(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

13/2026 FORU DEKRETUA, OTSAILAREN 25EKOA, ZEINAREN BIDEZ ONESTEN BAITA TALDE MULTINAZIONALENTZAKO ETA TALDE NAZIONAL HANDIENTZAKO GUTXIENEKO ZERGAPETZE-MAILA GLOBALA BERMATZEKO ZERGA OSAGARRIARI BURUZKO ERREGELAMENDUA

BON N.º 55 - 17/03/2026

  I. TITULUA. EREMU SUBJEKTIBOA

  II. TITULUA. DOIKUNTZAK ZERGAOINARRIA ETA ZERGA ESTALI DOITUAK ZEHAZTEAN

  III. TITULUA. ZERGA OSAGARRIAREN KALKULUA

  IV. TITULUA. ZERGA OSAGARRIAREN AITORPEN INFORMATIBOA ETA BESTELAKO KOMUNIKAZIOAK

  I. KAPITULUA. XEDAPEN OROKORRAK

  II. KAPITULUA. TALDE MULTINAZIONALAREN EDO TALDE NAZIONAL HANDIAREN INFORMAZIOA

  III. KAPITULUA. PORTU SEGURUAK ETA ZERGA OSAGARRIAREN GALDAGARRITASUNIK EZAKO BESTE KASU BATZUK

  IV. KAPITULUA. TALDEA DAGOEN JURISDIKZIOETAN SORTU ETA GALDATZEN DIREN ZERGA OSAGARRIEN KALKULUA

  V. TITULUA. ARAUHAUSTEAK ETA ZEHAPENAK

  VI. TIULUA. AUTOLIKIDAZIOA

Atariko

I

Abenduaren 22ko 18/2025 Foru Legeak, zeinaren bidez ezarri baitzen talde multinazionalentzako eta talde nazional handientzako gutxieneko zergapetze-maila globala bermatzeko zerga osagarri bat, zerga berri bat sartu du Nafarroako Foru Komunitateko ordenamendu juridikoan, zerga osagarria izenekoa, eta hala bete da Kontseiluaren 2022ko abenduaren 15eko 2022/2523 (EB) Zuzentarauaren transposizioa egiteko betebeharra, zuzentarau hori Europar Batasuneko enpresa-talde multinazionalentzako eta enpresa-talde nazional handientzako gutxieneko zergapetze-maila globala bermatzeari buruzkoa baita.

Zerga berri hori ezartzeak berekin dakar erregelamenduzko arau bat onetsi beharra, haren bidez garatzeko foru legean ezarritako zenbait alderdi, eta, orobat, foru legearen interpretazioa errazteko, kontuan harturik zerga osagarri berri hori nazioartekoa dela nagusiki.

Beraz, foru dekretu honen bidez onesten den erregelamenduak bi funtzio beteko ditu: zergari buruzko foru legeak ezartzen dituen parametroak garatuko ditu, eta bertan jasotako arauak argitu eta interpretatuko ditu.

II

Foru dekretu honek artikulu bakarra eta bi azken xedapen ditu.

Artikulu bakarrak Talde multinazionalentzako eta talde nazional handientzako gutxieneko zergapetze-maila global bat bermatzeko zerga osagarriari buruzko Erregelamendua onesten du.

Azken xedapenetako lehena foru dekretu honetan eta barne duen erregelamenduan xedatutakoa garatu eta aplikatzeko arauak emateko gaikuntzari buruzkoa da, eta azken xedapenetako bigarrenak xedatzen du noiz hartuko duen indarra.

Zerga osagarriari buruzko Erregelamenduak 32 artikulu ditu, sei titulutan eta hiru xedapen iragankorretan egituraturik.

I. titulua eremu subjektiboari buruzkoa da, eta argitzen du, entitate baztertutzat jotzeko ondorioetarako, zein kasutan joko den entitate baztertutzat irabazi-asmorik gabeko erakunde batek egindako jardueren jarduera osagarriak egiten dituen entitate bat. Bestetik, titulu horrek azaltzen du zer kasutan hauta dezakeen aseguru-mutualitate arautu batek inbertsio-entitate bat edo aseguruen inbertsio-entitate bat fiskalki gardena den entitatetzat jotzea, zergari buruzko foru legearen 44. artikuluan ezarritako moduan.

II. tituluak zerga osagarriaren zerga-oinarria eta zerga estali doituak zehazteko arauak garatzen ditu.

Lehenik eta behin, honako kasu honetan aplikatu beharreko arauak ezartzen dira: azken entitate nagusiaren ekitaldi ekonomikoak edo fiskalak bat ez datozenean talde multinazionaleko edo talde nazional handiko entitate eratzaileen ekitaldi ekonomikoekin edo fiskalekin.

II. titulu horretan ere zenbait doikuntza arautzen dira, aplikatzen ahalko direnak ekitaldiko irabazi edo galera onargarriak zehazteko, izan doikuntza horiek atzerriko negozioetan egindako inbertsio garbiaren estalduragatik, izan kiten ondoriozko diru-sarrerengatik. Doikuntza horien arabera, entitate aitortzaileak aukeratzen ahalko du zer hartuko duen kapital irabazi edo galera baztertutzat: zergaldian, entitate eratzaile baten kontabilitate-emaitzan islaturik dagoen atzerriko monetako galera edo irabazia, bost urteko epean eta inguruabar jakin batzuetan, edo kita baten kontabilitate-erregistroari dagozkion diru-sarrerak.

Substantzia ekonomikoari lotutako errenta-bazterketari dagokionez, II. tituluak zenbait arau garatzen ditu langile onargarriak eta aktibo material onargarriak zenbatzeko. Zehazki, zehazten da nola zenbatu halako langileak edo aktiboak jurisdikzio batean baino gehiagotan edo talde batean baino gehiagotan enplegatzen edo erabiltzen direnean.

Halaber, arreta berezia jartzen da kreditu fiskalen tratamenduan; izan ere, tratamendu hori ezinbestekoa da, kontuan izanik nolako eragina duen jurisdikzioak zerga-tasa efektiboa kalkulatzeko. Hala, diru-sarrera gisa zenbatuko dira, irabazi edo galera onargarriak zehazteko, edo, aitzitik, zerga estalien murrizketa gisa, kontuan harturik kreditu fiskal itzulgarri onargarriak edo ez-onargarriak diren, hurrenez hurren. Horrez gainera, argitzen da zer nolako tratamendua emanen zaie merkatuan transferitu daitezkeen kreditu fiskal gisa kalifikatutako kreditu fiskalei; izan ere, kreditu horien konfigurazioagatik eta ezaugarri espezifikoengatik, kreditu fiskal itzulgarri onargarriekin parekatu behar dira.

Zerga geroratuagatiko doikuntzaren zenbateko osoari dagokionez, honako hau zehazten da: entitate eratzaile baten zerga geroratuagatiko gastua edo diru-sarrera zehazteko abiapuntua izan behar da entitate horrek zergaldian izan duen kontabilitate-emaitza, talde barreneko eragiketak ezabatzeagatiko edozein bateratze-doikuntza egin aurretik, bat etorriz zergari buruzko foru legearen 9. artikuluaren 1. eta 2. apartatuetan xedatutakotik ondorioztatzen den hierarkiaren arabera dagokion finantza-kontabilitateko arauarekin. Bereziki, 9.1 artikuluan xedatutakoari jarraikiz, entitate eratzailearen urteko banakako kontuak formulatu badira azken entitate nagusiak egoera-orri finantzario bateratuak egiteko erabilitakoa ez beste finantza-kontabilitateko arau onargarri edo baimendu baten arabera, taldearen kontu bateratuak formulatzeko beharrezkoak diren homogeneizazioak egin beharko dira, bestelako bateratze-doikuntzarik egin gabe. Hala ere, bat-etortze hori zentzuz egiterik ez badago, 9.2 artikuluan xedatutakoaren arabera, banakako kontabilitate-magnitude horiek hartu beharko dira abiapuntutzat, hargatik eragotzi gabe 9.2.c) artikuluan ezarritako milioi batetik gorako diferentzia iraunkorrengatiko doikuntza. Orobat, erregelamendu honek argitzen du zer jotzen den galera bati dagokion zerga geroratuagatiko aktibotzat, eta zer ondorio dituen zerga geroratuagatiko doikuntzaren zenbateko osoa zehaztean, galera onargarrien hautaketa errebokatzen bada.

Halaber, erregelamenduak zehazten du zer tratamendu eman behar zaien zergaldiko zerga estali doitu negatiboei irabazi onargarri garbiak dituen jurisdikzio batean, zergari buruzko foru legearen 6.3 artikuluan xedatutakoari dagokionez.

Kapital-irabaziak edo -galerak baztertzeari dagokionez, zehaztu behar da nola aplikatuko den; izan ere, baliteke irabazi edo galera horiek ez baztertzea entitate eratzailearen irabazi edo galera onargarriak zehaztean, entitate gardenak badira eta inguruabar jakin batzuk gertatzen badira. Horri dagokionez, tratamenduan bereiziko dira entitate garden bateko partaidetza adierazgarri eta ez-kualifikatuak eta entitate garden bateko partaidetza kualifikatuak.

Baztertutako dibidenduei dagokienez, zehazten da nola jokatzen duen bazterketa horrek finantza-tresna konposatu jakin batzuen kasuan.

Gainera, zenbait berezitasun garatu behar dira, aseguru-entitateen irabazi edo galera onargarriak zehazteko, zergari buruzko foru legearen 10. artikuluko 2. eta 11. apartatuetan xedatutakoa garatzeko.

Halaber, zergari buruzko foru legearen 10.2 artikuluan xedatutakoaren ildotik, distortsiorik sortu ez dadin zergaldiko zerga-tasa efektiboaren zenbaketan, erregelamendu honek aukera jaso behar du -talde multinazionaleko edo talde nazional handiko entitate eratzaile bakoitzarentzat- ez aplikatzeko foru legearen 10.1 artikuluan zehaztutako kapital-irabazi edo -galeren bazterketa, gutxienez 5 zergalditan.

Ondoren, II. tituluak bi gai garrantzitsu zehazten ditu, zeinak beharrezkoak baitira zergari buruzko foru legearen 40. eta 42. artikuluetan araututako neutraltasun- eta banaketa-araubideak behar bezala aplikatzeko.

III. tituluak, bestalde, zerga osagarria behar bezala kalkulatzeko beharrezkoa den erregela bat ezartzen du 15. artikuluan, eta zehazten du nola aplikatu behar den errentak sartzeko erregela, baldin eta entitate eratzaile bat zergaldi berean talde multinazional batean edo talde nazional handi batean sartu edo talde multinazional batetik edo talde nazional handi batetik baztertu badaiteke.

IV. titulua zerga osagarriaren aitorpen informatiboari buruzkoa da. Bertan azpimarratzen da aitorpen horrek zerga-kudeaketaren arloan duen garrantzia, zerga osagarria behar bezala aplikatzen eta likidatzen dela bermatzeko ez ezik, Espainiako zerga administrazioak inplikatuta egon litezkeen gainerako jurisdikzioekin egin beharreko informazio-truke oro arrakastaz burutzeko ere.

Titulu horren barruan, I. kapituluak aitorpen informatiboaren xedapen orokorrak arautzen ditu, hala nola aitorpenaren edukia, aurkezteko epea eta entitate aitortzaileak zerga administrazioari egin behar dion komunikazioa. Azkenik, talde multinazionalen kasuan, ezartzen du informazio-trukea hitzarmen multilateralaren arabera edo Espainiako Erresumak beste estatu edo jurisdikzio batzuekin sinatzen dituen alde biko hitzarmenen edo akordio multilateralen arabera eginen dela.

