LEXNAVARRA
52/2025 FORU DEKRETUA, MAIATZAREN 28KOA, NAFARROAKO KIROL-LANBIDEETAN ARITZEKO GAIKUNTZEN ARAUBIDEA EZARTZEN DUENA
BON N.º 118 - 13/06/2025
- ZIOEN AZALPENA
- 1. artikulua. Foru dekretuaren xedea.
- 2. artikulua. Aplikazio eremua.
- 3. artikulua. Gaikuntza.
- 4. artikulua. Laneko edo boluntario araubideko gutxieneko esperientziaren betekizunak eta egiaztagiriak.
- 5. artikulua. Esperientzia orduak baliozkotzea titulazioaren arabera.
- 6. artikulua. Erantzukizunpeko adierazpena aurkeztea.
- 7. artikulua. Erantzukizunpeko adierazpena zuzentzea.
- 8. artikulua. Erantzukizunpeko adierazpenaren eta ezarritako epean ez aurkeztearen ondorioak.
- 9. artikulua. Gaikuntzaren indarraldia.
- 10. artikulua. Gaikuntzaren galera.
- 11. artikulua. Pertsona gaituak inskribatzeko araubidea.
- Xedapen gehigarri bakarra. Goi errendimenduko lehiaketak.
- Azken xedapenetako lehena. Foru dekretu hau garatzeko ahalmena.
- Azken xedapenetako bigarrena. Indarra hartzea.
1
Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 44.14 artikuluak Nafarroari ematen dio eskumen esklusiboa kirolaren sustapenaren arloan. Orobat, eta aipatu lege organikoaren 44.26 artikuluan xedatutakoari jarraikiz, Nafarroak eskumen esklusiboa du profesionalen elkargoen arloan eta lanbide tituludunetan aritzearen arloan.
Nafarroako Foru Komunitateak hartutako eskumenok erabiliz, apirilaren 4ko 18/2019 Foru Legea, Nafarroan kirol-lanbidean hasteari eta jarduteari buruzkoa, eman zen. Foru Lege honek xedetzat du kirol arloko lanbide jakin batzuetan hasteko eta aritzeko oinarrizko alderdiak arautzea. Berariaz adieraziko da zeintzuk diren lanbide horiek, lanbide bakoitzaren jardun-eremu funtzional orokorra ezarriko da, eta aditzera emanen da lanbide bakoitzean sartzeko zer kualifikazio eskatzen den.
Lege-aldaketa orok trantsizio-arazoak planteatzen ohi ditu, eta horixe da 18/2019 Foru Legea, apirilaren 4koak, Nafarroan kirol-lanbidean hasteari eta jarduteari buruzkoa, zeinak Nafarroako Foru Komunitatean lehendabizikoz arautzen baitu kirol-lanbide batzuetan sartzea eta haietan aritzea. Lanbide libreen araubide bat lanbide arautuen beste bat bihurtzen denean dagoen aldi baterakotasuna kontu handiz jorratzen da foru legean, eta saiatzen da bateratzen, batetik, indarrean jarri zelarik Nafarroan lege-araubidearen xede den lanbideetakoren batean legez eskatutako kualifikaziorik gabe jada lan egiten ari zirenen eskubideak, eta bestetik, foru legeak lortu nahi duen helburua; alegia, haien hartzaileei emandako lanbide-zerbitzuak ahalik eta kalitate handienetakoak izan daitezela haien hartzaile diren pertsonendako.
2
Apirilaren 4ko 18/2019 Foru Legeak, Nafarroan kirol-lanbidean hasteari eta jarduteari buruzkoak, lehenengo xedapen iragankorrean hauxe xedatzen du: harik eta abuztuaren 27ko 66/2014 Foru Dekretuan ezarritako prozedura administratiboak ezartzen diren arte, egiaztatu ahal izateko kiroleko profesionalek eskuraturiko gaitasunak laneko esperientziaren bitartez edo prestakuntza bide ez-formalen bitartez, bidea izanen da lanbide horietarako gaitzea erantzukizunpeko adierazpena aurkezten dutenak, foru legea indarrean sartu aurretik jarduera profesional arautuak etengabe edo ez noizbehinka egiten zituztela frogatzen dutenak eta laneko esperientziaren bitartez edo prestakuntza bide ez-formalen bitartez eskuraturiko lanbide gaitasunak profesionalen aintzatespena eskatzeko konpromisoa hartzen dutenak, erregelamenduz ezartzen diren epean eta baldintzetan. Aipatu xedapen iragankorraren arabera, erregelamenduzko garapena bi urteko epean onetsi beharko da gehienez ere.
