEILUA

33. artikulua. Gizartekontseilua.

1. Gizarte-kontseilua gizarteak ikastetxe integratuetan parte hartzeko kide anitzeko organoa da.

2. Lanbide Heziketaren Sistemako gainerako ikastetxeek ere gizarte-kontseilua izan dezakete, Hezkuntza Departamentuak erabakitzen duenaren arabera.

3. Gizarte-kontseiluaren araubide juridikoa oinarrizko araudian, administrazio publikoetako kide anitzeko organoak arautzen dituen legerian, foru dekretu honetan eta hura garatzen duen araudian ezarritakoa izanen da.

34. artikulua. Gizartekontseiluaren osaera.

1. Hezkuntza Departamentuak arau bidez zehaztuko du gizarte-kontseiluko kideak hautatzeko prozesua, indarrean dagoen araudian jasotako osaera kontuan hartuta. Hezkuntza Departamentuak neurriak hartuko ditu organo horretan emakumeen eta gizonen presentzia orekatua izan dadin.

2. Kontseiluko kideak berritzeko prozesua ere Hezkuntza Departamentuak zehaztuko du, arau bidez.

35. artikulua. Gizartekontseiluaren eskumenak.

Oinarrizko araudian jasotakoaren arabera, Hezkuntza Departamentuak zehaztuko ditu gizarte-kontseiluaren eskumenak, foru dekretu hau garatzen duen araudi espezifikoan.

36. artikulua. Gizartekontseiluaren funtzionamendua.

1. Gizarte-kontseiluaren bileretako burua ikastetxeko zuzendaria izanen da.

2. Gizarte-kontseiluaren bileretan, idazkari-lanak ikastetxeko idazkariak eginen ditu, hitza bai baina botorik ez duela. Kargu hori ez duten ikastetxeetan, gizarte-kontseiluko irakasle batek beteko du zeregin hori. Irakasle hori zuzendariak aukeratuko du, eta, irakasleen ordezkari gisa, hitza eta botoa izaten jarraituko du.

V. KAPITULUA. IKASTETXEETAKO IRAKASKUNTZA KOORDINATZEKO ORGANOAK

37. artikulua. Xedapen orokorrak.

1. Irakaskuntza koordinatzeko organoek lankidetzaren eta talde-lanaren printzipioen eta efizientzia- eta eraginkortasun-irizpideen arabera beteko dituzte beren eginkizunak.

2. Horretarako, irakasleek koordinaturik egin beharko dute lan, bai maila horizontalean, bai maila bertikalean.

3. Ikastetxeko zuzendariak, irakaskuntza koordinatzeko organoetan erantzukizuneko karguak ematen dituenean, ikastetxeko antolaketa pedagogikoa hobetzeari eta giza baliabideak eta antolakuntzako baliabideak hobeki aprobetxatzeari begiratuko die.

4. Irakaskuntza koordinatzeko organoen bileretara joatea nahitaezkoa izanen da kide guztientzat.

38. artikulua. Irakaslana koordinatzeko organoak.

1. Lehen Hezkuntzako ikastetxeek eta Haur eta Lehen Hezkuntzakoek irakaskuntza koordinatzeko organo hauek izanen dituzte:

a) Taldeko irakasle-taldeak.

b) Zikloko irakasle-taldeak.

c) Hezkuntza-laguntzako unitatea.

d) Koordinazio pedagogikorako batzordea.

e) Tutoretza.

f) Hezkuntza Departamentuak onesten duen beste edozein koordinazio-organo.

2. Oinarrizko Hezkuntzako ikastetxeek gobernu-organo hauek izanen dituzte irakaslana koordinatzeko:

a) Taldeko irakasle-taldeak.

b) Zikloko irakasle-taldeak, Haur eta Lehen Hezkuntzan.

c) Koordinazio didaktikoko departamentuak, Derrigorrezko Bigarren Hezkuntzan.

d) Hezkuntza-laguntzako unitatea.

e) Koordinazio pedagogikorako batzordea.

f) Tutoretza.

g) Hezkuntza Departamentuak onesten duen beste edozein koordinazio-organo.

3. Derrigorrezko Bigarren Hezkuntzako institutuek eta Bigarren Hezkuntzako institutuek irakaskuntza koordinatzeko organo hauek izanen dituzte:

a) Taldeko irakasle-taldeak.

b) Koordinazio didaktikoko departamentuak.

c) Hezkuntza- eta lanbide-orientazioko departamentua.

d) Koordinazio pedagogikorako batzordea.

e) Tutoretza.

f) Hezkuntza Departamentuak onesten duen beste edozein koordinazio-organo.

Derrigorrezko Bigarren Hezkuntzako edo Batxilergoko ikasketez gain Lanbide Heziketako ikasketak ere ematen dituzten institutuetan, irakaskuntza koordinatzeko beste organo batzuk ere egon daitezke, Hezkuntza Departamentuak edo, bestela, indarrean dagoen araudiak agindutakoarekin bat.

4. Lanbide Heziketa ematen duten ikastetxeek gobernu-organo hauek izanen dituzte irakaslana koordinatzeko:

a) Taldeko irakasle-taldeak.

b) Heziketa-zikloko irakasle-taldeak.

c) Koordinazio didaktikoko departamentuak.

d) Hezkuntza- eta lanbide-orientazioko departamentua.

e) Koordinazio pedagogikorako batzordea.

f) Tutoretza.

g) Hezkuntza Departamentuak onesten duen beste edozein koordinazio-organo.

5. Foru dekretu honen aplikazio-eremuko gainerako ikastetxeetan (3.17 artikuluan aipatzen direnak barne), Hezkuntza Departamentuak zehaztuko ditu irakaskuntza koordinatzeko dagozkien organoak, ematen dituzten ikasketen bereizgarriak kontuan hartuta.

1. ATALA. TALDEKO IRAKASLE-TALDEA

39. artikulua. Taldeko irakasletaldearen osaera.

1. Ikasle-talde berean irakasten duten irakasleek osatuko dute taldeko irakasle-taldea.

2. Taldeko irakasle-taldeak, dagozkion zereginak betetzeko ezinbestekoa den koordinazio horizontala egokia izan dadin ziurtatzeko, irizpide eta jarduera-jarraibideak bateratuz lan eginen du, irakaskuntza- eta ikaskuntza-prozesua ikasle guztiekin bat etor dadin.

40. artikulua. Taldeko irakasletaldearen eskumenak.

Taldeko irakasle-taldeak eskumen hauek izanen ditu:

a) Curriculuma emate aldera, askotariko jakintza-alorrak koordinatzea, ikasleek dagozkien helburuak lortu eta gaitasunak landu ditzaten.

b) Ikasleei proposatzen zaizkien irakaskuntza- eta ikaskuntza-jarduerak modu orekatuan planifikatzea.

c) Hezkuntza-laguntzako premia espezifikoak dituzten ikasleekin, premia horiek hautemateko eta esku hartzeko estrategiak gauzatzea.

d) Ikasle guztiak ebaluatzea eta jarraipena egitea, eta taldearen funtzionamendua aztertzea, ikaskuntza eta bizikidetza-giroa hobetzeko neurriak ezartze aldera.

e) Taldean sortzen diren gatazkei modu koordinatuan aurre egitea, eta gatazkak konpontzeko neurri egokiak hartzea.

f) Ikasleei edo, hala badagokie, haien guraso edo legezko ordezkariei zer informazio eman behar zaien zehaztea.

g) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoetan egokitutako gainerako eskumen guztiak, baita Hezkuntza Departamentuak eta ikastetxeko zuzendariak egokitutako guztiak ere.

41. artikulua. Taldeko irakasletaldearen funtzionamendua.

1. Taldeko irakasle-taldea dagokion tutoreak koordinatuko du.

2. Ikastetxeko ikasketa-burua arduratuko da taldeko irakasle-taldeen bilerak antolatzeaz; bai indarrean dagoen araudian ezarritako nahitaezko bilerak, bai taldeetako tutoreek proposatutakoak.

3. Taldeko irakasle-taldearen barruan, irakasleek aho batez adostuko dituzte erabaki eta akordioak. Adostasuna ezinezkoa denean, erabakiak gehiengo soilez hartuko dira. Berdinketarik gertatuz gero, tutorearen kalitateko botoa izanen da erabakigarria.

4. Ikastetxeak berak ezarriko du, bere antolaketa- eta funtzionamendu-arauetan, irakasle-taldeen funtzionamendu-araubidea, betiere artikulu honetan ezarritakoa errespetatuz.

5. Hezkuntza-laguntzako espezialistek parte har dezaten, irakasle-taldeek koordinazio-bileretara joateko baimena ematen ahalko diete. Betiere, beren borondatez bertaratuko dira, eta hitza izanen dute, baina botorik ez.

2. ATALA. ZIKLOKO IRAKASLE-TALDEA

42. artikulua. Zikloko irakasletaldearen osaera.

1. Zikloko irakasle-taldea, hau da, Haur Hezkuntzako bigarren zikloko eta Lehen Hezkuntzako ikasketetako irakaskuntza koordinatzen duen organoa, ikasketa horien ziklo berean irakasten duten irakasle guztiek osatuko dute.

2. Zikloko irakasle-taldea arduratuko da, ikastetxeko ikasketaburuak gainbegiratuta, zikloko berezko ikasketak eta bere eskumenen esparruan egokitzen zaizkion jarduerak antolatzeaz eta garatzeaz.

3. Lehen Hezkuntzako ikastetxeetan eta sei unitate baino gutxiago dituzten Haur eta Lehen Hezkuntzako ikastetxeetan, irakasleen klaustroak zikloko irakasle-taldeei egokitutako eginkizunak beteko ditu.

43. artikulua. Zikloko irakasletaldearen eskumenak.

Zikloko zuzendaritza-taldeak eskumen hauek izanen ditu:

a) Zuzendaritza-taldeari, koordinazio pedagogikorako batzordearen bitartez, honako hauek lantzeko eta, hala badagokie, aldatzeko proposamenak egitea: antolaketa- eta funtzionamendu-arauak, hezkuntza-proiektua, hezkuntza-proiektuko curriculum-edukia, kudeaketa-proiektua eta urteko programazio orokorra.

b) Arlo edo eremu bakoitzeko programazio didaktikoak prestatzea eta eguneratzea, etapako curriculum-zehaztapenean ezarritako irizpideak kontuan hartuta, eta zikloaren koordinazioaz arduratzen den pertsonak zuzenduta eta gainbegiratuta.

c) Programazio didaktikoen garapen-mailaren jarraipena egitea, gutxienez hiru hilean behin, eta zenbateraino betetzen diren ebaluatzea. Ebaluazio hori eta hurrengo ikasturterako hobekuntza-proposamenak zikloko urteko planaren azken memorian jasoko dira.

d) Aurreko ikasturteetan gainditu gabeko arlo edo eremuak dituzten ikasleen errekuperazio-sistemak diseinatzea.

e) Urteko programazio orokorraren esparruan, zikloko urteko plana prestatzen laguntzea, ikastetxeko urteko planaren helburuekin bat datozen helburu pedagogikoak eta curriculum-helburuak sartuz, baita azken memoria bat egiten ere. Azken memoria horretan, ikasleek barne- eta kanpo-ebaluazioetan izan dituzten ikaskuntza-emaitzen analisi zehatza jasoko da, eta emaitza horiek eragin dituzten arrazoiei buruz hausnartuko da.

f) Etapa eta maila guztietako arlo edo eremuetako irakaskuntza-prozesua sistematikoki koordinatzea.

g) Koordinazio pedagogikorako batzordearen bitartez, zuzendaritza-taldeari prestakuntza-jarduerak proposatzea, irakasleen prestakuntza-planean sartzeko.

h) Ebaluazio-tresnak eta kalifikazio-irizpideak bateratzea, baita zikloan adostu beharreko gainerako alderdiak ere.

i) Ebaluazio-prozesuaren gainean egindako erreklamazioak ebaztea, indarrean dagoen araudiaren arabera.

j) Koordinazio pedagogikorako batzordearen bidez, testuliburuak eta irakaskuntza-jardunbiderako material didaktikoak proposatzea zuzendaritza-taldeari.

k) Ikastetxeko idazkariari inbentarioa egiten laguntzea eta, zikloa koordinatzen duen pertsonaren bitartez, materiala eta ekipamendua erosteko proposamenak helaraztea.

l) Koordinazio pedagogikorako batzordearen bitartez, zikloko ikasleekin egiteko jarduera osagarriak proposatzea zuzendaritza-taldeari, eta jarduera horiek modu koordinatuan antolatzea eta lantzea.

m) Koordinazio pedagogikorako batzordearen bitartez, arratsaldean ikasleei arreta emateko jarduerak proposatzea zuzendaritza-taldeari; hori, eskola-ordutegi jarraitua duten ikastetxeetan.

n) Koordinazio pedagogikorako batzordearen bidez, zikloko ikasleekin egiteko eskolaz kanpoko jarduerak proposatzea zuzendaritza-taldeari.

ñ) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoetan egokitutako gainerako eskumen guztiak, baita ikastetxeko zuzendariak, taldeko koordinatzaileak eta Hezkuntza Departamentuak egokitutako guztiak ere.

44. artikulua. Zikloko irakasletaldearen koordinatzailea.

1. Zikloko irakasle-talde bakoitzak koordinatzaile baten zuzendaritzapean jardunen du. Koordinatzaile hori dagokion zikloko irakasle bat izanen da.

2. Zikloko irakasle-taldearen koordinatzailea ikastetxeko zuzendariak izendatuko du, zikloko irakasle-taldearen iritzia entzun ondoren.

3. Oro har, izendatu duen zuzendaria bezainbeste denboraz izanen da irakasle-taldeko koordinatzaile, salbu eta dagokion epea agortu aurretik kargua uzten badu.

4. Zikloko irakasle-taldearen koordinatzaileak kasu hauetan utziko dio bere eginkizunak betetzeari:

a) Proposatu zuen pertsonak kargua uzten badu.

b) Izendatu duen zuzendariaren agintaldia agortzen bada.

c) Ikastetxean zerbitzuak emateari uzten badio.

d) Artikulu honen 1. apartatuan ezarritako baldintza betetzeari uzten badio.

e) Ikastetxearen antolamenduaren barruan, hura izendatzea eragin zuen irakaskuntza-koordinazioko organoa desagertzen bada.

f) Dimisio arrazoitua aurkeztu eta zuzendariak onartzen badu.

g) Zuzendaritzako titularrak hala erabakitzen badu.

5. Zikloko irakasle-taldearen koordinatzaileak izendatutako agintaldia burutu baino lehen kargua uzten badu, ikastetxeko zuzendariak beste koordinatzaile bat izendatuko du.

45. artikulua. Zikloko irakasletaldearen koordinatzailearen eskumenak.

Zikloko irakasle-taldearen koordinatzaileak eskumen hauek izanen ditu:

a) Zikloko bilerak deitzea eta bileretako buru izatea, baita bilera horien aktak idaztea eta sinatzea ere.

b) Zikloan garatutako jarduerak zuzentzea eta koordinatzea.

c) Honako hauek egiteak eta, hala badagokie, aldatzeak zikloko irakasle-taldeari eraginen dizkion zereginez arduratzea eta zeregin horietan parte hartzea: antolaketa- eta funtzionamendu-arauak, hezkuntza-proiektua, hezkuntza-proiektuan jasotako curriculum-zehaztapena, kudeaketa-proiektua eta urteko programazio orokorra.

d) Urteko programazio orokorraren esparruan, zikloko urteko plana eta dagokion azken memoria prestatzea, zikloko irakasle-taldearen laguntzarekin.

e) Arlo edo eremu bakoitzeko programazio didaktikoen prestaketa zuzentzea, eta, horretarako, arlo edo eremu bakoitzaren barruan koordinazio horizontala eta bertikala bermatzea. Horrez gain, ikasgelako programazioak gainbegiratzea.

f) Gurasoei edo legezko ordezkariei zikloko arlo edo eremuetako programazio didaktikoei buruz ematen zaien informazioa gainbegiratzea.

g) Ikasleen errekuperazio-planak eta curriculum-egokitzapenak egiten direla ziurtatzea.

h) Ikasleak ebaluatzeko prozesuan erreklamazioak aurkezteko prozedura betetzen dela bermatzea, indarra duten arauei jarraikiz.

i) Taldekideek lantzen dituzten proiektu, programa eta jardueren ebaluazioa koordinatzea.

j) Zikloko irakasle-taldeko kideek eta zikloko irakasle-taldeek elkarrekin lan egin dezaten sustatzea, ikastetxeko hezkuntza-proiektuko helburuak lortzen laguntzeko.

k) Koordinazio pedagogikorako batzordean zikloko irakasle-taldea ordezkatzea eta taldekideek egindako proposamenak batzordeari helaraztea.

l) Ikastetxeko idazkariari zikloko inbentarioa eguneratzen laguntzea, eta materiala eta ekipamendua erosteko proposamenen berri ematea.

m) Gobernu-organoek eta irakaskuntza koordinatzeko organoek emandako informazio guztia zikloko irakasle-taldeko kideei helaraztea, informazio horrek irakasleen zereginetan eragina izan badezake.

n) Zuzendaritza-taldearekin eta irakaskuntza koordinatzeko gainerako organoekin batera lan egitea ikastetxeak parte hartzen duen ebaluazio, plan, proiektu, programa eta jardueretan.

ñ) Zikloko irakasle-taldearen funtzionamenduan gertatzen den edozein gorabeheraren berri ematea zuzendaritza-taldeari.

o) Heldu berri diren irakasleak hartzeko prozesuan buru izatea.

p) Zikloko gainerako irakasle-taldeetako koordinatzaileekin koordinatzea, zikloen arteko trantsizioa egokia eta arina izan dadin.

q) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoetan egokitutako gainerako eskumen guztiak, baita Hezkuntza Departamentuak eta ikastetxeko zuzendariak egokitutako guztiak ere.

46. artikulua. Zikloko irakasletaldearen funtzionamendua.

1. Zikloko irakasle-taldea koordinatzen duen pertsona arduratuko da dagokion taldearen bilerak antolatu, deitu eta zuzentzeaz.

2. Zikloko irakasle-taldearen bilerak ikastetxeak antolaketa eta funtzionamendu-arauetan ezarritako maiztasunarekin eginen dira; baita, hala badagokio, koordinatzaileak erabakitzen duenean ere.

3. Zikloko irakasle-taldearen barruan, irakasleek aho batez adostuko dituzte erabaki eta akordioak. Adostasuna ezinezkoa denean, erabakiak gehiengo soilez hartuko dira. Berdinketarik gertatuz gero, koordinatzailearen kalitateko botoa izanen da erabakigarria.

4. Zikloko irakasle-taldeen bileretara joatea nahitaezkoa izanen da kide guztientzat.

5. Zikloko irakasle-taldearen bilera bakoitzeko akta bat eginen da, eta taldeko koordinatzaileak idatziko du.

6. Zikloko irakasle-taldearen koordinatzailea bajan edo aldi baterako kanpoan badago, zikloko irakasle-taldeko beste kide batek beteko ditu bere eginkizunak. Ordezkari hori zuzendariak izendatuko du, zikloko irakasle-taldearen iritzia entzun ondoren.

7. Ikastetxeak berak ezarriko du, bere antolaketa- eta funtzionamendu-arauetan, zikloko irakasle-taldeen funtzionamendu-araubidea, betiere artikulu honetan ezarritakoa errespetatuz.

3. ATALA. HEZIKETA-ZIKLOKO IRAKASLE-TALDEA

47. artikulua. Heziketazikloko irakasletaldearen osaera.

1. Heziketa-zikloko irakasle-taldea Lanbide Heziketako, Arte Plastikoetako eta Diseinuko eta Kirol-irakaskuntzako ikasketa profesionaletan irakaskuntza koordinatzeko berezko organoa da, eta ikasketa horien ziklo beraren barruan irakasten duten irakasle guztiek osatuko dute.

2. Heziketa-zikloko irakasle-taldea arduratuko da, ikastetxeko ikasketaburuak gainbegiratuta, zikloko berezko ikasketak eta bere eskumenen esparruan egokitzen zaizkion jarduerak antolatzeaz eta garatzeaz.

48. artikulua. Heziketazikloko irakasletaldearen eskumenak.

Heziketa-zikloko irakasle-taldeak eskumen hauek izanen ditu:

a) Zuzendaritza-taldeari, koordinazio pedagogikorako batzordearen bitartez, honako hauek lantzeko eta, hala badagokie, aldatzeko proposamenak egitea: antolaketa- eta funtzionamendu-arauak, hezkuntza-proiektua, hezkuntza-proiektuko curriculum-edukia, kudeaketa-proiektua eta urteko programazio orokorra.

b) Modulu bakoitzeko programazio didaktikoak prestatzea eta eguneratzea, heziketa-zikloko curriculumaren zehaztapenean ezarritako irizpideak kontuan hartuta, eta heziketa-zikloaren koordinazioaz arduratzen den pertsonak zuzenduta eta gainbegiratuta.

c) Programazio didaktikoen garapen-mailaren aldizkako jarraipena egitea, gutxienez hiru hilean behin, eta zenbateraino betetzen diren ebaluatzea. Ebaluazio hori eta hurrengo ikasturterako hobekuntza-proposamenak azken memorian jasoko dira.

d) Aurreko ikasturteetan gainditu gabeko moduluak dituzten ikasleen errekuperazio-sistemak diseinatzea.

e) Urteko programazio orokorraren esparruan, heziketa-zikloko urteko plana prestatzen laguntzea, ikastetxeko urteko planaren helburuekin bat datozen helburu pedagogikoak eta curriculum-helburuak sartuz, baita heziketa-zikloko azken memoria bat egiten ere. Azken memoria horretan, ikasleek barne- eta kanpo-ebaluazioetan izan dituzten ikaskuntza-emaitzen analisi zehatza jasoko da, eta emaitza horiek eragin dituzten arrazoiei buruz hausnartuko da.

f) Dagokion heziketa-zikloko moduluen irakaskuntza-prozesua sistematikoki koordinatzea, eta, curriculuma emateko, askotariko jakintza-alorrak koordinatzea, ikasleek dagozkien helburuak lortu eta gaitasunak landu ditzaten.

g) Heziketa-zikloan zehar ikasleei proposatzen zaizkien irakaskuntza- eta ikaskuntza-jarduerak modu orekatuan planifikatzea.

h) Ebaluazio-tresnak eta kalifikazio-irizpideak bateratzea, baita heziketa-zikloan adostu beharreko gainerako alderdiak ere.

i) Ebaluazio-prozesuaren gainean egindako erreklamazioak ebaztea, indarrean dagoen araudiaren arabera.

j) Koordinazio pedagogikorako batzordearen bitartez, heziketa-zikloa ezartzeko eta lantzeko prestakuntza-jarduerak proposatzea zuzendaritza-taldeari, irakasleen prestakuntza-planean sartzeko.

k) Koordinazio pedagogikorako batzordearen bidez, testuliburuak eta irakaskuntza-jardunbiderako material didaktikoak proposatzea zuzendaritza-taldeari.

l) Ikastetxeko idazkariari inbentarioa egiten laguntzea eta, heziketa-zikloa koordinatzen duen pertsonaren bitartez, materiala eta ekipamendua erosteko proposamenak helaraztea.

m) Koordinazio pedagogikorako batzordearen bitartez, heziketa-zikloko ikasleekin egiteko jarduera osagarriak proposatzea zuzendaritza-taldeari, eta jarduera horiek modu koordinatuan antolatzea eta lantzea.

n) Koordinazio pedagogikorako batzordearen bidez, heziketa-zikloko ikasleekin egiteko eskolaz kanpoko jarduerak proposatzea zuzendaritza-taldeari.

ñ) Partekatutako gune eta baliabideen erabilera arrazionalizatzea eta koordinatzea.

o) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoetan egokitutako gainerako eskumen guztiak, baita ikastetxeko zuzendariak, heziketa-zikloko taldeko koordinatzaileak eta Hezkuntza Departamentuak egokitutako guztiak ere.

49. artikulua. Heziketazikloko irakasletaldearen koordinatzailea.

1. Heziketa-zikloko irakasle-talde bakoitzak koordinatzaile baten zuzendaritzapean jardunen du. Koordinatzaile hori dagokion heziketa-zikloko irakasle bat izanen da.

2. Heziketa-zikloko irakasle-taldearen koordinatzailea ikastetxeko zuzendariak izendatuko du, heziketa-zikloko irakasle-taldearen iritzia entzun ondoren.

3. Oro har, izendatu duen zuzendaria bezainbeste denboraz izanen da irakasle-taldeko koordinatzaile, salbu eta dagokion epea agortu aurretik kargua uzten badu.

4. Heziketa-zikloko irakasle-taldearen koordinatzaileak kasu hauetan utziko dio bere eginkizunak betetzeari:

a) Proposatu zuen pertsonak kargua uzten badu.

b) Izendatu duen zuzendariaren agintaldia burutzen bada.

c) Ikastetxean zerbitzuak emateari uzten badio.

d) Artikulu honen 1. apartatuan ezarritako baldintza betetzeari uzten badio.

e) Ikastetxearen antolamenduaren barruan, hura izendatzea eragin zuen irakaskuntza-koordinazioko organoa desagertzen bada.

f) Dimisio arrazoitua aurkeztu eta zuzendariak onartzen badu.

g) Zuzendaritzako titularrak hala erabakitzen badu.

5. Heziketa-zikloko irakasle-taldearen koordinatzaileak kargua uzten badu izendatutako agintaldia burutu baino lehen, ikastetxeko zuzendariak beste koordinatzaile bat izendatuko du.

50. artikulua. Heziketazikloko irakasletaldearen koordinatzailearen eskumenak.

1. Heziketa-zikloko irakasle-taldearen koordinatzaileak eskumen hauek izanen ditu:

a) Heziketa-zikloko bileretara deitzea eta bileretako buru izatea, baita bilera horien aktak idaztea eta sinatzea ere.

b) Heziketa-zikloan garatutako jarduerak zuzentzea eta koordinatzea.

c) Honako hauek egiteak eta, hala badagokie, aldatzeak heziketa-zikloko irakasle-taldeari eraginen dizkion zereginez arduratzea eta zeregin horietan parte hartzea: antolaketa- eta funtzionamendu-arauak, hezkuntza-proiektua, hezkuntza-proiektuan jasotako curriculum-zehaztapena, kudeaketa-proiektua eta urteko programazio orokorra.

d) Urteko programazio orokorraren esparruan, zikloko urteko plana eta dagokion azken memoria prestatzea, heziketa-zikloko irakasle-taldearen laguntzarekin.

e) Modulu bakoitzaren programazio didaktikoen prestaketa zuzentzea, moduluen arteko koordinazioa bermatzea eta ikasgelako programazioak gainbegiratzea.

f) Gurasoei edo legezko ordezkariei moduluetako programazio didaktikoari buruz ematen zaien informazioa gainbegiratzea.

g) Ikasleen errekuperazio-planak eta curriculum-egokitzapenak egiten direla ziurtatzea.

h) Ikasleak ebaluatzeko prozesuan erreklamazioak aurkezteko prozedura betetzen dela bermatzea, indarra duten arauei jarraikiz.

i) Heziketa-zikloko irakasle-taldeko kideek lantzen dituzten proiektu, programa eta jardueren ebaluazioa koordinatzea.

j) Heziketa-zikloko irakasle-taldeko kideek eta zikloko irakasle-taldeek elkarrekin lan egin dezaten sustatzea, ikastetxeko hezkuntza-proiektuko helburuak lortzen laguntzeko.

k) Koordinazio pedagogikorako batzordean heziketa-zikloko irakasle-taldea ordezkatzea eta taldekideek egindako proposamenak batzordeari helaraztea.

l) Hezkuntza-ziklora sartzeko probak prestatzen eta ebaluatzen laguntzea, oinarri harturik Hezkuntza Departamentuak horretarako ezartzen dituen jarraibideak.

m) Ikastetxeko idazkariari heziketa-zikloaren inbentarioa eguneratzen laguntzea, eta materiala eta ekipamendua erosteko proposamenen berri ematea.

n) Partekatutako gune eta baliabide didaktikoak erabiltzeko proposamenen berri ematea zuzendaritza-taldeari.

