17. artikulua. Konpromisohitzarmena.
18. artikulua. Boluntario izateko debekua zigoraurrekariak dituzten pertsonentzat.
19. artikulua. Harremana amaitzea.
20. artikulua. Gatazkak konpontzeko bitartekaritza.

IV. KAPITULUA. JARDUN BOLUNTARIOAREN HARTZAILEAK

21. artikulua. Kontzeptua.
22. artikulua. Jardun boluntarioaren hartzaileen eskubideak.
23. artikulua. Jardun boluntarioaren hartzaileen betebeharrak.

IV. TITULUA. NAFARROAKO ADMINISTRAZIO PUBLIKOEN BOLUNTARIOTZAREN ARLOKO EGINKIZUNAK

I. KAPITULUA. NAFARROAKO FORU KOMUNITATEKO ADMINISTRAZIOA

24. artikulua. Eginkizunak.
25. artikulua. Boluntariotzari laguntzeko tresnak.
26. artikulua. Boluntariotzaren Mahai Teknikoa.

II. KAPITULUA. NAFARROAKO TOKIENTITATEAK

27. artikulua. Tokientitateen eginkizunak.

V. TITULUA. HEZKUNTZA SISTEMA ETA BOLUNTARIOTZA

28. artikulua. Unibertsitatez kanpoko hezkuntzasisteman boluntariotza sustatzea.
29. artikulua. Unibertsitateko hezkuntzasisteman boluntariotza sustatzea.

VI. TITULUA. BOLUNTARIOTZA PLANIFIKATU ETA SUSTATZEKO TRESNAK

I. KAPITULUA. NAFARROAKO BOLUNTARIOTZAREN PLANA

30. artikulua. Nafarroako Boluntariotzaren Plana.
31. artikulua. Nafarroako Boluntariotzaren Plana egitea eta onestea.

II. KAPITULUA. AITORTZAK ETA IDENTIFIKAZIOAKREDITAZIOAK

32. artikulua. Nafarroako boluntarioaren saria.
33. artikulua. Beste aitortza eta ekimen batzuk.
34. artikulua. Gaitasunak aitortzea.
35. artikulua. Identifikazioakreditazioa.

III. KAPITULUA. PRESTAKUNTZA

36. artikulua. Boluntarioen prestakuntzaplana.
37. artikulua. Nafarroako Jardun Boluntarioaren Eskola.

IV. KAPITULUA. BOLUNTARIOTZAENTITATEEN ARTEKO ALIANTZAK

38. artikulua. Boluntariotzaentitateen plataformak.
39. artikulua. Nafarroako Boluntariotzaren Sarea.

V. KAPITULUA. BOLUNTARIOTZAENTITATEEN ERREGISTROA

40. artikulua. Boluntariotzaentitateen erregistroa.

VI. KAPITULUA. ENPRESEK BOLUNTARIOTZA SUSTATZEA

41. artikulua. Boluntariotza korporatiboa.

VII. TITULUA. PARTEHARTZEA

42. artikulua. Nafarroako Boluntariotzaren Kontseilua.
43. artikulua. Osaera.
Lehenengo xedapen gehigarria. Babes zibilaren arloko boluntariotza.
Bigarren xedapen gehigarria. Boluntarioei aitortza publikoak egitea.
Lehenengo xedapen iragankorra. Boluntariotzaren arloko entitateen betebeharrak.
Bigarren xedapen iragankorra. Boluntariotzaren arloko entitateen erregistroa.
Xedapen indargabetzaile bakarra. Arauak indargabetzea.
Azken xedapenetako lehenengoa. Arauak emateko gaikuntza.
Azken xedapenetako bigarrena. Indarra hartzea.

HITZAURREA

Nafarroako Foru Komunitatean ohitura errotua da pertsona batzuek beste batzuen edo komunitatearen mesedetan jardutea.

Alde horretatik, auzolana edo artelana ekartzen ahal dugu gogora, adibidez, komunitatearen onerako egiten den lan hori, zeina, usadioaren arabera, komunitatearentzat onak diren eta, hein batean bada ere, herri bateko bizilagunek beraiek egiten ahal dituzten zenbait zeregini heltzeko beharrak sortutakoa baita. Auzolana komunitatetik bertatik sortu zen, eta tokian tokiko ohiturek arautu zuten, baina lege testuetan ere jasoa izan da gerora.

Espainiako Konstituzioaren 9.2 artikuluan jasotzen denez, botere publikoen betebeharra da norbanakoen nahiz haiek partaide diren taldeen askatasuna eta berdintasuna bene-benetakoak izateko baldintza egokiak sustatzea, askatasun- eta berdintasun-xede hori galarazten edo osotara garatzea zailtzen duten oztopoak kentzea, eta herritar guztiei aukera egokiak ematea bizitza politiko, ekonomiko, kultural eta sozialean parte hartzeko.

Europako 1961eko Gutun Sozialak eta Nazio Batuen Batzar Orokorrak 1986ko otsailean onetsitako Ebazpenak nabarmentzen dute garrantzitsua dela bultzatzea herritarrek borondatezko zerbitzuen bidez parte hartzea gizartean eta parte-hartze horri aitortza ematea, gizarte inklusiboagoak eta justuagoak lortzeko funtsezko elementua delakoan.

Aurreko guztiarekin lotuta, Europako Kontseiluak eta Europako Parlamentuak, ebazpen eta gomendioen bitartez, neurri orokor batzuk taxutu dituzte herritarrak sentsibilizatzeko bai gizartearen arazoez bai borondatezko lanek arazo horiek konpontzeko egiten ahal duten ekarpenaz, aisialdia modu eraikitzailean erabiliz eta ekintza sozialean parte hartuz egin ere. Arlo horretan, azpimarratzekoak dira zenbait ekimen, Europako Elkartasun Kidegoa edo UN Volunteers, esate baterako, nazioz gaindiko instituzioek jardun boluntarioaren sustapenarekin duten konpromisoa erakusten dutenak.

Gaur egun, Estatu mailan, Boluntzariotzari buruzko urriaren 14ko 45/2015 Legean dago araututa boluntariotza. Arau horrek, azken xedapenetako bigarrenean, ezartzen du berau aplikatuko dela ukatu gabe autonomia-erkidegoek beren autonomia-estatutuetan eta legeria espezifikoan boluntariotzaren arloan esleituta dituzten eskumenak.

Nafarroako Foru Eraentza Berrezarri eta Hobetzeari buruzko Lege Organikoak berritu ditu Nafarroako eskumen historikoak, Nafarroako gizartearentzat kezka iturri diren alderdi guztiei eragiten dietenak. Horien artean dago herritarrek Foru Komunitatean ongizatea lortzeko parte hartzeari buruzko eskumena, legegintzakoa eta antolamendukoa, eta, zehazki, garapen komunitarioaren arloko eskumena, 44. artikuluaren 18 apartatuan jasota dagoena.

Nafarroako Foru Komunitateak boluntariotzari buruzko araudi zehatza du, Nafarroako Bolondres lanari buruzko martxoaren 27ko 2/1998 Foru Legea onetsi zenetik.

27 urte baino gehiago iragan dira arau hori onetsi zenetik; izan ere, foru-legearen atarikoan berariaz jasotzen denez, Nafarroako 1997-2000 aldirako Plan Gerontologikoan izan zuen abiapuntua.

Ordutik hona, aldaketa handiak gertatu dira, eta, zenbait balio mantendu egin badira ere -boluntariotzaren garrantzia, adibidez-, beste batzuk eraldatuz joan dira gizartearen erritmo berean. Sakoneko eraldaketak bizi izan ditugu, herritarrek parte hartzeko moduetan nahiz konpromiso solidarioaren ideian berean. Errealitate horren aurrean, ezinbestekoa da lege-esparrua berritu eta eguneratzea, oraingo garaietako eskakizunetara eta errealitateetara egokitzeko.

Gaur egun, boluntariotza askotarikoa da, bere esparruei dagokienez, boluntariotza-entitate motei dagokienez, bai eta boluntarioak jardun boluntarioan aritzera bultzatzen dituzten arrazoiei dagokienez ere. Boluntariotza-mota egoki bat dago pertsona bakoitzarentzat. Foru-lege honek, aniztasun hori jaso eta aitortzen baitu, aurreikusten du boluntariotza iraunkorrak, boluntariotza puntualak eta mikroboluntariotzak egoten ahal direla, eta jardun boluntarioa modu presentzialean, digitalean edo birtualean egiteko aukera ere aurreikusten du. Ekintza komunitarioaren esparruak arautzean ere hartzen du kontuan aniztasun hori.