Foru legearen bosgarren xedapen iragankorrak, berriz, Lehen xedapenean kiroleko profesionalentzat ezarritako behin-behineko gaikuntzak eta gaitasunen aintzatespenak aplikatzekoak izanen zaizkie, orobat, jasotako lanbide-jarduerak boluntarioen araubidean egiten dituztenei.
11/2024 Foru Legeak, uztailaren 5ekoak, Nafarroan kirol-lanbidean hasteari eta jarduteari buruzko apirilaren 4ko 18/2019 Foru Legearen zenbait xedapen aldatu ditu. Haien artean, apirilaren 4ko 18/2019 Foru Legearen azken xedapenetako laugarrenaren 2. apartatua aldatu zen, foru legean araututako lanbideetan aritzeko gaitzen duten lanbide-kualifikazioak exijitzen hasteko unea 2025eko irailaren 1era atzeratuz.
Halaber, aldatu egin zen Nafarroan Kirol-lanbidean Hasteari eta Jarduteari buruzko apirilaren 4ko 18/2019 Foru Legeren zortzigarren xedapen iragankorra; hala bada, 2025eko irailaren 1a baino lehen kirol-lanbideetako batean jardunean daudenek data hori baino lehen aurkeztu beharko dute erantzukizunpeko adierazpena.
Bestalde, uztailaren 18ko 659/2023 Errege Dekretuak, Lanbide Heziketaren Sistemaren antolamendua garatzekoak, ezartzen du lan esperientziaren edo beste bide formal edo informal batzuen bidez eskuratutako gaitasun profesionalak egiaztatzeko prozedura etengabe irekita dagoen administrazio prozedura bat dela orain, eta Gaitasun Profesionalen Estandarren Katalogo Nazionala izanen du erreferente moduan, horren gaineko deialdirik behar izanik gabe.
3
Horrenbestez foru dekretu honen xedea hauxe da: foru lege horretan araututako kirol-lanbideetan etengabe eta ez noizbehinka aritzen ziren eta bertan eskatutako kalifikazioak ez zituzten pertsonen behin-behineko gaikuntzarako prozedura eta baldintzak arautzea. Pertsona horiek etengabe aritu izana egiaztatu behar dute, eta bide ez-formalen edo lan esperientziaren bitartez eskuratutako lanbide-gaitasunen aintzatespena eskatzeko konpromisoa hartu behar dute.
Pertsona horiek gaitzeko modua eratzen da erantzukizunpeko adierazpena aurkezteko prozeduraren bitartez, Administrazio Publikoen Administrazio Prozedura Erkideari buruzko 39/2015 Legearen 69. artikuluan xedatutakoarekin bat etorriz. Hala, erantzukizunpeko adierazpena aurkezte hutsak pertsona horien behin-behineko gaikuntza ekarriko du ordura arte aritzen ziren kirol-lanbideetan aritu daitezen, hargatik eragotzi gabe administrazioak egiaztatu, kontrolatu eta ikuskatzeko dituen ahalmenak.
Foru dekretu honek adierazten du aurretiko lan esperientziaren zer baldintza bete beharko diren pertsona batek behin-behineko gaikuntza eskura dezan, barne hartuta, eranskin batean, kirol-lanbide bakoitzean behar diren lan esperientziako ordu kopurua. Eskatutako esperientzia orduen kopurua ezartzen da lanbide bakoitzean aritzeko gaikuntza ematen duten titulazioetako bakoitzaren prestakuntza ordu kopuruaren arabera. Nolanahi ere, ezartzen da pertsonei behar den gaikuntza ematea, baldin eta 2025eko irailaren 1ean lanbide-jardueretan aritzen badira aurretiko lan esperientziaren betekizunak bete gabe eta prestakuntza jakin batzuk hasi dituztela egiaztatzen badute.
Erregelamendu honetan ezarritako gaikuntzak behin-behineko gaikuntza gisa ezartzen dira, eta haien indarraldia adierazten da. Indarraldi hori ezarri da interesdunek aski denbora izan dezaten foru legean eskatutako lanbide-kualifikazioak eskuratzeko. Indarraldi luzea ezarri da, dagoen eskarirako aski lanbide-eskaintza bermatua egon dadin. Hala, indarraldi luzeagoa adierazten da, eskatutako gutxieneko titulazioa unibertsitate titulazioa duten lanbideei dagokienez, titulazioa eskuratzeko behar den denbora luzeagoa baita unibertsitateaz kanpoko beste batzuen kasuan baino. Ildo horretatik, ez da ahaztu behar apirilaren 4ko 18/2019 Foru Legearen helburu nagusia dela arian-arian ezartzea kualifikazio egokiak eta behar den prestakuntza dituzten profesionalek osatutako kirol-sistema, eta bermatzea zerbitzuak erabiltzaileendako segurtasun- eta osasun-bermeekin ematen direla. Nolanahi ere, pixkanaka-pixkanaka ezarri behar da, kirol-zerbitzuak ematen dituzten erakundeen eskariari aurre egiteko behar adina profesional gabe gelditzeko arriskurik egon ez dadin.
