(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

18/2025 FORU LEGEA, ABENDUAREN 22KOA, TALDE MULTINAZIONALENTZAKO ETA TALDE NAZIONAL HANDIENTZAKO GUTXIENEKO ZERGAPETZE-MAILA GLOBALA BERMATZEKO ZERGA OSAGARRIARI BURUZKOA

BON N.º 260 - 31/12/2025

  ATARIKO TITULUA. XEDAPEN OROKORRAK

  I. TITULUA. ZERGAEGITATEA

  II. TITULUA. DEFINIZIOAK

  III. TITULUA. EREMU SUBJEKTIBOAK ETA LOTURAARAUAK

  IV. TITULUA. ZERGAOINARRIA

  IV. TITULUA. ZERGA ESTALI DOITUAK ZEHAZTEA

  VI. TITULUA. ZERGATASA EFEKTIBOA

  VII. TITULUA. ZERGAZORRA

  I. KAPITULUA. KARGATASA

  II. KAPITULUA. ZERGA OSAGARRIAREN KUOTA

  III. KAPITULUA. ZERGA OSAGARRI NAZIONALA

  IV. KAPITULUA. LEHEN MAILAKO ZERGA OSAGARRIA: ZERGA ESLEITZEA ETA ERRENTAK SARTZEKO ERREGELA KONPENTSATZEA

  V. KAPITULUA. BIGARREN MAILAKO ZERGA OSAGARRIA: BEHAR BESTE ZERGAPETU GABEKO ETEKINAK SARTZEKO ERREGELA APLIKATZEA

  VI. KAPITULUA. ZERGA OSAGARRI GEHIGARRIA

  VIII. TITULUA. ZERGALDIA ETA ZERGAREN SORTZAPENA

  IX. TITULUA. ZERGA OSAGARRIAREN GALDAGARRITASUNIK EZA

  X. TITULUA. ARAUBIDE BEREZIAK

  I. KAPITULUA. ENPRESAK BERREGITURATZEA ETA BATERAKO NEGOZIOAK

  II. KAPITULUA. NEUTRALTASUN ETA BANAKETAARAUBIDEAK

  III. KAPITULUA. INBERTSIOENTITATEAK ETA ASEGURUEN INBERTSIOENTITATEAK

  IV. KAPITULUA. JABETZA MINORITARIOKO ENTITATE ERATZAILEAK

  XI. TITULUA. BETEBEHAR FORMALAK

  I. KAPITULUA. INFORMATZEKO BETEBEHARRA ETA ZEHAPENARAUBIDEA

  II. KAPITULUA. AUKERAK BALIATZEA

  XII. TITULUA. ZERGAREN KUDEAKETA

  XIII. TITULUA. BALIOKIDETZAREN EBALUAZIOA

  XIV. TITULUA. JURISDIKZIOORDENA

Atariko

NAFARROAKO FORU KOMUNITATEKO LEHENDAKARIA NAIZEN HONEK.

Aditzera ematen dut Nafarroako Parlamentuak onetsi duela honako:

FORU LEGEA, TALDE MULTINAZIONALENTZAKO ETA TALDE NAZIONAL HANDIENTZAKO GUTXIENEKO ZERGAPETZE-MAILA GLOBALA BERMATZEKO ZERGA OSAGARRIARI BURUZKOA.

HITZAURREA

I

Azken urteetako nazioarteko testuinguruan araudiak izan duen bilakaera plangintza fiskal oldarkorraren aurkako borroka indartzeko neurrietan islatzen joan da, merkatu globalizatu batean. Arlo honetan, Ekonomia Lankidetza eta Garapenerako Antolakundeak (aurrerantzean, ELGA) zerga-oinarriaren higaduraren eta etekinen lekualdatzearen aurkako ekimenetik (BEPS, ingelesezko siglak) abiatuta egin zituen gomendioek bide bati ekin zioten, zeinak berekin ekarri baitu barne arau fiskalen bilakaera, fiskalitate bidezkoagoa eta ekitatezkoagoa lortzeko xedearekin.

Azken urteotan, Europar Batasunak neurriak hartu ditu barne merkatuan plangintza fiskal oldarkorraren aurkako borroka indartzeko, besteak beste, saiheste fiskalaren aurkako zuzentarauak onetsiz: Kontseiluaren 2016ko uztailaren 12ko 2016/1164 (EB) Zuzentaraua, barne merkatuaren funtzionamenduan zuzenean eragiten duten saiheste fiskaleko praktiken aurkako arauak ezartzen dituena, eta Kontseiluaren 2017ko maiatzaren 29ko 2017/952(EB) Zuzentaraua, 2016/1164 (EB) Zuzentaraua aldatzen duena beste herrialde batzuekiko asimetria hibridoei dagokienez; ATAD1 eta ATAD2 izenez ezagutzen dira zuzentarau horiek, hurrenez hurren. Zuzentarauok Europar Batasunaren zuzenbide bihurtu zituzten ELGAk zerga-oinarriaren higaduraren eta etekinen lekualdaketaren aurkako ekimenaren testuinguruan eman zituen gomendioak.

Enpresa multinazionalen zerga-jardunbide batzuek aukera ematen diete etekinen zergapetzerik ez duten edo zerga-maila apala duten herrialde edo lurraldeetara eramateko; jardunbide horiek desagerrarazteko etengabeko ahaleginean, ELGAk nazioarteko zerga-neurri batzuk garatzen jarraitu du. Horien artean daude enpresa-etekinak zergapetzen dituen zergaren tasei dagokienez zerga-lehia mugatu nahi duten neurriak, eta, ildo horretan, negozio-zifraren zenbateko garbi bateratua 750 milioi euro edo handiagoa duten talde multinazionalentzat gutxieneko zergapetze-maila globala ezartzen dutenak. Legegintza-politikaren helburu hori dokumentu honen bidez gauzatu zen: "Ekonomiaren digitalizazioak dakartzan zerga-erronkak-Zerga-oinarriaren higaduraren aurkako eredu-arauak (Bigarren Zutabea)", laburtuta, aurrerantzean, "ELGAren eredu-arauak". Dokumentu hori 2021eko abenduaren 14an onetsi zuen BEPSei buruzko ELGA-G20aren Inklusio-esparruak, zeinari Europar Batasuneko estatuak atxiki baitzitzaizkion.

Europar Batasunaren eremuan, Europako Kontseiluari gai fiskalei buruz egindako txostenean -Kontseiluak 2021eko abenduaren 7an onetsia-, Kontseiluak berretsi zuen gutxieneko zergapetze-maila globalaren erreformaren aldeko babes irmoa, eta erreforma Europar Batasunaren zuzenbidearen bidez aplikatzeko konpromisoa hartu zuen; izan ere, hertsiki integratutako ekonomietan funtsezkoa da gutxieneko zergapetze-maila globalaren aplikazioa koherentea eta koordinatua izatea. Hala, ondorioztatu zen ezen, kontuan hartuta nazioarteko zerga-neurri berri horien eskala, xehetasuna eta alderdi teknikoak, Europar Batasunaren esparru erkide batek bakarrik saihestuko duela barne merkatua zatitzea neurri horien aplikazioan.

Aurrekoaren ildotik, Kontseiluaren 2022ko abenduaren 15eko 2022/2523 (EB) Zuzentaraua onetsi zen, Batasuneko enpresa-talde multinazionalentzako eta talde nazional handientzako gutxieneko zergapetze-maila globala bermatzeari buruzkoa (aurrerantzean, 2022/2523 (EB) Zuzentaraua edo, besterik gabe, Zuzentaraua). Europar Batasuneko estatu guztiek egin behar dute zuzentarau horren transposizioa, haren 56. artikuluan ezarritako moduan.

Zuzentarauak oro har betetzen ditu ELGAren eredu-arauen edukia eta egitura, baina arauok Europar Batasunaren sorrerako zuzenbidearekin bateragarriak direla bermatzeko, bereziki establezimendurako askatasunaren printzipioarekin, haren xedapen batzuk -zehazki, eremu subjektiboari buruzkoak-, diseinatu dira mugaz gaindiko egoeren eta egoera nazionalen arteko diskriminazio-arrisku oro saihesteko moduan.

2022/2523 (EB) Zuzentarauak zerga osagarri bat ezartzen du, elkarri lotutako bi erregela baliatuz. Haien bidez, bermatzen da Europar Batasuneko estatuetan kokatutako talde nazional handiek edo entitate nagusia Europar Batasuneko estatu batean kokatuta duten talde multinazionalek -azken kasu horretan, taldeko enpresak Europar Batasunean kokatuta egon zein kanpoan egon- benetan ehuneko 15eko gutxieneko tasa globalaren arabera tributatuko dutela lortutako errentengatik. Elkarri lotutako bi erregela horiek honako hauek dira: errentak sartzeko erregela eta behar beste zergapetu gabeko etekinen erregela. Bigarrenak lehenengoari laguntzeko balio du.

Hala, talde nazional handietako edo talde multinazionaletako entitate eratzaileen zerga-tasa efektiboa, jurisdikzio jakin batean, ehuneko 15etik beherakoa bada, zerga gehigarri bat bilduko da, zerga osagarria, zeinak aukera emanen baitu ehuneko 15eko gutxieneko tasa globalera iristeko, dela errentak sartzeko erregelaren bidez, dela, halakorik ezean, behar beste zergapetu gabeko etekinen erregelaren bidez.

Hala ere, 2022/2523 (EB) Zuzentarauak 11. artikuluan zehazten duenez, Batasuneko estatuek zerga osagarri nazional onargarri bat aplikatzen ahalko diete beren lurraldean kokatutako entitate eratzaileei, baldin eta gutxienez ehuneko 15eko tributaziora iristen ez badira estatu kide horren jurisdikzioan. Zerga osagarri nazional onargarririk ezean, entitate horiei dagokien zerga osagarria honako jurisdikzio hauei esleituko litzaieke: errentak sartzeko erregela aplikatuta, zerga osagarri nazional onargarria ezartzea aukeratu ez duen jurisdikzioan kokatutako entitateetako partaidetzen titulartasuna duen entitatea kokatuta dagoen jurisdikzioari, betiere jurisdikzio horrek bere barne ordenamenduan sartu badu; edo, halakorik ezean, barne legerian behar beste zergapetu gabeko etekinen erregela ezarri duten jurisdikzioei.

Foru lege honen bidez, bete nahi da transposiziorako betebeharra Nafarroako Foru Komunitatean, Estatuaren eta Nafarroako Foru Komunitatearen arteko Hitzarmen Ekonomikoaren 27 bis artikuluan xedatutakoari jarraikiz. Hitzarmena abenduaren 26ko 28/1990 Legearen bidez onetsi zen, eta, uztailaren 24ko 4/2025 Legearen bidez, 27 bis artikulua gehitu zitzaion, zerga osagarriari araudi autonomoko tributuaren izaera emateko. Izaera horrekin bat, zergadun bakoitzari aplikatu beharreko foru araudia edo araudi erkidea esleitzeko behar diren lotura-puntuak ezartzen dira.

Aurrekotik abiatuta, foru lege honek, bere eskumenen esparruan, arauak ezartzen ditu bermatzeko gutxieneko benetako zerga-maila bat ezartzen zaiela merkatu bakarrean jarduten duten talde multinazional handiei eta soilik nazionalak diren talde handiei (negozio-zifraren zenbateko garbi bateratua gutxienez aurreko azken lau ekitaldietako bitan 750 milioi eurokoa edo handiagoa izan dutenei). Arauok koherenteak izan behar dute 2021ean Inklusio-esparruak lortutako akordioarekin, eta hurbiletik jarraitu behar diete esparru horrek adostutako ELGAren eredu-arauei.

Inklusio-esparruak lortutako akordio horrek ehuneko 15eko gutxieneko zerga-tasa ezartzen du jurisdikzio mailan. Zerga osagarria sortzen duen tributazio osagarriko arauaren abiapuntua zerga-tasa diferentzial bat kalkulatzea da, zerga osagarriaren karga-tasa, hain zuzen, jurisdikzio bateko zerga-tasa efektiboaren eta ehuneko 15en arteko aldeagatik. Jurisdikzioko karga-tasa kalkulatu ondoren, tasa hori jurisdikzio bakoitzeko irabazi onargarri garbien gainean aplikatu behar da, jurisdikzioan taldeak duen substantziaren arabera kalkulatutako zenbatekoarekin minoratuta, jurisdikzio mailan sortutako zerga osagarriaren zenbatekoa zehazteko.

Talde multinazionaleko edo talde nazional handiko entitate eratzaile bakoitzari dagokion zerga osagarriaren zenbatekoa esleitzeko, jurisdikzio horretako taldeko entitate eratzaile bakoitzari esleitu behar zaio aipatutako zerga osagarri jurisdikzionala, entitate eratzaile bakoitzaren irabazi onargarrien eta jurisdikzioko irabazi onargarrien arteko proportzioan.

Azpimarratu behar da, berriz ere, gutxieneko tributazioa talde nazionaletara hedatzearen helburua dela Europar Batasuneko estatu batean diskriminazio-arrisku oro saihestea nazioarteko presentzia duen talde bateko entitate baten eta presentzia esklusiboki nazionaleko talde baten artean.

Aurreko lerroetan adierazi den bezala, arau hau ELGAren esparruan hartutako ekimenek ekarritako nazioarteko testuinguru batean ezartzen da, non eredu-arauak deitutakoak nabarmentzen baitira, eta Europar Batasunean, berriz, 2022/2523 (EB) Zuzentaraua, zeinaren transposizioa baita foru lege hau.

Testuinguru horrekin bat, kontuan hartu behar dira Kode Zibilaren 3.1 artikuluan ezarritako interpretazio-irizpideak, Nafarroako Foru Zuzenbide Zibilaren Konpilazio edo Foru Berriaren 6. legearen esparruan.

II

Foru lege honek berrogeita hamabost artikulu, sei xedapen iragankor eta bost azken xedapen ditu.

Atariko tituluak xedapen orokor batzuk jasotzen ditu, zerga osagarriaren izaera, xedea eta aplikazio-eremua arautzen dituztenak.

Zerga osagarria zuzeneko tributu pertsonala da, eta elkarri lotutako eta nahitaez aplikatu beharreko erregela batzuen bidez egituratzen da: errentak sartzeko erregela eta behar beste zergapetu gabeko etekinen erregela dira. Zerga osagarriaren konfigurazioa hiru modalitatetan oinarritzen da, lehenengo biek errentak sartzeko erregelari erantzuten diote, eta hirugarrenak, berriz, behar beste zergapetu gabeko etekinen erregelari; honako hauek dira modalitateak: zerga osagarri nazionala, lehen mailako zerga osagarria eta bigarren mailako zerga osagarria.

Lehenik eta behin, zerga osagarri nazionala da Espainiako lurraldean kokatuta dauden talde multinazionaletako eta talde nazional handietako entitate eratzaileek lortu dituzten errentei errentak sartzeko erregela aplikatzearen ondoriozko emaitza.

Bigarrenik, lehen mailako zerga osagarria da Espainiako lurraldean kokatuta ez dauden talde multinazionaletako entitate eratzaileek lortu dituzten errentei errentak sartzeko erregela aplikatzearen emaitza.

Azkenik, bigarren mailako zerga osagarriak aukera ematen du, behar beste zergapetu gabeko etekinen erregela aplikatzearen ondorioz, bermatzeko talde multinazional batek lortu dituen errentengatik gutxieneko zergapetze bat aplikatuko zaiola, baldin eta errentak ezin izan badira zergapetu errentak sartzeko erregela onargarri bat aplikatuta.

Arestian adierazi bezala, 2022/2523 (EB) Zuzentarauak aukera ematen die Europar Batasuneko estatuei zerga osagarri nazional onargarri bat aplikatzeko. Alde horretatik, Espainiak, ahalmen horretaz baliatuta, zerga osagarri nazional bat ezarri du, helburu nagusi duena bermatzea kasu guztietan Espainiako zerga-administrazioak exijituko duela zerga osagarria, Espainiako lurraldean kokatuta dauden eta Espainiako lurraldean ehuneko 15eko gutxieneko zergapetzera iristen ez diren talde multinazionaletako eta talde nazional handietako entitate eratzaileei dagokiena.

Beraz, foru lege honek zerga-araubide osagarri nazional bat jasotzen du, bermatzeko Espainiako lurraldean kokatuta dauden entitate eratzaileen irabazi onargarri garbien gutxieneko benetako zergapetzea izanen dela, gutxienez ere, 2022/2523 (EB) Zuzentarauaren eta ELGAren eredu-arauen arabera zerga osagarria kalkulatzearen ondoriozko emaitzaren baliokidea. Hala, Espainiako lurraldean kalkulatu eta ordaintzen den zerga osagarri nazionala "zerga nazional onargarria" izanen da, baldin eta, gutxienez, talde multinazional bateko edo talde nazional handi bateko entitate eratzaileek Espainiako lurraldean lortutako errentei errentak sartzeko erregela aplikatzearen ondoriozko emaitzarekin bat datorren emaitza ematen badu eta taldeak, Espainian, gutxieneko zerga-tasa (ehuneko 15) baino txikiagoa den zerga-tasa efektibo bat ordaindu behar badu.

Horri dagokionez, adierazi behar da foru lege honetan ezarritako zerga osagarri nazionala eratu dela halako moduan non lehenago adierazitakoaren arabera emaitza baliokidea emanen baitu, berezitasunak berezitasun. Ildo horretan, azpimarratu behar da ezen, zergadunaren eta kargatzen diren errenten artean identitatea dagoenez, ez dela beharrezkoa arautzea lehen mailako zerga osagarriaren aplikaziorako arauen baliokideak diren lehentasun-erregelak edo 27. artikuluan ezarritako konpentsazio-arauak. Hala, lehen mailako zerga osagarrian ez bezala, modalitate honen konfigurazioagatik beragatik, halako entitateen zerga osagarri nazionalaren zenbatekoa kalkulatzeko, berdin da zein den entitateon gaineko partaidetza-ehunekoa; alegia, zerga osagarri nazionala zehazteko ez da zertan kontuan hartu partaidetza-ehuneko hori. Halaber, zerga osagarri nazionalaren ondorioetarako, 25. artikuluko 3. apartatuak kasu jakin batzuk arautzen ditu, zeinetan ez baitira aplikatuko 20. artikuluan ezarritako entitate eratzaile jakin batzuek jasandako zerga estaliak berariaz esleitzeko erregeletako batzuk.

Hala, zerga osagarri nazionala dela bide, Espainian kokatutako talde nazional bateko edo talde multinazional bateko entitate eratzaile bakoitzak zerga osagarria ordaindu beharko du entitate horrek lortutako errentengatik, jurisdikzio mailan gutxieneko zerga-tasa baino tasa efektibo apalagoa ezarri bazaie.

Lehen mailako zerga osagarria dela bide, talde multinazional bateko entitate nagusiak, Espainiako lurraldean kokatuta badago, Espainiako lurraldean kokatuta ez dauden talde multinazionaleko entitate eratzaileen errentei dagokien zerga osagarritik esleitzen ahal zaion zatia kalkulatuko du, errenta horiek gutxieneko zerga-tasa baino apalagoa den zerga-tasarekin zergapetu badira jurisdikzio mailan (errentak sartzeko erregela).

Bigarren mailako zerga osagarria dela bide, talde multinazional bateko entitate eratzaile batek, Espainiako lurraldean kokatuta badago, Espainiako lurraldean kokatuta ez dauden eta errentak sartzeko erregela onargarri baten mende ez dauden talde multinazionaleko entitate eratzaileen errentei dagokien zerga osagarria ordaindu beharko du, errenta horiek gutxieneko zerga-tasa baino apalagoa den zerga-tasarekin zergapetu badira jurisdikzio mailan (behar beste zergapetu gabeko etekinak sartzeko erregela).

Hortaz, behar beste zergapetu gabeko etekinen erregelak errentak sartzeko erregelaren lagungarri gisa balio du; izan ere, zerga osagarriaren edozein hondar-zenbateko berresleitzen du, kasu honetan: errentak sartzeko erregelaren bitartez talde multinazionalaren entitate nagusiak ezin duenean bildu zerga-maila apala duten entitateei dagokien zerga osagarriaren zenbateko osoa.

Zerga osagarria Espainiako lurralde osoan aplikatzen da, eta foru lege honetan araututakoari lotu beharko zaio Hitzarmen Ekonomikoaren 127 bis artikuluan ezarritako irizpideen arabera hala egin behar denean.

I. tituluaren arabera, zerga osagarriak kargatzen ditu talde multinazional bateko zein talde nazional handi bateko entitate eratzaileek lortutako errentak, baldin eta errenta horiek, jurisdikzio mailan, zergapetuta badaude gutxieneko zerga-tasa baino apalagoa den zerga-tasa efektibo batekin. Horiez gainera, foru lege honen xedapenen arabera entitate horiei egozten zaizkien errentak ere zergapetzen ditu zerga osagarriak.

II. tituluak 5. artikuluan jasotzen ditu foru lege honetan oro har erabiltzen diren termino eta kontzeptuen definizioak. Ezinbestekoa zen halako manu bat sartzea, kontuan hartuta zergaren berritasuna eta Europar Batasunaren harmonizazioaren mendeko araudia izanik eragin oso nabarmena izanen duela beste jurisdikzio batzuetan, Europar Batasunaren eta ELGAren eremuan. Hori guztia dela eta, ezinbestekoa da barne ordenamendu juridikoan beharbada ohikoak ez diren kontzeptuak foru lege honetan arautu edo, gutxienez, definitzea, beste jurisdikzio batzuetan eragina izan baitezakete eta interpretazio harmonizatua behar baitute.

Aurrekoa alde batera utzi gabe, foru legearen beste artikulu batzuek beste zenbait kontzeptu espezifiko definitzen dituzte, egoera partikularrei edo kasu espezifikoagoei erantzuten dietenak, betiere jasotzen duten erregulazioa irakurtzea eta ulertzea errazteko asmoz.

III. tituluak zerga osagarriaren eremu subjektiboa eta lotura-arauak ezartzen ditu.

Zerga hau Espainiako lurraldean kokatutako entitate hauei baino ez zaie aplikatzen: zergaldia hasi aurreko lau zergaldietatik bitan gutxienez ere negozio-zifraren zenbateko garbi bateratua gutxienez 750 milioi eurokoa izan duten enpresa-talde multinazionaletako edo talde nazional handietako kideak izan behar dute. 750 milioi euroko muga hori koherentea da indarrean dauden nazioarteko beste zerga-akordio batzuetan ezarritakoarekin. Horrela, zifra hori bat dator talde multinazionalei herrialdez herrialdeko informazioa aurkezteko exijitzen zaienarekin.

Ondoren, 6. artikuluak zerga osagarriaren zergadunak definitzen ditu, zergaren hiru modalitateetan: zerga osagarri nazionala, lehen mailako zerga osagarria eta bigarren mailako zerga osagarria.

Oro har, zergadunak izanen dira Espainian kokatuta dauden talde multinazionaleko edo nazionaleko entitate eratzaileak. Baina legegileak zergadunaren ordezko gisa identifikatzen dituen entitate eratzaileak izanen dira, legez aginduta eta zergadunen ordez, aitorpena aurkeztu eta zerga ordaintzeko betebeharra bete beharko dutenak. Horrela, gerta daiteke zerga osagarriaren subjektu pasiboa bera izatea zerga osagarriaren zergaduna eta Espainiako lurraldean kokatuta dauden talde multinazionaleko edo nazionaleko gainerako zergadunen ordezkoa.

Halaber, zenbait entitate foru lege honen aplikazio-eremutik bazter utzi behar dira, lortu nahi duten helburua edo duten izaera berezia dela eta. Entitate baztertuak dira, oro har, merkataritza- edo enpresa-jardueretan aritzen ez direnak edo interes orokorreko jarduerak egiten dituztenak. Zehazki, 7. artikuluaren arabera, entitate baztertutzat jotzen dira entitate publikoak, nazioarteko erakundeak, pentsio funtsak eta irabazi-asmorik gabeko erakundeak. Era berean, bazter uzten ditu inbertsio funtsak eta higiezinen arloko inbertsio tresnak, baldin eta talde multinazionaleko edo talde nazional handiko azken entitate nagusia badira. Azken horiek arrazoi teknikoengatik uzten dira bazter, entitate horiek lortutako errentak titularren egoitzan zergapetzen direlako.

Foru lege honen ondorioetarako, talde multinazional edo nazional handi bateko kide diren entitate guztiei "entitate eratzaile" deitzen zaie. Talde multinazional bateko edo talde nazional handi bateko kide izan daitezkeen entitate eratzaileen kasuistika zabala da; desberdinak dira, haien merkataritza-araubidea, zerga-araubidea edo araubide substantiboa desberdinak diren heinean; gainera,talde multinazionala edo talde nazional handia jurisdikzio askotan egon daiteke; hori guztia aintzat hartuta beharrezkoa da entitate horiek lokalizatzeko arau bat ezartzea, hain zuzen ere 8. artikuluan jasotzen dena.

IV., V. eta VI. tituluek zerga-oinarria, zerga estali doituak eta zerga-tasa efektiboa arautzen dituzte, hurrenez hurren.

Zerga osagarriaren zerga-oinarria, IV. tituluan arautua, entitate eratzailearen kontabilitate-emaitzatik abiatzen da. Kontabilitate-emaitza, bestalde, foru lege honetan ezarritakoaren arabera doitu beharko da, "irabazi edo galera onargarriak" deiturikoak zehazteko.

9. artikuluaren arabera, entitate horren kontabilitate-emaitza, zergaldian, azken entitate nagusiaren egoera-orri finantzario bateratuak egiteko erabilitako finantza-kontabilitateko arau onargarri edo baimenduarekin bat etorriz zehazten dena izanen da, bateratze-ezabapenak egin aurrekoa. Entitate eratzaile baten kontabilitate-emaitza ezin bada zehaztu lehen adierazitakoaren arabera, zehazten ahalko da finantza-kontabilitateko beste arau onargarri bat edo baimendutako finantza-kontabilitateko arau bat erabiliz, 5. artikuluko 32. eta 33. apartatuetan zehaztutako baldintzetan.

Aurrekoa gorabehera, zerga osagarri nazionalaren kasuan, arauak adierazten duenez, bi modu izanen dira entitate eratzailearen kontabilitate-emaitza zehaztu ahal izateko: azken entitate nagusiaren egoera-orri finantzario bateratuak egiteko erabiltzen diren kontabilitate-arautik abiatuta, bateratze-ezabapenak egin aurretik; edo Espainiako lurraldean oro har onartutako eta entitate eratzailearen finantza-kontuak egiteko erabilitako kontabilitate-arauetatik abiatuta, baldin eta ezin bada zentzuz zehaztu entitate eratzailearen kontabilitate-emaitza, arestian adierazitakoaren arabera.

Irabazi edo galera onargarriak zehazteko egin beharreko doikuntzei dagokienez, honako hauek daude, besteak beste:

a) Enpresa-mozkinak zergapetzen dituen zergaren kontabilitate-gastua;

b) "Baztertutako dibidenduak": ehuneko 10eko edo gehiagoko partaidetzatik datozenak, edo ehuneko horretatik beherako partaidetzatik datozenak, gutxienez urtebeteko edukitza-aldiarekin;

c) Errenta negatiboak edo positiboak, ehuneko 10eko edo gehiagoko partaidetza eskualdatzearen ondoriozkoak;

d) 50.000 euroko edo gehiagoko isunen gastuak.

Doikuntza horiek eta 10. artikuluan jasotako gainerakoek islatzen dituzte zerga-sistema gehienetan egon ohi diren desberdintasun iraunkor nabarmenak, kontabilitate-etekinaren eta enpresa-mozkinak kargatzen dituen zerga baten zerga-oinarriaren artekoak.

Halaber, transakzio jakin batzuen zenbatekoa doitzeko erregela espezifiko batzuk ezartzen dira -batzuk nahitaezkoak eta beste batzuk aukerakoak-, entitate eratzailearen edo azken entitate nagusiaren aukerakoak, kasuen arabera. Lehenengoen artean honako hauek daude: talde barreneko finantzaketa-akordio jakin batzuetatik edo lehia askearen printzipioa betez merkatu-balioaren arabera balioetsi behar diren transakzioen ondoriozko gastuak. Bigarrenen artean, berriz, honako hauek: pertsonal-gastuak, ondare-tresnetan oinarritutako ordainketei dagozkienak; edo egoera-orri finantzario bateratuetan egindako ezabapenak, jurisdikzio berean kokatutako eta zerga-baterakuntzako talde batean sartutako entitate eratzaileen arteko transakzioen ondoriozkoak.

Orobat, 11. artikuluan zehaztutako inguruabarretan, entitate eratzaile baten nazioarteko itsas garraioaren ondoriozko errentak eta garraio horren errenta osagarriak entitatearen irabazi edo galera onargarrien kalkulutik bazter utziko dira.

12. artikuluak irabazi edo galera onargarriak entitate nagusiaren eta establezimendu iraunkor baten artean banatzeko berezitasunak arautzen ditu, betiere entitate horiek entitate eratzailetzat hartzen badira foru lege honen arabera. Bestalde, 13. artikuluan ezartzen dira entitate gardenek lortutako irabazi edo galera onargarriak beren bazkideei egozteko erregela bereziak.

Irabazi edo galera onargarriak horrela lortuta, zerga-oinarria zehazteko, irabazi onargarri garbiak minoratuko dira "substantzia ekonomikoari lotutako errenta-bazterketa" delakoarekin (14. artikulua). Irabazi onargarri garbiak izanen dira jurisdikzioko entitate eratzaileen irabazi onargarrien eta galera onargarrien arteko aldea. "Substantzia ekonomikoari lotutako errenta-bazterketa" delakoa irabazi onargarri garbiak zenbateko batekin minoratzea da, zeina zehaztuko baita jurisdikzioan kokatutako entitate eratzaileetako langileei dagozkien kostuen eta aktibo materialen balioaren arabera. Bazterketa horren helburua da emaitza proportzionatua bermatzea zerga-oinarriak higatzeko eta mozkinak lekualdatzeko arriskuak apalak diren egoeretan.

Aurreko guztia dela bide, 15. artikuluan adierazten denez, zerga-maila apaleko jurisdikzio bateko zerga osagarriaren zerga-oinarria, bai zerga osagarri nazionalaren modalitatean, bai lehen mailako zerga osagarriaren modalitatean, honako hau izanen da zergaldian: jurisdikzioko entitate eratzaileen irabazi onargarri garbiak substantzia ekonomikoari lotutako errenta-bazterketaren ondoriozko zenbatekoarekin minoratzeak dakarren emaitza positiboa.

Halaber, 6. artikuluko 2. eta 3. apartatuetan adierazitako zergadunentzako zerga osagarriaren zerga-oinarria, jurisdikzio batean eta zergaldian, eragiketa honen emaitza izanen da: zerga-maila apala duen jurisdikzio bateko zerga osagarriaren zerga-oinarria biderkatzea zergadunak edo partaidetzapeko entitate eratzaile bakoitzak zergaldian lortutako irabazi onargarriak zerga-maila apala duen jurisdikzio bakoitzeko irabazi onargarri agregatuekiko duen proportzioarekin.

Jurisdikzioko irabazi onargarri garbiak zehaztu ondoren, jurisdikzio horretako zerga-tasa efektiboa zehaztu behar da.

Horretarako, lehenik eta behin, zehaztu behar dira jurisdikzioko zerga estali doituak, V. tituluan arautzen den moduan. Oro har, oinarritzat hartzen da entitatearen etekinak zergapetzen dituen zerga arruntagatiko gastua, jurisdikzioko entitate eratzaileetako bakoitzaren egoera-orri finantzarioetan erregistratuta dagoena, eta gastu horren gainean doikuntza batzuk egin behar dira.

Horrela, adibide gisa, zerga estalietan gehituko da zerga estalien definizioa betetzen duten zergen zenbatekoa, baldin eta zergak aplikatu aurreko emaitza zehaztean gastu gisa kontsignatu badira, hau da, zerga arruntagatiko kontabilitate-gastu gisa erregistratuta ez badaude.

Orobat, minoratzeak eginen dira, irabazi edo galera onargarrien kalkulutik bazter utzitako irabaziei dagokien zerga arruntak eragindako gastuaren zenbatekoekin, edo zergaldia bukatu eta hurrengo hiru urteetan benetan ordaintzea espero ez den zerga arruntak eragindako gastuarekin, besteak beste.

Era berean, kontuan hartu beharko da zerga geroratuagatiko doikuntzaren zenbateko osoa, 18. artikuluan arautua. Entitate eratzaile baten egoera-orri finantzarioetan erregistratutako zerga geroratuagatiko gastu edo sarrera hartzen da oinarritzat, eta haren gainean zenbait doikuntza egiten dira.

VI. titulua zerga-tasa efektiboari buruzkoa da.

Behin irabazi onargarri garbiak eta zerga estali doituak jurisdikzio mailan zehaztuta, jurisdikzioko zerga-tasa efektiboa, zergaldian, zatiketa honen emaitza izanen da: jurisdikzioan kokatutako entitate eratzaileen zerga estali doituak (lehen adierazitako erregelen arabera zehaztuak) zati jurisdikzio horretan kokatutako entitate eratzaileen irabazi onargarri garbiak.

Hala ere, zerga-tasa efektiboa kalkulatzeko, kontuan hartu beharko dira foru lege honetan ezarritako berezitasunak, egoitzarik gabeko entitateei, inbertsio-entitateei, baterako negozioei edo jabetza minoritarioko entitate eratzaileei dagokienez.

VII. tituluaren izenburua "Zerga-zorra" da, eta sei kapitulu ditu.

I. kapituluak zergaren karga-tasa arautzen du.

Zergaldi batean jurisdikzio baterako zerga osagarriaren karga-tasa hau da: ehuneko 15eko gutxieneko zerga-tasaren eta jurisdikzio mailan kalkulatutako zerga-tasa efektiboaren arteko diferentzia positiboa.

Horrenbestez, zergaldi batean jurisdikzio bateko zerga-tasa efektiboa gutxieneko zerga-tasa baino txikiagoa bada, taldeko entitate eratzaileek jurisdikzio horri dagokion zerga osagarria jasan beharko dute, dena delako modalitatekoa (zerga osagarri nazionala, lehen mailako zerga osagarria edo bigarren mailako zerga osagarria).

Jurisdikzioan kokatutako entitate eratzaile bakoitzaren zerga osagarriaren karga-tasak, bat etorri behar du jurisdikzio horretarako lortutako karga-tasarekin. Karga-tasa hori jurisdikzioan dagoen talde multinazionaleko edo talde nazional handiko entitate eratzaile bakoitzaren zergaldiko zerga-oinarriari aplikatu behar zaio, lehen azaldutako baldintzetan kalkulatuta, entitatearen zerga osagarriaren kuota zehazteko.

II. kapituluan xedatutakoaren arabera, Espainiako lurraldean kokatutako entitate eratzaile baten zerga osagarriaren kuota honako hau izanen da zergaldian: zerga osagarri nazionalaren kuotari lehen mailako zerga osagarriaren kuota eta bigarren mailako zerga osagarriaren kuota gehitzearen ondoriozko emaitza.

Zerga osagarri nazionalaren kuota (III. kapitulua) 6 artikuluko 2. apartatuan ezarritako zergadunei dagokien zerga osagarria izanen da. Haren kalkulua egiteko, zerga osagarri nazionala aplikatuko da, 24. artikuluaren arabera.

Lehen mailako zerga osagarriaren kuota (IV. kapitulua) 6 artikuluko 3. apartatuan ezarritako zergadunei dagokien zerga osagarria izanen da. Haren kalkulua egiteko, IV. kapituluan arautzen den errentak sartzeko erregela aplikatuko da, 24. artikuluaren arabera.

Bigarren mailako zerga osagarriaren kuota (V. kapitulua) 6 artikuluko 4. apartatuan ezarritako zergadunei esleitutakoa izanen da, 29. artikuluan xedatutakoaren arabera.

VI. kapituluan adierazitako moduan, zerga osagarria gehitu eginen da zerga osagarri gehigarriarekin.

VIII. tituluak zergaldia eta zerga osagarriaren sortzapena arautzen ditu.

Zergaldia bat etorriko da talde multinazionalaren edo talde nazional handiaren azken entitate nagusiaren ekitaldi ekonomikoarekin, egoera-orri finantzario bateratuak egiten baditu, edo, halakorik ez bada, urte naturalarekin.

Zergaldiko azken egunean sortuko da zerga.

IX. tituluan, berriz, foru legeak "de minimis" bazterketa bat jasotzen du, gutxieneko zergapetze-maila globalaren erreformaren helburuen eta zerga-administrazioentzako eta zergadunentzako administrazio-kargaren arteko oreka lortzeko.

Hala, jurisdikzio batean kokatutako entitate eratzaileen sarrera onargarrien batezbestekoa 10 milioi eurotik beherakoa bada eta jurisdikzio horretako entitate eratzaile guztien irabazi edo galera onargarrien batezbestekoa milioi bat eurotik beherakoa bada, entitate eratzaile aitortzaileak aukeratzen ahalko du jurisdikzio horretan kokatutako entitate eratzaileek zor duten zerga osagarria zero izatea.

Ildo berean, betetze-kostuak eta administrazio-kostuak murrizteko, portu seguruak aplikatzeko aukera ezartzen da.

Beraz, zergaldian ez zaie exijituko 6. artikuluko 3. apartatuan adierazitako zergadunei lehen mailako zerga osagarria, beste jurisdikzio batean kokatuta dituzten entitate eratzaileei dagokienez, baldin eta jurisdikzio horrek exijitu badu zerga osagarri nazional onargarri bat, bermatuko duena zerga horren mendeko entitate eratzaileen zerga-maila efektiboak portu seguruei buruzko nazioarteko akordio onargarri baten baldintzak betetzen dituela.

Halaber, etorkizunean nazioartean onar litezkeen portu seguruen aplikagarritasuna bermatzeko, kasu horretan ere ez zaie exijituko zergaldian 6. artikuluan ezarritako zergadunen zerga osagarria, portu seguruei buruzko nazioarteko akordio onargarri baten baldintzak betetzen dituen jurisdikzio batean kokatutako entitate eratzaileei dagokienez, nazioarteko akordio horretan ezarritako baldintzen arabera.