Beste alde batetik, jardun boluntarioaren onuradunak izan ohi diren zenbait kolektibok ekarpen aktiboa egiten diote gaur egun boluntariotzari, haiek ere boluntario gisa jardunez. Desgaitasuna duten pertsonez, haur-nerabeez eta adinekoez ari gara, besteak beste.

Arauak genero-ikuspegia ere aintzat hartzen du, eta emakumeen eta gizonen arteko aukera-berdintasuna jasotzen du jardun boluntarioaren esparru orotan, arreta emanda emakumeen ahalduntzeari eta parte-hartze sozialari.

Boluntariotzan aritzeko moduak ere aldatu dira: ohikoari, hots, fisiko edo presentzialari, bitarteko digitalak erabiliz egiten dena batu zaio orain, presentzialtasuna beharrezkoa izan gabe egiten dena alegia.

Boluntariotza mesedegarria da jasotzen duenarentzat, baina, horrez gain, boluntarioa eraldatzen du eta, finean, gizarte osoaren zimendu etiko eta komunitarioak sendotzen ditu.

Beste alde batetik, boluntariotza-eragileak ikusarazi behar dira, eta sarean lan egitearen garrantzia nabarmendu beharra dago. Horrela, arauaren helburua da sektoreen arteko lotura bermatzea, aliantzak sustatuz boluntariotza-entitateen, boluntarioen, administrazio publikoen eta enpresen artean, sinergiak bilatzeko eta boluntariotza indartzeko, Boluntariotzaren Nafarroako Sarea deritzonaren baitan.

Hori horrela, beharrezkoa da balioa ematea boluntariotza-eragileei eta argi arautzea haien eskubideak eta betebeharrak.

Boluntariotzak balio handia du, herritarren parte-hartze aktiborako bitartekoa eta aldaketa sozialerako eragilea den aldetik. Boluntariotzaren inguruan gizakien arteko hartu-emanak sortzen dira, konfiantzakoak, eta kalitatezkotzat jo ditzakegunak. Horregatik, boluntariotza bizi-kalitaterako bektore bat izaten ahal da nafar gizartearentzat. Horrenbestez, Nafarroan boluntariotza bultzatu, ikusarazi, sendotu eta garatu behar da, eta foru-lege honen norabidea da behar horiei erantzuna ematea, gizartetik bertatik sortzen den boluntariotzaren ernamuina errespetatuz betiere, eta Nafarroako administrazio publikoak hazi horren lagungarri izanez. Arauaren helburua da, hortaz, konpromiso solidarioa sendotzea ongizate kolektiboa lortzeko xedez, talde sozial bakoitzaren berezitasunak kontuan hartuta.

Boluntariotzaren beste alderdi garrantzitsu bat da Nafarroako herriak bizirik mantentzen laguntzen duen jarduera bat dela; ekintza komunitarioa tokiko eremuan nahitaezkoa da komunitate-harremanak eta kidetze-sentimendua sortzeko, eta, gainera, landa-eremuan bizi-kalitatea hobetzen laguntzen du.

Horregatik guztiagatik, lege hau onestea justifikatuta dago boluntariotzaren jarduna eguneratzeak eta aitortzeak berebiziko garrantzia dutelako, hura gizarte-ongizatea, komunitatearen kohesioa eta giza garapen integrala sustatzeko tresna den aldetik.

Nafarroako Boluntariotzaren III. Planak (2024-2027), hasiera-hasieratik boluntariotza-entitateen, boluntarioen eta administrazio publikoen partaidetzarekin prestatu zenak, arau-esparruaren berrikuspena jasotzen du bere konpromisoen artean, zeharkakotasunezko ildo gisa. Zehazki, ekintzetako bat da Nafarroako Bolondres lanari buruzko martxoaren 27ko 2/1998 Foru Legea berrikusi eta eguneratzea. Hala, Nafarroako boluntariotza-eragileen konpromiso bat da arau berri hau izatea, Nafarroako boluntariotza arautzen duena.

Foru-lege hau partaidetza prozesu zabal baten bidez prestatu da, boluntariotzarekin lotura duten pertsona eta entitate guztiek beren legea dela sentitu dezaten eta boluntariotza-eragile guztiak ordezkatzen dituen arau erabilgarria izan dadin.

Alde horretatik, aldez aurreko jendaurreko kontsultaren eta herritarren partaidetzaren tramite guztiak bete dira, "Parte hartu, Nafarroa!" atalean argitaratu baita. Horrez gain, parte hartzeko 9 saio presentzial egin dira, lurraldekoak nahiz sektorialak. Azkenik, Nafarroako Boluntariotzaren Kontseiluak testuaren aldeko txostena eman du.

Foru-lege honen I. tituluaren helburu nagusia da foru-legearen xedea eta haren aplikazio-eremu subjektiboa eta lurralde-eremua ezartzea.

II. tituluan, jardun boluntarioaren kontzeptua arautzen da. Bertan ezartzen dira, halaber, jardun boluntarioaren printzipioak, bai eta jardun boluntario horren esparruak ere, zenbait eremu hartzen dituztenak, boluntariotza sozialetik harago, ahalik eta esparru zabalena izateko, eta esparru itxia izan gabe edonola ere.

III. tituluan jasotzen da jardun boluntarioaren subjektuen estatututzat jotzen ahal dena; horrela, boluntarioen, boluntariotza-entitateen eta jardun boluntarioaren onuradunen kontzeptuak eta eskubideak eta betebeharrak arautzen dira. Boluntarioei dagokienez, nabarmendu behar da arautzen direla, batetik, boluntariotza eta adingabeak eta, bestetik, jardun boluntarioarekin bateraezinak diren zenbait ekintza. Boluntariotza-entitateei dagokienez, arautzen dira, halaber, ekintza-plana, koordinatzailearen figura eta boluntarioekin izanen duen harremana eta, zehazki, konpromiso-hitzarmena, jardun boluntarioan aritzeko debekuak, harremanaren bukaera eta bitartekaritza.

IV. tituluak honako hauek arautzen ditu: Nafarroako Foru Komunitateko Administrazioaren eginkizunak, mahai tekniko baten eraketa eta Nafarroako toki-entitateen eginkizunak.

V. tituluan, boluntariotzarako garrantzitsua den gai bat arautzen da: hezkuntza-sisteman presentzia izatea eta sustatzea, bai unibertsitatekoan bai unibertsitatez kanpokoan. Erabakigarria da boluntariotza haurtzarotik bertatik sustatzea, orain eta etorkizunean ere komunitatearen eta gizateriaren ongizatearekin konprometituagoa egonen den gizarte bat sortu ahal izateko.

VI. tituluan biltzen dira, halaber, boluntariotzarako funtsezkoak diren beste elementu batzuk, hala nola plangintza eta sustapena. Titulu horretan garrantzizko tresna batzuk jasotzen dira, hala nola Boluntariotza Plana; Boluntariotzaren Nafarroako Sarea; aitortzak, boluntariotza sustatzeko eta ikusarazteko bide gisa; identifikazioaren akreditazioa; prestakuntza, boluntariotza-eskola zehazki; aliantzak; boluntariotza-entitateen erregistroa, eta, azkenik, boluntariotza korporatiboa.

Bukatzeko, VII. tituluak Nafarroako Boluntariotzaren Kontseilua arautzen du, boluntariotzaren gaietarako kontsulta- eta partaidetza-organoa.

Foru-legeak bi xedapen gehigarri, bi xedapen iragankor, xedapen indargabetzaile bakar bat eta bi azken xedapen ditu.

I. TITULUA. ALDERDI OROKORRAK

1. artikulua. Xedea.

Foru-lege honen xedea da:

a) Jardun boluntarioa definitzea.

b) Boluntarioen, boluntariotza-entitateen eta jardun boluntarioaren hartzaileen eskubideen eta betebeharren araudia ezartzea.

c) Boluntariotzaren arloko Nafarroako eragileen lankidetza eta koordinazioa sustatzea gizarte-eraldaketarako sareak sortuz.

d) Nafarroako administrazio publikoek boluntariotzaren sustapenaren eta bultzadaren alorrean dituzten jarduna eta eginkizunak antolatzea.

2. artikulua. Aplikazioeremu subjektiboa.

1. Foru-lege hau Nafarroako boluntariotza-eragileei aplikatuko zaie.

2. Foru-lege honen ondorioetarako, honako hauek jotzen dira boluntariotza-eragiletzat:

a) Boluntariotza-entitateak.

b) Boluntarioak.

c) Jardun boluntarioaren hartzaileak.

d) Nafarroako administrazio publikoak.

e) Aurreko letretan aurreikusi gabeko beste pertsona eta entitate batzuk, baldin eta boluntariotza-entitateen bidez ekintza boluntarioak bultzatzen edo sustatzen badituzte edo, oro har, boluntariotza sustatzen laguntzen badute.