II. kapituluak honako alderdi hauek arautzen ditu: aitorpen informatiboan sartu beharreko entitate aitortzailearen identifikazioari eta taldearen informazio orokorrari buruzko informazioa; taldearen egitura eta taldeko entitate eratzaileen identifikazioa, eta, azkenik, talde multinazionalak edo talde nazional handiak presentzia duen jurisdikzioari edo jurisdikzioei buruzko informazio laburtua.

III. kapituluak, berriz, aitorpen informatiboan sartu behar den jurisdikzio-mailako informazioa arautzen du, eta zehazten du, hala badagokio, portu seguruen edo bazterketen aplikazioa eta talde multinazionalei eta talde nazional handiei inguruabar jakin batzuk gertatzen direnean zerga osagarria aldi baterako ez exijitzeari buruzko informazioa.

Bestalde, IV. kapituluak arautzen du zerga osagarria kalkulatzeko beharrezkoa den zer informazio sartu behar den aitorpen informatiboan, zeinak alderdi hauek jasoko baititu: jurisdikzio-arloko informazioa; jurisdikzio bakoitzerako zerga-tasa efektiboa kalkulatzeko behar den informazioa; jurisdikzio edo entitate eratzaile bakoitzak baliatutako edo errebokatutako aukerak, banakaturik, eta jurisdikzio-mailan ez ezik, entitate eratzaile bakoitzak ere eman behar duen informazioa.

V. tituluak zergari buruzko foru legearen 48. artikuluan arautzen den zehapen-araubidea garatzen du, eta zehazten du zer hartzen den datu-multzotzat araubide hori aplikatzeko.

Azkenik, VI. tituluak zerga-autolikidazioa arautzen du, zehazki, hura aurkezteko modua eta epea.

Aurreko guztia osatzeko, hiru xedapen iragankor daude.

Lehenengo xedapen iragankorrak argitzen du zein dies a quotik zenbatu behar den zergari buruzko foru legearen hirugarren xedapen iragankorrak aipatzen duen bost urteko aldia; hain zuzen, behar beste zergapetu gabeko etekinen erregela exijitu daitekeen lehen zergaldia hasten denetik aurrera.

Zergari buruzko foru legearen 47. artikuluan xedatutakoa garatzeko, bigarren xedapen iragankorrak aukera ematen die, 2030eko uztailaren 1a baino lehen amaitzen diren zergaldietarako, talde multinazionalei edo talde nazional handiei aitorpen informatiboa modu erraztuan aurkezteko, baldintza jakin batzuk betetzen dituzten jurisdikzioetan.

Bestalde, hirugarren xedapen iragankorrak arautzen du zer epe dauden zergaren lehen aitorpen informatiboa eta lehen zerga-autolikidazioa aurkezteko, zergaldi honi dagozkionak: errentak sartzeko erregela onargarri baten edo behar beste zergapetu gabeko etekinen erregela onargarri baten arabera talde multinazional bat edo talde nazional handi bat zerga osagarri baten aplikazio-eremuan lehen aldiz sartzen den zergaldia.

III

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean xedatutakoarekin bat, foru dekretu hau premiaren, eraginkortasunaren, proportzionaltasunaren, segurtasun juridikoaren, gardentasunaren eta efizientziaren printzipioen arabera egin da.

Premia eta eraginkortasunaren printzipioa betetzen da erregelamendua beharrezkoa delako Kontseiluaren 2022ko abenduaren 15eko 2022/2523 (EB) Zuzentarauaren transposizioa osorik egin beharrari erantzun dion foru legearen garapenari buru emateko (zuzentarau hori Europar Batasuneko enpresa-talde multinazionalentzako eta enpresa-talde nazional handientzako gutxieneko zergapetze-maila globala bermatzeari buruzkoa da).

Proportzionaltasunaren printzipioa ere betetzen da, bakar-bakarrik erreparatu zaiolako exijitzen diren eta arestian aipatu diren helburu behar-beharrezkoei erantzuteko moduari.

Segurtasun juridikoaren printzipioari dagokionez, testuak gainerako foru ordenamendu juridikoarekin eta Europar Batasunekoarekin koherentzia izatea bermatu da.

Gardentasunaren printzipioa bermatu da zioen azalpen honek modu argian identifikatzen dituelako erregelamenduaren xedea eta helburua, eta, orobat, proiektua Nafarroako Gobernu Irekiaren eta Nafarroako Foru Ogasuneko web-atarietan argitaratzen delako, herritarrek testua ezagutu ahal izan dezaten, entzunaldiaren eta jendaurreko informazioaren izapidean.

Azkenik, efizientziaren printzipioari dagokionez, ahalegina egin da arauak ahalik eta administrazio karga gutxien izan dezan herritarrentzat eta zeharkako kostu gutxien ere bai, horrela baliabide publikoen arrazoizko erabilera sustatuta.

Foru dekretu honen bidez onestekoa den arau garapena abenduaren 22ko 15/2025 Foru Legeak azken xedapenetako laugarrenean jasotzen duen gaikuntzaren babesean egiten da, hartan baimena ematen baitzaio Nafarroako Gobernuari aipatu foru lege hori garatu eta betearazteko beharrezkoak diren xedapen guztiak emateko.

Horrenbestez, Ekonomia eta Ogasuneko kontseilariak proposaturik, Nafarroako Kontseiluaren irizpena aintzat hartuta, eta bat etorriz Nafarroako Gobernuak bi mila eta hogeita seiko otsailaren hogeita bosteko bilkuran hartutako erabakiarekin,

DEKRETATZEN DUT:

Artikulu bakarra. Talde multinazionalentzako eta talde nazional handientzako gutxieneko zergapetzemaila global bat bermatzeko zerga osagarriari buruzko Erregelamendua onestea.

Talde multinazionalentzako eta talde nazional handientzako gutxieneko zergapetze-maila global bat bermatzeko zerga osagarriari buruzko Erregelamendua onesten da; haren testua ondoren txertatu da.

Azken xedapenetako lehena. Arauak emateko gaikuntza.

Gaikuntza ematen zaio tributuen arloan eskumena duen departamentuaren titularrari foru dekretu hau eta bertan jasotzen den erregelamendua garatzeko eta betearazteko beharrezkoak diren xedapen guztiak emateko.

Azken xedapenetako bigarrena. Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra, eta 2023ko abenduaren 31tik aurrera hasten diren zergaldietarako sortuko ditu ondorioak.

TALDE MULTINAZIONALENTZAKO ETA TALDE NAZIONAL HANDIENTZAKO GUTXIENEKO ZERGAPETZE-MAILA GLOBAL BAT BERMATZEKO ZERGA OSAGARRIARI BURUZKO ERREGELAMENDUA

I. TITULUA. EREMU SUBJEKTIBOA

1. artikulua. Irabaziasmorik gabeko erakundeek egiten dituzten jardueren jarduera osagarriak.

1. Zergari buruzko foru legearen 7.1.b).ii) artikuluan xedatutakoaren ondorioetarako, partaidetzapeko entitate baten partaidetza guztia irabazi-asmorik gabeko erakunde baten edo batzuen esku dagoenean, zuzenean edo zeharka, ulertuko da entitate horrek irabazi-asmorik gabeko erakundearen jardueren jarduera osagarriak baino ez dituela egiten baldin eta talde multinazionaleko edo nazional handiko kide diren entitate guztien negozio-zifraren zenbateko garbia -irabazi-asmorik gabeko erakundeei eta zergari buruzko foru legearen 7.1 artikuluaren b) eta c) letretan ezarritako entitateei dagokiena kenduta- honako bi zenbateko hauetako txikiena baino txikiagoa bada:

a) 750 milioi euro, zergaldian.

b) Talde multinazionalaren edo talde nazional handiaren zergaldiko negozio-zifraren zenbateko garbiaren %25.

2. Aurreko apartatuan xedatutakoaren ondorioetarako, zergari buruzko foru legearen 7.1 artikuluaren b) eta c) letretan ezartzen diren entitateen establezimendu iraunkorrek garatutako jarduerak kontuan hartu beharko dira, entitate nagusiek garatutako jarduerekin batera.

3. Zergaldia hamabi hilabetetik gorakoa edo beherakoa denean, 1.a) apartatuan aipatzen den 750 milioi euroko kopuruaren kalkulua egiteko aintzat hartuko da zergari buruzko foru legearen 6.1 artikuluaren bigarren paragrafoan ezarritakoa.

4. Zergari buruzko foru legearen 5.17) artikuluan definitutako entitate publikoetako batek betetzen badu foru lege horren 5.35) artikuluan jasotako irabazi-asmorik gabeko erakundearen definizioa, artikulu honetan xedatutakoa aplikatzen ahalko du bere mendeko entitateek garatzen dituzten jarduera osagarriei dagokienez.

2. artikulua. Asegurumutualitate arautua.

Zergari buruzko foru legearen 44. artikuluan xedatutakoaren ondorioetarako, aseguru-mutualitate arautu batek artikulu horretan xedatutakoa aplikatzen ahalko du baldin eta entitate eratzaile bat bada, inbertsio-entitate edo aseguruen inbertsio-entitate den beste entitate eratzaile bateko partaidetzen titularra dena, eta hautatzen ahalko du inbertsio-entitate edo aseguruen inbertsio-entitate hori entitate gardentzat har dadila, aipatu den artikuluan ezarritako moduan.

Aseguru-mutualitate araututzat hartuko da aseguru-entitate arautua izanik osorik aseguratu guztien jabetzakoa den entitate eratzailea.

II. TITULUA. DOIKUNTZAK ZERGA-OINARRIA ETA ZERGA ESTALI DOITUAK ZEHAZTEAN

3. artikulua. Azken entitate nagusiaren eta talde multinazionaleko edo talde nazional handiko entitate eratzaileen ekitaldi ekonomikoak edo fiskalak bat ez etortzea.

1. Baldin eta talde multinazionaleko edo talde nazional handiko entitate eratzaile baten edo batzuen egoera-orri finantzarioen erreferentziako ekitaldi ekonomikoa ez bada azken entitate nagusiarena, ezabatu beharko da desadostasun hori, taldeko egoera-orri finantzario bateratuak prestatzen direnean desadostasun hori ezabatzeko erabili den metodoa baliatuta; izan ere, ezabatze hori beharrezkoa da entitate eratzaileen irabazi edo galera onargarriak zenbatzeko abiaburu gisa balio duen zergaldiko kontabilitate-emaitza zehazteko, zergari buruzko foru legearen 9.1 artikuluan ezarritako moduan.

2. Baldin eta talde multinazionaleko edo talde nazional handiko entitate eratzaile baten edo batzuen egoera-orri finantzarioen erreferentziako ekitaldi ekonomikoa ez bada azken entitate nagusiarena, eta egoera-orri finantzario horiek sartuta ez badaude taldeko egoera-orri finantzario bateratuetan, zergari buruzko foru legearen 9.2 artikuluan xedatutakoa aplikatzen ahalko da, aipatutako entitate eratzaileen kontabilitate-emaitza zehazteko. Apartatu hau bera aplikatzekoa izanen zaio baterako negozio bati edo baterako negozio baten talde bati, baldin eta haren egoera-orri finantzarioen erreferentziako ekitaldi ekonomikoa ez bada azken entitate nagusiarena.

3. Aurreko apartatuan jasotako kasuetan, entitate eratzaileen eta baterako negozioaren edo baterako negozio baten taldearen kontabilitate-emaitza zehazteko behar diren kalkuluak egiteko, zergari buruzko foru legearen 9.2 artikuluan ezarritako moduan, kontuan hartuko dira egoera-orri finantzario indibidualak, azken entitate nagusiaren ekitaldi ekonomikoaren barruan amaitzen den ekitaldi ekonomikoari dagozkionak.

