LEXNAVARRA
90/2024 FORU DEKRETUA, URRIAREN 16KOA, NAFAR KOMUNITATEEN KONTSEILUAREN OSAERA, ANTOLAKETA ETA FUNTZIONAMENDUA ARAUTZEN DITUENA, ETA KOMUNITATE HORIEK AITORTZEKO ETA OFIZIALKI ERREGISTRATZEKO PROZEDURA EZARTZEN DUENA
BON N.º 221 - 31/10/2024
- ZIOEN AZALPENA
- 1. artikulua. Xedea.
I. TITULUA. NAFAR KOMUNITATEEN KONTSEILUA
I. KAPITULUA. MUINA
- 2. artikulua. Nafar Komunitateen Kontseiluaren muina.
II. KAPITULUA. OSAERA
- 3. artikulua. Nafar Komunitateen Kontseiluaren osaera.
- 4. artikulua. Kontseiluburua.
- 5. artikulua. Kontseiluko buruordea.
- 6. artikulua. Idazkaria.
- 7. artikulua. Kontseilukideak.
- 8. artikulua. Kontseiluko kideen izendapena.
- 9. artikulua. Batzordeko kide izateari uztea.
III. KAPITULUA. ANTOLAKETA ETA FUNTZIONAMENDUARAUBIDEA
1. ATALA. OSOKO BILKURA, LANTALDEAK ETA ADITUAK
- 10. artikulua. Osoko Bilkura.
- 11. artikulua. Lantaldeak.
- 12. artikulua. Adituak agertzeko eskaerak.
- 13. artikulua. Barnefuntzionamendua.
2. ATALA. BILKUREN ARAUBIDEA
- 14. artikulua. Bilkura arruntak eta bilkura bereziak.
- 15. artikulua. Deialdiak.
- 16. artikulua. Osaera eta quoruma.
- 17. artikulua. Bitarteko elektronikoen bidezko bilkurak.
- 18. artikulua. Kalteordainak jasotzeko eskubidea.
3. ATALA. ERABAKIAK
- 19. artikulua. Erabakiak nola hartu.
II. TITULUA. KANPOKO NAFAR KOMUNITATEAK AITORTZEA ETA ERREGISTRATZEA
I. KAPITULUA. AITORPENA
- 20. artikulua. Aitorpena eskatzeko prozeduraren hasiera, dokumentazioa eta eskaera aurkezteko lekua.
- 21. artikulua. Kanpoko komunitate birtualen aitortza ofiziala lortzeko baldintzak.
- 22. artikulua. Instrukzioa.
- 23. artikulua. Ebazpena.
- 24. artikulua. Errebokatzea.
II. KAPITULUA. KANPOKO NAFAR KOMUNITATEAK OFIZIALKI ERREGISTRATZEA
- 25. artikulua. Xedea.
- 26. artikulua. Araubide juridikoa.
- 27. artikulua. Izaera eta atxikipena.
- 28. artikulua. Inskribatzeko moduko datuak eta komunikatzeko betebeharra.
- 29. artikulua. Erregistroaren egitura.
- 30. artikulua. Dokumentu elektronikoak artxibatzea eta zaintzea.
- Lehenbiziko xedapen gehigarria. Kontseiluaren eraketa.
- Bigarren xedapen gehigarria. Parekidetasunprintzipioa.
- Lehen xedapen iragankorra. Espainiako beste eskualde batzuetan edo beste herrialde batzuetan dauden nafar komunitateak.
- Bigarren xedapen iragankorra. Komunitate birtualak eta itzulitako pertsonen elkarteak.
- Xedapen indargabetzaile bakarra. Arauak indargabetzea.
- Azken xedapenetako lehena. Arauak emateko gaikuntza.
- Azken xedapenetan bigarrena. Egitura organikoa.
- Azken xedapenetako hirugarrena. Indarra hartzea.
I. ERANSKINA. KANPOKO NAFAR KOMUNITATEA AITORTZEKO ESKAERA
II. ERANSKINA. KANPOKO KOMUNITATEARI BURUZKO DATUAK
Otsailaren 22ko 3/2023 Foru Legeak, kanpoko nafar herritarrekiko harremanei buruzkoak, 12. artikuluan ezartzen duenez, Nafar Komunitateen Kontseilua sortuko da kanpoko nafar herritarrekiko harremanei lotutako gaietan kontsultak egiteko eta parte hartzeko organo gisa, eta aipatutako arloan eskumena duen departamentuari atxikiko zaio.
Aipatutako artikuluaren laugarren atalak xedatzen duenez, Kontseiluaren osaera, antolaketa eta funtzionamendua erregelamendu bidez zehaztuko da, foru-dekretu baten bitartez.