4
Kontuan hartuta arestian azaldutako guztia, Nafarroan kirol-lanbidean hasteari eta jarduteari buruzko apirilaren 4ko 18/2019 Foru Legea aplikatzeko, ezinbestekoa da haren lehen xedapen iragankorra erregelamenduz garatzea, eta betekizunak ezartzea Nafarroan kirol-lanbideetan behin-behineko aritzeko gaikuntza eman dakien 2025eko irailaren 1a baino lehenago foru legean eskatutako lanbide-kualifikazioak eduki gabe lanbideren batean aritzen zirenei. Gaikuntza hori aldi baterako eratzen da, eta aski indarraldia ezartzen da interesdun guztiak egon daitezen eskatutako lanbide-kualifikazioak eskuratzeko moduan.
Aldi baterako gaikuntza ezin da hartu lanbide-gaitasunen nolabaiteko aintzatespentzat. Gaikuntzak ez du ondorio akademikorik, eta ez dakar gaitasunen eta titulazioen homologazio, egiaztapen, aintzatespen eta baliozkotzerik; haren xedea da, besterik gabe, merkatutik ez kanporatzea araudiaren aurretik araudi berriak eskatzen duen kualifikaziorik gabe kirol-lanbideetan aritzen zirenak.
Hondarrean, gaikuntza eskuratzeko eta atxikitzeko, gaitutako pertsonek Gaitasun Profesionalen Estandarren Katalogo Nazionalean zehaztutako kualifikazioekin lotutako lanbide-gaitasunak aintzatesteko eta egiaztatzeko modu iraunkorrean irekitako prozeduran parte hartu behar dute. Foru dekretuak gaikuntza galtzea eta dagokion erregistro ezereztea xedatzen du, baldin eta urtebeteko epean, erantzukizunpeko adierazpena aurkezten denetik hasita, ez badute egiten prozeduran parte hartzeko eskaerarik, eta eskaera ez bada onartzen bertan parte hartzeko ezarritako betekizunak betetzen ez dituztelako. Ondorio bera sortuko da, baldin eta prozeduran parte hartzen duen gaitutako pertsonak ebaluazio prozesua gainditzen ez badu, eta ez baditu egiaztatzen gaituta zegoen lanbidean aritzeko behar diren gaitasun unitateak.
Aurreikusitako erregelamenduzko garapena Nafarroako Gobernuari dagokio, foru legearen azken xedapenetako hirugarrenarekin bat etorriz.
Foru dekretu hau egiteko prozeduran, Nafarroan ordezkaritza handiena duten sindikatuei kontsulta espezifikoa egin zaie, Nafarroan Kirol-lanbidean Hasteari eta Jarduteari buruzko apirilaren 4ko 18/2019 Foru Legearen hamaseigarren xedapen gehigarrian ezarritakoa betez.
Horrenbestez, Kultura, Kirol eta Turismoko kontseilariak proposaturik, Nafarroako Kontseiluarekin bat etorrita, eta Nafarroako Gobernuak bi mila eta hogeita bosteko maiatzaren hogeita zortziko bilkuran hartutako Erabakiarekin bat,
DEKRETATZEN DUT:
1. artikulua. Foru dekretuaren xedea.
Foru dekretu honen xedea da Nafarroan Kirol Lanbidean Hasteari eta Jarduteari buruzko apirilaren 4ko 18/2019 Foru Legearen lehen xedapen iragankorrean dauden aurreikuspenak erregelamenduz garatzea, eta betekizunak eta prozedura ezartzea foru lege horretan araututako kirol-lanbideetan, bertan eskatutako kualifikazioak eduki gabe, etengabe eta ez noizbehinka aritzen diren pertsonei haietan aritzeko behin-behineko gaikuntza eman dakien.
2. artikulua. Aplikazio eremua.
1. Foru dekretu honen xedapenak profesionalei eta boluntarioei aplikatuko zaizkie, baldin eta Nafarroan kirol-lanbidean hasteari eta jarduteari buruzko apirilaren 4ko 18/2019 Foru Legean araututako jardueretan, etengabe eta ez noizbehinka, aritzen badira, eta eskatutako gutxieneko kualifikaziorik ez badute.
2. Gaikuntza eskuratzeko prozedura hasi beharko dute, nolanahi ere, 2025eko irailaren 1a baino lehenago.
1. Gaikuntza eskuratzeko prozedura hasiko da interesdunak eskatuta.
Eskaera eginen da erantzukizunpeko adierazpen bat aurkeztuz Nafarroako Foru Komunitateko kirol-administrazioan, foru dekretu honen 6. artikuluan adierazitakoaren arabera.