4. Baldin eta talde multinazionaleko edo talde nazional handiko entitate eratzaile baten edo batzuen erreferentzia-ekitaldia (tributu-aitorpenak aurkezteko, zergapetze nazionalari dagokionez), talde multinazionalaren edo talde nazional handiaren zergaldiaz beste bada, desadostasun hori ezabatu beharko da, taldeko egoera-orri finantzario bateratuak prestatzen direnean desadostasun hori ezabatzeko metodoa baliatuz; izan ere, ezabatze hori beharrezkoa da entitate horien zerga estali doituak zergaldian kalkulatzeko, zergari buruzko foru legearen 17. artikuluan ezarritakoari jarraituz. Apartatu hau aplikatzekoa izanen zaio baterako negozio bati edo baterako negozio baten taldeari baldin eta tributu-aitorpenak (zergapetze nazionalean) aurkezteko erreferentzia-ekitaldia ez bada taldearen zergaldia.

4. artikulua. Doikuntzak, atzerriko negozioetako inbertsio garbiaren estalduragatik eta kiten ondoriozko dirusarrerengatik.

1. Zergari buruzko foru legearen 10. artikuluko 1.c) eta 2.c) apartatuetan xedatutakoaren ondorioetarako, entitate aitortzaileak hautatzen ahalko du, bost urteko eperako, baztertutako kapital-irabazi edo -galeratzat jotzea zergaldian entitate eratzaile baten kontabilitate-emaitzan atzerriko monetan jasotako irabaziak edo galerak, zergari buruzko foru legearen 9.1 artikuluan ezarritako moduan, baldin eta honako baldintza hauek betetzen badira:

a) Atzerriko monetan izandako irabaziak edo galerak estaldura-tresnei egozteko modukoak badira; tresna horiek atzerriko negozioetan egindako inbertsio garbien kanbio-tasaren arriskua estaliko dute zenbait entitateren bitartez, zeinetan partaidetza adierazgarria baitu entitate aitortzaileak.

b) Aurreko letran aipatzen diren irabaziak edo galerak kontabilizatu behar badira talde multinazionalaren edo talde nazional handiaren urteko kontu bateratuetan, "beste emaitza global bat" partidan.

c) Estaldura-tresna eraginkorra dela jotzen bada, azken entitate nagusiaren egoera-orri finantzario bateratuak egiteko erabilitako finantza-kontabilitateko arau onargarriaren edo baimenduaren arabera.

Entitate aitortzaileak apartatu honetan ezartzen den aukera baliatu badu, baztertutako irabaziei lotutako edozein zerga estali salbuetsita geratuko da zergaldiko zerga estali doituetatik, zergari buruzko foru legearen 17.3.a) eta 18.5.a) artikuluetan xedatutakoaren arabera.

2. Zergari buruzko foru legearen 10.2 artikuluan xedatutakoaren ondorioetarako, entitate eratzaile aitortzaileak aukera izanen du zergaldian entitate eratzaile baten kontabilitate-emaitzan islatutako kiten ondoriozko diru-sarrerak ez zenbatzeko, aipatutako foru legearen 9.1 artikuluan ezarritako moduan, entitate eratzailearen zergaldiko irabazi edo galera onargarriak kalkulatzeko, baldin eta inguruabar hauetako edozein gertatzen bada:

a) Kita egiten bada aplikatzekoa den konkurtso-araudi nazionalean ezarritako kaudimengabezia-prozedura baten esparruan, betiere dagokion jurisdikzioko auzitegi batek edo beste organo judizial batek gainbegiratzen badu prozedura edo kaudimengabezia-administratzaile independente bat izendatzen bada prozeduran. Kasu horretan, irabazi edo galera onargarrien zenbaketatik kanpo geratuko dira hirugarren batzuen zorrak zein hitzarmen bereko esparruan aske geratutako alderdi lotuen zorrak.

b) Kita hitzarmen baten ondorio bada eta zentzuzkoa bada ondorioztatzea ezen, hirugarrenen zorrak hitzarmen horren bidez barkatu ezean, zorduna kaudimengabezia-egoerara pasako zela akordioaren ondorengo hamabi hilabeteen barruan. Hitzarmen horretan, hartzekodunak edo hartzekodunek ezin dute loturarik eduki zordunarekin. Kasu horretan, irabazi edo galera onargarrien zenbaketatik kanpo geratuko dira hirugarren batzuekiko zorrak zein hitzarmen bereko esparruan aske geratutako alderdi lotuen zorrak.

c) Zordunaren pasiboaren zenbateko osoa handiagoa bada haren aktiboen merkatu-balioa baino (kitaren data baino lehentxeago zehaztua), irabazi edo galera onargarrien zenbaketatik kanpo uzten ahalko dira, bakar-bakarrik, lotu gabeko hartzekodunekiko zorren kiten ondoriozko diru-sarrerak, honako zenbateko hauetako txikienean:

1. Zordunak bere aktiboen merkatu-balioaren gainean daukan pasiboaren gaindikina (balio hori kitaren data baino lehentxeago zehaztua).

2. Kontabilitateaz kanpoko doikuntza negatiboaren zenbatekoa, doikuntza hori egin izan behar bada kitaren ondorioz zordunaren zergapetze pertsonalean, betiere zergadunaren jurisdikzioko tributu-legeriaren arabera.

Aurreko a) eta b) letretan ezarritako kasuetan, irabazi edo galera onargarrien zenbaketatik kanpo uzten ahalko dira hirugarren batzuekiko edo alderdi lotuekiko zorren ondoriozko kitei dagozkien diru-sarrerak. Aurreko c) letran ezarritako kasuan, bakarrik uzten ahalko dira zenbaketatik kanpo zordunarekin loturarik ez duten hartzekodunekiko zorren ondoriozko kitei dagozkien diru-sarrerak.

c) letran xedatutakoa kasu honetan baino ezin izanen da aplikatu: a) edo b) letretan ezarritako inguruabarrak gertatzen ez direnean.

Kita baten ondoriozko diru-sarrerak kanpo utzi izan balira zergaldiko irabazi edo galera onargarrien zenbaketatik, apartatu honetan xedatutako moduan, kanpo utzitako irabaziei lotutako edozein zerga estali ere zergaldiko zerga estali doituetatik kanpo utziko da, zergari buruzko foru legearen 17.3.a) eta 18.5.a) artikuluetan xedatutakoaren arabera.

5. artikulua. Substantzia ekonomikoari lotutako errenten bazterketa.

1. Zergari buruzko foru legearen 14. artikuluan xedatutakoaren ondorioetarako, hurrengo apartatuetan jasotzen diren arauak aplikatuko dira substantzia ekonomikoari lotutako errenten bazterketa kalkulatzeko.

2. Entitate eratzaile bateko langile bat langile onargarri gisa zenbatuko da enplegatzaile den entitate eratzailea kokatuta dagoen jurisdikzioan, baldin eta langileak lan-denboraren %50 baino gehiago jurisdikzio horretan betetzen badu.

3. Langile onargarriak nor diren zehazteko, zergari buruzko foru legearen 14.1.a) artikuluan ezarritakoaren arabera betiere,kontuan hartu beharko dira, bai pertsona fisiko diren eta talde multinazionalaren edo talde nazional handiaren ohiko funtzionamendu-jardueretan parte hartzen duten kontratista independenteak, bai laneratze- edo enplegu-enpresa bateko langile diren pertsona fisikoak, zeinek eguneroko jarduna egiten baitute talde multinazionalaren edo talde nazional handiaren kontrolaren eta zuzendaritzaren pean.

4. Ondare-tresnetan oinarritutako ordainsariak itundu diren kasuetan, foru lege horren 10.3 artikuluan xedatutako aukera baliatzeak ez dio eraginen entitate eratzaile baten nominen bazterketari, eta kontuan hartu beharko da ordainsari horri dagokion gastua, entitate eratzailearen egoera-orri finantzarioetan erregistratutakoa.

5. Ondasun higiezintzat hartzen ez den aktibo material onargarri bat aktibo material onargarri gisa zenbatuko da, zergaldiaren erdia edo gehiago non dagoen kokatuta, jurisdikzio horretan.

6. Aldi berean jurisdikzio batean baino gehiagotan kokatutako aktibo material onargarri bat aktibo material onargarri gisa zenbatuko da, modu proportzionalean, zergaldian non dagoen kokatuta, jurisdikzio horietan.

7. Zergari buruzko foru legearen 14.1.c).iii) artikuluan xedatutakoaren ondorioetarako, aktibo material onargarritzat hartuko da errentariaren eskubidea kokatuta dagoen jurisdikzioan dauden aktibo materialak erabiltzeko. Hala ere, errentamendu operatiboa bada, lagatako aktibo materiala erabiltzeko eskubidea aktibo material onargarritzat hartuko da errentariaren egoitzan, baldin eta errentariak dagokion erabilera-eskubidea erregistratu badu bere egoera-orri finantzarioetan eta aktibo materiala errentaria kokatuta dagoen jurisdikzioan badago. Talde multinazional bereko edo talde nazional handi bereko bi entitate eratzaile desberdinek edo talde multinazional bateko entitate eratzaile batek eta talde nazional handi bateko beste batek zenbatu ez dezaten aktibo material bera, zergari buruzko foru legearen 14.4 artikuluan aipatzen diren aktibo materialen bazterketaren kalkuluan, aktibo horrek sortzen duen substantzian oinarritutako bazterketaren zenbatekoa honako hau izanen da:

a) Errentariarentzat, zergaldiaren hasieran eta amaieran egoera-orri finantzarioetan erregistratutako erabilera-eskubidearen kontabilitate-balio garbiaren batezbestekoa.

b) Errentatzailearentzat, zergaldiaren hasieran eta amaieran errentan hartutako aktiboaren kontabilitate-balio garbiaren batezbestekoak aurreko letran ezartzen den zenbatekoaren gainean duen gaindikina.

Jurisdikzio berean kokatuta dauden talde multinazional bereko edo talde nazional handi bereko entitate eratzaileen arteko finantza-errentamenduaren edo errentamendu operatiboaren kasuan, ezabatzeengatiko doikuntzak egin ondoren zehaztu beharko da aktibo materialen bazterketaren zenbatekoa; beraz, errentatzaileak zenbatuko du osorik aktibo material onargarri gisa zergaldiaren hasieran eta amaieran errentan hartutako aktiboaren kontabilitate-balio garbiaren arteko batezbestekoa, betiere errentatzailea kokatuta dagoen jurisdikzioan badago aktibo hori.

8. Zergari buruzko foru legearen 14.1.c).iv) artikuluan xedatutakoaren ondorioetarako, aktibo material onargarritzat hartuko dira administrazio-emakidak, lizentziak edo antzeko administrazio-tresnak, kontuan hartu gabe aktibo ukiezin edo finantzario gisa erregistratu behar diren kontabilitatean, baldin eta entitate emakidadunak edo lizentziadunak lizentzia edo antzeko eskubidea eskuratzeko gastuak egin baditu eta eskuratutako eskubideak ustiatzeko aktibo materialetan inbertsio adierazgarriak egin baditu.

Hala ere, entitate emakidadunak edo lizentziadunak bereizita erregistratu beharko balu egoera-orri finantzarioetan aurreko paragrafoan aipatutako aktibo finantzarioa ez den beste kobrantza-eskubide bat, azpiko aktibo materialaren ustiapenetik eratorritakoa, eskubide hori ez litzateke aktibo material onargarri gisa zenbatuko.

9. Aktibo material onargarri bat narriatu bada, egoera-orri finantzario bateratuak egiteko erabilitako kontabilitate-irizpideen arabera, aktiboaren kontabilitate-balioa narriaduraren zenbatekoarekin murriztuko da, eta hura itzultzeko zenbatekoarekin -halakorik sortu bada- gehituko da, baina aktibo material onargarriaren kontabilitate-balioak ezin izanen du, itzultze horren ondorioz, narriaduraren aurretik zuen kontabilitate-balioa gainditu.