3. artikulua. Aplikatzeko lurraldeeremua.

Foru-lege hau jardun boluntario osoari aplikatuko zaio, baldin eta jarduera, onura edo programa Nafarroako Foru Komunitateko lurraldean gauzatzen bada, edozein izanda ere entitateen titulartasuna edo egoitza soziala duten lekua. Baita Nafarroatik sustaturikoak diren nazioarteko eta/edo kanpo-boluntariotzako programei ere.

II. TITULUA. JARDUN BOLUNTARIOA

4. artikulua. Jardun boluntarioaren kontzeptua.

1. Foru-lege honen ondorioetarako, jardun boluntarioa pertsona fisikoek gauzatzen duten prestazio aske, arduratsu, altruista eta solidarioa da, ordaindu gabekoa, legezko betebeharren ondorioa ez dena eta interes orokorreko helburuak lortzen laguntzen duena.

2. Jardun boluntarioa boluntarioek betetzen dute boluntariotza-entitateen bitartez, haien boluntariotza-plan edo -programen barruan, eta aukera dago modu presentzialean edo birtualean egiteko, iraunkortasunez edo puntualki.

3. Jardun boluntarioaren kontzeptutik kanpo geratzen dira honako hauek: ordaindutako lana, lege- edo kontratu-egoeren ondoriozko betebeharrak, eta helburu pertsonalekin edo irabazizko helburuekin egindakoak.

5. artikulua. Jardun boluntarioaren printzipioak.

Boluntariotza-eragileek printzipio hauen arabera garatuko dute boluntariotzaren eremuko beren jarduera:

a) Norbere borondatez jardutea, bai boluntarioek bai jardun boluntarioaren hartzaileek askatasunez onartuta jarduera.

b) Doakotasuna; bermatzen dena jardunaren bidez irabazi ekonomiko pertsonalik lortu nahi ez delako eta halakorik sortzen ez delako. Horrela, bermatuko da jarduna desinteresatua eta altruista dela, eta jardun boluntarioaren hartzaileak ez duela kontraprestaziorik emanen.

c) Berdintasuna, begirune ideologikoa, pertsonak ez diskriminatzea, emakumeen eta gizonen arteko aukera-berdintasuna eta genero-ikuspegia, jardun-esparru guztietan.

d) Inklusioa; desgaitasuna duten pertsonek, adinekoek, migratzaileek, adingabeek eta beste kolektibo zaurgarri edo ordezkaritza txikiko batzuek boluntario gisa parte har dezaten sustatuz.

e) Parte-hartze arduratsu eta demokratikoa; gobernu-, erabaki- eta hausnarketa-prozesu inklusibo eta ordezkagarrien bidez bermatua, kontuan hartuta emakumeen ahalduntzea eta partaidetza soziala.

f) Elkartasuna, konpromiso soziala eta komunitate-sustapen eta -garapena, jardun boluntarioak berezko duena.

g) Autonomia, zeinak, guztien ongiaren erantzukizun kolektiboaren esparruan, aitortzen baitu pertsonek eta entitateek beren jarduerak gauzatzean erabaki independenteak sortzeko eta hartzeko gaitasuna dutela.

h) Boluntariotza-eragile guztien arteko osagarritasuna, sare-lanaren bidez guztien ongia lortzeko bidean.

i) Ekintzaren jasangarritasuna eta efizientzia; eragin positiboa eta iraunkorra izan dezan, bai pertsonengan, bai gizartean, eta, bereziki, ingurumenean.

j) Gardentasuna, beren jarduerei, baliabideei eta kudeaketari buruzko informazio argia eta eskuragarria emanez boluntarioei eta, oro har, gizarteari.

k) Intimitatea eta datu pertsonalen pribatutasuna errespetatzea, lortu nahi diren interes orokorreko helburuak erdiesteko behar den errespetu- eta konfiantza-giroa sortzeko.

l) Jardun boluntarioaren plangintza eta koordinazioa.

m) Irisgarritasuna, beharrezko tresna den aldetik aukera-berdintasuna, autonomia pertsonalaren sustapena, komunitate-inklusioa eta bizitza beregaina bermatzeko pertsona guztientzat.

6. artikulua. Jardun boluntarioaren esparruak.

1. Jardun boluntarioa gauzatzen da guztien ongia sustatzen laguntzen duten interes orokorreko esparruetan.

2. Zehazki, jardun boluntarioaren berezko esparruak izanen dira, besteak beste, honako hauek:

a) Soziala, soziosanitarioa, sanitarioa eta osasunekoa.

b) Hezkuntza eta prestakuntza.

c) Landa- eta toki-garapena eta -integrazioa.

d) Kultura eta ondare historiko eta artistikoaren babesa eta zaintza.

e) Aisialdia.

f) Kirola eta jarduera fisikoa.

g) Nazioarteko boluntariotza, garapenerako lankidetza eta elkartasun globala.

h) Ingurumenaren zaintza, jasangarritasuna eta animalien babesa.

i) Berdintasuna, nortasunarekiko errespetua eta aniztasuna.

j) Baldintza sozioekonomikoen eta gizarte-kohesioaren hobekuntza.

k) Herritarren parte-hartzea eta komunitate- edo auzokide-jarduerak.

l) Desgaitasuna eta inklusiorako laguntza.

m) Gizarteratzea, gizarteratzea eta laneratzea, eta zaurgarritasun egoerak.

n) Babes zibila eta larrialdiak.

3. Jardun boluntarioaren esparru izaten ahal dira aipatutako esparruen antzekoak edo horiekiko aldiberekoak diren beste edozein.

III. TITULUA. JARDUN BOLUNTARIOAREN SUBJEKTUAK

I. KAPITULUA. BOLUNTARIOA

7. artikulua. Kontzeptua.

1. Boluntarioa da modu libre, altruista eta solidarioan interes orokorreko jardueretan parte hartzea erabakitzen duen pertsona fisikoa. Jarduera horiek boluntariotza-entitateen bidez antolatzen dira, hirugarren pertsonen edo gizarte osoaren mesedetan.

2. Boluntarioak gaitasun osoarekin eta erabakitzeko askatasunarekin jardunen du, eta behar den arduraz zainduko ditu jarduna eta hartzaileak, foru-lege honetan adierazitako printzipio, eskubide eta betebeharren arabera; halaber, bere lankidetza formalizatuko du boluntariotza-entitatearekin konpromiso-hitzarmen bat izenpetuz.

8. artikulua. Boluntarioen eskubideak.

Boluntarioek eskubide hauek izanen dituzte:

a) Beren askatasuna, duintasuna, intimitatea eta sinesmenak errespetatuak izateko eskubidea, bai eta berdintasunez eta diskriminaziorik gabe edo beren eskubideei kalterik egin gabe tratatuak izateko eskubidea ere.

b) Lotura askatasunez eta modu itunduan eta integratzailean egiteko eskubidea, baldintzak, denbora, esparrua eta hura gauzatzeko beharrezkoak diren gainerako inguruabarrak adostuta.

c) Zer boluntariotza-entitatetako kide izan nahi duten, horren helburuari, antolaketari, nortasunari eta funtzionamenduari buruzko informazio guztia biltzen duen konpromiso-hitzarmen bat sinatzeko eskubidea. Ez da konpromiso-hitzarmenik izenpetuko 17. artikuluaren 3. apartatuan ezarritako kasuetan.

d) Beren funtzioei dagozkien berezitasun tekniko, etiko eta operatiboei heltzeko diseinatutako prestakuntza -hasierakoa zein jarraitua- jasotzeko eskubidea, beren jardunaren kalitatea eta eraginkortasuna babesteko prestakuntza integrala bermatze aldera.

e) Jarduna segurtasun-, osasun- eta higiene-baldintzetan egiteko eskubidea, haren izaeraren eta ezaugarrien arabera. Behar diren informazioa, bitartekoak eta laguntza jasotzeko eskubidea, prozesu horietan parte hartuz, jarduera eta programa espezifikoak ahalik eta eraginkortasun handienez egiteko.

f) Programa edo jarduera aldatzeko edo konpromiso-hitzarmenean ezarritako baldintzak aldatzeko eskubidea, modu adostuan aldatuz horiek betiere.

g) Jarduerak eta programak diseinatzeko, planifikatzeko, gauzatzeko eta ebaluatzeko prozesuetan aktiboki parte hartzeko eskubidea, iradokizunak eta kexak aurkezteko bideak barne, jardunak ahalbidetzen duen neurrian erantzukidetasuna sustatzeko.

h) Aitortza formala jasotzeko eskubidea, eta hura egiaztatua izatekoa identifikazio egokiz eta ziurtagiriak emanez, zeinetan adieraziko baitira gauzatutako jardun boluntarioaren iraupena eta hartan izandako eginkizunak eta landutako gaitasunak, bai eta eskuratutako esperientzia ere, jardun boluntarioaren balio soziala eta profesionala aitortzeko eta finkatzeko helburuaz.

i) Arriskuen estaldurarako eskubidea, legez eskatutako kasuetan jardun boluntarioaren ondoriozko istripuak eta erantzukizun zibila estaltzen dituzten aseguru-polizen edo finantza-bermeen bidez, jarduerak egin bitartean boluntarioak babeste aldera.

j) Jardun boluntarioak eragindako gastuak ordainduak izateko eskubidea, konpromiso-hitzarmenarekin bat.

k) Beren datu pertsonalak babestuak izateko eskubidea.

l) Jarduna beren borondatez eta hertsadurarik gabe egiteko eskubidea.

m) Parte hartzeari askatasunez uko egiteko eskubidea, egoera horrek hartzaileengan edo programaren garapenean eragin negatiborik izan ez dezan saiatuz.

n) Jarduna tresna digitalen bidez egiteko eskubidea, haren izaerak hala eskatzen badu edo horretarako aukera ematen badu, boluntarioen eta hartzailearen integrazio digitala errazteko.