X. tituluak araubide berezi batzuk arautzen ditu, arau espezifikoak behar dituzten hainbat egoeratan aplikatuko direnak.

Bereziki, I. kapituluak enpresen berregituraketak eta baterako negozioak arautzen ditu. Bertan irizpide bereziak ezartzen dira, kopuruen eta denboraren aldetik, zehazteko, enpresak berregituratzeko eragiketa jakin batzuk egin ondoren, noiz iristen den foru lege honen aplikazio-atalasera, edo zer inpaktu eragiten den talde multinazional baten edo talde nazional handi baten konfigurazioan kasu hauetan: bat-egiteen edo zatiketen kasuan, edo entitate bat taldetik irten edo taldera sartzen bada entitate horretan zuzeneko edo zeharkako partaidetza bat eskuratu edo eskualdatzearen ondorioz, edo entitate bat talde berri baten entitate nagusi bihurtzen bada eskuratzea egiten den zergaldian. Orobat, arau bereziak ezartzen dira azken entitate nagusia identifikatzeko, baterako negozioen kasuan edo entitate nagusi ugari dituzten talde multinazionalen kasuan.

Bestalde, II. kapituluak neutraltasun-araubidea eta dibidenduak banatzeko araubidea arautzen ditu. Talde multinazional bateko edo talde nazional handi bateko azken entitate nagusia fiskalki gardena bada, haren egoitzan irabazi eta galera onargarriak modulatzeko arauak beharko dira, entitatearen irabazien tributazioa bermatzeko haren bazkideen egoitzan, halako irabazi edo galera onargarriak bazkideoi egotzi ondoren. Halakoetan, entitate horien zerga estaliak murriztuko dira bazkideei egotzitako irabazi onargarrien zenbatekoaren proportzioan.

Entitate bateko partaidetzen titularren errentei zerga-maila bakarra aplikatzen dieten zerga-araubideen kasuan, baldin eta horretarako titularrei banatutako etekinak entitatearen errentetatik kendu edo baztertzen badituzte, arauak ezartzen du ezen araubide horien mende dauden azken entitate nagusiek beren irabazi onargarriak murriztea, entitateok beren titularren egoitzan tributatzen badute, betiere neutraltasun-printzipioaren bila.

Halaber, tributazioa ez bada gertatzen etekinak lortu diren momentuan, baizik eta etekinak banatu diren momentuan -hala gertatzen da banaketako zenbait zerga-araubidetan-, ezartzen da etekinak lortu ziren zergaldian zergapetu behar zituen zerga zenbatzeko aukera, baldin eta etekinak hurrengo lau urteetan banatzen badira.

III. kapituluak inbertsio-entitateei aplikatu beharreko berezitasunak arautzen ditu. Azken entitate nagusi ez diren inbertsio-entitateen kasuan, mekanismo bat ezartzen da entitateetako bakoitzeko zerga-tasa efektiboa kalkulatzeko, entitate horiek beren jurisdikzioan duten tributazio apala kontuan hartuta, horrela, jurisdikzioan kokatuta dauden taldeko gainerakoen tasa efektiboaren zenbaketari kalterik ez egiteko. Horrez gainera, alternatiba gisa, aukera ematen da entitate horiek beren burua fiskalki gardentzat jotzeko edo zerga-banaketaren araubide bat aplikatzeko.

Azkenik, IV. kapituluak jabetza minoritarioko entitate eratzaileen berezitasunak arautzen ditu.

XI. eta XII. tituluetan xedatutakoari jarraituz, zerga osagarriaren kudeaketa bi zutabe nagusitan oinarritzen da.

Alde batetik, XI. tituluak betebehar formalak aipatzen ditu.

I. kapituluan, zehazki 47. artikuluan, informazio-betebehar bat ezartzen du talde multinazional edo talde nazional handi bateko kide diren entitate guztientzat, aitorpen informatibo gisa. Hala ere, entitate horiek entitate eratzaile bakar bat identifikatzen ahalko dute, beren izenean eta beren kontura talde multinazionalaren edo talde nazional handiaren aitorpen informatiboa aurkezteko. Informazio zehatza eskatzen da: entitate eratzaileen identifikazio-datuak; taldearen egitura; zerga-tasa efektiboa, zerga osagarria eta azken hori jurisdikzio eta entitate bakoitzari nola esleitu kalkulatzeko behar diren datu guztiak; bai eta taldeko entitateek baliatutako aukera guztien xehetasuna ere.

Orobat, 48. artikuluan zehapen-araubide espezifiko bat ezartzen da, zerga osagarriaren informazio-betebeharrei dagokiena, 2022/2523 (EB) Zuzentarauaren 46. artikuluan xedatutakoari jarraikiz.

II. kapituluak foru lege honetan aurreikusitako aukeren erabilera arautzen du.

Bestalde, XII. tituluak zerga osagarriaren kudeaketa arautzen du. Zergaren autolikidazioa eta sarrera, oro har, Espainian kokatuta dauden talde multinazionalaren edo talde nazionalaren entitate eratzaileei egokituko zaizkie. Nolanahi ere, kasu jakin batzuetan, legegileak zergadunaren ordezko gisa identifikatutako entitate eratzaileek legez hartu beharko dituzte beren gain zergadun batzuen betebehar formalak eta materialak.

Zerga osagarriaren autolikidazioa eta zerga-zor autolikidatuaren sarrera zergadunak egin beharko ditu, edo, hala badagokio, legegileak zergadunaren ordezko gisa izendatutako entitateak, Nafarroako Foru Ogasunean, hala dagokionean, Hitzarmen Ekonomikoaren 27 bis.2 artikuluari jarraikiz eta erregelamendu bidez ezartzen diren baldintzen arabera.

53. artikuluak ezartzen ditu zerga-administrazioak zerga-oinarria eta zerga osagarriaren gainerako elementuak zehazteko dituen ahalmenak. Horretarako, 9. artikuluan ezarritako kontabilitate-arauak eta foru lege honetako gainerako araudia aplikatuko dira.

XIII. tituluak, berriz, beste jurisdikzio batzuetan aplika daitekeen zuzenbide nazionalaren baliokidetasuneko balizko ebaluazio bat arautzen du.

Azkenik, XIV. tituluak administrazioarekiko auzien jurisdikzioari esleitzen dio, bide ekonomiko-administratiboa amaitu ondoren, foru lege honen ondorioz sortzen diren eztabaidak ebazteko eskumen esklusiboa.

Horrez gain, foru legeak sei xedapen iragankor eta bost azken xedapen ditu.

Lehenengo xedapen iragankorrak zerga geroratuengatiko aktibo eta pasiboen eta trantsizio-zergaldian eskualdatutako aktiboen tratamendu fiskala arautzen du.

Bigarren xedapen iragankorrak substantzia ekonomikoari lotutako errenten bazterketari dagozkion ehuneko batzuk jasotzen ditu, aldi baterako aplikatuko direnak, 2032ra arte zergaren aplikazioa leuntzeko.

Bestalde, hirugarren xedapen iragankorrak ezartzen du ezen ez zaiela zerga osagarri nazionala exijituko azken entitate nagusiari eta entitate horrek Espainiako lurraldean kokatuta dituen entitate eratzaileei, ez eta tarteko entitate nagusiari eta entitate horrek Espainiako lurraldean kokatuta dituen entitate eratzaileei ere, baldin eta azken entitate nagusia entitate baztertu bat bada, talde multinazionalaren nazioarteko jardueraren hasierako fasearen lehen bost urteen barnean, edo talde nazional handia foru lege hau lehen aldiz aplikatzera behartuta dagoen zergaldiko lehen egunetik aurrerako lehen bost urteen barrenean hasten diren zergaldietan. Bereziki, aipatu behar da zehapen-araubide espezifiko bat ezarri dela hirugarren xedapen iragankorrean ezarritako komunikazioak epean ez aurkezteagatik.

Era berean, laugarren xedapen iragankorrean arautzen da zerga osagarriaren galdagarritasunik eza 2023ko abenduaren 31tik 2026ko abenduaren 31ra bitartean hasitako zergaldietarako, baldin eta zergaldi horietan herrialdez herrialdeko informazio onargarri bat aurkezten bada, jurisdikzioren eta aldiaren araberakoa.

Bosgarren xedapen iragankorrak, berriz, epe espezifiko bat arautzen du aitorpen informatiboa eta autolikidazioa trantsizio-zergaldian aurkezteko.

Azkenik, seigarren xedapen iragankorrak ezartzen du behar beste zergapetu gabeko etekinen erregelak emaitza nulua emanen duela azken entitate nagusia kokatuta dagoen jurisdikzioari dagokionez, talde multinazional hauen kasuan: 2025eko abenduaren 31 baino lehen hasi eta 2026ko abenduaren 31 baino lehen bukatzen den zergaldia duten talde multinazionalak, baldin eta talde horien azken entitate nagusia gutxienez ehuneko 20ko zerga-tasa nominalarekin zergapetuta egon bada enpresa-mozkinen gaineko zerga baten bidez.

Azken xedapenak honako alderdi hauei buruzkoak dira:

a) Lehenengoak Tributuei buruzko abenduaren 14ko 13/2000 Foru Lege Orokorra aldatzen du;

b) Bigarrenak Sozietateen gaineko Zergari buruzko abenduaren 28ko 26/2016 Foru Legea aldatzen du;

c) Hirugarrenean aipatzen da foru lege honek 2022/2523 (EB) Zuzentaraua barne ordenamendu juridikoan txertatzen duela;

d) Laugarrenak gaikuntza ematen die Nafarroako Gobernuari eta tributuen arloan eskumena duen departamentuaren titularrari foru lege hau garatzeko eta betearazteko beharrezkoak diren xedapen guztiak emateko;

e) Bosgarrena indarrean jartzeari eta aplikatzeari buruzkoa da; foru legeak 2023ko abenduaren 31tik aurrera hasten diren zergaldietan izanen ditu ondorioak, salbu eta behar beste zergapetu gabeko etekinen erregelaren kasuan, 2024ko abenduaren 31tik aurrera hasitako zergaldietarako eraginkorra izatea aurreikusten baita.

III

Azpimarratu behar da, orain arte azaldutakoaren arabera, arau-testu hau bat datorrela Nafarroako Foru Komunitateko Administrazioari eta Foru-sektore Publiko Instituzionalari buruzko martxoaren 11ko 11/2019 Foru Legearen 129. artikuluan ezarritako premiaren, efikaziaren, proportzionaltasunaren, segurtasun juridikoaren, gardentasunaren eta efizientziaren printzipioekin.

Arauak tributu baten sorrera arautzen du, eta, beraz, foru lege mailako arau baten bidez onetsi behar da, maila apalagoko beste arau aukera batzuk kontuan hartu gabe.

Proportzionaltasunaren printzipioa ere betetzen da; izan ere, hertsiki lortu nahi izan dira Kontseiluaren abenduaren 15eko 2022/2523 (EB) Zuzentarauaren helburuak (zuzentarau hori Batasuneko enpresa-talde multinazionalentzako eta talde nazional handientzako gutxieneko zergapetze-maila globala bermatzeari buruzkoa da), zuzentarau horren transposizioa egin baita.

Segurtasun juridikoaren printzipioari dagokionez, bermatu da arau-proiektuaren koherentzia gainerako foru ordenamendu juridikoarekin, bai eta Europar Batasunekoarekin ere.

Gardentasun printzipioari dagokionez, Nafarroako Aldizkari Ofizialean argitaratzea alde batera utzi gabe, proiektua eta memoria Nafarroako Gobernu Irekiaren Atarian argitaratuz bermatzen da, herritarrek testu horiek ezagutu ahal izan ditzaten entzunaldiaren eta jendaurreko informazioaren tramitean.

Azkenik, efizientzia printzipioari dagokionez, nahiz eta zerga berriak barne kudeaketako sistemak aldatzea eskatuko duen, talde nazional handiak eta talde multinazionalak nazioarteko tributazioaren paradigma berrietara egokitzeko, ahalegina egin da arauak ahalik eta administrazio-karga eta zeharkako kostu txikienak sor ditzan, baliabide publikoen erabilera arrazionala sustatuz. Ildo horretan, zergadunei eskatzen zaien informazioa eta dokumentazioa zerga-administrazioak haien jarduera kontrolatzen duela bermatzeko ezinbestekoak baizik ez dira.

ATARIKO TITULUA. XEDAPEN OROKORRAK

1. artikulua. Izaera eta xedea.

1. Zerga osagarria zuzeneko tributu bat da, izaera pertsonalekoa, eta foru lege honen 6. artikuluko 1. apartatuan ezarritako talde multinazional bateko edo talde nazional handi bateko entitate eratzaileen errentak zergapetzen ditu, baldin eta kokatuta dauden jurisdikzioko zerga-tasa efektiboa (jurisdikzio mailan kalkulatua) gutxieneko zerga-tasa baino txikiagoa bada, foru lege honen arauen arabera eta Kontseiluaren 2022ko abenduaren 15eko 2022/2523 (EB) Zuzentarauari jarraituz (Batasuneko enpresa-talde multinazionalentzako eta talde nazional handientzako gutxieneko zergapetze-maila globala bermatzeari buruzkoa).

2. Foru lege honen xedea zerga osagarri bat arautzea da, talde multinazional batek edo talde nazional handi batek (foru lege honen 6. artikuluko 1. apartatuan definituta dagoen bezala) zerga-maila apala duten jurisdikzioetan lortu dituen errenten gaineko gutxieneko zergapetze efektibo bat bermatzeko. Zerga osagarri horrek honako forma hauek izanen ditu:

a) Zerga osagarri nazional bat; haren bitartez, Espainiako lurraldean kokatuta dauden talde multinazional bateko edo talde nazional handi bateko entitate eratzaile guztiak lortu duten zerga-oinarriagatik zergapetuko dira, foru lege honetan xedatutakoaren arabera, eta 23. artikuluan ezarritako karga-tasa aplikatuko zaie.

b) Lehen mailako zerga osagarri bat; haren bitartez, talde multinazional bateko entitate nagusiak, Espainiako lurraldean kokatuta badago, Espainiako lurraldean kokatuta ez dauden talde multinazionaleko entitate eratzaileen errentei dagokien zerga osagarritik esleitzen ahal zaion zatiaren mende (foru lege honetan ezarritakoaren arabera zehaztua) geratuko da, errenta horiek gutxieneko zerga-tasa baino txikiagoa den zerga-tasa batekin zergapetu badira, jurisdikzio mailan, foru lege honetan xedatutakoari jarraikiz (errentak sartzeko erregela).

c) Bigarren mailako zerga osagarri bat; haren bitartez, talde multinazional bateko entitate eratzaile batek, Espainiako lurraldean kokatuta badago, zerga osagarriaren zenbatekoa ordaindu beharko du (foru lege honetan ezarritakoaren arabera zehaztua), lurralde horretan kokatuta ez dauden talde multinazionaleko entitate eratzaileen errentei dagokienez, baldin eta errenta horiek errentak sartzeko erregela onargarri baten mende ez badaude eta gutxieneko zerga-tasa baino txikiagoa den zerga-tasa batekin zergapetu badira, jurisdikzio mailan, foru lege honetan xedatutakoari jarraikiz (behar beste zergapetu gabeko etekinen erregela).

2. artikulua. Aplikazioeremua.

1. Zerga osagarria Espainiako lurralde osoan aplikatuko da.

Aurreko paragrafoan xedatutakoaren ondorioetarako, Espainiako lurraldeak barne hartzen ditu lurraldeko uren ondoko esparruak ere, zeinen gainean Espainiak dagozkion eskubideak balia baititzake itsasoko zoruari eta zorupeari, gaineko urei eta baliabide naturalei dagokienez, Espainiako legeriarekin eta nazioarteko zuzenbidearekin bat etorriz.

2. Foru lege honen aplikazio-eremua zehaztuko da Estatuaren eta Nafarroako Foru Komunitatearen arteko Hitzarmen Ekonomikoaren 27 bis artikuluan ezarritako irizpideei jarraikiz.

3. artikulua. Tratatuak eta hitzarmenak.

Foru lege honetan ezarritakoak ez du ukatzen Espainiako barne ordenamenduaren parte bihurtu diren nazioarteko tratatu eta hitzarmenetan xedatutakoa, Espainiako Konstituzioaren 96. artikuluari jarraikiz.

I. TITULUA. ZERGA-EGITATEA

4. artikulua. Zergaegitatea.

1. Zerga-maila apala duten entitate eratzaileek errenta lortzea izanen da zerga osagarriaren zerga-egitatea, foru lege honen xedapenen arabera.

2. Halaber, talde multinazional bateko edo talde nazional handi bateko entitate eratzaileek lortutako errentatzat hartuko dira foru lege honen xedapenen arabera egozten zaizkien errentak.

II. TITULUA. DEFINIZIOAK

5. artikulua. Definizioak.

Foru lege honen ondorioetarako, honela ulertzen dira termino hauek:

1) "Kreditu fiskal itzulgarri onargarria":

a) Entitate eratzaile bati eskudirutan edo antzeko bitartekoak erabilita lau urteko epean ordaindu behar zaion kreditu fiskal itzulgarria -epe hori kreditua ematen duen jurisdikzioko legeriak entitate eratzaileari kreditu fiskal itzulgarria jasotzeko eskubidea aitortzen dion egunetik aurrera hasi behar da zenbatzen-; edo

b) Kreditu fiskala partez itzulgarria bada, entitate eratzaile bati eskudirutan edo antzeko bitartekoen bidez lau urteko epean ordaintzekoa den kreditu fiskal itzulgarriaren zatia -epe hori entitate eratzaileak partez itzulgarria den kreditu fiskala jasotzeko eskubidea duen egunetik aurrera hasiko da zenbatzen-;

Kreditu fiskal itzulgarri onargarri baten barnean ez da sartuko zerga itzulgarri edo egozgarri baten ezein zenbatekorik, egotzitako zerga onargarri baten edo egotzitako zerga itzulgarri ez-onargarri baten aplikazioagatik.

2) "Kreditu fiskal itzulgarri ez-onargarria": kreditu fiskal itzulgarri onargarria ez den kreditu fiskala, baina osorik edo partez itzulgarria dena.

3) "Lehiaren distortsio adierazgarria": oro har onartutako kontabilitate-printzipio multzo baten esparruan, printzipio edo prozedura espezifiko bat aplikatzeari dagokionez, zergaldi batean diru-sarreren edo gastuen aldakuntza agregatua 75 milioi eurotik gorakoa izatea, kasuko printzipioa edo prozedura edo finantza-informazioko nazioarteko arauen araberako prozedura aplikatuta zehaztuko zen zenbatekoarekin alderatuta. Nazioarteko arau horiek FINA arauak dira, Europar Batasunak onetsi zituenak Kontabilitateko nazioarteko arauen ezarpenari buruzko Europako Parlamentuaren eta Kontseiluaren 2002ko uztailaren 19ko 1606/2002 (EE) Erregelamenduaren bidez.

4) "Entitatea": finantza-kontabilitate bereizia daraman pertsona juridiko, lege-akordio edo tresna juridiko oro.

5) "Entitate eratzailea":

a) Talde multinazional bateko edo talde nazional handi bateko kide den entitate oro; eta

b) Aurreko a) letran aipatzen den talde multinazional bateko kide den entitate nagusi baten establezimendu iraunkor oro;

6) "Zerga-maila apaleko entitate eratzailea":

a) Talde multinazional bateko edo talde nazional handi bateko entitate eratzaile bat, zerga-maila apaleko jurisdikzio batean kokatuta dagoena, edo

b) Egoitzarik gabeko entitate eratzaile bat, zergaldi batean irabazi onargarriak eta gutxieneko zerga-tasa baino txikiagoa den zerga-tasa efektiboa dituena.

7) "Entitate eratzaile aitortzailea": 47. artikuluaren arabera zerga osagarriaren aitorpen informatiboa aurkezten duen entitatea.

8) "Entitate eratzaile titularra": talde multinazional edo talde nazional handi bereko beste entitate eratzaile batean zuzenean edo zeharka partaidetza bat duen entitate eratzailea.

9) "Inbertsio-entitatea":

a) Inbertsio-funts bat edo higiezinen arloko inbertsio-tresna bat;

b) Aurreko a) letran jasotako entitateetako baten partaidetzapeko entitate bat, partaidetza hori zuzena edo halako entitateen kate baten bitartekoa eta gutxienez ehuneko 95ekoa bada, eta aktiboak edukitzeko edo haren onurarako funtsak inbertitzeko soilik edo ia soilik jarduten badu; edo

c) Aurreko a) letran aipatutako entitateetako baten partaidetzapeko entitatea, partaidetza hori gutxienez ehuneko 85ekoa bada eta bere diru-sarrera guztiak funtsean dibidenduetatik edo kapital-irabazi edo -galeretatik badatoz eta halakoak irabazi edo galera onargarrien kalkulutik baztertuta badaude foru lege honen ondorioetarako.

10) "Pentsio-zerbitzuen entitatea": 22. puntuko a) letran aipatutako entitateen onurarako funtsak inbertitzeko edo 22. puntuko a) letran aipatutako jarduera arautuen lagungarri diren jarduerak egiteko soilik edo ia soilik eratuta dagoen eta jarduten duen entitatea, baldin eta pentsio-zerbitzuen entitatea jarduera arautu horiek egiten dituzten entitateen talde berekoa bada.

11) "Entitate aitortzaile izendatua": azken entitate nagusia ez beste entitate eratzaile bat, talde multinazionalak edo talde nazional handiak izendatu duena 47. artikuluan ezarritako informazio betebeharrak talde multinazionalaren edo talde nazional handiaren izenean betetzeko.

12) "Entitate nagusia": azken entitate nagusi bat, ez dena entitate baztertua, tarteko entitate nagusia edo partez partaidetzapekoa den entitate nagusia.

13) "Tarteko entitate nagusia": zuzenean edo zeharka talde multinazional edo talde nazional handi bereko beste entitate eratzaile bateko partaidetza baten titularra den entitate eratzaile bat, ezin dena hartu azken entitate nagusitzat, partez partaidetzapekoa den entitate nagusitzat, establezimendu iraunkortzat, inbertsio-entitatetzat edo aseguruen inbertsio-entitatetzat;

14) "Partez partaidetzapekoa den entitate nagusia": zuzenean edo zeharka talde multinazional edo talde nazional handi bereko beste entitate eratzaile bateko partaidetza baten titularra den entitate eratzailea, baldintza hauek betetzen dituena: haren etekinetako partaidetzaren ehuneko 20 baino gehiago pertsona batek edo gehiagok zuzenean edo zeharka edukitzea, eta pertsona horiek ez izatea talde multinazional edo talde nazional handi horretako entitate eratzaile; eta, azkenik ez izatea azken entitate nagusia, establezimendu iraunkorra, inbertsio-entitatea edo aseguruen inbertsio-entitatea.

15) "Azken entitate nagusia":

a) Zuzenean edo zeharka beste edozein entitateren gaineko kontrol-partaidetza duen entitate bat, zuzenean edo zeharka entitate horretan kontrola edo kontrol-partaidetza duen beste entitate baten jabetzakoa ez dena; edo

b) Talde bateko entitate nagusia, 24. puntuko b) letran definitzen den moduan.

Ez dira azken entitate nagusitzat hartuko artikulu honen 17. puntuan ezarritako entitate publikoaren definizioa betetzen duten funts subiranoak.

16) "Entitate nagusia": bere egoera-orri finantzarioetan establezimendu iraunkor baten kontabilitate-emaitza jasotzen duen entitatea.

17) "Entitate publikoa": honako irizpide hauek guztiak betetzen dituen entitate oro:

a) Administrazio publiko baten parte izatea edo administrazio publiko batek haren jabetza osoa izatea (administrazioaren azpizatiketa edo tokiko agintaritza oro barne);

b) Ez jardutea ezein merkataritza- edo enpresa-jardueratan, eta xede nagusi hau izatea:

i) Administrazio publikoko eginkizun bat betetzea; edo

ii) Administrazio publikoaren edo jurisdikzioaren aktiboak kudeatzea edo inbertitzea, inbertsioak eginez eta mantenduz, eta administrazio edo jurisdikzio horren aktiboei lotutako aktiboak eta inbertsio-jarduerak kudeatzea;

c) Administrazio publiko bati kontuak ematea bere errendimendu globalaz, bai eta urteko informazioa ematea ere; eta

d) Desegiten den unean, aktiboak administrazio publiko bati esleitzea, eta, etekin garbiak banatzen badira, etekin horiek administrazio horri bakarrik banatzea, eta etekin horiek batere onurarik ez ekartzea ezein partikularri.

18) "Entitate gardena": sortu zen jurisdikzioan sarrera, gastu, irabazi edo galerei dagokienez zerga ondorioetarako gardena den entitatea, salbu eta beste jurisdikzio batean egoitza fiskala badu eta haren errenta edo etekinen gaineko zerga estali baten zergapean badago bertan.

Honako hauek dira entitate gardenak:

a) Bere sarrera, gastu, irabazi edo galerei dagokienez zerga ondorioetarako gardena den entitatea, bere partaidetzen titularra dagoen jurisdikzioan zerga ondorioetarako gardena bada; edo

b) Bere sarrera, gastu, galera edo irabaziei dagokienez alderantzizko entitate hibridoa den entitate bat, baldin eta bere partaidetzen titularra dagoen jurisdikzioan zerga ondorioetarako gardena ez bada.

Definizio honen ondorioetarako, zerga ondorioetarako gardena den entitatea edo fiskalki gardena den entitatea izanen da jurisdikzio bateko legediak tratatzen baditu entitate horren sarrera, gastu, irabazi edo galerak entitatearen titularrak zuzenean lortu edo jasan balitu bezala, duen partaidetzaren proportzioan.

Entitate eratzailearen definizioa betetzen duen entitate bateko edo establezimendu iraunkor bateko partaidetza zeharka edukiz gero, zerga ondorioetarako gardenak diren entitateen kate baten bitartez, partaidetza hori zerga ondorioetarako egitura garden baten bidez edukitzen dela joko da.

Entitate eratzailea ez bada zerga-egoiliarra eta ez badago zerga estali baten edo zerga osagarri nazional onargarri baten mende, kudeaketa-lekuaren, sortu den lekuaren edo antzeko irizpideen arabera, zerga ondorioetarako gardena den entitatetzat hartuko da, bere sarrerei, gastuei, irabaziei edo galerei dagokienez, baldin eta:

a) Haren titularrak entitatea zerga ondorioetarako gardentzat jotzen duen jurisdikzio batean kokatuta badaude;

b) Sortu den jurisdikzioan establezimendurik ez badauka; eta

c) Sarrerak, gastuak, irabaziak edo galerak establezimendu iraunkor bati egoztekoak ez badira.

19) "Establezimendu iraunkorra":

a) Negozio-leku bat edo halakotzat hartzen den leku bat, kokatua dagoen jurisdikzioan establezimendu iraunkor gisa tratatzen dena aplikatzekoa den hitzarmen fiskal baten arabera, baldin eta jurisdikzio horrek esleitzen zaion errenta zergapetzen badu ELGAren Errentaren eta Ondarearen gaineko Zerga Hitzarmenaren Ereduaren 7. artikuluaren antzeko xedapen baten arabera (berrikusitako azken bertsioa);

b) Ez badago aplikatzekoa den hitzarmen fiskalik, negozio-leku bat edo halakotzat hartzen den leku bat, zeina kokatuta baitago establezimendu horri esleitzen ahal zaion errenta -zenbateko garbietan- bere egoiliar fiskalei errentak zergapetzen dizkien antzera kargatzen duen jurisdikzio batean;

c) Jurisdikzio batek ez badu enpresa-mozkinen gaineko zerga-araubiderik, negozio-leku bat edo jurisdikzio horretan halakotzat hartutako leku bat, establezimendu iraunkortzat hartuko litzatekeena ELGAren Errentaren eta Ondarearen gaineko Zerga Hitzarmenaren Ereduaren arabera (berrikusitako bertsioa), betiere jurisdikzio horrek establezimenduari esleitzen ahal zitzaizkion errentak zergapetzeko eskubidea izan bazezakeen, hitzarmen horren 7. artikuluaren arabera; edo

d) Negozio-leku bat edo halakotzat hartutako leku bat, aurreko a) letratik c) letrara azaldu ez dena, zeinaren bidez entitatea kokatuta dagoen jurisdikziotik kanpoko eragiketak egiten baitira, betiere jurisdikzio horrek salbuespen bat aplikatzen badu eragiketa horiei esleitzen ahal zaizkien errentetarako.

20) "Egoera-orri finantzario bateratuak":

a) Entitate batek finantza-kontabilitateko arau onargarri baten arabera egindako egoera-orri finantzarioak. Arau horren arabera, entitatearen aktiboak, pasiboak, sarrerak, gastuak eta diru-fluxuak edo entitate horrek kontrola edo kontrol-partaidetza duen edozein entitaterenak unitate ekonomiko bakar batenak balira bezala aurkezten dira;

b) 24.puntuko b) letran zehaztutako taldeen kasuan, entitateak finantza-kontabilitateko arau onargarri baten arabera egindako egoera-orri finantzarioak;

c) Azken entitate nagusiaren egoera-orri finantzarioak, finantza-kontabilitateko arau onargarri baten arabera egin ez direnak, baina ondoren doitu direnak lehiaren edozein distortsio adierazgarri saihesteko; eta

d) Azken entitate nagusiak aurreko a), b) edo c) letretan azaldutakoaren arabera egoera-orri finantzarioak egiten ez baditu, azken entitate nagusia egoera-orri finantzario horiek honako arau hauetakoren arabera egitera behartuta egon balitz bezala eginen ziratekeen egoera-orri finantzarioak:

i) Finantza-kontabilitateko arau onargarri bat; edo

ii) Finantza-kontabilitateko beste arau baimendu bat, betiere egoera-orri finantzario horiek lehiaren edozein distortsio adierazgarri saihesteko doitu badira.

21) "Inbertsio-funtsa": honako baldintza hauek betetzen dituen entitatea edo mekanismoa:

a) Inbertitzaile batzuen aktibo finantzarioak edo ez-finantzarioak batera jartzeko diseinatuta egotea, inbertitzaile horietakoren bat lotuta ez badago;

b) Inbertsio-politika jakin bati jarraituz inbertitzea;

c) Inbertitzaileei aukera ematea eragiketa-, ikerketa- eta analisi-kostuak murrizteko edo arriskua kolektiboki banatzeko;

d) Nagusiki inbertsio-errentak edo -irabaziak sortzeko diseinatuta egotea, edo gertaera edo emaitza zehatz edo orokor baten aurrean babesteko;

e) Inbertitzaileek funtsaren aktiboetatik edo aktibo horietatik lortutako errenten ondoriozko etekinak -egin duten ekarpenaren araberakoak- jasotzeko eskubidea izatea;

f) Inbertsio-funtsa edo haren kudeaketa, ezarrita dagoen edo kudeatzen den jurisdikzioan, inbertsio-funtsen araubide erregulatzailearen mende egotea, bereziki kapitalak zuritzearen aurka borrokatzeko eta inbertitzaileak babesteko erregulazio egokiaren mende egotea; eta

g) Inbertitzaileen kontura inbertsio-funtsen kudeaketako profesionalek kudeatzea.

22) "Pentsio-funtsa":

a) Esklusiboki edo ia esklusiboki pertsona fisikoei erretiro-prestazioak eta prestazio osagarriak kudeatzeko edo emateko jurisdikzio batean eratuta dagoen eta jarduten duen entitate bat, baldin eta:

i) Entitatea jurisdikzio horrek edo haren azpiatal politikoetako batek edo tokiko agintariek pentsio-funts gisa araututa badute; edo

ii) Prestazio horiek araudi nazionalak beste modu batean bermatzen edo babesten baditu eta finantzatuta badaude talde multinazionalen eta talde nazional handien kaudimengabezia-kasu baten aurrean pentsioen arloko betebeharrak betetzen direla bermatzeko akordio fiduziario baten edo fideikomisodun baten bitartez edukitako aktibo multzo baten bidez;

b) Pentsio-zerbitzuen entitate bat.

23) "Irabazi edo galera onargarriak": entitate eratzaile baten kontabilitate-emaitza, foru lege honetan ezarritako arauen arabera doitua.

24) "Taldea":

a) Kontrolaren edo kontrol-partaidetza baten bidez erlazionatuta dauden entitateen multzoa, azken entitate nagusiak egoera-orri finantzario bateratuak egiteko onartzen den finantza-kontabilitateko arauan definitzen den bezala; azken entitate nagusiaren egoera-orri finantzario bateratuetatik, tamainan, garrantzi erlatiboko arrazoietan edo salmentarako edukitzean bakarrik oinarrituta, bazter utzi den edozein entitate barne; edo

b) Entitate nagusi bat eta establezimendu iraunkor bat edo gehiago, baldin eta entitate nagusia aurreko a) letran xedatutakoaren arabera beste talde bateko kide ez bada.

25) "Talde multinazionala": azken entitate nagusiaren jurisdikzioan kokatuta ez dagoen entitate edo establezimendu iraunkor bat gutxienez barne hartzen duen talde oro.

26) "Talde nazional handia": entitate eratzaile guztiak Espainiako lurraldean kokatuta dituen edozein talde.

27) "Zerga osagarria": zerga osagarri nazionala, lehen mailako zerga osagarria (errentak sartzeko erregela) eta bigarren mailako zerga osagarria (behar beste zergapetu gabeko etekinen erregela), foru lege honetan xedatutakoaren arabera kalkulatuak.

28) "Zerga osagarri nazional onargarria": jurisdikzio bateko zuzenbide nazionalean aplikatzen den zerga osagarria, betiere jurisdikzio horrek arau horiekin lotutako onurarik ematen ez badu eta:

a) Jurisdikzio horretan kokatutako entitate eratzaileen zerga-oinarria nola zehaztu xedatzen badu, 2022/2523 (EB) Zuzentarauan ezarritako arauen arabera, edo, beste jurisdikzio batzuei dagokienez, ELGAren eredu-arauen arabera, bai eta zerga-oinarri horri gutxieneko zerga-tasa aplikatu beharra ere, jurisdikziorako eta entitate eratzaileentzat, aipatutako zuzentarauan ezarritako arauen arabera edo, beste jurisdikzio batzuei dagokienez, ELGAren eredu-arauen arabera; eta

b) Zuzentarau horretan ezarritako arauen arabera edo, beste jurisdikzio batzuei dagokienez, ELGAren eredu-arauen arabera administratzen bada.

29) "Egotzitako zerga itzulgarri ez-onargarria": entitate eratzaile batek sortu duen edo ordaindu duen edozein zerga, egotzitako zerga onargarria ez dena:

a) Entitate eratzaileak banatutako dibidendu baten benetako onuradunari itzultzeko modukoa izan behar du, edo benetako onuradunak zerga-zor bati (dibidendu horiekiko zerga-zorra ez beste bat) egozteko modukoa; edo

b) Dibidendu bat akziodun bati banatzen dion sozietateari itzultzeko modukoa izan behar du, banaketa egiten den unean.

Definizio honen ondorioetarako, "egotzitako zerga onargarria" izanen da entitate eratzaile batek -establezimendu iraunkorrak barne- sortutako edo ordaindutako zerga estalia, entitate eratzaileak banatutako dibidenduaren benetako onuradunari itzul edo egotz dakiokeena, edo, establezimendu iraunkor batek sortutako edo ordaindutako zerga estaliaren kasuan, entitate nagusiak banatutako dibidendu bat, baldin eta hauetako batek aitortzen badu itzulketa edo ematen badu kreditua:

a) Zerga estaliak aplikatu dituena ez beste jurisdikzio batek;

b) Zergapetutako dibidenduen benetako onuradun bati, baldin eta zerga ordaindu behar badu tasa nominal honekin: entitate eratzaileari zergak aplikatu dizkion jurisdikzioko zuzenbide nazionalak jaso diren dibidenduen gainean ezartzen duen zerga-tasaren parekoa edo handiagoa; edo

c) Dibidenduen benetako onuradun den pertsona fisiko bati, baldin eta egoitza fiskala badu entitate eratzaileari zerga estaliak aplikatu dizkion jurisdikzioan eta zerga ordaindu behar badu errenta arruntei aplikatu beharreko zerga-tasaren pareko edo handiagoko tasa nominalarekin; edo

d) Honako hauei: entitate publiko, nazioarteko antolakunde, irabazi-asmorik gabeko entitate egoiliar edo pentsio-funts egoiliar bati, talde multinazional bateko edo talde nazional handi bateko kide ez den inbertsio-entitate egoiliar bati, edo bizitza-alorrean jarduten duen aseguru-entitate egoiliar bati, baldin eta dibidendua pentsio-funts egoiliarraren jarduerekin lotuta jasotzen bada eta pentsio-funts batek jasotako dibidenduaren antzera kargatzen bada.

Zehazki, d) letraren ondorioetarako:

i) Irabazi-asmorik gabeko erakunde bat edo pentsio-funts bat jurisdikzio bateko egoiliar izanen da, baldin eta jurisdikzio horretan sortu eta kudeatzen bada;

ii) Inbertsio-entitate bat jurisdikzio bateko egoiliar izanen da, baldin eta jurisdikzio horretan sortu eta arautzen bada;

iii) Bizitza-alorrean jarduten duen aseguru-entitate bat kokatuta dagoen jurisdikzioko egoiliar izanen da.

30) "Higiezinen arloko inbertsio-tresna": titulartasun zabaleko entitatea, nagusiki ondasun higiezinak dituena (zuzenean edo zeharka) eta zerga-maila bakar bati, gehienez ere urtebeteko gerorapenarekin, lotua dagoena (bai bera bai haren interes-titularrak).

31) "Zerga-maila apaleko jurisdikzioa": edozein zergalditan, talde multinazional bati edo talde nazional handi bati dagokionez, Europar Batasuneko estatu bateko jurisdikzio bat edo beste jurisdikzio bat, non talde multinazionalak edo talde nazional handiak irabazi onargarriak baititu eta gutxieneko zerga-tasa baino txikiagoa den zerga-tasa efektibo bat ordaindu behar baitu.