Horrez gain, otsailaren 22ko 3/2023 Foru Legean, kanpoko nafar herritarrekiko harremanei buruzkoan, 8. artikulutik 11. artikulura bitartean, kanpoko nafar komunitateak eta horien balizko federazioak arautzen dira, eta Nafarroako Gobernuak komunitate horiek ofizialki aitortzeko baldintzak ezartzen dira, baita erregistro ofizialean inskribatzekoak ere.
Horretarako, kanpoko nafar komunitateak aitortzeko prozedura ere definitzen du foru-dekretuak, baita komunitate horiek ofizialki erregistratzekoa ere. Prozesua errazteko, bi eranskin gehitzen dira: batean, kanpoko nafar komunitateak -komunitate birtualak barne- eta kanpoko nafar komunitateen federazioak aitortzeko eskaeraren eredua dago, 3/2023 Foru Legearen 8. artikuluak arautzen duen bezala; eta, bestean, erregistro ofizialari jakinarazteko eredua, 3/2023 Foru Legearen 11. artikuluaren 3. puntuan eskatzen den bezala. Xedapen honek Nafarroako Foru Komunitateko Administrazioari eta Foru Sektore Publiko Instituzionalari buruzko martxoaren 11ko 11/2019 Foru Legearen 129.3. artikuluan ezarritako printzipio hauek betetzen ditu: arautze egokia, premia, eraginkortasuna, proportzionaltasuna, segurtasun juridikoa, gardentasuna, sinpletasun, efizientzia eta irisgarritasuna.
Azaroaren 15eko 239/2023 Foru Dekretuaren bidez, Memoria eta Bizikidetzako, Kanpo Ekintzako eta Euskarako Departamentuaren egitura organikoa ezartzen da. Foru Dekretu horren 1. artikuluak Nafarroako herritarrek kanpoan jaso beharreko harremana eta arretari buruzko eskumenak, besteak beste, esleitzen dizkio Memoria eta Bizikidetzako, Kanpo Ekintzako eta Euskarako Departamentuari.
Kanpoko nafar herritarrekiko harremanei buruzko otsailaren 22ko 3/2023 Foru Legearen 12.4. artikuluan araututakoa betez, eta Nafar Komunitateen Kontseilua eratzeko, haren funtzionamendua arautzeko eta nafar komunitateak aitortu eta erregistratzeko behar diren tramiteak zehazteko, erregelamendu hau onetsi behar da.
Horrenbestez, Memoria eta Bizikidetzako, Kanpo Ekintzako eta Euskarako kontseilariak proposaturik, Nafarroako Kontseiluarekin bat etorrita, eta Nafarroako Gobernuak bi mila eta hogeita lauko urriaren hamaseiko bilkuran hartutako Erabakiarekin bat,
DEKRETATZEN DUT:
Foru Dekretu honen xedea da Nafar Komunitateen Kontseiluaren osaera, antolaketa eta funtzionamendua arautzea eta komunitate horiek aitortzeko eta ofizialki erregistratzeko prozedura ezartzea. Hortaz, kanpoko nafar herritarrekiko harremanei buruzko otsailaren 22ko 3/2023 Foru Legean, Erregelamendu honetan eta, osagarri gisa, aplikatu beharreko gainerako araudian oinarrituko da.
I. TITULUA. NAFAR KOMUNITATEEN KONTSEILUA
I. KAPITULUA. MUINA
2. artikulua. Nafar Komunitateen Kontseiluaren muina.
Nafar Komunitateen Kontseilua kide anitzeko organoa da, eta Nafarroako Foru Komunitatean aholkua ematen eta parte hartzen du, kanpoko nafar herritarrekiko harremanen arloan. Haren txostenak eta irizpenak ez dira lotesleak izanen.
II. KAPITULUA. OSAERA
3. artikulua. Nafar Komunitateen Kontseiluaren osaera.
Honako hauek osatzen dute Nafar Komunitateen Kontseilua:
- Kontseiluburua.
- Kontseiluko buruordea.
- Hemezortzi kontseilukide.
Idazkari-lanak eginen dituen pertsonak hitza izanen du Kontseiluaren bilkuretan, baina ez botorik.
1. Kontseiluburua kanpoko biztanleriako politiketan eskuduna den departamentuko titularra izanen da, eta Nafarroako Foru Komunitateko Administrazioari eta Foru Sektore Publiko Instituzionalari buruzko martxoaren 11ko 11/2019 Foru Legearen 21. artikuluan ezarritako eginkizunak izanen ditu, berdinketak haren botoaren bidez ebaztea barne, akordioak lortzeko.
2. Kargua hutsik dagoenean, titularra kanpoan edo eri dagoenean edo justifikatutako gainerako kasuetan, kontseiluko buruaren ordez buruordea arituko da.
5. artikulua. Kontseiluko buruordea.
