(ir al contenido)

navarra.es

Castellano | Euskara | Français | English

LEXNAVARRA


Versión para imprimir

Versión en castellano

202E/2025 FORU AGINDUA, EKAINAREN 6KOA, OSASUNEKO KONTSEILARIAK EMANA, ZEINAREN BIDEZ EZARTZEN BAITIRA BETETZEKO ZAILAK DIREN LANPOSTUAK ZEHAZTEKO IRIZPIDEAK ETA LANPOSTU HORIEK BETETZEKO PIZGARRIAK

BON N.º 133 - 04/07/2025



HITZAURREA

Zenbait espezialitate eta lan esparrutan osasungintzako profesionalen eskasia dago oro har. Horregatik, betetzeko zailak diren lanpostu horiek identifikatu nahi dira eta antzemandako arazoari aurre egiteko ekintza zehatzak antolatu. Horixe gertatzen da Nafarroako oinarrizko osasun laguntzan, hainbat arrazoirengatik betetzeko zailak baitira zenbait lanpostu. Horrek, dudarik gabe, ondorio negatiboak ditu, eta zaildu egiten du herritarren eskubideak bermatzea osasun-zerbitzuei dagokienez.

Lanpostuak betetzeko zailtasun horren kausetako bat da laguntza-zentroetara dagoen distantzia. Hori dela eta, 11/2023 Foru Legeak, martxoaren 29koak -zeinaren bidez aldatzen baita 11/1992 Foru Legea, urriaren 20koa, Osasunbidea-Nafarroako Osasun Zerbitzuari atxikitako langileen berariazko erregimenari buruzkoa-, kalte-ordaina ematen du egoera jakin batzuetan betetzeko zailak diren lanpostuak beteko dituzten oinarrizko osasun laguntzako taldeetako langileen joan-etorrien gastuetarako.

Hala ere, martxoaren 29ko 11/2023 Legea garatzean, Osasunbidea-Nafarroako Osasun Zerbitzuak beharrezkotzat jo du identifikatzea ez bakarrik zein lanpostutan den egokia kasuan kasuko arloburuari ordaintzea betetzeko zaila den lanpostura dagoen distantziari dagokion kalte-ordaina, baita, ikuspegi zabalagotik, zein baldintzak eragiten duten lanpostuak betetzeko eragozpen handiena (esaterako, lanaldi-motak edo laguntza-kargak).

Foru lege horrek ezartzen dituen pizgarri ekonomikoez gain, egokitzat jotzen da beste era bateko pizgarri ez-ekonomikoak ere ematea, lagungarriak izaten ahal baitira halako lanpostuak betetzeko interesa duten profesionalak erakartzeko; esaterako, aldi baterako kontratazio-prozesuekin edo lanpostuak betetzeko hautapen-prozesuekin erlazionatutakoak.

Aurrekoaz gain, esan behar da zaila dela lanpostuak betetzea beste arlo batzuetan ere, hala nola osasun laguntza espezializatuan (zehazki, eskualdeko ospitaleetan) eta osasun mentalean (eskualdeko ospitaleetan edo Nafarroako Osasun Publikoaren eta Lan Osasunaren Institutuan ez dauden eta Nafarroako Ospitale Unibertsitarioan dauden espezialitateetan). Hori dela eta, ikuspegi zabalago horretatik, betetzeko zailak diren lanpostutzat hartuko dira arlo horretakoak ere, eta pizgarri ez-ekonomikoak proposatzen dira haiek betetzeko.

Horrenbestez, Osasunbidea-Nafarroako Osasun Zerbitzuko eta Nafarroako Osasun Publikoaren eta Lan Osasunaren Institutuko osasun-arloko lanpostuei aplikatuko zaie foru agindu hau, adierazitako moduan.

Nafarroako Kontseiluaren iritzipean jarri da proiektua, eta hark haren aldeko txostena egin du maiatzaren 28ko 13/2025 Irizpenean.

Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluak ematen dizkidan ahalmenak erabiliz,

AGINTZEN DUT:

1. artikulua. Xedea eta aplikazioeremua.

1. Foru agindu honen helburua da betetzeko zailak diren lanpostuak zehazteko irizpideak eta lanpostu horiek betetzen dituztenentzako pizgarriak ezartzea. Halako lanpostuak daude Osasunbidea-Nafarroako Osasun Zerbitzuan, Nafarroako oinarrizko osasun laguntzan, ospitaleko osasun laguntzaren arloan, osasun mentaleko zentroetan eta Nafarroako Osasun Publikoaren eta Lan Osasunaren Institutuan.