32) "Finantza-kontabilitateko arau onargarria": finantza-informazioko nazioarteko arauak (FINA arauak, Kontabilitateko nazioarteko arauen ezarpenari buruzko Europako Parlamentuaren eta Kontseiluaren 2002ko uztailaren 19ko 1606/2002 (EE) Erregelamenduaren bidez Europar Batasunak onetsiak) eta oro har herrialde hauetan onartutako kontabilitate-printzipioak; Australia, Brasil, Kanada, Europar Batasuneko estatuak, Europako Esparru Ekonomikoko estatuak, Hong Kong (Txina), Japonia, Mexiko, Zeelanda Berria, Txinako Herri Errepublika, Indiako Errepublika, Koreako Errepublika, Errusia, Singapur, Suitza, Erresuma Batua eta Amerikako Estatu Batuak.

33) "Finantza-kontabilitateko arau baimendua": entitate bati dagokionez, oro har onargarriak diren kontabilitate-printzipioen multzoa, entitate hori kokatua dagoen jurisdikzioan baimendutako kontabilitate-erakunde batek baimenduak.

Definizio honen ondorioetarako, "baimendutako kontabilitate-erakundea" izanen da jurisdikzio baten finantza-informazioaren ondorioetarako kontabilitate-arauak emateko, ezartzeko edo onartzeko legezko aginpidea duen erakundea.

34) "Nazioarteko erakundea": gobernu arteko erakunde oro, nazioz gaindiko entitateak barne, edo erakunde horren partaidetza osoa duen organismo edo tresna oro, baldin eta irizpide hauek guztiak betetzen baditu:

a) Batez ere gobernuek osatuta egotea;

b) Benetan izatea egoitza-akordio bat edo funtsean antzekoa den akordio bat kokatuta dagoen jurisdikzioarekin, hala nola erakundeak jurisdikzio horretan dituen bulego edo establezimenduei pribilegioak eta immunitateak ematen dizkieten akordioak; eta

c) Erakundea arautzen duten legeek edo estatutuek eragoztea haren sarrerak partikular baten onurarako kontabilizatzea.

35) "Irabazi-asmorik gabeko erakundea": honako irizpide hauek guztiak betetzen dituen entitate oro:

a) Egoitza duen lurraldean ezarrita egotea eta bertan jardutea:

i) Erlijio-, ongintza-, zientzia-, arte-, kultura-, kirol-, hezkuntza-helburuetarako edo antzekoetarako bakarrik; edo

ii) Profesionalen entitate gisa, merkataritza-interesak sustatzeko elkarte gisa, merkataritza-ganbera gisa, erakunde sindikal gisa, nekazaritza- edo barazkigintza-erakunde gisa, elkarte zibil gisa edo gizarte ongizatea sustatzea beste xederik ez duen erakunde gisa;

b) Aurreko a) letran aipatutako jardueren ondoriozko etekin gehienak salbuetsita egotea egoitza duen jurisdikzioan enpresa-mozkinak zergapetzen dituen zerga ordaintzetik;

c) Haren errentaren edo aktiboen benetako onuradun edo titular diren akziodun edo bazkiderik ez izatea;

d) Entitatearen errentak edo aktiboak banatu ezin izatea partikular bati edo ongintzarako ez den entitate bati, ez eta halakoen onurarako erabili, honako kasu hauetan izan ezik:

i) Entitatearen ongintza-jardueraren garapenean;

ii) Emandako zerbitzuengatiko edo ondasunak edo kapitala erabiltzeagatiko kontraprestazio baten ordainketa gisa; edo

iii) Entitateak eskuratutako elementuen arrazoizko balioa litzatekeenaren ordainketa gisa;

e) Entitatea amaitu, likidatu edo desegin ondoren, haren aktibo guztiak irabazi-asmorik gabeko erakunde bati banatu edo eman behar zaizkio, edo entitateak egoitza duen jurisdikzioko edo haren edozein azpizatiketa politikotako administrazio publikoari (edozein entitate publiko barne);

f) Ez gauzatzea entitatea sortu zeneko helburuekin zuzenean lotuta ez dagoen merkataritza- edo enpresa-jarduerarik.

36) "Kontrol-partaidetza": entitate bateko partaidetza, haren titularra behartzen duena edo lukeena entitatearen aktiboak, pasiboak, sarrerak, gastuak eta diru-fluxuak integrazio globalaren metodoarekin bateratzera, finantza-kontabilitateko arau onargarri baten arabera.

Entitate nagusi batek bere establezimendu iraunkorretan kontrol-partaidetzak dituela jotzen da.

Entitate publikoaren definizioa betetzen duen funts subirano bat, artikulu honen 16. puntuan ezarritakoaren arabera, ez da jotzen kontrol-partaidetzen titulartzat.

37) "Entitate bateko partaidetza": entitate baten funts berekietako edozein partaidetza, berekin badakar entitate baten irabazietan, kapitalean edo erreserbetan edo establezimendu iraunkor baten ondarean parte hartzeko eskubidea.

38) "Zergaldia": talde multinazional bateko edo talde nazional handi bateko azken entitate nagusiak bere egoera-orri finantzario bateratuak egiteko erreferentzia den kontabilitate-aldia, edo, azken entitate nagusiak egoera-orri finantzario bateraturik egiten ez badu, urte naturala.

39) "Atzerriko sozietate kontrolatuen zerga-araubidea": zerga-arauen multzo bat, errentak sartzeko erregela onargarri bat ez dena, zeinaren bidez atzerriko entitate bateko zuzeneko edo zeharkako akziodun batek edo establezimendu iraunkor bateko entitate nagusiak zerga ordaindu behar baitute atzerriko entitate eratzaileak lortu dituen errenten zati batean edo errenta guztietan duen partaidetzagatik, errenta horiek akziodunari banatzen zaizkion kontuan hartu gabe.

40) "Banaketaren gaineko tributu-araubide onargarria": sozietateen enpresa-mozkinak zergapetzen dituen zergaren araubide bat:

a) Mozkinak kasu hauetan bakarrik zergapetzen ditu: akziodunen artean banatzen badira edo banatutzat jotzen badira, edo sozietateak bere jarduerari ez dagozkion gastu jakin batzuk egiten baditu;

b) Zerga-tasa gutxieneko zerga-tasaren parekoa edo handiagoa duena; eta

c) 2021eko uztailaren 1ean edo lehenago indarrean zegoena;

41) "Behar beste zergapetu gabeko etekinen erregela onargarria": arau multzo bat, jurisdikzio bateko zuzenbide nazionalean aplikatzen dena, betiere jurisdikzioak arau horiekin lotutako onurarik ematen ez badu eta:

a) 2022/2523 (EB) Zuzentarauan ezarritako arauen baliokideak badira, edo, beste jurisdikzio batzuei dagokienez, ELGAren eredu-arauen baliokideak. Arau horien arabera, jurisdikzio batek talde multinazional baten zerga osagarritik esleitzen ahal zaion zatia biltzen du, baldin eta talde horri ez bazitzaion aplikatu errentak sartzeko araua, zerga-maila apala duten talde hori osatzen duten entitateei dagokienez;

b) Zuzentarau horretan ezarritako arauen arabera edo, beste jurisdikzio batzuei dagokienez, ELGAren eredu-arauen arabera aplikatzen badira.

42) "Errentak sartzeko erregela onargarria": jurisdikzio bateko zuzenbide nazionalari gehitu zaion arau multzoa, betiere jurisdikzioak arau horiekin lotutako onurarik ematen ez badu eta:

a) 2022/2523 (EB) Zuzentarauan ezarritako arauen baliokideak badira, edo, beste jurisdikzio batzuei dagokienez, ELGAren eredu-arauen baliokideak. Arau horien arabera, talde multinazional bateko edo talde nazional handi bateko entitate nagusiak esleitzen ahal zaion zerga onargarriaren zatia kalkulatu eta ordainduko du, zerga-maila apala duten talde horretako entitate eratzaileei dagokiena;

b) Zuzentarau horretan ezarritako arauen arabera edo, beste jurisdikzio batzuei dagokienez, ELGAren eredu-arauen arabera aplikatzen badira.

43) "Gutxieneko zerga-tasa": ehuneko 15.

44) "Aktibo materialen kontabilitate-balio garbia": aktibo materialen hasierako eta bukaerako balioen batezbestekoa, jasandako balio-galera, akidura edo narriadura kontuan hartu ondoren, egoera-orri finantzarioetan jasotakoaren arabera.

III. TITULUA. EREMU SUBJEKTIBOAK ETA LOTURA-ARAUAK

6. artikulua. Subjektu pasiboak eta loturaarauak.

1. Zerga osagarriaren subjektu pasiboak izanen dira Espainiako lurraldean kokatuta dauden eta talde multinazional bateko edo talde nazional handi bateko kide diren entitate eratzaileak, foru lege honen 8. artikuluan xedatutakoaren arabera eta hurrengo 2., 3., 4. eta 5. apartatuetan ezarritako baldintzetan, baldin eta, zergaldia hasi aurreko lau zergaldietako bitan gutxienez, taldeko entitate guztien baterako negozio-zifraren zenbateko garbia, 7. artikuluan aipatutako entitate baztertuena barne, 750 milioi euro edo handiagoa bada, azken entitate nagusiaren egoera-orri finantzario bateratuen arabera.

Aurreko paragrafoan aipatutako zergaldi baten edo batzuen iraupena hamabi hilabete baino luzeagoa edo laburragoa bada, paragrafo horretan aipatutako negozio-zifraren zenbateko garbia proportzioan doituko da zergaldi horietako bakoitzerako.

2. Zerga osagarri nazionalaren zergadunak izanen dira 1. apartatuan aipatutako taldeetako entitate eratzaileak, zergaldian lortutako errentak direla eta, baldin eta taldearen zerga-tasa efektiboa, Espainiako lurraldean, gutxieneko zerga-tasa baino txikiagoa bada, foru lege honetan adierazitako baldintzetan.

3. Lehen mailako zerga osagarriaren zergadunak izanen dira beherago adierazitako talde multinazional bateko entitate eratzaileak, 1. apartatuan aipatzen direnak, beste entitate eratzaile batzuetan (egoitzarik gabeak edo beste jurisdikzio batzuetan kokatuta daudenak) dituzten zuzeneko nahiz zeharkako partaidetzei esleitzen ahal zaien zatiagatik, aipatu entitateek lortu dituzten errentei dagokienez, baldin eta, jurisdikzio mailan, gutxieneko zerga-tasa baino zerga-tasa efektibo txikiagoa ezarri bazaie, foru lege honetan adierazitako moduan. Hauek dira entitateok:

a) Azken entitate nagusia.

b) Tarteko entitate nagusi bat, azken entitate nagusia beste jurisdikzio batean kokatuta duena edo estatu kide batean kokatuta dagoen entitate baztertu bat dena, honako kasu hauetan izan ezik:

i) Azken entitate nagusia zerga osagarri bati lotuta badago eta zerga hori aplikatzen badu errentak sartzeko erregela onargarri baten arabera, edo,

ii) arteko beste entitate nagusi batek, zuzenean edo zeharka, kontrol-partaidetza bat badu Espainiako lurraldean dagoen tarteko entitate nagusian, eta zerga osagarri baten mende badago bere jurisdikzioan errentak sartzeko erregela onargarri baten arabera.

c) Partez partaidetzapekoa den entitate nagusi bat, salbu eta partez partaidetzapekoa den beste entitate nagusi batek lehenengoaren partaidetza guztiak baditu, zuzenean edo zeharka, eta zerga osagarri bati lotuta badago bere jurisdikzioan errentak sartzeko erregela onargarri baten arabera.

4. Bigarren mailako zerga osagarriaren zergadunak izanen dira 1. apartatuan aipatzen den talde multinazional bateko entitate eratzaileak, zerga-maila apala duten, egoitzarik ez duten edo beste jurisdikzio batzuetan kokatuta dauden beste entitate eratzaile batzuei esleitzen ahal zaien zerga osagarriaren zatiagatik, baldin eta azken entitate nagusia errentak sartzeko erregela onargarririk aplikatzen ez duen jurisdikzio batean edo zerga-maila apala duen jurisdikzio batean badago, bai eta azken entitate nagusia entitate baztertua bada ere, foru lege honetan adierazitako baldintzetan.

Halaber, bigarren mailako zerga osagarriaren zergadunak izanen dira 1. apartatuan aipatzen den talde multinazional bateko entitate eratzaileak, zerga-maila apala duten beste entitate eratzaile batzuei esleitzen ahal zaien zerga osagarriaren zatiagatik, baldin eta entitateon azken entitate nagusia kokatuta dagoen estatu kideak hautatu badu ez aplikatzea errentak sartzeko erregela eta behar beste zergapetu gabeko etekinen erregela 2022/2523 (EB) Zuzentarauaren 50. artikuluan xedatutakoari jarraikiz.

Apartatu honetan xedatutakoa ez zaie aplikatuko inbertsio-entitate diren entitate eratzaileei.

5. Aurreko guztia gorabehera, 1. apartatuan ezarritako zerga osagarriaren zergadunaren ordezkotzat joko da beherago adierazitako talde multinazional bateko edo talde nazional handi bateko entitate eratzaileetako bat, zeina behartuta egonen baita aitorpena edo aitorpenak aurkeztera eta zerga-zorra edo zerga-zorrak ordaintzera, foru lege honen 50. eta 51. artikuluetan xedatutako baldintzetan. Honakoak dira entitateok eta lehentasun-ordena:

i) Azken entitate nagusia, Espainiako lurraldean kokatuta badago, eta entitate baztertua ez bada, edo, bestela,

ii) Espainiako lurraldean kokatuta dagoen entitate nagusia, zergaldian aktibo materialen kontabilitateko balio garbi handiena duena -5. artikuluko 44. apartatuanzehaztu bezala- Espainiako lurraldean kokatuta dauden taldeko entitate nagusien artean, eta, betiere, entitate baztertua ez bada, edo, bestela,

iii) Taldeko entitate eratzailea, Espainiako lurraldean kokatuta dagoena, zergaldian aktibo materialen kontabilitateko balio garbi handiena duena -5. artikuluko 44. apartatuan zehaztu bezala-, Espainiako lurraldean kokatuta dauden taldeko entitate eratzaileen artean, eta, betiere, entitate baztertua ez bada.

Zehazki, egiaztatze-jarduketak zergadunaren ordezkotzat hartutako entitate eratzailearekin eginen dira, erregelamendu bidez garatzen diren baldintzetan.

6. Zergaduntzat jotzen diren talde multinazionaleko edo talde nazional handiko entitate eratzaileak, baldin eta artikulu honetan xedatutakoaren arabera ordaintzera behartuta ez badaude, erantzule solidarioak izanen dira talde horretako entitate eratzaileen zerga-zor guztien ordainketari dagokionez.

7. artikulua. Entitate baztertuak.

1. Honako entitate hauek entitate baztertuak izanen dira eta, beraz, ez zaie foru legea aplikatuko:

a) Entitate publikoak, nazioarteko erakundeak, irabazi-asmorik gabeko erakundeak, pentsio-funtsak, azken entitate nagusi diren inbertsio-funtsak edo azken entitate nagusi diren higiezinen arloko inbertsio-tresnak;

b) Beren balioaren ehuneko 95 gutxienez a) letran aipatutako entitate baten edo batzuen jabetzakoa duten entitateak, baldin eta jabetza hori zuzenean edo entitate baztertu baten edo batzuen bitartez eskuratu bada, pentsio-zerbitzuetako entitateak izan ezik, eta:

i) Aktiboak edukitzeko edo a) letrako entitatearen edo entitateen onurarako funtsak inbertitzeko soilik edo ia soilik jarduten badute; edo

ii) Aurreko a) letrako entitateak edo entitateek egiten dituzten jardueren osagarri diren jarduerak soilik egiten badituzte;

c) Beren funts propioen ehuneko 85 gutxienez a) letran aipatutako entitate baten edo batzuen jabetzakoa duten entitateak -jabetza zuzenean edo entitate baztertu baten edo batzuen bitartez eskuratuta-, pentsio-zerbitzuetako entitateak izan ezik, eta, betiere, haien etekin guztiak, funtsean, irabazi edo galera onargarrien kalkulutik baztertuta dauden dibidenduetatik edo, kapital-irabazi edo -galeretatik badatoz, 10. artikuluko 2. apartatuko b) eta c) letretan xedatutakoari jarraikiz.

2. Aurreko apartatuan xedatutakoaren salbuespen gisa, entitate eratzaile aitortzaileak, 49 artikuluko 1. apartatuan bat etorriz, hautatzen ahalko du 1. apartatuko b) eta c) letretan jasotako edozein entitate entitate baztertutzat hartzeko.

8. artikulua. Entitate eratzaileen kokalekua.

Foru lege honen ondorioetarako:

1. Entitate gardena ez den entitate bat kokatuta dago zerga ondorioetarako egoiliartzat hartzen den jurisdikzioan, aintzat hartuta helbide-egoitza, sortu zen tokia edo antzeko irizpide bat.

Aurreko paragrafoaren arabera ezin bada zehaztu entitate gardena ez den entitate eratzaile bat zein jurisdikziotan dagoen kokatuta, entitate hori sortu den jurisdikzioan kokatuta dagoela joko da.

2. Entitate garden bat egoitzarik gabekotzat joko da, salbu eta talde multinazional bateko edo talde nazional handi bateko azken entitate nagusia bada edo behartuta badago errentak sartzeko erregela bat aplikatzera, foru lege honekin bat; kasu horretan, entitate gardena sortu den jurisdikzioan kokatuta dagoela joko da.

3. 5. artikuluko 19. puntuko a) letran aipatzen den establezimendu iraunkorra establezimendu iraunkortzat hartzen den jurisdikzioan kokatuta dagoela joko da, non errentaren gaineko zerga ordaindu beharko baitu aplikatzekoa den hitzarmen fiskalaren arabera.

5. artikuluko 19. puntuko b) letran aipatzen den establezimendu iraunkorra tributazioaren mende dagoen jurisdikzioan kokatuta dagoela joko da, letra horretan xedatutako baldintzetan.

5. artikuluko 19. puntuko c) letran aipatzen den establezimendu iraunkorra letra horretan aipatzen den jurisdikzioan kokatuta dagoela joko da.

5. artikuluko 19. puntuko d) letran aipatzen den establezimendu iraunkorra egoitzarik gabekotzat joko da.

4. Entitate eratzaile bat indarrean dagoen hitzarmen fiskal aplikagarri bat sinatu duten bi jurisdikziotan kokatuta badago, entitate eratzailea zerga ondorioetarako egoiliartzat jotzen den jurisdikzioan kokatuta dagoela joko da, hitzarmen fiskal horren arabera.

Hurrengo 5. apartatuan xedatutakoa aplikatuko da, baldin eta aipatutako hitzarmen fiskalak eskatzen badu agintaritza eskudunak ados jarri behar direla zerga ondorioetarako entitate eratzailearen egoitza zein den erabakitzeko, eta adostasun hori ez bada lortzen.

Aplikatzekoa den hitzarmen fiskala dela bide zergapetze bikoitza ezabatzen ez bada entitate eratzailea zerga ondorioetarako egoiliarra izateagatik bi kontratugileetan, hurrengo 5. apartatuan xedatutakoa aplikatuko da.

5. Entitate eratzailea bi jurisdikziotan kokatuta badago eta jurisdikzio horiek aplikatzekoa den hitzarmen fiskalik ez badute, entitate eratzailea zergaldiari dagozkion zerga estalien zenbateko handiena ordaindu duen jurisdikzioan kokatuta dagoela joko da, kontuan hartu gabe, ondorio horietarako, atzerriko sozietate kontrolatuen araubide berezia aplikatzearen ondoriozko zenbatekoa.

Aurreko paragrafoan aipatutako zerga estalien zenbatekoa berbera edo nulua bada bi jurisdikzioetan, entitate eratzailea substantzia ekonomikoari lotutako errenta-bazterketaren zenbateko handiena (zergaldiari dagokiona) izan den jurisdikzioan kokatuta dagoela joko da; zenbatekoa entitateak kalkulatuko du 14. artikuluan xedatutakoari jarraikiz.

Substantzia ekonomikoari lotutako errenten bazterketaren zenbatekoa berbera edo nulua bada bi jurisdikzioetan, entitate eratzailea egoitzarik gabekotzat joko da, non eta ez den azken entitate nagusi bat; hala bada, sortu zen jurisdikzioan kokatuta dagoela joko da.

6. Aurreko 4. eta 5. apartatuetan xedatutakoa aplikatzearen ondorioz, entitate nagusi bat errentak sartzeko erregela onargarri bat aplikatu behar ez duen beste jurisdikzio batean kokatuta badago, errentak sartzeko erregela onargarria duen beste jurisdikzioak eskatzen ahalko du entitate nagusi horrek erregela aplikatu dezala, salbu eta aplikatzekoa den hitzarmen fiskal batek erregela hori aplikatzea debekatzen badu.

Baldin eta, aurreko paragrafoan xedatutakoaren arabera, errentak sartzeko erregela onargarria estatu kide batek aplikatu beharreko erregela bada, entitate nagusiak aipatu den erregela aplikatuko du, salbu eta aplikatzekoa den hitzarmen fiskal batek erregela aplikatzea debekatzen badu.

7. Entitate eratzaile bat zergaldi batean zehar kokalekuz aldatzen bada, artikulu honen arabera zergaldi horren hasieran kokatua zegoen jurisdikzioan dagoela joko da.

IV. TITULUA. ZERGA-OINARRIA

9. artikulua. Kontabilitateemaitza. Kontabilitateestandarrak.

1. Entitate eratzaile baten irabazi edo galera onargarriak kalkulatzeko, zenbait doikuntza eginen dira -10. artikulutik 13. artikulura bitartean ezarritakoak- entitate eratzaileak zergaldian izan duen kontabilitate-emaitzaren gainean, talde barreneko eragiketak ezabatzeagatiko edozein bateratze-doikuntza egin aurretik, azken entitate nagusiaren egoera-orri finantzario bateratuak egiteko erabilitako finantza-kontabilitateko arau onargarriari edo baimenduari jarraikiz.

2. Aurreko apartatuan ezarritakoaren arabera ezinezkoa bada zentzuz zehaztea entitate eratzaile baten kontabilitate-emaitza, entitate eratzailearen zergaldiko kontabilitate-emaitza kalkulatzeko, finantza-kontabilitateko beste arau onargarri bat edo baimendutako finantza-kontabilitateko arau bat erabiltzen ahalko da; baina, horretarako, baldintza hauek bete beharko dira:

a) Entitate eratzailearen finantza-kontuak kontabilitate-arau hori aplikatuz egin beharko dira;

b) Finantza-kontuetan jasotako informazioak fidagarria izan beharko du; eta

c) Sarreren, gastuen edo transakzioen partidei printzipio edo arau partikular bat aplikatzearen ondoriozko milioi batetik gorako diferentzia iraunkorrak (printzipio edo arau hori azken entitate nagusiaren egoera-orri finantzario bateratuak egiteko erabilitako finantza-arauarekin bat ez badator), doitu egin beharko dira, egoera-orri finantzario bateratuak egiteko erabilitako kontabilitate-arauan partida horretarako eskatzen den tratamenduarekin harmonizatzeko.

3. Azken entitate nagusi baten egoera-orri finantzario bateratuak, finantza-kontabilitateko arau onargarri baten arabera egin ez badira eta 5. artikuluko 20. apartatuko c) letran adierazitako moduan doitu ez badira, doitu eginen dira lehiaren edozein distortsio adierazgarri saihesteko.

4. Azken entitate nagusi batek ez baditu egiten egoera-orri finantzario bateratuak 5. artikuluko 20. apartatuko a), b) eta c) letretan xedatutakoaren arabera, egoera-orri finantzario bateratuok izanen dira, 5. artikuluko 20. apartatuko d) letran xedatutakoaren arabera, entitateak halakoak egiteko honako arau hauetakoren bat erabiltzera behartuta egon balitz eginen zituzkeenak:

a) Finantza-kontabilitateko arau onargarri bat; edo

b) Baimendutako finantza-kontabilitateko arau bat, betiere egoera-orri finantzario bateratu horiek doitzen badira lehiaren edozein distortsio adierazgarri saihesteko.

5. Oro har onartutako kontabilitate-printzipio multzo baten esparruan printzipio edo prozedura espezifiko bat aplikatzearen ondorioz lehiaren distortsio adierazgarria sortzen bada, printzipio edo prozedura horri lotutako edozein partidaren edo eragiketaren kontabilitate-tratamendua egokitu eginen da partida edo eragiketa horretarako behar den tratamenduarekin harmonizatzeko, finantza-informazioko nazioarteko arauen arabera (FINA arauak, Europar Batasunak 1606/2002 (EE) Erregelamenduaren bidez onetsiak).

10. artikulua. Irabazi edo galera onargarriak zehazteko doikuntzak.

1. Artikulu honen ondorioetarako, honela ulertuko dira kontzeptu hauek:

a) "Zerga-gastu garbia" honako elementu hauen zenbateko garbia da:

i) Gastu gisa kontsignatutako zerga estaliak, eta edozein zerga estali (arruntak eta geroratuak), enpresa-mozkinak edo errenta kargatzen dituen zergaren gastuaren barnean sartutakoak, bereziki, irabazi edo galera onargarrien kalkulutik bazter utzitako errentaren gaineko zerga estaliak;

ii) Zergaldiko galera bati esleitzen ahal zaizkion zerga geroratuagatiko aktiboak;

iii) Gastu gisa kontsignatutako zerga osagarri nazional onargarriak;

iv) Foru lege honen, 2022/2523 (EB) Zuzentarauaren edo beste jurisdikzio batzuei dagokienez ELGAren eredu-arauen xedapenen ondoriozko zergak, gastu gisa erregistratuak; eta

v) Gastu gisa kontsignatu diren zerga egotziak, itzulgarriak eta ez-onargarriak direnak.

b) "Dibidendu baztertua": dibidendua edo entitate bateko partaidetzari lotuta banatu, jaso edo sortutako beste zenbateko bat, kasu hauetan izan ezik:

i) Partaidetza ez-adierazgarria izatea eta dibidenduak edo banatzen diren etekinak jasotzen dituen edo jasotzeko eskubidea duen entitate eratzaileak partaidetza ez-adierazgarri hori eduki duen aldia urtebetetik beherakoa izatea banatzen den etekina galdagarria den egunean.

Kasu hauetan joko da partaidetza ez-adierazgarria dela: taldeak entitate batean duen partaidetza ehunekoa entitate horren funts berekien edo boto-eskubideen ehuneko 10 baino txikiagoa bada, banatzen den etekina galdagarria den egunean edo eskualdatze-datan.

ii) 45. artikuluan ezarritako aukerari lotuta dagoen inbertsio-entitate bateko partaidetza izatea.

c) "Kapital-irabazi edo -galera baztertua": entitate eratzailearen kontabilitate-emaitzan sartutako irabazi edo galera garbia, honako hauen ondoriozkoa:

i) Funts berekietako partaidetza baten arrazoizko balioaren aldaketak, partaidetza hori ez-adierazgarria denean izan ezik;

ii) Baliokidetzan jartzeko metodoaren arabera erregistratutako entitate bateko partaidetza; eta

iii) Entitate bateko partaidetzaren eskualdaketa, partaidetza ez-adierazgarria denean izan ezik;

d) "Errebalorizazio metodoan sartutako irabazia edo galera": irabazia edo galera, zergaldian, hari lotutako edozein zerga estalik handitutakoa edo gutxitutakoa, ibilgetu materialari dagokionez honako hauek dakartzan kontabilitate-metodo edo -praktika bat aplikatzearen ondoriozkoa:

i) Ibilgetu material horren kontabilitate-balioa bere arrazoizko baliora egokitzea aldizka.

ii) Balio-aldaketa horiek "beste emaitza orokor bat" partidan erregistratzea; eta

iii) Aldaketa horiek geroago ez sartzea kontabilitate-emaitzan.

e) "Atzerriko monetan izandako irabazi edo galera asimetrikoa": entitate batek atzerriko monetan izandako irabazia edo galera, baldin eta entitate horren kontabilitate-moneta funtzionala eta zerga-moneta funtzionala desberdinak badira eta:

i) Entitate eratzailearen tributaziopeko irabazi edo galeren kalkuluan sartzen bada, eta haren kontabilitate-moneta funtzionalaren eta zerga-moneta funtzionalaren arteko kanbio-tasaren fluktuazioen ondoriozkoa izan badaiteke;

ii) Entitate eratzailearen kontabilitate-emaitzaren kalkuluan sartzen bada, eta haren kontabilitate-moneta funtzionalaren eta zerga-moneta funtzionalaren arteko kanbio-tasaren fluktuazioen ondoriozkoa izan badaiteke;

iii) Entitate eratzailearen kontabilitate-emaitzaren kalkuluan sartzen bada, eta atzerriko hirugarren moneta baten eta entitate eratzailearen kontabilitate-moneta funtzionalaren arteko kanbio-tasaren fluktuazioen ondoriozkoa izan badaiteke; eta

iv) Atzerriko hirugarren moneta baten eta entitate eratzailearen moneta funtzional fiskalaren arteko kanbio-tasaren fluktuazioen ondoriozkoa izan badaiteke, kontuan hartu gabe atzerriko hirugarren moneta horretan izandako irabazi edo galera hori tributazioaren mende dagoen errentan sartzen den.

Moneta funtzional fiskala da entitate eratzailearen zergapeko irabazi edo galerak zehazteko erabiltzen den moneta funtzionala, entitate hori kokatuta dagoen jurisdikzioan zerga estali bati dagokionez. Kontabilitate-moneta funtzionala da entitate eratzailearen kontabilitate-emaitza zehazteko erabiltzen den moneta funtzionala. Atzerriko hirugarren moneta, berriz, entitate eratzailearen kontabilitate-moneta funtzionala eta moneta funtzional fiskala ez den moneta.

f) "Gastu ez-onargarriak, legez kanpoko ordainketek, isunek eta zehapenek sortuak":

i) Entitate eratzaileak legez kanpoko ordainketengatik sortutako gastuak, eroskeriak eta komisioak barne; eta

ii) Entitate eratzaileak sortutako gastuak, 50.000 euroko edo hortik gorako isun eta zehapenengatik edo entitate eratzailearen kontabilitate-emaitza kalkulatzen den moneta funtzionalean baliokidea den zenbatekoagatik.

g) "Kontabilitate-akatsak edo kontabilitate-irizpideen aldaketak": entitate eratzaileak zergaldiaren hasieran izan duen ondare garbiaren aldaketa, honako hauen ondoriozkoa:

i) Aurreko zergaldi bateko kontabilitate-emaitza zehaztean egindako akats bat zuzentzearen ondoriozkoa, baldin eta akats horrek eragina izan badu zergaldi horretako irabazi edo galera onargarrien kalkuluan sartu ziren sarrera edo gastuetan, salbu eta akats horren zuzenketak 21. artikuluaren arabera zerga estaliengatiko zenbatekoa nabarmen gutxitzea badakar; eta

ii) Kontabilitateko printzipio edo politiken aldaketa baten ondoriozkoa, baldin eta aldaketak irabazi edo galera onargarrien kalkuluan sartutako sarrera edo gastuetan eragina izan badu.

h) "Sortutako pentsio-gastua": zergaldian kontabilitate-emaitzan sartutako pentsioengatiko konpromisoak direla-eta sortutako gastuaren zenbatekoaren eta pentsio-funts bati egindako ekarpenaren zenbatekoaren arteko aldea.

2. Entitate eratzaile baten kontabilitate-emaitza honako partida hauen zenbatekoaren arabera doituko da, irabazi edo galera onargarriak zehazteko:

a) Zerga-gastu garbia.

b) Baztertutako dibidenduak.

Entitate eratzaile aitortzaileak talde multinazionaleko edo talde nazional handiko entitate eratzaile bakoitzerako aukeratzen ahalko du dibidendu horien bazterketa ez aplikatzea gutxienez 5 zergalditan.

c) Kapital-irabazi edo -galera baztertuak.

d) Errebalorizazio-metodoaren arabera sartutako irabaziak edo galerak.

e) 37. artikuluaren arabera, aktibo eta pasibo baztertuak besterentzearen ondoriozko irabaziak edo galerak.

f) Atzerriko monetan izandako irabazi edo galera asimetrikoak.

g) Legez kanpoko ordainketak, isunak eta zehapenak diren gastu ez-onargarriak.

h) Kontabilitate-akatsak eta kontabilitate-irizpideen aldaketak.

i) Sortutako pentsio-gastua.

3. Entitate eratzaile batek ordaintzeko formula gisa ondare-tresnetan oinarritutako ordainketak erabiltzen baditu, aukera du, zergaldiko galera eta irabazi onargarriak zehazteko, entitate eratzaile aitortzaileak hala erabakiz gero, ordainketa horiei dagokien gastuaren zenbatekoa -egoera-orri finantzarioetan erregistratua- erabili ordez, entitate eratzailearen errenta kargatzen duen zergan fiskalki kengarritzat jotzen den zergaldiko gastu horren zenbatekoa erabiltzeko.

Ondare-tresnetan oinarritutako aukera daukanak aukera baliatzen ez badu eta entitate eratzaileak aurreko paragrafoan xedatutakoa hautatu badu, ondare-tresnetan oinarritutako aukera bukatzen den zergaldian irabazi edo galera onargarriei gehituko zaie entitate eratzaileak horiek zehazteko zenbatu dituen gastuen zenbatekoa.

Entitate eratzaileak lehen paragrafoan xedatutakoa aplikatzea erabakitzen duen zergaldian, betiere ondare-tresnetan oinarritutako aukera baliatu aurretik, ondare-tresnetan oinarritutako ordainsari-gastuen zenbatekoaren zati bat entitate eratzailearen egoera-orri finantzarioetan erregistratu bada aipatutako zergaldiaren aurreko zergaldietan, entitate eratzaileak zergaldi horretan izan dituen irabazi edo galera onargarrien kalkuluan honako zenbateko hau sartuko da: aurreko zergaldi horietan haren irabazi edo galera onargarriak kalkulatzeko zenbatu diren ondare-tresnetan oinarritutako ordainsari-gastuen guztizko zenbatekoaren eta aurreko zergaldi horietan entitate eratzailearen errenta kargatzen duen zergan kengarritzat jo diren gastuen guztizko zenbatekoaren arteko aldea, baldin eta apartatu honetan ezarritako aukera baliatu bada zergaldi horietan.

Apartatu honetan ezarritako aukera 49. artikuluko 1. apartatuari jarraikiz baliatuko da, eta modu koherentean aplikatuko dute jurisdikzio berean kokatutako entitate eratzaile guztiek, aukera baliatzen duten zergaldian eta ondorengo guztietan, aukera hori errebokatu arte.

Apartatu honetan ezarritako aukera errebokatzen den zergaldian, ondare-tresnetan oinarritutako ordainsarien gastuen zenbatekoa, ordaindu ez direnena -gastuok entitate eratzailearen galera edo irabazi onargarri gisa zenbatuak, lehen paragrafoko aukeraren arabera-, entitate eratzailearen irabazi edo galera onargarrien kalkuluan sartuko da, baldin eta sortutako kontabilitate-gastuak gainditzen baditu.

4. Jurisdikzio desberdinetan kokatutako entitate eratzaileen arteko transakzioak, baldin eta bi entitate eratzaileen egoera-orri finantzarioetan zenbateko berarekin erregistratuta ez badaude edo, lehia askearen printzipioaren arabera, merkatu-balioaren arabera baloratuta ez badaude, doitu eginen dira zenbateko berarekin agertzeko eta printzipio horrekin bat etortzeko.

Jurisdikzio berean kokatuta dauden bi entitate eratzaileren arteko aktiboen salmentaren edo beste eskualdatze baten ondoriozko galerak, lehia askearen printzipioaren arabera erregistratuta ez daudenak, doitu eginen dira printzipio horretan oinarrituta, aipatutako galera hori irabazi edo galera onargarrien kalkuluan sartzen bada.

Apartatu honen ondorioetarako, "lehia askearen printzipioa" da entitate eratzaileen arteko eragiketak merkatu-balioaren arabera erregistratu behar direla dioena; merkatu-balioa, berriz, enpresa independenteen artean konparatzeko moduko transakzio eta inguruabarretan adostuko zatekeena izanen da.

Apartatu honetan aipatzen den doikuntza ez da eginen zergapetze bikoitza edo galeren zenbaketa bikoitza sortzen badu foru lege honen aplikazio-eremuan.

5. 5. artikuluko 1. apartatuan aipatzen diren kreditu fiskal itzulgarri onargarriak sarreratzat hartuko dira entitate eratzaile baten irabazi edo galera onargarriak kalkulatzeko. Kreditu fiskal itzulgarri ez-onargarriak ez dira sarreratzat hartuko entitate eratzaile baten irabazi edo galera onargarriak kalkulatzeko.

6. Entitate eratzaile aitortzaileak gauzatze-metodoa aplikatzen ahalko die zergaldian egoera-orri finantzario bateratuetan arrazoizko balioaren edo balio-narriaduraren metodoaren bidez erregistratutako aktibo eta pasiboei, irabazi edo galera onargarriak kalkulatzeko.

Aktibo edo pasibo baten arrazoizko balioaren edo balio-narriaduraren metodoa aplikatzearen ondoriozko kontabilitateko irabaziak edo galerak entitate eratzaile baten irabazi edo galera onargarrien kalkulutik bazter utziko dira, aurreko paragrafoan xedatutakoaren arabera.

Aktibo edo pasibo baten kontabilitate-balioa, irabazi edo galera bat gauzatze-metodoaren arabera zehazteko, aktiboa eskuratu zen edo pasiboa hartu zen uneko kontabilitate-balioa izanen da, edo apartatu honetan ezarritako aukera baliatzen den zergaldiko lehen eguneko kontabilitate-balioa, data hori ondorengoa bada.

49. artikuluaren 1. apartatuan xedatutakoaren arabera baliatuko da aukera, eta aukera baliatzen den jurisdikzioan kokatutako entitate eratzaile guztiek aplikatuko dute, arrazoizko balioaren edo narriaduraren metodoaren bidez erregistratzen diren aktibo eta pasibo guztiei dagokienez, salbu eta entitate eratzaile aitortzaileak erabakitzen badu aukera mugatzea entitate eratzaileen aktibo materialei edo inbertsio-entitateei dagokienez.

