LEXNAVARRA
8/2025 FORU LEGEA, EKAINAREN 30KOA, TAXIEI BURUZKO UZTAILAREN 6KO 9/2005 FORU LEGEA ALDATZEN DUENA
BON N.º 133 - 04/07/2025
- HITZAURREA
- Artikulu bakarra. Taxiei buruzko uztailaren 6ko 9/2005 Foru Legea aldatzea.
- Bigarren xedapen iragankorra. Ordenantzak egokitzeko epea.
- Azken xedapen bakarra. Indarra hartzea.
Nafarroako Foru Komunitateak eskumen osoa du ibilbidea osoki Nafarroako lurraldean duten lurreko garraioen gainean, Nafarroako Foru Eraentza Berrezarri eta Hobetzeari buruzko abuztuaren 10eko Lege Organikoaren 49.1.f) artikuluan xedatutakoaren arabera. Hala, eskumen hori baliatuta, Taxiei buruzko uztailaren 6ko 9/2005 Foru Legea onetsi zen.
Foru legea onetsi zenetik igarotako epean, atzeman da komeni dela zenbait neurri hartzea, erabiltzaileek zerbitzu hobea jaso dezaten.
Foru legeari egiten zaion aldaketak malgutu egiten du, pertsona kontratatuen bitartez, taxi-zerbitzuaren ematea, zeina foru lege horren 20. artikuluan araututa baitago, halako moldez non gaur egun dauden mugak bertan behera uzten baitira taxi-zerbitzuaren eskaintza handitze aldera, Iruñerriko Baterako Taxi Zerbitzurako Eremuaren kudeatzaile den Iruñerriko Mankomunitateak eskatu duen bezalaxe.
Zerbitzu-eskaintza handitzearen eta sektorera profesional gehiago erakartzearen helburu horrekin berarekin jasotzen da Nafarroako Taxien Kontseiluaren 2024ko otsailaren 9ko bilkuran egin zen proposamena, foru lege horren 28. artikuluaren 1. apartatua aldatzeari buruzkoa, halako moldez non taxi-lizentzia eta -baimen berriei atxikitzeko moduan egonen baitira bi urte baino gutxiagoko antzinatasuna duten ibilgailuak -epe hori da estatuko araudiak ezartzen duena hiriarteko taxi-zerbitzuak baimentzeari dagokionez-.
Halaber jasotzen dira CERMIN-Desgaitasuna duten Pertsonak ordezkatzen dituzten Nafarroako Entitateen Komiteak irisgarritasunaren alorrean eginiko zenbait proposamen; adibidez, gidarien prestakuntzari buruzkoa, zerbitzuak nola eta desgaitasuna duten pertsonendako irisgarritasun unibertsalerako baldintzak betetzen dituzten sistemen bitartez kontratatzeari buruzkoa, eta zerbitzuak aurretiaz hitzartu edo erreserbatzeari buruzkoa.
Artikulu bakarra. Taxiei buruzko uztailaren 6ko 9/2005 Foru Legea aldatzea.
Taxiei buruzko uztailaren 6ko 9/2005 Foru Legeari aldaketa hauek egiten zaizkio:
Bat. 3. artikuluko h) letra aldatzen da. Testu hau izanen du:
"h) Taxiaren sektorearen modernizazioa, hura egokituz zerbitzu-emate hobea eta ingurumenaren babestea ahalbidetzen duten aurrerapen teknikoetara, bai eta aukera-berdintasuna bermatuko duten irisgarritasun unibertsalerako neurriak hartuz ere".
Bi. 18. artikuluaren 2. apartatua aldatzen da, eta hauxe izanen du testu berria:
"2. Deialdian ezartzen den epean, taxi-lizentziaren adjudikazio-hartzaileak dokumentazioa aurkeztu beharko du, zeinaren bidez frogatuko baitu bete egiten dituela lizentzia emateko eskatzen diren baldintzak; bereziki, ibilgailuak edukitzeari, aseguru-kontratazioari eta, kasua denean, kontrataturiko gidariari buruzkoa".
Hiru. 20. artikuluaren 1., 2., 3. eta 4. apartatuak aldatzen dira, halako moduz non honela idatzita geratuko baitira:
"1. Lizentziaren titularrak gehienez ere gidari bat kontratatu ahal izanen du.
2. Taxi-zerbitzua gidari kontratatu baten bitartez ematen den guztizko denborak ezin izanen du gainditu, urtean, lizentziaren titularrak zerbitzuan ematen duena. Lizentziaren titularrak udalerrian edo Baterako Zerbitzurako Eremuko toki-entitate eskudunean aurkeztu beharko du horri buruz zehazten den informazioa, bai eta emandako baimenaren kontrola egiteko beharrezkotzat jotzen den bestelako informazioa ere, udalerri edo toki-entitate eskudunak ordenantza baten bidez zehazten duen aldizkakotasunaz.