ñ) Gobernu-organoek eta irakaskuntza koordinatzeko organoek emandako informazio guztia zikloko irakasle-taldeko kideei helaraztea, informazio horrek irakasleen zereginetan eragina izan badezake.

o) Zuzendaritza-taldearekin eta irakaskuntza koordinatzeko gainerako organoekin batera lan egitea ikastetxeak parte hartzen duen ebaluazio, plan, proiektu, programa eta jardueretan.

p) Heziketa-zikloko irakasle-taldearen funtzionamenduan gertatzen den edozein gorabeheraren berri ematea zuzendaritza-taldeari.

q) Heldu berri diren irakasleak hartzeko prozesuan buru izatea.

r) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoetan egokitutako gainerako eskumen guztiak, baita Hezkuntza Departamentuak eta ikastetxeko zuzendariak egokitutako guztiak ere.

2. Eskumen horiek koordinazio didaktikoko departamentuko buruekin elkarlanean beteko ditu, dagokion heziketa-zikloko curriculum-zehaztapenaren esparruan.

51. artikulua. Heziketazikloko irakasletaldearen funtzionamendua.

1. Heziketa-zikloko irakasle-taldea koordinatzen duen pertsona arduratuko da dagokion taldearen bilerak antolatu, deitu eta zuzentzeaz.

2. Heziketa-zikloko irakasle-taldearen bilerak ikastetxeak antolaketa eta funtzionamendu-arauetan ezarritako maiztasunarekin eginen dira; baita, hala badagokio, koordinatzaileak erabakitzen duenean.

3. Heziketa-zikloko irakasle-taldearen barruan, irakasleek aho batez adostuko dituzte erabaki eta akordioak. Adostasuna ezinezkoa denean, erabakiak gehiengo soilez hartuko dira. Berdinketarik gertatuz gero, koordinatzailearen kalitateko botoa izanen da erabakigarria.

4. Heziketa-zikloko irakasle-taldeen bileretara joatea nahitaezkoa izanen da kide guztientzat.

5. Heziketa-zikloko irakasle-taldearen bilera bakoitzeko, akta bat eginen da, eta taldeko koordinatzaileak idatziko du.

6. Heziketa-zikloko irakasle-taldearen koordinatzailea bajan edo aldi baterako kanpoan badago, zikloko irakasle-taldeko beste kide batek beteko ditu haren eginkizunak. Ordezkari hori zuzendariak izendatuko du, zikloko irakasle-taldearen iritzia entzun ondoren.

7. Ikastetxeak berak ezarriko du, bere antolaketa- eta funtzionamendu-arauetan, heziketa-zikloko irakasle-taldeen funtzionamendu-araubidea, betiere artikulu honetan ezarritakoa errespetatuz.

4. ATALA. KOORDINAZIO DIDAKTIKOKO DEPARTAMENTUAK

52. artikulua. Koordinazio didaktikoko departamentuen osaera.

1. Koordinazio didaktikoko departamentuak irakasle-taldeak dira. Irakasle horiek arduratzen dira, dagozkien jakintzagai, eremu, modulu edo irakasgaietako ikasketak ez ezik, beren eskumenen esparruan egokitzen dizkieten jarduerak antolatu eta lantzeaz.

2. Irakasleek irakaskuntzaren antolaketan parte hartzeko bide normalak dira koordinazio didaktikoko departamentuak, baita hobekuntza pedagogiko eta zientifikorako bitarteko iraunkorrak ere.

3. Orokorrean, koordinazio didaktikoko departamentuak irakaskuntza-espezialitateen arabera eratuko dira, Hezkuntza Departamentuak baimena eman ondoren.

4. Halaber, irakaskuntza-espezialitate bat baino gehiago biltzen dituzten koordinazio didaktikoko diziplinarteko departamentuak eratzen ahalko dira, Hezkuntza Departamentuak baimena eman ondoren.

5. Koordinazio didaktikoko departamentuak, oro har, irakaskuntza-espezialitate berari egokitutako jakintzagai, eremu, modulu edo irakasgaiak ematen dituzten irakasleek osatuko dituzte, oinarrizko araudian eta Hezkuntza Departamentuak ematen dituen xedapenetan jasotakoaren arabera.

6. Koordinazio didaktikoko departamentuko kide izanen dira departamentuari egokitutako jakintzagai, eremu, modulu edo irakasgaiak ematen dituzten espezialitateko edo espezialitateetako irakasleak, eta departamentuaren bileretara joan beharko dute.

7. Departamentuari atxikiko zaizkio, departamentu horretako kide izan gabe departamentu horri dagozkion jakintzagai, eremu, modulu edo irakasgaiak ematen dituzten beste departamentuetako irakasleak. Espezialitate bat baino gehiago dituzten irakasleak edo espezialitate bati baino gehiagori esleituta dauden gaiak, alorrak moduluak edo irakasgaiak irakasten dituztenak lekualdatze-lehiaketaren bidez edo beste prozedura batez lortu zuten lanpostuari dagokion departamentukoak izanen dira, aipatu diren baldintzetan beste departamentu batzuei atxikita egoteko aukera galarazi gabe.

8. Koordinazio didaktikoko departamentu bateko kide izanik, goian jasotakoaren arabera beste departamentu bati edo gehiagori atxikita dauden irakasleek kide diren departamentuaren bileretara joan beharko dute, eta atxikita dauden departamentuak (edo departamentuek) emandako jarraibideak bete beharko dituzte. Hori, atxikita dauden departamentuek ematen dituzten jakintzagai, eremu, modulu edo irakasgaietako irakaskuntza-jarduerak behar bezala gauzatzen direla bermatzeko.

9. Departamentu batean espezialitate bateko baino gehiagotako irakasleak biltzen direnean, espezialitate bakoitzeko jakintzagai, eremu, modulu edo irakasgaiak dagozkien irakasleek programatu eta emanen dituzte.

10. Ikastetxe batean arauz koordinazio didaktikoko departamentu bati esleituta ez dauden gaiak, alorrak, moduluak edo irakasgaiak irakasten badira edo departamentu bateko baino gehiagotako irakasleek irakasten ahal badituzte eta indarreko araudian ez badago ezarrita irakasgaiak emateko lehentasuna, zuzendariak atxikiko dizkio ikastetxeko departamentu bati edo irakasle-espezialitate bati, koordinazio pedagogikorako batzordeak proposatuta.

53. artikulua. Koordinazio didaktikoko departamentuen eskumenak.

Koordinazio didaktikoko departamentuek eskumen hauek izanen dituzte:

a) Zuzendaritza-taldeari, koordinazio pedagogikorako batzordearen bitartez, honako hauek lantzeko eta, hala badagokie, aldatzeko proposamenak egitea: antolaketa- eta funtzionamendu-arauak, hezkuntza-proiektua, hezkuntza-proiektuko curriculum-edukia, kudeaketa-proiektua eta urteko programazio orokorra.

b) Jakintzagai, eremu, modulu edo irakasgaietako programazio didaktikoak prestatzea eta eguneratzea, etapa edo ikasketetako curriculum-zehaztapenean ezarritako irizpideak kontuan hartuta, eta departamentuko buruak zuzenduta eta gainbegiratuta.

c) Programazio didaktikoen garapen-mailaren aldizkako jarraipena egitea, gutxienez hiru hilean behin, eta zenbateraino betetzen diren ebaluatzea. Ebaluazio hori eta hurrengo ikasturterako hobekuntza-proposamenak azken memorian jasoko dira.

d) Departamentuaren urteko plana prestatzen laguntzea, ikastetxeko urteko planaren helburuekin bat datozen helburu pedagogikoak eta curriculum-helburuak sartuz, baita departamentuaren urteko planaren azken memoria bat egiten ere. Azken memoria horretan, ikasleek barne- eta kanpo-ebaluazioetan izan dituzten ikaskuntza-emaitzen analisi zehatza jasoko da, eta emaitza horiek eragin dituzten arrazoiei buruz hausnartuko da.

e) Ikasketa eta maila guztietako jakintzagai, eremu, modulu edo irakasgaien irakaskuntza-prozesua sistematikoki koordinatzea.

f) Koordinazio pedagogikorako batzordearen bitartez, zuzendaritza-taldeari prestakuntza-jarduerak proposatzea, irakasleen prestakuntza-planean sartzeko.

g) Ebaluazio-tresnak eta kalifikazio-irizpideak bateratzea, baita departamentuan adostu beharreko gainerako alderdiak ere.

h) Aurreko ikasturteetan gainditu gabeko jakintzagai, eremu, modulu edo irakasgaiak dituzten ikasleen errekuperazio-sistemak diseinatzea, eta, hala badagokio, baita egin daitezkeen proba libre edo apartekoak ere.

i) Ebaluazio-prozesuaren gainean egindako erreklamazioak ebaztea, indarrean dagoen araudiaren arabera.

j) Koordinazio pedagogikorako batzordearen bidez, testuliburuak eta irakaskuntza-jardunbiderako material didaktikoak proposatzea zuzendaritza-taldeari.

k) Koordinazio pedagogikorako batzordearen bitartez, irakasteko jakintzagai, eremu, modulu edo irakasgaiak proposatzea, indarrean dagoen araudian jasotakoaren arabera.

l) Ikastetxeko idazkariari inbentarioa egiten laguntzea, eta, koordinazio didaktikoko departamentuko buruaren bitartez, materiala eta ekipamendua erosteko proposamenak helaraztea.

m) Koordinazio pedagogikorako batzordearen bitartez, ikasleekin egiteko jarduera osagarriak proposatzea zuzendaritza-taldeari, eta jarduera horiek modu koordinatuan antolatzea eta lantzea.

n) Koordinazio pedagogikorako batzordearen bidez, ikasleekin egiteko eskolaz kanpoko jarduerak proposatzea zuzendaritza-taldeari.

ñ) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoetan egokitutako gainerako eskumen guztiak, baita Hezkuntza Departamentuak eta indarrean dagoen araudiak egokitutako guztiak ere.

54. artikulua. Koordinazio didaktikoko departamentuko burua.

1. Koordinazio didaktikoko departamentu bakoitzak buru baten zuzendaritzapean jardunen du. Buru hori departamentuko jakintzagai, eremu, modulu edo irakasgairen bat ematen duen irakasle bat izanen da.

2. Koordinazio didaktikoko departamentuko buruak ikastetxeko zuzendariak izendatuko ditu, dagokion departamentuko irakasleen iritzia entzun ondoren. Departamentuari dagozkion ikasketetako katedradunen kidegoetako funtzionarioek lehentasuna izanen dute kargu hori hartzeko, ikasturtea hasi aurretik espresuki hala eskatzen badute.

3. Oro har, izendatu duen zuzendaria bezainbeste denboraz izanen da departamentuko buru, salbu eta dagokion epea agortu aurretik kargua uzten badu.

4. Koordinazio didaktikoko departamentuko buruak kasu hauetan utziko dio bere eginkizunak betetzeari:

a) Proposatu zuen pertsonak kargua uzten badu.

b) Izendatu duen zuzendariaren agintaldia burutzen bada.

c) Ikastetxean zerbitzuak emateari uzten badio.

d) Artikulu honen 1. apartatuan ezarritako baldintza betetzeari uzten badio edo 2. apartatuan ezarritakoa betetzen bada.

e) Ikastetxearen antolamenduaren barruan, hura izendatzea eragin zuen irakaskuntza-koordinazioko organoa desagertzen bada.

f) Dimisio arrazoitua aurkeztu eta zuzendariak onartzen badu.

g) Zuzendaritzako titularrak hala erabakitzen badu.

5. Departamentuko buruak izendatutako agintaldia burutu baino lehen kargua uzten badu, ikastetxeko zuzendariak beste buru bat izendatuko du.

55. artikulua. Koordinazio didaktikoko departamentuburuaren eskumenak.

Koordinazio didaktikoko departamentuko buruak eskumen hauek izanen ditu:

a) Departamentuko bileretara deitzea eta bileretako buru izatea, baita bilera horien aktak idaztea eta sinatzea ere.

b) Departamentuan garatutako jarduerak zuzentzea eta koordinatzea.

c) Honako hauek egiteak eta, hala badagokie, aldatzeak departamentuari eraginen dizkion zereginez arduratzea eta zeregin horietan parte hartzea: antolaketa- eta funtzionamendu-arauak, hezkuntza-proiektua, hezkuntza-proiektuan jasotako curriculum-zehaztapena, kudeaketa-proiektua eta urteko programazio orokorra.

d) Urteko programazio orokorraren esparruan, departamentuaren urteko plana eta dagokion azken memoria prestatzea, departamentuko kideen laguntzarekin.

e) Jakintzagai, eremu, modulu edo irakasgai bakoitzeko programazio didaktikoen prestaketa zuzentzea, eta, horretarako, jakintzagai, eremu, modulu edo irakasgai bakoitzaren barruan koordinazio horizontala eta bertikala bermatzea. Horrez gain, ikasgelako programazioak gainbegiratzea.

f) Ikasleei eta, hala badagokie, gurasoei edo legezko ordezkariei departamentuko jakintzagai, eremu, modulu edo irakasgaien programazio didaktikoari buruz ematen zaien informazioa gainbegiratzea.

g) Errekuperazio-planak, ikasleen curriculum-egokitzapenak eta, hala badagokio, proba libre edo apartekoak egiten direla ziurtatzea.

h) Ikasleak ebaluatzeko prozesuan erreklamazioak aurkezteko prozedura betetzen dela bermatzea, indarra duten arauei jarraikiz.

i) Ikasleak ebaluatzeko erabiltzen den dokumentazioa zaintzea.

j) Departamentuko kideek lantzen dituzten proiektu, programa eta jardueren ebaluazioa koordinatzea.

k) Departamentuko kideen arteko eta departamentuen arteko elkarlana sustatzea, ikastetxeko hezkuntza-proiektuko helburuak lortzen laguntzeko.

l) Koordinazio pedagogikorako batzordean departamentua ordezkatzea eta departamentuko kideek egindako proposamenak batzordeari helaraztea.

m) Ikastetxeko idazkariari departamentuko inbentarioa eguneratzen laguntzea, eta materiala eta ekipamendua erosteko proposamenen berri ematea.

n) Gobernu-organoek eta irakaskuntza koordinatzeko organoek emandako informazio guztia departamentuko kideei helaraztea, informazio horrek beren zereginetan eragina izan badezake.

ñ) Zuzendaritza-taldearekin eta irakaskuntza koordinatzeko gainerako organoekin batera lan egitea ikastetxeak parte hartzen duen ebaluazio, plan, proiektu, programa eta jardueretan.

o) Departamentuaren funtzionamenduan gertatzen den edozein gorabeheraren berri ematea zuzendaritza-taldeari.

p) Heldu berri diren irakasleak hartzeko prozesuan buru izatea.

q) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoetan egokitutako gainerako eskumen guztiak, baita Hezkuntza Departamentuak eta ikastetxeko zuzendariak egokitutako guztiak ere.

56. artikulua. Koordinazio didaktikoko departamentuaren funtzionamendua.

1. Departamentuko burua arduratuko da dagokion departamentuaren bilerak antolatu, deitu eta zuzentzeaz.

2. Departamentuaren bilerak eginen dira ikastetxeak antolaketa eta funtzionamendu-arauetan ezarritako maiztasunarekin eta, hala badagokio, departamentuko buruak erabakitzen duenean.

3. Departamentuaren barruan, irakasleek aho batez adostuko dituzte erabaki eta akordioak. Adostasuna ezinezkoa denean, erabakiak gehiengo soilez hartuko dira. Berdinketarik gertatuz gero, departamentuburuaren kalitateko botoa izanen da erabakigarria.

4. Departamentuetako bileretara joatea nahitaezkoa izanen da kide guztientzat.

5. Departamentuen bilera bakoitzeko, akta bat eginen da, eta departamentuko buruak idatziko du.

6. Departamentuko burua bajan edo aldi baterako kanpoan badago, departamentuko beste kide batek beteko ditu haren eginkizunak. Ordezkari hori zuzendariak izendatuko du, zikloko irakasle-taldearen iritzia entzun ondoren, eta, betiere, dagozkion ikasketetako katedradunen kidegoetako funtzionarioak lehenetsiko ditu, baldin eta ikasturtea hasi aurretik espresuki hala eskatu badute.

7. Ikastetxeak berak ezarriko du, bere antolaketa- eta funtzionamendu-arauetan, koordinazio didaktikoko departamentuen funtzionamendu-araubidea, betiere artikulu honetan ezarritakoa errespetatuz.

5. ATALA. HEZKUNTZA-LAGUNTZAKO UNITATEA

57. artikulua. Hezkuntza Laguntzako Unitatearen osaera.

1. Hezkuntza Laguntzako Unitatea irakaskuntza-organo bat da, ikasleen desberdintasun indibidualei arreta emateaz eta haien hezkuntza-orientazioaz arduratzen dena, foru dekretu honen 38. artikuluan horrela jasotako ikastetxeetan.

2. Sei unitate baino gutxiagoko ikastetxeetan, haietako zenbaitetarako hezkuntza-laguntzako Unitate komun bakar bat eratu daiteke, baldin eta hurbiltasun geografikorik bada eta irakasle berak partekatzen badira.

3. Honako hauek osatzen dute Hezkuntza Laguntzako Unitatea:

a) Hezkuntza-orientazioko irakasleak.

b) Ikasketaburua.

c) Pedagogia terapeutikoko irakasleak.

d) Entzumen eta hizkuntzako irakasleak.

e) Egoera ahulean dauden ikasleei laguntzeko irakasleak.

f) Foru dekretu hau lantzeko arauetan, ikasketen xedapen espezifikoetan eta ikastetxeko antolaketa- eta funtzionamendu-arauetan jaso daitekeen irakasleen klaustroko beste edozein pertsona.

58. artikulua. Hezkuntza Laguntzako Unitatearen eskumenak.

1. Hezkuntza Laguntzako Unitateak eskumen hauek izanen ditu:

a) Zuzendaritza-taldeari, koordinazio pedagogikorako batzordearen bitartez, honako hauek lantzeko eta, hala badagokie, aldatzeko proposamenak egitea: antolaketa- eta funtzionamendu-arauak, hezkuntza-proiektua, hezkuntza-proiektuko curriculum-edukia, kudeaketa-proiektua eta urteko programazio orokorra.

b) Koordinazio pedagogikorako batzordean ikastetxeko zuzendaritza-taldearekin batera lan egitea, ikasleen desberdintasun indibidualei arreta emateko plangintza prestatzen.

c) Hezkuntza Laguntzako Unitateko buruarekin batera lan egitea tutoretza-planerako proposamenak eta urteko programazio orokorrean dagozkion zehaztapenak prestatzen. Plan horren barruan sartuko da Hezkuntza eta Lanbide Orientazioko Plana.

d) Ikastetxeko ikasketaburuarekin batera lan egitea tutoretza-ekintza koordinatzeko.

e) Hezkuntza-komunitateko kide guztiei aholku ematea aniztasunarekiko arretako metodologia eta antolakuntza-estrategiei buruz.

f) Irakasleei laguntza eta aholkularitza ematea ikasleen desberdintasun indibidualei arreta emateko neurriak diseinatu, garatu eta ebaluatzeko, normalizazio- eta inklusio-printzipioak kontuan hartuta.

g) Hezkuntza-laguntzako premi espezifikoak dituzten ikasleei curriculumeko elementuak egokitzeko irizpideak eta prozedurak prestatzen direla eta hezkuntza-premia bereziak dituzten ikasleen curriculum-egokitzapenak egiten direla ziurtatzea, eta koordinazio pedagogikoko gainerako organoei helaraztea.

h) Laguntza ematea ikasleen ikasteko zailtasunak goiz detektatzeko eta hura prebenitzeko eta konpentsatzeko laguntza egokiak ezartzeko; laguntza ematea, orobat, balorazio psikopedagogikoan, hezkuntza-laguntzako premi espezifikoak dituzten ikasleen segimenduan eta ebaluazioari eta mailaz igotzeari buruzko erabakietan.

i) Tutoretza-ekintzan eta familientzako orientazio indibidualean aholku ematea eta laguntzea.

j) Hezkuntza Laguntzako Unitateko koordinatzailearekin batera lan egitea unitate horretako urteko plana eta azken memoria prestatzeko.

k) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoan egokitutako gainerako eskumen guztiak, baita ikastetxeko zuzendariak, unitateko koordinatzaileak eta Hezkuntza Departamentuak egokitutako guztiak ere.

2. Oinarrizko Hezkuntzako ikastetxeetan, Hezkuntza Laguntzako Unitateak bere gain hartuko ditu, halaber, foru dekretu honen 63. artikuluan hezkuntza- eta lanbide-orientazioko departamentuari egokitutako eskumenak.

59. artikulua. Hezkuntza Laguntzako Unitateko koordinatzailea.

1. Hezkuntza Laguntzako Unitateak koordinatzaile baten zuzendaritzapean jardunen du. Koordinatzaile hori hezkuntza-orientazioko irakasleetako bat izanen da, eta ikastetxeko zuzendariak izendatuko du.

2. Oro har, izendatu duen zuzendaria bezainbeste denboraz izanen da irakasle-taldeko koordinatzaile, salbu eta dagokion epea agortu aurretik kargua uzten badu.

3. Hezkuntza Laguntzako Unitateko koordinatzaileak kasu hauetan utziko dio bere eginkizunak betetzeari:

a) Proposatu zuen pertsonak kargua uzten badu.

b) Izendatu duen zuzendariaren agintaldia burutzen bada.

c) Ikastetxean zerbitzuak emateari uzten badio.

d) Ikastetxearen antolamenduaren barruan, hura izendatzea eragin zuen irakaskuntza-koordinazioko organoa desagertzen bada.

e) Dimisio arrazoitua aurkeztu eta zuzendariak onartzen badu.

f) Zuzendaritzako titularrak hala erabakitzen badu.

4. Hezkuntza Laguntzako Unitateko koordinatzaileak kargua uzten badu izendatutako agintaldia burutu baino lehen, ikastetxeko zuzendariak beste koordinatzaile bat izendatuko du.

60. artikulua. Hezkuntza Laguntzako Unitateko koordinatzailearen eskumenak.

1. Hezkuntza Laguntzako Unitateko koordinatzaileak eskumen hauek izanen ditu:

a) Hezkuntza Laguntzako Unitatearen bileretara deitzea eta bileretako buru izatea, baita bilera horien aktak idaztea eta sinatzea ere.

b) Hezkuntza Laguntzako Unitatearen eginkizunak betetzeko egiten diren jarduerak zuzendu eta koordinatzea.

c) Honako hauek egiteak eta hala badagokio aldatzeak Hezkuntza Laguntzako Unitateari eraginen dizkion zereginez arduratzea eta zeregin horietan parte hartzea: antolaketa- eta funtzionamendu-arauak, hezkuntza-proiektua, hezkuntza-proiektuan jasotako curriculum-zehaztapena, kudeaketa-proiektua eta urteko programazio orokorra.

d) Urteko programazio orokorraren esparruan, Hezkuntza Laguntzako Unitatearen urteko plana eta dagokion azken memoria prestatzea, unitateko gainerako kideen laguntzarekin.

e) Koordinazio pedagogikorako batzordean Hezkuntza Laguntzako Unitatea ordezkatzea eta unitateko kideek egindako proposamenak batzordeari helaraztea.

f) Irakasle-taldeek proposatutako ikasleen ebaluazio psikopedagogikoa egitea, eta dagozkien txostenak idaztea, talde horien laguntzarekin.

g) Ikasleren bat hezkuntza-laguntzako premia espezifikoak dituztenen zerrendan sartuz gero, haren familiari jakinaraztea.

h) Hezkuntza-laguntzako premia espezifikoak dituzten ikasleei curriculumeko elementuak egokitzeko irizpideak eta prozedurak prestatzen direla ziurtatzea, eta koordinazio pedagogikoko organoei helaraztea.

i) Tutorearekin batera, Hezkuntza Laguntzako Unitateko kideak hezkuntza-laguntzako premia espezifikoak dituzten ikasleei arreta ematen dieten gainerako irakasleekin koordinatuta daudela bermatzea.

j) Gobernu-organoek eta irakaskuntza koordinatzeko organoek emandako informazio guztia Hezkuntza Laguntzako Unitateko kideei helaraztea, informazio horrek beren zereginetan eragina izan badezake.

k) Hezkuntza Laguntzako Unitateko kideen arteko elkarlana sustatzea, ikastetxeko hezkuntza-proiektuko helburuak lortzen laguntzeko.

l) Zuzendaritza-taldearekin eta irakaskuntza koordinatzeko gainerako organoekin batera lan egitea ikastetxeak parte hartzen duen ebaluazio, plan, proiektu, programa eta jardueretan.

m) Hezkuntza Laguntzako Unitatearen funtzionamenduan gertatzen den edozein gorabeheraren berri ematea zuzendaritza-taldeari.

n) Hezkuntza Laguntzako Unitatera heldu berri diren irakasleak hartzeko prozesuan buru izatea.

ñ) Ikastetxeko idazkariari Hezkuntza Laguntzako Unitatearen inbentarioa eguneratzen laguntzea, eta materiala eta ekipamendua erosteko proposamenen berri ematea.

o) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoetan egokitutako gainerako eskumen guztiak, baita Hezkuntza Departamentuak eta ikastetxeko zuzendariak egokitutako guztiak ere.

2. Oinarrizko Hezkuntzako ikastetxeetan, Hezkuntza Laguntzako Unitateko koordinatzaileak bere gain hartuko ditu, halaber, hezkuntza- eta lanbide-orientazioko departamentuko buruari egokitutako eskumenak; eskumen horiek foru dekretu honen 65. artikuluan zerrendatuta daude.

61. artikulua. Hezkuntza Laguntzako Unitatearen funtzionamendua.

1. Hezkuntza Laguntzako Unitateko koordinatzailea arduratuko da unitatearen bilerak antolatu eta zuzentzeaz.

2. Ikasturtean zehar, Hezkuntza Laguntzako Unitateko kideak gutxienez astean behin bilduko dira. Halaber, egoerak hala eskatzen badu, Hezkuntza Laguntzako Unitateko koordinatzaileak unitateko kideak bilerara deitu ditzake.

3. Hezkuntza Laguntzako Unitatean, kideek aho batez adostuko dituzte erabaki eta akordioak. Adostasuna ezinezkoa denean, erabakiak gehiengo soilez hartuko dira. Berdinketarik gertatuz gero, koordinatzailearen kalitateko botoa izanen da erabakigarria.

4. Hezkuntza Laguntzako Unitatearen bileretara joatea nahitaezkoa izanen da kide guztientzat.

5. Hezkuntza Laguntzako Unitatearen bilera bakoitzeko, akta bat eginen da, eta unitateko koordinatzaileak idatziko du.

6. Hezkuntza Laguntzako Unitateko koordinatzailea bajan edo aldi baterako kanpoan badago, unitateko beste kide batek beteko ditu haren eginkizunak. Ordezkari hori zuzendariak izendatuko du, unitateko kideen iritzia entzun ondoren.