Erantzukizunpeko adierazpena aurkezte hutsak eskatzailea gaituko du jardueran aritzen jarrai dezan, foru dekretu honen 9. artikuluan ezarritako indarraldiarekin, hargatik eragotzi gabe Nafarroako Foru Komunitateko kirol-administrazioak egiaztatzeko, kontrolatzeko eta ikuskatzeko ahalmenak.
Gaikuntzak ekarriko du gaitutako pertsonak Nafarroako Kirolaren Erregistroko Kiroleko Profesionalen Atalean inskribatzea, haren arau erregulatzailean ezarritakoaren arabera. Nolanahi ere, boluntario araubidean jardueran ari diren pertsona gaituak ez dira erregistroan inskribatuko.
2. Gaikuntza eskuratzeko, Nafarroan kirol-lanbidean hasteari eta jarduteari buruzko apirilaren 4ko 18/2019 Foru Legean arautzen diren jardueretan, etengabe eta ez noizbehinka, eta foru lege horretan eskatutako gutxieneko kualifikazioa eduki gabe, aritzen diren pertsonek honako betekizun hauek bete beharko dituzte:
a) Foru dekretu honen 1. eranskinean adierazten diren laneko eta boluntario araubideko gutxieneko esperientziako betekizunak betetzea.
b) Konpromisoa hartzea modu iraunkorrean irekitako prozeduran, hau da, Gaitasun Profesionalen Estandarren Katalogo Nazionalean zehaztutako kualifikazioei lotutako lanbide gaitasunak aintzatesteko eta egiaztatzeko prozeduran, parte hartzeko.
3. Nolanahi ere, baldin eta apirilaren 4ko 18/2019 Foru Legean araututako jardueretan aritzen diren pertsonek ez badituzte betetzen foru dekretu honen 1. eranskinean adierazitako laneko eta boluntario araubideko gutxieneko esperientziaren betekizunak, gaikuntza eskuratzeko aukera izanen dute, betiere egiaztatzen badute, 2025eko irailaren 1a baino lehenago, hasi dituztela araubide bereziko edo bitarteko aldiko (1. maila) edo erdi mailako hasierako zikloko kirol-irakaskuntzen bloke komuneko honako prestakuntza hauek:
a) Kirol-modalitate baten entrenatzailea (erdi maila).
b) Kirol-modalitate baten entrenatzailea (oinarrizko maila).
c) Desgaitasuna duten pertsonendako jardueretako kirol-modalitate baten kirol-begiralea.
d) Kirol-modalitate baten kirol-begiralea (erdi maila edo hobekuntza).
e) Kirol egokituaren modalitate esklusiboen kirol-begiralea, desgaitasuna duten pertsonendako jardueretan.
f) Kirol-begiralea (oinarrizko maila edo kirol-hastapenekoa).
Jardueren mailek Nafarroako kirol-lanbidean hasteari eta jarduteari buruzko apirilaren 4ko 18/2019 Foru Legearen seigarren xedapen gehigarrian xedatutakoa beteko dute.
Apartatu honetan xedatutakoaren arabera eskuratutako gaikuntza ondoriorik gabe geldituko da bloke komuna edo hasierako zikloa gainditu ezean.
4. artikulua. Laneko edo boluntario araubideko gutxieneko esperientziaren betekizunak eta egiaztagiriak.
1. Foru dekretu honen 3. artikuluan ezarritakoaren ondorioetarako, Nafarroan kirol-lanbidean hasteari eta jarduteari buruzko apirilaren 4ko 18/2019 Foru Legean arautzen diren jardueretan, etengabe eta ez noizbehinka, eta foru lege horretan eskatutako gutxieneko kualifikazioa eduki gabe, aritzen diren pertsonek laneko edo boluntario araubideko gutxieneko esperientziaren betekizunak bete beharko dituzte; alegia, foru dekretu honen 1. eranskinean adierazitakoak.
2. Nafarroako Foru Komunitateko Administrazioko kirol-administrazioak egiaztatzeko, kontrolatzeko eta ikuskatzeko dituen ahalmenei dagokienez, aurreko apartatuan aipatutako lan-esperientzia honako agiri hauen bidez justifikatuko da:
a) Soldatapekoei dagokienez, Gizarte Segurantzako Diruzaintza Nagusiaren, mutualitatearen edo antzeko izaerako erakundearen ziurtagiria, enpresa, lan kategoria (kotizazio taldea) eta kontratazio aldia adierazita, eta lan esperientzia lortutako enpresaren ziurtagiria edo lan kontratua, kontratuaren epe zehatzen iraupena, egin den lanbide-jarduera eta zenbat denboran egin den berariaz adierazita. Administrazio publikoko langileei dagokienez, lanbide-zerbitzuak emandako administrazio publikoaren ziurtagiri baten bidez eginen da.
b) Langile autonomoei edo norberaren konturako langileei dagokienez, ekonomia-jardueren gaineko zergako alta ziurtagiria, eta Gizarte Segurantzako Diruzaintza Nagusiaren, mutualitatearen edo antzeko izaerako erakundearen ziurtagiria, dagokion araubide bereziko alta aldiei buruzkoa, eta egindako lanbide-jardueraren deskribapena eta jarduera egin duen denbora-tartea.