10. Entitate eratzaile baten langile bat edo aktibo material bat langile onargarri gisa edo aktibo material onargarri gisa zenbatzen bada %50ean edo ehuneko txikiagoan entitatea kokatuta dagoen jurisdikzioan, entitate eratzaileak aukera izanen du substantzia ekonomikoari lotutako errenten bazterketa kalkulatzeko langilea edo aktibo materiala jurisdikzio horretan benetan egon den denboraren proportzioan, aurreko 2. eta 5. apartatuetan xedatutakoari jarraikiz.

6. artikulua. Kreditu fiskalen tratamendua.

1. Artikulu honetan xedatutakoaren ondorioetarako, merkatuan transferitu daitekeen kreditu fiskaltzat hartuko da titularrak zerga estaliak murrizteko erabil dezakeen kreditu fiskala, betiere honako baldintza hauek betetzen badira:

a) Legezko transferibilitate-estandarra: baldintza hau betetzat joko da kreditu fiskala sortu duen entitateak lotu gabeko entitate bati transferitu badiezaioke kreditua sortzen den zergaldian edo, hala badagokio, zergaldi hori amaitu eta hurrengo hamabost hilabeteen barruan. Kredituaren eskuratzaileak berriro eskualdatzen badu, transferibilitate-estandarra betetzat joko da entitateak kreditua sortu zuen antzeko moduan egin badaiteke eskualdaketa, kreditua eskuratu zen zergaldi berean.

b) Merkatu-estandarra: irizpide hau betetzat jotzeko, kreditu fiskala sortu duen entitateak lotu gabeko entitate bati transferitu behar dio, kreditua sortu zen zergaldia amaitu eta hurrengo hamabost hilabeteen barruan, merkatuko gutxieneko prezioan edo handiagoan. Estandarra kreditu-eskuratzailearen kasuan betetzat joko da, baldin eta kreditua lotu gabeko entitate bati eskuratu bazitzaion, merkatuko gutxieneko prezioan edo handiagoan.

Apartatu honetan xedatutakoaren ondorioetarako, ulertuko da ezen kreditu fiskala sortzen duen entitatea eta entitate eskuratzailea lotuta daudela, baldin eta haietako batek, zuzenean edo zeharka, bestearen kapitalaren eta boto-eskubideen %50 badu gutxienez, edo beste pertsona batek, zuzenean edo zeharka, bi entitateen kapitalaren eta boto-eskubideen %50 badu gutxienez. Nolanahi ere, bi entitateak lotuta egonen dira baldin eta batak bestearen kontrola badu edo biak pertsona berak edo berek kontrolatzen baditu edo kontrolatzen badituzte, gertatutako egitateen arabera.

Apartatu honetan xedatutakoaren ondorioetarako, kreditu fiskal baten merkatuko gutxieneko preziotzat hartuko da kreditu fiskalaren unean uneko balio garbiaren %80. Balio hori zehazteko kontuan hartuko da kreditu fiskala epemuga berarekin edo antzekoarekin (inoiz ere ez bost urtetik gorako epearekin) eman duen jurisdikzioko gobernuak jaulkitzen duen zor-tresna batek epemugan duen errendimendua, kreditua transferitu den aldian, eta, transferitu ezean, kreditua sortu zen aldian.

2. Kreditu fiskal transferigarritzat hartuko da sortzen duen entitatearen egoitzan transferigarri den kreditu fiskala, baina merkatuan transferitu daitekeen kreditu fiskala izateko baldintzak betetzen ez dituena, eta, eskuratzailearen egoitzan, berriz, merkatuan transferitu daitekeen kreditu fiskal bat ez dena.

3. Merkatuan transferitu daitekeen kreditu fiskala kreditu fiskal itzulgarri onargarritzat hartuko da, zergari buruzko foru legearen 5.1. artikuluan xedatutakoaren ondorioetarako, arestian adierazitako ezaugarriak kontuan hartuta. Entitate eratzaile baten irabazi edo galera onargarriak kalkulatzeko, diru-sarrera gisa zenbatuko dira kreditu fiskal itzulgarri onargarriak zein merkatuan transferitu daitezkeen kreditu fiskalak.

Kreditu fiskal baten zati bat bakarrik har badaiteke zenbateko itzulgarri edo transferigarritzat, aztertu egin beharko da zati horretan itzulgarri onargarritzat edo merkatuan transferigarritzat jotzeko baldintzak betetzen diren. Hala bada, aurreko paragrafoan xedatutakoa aplikatuko da proportzio horretan.

Kreditu fiskal itzulgarri onargarria aktibo bat eskuratu, fabrikatu edo eraikitzearen ondorio bada, eta kreditu fiskala sortzen duen entitate eratzaileak, kontabilitate-aldetik, aktiboaren balioa murriztu badu kreditu fiskal horretan, edo kreditua diru-sarrera geroratu gisa aitortu badu eta aktiboaren bizitza erabilgarriaren arabera egotzi badu, kontabilitate-tratamendu berari jarraitu beharko zaio kreditu fiskal itzulgarri onargarri horri dagokionez, kreditua sortzen duen entitate eratzailearen irabazi edo galera onargarriak zehazteko.

4. Merkatuan transferitu daitekeen kreditu fiskalaren zenbatekoa, zeina diru-sarrera gisa zenbatu beharko baita zergaldian entitate eratzaile baten irabazi edo galera onargarriak kalkulatzeko, honako hau izanen da:

a) Kreditua sortzen duen entitatearentzat, kredituaren balio nominala, salbu eta kreditua sortu deneko zergaldia amaitu eta hurrengo hamabost hilabeteen barruan eskualdatu badu; kasu horretan, eskualdatze-prezioa izanen da. Hala ere, hamabost hilabeteko epe hori igaro ondoren eskualdatu badu, apartatu honen arabera diru-sarreratzat hartu den kredituaren balio nominalaren eta eskualdatze-prezioaren arteko aldea galera gisa tratatuko da, entitate eratzailearen irabazi edo galera onargarriak zehazteko, kreditua eskualdatzen den zergaldian.

b) Ondorioz bere zerga estaliak murriztu dituen kredituaren entitate eskuratzailearentzat, diru-sarrera hau izanen da: kredituaren balio nominalaren eta eskuratze-prezioaren arteko aldea, zerga estalien murrizketari dagokion proportzioan, salbu eta entitate horrek berriro eskualdatzen badu; kasu horretan, eragiketa horretatik eratorritako irabazia edo galera izanen da diru-sarrera.

5. Zergari buruzko foru legearen 17.2 artikuluan xedatutakoa eragotzi gabe, entitate eratzaile baten zergaldiko zerga estaliak gehitu eginen dira kreditu fiskal itzulgarri onargarriaren edo merkatuan transferitu daitekeen kreditu fiskalaren zati honekin: zergaldiko zerga arruntagatiko gastua murriztu duen zatian.

6. Zergari buruzko foru legearen 5.2) artikuluan aipatzen diren kreditu fiskal itzulgarri ez-onargarriak eta artikulu honetan aipatzen diren kreditu fiskal transferigarriak ez dira zenbatuko diru-sarrera gisa, entitate eratzaile baten irabazi edo galera onargarriak kalkulatzeko. Entitate eratzaile baten egoera-orri finantzarioetan diru-sarrera gisa erregistratu badira, diru-sarrera horiek ezabatu egin beharko dira zerga osagarriaren zerga-oinarria kalkulatzeko.

7. Zergari buruzko foru legearen 17.3 artikuluan xedatutakoa eragotzi gabe, entitate eratzaile baten zergaldiko zerga estaliak honela gutxituko dira:

a) Zerga arruntagatiko gastuaren murrizketa gisa erregistratu ez den kreditu fiskal itzulgarri ez-onargarriaren zatiarekin.

b) Entitate eratzaile bati itzulitako edo egotzitako zerga estalien edozein zenbatekorekin, baldin eta galera-irabazien kontuan ez bada erregistratu zerga arruntagatiko gastuaren doikuntza gisa, kasu honetan izan ezik: kreditu fiskal itzulgarri onargarri batekin edo merkatuan transferitu daitekeen kreditu fiskal batekin lotuta dagoenean.

8. Aurreko apartatuko b) letrari dagokionez, entitate eratzaile baten zergaldiko zerga estalien gutxitze gisa tratatu beharko den zenbatekoa honako hau izanen da:

a) Kreditua sortzen duen entitatearen kasuan, zergaldiaren barruan amaitzen den ekitaldi fiskalari dagokion zerga-zorra (zergapetze nazionalean) murrizteko erabili den kredituaren zenbatekoa eta, kreditua transferitzen bada, zergaldian jasotako zenbateko guztiak.

b) Entitate eskuratzailearen kasuan, kredituaren eskuratze-prezioaren gainean izandako balioaren edozein gaindikin, zergaldi barruan amaitzen den ekitaldi fiskalari dagokion zerga-zorra (zergapetze nazionalean) murrizteko erabilitako proportzioan.

c) Entitate eskuratzailearen kasuan, eskualdatzetik eratorritako edozein irabaziren zenbatekoa, kreditu fiskala zergaldian eskualdatzen bada. Halaber, eskualdatzearen ondoriozko galera oro sartu beharko da zergaldi horretako galera eta irabazi onargarrien zenbaketan.

9. Zergari buruzko foru legearen 21.1 artikuluan xedatutakoa ezertan eragotzi gabe aplikatuko da aurreko bi apartatuetan ezarritakoa.

7. artikulua. Zerga geroratuengatiko doikuntzaren zenbateko osoa.

1. Zergari buruzko foru legearen 18.2 artikuluan xedatutakoaren ondorioetarako, entitate eratzaile baten zerga geroratuagatiko gastuaren edo diru-sarreraren zenbatekoa zehaztuko da entitate eratzailearen zergaldiko kontabilitate-emaitzatik abiatuta, talde barruko eragiketak ezabatzeagatiko edozein bateratze-doikuntza egin aurretik, azken entitate nagusiaren egoera-orri finantzario bateratuak egiteko erabilitako finantza-kontabilitateko arau onargarriaren edo baimenduaren arabera, hala ezartzen baitu zergari buruzko foru legearen 9.1 artikuluak.

2. Aurreko apartatuan xedatutakoa zergari buruzko foru legearen 9.2 artikuluan ezarritako kasuetan ere aplikatuko da.

3. Zergari buruzko foru legearen 18.4 artikuluan xedatutakoaren ondorioetarako, galera bati dagokion zerga geroratuagatiko aktibotzat hartuko da honako honi dagokiona:

a) Denbora-diferentzia kengarri bati dagokiona.

b) Ondorengo ekitaldietan galera fiskalak konpentsatzeko eskubideari dagokiona.

4. Zergari buruzko foru legearen 18.5.c) artikuluan xedatutakoaren ondorioetarako, honako hau hartuko da zerga geroratuagatiko aktibo baten kontabilitatean jasotzeko edo baloratzeko doikuntzatzat: kontabilitatean jasotzeko irizpideak ez betetzeagatik aldez aurretik aitortu ez den aktibo horren erregistroa.

5. Zergari buruzko foru legearen 19.4 artikuluan jasotako kasuan, behin zerora murriztu denean aplikatzeko dagoen eta galera onargarri garbi bati dagokion zerga geroratuagatiko aktiboaren saldoa, jurisdikzioko zerga geroratuagatiko aktiboen eta pasiboen zenbatekoa, hala badagokio, hau izanen da: aurreko zergaldietan zergari buruzko foru arauaren lehen xedapen iragankorrean eta 18. artikuluan xedatutakoa aplikatzekoa izan balitz kalkulatuko zena.

8. artikulua. Zergaldiko zerga estali doitu negatiboen tratamendua, irabazi onargarri garbiak lortzen diren jurisdikzio batean.