3. Titularrak baliaezintasuna edo lanerako ezintasun iragankorra badu, edo behar bezala baimendurik zerbitzu-ematea eteten badu, edo hiltzen bada edo erretiroa hartzen badu, edo zerbitzu-emate pertsonala ezindu egiten duten egokiro frogaturiko gainerako egoera supituetan, zilegi izanen da pertsona bat kontratatuz aldi baterako ustiatzea lizentzia, 2. apartatuan ezarritako mugapena eta eskakizunak bete gabe. Nolanahi ere, egoera horren gehieneko iraupena ez da bi urte baino gehiagokoa izanen.
4. Kontrataziorako, beharrezkoa izanen da udalerriak edo Baterako Zerbitzurako Eremuan eskumena duen toki-entitateak aurretik baimena ematea. Baimen hori lizentziaren titularrak eskatuko du. Pertsona hori kontratatzeko baimenerako eskaerari baiezkoa eman zaiola ulertuko da baldin eta hilabeteko epean udalerriak edo Baterako Zerbitzurako Eremuan eskumena duen toki-entitateak ez badu ebazpen espresik eman eta jakinarazi.
Behin baimena lorturik, hilabeteko epean entitate eskudunari aurkeztuko zaio langilearen kontratuaren kopia. Halaber aurkeztuko zaio Gizarte Segurantzako araubide orokorrean langile horri emandako alta; edo langile autonomoen araubide bereziko alta, baldin bi aldeen arteko ahaidetasuna dela-eta pertsona kontratatua araubide horretan alta hartuta egon badaiteke, laneko eta gizarte-segurantzaren arloko araudiari jarraikiz".
Lau. 21. artikuluko 3. apartatua aldatzen da, eta hauxe izanen du testu berria:
"3. Hala erregelamenduz nola udal ordenantzen bidez, lanbide-prestakuntza eta -birziklapeneko programak taxutuko dira, lizentzien titularrei eta, kasua denean, pertsona kontratatuei zuzenduak. Lanbide-prestakuntza eta -birziklapeneko programetan gutxienez modulu bat txertatuko da, desgaitasuna duten pertsonentzako arreta, baliabide lagungarriak eta irisgarritasun unibertsalaren nahiz genero-ikuspegiaren gaineko oinarrizko nozioak landuko dituena".
Bost. 22. artikuluaren 2. apartatua aldatzen da, eta hauxe izanen du testu berria:
"2. Udalerriek edo Baterako Zerbitzurako Eremu batean eskumena duen toki-entitateak zilegi izanen dute egoki irizten dieten baldintza gehigarriak ezartzea, erabiltzaileei zerbitzu-emate arteza bermatzeko; zehazki, kutsagarritasun txikiagoko erregaiak erabiltzearen, segurtasunaren, ahalmenaren eta irisgarritasun unibertsalaren baldintzei dagokienez".
Sei. 28. artikuluaren 1. apartatua aldatzen da, eta hauxe izanen du testu berria:
"1. Taxi-lizentzia eta -baimen berriei bi urte baino gutxiagoko antzinatasuneko ibilgailuak baizik ez zaizkie atxikiko. Antzinatasuna lehenbiziko matrikulaziotik hasita neurtuko da".
Zazpi. 30. artikulua aldatzen da, eta hauxe izanen du testu berria:
"30. artikulua. Teknologia berriak sartzea.
Administrazio eskudunek, taxien sektorea ordezkatzen duten lanbide-elkarteekin batera, sustatuko dute pixkanaka berrikuntza teknologikoak ezar daitezen, beharrezkoak direnak taxi-zerbitzuaren emate eta horren segurtasunerako baldintzak hobetzeko eta irisgarritasun unibertsala bermatzeko; zerbitzua ordaindu eta fakturatzeko sistema automatikoak eta nabigazio-sistemak ezar daitezen; ibilgailuen zarata-maila arian-arian beheratua izan dadin; erabilitako materialen birziklapena optimiza dadin; eta sektorean agertzen den beste edozein berrikuntza ezar dadin".
Zortzi. 34. artikuluaren 1. apartatua aldatzen da, eta hauxe izanen du testu berria:
"1. Taxi-zerbitzua hitzartzeko, erabiltzaileek telefonoa nahiz beste sistema teknologiko batzuk erabili ahalko dituzte, hala nola posta elektronikoa, mugikorretarako aplikazioak, web-orriak, bideodeia eta antzekoak.
Halaber, modua emanen da zerbitzuak web edo mugikorretarako aplikazio homologatu bidez kobratzeko, aplikazioaren bitartezko aurretiazko kobrantza barne".
Bederatzi. 34. artikuluari 3. eta 4. apartatuak gehitzen zaizkio, eta hauxe izanen dute testua:
"3. Desgaitasuna duten pertsonek aurretiaz hitzartu ahalko dute eurotaxi ibilgailuen erabilera, erreserba bidez, garraio publikoaren erabilerari dagokionez aukera-berdintasuna bermatzeko.