Egiaztagirietan, soldatapeko langileei nahiz norberaren konturako langileei dagokienez, dedikazio- edo lan-orduen kopuruaren justifikazioa jaso beharko da, artikulu honen lehen apartatuan xedatutakoaren ondorioetarako.
3. Esperientziaren justifikazioa, jarduera boluntario araubidean egin denean, boluntarioak zerbitzuak egin dituen erakundeak emandako egiaztagiriaren bidez eginen da, eta harekin batera aurkeztuko dira, ezinbestean, ziurtatutako datuak abalatzen dituzten agiriak, hala nola boluntario kontratua, arrisku aseguruaren agiria edo antzeko beste edozein agiri. Agiri horietan jasoko da, ezinbestean, zerbitzuak emandako denbora.
Aurreko paragrafoan jasotakoaren salbuespen gisa, federazio eremuan bakarrik, esperientzia justifikatzen ahalko da teknikarien estamentuari dagokion federazio lizentziaren bidez edo dagokion kirol-federazioak egindako egiaztagiriaren bidez. Kasu horretan, eta 1. eranskinean eskatutako esperientzia orduen kopuruaren ondorioetarako, 275 ordu zenbatuko dira urtean ekipo edo talde bakoitzeko.
4. Artikulu honetan adierazitako agiriak ez dira erantzukizunpeko adierazpenarekin batera aurkeztu beharko, baina interesdunak halakoak eduki beharko ditu badaezpada administrazioak eskatuko balizkio ere.
5. artikulua. Esperientzia orduak baliozkotzea titulazioaren arabera.
Baldin eta pertsona batek kirol-lanbide batean aritzeko gaikuntza eskuratu nahi badu eskatutako gutxieneko kualifikazioa eduki gabe, baina maila txikiagoko titulazio ofizialarekin, egiaztatu beharreko esperientzia orduen kopurua 2. eranskinean ezarritakoaren arabera murriztuko da.
Baliozkotu beharreko orduen gehieneko kopurua, egiaztatutako titulazioaren arabera, 1. eranskinean lanbideetako bakoitzean aritzeko eskatutako esperientzia orduen kopurua kenduko da.
Kirol-modalitate bereko titulazio ofizial bat baino gehiago edukitzea egiaztatuz gero, esperientzia orduak baliozkotzeko, ikasketa-maila handieneko titulazioa baino ez da kontuan hartuko.
Egiaztatutako titulazioaren arabera esperientzia orduak baliozkotzeko, artikulu honetan adierazitakoaren arabera, gaikuntza eskatzen den lanbidearekin lotutako titulazioak baino ez dira kontuan hartuko.
6. artikulua. Erantzukizunpeko adierazpena aurkeztea.
1. Erantzukizunpeko adierazpena interesdunak edo, hala badagokio, haren ordezkariak aurkeztuko du, Nafarroako Foru Komunitateko Kirol Administrazioak onetsitako eredu normalizatuaren bidez, 2025eko irailaren 1a baino lehenago.
2. Erantzukizunpeko adierazpena egun hori baino geroago aurkezten dutenek ez dute gaikuntzarik lortuko, eta jarduera bertan behera utzi beharko dute.
3. Foru dekretu honetan ezarritakoaren ondorioetarako, erantzukizunpeko adierazpentzat hartzen da profesionalek eta boluntarioek, edo haien ordezkariak, sinatutako agiria, zeinaren bidez, beren erantzukizunpean, honako hau adierazten baita:
a) Bete egiten dituzte foru dekretu honetan Nafarroan kirol-lanbide batean edo, hala badagokio, batzuetan aritzeko gaikuntza eskuratzeko eskatzen diren betekizunak.
b) Prest daude egokiak diren egiaztagiriak aurkezteko, hartarako eskaera eginez gero.
c) Konpromisoa hartzen dute laneko esperientziaren bitartez edo bide ez-formalak erabiliz eskuratutako lanbide-gaitasunak aintzatesteko eskatzeko, dagokion prozeduraren bidez.