Apartatu honetan ezarritako aukera errebokatzen den zergaldian, aktiboaren edo pasiboaren arrazoizko balioaren eta zergaldiko lehen eguneko kontabilitate-balioaren arteko aldearen zenbatekoa sartuko da entitate eratzaileen irabazi edo galera onargarrien kalkuluan, arrazoizko balioa kontabilitate-balioa baino handiagoa bada, edo, kendu eginen da kalkulu horretatik, kontabilitate-balioa arrazoizko balioa baino handiagoa bada.

7. Entitate eratzaile aitortzaileak aukera izanen du jurisdikzio bateko irabazi edo galera onargarrietan ez zenbatzeko, zergaldian, jurisdikzio horretan dauden tokiko aktibo materialak beste batzuei eskualdatzearen ondoriozko irabazi garbiak. Ondorio horietarako, jurisdikzio horretan dauden ondasun higiezinak joko dira "tokiko aktibo materialtzat".

Irabazi garbi bati edo galera garbi bati dagokion zerga estalirik ez da sartuko apartatu honetan araututako aukera baliatzen den aldian, aldiko zerga estali doituetan.

Tokiko aktibo materialak eskualdatzearen ondoriozko irabazi garbia, apartatu honetan xedatutako aukera baliatzen den zergaldikoa, proportzioan konpentsatuko da jurisdikzio horretan kokatutako entitate eratzaileek izandako edozein galera garbirekin, baldin eta tokiko aktibo materialak beste batzuei eskualdatzearen ondorioz sortu bada galera eta aukera baliatzen den zergaldian edo zergaldi horren aurreko lau zergaldietan (aurrerantzean, bost urteko aldia). Irabazi garbia konpentsatuko da, lehenik eta behin, bost urteko aldi horretako zergaldirik antzinakoenean gertatu den eta aldez aurretik konpentsatu ez den galera garbiarekin. Irabazi garbiaren hondar-zenbatekoa ondoz ondo egotziko zaie bost urteko aldia osatzen duten ondorengo zergaldiei, eta konpentsatuko da aldi horietan sortu diren eta aldez aurretik konpentsatu ez diren galera garbiekin.

Aurreko paragrafoan xedatutakoa aplikatu ondoren irauten duen irabazi garbiaren hondar-zenbateko oro uniformeki banatuko da bost urteko aldian, eta jurisdikzio horretako entitate eratzaileetako bakoitzari esleituko zaio, kontuan hartuta aukera baliatzen den aldian zer proportzio adierazten duen entitate eratzailearen irabazi garbiak ekitaldi horretako entitate eratzaile guztien irabazi garbiarekiko.

Formula hori kalkulatzeko, kontuan hartu behar diren irabazi garbia duten entitate eratzaileak dira esleitze-aldi bakoitzean (bost urteko aldia) aukera baliatu den jurisdikzioan kokatuta zeuden entitateak. Aurreko formularen arabera esleitu ezin izan den irabazi garbiaren edozein hondar-zenbateko uniformeki esleitu beharko zaie aipatutako jurisdikzioan kokatutako entitate eratzaileei, esleitze-aldi bakoitzean.

Aukera baliatzen den zergaldiaren aurreko zergaldietan apartatu honen arabera egindako doikuntzak kontuan hartuko dira 30. artikuluko 1. apartatuan xedatutakoa aplikatzeko.

Apartatu honetan ezarritako aukera urtero baliatuko da, 49 artikuluko 2. apartatuan xedatutakoari jarraikiz.

8. Entitate eratzaile batek edo gehiagok talde bereko beste entitate bati edo batzuei kreditua emateko edo entitateotan beste modu batean inbertitzeko finantzaketa-akordio batek (aurrerantzean, talde barreneko finantzaketa-akordioa) eragindako gastuak ez dira kontuan hartuko entitate eratzaile baten irabazi edo galera onargarriak kalkulatzeko, baldintza hauek betetzen badira:

a) Entitate eratzailea zerga-maila apaleko jurisdikzio batean kokatuta egotea, edo, entitate eratzaileak gastuak sortu izan ez balitu zerga-maila apala izanen zukeen jurisdikzio batean;

b) Aurrez espero ahal izatea talde barreneko finantzaketa-akordioa indarrean dagoen bitartean, akordio horrek entitate eratzailearen irabazi edo galera onargarriak kalkulatzeko kontuan hartzen diren gastuen zenbatekoa handituko duela, kreditua ematen duen entitate eratzailearen (aurrerantzean, kontrako alderdia) zerga-errentan igoera proportzionalik eragin gabe;

c) Kontrako alderdia zerga-maila apala ez duen jurisdikzio batean kokatuta egotea, edo, bestela, gastuekin lotutako sarrerak kontrako alderdiak sortu izan ez balitu zerga-maila apalik izanen ez zukeen jurisdikzio batean.

9. Azken entitate nagusi batek bere kontabilitate-tratamendu bateratua aplikatzea aukeratu dezake entitate eratzaileen arteko transakzioetatik datozen sarrerak, gastuak, irabaziak edo galerak ezabatzeko, baldin eta entitate horiek jurisdikzio berekoak badira eta zerga-baterakuntzako talde batean sartuta badaude, entitate eratzaile horien irabazi edo galera onargarriak kalkulatzeko.

Aukera hori 49 artikuluko 1. apartatuan xedatutakoaren arabera baliatuko da.

Aukera baliatzen edo errebokatzen den zergaldian, behar diren doikuntzak eginen dira, irabazi edo galera onargarriak behin baino gehiagotan kontuan har ez daitezen eta baliatze edo errebokatze horren ondorioz kontuan hartu gabe gera ez daitezen.

10. Aseguru-entitateek beren irabazi edo galera onargarrien zenbaketatik bazter utziko dute aseguratuei emandako prestazioak direla-eta aseguru-entitateak ordaindu dituen zergengatik aseguru-hartzaileei kobratu dieten edozein zenbateko.

Aseguru-entitateek beren irabazi edo galera onargarrien kalkuluan sartuko dute aseguru-hartzaileentzako edozein prestazio, kontabilitate-emaitzan jaso ez dena, baldin eta aseguru-hartzaileen aurreko erantzukizunaren gehikuntza edo gutxitzea beren kontabilitate-emaitzan jasotzen bada.

11. Entitate eratzaile baten ondare garbiaren gutxitze gisa erregistratutako zenbateko bat haren irabazi edo galera onargarriak kalkulatzeko gastu gisa tratatuko da, baldin eta entitate eratzaile horrek, zuhurtziazko betekizun arautzaileak direla bide, emandako tresna bati lotuta egin diren edo zor diren banaketen ondoriozkoa bada (aurrerantzean, lehen mailako kapital gehigarria).

Entitate eratzaile baten kapitalaren gehikuntza gisa erregistratutako zenbateko oro entitate horren irabazi edo galera onargarrien kalkuluan sartuko da, baldin eta entitate eratzaileak duen lehen mailako kapital gehigarri bati dagokionez jaso dituen edo kobratzeko dituen banaketen ondoriozkoa bada zenbateko hori.

Tresna horiek (lehen mailako kapital gehigarria) jaulki edo berreskuratzearen ondoriozko ondare garbiko doikuntzak ez dira inola ere zenbatuko entitate eratzailearen irabazi edo galera onargarrietan.

11. artikulua. Nazioarteko itsas garraioaren ondoriozko errenta kalkulutik bazter uztea.

1. Artikulu honen ondorioetarako, honela ulertuko dira kontzeptu hauek:

a) "Nazioarteko itsas garraioaren errenta": entitate eratzaile batek honako jarduera hauetatik lortutako errenta garbia, garraioa jurisdikzio beraren barneko bide nabigagarrietatik egiten ez bada:

i) Nazioarteko itsas trafikoan bidaiariak edo zama ontzien bidez garraiatzea, ontziak bereak izan, errentan hartuak izan edo beste modu batean jarriak izan haren esku;

ii) Nazioarteko itsas trafikoan bidaiariak edo zama ontzien bidez garraiatzea, espazioaren araberako pleitamendu-akordioen esparruan;

iii) Nazioarteko itsas trafikoan bidaiariak edo zama garraiatzeko erabiliko den ontzi bat errentan ematea, ontzi hori erabat ekipatuta, hornituta eta tripulazio guztiarekin pleitaturik dagoela;

iv) Nazioarteko itsas trafikoan bidaiariak edo zama garraiatzeko erabilitako ontzia beste entitate eratzaile bati errentan ematea, ontzi-krosko hutseko pleitamendu-araubidean;

v) Nazioarteko itsas trafikoan bidaiariak edo zama ontzien bidez garraiatzeko partzuergo, baterako negozio edo nazioarteko ustiapen-erakunde batean parte hartzea; eta

vi) Nazioarteko itsas trafikoan bidaiariak edo zama garraiatzeko erabilitako ontzi bat saltzea, baldin eta ontzi hori entitate eratzailearen esku gutxienez urtebetez egon bada erabiltzeko.

b) "Nazioarteko itsas garraioaren errenta osagarri onargarria": entitate eratzaile batek honako jarduera hauetatik lortutako errenta garbia, baldin eta jarduera horiek batez ere nazioarteko itsas trafikoan bidaiariak edo zama ontzien bidez garraiatzearekin lotuta egiten badira:

i) Ontzi bat entitate eratzailea ez den beste ontzi-enpresa bati errentan ematea ontzi-krosko hutseko pleitamendu-araubidean, pleitamenduaren iraupena hiru urtetik gorakoa ez bada;

ii) Beste ontzi-enpresa batzuek nazioarteko bidaia baten tarte nazionalerako jaulkitzen dituzten txartelak saltzea;

iii) Edukiontziak epe laburrera errentan ematea eta biltegiratzea edo edukiontziak berandu itzultzearen ondoriozko atxikitze-gastuak;

iv) Ingeniariek, mantentze-lanetako langileek, zamaketariek, sukaldeko langileek eta bezeroei arreta emateko langileek beste ontzi-enpresa batzuei zerbitzuak ematea; eta

v) Inbertsio-errentak, errentak sortzen dituzten inbertsioak ontziak nazioarteko trafikoan ustiatzeko jardueraren parte gisa egiten badira.

2. Entitate eratzaile baten nazioarteko itsas garraioaren errenta eta nazioarteko itsas garraioaren errenta osagarri onargarria haren irabazi edo galera onargarrien kalkulutik bazter geldituko dira, baldin eta entitate eratzaileak frogatzen badu ukitutako ontzi guztien kudeaketa estrategikoa edo komertziala entitate eratzailea kokatuta dagoen jurisdikziotik egiten dela benetan.

3. Entitate eratzaile baten nazioarteko itsas garraioaren errentaren edo nazioarteko itsas garraioaren errenta osagarri onargarriaren kalkuluak galera bat eragiten badu, entitate eratzailearen irabazi edo galera onargarrien kalkulutik bazter utziko da galera hori.

4. Jurisdikzio batean kokatutako entitate eratzaile guztien nazioarteko itsas garraioaren errenta osagarri onargarriak ez du gainditu behar entitate eratzaile horien nazioarteko itsas garraioaren errentaren ehuneko 50.

5. Entitate eratzaile batek sortzen dituen kostuak, zuzenean esleitzen ahal zaizkionak, bai haren nazioarteko itsas garraioko jarduerei -1. apartatuko a) letran zerrendatutakoak-, bai haren nazioarteko itsas garraioko jarduera osagarri onargarriei -1. apartatuko b) letran zerrendatutakoak- jarduera horiei esleituko zaizkie, entitate eratzailearen nazioarteko itsas garraioaren errenta garbia eta nazioarteko itsas garraioaren errenta osagarri onargarri garbia kalkulatzeko.

Entitate eratzaile batek sortzen dituen kostuak, haren nazioarteko itsas garraioko jardueretatik eta nazioarteko itsas garraioko jarduera osagarri onargarrietatik zeharka eratortzen direnak, kendu eginen dira jarduera horien negozio-bolumenetik, entitate eratzailearen nazioarteko itsas garraioaren errenta eta nazioarteko itsas garraioaren errenta osagarri onargarria kalkulatzeko, jarduera horietako bakoitzaren negozio-bolumenak guztizko negozio-bolumenarekiko duen proportzioan.

6. Entitate eratzaile baten zuzeneko zein zeharkako kostuak, nazioarteko itsas garraioaren errentari eta nazioarteko itsas garraioaren errenta osagarri onargarriari esleitutakoak, entitatearen irabazi edo galera onargarrien kalkulutik bazter utziko dira, aurreko 5. apartatuan xedatutakoaren arabera.

12. artikulua. Irabazi edo galera onargarriak entitate nagusi baten eta establezimendu iraunkor baten artean banatzea.

1. Entitate eratzailea 5. artikuluko 19. apartatuko a), b) edo c) letretan definitutako establezimendu iraunkor bat bada, haren kontabilitate-emaitza establezimendu iraunkor horren finantza-kontabilitate bereizian islatutako emaitza izanen da.

Establezimendu iraunkor batek finantza-kontabilitate bereizirik ez badu, haren kontabilitate-emaitza finantza-kontabilitate bereizian islatuko zatekeen zenbatekoa izanen da, baldin eta hura modu independentean egin izan balitz eta azken entitate nagusiaren egoera-orri finantzario bateratuak egiteko erabilitako kontabilitate-arauari jarraikiz.

2. Entitate eratzaile batek 5. artikuluko 19. apartatuko a) edo b) letretan establezimendu iraunkorrari buruz ematen den definizioa betetzen badu, haren kontabilitate-emaitza doitu eginen da, soilik islatzeko aplikatzekoa den hitzarmen fiskalaren edo kokatuta dagoen jurisdikzioko zuzenbide nazionalaren arabera esleitzen ahal zaizkion sarreren eta gastuen zenbatekoak eta partidak, alde batera utzita zergapeko sarreren zenbatekoa eta jurisdikzio horretan fiskalki kengarriak diren gastuen zenbatekoa.

Entitate eratzaile batek 5. artikuluko 19. apartatuko c) letran establezimendu iraunkorrari buruz ematen den definizioa betetzen badu, haren kontabilitate-emaitza doitu eginen da, soilik islatzeko ELGAren Errentaren eta Ondarearen gaineko Zerga Hitzarmenaren Ereduaren 7. artikuluaren arabera (berrikusitako bertsioa) esleitu zekizkiokeen sarreren eta gastuen partidak eta zenbatekoak.

3. Entitate eratzaile batek 5. artikuluko 19. apartatuko d) letran establezimendu iraunkorrari buruz ematen den definizioa betetzen badu, kontabilitate-emaitza honela kalkulatuko da: entitate nagusia kokatuta dagoen jurisdikzioan salbuetsita dauden sarreren zenbatekoa eta partidak oinarri hartuta, zeinak jurisdikzio horretatik kanpo egindako eragiketei esleitzen ahal zaizkien, eta entitate nagusia kokatuta dagoen jurisdikzioan zerga ondorioetarako kengarriak ez diren gastuen zenbatekoak eta partidak oinarri hartuta, halako eragiketei esleitzen ahal zaizkienak.

4. Establezimendu iraunkor baten kontabilitate-emaitza, aurreko apartatuetan xedatutakoaren arabera, ez da kontuan hartuko entitate nagusiaren irabazi edo galera onargarriak kalkulatzeko orduan, hurrengo 5. apartatuan jasotako kasuetan izan ezik.

5. Establezimendu iraunkor baten galera onargarria entitate nagusiaren gastutzat hartuko da, eta ez establezimendu iraunkorraren gastutzat, haren irabazi edo galera onargarriak kalkulatzeko, baldin eta establezimendu iraunkorraren galera hori zerga ondorioetarako kengarritzat jo bada entitate nagusiaren etekinak zergapetzen dituen zergan, eta, baldin eta galera konpentsatu ez bada etekinak zergapetzen dituen zergan tributazioaren mende dagoen partida batekin, entitate nagusiaren jurisdikzioko legeriaren arabera zein establezimendu iraunkorraren jurisdikzioko legeriaren arabera.

Establezimendu iraunkorrak ondoren lortzen dituen irabazi onargarriak entitate nagusiaren irabazi onargarritzat hartuko dira, eta ez establezimendu iraunkorraren irabazi onargarritzat, aurreko paragrafoan xedatutakoaren arabera entitate nagusiaren gastutzat hartu zen galera onargarriaren zenbatekoraino.

13. artikulua. Entitate garden baten irabazi edo galera onargarriak esleitzea.

1. Eratu den jurisdikzioan entitate gardena den entitate eratzaile baten kontabilitate-emaitza murriztu eginen da entitatearen partaidetzen titularrei esleitzen ahal zaien zenbatekoarekin, titular horiek talde multinazionaleko entitate ez badira eta partaidetzak entitate gardenean badituzte zuzenean edo fiskalki gardenak diren entitateen kate baten bitartez, honako kasu hauetan izan ezik:

a) Entitate gardena azken entitate nagusia izatea; edo

b) Entitate gardena aurreko a) letran adierazitako azken entitate nagusi baten partaidetzapekoa izatea, zuzenean edo fiskalki gardenak diren entitateen kate baten bitartez.

2. Entitate gardena den entitate eratzaile baten kontabilitate-emaitza murriztu eginen da beste entitate eratzaile bati foru lege honetan xedatutakoaren arabera esleitu beharreko kontabilitate-emaitzaren zenbatekoarekin.

3. Entitate garden batek bere jarduerak osorik edo partez establezimendu iraunkor baten bidez gauzatzen baditu, aurreko 1. apartatuan xedatutakoa aplikatu ondoren irauten duen kontabilitate-emaitza establezimendu iraunkor horri esleituko zaio, 12. artikuluan ezarritakoari jarraikiz.

4. Fiskalki gardena den entitate bat ez bada azken entitate nagusia, aurreko 1., 2. eta 3. apartatuak aplikatu ondoren irauten duen entitate gardenaren kontabilitate-emaitza esleituko zaie entitate gardenaren titular diren entitate eratzaileei, entitate horretan dituzten partaidetzen arabera.

5. Entitate garden bat fiskalki gardena den entitate bat bada, azken entitate nagusia edo alderantzizko entitate hibrido bat dena, 1., 2. eta 3. apartatuak aplikatu ondoren irauten duen entitate gardenaren kontabilitate-emaitza oro azken entitate nagusiari edo alderantzizko entitate hibridoari egotziko zaio.

6. 3., 4. eta 5. apartatuetan xedatutakoa bereiz aplikatuko da entitate eratzaile titular bakoitzeko, entitate gardenean dituzten partaidetzen arabera.

14. artikulua. Substantzia ekonomikoari lotutako errenten bazterketa.

1. Artikulu honen ondorioetarako, honela ulertuko dira kontzeptu hauek:

a) "Langile onargarriak": entitate eratzaile bateko lanaldi osoko edo lanaldi partzialeko langileak, eta kontratista independenteak, talde multinazionalaren edo talde nazional handiaren ohiko funtzionamendu-jardueretan parte hartzen dutenak talde multinazionalaren edo talde nazionalaren zuzendaritzapean eta kontrolpean.

b) "Soldata-kostu onargarriak": pertsonal-gastuak, soldatak eta kontraprestazio edo erabilgarritasun bat dakarten bestelako gastuak, langileari zuzeneko eta banakako onura pertsonala ematen diotenak, hala nola gaixotasun-asegurua, pentsio-araubideari ordaindutako kontribuzioak eta ekarpenak, nominaren eta enpleguaren gaineko zergak eta enplegatzaileak Gizarte Segurantzari egindako kotizazioak.

c) "Aktibo material onargarriak":

i) Jurisdikzioan kokatutako ibilgetu materialeko elementuak;

ii) Jurisdikzioan dauden baliabide naturalak;

iii) Errentariak jurisdikzioan kokatutako aktibo materialak erabiltzeko duen eskubidea; eta

iv) Ondasun higiezinak erabiltzeko edo baliabide naturalak ustiatzeko emakida, lizentzia edo antzeko administrazio-tresna, aktibo materialetan inbertsio adierazgarria dakarrena.

2. Salbu eta talde multinazional bateko edo talde nazional handi bateko entitate eratzaile aitortzaileak erabakitzen badu zergaldian ez aplikatzea substantzia ekonomikoari lotutako errenten bazterketa, 49. artikuluaren 2. apartatuaren arabera, zerga osagarria kalkulatzeko, jurisdikzio baterako irabazi onargarri garbiak murriztu eginen dira artikulu honen 3. apartatuan adierazten den nominen bazterketa eta artikulu honen 4. apartatuan adierazitako aktibo materialen bazterketa batuta ateratzen den zenbatekoarekin, jurisdikzioan kokatutako entitate eratzaile bakoitzerako.

3. Jurisdikzio batean kokatutako entitate eratzaile baten nominen bazterketa honako hau izanen da: jurisdikzio horretan talde multinazionalerako edo talde nazional handirako jarduerak egiten dituzten langile onargarrien soldata-kostu onargarrien ehuneko 5, baldintza hauek betetzen dituzten soldata-kostu onargarriak alde batera utzita:

a) Kapitalizatuak direnak eta aktibo material onargarrien kontabilitate-balioan sartuta daudenak;

b) 11. artikuluaren arabera baztertutako errentei dagozkienak.

4. Jurisdikzio batean kokatutako entitate eratzaile baten aktibo materialen bazterketa jurisdikzioan kokatutako aktibo material onargarrien kontabilitate-balioaren ehuneko 5 izanen da, honako hauek alde batera utzita:

a) Saltzeko, errentan jartzeko edo inbertitzeko diren ondasunen kontabilitate-balioa, lurrak eta eraikinak barne;

b) 11. artikuluaren arabera baztertutako errentak lortzeko erabilitako aktibo materialen kontabilitate-balioa.

5. Aurreko 4. apartatuaren ondorioetarako, aktibo material onargarrien kontabilitate-balioa zergaldiaren hasierako eta bukaerako aktibo material onargarrien kontabilitate-balio garbiaren batezbestekoa izanen da. Aktibo material horiek azken entitate nagusiaren egoera-orri finantzario bateratuak prestatzeko erabilitakoak dira, narriaduraren zenbatekoa eta metatutako amortizazioaren zenbatekoa kontuan hartuta, bai eta kapitalizatutako soldata-gastuena ere.

6. Artikulu honetako 3. eta 4. apartatuen ondorioetarako, establezimendu iraunkorra den entitate eratzaile baten soldata-kostu onargarriak eta aktibo material onargarriak 12. artikuluko 1. eta 2. apartatuetan xedatutakoaren arabera finantza-kontabilitate bereizian sartuta daudenak izanen dira, betiere soldata-kostu onargarriak eta aktibo material onargarriak establezimendu iraunkorraren jurisdikzio berean badaude.

Establezimendu iraunkor baten soldata-kostu onargarriak eta aktibo material onargarriak ez dira kontuan hartuko entitate nagusiaren soldata-kostu onargarriak eta aktibo material onargarriak zehazteko.

Establezimendu iraunkor baten errentak guztiz edo partez baztertu badira 13. artikuluko 1. apartatuaren edo 40. artikuluko 6. apartatuaren arabera, establezimendu iraunkor horren soldata-kostu onargarriak eta aktibo material onargarriak proportzio berean baztertuko dira artikulu honetan ezarritako kalkulutik.

7. Entitate garden batek ordaindutako langile onargarrien soldata-kostu onargarriak, aurreko 6. apartatuan xedatutakoari jarraikiz esleitu ez direnak, eta entitate horren jabetzako aktibo material onargarriak honako hauei esleituko zaizkie:

a) Entitate gardenaren partaidetzen titular diren entitate eratzaileei, 13. artikuluko 4. apartatuaren arabera esleitu zaien zenbatekoaren proportzioan, baldin eta langile onargarriak eta aktibo material onargarriak entitate gardeneko partaidetzen titularren jurisdikzioan kokatuta badaude; eta

b) Azken entitate nagusia den entitate gardenari, 40. artikuluko 2. eta 3. apartatuei jarraikiz entitate gardenaren irabazi onargarrien kalkulutik baztertutako errentekin proportzioan murriztuta, baldin eta langile onargarriak eta aktibo material onargarriak entitate gardenaren jurisdikzioan kokatuta badaude.

Entitate gardenaren gainerako soldata-kostu onargarri eta aktibo material onargarri guztiak talde multinazionalaren edo talde nazional handiaren substantzia ekonomikoari lotutako errenta-bazterketako kalkuluetatik bazter utziko dira.

8. Egoitzarik gabeko entitate eratzaile bakoitzaren substantzia ekonomikoari lotutako errenta-bazterketa banaka kalkulatuko da, zergaldi bakoitzerako, gainerako entitate eratzaile guztien substantzia ekonomikoari lotutako errenta-bazterketatik bereizita.

9. Artikulu honen arabera kalkulatutako substantzia ekonomikoari lotutako errenten bazterketak jurisdikzio batean ez du barne hartuko jurisdikzio horretan inbertsio entitate diren entitate eratzaileen nominen bazterketa, ez eta entitate horien aktibo materialen bazterketa ere.

15. artikulua. Zergaoinarria zehaztea.

1. Zerga-maila apaleko jurisdikzio bateko zerga osagarriaren zerga-oinarria, bai zerga osagarri nazionalaren modalitatean, bai lehen mailako zerga osagarriaren modalitatean, honako hau izanen da zergaldian: jurisdikzioko entitate eratzaileen irabazi onargarri garbiak substantzia ekonomikoari lotutako errenta-bazterketaren zenbatekoarekin minoratzearen ondoriozko zenbateko positiboa, foru lege honetan xedatutakoaren arabera.

2. Aurreko 6. artikuluko 2. apartatuan adierazitako zergadunentzako zerga osagarriaren zerga-oinarria, Espainiako lurraldean eta zergaldian, zein den kalkulatzeko, zerga osagarriaren zerga-oinarria biderkatu behar da zergaldian zergadunak lortu dituen irabazi onargarriek Espainiako lurraldeko irabazi onargarri agregatuekiko duten proportzioarekin; biderketa horren ondoriozko zenbatekoa izanen da zerga-oinarria.

6. artikuluko 3. apartatuan adierazitako zergadunentzako zerga osagarriaren zerga-oinarria, jurisdikzio batean eta zergaldian, zein den kalkulatzeko, zerga-maila apaleko jurisdikzio bateko zerga osagarriaren zerga-oinarria biderkatu behar da partaidetzapeko entitate eratzaile bakoitzak zergaldian lortutako irabazi onargarriak zerga-maila apaleko jurisdikzio bakoitzeko irabazi onargarri agregatuekiko duten proportzioarekin, eta ondoriozko biderkadura biderkatu behar da zergadunek zuzenean edo zeharka partaidetzapeko entitate eratzaile bakoitzean (egoitzarik gabea edo beste jurisdikzio batean kokatua) duten partaidetza-ehunekoarekin. Ondoriozko zenbatekoa izanen da zerga-oinarria.

3. 6. artikuluko 4. apartatuan adierazitako zergadunentzako zerga-oinarria, zergaldian, zein den kalkulatzeko, 29 artikuluko 10. apartatuan xedatutakoaren arabera zehaztutako zenbatekoa zati zerga-maila apaleko jurisdikzioko zerga-tasa eginen da.

IV. TITULUA. ZERGA ESTALI DOITUAK ZEHAZTEA

16. artikulua. Zerga estaliak.

1. Foru lege honen ondorioetarako, entitate eratzaile baten zerga estaliek honako hauek hartuko dituzte barne:

a) Entitate eratzailearen galera-irabazien kontuan kontsignatzen diren eta entitate horren errenta edo etekinak kargatzen dituzten zergak, entitate horren errentari edo etekinei dagozkienak, edo beste entitate eratzaile batek lortutako errentei edo etekinei dagozkienak, entitateak beste horren gainean duen partaidetza-ehunekoaren proportzioan.

b) Honako hauek kargatzen dituzten zergak: banatutako etekinak, ustezko etekin banatuak eta enpresaz kanpoko gastuak, banaketaren gaineko araubide onargarri baten araberako tributazioaren mende daudenak.

c) Sozietateen errentak edo enpresa-mozkinak zergapetzen dituen aplikazio orokorreko zerga baten ordez exijitzen diren zergak.

d) Entitate eratzailearen banatu gabeko etekinak edo kapital soziala zergapetzen dituzten zergak, errentetan eta kapitalean oinarritutako osagai asko kargatzen dituzten zergak barne.

2. Entitate eratzaile baten zerga estaliek ez dituzte honako hauek barne hartuko:

a) Espainiako lurraldean sortutako zerga osagarria, foru lege honetan xedatutakoaren arabera.

b) Errentak sartzeko erregela onargarri bat aplikatzearen ondoriozko zerga osagarria.

c) Beste jurisdikzio bateko zerga osagarri nazional onargarria.

d) Entitate eratzaile bati esleitutako zerga osagarria, behar beste zergapetu gabeko etekinen erregela onargarri bat aplikatzearen ondoriozkoa.

e) Zerga egotzi itzulgarri ez-onargarria.

f) Aseguru-entitate batek ordaindutako zergak, 10.10 artikuluaren arabera baztertutako zenbatekoei dagozkienak.

3. Zerga estalien zehaztapenetik baztertuko dira 10. artikuluko 7. apartatuaren lehen paragrafoan adierazitako tokiko aktibo materialak besterentzearen ondoriozko irabazi edo galera garbi bati egozten ahal zaizkion zerga estaliak, paragrafo horretan aipatzen den aukera baliatzen den zergaldian.

17. artikulua. Zerga estali doituak.

1. Entitate eratzaile baten zergaldiko zerga estali doituak kalkulatzeko, doitu eginen da galera-irabazien kontuko zerga arruntagatiko gastua, zergaldiko zerga estaliekin bat datorrena, honako zenbateko hauekin:

a) Zergaldiko zerga estalien gehikuntzen eta murrizketen zenbateko garbia, artikulu honen 2. eta 3. apartatuetan ezarritakoari jarraikiz.

b) Zerga geroratuengatiko doikuntzaren zenbateko osoa, 18. artikuluan ezarritakoaren arabera dagokiona.

c) Ondare garbian edo "beste emaitza orokor bat" partidan erregistratzen den zerga estalien edozein gehikuntza edo minoratze, irabazi edo galera onargarrien kalkuluan sartutako zenbatekoei dagokiena; zenbateko horiek zergapetuta egonen dira entitate eratzailea kokatuta dagoen jurisdikzioan.

2. Entitate eratzaile baten zergaldiko zerga estaliak honako hauekin gehituko dira:

a) Galera-irabazien kontuan aldiko gastu gisa erregistratutako zerga estaliak, zergak aplikatu aurreko emaitza minoratuta.

b) Zergaldian aplikatutako galera onargarriari dagokion zerga geroratuagatiko aktiboa, 19 artikuluko 2. apartatuan ezarritakoaren arabera.

c) Zergaldian benetan ordaindutako zerga estaliak, zalantzazko posizio fiskal bati esleitzen ahal zaizkionak, baldin eta aurreko ekitaldi batean zerga estalien murrizketa gisa tratatu diren zenbatekoei badagozkie, 3. apartatuko d) letraren arabera.

d) Aldiko zerga arruntagatiko gastua murriztu duen kreditu fiskal itzulgarri onargarriaren zatia.

3. Entitate eratzaile baten zergaldiko zerga estaliak honako hauekin minoratuko dira:

a) Foru lege honen arabera irabazi edo galera onargarrien kalkulutik bazter utzi diren irabaziei dagokien zerga arruntagatiko gastua.

b) Zerga arruntagatiko gastuaren murrizketa gisa erregistratu ez den kreditu fiskal itzulgarri ez-onargarriaren zatia.

c) Entitate eratzaile bati itzulitako edo egotzitako zerga estalien edozein zenbateko, baldin eta galera-irabazien kontuan ez bada erregistratu zerga arruntagatiko gastuaren doikuntza gisa, kreditu fiskal itzulgarri onargarri batekin lotuta dagoenean izan ezik.

d) Zalantzazko posizio fiskal bati dagokion zerga arruntagatiko gastua.

e) Zergaldia bukatu ondorengo hiru urteetan benetan ordaintzea espero ez den zerga arruntagatiko gastua.

4. Zerga estali doituak kalkulatzeko, zerga estali bera behin baino ezin izanen da zenbatu, aurreko letretako batean baino gehiagotan sartzen ahal bada ere.

5. Jurisdikzioan irabazi onargarri garbirik lortzen ez den zergaldian, eta jurisdikzio horretako zerga estali doituen zenbatekoa negatiboa bada eta espero izandako zerga estali doituak baino txikiagoa, espero izandako zerga estali doituen eta zerga estali doituen arteko aldeari dagokion zenbatekoa zerga osagarri gehigarritzat hartuko da zergaldi horretan, eta jurisdikzioko entitate eratzaile bakoitzari esleituko zaio, 30. artikuluko 3. apartatuan xedatutakoari jarraikiz.

Aurrekoa gorabehera, entitate eratzaile aitortzaileak aukera izanen du espero izandako zerga estali doituen eta zerga estali doituen arteko aldea (aurreko paragrafoan adierazia) zerga osagarri gehigarritzat hartzeko jurisdikzioan irabazi onargarriak lortzen diren ondorengo zergaldi batean; hala, murrizten ahalko ditu ondorengo zergaldi horretako zerga estali doituak, deuseztatu arte. Soberakina egonez gero, hurrengo zergaldietan aplikatuko da, eta apartatu honetan ezarritako baldintzetan egotziko da.

Apartatu honetan ezarritako aukera 49. artikuluko 3. apartatuan xedatutakoaren arabera baliatuko da, eta ondorengo zergaldi guztietan aplikatuko da, harik eta aurreko paragrafoan aipatutako aldea hurrengo zergaldietan zerga osagarri gehigarri gisa osorik integratu arte.

Talde multinazionalak edo talde nazional handiak jurisdikzioan entitate eratzaileak edukitzeari uzten badio, zerga osagarri gehigarri gisa integratzeko dagoen zenbatekoa hurrengo zergaldietara pasatuko da, taldeak jurisdikzioan entitate eratzaileak berriz dauzkan zergalditik aurrera aplikatzeko, eta apartatu honetan ezarritako baldintzetan egotziko da.

Apartatu honetan xedatutakoaren ondorioetarako, "espero izandako zerga estali doituak" izanen dira jurisdikzioko galera onargarri garbia gutxieneko zerga-tasarekin biderkatzearen ondoriozko emaitza.

18. artikulua. Zerga geroratuengatiko doikuntzaren zenbateko osoa.

1. Artikulu honetan xedatutakoaren ondorioetarako, honako definizio hauek ematen dira:

a) "Baimendu gabeko sortzapena":

i) Entitate eratzaile baten galera-irabazien kontuan zerga geroratuagatiko gastuak eragindako edozein aldaketa, zalantzazko posizio fiskal bati dagokiona.

ii) Entitate eratzaile baten galera-irabazien kontuan zerga geroratuagatiko gastuak eragindako edozein aldaketa, entitate eratzaile baten etekinen banaketa bati dagokiona.

b) "Erreklamatu gabeko sortzapena": zergaldi batean zerga geroratuagatiko pasibo batek izandako gehikuntza, entitate eratzaile baten egoera-orri finantzarioetan aitortua badago eta 7. apartatuan ezarritako epean benetan ordainduko dela espero ez bada, baldin eta, 49. artikuluaren 2. apartatuaren arabera, entitate eratzaile aitortzaileak duen aukera baliatuta (urtero baliatzen du), ez bada sartzen zergaldi horri dagokion zerga geroratuengatiko doikuntzaren zenbateko osoaren barnean.

2. Entitate eratzaile bati zergaldian dagokion zerga geroratuengatiko doikuntzaren zenbateko osoa hau izanen da: haren galera-irabazien kontuan ageri den zerga geroratuagatiko gastua edo sarrera, 3. apartatutik 6. apartatura bitartekoetan ezarritakoaren arabera zerga estali eta doituei dagokiena, baldin eta horiek zehazteko aplikatu beharreko zerga-tasa gutxieneko zerga-tasaren parekoa edo txikiagoa bada.

Zerga geroratuagatiko gastua edo sarrera kalkulatzeko aplikatutako zerga-tasa gutxieneko zerga-tasa baino handiagoa bada, gutxieneko zerga-tasaren arabera kalkulatu beharko da berriz irabazi-galeren kontuan ageri den zerga geroratuagatiko gastua edo sarrera, zerga estaliei dagokiena.

3. Zerga geroratuengatiko doikuntzaren zenbateko osoa zenbateko hauekin gehituko da:

a) Baimendu gabeko sortzapen bati edo erreklamatu gabeko sortzapen bati dagozkion zenbatekoak, zergaldian ordaindutakoak.

b) Berreskuratutako zerga geroratuagatiko pasiboaren zenbatekoa, aurreko zergaldi batean zehaztu eta zergaldian zehar ordaindu dena.

4. Baldin eta zergaldian galera bati dagokion zerga geroratuagatiko aktiboa ez bada erregistratzen egoera-orri finantzarioetan (ez betetzeagatik kontabilitatean jasotzeko irizpideak), zerga geroratuengatiko doikuntzaren zenbateko osoa murriztu eginen da kontabilitatean jasotzeko irizpideak bete izan balira zenbateko horretatik kenduko zatekeen zenbatekoarekin.

5. Zerga geroratuengatiko doikuntzaren zenbateko osoan ez dira sartuko honako hauek:

a) Zerga geroratuagatiko gastua edo sarrera, foru lege honen arabera irabazi edo galera onargarrien kalkulutik bazter utzi diren partidei dagokiena.

b) Zerga geroratuagatiko gastua edo sarrera, baimendu gabeko sortzapenei eta erreklamatu gabeko sortzapenei dagokiena.

c) Zerga geroratuagatiko aktibo bat kontabilitatean jasotzeko edo baloratzeko doikuntza batek eragindako ondorioak.

d) Zerga geroratuagatiko gastu edo sarreraren aldaketa, aplikatu beharreko zerga-tasa nazionalaren aldaketa baten ondoriozkoa.

e) Zerga geroratuagatiko gastua edo sarrera, kreditu fiskalen sorrerari eta erabilerari dagokiena.