Zergari buruzko foru legearen 17.5 artikuluan xedatutakoaren ildotik, baldin eta jurisdikzioan irabazi onargarri garbiak lortzen diren zergaldian zerga estali doituen zenbatekoa negatiboa bada jurisdikzioan, ez da kontuan hartuko zerga estali doitu negatiboen zenbatekoa, zergaldi horretan jurisdikzioko zerga-tasa efektiboa kalkulatzean; aitzitik, zenbateko hori ondorengo zergaldietara eramanen da, eta, hala, murriztu eginen ditu hurrengo zergaldiko zerga estali doituak, deuseztatu arte. Gaindikina, egonez gero, hurrengo zergaldietan aplikatuko da.

9. artikulua. Kapitalirabaziak edo galerak sartzeko aukera eta entitate gardenetako partaidetza kualifikatuen tratamendua.

1. Artikulu honetan xedatutakoaren ondorioetarako, honako definizio hauek ematen dira:

a) "Entitate garden bateko partaidetza adierazgarri eta ez-kualifikatuaren ondoriozko irabazia edo galera": beste entitate baten funts propioetako partaidetzaren ondoriozko edozein irabazi edo galera; partaidetza adierazgarritzat hartzeko zergari buruzko foru legearen 10.1.b).i) artikuluan ezarritakoa hartuko da kontuan, eta hurrengo letran aurreikusitako entitate garden bateko partaidetza kualifikatuaren definizioa ez betetzea.

b) "Entitate garden bateko partaidetza kualifikatua": entitate garden batean egindako inbertsio bat, zerga-ondorioetarako kapitaleko edo funts propioetako partaidetza gisa tratatzen dena, edo halakotzat hartuko zena entitate gardena kokatuta dagoen jurisdikzioan baimendutako finantza-kontabilitateko arauaren arabera, baldin eta:

1. Entitate gardenaren aktiboak, pasiboak, diru-sarrerak, gastuak eta diru-fluxuak ez badira bateratzen integrazio globaleko metodoaren bidez talde multinazionaleko edo talde nazional handiko azken entitate nagusiak egindako egoera-orri finantzario bateratuetan; eta,

2. Inbertsioa osorik edo zati batean berreskuratzeko, zergari buruzko foru legearen 5.1) artikuluaren arabera kreditu fiskal itzulgarri onargarriak ez diren kreditu fiskalak egozten badira.

2. Irabazi edo galera onargarriak zehazteko, aurreko 1.a) apartatuan aipatutako entitate garden bateko partaidetza adierazgarri ez-kualifikatua bada, entitate eratzaile aitortzaileak aukera hauek izanen ditu:

a) Behin zergari buruzko foru legeren 10.2 artikuluan ezarritako doikuntzak eginda -artikulu horretako c) letran jasotakoa izan ezik-, honako irabazi edo galera hauetako edozein sartzen ahalko du:

1. Partaidetzaren arrazoizko balioaren edo balio-narriaduraren metodoa aplikatuz sortzen diren kontabilitate-irabaziak edo -galerak, baldin eta partaidetzaren titularrak zerga ordaindu badu arestian adierazitako magnitudeen aldaketengatik, eta zerga arruntagatiko gastu edo diru-sarrera bat galera-irabazien kontuan erregistratu badu; edo, bestela, titular horrek bere zergapetze pertsonalean gauzatze-metodoa aplikatzen badu eta zerga geroratuagatiko gastu edo diru-sarrera bat erregistratzen badu galera-irabazien kontuan -gastu edo diru-sarrera hori egokituko zaie halako magnitudeetan izandako galera edo irabazien araberako aldaketei (zentzuzko balioa) edo partaidetzaren balio-narriadurari-.

Aurreko paragrafoan xedatutakoa erregelamendu honen 7.3 artikuluan ezarritakoa kontuan hartuta aplikatuko da.

2. Baliokidetzan jartzeko metodoaren arabera kontabilizatu den partaidetza-eskualdatzearen ondoriozko irabaziak edo galerak; eta,

3. Partaidetza-eskualdatzearen ondoriozko irabaziak edo galerak, eskualdatzailearen zergapetze pertsonalaren zerga-oinarrian sartuta daudenak, alde batera utzita salbuespeneko metodo bat, kuotan kenkaria aplikatzeko metodo bat edo antzeko tresna bat aplikatu zaien zenbatekoak; eta

b) Aurreko letran ezarritako magnitudeekin lotutako zerga arrunt eta geroratu guztiak sartzen ahalko ditu zergaldiko zerga estali doituen zenbatekoan, ezertan eragotzi gabe zergari buruzko foru legearen 17.3.a) eta 18.5.a) artikuluetan xedatutakoa.

Apartatu honetan ezartzen den aukera bost urteko aldirako baliatuko du entitate eratzaile aitortzaileak, jurisdikzio bakoitzeko. Aukera hori ezin izanen da errebokatu kasu honetan: entitate garden bateko partaidetza adierazgarri eta ez-kualifikatu batek galera bat sortu balu eta galera hori zenbatu izan balitz artikulu honetan ezarritako aukera indarrean zegoen zergaldi bateko irabazi edo galera onargarrietan.

3. Entitate garden batek zergaldian sortu dituen kreditu fiskalak fiskalki gardena den entitateko partaidetzen titular zuzenei nahiz zeharkakoei esleituko zaizkie, ondorio fiskaletarako gardena den egitura baten bitartez, kreditu horien izaera kontuan hartuta zergari buruzko foru legean ezartzen zaien tratamenduaren arabera.

4. Entitate garden bateko partaidetza kualifikatua zerora murriztuko da, honako zenbateko hauetan:

a) Partaidetzaren titularrari egotzitako kreditu fiskalen zenbatekoa, kreditu horiek hurrengo letran ezarritakoez bestelakoak direlarik.

b) Partaidetzaren titularrari egotzitako zerga-oinarri negatiboen zenbatekoa, titularrari aplikatu beharreko karga-tasaz biderkatua.

c) Partaidetzaren titularrari banatutako edo itzulitako kopuruen zenbatekoa.

d) Partaidetza osorik edo zati batean saltzearen ondoriozko zenbatekoa.

5. Aurreko apartatuko a) edo b) letretan ezarritako kopuruak, kreditu fiskal itzulgarri onargarriak ez badira eta entitate garden bateko partaidetza kualifikatu baten zuzeneko nahiz zeharkako titularrari egozten bazaizkio ondorio fiskaletarako gardena den egitura baten bitartez, honela zenbatuko dira: partaidetzaren titularraren zergaldiko zerga estali doitu gisa, baldin eta zenbateko horiek kontabilitatean murriztu balute zergagatiko gastua.

6. Aurreko 4. apartatuan jasotako edozein zenbateko, entitate bateko partaidetza kualifikatua ezereztatu ondoren egotzi edo jaso bada, ez da zenbatuko partaidetzaren titularraren zerga estali doitu gisa.

Hala ere, c) eta d) letretan ezarritako zenbatekoak eta kreditu itzulgarri onargarriak ez dira zenbatuko partaidetzaren titularraren zerga estali doitu gisa; hori hala izanen da baldin eta titular horri egotzitako zenbatekoa aurretik zerga estali doitu gisa zenbatu bada.

10. artikulua. Baztertutako kapitalirabaziengatiko edo galerengatiko doikuntza eta baztertutako dibidenduak.

1. Finantza-tresna konposatuak direla-eta zergari buruzko foru legearen 10.1.b) artikuluan xedatutakoaren ondorioetarako, baztertutako dibidendutzat bakarrik hartuko da finantza-tresna konposatuaren ondare-osagaiari dagokion zenbatekoa.

2. Zergari buruzko foru arauaren 10.1.b) artikuluan xedatutakoaren ondorioetarako, finantza-tresna baten jaulkitzailea eta inbertitzailea talde bereko kide badira, jaulkitzaileak finantza-tresna horri emandako kalifikazio bera eman beharko dio inbertitzaileak.

Ez da baztertutako dibidendutzat hartuko entitate eratzaile batek jaulkitako finantza-tresna batetik eratorritakoa, baldin eta haren banaketak gastua sortzen badu beste entitate eratzaile batean, eta gastu hori azken entitate horren zergaldiko galera edo irabazi onargarrietan zenbatu bada, bi entitateak talde berekoak direnean.

11. artikulua. Aseguruentitateen irabazi edo galera onargarriak zehazteko doikuntzak.

1. Zergari buruzko foru legearen 10.2.b) artikuluan xedatutakoaren ondorioetarako, ez da gastutzat hartuko, aseguru-entitate eratzaile baten irabazi edo galera onargarriak zehazteko orduan, entitate horren erreserbetan izandako aldaketa, baldin eta polizaren titularraren izenean mantentzen den balio baten dibidendu baztertuaren -kudeaketa-komisioa kenduta- baliokidea bada aldaketa hori.

2. Zergari buruzko foru legaren 10.2.c) artikuluan xedatutakoaren ondorioetarako, ez da gastutzat hartuko, aseguru-entitate eratzaile baten irabazi edo galera onargarriak zehazteko orduan, entitate horren erreserbetan izandako aldaketa, baldin eta polizaren titularraren izenean mantentzen den balio baten baztertutako kapital-irabazi edo -galera baten baliokidea bada aldaketa hori.

3. Zergari buruzko foru legearen 10.11 artikuluan xedatutakoa lehen mailako kapital murriztua diren tresnei ere aplikatuko zaie.

Apartatu honetan ezarritako ondorioetarako, honako hau hartuko da lehen mailako kapital murriztutzat: aseguru-sektorearen zuhurtziazko betekizun arautzaile batzuei jarraituz entitate eratzaile batek jaulkitzen duen tresna, zeina kapital bihur baitaiteke edo amortizatzen baita aurretik hitzartutako inguruabar bat gertatzen bada. Lehen mailako kapital murriztuak, gainera, beste ezaugarri batzuk izanen ditu, finantza-krisiaren kasuan galerak xurgatzen laguntzeko diseinatuak.

12. artikulua. Nazioarteko itsas garraioaren ondoriozko errenta kalkulutik bazter uztea.

Zergari buruzko foru legearen 11.1.a)v) artikuluan xedatutako ondorioetarako, baterako negoziotzat hartuko da nazioarteko itsas trafikoan bidaiariak edo zama ontzien bidez garraiatzeko baterako ustiapena, zeinean entitate eratzaileak parte hartzen baitu.

13. artikulua. Azken entitate nagusi gardena.

Zergari buruzko foru legearen 40.2.b) artikuluan xedatutakoaren ondorioetarako, azken entitate nagusiaren zerga estali doituen zenbateko agregatua hau izanen da: azken entitate nagusiak eta fiskalki gardena den egituraren parte diren gainerako entitateek ordaindutako zerga estali doituen zenbateko agregatua.

14. artikulua. Banaketaren gaineko tributusistema onargarriak.

Zergari buruzko foru legearen 42.7 artikuluan xedatutakoa aplikatu ondoren, jarraian zehazten diren zenbatekoak biderkatu beharko dira unitateari apartatu horretako bigarren paragrafoan aipatzen den koefizientea kentzearen ondoriozko zenbatekoaz, jurisdikzioko ustezko banaketaren gaineko zerga berreskuratzeko kontu bat egon zen urte bakoitzeko; hona zenbatekook: jurisdikzioko ustezko banaketaren gaineko zerga berreskuratzeko kontuko zenbatekoak, jurisdikzioko galera eta irabazi onargarrien zenbatekoak, jurisdikzioko zerga estali doituen zenbatekoak eta jurisdikzioko substantzia ekonomikoari lotutako errenten bazterketaren zenbatekoa.

III. TITULUA. ZERGA OSAGARRIAREN KALKULUA

15. artikulua. Errentak sartzeko erregela aplikatzea, talde multinazional edo talde nazional handi batean sartzen eta taldeotatik baztertzen diren entitate eratzaileen kasuan.