7. Ikastetxeak berak ezarriko du, bere antolaketa- eta funtzionamendu-arauetan, Hezkuntza Laguntzako Unitatearen funtzionamendu-araubidea, betiere artikulu honetan ezarritakoa errespetatuz.

6. ATALA. HEZKUNTZA- ETA LANBIDE-ORIENTAZIOKO DEPARTAMENTUA

62. artikulua. Hezkuntza eta lanbideorientazioko departamentuaren osaera.

1. Hezkuntza- eta lanbide-orientazioko departamentua irakaskuntza-organo bat da, ikasleen desberdintasun indibidualei arreta emateaz eta haien hezkuntza-orientabideaz arduratzen dena, foru dekretu honen 38. artikuluan horrela jasotako ikastetxeetan.

2. Hezkuntza- eta lanbide-orientazioko departamentua honako hauek osatuko dute (ikastetxean ematen diren ikasketei aplikatu beharreko araudiak berezitasunak ezar ditzake):

a) Hezkuntza-orientazioko irakasleak.

b) Ikasketaburua.

c) Pedagogia terapeutikoko irakasleak.

d) Arloko espezialitateko irakasleak, hala badagokie.

e) Irakasleen klaustroko beste edozein pertsona, hala ezartzen bada foru dekretu hau lantzeko arauetan, ikasketen xedapen espezifikoetan eta ikastetxeko antolaketa- eta funtzionamendu-arauetan.

63. artikulua. Hezkuntza eta lanbideorientazioko departamentuaren eskumenak.

1. Hezkuntza- eta lanbide-orientazioko departamentuak eskumen hauek izanen ditu:

a) Zuzendaritza-taldeari, koordinazio pedagogikorako batzordearen bitartez, honako hauek lantzeko eta, hala badagokie, aldatzeko proposamenak egitea: antolaketa- eta funtzionamendu-arauak, hezkuntza-proiektua, hezkuntza-proiektuko curriculum-edukia, kudeaketa-proiektua eta urteko programazio orokorra.

b) Koordinazio pedagogikorako batzordean ikastetxeko zuzendaritza-taldearekin batera lan egitea, ikasleen desberdintasun indibidualei arreta emateko plana prestatzen.

c) Hezkuntza- eta lanbide-orientazioko departamentuko buruarekin batera lan egitea tutoretza-planerako proposamenak eta urteko programazio orokorrean dagozkion zehaztapenak prestatzen. Plan horren barruan sartuko da Hezkuntza eta Lanbide Orientazioko Plana.

d) Ikastetxeko ikasketaburuarekin batera lan egitea tutoretza-ekintza koordinatzeko.

e) Hezkuntza-komunitateko kide guztiei aholku ematea aniztasunarekiko arretako metodologia eta antolakuntza-estrategiei buruz.

f) Irakasleei laguntza eta aholkularitza ematea ikasleen desberdintasun indibidualei arreta emateko neurriak diseinatu, garatu eta ebaluatzeko, normalizazio- eta inklusio-printzipioak kontuan hartuta.

g) Hezkuntza-laguntzako premi espezifikoak dituzten ikasleei curriculumeko elementuak egokitzeko irizpideak eta prozedurak prestatzen direla eta hezkuntza-premia bereziak dituzten ikasleen curriculum-egokitzapenak egiten direla ziurtatzea, eta koordinazio pedagogikoko gainerako organoei helaraztea.

h) Laguntza ematea ikasleen ikasteko zailtasunak goiz detektatzeko eta hura prebenitzeko eta konpentsatzeko laguntza egokiak ezartzeko; laguntza ematea, orobat, balorazio psikopedagogikoan, hezkuntza-laguntzako premi espezifikoak dituzten ikasleen segimenduan eta ebaluazioari eta mailaz igotzeari buruzko erabakietan.

i) Tutoretza-ekintzan eta familientzako orientazio indibidualean aholku ematea eta laguntzea.

j) Hezkuntza- eta lanbide-orientazioko departamentuko buruari laguntzea departamentu horren urteko plana eta azken memoria prestatzen.

k) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoetan egokitutako gainerako eskumen guztiak, baita Hezkuntza Departamentuak eta indarrean dagoen araudiak egokitutako guztiak ere.

2. Oinarrizko Hezkuntzako ikastetxeetan, Hezkuntza Laguntzako Unitateak bere gain hartuko ditu artikulu honetan hezkuntza- eta lanbide-orientazioko departamentuari egokitutako eskumenak.

64. artikulua. Hezkuntza eta lanbideorientazioko departamentuaren burutza.

1. Hezkuntza- eta lanbide-orientazioko departamentuak buru baten zuzendaritzapean jardunen du. Buru hori hezkuntza-orientazioko espezialitateko irakasle bat izanen da.

2. Ikastetxeko zuzendariak izendatuko du hezkuntza- eta lanbide-orientazioko departamentuko burua, departamentu horretako irakasleen iritzia entzun ondoren. Katedradunen kidegoetako funtzionarioek lehentasuna izanen dute kargu hori hartzeko, ikasturtea hasi aurretik espresuki hala eskatzen badute.

3. Oro har, izendatu duen zuzendaria bezainbeste denboraz izanen da departamentuko buru, salbu eta dagokion epea agortu aurretik kargua uzten badu.

4. Hezkuntza- eta lanbide-orientazioko departamentuko buruak kasu hauetan utziko dio bere eginkizunak betetzeari:

a) Proposatu zuen pertsonak kargua uzten badu.

b) Izendatu duen zuzendariaren agintaldia burutzen bada.

c) Ikastetxean zerbitzuak emateari uzten badio.

d) Dimisio arrazoitua aurkeztu eta zuzendariak onartzen badu.

e) Zuzendaritzako titularrak hala erabakitzen badu.

5. Departamentuko buruak izendatutako agintaldia burutu baino lehen kargua uzten badu, ikastetxeko zuzendariak beste buru bat proposatuko du.

65. artikulua. Hezkuntza eta lanbideorientazioko departamentuburuaren eskumenak.

1. Hezkuntza- eta lanbide-orientazioko departamentu-buruaren eskumenak hauek izanen dira:

a) Hezkuntza- eta lanbide-orientazioko departamentuaren bileretara deitzea eta bileretako buru izatea, baita bilera horien aktak idaztea eta sinatzea ere.

b) Hezkuntza- eta lanbide-orientazioko departamentuaren eginkizunak betetzeko egiten diren jarduerak zuzendu eta koordinatzea.

c) Honako hauek egiteak eta hala badagokio aldatzeak hezkuntza- eta lanbide-orientazioko departamentuari eraginen dizkion zereginez arduratzea eta zeregin horietan parte hartzea: antolaketa- eta funtzionamendu-arauak, hezkuntza-proiektua, hezkuntza-proiektuan jasotako curriculum-zehaztapena, kudeaketa-proiektua eta urteko programazio orokorra.

d) Urteko programazio orokorraren esparruan, hezkuntza- eta lanbide-orientazioko departamentuaren urteko plana eta dagokion azken memoria prestatzea, departamentuko gainerako kideen laguntzarekin.

e) Koordinazio pedagogikorako batzordean hezkuntza- eta lanbide-orientazioko departamentua ordezkatzea eta departamentuko kideek egindako proposamenak batzordeari helaraztea.

f) Hezkuntza-laguntzako premi espezifikoak dituzten ikasleei curriculumeko elementuak egokitzeko irizpideak eta prozedurak prestatzen direla eta hezkuntza-premia bereziak dituzten ikasleen curriculum-egokitzapenak egiten direla ziurtatzea, eta koordinazio pedagogikorako gainerako organoei helaraztea.

g) Irakasle-taldeek proposatutako ikasleen ebaluazio psikopedagogikoa egitea, eta dagozkien txostenak idaztea, talde horien laguntzarekin.

h) Ikasleren bat hezkuntza-laguntzako premia espezifikoak dituztenen zerrendan sartuz gero, haren familiari jakinaraztea.

i) Tutorearekin batera, hezkuntza- eta lanbide-orientazioko departamentuko kideak hezkuntza-laguntzako premia espezifikoak dituzten ikasleei arreta ematen dieten gainerako irakasleekin koordinatuta daudela bermatzea.

j) Gobernu-organoek eta irakaskuntza koordinatzeko organoek emandako informazio guztia hezkuntza- eta lanbide-orientazioko departamentuko kideei helaraztea, informazio horrek beren zereginetan eragina izan badezake.

k) Departamentuko kideen arteko elkarlana sustatzea, ikastetxeko hezkuntza-proiektuko helburuak lortzen laguntzeko.

l) Zuzendaritza-taldearekin eta irakaskuntza koordinatzeko gainerako organoekin batera lan egitea ikastetxeak parte hartzen duen ebaluazio, plan, proiektu, programa eta jardueretan.

m) Hezkuntza- eta lanbide-orientazioko departamentuaren funtzionamenduan gertatzen den edozein gorabeheraren berri ematea zuzendaritza-taldeari.

n) Hezkuntza- eta lanbide-orientazioko departamentura heldu berri diren irakasleak hartzeko prozesuan buru izatea.

ñ) Ikastetxeko idazkariari departamentuko inbentarioa eguneratzen laguntzea, eta materiala eta ekipamendua erosteko proposamenen berri ematea.

o) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoetan egokitutako gainerako eskumen guztiak, baita Hezkuntza Departamentuak eta ikastetxeko zuzendariak egokitutako guztiak ere.

2. Oinarrizko Hezkuntzako ikastetxeetan, Hezkuntza Laguntzako Unitateko koordinatzaileak bere gain hartuko ditu foru dekretu honen artikulu honetan hezkuntza- eta lanbide-orientazioko departamentuko buruari egokitutako eskumenak.

66. artikulua. Hezkuntza eta lanbideorientazioko departamentuaren funtzionamendua.

1. Hezkuntza- eta lanbide-orientazioko departamentuko burua arduratuko da dagokion departamentuaren bilerak antolatu, deitu eta zuzentzeaz.

2. Ikasturtean zehar, departamentuko kideak gutxienez hilean behin bilduko dira. Era berean, egoerak hala eskatzen duenean, departamentuko buruak bertako kideak bilerara deitzen ahalko ditu.

3. Hezkuntza- eta lanbide-orientazioko departamentuan, kideek aho batez adostuko dituzte erabaki eta akordioak. Adostasuna ezinezkoa denean, erabakiak gehiengo soilez hartuko dira. Berdinketarik gertatuz gero, departamentuburuaren kalitateko botoa izanen da erabakigarria.

4. Departamentuko bileretara joatea nahitaezkoa izanen da kide guztientzat.

5. Departamentuaren bilera bakoitzeko, akta bat eginen da, eta departamentuko buruak idatziko du.

6. Departamentuko burua bajan edo aldi baterako kanpoan badago, departamentuko beste kide batek beteko ditu haren eginkizunak. Ordezkari hori zuzendariak izendatuko du, gainerako kideen entzun ondoren, eta, betiere, hezkuntza-orientazioko espezialitateko irakasleak lehenetsiko ditu, eta horien barruan espezialitate horretako katedradunen kidegoetako funtzionarioak, baldin eta espresuki hala eskatu badute.

7. Ikastetxeak berak ezarriko du, bere antolaketa- eta funtzionamendu-arauetan, departamentuaren funtzionamendu-araubidea, betiere artikulu honetan ezarritakoa errespetatuz.

7. ATALA. KOORDINAZIO PEDAGOGIKORAKO BATZORDEA

67. artikulua. Koordinazio pedagogikorako batzordearen osaera.

1. Koordinazio pedagogikorako batzordea irakaskuntza koordinatzeko organo bat da, eta hezkuntzaren, jarduera pedagogikoaren eta curriculumaren inguruko gaien antolamendua koordinatzeaz arduratzen da. Alde horretatik, ikastetxeko hezkuntza-proiektua, etapa edo ikasketen curriculum-zehaztapena eta urteko programazio orokorra bat datozela ziurtatzen du.

2. Lehen Hezkuntzako ikastetxeetan eta Haur eta Lehen Hezkuntzako ikastetxeetan, koordinazio pedagogikorako batzordea honako hauek osatuko dute:

a) Ikastetxeko zuzendaritza-taldeko kideak, pertsona bakarreko organo atxikiak barne, hala badagokie.

b) Zikloko irakasle-taldeen koordinatzaileak.

c) Hezkuntza Laguntzako Unitateko koordinatzailea.

d) Irakasleen klaustroko beste edozein pertsona, hala ezartzen bada foru dekretu hau lantzeko arauetan, ikasketen xedapen espezifikoetan eta ikastetxeko antolaketa- eta funtzionamendu-arauetan.

Bederatzi unitate baino gutxiago dituzten ikastetxeetan, koordinazio pedagogikorako batzordearen eginkizunak irakasleen klaustroak hartuko ditu bere gain.

3. Hauek izanen dira Oinarrizko Hezkuntzako koordinazio pedagogikorako batzordeko kideak:

a) Ikastetxeko zuzendaritza-taldeko kideak, pertsona bakarreko organo atxikiak barne, hala badagokie.

b) Zikloko irakasle-taldeen koordinatzaileak, Haur eta Lehen Hezkuntzan.

c) Koordinazio didaktikoko departamentuetako buruak.

d) Heziketa-zikloko koordinatzaileak, horrelakorik badago.

e) Hezkuntza Laguntzako Unitateko koordinatzailea.

f) Irakasleen klaustroko beste edozein pertsona, hala ezartzen bada foru dekretu hau lantzeko arauetan, ikasketen xedapen espezifikoetan eta ikastetxeko antolaketa- eta funtzionamendu-arauetan.

4. Derrigorrezko Bigarren Hezkuntzako institutuetan, Bigarren Hezkuntzako institutuetan, Lanbide Heziketako institutuetan eta ikastetxe integratuetan, koordinazio pedagogikorako batzordea honako hauek osatuko dute:

a) Ikastetxeko zuzendaritza-taldeko kideak, pertsona bakarreko organo atxikiak barne, hala badagokie.

b) Koordinazio didaktikoko departamentuetako buruak.

c) Heziketa-zikloko koordinatzaileak, hala badagokio.

d) Hezkuntza- eta lanbide-orientazioko departamentu-burua.

e) Irakasleen klaustroko beste edozein pertsona, hala ezartzen bada foru dekretu hau lantzeko arauetan, ikasketen xedapen espezifikoetan eta ikastetxeko antolaketa- eta funtzionamendu-arauetan.

5. Foru dekretu honen aplikazio-eremuko gainerako ikastetxeetan (3.17 artikuluan aipatzen direnak barne), Hezkuntza Departamentuak zehaztuko du koordinazio pedagogikorako batzordearen osaera, ematen dituzten ikasketen bereizgarriak kontuan hartuta.

68. artikulua. Koordinazio pedagogikorako batzordearen eskumenak.

Koordinazio pedagogikorako batzordeak eskumen hauek izanen ditu:

a) Zuzendaritza-taldeari honako hauek lantzeko eta hala badagokio aldatzeko proposamenak egitea: antolaketa- eta funtzionamendu-arauak, hezkuntza-proiektua, hezkuntza-proiektuko curriculum-edukia, kudeaketa-proiektua eta urteko programazio orokorra.

b) Koordinazio pedagogikorako batzordearen jardueren urteko programazioa adostea eta programazioaren jarraipena egitea, organo horretako buruaren zuzendaritzapean.

c) Ikastetxeko hezkuntza-proiektua, etapa eta ikasketen curriculum-zehaztapena, urteko programazio orokorra eta hura osatzen duten plan eta proiektuak bat datozela ziurtatzea.

d) Honako hauek prestatu eta berrikusteko jarraibide orokorrak ezartzea: etapa edo ikasketetako curriculumaren zehaztapena, urteko programazio orokorra eta arlo, jakintzagai, eremu, modulu edo irakasgaien programazio didaktikoak.

e) Irakas-praktikaren gaineko irizpide orokorrak ezartzea ikastetxearen ildo pedagogiko-didaktikoaren arabera.

f) Koordinazio didaktikoko departamentuen edo zikloko taldeen lana koordinatzea.

g) Etapa edo ikasketa bakoitzeko ikasketa-planeko curriculum-zehaztapenaren prestaketa koordinatzea (programazio didaktikoetan ageri da), eta ezarritako jarraibideetara egokitzen dela zaintzea.

h) Ikastetxeko zuzendaritza-taldearekin batera lan egitea ikasleen desberdintasun indibidualei arreta emateko plangintzan.

i) Ikastetxean egiten diren jardueren eta diagnostikoen ebaluazioetan parte hartzea, emaitzak aztertzea eta hobetzeko ekintzak proposatzea.

j) Ikastetxeak parte hartzen duen plan, proiektu, programa eta jardueretan laguntzea, emaitzak aztertzea eta hobetzeko ekintzak proposatzea.

k) Ikastetxeko barne- eta kanpo-ebaluazioetako txostenak aztertzea eta baloratzea, eta emaitzak hobetzen laguntzeko egokitzapenak eta aldaketak xedatzea.

l) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoetan egokitutako gainerako eskumen guztiak, baita Hezkuntza Departamentuak eta ikastetxeko zuzendariak egokitutako guztiak ere.

69. artikulua. Koordinazio pedagogikorako batzordearen funtzionamendua.

1. Koordinazio pedagogikorako batzordeko burua ikastetxeko zuzendaria izanen da, eta hura arduratuko da bileretarako deialdiak egiteaz; betiere, kide guztiak bertaratu ahal izateko ordutegia aukeratuko du.

2. Koordinazio pedagogikorako batzordeko idazkari-lanak ikastetxeko idazkariak eginen ditu, eta hura arduratuko da batzordearen bileren aktak egiteaz eta hartutako erabakien fede emateaz, lehendakariaren oniritziarekin.

3. Ikasturtean zehar, koordinazio pedagogikorako batzordeko kideek osoko bilkura eginen dute gutxienez hilean behin. Era berean, batzordeak lantaldeak eratzen ahalko ditu bere baitan, batzordearen urteko jardueren programazioan ezarritakoaren arabera.

4. Halaber, egoerak hala eskatzen badu, koordinazio pedagogikorako batzordeko buruak batzordekideak bilerara deituko ditu.

5. Koordinazio pedagogikorako batzordean, kideek aho batez adostuko dituzte erabaki eta akordioak. Adostasuna ezinezkoa denean, erabakiak gehiengo soilez hartuko dira. Berdinketarik gertatuz gero, lehendakariaren kalitateko botoa izanen da erabakigarria.

6. Koordinazio pedagogikorako batzordearen bilkuretara joatea nahitaezkoa izanen da kide guztientzat.

7. Ikastetxeak berak ezarriko du, bere antolaketa- eta funtzionamendu-arauetan, koordinazio pedagogikorako batzordearen funtzionamendu-araubidea, betiere artikulu honetan ezarritakoa errespetatuz.

8. ATALA. TUTORETZA

70. artikulua. Tutoreak.

1. Tutoretza-ekintzaren helburua da familiekin batera ikasleei beren garapen pertsonal eta sozialean laguntzea, nola esparru akademikoan hala pertsonalean eta sozialean, eta, irakasle guztiekin batera, ikasleen jarraipen indibidual eta kolektiboa koordinatzea.

2. Ikasle-talde bakoitzeko tutore bat izendatuko da.

3. Halaber, beste tutoretza-irudi batzuk izendatuko dira, dagokion tutorearekin elkarlanean aritu daitezen, baldin eta ikasketen aplikazio-arauak hala xedatzen badu, Hezkuntza Departamentuak hala ezartzen badu edo taldearen ezaugarriak edo beste egoera batzuk direla eta hala komeni bada.

4. Tutoreak eta, hala badagokio, gainerako tutoretza-figurak zuzendariak izendatuko ditu, ikasketaburuak proposatuta; betiere, dagokion irakasle-taldeko norbait hautatuko du. Izendapena ikasturte baterako izanen da.

5. Nolanahi ere, artikulu honetan jasotakoa ikasketen antolamenduaren bereizgarrietara egokituko da.

71. artikulua. Tutoreen eskumenak.

Tutoreek eskumen hauek izanen dituzte (betiere, ikasketen antolamenduaren bereizgarrietara egokituko dira):

a) Tutoretza-planaren garapenean parte hartzea, hezkuntza-orientazioko irakasleekin elkarlanean eta ikasketaburuak koordinatuta.

b) Ikasleei eta, hala badagokio, familiei orientazioa eta aholkuak ematea, beren aukera akademiko eta profesionalak landu ditzaten.

c) Ikasleen interesak ezagutzea, eta taldean eta ikastetxeko bizitzan moldatzen laguntzea, baita jarrera partizipatibo eta positiboak sustatzea ere, taldeko harreman onak sendotze aldera.

d) Taldeko irakasle-taldearen hezkuntza-lana koordinatzea; arlo, jakintzagai, eremu, modulu edo irakasgaietako lana bateratzen dela zaintzea; eta, horretarako, ikasgelako taldeak egoki funtzionatzeko eta ikasleen errendimendua ezin hobea izateko jarduerak adostea.

e) Irakasle-taldearen eta ikasle, guraso eta legezko ordezkarien arteko komunikazioa eta koordinazioa erraztea, eta, desadostasunen bat sortzen bada, bitartekari-lanak egitea.

f) Bere taldeko ikasleen ebaluazio-prozesua koordinatzea, eta ebaluazio-saioak prestatzea, saio horietan buru izatea eta akta egitea.

g) Gainerako irakasleek ebaluazio-dokumentuak behar bezala betetzen dituztela zaintzea.

h) Bere taldeko ikasleen hutsegiteak eta puntualtasun faltak kontrolatzea, eta familiei eta ikasketaburuari gorabehera horien eta gainerakoen berri ematea.

i) Aldizka bilerak egitea, bai ikasleekin, bai haien familiekin, banaka edo taldeka.

j) Familiei, irakasleei eta taldeko ikasleei ikastetxeko jarduerekin, errendimendu akademikoarekin eta bizikidetzarekin zerikusia duen guztiaren berri ematea.

k) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoetan egokitutako gainerako eskumen guztiak, baita Hezkuntza Departamentuak eta ikastetxeko zuzendariak egokitutako guztiak ere.

72. artikulua. Tutoretzaren funtzionamendua.

1. Irakasleen tutoretza-ekintza ikasketaburuak koordinatuko du, Hezkuntza Laguntzako Unitatearen edo hezkuntza- eta lanbide-orientazioko departamentuaren laguntzarekin. Alde horretatik, ikasturtean zehar tutoreekin egin beharreko aldizkako bileretarako deialdia eginen du eta bilera horietako buru izanen da. Bilera horietan, gainera, irakasleen klaustroko beste edozein pertsona egon daiteke, horrela jasoa badago foru dekretu honetako arauetan, ikasketen xedapen espezifikoetan edo ikastetxeko antolamendu- eta funtzionamendu-arauetan.

2. Tutoreak, Hezkuntza Laguntzako Unitatearen edo hezkuntza- eta lanbide-orientazioko departamentuaren laguntza teknikoarekin eta taldeko ikasleen ezaugarri eta premiak kontuan hartuta, ikasturterako ezarritako tutoretza-planetan eta hezkuntza- eta lanbide-orientazioko planetan programatutako tutoretza-jarduerak eginen ditu.

3. Ebaluazio-saioez gain, tutoreak, beharrezkotzat joz gero, bilerak eginen ditu taldeko irakasle-taldearekin.

4. Ikasleei dagokienez, tutore bakoitzaren taldeak taldeko tutoretza-saioak izanen ditu astero, indarrean dagoen ikasketen araudiak ezartzen dituenak, hain zuzen.

5. Ikasketen antolamendu-araudiak horretarako ezartzen dituen aginduzko bilerez gain, tutoreak, beharrezkotzat jotzen duenean, tutoretzako banakako bilerak programatuko ditu, bai ikasleekin, bai haien guraso edo legezko ordezkariekin.

6. Familiek seme-alaben hezkuntza-prozesuan parte hartzeko duten eskubidea bermatzeko, ikasleen tutoreek eta gainerako irakasleek haien seme-alaben ikasketen bilakaeraren berri eman behar diete. Hori, batez ere, ikasleen ikaskuntzaren emaitzak positiboak ez direnean, gizartean eta hezkuntzan integratzeko arazoak dituztenean edo familiek edo irakasleek hala eskatzen dutenean.

7. Talde berean eskolak ematen dituzten irakasleek tutoreari lagunduko diote tutoretza-lanak eta aurreikusitako tutoretza-jarduerak egiten; horretarako, dagokion tutorearekin komunikatuko da, denbora guztian eta arin. Era berean, arreta eta laguntza pertsonala emanen die ikasleei, eta eskolan porrot egiteko arriskuan dauden ikasleen jarraipen etengabea eginen du.

8. Ikastetxeko irakasle guztiek ikasleen jarduera akademikoan eragina duten eta behar bezalako garapen akademikoa eragozten duten gorabehera garrantzitsu guztiei buruzko informazioa emanen diete familiei, ahal den lasterren; horretarako, lan hori dagokion tutorearekin koordinatuko dute.

9. Tutoretza-ekintza osatzeko, Hezkuntza Departamentuak prestatutako hezkuntza-plataforma digitala erabiliko da, eguneroko tutoretza-ekintza errazteko.

10. Nolanahi ere, artikulu honetan jasotakoa ikasketen antolamenduaren bereizgarrietara egokituko da.

9. ATALA. IKASTETXEETAKO BESTE BATZORDE, TALDE ETA KOORDINAZIO-FIGURA BATZUK

73. artikulua. Beste batzorde, talde eta koordinaziofigura batzuk.

1. Hezkuntza Departamentuak proposa dezake beste batzorde, lantalde edo koordinazio-figura batzuk eratzea, ikastetxeetan departamentuak berak sustatzen dituen hezkuntza-proiektu edo -programak ezartzeko.

2. Era berean, ikastetxeek, antolatzeko duten autonomia baliatuz eta beren bitartekoak erabiliz, ikastetxeko hezkuntza-proiektua zabaltzen laguntzeko nahi adina batzorde, lantalde eta koordinazio-irudi eratzen ahalko dituzte. Horretarako, ikastetxeko zuzendariak irakasleen klaustroko edozein kideri eginkizun espezifikoak egokitzen ahalko dizkio, ikastetxea egoki antolatu eta ongi funtziona dezan.

3. Artikulu honetan ezarritakoaren babesean eratu daitezkeen batzorde, talde eta koordinazio-figuren funtzionamendu-araubidea ikastetxearen antolaketa- eta funtzionamendu-arauetan jasoko da.

VI. KAPITULUA. IRAKASLEAK

74. artikulua. Titulaziobaldintzak.

Ikasketetan eskolak ematen dituzten langileek indarrean dagoen araudiak ezarritako kualifikazio- eta titulazio-baldintzak bete beharko dituzte, eta eskatzen den prestakuntza pedagogiko eta didaktikoa izan beharko dute.

75. artikulua. Irakasleen eginkizunak.

