LEXNAVARRA
19/2025 FORU AGINDUA, OTSAILAREN 14KOA, EKONOMIA ETA OGASUNEKO KONTSEILARIAK EMANA, ZEINAREN BIDEZ ARAUTZEN BAITA HILDAKOEN OINORDEKOEN ETA JARAUNSPEN JASOGABEEN ORDEZKARIEN ERROLDA NAFARROAKO FORU KOMUNITATEKO ZERGA-ESPARRUAN
BON N.º 52 - 14/03/2025
- Atariko
- 1. artikulua. Xedea eta aplikazio eremua.
- 2. artikulua. Harremanak erroldan inskribatzea.
- 3. artikulua. Erroldaren edukia.
- 4. artikulua. Erroldaren ondorioak eta irismena.
- Azken xedapen bakarra. Indarra hartzea.
Tributuei buruzko abenduaren 14ko 13/2000 Foru Lege Orokorraren 33. artikuluak zerga arloko eskubide eta betebeharren oinordetza arautzen du pertsona fisikoen heriotza kasuetarako, eta ezartzen du "mortis causa" oinordekoak kausa-eragilearen tokian subrogatuko direla eta ordaintzeke dauden zerga arloko betebeharrei erantzunen dietela, betiere jarauntsia eskuratzeko legeria zibilean xedatutako mugak dituztelarik.
Bestalde, Tributuei buruzko Foru Lege Orokorraren 36.4 artikuluan ezartzen denez, jaraunspen jasogabeen kasuan, haien ordezkari diharduenak izanen du ordezkaritza, modu fede-emailean frogatzen bada; inor ez badute izendatu ordezkari, itxuraz kudeaketa- edo zuzendaritza-lanetan aritzen dena hartuko da halakotzat, eta, halakorik ez bada, entitatea edo erkidegoa osatzen duten bazkide edo partaideetako edozein.
Jendea hiltzen denean, arrunta da zerga arloko zenbait betebehar bete gabe gelditzea. Betebehar horiek izapidetzean, oztopoak topatzen dira izapideak egin nahi dituztenek frogatu nahi dutenean behar adinako legitimazioa dutela betebehar horiek betetzeko. Jarauntsia onartu bada, oinordekoen identitatea jakin daiteke.
Kasu horietan, gaur egun, teknologikoki eta juridikoki konplexua da zehaztea nork duen legitimazioa betebehar horiek betetzeko eta nola bete behar diren.
Azaldutako egoerak Zerga Administrazioan errazago egiaztatu ahal izateko, foru agindu honek errolda bat sortzen du, aipatutako oinordetza-harremanak bertan sartzeko.
Errolda horrekin, identifikazio egokia emanen zaio jendeari, araudian xedatutakoa betez, hirugarrenen zerga arloko betebeharrak bete ahal izateko edo bete behar izateko, oinordeko gisa edo jaraunspen jasogabeen ordezkari gisa, eta, horrela, kasuan kasuko izapideak egiteko modua izanen dute.
Erroldako altak ofizioz eginen dira, baina aurreikusten da interesdunek eskatuta bultzatzen ahalko direla.
Erroldako ofiziozko altak Zerga Administrazioak ematen ahalko ditu, baldin eta bere esku badu hildakoaren eta haren oinordekoen edo jaraunspen jasogabeen ordezkarien arteko harremana ezartzen duen beharrezko informazioa edo dokumentazioa (Erregistro Zibilaren informazioa, ebazpen judizialak, notarioen jaraunspen esleipenak, etab.). Halakotzat edukitzen ahalko dira Tributuei buruzko abenduaren 14ko 13/2000 Foru Lege Orokorraren 33. eta 36.4 artikuluetan xedatutakoa aplikatuz.
Erroldako altak ere interesdunek eskatuta bultzatzen ahalko dira. Halakoetan, Zerga Administrazioak egiaztatu eta baliozkotu beharko du aurkeztutako dokumentazioa, harremana erroldan inskribatuko bada.
Foru agindu honen bidez errolda hori sortu eta definitzean, posible izanen da dauden tresna informatikoak erabiltzea, halako eran non modu efiziente eta eraginkorrean eginen baitituzte oinordekoek egin beharreko izapideen kudeaketa telematikoa eta informatikoa.
Foru agindu honen bidez zehazten dira deskribatutako erroldaren eremua, funtzionamendua eta kudeaketa.
Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean xedatutakoarekin bat, foru agindu hau premiaren, eraginkortasunaren, proportzionaltasunaren, segurtasun juridikoaren, gardentasunaren eta efizientziaren printzipioen arabera egin da.
Premiaren eta eraginkortasunaren printzipioak betetzen dira; izan ere, adierazi den bezala, beharrezkoa da hildakoen oinordekoen eta jaraunspen jasogabeen ordezkarien errolda arautzea, Zerga Administrazioaren aurrean errazago identifikatzeko eta bete gabe dauden zerga arloko betebeharrak behar bezala betetzen direla bermatzeko, eta foru agindu hau da hori arautzeko tresna egokia.