Zergari buruzko foru legearen 36.1.g) artikuluan xedatutakoa orobat aplikatuko da eskuratze-zergaldian bi talderen edo gehiagoren mendeko entitate eratzailea entitate nagusi bat bada, azken entitate nagusiaz bestelakoa; kasu horretan, bereiz aplikatu beharko du errentak sartzeko erregela, talde horietako bakoitzean zerga-maila txikia duten entitateei esleitu dakiekeen zerga osagarrian daukan partaidetzaren proportzioan, zergari buruzko foru legearen 6.3 artikuluak ezartzen duen bezala.

IV. TITULUA. ZERGA OSAGARRIAREN AITORPEN INFORMATIBOA ETA BESTELAKO KOMUNIKAZIOAK

I. KAPITULUA. XEDAPEN OROKORRAK

16. artikulua. Gaikuntza.

Zergari buruzko foru legearen 47. artikuluan ezarritako aitorpen informatiboaren eredua zerga arloan eskumena duen departamentuko titularraren foru agindu bidez onetsiko da.

17. artikulua. Aitorpen informatiboaren edukia eta aurkezteko epea.

1. Zerga osagarriari buruzko aitorpen informatiboak zergari buruzko foru legearen 47.4 artikuluan aipatzen den informazioa bilduko du, bai eta erregelamendu honen II., III., IV. eta ondorengo kapituluetan jasotakoa ere.

2. Aurrekoa gorabehera, baldin eta entitate eratzaile bat Espainian kokatuta badago eta azken entitate nagusia hirugarren jurisdikzio batean, zeinetan aplikatzen diren arauak baliokidetzat baloratu baitira zergari buruzko foru legearen 54. artikuluarekin bat, entitate eratzaileak edo izendatutako toki entitateak zerga osagarriari buruzko aitorpen informatibo bat aurkeztuko du, zergari buruzko foru legearen 47.5 artikuluan aipatzen den informazioa jasoko duena.

3. Zerga administrazioari aurkeztu beharko zaizkio aitorpen informatiboa eta hurrengo artikuluan ezartzen denaz bestelakoa den eta egoki den beste edozein dokumentazio, zergaldiaren azken egunetik hamabost hilabete pasatzen direnean, hilabete horren azken egunean beranduenez.

18. artikulua. Entitate aitortzailearen komunikazioa.

1. Espainian kokatuta dauden entitate eratzaile guztiek, zergari buruzko foru legearen 47. artikuluan ezarritako aitorpen informatiboa aurkezteko betebeharra badute, honako hauek jakinarazi beharko dizkiote zerga administrazioari, aitorpen informatibo hori aurkezteko epea amaitu baino hiru hilabete lehenago:

a) Azken entitate nagusiaren identifikazioa eta zer herrialde edo lurraldetan dagoen kokatuta, entitate horrek aurkeztu behar badu aitorpen informatiboa, edo, bestela, aitorpen informatiboa aurkezteko entitate bat izendatzen bada, haren identifikazioa eta zer herrialde edo lurraldetan kokatuta dagoen.

b) Zergaldiaren hasiera- eta amaiera-datak.

c) Aitorpen informatiboa non aurkeztuko duen, jurisdikzio horren identifikazioa.

d) Zergadunaren ordezkoaren identifikazioa (zergari buruzko foru legearen 6.5 artikuluan aipatzen denarena).

2. Aurreko apartatuan ezarritako betebeharra komunikazio bakar bat aurkeztuta joko da betetzat, hartan jasotzen bada Espainian kokatuta dauden eta talde multinazional edo talde nazional handi bateko kide diren entitate eratzaile guztiei buruzko informazioa.

3. Zerga arloan eskumena duen departamentuko titularraren foru agindu bidez onetsiko da entitate aitortzailearen komunikazioaren eredua.

19. artikulua. Informaziotrukea talde multinazionalen kasuan.

Hitzarmen multilateralaren bidez edo Espainiako Erresumak beste estatu edo jurisdikzio batzuekin sinatzen dituen alde biko hitzarmenen edo akordio multilateralen bidez gauzatuko da talde multinazionalen arteko informazio-trukea, zergari buruzko foru legearen 47. artikuluan jasotzen den informazio-truke automatikoa bermatzeko.

II. KAPITULUA. TALDE MULTINAZIONALAREN EDO TALDE NAZIONAL HANDIAREN INFORMAZIOA

20. artikulua. Entitate aitortzailearen identifikazioa eta taldeari buruzko informazio orokorra.

1. Aitorpen informatiboan entitate aitortzailearen identifikazioa adieraziko da, eta, baita ere, talde multinazionalari edo talde nazional handiari buruzko informazio orokorra eta kontabilitatekoa.

2. Hasteko, entitate aitortzailea identifikatu beharko da, honako hauek adierazita: entitatearen izena, identifikazio fiskaleko zenbakia, kokatuta dagoen jurisdikzioa eta zergari buruzko foru legearen xedapenen arabera duen kategorizazioa.

3. Talde multinazionalari edo talde nazional handiari buruzko informazio orokorra ere jaso beharko du, bereziki, taldearen izena eta aitorpenari dagokion zergaldia.

4. Orobat jaso beharko du taldearen kontabilitate-informazioa, eta zehaztu azken entitate nagusiaren egoera-orri finantzario bateratuen mota (zergari buruzko foru legearen 5.20 artikuluan ezarritakoaren arabera), taldearen egoera-orri finantzario bateratuak egiteko erabilitako finantza-kontabilitateko arauak eta, azkenik, egoera-orri finantzario bateratu horiek egiteko erabilitako moneta funtzionala.

21. artikulua. Taldearen egiturari buruzko informazioa eta taldeko entitate eratzaileen identifikazioa.

1. Aitorpen informatiboan talde multinazionalari buruzko edo talde nazional handiari buruzko informazioa adieraziko da, bai eta taldeko entitate eratzaileen identifikazioa ere.

2. Taldeko azken entitate nagusia identifikatu beharko da, honako hauek zehaztuta: azken entitate nagusiaren izena, identifikazio fiskaleko zenbakia edo zenbakiak eta kokatuta dagoen jurisdikzioa. Horrez gainera, adierazi beharko da jurisdikzioa ELGAren arau-ereduak inplementatu dituen jurisdikzioa den edo, kasua bada, zergari buruzko foru legearen 8. artikuluko 4., 5. eta 6. apartatuetan aipatzen den jurisdikzioetako bat den, eta, azkenik, zergari buruzko foru legearen xedapenen arabera duen kategorizazioa zehaztuko da.

3. Identifikatu beharko dira azken entitate nagusi ez diren taldeko entitate eratzaileak eta baterako negozioak edo baterako negozioen filialak, zergari buruzko foru legearen 38. artikuluan aipatzen direnak, honako datu hauek zehaztuta: izena, identifikazio fiskaleko zenbakia edo zenbakiak, kokatuta dauden jurisdikzioa (jurisdikzioak ELGAren arau-ereduak inplementatu dituen edo ez adierazita), zergari buruzko foru legearen xedapenen araberako kategorizazioa, eta entitate eratzaile bakoitzeko bazkideen identifikazioa, kategorizazioa, identifikazio fiskaleko zenbakia edo zenbakiak eta bakoitzak daukan partaidetzaren ehunekoa. Orobat adierazi beharko da apartatu honetan aipatutako entitateren batek aldaketarik izan duen aitorpenari dagokion zergaldiaren aurreko zergaldiarekin alderatuta.

4. Zehaztu beharko da entitateak tarteko entitate nagusitzat edo partez partaidetzapekoa den entitate nagusitzat hartzen diren. Kasu horietan, informazio hau gehitu beharko da:

a) Tarteko entitate nagusien kasuan, aplikatzekoak direnean zergari buruzko foru legearen 6.3.b) artikuluan ezarritako salbuespenak edo beste salbuespen baliokideren bat, azken entitate nagusia edo letra horretan aipatutako beste tarteko entitate nagusia identifikatu beharko da.

b) Partez partaidetzapekoak diren entitate nagusien kasuan, aplikatzekoa denean zergari buruzko foru legearen 6.3.c) artikuluan ezarritako salbuespena edo beste salbuespen baliokideren bat, letra horretan aipatzen den partez partaidetzapekoa den beste entitate nagusia identifikatuko da.

5. Behar beste zergapetu gabeko etekinen erregela aplikatzekoa balitz kasuan kasuko jurisdikzioan, honako informazio hau zehaztu beharko da:

a) Ea zergari buruzko foru legearen hirugarren xedapen iragankorraren 3. apartatuan ezarritako inguruabarra edo antzeko beste inguruabar bat gertatzen den, bai eta dagokion zerga osagarriaren kalkuluak egiteko behar den informazioa ere.

b) Baterako negozioko kide den entitate nagusi bakoitzari esleitu dakiokeen zerga osagarriaren zatia, zergari buruzko foru legearen 38. artikuluko 2. eta 4. apartatuetan ezarritakoaren arabera.

c) Ea zergari buruzko foru legearen 38.4 artikuluko bigarren paragrafoan aipatzen den baterako negozioaren taldearen zerga osagarriaren soberakinik dagoen.

6. Baztertutako entitateak identifikatu beharko dira, haien sozietate-izen osoa eta zergari buruzko foru legearen xedapenen arabera dagokien tipologia zehaztuta, gutxienez. Orobat adierazi beharko da apartatu honetan aipatutako entitateren batek aldaketarik izan duen aitorpenari dagokion zergaldiaren aurreko zergaldiarekin alderatuta.

7. Informazioa zer zergaldiri dagokion, zergaldi horretan taldearen egituran aldaketarik izan bada, informazioa eman beharko da ukitutako entitate eratzaileari buruz: haren identifikazio fiskaleko zenbakia, kategorizazioa, taldeak entitatean bertan duen partaidetza-ehunekoa eta aldaketaren aurreko egoera zein ondorengoa.

8. Taldearen egituran izandako aldaketek eraginik izan ez badute zerga-tasa efektiboaren kalkuluan, zerga osagarriaren kalkuluan edo zerga osagarriaren esleipenean, hala adieraziko da, eta aldaketak ez dira jaso beharko aitorpen informatiboan.

22. artikulua. Jurisdikzio bakoitzari buruzko informazio laburtua.

1. Taldea dagoen jurisdikzioetako bakoitzari buruzko informazio laburtua jasoko da aitorpen informatiboan, artikulu honetan xedatutakoaren arabera.

2. Jurisdikzioaren izena adierazi beharko da, eta, kasua bada, jurisdikzio horretan jurisdikzio-mailatik beherako kalkuluak behar dituen entitateren bat edo entitate-multzo bat dagoen, honako hauen artean bereiziz:

a) Entitate eratzaileak.

b) Jabetza minoritarioko azpitaldea.

c) Jabetza minoritarioko entitate eratzaileak, aurreko letran jasotzen ez direnak.

d) Inbertsio-entitateak.

e) Baterako negozioak eta haien filialak.

f) Egoitzarik gabeko entitate eratzaileak.

3. Jurisdikzioa zerga-maila txikikoa bada, identifikatu beharko da zer jurisdikziok duen edo duten eskubidea jurisdikzio horretan sortu den zerga osagarria eskatzeko, errentak sartzeko erregela edo behar beste zergapetu gabeko errenten erregela aplikatzearen ondorioz, modalitateetako edozeinetan.

4. Jurisdikzioari dagokionez, zehaztu beharko da hurrengo kapituluan jasotzen diren portu seguruetako bat aplikatu daitekeen, hala badagokio.

5. Substantziari lotutako errenten bazterketaren aplikazioak ekarri badu zerga osagarririk ez egotea, zergari buruzko foru legearen 14. artikuluan ezarritako moduan edo antzeko moduan, inguruabar hori adierazi beharko da.

6. Talde multinazionala beste jurisdikzio batzuetan dagoenean, zehaztu beharko da jurisdikzio horietan eskatu beharrekoa den zerga-tasa efektiboa eta zerga osagarria, hiru modalitateetako edozeinetan, zer balio-tartetan dauden.