2. Ez zaie foru agindu hau aplikatuko landa-eremuko larrialdi-zerbitzuetan eta ospitalez kanpoko larrialdi-zerbitzuetan etengabeko arreta eta larrialdietakoa ematen dituzten langileei.

2. artikulua. Nafarroako oinarrizko osasun laguntzaren esparruan betetzeko zailak diren lanpostutzat hartzeko irizpideak.

1. Nafarroako oinarrizko osasun laguntzaren esparruan betetzeko zailak diren lanpostutzat hartzen ahalko dira jarraian bi urte baino gehiago hutsik daramaten lanpostuak, baita gehienez sei hilabeteko aldian iraupen luzeko zerrendetan gutxienez bi deialdi-txandaren bitartez aldi batez kontratatzeko eskaini ondotik bete ezin izan direnak ere.

Ondorio horietarako, deialdi-txandatzat hartuko da eskaintza onartzen duen hautagai bat lortu arte edo, lortu ez arren, zerrendaren amaierara iritsi arte egiten dena.

Bi kasu hauetan eginen da bigarren deialdi-txanda: pertsonaren bat sartzen bada dagokion kontratazio-zerrendan, edo hautaketa- eta hornidura-prozesuen ondorioz zerrenda horretan mugimenduak badaude. Halakorik gertatzen ez bada, lehenengo deialdi-txanda egin eta sei hilabete igaro baino lehen eginen da bigarren txanda.

2. Era berean, betetzeko zailak diren lanpostutzat hartzen ahalko dira jarraian urtebete baino gehiago hutsik daramaten oinarrizko osasun laguntzako lanpostuak, edo azken bi urteetan %50etik behera bete diren lanpostuak, baldin eta beste baldintza hauetako bat ere betetzen bada:

1. Dagokion osasun-barrutiko hiri nagusitik (Iruña, Lizarra eta Tutera) lanpostua atxikita daukan zentrora errepidez dagoen distantzia gutxienez 40 kilometro izatea.

2. Plaza horretan, arratsaldez ere lan egin behar izatea.

3. Hilean 10na ordutik gorako lau guardia baino gehiago egin behar izatea sei hilabeteko epean.

4. Lanpostua kokatuta dagoen osasun-zentroan bi plaza edo gehiago egotea hutsik aurretik aipatutako aldietan.

Betetzeko zailak diren lanpostutzat hartzeko 2., 3. eta 4. baldintzetan ezarritako irizpideak gutxienez sei hilabetez mantenduko dira urte naturalean.

3. Halaber, betetzeko zaila den lanpostu bat egonen da lanaldi oso baten baliokideak diren lanaldi-murrizketa guztiak betetzeko kontratazio bat egitea proposatzen duten zentro edo unitateetan, baldin eta betetzeko zailak diren lanpostutzat hartzeko foru agindu honetan jasotzen diren baldintzak betetzen badira.

3. artikulua. Tuterako eta Lizarrako osasunbarrutietako eta osasun mentaleko zentroen eta ospitaleko osasun laguntzako zerbitzuen esparruan lanpostuak betetzeko zailtzat hartzeko irizpideak.

Betetzeko zailak diren lanpostutzat hartzen ahalko dira jarraian urtebete baino gehiago hutsik daramaten Tuterako eta Lizarrako Osasun Barrutietako ospitaleko osasun laguntzako lanpostuak, edo azken bi urteetan %50etik behera bete diren lanpostuak, baldin eta beste baldintza hauetako bat ere betetzen bada:

1. Hilean lau guardia baino gehiago egin behar izatea sei hilabeteko epean.

2. Arratsaldez ere lan egin behar izatea.

3. Edozein zerrendatan kontratatzeko izangairik ez egotea.

Betetzeko zailak diren lanpostutzat hartzeko 1., 2. eta 3. baldintzetan ezarritako irizpideak gutxienez sei hilabetez mantenduko dira urte naturalean.

4. artikulua. Betetzeko zailak diren lanpostuetara jendea erakartzeko eta haietan atxikitzeko pizgarriak.

Betetzeko zailak diren lanpostuak betetzen dituzten pertsonek pizgarri ez-ekonomiko hauek izanen dituzte:

1. Mugikortasun-prozesuetan:

a. Parte hartzen duen eta plazaren esleipendun gertatzen den lehenengo mugikortasun-prozesuan, lehentasuna izanen du urtebete baino gehiago eman duenak betetzeko zaila den lanpostu batean, baita haren ezkontideak edo bikotekide egonkorrak ere, ezkontideak edo bikotekide egonkorrak betetzeko zaila den lanpostua duen udalerrian edo beste mugakide batean kokatutako zentroei atxikita dauden plazei dagokienez. Beste lehentasun-eskubide bat sortuko da mugikortasun-prozesu batean parte hartuz gero, betetzeko zaila den lanpostu batean metatutako beste hiru urteko.