1. Kanpoko herritarrekiko harremanaren eskumena duen zuzendaritza nagusiaren titularra izanen da buruordea.
2. Kontseiluburuak edo Nafar Komunitateen Kontseiluaren osoko bilkurak esleitzen dizkion eginkizunak beteko ditu buruordeak, kontseiluak kudeaketa, antolaketa eta funtzionamendu ona izan ditzan.
3. Kargua hutsik dagoenean, kontseiluko buruordea kanpoan edo eri dagoenean edo justifikatutako gainerako kasuetan, kontseiluko kide batek ordezkatuko du, Kontseilua eratu ondoren kideen gehiengo soilak aukeratzen duenak, hain zuzen ere.
1. Kanpoko nafar herritarrekiko harremanaren eskumena duen departamentuko Idazkaritza Nagusi Teknikoko titularra izanen da idazkaria.
2. Nafarroako Foru Komunitateko Administrazioari eta Sektore Publiko Instituzionalari buruzko martxoaren 11ko 11/2019 Foru Legearen 22. artikuluan aurreikusitako eginkizunak izanen ditu.
3. Kargua hutsik dagoenean, titularra kanpoan edo eri dagoenean edo justifikatutako gainerako kasuetan, Memoria eta Bizikidetzako, Kanpo Ekintzako eta Euskarako Departamentuko Idazkaritza Nagusi Teknikoko Araubide Juridikoaren Ataleko titularrak ordezkatuko du, eta, halakorik egon ezean, kanpoko nafar herritarrekiko harremanen arloan eskumena duen departamentuan administrazio publikoko (adar juridikoa) teknikari lanpostua betetzen duen pertsonak.
7. artikulua. Kontseilukideak.
1. Honako hauek izanen dira Kontseiluko kideak:
a) Kanpoko nafar herritarrekiko harremanen arloan eskumena duen departamentuko titularrak libreki izendatutako bi pertsona, Nafarroako Foru Komunitateko Administrazioaren egiturakoak.
b) Nafarroako Gobernuko departamentuetako lau pertsona, kanpoko nafar herritarrekiko harremanei buruzko 2023ko otsailaren 22ko 3/2023 Foru Legean aitortutako eskubideekin lotutako eskumenak dituztenak.
c) Ofizialki aitortutako kanpoko komunitate nafarren ordezkari gisa izendatutako zortzi pertsona, komunitate birtualetakoak barne, honako banaketa hau kontuan hartuta aukeratuko direnak:
- Hiru pertsona, Espainian dauden Nafarroako Etxeen Federazio Nazionalak proposatuta.
- Amerikako nafar komunitateek proposatutako bi pertsona (Ipar Amerikako, Erdialdeko Amerikako, Karibeko eta Hego Amerikako herrialdeak).
- Munduko gainerako komunitate nafarrek proposatutako pertsona bat.
- Kanpoan dauden nafar komunitate birtualek proposatuta izendatutako bi pertsona.
Aurreko c) letran araututako kideak eta haien ordezkoak hautagaitzak inskribatu ondoren hautatuko dira, dagokion deialdian zehaztutako epean, kanpoko nafar komunitate ofizialek aurkeztutako proposamenen sistemaren bidez. Esleitutako kide-kopurua baino hautagai gehiago aurkeztuko balira, hautagaien hurrenkera hartuko da kontuan, eta zonalde bakoitzeko ordezkarien artean txandakatze-sistema bat ezarriko da, bi urteko aldietarako. Agintaldia amaitzean ordezkaririk izan ez duten hautagairik balego, lehentasuna izanen lukete hurrengo agintaldian, oraindik ere interesa izanez gero.
Hautagaitzak aurkezten dituzten komunitate guztiek Nafarroako Gobernuaren aitortza behar bezala jaso beharko dute, eta komunitateen erregistro ofizialean inskribatuta egon beharko dute.
d) Itzulitako etorkinen elkarteak izendatutako pertsona bat; elkarteak behar bezala aitortuta eta inskribatuta egon behar du, eta bazkide gehien izan behar ditu.
e) Nafarroako Parlamentuak proposatutako bi pertsona, Nafarroako Parlamentuko Erregelamenduan xedatutakoarekin bat etorriz.
f) Nafarroako Udal eta Kontzejuen Federazioak hautatutako pertsona bat.
2. Kontseilukideek Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 23. artikuluan ezarritako eginkizunak izanen dituzte.
8. artikulua. Kontseiluko kideen izendapena.
1. Kanpoko nafar herritarrekiko harremanen arloan eskumena duen departamentuko titularrak izendatuko ditu Nafar Komunitateen Kontseiluko kideak, foru-agindu bidez. Lau urterako izendatuko ditu, eta iraupen bereko aldi baterako berritzen ahalko dira, hargatik eragotzi gabe hurrengo artikuluan kargua uzteko ezarritako edozein arrazoi gertatzea, edo kideak izendatzeko eskatzen diren baldintzak, 7.1 artikuluko a) eta b) ataletan jasotakoak, galtzea.