III. KAPITULUA. PORTU SEGURUAK ETA ZERGA OSAGARRIAREN GALDAGARRITASUNIK EZAKO BESTE KASU BATZUK

23. artikulua. Portu seguruak eta zerga osagarriaren galdagarritasunik ezako beste kasu batzuk, talde multinazionalentzat eta talde nazional handientzat.

1. Portu seguruei eta taldea dagoen jurisdikzioetako bakoitzean aplikatzekoak diren bazterketei buruko informazioa jasoko da aitorpen informatiboan.

2. Lehenik eta behin, jurisdikzioaren identifikazioari eta bertan kokatutako entitate eratzaileen identifikazioari buruzko informazioa eman beharko da, eta, kasua bada, adierazi beharko da jurisdikzio horretan dagoen eta jurisdikzio-mailatik beherako kalkuluak behar dituen entitatearen edo entitate-multzoaren mota, honako hauen artean bereiziz:

a) Entitate eratzaileak.

b) Jabetza minoritarioko azpitaldea.

c) Jabetza minoritarioko entitate eratzaileak, aurreko letran jasotzen ez direnak.

d) Inbertsio-entitateak.

e) Baterako negozioak eta haien filialak.

f) Egoitzarik gabeko entitate eratzaileak.

g) Zergari buruzko foru legearen laugarren xedapen iragankorrean aipatzen den zerga osagarriaren galdagarritasunik ezako erregelaren pean dauden entitateen taldea.

3. Zergaldian de minimis salbuespena aplikatzeko aukera baliatzen den jaso beharko da, zergari buruzko foru legearen 33. artikuluan adierazitako inguruabarrak gertatzen direnean, eta salbuespena aplikatzeko garrantzitsua den informazioa eman: diru-sarrera onargarriak, irabazi eta galera onargarriak, negozio-zifraren zenbateko garbia edo jurisdikzio bateko entitate eratzaileek aribideko zergaldian eta aurreko bietan izan duten kontabilitate-emaitza, bai eta zenbateko horien batezbestekoa ere.

4. Aplikatzeko diren portu seguruei dagokienez, adierazi beharko da zein aukeratu den edo aukeratu diren jurisdikzioan aplikatu beharrekoa edo beharrekoak izateagatik, eta hura edo haiek aplikatzeko garrantzitsua den informazioa eman, aplikatu beharreko portu seguruen tipologia kontuan hartuta.

5. Ondorio horietarako, portu segurutzat hartuko da zerga osagarriaren galdagarritasunik eza, zergari buruzko foru legearen laugarren xedapen iragankorrean ezarritako herrialdez herrialdeko informazio onargarriaren arabera edo beste jurisdikzio bati dagokion herrialdez herrialdeko antzeko informazio onargarri baten arabera.

24. artikulua. Zerga osagarriaren aldi baterako galdagarritasunik ezako beste kasu batzuk, talde multinazionalentzat eta talde nazional handientzat.

1. Talde multinazionalei eta talde nazional handiei zerga osagarria aldi baterako galdatu beharrik ezari buruzko informazioa jasoko da aitorpen informatiboan, baldin eta zergari buruzko foru legearen hirugarren xedapen iragankorrean aipatzen diren inguruabarrak gertatzen badira.

2. Eman behar den informazioan zehaztu beharko da zein den talde multinazionala edo talde nazional handia zergari buruzko foru legearen aplikazio-eremuan lehen aldiz sartzen den zergaldiko lehen eguna, eta hura aplikatzeko garrantzitsua den informazioa.

IV. KAPITULUA. TALDEA DAGOEN JURISDIKZIOETAN SORTU ETA GALDATZEN DIREN ZERGA OSAGARRIEN KALKULUA

25. artikulua. Talde multinazionalaren edo talde nazional handiaren jurisdikziomailako informazioa.

1. Aitorpen informatiboan, zerga osagarria kalkulatzeko beharrezkoa den informazioa jasoko da, zeina jurisdikzio-informazioari egokituko baitzaio.

2. Jurisdikzioaren identifikazioaz gainera, jurisdikzio horretan jurisdikzio-mailatik beherako kalkuluak behar dituen entitate edo entitate-multzoren bat egonen balitz (21. artikuluaren 2. eta 7. apartatuan aipatzen direnetatik), horien mota adieraziko da, honako hauen artean bereiziz:

a) Entitate eratzaileak.

b) Jabetza minoritarioko azpitaldea.

c) Jabetza minoritarioko entitate eratzaileak, aurreko letran jasotzen ez direnak.

d) Inbertsio-entitateak.

e) Baterako negozioak eta haien filialak.

f) Egoitzarik gabeko entitate eratzaileak.

3. Aurreko kapituluan ezarritako portu seguruetako bat edo batzuk aplikatzea aukeratuz gero, eta horren ondorioz kapitulu honetan ezarritako kalkuluak egin behar ez badira, taldea dagoen jurisdikzioetakoren bati dagokionez, bakar-bakarrik bete beharko dira kasuan kasuko portu seguruaren aplikazioak ukitzen ez dituen datuak.

26. artikulua. Jurisdikzioko zerga tasa efektiboa kalkulatzeko informazioa.

1. Zerga osagarria modalitate guztietan kalkulatzeko behar den informazioa jasoko da aitorpen informatiboan, zehazki, jurisdikzio bakoitzeko zerga-tasa efektiboa kalkulatzeko behar den informazioa izanen da.

2. Jurisdikzioan kokatuta dauden entitate eratzaileen irabazi edo galera onargarri garbiak kalkulatzeko behar den informazioa emanen da. Bereziki, aipatu beharko da entitate eratzaileen zergaldiko kontabilitate-emaitzaren jurisdikzio-zenbateko agregatua, eta kontuan hartu behako dira entitate jakin batzuen irabazi eta galera onargarrien banaketa eta esleipena, hori guztia zergari buruzko foru legearen 9., 12. eta 13. artikuluetan ezarritako moduan. Orobat, kontuan hartu beharko dira jurisdikzioko irabazi edo galera onargarri garbi agregatuak zehazteko beharrezkoak diren doikuntzak.

3. Jurisdikzioan kokatuta dauden entitate eratzaileen zerga estali doituak kalkulatzeko behar den informazioa ere emanen da. Bereziki, jurisdikzioko zerga estali agregatuen zenbatekoa adierazi beharko da, zergari buruzko foru legearen 20. artikuluan ezarritako moduan esleipena egin ondoren, hala badagokio; orobat, zerga estali doituen zenbatekoa zehazteko behar diren doikuntzak adierazi beharko dira.

4. Informazio espezifikoa eman beharko da zergari buruzko foru arauaren 17.5 artikuluan ezarritako inguruabarren baliokideak gertatzen badira edo esleitu behar badira atzerriko sozietate kontrolatuen zerga-araubide jakin batzuk aplikatzearen ondoriozko zerga estaliak.

5. Bereizita banakatuko da honako hauei buruzko informazio xehe guztia: zerga geroratuengatiko doikuntzaren zenbateko osoari buruzkoa, galera onargarrien hautuari buruzkoa eta zerga geroratuagatiko pasiboak berreskuratzeko mekanismoari buruzkoa. Hori guztia zergari buruzko foru legearen 18. eta 19. artikuluetan ezarri bezala.

6. Artikulu honen arabera eman behar den informazioan, banakaturik ageriko dira, batetik, zerga geroratuengatiko aktiboen eta pasiboen tratamendu fiskala eta, bestetik,trantsizio-zergaldian eskualdatutako aktiboen tratamendu fiskala, zergari buruzko foru legearen lehen xedapen iragankorrean xedatutako moduan.

27. artikulua. Jurisdikzio bakoitzeko egindako aukerei buruzko informazioa.

1. Aitorpen informatiboan, xehakaturik adieraziko dira jurisdikzio-mailan edo entitate eratzaile bakoitzeko baliatutako edo/eta errebokatutako aukerak; gainera, bereizita jasoko da aukera horiek urtekoak ala bost urtekoak diren, zergari buruzko foru legearen 49. artikuluaren 1. eta 2. apartatuetan xedatutako moduan.

2. Zergari buruzko foru legearen 19.5 artikuluan ezarritako aukera bakarrik baliatzen ahalko da talde multinazionalaren edo talde nazional handiaren zerga osagarriaren lehen aitorpen informatiboan, zergari buruzko foru legearen 47. artikuluan aipatzen den horretan. Aitorpen hori, zehazki, aukera zein jurisdikziotarako baliatzen den lehen aldiz, jurisdikzio hori jasotzen duen zergaldiari egokituko zaio; alegia, talde multinazionalak edo talde nazional handiak jurisdikzio horretan entitate eratzaile bat kokatuta duen lehen zergaldiari.

3. Zergari buruzko foru legean xedatutako aukerez gainera, aitorpen informatiboan xehakaturik jaso behar dira erregelamendu honen 4. eta 9.2 artikuluetan ezarritako aukerak, baliatutakoak zein errebokatutakoak.

28. artikulua. Banakako informazioa entitate eratzaileko.

1. 26. artikuluan jasotako informazioa jurisdikzio-mailan eta entitate eratzaile bakoitzeko eman beharko da.

2. Aurreko apartatuan xedatutakoaren ondorioetarako, zerga osagarriaren aitorpen informatiboan honako alderdi hauei buruzko informazioa jasoko da:

a) Entitate eratzaileak zergaldian izan duen kontabilitate-emaitzaren zenbatekoa, zergaldiko irabazi edo galera onargarriak zehazteko beharrezkoak diren doikuntzekin batera, zergari buruzko foru legearen 9. eta 10. artikuluetan ezarritako moduan.

b) Irabazi edo galera onargarrien banaketa eta esleipena, hala badagokio, zergari buruzko foru legearen 12. eta 13. artikuluetan ezarri bezala.

c) Zergaldiko zerga estaliak direla-eta egindako doikuntzen banakapena, zergari buruzko foru legearen 17. eta 18. artikuluetan ezarri bezala.

d) Hala badagokio, bidezkoak diren murrizketen banakapena, zergari buruzko foru legearen 40. eta 41. artikuluetan ezarri bezala.

e) Beste entitate eratzaile batzuei esleitu zaizkien eta beste entitate eratzaile batzuek esleitu dituzten zerga estalien banakapena, zergari buruzko foru legearen 20. artikuluan ezarri bezala.

f) Entitate eratzailearen errentaren kalkuluaren banakapena, aplikatzekoa bada nazioarteko itsas garraioaren ondoriozko errenta bazterketa, zergari buruzko foru legearen 11. artikuluan ezarri bezala.

g) Garrantzitsua izan daitekeen beste edozein informazio gehigarri, hala nola banaketa onargarrirako tributu-araubideari buruzkoa (aplikatzekoa bada), edo entitate eratzailearen kontabilitate-emaitza zehazteko erabilitako kontabilitate-arauaren identifikazioa, ez bada azken entitate nagusiak taldearen egoera-orri finantzario bateratuak egiteko erabili duena.

29. artikulua. Zergamaila txikiko jurisdikzioetan sortutako zerga osagarria kalkulatzeko informazioa.

1. Zerga-maila txikia duten jurisdikzioetan sortutako zerga osagarria jurisdikzio-mailan kalkulatzeko beharrezkoa den informazioa jasoko da aitorpen informatiboan; informazio horretan, kalkulu espezifikoak zehaztuko dira, zerga-maila txikia duten jurisdikzioetan jurisdikzio-mailan sortutako zerga osagarriaren zenbatekoa zehazteko behar direnak.

2. Aitorpen informatiboak jurisdikzio-informazio agregatua jasoko du, honako hauei buruzkoa: aplikagarri den zerga-tasa efektiboa, substantzia ekonomikoari lotutako errenten bazterketaren zenbatekoa, zerga-oinarria, zerga osagarri gehigarria eta zerga osagarri nazional onargarria.