1. Irakasleek parte hartuko dute ikastetxeko jarduera orokorretan, elkarlana eta talde-lana dituztela gidari.

2. Irakasleek zeregin hauek izanen dituzte (betiere, ikasketen antolamenduaren bereizgarrietara egokituko dira):

a) Ikastetxeko hezkuntza-proiektua, antolaketa eta funtzionamendua ezagutzea.

b) Aktiboki parte hartzea ikastetxearen antolamenduan eta funtzionamenduan eta programatutako hezkuntza-jardueretan, zuzendaritza-taldeko kideekin batera.

c) Ezarritako lantalde eta laneko ekipoetan parte hartzea, eta proposamen eraikitzaileak aurkeztea.

d) Ikastetxearen plangintzan ezartzen diren urteko eta zenbait urtetarako hezkuntza-helburuak eta -xedeak beren gain hartzea.

e) Ikastetxeak hezkuntza-helburuak betetzeko abian jartzen dituen proiektu, programa eta plan espezifikoetan parte hartzea.

f) Ikastetxeko irakasle-taldeko, departamentuko eta zikloko lankideekin koordinatzea eta elkarlanean aritzea, hezkuntza-prozesuak hobetzeko.

g) Foru dekretu honetan jasotakoaren arabera egokituta eta planifikatuta dituzten arlo, jakintzagai, eremu, modulu edo irakasgaiak ematea.

h) Esleituta dauzkaten arlo, jakintzagai, eremu, modulu edo irakasgaien ikasgelako programazioak egitea, curriculum ofizialen arabera eta dagozkion programazio didaktikoetan ezarritakoarekin bat, departamentuko buru den edo taldea koordinatzen duen pertsonak gainbegiratuta.

i) Bere irakaskuntza-jardunbidean, hezkuntza-laguntzako premia espezifikoak dituzten ikasleei arreta emateko curriculum-neurri, estrategia, teknika eta baliabide egokiak erabiltzea.

j) Bere ardurapeko arlo, jakintzagai, eremu, modulu edo irakasgaiei dagozkien curriculum-egokitzapen nabarmenak egitea, Hezkuntza Laguntzako Unitatearen edo hezkuntza- eta lanbide-orientazioko departamentuaren laguntza eta aholkularitzarekin.

k) Ikasturte-hasieran, dagozkien arlo, jakintzagai, eremu, modulu edo irakasgaietako programazioen eta ebaluazio- eta kalifikazio-prozesu eta -irizpideen berri ematea ikasleei eta haien familiei.

l) Ikasleen ikaskuntza-prozesua eta irakaskuntza-prozesuak ebaluatzea, eta beren irakaskuntza-jardunbidea nola hobetu hausnartzea.

m) Ikastetxean egonen ez den aldietarako, ikasleen arreta antolatzea.

n) Tutorearekin batera, ikasleen banakako eta taldeko jarraipena egitea, beren hezkuntza-prozesuan laguntzea eta hezkuntza-, ikasketa- eta lanbide-orientazioa ematea.

ñ) Ikasleen garapen intelektual, afektibo, psikomotor, sozial eta morala sustatzea, pertsonen garapen osoan oinarritutako hezkuntzaren bidez eta estereotipoak eta genero-rolak alde batera utzita. Horrez gain, sexuagatiko edozein diskriminazio-mota deuseztatzea.

o) Ikastetxeak ikastetxean bertan edo ikastetxetik kanpo programatutako jarduera osagarrietan parte hartzea; hori, foru dekretu honen 109. artikuluan ezarritakoaren arabera.

p) Ikastetxeko jarduerak errespetu-, tolerantzia-, partaidetza- eta askatasun-giroan egitea, ikasleengan herritartasun demokratikorako eta bakearen kulturarako balioak sustatze aldera, eta ikastetxean bizikidetza-arauak betetzen direla zaintzea.

q) Aldizka, seme-alaben ikaskuntza-prozesuari buruzko informazioa ematea familiei, eta familiek edo ikasleek eskatzen dieten edozein argibide ematea.

r) Irakatsi eta ikasteko prozesuak ebaluatzea eta hobetzea, prozesu horiei eta haiek praktikan jartzeari buruz gogoeta egitea, eta irakaskuntzak ikasleen ikaskuntzan zer eragin duen aztertzea.

s) Barne- eta kanpo-ebaluazioetan parte hartzea eta laguntzea, baita urteko programazio orokorrean adostu eta onetsitako gainerako gaietan ere.

t) Hezkuntza-plataforma digitala ezagutzea, ikasleen kalifikazioak han erregistratzea, egokitzen zaizkion hezkuntza- eta kudeaketa-prozesuak eguneratuta izatea, eta, betiere, epeak betetzea.

u) Jolas-orduetan, guardietan edo ikasleei laguntzeko edo gainbegiratzeko agintzen zaion beste edozein lanetan parte hartzea.

v) Elkarlanean aritzea gizarte- eta osasun-zerbitzuekin, Hezkuntza Departamentuarekin, beste ikastetxe batzuekin eta hezkuntzan parte hartzen duten gainerako erakunde eta entitateekin.

w) Ikastetxeko instalazioetan edo ekipamendu didaktikoan atzemandako akatsen berri ematea ikastetxeko idazkariari.

x) Foru dekretu honen gainerako artikuluetan, ikastetxearen antolaketa- eta funtzionamendu-arauetan eta ikasketen araudi espezifikoetan egokitutako gainerako eskumen guztiak, baita Hezkuntza Departamentuak eta ikastetxeko zuzendariak egokitutako guztiak ere.

VII. KAPITULUA. IRAKASLE EZ DIREN IKASTETXEKO LANGILEAK

76. artikulua. Irakasle ez diren langileak.

1. Ikasketen antolamendu espezifikoaren eta ikastetxearen ezaugarrien arabera egindako egokitzapenak gorabehera, hauek izanen dira irakasle ez diren ikastetxeko langileak:

a) Administrazio eta zerbitzuetako langileak, hezkuntza-lanetan aritzen diren baina irakasleen klaustroan ez dauden langile guztiak barne.

b) Hezkuntza-arreta osagarriko langileak.

2. Irakasle ez diren ikastetxeko langileen burua ikastetxeko zuzendaria izanen da. Oro har, eta ikasketen araudi espezifikoetan horri buruz xedatutakoa gorabehera, administrazio eta zerbitzuetako langileen kasuan, eskumen hori idazkariak izanen du, ikastetxeko zuzendariak eskuordetuta; eta, hezkuntza-arreta osagarriko langileen kasuan, ikasketaburuak.

3. Irakasle ez diren langileen eginkizunak organo eskudunak horretarako ezartzen dituenak izanen dira.

77. artikulua. Irakasle ez diren langileen partehartzea ikastetxeen gobernuan.

1. Indarrean dagoen araudiaren arabera, eta ikastetxeen gobernuan parte har dezaten sustatze aldera, administrazio eta zerbitzuetako langileen ordezkari bat eskola-kontseiluko kide izanen da, aplikatu behar den araudian ezarritako baldintzetan.

2. Halaber, eta aplikatzekoa den araudian ezarritakoari ere erantzunez, Hezkuntza Bereziko ikastetxe espezifikoetan eta Hezkuntza Bereziko unitateak dauzkatenetan hezkuntza-arreta osagarriko langileen ordezkari bat ere izanen da eskola-kontseiluko kide.

VIII. KAPITULUA. FAMILIEN ETA IKASLEEN PARTE-HARTZEA

1. ATALA. FAMILIEN PARTE-HARTZEA IKASTETXEEN FUNTZIONAMENDUAN ETA GOBERNUAN

78. artikulua. Familiek parte hartzeko bideak.

1. Ikasleen gurasoek eta legezko ordezkariek, beren seme-alaben hezkuntzaren arduradun nagusi diren aldetik, indarrean dauden xedapen arauemaileetan ezarritako eskubide eta betebeharrak izanen dituzte. Eskubide eta betebehar horiek, betiere, ikasketen antolamenduaren berezitasunera eta ikastetxe bakoitzaren ezaugarrietara egokituko dira.

2. Ikasleen guraso eta legezko ordezkariek ikastetxeen gobernuan parte hartzeko duten eskubidea erabiltze aldera, eskola-kontseiluan parte hartzen ahalko dute, kide hautetsi gisa, aplikatu beharreko araudian ezarritako moduan.

3. Halaber, parte hartzeko eskubide hori ikasleen gurasoen eta legezko ordezkarien elkarteen bidez gauzatzen ahalko da. Elkartearen ordezkari bat eskola-kontseiluaren parte izanen da, kide ez-hautetsi gisa, indarrean dagoen araudian ezarritako moduan. Elkarte bat baino gehiago egonez gero, ordezkari hori ikastetxean ordezkaritza handiena duen elkarteak izendatuko du.

4. Ikasleen guraso eta legezko ordezkariek ikastetxeei eta irakasleei lagundu behar diete beren seme-alaben hezkuntza-prozesuan.

5. Ikastetxeek, beren antolaketa- eta funtzionamendu-autonomia baliatuz, familiek parte hartzeko moduak zehazten ahalko dituzte beren antolaketa- eta funtzionamendu-arauetan, beren ikasketen antolamenduaren berezitasunak kontuan hartuta.

79. artikulua. Gurasoen eta legezko ordezkarien elkarteak.

1. Gurasoek eta legezko ordezkariek bermatua dute hezkuntza-arloan elkartzeko askatasuna, eta Hezkuntza Departamentuari eta ikastetxeei dagokie ikastetxeetan benetan parte har dezaten sustatzea.

2. Horretarako, foru dekretu honen aplikazio-eremuan jasotako ikastetxeetan, ikasleen gurasoen eta legezko ordezkarien elkarteak egon daitezke. Elkarte horiek, betiere, indarrean dagoen araudian ezarritakoaren arabera arautuko dira.

3. Ikastetxean ikasten ari diren ikasleen guraso eta legezko ordezkariak izan daitezke elkarteetako kide.

4. Gurasoen eta legezko ordezkarien elkarteek xede hauek izanen dituzte (betiere, indarrean dagoen araudia beteko dute):

a) Gurasoei edo legezko ordezkariei laguntzea seme-alaben hezkuntzari buruzko guztian.

b) Ikastetxeko hezkuntza jardueretan laguntzea.

c) Familiek ikastetxearen kudeaketan parte hartzea sustatzea.

5. Gurasoen eta legezko ordezkarien elkarteek, dagozkien helburu eta zereginak betetzeko, ikastetxeko gelak eta behar bezala funtzionatzeko behar dituzten baliabide materialak erabiltzen ahalko dituzte, eta ikastetxeko zuzendariak eskubide hori erabiltzea erraztuko die. Aldez aurretik, elkarteek ikastetxeko zuzendaritzari jakinaraziko diote, ikastetxearen antolaketa- eta funtzionamendu- arauetan jasotakoaren arabera. Nolanahi ere, elkarteen jarduerek ez dute urteko programazio orokorraren ohiko garapena oztopatzen ahalko.

6. Elkarteen izen-emateari eta erregistroari dagokionez, indarrean dagoen araudian jasotakoa beteko da.

80. artikulua. Gurasoen eta legezko ordezkarien elkarteen eginkizunak.

Gurasoen eta legezko ordezkarien elkarteek eginkizun hauek izanen dituzte:

a) Zuzendaritza-taldeari honako hauek lantzeko eta, hala badagokie, aldatzeko proposamenak egitea: antolaketa- eta funtzionamendu-arauak, ikastetxeko hezkuntza-proiektua, kudeaketa-proiektua eta urteko programazio orokorra.

b) Hezkuntza-proiektuaren esparruan diseinatutako jarduerak egitea. Jarduera horiek, betiere, ikastetxearen antolaketa eta funtzionamendua errespetatuko dituzte.

c) Eskola-kontseiluari proposamenak egitea.

d) Eskola-kontseilurako beren ordezkaria izendatzea, indarrean dagoen araudian ezarritako moduan; ordezkari hori kide ez-hautetsi izanen da. Elkarte bat baino gehiago badago, ordezkari hori ikastetxean ordezkaritza handiena duen elkarteak izendatuko du.

e) Familiei beren jardueren berri ematea.

f) Ikastetxeko familien, ikasleen eta irakasleen parte-hartzea eta elkarlana sustatzea, ikastetxeak egoki funtziona dezan.

f) Zuzendaritza-taldearekin batera lan egitea ikastetxeak ongi funtziona dezan.

h) Indarrean dagoen arauditik eratortzen diren edo Hezkuntza Departamentuak ezartzen dituen gainerako guztiak.

2. ATALA. IKASLEEN PARTE-HARTZEA IKASTETXEEN FUNTZIONAMENDUAN ETA GOBERNUAN

81. artikulua. Ikasleek parte hartzeko bideak.

1. Ikasle guztiek indarrean dauden araudietan ezarritako eskubide eta eginbehar berberak dituzte; duten adinaren eta dauden hezkuntza-mailaren arabera, jakina.

2. Ikasleek ikastetxearen gobernuan parte hartzeko duten eskubidea eskola-kontseiluan parte hartzeko aukeran egikarituko da, aplikatu beharreko araudian ezarritako moduan.

3. Parte hartzeko eskubide hori gauzatzeko, ikasleek taldeko ordezkariak izendatu eta ordezkarien batzordeak eratuko dituzte. Gainera, ikasleen elkarteetan parte hartzeko aukera izanen dute. Hori, atal honetan jasotako baldintza eta kondizioetan.

4. Indarrean dauden xedapenen arabera, ikasleek betebehar hauek dituzte: ikastetxeko prestakuntza-jardueretan parte hartzea, irakasleen jarraibideak betetzea, bizikidetza hobetzen parte hartzea eta laguntzea, eta ikastetxeko antolaketa- eta funtzionamendu-arauak errespetatzea.

5. Ikastetxeek, beren antolaketa- eta funtzionamendu-autonomia erabiliz, ikasleek parte hartzeko moduak zehazten ahalko dituzte beren antolaketa- eta funtzionamendu-arauetan, beren ikasketen antolamenduaren berezitasunak eta ikastetxearen ezaugarriak kontuan hartuta.

82. artikulua. Taldeordezkariak.

1. Derrigorrezko Bigarren Hezkuntza, Batxilergoa edo Lanbide Heziketa ematen dituzten ikastetxeek taldeko ordezkariak izanen dituzte, ikastetxeko talde bakoitzeko ikasleek libreki aukeratuak. Foru dekretu honen aplikazio-eremuan jasota dauden gainerako ikastetxeek ordezkariak izaten ahalko dituzte, ematen dituzten ikasketen araudi espezifikoan edo beren antolaketa- eta funtzionamendu-arauetan ezarritakoaren arabera.

2. Ikasturtearen lehen hilabetean, ikasle-talde bakoitzak taldeko ordezkari bat hautatuko du, zuzeneko sufragio sekretu bidez, ikasturte osorako. Ordezkari hori ikasleen ordezkarien batzordeko kide izanen da. Horrez gain, ordezkariorde bat hautatuko dute, ordezkariari bere eginkizunetan lagundu diezaion. Ordezkariak huts egiten badu edo gaixorik badago, ordezkariordeak ordezkatuko du.

3. Ordezkarien eta ordezkariordeen hauteskundeetarako deia ikasketaburuak antolatu eta deituko ditu, taldeetako tutoreen laguntzarekin, ikastetxearen antolaketa- eta funtzionamendu-arauetan ezarritako prozeduraren arabera.

4. Hauteskundeak tutoretza-ekintzen esparruan antolatuko dira, eta taldeko tutoreari dagokio behar bezala egiten direla bermatzea.

5. Ordezkariak eta ordezkariordeak atzera botatzen ahalko dira, taldeko ikasleen erabateko gehiengoak hala erabakitzen badu. Aurrez, tutoreari txosten arrazoitu bat aurkeztu behar zaio. Kasu horretan, hauteskunde berrietarako deialdia eginen da, hamabost eguneko epean, lehen ezarritakoaren arabera. Ordezkariak eta ordezkariordeak dimisioa aurkezten badute, hautatzeko prozedura bera erabiliko da.

6. Ikastetxearen antolaketa- eta funtzionamendu-arauetan jasoko dira, halaber, artikulu honetan xedatutakoa osatzeko beharrezkotzat jotzen diren gainerako alderdi guztiak.

7. Nolanahi ere, artikulu honetan jasotakoa ikasketen antolamenduaren bereizgarrietara egokituko da.

83. artikulua. Taldeko ordezkarien eginkizunak.

1. Taldeko ordezkariek eginkizun hauek izanen dituzte:

a) Ordezkarien batzordearen bileretara joatea eta eztabaidetan parte hartzea, eta taldeari eragin diezaioketen gai guztien berri ematea beren taldeko ikasleei eta tutoreari.

b) Taldearen bozeramaile izatea tutorearen eta ikastetxean eratutako beste edozein organoren aurrean, taldeak bere iritzia eman nahi duen gai guztietan.

c) Taldeko ikasleen arteko bizikidetza sustatzea, tutorearekin eta taldeko irakasle-taldearekin lankidetzan arituz taldearen funtzionamenduari eragiten dioten gaietan.

d) Taldeak materialak eta espazioak behar bezala erabiltzen dituela zaintzea.

e) Ikastetxearen antolaketa- eta funtzionamendu-arauetan egokitutako guztiak, baita indarrean dagoen arauditik eratorritakoak eta Hezkuntza Departamentuak ezarritakoak ere.

2. Nolanahi ere, artikulu honetan jasotakoa ikasketen antolamenduaren bereizgarrietara egokituko da.

84. artikulua. Ordezkarien batzordea.

1. Derrigorrezko Bigarren Hezkuntza, Batxilergoa edo Lanbide Heziketa ematen dituzten ikastetxeek ordezkarien batzorde bat izanen dute. Batzorde hori taldeetako ordezkariek eta ikastetxeko eskola-kontseiluan ikasleek dituzten ordezkariek osatuko dute. Foru dekretu honen aplikazio-eremuan jasota dauden eta ordezkariak dituzten gainerako ikastetxeek batzordea izaten ahalko dute, ematen dituzten ikasketen araudi espezifikoan edo beren antolaketa- eta funtzionamendu-arauetan ezarritakoaren arabera.

2. Batzordeak ordezkari bat eta ordezkariorde bat aukeratzen ahalko ditu bere kideen artean, eta haiek arduratuko dira batzordearen lana eta bilerak koordinatzeaz.

3. Ordezkarien batzordeak bilerak egin ditzakete, eta, aztertu beharreko gaiak direla eta hala egitea komeni bada, batzordeak eratu ditzakete ikasturte bateko edo ikastetxean ematen diren etapa edo ikasketa bateko ordezkariekin.

4. Ordezkarien batzordeak hala eskatzen duenean, ikasleei bereziki eragiten dieten gaietan esateko duena entzunen dute ikastetxeko pertsona bakarreko gobernu-organoek, bilkuran edo batzordean.

5. Ordezkarien batzordeek eskubidea izanen dute ikasleek eskola-kontseiluan dituzten ordezkariengandik kide anitzeko organo horretan landu diren gaiei buruzko informazioa jasotzeko.

6. Ordezkarien batzordeek, dagozkien helburu eta zereginak betetzeko, ikastetxeko gelak eta behar bezala funtzionatzeko behar dituzten baliabide materialak erabiltzen ahalko dituzte, eta ikastetxeko zuzendariak eskubide hori erabiltzea erraztuko die. Aldez aurretik, batzordeek ikastetxeko zuzendaritzari jakinaraziko diote, ikastetxearen antolaketa- eta funtzionamendu- arauetan jasotakoaren arabera. Batzordeen jarduerek ez dute urteko programazio orokorraren ohiko garapena oztopatzen ahalko.

7. Ordezkarien batzordeek autonomia izanen dute beren antolaketa- eta funtzionamendu-araubidea ezartzeko; araubide horrek artikulu honetan xedatutakoa zehazteko balioko du. Antolaketa- eta funtzionamendu-araubidea ikastetxeko ikasketaburuak onetsi ondoren sartuko da indarrean. Ikasketaburuak araubidea indargabetzen ahalko du, baldin eta ikasleek eta hezkuntza-komunitateko gainerako kideek erregelamenduzko xedapenen arabera dituzten eskubide eta betebeharren aurkakoa bada; baita indarrean dagoen araudian, foru dekretu honetan edo ikastetxearen plangintza instituzionaleko edozein dokumentutan ezarritakoaren aurkakoa bada ere.

8. Artikulu honetan jasotakoa ikasketen antolamenduaren berezitasunetara eta ikastetxeen bereizgarrietara egokituko da.

85. artikulua. Ordezkarien batzordearen eginkizunak.

Ordezkarien batzordeak eginkizun hauek izanen ditu:

a) Zuzendaritza-taldeari honako hauek lantzeko eta, hala badagokie, aldatzeko proposamenak egitea: antolaketa- eta funtzionamendu-arauak, ikastetxeko hezkuntza-proiektua, kudeaketa-proiektua eta urteko programazio orokorra.

b) Ikasleei batzordearen jardueren berri ematea.

c) Ikasleek eskola-kontseiluan dituzten ordezkariei ikastetxeko taldeetan eragina izan dezaketen gai guztien berri ematea.

d) Bere eskumenen esparruan eskola-kontseiluak landuko dituen gaiak eztabaidatzea eta eskola-kontseiluan dituzten ordezkariei ebazpen-proposamenak aurkeztea.

e) Eskola-kontseiluari proposamenak egitea.

f) Ikastetxeko ikasle eta irakasleen eta, hala badagokie, familien parte-hartzea eta lankidetza sustatzea, ikastetxeak egoki funtziona dezan.

g) Zuzendaritza-taldearekin batera lan egitea ikastetxeak ongi funtziona dezan.

h) Ikastetxearen antolaketa- eta funtzionamendu-arauetan egokitutako guztiak, baita indarrean dagoen arauditik eratorritakoak eta Hezkuntza Departamentuak ezarritakoak ere.

86. artikulua. Ikasleen elkarteak.

1. Foru dekretu honen xede diren ikastetxeetako ikasleek bermatuta izanen dute hezkuntza-arloan elkartzeko askatasuna, oinarrizko araudiaren arabera. Hezkuntza Departamentuaren eta ikastetxeen ardura izanen da ikastetxeetan benetan parte har dezaten sustatzea.

2. Horretarako, eskubide hori duten ikasleek ikasle-elkarteak eratzen ahalko dituzte; elkarte horiek indarrean dagoen araudiak arautuko ditu.

3. Ikasleen elkarteek xede hauek izanen dituzte (betiere, indarrean dagoen araudia beteko dute):

a) Ikasleen iritzia adieraztea haien ikastetxeetako egoerari dagokion guztian.

b) Ikastetxeen hezkuntza-lanean eta jarduera osagarrietan zein eskolaz kanpokoetan lagundu.

c) Ikastetxeko eskola-kontseiluan ikasleek parte hartzea bultzatu.

d) Kultura- eta kirol-jarduerak egitea, bai eta elkartasun ekintza eta lantaldea bultzatzeko jarduerak ere.

4. Ikasleen elkarteek, dagozkien helburu eta zereginak betetzeko, ikastetxeko gelak eta behar bezala funtzionatzeko behar dituzten baliabide materialak erabiltzen ahalko dituzte, eta ikastetxeko zuzendariak eskubide hori baliatzea erraztuko die, foru dekretu honetan jasotakoaren arabera. Aldez aurretik, elkarteek ikastetxeko zuzendaritzari jakinaraziko diote, ikastetxearen antolaketa- eta funtzionamendu- arauetan jasotakoaren arabera. Nolanahi ere, elkarteen jarduerek ez dute urteko programazio orokorraren ohiko garapena oztopatzen ahalko.

5. Ikasleen elkarteek eskubidea izanen dute ikasleek eskola-kontseiluan dituzten ordezkariengandik kide anitzeko organo horretan landu diren gaiei buruzko informazioa jasotzeko.

6. Elkarteen izen-emateari eta erregistroari dagokionez, indarrean dagoen araudian jasotakoa beteko da.

87. artikulua. Ikasleelkarteen eginkizunak.

Ikasleen elkarteek eginkizun hauek izanen dituzte:

a) Zuzendaritza-taldeari honako hauek lantzeko eta, hala badagokie, aldatzeko proposamenak egitea: antolaketa- eta funtzionamendu-arauak, ikastetxeko hezkuntza-proiektua, kudeaketa-proiektua eta urteko programazio orokorra.

b) Hezkuntza-proiektuaren esparruan diseinatutako jarduerak egitea. Jarduera horiek, betiere, ikastetxearen antolaketa eta funtzionamendua errespetatuko dituzte.

c) Eskola-kontseiluari proposamenak egitea.

d) Ikasleei beren jardueren berri ematea.

e) Ikastetxeko ikasle eta irakasleen eta, hala badagokie, familien parte-hartzea eta lankidetza sustatzea, ikastetxeak egoki funtziona dezan.

f) Zuzendaritza-taldearekin batera lan egitea ikastetxeak ongi funtziona dezan.

g) Indarrean dagoen arauditik eratortzen diren edo Hezkuntza Departamentuak ezartzen dituen gainerako guztiak.

IX. KAPITULUA. ESKUBIDEAK, BETEBEHARRAK, BIZIKIDETZA ETA BERDINTASUNA

88. artikulua. Ikasleen eskubide eta betebeharrak.

1. Ikasle guztiek eskubide eta eginbehar berberak dituzte. Ezberdintasun bakarrak adinaren eta ikasten ari diren hezkuntza-mailaren araberako zehaztapen batzuk izanen dira.

2. Ikastetxeek behar diren neurri guztiak hartuko dituzte ikasleen prestakuntza bideratu eta indarrean dagoen araudiak aitortzen dizkien eskubide eta betebeharrak ezagutu eta behar bezala erabil ditzaten.

3. Ikasleek arduraz onartu beharko dituzte beren betebeharrak, eta beren eskubideak ezagutu eta baliatu beharko dituzte; hori, betiere, gainerako pertsonei errespetua zor dietela kontuan hartuta.

4. Hezkuntza-erkidegoko kide guztiei dagokie arduratzea eta behar diren neurriak hartzea ikastetxeetako bizikidetza bermatzeko eta ikasleen eskubideak zuzen baliatzen direla eta eginbeharrak zehatz-mehatz betetzen direla bermatzeko.

89. artikulua. Bizikidetzaplana.

1. Ikastetxeek bizikidetza-plan bat eginen dute, ematen dituzten ikasketen antolamenduaren bereizgarrietara egokitua; plan hori hezkuntza-proiektuan sartuko da.

2. Bizikidetza-planean jasoko dira, batetik, ikastetxean bizikidetza-giro egokia sustatzeko antolatutako jarduera guztiak; eta, bestetik, ikasleek dituzten eskubide eta betebeharrak, zehatz-mehatz, eta betetzen ez badituzte aplikatu beharreko neurri zuzentzaileak, indarrean dagoen araudiaren araberakoak.

3. Nolanahi ere, neurri zuzentzaileak hezitzaileak eta lehengoratzaileak izanen dira, bermatu beharko dute gainerako ikasleen eskubideak errespetatzen direla, eta, ahal dela, hezkuntza-komunitateko kide guztien harremanak hobetuko dituzte.

90. artikulua. Hezkidetzaplana.

1. Eskubide- eta aukera-berdintasuna bultzatzeko eta emakumeen eta gizonen benetako berdintasuna sustatzeko, ikastetxeek hezkidetza-printzipioa landuko dute, indarrean dagoen araudian jasotakoaren arabera.

2. Ikastetxeek nahitaez sartu eta justifikatu beharko dituzte beren hezkuntza-proiektuan ikasketa guztietan edo, hala badagokio, hezkuntzako etapa guztietan berdintasuna bultzatzeko eta berdintasunean prestatzeko garatzen dituzten neurriak; besteak beste, genero-indarkeria ezabatzeko heziketa, nortasunekiko, kulturekiko, sexualitateekiko eta aniztasunarekiko errespetua, eta benetako berdintasuna izateko parte-hartze aktiboa. Neurri horiek eratuko dute ikastetxeko hezkidetza-plana, eta plan hori ikastetxearen hezkuntza-proiektuaren parte izanen da.

3. Halaber, ikastetxeek neurriak hartuko dituzte emakume eta gizonen arteko benetako berdintasuna garatzeko tutoretza- eta bizikidetza-planetan.