2. Batzordekideen izendapena proposatzeko ahalmena duten entitateek ordezkoak ere proposatu beharko dituzte. Izan ere, kontseilukide izateko hautagaitzetan titularra eta ordezkoa agertu beharko dira.
9. artikulua. Batzordeko kide izateari uztea.
1. Kontseiluko kideek honako zio hauengatik utziko dute kargua:
a) Heriotza edo sortutako ezintasuna.
b) Izendapen-aldia bukatzeagatik.
c) Ordezkatzen duten erakundeak eta entitateak proposatzea.
d) Kontseiluko buruari behar bezala jakinarazita uko egitea.
e) Jada ez egoteagatik izendatu zutenean zegoen elkarte, entitate edo erakundean.
f) Kontseilurako ordezkari izendatu zuten elkarte, entitate edo erakundea desegiteagatik.
2. Kontseilukideko kargualdia bukatzeaz gaineko arrazoiren batengatik sortzen diren hutsuneak horretarako izendatutako ordezkoak beteko ditu, salbu eta kargua uzteko arrazoiren bat beteko balitz, eta gainerako batzordekideen denbora berean amaituko du hark ere kargualdia.
III. KAPITULUA. ANTOLAKETA- ETA FUNTZIONAMENDU-ARAUBIDEA
1. ATALA. OSOKO BILKURA, LANTALDEAK ETA ADITUAK
1. Nafar Komunitateen Kontseiluak osoko bilkuran jardunen du.
2. Nafar Komunitateen Kontseiluko kide guztiek osatzen dute osoko bilkura.
Nafar Komunitateen Kontseiluak bere eginkizunak bete ditzan, lantaldeak eratzen ahalko dira kontseiluko kideekin intereseko gaiak aztertzeko, hala behar denean.
12. artikulua. Adituak agertzeko eskaerak.
Kontseiluburuak egokitzat jotzen dituen adituek osoko bilkurara eta lantaldeetara joan ahalko dute, hitza izanda baina botorik ez, dagokion bileran landuko diren gairen bati buruz duten ezagutza espezifikoan oinarrituta.
13. artikulua. Barnefuntzionamendua.
Kontseiluak bere barne-funtzionamendurako beharrezkoak diren arauak edo akordioak onesten ahalko ditu.
2. ATALA. BILKUREN ARAUBIDEA
14. artikulua. Bilkura arruntak eta bilkura bereziak.
Nafar Komunitateen Kontseiluak gutxienez urtean behin eginen du bilkura arrunta, eta bilkura berezia, berriz, kontseiluburuak deitzen duenean, bere ekimenez edo kideen heren batek gutxienez eskaturik. Halakoetan, eskaera idazkariari bidaliko zaio, bilkurarako aurreikusitako data baino hogei egun lehenago gutxienez.
1. Deialdiak idatziz eginen dira, gutxienez ere hilabete lehenago, bereziak izan ezik, horiek berrogeita zortzi ordu lehenago bidaltzen ahalko baitira.
2. Deialdiak posta elektronikoz eginen dira beti, Kontseiluko kideek emandako helbide elektronikoen bidez, eta deialdia jaso duten ala ez adieraziko dute.
3. Deialdiarekin batera eguneko gai-zerrenda igorriko da, baita, ahal delarik, eztabaidarako beharrezkoa den dokumentazioa ere.
4. Nafar Komunitateen Kontseiluaren bilkura arruntetako gai-zerrendan aztertu beharreko gaiak kontseiluburuak, kontseiluko buruordeak edo kontseiluko kideek proposatzen ahalko dituzte, bilera egin baino 48 ordu lehenago gutxienez. Gaiak aztertzeko eskaera idazkaritzara zuzendu beharko da.
5. Bilkura arrunten deialdietako gai-zerrendan, aurreko bilkuraren edo bilkuren aktaren onespena sartuko da, bai eta galde-erreguetarako atal bat ere.
6. Ezin eztabaidatu edo erabakiko da eguneko gai-zerrendan sartuta ez dagoen ezer, salbu eta Kontseiluko kide guztiak bertaratu badira eta gaia presazkoa dela deklaratzen bada gehiengo soilak horren aldeko botoa emanda.
16. artikulua. Osaera eta quoruma.
1. Lehen deialdian, Kontseilua modu baliozkoan geldituko da eraturik eta, beraz, erabakiak hartzen ahalko ditu, bertan daudelarik kontseiluburua eta idazkaria, edo araudiaren arabera ordezkatzen dituztenak, gehi kideen erdia gutxienez.
2. Bigarren deialdian, Kontseilua modu baliozkoan eratutzat joko da bertan daudelarik kontseiluburua eta idazkaria, edo araudiaren bidez ordezkatzen dituztenak, gehi kideen herena gutxienez. Lehenbiziko deialditik bigarrenera ordu erdi bat iraganen da gutxienez.