ñ) Gizartearen eta entitatearen aldetik aitortza jasotzeko eskubidea, parte-hartzean erakutsitako balio eta konpromiso solidario eta altruistagatik.

o) Foru-lege honek edo aplikagarri den araudiak aitortzen dien beste edozein eskubide.

9. artikulua. Boluntarioen betebeharrak.

Boluntarioek betebehar hauek izanen dituzte:

a) Hartzaileen eskubideak errespetatzea, jasotako informazioaren konfidentzialtasuna eta, hala badagokio, izaera erreserbatua zainduz.

b) Konpromiso-hitzarmenean hartutako konpromisoak betetzea, egiten duten jardunaren bidez entitatearen helburuak eta parte hartzen duten boluntariotza-programaren helburuak betetzen laguntzeko.

c) Behar den arduraz jardutea, jardun boluntarioaren berezko balioak errespetatuz.

d) Beren jardun boluntarioagatik kontraprestazio ekonomiko edo materialen bat eskainiko balitzaie, horri uko egitea, ohiko, gizarteko eta kortesiazko usadioak alde batera utzita.

e) Boluntariotza-entitatearen barne-funtzionamenduko arauak betetzea, bai eta, hala badagokio, jardueren xederako egokiak diren aginduak eta jarraibideak ere.

f) Entitatearekin lankidetzan aritzea jardueren plangintzan, garapenean eta ebaluazioan, arduradunen jarraibideak errespetatuz.

g) Araudiak eskatzen duen prestakuntza orokorra jasotzea eta arduraz parte hartzea beren gaitasunak hobetze eta programak eta ekintzak behar bezala garatze aldera entitateak antolatzen dituen prestakuntza-jardueretan.

h) Boluntario-akreditazioa eta entitateak haren esku jartzen dituen baliabideak eta bitartekoak egoki eta zentzuz erabiltzea.

i) Jarduera uzteko erabakiaren berri ematea entitateari behar besteko aurrerapenaz, eta ahalegina egitea erabaki horrek ondorio negatiborik izan ez dezan hartzaileengan eta garatzen ari den programan.

j) Jardun boluntarioaren garapenari eragiten dion edo hartzaileak edo entitatea arriskuan jartzen ahal dituen edozein gorabeheraren berri ematea, eta, bereziki, ordenamendu juridikoa urratzen duen edozein egoeraren berri ematea, eta, kasua bada, dagokien agintariei jakinaraztea.

k) Portaera kooperatiboa eta begirunezkoa izatea pertsona eta erakunde guztiekiko, eta ez izatea diskriminazioa, abusua, indarkeria edo jazarpena dakarren jokabiderik.

l) Foru-lege honetan edo aplikatzekoa den araudian ezarritakoak dakartzan gainerako betebeharrak betetzea.

10. artikulua. Jardun boluntarioaren bateragarritasuna eta gauzatzea.

1. Boluntariotza-jarduerak egitea ezin izanen da izan lanpostuak desagerraraztea justifikatzeko arrazoi.

2. Jardun boluntarioak ez ditu ordeztuko administrazio publikoek eta haien enplegatuek zerbitzu publikoak ematean dituzten betebeharrak eta eginkizunak.

3. Besteren kontura lan egiten dutenek lanalditik kanpo bakarrik egiten ahalko dituzte boluntariotza-jarduerak.

4. Boluntariotza-entitatean bertan besteren kontura egiten den lana bateragarria izanen da jardun boluntarioarekin, baldin eta jardun hori lanalditik kanpo eta entitatean egiten direnez bestelako funtzioekin egiten bada.

5. Boluntario-izaera bateragarria da boluntariotza hori gauzatzen duen boluntariotza-entitateko bazkide izatearekin eta haren gobernu-organoetan parte hartzearekin, baldin eta hori bat badator entitatearen estatutuekin.

11. artikulua. Adingabeak eta boluntarioak.

1. Adingabeek boluntariotza-jardueretan parte hartzen ahalko dute beren heldutasunaren eta jardun boluntarioaren edukiaren arabera.

2. 16 urte baino gehiago eta 18 baino gutxiago dituztenek askatasunez ematen ahalko dute boluntariotza-jarduerak egiteko beren baimena.

3. 12 urte baino gehiago eta 16 baino gutxiago dituztenek boluntariotza-jarduerak egiten ahalko dituzte baldin eta jarduera horiek ez badiete kalterik egiten haien garapenari, prestakuntza integralari eta eskolatzeari, edo ez badakarte arriskurik haien segurtasunerako, eta, betiere, gurasoen, tutoreen edo legezko ordezkarien berariazko baimenarekin.

4. Entitate antolatzaileek adingabeentzat segurua eta babestua den ingurune bat bermatuko dute, gainbegiratze eta laguntza egokiarekin, zeinetan haien prestakuntza sustatuko den, eta modu sinesgarri eta arrazoituan baloratuko dute jardueraren egokitasuna.

II. KAPITULUA. BOLUNTARIOTZA-ENTITATEAK

12. artikulua. Kontzeptua.

1. Boluntariotza-entitateak nortasun juridikoa duten irabazi asmorik gabeko entitateak dira, interes orokorreko edo guztien onerako jarduerak egiten dituzte, eta boluntarioek parte hartzen dute haietan.

2. Boluntariotza-entitateek honako hauek bete beharko dituzte:

a) Legez eratuta egotea.

b) Nortasun juridikoa duten irabazi asmorik gabeko entitateen erregistro ofizialen batean inskribatuta egotea, salbu eta, haien izaera dela-eta, halakorik eskatu behar ez bazaie.

c) Boluntariotza-ekintzak egitea boluntarioekin, horrek galarazi gabe soldatapeko langileak izatea, entitatearen funtzionamendurako behar direnak.

d) Jardun boluntarioaren plan bat onartu eta garatzea.

3. Boluntariotza-entitatetzat hartuko dira estatuko, autonomia-erkidegoko, tokiko edo Europar Batasuneko mailan legez eratutako boluntariotza-entitate, federazio, konfederazio edo entitate-elkarte guztiak.

13. artikulua. Boluntariotzaentitateen eskubideak.

Boluntariotza-entitateek honako eskubide hauek dituzte:

a) Beren boluntariotza-programak diseinatzeko, boluntarioak kudeatzeko, barne-egiturak ezartzeko eta beren baliabideen kudeaketari buruz erabakitzeko eskubidea.

b) Jardun boluntariorako pertsonak hautatzeko eskubidea, bai eta boluntarioekiko harremana amaitzekoa ere 19. artikuluan xedatutako arrazoi justifikatuak gertatzen badira.

c) Jardun boluntarioaren arloko politika publikoak diseinatzean, gauzatzean eta ebaluatzean zuzenean edo zeharka parte hartzeko eskubidea.

d) Administrazio publikoei beren jarduerak behar bezala gauzatzeko informazioa, orientazioa eta laguntza eskatzeko eta hura eskuratzeko eskubidea, bai eta dirulaguntzen deialdietan eta bestelako laguntza publiko eta pribatuetan parte hartzekoa eta legeria espezifikoan ezartzen diren zerga-pizgarrien onuradun izatekoa ere.

e) Guztien ongiaren sustapenean funtsezko eragile gisa publikoki aitortuak izateko eskubidea. Eskubide horrek barne hartzen du haien lana eta balioak ikusaraztea ahalbidetzen duten hedapen-mekanismoetara irispidea izatea.

f) Foru-lege honek edo aplikatzekoa den araudiak aitortzen dien beste edozein eskubide.