X. KAPITULUA. IKASTETXEEN ORDUTEGI OROKORRA

91. artikulua. Ordutegi orokorra.

1. Ikastetxearen ordutegi orokorra zuzendaritza-taldeak prestatuko du, irakasleen klaustroaren iritzia entzun ondoren, eta eskola-kontseiluak onetsiko du. Ordutegiak alderdi hauek jasoko ditu, gutxienez:

a) Ikastetxea zer ordutan eta zer baldintzatan egonen den irekita, ikastetxe-motaren eta ematen dituen ikasketen araubidearen arabera.

b) Eskola-jardueren ordu-banaketa. Ordutegi hori irizpide pedagogikoen arabera antolatuko da, eta ez da ordu librerik izanen ikasleen ordutegiaren barnean. Irakasleen lehentasun pertsonalek ez dute oztopatzen ahalko, inolaz ere, irizpide horiek betetzea. Horrez gain, orduak banatuko dira kontuan hartuta, batetik, indarrean dagoen araudia; eta bestetik, ikasmaila bakoitzean ikasketa bakoitzaren eskola-egutegia eta -ordutegia arautzen dituzten jarraibideak.

c) Eskolaz kanpoko jardueren ordu-banaketak ez du ikasleen eskola-ordutegia etenen. Eskola-ordutegitik kanpo eginen dira, ahal izanez gero eta salbuespen arrazoiturik ezean, irakasleen klaustroaren bilerak, ebaluazio-saioak eta ikastetxetik kanpoko langileak dituzten organoen bilerak; hartara, dagozkien gobernu- edo koordinazio-organoetako kide guztiak bertaratzen ahalko dira.

2. Langileak partekatzen dituzten ikastetxeek ados jarri beharko dute, ikastetxeko ordutegi orokorra prestatu baino lehen, langile horiek bi ikastetxeetako jarduerak bateratu ahal izan ditzaten.

3. Foru dekretu honetan ezarritakoaz gain, eskola-orduetatik kanpo, ikastetxeak eta instalazioak indarrean dagoen araudian jasotakoaren arabera erabiliko dira.

II. TITULUA. AUTONOMIA PEDAGOGIKOA

I. KAPITULUA. IKASTETXEEN ANTOLAKETA PEDAGOGIKOA

92. artikulua. Ikastetxeen antolaketa pedagogikoari buruzko zenbait xedapen orokor.

1. Ikastetxeek autonomia pedagogikoa izanen dute, indarrean dagoen araudian, foru dekretu honetan eta dekretua garatzen duten arauetan ezarritako moduan.

2. Autonomia pedagogikoa ikastetxeek curriculuma beren ingurunera egokitzeko, beren hezkuntza-eskaintza zehazteko eta ikasleen eta familien premiei eta iguripenei erantzuteko erabakiak hartzeko duten gaitasuna da. Autonomia pedagogikoa bideratuko da, beti, ikastetxeko hezkuntza-jarduera etengabe hobetzera, ikasleen garapen integralera eta ikasle guztien emaitza akademikoak hobetzera. Betiere, ikastetxeek beren emaitzen kontu emanen dute.

3. Hezkuntza Departamentuak ikastetxeen autonomia pedagogikoa sustatuko du, haien baliabide ekonomikoak eta materialak eta giza baliabideak bideragarri egin ditzaten prestatzen dituzten hezkuntza-proiektuak eta proposamenak, behar bezala ebaluatu eta balioetsi ondoren.

4. Autonomia pedagogikoa baliatuz, eta dituzten zeregin normatiboen, helburuen eta lehentasunen arabera, ikastetxeek honako hauek egiten ahalko dituzte, indarrean dagoen araudian ezarritako baldintzetan:

a) Ikastetxeko hezkuntza-proiektua egin, eta hezkuntza-jardunbidea adostu, antolatu eta kudeatu.

b) Curriculum ofiziala landu eta zehaztu, ikastetxearen ezaugarriei eta testuinguruari egokitzeko.

c) Hezkuntza-eskaintza ezarri, hezkuntza-komunitatearen premiei erantzuteko.

d) Irakaskuntza programatzea eta ikasleen premiei egokitu, curriculumaren helburuak kontuan hartuta.

e) Berezko proiektu, programa eta planak egin, langile-kopurua eta langileen ordutegia kontuan hartuta.

f) Ikastetxearen antolaketa eta funtzionamendu akademikoa errazten duten jarduerak programatu.

g) Hezkuntza-prozesuak planifikatu, antolatu eta gauzatu.

5. Aurreko atalean aipatzen diren elementuak eskola-kontseiluak onetsi beharko ditu; eta hezkuntzaren, pedagogiaren eta curriculum-zehaztapenaren inguruko gaiak, berriz, irakasleen klaustroak. Halaber, Hezkuntza Departamentuari jakinarazi beharko zaizkio eta, hala erabakitzen denean, behar den baimena eskatu.

6. Ikastetxeek beren autonomia baliatuz egiten dituzten proposamenek curriculumak eta indarrean dagoen araudiak ezarritako gainerako hezkuntza-xedapenak errespetatuko dituzte, eta ikastetxeek ematen dituzten ikasketen antolamenduaren berezitasunetara egokituko dira.

7. Ikastetxeek plangintza pedagogikoko dokumentuetan jasoko dute beren autonomia pedagogikoa.

8. Hezkuntza Departamentuak ikastetxeen artean jardunbide egokiak trukatzea sustatuko du, eta beren autonomia erabiliz adosten dituzten ekimenak zabaltzen lagunduko die, baldin eta egiaztatzen bada hezkuntza-zerbitzua eta ikasleen ikaskuntza-emaitzak hobetzen dituztela.

9. Ikastetxeen autonomia pedagogikoko elementu eta dokumentuen zehaztapenari, izenari eta edukiari buruz titulu honetan ezarritakoa ikastetxeen ezaugarrietara eta ikasketa bakoitzaren arau espezifikoetan ezarritakora egokitu beharko da, baita Hezkuntza Departamentuak arau bidez ezartzen duen horretara ere.

II. KAPITULUA. IKASTETXEEN PLANGINTZA PEDAGOGIKOA

1. ATALA. PLANGINTZA PEDAGOGIKOA

93. artikulua. Plangintza pedagogikoko agiriak.

1. Ikastetxeen plangintza pedagogikoko oinarrizko dokumentuak hezkuntza-proiektua eta urteko programazio orokorra dira.

2. Halaber, ikastetxeek beste dokumentu batzuen bidez zehazten ahalko dute epe ertainerako plangintza, hala nola zuzendaritza-proiektuaren edo plan estrategikoaren bidez, eta helburuak eta lan-ildoak ezarriko dituzte ikasturtea baino aldi luzeagoetarako.

3. Ikastetxeko plangintza pedagogikoko dokumentuen prestakuntzaz zuzendaritza-taldea arduratuko da. Horretarako, ikastetxeko kide anitzeko gobernu-organoek edo koordinazio pedagogikorako batzordeak beren eskumen-esparruetan aurrez onetsitako proposamenak baloratuko ditu, baita hezkuntza-komunitateko beste edozeinek egindako proposamenak ere. Xede horiekin, prozesua zuzendu eta koordinatuko du, egitekoak zehaztuko ditu eta dokumentuak nork idatziko dituen erabakiko du.

4. Onetsi ondoren, plangintza pedagogikoko dokumentuak lotesleak izanen dira, eta nahitaez bete beharrekoak irakasle, ikasle eta hezkuntza-komunitateko gainerako kideentzat.

5. Hezkuntzako Ikuskapen Zerbitzuak plangintza pedagogikoko dokumentuak gainbegiratuko ditu, indarrean dagoen araudian ezarritakoarekin bat datozela egiaztatzeko. Horrez gain, egokitzat jotzen dituen iradokizunak eginen ditu, eta, behar izanez gero, zer aldaketa egin azalduko du.

2. ATALA. HEZKUNTZA-PROIEKTUA

94. artikulua. Hezkuntzaproiektuaren definizioa eta edukia.

1. Ikastetxearen hezkuntza-proiektua plangintza pedagogiko eta instituzionaleko dokumentu bat da. Dokumentu horrek ikastetxearen ezaugarriak zehazten ditu; jardueren helburuak eta lehentasunak ezartzen ditu, testuinguru sozioekonomikoa kontuan hartuta; eta balioak jasotzen ditu. Helburua da ikasle guztiek kalitatezko hezkuntza jasotzea eta, horretarako, ikastetxeko jarduerei zentzua eta orientazioa ematea.

2. Oro har, hezkuntza-proiektuak honako hauek jasoko ditu:

a) Testuinguru sozioekonomiko eta kulturalaren ezaugarriak.

b) Nortasun-ezaugarriak.

c) Xedea, ikuspegia eta balioak: ikastetxeak esku hartzeko gida gisa ezartzen dituen helburu, jarduteko lehentasun eta balioak.

d) Hezkuntza-eskaintza.

e) Ikasketen curriculuma edo, hala badagokio, hezkuntza-etapak.

f) Ikastetxeko hizkuntza-proiektua.

g) Irakurketa-plana.

h) Ikasleen desberdintasun indibidualen arreta-plana.

i) Tutoretza-plana.

j) Bizikidetza-plana.

k) Hezkidetza-plana.

l) Ikastetxeko plan digitala.

m) Bere proiektu, programa eta planak.

n) Hobekuntza-plana.

3. Betiere, hezkuntza-proiektuaren edukia ikasketen antolamenduaren berezitasunen eta ikastetxeen bereizgarrien arabera egokituko da.

95. artikulua. Hezkuntzaproiektua egitea, onestea eta ebaluatzea.

1. Hezkuntza-proiektuaren prestakuntza zuzendaritza-taldeak koordinatuko du, eta hura arduratuko da, halaber, proiektua eta proiektuaren aldaketak idazteaz. Horretarako, ikastetxeko kide anitzeko gobernu-organoek edo koordinazio pedagogikorako batzordeak beren eskumen-esparruetan aurrez onetsitako proposamenak baloratuko ditu, baita hezkuntza-komunitateko beste edozeinek egindako proposamenak ere.

2. Zuzendaritza-taldeak, antolaketa- eta funtzionamendu-arauak zehazteko, lagun diezaien eta parte har dezaten eskatzen ahalko die koordinazio pedagogikorako batzordeari, irakaskuntza koordinatzeko beste batzorde batzuei eta koordinazio-batzorde edo -taldeei.

3. Hezkuntza-proiektua eta haren aldaketak eskola-kontseiluak onetsiko ditu; eta hezkuntzaren, pedagogiaren eta curriculum-zehaztapenaren inguruko gaiak, berriz, irakasleen klaustroak Hezkuntza-proiektua kide anitzeko organo horiek ebaluatuko dute, nork bere eskumenen esparruan.

4. Hezkuntza-proiektuak ikastetxeko langile guztiak behartuko ditu hura betetzera, eta ikastetxeko hezkuntza-komunitatea lotetsiko du.

5. Ikastetxeek beren hezkuntza-proiektua argitaratuko dute, hezkuntza-komunitateko kide guztiek ezagutu eta kontsultatu dezaten; eta eskura egotea ziurtatuko dute, ahal izanez gero baliabide elektroniko edo telematikoen bidez.

3. ATALA. URTEKO PROGRAMAZIO OROKORRA

96. artikulua. Urteko programazio orokorraren definizioa.

1. Urteko programazio orokorra ikastetxearen plangintza, antolaketa eta funtzionamendurako oinarrizko tresna da. Izan ere, ikastetxearen hezkuntza-proiektua, antolaketa- eta funtzionamendu-arauak eta kudeaketa-proiektua zehazten ditu ikasturte bakoitzerako.

2. Urteko programazio orokorrak ezartzen du esparrua behar bezala erabil daitezen gobernu-organoaren eta irakaslana koordinatzeko organoaren eskumenak eta hezkuntza-komunitateko sektore guztiek parte har dezaten. Era berean, lehentasunak ezartzen ditu eta ikastetxeko hezkuntza-jardueren garapena koordinatzea bermatzen du.

3. Urteko programazio orokorrak, ikastetxearen egoeraren urteko analisi diagnostikoa oinarritzat hartuta, hobekuntzak sartzea errazten du, eta ikastetxeko premia espezifikoetarako eta sortzen diren arazo berrietarako irtenbideak ematen ditu.

4. Ikasturte-hasieran, ikastetxeek urteko programazio orokorra eginen dute. Programazio horretan, dagozkien organoek adostu eta onetsitako curriculuma, proiektuak eta jarduera-planak jasoko dituzte; baita ikastetxearen antolaketari, funtzionamenduari eta kudeaketari buruzko arau eta gai guztiak ere.

5. Urteko programazio orokorraren edukiaren inguruan ikasturtean zehar gertatzen den edozein gorabehera ikasturte hondarreko memorian jasoko da.

6. Salbuespen gisa, gerora ezustekoren bat gertatuz gero, urteko programazio orokorra ikasturtean zehar aldatzen ahalko da, eta berriro onetsi beharko da, foru dekretu honen 98.2 artikuluan ezarritakoaren arabera.

97. artikulua. Urteko programazio orokorraren edukia.

1. Urteko programazio orokorraren esparruan, ikastetxeek erabaki hauek hartuko dituzte ikasturte bakoitzean:

a) Pedagogia- eta curriculum-jardueren plan, proiektu eta programei buruzko erabakiak.

b) Antolamenduari eta funtzionamenduari buruzko erabakiak.

c) Baliabideen kudeaketari buruzko erabakiak.

2. Hezkuntza Departamentuak erabakiko du urteko programazio orokorrak ikasketa bakoitzean zein atal izanen dituen.

3. Urteko programazio orokorrari buruzko informazioa Hezkuntza Departamentuaren eta ikastetxeko hezkuntza-komunitatearen eskura egonen da.

98. artikulua. Urteko programazio orokorra prestatzea eta onestea.

1. Ikastetxeko urteko programazio orokorraren prestakuntzaz zuzendaritza-taldea arduratuko da. Horretarako, ikastetxeko kide anitzeko gobernu-organoek edo koordinazio pedagogikorako batzordeak beren eskumen-esparruetan aurrez onetsitako proposamenak baloratuko ditu, baita hezkuntza-komunitateko beste edozeinek egindako proposamenak ere. Xede horiekin, prozesua zuzendu eta koordinatuko du, egitekoak zehaztuko ditu eta dokumentuak nork idatziko dituen erabakiko du. Horrez gain, tresnak jarriko ditu eta programazioa egiteaz nor arduratuko den erabakiko du.

2. Urteko programazio orokorra eskola-kontseiluak onetsi beharko du; eta hezkuntzaren, pedagogiaren eta curriculum-zehaztapenaren inguruko gaiak, berriz, irakasleen klaustroak. Onetsi ondoren, urteko programazio orokorra hezkuntza-komunitateko kide guztiek bete beharko dute nahitaez.

99. artikulua. Urteko programazio orokorraren ebaluazioa.

Ikasturteko eskola-jarduerak buruturikoan, ikastetxeko eskola-kontseiluak, irakasleen klaustroak eta zuzendaritza-taldeak ebaluatuko dute urteko programazio orokorra zenbateraino bete den, eta ebaluazio hori ikasturte hondarreko memorian jasoko da. Horretarako, arduradun bakoitzak aztertuko eta baloratuko ditu dagokion planaren, proiektuaren edo programaren emaitzak.

III. KAPITULUA. AUTONOMIA PEDAGOGIKOA BALIATZEA

1. ATALA. CURRICULUMA ZEHAZTEA ETA EGOKITZEA

100. artikulua. Curriculumzehaztapena.

1. Ikastetxeei dagokie, beren autonomia pedagogikoa baliatuz, indarrean dagoen araudian onetsitako curriculum ofiziala zehaztea eta egokitzea. Zehaztapen hori hezkuntza-proiektuaren parte izanen da, eta ikastetxearen hezkuntza-eskaintzako etapa edo ikasketa guztien ikasketa-plana jasoko du.

2. Curriculumaren zehaztapena ikastetxeak gai hauen garapenaren inguruan hartutako erabakien multzoa da: helburuak, gaitasunak, hezkuntza-edukiak, metodoak, baliabide didaktikoak, ebaluazio-irizpide eta -prozedurak eta irakaskuntzaren programazioa bideratzen duten beste curriculum- eta pedagogia-elementu batzuk. Curriculum-zehaztapenaren asmoa da irakasleen jarduerak bateratzea, dagokien etapa edo ikasketan.

101. artikulua. Curriculuma zehaztea eta onestea.

1. Koordinazio pedagogikorako batzordeak koordinatuko ditu ikastetxean ematen diren etapa edo ikasketetako ikasketa-planen curriculum-zehaztapenaren prestakuntza eta idazketa, honako hauek kontuan hartuta: curriculum ofiziala, hezkuntza-proiektua, irakasleen klaustroak ezarritako irizpideak eta koordinazio didaktikoko departamentuek edo zikloko irakasle-taldeek egindako proposamenak.

2. Etapa edo ikasketa bakoitzeko curriculum-zehaztapena eta haren aldaketak irakasleen klaustroak onetsiko ditu.

3. Irakasleek beren irakaskuntza-jarduerak antolatuko dituzte curriculum ofizialen arabera eta ikastetxeak onetsitako etapa edo ikasketen ikasketa-planetako curriculum-zehaztapenarekin bat.

2. ATALA. IRAKASKUNTZAREN PROGRAMAZIOA

102. artikulua. Irakaskuntzaren programazioa zehaztea.

1. Irakaskuntza-programazioa da curriculuma planifikatzeko oinarrizko funtzioa, eta ikasgelan hezkuntza-arreta egokia izateko aukera ematen die irakasleei.

2. Irakaskuntza-programazioak curriculuma zehaztea eta garatzea ahalbidetzen du, ikastetxeak hartutako erabaki pedagogikoekiko koherentzia bermatzen du, eta ikastetxeko ikasleek dituzten premia eta arazo espezifikoetarako konponbideak ematen ditu, ikasleak erabat garatzera bideratuta.

3. Irakaskuntza-programazioa programazio didaktikoan zehazten da, eta programazio hori, aldi berean, ikasgelako programazioaren bidez garatzen da.

103. artikulua. Programazio didaktikoak.

1. Programazio didaktikoa arlo, jakintzagai, eremu, modulu edo irakasgaiak planifikatu, landu eta ebaluatzeko tresna espezifiko bat da. Horretarako, curriculumeko elementuak hezkuntza-maila bakoitzera egokitu eta zehazten ditu.

2. Programazio didaktikoa prestatzeko, irakasle-taldeko kideak koordinazio didaktikoko departamentutan edo zikloko irakasle-taldetan antolatzen dira, eta esku-hartze pedagogiko eta didaktikoaren ildo nagusiak adosten dituzte, haien irakaskuntza-jardunbidea eraginkorra eta bateratua izanen dela ziurtatzeko.

3. Koordinazio didaktikoko departamentu edo zikloko irakasle-talde bakoitzeko arlo, jakintzagai, eremu, modulu edo irakasgaien programazio didaktikoak departamentu edo talde horiek prestatuko dituzte, buru edo koordinatzaile duten pertsonaren zuzendaritzapean, eta curriculum ofizialaren eta koordinazio pedagogikorako batzordeak ezarritako irizpide orokorren arabera.

4. Maila edo ikasmaila bakoitzeko programazio didaktikoak koordinazio didaktikoko departamentuko edo zikloko irakasle-taldeko kideek prestatu eta eguneratuko dituzte, beren ardurapeko arlo, jakintzagai, eremu, modulu edo irakasgaien arabera.

5. Programazio didaktikoak egin ondoren, koordinazio pedagogikorako batzordeari bidaliko zaizkio, eta hark begiratuko du ezarritako jarraibideekin bat datozen. Hala ez bada, zuzendariak dagokion departamentu edo zikloko taldeari itzuliko dio programazioa, berregin eta berriz bideratu dezan.

6. Ikasturtea burutzen denean, departamentuko edo zikloko taldeko kideek programazio didaktikoaren azken ebaluazioa eginen dute, zenbateraino bete den jakiteko, eta baita programazioko atalen garapenaren balantzea ere, adostutako kontrol-adierazleei erreparatuta, bereziki. Ebaluazio-prozesuan ateratako ondorio garrantzitsuenak ikasturteko programazio didaktikoaren azken memorian jasoko dira.

7. Halaber, ikasleek barne-ebaluazioetan izan dituzten emaitzak (emaitza akademikoak) zehatz-mehatz aztertuko dira; baita, hala badagokie, kanpo-ebaluazioetan izan dituzten emaitzak ere (diagnostikorako ebaluazioak, unibertsitatean sartzeko proba eta erabakitzen den beste edozein). Azterketa hori ikasturterako proposatutako adierazle eta xedeak kontuan hartuta eginen da. Azkenik, hausnarketa bat eginen da horiek eragin dituzten kausei buruz, eta, hala badagokio, curriculumeko, materialeko, antolamenduko eta pertsonaleko elementuen funtzionamenduan hautemandako gabeziei eta disfuntzioei buruz.

8. Programazio didaktikoak eta haren aldaketak irakasleen klaustroak onetsiko ditu.

104. artikulua. Ikasgelako programazioak.

1. Ikasgelako programazioa tresna espezifiko bat da, irakasleei balio diena ikasgelan egunez egun eginen dutena aldez aurretik planifikatzeko. Ikasgelako programazioak zehazten eta garatzen du programazio didaktikoa, eta xede dituen ikasle zehatzen ezaugarrien arabera.

2. Irakasle bakoitzari dagokio ematen dituen arlo, jakintzagai, eremu, modulu edo irakasgaietako ikasgelako programazioak egitea, departamentuko buruak edo zikloko taldearen koordinatzaileak gainbegiratuta.

3. Lantzen dituzten ikasgelako programazioen bidez antolatuko dituzte beren irakaskuntza-jarduerak irakasleek, dagozkien departamentu edo zikloko taldeek prestatutako programazio didaktikoen arabera.

4. Betiere, ikasgelako programazioak dagokion programazio didaktikoa eratzen duten elementuak errespetatuko ditu eta departamentuaren edo zikloaren eskura egonen da.

5. Hezkuntzako Ikuskapen Zerbitzuak programazio didaktikoak eta ikasgelako programazioak berrikusten ahalko ditu, indarrean dagoen araudian ezarritakoarekin bat datozela eta behar bezala garatzen eta aplikatzen direla egiaztatzeko.

3. ATALA. CURRICULUMEKO BESTE ELEMENTU BATZUK

105. artikulua. Hizkuntzen tratamendua.

1. Ikasketen programazio orokorrean Hezkuntza Departamentuak baimendu dizkien hizkuntza-ereduen arabera emanen dituzte ikastetxeek ikasketak.

2. Ikastetxeei egokitutako hizkuntza-ereduetako ikasketak legeriaren eta indarrean dagoen araudiaren arabera emanen dira.

3. Ikastetxeak, bere hizkuntza-errealitatea kontuan hartuta eta ikasketen curriculum ofizialen arabera, helburuak, hizkuntza-ibilbidea, antolaketa-neurriak eta estrategia metodologikoak adostuko ditu ikastetxeko hizkuntza-proiektuan. Dokumentu hori hezkuntza-proiektuaren parte izanen da.

4. Ikastetxeek, beren autonomia baliatuz, atzerriko hizkuntza bat gehiago erabili eta hizkuntza horretako curriculum-eduki gehiago irakasten ahalko dute, atzerriko hizkuntzak ikasteko programak ezarriz. Programa horiek Hezkuntza Departamentuak baimendu beharko ditu.

5. Ikastetxeetan hizkuntzen erabilera egokia koordinatzeko eta bultzatzeko, indarrean dagoen araudiak eta Hezkuntza Departamentuak ezarritakoa beteko da.

6. Ikastetxeek Hizkuntza Eskola Ofizialetako berezko ikasketen programa eskatzen eta ematen ahalko dute, indarrean dagoen araudiak jasotzen duen moduan.

7. Artikulu honetan jasotakoa ikasketen antolamenduaren berezitasunetara eta ikastetxeen bereizgarrietara egokituko da.

106. artikulua. Arlo, jakintzagai, modulu edo irakasgaiak eremutan antolatzea.

1. Ikastetxeek, beren autonomia erabiliz eta ematen dituzten ikasketei aplikatu beharreko araudiak hala zehazten duenean, hainbat arlo, jakintzagai, modulu edo irakasgai eremu berean emateko antolamendu didaktikoak ezartzen ahalko dituzte, beren hezkuntza-proiektuaren eta dagozkien etapa edo ikasketen ikasketa-planeko curriculum-zehaztapenaren arabera.

2. Eremuka lan egiteko erabakia hartzen duten ikastetxeek indarrean dagoen araudian horretarako xedatutakoa beteko dute, eta egoera hori dagokien etapa edo ikasketetako ikasketa-planaren curriculum-zehaztapenean adieraziko dute.

107. artikulua. Aukerako arlo, jakintzagai, modulu edo irakasgaiak.

1. Ematen dituzten ikasketei aplikatu beharreko araudiak hala ezartzen duenean, ikastetxeek aukerako arlo, jakintzagai, modulu edo irakasgaien katalogoa izanen dute; derrigorrez eskaini beharrekoak ere katalogo horretan jasoko dituzte.

2. Era berean, ikastetxeek, beren autonomia baliatuz, eta ematen dituzten ikasketei aplikatu beharreko araudiak hala ezartzen duenean, beren arlo, jakintzagai, modulu edo irakasgaiak diseinatzen ahalko dituzte; eskaintza hori ikastetxearen ezaugarrien eta ikasleen premia eta iguripen orokorren araberakoa izanen da. Hezkuntza Departamentuari arlo, jakintzagai, modulu edo irakasgai horien berri eman behar zaio, ikasturte bakoitzerako erabakitzen diren epe eta baldintzetan.

3. Beren arlo, jakintzagai, modulu edo irakasgaiak diseinatzen dituzten ikastetxeek egoera hori jaso beharko dute dagozkien etapa edo ikasketen ikasketa-planeko curriculum-zehaztapenean.

108. artikulua. Proiektuak, programak eta planak.

1. Ikastetxeek erregulazio espezifikoa duten proiektu, programa eta plan instituzional ofizialak sartzen ahalko dituzte beren hezkuntza-proiektuan. Programa, proiektu edo plan instituzional horiek ikastetxean ezartzeko, beren erregulazio espezifikoan jasotakoa beteko dute.

2. Era berean, ikastetxeek, indarrean dagoen araudiak ahalbidetzen duen neurrian, zerbitzuaren kalitatea optimizatzeko eta, bereziki, ikasleen ikaskuntza-emaitzak hobetzeko, beren proiektu, programa eta planak lantzen ahalko dituzte.

3. Berezko proiektu, programa eta planetan, loturak edo sareak ezartzen ahalko dituzte interes berak dituzten ikastetxe, sektore edo herriekin, betiere ikastetxeko hezkuntza-proiektuaren helburuen ikuspegitik.

4. Ikastetxeek hezkuntza-komunitate osoari emanen diete beren proiektu, programa eta planen berri.

4. ATALA. JARDUERA OSAGARRIAK ETA ESKOLAZ KANPOKOAK

109. artikulua. Jarduera osagarriak.

1. Jarduera osagarriak programazio didaktikoaren barruan dauden eta ikasleek nahitaez ikastetxean egon behar duten eskola-orduetan egiten diren jarduera didaktiko bereziak dira. Eta bereziak dira egiten diren momentu edo tokiagatik, edo ikastetxeak gehiago inplikatu behar duelako (giza baliabide eta baliabide material gehiago behar direlako).