17. artikulua. Bitarteko elektronikoen bidezko bilkurak.
1. Nafar Komunitateen Kontseiluak bilkurak modu telematikoan edo mistoan (aurrez aurrekoa eta telematikoa) egiten ahalko ditu, betiere baliabide elektronikoen bidez (halakotzat jotzen dira bide telefonikoak eta ikus-entzunezkoak ere) bermatzen bada kideen edo kideak ordezten dituzten pertsonen identitatea, kideen adierazpenen edukia, adierazpen horiek egiten diren unea, kideen arteko hartu-emana eta interkomunikazioa denbora errealean, eta bilkurak irauten duen bitartean bitartekoak eskuragarri egonen direla.
2. Hori guztia kanpoko nafar herritarrekiko harremanei buruzko otsailaren 22ko 3/2023 Foru Legearen 6. artikuluaren 2. puntuan ezarritakoa errespetatuz eta betez, Irisgarritasun Unibertsalari buruzko ekainaren 14ko 12/2018 Foru Legeari dagokionez.
18. artikulua. Kalteordainak jasotzeko eskubidea.
1. Nafar Komunitateen Kontseiluko kideek, kanpoko komunitate nafarren ordezkari gisa aukeratutakoek, eskubidea izanen dute kide anitzeko organoaren bileretara joateak eragindako ezinbesteko gastuengatik kalte-ordaina jasotzeko, bai osoko bilkuran, bai lantaldean, joan-etorrietako, ostatuko eta mantenuko gastuak barne.
2. Kalte-ordain posibleen izaera, gehieneko zenbatekoa eta tramitazio-prozedura kanpoko nafar herritarrekiko harremanen arloan eskumena duen departamentuko titularraren foru-agindu bidez finkatuko dira.
3. ATALA. ERABAKIAK
19. artikulua. Erabakiak nola hartu.
1. Erabakiak bertaraturiko batzordeko kideen gehiengo soilez hartuko dira. Urrutitik parte hartzen denean, erabakiak kontseiluaren lehendakaritzaren egoitzan hartutzat joko dira.
2. Idazkariak kontseiluburuaren oniritziarekin eginen du akta, eta bide elektronikoen bitartez bidaliko die Kontseiluko kideei, onets dezaten. Kideek bide bera erabiltzen ahalko dute testuarekin ados dauden edo eragozpenik duten adierazteko. Testua hurrengo bilkuran onetsiko da, eta ez du eragotziko eztabaidatutako gaiei eta bozketari buruzko ziurtagiriak bidaltzea.
II. TITULUA. KANPOKO NAFAR KOMUNITATEAK AITORTZEA ETA ERREGISTRATZEA
I. KAPITULUA. AITORPENA
20. artikulua. Aitorpena eskatzeko prozeduraren hasiera, dokumentazioa eta eskaera aurkezteko lekua.
1. Kanpoko nafar herritarrekiko harremanei buruzko otsailaren 22ko 3/2023 Foru Legearen 3.b) eta c) artikuluetan definitutako entitateek eskatuko dute aitorpena, lege-ordezkariak sinatutako eskaera baten bidez, foru-dekretu honen I. eranskinean ageri den ereduaren arabera, eta harekin batera dokumentu hauek aurkeztuko dira:
- Entitatearen estatutuen kopia kautotua edo konpultsatua, eta entitatearen eraketa eta nortasun juridikoa egiaztatzen duen dokumentazioa, baita dagokion erregistroko inskripzioarena ere, hala badagokio.
- Entitatearen batzar orokorrak edo gobernu-organo gorenak hartutako erabakia, aitortza eskatzeko adierazitako nahiari buruzkoa.
- Memoria bat, egindako jardueren eta etorkizunerako proiektatzen direnen berri ematen duena.
- Entitateko zuzendaritza-organoen osaeraren eta kideen zerrendaren ziurtagiria.
- Erakunde eskatzailearen identifikazio-datuen eredua, foru dekretu honen II. eranskinean jasotako baldintzetan.
2. Eskaera eta dokumentazioa Nafarroako Gobernuaren erregistro orokorrean aurkeztu behar dira, foru-dekretu honen eranskinetan ezarritako eskabide-ereduaren arabera, eta www.navarra.es webgunean gaituko den sarbidearen bidez.
21. artikulua. Kanpoko komunitate birtualen aitortza ofiziala lortzeko baldintzak.
