LEXNAVARRA
72/2014 FORU AGINDUA, OTSAILAREN 18KOA, EKONOMIA, OGASUN, INDUSTRIA ETA ENPLEGUKO KONTSEILARIAK EMANA, INTERPRETAZIORAKO ZENBAIT IRIZPIDE EZARTZEN DITUENA SOZIETATEEN GAINEKO ZERGARI BURUZKO ABENDUAREN 30EKO 24/1996 FORU LEGEAREN 66. ARTIKULUAN XEDATUTAKO KENKARIA APLIKATZEKO, IKERKETA ZIENTIFIKOAREN ETA BERRIKUNTZA TEKNOLOGIKOAREN JARDUERAK EGITEAGATIK
BON N.º 41 - 28/02/2014
Foru agindu honek helburu du irizpideak ezartzea Sozietateen gaineko Zergari buruzko abenduaren 30eko 24/1996 Foru Legearen 66. artikuluan araututako kenkaria aplikatzeko, ikerketa zientifikoaren eta berrikuntza teknologikoaren jarduerak egiteagatik. Horren xedea da, alde batetik, prozedura horretan parte hartzen duten Foru Komunitateko Administrazioaren organoek (berrikuntzaren eta teknologiaren arloan eskuduna den zuzendaritza nagusia eta Nafarroako Zerga Ogasuna) modu berean aplikatzea irizpide horiek, eta, bestetik, zergaren subjektu pasiboek irizpide horietara egokitzea haien ikerketa, garapena eta berrikuntza teknologikoa, kenkaria aplikatzeko.
Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1.c) artikuluak xedatzen du kontseilariek dutela, departamentu baten titularrak diren aldetik, departamentua eta departamentuaren menpeko edo hari lotutako entitateak zuzendu eta koordinatzeko eskudantzia.
Bestalde, Nafarroako Zerga Ogasuna Erakunde Autonomoaren estatutuetan (irailaren 3ko 119/2007 Foru Dekretuaren bidez onetsiak), xedatzen da Ekonomia eta Ogasun Departamentuaren titularrak izanen duela erakunde autonomo horren planifikazio, zuzendaritza eta babes nagusia, eta horrek, Foru Komunitateko zerga sistema aplikatu beharrez, baliabide pertsonal, material eta tekniko guztiak behar bezala koordinatuko ditu tributuen kudeaketa eta bilketa zuzen eta eraginkorra lortze aldera.
Horrenbestez, aipatutako artikuluek ematen dizkidaten eskudantziak erabiliz,
AGINDU DUT:
Sozietateen gaineko Zergari buruzko abenduaren 30eko 24/1996 Foru Legearen 66. artikuluan xedatutako kenkaria aplikatzeko ikerketa zientifikoaren eta berrikuntza teknologikoaren jarduerak egiteagatik, interpretaziorako irizpide hauei jarraituko diete berrikuntza teknologikoaren arloan eskumena duten organoek eta Nafarroako Zerga Ogasuna Erakunde Autonomoak:
Foru lege horren 66. artikuluko 1. eta 3. zenbakietan ezarritakoarekin bat, zergaldian egindako gastuak izanen dira. Hortaz, gastutzat hartuko dira, kontularitzari buruzko arauen arabera, kontuan izan gabe gastu bezala kontabilizatuko diren behin betiko edo geroago aktibatzen diren ibilgetu ukiezin bezala.
Horri dagokionez, ez dira gastutzat hartuko amortizazio fiskalak kontularitzako amortizazioaren gainetik dituen soberakinak, foru lege horren 16.1. a) eta b) artikuluek aipatzen duten amortizazio askatasunaren kasuetan.
66. artikuluko 5. puntuan xedatuarekin bat, gastu horiek lotura zuzena izan behar dute ikerketaren eta garapenaren jarduerekin edo berrikuntza teknologikoarenekin eta jarduera horiek gauzatzean benetan aplikatu behar dira.
Lotura zuzena duten gastuak dira jarduera horietan berariaz erabilitakoak bezala identifikatzen ahal direnak eta horiei banan-banan lotzen ahal zaizkienak.
Honako hauek izanen dute lotura zuzena ikerketaren, garapenaren edo berrikuntza teknologikoaren jarduerarekinn (hemendik aurrera, I+G+B):
a) Ekipamenduak, patenteak eta eredu erabilgarrien amortizazio gastuak, ondareko elementu horiek I+G+B proiektu batean erabiltzen diren neurrian eta denbora horretan.