6. Entitate eratzaile baten galera onargarri bati dagokion zerga geroratuagatiko aktibo bat zergaldi batean gutxieneko zerga-tasa baino tasa txikiagoarekin erregistratu bada, aktibo hori berriz kalkulatzen ahalko da, zergaldi berean, gutxieneko zerga-tasarekin, baldin eta zergadunak egiaztatzen ahal badu zerga geroratuagatiko aktiboa galera onargarri bati dagokiola.

Zerga geroratuengatiko aktibo bat gehitzen bada aurreko paragrafoan xedatutakoaren arabera, zerga geroratuengatiko doikuntzaren zenbateko osoa horren arabera murriztuko da.

7. Zerga geroratuagatiko pasibo bat itzuli ez bada eta haren zenbatekoa hurrengo bost zergaldietan ordaindu ez bada, pasibo hori berreskuratu egin beharko da, baldin eta kontuan hartu bada entitate eratzaile baten zerga geroratuengatiko doikuntzaren zenbateko osoan, betiere hurrengo apartatuan xedatutakoa aplikatu behar ez bada.

Uneko zergaldian berreskuratutako zerga geroratuagatiko pasiboaren zenbatekoak minoratuko ditu uneko zergaldiaren aurreko bosgarren zergaldiko zerga estaliak, eta azken zergaldi horretako zerga-tasa efektiboa eta zerga osagarria berriz kalkulatuko dira, 30. artikuluko 1. apartatuan xedatutakoaren arabera. Uneko zergaldian berreskuratutako zerga geroratuagatiko pasiboa bat etorriko da zerga geroratuagatiko pasiboaren gehikuntzaren zenbatekoarekin, zeina sartu baitzen uneko zergaldiaren aurreko bosgarren zergaldian zerga geroratuengatiko doikuntzaren zenbateko osoan eta ez baita itzuli uneko zergaldiko azken egunaren bukaeran.

8. Ez da aplikatuko aurreko 7. apartatuan xedatutakoa, aldi horretan sortutako zerga geroratuagatiko honako pasibo hauen kasuan, horiek ez baitira berreskuratzekoak izanen, nahiz eta hurrengo bost urteetan itzuli eta ordaindu ez diren. Berreskuratzekoa ez den zerga geroratuagatiko pasiboa izanen da zergaldian sortutako zergagatiko gastuaren zenbatekoa, zerga geroratuagatiko pasiboan izandako aldaketei dagokiena, partida hauei lotutakoa:

a) Aktibo materialen kostuak berreskuratzeagatik egindako balio-zuzenketak.

b) Ondasun higiezinak erabiltzeko edo baliabide naturalak ustiatzeko gobernu baten lizentzia, emakida edo antzeko tresna baten kostua, aktibo materialetan inbertsio adierazgarria dakarrena.

c) Ikerketako eta garapeneko gastuak.

d) Eraisteko, obra-hondakinak ateratzeko edo birgaitzeko kostuak.

e) Gauzatu gabeko irabazi garbiei arrazoizko balioaren irizpidea aplikatzeagatik eragindako balio-aldaketak.

f) Atzerri-monetako kanbio-diferentzien ondoriozko irabazi garbiak.

g) Aseguru-polizen hornidura teknikoak eta eskuratze-kostu geroratuak.

h) Entitate eratzailearen jurisdikzio berean dauden ondasun materialak eskualdatzearen ondoriozko errenta positiboak, jurisdikzio horretako ondasun materialetan berriro inbertitzen direnak.

i) Aurreko a) letratik h) letrara bitartekoetan adierazitako partidei dagokienez kontabilitate-irizpideak aldatzearen ondorioz sortutako zenbateko gehigarriak.

19. artikulua. Galera onargarriak hautatzea.

1. Aurreko 18. artikuluan xedatutakoa gorabehera, entitate eratzaile aitortzaileak aukeratzen ahalko du jurisdikzio batean galera onargarriak hautatzea. Hala, aukera baliatu den jurisdikzioan galera onargarri garbi bat dagoen zergaldi bakoitzean, galera onargarri horri esleitzen ahal zaion zerga geroratuagatiko aktibo bat kalkulatuko da, eta haren zenbatekoa izanen da jurisdikzioan izandako galera onargarri garbia gutxieneko zerga-tasarekin biderkatzearen emaitza.

Apartatu honetan ezarritako aukera ez da aplikatuko banaketarako tributu-sistema onargarria duten jurisdikzioen kasuan, 42. artikuluan ezarritakoari jarraikiz.

2. Galera onargarri garbi bati dagokion zerga geroratuagatiko aktiboa, 1. apartatuaren arabera zehaztutakoa, aplikatuko da jurisdikzioak irabazi onargarri garbiak lortzen dituen ondorengo edozein zergalditan, irabazi onargarri garbiak gutxieneko zerga-tasarekin biderkatuta ateratzen den zenbatekoarekin, edo, txikiagoa bada, aplikatzeko dagoen galera onargarri garbiari esleitzen ahal zaion zerga geroratuagatiko aktiboaren zenbatekoarekin.

3. Galera onargarri garbi bati dagokion zerga geroratuagatiko aktiboa, 1. apartatuaren arabera zehaztutakoa, murriztuko da zergaldi batean aplikatutako zenbatekoarekin, eta erabili gabeko saldoa, halakorik balego, hurrengo zergaldietan aplikatuko da.

4. Galera onargarrien hautua errebokatzen bada, aplikatzeko dagoen zerga geroratuagatiko aktiboaren saldoa, galera onargarri garbi bati dagokiona, artikulu honen 1. apartatuaren arabera zehaztuta, zerora murriztuko da, eta horrek galera onargarrien hautua aplikagarri ez den lehen zergaldiko lehen egunetik aurrera izanen ditu ondorioak.

5. Galera onargarrien hautua behin baino ezin izanen da baliatu, zehazki, talde multinazionalaren edo talde nazional handiaren zerga osagarriaren lehen aitorpen informatiboan (47. artikuluan aipatzen da), non hautua zein jurisdikziotarako baliatzen den jasoko baita.

6. Talde multinazional bateko edo talde nazional handi bateko azken entitate nagusia den entitate garden batek galera onargarrien hautua egiten badu artikulu honetan ezarritakoaren arabera, galera onargarri garbi bati dagokion zerga geroratuagatiko aktiboa kalkulatzeko, entitate gardenak izandako galera onargarri garbia hartuko da kontuan, 40. artikuluko 3. apartatuari jarraituz murrizketa egin ondoren.

20. artikulua. Entitate eratzaile jakin batzuek jasaten dituzten zerga estalien esleipen espezifikoa.

1. Entitate eratzaile baten egoera-orri finantzarioetan sartu diren zerga estaliak, baldin eta establezimendu iraunkor baten irabazi edo galera onargarriei badagozkie, establezimendu iraunkorrari esleituko zaizkio.

2. Fiskalki gardena den entitate eratzaile baten egoera-orri finantzarioetan sartu diren zerga estaliak, baldin eta, 13.4 artikuluarekin bat, entitate eratzaile titularrei esleitutako irabazi edo galera onargarriei badagozkie, entitate eratzaile titular horiei esleituko zaizkie.

3. Atzerriko sozietate kontrolatuen zerga-araubidearen mende dagoen entitate eratzaile baten titular diren entitate eratzaileen egoera-orri finantzarioetan sartutako zerga estaliak entitate eratzaile horri esleituko zaizkio, atzerriko sozietate kontrolatuen araubidearen arabera zergapetutako etekinei dagokien zatian.

4. Entitate hibridoa edo alderantzizko entitate hibridoa den entitate eratzaile baten titular diren entitate eratzaileen egoera-orri finantzarioetan sartu diren zerga estaliak, entitate eratzaile horren irabazi onargarriei lotutakoak, entitate hibridoari edo, hala badagokio, alderantzizko entitate hibridoari esleituko zaizkio.

Entitate hibridotzat hartuko da haren partaidetzen titularra kokatuta dagoen jurisdikzioan fiskalki gardentzat jotzen den entitatea, baina entitatea kokatuta dagoen jurisdikzioan halakotzat hartzen ez dena.

5. artikuluko 18. apartatuko b) letran xedatutakoaren arabera, alderantzizko entitate hibridotzat joko da entitatea kokatuta dagoen jurisdikzioan fiskalki gardentzat jotzen den entitatea, baina partaidetzen titularra dagoen jurisdikzioan halakotzat hartzen ez dena.

5. Entitate eratzaileek egindako banaketen gaineko zerga estaliak, haien zuzeneko entitate eratzaile titularren egoera-orri finantzarioetan sartu badira, zergaldian banaketak egin dituzten entitate eratzaileei esleituko zaizkie.

6. Baldin eta entitate eratzaileei, 3. eta 4. apartatuen arabera, esleitu bazaizkie errenta pasiboei dagozkien zerga estaliak, zerga estali horiek beren zerga estali doituetan sartuko dituzte, errenta pasiboei lotutako eta esleitutako zerga estalien zenbateko berean.

Hala ere, aurreko paragrafoan aipatzen diren entitate eratzaileek zenbateko bat sartuko dute zerga estali doituetan, biderketa honen arabera kalkulatua: jurisdikzioko zerga osagarriaren tasa bider atzerriko sozietate kontrolatuen araubide fiskal baten edo gardentasun fiskaleko arau baten mende dauden entitate eratzailearen errenta pasiboen zenbatekoa. Hala eginen dute emaitza aurreko paragrafoari jarraituz kalkulatutako zenbatekoa baino txikiagoa bada. Paragrafo honen ondorioetarako, jurisdikzioko zerga osagarriaren tasa kalkulatzeko ez dira kontuan hartuko entitate eratzaile titularrari errenta pasibo horiek direla-eta egozten ahal zaizkion zerga estaliak.

Entitate eratzaile titularraren zerga estaliak, apartatu hau aplikatu ondoren irauten duten errenta pasiboei dagozkienak, ez dira esleituko 3. eta 4. apartatuen arabera.

Apartatu honen ondorioetarako, "errenta pasiboak" dira irabazi onargarrietan sartutako zenbait errenta, beherago adieraziak, baldin eta entitate eratzaile titularra tributazioaren mende egon bada atzerriko sozietate kontrolatuen zerga-araubide bat aplikatzeagatik edo entitate hibrido baten funts propioetako partaidetza edukitzeagatik. Honakoak dira errenta horiek:

a) Dibidenduak edo antzeko beste sarrera edo errenta batzuk;

b) Interesak edo antzeko beste sarrera edo errenta batzuk;

c) Errentamenduak;

d) Kanonak;

e) Kapitalizazio- eta aseguru-eragiketen ondoriozko errentak; edo

f) Aurreko a) letratik e) letrara bitartean azaldutako errentak sortzen dituzten aktiboen ondoriozko irabazi garbiak.

7. Establezimendu iraunkor baten irabazi onargarriak entitate nagusiaren irabazi onargarritzat hartzen badira, 12. artikuluko 5. apartatuan ezarritakoari jarraituz, establezimendu iraunkorra dagoen jurisdikzioari dagozkion zerga estaliak, irabazi horiei lotuta daudenak, entitate nagusiaren zerga estalitzat joko dira, zenbateko honekin: irabazi horiek entitate nagusia kokatuta dagoen jurisdikzioko errenta arruntaren gainean aplikatutako zerga-tasa altuenarekin biderkatzearen ondoriozko emaitza gainditzen ez duen zenbatekoa.

21. artikulua. Aitorpenaren ondorengo doikuntzak eta zergatasen aldaketak.

1. Entitate eratzaile batek bere egoera-orri finantzarioetan zuzenketa bat egiten badu, eta horren ondorioz handitzen badira aurreko zergaldi bateko zerga estaliak, zuzenketa egiten den zergaldiko zerga estalien doikuntzatzat hartuko da.

Zuzenketaren ondorioz entitate eratzailearen zerga estali doituetan sartutako zerga estaliak -aurreko zergaldi bati dagozkionak- gutxitzen badira, berriro kalkulatuko dira zerga-tasa efektiboa eta zerga osagarria zergaldi horretarako, 30. artikuluko 1. apartatuaren arabera. Beste kalkulu bat egitea bidezkoa izanez gero, zerga estali doituak murriztuko dira zergaldian izan den zerga estalien gutxitzeari dagokion zenbatekoarekin. Uneko zergaldiko eta aurreko zergaldietako irabazi onargarriak horren arabera doituko dira.

Aurreko paragrafoan xedatutakoa gorabehera, entitate eratzaile aitortzaileak urtero aukera izanen du, 49. artikuluko 2. apartaturi jarraikiz, zerga estalien gutxitze ez-adierazgarri bat zuzenketa egiten den zergaldiko zerga estalien doikuntzatzat hartzeko. Honako hau hartuko da "zerga estalien gutxitze ez-adierazgarritzat": zerga estali doituen gutxitze bat, zeinaren guztizko zenbatekoa milioi bat eurotik beherakoa baita jurisdikzioko eta zergaldiko.

2. Gutxieneko zerga-tasaren azpitik aplikatu beharreko zerga-tasa nazionala murriztearen ondoriozko zerga geroratuagatiko gastua honakotzat hartuko da: 17. artikuluaren ondorioetarako kontuan hartu diren eta aurreko zergaldi bati dagozkion zerga estaliak direla-eta entitate eratzailearen zergagatiko gastuaren doikuntzatzat.

3. Zerga geroratuagatiko gastua gutxieneko zerga-tasa baino tasa txikiagoarekin zehaztu bada eta aplikatu beharreko zerga-tasa geroago gehitzen bada, gehikuntza horren ondoriozko zerga geroratuagatiko gastuaren zenbatekoa, ordaintzeko unean, entitate eratzaileak aurreko zergaldi bati dagozkion zerga estaliengatik -17. artikuluaren ondorioetarako kontuan hartutakoak- zor duen zenbatekoaren doikuntzatzat joko da.

Aurreko paragrafoan aipatzen den doikuntzaren zenbatekoa ezin izanen da handiagoa izan gutxieneko tasan berriz kalkulatu den zerga geroratuagatiko gastuaren zenbatekoa baino.

4. Zergaldi batean entitate eratzaile baten zerga arruntaren zenbatekoa, zerga estali doituetan sartu dena, milioi bat eurotik gorakoa bada eta zenbateko hori ez bada benetan ordaintzen zergaldi hori bukatu eta hurrengo hiru urteen barrenean, berriz kalkulatuko dira zerga-tasa efektiboa eta zerga osagarria -biak ordaindu gabeko zenbatekoa zerga estali gisa kontuan hartu den zergaldikoak-, 30. artikuluko 1. apartatuan xedatutakoaren arabera. Ordaindu ez den zenbatekoa zerga estali doituetatik bazter utziko da.

VI. TITULUA. ZERGA-TASA EFEKTIBOA

22. artikulua. Zergatasa efektiboa zehaztea.

1. Talde multinazional baten edo talde nazional handi baten zerga-tasa efektiboa zergaldi bakoitzerako eta irabazi onargarri garbiak dauden jurisdikzio bakoitzerako kalkulatuko da.

Jurisdikzioko zerga-tasa efektiboa honako hau izanen da: zerga estali doituak jurisdikzio horretan kokatuta dauden entitate eratzaileen irabazi onargarri garbiekin zatitzearen emaitza, ehunekotan adierazia eta lau hamartarrekin biribildua.

2. Entitate eratzaileen zerga estali doitutzat hartuko da jurisdikzioan kokatuta dauden entitate eratzaile guztien zerga estali doituen batura. Zerga horiek foru lege honetan xedatutakoaren arabera zehaztuko dira.

3. Zergaldi batean jurisdikzioan kokatuta dauden entitate eratzaileen irabazi edo galera onargarri garbia entitate eratzaile horien irabazi onargarrien eta galera onargarrien arteko aldea izanen da.

Entitate eratzaileen irabazi onargarriak, berriz, jurisdikzioan kokatuta dauden entitate eratzaile guztien irabazi onargarrien batura positiboa izanen dira. Irabazi horiek foru lege honetan xedatutakoaren arabera zehaztuko dira.

Entitate eratzaileen galera onargarriak, azkenik, jurisdikzioan kokatuta dauden entitate eratzaile guztien galera onargarrien batura izanen dira. Galera horiek foru lege honetan xedatutakoaren arabera zehaztuko dira.

4. Inbertsio-entitate diren entitate eratzaileen zerga estali doituak eta irabazi edo galera onargarriak zerga-tasa efektiboaren kalkulutik eta irabazi onargarri garbien kalkulutik bazter utziko dira (aurreko apartatuetan adierazitako kalkuluak).

5. Egoitzarik gabeko entitate eratzaile bakoitzaren zerga-tasa efektiboa banaka eta gainerako entitate eratzaileei dagokien benetako zerga-tasatik bereizita kalkulatuko da, zergaldi bakoitzerako.

VII. TITULUA. ZERGA-ZORRA

I. KAPITULUA. KARGA-TASA

23. artikulua. Zerga osagarriaren kargatasa.

Zerga osagarria kalkulatzeko, 2. artikuluko 4., 3. eta 6. apartatuetan ezarritako zergadunei, zergaldian eta jurisdikzio bakoitzari dagokionez, aplikatu beharreko karga-tasa honako hau izanen da: 5. artikuluko 43. apartatuan aipatzen den gutxieneko zerga-tasaren eta jurisdikzio bakoitzeko benetako zerga-tasaren arteko diferentzia positiboa, ehunekoetan adierazia eta 22. artikuluko 1. apartatuan xedatutakoaren arabera zehaztuta.

II. KAPITULUA. ZERGA OSAGARRIAREN KUOTA

24. artikulua. Zerga osagarriaren kuota.

1. Zergaldian Espainiako lurraldean kokatutako entitate eratzaile baten zerga osagarriaren kuota honako hau izanen da: zerga osagarri nazionalaren kuotari lehen mailako zerga osagarriaren kuota eta bigarren mailako zerga osagarriaren kuota gehitzearen ondoriozko emaitza.

Zerga osagarri nazionalaren kuota 6. artikuluko 2. apartatuan ezarritako zergadunei dagokien zerga osagarria izanen da. Haren zenbatekoa kalkulatzeko, III. kapituluan araututako zerga osagarri nazionala aplikatuko da, 5. apartatuaren arabera.

Lehen mailako zerga osagarriaren kuota 6. artikuluko 3. apartatuan ezarritako zergadunei dagokien zerga osagarria izanen da. Haren zenbatekoa kalkulatzeko, IV. kapituluan araututako errentak sartzeko erregela aplikatuko da, 5. apartatuaren arabera.

Bigarren mailako zerga osagarriaren kuota 6. artikuluko 4. apartatuan ezarritako zergadunei esleitutakoa izanen da, V. kapituluan xedatutakoaren arabera.

2. Zergaldian talde multinazional bateko edo talde nazional handi bateko entitate eratzaileak kokatuta dauden jurisdikzioko zerga-tasa efektiboa gutxieneko zerga-tasa baino txikiagoa bada, 2. artikuluko 3. eta 6. apartatuetan adierazitako zergadunek jurisdikzio horretako zerga osagarria kalkulatuko dute. Halaber, irabazi onargarriak dituzten entitate eratzaileetako bakoitzaren zerga osagarria zehaztuko dute, baldin eta irabazi onargarriok sartu badira jurisdikzio horretako irabazi onargarri garbien kalkuluan.

Apartatu honetan xedatutakoaren ondorioetarako, III., IV., V. eta VI. kapituluetan jasotako erregelak hartuko dira kontuan.

3. Jurisdikzio bateko zerga osagarriaren karga-tasa, zergaldian, gutxieneko zerga-tasaren eta zerga-tasa efektiboaren arteko diferentzia positiboa izanen da, ehunekotan adierazia. Zerga-tasa efektiboa 22 artikuluko 1. apartatuan xedatutakoaren arabera kalkulatuko da.

4. Zerga-maila apaleko jurisdikzio bateko zerga osagarria honako hau izanen da zergaldian: jurisdikzioko karga-tasa, aurreko apartatuan adierazitakoa, jurisdikzioko zerga-oinarriarekin -15. artikuluko 1. apartatuan xedatutakoaren arabera zehaztua- biderkatuta ateratzen den zenbateko positiboa.

Azkenik, jurisdikzio bateko zerga osagarriaren zenbatekoa, zergaldian, gehituko da galdagarria den zerga osagarri gehigarriarekin, eta minoratuko da zerga-maila apaleko beste jurisdikzio batzuetan galdatu den zerga osagarri nazional onargarriaren zenbatekoarekin.

Aurreko paragrafoan xedatutakoaren ondorioetarako, kontzeptu hauek honela ulertuko dira:

- "Zerga osagarri gehigarria": 30. artikuluaren arabera zergaldian kalkulatutako zergaren zenbatekoa.

- "Zerga osagarri nazional onargarria": beste jurisdikzio bateko zergaldiko zerga osagarri nazional onargarriaren zenbatekoa, baldin eta 34. artikuluan ezarritako baldintzak betetzen ez baditu eta jurisdikzio horretan kokatutako entitate eratzaileen kontabilitate-emaitza 9. artikuluko 1. apartatuan xedatutakoaren arabera zehaztu bada, edo finantza-kontabilitateko beste arau onargarri baten edo behar bezala doitutako finantza-kontabilitateko arau baimendu baten arabera, lehiaren edozein distortsio adierazgarri prebenitzeko.

5. Entitate eratzaile baten zergaldiko zerga osagarria kalkulatzeko, entitatea kokatuta dagoen jurisdikzioko zerga osagarria biderkatu beharko da entitate eratzailearen irabazi onargarrien eta jurisdikzioan kokatutako entitate eratzaile guztien irabazi onargarri agregatuen arteko proportzioarekin; biderkadura hori izanen da entitate eratzailearen zerga osagarria.

"Jurisdikzio baterako entitate eratzailearen zergaldiko irabazi onargarriak" honako hauek izanen dira: foru lege honetan xedatutakoaren arabera zehaztu direnak.

"Jurisdikzioko entitate eratzaile guztien zergaldiko irabazi onargarri agregatuak" honako hauek izanen dira: zergaldian jurisdikzio horretan kokatuta dauden entitate eratzaile guztien irabazi onargarrien batura.

6. Zerga-maila apaleko jurisdikzio bateko zerga osagarria bat badator 30. artikuluko 1. apartatuaren arabera jurisdikzio bati dagokionez berriz egindako kalkulu batekin, eta kalkulua berriz egin den zergaldian jurisdikzio horretan ez bada irabazi onargarri garbirik erregistratzen, zerga osagarri gehigarria aipatutako jurisdikzioan kokatuta dagoen entitate eratzaile bakoitzari esleituko zaio; horretarako, 4. apartatuan ezarritako formula erabiliko da, eta kontuan hartuko da kalkulu berriak ukitu dituen zergaldietan entitate eratzaileek izan dituzten irabazi onargarriak, 30. artikuluko 1. apartatuari jarraikiz.

7. Egoitzarik gabeko entitate eratzaile bakoitzaren zerga osagarria kalkulatuko da banaka eta gainerako entitate eratzaileei dagokien zerga osagarritik bereizita, zergaldi bakoitzerako.

8. Espainiako lurraldeko zerga osagarriaren kuota, zergaldian, kalkulatzeko, batu eginen dira Espainiako jurisdikzioko zerga osagarriaren zenbatekoa, zergaldikoa -dela zerga osagarri nazionalaren modalitatean, dela lehen mailako zerga osagarriaren modalitatean-, 4. apartatuaren arabera kalkulatua, eta 29 artikuluko 1. apartatuan xedatutakoari jarraikiz Espainiako jurisdikzioari esleitutako bigarren mailako zerga osagarriaren zenbatekoa.

9. Titulu honetan xedatutakoaren ondorioetarako, 50. artikuluan borondatez ordaintzeko ezarritako epearen azken egunean edo ordainketa-datan (lehenagokoa bada) indarrean dagoen kanbio-tasa erabiliko da.

III. KAPITULUA. ZERGA OSAGARRI NAZIONALA

25. artikulua. Zerga osagarri nazionala.

1. 6. artikuluko 2. apartatuan aipatzen diren zergadunak kapitulu honetan aipatzen den zerga osagarri nazionalari lotuta egonen dira.

Zerga osagarri nazionala 24. artikuluan xedatutakoaren arabera zehaztuko da, X. tituluan entitate jakin batzuetarako ezarritako araubide bereziak gorabehera. Halako entitateek beren arau espezifikoen arabera zehaztuko dute zerga osagarri nazionala.

Ondorio horietarako, zerga nazional osagarriaren kasuan, Espainiako lurraldea izanen da jurisdikzioa.

2. Entitate eratzaileen kontabilitate-emaitza, zerga osagarri nazionala kalkulatzeko, 9. artikuluko 1. apartatuan xedatutakoari jarraituz zehaztuko da.

Arestian adierazitakoaren arabera ezinezkoa bada zentzuz zehaztea entitate eratzaile baten kontabilitate-emaitza, entitatearen zergaldiko kontabilitate-emaitza zehaztuko da Espainiako lurraldean oro har onartutako eta entitate eratzailearen finantza-kontuak egiteko erabilitako kontabilitate-arauen arabera.

Kasu horretan, sarreren, gastuen edo transakzioen partidei printzipio edo arau partikular bat aplikatzearen ondoriozko milioi bat eurotik gorako diferentzia iraunkorrak -printzipio edo arau hori ez bada azken entitate nagusiaren egoera-orri finantzario bateratuak egiteko erabilitako finantza-araua- doitu egin beharko dira, egoera-orri finantzario bateratuak egiteko erabilitako kontabilitate-arauaren arabera partida horretarako eskatzen den tratamenduarekin harmonizatzeko.

Betiere, entitate eratzailearen zergaldia bat ez badator azken entitate nagusiaren egoera-orri finantzario bateratuak egitean kontuan hartu den kontabilitate-aldiarekin, 9. artikuluan xedatutakoa bete beharko da.

3. Zerga-tasa efektiboa kalkulatzeko, 22. artikuluaren arabera kalkulatuko baita, kalkulatzeko, 6. artikuluko 2. apartatuan aipatzen diren zergadunen zerga estali hauek ez dira kontuan hartuko:

a) Atzerriko sozietate kontrolatuen zerga-araubidearen mende dagoen entitate eratzaile baten titular diren entitate eratzaileen zerga estaliak, 20. artikuluko 3. apartatuaren arabera Espainiako lurraldean kokatutako entitate eratzaile horri esleitu zaizkionak.

b) Entitate nagusiaren zerga estaliak, 20. artikuluko 1. apartatuaren arabera Espainiako lurraldean kokatutako establezimendu iraunkor bati esleitu zaizkionak.

c) Entitate hibridoa den entitate eratzaile baten titular diren entitate eratzaileen zerga estaliak, 20 artikuluko 4. apartatuaren arabera Espainiako lurraldean kokatutako entitate hibridoari esleitu zaizkionak.

d) Entitate eratzaile baten titular diren entitate eratzaileen zerga estaliak, 20 artikuluko 5. apartatuaren arabera banaketak egin dituen eta Espainiako lurraldean kokatuta dagoen entitate eratzaileari esleitu zaizkionak. Nolanahi ere, Espainiako lurraldean kokatuta dagoen entitate eratzaile batek egin dituen banaketen gaineko atxikipenei dagozkien zerga estaliak entitate horri esleituko zaizkio, zerga osagarri nazionala kalkulatzeko.

4. Aurrekoa gorabehera, titulizazio-entitate edo -mekanismo diren entitate eratzaileei dagokien zerga osagarri nazionalaren kuota ordaindu beharko dute Espainiako lurraldean kokatuta dauden talde multinazionaleko edo talde nazional handiko gainerako entitate eratzaileek, zergaldian irabazi onargarriak dituztenek, proportzio honetan: gainerako entitate eratzaileetako bakoitzak zergaldian lortutako irabazi onargarriak Espainiako lurraldean izandako irabazi onargarri agregatuekiko duen proportzioan. Hala ere, talde multinazionaleko edo nazional handiko beste entitate eratzailerik ez badago, zergaldian irabazi onargarriak dituenik eta titulizazio-entitate edo -mekanismo diren entitate eratzaileez bestelakorik, azken horiexek ordaindu beharko dute aldiko zerga osagarri nazionalaren kuota.

"Titulizazio-entitate edo -mekanismoa" izanen da titulizazio-akordio batean parte hartzen duen entitatea edo mekanismoa, honako baldintza hauek betetzen baditu:

a) Entitateak edo mekanismoak titulizazio-akordio bat edo gehiago egitea ahalbidetzen duten jarduerak bakarrik egitea.

b) Haren aktiboek bere hartzekodunen eskubideak edo beste titulizazio-entitate edo -mekanismo baten hartzekodunen eskubideak bermatzea.

c) Haren aktiboek sortutako kutxako fluxuak bere hartzekodunei edo beste titulizazio-entitate edo -mekanismo baten hartzekodunei ordaintzeko erabiltzea, urtean behin edo maizago, honako kasu hauetan izan ezik:

i) Kutxako fluxuak, etekinen zenbateko bat estaltzeko atxiki behar direnak, hala exijitu baita titulizazio-akordioan, partaideei edo akziodunei banatzeko, hala badagokio.

ii) Titulizazio-akordioaren arabera honako helburu hauetako edozein edo biak estaltzeko aukera ematen duten kutxako fluxuak:

- Titulizazio-akordioan ezarritako etorkizuneko ordainketak egiteko hornidurak ematea.

- Entitatearen edo mekanismoaren kreditu-kaudimenari eustea edo hura hobetzea.

Etekinak dituen entitate edo mekanismo bat ez da titulizazio-entitate edo -mekanismotzat hartuko, salbu eta c) letrako i) tartekian aipatzen diren etekinak hutsalak badira entitatearen edo mekanismoaren sarrerekiko.

"Titulizazio-akordioa" izateko, akordioak baldintza hauek bete beharko ditu:

a) Aktiboen zorro bat (edo aktibo horiei lotutako arriskuak) taldekatu eta berriro taldekatzeko asmoarekin formalizatzea, talde multinazionaleko edo talde nazional handiko entitate eratzaile ez diren inbertitzaileentzat, behar bezala identifikatutako aktibo-talde bat edo gehiago legez bereiz daitezen; eta

b) Inbertitzaileak legez bereizitako aktiboak dituen entitatearen kaudimengabezia-arriskupean uzteko aukera mugatu nahi izatea, entitate horren (edo akordioan ezarritako beste entitate batean) hartzekodun identifikatuek entitatearen aurkako erreklamazioak aurkezteko duten gaitasuna kontrolatuta, hartzekodun horiek sinatutako kontratu lotesleen bidez.

IV. KAPITULUA. LEHEN MAILAKO ZERGA OSAGARRIA: ZERGA ESLEITZEA ETA ERRENTAK SARTZEKO ERREGELA KONPENTSATZEA

26. artikulua. Lehen mailako zerga osagarria esleitzea.

1. 6. artikuluko 3. apartatuan aipatzen den zergadunak zor duen lehen mailako zerga osagarria, zerga-maila apaleko beste jurisdikzio batean kokatutako entitate eratzaile bati dagokiona, entitate eratzaile horren zerga osagarriaren parekoa izanen da -24. artikuluan xedatutakoaren arabera kalkulatua-, entitate nagusiari dagokion proportzioan -hurrengo apartatuan xedatutakoaren arabera kalkulatua-.

Zergadun horrek zerga-maila apala duten eta egoitzarik ez duten entitate eratzaileei dagokien lehen mailako zerga osagarria ere ordaindu beharko du, baldin eta haietan partaidetza badu.

2. Zerga-maila apala duen entitate eratzaile bati dagokion lehen mailako zerga osagarriaren zatia, entitate nagusiari esleitzen ahal zaiona, zerga-maila apala duen entitate eratzailearen irabazi onargarrietan entitate nagusiak duen partaidetzaren proportziokoa izanen da. Proportzio hori honela kalkulatuko da: zerga-maila apaleko entitate eratzaileak zergaldian dituen irabazi onargarriak -beste titular batzuek dituzten partaidetzei egozten ahal zaizkien irabazi horien zenbatekoarekin minoratuta- zatituko dira entitate eratzaile horren irabazi onargarriekin.

Zerga-maila apaleko entitate eratzaile batean beste titular batzuek dituzten partaidetzei esleitzen ahal zaizkien irabazi onargarrien zenbatekoa hau izanen da: zerga-maila apaleko entitate eratzailearen kontabilitateko irabazi garbiak irabazi onargarrien parekoak balira, azken entitate nagusiaren egoera-orri finantzario bateratuetan erabilitako finantza-kontabilitateko arau onargarriaren printzipioen arabera, titular horiei egotzi beharreko zenbatekoa, baldin eta:

a) Entitate nagusiak kontabilitate-arau horren arabera egin balitu egoera-orri finantzario bateratuak (aurrerantzean, "egoera-orri finantzario bateratu hipotetikoak");

b) Entitate nagusia zerga-maila apaleko entitate eratzaileko kontrol-partaidetza horren titularra balitz, eta zerga-maila apaleko entitate eratzailearen sarrera eta gastu guztiak bateratuta baleude entitate nagusiarenekin, integrazio-metodo globalaren bidez, egoera-orri finantzario bateratu hipotetikoetan;

c) Zerga-maila apaleko entitate eratzailearen irabazi onargarri guztiak taldeko entitate ez diren pertsonekin egindako eragiketei esleitzekoak balira; eta

d) Entitate nagusiak zuzenean edo zeharka ez dauzkan partaidetza guztiak taldeko entitate ez diren pertsonek edukiko balituzte.

27. artikulua. Konpentsazioarauak.

6. artikuluko 3. apartatuaren arabera zergadun den entitate nagusi batek zeharkako partaidetza bat badauka zerga-maila apala duen entitate eratzaile batean, tarteko entitate nagusi baten bitartez edo partez partaidetzapekoa den entitate nagusi baten bitartez (errentak sartzeko erregela onargarri bai lotua), zergadun horrek zor duen lehen mailako zerga osagarria murriztuko da, zergaldian, tarteko entitate nagusiak edo partez partaidetzapekoa den entitate nagusiak zor duen zerga osagarriaren zatia (26. artikuluko 2. apartatuaren arabera esleitu beharrekoa) adinako zenbateko batekin.

V. KAPITULUA. BIGARREN MAILAKO ZERGA OSAGARRIA: BEHAR BESTE ZERGAPETU GABEKO ETEKINAK SARTZEKO ERREGELA APLIKATZEA

28. artikulua. Behar beste zergapetu gabeko etekinen erregela aplikatzea.

1. Talde multinazional bateko azken entitate nagusia errentak sartzeko erregela onargarririk aplikatzen ez duen beste jurisdikzio batean kokatuta badago, edo entitate nagusi hori entitate baztertua bada, 6. artikuluko 4. apartatuan aipatzen diren entitate eratzaileek zergaldian ordaindu beharko dute zerga osagarriaren zenbatekoa, Espainiako lurraldeari behar beste zergapetu gabeko etekinen erregela aplikatuta esleitu zaiona, 29. artikuluan xedatutakoari jarraikiz.

2. Talde multinazional bateko azken entitate nagusia zerga-maila apala duen beste jurisdikzio batean kokatuta badago, 6. artikuluko 4. apartatuan aipatzen diren entitate eratzaileek zergaldian ordaindu beharko dute azken entitate nagusi horri eta jurisdikzio berean kokatuak dauden haren entitate eratzaileei) dagokien zerga osagarriaren zenbatekoa, Espainiako lurraldeari esleitu zaiona behar beste zergapetu gabeko etekinen erregela aplikatuta, 29. artikuluan xedatutakoari jarraikiz.

Aurreko paragrafoan xedatutakoa ez da aplikatuko zerga-maila apaleko jurisdikzioan azken entitate nagusia, zergaldian, errentak sartzeko erregela onargarri bati lotuta badago, bai entitateari berari dagokionez bai zerga-maila apaleko jurisdikzio horretan kokatuta dituen entitate eratzaileei dagokienez.

3. Talde multinazional bateko azken entitate nagusia kokatuta badago errentak sartzeko erregelaren eta behar beste zergapetu gabeko etekinen erregelaren aplikazio geroratua hautatu duen estatu kide batean -2022/2523 (EB) Zuzentarauaren 50. artikuluko 1. apartatuan xedatutakoaren arabera-, 6. artikuluko 4. apartatuan aipatzen diren entitate eratzaile zergadunek ordaindu beharko dute artikulu honen 1. eta 2. apartatuetan aipatzen den zerga osagarriaren zenbatekoa, Espainiako lurraldeari behar beste zergapetu gabeko etekinen erregelaz baliatuz esleitu zaiona, 29. artikuluan xedatutakoari jarraikiz, hautu hori indarrean dagoen zergaldietan.

4. Inbertsio-entitate diren entitate eratzaileek ez dute bete beharko artikulu honetan xedatutakoa.

29. artikulua. Behar beste zergapetu gabeko etekinen erregelari lotutako bigarren mailako zerga osagarria kalkulatzea eta esleitzea.

1. Espainiako lurraldeari esleitu beharreko bigarren mailako zerga osagarriaren zenbatekoa kalkulatzeko, behar beste zergapetu gabeko etekinen erregelari lotutako zerga osagarriaren zenbateko osoa, 2. apartatuan xedatutakoaren arabera zehaztua, biderkatu beharko da Espainiako lurraldeko behar beste zergapetu gabeko etekinen erregelaren ehunekoarekin, zeina 5. apartatuan xedatutakoaren arabera zehaztuko baita.

2. Zergaldian behar beste zergapetu gabeko etekinen erregelari lotutako bigarren mailako zerga osagarriaren zenbateko osoa honako hau izanen da: zerga-maila apaleko jurisdikzio batean kokatuta dauden talde multinazionaleko entitate eratzaile guztien zerga osagarrien batura, bakoitzari zergaldian dagokiona 24. artikuluan xedatutakoaren arabera kalkulatuta, 3. eta 4. apartatuetan ezarritako doikuntzak egitea ukatu gabe.

3. Zero izanen da zerga-maila apala duen entitate eratzaile baten zerga osagarria, behar beste zergapetu gabeko etekinen erregelari lotua, baldin eta entitate eratzaile horretan azken entitate nagusiari dagozkion partaidetza guztiak, zergaldi horretan, zuzenean edo zeharka, entitate eratzaile horri dagokionez errentak sartzeko erregela onargarri bat aplikatzera behartuta dagoen entitate nagusi baten edo gehiagoren esku badaude.