Kanpoko nafar komunitate birtualaren aitorpen ofiziala lortzeko, aurreko artikuluan eskatutakoaz gain, honako baldintza hauek bete behar dira:
a) Komunitateak gutxienez 30 kide izatea.
b) Komunitateko administratzaile gisa pertsona bat edo gehiago identifikatuta izatea.
c) Online eskuragarri egotea, eta edukietarako sarbidea publikoa, doakoa eta librea izanen dela bermatzea.
d) Aplikagarria den araudia errespetatzea; bereziki, datuen babesari, informazioaren gizarteari eta merkataritza elektronikoari, jabetza industrialari eta intelektualari buruzkoa.
e) Komunitatea online identifikatzean, berariaz jasotzea "Navarra" edo "Nafarroa" terminoak, edo termino horien aldaeraren bat, eta lehendik aitortuta dagoen beste erakunde baten izenarekin bat ez etortzea, edo biak nahastea eragin dezakeen izenik ez izatea.
1. Eskaeran eta erantsitako dokumentazioan jasotako datuak aitortzeko eta egiaztatzeko prozeduraren instrukzioa Nafarroako Foru Komunitateko Administrazioaren zerbitzuari dagokio, zeinak eskumena baitu kanpoko nafar herritarrekiko harremanen arloan, eta egiaztatuko baitu betetzen direla otsailaren 22ko 3/2023 Foru Legearen 8. artikuluan eskatzen diren baldintzak.
2. Eskaerak ez baditu betetzen eskatutako baldintzak, edo nahitaezko agiriak ez badira aurkezten, aitorpena eskatu duen entitateari adieraziko zaio hamar eguneko epea duela akats hori zuzentzeko edo aurkeztu ez dituen nahitaezko agiriak aurkezteko. Orobat, adieraziko zaio, hala egin ezean, eskaeran atzera egin duela ulertuko dela.
3. Aurreko atalean aipatzen den eskakizuna jakinarazpen elektroniko bidez eginen da.
1. Kanpoko nafar komunitateek, birtualak barne, eta kanpoko nafar komunitateen federazioek aurkeztutako dokumentazioa eta Nafar Komunitateen Kontseiluak aldez aurretik emandako txostena ikusirik, Nafarroako Gobernuak, gobernu-erabaki baten bidez, aitorpena onartuko du gehienez ere sei hilabeteko epean, foru-dekretu honetan eskatzen den eskaera aurkezten denetik kontatzen hasita.
2. Aitorpena, kanpoko nafar herritarrekiko harremanei buruzko otsailaren 22ko 3/2023 Foru Legean adierazitako ondorioekin, mugagabea izanen da, foru-lege horretan eta foru-dekretu honen 24. artikuluan adierazitako kasuetan errebokatzen ez bada.
1. Kanpoko nafar komunitateek ez badituzte betetzen kanpoko nafar herritarrekiko harremanei buruzko otsailaren 22ko 3/2023 Foru Legean ezarritako helburuak, 8. artikuluaren 1. eta 6. ataletan jasotako baldintzak eta foru-lege horretan edo foru-dekretu honetan jasotako beste edozein betebehar, zilegi izanen da haien aitorpena baliogabetzea.
2. Errebokazioa egiteko, ofizioz hasiko da dagokion prozedura, administrazio-prozeduraren arau orokorrekin bat etorriz.
II. KAPITULUA. KANPOKO NAFAR KOMUNITATEAK OFIZIALKI ERREGISTRATZEA
Kanpoko nafar komunitateen erregistro ofizialaren xedea da ofizioz inskribatzea komunitate, etxe edo zentro nafar edo euskal-nafarrak, kanpoan dauden nafar komunitate birtualak eta federazioak, kanpoko nafar herritarrekiko harremanei buruzko otsailaren 22ko 3/2023 Foru Legearen babesean aitortuak.
26. artikulua. Araubide juridikoa.
Foru-dekretu honek, kanpoko nafar herritarrekiko harremanei buruzko otsailaren 22ko 3/2023 Foru Legeak eta Nafarroako Foru Komunitateko Administrazioari eta Foru Sektore Publiko Instituzionalari buruzko martxoaren 11ko 11/2019 Foru Legeak arautuko dute erregistroa, baita Administrazio Publikoen Administrazio Prozedura Erkideari buruzko urriaren 1eko 39/2015 Legeak ere.
27. artikulua. Izaera eta atxikipena.
1. Kanpoko nafar komunitateen erregistroa publikoa da. Publizitatea adierazteko, erakundearen eta haren gobernu-organoaren datuak emanen zaizkio hala eskatzen duenari, edo dagokion ziurtagiria emanen zaio, erregistroaren edukia modu fede-emailean egiaztatzeko bide bakarra den aldetik.
2. Pertsona fisiko, erakunde publiko edo pribatu orok du erregistroko datuak kontsultatzeko eskubidea, bai eta organo eskudunak erregistroaren edukiari buruzko ziurtagiriak eman eta dokumentuak konpultsatzeko eskubidea ere.