Halaber, ondareko elementu horiek proiektua gauzatzen denean sortzen dituzten gastuak kontabilizatuko dira, baldin eta rentingaren, errentamendu finantzarioaren edo operatiboaren eta antzekoen modalitateetan erabiltzen badira.
b) Langileria gastuak (ikertzaileak, teknikariak eta gainerako laguntzaileak), zuzenean I+G+B jardueran enplegatuta daudenean, I+G+B proiektuan aritzen diren neurrian eta denbora horretan.
c) Erabilitako materialak: lehengaiak eta bestelako hornikuntzak.
Entitateak material horiek eskuratzen baditu enpresaren beste jarduera batzuetan ere erabiltzeko, horiek banatzeko irizpide bat ezarri beharko da, I+G+B jardueran erabilitako kantitatearen arabera edo kontsumitutako kilogramoen arabera, hura behar bezala frogaturik.
d) Kanpoko kolaborazioak, unibertsitateenak, zentro teknologikoenak eta proiektuan I+G+B lanak eta ezagutza teknikoen ekarpenak egiten dituzten beste enpresa batzuenak.
66. artikuluko 5. puntuan xedatuarekin bat, gastuak banakakoak izanen dira berariaz, proiektu bakoitzaren arabera.
Artikulu horretako 6. puntuan aipatzen den azalpen memorian, enpresak proiektuari atxikitako gastuak zehaztuko ditu, baita banatzeko irizpideak ere, hala balegokio.
Proiektu bat baino gehiago batera gauzatzen badira, I+G+B proiektu bakoitzaren arabera zehaztu eta sailkatuko dira gastuak.
Proiektu bakoitzeko gastu zuzenak proiektu bakoitzaren arabera behar bezala zehazteko, beharrezkoa da, hartara, kontzeptuak eta zenbatekoak konkretatzea, arrazoizko edozein metodo erabiliz, baldin eta geroago posible bada justifikatzea eta frogatzea gastu bakoitzak proiektu bakoitzarekin eta zenbatekoarekin duen lotura zuzena.
Kenkaria soilik aplikatuko da gastuak I+G+B proiektu zehatz bati zalantzarik gabe atxikitzen ahal zaizkionean eta horiek neurtzen ahal direnean.
Horrenbestez, kenkaria ezin izanen da aplikatu zeharkako gastuen gainean (besteak beste, enpresaren egitura orokorra edo finantza gastuak), ezta banan-banan zehaztu ezin direnen gainean ere, nahiz eta lotura zuzena duten I+G+B jarduerarekin, edota, banan-banan zehazteko modukoak badira, hala konkretatu ez direnen gainean.
Ikerketaren eta garapenaren jardueran sortzen diren prototipoen kasuan, produkziorako jardueran merkaturatzen edo erabiltzen badira, haien kostua ez da I+G+B gastuen parte izanen.
Ondorio horietarako, prototipoaren kostua izan daiteke hura egiteko balio garbia, edo, hala balegokio, birjartzearen prezioa.
Tratamendu bera jasoko dute I+G+B jardueran lortzen diren beste azpiproduktuek, hondakinek eta lehengoratze materialek, haiek merkaturatzen badira edo produkziorako aprobetxatzen badira.
Ulertuko da salmentako prezioa gauzatzeko balio garbia dela, merkaturatzeko beharrezko kostuak kenduta.
Birjartzeko prezioa izanen da erabiltzen den produktua ordezteko beste bat eskuratzeko behar den zenbatekoa.
Ondoko gastuak ez dira kenkariaren oinarriaren parte izanen, nahiz eta I+G+B jarduerekin lotura izan:
a) Langileen prestakuntzarako eta trebakuntzarako gastuak.
b) Proiektuaren dokumentazioari dagozkion gastuak.
c) Aholkularitza eta ziurtapen gastuak, proiektuaren kudeaketari eta I+G+B egiteagatik onura fiskalak eta diru-laguntzak tramitatzeari lotutakoak.
d) Administrazioaren gastuak eta bulegoko materialarenak.
e) Bidaia gastuak, dietak eta kilometrajea, ostatuarena eta joan-etorriarena, non ez den frogatzen lotura zuzena, hurrena eta beharrezkoa dutela I+G+B proiektuarekin.
f) Patenteak, markak edo industriaren jabetzaren beste modalitate batzuk inskribatzeko eskaerarekin lotura duten gastuak.
Azken Xedapen Bakarra . Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2014ko otsailaren 18an.-Ekonomia, Ogasun, Industria eta Enpleguko kontseilaria, Lourdes Goicoechea Zubelzu.
Iragarkiaren kodea: F1402588