4. Kirol-begiralearen, entrenatzailearen, kirol-zuzendariaren eta prestatzaile fisikoaren lanbidean sartzeko eta aritzeko, betiere adingabeekin lotuta aritzen bada, egiaztatu beharko da ez dela kondenatua izan, epai irmoan, sexu-askatasunaren eta sexu-ukigabetasunaren aurkako delituren batengatik. Berariazko erantzukizunpeko adierazpen baten bidez frogatzen ahalko da hori, eta berariazko baimena emanen da datuak Sexu Delituen Egileen Erregistro Nagusian kontsultatzeko, edo, hala egin ezean, aipatutako erregistroaren ziurtagiri negatiboa aurkeztu beharko da.
Aurreko betebeharra aplikatuko zaie irakaskuntza pribatuko gorputz hezkuntzaren irakasleei. Aitzitik, apirilaren 4ko 18/2019 Foru Legearen 11. artikuluak xedatzen duen bezala, profesionalei ez zaie erantzukizunpeko adierazpena eskatuko baldin Gorputz Hezkuntzako irakasle ari badira esklusiboki, Administrazio Publikoarekin loturik, zuzenbide administratiboaren edo lan zuzenbidearen bidez araututako zerbitzu erlazio baten bidez, galarazi gabe Administrazio Publikoak Erregistroari bidali behar izatea apartatu honetan ezarritako informazioa, Nafarroako Kirolaren Erregistroa arautzen duen erregelamenduan ezarritako moduan.
5. Boluntarioek erantzukizunpeko adierazpena aurkeztu beharko dute Nafarroako Foru Komunitateko Administrazioan behin-behineko gaikuntza eskuratzeko, baina ez dute inskribatu beharko Nafarroako Kirolaren Erregistroko Kiroleko Profesionalen Atalean.
6. Adierazpena Nafarroako Gobernuaren erregistro orokor elektronikoaren bitartez aurkeztuko da edo Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan ezarritako gainerako lekuetan.
7. Administrazio Publikoen Administrazio Prozedura Erkidearen urriaren 1eko 39/2015 Legean ezarri bezala aurkeztuko da erantzukizunpeko adierazpena. Pertsona fisikoek une oro hautatzen ahalko dute Nafarroako Foru Komunitateko kirol-administrazioarekin bitarteko elektronikoen bitartez komunikatzen direnetz, lege horren 14. artikuluan ezarri bezala.
8. Erantzukizunpeko adierazpenaren eredu normalizatuan, gutxienez, honako informazio hau jasoko da:
a) Kirol arloko profesionalaren identifikazio-datuak (izena, abizenak eta helbidea) eta, hala badagokio, ordezkariarenak, sexuaren aldagaia barne, bai eta nortasun agiri nazionala edo antzeko identifikazio agiri batena ere.
b) Erantzukizun zibileko aseguru polizaren datuak edo, hala badagokio, aseguru hori banaka kontratatzeko betebeharretik salbuesteko erantzukizunpeko adierazpena.
c) 2025eko irailaren 1a baino lehenago aritutako kirol-lanbidea edo -lanbideak, eta egindako lanbide-jarduerak presentzia fisikorik behar duenetz.
d) Lanbide-jarduera gauzatzean garatutako zeregina edo maila. Entrenatzailearen lanbide-jardueren kasu zehatzean, honako maila hauek identifikatu beharko ditu: oinarrizko maila, erdi maila eta errendimendu maila.
e) Lanbideetan aritzeko bide ez-formalen bidezko prestakuntzaren edo lanbide-esperientziaren datuak.
f) Lanbide-ariketa etengabearen edo ez noizbehinkakoaren datuak, foru dekretu honetan ezarritakoaren arabera.
g) Lehen sorospenetako prestakuntza, Nafarroan kirol arloko lanbideetan aritzeko lehen sorospenetako hasierako prestakuntzaren egiaztapena arautzen duen ekainaren 15eko 63/2022 Foru Dekretuak xedatutakoaren arabera.
h) Lanbide-jardueran aritzeko desgaikuntza dakarten zehapen penal edo administratibo irmoak. Ez dira sartuko kirol federazioek ezarritako etete edo desgaikuntza zehapenak.
9. Nafarroako Foru Komunitatearen kirol-administrazioak datu pertsonalak tratatuko ditu datu pertsonalak babesteko arloan indarra duen araudian ezarritako betebeharrak betez.
10. Nafarroako Foru Komunitateko Kirol Administrazioak etengabe argitaratuta, eguneratuta eta elektronikoki eskuragarri izanen ditu erantzukizunpeko adierazpenaren ereduak.
7. artikulua. Erantzukizunpeko adierazpena zuzentzea.