2. Jarduera osagarriek zuzeneko lotura izanen dute curriculumaren garapenarekin, eskola-jardueren osagarri gisa, eta taldeko edo mailako ikasle guztiek parte hartuko dute, dagokion programazio didaktikoak zehazten duenaren arabera. Jarduera horiek ebaluatu daitezke, eta ikasleen emaitza akademikoetan eragina izan dezakete.

3. Oro har, ikasleentzako jarduera osagarrien kostua ez da izanen, inola ere, jarduera horien benetako kostua baino handiagoa.

4. Jarduera osagarriak programatu eta egiteko orduan, kontuan hartu behar da ez dituztela ikasleak arrazoi ekonomikoengatik diskriminatuko; hau da, ikasleen egoera sozioekonomikoak ez duela eragotziko, inola ere, jarduera horietan parte hartzea.

5. Jarduera osagarriak bi motatakoak izaten ahal dira:

a) Jarduera arruntak: jarduera osagarri arruntak dira eskola-ordutegia gainditu arren ikasleak etxetik kanpo lo egitera behartzen ez dituztenak. Ikasle eta irakasleek nahitaez parte hartu behar dute jarduera horietan.

b) Jarduera bereziak: jarduera osagarri bereziak dira gaua etxetik kanpo igarotzea eskatzen dutenak. Ikasle eta irakasleek ez dute jarduera horietan nahitaez parte hartu behar. Beraz, parte hartzen ez duten ikasleek ikastetxean curriculum-arreta egokia jasotzea ziurtatuko da, eta arreta hori ebaluatzen ahalko da.

6. Jarduera osagarrietan parte hartzeagatik irakasleek beren ohiko ordutegia gainditzen badute, dagokion araudian ezarritako konpentsazioa aplikatuko zaie.

110. artikulua. Eskolaz kanpoko jarduerak.

1. Eskolaz kanpoko jarduerak dira programazio didaktikotik kanpo dauden eta, orokorrean, curriculum-ordutegitik kanpo ikasleekin egiten diren hezkuntza-jarduerak.

2. Aurreko atalean ezarritakoa gorabehera, ez dira eskolaz kanpoko jardueratzat hartuko Hezkuntza Departamentuak ikasketa-mota bakoitzerako arau bidez ezarri eta ikasleei arreta emateko ordutegian egiten direnak.

3. Ikasle eta irakasleek beren borondatez parte hartzeko eskolaz kanpoko jarduerak ez dira programazio didaktikoan sartuko, ezta haren ebaluazio-esparruan ere; beraz, ez dute eraginik izanen ikasleen emaitza akademikoetan. Jarduera horietan parte hartzen ez duten ikasleek hezkuntza-arreta egokia jasoko dute, eta ohikoak ez diren jarduerak egiteko aukera emanen zaie.

4. Ikasleentzako eskolaz kanpoko jarduera osagarrien kostua ez da izanen, inola ere, jarduera horien benetako kostua baino handiagoa.

5. Eskolaz kanpoko jardueretan parte hartzeagatik irakasleek beren ohiko ordutegia gainditzen badute, dagokion araudian ezarritako konpentsazioa aplikatuko zaie.

111. artikulua. Jarduera osagarriak eta eskolaz kanpokoak programatzea eta gauzatzea.

1. Ematen dituzten ikasketei aplikatu beharreko araudiak hala ezartzen duenean, ikastetxeek jarduera osagarrien eta eskolaz kanpoko jardueren plangintza egin beharko dute ikasturte bakoitzerako.

2. Jarduera osagarrien eta eskolaz kanpoko jardueren plangintza prestatzeaz ikastetxeko zuzendariordea arduratuko da.

3. Jarduera osagarrien eta eskolaz kanpoko jardueren urteko plangintza egiteko, aurrez honako hauek egindako proposamenak baloratuko dira: ikastetxeko kide anitzeko gobernu-organoek eta, hala badagokie, irakaskuntza koordinatzeko organoek; gurasoen elkarteek; ikasleen elkarteek; ordezkarien batzordeek eta, hala badagokie, beste erakunde batzuek. Jarduera horien aurreko ikasturteetako plangintza- eta ebaluazio-ibilbidea ere kontuan hartuko dira.

4. Jarduera osagarriek eta eskolaz kanpoko jarduerek bat etorri behar dute ikastetxearen hezkuntza-proiektuarekin, eta proiektu hori garatzen lagundu behar dute.

5. Ikastetxeko zuzendariordeak bertan egiten diren mota horretako jarduera guztien erregistro eguneratua izanen du.

6. Jarduerak egiteko ikasle adingabeek ikastetxeko instalazioetatik kanpora atera behar badute, haien guraso edo legezko tutoreen idatzizko baimena beharko da. Irakasle laguntzaileen gutxieneko kopurua hau izanen da:

a) 14 ikasle arteko taldeak: irakasle bat.

b) 15 eta 30 ikasle arteko taldeak, biak barne: 2 irakasle.

c) 31 ikasle edo gehiagoko taldeak: irakasle bat 15 ikasleko.

Paragrafo honetan ezarritakoaren ondorioetarako, hezkuntza-premia bereziko ikasle gisa erroldatutako ikasleak bi aldiz zenbatuko dira.

Zuzendariak egoki iritziz gero, irakasle laguntzaileen kopurua handitzen ahalko da, baldin eta gainerako ikasleen eskola-ordutegiko arretan eraginik ez badu.

7. Zuzendariorderik ez badago, pertsona bakarreko gobernu-organo horri artikulu honetan egokitutako eginkizun guztiak foru dekretu honen 19. artikuluaren arabera dagokion pertsonari egokituko zaizkio.

IV. KAPITULUA. HEZKUNTZA-PROZESUAK

112. artikulua. Hezkuntzaprozesuak zehaztea.

1. Hezkuntza-prozesuak ikasleen ikaskuntza eta garapen osoa errazte aldera ikastetxeko ikasmailetan planifikatu eta antolatutako jardueren multzoa da.

2. Ikastetxe bakoitzak, bere autonomia erabiliz eta bertako antolamendu- eta pedagogia-errealitatearen arabera, bere hezkuntza-prozesuak ezarriko ditu; besteak beste, programazioa, eskolak, ebaluazioa, tutoretza eta ikasleen desberdintasun indibidualen arreta.

3. Hala badagokie, ikastetxeko hezkuntza-prozesuak kudeaketa integraleko prozedura eta sistemen arabera planifikatzen, ezartzen, ebaluatzen eta hobetzen ahalko dira, irakaskuntza-jarduera koordinatu ahal izateko.

113. artikulua. Eskolak ematea.

1. Irakasleek aurrez planifikatuko dituzte eskolak, modu egituratuan, ikasgelako programazioaren bitartez eta koordinazio didaktikoko departamentuaren edo zikloko irakasle-taldearen programazio didaktikoarekin bat.

2. Eskolak ematen dituztenean, irakasleek ikasketa-xedeak eta landu beharreko edukiak aurkeztuko dituzte; egoki, arin eta eraginkortasunez komunikatuko dira; eta egin beharreko jarduera eta zereginen gaineko jarraibide argiak emanen dituzte.

3. Era berean, teknika eta estrategia metodologiko egokiak erabiliko dituzte, lantzen diren ikaskuntzen arabera; malguak izanen dira; eta, behar izanez gero, irakaskuntza-estrategiak aldatuko dituzte. Edukiak bat etorriko dira ikasturteko programazio didaktikoarekin, eta modu egituratu eta antolatuan landuko dira, denbora egoki kudeatuta.

4. Zehaztutako gaitasunak eta programatutako edukiak benetan erabiltzeko aukera emanen duten askotariko jarduerak proposatuko dituzte. Ikasgelan hainbat lan, esperientzia, proiektu eta ikasteko egoera aplikatuko dituzte, irakaskuntza-edukietan oinarrituta. Ikastea errazteko, askotariko bitarteko, baliabide didaktiko eta guneak erabiliko dituzte. Beharrezkoa denean, teknologia eta aplikazio digitalak integratu eta erabiliko dituzte.

5. Irakasleek maiz hitz egin eta jardunen dute ikasleekin, enpatia azalduko dute, motibatu eginen dituzte eta ikasteko interesa piztuko diete. Ikasleak taldekatuko dituzte ikastea errazteko eta autonomiaz aritzeko moduan; antolaketa hori, ordea, malgua izanen da.

6. Hezkuntza-laguntzako premia espezifikoak dituzten ikasleei laguntzeko hainbat estrategia erabiliko dituzte, eta, horretarako, proposamen didaktikoak egokitu, beharrezkoak diren egokitzapenak egin eta eskura dituzten laguntza eta errefortzu espezifikoak erabiliko dituzte.

7. Eraginkorki eta arduraz lan egiteko giroa sortu, eta ikasleen mailaren araberako erritmoa proposatuko dute, eskolako zereginetan ahalik eta gehien engaiatu eta parte har dezaten.

8. Ematen dituzten edukiak ulertzen direla ziurtatuko dute, eta ikasleek izan ditzaketen zalantzak aintzat hartu eta argituko dituzte.

9. Egiten dituzten lan, jarduera eta proiektuen emaitzak emanen dizkiete ikasleei, garaiz eta behar den moduan, eta landutako helburu eta edukiak laburbildu eta azken berrikuspena eginen dute.

10. Azkenik, ikasleen garapen intelektual, afektibo, psikomotor, sozial eta morala zainduko dute, estereotipoak eta genero-rolak alde batera utzita, eta familiekin elkarlanean.

11. Artikulu honetan jasotakoa ikasketen antolamenduaren berezitasunetara eta ikastetxeen bereizgarrietara egokituko da.

114. artikulua. Ikasleen ebaluazioa.

1. Ikasleak ebaluatzeko, indarrean dagoen araudiak arlo horretan araututakoa beteko da.

2. Ikasleek beren dedikazioa, ahalegina eta errendimendua objektibotasunez baloratuak eta aitortuak izateko duten eskubidea bermatuko dute ikastetxeek. Horretarako, indarrean dagoen araudiaren arabera, ikasturte-hasieran irakasleek dagozkien arlo, jakintzagai, eremu, modulu edo irakasgaietako programazioen berri emanen diete ikasleei eta haien familiei, bai eta ebaluazio- eta kalifikazio-prozesu eta -irizpideen berri ere.

3. Irakasleek, ikasleei eta familiei ebaluazio-sistemaren berri eman ondoren, programazio didaktikoan ezarritako ebaluazio- eta errekuperazio-tresna eta -prozedurak erabiliko dituzte, ebaluazio-tresnetan zehaztutako gaiak sistematikoki erregistratuko dituzte, eta ikasleen hiru hilez behingo kalifikazioak eta azken kalifikazioak jarriko dituzte, programazioan adostutako irizpideen arabera. Era berean, aurreko ikasturteetan gainditu gabeko arlo, jakintzagai, eremu, modulu edo irakasgaietako ikaskuntzak errekuperatzeko prozedurak erabiliko dituzte.

4. Ikasturte-hasieran, ikasketaburuak ebaluazio-prozesuaren plangintza orokorra eginen du, eta programazio didaktikoetan zehaztuta dauden hiru hilean behingo egutegia eta azken proba orokorren egutegia zehaztuko du, probak modu orekatuan banatzea bermatzeko. Era berean, egin beharreko ebaluazio-saioak planifikatu eta haietara deituko du. Talde baten ebaluazio-saioetara talde horretako irakasle guztiek joan behar dute, nahitaez.

5. Ebaluazio-saioak tutoreak prestatuko ditu, eta bera izanen da saio horietako buru. Aurrez, irakasle-taldeko gainerako kideen informazioa jasoko du, gai hauen laburpena aurkeztu ahal izateko: taldeko bizikidetza-giroa, taldeko eta banakako emaitza akademikoak eta aurrez adostutako hezkuntza-neurrien eraginkortasuna. Horretarako, irakasleek Hezkuntza Departamentuak jarritako hezkuntza-plataforma digitalean bete beharko dituzte arlo, jakintzagai, eremu, modulu edo irakasgai bakoitzeko kalifikazio eta estatistikak eta ikasketaburuak eskatutako beste edozein dokumentazio, zuzendaritza-taldeak finkatutako epeetan.

6. Ebaluazio-saioak taldeko irakasle guztiak bertaratzen ahal diren orduan eginen dira.

7. Saio horietan, ikasleen ikaskuntza-prozesuari erreparatuko zaio, emaitza akademikoak aztertuko dira, taldea bere osoan aztertuko da eta behar diren erabakiak hartuko dira taldeari eta banakoei buruz. Era berean, aurreko ebaluazio-bileretan hartutako erabakiak baloratuko dira. Ikasle bakoitzerako, eta aniztasunari erantzuteko hezkuntza-neurriei eragiten dieten erabakien kasuan, neurri horiek mantentzea edo ezabatzea egokia den ebatziko da, baita neurri berriak hartzea komeni den ere.

8. Tutoreak ebaluazio-saioen akta bana eginen du, eta akta horiek atal hauek izanen dituzte, gutxienez:

a) Bertaratu diren irakasleen zerrenda.

b) Bertaratu ez diren irakasleen zerrenda.

c) Arlo, jakintzagai, eremu, modulu edo irakasgai bakoitza gainditu ez dutenen eta gainditu dutenen laburpen estatistikoa, eta ikasleen ehunekoa.

d) Taldearen errendimenduaren, jarreraren eta izan ditzakeen zailtasunen komentario orokorra.

e) Taldearen hezkuntza-prozesua hobetzeko adostutako neurriak.

f) Neurri indibidualizatuak behar dituzten ikasleen zerrenda, neurri horiek adierazita.

9. Behin ebaluazio-saioa burututa, ikasle eta familientzako ebaluazio-buletinak argitaratuko dira Hezkuntza Departamentuak prestatutako hezkuntza-plataforma digitalean. Horrez gain, ikasleek edo haien familiek eskatuz gero, edo ikastetxeak egoki irizten dionean, ebaluazio-buletinak beste bitarteko batzuen bidez emanen dira (komunikazio elektronikoz, eskura eta ikastetxeak erabakitzen duen beste edozein modutan).

10. Ikasleek edo haien familiek argibideak eskatuz gero, irakasleek eman eginen dizkiete. Alde horretatik, ikasleek edo haien familiek dagozkien proba, ariketa edo lanak eskuratzen ahalko dituzte, ikastetxeak bere antolaketa- eta funtzionamendu-arauetan ezarritako prozedura eta epeen eta indarrean dagoen araudiaren arabera.

11. Ikaskuntza-prozesuen ebaluazioaren zeregina ikasleak prestatzea izanen da, eta informazioa emanen die: benetan zenbat aurreratu duten, zer estrategia pertsonalek lagundu dieten gehien, zer zailtasun izan dituzten eta zailtasun horiek gainditzeko zer baliabide dituzten. Helburu horrekin, tutoreek aldizkako bilerak eginen dituzte ikasleekin eta haien familiekin. Era berean, taldean eskolak ematen dituen edozein irakasle ikasleekin eta haien familiekin elkartuko da, haietako edozeinek hala eskatuz gero.

12. Ikasketaburuak, behin ebaluazio-saioak burututa eta Hezkuntza Departamentuak prestatutako hezkuntza-plataforma digitalaren laguntzarekin, talde guztien datuak bilduko ditu, eta emaitzen estatistika, ikasleen hutsegiteen estatistika eta arlo, jakintzagai, eremu, modulu edo irakasgai bakoitzean eman ez diren eskolen estatistika eginen du. Horrez gain, irakasleen klaustroak eta eskola-kontseiluak ikastetxearen emaitzak aztertzeko eta ebaluatzeko garrantzitsua den beste edozein datu gehituko du.

13. Artikulu honetan jasotakoa ikasketen antolamenduaren berezitasunetara eta ikastetxeen bereizgarrietara egokituko da.

115. artikulua. Tutoretzalana.

1. Tutoretza-lanak leku nabarmena izanen du ikastetxearen hezkuntza-proiektuan, eta ikasleei bereziki lagundu beharko die gaitasun pertsonal eta sozialak garatzen, ikasteko zailtasunak gainditzen, dagokien etapa edo ikasketako helburuak lortzen eta ezarritako gaitasunak eskuratzen.

2. Tutoretza-lanak ikasleen bakarkako eta taldeko hezkuntza-prozesua bideratuko du, eta adimena lantzeko trebetasun, estrategia eta teknikak eskuratzen lagunduko die. Horrez gain, beren hezkuntza- eta lanbide-etorkizuna gero eta modu autonomoagoan antolatzeko eta kudeatzeko balioko dieten gaitasunak eta trebetasunak garatzea sustatuko du.

3. Tutoretza-lana, ikasleen heziketari dagokionez, familiekin koordinatuko eta haiekin elkarlanean gauzatuko da.

4. Ikasleekin egiteko tutoretza-ekintzen esparruak honako hauek izan daitezke, besteak beste:

a) Ikasleen nortasuna eta gaitasunak erabat garatzea.

b) Balioak eskuratzeko eta bizikidetzarako prestatzea.

c) Osasuna, elikadura-eredu osasungarriak eta jarduera fisikoa sustatzea.

d) Hezkuntza emozionala.

e) Pertsonen arteko harremanak eta garapen soziala lantzea.

f) Duintasuna, nortasuna eta kontzientzia-askatasuna errespetatzea.

g) Pertsonen desberdintasunak eta eskubideak onartzea eta errespetatzea.

h) Emakumeek eta gizonek eskubide eta aukera berak edukitzea.

i) Indarkeriaren prebentzioa eta gatazkak modu baketsuan ebaztea.

j) Hiritartasuna egikaritzea.

k) Arduraz ikastea, eta meritua eta ahalegina balioestea.

l) Ohitura intelektualak eta lanerako teknikak eskuratzea.

m) Aukera pertsonal eta profesionalak egiteko orientatzea.

5. Ikastetxeak ikasleen erabateko garapena bermatzeko diseinatutako hezkuntza-neurri eta -ekintzak tutoretza-planean jasoko dira; dokumentu hori hezkuntza-proiektuaren parte izanen da.

6. Tutoretza Planean apartatu hauek sartuko dira:

a) Printzipioak.

b) Helburuak.

c) Tutoreak izendatzeko prozedura.

d) Tutoretzen antolaketa eta funtzionamendua.

e) Tutoretza-ekintzako eremu espezifikoak, ikasleekin, familiekin eta irakasle-taldearekin aritzeko.

f) Urteko tutoretza-plana zehazteko irizpideak.

g) Hezkuntza- eta lanbide-orientazioko plana.

h) Jarraipena eta ebaluazioa.

7. Ikastetxeek ikasleak trebatuko dituzte hezkuntza-arloan eta arlo pertsonal eta profesionalean beren interesetarako egokienak diren aukerak egin ditzaten, estereotiporik, aurreiritzirik eta genero-rolik gabe. Horretarako, Hezkuntza eta Lanbide Orientazioko Plana eginen dute; dokumentu hori tutoretzako-planean sartuko da, separata gisa. Hezkuntza eta Lanbide Orientazioko Planean ikasleen orientazioa antolatzeko irizpide eta ekintzak sartuko dira.

8. Tutoretza-planaren eta Hezkuntza eta Lanbide Orientazioko Planaren proposamenak Hezkuntza eta Lanbide Orientazioko departamentuak edo hezkuntza-laguntzako unitateak eginen ditu, koordinazio pedagogikorako batzordearen jarraibideen arabera eta irakaskuntza koordinatzeko organoen eta irakasleen ekarpenak kontuan hartuta.

9. Ikasturte-hasieran, ikastetxearen abiapuntua eta maila bakoitzeko ikasleen premia indibidualak eta taldeko premiak aztertu ondoren, maila bakoitzean zer tutoretza-jarduera eta zer hezkuntza- eta lanbide-orientazioko jarduera eginen diren zehaztuko da.

10. Taldearen ezaugarriak edo bestelako gorabeheraren batzuk direla eta hala komeni bada, ikastetxeko ikasketaburuak tutoretza-lanetan laguntzeko neurri osagarriak ezartzen ahalko ditu, Hezkuntza Departamentuak zer baliabide egokitu dizkion kontuan hartuta.

11. Artikulu honetan jasotakoa ikasketen antolamenduaren berezitasunetara eta ikastetxeen bereizgarrietara egokituko da.

116. artikulua. Ikasleen desberdintasun indibidualei arreta jartzea.

1. Ikastetxeek ikasleen desberdintasun indibidualei ematen dieten arreta printzipio hauek gidatuko dute: normalizazioa, zuzentasuna, emakumeen eta gizonen arteko berdintasuna eta inklusioa.

2. Ikastetxeek Hezkuntza Departamentuak egokitutako baliabideak erabiliko dituzte, ikasle guztiek ahalik eta garapen pertsonal, intelektual eta sozial handiena izan dezaten. Alde horretatik, behar adina giza baliabide eta baliabide material jarriko dituzte hezkuntza-helburuak lortzeko zailtasun bereziak dituzten ikasleen egoera konpentsatzeko. Hala, ikasturte bakoitzean, ikastetxeek erabakiko dute aniztasunari arreta emateko egokitutako orduak nola erabili, eta plantillan behar diren profilak ezarriko dituzte. Horretarako, dagozkien espezialitateetako irakasleak eta beste profesional kualifikatu batzuk sartuko dituzte, Hezkuntza Departamentuak ezartzen dituen irizpideen arabera.

3. Ikastetxeetako zuzendaritza-taldeek, hezkuntza- eta lanbide-orientazioko departamentuarekin edo hezkuntza-laguntzako unitatearekin eta koordinazio pedagogikorako batzordearekin elkarlanean, ikasleen desberdintasun indibidualei erantzuteko plan bat eginen dute. Plan horretan, ikasleen hezkuntza-laguntzako premia espezifikoei erantzun egokia ematea ziurtatzeko antolaketa-, curriculum- eta metodologia-neurriak ezarriko dituzte. Plan hori ikastetxeko hezkuntza-proiektuaren parte izanen da.

4. Ikastetxeek prozedura eta baliabideak izanen dituzte ikasleen hezkuntza-laguntzako premia espezifikoak identifikatzeko, ikaskuntzan desorekak prebenitzeko eta beharrezkoak diren hezkuntza-neurriak ahalik eta lasterren hartzeko. Horretarako, behar adina ebaluazio psikopedagogiko eginen dituzte eta hezkuntza-laguntzako premia espezifikoak dituzten ikasleen errolda eguneratuko dute, Hezkuntza Departamentuak prestatutako hezkuntza-plataforma digitalaren laguntzarekin.

5. Ikasleengan hautemandako premia indibidualei erantzuteko, hezkuntza-neurri orokorrak, hezkuntza-neurri espezifikoak eta aparteko hezkuntza-neurriak har daitezke.

6. Hezkuntza-laguntzaren aldetik atzematen diren premia espezifikoei erantzuteko hezkuntza-neurriak koordinatu eta ezartzeko esparrua irakasle-taldea da, ikasle-talde berean irakasten duten irakasleek osatua eta tutoreak koordinatua.

7. Irakasleek, beren irakaskuntza-jardunbidean, hezkuntza-laguntzako premia espezifikoak dituzten ikasleei arreta emateko curriculum-neurri, estrategia, teknika eta baliabide egokiak erabiliko dituzte.

8. Ikasleen egoera eta premia espezifiko batzuei erantzuteko, ezinbestekoa izanen da ikastetxea koordinatzea eta, hala badagokio, baita kanpoko eragile sozial, sanitario eta komunitarioekin sarean lan egitea ere.

9. Artikulu honetan jasotakoa ikasketen antolamenduaren berezitasunetara eta ikastetxeen bereizgarrietara egokituko da.

III. TITULUA. KUDEATZEKO AUTONOMIA

I. KAPITULUA. IKASTETXEEN KUDEAKETA

117. artikulua. Ikastetxeen antolaketari buruzko xedapen orokorrak.

1. Ikastetxeek kudeatzeko autonomia izanen dute, indarrean dagoen araudian, foru dekretu honetan eta dekretua garatzen duten arauetan ezarritako moduan.

2. Kudeatzeko autonomia esatean, ikastetxeek beren baliabide ekonomiko eta materialak eta giza baliabideak administratzeko duten gaitasuna esan nahi da.

3. Ikastetxeak kudeatzeaz zuzendaritza-taldeak arduratzen dira, eta hezkuntza-komunitate osoak parte hartzen du.

4. Kudeatzeko autonomia baliatuz, eta dituzten zeregin normatiboen, helburuen eta lehentasunen arabera, ikastetxeek honako hauek egiten ahalko dituzte, indarrean dagoen araudian ezarritako baldintzetan:

a) Ondasunak eta zerbitzuak eskuratu eta kontratatu.

b) Ikastetxeko baliabide ekonomikoen banaketa eta erabilera planifikatu, aurrekontuaren arabera.

c) Irakasleak, hezkuntza-arreta osagarriko langileak eta administrazio eta zerbitzuetako langileak kudeatu.

d) Ikastetxeko instalazioen zaintza, mantentze-lanak, hobekuntza eta berrikuntza kudeatu, indarrean dagoen araudiaren arabera.

e) Baliabide ekonomiko eta material osagarriak lortu edo, hala badagokie, onartu, indarrean dagoen araudiaren arabera.

f) Eskola-jantokiko eta eskola-garraioko zerbitzu osagarriak antolatzen lagundu.

g) Titulu honetako V. kapituluan jasotako beste edozein elementu kudeatu.

5. Hezkuntza Departamentuak ikastetxeei lagunduko die kudeatzeko autonomia erabiltzen, eta, horretarako, giza baliabideak eta baliabide ekonomiko eta materialak emanen dizkie, ikastetxearen eta ikasleen ezaugarriak kontuan hartuta.

6. Ikastetxeek, beren autonomia baliatuz, kudeaketa-proiektu batean jasoko dituzte beren baliabide ekonomikoak, giza baliabideak eta baliabide materialak administratzeko hartutako erabakiak.

7. Ikastetxeek kudeatzeko duten autonomiako elementu eta dokumentuen zehaztapenari, izenari eta edukiari buruz titulu honetan ezarritakoa ikastetxeen ezaugarrietara eta ikasketa bakoitzaren arau espezifikoetan ezarritakora egokitu beharko da, baita Hezkuntza Departamentuak arau bidez ezartzen duen horretara ere.

118. artikulua. Kudeaketaproiektua.

1. Ikastetxeek beren kudeaketa-proiektua izanen dute, oinarrizko araudian, foru dekretu honetan eta dekretu hau garatzen duten arauetan jasotakoaren araberakoa.

2. Kudeaketa-proiektua ikastetxeen hezkuntza-proiektuaren eta antolaketa- eta funtzionamendu-arauen zerbitzura egonen da, horiek garatu ahal izateko.

3. Kudeaketa-proiektuan kudeaketa ekonomikoa eta pertsonen kudeaketa jasoko dira, eta ikastetxeko baliabide materialak nola antolatu eta erabiliko diren azalduko da.

4. Kudeaketa-proiektuak elementu hauek izanen ditu:

a) Kudeaketa ekonomikoari dagokionez (titulu honen II. kapituluan jasota dago), urteko aurrekontua, kudeaketa-kontua eta tasen kobrantza eta likidazioa jasoko dira.

b) Pertsonen kudeaketari dagokionez (titulu honen III. kapituluan jasota dago), ikastetxeko plantillak nola eratzen diren eta langileen jarduera eta prestakuntza-plangintza nola garatzen diren azalduko da.

c) Baliabide materialen kudeaketari dagokionez (titulu honen IV. kapituluan jasota dago), instalazioen eta ekipamenduen mantentze-lanak eta zaintza jasoko dira, baita bitarteko eta baliabide material eta digitalen hornidura ere.

d) Beste kudeaketa-elementu batzuei dagokienez, titulu honen V. kapituluan jasotakoa beteko da.

e) Hezkuntza Departamentuak ezartzen ahal duen beste edozein.