Dagokion mugikortasun-prozesuan pertsona batek baino gehiagok baldin badu plaza bererako lehentasuna, betetzeko zaila den lanpostu bat betetzen denbora gehien eman duenari esleituko zaio. Berdinketa egonez gero, aitortutako antzinatasun handiena duenari esleituko zaio.

b. Betetzeko zaila den lanpostu bat urtebetez edo denbora gutxiagoz bete duenak puntuazio handiagoa izanen du baremoan; hain zuzen ere, lanpostuak betetzeko parte hartzen duen lehenengo prozesuko puntuazio osoaren %15 gehienez.

5 puntu emanen dira betetzen zailak diren lanpostu batean emandako 4 hilabeteko aldi bakoitzeko, edozein dela ere lanaldiaren araubidea; 15 puntu emanen dira gehienez ere, betetzen zailak diren lanpostu batean emandako urtebeteko aldi bakoitzeko.

Denbora gutxiago eman bada lanpostuan, proportzionalki dagokion puntuazioa esleituko da.

2. Sartzeko hautaketa-prozesuetan:

a. Parte hartzen den lehenengo hautaketa-prozesuan:

Betetzeko zaila den lanpostu bat urtebetez baino gehiagoz bete duenak puntuazio handiagoa izanen du baremoan; hain zuzen ere, emandako zerbitzuei edo antzinatasunari dagokion puntuazio osoaren %15 gehienez. Aldiz, betetzeko zaila den lanpostu bat urtebetez bete dutenek %5 izanen dute.

5 puntu emanen dira betetzen zailak diren lanpostu batean emandako urtebeteko aldi bakoitzeko, edozein dela ere lanaldiaren araubidea; 15 puntu emanen dira gehienez ere, betetzen zailak diren lanpostu batean emandako hiru urteko aldi bakoitzeko.

Urte osoa ez bada, proportzionalki dagokion puntuazioa emanen da.

b. Hautaketa-prozesu hauetan:

Betetzeko zaila den lanpostu batean metatutako beste hiru urteko, baremoan puntuazio handiagoa izateko beste eskubide bat sortuko da sartzeko beste hautaketa-prozesu batean parte hartzean.

3. Aldi batez kontratatzean:

a. Puntuazio handiagoa izanen da aldi baterako kontratazioari dagokion baremoan; hain zuzen ere, puntuazio osoaren beste %15 gehienez, baldin eta gutxienez urtebete eman bada betetzeko zaila den lanpostu batean, alderdi hauen arabera:

- Onartuen zerrendan dauden baina plazarik ez duten izangaiak: beste 5 puntu esleituko zaizkie urtebete bakoitzeko, edo dagokion proportzioa (gehienez 15 puntu).

- Oposizio-fasea gainditu ez dutenen zerrendan dauden izangaiak: beste 0,6 puntu esleituko zaizkie urtebete bakoitzeko, edo dagokion proportzioa (gehienez 1,8 puntu).

- Zerrenda irekietan dauden izangaiak: beste 2,5 puntu esleituko zaizkie urtebete bakoitzeko, edo dagokion proportzioa (gehienez 7,5 puntu).

Bi urtez behin eguneratuko da baremoa, zerrenda irekietan emandako zerbitzuak eguneratzen direnean.

b. Sortzen den lehenengo eskaintzan, lehentasuna emanen zaio betetzeko zailak diren lanpostuetan daudenen ezkontideak edo bikotekide egonkorrak aldi batez kontratatzeari, haien ezkontideak edo bikotekide egonkorrak betetzeko zaila den lanpostua duen udalerrian edo beste mugakide batean kokatutako osasun-zentroetako osasun-arloko lanpostuak betetzeko. Ez da zigorrik ezarriko eskaintzari uko eginez gero. Ezkontideak edo bikotekide egonkorrak betetzeko zaila den lanpostuan metatu dituen beste hiru urteko, beste lehentasun bat sortuko da.

Lehentasun hori gauza dadin, ezkontideak edo bikotekide egonkorrak eskatu egin beharko du, eta hala dela frogatu, kontratazio-zerrendak kudeatzeko eskumena duen organoaren aurrean.