Baldin eta erantzukizunpeko adierazpenak ez baditu betetzen Administrazio Publikoen Administrazio Prozedura Erkideari buruzko urriaren 1eko 39/2015 Legearen 69. artikuluko betekizunak, foru dekretu honetan adierazitakoak eta aplikatu beharreko legeriak eskatutako beste batzuk, errekerimendua eginen zaio interesdunari hamar eguneko epean falta zuzentzeko edo aurkeztu ez dituen nahitaezko dokumentuak aurkezteko, eta adieraziko zaio ezen, hala egin ezean, eskaeran atzera egindakotzat joko dela eta eskabidea artxibatuko dela, horretarako ebazpena aipatutako legearen 21. artikuluan jasotako moduan eman ondotik.
8. artikulua. Erantzukizunpeko adierazpenaren eta ezarritako epean ez aurkeztearen ondorioak.
1. Erantzukizunpeko adierazpena aurkezte hutsak, foru dekretu honetan ezarritako moduan eta baldintzekin, gaikuntza emanen du, aldi baterako, 2025eko irailaren 1etik aurrera, adierazpena aurkezten duenak aritzen zen lanbide-jardueran aritzen jarrai dezan, eta erakunde berean edo beste batean, 2025eko irailaren 1a baino lehen, garatzen zuen zeregin edo mailara mugatuko da.
2. Gaikuntza ez da eraginkorra izanen entrenatzailearen jardueran aritzeko dagokion kualifikazioa edukitzea eskatzen duten kirol-federazioetan.
3. Artikulu honetako lehen apartatuak aipatzen dituen gaikuntzek ez dakarte prestakuntza prozesurik baliozkotzea edo egiaztatzea, eta ez dira ikasketa- eta lanbide-titulutzat hartzen; alegia, profesionalak 2025eko irailaren 1a baino lehenago garatzen zuen lanbide-eginkizunean aldi baterako aritzea baino ez dute gaitzen.
4. Nafarroako Foru Komunitateko kirol-administrazioak, kudeaketa-zuzendaritzako titularraren ebazpen bidez, lanbidean aritzeko emandako behin-behineko gaikuntza ondoriorik gabe uzten ahalko du, baldin eta, aintzat hartuta garatutako jardueraren ezaugarriak, beharrezko kualifikaziorik gabe lanbidean aritzeak zuzeneko arrisku larruan paratzen baditu lanbide-zerbitzuen hartzaileen osasuna eta segurtasuna. Horretarako, ematen den ebazpenak egoera horretan dauden jardueren zerrenda hartuko du barne.
5. Foru dekretu honetan xedatutakoaren arabera hartutako gaikuntzak ez du salbuetsiko modu iraunkorrean irekitako prozeduran parte hartzetik; hau da, Gaitasun Profesionalen Estandarren Katalogo Nazionalean zehaztutako kualifikazioei lotutako lanbide gaitasunak aintzatesteko eta egiaztatzeko prozeduran parte hartzetik.
6. Erantzukizunpeko adierazpena 2025eko irailaren 1a baino lehenago ez aurkezteak eragotziko du foru dekretu honetan ezarritako gaikuntza eskuratzea. Halaber, jardueran erantzukizunpeko adierazpena aurkeztu gabe aritzea arrazoia izanen da dagokion zehapen prozedura irekitzeko, hargatik eragotzi gabe administrazioak lanbidean aritzea eteteko behar diren jarduketak egiteko duen ahalmena.
7. Erantzukizunpeko adierazpena aurkezteak aukera emanen dio organo eskudunari egiteko, noiznahi, agiri horretan jasotako datuen ikuskapen eta egiaztapen lanak, egiazkoak diren jakiteko, eta kautelazko edo zehatzeko neurriak hartuko ditu, egokia bada.
8. Erantzukizunpeko adierazpenari erantsi edo gehitzen zaion funtsezko edozein datu, adierazpen edo agiri zehaztugabea edo faltsua dela egiaztatzen bada, edo legezko betekizunak betetzen ez direla egiaztatzen bada, horrek lanbidean jardutea eragotziko du, alde batera utzi gabe dauden erantzukizun penal, zibil edo administratiboak.
Kasu horretan, organo eskudunak, interesdunari entzun ondotik, inguruabar horiek adieraziko dituen ebazpena emanen du. Ebazpen horren bidez, Nafarroako Kirolaren Erregistroko inskripzioa deuseztatuko da, hala badagokio, eta interesdunak lanbide-jardueran aritzeari utzi beharko dio.
9. Erantzukizunpeko adierazpenari erantsitako edozein datu, adierazpen edo dokumentu zehaztugabea edo faltsua denean, aurreko atalean ezarritakoaren ondorioetarako, ulertuko da funtsezkoa dela baldin eta lanbide kualifikazioari, bete beharreko lanbideari edo, hala badagokio, eska daitekeen erantzukizun zibil profesionaleko aseguruari eragiten badio.
9. artikulua. Gaikuntzaren indarraldia.