4. Aurreko 3. apartatuan xedatutakoa aplikatu beharrekoa ez bada, zerga-maila apala duen entitate eratzaile baten zerga osagarria, behar beste zergapetu gabeko etekinen erregelari lotua, murriztuko da entitate eratzaile horren zerga osagarritik entitate nagusiari esleitzen ahal zaion zatiarekin, baldin eta errentak sartzeko erregela onargarri baten arabera kargatu bada zati hori.

5. Zergaldi bakoitzerako eta talde multinazional bakoitzerako kalkulatuko da Espainiako lurraldeari dagokion behar beste zergapetu gabeko etekinen erregelaren ehunekoa, bi faktore hauek batuz:

i) Espainiako lurraldeko langile-kopuruaren eta behar beste zergapetu gabeko etekinen erregela duten jurisdikzio guztietako langile-kopuruaren arteko zatiduraren ehuneko 50.

ii) Espainiako lurraldeko aktibo materialen balio osoaren eta behar beste zergapetu gabeko etekinen erregela duten jurisdikzio guztietako aktibo materialen balio osoaren arteko zatiduraren ehuneko 50.

Apartatu honetan xedatutakoaren ondorioetarako, honela ulertuko dira kontzeptu hauek:

a) "Espainiako lurraldeko langile-kopurua" Espainiako lurraldean kokatuta dauden talde multinazionaleko entitate eratzaile guztietako langile-kopuru osoa da.

b) "Behar beste zergapetu gabeko etekinen erregela duten jurisdikzio guztietako langile-kopurua", berriz, zergaldian behar beste zergapetu gabeko etekinen erregela onargarri bat indarrean duen jurisdikzio batean kokatuta dauden talde multinazional bateko entitate eratzaile guztietako langile-kopurua da.

c) "Espainiako lurraldeko aktibo materialen balio osoa" Espainiako lurraldean kokatuta dauden talde multinazionaleko entitate eratzaile guztien aktibo materialen kontabilitate-balio garbiaren batura da.

d) "Behar beste zergapetu gabeko etekinen erregela duten jurisdikzio guztietako aktibo materialen balio osoa", berriz, behar beste zergapetu gabeko etekinen erregela onargarri bat zergaldian indarrean duen jurisdikzio batean kokatuta dauden talde multinazional bateko entitate eratzaile guztien aktibo materialen kontabilitate-balio garbiaren batura da.

6. Langile-kopurua honako hau izanen da: lanaldi osoaren lanpostu baliokideak zenbatuta, dagokion jurisdikzioan kokatutako entitate eratzaile guztietako lanpostuetan dauden langileen kopurua, eta kontratista independenteak ere bai, entitate eratzailearen ohiko funtzionamendu-jardueretan parte hartzen badute.

Aktibo materialen artean, dagokion jurisdikzioan kokatutako entitate eratzaile guztien aktibo materialak sartuko dira; eskudirurik edo eskudiruaren baliokide diren ordainbiderik, ordea, ez, ez eta aktibo ukiezin edo finantzariorik ere.

7. 12 artikuluko 1. apartatuaren arabera establezimendu iraunkor baten finantza-kontabilitate bereizian soldata-kostuak sartuta dituzten langileak, 12 artikuluko 2. apartatuan xedatutakoaren arabera doituta, establezimendu iraunkorra kokatuta dagoen jurisdikzioari esleituko zaizkio.

12 artikuluko 1. apartatuaren arabera establezimendu iraunkor baten finantza-kontabilitate bereizian sartuta dauden aktibo materialak, 12 artikuluko 2. apartatuan xedatutakoaren arabera doituta, establezimendu iraunkorra kokatuta dagoen jurisdikzioari esleituko zaizkio.

Establezimendu iraunkor baten jurisdikzioari esleitutako langile-kopurua eta aktibo materialak ez dira kontuan hartuko entitate nagusiaren jurisdikzioko langile-kopurua eta aktibo materialak kalkulatzeko.

Inbertsio-entitate batek dituen langile-kopurua eta aktibo materialen kontabilitate-balio garbia 5. apartatuan ezarritako formulatik bazter utziko dira.

Entitate garden bateko langile-kopurua eta aktibo materialen kontabilitate-balio garbia 5. apartatuan aipatutako formulatik bazter utziko dira, salbu eta establezimendu iraunkor bati esleitzen bazaizkio, edo, establezimendu iraunkorrik ezean, entitate gardena sortu den jurisdikzioan kokatutako entitate eratzaileei esleitzen bazaizkie.

8. Aurreko 5. apartatuan xedatutakoa gorabehera, jurisdikzio batean behar beste zergapetu gabeko etekinen erregelaren ehunekoa zero izanen da talde multinazional batentzat, zergaldian, baldin eta jurisdikzio horri aurreko zergaldi batean esleitutako zerga osagarriaren zenbatekoak, behar beste zergapetu gabeko etekinen erregelari lotutakoak, ez badu ekarri jurisdikzio horretan kokatuta dauden talde multinazional horretako entitate eratzaileek ordaindu behar izatea jurisdikzio horri aurreko zergaldi horretarako esleitutako zerga osagarriaren zenbateko lotua.

Kasu horretan, zergaldi batean behar beste zergapetu gabeko etekinen erregelaren ehunekoa zero den jurisdikzio batean kokatuta dagoen talde multinazionalaren entitate eratzaileen langile-kopurua eta aktibo materialen kontabilitate-balio garbia behar beste zergapetu gabeko etekinen erregelari lotutako zerga osagarriaren zenbateko osoaren esleitze-formulako elementuetatik bazter utziko dira, zergaldi horretan talde multinazionalari dagokionez.

9. Artikulu honen 8. apartatua ez zaio aplikatuko zergaldiari, baldin eta zergaldi horretan behar beste zergapetu gabeko etekinen erregela onargarri bat indarrean duten jurisdikzio guztientzat erregela horren ehunekoa zero bada talde multinazional batentzat, zergaldi horretan.

10. Artikulu honen aurreko apartatuetan xedatutakoaren arabera Espainiako lurraldeari esleitutako zerga osagarriaren zenbatekoa 6. artikuluko 4. apartatuan aipatzen diren entitate eratzaileei esleituko zaie, baldin eta entitate eratzaileak ez badira titulizazio-entitate edo -mekanismoak (25 artikuluko 4. apartatuan definituak), eta, horretarako, 5. apartatuan adierazitako formula erabiliko da. Formula horretan, zenbakitzailea entitate eratzaile bakoitzeko langile-kopurua eta aktibo materialen balio osoa izanen da, eta izendatzailea, berriz, aipatutako entitate eratzaile guztietako langile kopurua eta aktiboen balio osoa.

Aurrekoa gorabehera, Espainiako lurraldean kokatuta dauden talde multinazionaleko entitate guztiak titulizazio-entitate edo -mekanismoak badira, apartatu honetan ezarritako esleipena 5. apartatuan erabilitako formularen bidez gauzatuko da. Formula horretan, zenbakitzailea entitate eratzaile bakoitzeko langile-kopurua eta aktibo materialen balio osoa izanen da, eta izendatzailea, berriz, aipatutako entitate eratzaile guztietako langile-kopurua eta aktiboen balio osoa.

VI. KAPITULUA. ZERGA OSAGARRI GEHIGARRIA

30. artikulua. Zerga osagarri gehigarria.

1. Bat etorriz 10. artikuluko 7. apartatuarekin, 18. artikuluko 7. apartatuarekin, 21. artikuluko 1. eta 4. apartatuekin, manu honen 5. apartatuarekin eta 42. artikuluko 4. apartatuarekin, zerga estalien edo irabazi edo galera onargarrien doikuntza baten ondorioz berriz kalkulatu behar bada talde multinazionalaren edo talde nazional handiaren zerga-tasa efektiboa eta zerga osagarria aurreko zergaldi baterako, 14. artikuluan eta VII. tituluaren II., III., IV. eta V. kapituluetan ezarritako arauen arabera kalkulatuko dira zerga-tasa efektiboa eta zerga osagarria aurreko zergaldi horretarako. Kalkulu berriaren ondorioz zerga osagarrian egiten den gehikuntza zerga osagarri gehigarritzat joko da, 24. artikuluko 4. apartatuaren ondorioetarako, kalkulu berria egiten den zergaldian.

2. Zerga osagarri gehigarri bat sortzen denean eta jurisdikzioan irabazi onargarri garbirik erregistratzen ez denean zergaldian, jurisdikzio horretan kokatuta dagoen entitate eratzaile bakoitzaren irabazi onargarriak honela zehaztuko dira: entitate eratzaile horiei 24. artikuluko 5. eta 6. apartatuekin bat etorrita esleitutako zerga osagarri gehigarria zati gutxieneko zerga-tasa.

3. 17. artikuluko 5. apartatuarekin bat etorrita zerga osagarri gehigarri bat zor denean, jurisdikzioan kokatuta dagoen entitate eratzaile bakoitzaren irabazi onargarriak honela zehaztuko dira: entitate eratzaile horri esleitutako zerga osagarri gehigarria zati gutxieneko zerga-tasa. Entitate eratzaile bakoitzari esleituko zaio, eragiketa honetatik ateratzen den ehunekoa kontuan hartuta: entitate eratzailearen irabazi edo galera onargarriak bider gutxieneko zerga-tasa; biderkadura hori, entitate eratzailearen zerga estali doituen zenbatekoarekin minoratuta, zati entitate eratzaile guztien irabazi edo galera onargarrien eta gutxieneko zerga-tasaren arteko biderkadura, biderkadura hori entitate eratzaile guztien zerga estali doituen zenbatekoarekin minoratuta.

Zerga osagarri gehigarria soilik esleituko zaie zerga estali doituen zenbateko negatiboa eta biderkadura hau baino txikiagoa erregistratzen duten entitate eratzaileei: entitate eratzaile horien irabazi edo galera onargarriak bider gutxieneko zerga-tasa.

4. Entitate eratzaile bati zerga osagarri gehigarri bat esleitzen zaionean artikulu honi eta 24. artikuluko 5. eta 6. artikuluei jarraikiz, entitate eratzaile hori zerga-maila apaleko entitate eratzailetzat hartuko da foru lege honen ondorioetarako.

5. Beste jurisdikzio bateko zerga osagarri nazional onargarriaren zenbatekoa -osoa edo partziala- galdagarria zen zergaldia bukatu ondorengo lau zergaldietan ordaindu ez bada, ordaindu gabeko zergaren zenbatekoa gehituko zaio 24. artikuluan ezarritakoaren arabera zehaztutako zerga osagarriaren kuotari, eta, 2022/2523 (EB) Zuzentarauaren 11 artikuluko 3. apartatuan xedatutakoaren arabera, zenbateko hori ez du bilduko zerga galdagarria zen jurisdikzioak.

VIII. TITULUA. ZERGALDIA ETA ZERGAREN SORTZAPENA

31. artikulua. Zergaldia.

Talde multinazional bateko edo talde nazional handi bateko entitate eratzaileen zerga osagarriaren zergaldia bat etorriko da talde multinazionalaren edo talde nazional handiaren azken entitate nagusiaren ekitaldi ekonomikoarekin, egoera-orri finantzario bateratuak egiten baditu, edo, bestela, bat etorriko da urte naturalarekin.

32. artikulua. Zergaren sortzapena.

Zergaldiaren azken egunean sortuko da zerga osagarria.

IX. TITULUA. ZERGA OSAGARRIAREN GALDAGARRITASUNIK EZA

33. artikulua. "De minimis" bazterketa.

1. 14., 22., 23., 24., 30. eta 46. artikuluetan xedatutakoa ukatu gabe, entitate eratzaile aitortzaileak artikulu honetan ezarritako aukera baliatzen badu, jurisdikzio batean kokatutako entitate eratzaileei dagokien zerga osagarriaren zenbatekoa zero izanen da honako baldintza hauek betetzen diren zergaldian:

a) Jurisdikzio horretan kokatutako entitate eratzaileen sarrera onargarrien batezbestekoa 10 milioi eurotik beherakoa izatea; eta

b) Jurisdikzio horretan kokatuta dauden entitate eratzaile guztien irabazi edo galera onargarrien batezbestekoak milioi 1 eurotik beherako galera edo etekina eragitea.

Apartatu honetan ezarritako aukera urtero baliatuko da, 49 artikuluko 2. apartatuan xedatutakoari jarraikiz.

2. Aurreko 1. apartatuan aipatutako sarrera onargarrien batezbestekoa eta irabazi edo galera onargarrien batezbestekoa kalkulatzeko, kontuan hartuko dira abian den zergaldia eta aurreko bi zergaldiak.

Aurreko bi zergaldietako batean ez bada egon jurisdikzioan kokatutako entitate eratzailerik, sarrera onargarririk edo galera onargarririk duenik, zergaldi hori ez da sartuko jurisdikzio horretako sarrera onargarrien zenbatekoaren batezbestekoaren kalkuluan edo irabazi edo galera onargarrien batezbestekoaren kalkuluan.

3. Entitate eratzaileei jurisdikzio batean eta zergaldi batean dagozkien sarrera onargarrien zenbatekoa izanen da jurisdikzio horretan kokatutako entitate eratzaile bakoitzaren sarreren zenbateko garbiaren batura, 9. artikulutik 13. artikulura bitartekoetan xedatutakoaren arabera dagozkion doikuntzak egin ondoren.

4. Zergaldi horretan jurisdikzioan kokatuta dauden entitate eratzaileen irabazi edo galera onargarriak izanen dira jurisdikzio horretako irabazi edo galera onargarri garbiak, 22. artikuluko 3. apartatuan xedatutakoaren arabera kalkulatuak.

5. Artikulu honetan xedatutakoa ez zaie aplikatuko egoitzarik gabeko entitate eratzaileei, ez eta inbertsio-entitateei ere. Entitate horien sarrera onargarrien eta irabazi edo galera onargarrien zenbatekoa ez da kontuan hartuko artikulu honetan ezarritako "de minimis" bazterketa kalkulatzeko.

34. artikulua. Zerga osagarriaren galdagarritasunik eza.

1. Beste jurisdikzio batean zerga osagarri nazional bati lotuta dituzten entitate eratzaileei dagokienez, 6. artikuluko 3. apartatuan adierazitako zergadunei dagokien lehen mailako zerga osagarria zero izanen da zergaldian, baldin eta jurisdikzio horrek zerga osagarri nazional onargarri bat eskatzen badu eta zerga horrek bermatzen badu zergari lotuta dauden entitate eratzaileen benetako zerga-mailak betetzen dituela portu seguruei buruzko nazioarteko akordio onargarri baten baldintzak.

2. Portu seguruei buruzko nazioarteko akordio onargarri bat duen jurisdikzio batean kokatuta dauden entitate eratzaileei dagokienez, 6. artikuluan adierazitako zergadunei dagokien lehen mailako zerga osagarria zero izanen da zergaldian, nazioarteko akordio horretan ezarritako baldintzetan.

3. Aurreko 1. eta 2. apartatuetan xedatutakoaren ondorioetarako, "portu seguruei buruzko nazioarteko akordio onargarria" izanen da jurisdikzio guztiek onartu dituzten nazioarteko arau eta baldintzen multzo bat, zeinak ELGAren eredu-arauen aplikazio-eremuan sartutako taldeei bermatzen baitie jurisdikzio baterako portu seguru bat edo gehiago baliatzeko aukera.

X. TITULUA. ARAUBIDE BEREZIAK

I. KAPITULUA. ENPRESAK BERREGITURATZEA ETA BATERAKO NEGOZIOAK

35. artikulua. Berregituratzeko, bat egiteko eta zatitzeko eragiketen aplikazioatalasea zehaztea.

1. Artikulu honetan xedatutakoaren ondorioetarako, honela ulertzen dira:

a) "Bat-egitea": ondoren zehazten dena gertatzea dakarren edozein erabaki:

i) Bi talde bereizitako edo gehiagotako entitate guztiak edo gehienak kontrol komunaren menpe jartzea eta, hala, talde konbinatu bateko entitateak izatea; edo

ii) Ezein taldetakoa ez den entitate bat kontrol komunaren menpe jartzea beste entitate edo talde batekin, eta, hala, horiek guztiak talde konbinatu bateko entitateak izatea.

b) "Zatitzea": talde bereko entitateak azken entitate nagusi berak dagoeneko bateratuta ez dituen bi taldetan edo gehiagotan banatzea dakarren edozein erabaki.

2. Bi talde edo gehiagoren bat-egitetik sortzen diren taldeek 6. artikuluko 1. apartatuan aipatzen den negozio-zifraren zenbateko garbia lortu dutela ulertuko da bat egindako taldeen negozio-zifraren zenbateko garbiaren -haien egoera-orri finantzario bateratuetako bakoitzean sartuta dagoena- batura 750 milioi eurokoa edo hortik gorakoa denean bat-egitea gauzatzen den zergaldiaren aurreko azken lau zergaldietako bitan.

3. Talde batekoa ez den entitate batek (aurrerantzean, "entitate eskuratua") entitate edo talde batekin bat egiten badu (aurrerantzean, "entitate eskuratzailea"), eta entitate eskuratuak edo entitate eskuratzaileak ez badute egoera-orri finantzario bateraturik egin bat egiteko eragiketa egiten den zergaldiaren aurre-aurreko azken lau zergaldietako bakar batean ere, bat egiteko eragiketa horretatik sortzen den taldea zergaren aplikazio-eremuan sartuko da zergaldi horretan, baldin eta aldi horretako egoera-orri finantzario bakoitzean edo egoera-orri finantzario bateratuetan sartutako negozio-zifraren zenbateko garbiaren batura 750 milioi euro edo hortik gorakoa bada.

4. Zergaren aplikazio-eremuko entitateen talde bat bi taldetan edo gehiagotan zatitzen bada, zatitutako talde bakoitzak aplikazio-eremukoa izaten jarraitzen duela ulertuko da baldintza hauetako bat betetzen bada:

i) Zatitzeko eragiketa egin ondoren bukatzen den lehen zergaldian, zatitutako taldearen negozio-zifraren zenbateko garbia 750 milioi euro edo hortik gorakoa bada.

ii) Zatitzeko eragiketa egin ondoren bukatzen den bigarren zergalditik laugarrenera bitartekoetan, zatitutako taldearen negozio-zifraren zenbateko garbia 750 milioi euro edo hortik gorakoa bada gutxienez hiru zergaldi horietako bitan.

36. artikulua. Entitate eratzaileak talde multinazional batean edo talde nazional handi batean sartzea edo taldetik bazter uztea.

1. Entitate eratzaile bat talde multinazional bateko edo talde nazional handi bateko kide bihurtzen denean, edo, entitate horretako partaidetza zuzen edo zeharkako baten eskualdaketaren ondorioz, talde horretakoa izateari uzten dionean, edo eskuratzea egiten den zergaldian talde berri bateko azken entitate nagusi bihurtzen denean, honako arau hauek aplikatuko dira entitate eratzailearen zerga-tasa efektiboa eta zerga osagarria kalkulatzeko:

a) Entitate eratzailea sartzen den talde multinazional edo talde nazional handi horren zatitzat hartuko da, baldin eta, eskuratzea egin den zergaldian, azken entitate nagusiaren egoera-orri finantzario bateratuetan integrazio globaleko metodoaren bidez bateratzen bada.

b) Eskuratzea egin den zergaldian, azken entitate nagusiaren egoera-orri finantzario bateratuetan sartuta dauden entitate eratzaile eskuratuaren kontabilitate-emaitza eta zerga estali doituak baino ez dira kontuan hartuko.

c) Eskuratzea egin den zergaldian zein hurrengoetan, entitate eskuratuaren irabazi edo galera onargarriak eta zerga estali doituak bere aktibo eta pasiboen kontabilitate-balioan oinarrituko dira.

d) Substantzia ekonomikoari lotutako errenta-bazterketa aplikatzeko, azken entitate nagusiaren egoera-orri finantzario bateratuetan agertzen diren soldata-kostuak baino ez dira kontuan hartuko, eta entitate eratzailearen aktibo material onargarrien kontabilitate-balioa entitate horrek eskuratze-aldian talde multinazionaleko edo nazionaleko kide izandako epearen proportzioan doituko da, hala badagokio.

e) Talde eskuratzaileak kontuan hartuko ditu entitate eratzailearen zerga geroratuagatiko aktiboak eta pasiboak, salbu eta foru lege honetan ezarritako galerak hautatzeko sistemari atxiki zaizkion galerei esleitzen ahal zaizkion zerga geroratuagatiko aktiboak, aktibo eta pasibo horiek kontuan hartuko dituelako sortu zirenean entitate hori taldeko kide izan balitz bezala.

f) Entitate eratzailearen zerga geroratuagatiko pasiboak, zerga estaliengatiko doikuntzaren zenbateko osoan aldez aurretik sartu badira, talde eskualdatzaileak itzulitakotzat joko dira, eta, aldi berean, ulertuko da entitate eratzaile hori eskuratu den zergaldian sortu direla talde eskuratzailean, eta berriz hasiko da zenbatzen 18. artikuluko 7. apartatuan itzulketarako ezarritako 5 urteko epea.

Aurreko paragrafoan adierazitakoa ez zaie aplikatuko 18. artikuluko 8. apartatuko zerga geroratuagatiko pasiboei, baldin eta ez badaude lotuta itzulketari; hala bada, pasiboak minoratuko dira zenbatekoa berreskuratzen den zergaldiko zerga estalien zenbatekoarekin.

g) Entitate eratzailea aldi berean bi talderen edo gehiagoren azken entitate nagusia eta mendekoa bada eskuratzearen zergaldian, errentak sartzeko erregela bereizita aplikatuko da, talde horietako bakoitzean zerga-maila apala duten entitateei esleitzen ahal zaien zerga osagarrian duen partaidetzaren proportzioan.

2. Aurreko 1. apartatuan xedatutakoa gorabehera, entitate eratzaile batean kontrol-partaidetza bat eskuratzea edo eskualdatzea ondare-elementuen eskuratzetzat edo eskualdaketatzat hartuko da, betiere entitate hori kokatuta dagoen jurisdikzioak, edo, fiskalki gardena den entitate baten kasuan, aktiboak kokatuta dauden jurisdikzioak bi eragiketak baliokidetzat jotzen baditu.

Horrez gainera, jurisdikzio horrek zerga estali bat ezarri behar dio eskualdatzaileari, saltzaileak jasotako kontraprestazioaren edo aktibo eta pasiboen arrazoizko balioaren eta eskuratutako aktibo eta pasiboei foru lege honen ondorioetarako dagokien balio fiskalaren arteko aldeagatik.

37. artikulua. Ondareelementuen eskualdaketa.

1. Artikulu honen ondorioetarako, honela ulertzen dira:

a) "Berrantolaketa": bat egiteko, zatitzeko edo likidatzeko eragiketa baten edo antzeko transakzio baten esparruan, ondare-elementuak eraldatzea edo eskualdatzea, baldin eta inguruabar hauek gertatzen badira:

i) Eskualdaketaren ondoriozko kontraprestazioa, osorik edo zati handienean, entitate eratzaile eskuratzaileak edo hari lotutako pertsona edo entitate batek jaulkitako partaidetzek osatuta egotea, edo, likidazioaren kasuan, eskuratutako entitatearen partaidetzen baliogabetzeak.

Aurreko paragrafoan xedatutakoa ez da aplikatuko partaidetzen jaulkipenak garrantzi ekonomikorik ez duenean.

ii) Aktibo horiei dagokienez, entitate eratzaile eskualdatzaileak aktibo horiei dagokienez duen irabazia edo galera ez egotea guztiz edo zati batean zergapetuta.

iii) Entitate eratzaile eskuratzailea kokatuta dagoen jurisdikzioak behartzea entitatea eskualdaketa edo eskuratzea egin ondorengo zerga-errentak kalkulatzera, entitate eratzaile eskualdatzailearen aktiboen balio fiskaletik abiatuta, eskualdaketaren edo eskuratzearen ondoriozko edozein irabazi edo galera ez-onargarriren zenbatekoaren arabera doituta, hala badagokio, foru lege honetan ezarritako baldintzetan.

b) "Irabazi edo galera ez-onargarria": bere jurisdikzioan tributazioaren mende dagoen berrantolatzeko eragiketa baten ondorioz entitate eratzaile eskualdatzaileak izandako irabaziaren edo galeraren eta berrantolatzeko eragiketaren ondoriozko kontabilitate-irabaziaren edo -galeraren arteko txikiena.

2. Entitate eratzaile eskualdatzaileak ondare-elementuen eskualdaketaren ondoriozko irabazia edo galera sartuko du bere irabazi edo galera onargarrien kalkuluan.

Bestalde, entitate eratzaile eskuratzaileak eskuratutako ondare-elementuen kontabilitate-baliotik abiatuta zehaztuko ditu bere irabazi edo galera onargarriak. Kontabilitate-balio hori azken entitate nagusiak egoera-orri finantzario bateratuak formulatzeko aplikatutako kontabilitate-arauen arabera zehaztuko da.

3. Aurreko 2. apartatuan xedatutakoa gorabehera, ondare-elementuak berrantolatzeko eragiketa baten barnean eskualdatzen edo eskuratzen direnean, honako erregela hauek aplikatuko dira:

a) Entitate eratzaile eskualdatzaileak ez du sartuko ondare-elementuen eskualdaketaren ondoriozko irabazi edo galera onargarria bere irabazi edo galera onargarrien kalkuluan.

b) Entitate eratzaile eskuratzaileak bere irabazi edo galera onargarriak zehaztuko ditu eskuratutako ondare-elementuek eskualdaketaren unean entitate eskualdatzailean zuten kontabilitate-baliotik abiatuta.

4. Hala ere, 2. eta 3. apartatuetan xedatutakoa ez da aplikatuko ondare-elementuak eskualdatu edo eskuratzen badira berrantolatzeko eragiketa baten barnean, eta entitate eskualdatzailearentzat irabazi edo galera ez-onargarria ekartzen badu. Kasu horretan, honako erregela hauek aplikatuko dira:

a) Entitate eskualdatzaileak eskualdaketak eragindako irabazia edo galera bere irabazi edo galera onargarrien kalkuluan sartuko du, irabazi edo galera ez-onargarriaren zenbatekoraino.

b) Entitate eratzaile eskuratzaileak ondare-elementuek entitate eskualdatzailean zuten kontabilitate-baliotik abiatuta zehaztuko ditu eskuratzearen ondoko irabazi edo galera onargarriak, entitate eratzaile eskuratzailearen tokiko zerga-arauen arabera doituta, irabazi edo galera ez-onargarria kontuan hartzeko.

5. Jurisdikzio batek talde bateko entitate eratzaile bati galdatzen badio edo aukera ematen badio eskualdaketa batean ondare-elementuen balioa arrazoizko baliora doitzeko, ondorio fiskaletarako, entitate eratzaileak honako hauek egiten ahalko ditu:

a) Irabazi edo galera onargarrien kalkuluan sartzen ahalko du ondare-elementuetako bakoitzari esleitzen ahal zaizkion irabazien edo galeren zenbatekoa. Zenbateko hori honako honen emaitza izanen da:

i) Eskualdaketa edo eraldaketa hori egin ondoren ondare-elementuak duen arrazoizko balioaren eta eskualdaketa edo eraldaketa egin aurretik zuen kontabilitate-balioaren arteko aldea.

ii) Minoratu edo gehituko da ondare-elementua eskualdatzearen edo eraldatzearen ondoriozko irabazi edo galera ez-onargarriarekin.

b) Ondare-elementuak eskualdatu edo eraldatu ondoren kontabilitate-ondorioetarako duen arrazoizko balioa erabiltzen ahalko du eskualdaketaren edo eraldaketaren ondotik bukatutako zergaldietako irabazi edo galera onargarriak kalkulatzeko.

c) Entitate eratzailearen irabazi edo galera onargarrietan a) letran xedatutakoa aplikatzearen ondoriozko guztizko zenbateko garbia sartzen ahalko du:

i) Bai eskualdaketa edo eraldaketa gertatzen den zergaldian.

ii) Bai bostenetan, eskualdaketa edo eraldaketa egiten den zergalditik aurrera eta hurrengo lau zergaldietan, salbu eta entitate eratzailea taldetik ateratzen bada; kasu horretan, gainerako zenbatekoa taldetik ateratzen den zergaldian sartuko da oso-osorik.

38. artikulua. Baterako negozioak.

1. Artikulu honetan ezarritakoari dagokionez, honela ulertuko dira:

a) "Baterako negozioa": edozein entitate, emaitza finantzarioak azken entitate nagusiaren egoera-orri finantzario bateratuetan baliokidetzan jartzeko metodoaren bidez jasotzen dituena, baldin eta azken entitate horrek gutxienez % 50eko partaidetza badu, zuzenean edo zeharka.

Honako hauek, berriz, ez dira joko baterako negoziotzat:

i) Errentak sartzeko erregela aplikatu behar duen talde multinazional bateko edo talde nazional handi bateko azken entitate nagusia.

ii) 7. artikuluaren arabera baztertutzat jotzen den entitate bat.

iii) 7. artikuluan ezarritakoaren arabera entitate baztertu baten zuzeneko partaidetzapeko entitate bat, baldin eta, gutxienez, baldintza hauetako bat betetzen bada:

- Aktiboak kudeatzeko edo bere inbertitzaileen onurarako funtsak inbertitzeko soilik edo ia soilik jardutea.

- Entitate baztertuak egindakoen jarduera osagarriak egitea.

- Bere sarrera guztiak edo ia guztiak irabazi edo galera onargarrien zenbaketatik baztertuta egotea, 10. artikuluko 2. apartatuko b) eta c) letretan ezarritakoaren arabera.

iv) Baztertutako entitateez soilik osatutako talde multinazional baten edo talde nazional handi baten partaidetzapeko entitate bat.

v) Baterako negozio baten filial bat.

b) "Baterako negozio baten filiala":

i) Entitate bat, aktiboak, pasiboak, sarrerak, gastuak eta diru-fluxuak baterako negozio baten egoera-orri finantzario bateratuetan sartzen dituena, finantza-kontabilitateko arau onargarri baten arabera, edo baterako negozioaren egoera-orri finantzario bateratuetan sartuko liratekeenak, baterako negozioak finantza-kontabilitateko arau onargarri baten arabera formulatu beharko balitu.

ii) Establezimendu iraunkor bat, zeinaren entitate nagusia baterako negozio bat edo aurreko i) letran definitutako entitate bat baita.

c) "Baterako negozioaren taldea": baterako negozio batek eta haren filialek osatutakoa.

2. Entitate nagusi batek baterako negozio batean edo baterako negozio baten filial batean zuzeneko edo zeharkako partaidetza duenean, entitate nagusi horrek errentak sartzeko erregela aplikatuko du, 6. artikuluko 3. apartatuan eta 26. eta 27. artikuluetan ezarritako moduan, baterako negozio horren edo haren filialaren zerga osagarritik esleitzen ahal zaion zatiari dagokionez.

3. Baterako negozioaren taldearen zerga osagarria kalkulatzeko, zerga estaliei eta galera eta irabazi onargarriei buruzko erregela orokorrak aplikatuko dira, talde multinazional edo talde nazional handi ezberdin bateko entitate eratzaileak izanen balira bezala eta baterako negozioa talde horretako azken entitate nagusia balitz bezala.

4. Baterako negozioaren taldeak zor duen zerga osagarria minoratuko da baterako negozioaren entitate nagusi bakoitzari esleitzen ahal zaion zerga osagarriaren zatiarekin, artikulu honen 2. apartatuan xedatutakoarekin bat etorrita.

Baterako negozioaren taldearen zerga osagarriaren soberakinak, halakorik badago, bigarren mailako zerga osagarriaren zenbateko osoa handituko du, 29. artikuluko 2. apartatuan xedatutakoarekin bat etorrita.

Apartatu honen ondorioetarako, "baterako negozioaren taldeak zor duen zerga osagarria" baterako negozioaren taldearen zerga osagarritik entitate nagusiari esleitzen ahal zaion zatia izanen da.

39. artikulua. Entitate nagusi ugari dituzten talde multinazionalak.

1. Artikulu honetan xedatutakoaren ondorioetarako, honela ulertuko dira:

a) "Entitate nagusi ugari dituen talde multinazionala edo talde nazional handia": bi talde multinazional edo nazional edo gehiago, zeinetan azken entitate nagusiek akordio bat sinatzen duten, hau da, egitura zatiezin bat edo kotizazio bikoitzeko akordio bat. Akordio horrek gutxienez talde konbinatuaren entitate edo establezimendu iraunkor bat jaso behar du, kokatuta egon beharko duena talde konbinatuaren gainerako entitateak kokatuta dauden jurisdikzioa ez den batean.

b) "Egitura zatiezina": talde desberdinetako azken entitate nagusiak diren bi entitatek edo gehiagok sinatutako akordioa, honako baldintza hauek betetzen dituena:

i) Talde desberdinetako azken entitate nagusien partaidetzen ehuneko 50, gutxienez, elkarren artean konbinatzen dira, eta ezin dira modu independentean eskualdatu edo negoziatu, jabetza-moduagatik, eskualdaketari ezarritako mugengatik edo beste baldintza batzuengatik, eta, kotizatuz gero, prezio bakarrean kotizatzen dute.

ii) Azken entitate nagusia den entitateetako batek egoera-orri finantzario bateratuak egiten ditu, non ukitutako taldeetako entitate guztien aktiboak, sarrerak, gastuak eta diru-fluxuak batera aurkezten baitira unitate ekonomiko bakar gisa; egoera-orri horiek, aplikatzekoa den araudiaren arabera, kontu-auditore baten edo auditoretza-sozietate independente baten auditoretzapean egon behar dute.

c) "Kotizazio bikoitzeko akordioa": talde desberdinetako bi azken entitate nagusik edo gehiagok sinatutako akordioa. Haren bidez:

i) Azken entitate nagusiek erabakitzen dute beren jarduerak kontratu bidez soilik konbinatzea.

ii) Itundutakoarekin bat, azken entitate nagusiek dibidenduak banatuko dituzte eta, hala badagokio, ratio finko batean oinarrituta likidatuko dira.

iii) Azken entitate nagusien jarduerak jarduera ekonomiko bakar gisa kudeatuko dira, itun edo kontratu bidez, eta haietako bakoitzak bere nortasun juridikoari eutsiko dio.

iv) Akordioa sinatzen duten azken entitate nagusien partaidetzak modu independentean negoziatu edo eskualdatuko dira kapital-merkatuetan.

v) Azken entitate nagusiek egoera-orri finantzario bateratuak eginen dituzte, non ukitutako taldeetako entitate guztien aktiboak, sarrerak, gastuak eta diru-fluxuak batera aurkezten baitira unitate ekonomiko bakar gisa; egoera-orri horiek, aplikatzekoa den araudiaren arabera, kontu-auditore edo auditoretza-sozietate independente baten auditoretzapean egon beharko dute.

2. Bi enpresa-taldetako edo gehiagoko entitateak eta entitate eratzaileak entitate nagusi ugari dituen talde multinazional bateko edo talde nazional handi bateko kide direnean, entitate nagusi ugari dituen talde multinazional bateko edo talde nazional handi bateko kidetzat hartuko dira entitate horiek.

Foru lege honetan xedatutakoaren arabera entitate baztertutzat hartzen ez den entitate bat entitate eratzailetzat hartuko da, baldin eta entitate nagusi ugari dituen talde multinazionalaren edo talde nazional handiaren egoera-orri finantzario bateratuetan integrazio globaleko metodoaren bidez sartuta badago edo entitate nagusi ugari dituen talde multinazional edo nazional horretako entitateek kontrolatzen badute.

3. Entitate nagusi ugari dituen talde multinazionalaren edo nazionalaren egoera-orri finantzario bateratuak izanen dira 1. apartatuan ezarritako egitura zatiezinaren edo kotizazio bikoitzeko akordioaren definizioetan aipatzen diren egoera-orri finantzario bateratu konbinatuak, azken entitate nagusiaren kontabilitate-arautzat hartzen den finantza-kontabilitateko arau onargarri baten arabera egindakoak.

4. Entitate nagusi ugari dituen talde multinazionala edo nazionala osatzen duten taldeetako bakoitzaren azken entitate nagusiak, guzti-guztiak, talde horretako azken entitate nagusitzat hartuko dira.

Foru lege hau entitate nagusi ugari dituen talde multinazional bati edo tamaina handiko talde nazional bati aplikatzean, azken entitate nagusi bati buruzko erreferentzia oro aplikatuko da, dagokionaren arabera, azken entitate nagusi ugari horiei buruzko erreferentziak balira bezala.

5. Entitate nagusi ugari dituen talde multinazional batek edo talde nazional handi batek Espainiako lurraldean kokatuta dituen entitate nagusiek, azken entitate nagusiak barne, errentak sartzeko erregela aplikatuko dute, foru lege honetan xedatutakoarekin bat etorrita, zerga-maila apala duten entitate eratzaileen zerga osagarritik esleitzen ahal zaien zatiari dagokionez.

6. Entitate nagusi ugariko talde multinazionalak edo talde nazional handiak Espainiako lurraldean kokatuta dituen entitate eratzaileek behar beste zergapetu gabeko etekinen erregela aplikatuko dute, foru lege honekin bat etorrita, kontuan hartuta entitate nagusi ugari dituen talde multinazionalaren edo talde nazional handiaren barnean zerga-maila apala duen entitate eratzaile bakoitzaren zerga osagarria.

7. Entitate nagusi ugari dituen talde multinazionaleko edo talde nazional handiko azken entitate nagusiek zerga osagarriaren aitorpen informatzailea aurkeztu beharko dute, salbu eta entitate nagusi horiek entitate aitortzaile bakarra izendatzen badute.

Aurreko paragrafoan aipatzen den aitorpenak entitate nagusi ugari dituen talde multinazionala edo nazionala osatzen duten taldeetako bakoitzari buruzko informazioa jaso beharko du.

II. KAPITULUA. NEUTRALTASUN- ETA BANAKETA-ARAUBIDEAK

40. artikulua. Azken entitate nagusi gardena.

1. Artikulu honetan ezarritako xedapenak talde multinazional bateko edo talde nazional handi bateko azken entitate nagusiei aplikatuko zaizkie, talde hori egoiliarra izan zein ez izan, baldin eta fiskalki gardenak badira 5. artikuluko 18. apartatuan ezarritakoaren arabera.