30. artikulua. Talde multinazionaleko edo talde nazional handiko entitate eratzaileei exijitzen zaizkien zerga osagarriak kalkulatzeko informazioa.

1. Taldeko entitate eratzaileei exijitu behar zaizkien zerga osagarriak kalkulatzeko beharrezkoa den informazioa jasoko da aitorpen informatiboan, eta zerga-maila txikiko jurisdikzioetan sortzen den zerga osagarriaren zenbatekoa zehazteko behar diren kalkulu espezifikoei buruzkoa izanen da informazio hori. Zerga osagarriaren zenbatekoa, bestalde, taldeko entitate eratzaileei exijitu beharko zaie, errentak sartzeko erregelari edo behar beste zergapetu gabeko etekinen erregelari jarraikiz.

2. Aitorpen informatiboan jaso beharrekoa izanen da, orobat, zerga-maila txikia duen talde multinazionaleko edo talde nazional handiko entitate eratzaile bakoitzak sortu duen zerga osagarriari buruzko informazioa; kontuan hartuta entitate eratzaile horren irabazi onargarriek zer ehuneko adierazten duten zerga-maila txikia duen jurisdikzioaren gainerako irabazi onargarriei dagokienez; informazio horretan alderdi hauek ere jasoko dira: taldeko entitate nagusiek zerga-maila txikiko entitate eratzailearen gainean daukaten partaidetza-ehunekoa eta entitate nagusi bakoitzari errentak sartzeko erregela dela bide exijitu behar zaion zerga osagarriaren zenbatekoa.

3. Aitorpen informatiboak, orobat, jasoko ditu Espainian kokatuta dauden talde multinazionaleko edo talde nazional handiko entitate eratzaileei exijitu beharko zaien zerga osagarri nazionalaren zenbatekoa zehazteko egin behar diren kalkulu espezifikoak.

4. Aitorpen informatiboak informazio zehatza jasoko du, behar beste banakatua, zerga-maila txikia duen talde multinazionala dagoen jurisdikzioetako bakoitzean sortutako zerga osagarriaren zenbatekoari buruzkoa. Zerga osagarri hori, zehazki, beste jurisdikzioek exijitu beharko dute, baldin eta haien zerga-tasa efektiboa gutxieneko zerga-tasa adinakoa edo handiagoa bada, kontuan hartuta jurisdikzio horietako bakoitzean behar beste zergapetu gabeko etekinen erregelaren ehunekoa. Horrez gainera, jurisdikzio horietako bakoitzean taldeko entitate eratzaileei exijitu beharko zaien zerga osagarriaren zenbatekoa zehazteko behar diren kalkulu espezifikoak ere jasoko dira informazio-aitorpenean.

V. TITULUA. ARAU-HAUSTEAK ETA ZEHAPENAK

31. artikulua. Zehapenaraubidearen garapena.

1. Zergari buruzko foru legearen 48.1 artikuluan ezarritakoaren ondorioetarako, datu-multzoak dira erregelamendu honen artikuluetako ondorengo apartatuetan aipatzen diren informazioak; hona hemen artikuluok eta apartatuok:

a) 20. artikuluaren 2., 3. eta 4. apartatuak.

b) 21. artikuluaren 2., 3., 4., 5., 6. eta 7. apartatuak.

c) 22. artikuluaren 2., 3., 4., 5. eta 6. apartatuak.

d) 23. artikuluaren 2., 3. eta 4. apartatuak.

e) 24.2. artikulua.

f) 25.2. artikulua.

g) 26. artikuluaren 2., 3., 4., 5. eta 6. apartatuak.

h) 28.2 artikuluaren letretako bakoitza.

i) 29.2. artikulua.

j) 30. artikuluaren 2. eta 3. apartatuak.

2. 28.2. artikuluaren letretako bakoitzean eta 30. artikuluaren 2. eta 3. apartatuetan jasotako informazioak izanez gero, informazioak hizpide dituzten entitate eratzaile adina datu-multzo egonen da.

3. Zehapena zehazteko datu-multzoa zenbatzeko, informazio bakoitza behin baino ez da kontuan hartuko.

VI. TIULUA. AUTOLIKIDAZIOA

32. artikulua. Autolikidazioa.

1. Zergaren autolikidazioak zerga administrazioan aurkeztu eta ordaindu beharko dira, 25 egun naturaleko epean, zergaldia bukatu ondorengo hamabosgarren hilabetetik aurrera, zergari buruzko foru legearen 50. artikuluan ezarritako moduan.

Autolikidazioak elektronikoki aurkeztuko dira, zerga arloan eskumena duen departamentuko titularrak zehaztutako moduan, ondoriozko kuota positiboa izan edo nulua izan.

2. Zergaldiko zerga osagarriaren kuota ezin izanen da negatiboa izan; beraz, zergaldiko autolikidazioek ezin izanen dute ezein itzultze-kopururik sortu.

3. Autolikidazioetan, adieraziko da zein aitorpen informatibotan dauden jasota zergaldiko kuota zehazteko bide eman duten datuak, aitorpen hori Espainian aurkeztua izan edo beste jurisdikzio batean aurkeztua izan, eta hura noiz aurkeztu den ere adieraziko da.

Halaber, autolikidazioetan zergadunaren ordezkoa identifikatuko da, zergari buruzko foru legearen 6.5 artikuluan xedatutakoaren arabera.

Lehendabiziko xedapen iragankorra.-Zerga osagarriaren aldi baterako galdagarritasunik eza, talde multinazionalentzat eta talde nazional handientzat.

Zergaren foru legearen hirugarren xedapen iragankorreko 4. apartatuan xedatutakoaren ondorioetarako, xedapen iragankor horretako 2. apartatuan aipatzen den bost urteko epea zenbatzen hasiko da behar beste zergapetu gabeko etekinen erregela exijitzen ahal den lehenbiziko zergaldia hasten denean, zergaren foru legearen azken xedapenetako bosgarrenean eta seigarren xedapen iragankorrean xedatutakoa kontuan harturik.

Bigarren xedapen iragankorra. Aitorpen informatibo erraztua.

1. Zergari buruzko foru legearen 47. artikuluan xedatutakoaren ondorioetarako, eta 2028ko abenduaren 31 baino lehen hasitako zergaldietarako edo data horren ondoren hasi baina 2030eko uztailaren 1a baino lehen amaitzen diren zergaldietarako, talde multinazionalek edo talde nazional handiek aukera izanen dute, aitorpen informatiboan bertan, jurisdikzio hauei buruzko informazioa modu erraztuan aurkezteko:

a) Zerga osagarririk sortzen ez duten jurisdikzioak, bai zerga-maila txikiko jurisdikzioak ez direlako, bai jurisdikzio horietan sortutako zerga osagarria nulua delako portu segururen bat aplikatzeagatik.

b) Zerga osagarria sortzen duten arren entitate eratzaile bakoitzaren araberako banakako kalkulua behar ez duten jurisdikzioak; halakoetan, nahikoa izango da jurisdikzio-mailan egindako kalkulua.

2. Aurreko apartatuko a) eta b) letretan aipatzen diren jurisdikzioei buruzko informazioa modu erraztuan aurkezten bada, taldeak aukera izanen du aitorpen informatiboan 28. artikuluan ezarritako edukia ez sartzeko.

3. Xedapen iragankor honetan xedatutakoa aukeratzen duen talde multinazionalak edo talde nazional handiak honako baldintza hauek bete beharko ditu:

a) Kontabilitate-sistema bat eduki beharko du, bide ematen duena modu zehatz eta fidagarrian egiteko jurisdikzio bakoitzean sortutako zerga osagarria zenbatzeko behar diren kalkuluak, zerga osagarria sortzen lagundu duten entitate eratzaileen identifikazioa barne; horrez gainera, kontabilitate-sistema horrek aukera eman behar du entitate bakoitzeko zerga osagarriaren arauak aplikatzeko, zerga-tasa efektiboa eta zerga osagarria kalkulatzeko garrantzizkoa bada, eta

b) Sistema fidagarri bat eduki beharko du, bide ematen duena kontabilitate-informazioaren trazatua egiteko, jurisdikzio bakoitzari dagokion informazioa esleitzeko eta informazio hori zergaldiko egoera-orri finantzario bateratuak egite aldera gehitzeko; eta

c) Jurisdikzio bakoitzean egindako doikuntza nagusiak identifikatzea ahalbidetzen duen sistema bat eduki beharko du, zergaldiko irabazi edo galera onargarriak edo zerga estali doituak zehazteko, batetik, eta doikuntza horiek egitea eragin duten entitate eratzaileak identifikatzeko, bestetik.

d) 1. apartatuaren a) eta b) letretan ezarritako jurisdikzioek zerga osagarria zehazteko euskarri gisa balio duen dokumentazioa jarri beharko dute zerga administrazioaren esku, proportzionaltasun- eta nahikotasun-printzipioekin bat. Halaber, jurisdikzio horien zerga osagarriaren zenbaketan egindako kalkuluak egiaztatzeko garrantzitsutzat jotzen duen informazio eta dokumentazio guztia eskatzen ahalko du zerga administrazioak.

4. Xedapen iragankor honetan ezarritako aukera aitorpen informatiboan bertan baliatu beharko du entitate aitortzaileak, aukera baliatzen den jurisdikzio bakoitzeko.

Hirugarren xedapen iragankorra. Lehenbiziko aitorpen informatiboa eta lehenbiziko autolikidazioa aurkezteko epeak.

1. Zergari buruzko foru legearen bosgarren xedapen iragankorrean xedatutakoarekin bat, aitorpen informatiboa eta erregelamendu honen 18.1. artikuluan ezarritakoa ez den beste edozein komunikazio honako epe honetan aurkeztuko dira zerga administrazioan: errentak sartzeko erregela onargarri baten edo behar beste zergapetu gabeko etekinen erregela onargarri baten arabera talde multinazional bat edo talde nazional handi bat zerga osagarri baten aplikazio-eremuan lehen aldiz sartzen den zergaldia amaitu ondorengo hemezortzigarren hilabetearen azken egunaren aurreko bi hilabeteen barruan.

Nolanahi ere, aitorpen informatiboa eta 18.1 artikuluan ezarritakoa ez den beste edozein komunikazio, 2025eko martxoaren 31 baino lehen amaitzen diren zergaldiei badagozkie, 2026ko ekainaren 30aren aurreko bi hilabeteen barruan aurkeztu beharko dira zerga administrazioan, errentak sartzeko erregela onargarri baten edo behar beste zergapetu gabeko etekinen erregela onargarri baten arabera talde multinazional bat edo talde nazional handi bat zerga osagarri baten aplikazio-eremuan lehen aldiz sartzen den zergaldiaren iraupena edozein delarik ere.

Aurreko paragrafoan ezarritako kasuan, 18.1 artikuluan jasotako komunikazioa 2026ko ekainaren 30aren aurreko bi hilabeteen barruan aurkeztu beharko zaio zerga administrazioari.

2. 32. artikuluan xedatzen dena gorabehera, autolikidazioa hogeita bost egun naturaleko epearen barruan aurkeztu beharko da zerga administrazioan; epe hori data honetatik aurrera zenbatuko da: errentak sartzeko erregela onargarri baten edo behar beste zergapetu gabeko etekinen erregela onargarri baten arabera talde multinazional bat edo talde nazional handi bat zerga osagarri baten aplikazio-eremuan lehen aldiz sartzen den zergaldia bukatu ondorengo hamazortzigarren hilabetea amaitzen denetik aurrera.

Nolanahi ere, ezin izanen da zerga-autolikidaziorik aurkeztu 2026ko ekainaren 30a baino lehen, edozein dela ere autolikidazioari dagokion zergaldia, eta data horretatik aurrera zenbatuko da aurreko paragrafoan aipatutako hogeita bost eguneko epea.

Gobierno de Navarra

Contacte con nosotros | Accesibilidad | Aviso legal | Mapa web