14. artikulua. Boluntariotzaentitateen betebeharrak.

1. Boluntariotza-entitateek honako betebehar hauek dituzte boluntarioekiko, haiekin boluntariotza-harremana dutenean:

a) Haien askatasuna eta autonomia errespetatzea, programen diseinuan eta gauzatzean haien parte-hartzea inklusiboa eta aktiboa izanen dela ziurtatuz, haien iritziak errespetatuz eta erabakiak hartzeko prozesuetan inplika daitezen sustatuz.

b) Dagokion idatzizko konpromiso-hitzarmena izenpetzea, salbu eta 17. artikuluaren 3. apartatuan ezarritako kasuan.

c) Hasierako eta etengabeko prestakuntza bermatzea, jarduerak eraginkortasunez, segurtasunez eta boluntariotzaren printzipioekin bat etorriz egin ahal izateko behar dena.

d) Boluntariotza-jarduerak behar bezala gauzatzeko ezinbestekoak diren baliabide materialak eta teknikoak ematea, baita giza baliabideak ere.

e) Boluntario guztien irisgarritasun unibertsalerako eskubidea bermatzea, ekintza boluntarioak baldintza berdinetan egin ahal izan ditzaten.

f) Aseguru-polizak edo bestelako finantza-bermeak izatea, erantzukizun zibila, istripuak eta egindako jardueren ondorioz hirugarrenei eragiten ahal zaizkien kalteak estaltzeko.

g) Jardun boluntarioak eragindako gastuak ordaintzea.

h) Segurtasun-, higiene- eta babes-baldintzak bermatzea jardueraren izaeraren eta ezaugarrien arabera.

i) Aldez aurretik eskatzen bazaie, 34. artikuluan aurreikusitako zerbitzua eman izanaren ziurtagiria luzatzea.

j) 35. artikuluan adierazitako identifikazio-akreditazioa ematea.

k) Boluntarioek jardun boluntarioan hirugarrenei eragindako kalte-galerei erantzutea, Kode Zibilaren eta indarrean dauden arauen arabera.

2. Boluntariotza-entitateek honako betebehar hauek dituzte administrazio publikoekiko eta gizartearekiko:

a) Jardun boluntarioaren plana diseinatu, ezarri eta gainbegiratzea.

b) Boluntarioen koordinatzaile bat izendatzea, eta zeregin horretarako behar dituen baliabideak ematea hari.

c) Boluntarioen alten eta bajen erregistro eguneratua izatea -entitateko jarduna hasi eta amaitu zuteneko datak eta beharrezko identifikazio-datuak adierazita, sexuaren aldagaia eta eta egindako jarduerak barne-.

d) Informazio argia eta gardena ematea hauei buruz: misioa edo xedea, ikuspegia eta balioak, helburuak eta jarduerak; eta modu eskuragarri eta ulergarrian kontu ematea.

e) 11. artikuluan aurreikusitako baimenak biltzea eta gordetzea.

f) 18. artikuluan aurreikusitako adierazpenak eta ziurtagiriak biltzea eta zaintzea.

g) Datu-babeserako araudia betetzea.

h) Foru-lege honetan edo aplikatzekoa den araudian ezarritakoak eragindako gainerako betebeharrak betetzea.

3. Nafarroako Gobernua lankidetzan arituko da boluntariotza-entitateekin betebehar horiek bete daitezen.

15. artikulua. Jardun boluntarioaren plana.

1. Entitateek jardun boluntarioaren plan bat izan beharko dute; hau da, boluntariotza-entitateko gobernu-organoak onetsitako dokumentu formala, programak eta ekintza boluntarioak biltzen dituena.

2. Hona hemen planaren gutxieneko edukia:

a) Izena.

b) Xedeak eta helburuak, entitatearen misioarekin, ikuspegiarekin eta balioekin bat etorri beharko dutenak.

c) Planaren arduradunaren eta boluntarioen koordinatzailearen identifikazioa (pertsona bera izaten ahal da).

d) Jarduteko lurralde-esparrua.

e) Plana gauzatzeko aurreikusitako epea.

f) Barne hartzen dituen programen edo jardueren deskribapena.

g) Boluntarioen identifikazioa eta haiei eskatzen zaizkien profilak eta prestakuntza.

h) Beharrezkoak diren bitartekoak eta baliabide materialak.

i) Boluntarioei ordaindu beharreko gastuen eta horiek kalkulatzeko prozeduren definizioa.

3. Boluntarioek parte hartu beharko dute plana egiten, erakundearentzako balio erantsi gisa.

4. Plana bera garatzeko, plan espezifikoak, programak eta ekintzak ateratzen ahal dira plan horretatik.

16. artikulua. Boluntarioen koordinatzailea.

Boluntariotza-entitateek boluntarioen koordinatzaile bat izendatu beharko dute. Koordinatzaile horrek erantzukizun nagusi hauek izanen ditu:

a) Boluntarioak arduraz antolatu eta kudeatzea; horretarako, boluntarioen erregistroa kudeatu behar du, bai eta zerbitzuak identifikatzeko eta egiaztatzeko dokumentazioa ere.

b) Jardun-planaren arabera, berariazko programak planifikatzea, antolatzea, gainbegiratzea eta ebaluatzea, horiek behar bezala gauzatzen direla ziurtatuz.

c) Prestakuntza egokia antolatzea, gatazkak konpontzea eta boluntarioen eta jardun boluntarioaren hartzaileen segurtasuna eta osasuna bermatzea jarduerak gauzatzen diren bitartean.

d) Prozesu eta programetan boluntarioen eta hartzaileen arteko komunikazioaz eta haien parte-hartzeaz arduratzea.

e) Entitatearen boluntariotza-planaren lanketa eta eguneraketa koordinatzea.

f) Entitatearen boluntariotza-plana gauzatzen eta ebaluatzen dela ziurtatzea.

g) Boluntarioen eta hartzaileen jarraipena eta gainbegiratzea antolatzea.

III. KAPITULUA. BOLUNTARIOTZA-ENTITATEEN ETA BOLUNTARIOEN ARTEKO HARREMANAK

17. artikulua. Konpromisohitzarmena.

1. Boluntariotza-entitatearen eta boluntarioaren arteko harremana konpromiso-hitzarmen bat sinatuz ezarriko da, eta hori izanen da bere araubidearen tresna nagusia.

2. Hitzarmen horrek, gutxienez, honako alderdi hauek hartuko ditu:

a) Boluntarioak hartzen duen konpromisoa -eginkizunen, jardueren, modalitatearen eta dedikazio denboraren deskribapena- eta parte hartzen duen boluntariotza-programaren koordinatzailearen identifikazioa.

b) Bi alderdiei dagozkien eskubide eta betebehar guztiak.

c) Esleitu zaizkion eginkizunak betetzeko behar den prestakuntza, kasua bada, eta jarraitu beharreko prestakuntza-ibilbidea.

d) Boluntariotza-programa edo -ekintza aldatzeko edo hasieran adostutako araubidea aldatzen duen beste edozein inguruabarretarako aurreikusitako mekanismoa.

e) Konpromisoaren iraupena, bai eta bi aldeak deslotzeko arrazoiak eta modua ere.

f) Boluntarioei gastuak ordaintzeko araubidea eta horiek zenbatesteko modua.

g) Boluntarioentzako nahitaezko aseguruari buruzko informazioa.

3. Ez da beharrezkoa izanen konpromiso-hitzarmena izenpetzea jardun boluntarioa ekitaldi puntual baterako besterik ez bada, boluntariotza-entitatearen eta boluntarioaren arteko harreman egonkorrik sortu gabe.

18. artikulua. Boluntario izateko debekua zigoraurrekariak dituzten pertsonentzat.

1. Emakumearen aurkako indarkeriazko delituengatik, bizitzaren, osotasun fisikoaren, askatasunaren, osotasun moralaren edo pertsona ororen sexu-askatasun eta -ukigabetasunaren aurkako delituengatik, pertsonen legez kanpoko trafiko-delituengatik edo immigrazio klandestinoagatik, edo terrorismo-delituengatik ezereztu gabeko zigor-aurrekariak dituzten pertsonak ezin izanen dira boluntario gisa jardun delituaren izaerarekin lotura zuzena duten boluntariotza-ekintzetan. Inguruabar hori frogatuko da delitu horiengatik zigor-aurrekaririk ez izateari buruzko erantzukizunpeko adierazpen baten bidez.

2. Adingabeekin ohiko harremana izatea dakarten programetan parte hartzeko, Sexu Delitugileen Erregistro Zentralaren ziurtagiri negatiboa aurkeztu beharko zaio boluntariotza-entitateari.