2. Aurreko 1. apartatuan ezarritako entitateen irabazi onargarriak murriztuko dira zergaldian, entitate horietako partaidetzen titularrei esleitzen edo egozten ahal zaizkien irabazi onargarrien zenbatekoarekin, betiere honako inguruabar hauetakoren bat gertatzen bada:

a) Titular horiek, murrizketa egiten den zergaldia bukatu eta hurrengo 12 hilabeteen barruan bukatzen den zergaldian, gutxieneko zerga-tasaren adinako tasa nominala ordaindu behar badute, gutxienez ere.

b) Zentzuzkoa bada espero izatea, murrizketa egiten den zergaldia bukatu eta hurrengo 12 hilabeteen barrenean bukatzen den zergaldian, azken entitate nagusiaren zerga estali doituen eta partaidetzen titularrak aipatutako irabazien gainean ordaindutako zergen zenbateko agregatua izatea irabazi horiek gutxieneko zerga-tasarekin biderkatuta ateratzen den zenbatekoaren berdina edo zenbateko hori baino handiagoa.

3. Aurreko 1. apartatuan ezarritako entitateen irabazi onargarriak murriztuko dira zergaldian, entitate horietako partaidetzen titularrei esleitzen edo egozten ahal zaizkien irabazi onargarrien zenbatekoarekin, betiere partaide horiek honako hauek badira:

a) Egoitza fiskala azken entitate nagusia kokatuta dagoen jurisdikzio berean duen pertsona fisikoa, baldin eta entitatean % 5eko edo gutxiagoko zuzeneko partaidetza badu; edo

b) 5. artikuluan definitutako entitate publiko bat, nazioarteko antolakunde bat, irabazi-asmorik gabeko erakunde bat edo pentsio-funts bat, egoitza fiskala azken entitate nagusia kokatuta dagoen jurisdikzioan duena, baldin eta entitatean ehuneko 5eko edo gutxiagoko zuzeneko partaidetza badu.

4. Artikulu honen 1. apartatuan aipatutako entitateen galera onargarriak murriztuko dira entitateko partaidetzaren titularrei esleitu zaizkien galeren zenbatekoarekin. Ulertuko da aurrekoak ez duela ukatzen 19. artikuluan ezarritakoa.

Aurrekoa ez da aplikatuko entitateko partaidetzaren titularrak ez badu baimenik galera horiek zergapetze pertsonalean konpentsatzeko.

5. 1. apartatuan ezarritako entitateen zerga estaliak murriztuko dira 2. eta 3. apartatuekin bat etorrita irabazi onargarriak murriztu diren proportzio berean.

6. 2. apartatutik 5. apartatura bitartekoetan xedatutakoa establezimendu iraunkorrei aplikatuko zaie honako kasu hauetan:

a) 1. apartatuan ezarritako entitateek beren jarduera osorik edo zati batean establezimendu iraunkor horren bidez egiten dutenean.

b) Entitate garden batek (5. artikuluko 18. apartatuaren arabera halakotzat jotzen dena) bere jarduera osorik edo zati batean establezimendu iraunkor horren bidez egiten duenean, betiere entitate horren partaidetza osoa 1. apartatuan aipatutako entitateetako batek badu, zuzenean edo fiskalki gardenak diren entitateen kate baten bitartez.

41. artikulua. Dibidenduen kengarritasunaraubideari lotutako azken entitate nagusia.

1. Artikulu honen ondorioetarako, honela ulertuko dira:

a) "Dibidenduen kengarritasun-araubidea": entitate baten titularren errentei zerga-maila bakarra aplikatzen dien zerga-araubidea, entitatearen errentetatik kenduta edo bazter utzita titularrei banatutako etekinak, edo kooperatiba-entitate bat zergak ordaintzetik salbuetsita;

b) "Dibidendu kengarria": dibidenduen kengarritasun-araubideari lotutako entitate eratzaile bati dagokionez:

i) Entitate eratzaileko partaidetzaren titularrari egindako etekin banaketa, entitate eratzailearen zerga-errentatik ken daitekeena, entitate eratzailea kokatuta dagoen jurisdikzioko legeriaren arabera; edo

ii) Kooperatiba bateko bazkide bati egindako itzulkina; eta

c) "Kooperatiba": bere bazkideen kontura ondasunak edo zerbitzuak kolektiboki merkaturatzen edo eskuratzen dituen entitatea, kokatuta dagoen jurisdikzioan zerga-araubide bati lotuta dagoena. Araubide horrek bazkideek kooperatibaren bidez saldu edo eskuratutako ondasun edo zerbitzuekiko neutraltasun fiskala bermatu behar du.

2. Artikulu honetan ezarritako xedapenak talde multinazional bateko edo talde nazional handi bateko azken entitate nagusiei aplikatuko zaizkie, baldin eta aldi berean beste entitate baten -egoiliarra edo ez-egoiliarra- mendekoak ez badira eta dibidenduen kengarritasun-araubide bati lotuta badaude.

3. 2. apartatuan ezarritako entitateen irabazi onargarriak zerora arte murriztuko dira zergaldian, zergaldia bukatu eta hurrengo 12 hilabeteetan banatutako dibidenduen zenbatekoarekin, betiere honako inguruabar hauetakoren bat betetzen bada:

a) Azken entitate nagusiaren zergaldia bukatu eta hurrengo 12 hilabeteen barrenean bukatzen den zergaldian, banatutako dibidenduek gutxieneko zerga-tasaren adinako tasa nominala ordaindu behar izatea, gutxienez, jasotzailearen egoitzan.

b) Zentzuzkoa bada espero izatea dibidendua banatzen duen azken entitate nagusiaren zerga estali doituen eta dibidenduaren jasotzaileek ordaindutako zergen zenbateko agregatua izatea dibidendu hori gutxieneko zerga-tasarekin biderkatuta ateratzen den zenbatekoaren berdina edo zenbateko hori baino handiagoa.

4. 2. apartatuan ezarritako entitateen irabazi onargarriak zerora arte murriztuko dira zergaldian, zergaldia bukatu eta hurrengo 12 hilabeteetan banatutako dibidenduen zenbatekoarekin, betiere jasotzailea hauetako bat bada:

a) Pertsona fisiko bat, eta hartutako dibidendua hornidura-kooperatiba baten kooperatiba-itzulkin bat bada;

b) Pertsona fisiko bat, egoitza fiskala azken entitate nagusia kokatuta dagoen jurisdikzio berean duena, baldin eta entitatean % 5eko edo gutxiagoko zuzeneko partaidetza badu; edo

c) 5. artikuluan definitu bezala, entitate publiko bat, nazioarteko antolakunde bat, irabazi-asmorik gabeko erakunde bat edo pentsio-funts bat (pentsio-zerbitzuen entitatea ez dena), egoitza fiskala azken entitate nagusia kokatuta dagoen jurisdikzioan duena.

5. 2. apartatuan aipatutako entitateen zerga estaliak murriztuko dira 3. eta 4. apartatuekin bat etorrita irabazi onargarriak murriztu diren proportzio berean.

Era berean, 2. apartatuan ezarritako entitateen irabazi onargarriak murriztuko dira 10. artikuluaren 2. apartatuko a) letran xedatutakoaren arabera zenbatutako zergagatiko gastuaren zenbatekoarekin, aldi horretako irabazi edo galera onargarriak zehazteko.

6. 3. apartatutik 5. apartatura bitartekoak 2. apartatuan ezarritako entitateaz beste entitate eratzaile guztiei aplikatuko zaizkie, baldin eta dibidenduen kengarritasun-araubidearen mende badaude eta honako baldintza hauek betetzen badira:

a) 2. apartatuan ezarritako entitatearen partaidetzapekoa izatea, zuzenean edo entitate eratzaileen kate baten bitartez.

b) Egoitza azken entitate nagusiaren jurisdikzioan izatea.

c) 2. apartatuan ezarritako entitateak dibidenduak banatzea 3. eta 4. apartatuetan ezarritako baldintzak betetzen dituzten jasotzaileei.

7. Hornidura-kooperatibek banatutako kooperatiba-itzulkinak zergapetuta egonen dira, onuradunari dagokionez, itzulkin horrek gastu edo kostu kengarria murrizten badu hartzailearen zergapeko irabazi edo galeren kalkuluan.

42. artikulua. Banaketaren gaineko tributusistema onargarriak.

1. Entitate eratzaile aitortzaileak aukera izanen du, berari dagokionez edo banaketaren gaineko tributu-araubide onargarri bati lotuta dagoen beste entitate eratzaile bati dagokionez, ustezko banaketaren gaineko zergaren zenbatekoa entitate eratzaileak zergaldian dituen zerga estali doituetan sartzeko. Zenbateko hori 3. apartatuaren arabera kalkulatuko da.

Artikulu honetan ezarritako aukera 49. artikuluko 2. apartatuan xedatutakoaren arabera baliatuko da, eta jurisdikzio berean kokatuta dauden eta banaketaren gaineko tributu-araubide onargarri bati lotuta dauden entitate eratzaile guztiei aplikatuko zaie.

2. "Ustezko banaketaren gaineko zergaren" zenbatekoa bi zenbateko hauetako txikiena izanen da:

a) Jurisdikzioko zerga-tasa efektiboa gutxieneko zerga-tasara egokitzeko behar den zenbatekoa, 22. artikuluko 1. apartatuaren arabera kalkulatuta.

b) Jurisdikzioan kokatutako entitate eratzaileek zergaldi horretan banaketaren gaineko tributu-araubide onargarriari lotutako irabazi guztiak banatu izan balituzte zor izanen zuketen zergaren zenbatekoa.

3. Aurreko 1. apartatuan aipatzen den aukera baliatzen denean, ustezko banaketaren gaineko zerga berreskuratzeko kontu bat sortuko da zergaldi eta jurisdikzio bakoitzeko.

Zergaldi eta jurisdikzio jakin baterako kalkulatutako ustezko banaketaren gaineko zergaren zenbatekoak zergaldiko ustezko banaketaren gaineko zerga berreskuratzeko kontua osatuko du.

Zergaldi bakoitza bukatzen denean, ustezko banaketaren gaineko zerga berreskuratzeko kontuetan erabili gabe gelditzen diren saldoak, aurreko zergaldietan zehaztutakoak, murriztu eginen dira, kontu zaharrenetik hasi eta denak deuseztatu arte, hurrenkera honetan:

a) Entitate eratzaileek zergaldian benetako edo ustezko banaketei dagokienez ordaindutako zergen zenbatekoa kenduko da.

b) Jurisdikzio jakin batean izandako galera onargarri garbiak bider gutxieneko zerga-tasa eginda ateratzen den biderkadura adinako zenbatekoa kenduko da.

4. Aurreko 3. apartatuko b) letra aplikatu ondoren gelditzen den galera onargarri garbien hondar-zenbatekoa bider gutxieneko zerga-tasa eginda ateratzen den zenbatekoa hurrengo zergaldietara eramanen da, eta 3. apartatua aplikatu ondoren ustezko banaketaren gaineko zerga berreskuratzeko kontuetan gelditzen den hondar-zenbateko oro murriztuko du.

5. Ustezko banaketaren gaineko zerga berreskuratzeko kontua sortu eta laugarren zergaldiko azken egunean kontu horretan erabili gabe gelditzen den saldoak, halakorik gelditzen bada, murriztuko ditu zergaldi horretan aldez aurretik zehaztutako zerga estali doituak. Zergaldi horretako zerga-tasa efektiboa eta zerga osagarria berriz kalkulatuko dira horren arabera, 30. artikuluari jarraikiz.

6. Benetako edo ustezko banaketak direla-eta zergaldian ordaintzen diren zergak ez dira sartuko zerga estali doituetan, baldin eta ustezko banaketaren gaineko zerga berreskuratzeko kontu bat murrizten badute aurreko apartatuetan xedatutakoarekin bat etorrita.

7. Aurreko 1. apartatuan aipatzen den aukera baliatu duen entitate eratzaile batek talde multinazionala edo talde nazional handia uzten badu edo haren aktibo gehienak talde multinazional bereko edo talde nazional handi bereko entitate eratzaile bat ez den edo jurisdikzio berean kokatuta ez dagoen pertsona bati eskualdatzen bazaizkio, aurreko zergaldietan sortutako ustezko banaketaren gaineko zerga berreskuratzeko kontuetan gelditzen den erabili gabeko edozein saldo zerga estali doituen murrizketatzat joko da zergaldi horietako bakoitzerako, 30. artikuluarekin bat etorrita.

Jurisdikzioan zor den zerga osagarri gehigarria ezartzeko, aurreko paragrafoan xedatutakoa aplikatu ondoren ateratzen den zenbatekoa biderkatu eginen da zatidura honekin: taldea uzten duen edo aktibo gehienak talde bereko entitate eratzailea ez den pertsona bati eskualdatzen dizkion entitate eratzailearen irabazi onargarriak zati jurisdikzioko irabazi onargarri garbiak.

Horretarako, taldea uzten duen edo aktibo gehienak talde bereko entitate eratzailea ez den pertsona bati eskualdatzen dizkion entitate eratzailearen irabazi onargarriak IV. tituluaren arabera zehaztuko dira, jurisdikziorako ustezko banaketaren gaineko zerga berreskuratzeko kontuetan erabili gabeko saldoa gelditzen den zergaldi bakoitzerako; jurisdikziorako irabazi onargarri garbiak, berriz, 22. artikuluko 3. apartatuaren arabera zehaztuko dira, jurisdikziorako ustezko banaketaren gaineko zerga berreskuratzeko kontuetan erabili gabeko saldoa gelditzen den zergaldi bakoitzerako.

III. KAPITULUA. INBERTSIO-ENTITATEAK ETA ASEGURUEN INBERTSIO-ENTITATEAK

43. artikulua. Zergatasa efektiboa eta zerga osagarria zehaztea.

1. Artikulu honetan eta hurrengoan xedatutakoaren ondorioetarako, "aseguruen inbertsio-entitatea" da 5. artikuluko 21. apartatuan ezarritako inbertsio-funtsaren definizioarekin bat etorriko litzatekeen entitatea, edo 5. artikuluko 30. apartatuan ezarritako higiezinen arloko inbertsio-tresnaren definizioarekin bat etorriko litzatekeena, baldin eta aseguru-kontratu baten edo errenta-aseguru baten ondoriozko pasiboei dagokienez ezarri ez balitz eta aseguru-etxe gisa kokatuta dagoen jurisdikzioan erregulazioari lotuta dagoen entitate batekoa ez balitz osorik.

2. Artikulu honetan xedatutakoa talde multinazional bateko edo talde nazional handi bateko entitate eratzaileetako batek baldintza hauetako bat betetzen badu aplikatuko da:

a) Inbertsio-entitate bat bada, 5. artikuluko 9. apartatuan ezarritako moduan, edo aseguruen inbertsio-entitate bada.

b) 5 artikuluko 18. apartatuan ezarritakoaren arabera fiskalki gardena den entitatea ez bada.

c) 44. eta 45. artikuluetan ezarritako aukera baliatu ez badu.

3. 2. apartuan aipatutako entitateari dagokionez, zerga-tasa efektiboa kokatuta dagoen jurisdikzioko zerga-tasa efektibotik bereizita kalkulatuko da.

4. 2. apartatuan aipatutako entitatearen zerga-tasa efektiboa honako hauek zenbatzearen ondoriozko zatidura izanen da:

a) Zenbakitzailean, entitatearen zerga estali doituak.

b) Izendatzailean, entitatearen irabazi edo galera onargarriak, talde multinazionalari edo talde nazional handiari esleitzen ahal zaion zatian.

Bi inbertsio-entitate edo aseguruen inbertsio-entitate edo bi baino gehiago jurisdikzio batean kokatuta daudenean, haien zerga-tasa efektiboa kalkulatzeko, kontuan hartuko dira entitate horien zerga estali doituak, bai eta entitate horien irabazi edo galera onargarriak ere, talde multinazionalari edo talde nazional handiari esleitzen ahal zaien zatian.

5. 2. apartatuan aipatutako entitatearen zerga estali doituak hauen batura izanen dira:

a) Zerga estali doituak, inbertsio-entitateak edo aseguruen inbertsio-entitateak, talde multinazionalari edo talde nazional handiari esleitzen ahal zaizkion zatian, dituen irabazi edo galera onargarriei egozten ahal zaizkienak.

b) 20. artikuluaren arabera entitateari esleitutako zerga estaliak.

2. apartatuan aipatzen den entitatearen zerga estali doitu gisa ez da inola ere sartuko entitate horrek sortutako zerga estali bat, baldin eta egozten ahal bazaie talde multinazionalari edo talde nazional handiari esleitzen ahal zaion zatian sartuta ez dauden irabaziei.

6. Artikulu honen 2. apartatuan aipatzen den entitatearen zerga osagarria biderketa honen emaitza izanen da: entitatearen zerga osagarriaren karga-tasa bider entitateak, talde multinazionalari edo talde nazional handiari esleitzen ahal zaion zatian, dituen irabazien eta entitate horrentzat kalkulatutako substantzia ekonomikoari lotutako errenten bazterketaren arteko aldea.

2. apartatuan aipatutako entitatearen zerga osagarriaren karga-tasa zenbateko positibo bat izanen da, entitate horren gutxieneko zerga-tasaren eta zerga-tasa efektiboaren arteko aldea adinakoa.

7. Bi inbertsio-entitate edo aseguruen bi inbertsio-entitate edo gehiago jurisdikzio batean kokatuta daudenean, entitate horien zerga-tasa efektiboa kalkulatzeko, kontuan hartuko dira entitate horiek, talde multinazionalari edo talde nazional handiari esleitzen ahal zaion zatian, dituzten irabazi onargarriak, bai eta entitate horien substantzia ekonomikoarekin lotutako errenten bazterketaren zenbatekoak ere.

8. Artikulu honetan aipatzen den entitate baten substantzia ekonomikoari lotutako errenta-bazterketa 14. artikuluaren arabera zehaztuko da.

Foru lege honetan ezarritako baldintzak betetzen dituzten langileen soldaten kostu onargarriak eta inbertsio-entitatearen edo aseguruen inbertsio-entitatearen aktibo material onargarriak zatidura honen proportzioan murriztuko dira: inbertsio-entitateak edo aseguruen inbertsio-entitateak, talde multinazionalari edo talde nazional handiari esleitzen ahal zaion zatian, dituen irabazi onargarriak zati inbertsio-entitate horrek guztira dituen irabazi onargarriak.

9. Artikulu honen ondorioetarako, 2. apartatuan aipatzen den entitate batek, taldeari esleitzen ahal zaion zatian dituen irabazi edo galdera onargarriak 26. artikuluan ezarritakoari jarraikiz zehaztuko dira, eta 44. edo 45. artikuluetan ezarritako aukerak baliatu ez dituztenen partaidetzak bakarrik hartuko dira kontuan.

44. artikulua. Fiskalki gardena den inbertsioentitatea edo aseguruen inbertsioentitatea.

1. Inbertsio-entitatea edo aseguruen inbertsio-entitatea den entitate eratzaile bateko partaidetzen titular diren entitate eratzaileek inbertsio-entitate edo aseguruen inbertsio-entitate hori entitate gardentzat hartzen ahalko dute, artikulu honetan ezarritako baldintzetan.

Aukera hori entitate eratzaile aitortzaileak baliatzen ahalko du, 49. artikuluan ezarritako baldintzetan.

2. Entitate eratzailea inbertsio-entitatea edo aseguruen inbertsio-entitatea bada, fiskalki gardena den entitatetzat hartzen ahalko da, 5. artikuluko 18. apartatuaren arabera, honako baldintza hauek betetzen badira:

a) Inbertsio-entitatea edo aseguruen inbertsio-entitatea den entitate eratzaile baten titular den entitate eratzailea zergapetuta egotea kokatuta dagoen jurisdikzioan, bere partaidetzen arrazoizko balioari dagokionez, edo inbertsio-entitatean edo aseguruen inbertsio-entitatean dituen partaidetzen arrazoizko balioaren urteko aldaketetan oinarritutako antzeko araubide baten araberako tributazioaren mende egotea.

b) Titular horri dagokion zerga-tasa, errenta horiei dagokienez, gutxieneko zerga-tasaren berdina edo handiagoa izatea.

3. Entitate eratzaile batek zeharkako partaidetza badu beste inbertsio-entitate edo aseguruen inbertsio-entitate batean, beste inbertsio-entitate bateko edo aseguruen inbertsio-entitate bateko zuzeneko partaidetzaren bidez, ulertuko da zergapetuta dagoela zeharkako partaidetzapeko entitatean dituen partaidetzen arrazoizko balioari dagokionez, edo zergapetuta dagoela partaidetza horien arrazoizko balioaren urteko aldaketetan oinarritutako antzeko araubide baten arabera, baldin eta entitate eratzailea zergapetuta badago zuzeneko partaidetzapeko entitatean dituen partaidetzen arrazoizko balioari dagokionez edo zergapetuta badago partaidetza horien arrazoizko balioaren urteko aldaketetan oinarritutako antzeko araubide baten arabera.

4. Artikulu honetan ezarritako aukera errebokatzen bada, inbertsio-entitateak edo aseguruen inbertsio-entitateak duen aktibo edo pasibo bat besterentzearen ondoriozko edozein irabazi edo galera zehazteko, abiapuntutzat hartuko da aktiboak edo pasiboak aukera errebokatzen den aldiko lehen egunean duen arrazoizko balioa.

45. artikulua. Zergabanaketaren araubidea.

1. Inbertsio-entitatea edo aseguruen inbertsio-entitatea den entitate eratzaile baten titular diren entitate eratzaileek zerga-banaketaren metodo bat aplikatzen ahalko dute inbertsio-entitate edo aseguruen inbertsio-entitate horretan duten partaidetzari dagokionez, artikulu honetan ezarritako baldintzetan.

Aukera hori entitate eratzaile aitortzaileak baliatzen ahalko du, 49. artikuluan ezarritako baldintzetan.

2. Inbertsio-entitate edo aseguruen inbertsio-entitate baten titular den entitate eratzaile batek zerga-banaketaren metodo bat aplikatzen ahalko du entitate horretan duen partaidetzari dagokionez, baldintza hauek betetzen badira:

a) Entitate eratzailea ez bada, aldi berean, inbertsio-entitate bat edo aseguruen inbertsio-entitate bat, eta

b) Zentzuz espero badaiteke entitate eratzaile titularra tributazioari lotuta egotea, inbertsio-entitatearen edo aseguruen inbertsio-entitatearen banaketak direla eta, gutxieneko zerga-tasaren berdina edo handiagoa den zerga-tasa batekin.

3. Artikulu honetan aipatzen den zerga-banaketaren metodoak honako ondorio hauek izanen ditu:

a) Inbertsio-entitate edo aseguruen inbertsio-entitate baten irabazi onargarrien banaketak eta ustezko banaketak 2. apartatuan aipatutako entitate eratzaile titularraren irabazi onargarrietan sartuko dira, entitate horrek banaketa jaso badu.

b) Inbertsio-entitateak edo aseguruen inbertsio-entitateak jasandako zerga estalietan 2. apartatuan aipatutako entitate eratzaile titularraren zerga-zorrari dagokion zenbatekoa, zeina inbertsio-entitatearen edo aseguruen inbertsio-entitatearen banaketaren ondoriozkoa baita, sartuko da 2. apartatu horretan aipatzen den eta banaketa jaso duen entitate eratzaile titularraren irabazi onargarrietan eta zerga estali doituetan.

c) Inbertsio-entitatearen irabazi onargarritzat hartuko da, zergaldian, inbertsio-entitatearen edo aseguruen inbertsio-entitatearen banatu gabeko irabazi onargarri garbien zatia, 4. apartatuan zehaztutako baldintzetan, 2. apartatuan aipatzen den entitate eratzaile titularrak duen partaidetza ehunekoari dagokiona, betiere banatu gabeko irabazi onargarri garbi horiek zergaldia baino lehenagoko hirugarren aldian sortu badira.

Irabazi onargarri horiek bider gutxieneko zerga-tasa eginda ateratzen den biderkaduraren zenbatekoa zergaldian zerga-maila apala duen entitate eratzailearen zerga osagarritzat hartuko da.

d) Inbertsio-entitate baten edo aseguruen inbertsio-entitate baten irabazi edo galera onargarriak eta irabazi horiei esleitzen ahal zaizkien zerga estali doituak zerga-tasa efektiboaren kalkulutik bazter utziko dira zergaldian, VI. tituluarekin eta 43. artikuluarekin bat etorrita, b) letran aipatzen diren zerga estalien zenbatekoa izan ezik.

4. Aurreko 3. apartatuan xedatutakoaren ondorioetarako, inbertsio-entitate baten edo aseguruen inbertsio-entitate baten banatu gabeko irabazi onargarri garbitzat hartuko dira zergaldia baino lehenagoko hirugarren aldian lortutako irabazi onargarri garbiak, honako zenbateko hauekin minoratuta, deuseztatu arte:

a) Inbertsio-entitatearen edo aseguruen inbertsio-entitatearen zerga estaliak;

b) Inbertsio-entitatearen edo aseguruen inbertsio-entitatearen partaidetzen titularren alde egindako banaketak eta ustezko banaketak, titular horiek ez badira, aldi berean, inbertsio-entitateak edo aseguruen inbertsio-entitateak, zergaldia baino lehenagoko hirugarren aldiko lehen eguna hasten den eta zergaldiko azken egunean bukatzen den aldian;

c) Zergaldia baino lehenagoko hirugarren aldiko lehen egunean hasten den eta zergaldiko azken egunean bukatzen den aldian sortutako galera onargarriak; eta

d) Zergaldia baino lehenagoko hirugarren aldiko lehen egunean hasten den eta zergaldiko azken egunean bukatzen den aldian sortutako galera onargarrien edozein zenbateko, adierazitako aldian zehar inbertsio-entitatearen edo aseguruen inbertsio-entitatearen banatu gabeko irabazi onargarri garbien zenbatekoa baino handiagoa bada, hurrengo ekitaldietara eramaten ahalko da.

5. Aurreko 4. apartatuan ezarritakoa gorabehera, inbertsio-entitate baten edo aseguruen inbertsio-entitate baten banatu gabeko irabazi onargarri garbiak ez dira zenbateko hauekin murriztuko:

a) Inbertsio-entitate horren edo aseguruen inbertsio-entitate horren aurreko aldietako banatu gabeko irabazi onargarri garbietan jada murriztu diren banaketen edo ustezko banaketen zenbatekoa, 4. apartatuko b) letran xedatutakoarekin bat etorriz.

b) Inbertsio-entitate horren edo aseguruen inbertsio-entitate horren aurreko aldietako banatu gabeko irabazi onargarri garbietan jada murriztu diren galera onargarrien zenbatekoa, 4. apartatuko c) letran xedatutakoarekin bat etorriz.

6. Artikulu honen ondorioetarako, ustezko banaketa egonen da talde multinazionalekoa edo talde nazional handikoa ez den entitate bati eskualdatzen zaionean inbertsio-entitatearen edo aseguruen inbertsio-entitatearen gaineko zuzeneko edo zeharkako partaidetza bat. Ustezko banaketaren zenbatekoa eskualdatze-datan zuzeneko edo zeharkako partaidetza horri dagozkion banatu gabeko irabazi onargarri garbien zatia adinakoa izanen da, eta artikulu honetan xedatutakoaren arabera zehaztuko da.

7. Artikulu honetan ezarritako aukera errebokatzen bada, errebokatzen den zergaldia baino lehenagoko hiru aldietan inbertsio-entitateak edo aseguruen inbertsio-entitateak izan dituen banatu gabeko irabazi onargarri garbietan 2. apartatuan aipatutako entitate eratzaile titularrari dagokion zatia inbertsio-entitate edo aseguruen inbertsio-entitate horren irabazi onargarritzat joko da errebokatzea gauzatzen den zergaldian, errebokatzea gauzatu baino lehenagoko zergaldiaren bukaeran dagokion zenbatekoarekin. Foru lege honen ondorioetarako, irabazi onargarri horiek bider gutxieneko zerga-tasa eginda ateratzen den biderkaduraren zenbatekoa zergaldian zerga-maila apala duen entitate eratzailearen zerga osagarritzat hartuko da.

IV. KAPITULUA. JABETZA MINORITARIOKO ENTITATE ERATZAILEAK

46. artikulua. Jabetza minoritarioko entitate eratzailea.

1. Artikulu honi dagokionez, honela ulertuko dira:

a) "Jabetza minoritarioko entitate eratzailea": entitate eratzailea, zeinetan azken entitate nagusiak % 30eko edo gutxiagoko partaidetza duen, zuzenean edo zeharka.

b) "Jabetza minoritarioko azken entitate nagusia": jabetza minoritarioko entitate eratzailea, zuzenean edo zeharka jabetza minoritarioko beste entitate eratzaile baten kontrol-partaidetza duena. Entitate bat ez da halakotzat hartuko jabetza minoritarioko entitate eratzaile batek zuzenean edo zeharka kontrol-partaidetza duenean haren gainean.

c) "Jabetza minoritarioko azpitaldea": jabetza minoritarioko azken entitate nagusia eta haren jabetza minoritarioko filialak.

d) "Jabetza minoritarioko filiala": jabetza minoritarioko entitate eratzailea, zeinaren gainean jabetza minoritarioko azken entitate nagusi batek kontrol-partaidetzak dituen, zuzenean edo zeharka.

2. Jabetza minoritarioko azpitalde bat osatzen duten entitateek foru lege honetan ezarritakoaren arabera kalkulatuko dituzte kokatuta dauden jurisdikzioko zerga-tasa efektiboa eta zerga osagarria, baina berezitasun batekin: jabetza minoritarioko azpitalde bakoitza talde multinazional edo talde nazional handi bereizi moduan tratatuko da.

Jabetza minoritarioko azpitalde bateko kideen zerga estali doituak eta irabazi edo galera onargarriak ez dira kontuan hartuko taldearen zerga-tasa efektiboa eta talde multinazionalaren edo talde nazional handiaren irabazi onargarri garbiak zehazteko, 22. artikuluko 1., 2. eta 3. apartatuekin bat etorrita.

3. Jabetza minoritarioko azpitalde batekoa ez den jabetza minoritarioko entitate eratzaileak foru lege honetan xedatutakoaren arabera kalkulatuko ditu zerga-tasa efektiboa eta zerga osagarria, baina berezitasun batekin: aipatutako kalkuluak bereizita eginen dira entitate horrentzat.

Jabetza minoritarioko entitate eratzailearen zerga estali doituak eta irabazi edo galera onargarriak ez dira kontuan hartuko taldearen zerga-tasa efektiboa eta talde multinazionalaren edo talde nazional handiaren irabazi onargarri garbiak zehazteko, 22. artikuluko 1., 2. eta 3. apartatuekin bat etorrita.

Apartatu honetan xedatutakoa ez zaio aplikatuko inbertsio-entitate den jabetza minoritarioko entitate eratzaileari.

XI. TITULUA. BETEBEHAR FORMALAK

I. KAPITULUA. INFORMATZEKO BETEBEHARRA ETA ZEHAPEN-ARAUBIDEA

47. artikulua. Informatzeko betebeharra.

1. Artikulu honen ondorioetarako, honela ulertuko dira hauek:

a) "Tokiko entitate izendatua": enpresa multinazionalen talde bateko edo talde nazional handi bateko entitate eratzailea, Espainiako lurraldean kokatuta dagoena eta lurralde berean kokatuta dauden enpresa-talde multinazionalaren edo talde nazional handiaren gainerako entitate eratzaileek izendatu dutena zerga osagarriari buruzko aitorpen informatiboa edo jakinarazpenak beren izenean aurkezteko, artikulu honetan xedatutakoarekin bat etorrita;

b) "Agintaritza eskudunaren akordio onargarria": bi agintaritza eskudunen edo gehiagoren arteko akordio edo hitzarmen bilaterala edo multilaterala, zerga osagarriaren urteko aitorpen informatiboen truke automatikoa aurreikusten duena.

2. Zerga osagarriaren aitorpen informatiboa aurkeztu beharko dute Espainiako lurraldean kokatuta dauden talde multinazional bateko edo talde nazional handi bateko entitate eratzaile guztiek.

3. Aurreko 2. apartatuan xedatutakoa gorabehera, entitate eratzaile batek ez du zerga osagarriaren aitorpen informatiborik aurkeztu beharko aitorpen hori honako hauetakoren batek aurkeztu badu artikulu honen arabera:

a) Espainiako lurraldean edo, informazioa trukatzeko, zergaldi horretan Espainiako Erresumarekin indarrean dagoen agintaritza eskudunaren akordio onargarri bat duen jurisdikzioan kokatuta dagoen azken entitate nagusi batek; edo

b) Espainiako lurraldean kokatuta dagoen eta azken entitate nagusia ez den entitate eratzaile batek, talde multinazionalak edo talde nazional handiak izendatu badu informazio hori aurkez dezan Espainiako lurraldean kokatuta dauden taldeko entitate eratzaileen izenean.

c) Azken entitate nagusia ez den eta beste jurisdikzio batean kokatuta dagoen entitate eratzaile batek, talde multinazionalak izendatuta, aipatutako jurisdikzioak indarrean badu agintaritza eskudunaren akordio onargarri bat Espainiako Erresumarekin, informazioa trukatzeko, zergaldian.

Aurreko b) letran ezarritako kasuan, Espainiako lurraldean hainbat entitate eratzaile badaude, eta haietako bat bada talde multinazionalak edo talde nazional handiak izendatu duen tokiko entitatea zerga osagarriaren aitorpen informatzailea aurkezteko, tokiko entitate izendatu horrek baino ez du aurkeztu beharko aitorpena aurreko apartatuari jarraikiz, betiere informazioa artikulu honetan ezarritakoaren arabera aurkezteko behar den informazio guztia lor badezake. Hala ez bada, aurreko apartatuan ezarritakoa aplikatuko da.

Era berean, Espainiako lurraldean kokatuta dagoen eta azken entitate nagusia ez den entitate eratzaile bat zerga osagarriaren aitorpen informatiboa aurkezteko izendatu badu dagokion talde multinazionalak, talde multinazionalaren azken entitate nagusiari eskatu beharko dio talde horri buruzko informazioa.

Apartatu honetan xedatutakoaren ondorioetarako, Espainiako lurraldean kokatuta dagoen eta hemen ezarritako aitorpena aurkeztera behartuta dagoen talde multinazional bateko edo talde nazional handi bateko kide den edozein entitate eratzailek zerga-administrazioari jakinarazi beharko dizkio azken entitate nagusiaren edo aitorpena aurkezteko izendatutako entitatearen identifikazioa eta hark egoitza duen herrialdea edo lurraldea, erregelamendu bidez zehazten den moduan.

4. Zerga osagarriaren aitorpen informatiboan, besteak beste, informazio hau jasoko da:

a) Entitate eratzaileen identifikazioa, haien identifikazio fiskaleko zenbakiak eta, hala badagokio, zein jurisdikziotan dauden kokatuta, bai eta haien kategorizazioa ere, foru lege honen xedapenen arabera.

b) Taldearen egitura orokorrari buruzko informazioa, taldeko entitate eratzaileen gaineko zuzeneko eta zeharkako kontrol-partaidetzak barne. Halaber, zerga osagarriaren erregelak aplikatzetik baztertuta dauden entitateetan dituen partaidetzei buruzko informazioa eta aitorpenari dagokion zergaldian taldearen konfigurazioan izandako edozein aldaketa.

c) Honako hauek kalkulatzeko behar den informazioa:

i) Jurisdikzio bakoitzerako zerga-tasa efektiboa eta entitate eratzaile bakoitzaren zerga osagarria.

ii) Baterako negozio bateko talde bateko kide baten zerga osagarria.

iii) Jurisdikzio bakoitzari esleitu beharreko zerga osagarriaren zenbatekoa.

d) Foru lege honen arabera baliatutako aukeren erregistroa.

e) Aitorpen honi dagokionez garrantzitsua den beste edozein datu.

5. Aurreko 4. apartatuan xedatutakoa gorabehera, entitate eratzaile bat Espainiako lurraldean badago kokatuta eta azken entitate nagusia 54. artikuluaren arabera foru lege honetako arauen baliokidetzat jotako arauak aplikatzen dituen beste jurisdikzio batean badago, entitate eratzaileak edo tokiko entitate izendatuak zerga osagarriari buruzko aitorpen informatibo bat aurkeztuko du, eta honako informazio hau izan beharko du:

a) 6. artikuluko 3. apartatuko c) letra aplikatzeko behar dena, eta zehazki: i) Entitate eratzaile guztien identifikazioa, baldin eta entitate horietan partez partaidetzapekoa den entitate nagusi batek, zuzenean edo zeharka, partaidetza bat badu entitate batean zergaldiko edozein unetan, eta partaidetza horiek entitatean duten egitura;

ii) Partez partaidetzapekoa den entitate nagusi batek aurreko i) tartekian identifikatutako entitate eratzaileetan dituen partaidetzei dagozkien jurisdikzioetako zerga-tasa efektiboa eta zor den zerga osagarria kalkulatzeko behar dena; eta

iii) Horretarako egokia dena, 25., 26. eta 27. artikuluekin bat etorriz.

b) 28 artikuluko 2. apartatua aplikatzeko beharrezkoa dena, honako hauek barne:

i) Azken entitate nagusiaren jurisdikzioan kokatutako entitate eratzaile guztien identifikazioa eta haien partaidetzen egitura;

ii) Azken entitate nagusiaren jurisdikzioko zerga-tasa efektiboa eta entitate horrek zor duen zerga osagarria kalkulatzeko behar dena; eta

iii) 28. eta 29. artikuluetan ezarritako behar beste zergapetu gabeko etekinen erregela aplikatuta, zerga osagarri hori esleitzeko behar dena.

c) Zerga osagarri nazional onargarri bat aplikatzea erabaki duen edozein jurisdikziok zerga osagarri hori aplikatzeko behar duen informazioa.

6. Zerga osagarriaren aitorpen informatiboa zerga-administrazioan aurkeztuko da, erregelamendu bidez zehazten den moduan, zergaldiko azken egunaren ondorengo hamabosgarren hilabeteko azken egunera arte, bosgarren xedapen iragankorrean ezarritakoa ukatu gabe.