4. Lehentasuna emanen da parte hartzen den arlorako eskaintzen diren etengabeko prestakuntzako jardueretan parte hartzeko, betetzeko zaila den lanpostuan egon bitartean eta hurrengo hiru urteetan.

5. artikulua. Pizgarri ekonomikoak.

Oinarrizko osasun laguntzaren arloan betetzeko zailak diren lanpostuak betetzen dituztenek joan-etorrien gastuetarako kalte-ordaina jasoko dute lanpostua betetzeko zailtzat hartzen den eta beteta dagoen bitartean. Kalte-ordain hori jasota dago 11/2023 Foru Legean, maiatzaren 29koan, zeinaren bidez aldatzen baita 11/1992 Foru Legea, urriaren 20koa, Osasunbidea-Nafarroako Osasun Zerbitzuari atxikitako langileen berariazko erregimenari buruzkoa.

Hilero ordainduko da kalte-ordaina, arduraldiari dagokion zati proportzionalean, eta urriaren 20ko 11/1992 Foru Legean eskatutako baldintzak egiaztatu ondotik.

Halaber, ondorio hauetarako, betetzeko zailak diren lanpostutzat hartuko dira betetzeko zailtzat hartzen diren lanpostuak dituen zentroko estamentu, espezialitate eta txanda bereko langileek dituztenak.

6. artikulua. Betetzeko zailak diren lanpostuak zehaztea eta eguneratzea.

1. Urtero, Osasun Departamentuaren titularrak emandako foru aginduaren bitartez, betetzeko zailak diren lanpostuen zerrenda zehaztuko da.

2. Sei hilabeteko epean aldi batez kontratatzeko bi deialdi-txandaren ondotik bete ezin izan diren lanpostuen kasuan, betetzeko zaila den lanpostutzat jotzeko baldintza betetzen den unean joko da halakotzat, lehen aipatutako urteko adierazpenarekin bat etorrarazi beharrik gabe.

3. Betetzeko zailak diren lanpostuen azken adierazpena argitaratu eta urtebete igaro ondotik dagokion eguneratzea onartzen ez bada, argitaratutako azkenak jarraituko du indarrean, ondorio guztiekin.

4. Aurrekoa gorabehera, pizgarri ez-ekonomikoak emateari dagokionez, betetzeko zailak diren lanpostuetan emandako benetako denbora baloratuko da, nahiz eta dagoeneko ez bete lanpostua betetzeko zailtzat jotzeko deklarazioa mantentzeko baldintzak.

Lehenengo xedapen gehigarria. Aldi baterako barneigoeraren bitartez betetako lanpostuei pizgarriak aplikatzea.

Foru agindu honetan xedatutakoa aplikagarri izanen zaie aldi baterako barne-igoeraren bitartez betetzeko zailak diren lanpostuak betetzen dituztenei, lanpostua betetzeko zailtzat jotzen den bitartean, foru agindu honetako irizpideei jarraikiz.

Bigarren xedapen gehigarria. Betetzeko zailak diren lanpostuetan profesionalik ez egotearen eragina jasaten duten langileei pizgarriak aplikatzea.

1. Halaber, ondorio hauetarako, betetzeko zailak diren lanpostutzat hartuko dira foru agindu honen arabera betetzeko zailtzat hartzen den lanpostu bat duen zentroko edo unitateko estamentu, espezialitate eta txanda bereko langile guztiek dituztenak.

2. Lanpostua betetzeko zailtzat hartzen den bitartean, betetzeko zailtzat jotako lanposturen bat duen osasun-zentro batean bestelako lanpostuak betetzen dituzten oinarrizko osasun laguntzako langileek pizgarri ez-ekonomiko hauek sortuko dituzte, eta foru agindu honen 4.3) a artikuluan xedatutakoaren arabera baremoa eguneratzean gauzatuko dira:

2.1. Puntuazio handiagoa aldi baterako kontratazioari dagokion baremoan, gehienez beste 2,5 puntu emanda urtebeteko, edo dagokion proportzioa, eta gehienez 7,5 puntu, baldintza hauen arabera:

- Onartuen zerrendan dauden baina plazarik ez duten izangaiak: beste 2,5 puntu esleituko zaizkie urtebete bakoitzeko, edo dagokion proportzioa (gehienez 7,5 puntu).

- Oposizio-fasea gainditu ez dutenen zerrendan dauden izangaiak: beste 0,3 puntu esleituko zaizkie urtebete bakoitzeko, edo dagokion proportzioa (gehienez 0,9 puntu).