3. Datu pertsonalei dagokienez, datu horien atzean dagoen pertsonak aldez aurretik propio baimendu beharko du datu horiek kontsultatzea edo lagatzea, eta beti izanen du eskubidea datuok eskuratzeko, zuzentzeko, mugatzeko, ukatzeko, ezabatzeko, eramateko eta baliogabetzeko; horrez gain, pertsona hari eragiten dion informazioarekin lotutako eskubideak ere erabiltzen ahalko ditu, datuak babesteko araudia betez, bereziki honako hauek: Europako Parlamentuaren eta Kontseiluaren 2016ko apirilaren 27ko 2016/679 (EB) Erregelamendua (haren bidez, pertsona fisikoen babesa arautu zen datu pertsonalen tratamenduari eta datu horien zirkulazio askeari dagokienez, eta, halaber, indarrik gabe utzi zen 95/46/EE Zuzentaraua), eta abenduaren 5eko 3/2018 Lege Organikoa, Datu Pertsonalak Babesteari eta Eskubide Digitalak Bermatzeari buruzkoa.
4. Erregistroa kudeatzearen ardura Nafarroako Foru Komunitatearen Administrazioko organo eskudunak izanen du, kanpoko nafar herritarrekiko harremanen eskumena duenak, alegia.
28. artikulua. Inskribatzeko moduko datuak eta komunikatzeko betebeharra.
1. Kanpoko nafar komunitateetan alta edo baja emateko inskripzioak ofizioz eginen dira, hura aitortzeko edo baliogabetzeko gobernu-erabakia hartu eta hurrengo hilabetearen barruan, hurrenez hurren, eta kanpoko nafar herritarrekiko harremanei buruzko otsailaren 22ko 3/2023 Foru Legean eta foru-dekretu honetan zehaztutako moduan.
Kanpoko nafar komunitateek nahitaez jakinarazi beharko dizkiote kanpoko nafar komunitateen erregistro ofizialari aldaketarik egon bada beren estatutuetan eta lehendakaritzaren, zuzendaritza-batzordearen edo edozein zuzendaritza-organoren osaeraren, baita kanpoko nafar herritarrekiko harremanei buruzko otsailaren 22ko 3/2023 Foru Legearen 11.3 artikuluan jasotako gainerako alderdi guztiak ere, aldaketak egiten direnetik bi hilabeteko epean, eta xedapen honen II. eranskinean agertzen den eredua aurkeztu beharko dute, datu eguneratuekin.
Hala ere, bazkideen zerrendako alten eta bajen egoera urtero aurkeztuko da, urte naturalaren lehen hiruhilekoan.
2. Aurreko paragrafoan ezarritakoari jarraituz, aldaketak erregistro ofizialari jakinarazi ondoren, erregistroan idatziko dira, zein egunetan gertatu diren adierazita.
3. Artikulu honen 1. puntuan aipatutako inguruabarrak ez jakinarazteak berekin ekar lezake kanpoko nafar komunitateen eskubideak etetea; eskubide horiek kanpoko nafar herritarrekiko harremanei buruzko 3/2023 Foru Legean, otsailaren 22koan, ezarrita daude.
29. artikulua. Erregistroaren egitura.
1. Kanpoko nafar herritarrekiko harremanei buruzko otsailaren 22ko 3/2023 Foru Legearen 11. artikuluaren 5. puntuan ezarritakoa betez, kanpoko nafar komunitateen erregistro ofiziala bi ataletan antolatuko da: bata, egoitza soziala Espainiako beste lurralde batean duten nafar komunitateena; eta, bestea, atzerrian dauden nafar komunitateena.
Komunitate birtualen kasuan, egoitza sozialaren kokalekutzat joko da informazioaren tratamenduaren ardura duen kanpoko komunitatea dagoen estatua.
2. Kanpoko nafar komunitateen erregistro ofizialeko atal bakoitza honako hauek osatuko dute:
- Direktorio bat, kanpoko nafar komunitateen alta-inskripzioak jasoko dituena.
- Ohar-liburua, erakunde bakoitzari dagozkion datuak bildu eta eguneratuta ordenatuko dituena, foru dekretu honen II. eranskineko fitxaren arabera.
3. Nafar komunitate bakoitzak erregistro-zenbaki bat izanen du, eta alta-inskripzioan esleituko zaio.
Bai direktorioko alta- edo baja-inskripzioetan, bai ohar-liburuan egindako mugimenduetan, mugimendu horiek zein egunetan egin diren jasoko da, dagokien erregistro-erreferentzia eta guzti.
30. artikulua. Dokumentu elektronikoak artxibatzea eta zaintzea.
1. Nafarroako Foru Komunitateko Administrazioaren erregistro orokor elektronikotik jasotzen edo bidaltzen diren dokumentu elektronikoak artxibatzeari eta zaintzeari dagokionez, Nafarroako Foru Komunitateko Administrazioaren erregistro orokor elektronikoari buruzko ekainaren 23ko 70/2008 Foru Dekretuan eta aplikatu beharreko gainerako legerian ezarritakoa beteko da.