3. Boluntario batek arestian deskribatutako jokabideren bat egiten badu, edo aldez aurretik jakinarazi gabeko zigor-aurrekariak dituela egiaztatzen bada, entitateak berehala eten beharko du harekiko elkarlana.

4. Aurreko apartatuetan ezarritakoa galarazi gabe, boluntariotza-entitateek ezartzen ahalko dituzte jardun boluntarioaren bidez iraungi gabeko zigor-aurrekari penalak dituzten pertsonak gizarteratzea helburu duten programak. Halakoetan, entitateak boluntariotza-programan bertan jasoko ditu haren ezaugarri bereziak.

19. artikulua. Harremana amaitzea.

1. Boluntarioaren eta entitatearen arteko harremana honako arrazoi hauengatik amaitzen ahalko da:

a) Konpromiso-hitzarmeneko betebeharrak ez betetzea.

b) Boluntariotza arautzen duten printzipio, helburu eta balioen aurkako jarduna.

c) Jardun boluntarioaren hartzaileen edo entitateko langileen eskubideak urratzen dituzten jokabideak.

d) Boluntariotza-entitateari berariaz jakinarazitako borondatezko uko egitea.

e) Boluntariotza-entitatean jardunik ez izatea urtebetez jarraian.

2. Boluntariotza-entitateek beti bermatu beharko diote kasuko boluntarioari entzunaldia emateko eskubidea baliatzeko aukera konpromiso-hitzarmena amaitu aurretik, aurreko apartatuaren a), b) eta c) letretan aurreikusitako kasuetan.

20. artikulua. Gatazkak konpontzeko bitartekaritza.

Konpromiso-hitzarmenean jasotako ituna badago, boluntariotza-entitatearen eta boluntarioen artean sortzen diren gatazkak bitartekaritzaren mende jarriko dira, gai zibiletako bitartekaritzari buruzko araudian xedatutakoaren arabera, eta, itunik ez badago, jurisdikzio eskudunaren mende, arau prozesaletan ezarritakoari jarraikiz.

IV. KAPITULUA. JARDUN BOLUNTARIOAREN HARTZAILEAK

21. artikulua. Kontzeptua.

Jardun boluntarioaren hartzaile dira jardun horren xede diren pertsona fisikoak eta haiek partaide diren taldeak edo komunitateak, zeinei zuzentzen baitzaie jardun hori haien bizi-baldintzak eta bizi-kalitatea hobetze, haien premiak asetze eta haien eskubideak eta beste edozein onura edo ondasun sozial defendatze aldera.

22. artikulua. Jardun boluntarioaren hartzaileen eskubideak.

Jardun boluntarioaren hartzaileek eskubide hauek dituzte:

a) Norberaren eta norbere familiaren askatasuna, berdintasuna, duintasuna eta intimitatea erabat errespetatuko direla bermatua izateko eskubidea.

b) Jarduna gauzatu aurretik eta prozesu osoan zehar boluntariotza-jardueren helburu, ezaugarri, iraupen eta garrantziari buruzko informazio eta orientazio nahikoa jasotzeko eskubidea, argia eta beren inguruabarretara egokitua, bai eta jarduera horien diseinuan zein ebaluazioan, hala dagokionean, parte hartzeko eta entzunak izateko eskubidea ere.

c) Ekintza boluntarioen jarraitutasuna, kalitatea, eraginkortasuna eta egokitasuna bermatuak izateko eskubidea, eta horiek ingurune hurbilean gauzatuak izateko eskubidea, bereziki ekintza horietatik zerbitzu edo prestazio pertsonalak sortzen direnean.

d) Boluntarioekin gatazkarik sortuz gero, boluntarioen koordinatzailearen esku-hartzea eskatzeko eskubidea.

e) Boluntarioa edo, hala badagokio, esleitutako programa aldatzea eskatzeko eta hori lortzeko eskubidea, inguruabarrek horretarako aukera ematen badute, zerbitzu horiek eskuratzeko askatasunaren esparruan, zeinek barne hartzen baitu une oro hari uko egiteko aukera, erabakia jasota geratzea ahalbidetzen duen edozein formularen bidez uko egin ere.

f) Beren datu pertsonalen tratamendua datuen babesaren arloan indarrean dagoen legeriaren araberakoa izateko eskubidea.

g) Foru-lege honek edo aplikatzekoa den araudiak aitortzen ahal dien beste edozein eskubide.

23. artikulua. Jardun boluntarioaren hartzaileen betebeharrak.

Jardun boluntarioaren hartzaileek betebehar hauek dituzte:

a) Boluntarioei laguntzea eta haien lana erraztea, eta pertsona guztiak duintasunez tratatzea.

b) Boluntarioei ez eskaintzea kortesia hutsetik harago doan gogobetetze edo kontraprestazio ekonomiko edo materialik, eta ez eskatzea dagokion ekintzatik edo programatik harago doan jarduketarik.

c) Dagozkion programak gauzatzean boluntarioek jakinarazten dizkieten neurri teknikoak, segurtasunekoak eta osasungarritasunekoak betetzea, bai eta orientabideak, arauak eta argibideak ere.

d) Aurreko artikuluaren e) letran ezarritako eskubideen erabileraren berri ematea boluntariotza-entitateari.

e) Boluntarioaren datu pertsonalak errespetatzea, datu-babeseko araudiaren arabera.

f) Foru-lege honetan edo aplikatzekoa den araudian ezarritakoak dakartzan gainerako betebeharrak betetzea.

IV. TITULUA. NAFARROAKO ADMINISTRAZIO PUBLIKOEN BOLUNTARIOTZAREN ARLOKO EGINKIZUNAK

I. KAPITULUA. NAFARROAKO FORU KOMUNITATEKO ADMINISTRAZIOA

24. artikulua. Eginkizunak.

Nafarroako Foru Komunitateko Administrazioak, bere eskumenen esparruan, honako eginkizun hauek beteko ditu boluntariotzaren arloan:

a) Herritarrek boluntariotza-entitateen bitartez jardun boluntarioan parte har dezaten sustatzea eta bultzatzea.

b) Gizartea sentsibilizatzea jardun boluntarioaren eta haren balioen inguruan, eta informazioa eta sustapena bultzatzea Nafarroako Foru Komunitate osoan eta, bereziki, landa-eremuan.

c) Boluntariotza-entitateen jarduerak bultzatzea eta erraztea.

d) Jardun solidarioa garatzeko baliagarri izanen diren baliabideak jartzea, eta azterlanak, estatistikak, planak eta estrategiak lantzea.

e) Gainerako boluntariotza-eragileekin lankidetzan aritzea eta sareak eratzea.

f) Nafarroako Boluntariotzaren Plana lankidetzan egitea, diseinutik hasi, gainerako etapetatik segi eta ebaluaziora arte, boluntariotza-eragile giltzarriekin eta herritarrekin oro har.

g) Boluntarioen eta boluntariotza-entitateen etengabeko prestakuntza sustatzea.

h) Administrazioen arteko eta lurraldeen arteko koordinazioa eta lankidetza sustatzea, bai administrazioan diren mailen artean bai boluntariotzaren arloko funtsezko eragileekin, bereziki boluntariotzari lotutako balioen sentsibilizazio- eta sustapen-funtzioetarako.

i) Boluntariotza-entitateei laguntzea, beren jarduerak garatzeko eta beren boluntariotza kudeatzeko baliabideak izateko aukera erraztuz.

j) Adingabeak, adinekoak, desgaitasuna duten pertsonak eta beste kolektibo zaurgarri batzuk boluntariotza-jardueretan sar daitezen sustatzea, eta aukera-berdintasuna eta irisgarritasun unibertsala bermatzea.

k) Boluntariotza-lanari aitortza publikoa ematea, ekitaldien, sarien eta bestelako ekimenen bidez.

l) Unibertsitateekin eta maila guztietako ikastetxeekin koordinatzea, boluntariotza sustatzeko, prestakuntza integralerako eta balio solidarioak sustatzeko tresna gisa.

m) Lankidetza hitzarmenak ezartzea beste entitate publiko eta pribatu batzuekin, boluntariotzaren arloko programak eta proiektuak garatzeko.

n) Boluntariotza-entitateei eta boluntarioei eragiten dieten administrazio-prozedurak sinplifikatzea.

ñ) Genero ikuspegi integratua txertatzea zeharkakotasunez boluntariotzaren arloko politika publikoak diseinatzean, gauzatzean eta ebaluatzean.

o) Ekintza zehatzen bidez bermatzea emakumeen ahalduntzea eta haiek jardun boluntarioan parte-hartze sozial inklusiboa eta ekitatiboa izatea.

25. artikulua. Boluntariotzari laguntzeko tresnak.

1. Nafarroako Foru Komunitateko Administrazioak aholkua eta laguntza emanen die Nafarroako boluntariotza-eragileei boluntariotzan espezializatutako zerbitzu baten bidez.