1. Foru dekretu honetan araututako gaikuntzek gehieneko iraupen hau izanen dute:
a) Eskatutako gutxieneko titulazioa unibertsitate titulazioa duten lanbideetan aritzeko, gaikuntza indarrean egonen da 2033. urteko abenduaren 31ra arte.
b) Gainerako kirol-lanbideetan aritzeko, gaikuntza indarrean egonen da harik eta dagokion lanbide-ziurtagiria eskuratzen den arte edo, hala badagokio, federazio titulazioen eta araubide bereziko kirol-irakaskuntzen edo bitarteko aldiko prestakuntzen arteko homologazio-, baliozkotze- edo baliokidetasun-ziurtagiria eskuratzen den arte.
Nolanahi ere, foru dekretu honen 3.3 artikuluan ezarritakoaren arabera emandako gaikuntzek 2028. urteko abenduaren 31ra arteko iraupena izanen dute gehienez, betiere dagokion prestakuntza gainditzen bada.
2. Nolanahi ere, gaikuntza hori mugatuko da erakunde berean edo beste batean zeukaten zeregin edo mailara, eta ez du balioko entrenatzaile moduan jarduteko dagokion kualifikazioa izatea eskatzen duten kirol-federazioetarako, baldin eta erregelamenduz hala ezarri badute.
10. artikulua. Gaikuntzaren galera.
1. Gaikuntza eskuratutako pertsonak ez badu eskatzen urtebeteko epean, erantzukizunpeko adierazpena aurkezteko datatik aurrera zenbatzen hasita, inskriba dezaten modu iraunkorrean irekitako prozeduran, hau da, Gaitasun Profesionalen Estandarren Katalogo Nazionalean zehaztutako kualifikazioei lotutako lanbide gaitasunak aintzatesteko eta egiaztatzeko prozeduran, galdu eginen du, kontraesanezko administrazio espedientearen ondotik, eskuratutako gaikuntza eta erregistroa ofizioz ezeztatuko du.
Gaikuntza galduko da, halaber, baldin eta, prozeduran parte hartzea eskatuta ere, bertan onartzen ez badute lanbide-gaitasunak egiaztatzeko prozedurarako ezarritako betekizunak betetzen ez dituelako.
Era berean, gaikuntza galduko da eta, ondorioz, erregistroa ezeztatuko da, baldin eta prozeduran parte hartzen duen gaitutako pertsonak ez baditu egiaztatzen gaitua zegoen lanbidean aritzeko behar diren lanbide-gaitasunaren estandarrak.
Nolanahi ere, gaitutako pertsonen gaikuntzarik ez da galduko, baldin eta, lanbide-gaitasunaren estandarra egiaztatzeko prozeduran parte hartzeko eskatuta ere, hura ez badago oraindik lotuta hezkuntza sistemako nahiz enplegurako dagoen lanbide-prestakuntza egiaztagarriaren eskaintzarekin.
2. Gaikuntza galduko da, orobat, baldin eta foru dekretu honen 3.3 artikuluan xedatutakoaren arabera berau eskuratzen duten pertsonek ez badute gainditzen araubide bereziko edo bitarteko aldiko (1. maila) edo erdi mailako hasierako zikloko kirol-irakaskuntzen bloke komuneko prestakuntza.
11. artikulua. Pertsona gaituak inskribatzeko araubidea.
1. Pertsona gaituak Nafarroako Kirolaren Erregistroko Kiroleko Profesionalen Atalean inskribatuko dira erregistroa arautzen duen foru dekretuan ezarritako araubide orokorra betez.
2. Gaikuntzaren inskripzioa ezeztatzen ahalko da, aurreko artikuluan ezarritako arrazoiengatik ez ezik, baita titularrak borondatez eskatzeagatik ere, Nafarroan kirol-lanbidean hasteari eta jarduteari buruzko apirilaren 4ko 18/2019 Foru Legean eskatutako lanbide kualifikazioa eskuratu ondotik.
Xedapen gehigarri bakarra. Goi errendimenduko lehiaketak.
Nafarroan kirol-lanbidean hasteari eta jarduteari buruzko apirilaren 4ko 18/2019 Foru Legearen lehen xedapen iragankorraren 4. apartatuan xedatutakoaren ondorioetarako, goi errendimenduko lehiaketatzat hartzen dira kirol-modalitate bakoitzeko liga profesionalak.
Azken xedapenetako lehena. Foru dekretu hau garatzeko ahalmena.
Kirolaren arloko eskumena duen departamentuko titularrari ahalmena ematen zaio foru dekretu hau garatzeko eta betearazteko behar diren xedapenak eman ditzan.
Azken xedapenetako bigarrena. Indarra hartzea.
Foru dekretu honek Nafarroako Aldizkari Ofizialean argitaratu eta biharamunean hartuko du indarra.