Udalerriek edo Baterako Zerbitzurako Eremuetan eskumena duten toki-entitateek erreserbaren baldintzak kasuan kasuko ordenantzan ezarri ahalko dituzte.
4. Irrati-gailuek eta taxi-zerbitzuak hitzartzekoak diren erreserba-kudeaketako beste sistema baliokide batzuek desgaitasuna duten erabiltzaileentzat irisgarritasun unibertsaleko baldintzak betetzen dituzten komunikazio-sistemez hornituta egon beharko dute".
Hamar. 44. artikuluaren izenburua eta 1. apartatua aldatzen dira, eta hauxe izanen dute testu berria:
"44. artikulua. Desgaitasuna edo mugikortasun urria duten erabiltzaileak.
1. Administrazio eskudunek bideak jarriko dituzte erabiltzaile guztiek erabili ahal izan dezaten taxi zerbitzua. Bereziki, mugikortasun urriko pertsonentzat moldatutako ibilgailuen erabilera sustatuko dute, foru lege honetan eta indarra duen araudian ezarritakoari jarraituz.
Desgaitasuna duten erabiltzaileek zilegi izanen dute, behar izanez gero, laguntza-txakurra berekin eramatea, eta horrek ez du zerbitzuaren prezioaren igoerarik ekarriko.
Halaber, banakako ordainketarekin kontrataturiko eserlekukako zerbitzuei dagokienez, desgaitasuna duten erabiltzaileek zilegi izanen dute lagundurik joatea, laguntzaile den pertsona batekin joateko beharra dutela frogatzen dutenean. Horrek ez du zerbitzuaren prezioaren igoerarik ekarriko".
Hamaika. 57. artikuluaren 1. apartatua aldatzen da, eta hauxe izanen du testu berria:
"1. Taxi-zerbitzuei buruzko arauak hausten direnean, honakoei egotziko zaie erantzukizun administratiboa:
a) Baldin arau-haustea egin bada beharrezkoa den lizentzia edo baimenaren babespean emandako taxi-zerbitzuaren jardunean, erantzukizuna lizentzia edo baimenaren titularrari egotziko zaio.
b) Baldin arau-haustea besteren izenean jaulkitako lizentzia edo baimenen babespean emandako taxi-zerbitzuetan jardutean egin bada, erantzukizuna lizentzia edo baimena erabili duen pertsona fisiko edo juridikoari egotziko zaio, bai eta lizentzia edo baimenaren bere izenean jaulkita daukan pertsonari ere, salbu eta frogatzen badu ez duela bere adostasuna adierazi.
c) Baldin arau-haustea kasuko lizentzia edo baimenaren babesik gabe emandako taxi-zerbitzuetan jardutean egin bada, erantzukizuna ibilgailuaren titularrari edo gidariari egotziko zaio.
d) Baldin arau-haustea taxi-zerbitzua hitzartzean edo aurretiaz erreserbatzean egin bada, erantzukizuna zerbitzuaren hitzartzea edo aurretiazko erreserba egiten duten irratiak kudeatzen dituzten elkarteei edo bestelako pertsona fisiko edo juridikoei egotziko zaie.
e) Baldin arau-haustea erabiltzaileek eta, oro har, aurreko apartatuetako kasuetan egon ez baina aipatu arauen eraginpeko jarduerak egiten dituzten hirugarren pertsonek egin badute, erantzukizuna egotziko zaio arau urratuaren xede den pertsona fisiko edo juridikoari, edo kasuko arauek berariaz erantzule egiten dutenari".
Hamabi. 60. artikuluari p) letra gehitzen zaio, eta hauxe izanen du testu berria:
"p) Hitzartutako edo aurretiaz erreserbatutako taxi-zerbitzu bat ez ematea, salbu eta horretarako kausa justifikatuak daudenean".
Lehenengo xedapen iragankorra.-Desgaitasuna duten erabiltzaileen irisgarritasun unibertsalerako baldintzak betetzen dituzten hitzartze-sistemak.
Hitzartze-sistemak 34.4 artikuluaren arabera egokitu beharko dira, desgaitasuna duten erabiltzaileendako irisgarritasun unibertsaleko baldintzak bete ditzaten, foru lege honek indarra hartzen duenetik bi urteko gehieneko epean.
Bigarren xedapen iragankorra. Ordenantzak egokitzeko epea.
Lege-aldaketa honek indarra hartzen duenetik sei hilabeteko epea izanen dute udalerriek edo Baterako Zerbitzurako Eremu batean eskumena duten toki-entitateek, taxi-zerbitzuei buruzko beren ordenantzak lege-aldaketa honetan xedatzen denera egokitzeko.
Azken xedapen bakarra. Indarra hartzea.
Foru lege honek Nafarroako Aldizkari Ofizialean argitaratua izan eta biharamunean hartuko du indarra.
Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta Estatuko Aldizkari Ofizialera igor dadila agintzen dut eta herritar eta agintariei bete eta betearaz dezatela manatzen diet.