2. Nafarroako Foru Komunitateko Administrazioak webgune bat izanen du, eduki honekin:

a) Beren borondatez atxikitzen zaizkion boluntariotza-entitateak.

b) Boluntarioak behar dituzten boluntariotza-entitateen ekintzak.

c) Jardun boluntarioan aritzeko beren burua eskaintzen duten boluntarioak.

d) Boluntariotza-entitateen eskura dauden baliabideak.

e) Nafarroako Boluntariotzaren Plana.

f) Boluntariotzari buruzko albisteak.

g) Boluntariotza sustatzeko baliabideak.

26. artikulua. Boluntariotzaren Mahai Teknikoa.

1. Nafarroako Foru Komunitateko jardun boluntarioaren jarraipena egiteko, boluntariotzaren mahai tekniko bat sortuko da.

2. Boluntariotzaren Mahai Teknikoa boluntariotza-programak bultzatzen dituzten departamentuetako teknikari esperientziadunek osatuko dute.

3. Boluntarioak koordinatzeko eskumena duen zuzendaritza nagusiko titularrak izendatuko ditu mahaiko kideak, boluntariotza-programak sustatzen dituzten zuzendaritza nagusiek proposatuta.

4. Boluntariotzaren Mahai Teknikoak eginkizun hauek izanen ditu:

a) Laguntza teknikoa ematea jardun boluntarioaren sustapenaren alorreko erabaki publiko-administratiboen azterketan, planifikazioan eta kudeaketan.

b) Departamentuak koordinatzea ikuspuntu teknikotik.

c) Nafarroako Boluntariotzaren Planean jasotako konpromisoak betetzen direla zaintzea eta horren jarraipenaren berri ematea Nafarroako Boluntariotzaren Kontseiluari.

II. KAPITULUA. NAFARROAKO TOKI-ENTITATEAK

27. artikulua. Tokientitateen eginkizunak.

Nafarroako toki-entitateek, beren eskumenen esparruan, honako eginkizun hauek beteko dituzte beren lurralde-esparruan boluntariotzari dagokionez:

a) Jarduera boluntarioa sustatzea.

b) Boluntariotza-entitateak eta boluntarioak sustatzea.

c) Boluntariotza-entitateak koordinatzea.

d) Boluntariotza-eragileekiko lankidetza.

V. TITULUA. HEZKUNTZA SISTEMA ETA BOLUNTARIOTZA

28. artikulua. Unibertsitatez kanpoko hezkuntzasisteman boluntariotza sustatzea.

Nafarroako Gobernuak sustatuko du ikastetxeek boluntariotzako programak edo ekintza puntualak ezartzea boluntariotza-entitateen bitartez, zerbitzu-ikaskuntza eta boluntariotzaren balioak sustatzeko adingabeen artean.

29. artikulua. Unibertsitateko hezkuntzasisteman boluntariotza sustatzea.

1. Unibertsitateek, indarrean dagoen legeriaren arabera, boluntariotza sustatzen ahalko dute. Unibertsitateetako boluntariotza-jarduketen helburuak izanen dira, besteak beste, unibertsitate-komunitatea trebatzea eta sentsibilizatzea boluntariotzari dagokionez.

2. Unibertsitateek maila guztietan sustatzen ahalko dituzte boluntariotzaren inguruko irakaskuntza eta ikerketa. Horretarako, lankidetza-hitzarmenak sinatzen ahalko dituzte administrazio publikoekin eta beste instituzio eta erakunde publiko edo pribatu batzuekin, eta horiek ikastaroak, azterlanak, analisiak eta ikerketak eskatzen ahalko dizkiete unibertsitateei.

3. Unibertsitateek beren ikasleek egindako boluntariotza-jardueren aitorpen akademikorako formulak ezartzen ahalko dituzte, baldin eta unibertsitate-antolamenduaren arloan aplikatzekoa den araudian ezarritako baldintza akademikoak betetzen badituzte eta boluntariotzaren balioak eta printzipioak errespetatzen badituzte.

VI. TITULUA. BOLUNTARIOTZA PLANIFIKATU ETA SUSTATZEKO TRESNAK

I. KAPITULUA. NAFARROAKO BOLUNTARIOTZAREN PLANA

30. artikulua. Nafarroako Boluntariotzaren Plana.

1. Nafarroako Boluntariotzaren Plana da Foru Komunitatean jardun boluntarioa planifikatzeko tresna nagusia. Era berean, Nafarroako boluntariotzaren arloko funtsezko eragileen jardunaren ibilbide-orria izanen da.

2. Haren helburu nagusia da boluntariotzaren garapena sustatzea Nafarroako boluntariotza indartzera eta hobetzera bideratutako konpromiso komunen bidez.

3. Planak, gutxienez, eduki hau izanen du:

a) Boluntariotzaren arloko helburu estrategikoak eta lehentasunak, arlo horretako gizarte-eskaerei arreta berezia eskainita.

b) Boluntariotza sustatzeko eta sendotzeko berariazko ekintza ildoak.

c) Gobernantza-mekanismoak eta -organoak, kontuan hartuta, organoen kasuan, emakumeen eta gizonen arteko presentzia orekatuaren printzipioa.

d) Hartutako konpromisoak.

e) Konpromisoak betetzeko egutegia.

f) Ekintzen aldizkako jarraipena eta ebaluazioa egiteko adierazleak.

g) Kontu-emate publikoa egiteko modua.

31. artikulua. Nafarroako Boluntariotzaren Plana egitea eta onestea.

1. Boluntariotzaren koordinazioaren arloan eskumena duen departamentuari dagokio plana koordinatzea.

2. Diseinutik bertatik, Nafarroako boluntariotzaren arloko funtsezko eragile guztien parte-hartzea izan behar du planak, eta kontuan hartuko du aurreko planaren ebaluazioa.

3. Planari eta haren ebaluazioei buruzko txostena eginen du Nafarroako Boluntariotzaren Kontseiluak.

4. Nafarroako Gobernuak onetsiko du plana.

II. KAPITULUA. AITORTZAK ETA IDENTIFIKAZIO-AKREDITAZIOAK

32. artikulua. Nafarroako boluntarioaren saria.

1. Nafarroako Gobernuak, Nafarroako Boluntariotzaren Kontseiluak proposatuta, Nafarroako boluntarioaren saria ematen ahalko die, bi urtean behin, pertsona fisiko bati eta pertsona juridiko bati, arlo hauetan nabarmentzeagatik: boluntariotzari eskainitako dedikazioagatik, jarduera boluntarioan gizarte-eredu izateagatik edo beren jarduketa boluntarioek Nafarroan eremu horretan garrantzi berezia lortu izanagatik.

2. Erregelamendu bidez ezarriko dira sari hori emateko betekizunak.

33. artikulua. Beste aitortza eta ekimen batzuk.

Nafarroako administrazio publikoek eta boluntariotza-entitateek boluntariotza bultzatzen eta sustatzen duten beste jarduera, aitortza, sari eta jarduera batzuk antolatzen ahalko dituzte.

34. artikulua. Gaitasunak aitortzea.

1. Boluntariotza-entitateek beren programa eta ekintzetan parte hartzen duten pertsonen zerbitzu-prestazioa aitortuko dute. Aitortza horrek, gutxienez, eduki hau izanen du:

a) Boluntarioaren identifikazio-datuak.

b) Entitatearen identifikazio-datuak.

c) Egindako jardun boluntarioaren datak, iraupena eta izaera.

d) Jardun-esparruak eta -programak, lekua eta egindako ekintza zehatzak, hala badagokio.

e) Eskuratutako prestakuntza, gaitasun eta trebetasun zehatzak.

2. Nafarroako Gobernuak laguntza emanen die boluntariotza-entitateei artikulu honetan arautzen den aitortzarako.

35. artikulua. Identifikazioakreditazioa.

1. Boluntariotza-entitateek akreditazio bat emanen diote boluntarioari, hura identifikatuko duena eta boluntario lana egiteko gaituko duena.

2. Nafarroako Gobernuak laguntza emanen die boluntariotza-entitateei artikulu honetan arautzen den akreditazioa emateko.

III. KAPITULUA. PRESTAKUNTZA

36. artikulua. Boluntarioen prestakuntzaplana.

Nafarroako Foru Komunitateko Administrazioak jardun boluntarioa sustatuko du boluntarioen etengabeko prestakuntzarako plan bat ezarriz. Plan horrek beharrizanak identifikatu eta prestakuntza ekintzak ezarriko ditu. Horretarako, kontuan hartu beharko ditu boluntariotza-entitateen eta boluntarioen premiak.

37. artikulua. Nafarroako Jardun Boluntarioaren Eskola.