Proportzionaltasun printzipioa ere betetzen da, hura onestea justifikatzen duten helburuak lortzeko beharrezko erregulazioa jasotzen duelako.
Segurtasun juridikoaren printzipioari dagokionez, bermatu da testua koherentea izatea gainerako foru ordenamendu juridikoarekin, eta arau esparru egonkor, aurreikus daitekeena, integratua, argia eta zalantzarik gabekoa sortu da, ezagutu eta ulertzen laguntzen duena, bai eta, horrenbestez, ukitutako subjektuek jarduten eta erabakiak hartzen ere, beharrik gabeko administrazio-zamak gehitu gabe.
Gardentasunaren printzipioa bermatu da, alde batera utzi gabe Nafarroako Aldizkari Ofizialean ofizialki argitaratzea, foru aginduaren proiektua argitaratu baita Nafarroako Gobernu Irekiaren Interneteko atarian, herritar guztiek testu horren berri izan dezaten entzunaldiaren eta jendaurreko informazioaren izapidean.
Azkenik, efizientziaren printzipioari dagokionez, ahalegina egin da arauak ahalik eta administrazio zama gutxien sor ditzan herritarrentzat, bai eta ahalik eta zeharkako kostu txikienak ere, baliabide publikoen zentzuzko erabilera sustatuta eta aurrekontu egonkortasunaren eta finantza jasangarritasunaren printzipioak guztiz beteta.
Horrenbestez,
AGINTZEN DUT:
1. artikulua. Xedea eta aplikazio eremua.
1. Foru agindu honen xedea da honako hauen ondoriozko harremanak inskribatzeko errolda arautzea:
a) Pertsona fisikoen oinordetzak (kausa-eragilearen eta oinordekoen artekoak), Tributuei buruzko abenduaren 14ko 13/2000 Foru Lege Orokorraren 33. artikuluko baldintzetan.
b) Jaraunspen jasogabeen ordezkaritza (kausa-eragilearen eta jaraunspen jasogabeen ordezkarien artekoa), Tributuei buruzko abenduaren 14ko 13/2000 Foru Lege Orokorraren 36.4 artikuluan ezarritakoa.
2. Foru agindu honen aplikazio-eremua tributu eremua da, berezkoa dutena Nafarroako Foru Ogasunak eta Nafarroako Foru Auzitegi Ekonomiko-Administratiboak esleituta dituzten eskumen eta funtzioetarako.
2. artikulua. Harremanak erroldan inskribatzea.
1. Erroldako inskripzioa ofizioz egiten ahalko da, baina interesdunak eskatuta bultzatzen ahalko da.
2. Erroldako inskripzioa ofizioz egiten ahalko da baldin eta Zerga Administrazioak oinordetzaren berri edo jaraunspen jasogabearen ordezkaritzaren berri badu erregistro batean kontsulta eginez, tributuen aplikazioari buruzko edozein prozeduraren edo komunikazioren bidez edo Tributuei buruzko Foru Lege Orokorrak esleitutako eskumenak erabiltzearen ondorioz.
3. Interesdunak eskatuta egiten bada inskripzioa, hark aurkeztu beharko ditu, araudi zibilari jarraituz, pertsona fisikoaren heriotza eta oinordetza frogatzen duten dokumentuak, edo, hala badagokio, jaraunspen jasogabearen ordezkaritza egiaztatzen dutenak.
Beharrezko dokumentazio guztia aurkeztu ondoren, harremana erroldan inskribatuko da hamar eguneko epean.
Aurkeztutako dokumentuetan akatsak edo omisioak atzemanez gero, interesdunari jakinaraziko zaio, hamar eguneko epean akatsa zuzen dezan edo beharrezko dokumentuak aurkez ditzan, eta ohartaraziko zaio ezen, hala egiten ez badu, jarduketak artxibatuko direla, eta ulertuko dela interesdunak atzera egin duela bere eskaeran.
3. artikulua. Erroldaren edukia.
Erroldan alta ematean, honako datu hauek jasoko dira:
a) Hildako pertsona fisikoaren izen-abizenak eta IFZa.
b) Oinordekoaren edo jaraunspen jasogabearen ordezkariaren izen-abizenak, edo sozietatearen izena, eta IFZa.
c) Harreman mota (oinordetza edo jaraunspen jasogabearen ordezkaritza).
d) Harremana egiaztatzen duen dokumentazioa edo frogagiria.
4. artikulua. Erroldaren ondorioak eta irismena.
1. Erroldan inskribatutako harremanen ondorioen irismena izanen da Tributuei buruzko abenduaren 14ko 13/2000 Foru Lege Orokorraren 33. eta 36.4 artikuluetan ezarritakoa.
2. Izapideak Internet bidez egiten ahalko dituzte hildako pertsona fisikoen oinordekoek eta erroldan inskribatutako jaraunspen jasogabeen ordezkariek, baldin eta izapide horiek hala egiteko aukera badago.
https://hacienda.navarra.es helbidean eguneratuta egonen da oinordeko gisa edo jaraunspen jasogabearen ordezkari gisa egin daitezkeen izapide elektronikoen zerrenda, foru agindu honetan ezarritakoarekin bat.
Azken xedapen bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