5. Betiere, kudeaketa-proiektuaren edukia ikasketen antolamenduaren berezitasunera eta ikastetxe bakoitzaren ezaugarrietara egokituko da.

119. artikulua. Kudeaketaproiektua egitea, onestea eta ebaluatzea.

1. Ikastetxeko hezkuntza-proiektuaren prestakuntza zuzendaritza-taldeak koordinatuko du, eta hura arduratuko da, halaber, proiektua eta proiektuaren aldaketak idazteaz. Horretarako, ikastetxeko kide anitzeko gobernu-organoek edo koordinazio pedagogikorako batzordeak beren eskumen-esparruetan aurrez onetsitako proposamenak baloratuko dituzte, baita hezkuntza-komunitateko beste edozeinek egindako proposamenak ere.

2. Zuzendaritza-taldeak, antolaketa- eta funtzionamendu-arauak zehazteko, lagun diezaien eta parte har dezaten eskatzen ahalko die koordinazio pedagogikorako batzordeari, irakaskuntza koordinatzeko beste batzorde batzuei eta koordinazio-batzorde edo -taldeei.

3. Kudeaketa-proiektua eta haren aldaketak eskola-kontseiluak onetsiko ditu. Ebaluatu ere kide anitzeko organo horrek eginen du.

4. Kudeaketa-proiektuak ikastetxeko langile guztiak behartuko ditu hura betetzera, eta ikastetxeko hezkuntza-komunitatea lotetsiko du.

5. Ikastetxeek beren antolaketa- eta funtzionamendu-arauak argitaratuko dituzte, hezkuntza-komunitateko kide guztiek ezagutu eta kontsultatu ditzaten; eta eskura egotea ziurtatuko dute, ahal izanez gero baliabide elektroniko edo telematikoen bidez.

II. KAPITULUA. IKASTETXEETAKO KUDEAKETA EKONOMIKOA

120. artikulua. Ikastetxeen kudeaketa ekonomikoari buruzko xedapen orokorrak.

1. Ikastetxeek autonomia izanen dute urteko aurrekontua eta kudeaketa-kontua administratzeko, beren hezkuntza-proiektuan ezarritako helburu eta lehentasunak betetze aldera.

2. Ikastetxeen kudeaketa ekonomikoari dagokionez, indarrean dagoen araudian jasotakoa beteko da.

121. artikulua. Urteko aurrekontua.

1. Ikastetxearen aurrekontua urteko plangintza ekonomikorako tresna da, eta gastu guztiak eta gastu horiek ordaintzeko aurreikusitako diru-sarrerak jasoko ditu.

2. Ikastetxeko zuzendaria arduratuko da gastuak baimentzeaz eta ordainketak agintzeaz, onetsitako aurrekontua kontuan hartuta.

122. artikulua. Kudeaketakontuak.

Ikastetxeek beren kudeaketa ekonomikoaren berri emanen dute kudeaketa-kontuen bidez, indarrean dagoen araudiak edo Hezkuntza Departamentuak ezarritako prozedura eta epeak kontuan hartuta.

123. artikulua. Tasak.

Ikastetxeek tasekin bildutakoa horretarako jarritako banku-kontuan sartuko dute, indarrean dagoen araudian jasotakoaren arabera.

III. KAPITULUA. PERTSONEN KUDEAKETA

124. artikulua. Pertsonen kudeaketari buruzko xedapen orokorrak.

1. Ikastetxeek, beren hezkuntza-proiektuan ezarritako helburu eta lehentasunak betetze aldera, autonomia izanen dute ikastetxeko irakasleak, hezkuntza-arreta osagarria ematen duten langileak eta administrazio eta zerbitzuetako langileak kudeatzeko.

2. Ikastetxeetako langileak kudeatzeko, Nafarroako Administrazio Publikoen Zerbitzuko Langileen Estatutuan ezarritakoa beteko da, baita hezkuntza-arloko irakasleen eta irakasle ez diren langileen araudi espezifikoan jasotakoa ere.

3. Ikastetxeetako lanpostuak betetzeko, langilerik egokienak hautatzea ziurtatzen duten prozesuak eginen dira, berdintasun-, merezimendu- eta gaitasun-printzipioak errespetatuz, eta Nafarroako Foru Komunitatean, oro har, eta Hezkuntza Departamentuan, bereziki, lanpostuak betetzeko ezarritako arauen arabera.

4. Ikastetxeetako irakasleei lanaldiak eta ordutegiak jartzeko eta eginkizun eta erantzukizunak egokitzeko, Nafarroako Foru Komunitateko ikastetxeetako irakasleen lanaldia eta ordutegia erregulatzen dituen araudia hartuko da kontuan.

125. artikulua. Irakasleak.

1. Ikastetxeetako irakasle-zerrenda, bai organikoa, bai funtzionamendukoa, Hezkuntza Departamentuak zehaztuko du. Gainera, hezkuntza-jarduera behar bezala garatzeko behar diren langileak esleituko ditu, ezartzen diren irizpideen arabera.

2. Irakasle funtzionarioek lanpostuak betetzeko prozedurari dagokionez, ikastetxeko plantilla organikoa Hezkuntza Departamentuak zehaztuko du, ikasturte bakoitzean eta zuzendariari kontsulta egin ondoren. Alde horretatik, zehaztuko du irakasleentzako zenbat plaza egonen diren, arruntak edo ibiltariak izanen diren, eta zer espezialitate eta profilekoak izanen diren.

3. Ikasturte bakoitzean behar diren irakasleak funtzionamendu-plantillaren bidez ezarriko dira. Hartarako, ikastetxeko zuzendariak bere proposamena eginen du horretarako prestatutako aplikazio digitalean, eta lanpostu bakoitzaren espezialitateak, profilak eta gainerako ezaugarriak zehaztuko ditu, bere hezkuntza-proiektuaren eta Hezkuntza Departamentuak ikasturte bakoitzerako ezarritako irizpideen arabera. Hezkuntza Departamentuak, proposamen hori kontuan hartuta, behin betiko funtzionamendu-plantilla ezarriko du, dagoen aurrekontuaren arabera.

126. artikulua. Ikastetxeko langileen jardueraren eta prestakuntzaplangintzaren garapena.

1. Ikastetxeko langileek (bai irakasleek, bai irakasle ez direnek) beren jarduera profesionala garatzea sustatuko du zuzendaritza-taldeak, kalitatezko hezkuntza-zerbitzua eskaintzeko etengabeko prozesuan.

2. Ikastetxeak beren jarduera profesionala garatzeko aukerak emanen dizkie irakasleei, honako hauen bitartez: berdinen arteko lankidetza-prozesuak, ikastetxera heldu berriak diren langileentzako harrera-prozesuak, irakaskuntzan esperientziarik ez duten irakasleen trebakuntza hobetzeko aholkularitza eta plangintzako prestakuntza-jarduerak.

3. Zuzendaritza-taldeak berdinen arteko elkarlan aktiboa sustatuko du, irakaskuntza-jardunbidea hobetzeko ezagutza, esperientzia eta baliabideak partekatzeko. Halaber, borondatezko lankidetzarako eta ikasgelak berdinen artean gainbegiratzeko prozesuak martxan jartzen ahal dituzte, irakaskuntzako esperientziak eta praktikak partekatzea harturik helburu.

4. Irakasleek beren irakaskuntza-jardunbidea eta ikasleek barne- eta kanpo-ebaluazioetan izan dituzten emaitzak nola hobetu hausnartuko dute. Horretarako, beren jarduera aztertuko dute, zer hobetu dezaketen zehaztuko dute eta lanbidean aurrera egiteko helburuak jarriko dituzte.

5. Ikasturte-hasieran, ikastetxeko zuzendaritza-taldeak erakundeak zer prestakuntza-premia dituen zehaztuko du, honako hauek kontuan hartuta: proiektu estrategikoetan eta plangintza-dokumentuetan jasotako helburu eta lehentasunak, barneko eta kanpoko ebaluazio-probetan ateratako emaitzak, Hezkuntza Departamentuak proposatutako plan eta lehentasunezko ildoak, Hezkuntzako Ikuskapen Zerbitzuak egindako gomendioak eta klaustroek eta irakasle-taldeek egindako lanetik eratorritako prestakuntza-premiak. Atzemandako premiak oinarritzat hartuta, ikastetxeko prestakuntza planifikatuko da.

6. Prestakuntza-ekintzak klaustro osoari edo irakasle-talde jakin bati zuzentzen ahalko zaizkio. Proposatutako prestakuntza-ekintzak lehentasunezko izanen dira, eta irakasleek nahitaez egin beharrekoak, baldin honako hauek garatzeko badira: Hezkuntza Departamentuaren edo ikastetxeen proiektu estrategikoak, planak eta lehentasunezko ildoak.

7. Prestakuntza hori zuzendaritza taldeak planifikatuko du, irakasle guztiek nahitaez egin beharko dute eta Hezkuntzako Ikuskapen Zerbitzuak gainbegiratuko du.

8. Ikasturte hondarreko memoriaren esparruan, prestakuntza-ekintzen eraginkortasuna aztertu eta baloratuko da, adierazle egokiak erabiliz, hala nola egindako prestakuntza-jarduerak ikasgelan zenbateraino aplikatu eta aprobetxatu diren.

9. Ikastetxeko zuzendariordea izanen da ikastetxearen prestakuntza-plangintza betetzearekin zerikusia duen guztiaren koordinatzailea eta arduraduna. Zuzendariorderik ez badago, eginkizun guztiak foru dekretu honen 19. artikuluaren arabera dagokion pertsonari egokituko zaizkio.

10. Aurreko paragrafoetan jasotakoa gorabehera, irakasleek parte hartzen ahalko dute, beren aldetik, ikastetxearen prestakuntza-plangintzatik kanpo antolatzen diren prestakuntza-jardueren beste deialdi batzuetan.

IV. KAPITULUA. BALIABIDE MATERIALEN KUDEAKETA

127. artikulua. Baliabide materialen kudeaketari buruzko xedapen orokorrak.

1. Ikastetxeek, hezkuntza-jarduerak ingurune seguru, osasungarri eta egokian egiten direla ziurtatzeko, autonomia izanen dute beren instalazioak zaintzeko eta mantentze-lanak egiteko, ekipamendua hornitzeko eta obrak, zerbitzuak eta hornidurak kontratatzeko; hori, betiere, indarrean dagoen araudian eta kapitulu honetan ezarritakoaren arabera.

2. Aurreko atalean aipatutako lanek eraikinaren erabiltzaileen segurtasunean eragina izan badezakete, aldez aurretik jakinarazi beharko zaizkie eraikinaren titular diren erakundeei.

128. artikulua. Ikastetxea mantentzea eta kontserbatzea.

1. Ikastetxeek behar dituzten mantentze- eta zaintza-prozedura eta -neurriak ezarriko dituzte kudeaketa-proiektuan, beren instalazioen bereizgarriak kontuan hartuta.

2. Lan horiek egiteko, Hezkuntza Departamentuak edo, hala badagokio, udalerriak ematen dituen mantentze-zerbitzuak erabiltzen ahalko dituzte ikastetxeek.

3. Hezkuntza-komunitateko kideren batek jakiten badu ikastetxeko ekipamendu edo instalazioek hutsen bat dutela, idazkariari esanen dio berehala, eta hark lehenbailehen jakinaraziko dio Hezkuntza Departamentuko edo, hala badagokio, udalerriko administrazio-unitate eskudunari.

4. Zuzendaritza-taldeak jasangarritasuneko eta energia-efizientziako neurriak sustatuko ditu ikastetxearen kudeaketan, eta energia-sistema efizienteagoak, hondakinen kudeaketa eta beste ekintza jasangarri batzuk sartzen ahalko ditu.

129. artikulua. Ekipamendua.

1. Ikastetxeek honako hauek zehaztuko dituzte beren kudeaketa-proiektuan: ekipamendu-, altzari- eta teknologia-premia espezifikoei erantzuteko prozedura eta neurriak, betiere ikastetxearen eta ikasleen ezaugarriak kontuan hartuta; hezkuntza-programetatik eratorritako eskariak; eta irakaskuntza-jarduera jakin batzuetarako behar diren jantzi espezifikoak.

2. Ikastetxe guztiek inbentario eguneratua izanen dute, Hezkuntza Departamentuak ezartzen duen moduan.

3. Hezkuntza Departamentuak behar duten ekipamendua emanen die ikastetxeei, dagoen aurrekontuaren arabera.

4. Ekipamendu berririk behar bada, ikastetxeko zuzendariak Hezkuntza Departamentuko arlo horretako unitate administratibo eskudunari jakinaraziko dio, eta hark hornituko du, eskuragarritasunaren eta indarrean dagoen araudiaren arabera. Unitate horrek ekipamendu hori eskura ez badu, ikastetxeak beste hornitzaile batzuei erosten ahalko die, kapitulu honetan zehaztutakoaren arabera.

130. artikulua. Obrak, zerbitzuak eta hornidurak kontratatzea.

Ikastetxeek ondasunak eskuratu eta obrak, zerbitzuak eta hornidurak kontratatzen ahalko dituzte, indarrean dagoen araudian jasotako prozedura, baldintza eta mugak kontuan hartuta.

131. artikulua. Baliabide eta bitarteko digitalak.

1. Ikastetxeek hezkuntza- eta kudeaketa-prozesuetan informazioaren eta komunikazioaren teknologiak (IKT) erabili ahal izateko beharrezkoak diren baliabide eta bitarteko digitalak izanen dituzte.

2. Konektibitatea sustatzeko, gailu digitalak emateko, hezkuntza-baliabide digitalak erabiltzea sustatzeko eta irakasleek beren jardunean teknologia eraginkorki erabili ahal izateko prestakuntza eskaintzeko, Hezkuntza Departamentuak ikasle eta irakasleentzako baliabide eta bitarteko digitalak emanen dizkie ikastetxeei, dagozkien planen esparruan.

3. Ikastetxeak plan digital bat izanen du, eta hezkuntza-proiektuan sartuko du elementu espezifiko gisa.

4. Hezkuntza Departamentuak ikastetxeko zuzendaritzaren esku uzten ahalko du IKT aktiboekin zerikusia duten kontratuak egiteko eskumena; aktibo horietan sartzen dira zerbitzuak, lizentzia digitalak eta hornidurak. Horri esker, ikastetxeak modu autonomo eta eraginkorrean kudeatzen ahalko ditu bere premiak, indarrean dagoen araudi-esparruaren arabera.

5. IKT aktibo berririk behar bada, ikastetxeko zuzendariak Hezkuntza Departamentuko arlo horretako unitate administratibo eskudunari jakinaraziko dio, eta hark hornituko du, eskuragarritasunaren eta indarrean dagoen araudiaren arabera. Unitate horrek aktibo hori eskura ez badu, ikastetxeak beste hornitzaile batzuei erosten ahalko die, kapitulu honetan zehaztutakoaren arabera.

6. IKT aktiboekin zerikusia duten erosketa eta kontratazioek, teknika aldetik egokiak direla eta Hezkuntza Departamentuaren IKT politika eta estrategiekin bat datozela ziurtatzeko, unitate administratibo eskudunaren oniritzia beharko dute.

7. Ikastetxeak jakiten badu IKT azpiegituran hutsen bat dagoela, Hezkuntza Departamentuari jakinaraziko dio, erabakitzen den prozeduraren bidez.

132. artikulua. Hezkuntzainformazioaren kudeaketa.

1. Ikastetxeek Hezkuntza Departamentuak prestatutako hezkuntza-plataforma digitala erabiliko dute honako hauek kudeatzeko: hezkuntza-informazioa eta -prozesuak, familiekin eta ikasleekin duten barne-komunikazioa, dokumentazio instituzionalen prestaketa, langileen kudeaketa, ikastetxeko kontabilitatea eta Hezkuntza Departamentuak erabakitako gainerako gaiak.

2. Ikastetxeko zuzendariak erabakiko du ikastetxeko hezkuntza-informazioa kudeatzeaz nor arduratuko den. Hezkuntza Departamentuak prestakuntza espezifikoa emanen die pertsona horiei, eta haiek arduratuko dira gainerako erabiltzaileei aholku emateaz.

3. Ikastetxeko langileen ardura izanen da hezkuntza-plataforma digitala nola erabiltzen den jakitea eta egokitzen zaizkion hezkuntza- eta kudeaketa-prozesuei buruzko datuak plataforman eguneratuta izatea.

4. Ikastetxeko zuzendariak dauden baliabideak jarriko ditu ikastetxeko langile guztiek hezkuntza-plataforma digitala erabili ahal izan dezaten.

5. Ikastetxeek estatistikak egiteko behar diren datuak emanen dituzte, Hezkuntza Departamentuak ezarritako epean eta moduan.

6. Hezkuntza Departamentuak hezkuntza-plataforma digitala erabiltzen erakusteko prestakuntza-eskaintza eginen du.

133. artikulua. Ikastetxeen webguneak.

1. Ikastetxeek webguneak izaten ahalko dituzte informazio instituzionala zabaltzeko; plangintza, jarduera eta zerbitzu guztiak hezkuntza-komunitatearen eskura jartzeko; eta familiekin eta ingurunearekin errazago komunikatzeko.

2. Hezkuntza Departamentuak baliabideak emanen dizkie ikastetxeei beren webguneak sortu eta mantentzeko.

V. KAPITULUA. KUDEAKETAKO BESTE ELEMENTU BATZUK

134. artikulua. Ikastetxeetarako sarbidea.

1. Ikastetxeek indarrean dagoen legerian gai hauei buruz ezarritako baldintzak bete beharko dituzte: instalazioak, guneak, segurtasun-baldintzak, irisgarritasuna eta oztopoak kentzea.

2. Ikastetxeek bulego, gela eta guneetara sartzeko protokolo espezifikoak ezarriko dituzte beren antolaketa- eta funtzionamendu-arauetan, baimendutako pertsonak bakarrik sar daitezen. Baimenak eta ordutegiak jardueren izaeraren arabera aldatzen ahalko dira.

3. Ikastetxeek bertara sartzeko baliozko identifikazioa eskatzen ahalko diete gurasoei, legezko ordezkariei eta ikastetxera erregulartasunez joaten ez den beste edozein pertsonari.

135. artikulua. Zerbitzu osagarriak.

1. Zerbitzu osagarriak eskola-garraioa eta eskola-jantokia dira.

2. Zerbitzu osagarriak antolatzeko eta kudeatzeko, indarrean dagoen araudian jasotakoa beteko da.

3. Zerbitzu osagarrien eskaintza publikoa duten ikastetxeetan, zuzendaritza-taldeari dagokio haiek kudeatzen laguntzea.

4. Zerbitzu osagarrien plana egitean, ikastetxeko zuzendaritza-taldeak zehaztu behar du zer irakasle behar diren eskola-garraioa erabiltzen duten ikasleak ikastetxera iristea eta handik ateratzea behar bezala artatzeko, jantokia zaintzeko eta, jantokia ikastetxeko eraikinetik kanpo dagoenean, hala badagokio, ikasleen joan-etorrian laguntzeko.

136. artikulua. Ikasleen osasuna eta segurtasuna.

1. Ikastetxeek ikasleen osasuna eta segurtasuna zainduko dituzte, haur eta nerabeen sustapenari, arretari eta babesari buruz indarrean dagoen legeria eta ikasleen eskubide eta betebeharrei eta unibertsitateaz kanpoko ikastetxeetako bizikidetzari buruzko araudia kontuan hartuta.

2. Ikastetxeek elikadura osasungarria eta ariketa fisikoa egitea sustatuko dituzte, indarrean dagoen araudiak ezarritakoaren arabera; horrez gain, osasuna zaintzen eta hobetzen laguntzen duen beste edozein ohitura ere bultzatuko dute.

3. Ikastetxeetan debekaturik egonen da tabakoa sustatzea, saltzea eta hornitzea, baita erretzea ere, bertako gela eta gune itxi eta aire zabalekoetan, eskola-garraiorako ibilgailuak barne; hori, indarrean dagoen araudiaren arabera.

4. Ikastetxeek geletan sortzen den kutsadura akustikoa mugatzeko jarduerak sustatuko dituzte.

137. artikulua. Datuen babesa.

1. Ikastetxeek beren hezkuntza-funtzioa betetzeko beharrezkoak diren ikasleen datu pertsonalak biltzen ahalko dituzte. Datu horiek izan daitezke jatorri eta giro sozial eta familiarrari buruzkoak, ezaugarri edo egoera pertsonalei buruzkoak, eskolatzeak izandako garapenari eta emaitzei buruzkoak eta ikasleak hezteko eta orientatzeko ezagutu beharreko beste hainbat inguruabarri buruzkoak.

2. Gurasoek edo legezko ordezkariek eta ikasleek berek lagundu beharko dute artikulu honetan adierazitako informazioa lortzen. Ikasle bat ikastetxe batean sartzean, ikasle horren datuak tratatzeko baimena emanen da, eta, hala badagokio, ikaslea aurretik eskolatu zen ikastetxeko datuak lagako dira, datuen babesari buruzko legerian ezarritako baldintzetan. Nolanahi ere, artikulu honetan aipatutako informazioa irakaslana eta orientabide-lana egoki egiteko behar-beharrezkoa dena izanen da, eta ez da, esanbidezko baimenik gabe, hezkuntzakoaz bestelako helburuetarako erabiltzen ahalko.

3. Ikastetxeak datu pertsonalak babesteko araudiaren mende egonen dira, eta ikastetxeko langile eta ikasleen eta haien guraso edo legezko ordezkarien datuen tratamenduan pribatutasuna eta konfidentzialtasuna bermatuko duten xedapen tekniko eta antolakuntzakoak aplikatuko dituzte.

4. Irakasleak eta gainerako langileak, beren funtzioak betetzeko datu pertsonalak edo familiakoak edo ikasleen edo haien familien ohorean eta intimitatean eragina izan dezaketenak erabiltzen dituztenean, informazioa isilpean gordetzeko betebeharrari lotuta geldituko dira.

5. Datuak lagatzeari dagokionez, datu pertsonalak babesteari buruz indarrean dagoen legediari jarraituko zaio.

6. Zuzendaritza-taldeari dagokio irakasleen klaustroari eta hezkuntza-komunitateko gainerako kideei datu pertsonalak babesteko araudiaren berri ematea.

138. artikulua. Kalitatea kudeatzeko sistema.

1. Ikastetxeek, beren autonomiaren baitan, kalitatea osoki kudeatzeko sistema edo esparruak txertatzen ahalko dituzte, zerbitzua hobetzeko eta beren hezkuntza-proiektuaren helburu eta lehentasunak betetzeko.

2. Ikastetxeetan kalitatea kudeatzeko txertatzen dituzten sistemak ospe handiko erakundeek, hezkuntza-erakundeek edo Hezkuntza Departamentuak berak ezarritako hainbat arau edo eredutan oinarritzen ahalko dira.

3. Nahi duten ikastetxeek Hezkuntza Departamentuak kalitatea kudeatzeko arautzen duen sistema ezartzen eta mantentzeko programan parte hartzen ahalko dute, indarrean dagoen araudiak ezarritako moduan.

4. Halaber, ikastetxeek kalitatea kudeatzeko ziurtagiri edo aintzatespen independenteak eskuratzen ahalko dituzte.

139. artikulua. Arriskuak prebenitzea.

1. Ikastetxeek, beren ingurunea segurua izan dadin, ikasleen, haien familien eta hezkuntza-komunitatea osatzen duten irakasleen eta irakasle ez diren langileen segurtasuna eta ongizatea bermatuko dituzte.

2. Ikastetxeko zuzendaritza-taldeak, ikastetxea segurua izan dadin bermatzeko, unitate administratibo arduradunak laneko arriskuak prebenitzeko ezarritako ildoak landu eta mantenduko ditu.

3. Laneko arriskuen prebentzioaz arduratzen den unitate administratiboak aldizkako ikuskapenak eginen ditu ikastetxean, segurtasun-neurriak betetzen direla egiaztatzeko eta, beharrezkoa denean, egokitzapenak egiteko.

4. Ikastetxeko zuzendaritza-taldeak ikastetxean laneko arriskuak prebenitzeko egiten diren aldizkako ebaluazioetan proposatutako segurtasun-neurri eraginkorrak hartuko ditu, antzemandako arriskuak arintzeko.

5. Ikastetxeko zuzendariak irakasleen aurkako kanpoko erasoen aurrean jarduteko protokoloaren berri emanen die irakasleen klaustroari eta hezkuntza-komunitateko gainerako kideei, eta, kanpoko erasoren bat gertatzen denean, jakinarazi eta protokoloa ofizioz martxan jarriko du.

6. Hezkuntza-komunitateko edozein kidek jakiten badu ikastetxeko langile batek ikastetxean bertan kanpoko erasoren bat izan duela, zuzendariari jakinaraziko dio, eta hark, ofizioz, kanpoko erasoen protokoloa martxan jarriko du eta Hezkuntza Departamentuari jakinaraziko dio, hark zehaztutako moduan.

7. Ikastetxeek, ikasleen osasun-arretari dagokion guztian, indarrean dagoen araudian eta, hala badagokio, administrazio eskudunek horretarako emandako jarraibide espezifikoetan ezarritakoa beteko dute. Aurrez jakin daitezkeen eta aurrez jakin ezin daitezkeen larrialdi-egoeretan ikasleen osasun-arreta errazteko eta ikastetxean sendagaiak emateko prozedurari dagokionez, ikastetxeek behar den arduraz jokatuko dute eta, betiere, administrazio eskudunek ezarritakoa beteko dute.

140. artikulua. Ikastetxearen larrialdiplana.

1. Ikastetxe guztiek larrialdietarako plan bat izan beharko dute beren kudeaketa-proiektuaren baitan, pertsonen eta ondasunen gaineko arriskuak prebenitzeko eta kontrolatzeko, eta gertatu daitezkeen larrialdiei erantzun egokia emateko. Plan horretan sartua egonen da nahitaezko ebakuazio-plana, non jasoko baitira larrialdi sailkatuen aurreko erantzuna, babeseko eta esku hartzeko neurriak eta gerta daitezkeen larrialdiei erantzuteko prozedurak eta jarduteko sekuentzia.

2. Zuzendaritza-taldeak ikastetxeko irakasleen eta irakasle ez diren langileen prestakuntza kudeatuko du, larrialdietarako planaren edukia ezagutu dezaten eta edozein larrialdiri erantzuteko gai izan daitezen.

3. Ikasturte bakoitzean, larrialdietarako planaren eraginkortasuna ebaluatzeko proba eta simulazioak eginen dira; besteak beste, ebakuazio-simulazioak eta suteen eta bestelako larrialdien aurreko erantzunak.

4. Larrialdietarako plana aldizka berrikusi eta eguneratuko da, ikastetxeko azpiegituran eta arriskuetan edo indarrean dagoen araudian izandako aldaketak jasotzen dituela ziurtatzeko.

141. artikulua. Ikastetxeen erabilera soziala.

Ikastetxe publikoei atxikitako lokal, instalazio eta eraikinak hezkuntza-, gizarte-, kultura- eta kirol-jarduerak egiteko erabiltzen ahalko dira, indarrean dagoen araudiak horretarako ezarritako baldintza, betebehar eta lehentasunen arabera.

IV. TITULUA. EMAITZAK NEURTZEA ETA EBALUATZEA

I. KAPITULUA. HEZKUNTZA-HELBURUAK, NEURKETA ETA JARRAIPENA

142. artikulua. Hezkuntzako helburuak.