1. Nafarroako Foru Komunitateko Administrazioak Nafarroako Jardun Boluntarioaren Eskola sortuko du aurreko artikuluan jasotako planaren esparruan prestakuntza-jardueren eskaintza bateratuko eta koordinatuko duen tresna gisa.

2. Boluntariotzaren koordinazioaren arloan eskumena duen departamentuari dagokio eskolak bultzatutako jarduerak kudeatzea, oinarrizko prestakuntzako eta espezializazioko programak ezarriz.

IV. KAPITULUA. BOLUNTARIOTZA-ENTITATEEN ARTEKO ALIANTZAK

38. artikulua. Boluntariotzaentitateen plataformak.

Nafarroako Foru Komunitateko Administrazioa elkarlanean arituko da boluntariotza-entitateekin, baldin eta haien sendotasuna eta ordezkagarritasuna erraztu eta jarduna hobetzeko plataformak sortzea erabakitzen badute.

39. artikulua. Nafarroako Boluntariotzaren Sarea.

1. Nafarroako boluntariotza-eragileak elkarlanean arituko dira sarean, Nafarroako boluntariotzaren ekosistema indartzeko eta bultzatzeko.

2. Nafarroako Foru Komunitateak sare-lan hori lagundu eta erraztuko du.

V. KAPITULUA. BOLUNTARIOTZA-ENTITATEEN ERREGISTROA

40. artikulua. Boluntariotzaentitateen erregistroa.

1. Boluntariotza-entitateen erregistroak Nafarroako boluntariotza-entitateak ikusarazteko balioko du, bai eta boluntariotza-entitateei zuzendutako dirulaguntzak eskuratzea bideratzeko ere.

2. Boluntariotzaren koordinazioaren arloan eskumena duen departamentuari atxikita egonen da erregistroa.

3. Inskripzioa borondatezkoa, publikoa eta doakoa izanen da, eta eskaera aurkeztuz eginen da. Eskaera horretan adieraziko da entitatea irabazi-asmorik gabeko entitateen zer erregistro ofizialetan dagoen inskribatuta -salbu eta bere izaera dela-eta hori nahitaezkoa ez bada-, eta boluntariotza-jarduerak egiten direla eta foru-lege honetan xedatutakoa betetzen dela deklaratuko da.

VI. KAPITULUA. ENPRESEK BOLUNTARIOTZA SUSTATZEA

41. artikulua. Boluntariotza korporatiboa.

1. Enpresek beren enplegatuen jardun boluntarioa sustatzen eta bultzatzen ahalko dute boluntariotza-entitateen boluntariotza-programen bidez.

2. Jardun boluntario korporatiboa gauzatuko dute askatasunez eta modu altruistan parte hartzea erabakitzen dutenek.

VII. TITULUA. PARTE-HARTZEA

42. artikulua. Nafarroako Boluntariotzaren Kontseilua.

1. Nafarroako Boluntariotzaren Kontseilua kide anitzeko organo aholku-emailea eta parte-hartzailea da, boluntariotzaren interesak defendatzea xede duena.

2. Kontseilua boluntariotzaren koordinazioaren arloan eskumena duen departamentuari atxikita dago.

3. Kontseiluak eginkizun hauek ditu:

a) Administrazio publikoei aholku ematea boluntariotzarekin zerikusia duten politika publikoak formulatu, gauzatu eta ebaluatzeko lanean, eta Nafarroako Boluntariotzaren Plana egiten parte hartzea.

b) Nafarroako Gobernuari proposatzea Nafarroako boluntarioaren saria nori eman.

c) Boluntariotza-eragileen arteko interakzioa eta koordinazioa bermatzea.

d) Azterketak, txostenak eta gomendioak egitea proposatzea.

e) Boluntariotzaren aldeko ekimenak sustatzea.

f) Boluntariotzaren arloko gaiak arautzen dituzten xedapen orokorren proiektuei buruzko txostenak egitea.

g) Zaintzea boluntario-ekintza askatasunezkoa, ardurazkoa, altruista eta solidarioa izan dadin, eta ordainpeko lanaren ordez erabilia izan ez dadin.

43. artikulua. Osaera.

1. Honako hauek osatuko dute Nafarroako Boluntariotzaren Kontseilua, gizon eta emakumeen ordezkaritza orekatuaren printzipioa bermatuz betiere; beraz, sexu bakoitzeko pertsonak ezin izanen dira izan ehuneko hirurogei baino gehiago ez eta ehuneko berrogei baino gutxiago ere:

a) Kontseiluko burua: Kontseilua atxikita duen departamentuko titularra.

b) Buruordea: Kontseiluaren alderdi sozialak bere kideen artetik hautatutako eta izendatutako pertsona bat. Ondorio horietarako, apartatu honen d), f), g) eta h) letretan adierazitako pertsonak hartuko dira alderdi sozial gisa.

c) Boluntariotza-programak bultzatzen dituzten departamentuen zazpi ordezkari.

d) Boluntariotza-entitateen zazpi ordezkari, ekitatea eta pluraltasuna bermatzen duten prozeduren bidez hautatuak.

e) Toki-entitateen ordezkari bat, Nafarroako Udal eta Kontzejuen Federazioak izendatua.

f) Bost boluntario, ekitatea eta pluraltasuna bermatzen duten prozeduren bidez hautatuak.

g) Boluntariotzaren arloko bi aditu, esparru akademikokoak, hezkuntza esparrukoak edo esparru profesionalekoak.

h) Nafarroan sindikatu-ordezkaritzaren %10 baino gehiago daukaten sindikatuen ordezkari bana.

2. Kontseilua atxikia duen departamentuko titularrak eginen du Kontseiluko kideen izendapena.

3. Boluntarioak koordinatzeko eginkizunak esleituta dituen ataleko burua izan da idazkaria. Idazkariak hitza izanen du, baina botorik ez.

4. Boluntariotza-entitateetako ordezkarien, boluntarioen eta adituen kontseilukideen agintaldia lau urtekoa izanen da.

5. Erakunde publikoetako ordezkariek kargua utziko dute aukeratuak izatea ahalbidetu zuen kargua uzten dutenean.

6. Kontseiluak lantalde espezializatuak eratzen ahalko ditu boluntariotzarekin lotutako gai zehatzei heltzeko. Lantalde horiek erakunde parte-hartzaileen tipologiaren arteko oreka bermatu beharko dute.

Lehenengo xedapen gehigarria. Babes zibilaren arloko boluntariotza.

Babes zibilaren eta larrialdien arretaren arloko jardueretan, boluntariotzaren eta boluntarioen erregulazioa horien araudi espezifikoan ezarriko da, eta foru-lege hau osagarri gisa aplikatuko da.

Bigarren xedapen gehigarria. Boluntarioei aitortza publikoak egitea.

Nafarroako Gobernuak boluntarioen aldeko neurri publikoak aztertuko ditu.

Lehenengo xedapen iragankorra. Boluntariotzaren arloko entitateen betebeharrak.

Foru-lege honek indarra hartu eta urtebeteko epean, boluntariotzaren arloko entitateek onartu beharko dituzte foru-lege honen 14. artikuluan ezarritako betebeharrak eta jardun boluntarioaren plan bat izan, 15. artikuluan arautzen den moduan.

Bigarren xedapen iragankorra. Boluntariotzaren arloko entitateen erregistroa.

1. Foru-lege honek indarra hartu eta urtebeteko epean, Nafarroako Gobernuak beste erregelamendu bat onetsiko du boluntariotzaren arloko entitateen erregistroa arautzeko.

2. Aurreko apartatuan ezarritako araudiak indarra hartu arte, indarrean jarraituko du Gizarte Politiketako kontseilariaren maiatzaren 13ko 306/2014 Foru Aginduak, Ekintza Boluntarioko Entitateen Errolda arautzen duenak.

Xedapen indargabetzaile bakarra. Arauak indargabetzea.

Indarrik gabe geratzen da Nafarroako Bolondres-lanari buruzko martxoaren 27ko 2/1998 Foru Legea, bai eta foru-lege honetan xedatutakoari aurka egiten dioten maila bereko edo beheragoko arau guztiak ere.

Azken xedapenetako lehenengoa. Arauak emateko gaikuntza.

Boluntariotzaren koordinazioaren arloan eskumena duen departamentuaren titularrari ahalmena ematen zaio foru-lege hau garatu eta betearazteko beharrezkoak diren erregelamenduzko xedapen guztiak eman ditzan.

Azken xedapenetako bigarrena. Indarra hartzea.

Foru-lege honek Nafarroako Aldizkari Ofizialean argitaratu eta biharamunean hartuko du indarra.

Contacte con nosotros | Accesibilidad | Aviso legal | Mapa web