Egoki den beste edozein komunikazio erregelamendu bidez zehazten den moduan aurkeztuko da.

48. artikulua. Zehapenaraubidea.

1. Tributuen arloko arau-hausteak izanen dira honako hauek:

a) 47. artikuluan aipatzen den aitorpen informatiboa epearen barrenean ez aurkeztea.

Arau-haustea astuna izanen da, eta zehapena 10.000 euroko diruzko isun finkoa, aitorpenean sartu ez den sartu beharreko datu bakoitzeko edo datu-multzo bakoitzeko; gehieneko muga izanen da talde multinazionala edo talde nazional handia osatzen duten entitate guztien -entitate baztertuena barne- negozio-zifraren zenbateko garbiaren % 1, azken entitate nagusiaren zergaldiko egoera-orri finantzario bateratuen arabera.

Aurreko paragrafoan adierazitako zehapena eta gehieneko muga erdira murriztuko dira, informazioa epez kanpo aurkezten bada zerga-administrazioak aurretik errekerimendua egin gabe.

Epe barrenean aitorpen osatugabeak, zehaztugabeak edo datu faltsuak dituztenak aurkeztu badira eta, ondoren, epez kanpo eta aurretiazko errekerimendurik gabe, aurrekoen osagarri edo ordezko den aitorpen bat aurkezten bada, ez da b) letran aipatzen den arau-hausterik gertatuko epe barrenean aurkeztutako aitorpenei dagokienez, eta letra hau aplikatzearen ondoriozko zehapena ezarriko da epez kanpo aitortutakoari dagokionez.

b) 47. artikuluan aipatzen den aitorpen informatiboa osatu gabe, datu zehaztugabeekin edo datu faltsuekin aurkeztea.

Arau-haustea astuna izanen da, eta zehapena 10.000 euroko diruzko isun finkoa, aitorpenean sartu ez den sartu beharreko datu bakoitzeko edo datu-multzo bakoitzeko; gehieneko muga izanen da talde multinazionala edo talde nazional handia osatzen duten entitate guztien -entitate baztertuena barne- negozio-zifraren zenbateko garbiaren % 1, azken entitate nagusiaren zergaldiko egoera-orri finantzario bateratuen arabera.

c) Apartatu honetan araututako arau-hausteak eta zehapenak bateraezinak izanen dira Tributuei buruzko abenduaren 14ko 13/2000 Foru Lege Orokorraren 67. artikuluko a) letran ezarritakoekin.

2. Zerga arloko arau-hauste astuna da 47 artikuluko 3. apartatuan eta hirugarren xedapen iragankorreko 5. apartatuan aipatzen diren jakinarazpenetako edozein epe barrenean ez aurkeztea. Zehapena diruzko isun finko bat izan da, 10.000 eurokoa.

II. KAPITULUA. AUKERAK BALIATZEA

49. artikulua. Aukerak baliatzea.

1. 7. artikuluko 2. apartatuan, 10. artikuluko 2. apartatuko b) letran eta 3., 6. eta 9. apartatuetan eta 44. eta 45. artikuluetan aipatzen diren aukerak aplikatuko dira haiek baliatzen diren zergalditik aurrera, eta aplikatzeari uko egiten ahalko zaio zergaldi hori hasten denetik bost urte igaro ondoren. Uko egiteak gutxienez bost urteko iraupena izanen du, uko egiten den zergaldia hasten denetik zenbatzen hasita.

2. 10. artikuluko 7. apartatuan, 14. artikuluko 2. apartatuan, 18. artikuluko 1. apartatuko b) letran, 21. artikuluko 1. apartatuan, 33. artikuluko 1. apartatuan eta 42. artikuluko 1. apartatuan aipatzen diren aukerak aplikatuko dira haiek baliatzen diren zergalditik aurrera, bai eta uko-egitea jakinarazi aurretik bukatzen diren hurrengoetan ere.

3. 17. artikuluko 5. apartatuan aipatzen den aukera errebokaezina izanen da, eta baliatzen den zergalditik aurrera aplikatuko da, baita hurrengo zergaldietan ere, manu horretan ezarritakoarekin bat.

4. Aurreko hiru apartatuetan adierazitako aukerak entitate eratzaile aitortzaileak edo entitate aitortzaile izendatuak zerga osagarriaren aitorpen informatiboan baliatuko ditu, 47. artikuluan ezarritakoarekin bat, eta Tributuei buruzko abenduaren 14ko 13/2000 Foru Lege Orokorraren 96 artikuluko 4. apartatuan xedatutakoa aplikatuko zaie.

Aurreko 1. eta 2. apartatuetan adierazitako aukerei uko egiten ahalko die entitate eratzaile aitortzaileak edo entitate aitortzaile izendatuak, 47. artikuluan ezarritako zerga osagarriaren aitorpen informatiboan, eta Tributuei buruzko abenduaren 14ko 13/2000 Foru Lege Orokorraren 96.4 artikuluan xedatutakoa aplikatuko zaie.

XII. TITULUA. ZERGAREN KUDEAKETA

50. artikulua. Zergaaitorpena.

1. Zerga osagarria Nafarroako Foru Ogasunean sartzera behartuta dauden zergadunek edo, hala badagokio, haien ordezkoek, zerga osagarriaren zerga-aitorpena aurkeztu beharko dute, erregelamendu bidez zehazten den moduan, 25 egun naturaleko epean, zergaldia bukatu ondorengo hamabosgarren hilabetetik aurrera, bosgarren xedapen iragankorrean ezarritakoa aplikatu behar denean izan ezik.

Zerga Nafarroako Foru Ogasunean sartzeko betebeharra zehazteko, Estatuaren eta Nafarroako Foru Komunitatearen arteko Hitzarmen Ekonomikoaren 27 bis.2 artikuluan adierazitako irizpideei jarraituko zaie.

2. Zergadunaren ordezkoak ordaindutako zerga-betebeharren zenbatekoa eskatzen ahalko dio zergadunari.

51. artikulua. Autolikidazioa eta zergazorraren sarrera egitea.

1. 50. artikuluan edo, hala badagokio, bosgarren xedapen iragankorrean ezarritakoari jarraikiz, zerga-aitorpena aurkeztera behartuta dauden subjektu pasiboek dagokion zorra zehaztu beharko dute aitorpena aurkezten dutenean, eta erregelamendu bidez zehazten den lekuan eta moduan sarrera egin.

2. Zerga-zorra ordaintzeko, honako hauek entregatzen ahalko dira: urriaren 3ko 217/1986 Foru Dekretuan xedatuaren babesean berariaz eta banaka interes kulturaleko ondasun deklaratutako ondasunak, historia-, arte- eta kultura-intereseko ondasunen inbentario ofizialetan sartutako ondasunak eta historia- eta kultura-ondarea osatzen duten beste ondasun batzuk, Nafarroako Foru Komunitateko Diru-bilketari buruzko Erregelamenduaren 30. artikuluan ezarritakoaren arabera. Erregelamendu hori uztailaren 2ko 177/2001 Foru Dekretuaren bidez onetsi zen.

52.artikulua. Behinbehineko likidazioa.

Tributuak kudeatzeko organoek dagokion behin-behineko likidazioa egiten ahalko dute, Tributuei buruzko abenduaren 14ko 13/2000 Foru Lege Orokorraren 113. artikuluan xedatutakoari jarraikiz, horrek ukatu gabe geroago tributuen ikuskatzaileek egiaztapen- eta ikerketa-jarduketak egitea.

53. artikulua. Administrazioak zergaoinarria eta beste zergaelementu batzuk zehazteko dituen ahalmenak.

Zerga-oinarria eta zerga osagarriaren gainerako elementuak zehazteko, zerga-administrazioak 9. artikuluan ezarritako kontabilitate-arauak eta aplikatzekoa den gainerako araudia aplikatuko ditu.

XIII. TITULUA. BALIOKIDETZAREN EBALUAZIOA

54. artikulua. Baliokidetzaren ebaluazioa.

1. Beste jurisdikzio bateko zuzenbide nazionalean aplikatutako esparru juridikoa foru lege honetan ezarritako errentak sartzeko erregela onargarri baten baliokidetzat hartuko da, eta ez da tratatuko atzerriko sozietate kontrolatuen gaineko zerga-araubide gisa, baldin eta honako baldintza hauek betetzen baditu:

a) Arau-multzo bat betetzea eskatzen du. Arau horien arabera, talde multinazional bateko azken entitate nagusiak kalkulatu eta ordainduko du zerga-maila apala duten talde multinazionaleko entitate eratzaileei dagokienez esleitzen ahal zaion zerga osagarriaren zatia.

b) Gutxienez ehuneko 15eko gutxieneko zerga-tasa efektiboa ezartzen du, eta, hortik behera, entitate eratzaileak zerga-maila apala duela jotzen da.

c) Gutxieneko zerga-tasa efektiboa kalkulatzeko, jurisdikzio berean kokatutako entitateen errentak baizik ezin dira konbinatu.

d) Zerga osagarri bat errentak sartzeko erregela onargarri baliokidearen arabera kalkulatzeko, kenkari bat ezartzen du errentak sartzeko erregela onargarria aplikatzearen ondorioz ordaindutako zerga osagarri ororentzat, bai eta zerga osagarri nazional onargarri guztientzat ere.

2. 2022/2523 (EB) Zuzentarauaren 55. artikuluan aipatzen diren jakinarazpen sinplifikatuko prozedurak aplikatuko dira artikulu horretan xedatutakoaren arabera adostu direnean.

XIV. TITULUA. JURISDIKZIO-ORDENA

55. artikulua. Jurisdikzioordena.

Administrazioarekiko auzietako jurisdikzioa izanen da -bide ekonomiko-administratiboa agortu eta gero- foru lege honetan aipatzen diren gaietako edozein dela-eta zerga-administrazioaren eta zergadunen artean gerta daitezkeen egitatezko eta zuzenbideko eztabaidak ebazteko jurisdikzio eskudun bakarra.

Lehen xedapen iragankorra. Zerga geroratuengatiko aktibo eta pasiboen eta trantsiziozergaldian eskualdatutako aktiboen tratamendu fiskala.

1. Trantsizio-zergalditzat hartuko da 6. artikuluan aipatzen diren zergadunek foru lege honetan ezarritako jurisdikzio bakoitzari dagokionez lehen aldiz aplikatu behar duten lehen zergaldia.

Aurrekoa gorabehera, trantsizio-zergalditzat hartuko da dagokion jurisdikzioan laugarren xedapen iragankorrean ezarritakoa aplikatu behar ez den lehen zergaldia.

2. Jurisdikzio bakoitzean trantsizio-zergaldiko zerga-tasa efektiboa zehazteko, bai eta ondoz ondoko zergaldi bakoitzekoa zehazteko ere, zerga geroratuagatiko aktibo eta pasibo guztien balioa hartuko da kontuan zerga estali doituen ondorioetarako, baldin eta aktibo eta pasibo horiek erregistratuta edo banakatuta badaude trantsizio-zergaldiaren hasieran dauden jurisdikzioko entitate eratzaileen egoera-orri finantzarioetan.

Balio hori izanen da aurreko paragrafoan aipatutako egoera-orri finantzarioetan haiei dagokienez kontsignatutakoa eta gutxieneko zerga-tasa aplikatuta ateratzen denaren arteko txikiena dena.

Gutxieneko zerga-tasa aplikatuta ateratzen den balioa izanen da tasa hori bider zatidura hau eginda ateratzen dena: egoera-orri finantzarioetan erregistratutako edo banakatutako kreditu fiskal aplikatu gabekoei dagozkien zerga geroratuagatiko aktiboak zati trantsizio-zergaldiaren aurrekoan erregistratzeko aplikatu zitzaien zerga-tasa nominala.

Aurrekoa gorabehera, gutxieneko zerga-tasa baino txikiagoa den zerga-tasarekin kontabilizatutako zerga geroratuagatiko aktiboak gutxieneko zerga-tasaren arabera balioesten ahalko dira baldin eta zergadunak froga badezake aktibo hori foru lege honetan xedatutakoaren arabera onargarria izanen zatekeen galera bati esleitzen ahal zaiola.

Ez dira kontuan hartuko zerga geroratuagatiko aktibo baten balioespen-doikuntzen edo kontabilitatean jasotzearen ondoriozko aldaketak.

3. IV. tituluan xedatutakoaren arabera irabazi edo galera onargarriak zehazteko baztertuta egon diren partiden ondoriozko zerga geroratuagatiko aktiboak ez dira kontuan hartuko 2. apartatuan aipatzen den kalkulua egiteko, baldin eta aktibo horiek 2021eko azaroaren 30etik trantsizio-zergaldia hasi arte egindako transakzio batean sortu badira.

4. 2021eko azaroaren 30etik aurrera eta trantsizio-zergaldia hasi aurretik entitate eratzaileen artean aktiboak eskualdatzen badira, eskuratutako aktiboetatik izakin ez diren aktiboen balioa izanen da entitate eskualdatzailearen egoera-orri finantzarioetan eskualdaketaren unean dauden aktibo eskualdatuen kontabilitate-balioa, eta balio horren gainean zehaztuko dira zerga geroratuagatiko aktiboak eta pasiboak.

5. Aurreko apartatuan xedatutakoa gorabehera, talde multinazionalak edo talde nazional handiak kontuan hartzen ahalko du eskualdaketaren ondoriozko errentari lotutako zerga geroratuagatiko aktibo bat, baldin eta egiaztatzen ahal bada entitate eskualdatzaileak eskualdaketa horren ondoriozko errentaren gaineko zerga ordaindu duela.

Aurreko paragrafoan aipatzen den zerga geroratuagatiko aktiboaren balioa ezin da izan bi zenbateko hauetako txikiena baino handiagoa:

i) Biderketa hau eginda ateratzen den balioa: gutxieneko zerga-tasa bider entitate eskuratzailea kokatuta dagoen jurisdikzioko legeriaren arabera zehaztutako aktiboaren balio fiskalaren eta 4. apartatuan aipatutako balioaren arteko aldea.

ii) Entitate eskualdatzaileak eskualdaketaren ondoriozko errentaren gainean ordaindutako zerga gehi, hala badagokio, eskualdaketaren zergaldiko zerga-errentaren kalkuluan eskualdaketaren ondoriozko errenta kengarria izan ez balitz, entitate eskualdatzaileak 2. apartatuan xedatutakoaren arabera kontuan hartuko zukeen galerari dagokion zerga geroratuagatiko aktiboaren zenbatekoa.

Apartatu honetan xedatutakoaren arabera zehaztutako zerga geroratuagatiko aktiboa dagokion aktiboaren balio-galera erregistratua ren arabera aplikatuko da, edo, bestela, eskualdatzen denean edo baja ematen zaionean. Nolanahi ere, zerga geroratuagatiko aktibo hori kontabilitatean jasotzeak ez du minoratuko entitate eskuratzailearen zerga estali doituen zenbatekoa.

6. 18. artikuluko 5. apartatuko e) letran xedatutakoa gorabehera, azken entitate nagusiaren egoera-orri finantzario bateratuak egiteko erabilitako finantza-kontabilitateko arau onargarri edo baimenduaren arabera prestatutako entitate eratzailearen egoera-orri finantzarioetan erregistratutako edo banakatutako kreditu fiskalei dagozkien zerga geroratuagatiko aktiboak -trantsizio-zergaldiaren hasieran daudenak- kontuan hartuko dira trantsizio-zergaldiko eta, hala badagokio, hurrengo zergaldietako zerga-tasa efektiboa zehazteko.

7. Aurreko apartatuan aipatutako zerga geroratuagatiko aktiboei dagokienez kontsignatutako balioa gutxieneko zerga-tasa baino txikiagoa den zerga-tasa erabilita kalkulatu bada, zerga geroratuagatiko aktibo horien zenbatekoa izanen da entitate eratzailearen egoera-orri finantzario bateratuetan agertzen diren zerga geroratuagatiko aktiboen zenbatekoa.

8. Aurreko 6. apartatuan aipatutako zerga geroratuagatiko aktiboei dagokienez kontsignatutako balioa gutxieneko zerga-tasa edo handiagoa den zerga-tasa erabilita kalkulatu bada, zerga geroratuagatiko aktibo horien zenbatekoa izanen da gutxieneko zerga-tasa bider zatidura hau eginda ateratzen den emaitza: azken entitate nagusiaren egoera-orri finantzario bateratuak egiteko erabilitako finantza-kontabilitateko arau onargarri edo baimenduaren arabera prestatu diren entitate eratzailearen egoera-orri finantzarioetan erregistratutako edo banakatutako kreditu fiskal aplikatu gabekoei dagozkien zerga geroratuagatiko aktiboak zati trantsizio-zergaldiaren aurrekoan erregistratzeko aplikatu zitzaien zerga-tasa nominala.

Trantsizio-zergaldiaren ondorengo zergaldi batean jurisdikzio bateko zerga-tasa aldatzen bada, zerga geroratuagatiko aktiboen zenbatekoa berriz kalkulatuko da aurreko paragrafoan zehaztutako formularen arabera, eta azken entitate nagusiaren egoera-orri finantzario bateratuak egiteko erabilitako finantza-kontabilitateko arau onargarri edo baimenduaren arabera prestatu diren egoera-orri finantzarioetan agertzen ziren kreditu fiskalek zerga-tasaren aldaketa gertatu den zergaldiaren hasieran zuten zenbatekoa mantenduko da. Zerga geroratuagatiko aktiboen zenbatekoaren aldaketa, zerga-tasaren aldaketa dela-eta egindako kalkulu berriaren ondoriozkoa, ez da sartuko zerga geroratuagatiko doikuntzaren zenbateko osoan zergaldi horretan. Kalkulu berria egin den zergaldian eta hurrengoetan zerga geroratuengatiko doikuntza zehazteko, zerga geroratuagatiko aktiboak kalkulu berriaren ondorioz duen zenbatekoa hartuko da abiapuntutzat.

9. Salbuespen hau dago 4. apartatuan xedatutakoari dagokionez: taldeak egiazta dezakeenean entitate eskualdatzaileak ordaindu duela 4. apartatu horretan aipatutako aktiboak eskualdaketaren ondoriozko errentaren gaineko zerga, eta zerga hori gutxieneko zerga-tasa bider eskualdaketaren ondoriozko errenta eginda ateratzen den emaitzaren berdina edo handiagoa dela, hurrengo paragrafoan ezarritakoa aplikatzen ahalko du.

Kasu horretan, entitate eskuratzaileak eskuratze-datan erregistratutako eta entitate eskuratzailearen egoera-orri finantzarioak prestatzeko erabilitako finantza-kontabilitateko arauaren arabera zehaztutako kontabilitate-balioa ematen ahalko zaie eskuratutako aktiboei eta ez da aplikatuko 5. apartatuan xedatutakoa.

Bigarren xedapen iragankorra. Substantzia ekonomikoari lotutako errenten bazterketa delaeta aplikatu beharreko ehunekoak.

1. 14. artikuluko 3. apartatuan xedatutakoaren ondorioetarako, % 5eko ehunekoaren ordez, hurrengo taulan azaltzen diren urte naturaletako abenduaren 31tik aurrera hasten den zergaldi bakoitzean, urte horretarako ezarritako ehunekoa aplikatuko da:

URTEAEHUNEKOA (%)
202310
20249,8
20259,6
20269,4
20279,2
20289,0
20298,2
20307,4
20316,6
20325,8

2. 14. artikuluko 4. apartatuan xedatutakoaren ondorioetarako, % 5eko ehunekoaren ordez, hurrengo taulan azaltzen diren urte naturaletako abenduaren 31tik aurrera hasten den zergaldi bakoitzean, urte bakoitzerako ezarritako ehunekoa aplikatuko da:

URTEAEHUNEKOA (%)
20238
20247,8
20257,6
20267,4
20277,2
20287,0
20296,6
20306,2
20315,8
20325,4

Hirugarren xedapen iragankorra. Zerga osagarriaren aldi baterako galdagarritasunik eza, talde multinazionalentzat eta talde nazional handientzat.

1. 25. artikuluan aipatzen den zerga osagarri nazionala zero izanen da Espainiako lurraldean kokatutako azken entitate nagusiarentzat eta haren entitate eratzaileentzat eta, azken entitate nagusia entitate baztertua bada, Espainiako lurraldean kokatutako bitarteko entitate nagusiarentzat eta haren entitate eratzaileentzat, aldi hauetan:

a) Talde multinazionalaren nazioarteko jardueraren hasierako faseko lehen bost urteetan.

b) Talde nazional handia foru lege hau lehen aldiz aplikatzera behartuta dagoen zergaldiko lehen egunetik aurrera, lehenengo bost urteetan.

2. 6.4 artikuluan aipatzen diren zergadunen bigarren mailako zerga osagarria, 29.2 artikuluan aipatzen dena, zero izanen da talde horren nazioarteko jardueraren hasierako fasearen lehen bost urteetan.

3. Talde multinazional bat bere nazioarteko jardueraren hasierako fasean dagoela ulertuko da zergaldi batean honako baldintza hauek betetzen dituenean:

a) Bere entitate eratzaileak sei jurisdikzio desberdinetan baino gehiagotan kokatuta ez egotea.

b) Talde multinazionalak erreferentziako jurisdikzioaz bestelako jurisdikzioetan dituen entitate eratzaile guztien aktibo materialen kontabilitate-balio garbiaren batura ez izatea 50 milioi eurotik gorakoa.

Apartatu honetan xedatutakoaren ondorioetarako, "erreferentziako jurisdikzioa" izanen da, talde multinazionalaren entitate eratzaileak kokatuta dauden jurisdikzioen artetik, aktibo materialen kontabilitate-balio garbiaren zenbateko oso handiena duena, taldearen entitate eratzaile guztien aktibo material guztiak kontuan hartuta, talde multinazionala foru lege honen aplikazio-eremuan lehen aldiz sartzen den zergaldian.

4. 1. apartatuko a) letran eta 2. apartatuan aipatzen den bost urteko aldia talde multinazionala foru lege honen aplikazio-eremuan lehen aldiz sartzen den lehen zergaldia hasten denetik aurrera hasiko da zenbatzen.

5. Entitate eratzaile aitortzaileak kokatuta dagoen jurisdikzioko zerga-administrazioari jakinaraziko dio talde multinazionalaren nazioarteko jardueraren hasierako fasea hasi dela.

47. artikuluan aipatzen den entitate eratzaile aitortzailea Espainiako lurraldean kokatuta dagoenean, Espainiako zerga-administrazioari jakinaraziko dio talde multinazionalaren nazioarteko jardueraren hasierako fasea hasi dela. Era berean, Espainiako lurraldean kokatutako talde nazional handi baten entitate eratzaile aitortzaileak Espainiako zerga-administrazioari jakinaraziko dio 1.apartatuko b) letran ezarritako bost urteko aldiaren hasiera.

Apartatu honetan aipatzen den jakinarazpena Nafarroako Foru Ogasunean aurkeztuko da, Estatuaren eta Nafarroako Foru Komunitatearen arteko Hitzarmen Ekonomikoaren 27 bis.4 artikuluan adierazitako irizpideen arabera, erregelamendu bidez zehazten den moduan.

Laugarren xedapen iragankorra. Zerga osagarriaren galdagarritasunik eza herrialdez herrialdeko informazio onargarriaren arabera.

1. Xedapen iragankor honetan xedatutakoaren ondorioetarako, honela ulertuko dira:

a) "Herrialdez herrialdeko informazio onargarria": egoera-orri finantzario onargarriak erabilita prestatutako herrialdez herrialdeko informazioa, dagokion zerga-administrazioari aurkeztutakoa. Herrialdez herrialdeko informazioa da hauetan aipatutakoa: ELGAren eta G-20ren zerga-oinarriaren higadurari eta etekinen eskualdaketari buruzko proiektuko 13. ekintzaren azken txostenean (Transferentzia-prezioei eta herrialdez herrialdeko txostenari buruzko dokumentazioa); Kontseiluaren 2016ko maiatzaren 25eko 2016/881 (EB) Zuzentarauan, zeinak 2011/16/EB Zuzentaraua aldatzen baitu, fiskalitatearen arloko nahitaezko informazio-truke automatikoari dagokionez; eta Sozietateen gaineko Zergari buruzko abenduaren 28ko 26/2016 Foru Legearen 30. artikuluan.

b) "Egoera-orri finantzario onargarriak":

i) Azken entitate nagusiaren egoera-orri finantzario bateratuak egiteko erabilitako finantza-kontabilitateko arau onargarriaren edo baimenduaren arabera prestatutako egoera-orri finantzarioak.

ii) Entitate eratzaile bakoitzaren egoera-orri finantzarioak, betiere finantza-kontabilitateko arau onargarri edo baimendu baten arabera egin badira, eta egoera-orri finantzario horietan jasotako informazioa kontabilitate-arau horren arabera erregistratu bada eta fidagarria bada.

iii) Entitate eratzailearen egoera-orri finantzarioak, talde multinazionalaren herrialdez herrialdeko informazioa prestatzeko erabiltzen direnak, baldin eta entitate hori ez bada bateratzen entitate nagusiaren egoera-orri finantzario bateratuetan integrazio globaleko metodoaren bidez, soilik garrantzi erlatiboko edo materialtasunaren arloko arrazoiak direla-eta.

c) Aldi iragankorra": 2023ko abenduaren 31tik 2026ko abenduaren 31ra bitartean hasitako zergaldiak.

d) "Tasa iragankorra":

% 15, 2023an eta 2024an hasten diren zergaldietarako.

% 16, 2025ean hasten diren zergaldietarako.

% 17, 2026an hasten diren zergaldietarako.

e) "Taldearen sarrera gordinak": herrialdez herrialdeko informazio onargarrian kontsignatutakoa, Espainiako zerga-administrazioak kasuan kasuko jurisdikzioetarako jasotakoa.

f) "Enpresa-mozkinen gaineko zerga edo izaera bereko edo antzeko zergak aplikatu aurreko emaitza": herrialdez herrialdeko informazio onargarrian, Espainiako zerga-administrazioak kasuan kasuko jurisdikzioetarako jasotakoan, kontsignatutako enpresa-mozkinen gaineko zerga edo izaera bereko edo antzeko zergak aplikatu aurreko emaitzaren zenbatekoa.

g) "Zerga estali sinplifikatuak": kasuan kasuko jurisdikzioetako entitate eratzaileen egoera-orri finantzarioetan erregistratutako enpresa-mozkinen gaineko zergaren ondoriozko gastua, 16. artikuluko 2. apartatuan xedatutakoaren arabera zerga estalitzat hartzen ez diren zergen zenbatekoarekin eta zalantzazko posizio fiskalekin lotutako zerga-gastuarekin minoratuta.

h) "Zerga-tasa efektibo sinplifikatua": zerga estali sinplifikatuen zenbatekoaren eta herrialdez herrialdeko informazio onargarrian, Espainiako zerga-administrazioak kasuan kasuko jurisdikzioetarako jasotakoan, kontsignatutako enpresa-mozkinen gaineko zerga edo izaera bereko edo antzeko zerga aplikatu aurreko emaitzen arteko zatiketaren emaitza.

2. Foru lege honetan araututako zerga osagarria zero izanen da, xedapen iragankor honetan aipatzen den aldi iragankorrean, herrialdez herrialdeko informazio onargarria Espainiako lurraldeko kasuan kasuko zerga-administrazioan aurkezten duen talde multinazional bateko kide diren zergadunentzat, hiru baldintza hauetako bat betetzen duten jurisdikzio eta zergaldiei dagokienez:

a) Taldeko diru-sarrera gordinen zenbatekoa eta enpresa-mozkinen gaineko zerga edo izaera bereko edo antzeko zergak aplikatu aurreko emaitza, hurrenez hurren, 10 milioi euro eta milioi bat euro edo gutxiago izatea jurisdikziorako.

Baldintza hori betetzat joko da enpresa-mozkinen gaineko zerga aplikatu aurreko emaitza nulua edo negatiboa denean.

Letra honetan aipatzen den taldearen sarrera gordinen zenbatekoa kalkulatzeko, kontuan hartuko dira salmentarako mantendu diren eta jurisdikzioan kokatuta dauden entitate eratzaileen sarrera gordinak.

b) Aldi iragankorreko zergaldi bakoitzerako jurisdikzioko zerga-tasa efektibo sinplifikatua aldi horretarako ezarritako tasa iragankorraren berdina edo handiagoa izatea.

c) Enpresa-mozkinak zergapetzen dituen zerga edo izaera bereko edo antzeko zergak aplikatu aurreko emaitzak foru lege honetan xedatutakoaren arabera jurisdikzio horretarako zehaztutako substantzia ekonomikoari lotutako errenten bazterketari dagokion zenbatekoa adinakoak edo txikiagoak izatea.

Baldintza hori betetzat joko da enpresa-mozkinen gaineko zerga aplikatu aurreko emaitza nulua edo negatiboa denean.

3. Arau bereziak.

a) 2. apartatuan ezarritakoa aplikatuko zaie 38. artikuluan aipatzen diren baterako negozioei eta haien filialei talde multinazional bereizi bateko entitate eratzaileak balira bezala; hala ere, irabazi edo galera onargarriak eta guztizko sarrera gordinak zehazteko, egoera-orri finantzario onargarrietan erregistratutakotik abiatuko da.

b) 2. apartatuan araututakoa ez zaie aplikatuko jurisdikzio batean egoiliar fiskaltzat jotzen diren inbertsio-entitateei, herrialdez herrialdeko informazio onargarriaren ondorioetarako, eta haien zerga osagarria foru lege honetan ezarritakoaren arabera zehaztu beharko da, honako kasu hauetan izan ezik:

i) Inbertsio-entitatea eta inbertsio-entitate horren partaide diren entitate eratzaile guztiak jurisdikzio bereko egoiliarrak badira;

ii) 44. eta 45. artikuluetan ezarritako aukerak baliatu ez badira inbertsio-entitate horri dagokionez.

Aurrekoarekin bat etorrita, 2. apartatuan araututakoa aplikatu behar denean, enpresa-mozkinen gaineko zerga edo izaera bereko edo antzeko zergak aplikatu aurreko emaitza, sarrera gordinak eta zerga estaliak, inbertsio-entitatearenak, haren partaidetzen titular zuzenen jurisdikzioan soilik hartu beharko dira kontuan, partaidetza horien proportzioan, herrialdez herrialdeko informazioan inbertsio-entitatea agertzen den jurisdikzioa edozein dela ere.

Aurreko b) letra horretan xedatutakoaren ondorioetarako, inbertsio-entitateak barne hartzen du aseguruen inbertsio-entitatea.

c) 2. apartatuan ezarritakoa ez da aplikatuko azken entitate nagusiek egoitza duten jurisdikzioan, entitate horiek 40. artikuluan xedatutakoa aplikatzen duten entitate gardenak direnean, edo dibidenduen kengarritasuneko araubide baten mende dauden azken entitate nagusien kasuan, 41. artikuluan xedatutakoa aplikatzen badute, salbu eta haien partaidetza osoa pertsona onargarrien eskuetan badago.

Azken entitate nagusi batek 40. edo 41. artikuluetan xedatutakoa aplikatzen badu, enpresa-mozkinen gaineko zerga edo izaera bereko edo antzeko zergak aplikatu aurreko emaitza murriztuko da pertsona onargarri bati esleitu edo banatu behar zaion proportzioan.

Bestetik, c) letra honetan ezarritakoaren ondorioetarako, pertsona onargarritzat hartuko dira 40. artikuluko 2. eta 3. apartatuetako a) eta b) letretan ezarritakoak, artikulu hori aplikatzekoa denean, eta 41. artikuluko 4. apartatuko a), b) eta c) letretan ezarritakoak, artikulu hori aplikatzekoa denean.

d) Jurisdikzio batean, arrazoizko balioko galera garbi gauzatu gabea, 50 milioi eurotik gorakoa, baztertu eginen da enpresa-mozkinen gaineko zerga edo izaera bereko edo antzeko zergak aplikatu aurreko emaitzatik. Ondorio horietarako, "arrazoizko balioko galera garbi gauzatu gabea" izanen da beste entitate bateko partaidetzen arrazoizko balioan izandako aldaketetatik sortutako galera guztien batura -edozein irabazirekin murriztuta-, partaidetza ez-adierazgarriak direnean izan ezik.

4. Aurreko 2. apartatuan ezarritakoa ez zaie aplikatuko honako entitate eratzaile hauei edo talde multinazional hauei:

a) Egoitzarik gabeko entitate eratzaileei.

b) Entitate nagusi ugari dituzten talde multinazionalak, 39. artikuluan aipatutakoak, baldin eta talde konbinatuen informazioa ez badago sartuta herrialdez herrialdeko informazio bakar batean, Espainiako Zerga Administrazioak jasotakoan.

c) 42. artikuluan aipatzen den banaketaren gaineko tributu-araubide onargarria aplikatzea aukeratu den jurisdikzioetan dauden entitate eratzaileei.

5. Talde multinazional bat foru lege honen aplikazio-eremuaren barrenean badago eta xedapen iragankor honetan agindutakoa aplikatzen ez badu zergaldian herrialdez herrialdeko informazio onargarrian sartutako jurisdikzioren bati dagokionez, ezin izanen du aplikatu jurisdikzio horri dagokionez ondorengo zergaldi batean.

6. Xedapen iragankor honetan ezarritakoa 2027ko urtarrilaren 1a baino lehen hasitako eta 2028ko uztailaren 1a baino lehen bukatutako zergaldiei aplikatuko zaie.

Bosgarren xedapen iragankorra. Zerga osagarriaren aitorpen informatiboa eta zergaaitorpena, trantsiziozergaldiari dagokionez.

1. Aurreko 47. artikuluko 6. apartatuan xedatutakoa gorabehera, zerga osagarriaren gaineko aitorpen informatiboa eta artikulu horretan aipatzen diren jakinarazpenak zerga-administrazioan aurkeztuko dira, errentak sartzeko erregela onargarri baten edo behar beste zergapetu gabeko etekinen erregela onargarri baten arabera, talde multinazional bat edo talde nazional handi bat zerga osagarri baten aplikazio-eremuan lehen aldiz sartzen den lehen zergaldia bukatu ondorengo hemezortzigarren hilabeteko azken egunera arte.

2. 50. artikuluan aipatzen den zerga-aitorpena 25 egun naturaleko epearen barrenean aurkeztu beharko da, errentak sartzeko erregela onargarri baten edo behar beste zergapetu gabeko etekinen erregela onargarri baten arabera, talde multinazional bat edo talde nazional handi bat zerga osagarri baten aplikazio-eremuan lehen aldiz sartzen den lehen zergaldia bukatu ondorengo hamazortzigarren hilabetea bukatu ondotik zenbatuta.

Seigarren xedapen iragankorra. Behar beste zergapetu gabeko etekinen erregelaren aldi baterako galdagarritasunik eza.

12 hilabeteko zergaldia edo txikiagoa duten talde multinazionalen kasuan, zergaldia 2025eko abenduaren 31 baino lehen hasi eta 2026ko abenduaren 31 baino lehen bukatzen bada, azken entitate nagusia kokatuta dagoen jurisdikzioari dagokionez, 28. artikuluaren arabera behar beste zergapetu gabeko etekinen erregela aplikatzearen ondorioz sortuko litzatekeen zerga osagarriaren zenbatekoa zero izanen da, baldin eta azken entitate nagusia enpresa-mozkinak zergapetzen dituen zergari lotuta egon bada, gutxienez % 20ko zerga-tasa nominalarekin, xedapen hau aplikatzekoa den zergaldi bakoitzean.

Azken xedapenetako lehena. Tributuei buruzko abenduaren 14ko 13/2000 Foru Lege Orokorraren aldaketa.

2023ko abenduaren 31tik aurrera hasitako zergaldietan ondorioak izateko, hirugarren ordinal bat gehitzen zaio Tributuei buruzko abenduaren 14ko 13/2000 Foru Lege Orokorraren 139. artikuluko 1. apartatuko b) letrari:

"Hirugarrena. Prozeduraren xedea zerga osagarria egiaztatzea edo ikertzea izatea."

Azken xedapenetako bigarrena. Sozietateen gaineko Zergari buruzko abenduaren 28ko 26/2016 Foru Legearen aldaketa.

2023ko abenduaren 31tik aurrera hasitako zergaldietan ondorioak izateko, aldatzen da Sozietateen gaineko Zergari buruzko abenduaren 28ko 26/2016 Foru Legearen 23.artikuluko 1. apartatuko b) letra, eta honela idatzita gelditzen da:

"b) Sozietateen gaineko zergaren eta zerga osagarriaren zenbaketen ondoriozkoak. Kontabilizazio horren ondoriozkoak ez dira sarreratzat hartuko".

Azken xedapenetako hirugarrena. Europar Batasuneko zuzenbidea txertatzea.

Foru lege honen bidez, Espainiako zuzenbidean txertatzen da Kontseiluaren 2022/2523 (EB) Zuzentaraua, 2022ko abenduaren 15ekoa, Batasuneko enpresa-talde multinazionalentzako eta talde nazional handientzako gutxieneko zergapetze-maila globala bermatzeari buruzkoa.

Azken xedapenetako laugarrena. Arauak emateko gaikuntza.

Gaikuntza ematen zaie Nafarroako Gobernuari eta tributuen arloan eskumena duen departamentuaren titularrari foru lege hau garatzeko eta betearazteko beharrezkoak diren xedapen guztiak emateko.

Azken xedapenetako bosgarrena. Indarra hartzea.

Foru lege honek Nafarroako Aldizkari Ofizialean argitaratu eta biharamunean hartuko du indarra, eta 2023ko abenduaren 31tik aurrera hasten diren zergaldietarako sortuko ditu ondorioak.

Nolanahi ere, behar beste zergapetu gabeko etekinen erregelari dagozkion xedapenek ondorioak izanen dituzte 2024ko abenduaren 31tik aurrera hasten diren zergaldietan, 28.3 artikuluan arautzen den kasuan izan ezik, 2023ko abenduaren 31tik aurrera hasten diren zergaldietan izanen baititu ondorioak.

Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta Estatuko Aldizkari Ofizialera igor dadila agintzen dut eta herritar eta agintariei bete eta betearaz dezatela manatzen diet.

Gobierno de Navarra

Contacte con nosotros | Accesibilidad | Aviso legal | Mapa web