1. Ikastetxeek ezarriko dituzte beren hezkuntza-proiektuko xede eta lehentasunak betetzeko lortu nahi dituzten hezkuntza-helburuak. Hezkuntza-helburu horiek zabalak izanen dira, eta ikastetxearen hainbat jarduera-eremu barne har ditzakete, hala nola ikasleen ikaskuntza-maila, ikasleen garapen pertsonal eta soziala, emakumeen eta gizonen arteko berdintasuna, hezkuntza-ekitatea, eskola-giroa, irakasleen garapen profesionala eta baliabideen kudeaketa.

2. Ikastetxeek finkatuko dute, batetik, zer adierazle eta helburu zehatz lortu nahi dituzten; eta bestetik, epe jakin batean zer ekintza gauzatzeko konpromisoa hartzen duten, hezkuntza-helburuak lortzeko bidean aurrera egiteko.

3. Zuzendariak, zuzendaritza pedagogikoaren arduradun gisa, ikastetxeak zer hezkuntza-helburu eta -xede lortu nahi dituen jakinaraziko die irakasleen klaustroari eta eskola-kontseiluari, haien lana bideratzeko eta zentzua emateko.

4. Antolaketaren eta didaktikaren inguruko proiektu, plan eta ikuspegiak adostuko dira, koherenteak eta jarritako hezkuntza-helburu eta -xedeak lortzeko garrantzitsuentzat jotzen direnak.

5. Irakasleek sistematikoki gauzatuko dituzte ikastetxeak bere autonomia erabiliz adostu dituen proiektu, plan eta ikuspegietatik eratorritako ekintzak, eta jarritako hezkuntza-helburu eta -xedeak lortzera bideratuko dituzte ahaleginak.

143. artikulua. Planak egitea.

1. Ikastetxe guztiek, beren hezkuntza-helburuak bultzatze aldera, plan eta proiektuak prestatuko dituzte. Plan eta proiektu horiek irakasleen lanari zentzua emanen diote, eta lan hori aurrez finkatutako helburuak lortzera bideratuko dute.

2. Ikastetxeen urteko programazio orokorrak eta han jasotako plan eta proiektuek ikastetxearen urteko helburu eta xedeak lortzeko ekintzak zehazten, epeak ezartzen eta erantzukizunak egokitzen lagunduko dute. Halaber, horien jarraipena egiteko eta aurreikusitako helburuak zenbateraino lortu diren jakiteko balioko dute, ikasturte hondarreko memoriaren bidez.

3. Hobekuntza-planak, zuzendaritza-proiektuak eta plan estrategikoak garatuz, ikastetxeek beren helburu eta xedeak epe ertainera lortzeko behar dituzten ekintza eta baliabideak ezartzen ahalko dituzte.

144. artikulua. Emaitzak.

1. Antolaketari, pedagogiari eta kudeaketari dagokienez, ikastetxeek beren autonomia eraginkorki erabiltzen dutela ziurtatzeko, jarduera-eremu guztietan ahalik eta emaitza onenak lortzera bideratuko dituzte beren baliabideak. Horretarako, helburuak jarri, neurketa-adierazleak zehaztu, lortzeko xedeak finkatu eta emaitzak bilduko dituzte. Emaitza horiek aztertu eta ebaluatu egin beharko dituzte, ondorioak ateratzeko eta beren jarduera etengabeko hobekuntzaren ikuspegitik zuzentzeko.

2. Emaitzetan, ikastetxearen jarduera orokorraren hainbat arlo eta alderdi jasotzen ahalko dituzte, finkatutako helburu eta xedeekin bat. Hezkuntza-proiektuaren helburu eta lehentasunak ez ezik, ikasleak hezteko hartu dituen erantzukizunak ere betetzen dituela ziurtatze aldera ikastetxeak erdietsi nahi dituen lorpenak izanen dira ikastetxearen funtsezko emaitzak.

3. Ikastetxeko arduradunek, dagokien maiztasunarekin, helburu bakoitzerako jarritako xedeetan zer emaitza izan dituzten aztertuko dute, gauzatutako ekintzen eta erabilitako baliabideen emaitza baloratuko dute eta esku-hartzearen eragina ebaluatuko dute, helburuak lortzeko bidean hobera eta aurrera egiteko.

4. Ikastetxeko zuzendariak emaitzen berri emanen die irakasleen klaustroari eta eskola-kontseiluari, helburuak zenbateraino bete diren nabarmentzeko. Horretarako, ikastetxeko ekintzen eta landu nahi diren proiektu eta planen arteko kausa-efektu erlazioak zehaztuko ditu. Informazio hori ezinbestekoa izanen da informazioan eta datu garrantzitsuetan oinarritutako erabaki arrazoituak hartu ahal izateko.

5. Ikastetxeek, beren autonomia erabiliz, hezkuntza-emaitza onak lortu beharko dituzte, jarritako xedeen araberakoak. Halaber, foru dekretu honen 149. artikuluan aipatzen den hobekuntza-plana diseinatzerakoan, hezkuntza-emaitzak kontuan hartuko dituzte.

145. artikulua. Emaitzen jarraipena eta ebaluazioa.

1. Ikastetxeek beren emaitzak neurtu eta haien jarraipena eginen dute, erabakiak hartu eta emaitza horiek eragiten dituzten prozesu eta jarduerak behar bezala kudeatu ahal izateko.

2. Ikastetxeek, beren emaitzak neurtzeko eta haien jarraipena egiteko, arlo guztiak barne hartzen dituzten eta fidagarriak diren mekanismoak izanen dituzte, hala nola adierazleen neurketa, ebaluazioa, inkestak, elkarrizketak eta foku-taldeak. Horien guztien artean, adierazleen neurketa eta ebaluazioa izanen dira ikastetxeek beren emaitzak neurtzeko eta emaitza horien jarraipena egiteko izanen dituzten bi mekanismo nagusiak.

3. Ikastetxeek, arlo guztietako jarduera neurtzeko, beren adierazle-sistema diseinatu eta ezarriko dute, Hezkuntza Departamentuak agindutakoaren arabera. Sistema hori parametro kuantifikagarri eta behagarrien multzo egituratu bat izanen da.

4. Betiere, ikastetxeek jarduera ebaluatzeko prozesua eta, hala badagokie, ebaluazio diagnostikoko prozesua izanen dituzte.

II. KAPITULUA. IKASTETXEEN JARDUNAREN EBALUAZIOA

146. artikulua. Printzipio orokorrak.

1. Jardueraren ebaluazioak baliozko informazio fidagarria emanen du ikastetxeetako hobekuntza-planetan eta urte anitzeko beste plan batzuetan ezarritako helburuen eta jardueren betetze-mailari buruz. Informazio horri esker, jakiten ahalko dute zein alderdik funtzionatzen duten behar bezala, eta zein hobetu daitezkeen eta hobetu behar diren. Izan ere, asmoa da ikastetxearen jarduera eta emaitzak etengabe hobetzea, eta kalitatea, ekitatea eta inklusioa sustatzea.

2. Ikastetxeen jardueraren ebaluazioa Hezkuntzako Ikuskapen Zerbitzuak bultzatuko du, bi ikuspegi bateratu eta osagarri hauekin: barne-ebaluazioa (autoebaluazioa), zeina ikastetxeak berak eginen baitu; eta kanpo-ebaluazioa, zeina Hezkuntzako Ikuskapen Zerbitzuak eginen baitu.

3. Ikastetxeen ebaluazioa, barne- eta kanpo-perspektiben arabera, jardun-alor beren, erreferentzia estandarren eta adierazle homologatuen arabera eginen da, errealitate berari erantzuten diotela bermatzeko.

147. artikulua. Barneebaluazioa. Ikastetxeen autoebaluazioa.

1. Hezkuntza Departamentuak ikastetxeen autoebaluazio-prozesuak sustatuko ditu, erabakitzen den maiztasunarekin.

2. Autoebaluazioa egiteko, kontuan hartuko dira ikastetxearen plangintza instituzionala, plangintzaren antolaketa, jarduera-prozesuak, testuinguru sozioekonomiko eta kulturala eta eskura dituen baliabideak.

3. Hezkuntza Departamentuak helburuak zehaztuko ditu, ebaluatu beharreko arloen esparrua ezarriko du, prozedura eta erantzukizunak finkatuko ditu eta ebaluazio-eredu eta-adierazleak prestatuko ditu, ikastetxeei beren autoebaluazio-prozesuetan laguntzeko.

4. Ebaluazio-prozedura gauzatzeko, estandar eta adierazle objektiboak zenbateraino bete diren baloratuko da, aurrez zehaztutako metriken arabera; metrika horien balorazio-mailak ebidentzien egiaztatze-mailaren arabera zehaztuko dira.

5. Ikastetxeen autoebaluazio-prozesua zuzendaritza-taldeak planifikatu eta zuzenduko du, koordinazio pedagogikorako batzordearekin lankidetzan, eta zehazten diren ebaluazio-taldeek gauzatuko dute.

6. Autoebaluazioaren emaitza modura, ikastetxeak diagnostiko bat jasoko du, zeinean bilduko baitira ikastetxearen lan-jarduneko indarguneak eta hobekuntza-arloak. Azkenik, ebaluazio-taldeek autoebaluazio-txostenetan jasoko dituzte beren ondorioak.

148. artikulua. Kanpoebaluazioa.

1. Autoebaluazio-prozesuaren osagarri gisa, autoebaluazioaren emaitzak alderatu eta aberasteko, Hezkuntza Departamentuak ikastetxeen jardueraren kanpo-ebaluazioa egitea sustatuko du.

2. Ikastetxeek Hezkuntza Departamentuak zehazten dituen kanpo-ebaluazioko prozesuetan parte hartuko dute, ezartzen den prozeduraren arabera.

3. Hezkuntza Departamentuak, Hezkuntzako Ikuskapen Zerbitzuaren bitartez, ebaluazio-prozeduren aplikazioa zuzendu eta koordinatuko du, aldez aurretik zehaztu eta argitaratutako irizpide eta adierazleen arabera, zeinak bat etorriko baitira ikastetxeen autoebaluaziorako ezarritako esparruarekin.

4. Ikastetxeen jardueraren kanpo-ebaluazioetan, honako hauek hartuko dira kontuan: ikastetxearen plangintza instituzionaleko dokumentuak, testuinguru sozioekonomiko eta kulturala, ikastetxeak eskura dituen baliabideak eta ordura arte egin dituen autoebaluazio-prozesuak.

5. Ebaluazio-prozesua burutzeko, txosten bat eginen da. Txostenak esku hartzeko azken proposamen bat edukiko du, ikastetxearen jarduera hobetzera bideratua.

6. Kanpo-ebaluazioaren emaitza espezifikoak ikasturte hondarreko memorian jasoko dira, eta ikastetxeko eskola-kontseiluari eta irakasleen klaustroari jakinaraziko zaizkie.

149. artikulua. Hobekuntzaplana.

1. Autoebaluazioaren eta, hala badagokio, kanpo-ebaluazioaren emaitza gisa, ikastetxeek beren jardueran zer arlo hobetu ditzaketen zehaztuko dute, eta horrek balioko die, gero, ikastetxea emaitzak hobetzera begira kudeatzeko.

2. Premiak antzemanda, ikastetxeek urte anitzeko hobekuntza-plana eginen dute.

3. Jarduera hobetzeko sustatzen diren ekintzen azken helburua irakaskuntza-prozesua hobetzea eta ikasleen ikaskuntza-emaitzak hobetzea izanen da.

III. KAPITULUA. EBALUAZIO DIAGNOSTIKOAK

150. artikulua. Xedapen orokorrak.

1. Hezkuntza Departamentuak ikasleen ebaluazio diagnostikoa egiteko ezartzen dituen prozesuetan parte hartuko dute ikastetxeek, oinarrizko araudiaren arabera.

2. Ikastetxeko hezkuntza-komunitateari ebaluazio diagnostikoko emaitzen eta haietatik eratorritako jarduera-planen berri emanen zaio.

3. Ebaluazio diagnostikoaren emaitzen analisia oinarritzat hartuta, ikastetxeek proposamenak eginen dituzte, foru dekretu honen 149. artikuluan aipatzen den hobekuntza-planean sartzeko.

151. artikulua. Ebaluazio diagnostikoko prozedurak.

1. Zehaztutako ikasketa eta ikasmailetan, ikasleek berenganatutako gaitasunen ebaluazio diagnostikoa eginen dute ikastetxeek. Ebaluazio hori, errolda-izaerakoa, Hezkuntza Departamentuaren ardurapekoa da, eta informatiboa, hezigarria eta orientabidezkoa izanen da ikastetxeentzat, irakasleentzat, ikasleentzat, haien familientzat eta hezkuntza komunitate osoarentzat.

2. Hezkuntza Departamentuak zehazten dituen ikastetxeek parte hartu beharko dute ikasturte bakoitzerako ezartzen diren laginketako ebaluazio diagnostikoko prozeduretan.

3. Ikastetxeek parte hartzen duten ebaluazio diagnostikoak antolatu, landu eta kontrolatuko ditu Hezkuntza Departamentuak, eta eredu eta laguntza egokiak emanen ditu, ikastetxe guztiek modu homogeneo eta egokian egin ditzaten ebaluazio horiek.

4. Ebaluazio horien emaitza gisa, Hezkuntza Departamentuak parte hartzen duten ikastetxe eta sare guztiek izan dituzten emaitzei buruzko txosten orokor bat prestatuko du; baita ikasleek dagozkien gaitasunetan lortutako emaitzei buruzko txosten estandarizatu bat ere, ikastetxe bakoitzerako.

5. Ebaluazio diagnostikoei esker, ikasleek gaitasunak zenbateraino berenganatu dituzten jakiten ahalko dute ikastetxeek. Gainera, maila hori beren indize sozioekonomiko eta kulturalarekin lotu eta Hezkuntza Departamentuak kudeatzen dituen ikastetxeen emaitzekin alderatuko dute.

6. Horrez gain, ikastetxe guztien eskura jarriko da probetako item bakoitzean lortu dituzten puntuazioei buruzko informazio zehatza. Hartara puntuazioak aztertu, eta ondorio zehatzagoak eta gaitasunetan izan dituzten emaitzen urte arteko bilakaerari buruzko informazioa ateratzen ahalko dituzte.

7. Erroldako ebaluazio diagnostikoetan izandako emaitzekin, ikastetxeek analisi kuantitatiboa eta kualitatiboa eginen dute, baita proposamen-txosten bat ere. Txosten hori ikasturte hondarreko memorian sartu, eta ikastetxeen kudeaketa hobetzeko prozesuetan erreferentzia gisa erabiliko dute, emaitzak hobetze aldera. Ebaluazio horien emaitzak ez dira ikastetxeen sailkapenak egiteko erabiltzen ahalko.

8. Irakasle guztien ardura da gaitasunak hobetzea, eta, horregatik, irakasle-talde guztiak engaiatuko dira ikastetxeak parte hartzen duen proba diagnostikoetan lortutako emaitzak aztertzen, eta egokitzat jotzen dituzten hobekuntza-proposamenak eginen dituzte. Hautemandako hobekuntza-eremuak zein diren adieraziko da, bai ikastetxearen hobekuntza-planean, bai irakasle-taldeetan. Horren guztiaren eta hartutako neurrien berri emanen zaio klaustroari eta eskola-kontseiluari.

9. Ikastetxeek zehaztuko dute noiz eta nola helarazi familiei ikasleek lortutako emaitzen txosten indibiduala ikasturtea burutu baino lehen. Gomendagarria da hori tutoretzaren testuinguruan egitea.

Lehen xedapen gehigarria. Ikasketen berezitasunetara eta ikastetxeen bereizgarrietara egokitzea.

Hezkuntza Departamentuari dagokio foru dekretu honetan ezarritakoa landu eta, behar izanez gero, ikasketen antolaketaren berezitasunetara eta ikastetxeen bereizgarrietara egokitzea.

Bigarren xedapen gehigarria. Ingurunearekin elkarlanean aritzea.

Ikastetxeek, gizartearen muin eta gune ireki diren aldetik, beren ingurune hurbileko administrazio, erakunde eta elkarteekin lan egitea eta koordinatzea sustatuko dute, eta, horretarako, hezkuntza-komunitate irekiak sortuko dituzte, gizartean eta komunitatean aldaketa-eragile izan daitezen.

Hirugarren xedapen gehigarria. Irakasle erretiratuen, hezkuntzakomunitateko pertsonen eta kanpoko pertsonen partehartzea.

1. Ikastetxe publikoak, beren autonomia erabiliz, elkarlanean aritzen ahalko dira erretiroa hartutako irakasleekin, Hezkuntza Departamentuak gai horri buruz arau bidez ezarritakoaren arabera. Irakasleek, betiere, beren borondatez jardunen dute.

2. Ikastetxeak elkarlanean aritzen ahalko dira, halaber, hezkuntza-komunitateko edo kanpoko pertsonekin. Hori, foru dekretu honetan ezarritako autonomiaren edo Hezkuntza Departamentuak horretarako xedatutakoaren arabera. Pertsona horiek, betiere, beren borondatez jardunen dute.

Laugarren xedapen gehigarria. Helduentzako Oinarrizko Hezkuntzako ikasgelak.

Helduentzako Oinarrizko Hezkuntzako ikastetxerik ez dagoen eremu geografikoetan, Hezkuntza Departamentuak helduentzako Oinarrizko Hezkuntzako ikasgelak sortzen ahalko ditu.

Bosgarren xedapen gehigarria. Ikastetxe publikoen publizitatea eta hezkuntzaeskaintza.

Informazioa emate aldera, ikastetxe publikoen zerrenda eta haien hezkuntza-eskaintza argitaratuko dira, ikastetxeen erregistroaren arloan eskumena duen zuzendaritza nagusiaren ebazpenaren bidez.

Seigarren xedapen gehigarria. Nafarroako Dantza Eskola.

Nafarroako Dantza Eskolan, eskolaren antolaketari eta funtzionamenduari buruzko araudi espezifikoa prestatzen ez den bitartean, foru dekretu honetan xedatutakoa aplikatuko da.

Xedapen gehigarrietan zazpigarrena. Itunpeko ikastetxe pribatuak.

Foru dekretu honetan xedatutakoa subsidiarioki aplikatuko da itunpeko ikastetxe pribatuetan, baldin eta haien eskumenen esparrua urratzen ez badu.

Zortzigarren xedapen gehigarria. Hezkuntzako Ikuskapen Zerbitzua.

Hezkuntzako Ikuskapen Zerbitzuak foru dekretu honetan ezarritakoa betetzen dela zainduko du, bere eskumenen arabera eta dagozkion eginkizun eta eskudantziak betez.

Xedapen iragankor bakarra. Araudiaren aplikazioa.

1. 2025/2026 ikasturtean, foru dekretu hau indarrean jarri arte ikastetxeen funtzionamendu espezifikoan aplikatzen ari diren arauzko xedapenak beteko dira.

2. 2025/2026 ikasturteaz geroztik, ikasketen arau espezifikorik lantzen ez den bitartean, 2026/2027 ikasturtearen hasierara arte ikastetxeen funtzionamendu espezifikoan aplikatzen ari diren arauzko xedapenak beteko dira, baldin eta foru dekretu honetan ezarritakoaren aurkakoak ez badira.

Xedapen indargabetzaile bakarra

1. Indarrik gabe uzten da 24/1997 Foru Dekretua, otsailaren 10ekoa, Nafarroako Foru Komunitateko Haur Hezkuntzako Eskola Publikoetako, Lehen Hezkuntzako Ikastetxe Publikoetako eta Haur eta Lehen Hezkuntzako Ikastetxe Publikoetako Erregelamendu Organikoa onesten duena.

2. Indarrik gabe uzten da 257/1998 Foru Agindua, uztailaren 16koa, Hezkuntza eta Kulturako kontseilariak emana, Haur Hezkuntzako eskola publikoen, Lehen Hezkuntzako ikastetxe publikoen eta Haur eta Lehen Hezkuntzako ikastetxe publikoen Erregelamendu Organikoa garatzen duena.

3. Indarrik gabe uzten da 25/1997 Foru Dekretua, otsailaren 10ekoa, Nafarroako Foru Komunitateko lurraldean dauden Bigarren Hezkuntzako Institutuen Erregelamendu Organikoa onesten duena.

4. Indarrik gabe uzten da uztailaren 16ko 258/1998 Foru Dekretua, Hezkuntzako eta Kulturako kontseilariarena, Bigarren Hezkuntzako Institutuen Erregelamendu Organikoa garatzen duena.

5. Indarrik gabe uzten da 94/1993 Foru Dekretua, martxoaren 15ekoa, Nafarroako Foru Komunitateko Arte Ikasketetako ikastetxe publikoetako gobernu-organoak arautzen dituena.

6. Indarrik gabe uzten da 255/1999 Foru Dekretua, uztailaren 6koa, helduen Oinarrizko Hezkuntza arautu eta ikasketa horien egitura eta berariazko curriculuma ezartzen dituena Nafarroako Foru Komunitatean.

7. Indarrik gabe uzten da 256/1999 Foru Dekretua, uztailaren 6koa, Nafarroako Foru Komunitatean Helduen Oinarrizko Hezkuntzako ikasketak emanen dituzten ikastetxe publikoen sarea ezartzen duena.

8. Indarrik gabe uzten da 63/2006 Foru Dekretua, irailaren 4koa, Nafarroako Foru Komunitateko Lanbide Heziketako ikastetxe integratuak arautzen dituena.

9. Indarrik gabe uzten dira foru dekretu honetan ezarritakoari aurka egiten dioten maila bereko edo apalagoko xedapen guztiak.

Azken xedapenetako lehena. Uztailaren 3ko 80/2019 Foru Dekretua aldatzea. Foru Dekretu horren bidez, Nafarroako Foru Komunitateko ikastetxe publikoen sarea berrantolatu zen.

80/2019 Foru Dekretuaren 2. artikulua aldatzen da, eta testu hau izanen du:

"1. Nafarroako Gobernuaren eskumena izanen da ikastetxe publikoak sortu eta kentzea. Erabaki bidez eginen da hori, Hezkuntza Departamentuko kontseilariak proposatuta.

2. Ikastetxe publiko guztiak Hezkuntza Departamentuko ikastetxeen erregistroan erregistratuko dira, eta haien erregistro-idazpenak unibertsitateaz kanpoko ikastetxeen estatuko erregistrora bidaliko dira, arauetan ezarritako epean.

3. Artikulu honetan ezarritakoaren arabera sortutako ikastetxeak publikoak izanen dira, xede guztietarako, eta beren antolaketa eta funtzionamendua erregulatzen dituen araudian ezarritakoaren arabera arautuko dira.

4. Foru dekretuari gehitu zaion eranskineko ikastetxeen sarearen egituran edozein aldaketa egin nahi izanez gero, Nafarroako Gobernuko Hezkuntza Departamentuak administrazio-espedientea tramitatu beharko du. Aldaketatzat hartzen da ikastetxe berriak sortzea, ikastetxeen osaera aldatzea, ikastetxeak bateratzea, zenbait ikastetxe bakar batean integratzea eta, azkenik, ikastetxeen, lerroen eta hezkuntza-unitateen atxikipenak aldatzea.

5. Hezkuntza Departamentuko kontseilariari ahalmena ematen zaio honako hauek jasotzen dituen administrazio-espedientea izapidetu eta onesteko: ikastetxeen osaera aldatzea, ikastetxeak bateratzea, ikastetxeen eta hezkuntza-ildo eta -unitateen atxikipenak aldatzea edo antolaketaren beste edozein alderdi aldatzea, salbu ikastetxeak sortzeko edo kentzeko.".

Azken xedapenetako bigarrena. Maiatzaren 29ko 58/2024 Foru Dekretua aldatzea. Foru Dekretu horren bidez, Nafarroako Foru Komunitateko unibertsitateaz kanpoko ikastetxe publikoetako eskola jantokiak arautu ziren.

58/2024 Foru Dekretuaren 3. artikuluaren 3. apartatua aldatzen da -"Eskola-jantokien sailkapena-, eta testu hau izanen du:

"3. Foru dekretu honetan ezarritako ondorioetarako, Hezkuntza Departamentuak eskualdeko jantokitzat ematen ahalko ditu aurreko paragrafoan jasotako ezaugarriak betetzen ez dituztenak, baldin eta honako ezaugarri berezi hauetakoren bat betetzen duen ikastetxe batekoak badira:

a) Inguruko ikastetxean onartu ez diren ikasleak dituzten ikastetxeak.

b) Hizkuntza-ereduagatik lekualdatutako ikasleak dituzten ikastetxeak.

c) Hezkuntza Bereziko ikasgela espezifikoetara bideratutako ikasleak dituzten ikastetxeak.

d) Egoera sozioekonomiko ahulean dauden ikasleak dituzten ikastetxeak.

e) Despopulatze-arrisku handi eta larrian dauden herrietako ikastetxeak, despopulatzearen arloan eskumena duen zuzendaritza nagusiak horri buruz ezarritakoaren arabera.

f) Haur Hezkuntzako lehen zikloa ematen duten ikastetxeak.".

Azken xedapenetako hirugarrena. Martxoaren 26ko 28/2007 Foru Dekretua aldatzea. Foru Dekretu horren bidez ezarri ziren Nafarroako Foru Komunitatean Haur Hezkuntzako lehen zikloa arautu eta hori ematen duten ikastetxeek bete beharreko baldintzak eta ziklo horren hezkuntza edukiak.

1. 4 bis apartatua gehitzen da 28/2007 Foru Dekretuaren 16. artikuluan -"Baldintza fisikoak"-, eta testu hau izanen du:

"4 bis. Haur Hezkuntzako lehen zikloa Haur eta/edo Lehen Hezkuntzako ikastetxe batean ematen bada, Haur Hezkuntzako lehen zikloko ikasleek ikastetxeko sarbideak eta beste gune batzuk erabiltzen ahalko dituzte. Gune horiek lehen zikloko ikasleek erabili ohi badituzte, indarrean dagoen segurtasun-araudia betetzen dela ziurtatu beharko dute.".

2. 5. apartatua gehitzen da 28/2007 Foru Dekretuaren 18. artikuluan -"Ratioak"-, eta testu hau izanen du:

"5. Haur Hezkuntzako lehen zikloa ematen duten Haur eta/edo Lehen Hezkuntzako ikastetxeetan, aurreko atalean jasotakoaz gain, Haur Hezkuntzako adin desberdinetako haurrak unitate berean elkartzen ahalko dira, ratio hauen arabera:

a) 1, 2 eta 3 urteko haurrendako unitateak: 12.

b) 2-3 urteko haurrendako unitateak: 14.

c) 2 urtetik gorako haurrentzako unitateak, aurrekoak ez bezalako adin-tarteetakoak: 12".

Azken xedapenetako laugarrena. Araugarapena.

Ahalmena ematen zaio Hezkuntzako kontseilariari foru dekretu honetan ezarritakoa betearazi eta garatzeko behar diren xedapen guztiak eman ditzan.

Azken xedapenetako bosgarrena. Indarra hartzea eta aplikagarritasuna.

1. Foru dekretu honek Nafarroako Aldizkari Ofizialean argitaratu eta biharamunean hartuko du indarra.

2. Foru dekretu honetan araututakoak 2026/2027 ikasturtetik aurrera izanen du eragina, honako hauek izan ezik: xedapen gehigarriak, xedapen iragankor bakarra, xedapen indargabetzaile bakarra eta azken xedapenak. Horiek dekretua indarrean jartzen denetik aurrera izanen dute eragina.

Gobierno de Navarra

Contacte con nosotros | Accesibilidad | Aviso legal | Mapa web