2. Inskripzioen eta oharren euskarri diren dokumentuak gordetzen diren artxiboaz gain, erregistroa kudeatzeaz arduratzen den organoak edukia kontserbatzea eta erabiltzea erraztuko duten baliabide informatikoak izanen ditu, bai eta haren datu-bankurako sarbide publikoa ere, foru dekretu honen 27. artikuluan xedatutakoaren arabera.
Lehenbiziko xedapen gehigarria. Kontseiluaren eraketa.
Nafar Komunitateen Kontseilua foru dekretu honek indarrean sartu eta sei hilabeteko epean eratuko da, proposamen aproposak egin eta kideak izendatu ondoren.
Bigarren xedapen gehigarria. Parekidetasunprintzipioa.
Kontseiluko kideen izendapenetan eta ordezkotzetan eta haien funtzionamenduan, emakumeen eta gizonen presentzia orekatua errespetatuko da, eta zenbaketatik kanpo geratuko dira betetzen duten kargu espezifikoaren arabera kide anitzeko organoko kide diren pertsonak, emakumeen eta gizonen benetako berdintasuna arautzen duen araudiaren arabera.
Printzipio horren arabera, zeina emakumeen eta gizonen arteko berdintasunari buruzko apirilaren 4ko 17/2019 Foru Legearen 4. artikuluan jasotzen baita, emakumeen eta gizonen presentzia, dagokion pertsona-multzoan, halako modukoa izanen da non sexu bateko pertsonak ez diren izanen %60 baino gehiago, ezta %40 baino gutxiago ere, eta sexu bakoitzeko %50 lortzera joko da.
Lehen xedapen iragankorra. Espainiako beste eskualde batzuetan edo beste herrialde batzuetan dauden nafar komunitateak.
Otsailaren 22ko 3/2023 Foru Legeko xedapen iragankorrean xedatutakoa beteko da; hau da, Espainiako beste eskualde batzuetan edo beste herrialde batzuetan dauden eta etxe edo zentro nafar edo euskal-nafar gisa aitortuta dauden Nafarroako komunitateei dagokiena.
Bigarren xedapen iragankorra. Komunitate birtualak eta itzulitako pertsonen elkarteak.
Nafar Komunitateen Kontseilua eratzeko, eta kanpoko komunitate birtualen bat -eta, hala badagokio, itzulitako pertsonen elkarteren bat- aitortu eta erregistratu arte, kontseiluan komunitate horiei dagozkien karguak kanpoko nafar komunitate batek betetzen ahalko ditu aldi baterako, Kontseiluaren lehendakaritzak proposatuta. Kargua amaituko da komunitate birtualak edo itzulitakoen elkarteak eratu eta inskribatzen direnean, eta beren ordezkariak proposatzen dituztenean.
Xedapen indargabetzaile bakarra. Arauak indargabetzea.
Indarrik gabe uzten dira foru-dekretu honetan ezarritakoari aurka egiten dioten maila bereko edo baxuagoko arau guztiak.
Azken xedapenetako lehena. Arauak emateko gaikuntza.
1. Baimena ematen zaio kanpoko nafar herritarrekiko harremanen eskuduna den departamentuko titularrari, foru-dekretu honetan xedatutakoa garatu eta betetzeko behar diren xedapenak eman ditzan.
2. Foru-dekretu honen eranskinak kanpoko nafar herritarrekiko harremanen arloan eskumena duen departamentuko titularraren foru-agindu bidez eguneratzen ahalko dira.
Azken xedapenetan bigarrena. Egitura organikoa.
Memoria eta Bizikidetzako, Kanpo Ekintzako eta Euskarako Departamentuaren egitura organikoa ezartzen duen azaroaren 15eko 239/2023 Foru Dekretuaren 2.3. artikulua aldatzen da, eta testu hau izanen du:
"3 Era berean, Memoria eta Bizikidetzako, Kanpo Ekintzako eta Euskarako Departamentuko titularrari dagokio kide anitzeko organo hauetako buru izatea:
- Euskararen Nafar Kontseilua.
- Terrorismoaren Biktimei Laguntzeko Nafarroako Batzordea.
- Memoria Historikoaren arloko Koordinazio Batzorde Teknikoa.
- Nafar Komunitateen Kontseilua."
Azken xedapenetako hirugarrena. Indarra hartzea.
Foru-dekretu honek Nafarroako Aldizkari Ofizialean argitaratu eta biharamunean hartuko du indarra.
I. ERANSKINA. KANPOKO NAFAR KOMUNITATEA AITORTZEKO ESKAERA
II. ERANSKINA. KANPOKO KOMUNITATEARI BURUZKO DATUAK