- Zerrenda irekietan dauden izangaiak: beste 1,25 puntu esleituko zaizkie urtebete bakoitzeko, edo dagokion proportzioa (gehienez 3,75 puntu).

2.2. Puntuazio handiagoa parte hartzen duen sartzeko lehenengo hautaketa-prozesuari eta plaza bat esleitzen dion lanpostuak hornitzeko lehenengo prozesuari dagokien baremoan; hala, beste 2,5 puntu urtebeteko, eta 7,5 puntu gehienez.

2.3. Lehentasuna parte hartzen den arlorako eskaintzen diren etengabeko prestakuntzako jardueretan parte hartzeko.

3. Xedapen honetan jasotakoaren arabera, zentroa edo unitatea zuzentzen dutenei dagokie egiaztatzea zeinek betetzen duten baldintza hori.

Hirugarren xedapen gehigarria. Lanaldia malgutzeko neurriak.

Betetzeko zailak diren lanpostuetan lanaldia malgutzeko neurriak ezartzea sustatuko da.

Laugarren xedapen gehigarria. Pizgarri ezekonomikoak aplikatzea barneko mediku egoiliarrak fidelizatzeko.

Egoitzako prestakuntza-aldia amaitzear duten barneko mediku egoiliarrak erakartzeko eta fidelizatzeko, foru agindu honen laugarren artikuluan ezarritako pizgarri ez-ekonomikoak aplikatuko zaizkie, betetzeko zaila den lanpostu batean aldi batez kontratatzea onartzen badute prestakuntza amaitu eta hurrengo hiru hilabeteetan, zehaztapen hauekin:

- Puntuazio handiagoa aldi baterako kontratazioari dagokion baremoan; gehienez, puntuazio osoaren %30.

- Puntuazio handiagoa sartzeko eta lanpostuak betetzeko hautaketa-prozesuei dagokien baremoan; puntuazio osoaren %25eraino igotzen ahal da.

Bosgarren Xedapen Gehigarria. Nafarroako Ospitale Unibertsitarioko arloko fakultatibo espezialistei pizgarri ezekonomikoak aplikatzea.

1. NOUko arloko fakultatibo espezialista hauei aplikatuko zaizkie foru agindu honetan ezarritako pizgarri ez-ekonomikoak:

a. Nafarroako Ospitale Unibertsitarioan soilik dauden eta foru agindu honen 3. artikuluko baldintzak betetzen dituzten espezialitateetakoei.

b. Tuterako eta/edo Lizarrako eskualde-ospitaleetan betetzeko zailak diren lanpostutzat hartutako unitateren batean jarduten dutenei.

c. Tuterako eta/edo Lizarrako eskualde-ospitaleetan jarduten dutenei arlo funtzional baten edo antzeko aliantza-tresna baten parte delako.

2. Aurreko atalean aipatutako profesionalei foru agindu honetan jasotako pizgarri ez-ekonomikoak aplikatuko zaizkie, berezitasun hauekin:

- Puntuazio handiagoa sartzeko eta lanpostuak betetzeko hautaketa-prozesuei dagokien baremoan; gehienez, puntuazio osoaren beste %15, jardueraren arabera.

- Puntuazio handiagoa aldi baterako kontratazioari dagokion baremoan; gehienez, puntuazio osoaren beste %15, jardueraren arabera.

1. apartuko a. letran adierazitako profesionalei pizgarri horiek aplikatuko zaizkie, foru agindu honen 4. artikuluan ezarritakoaren arabera.

b. eta c. letretan adierazitako profesionalei honela aplikatuko zaizkie: lau hilabeteri dagokien puntuazioa zenbatuko da (5 puntu), baldin eta aldi horretan gutxienez bi guardia egiten badira, edo bi produktibitate hilero edo batez beste lau hilabetean.

- Lehentasuna Nafarroako Ospitale Unibertsitarioan eskaintzen diren etengabeko prestakuntzako jardueretan parte hartzeko, pizgarriak lortzeko baldintzak bete bitartean eta hurrengo hiru urteetan.

Seigarren xedapen gehigarria. Nafarroako Osasun Publikoaren eta Lan Osasunaren Institutuko arloko fakultatibo espezialistei pizgarri ezekonomikoak aplikatzea.

1. Tuterako eta/edo Lizarrako eskualde-ospitaleetan betetzeko zailak diren lanpostutzat jotako unitateren batean diharduten NOPLOIko fakultatibo espezialistei aplikatuko zaizkie foru agindu honetan ezarritako pizgarri ez-ekonomikoak.

2. Aurreko atalean aipatutako profesionalei foru agindu honetan jasotako pizgarri ez-ekonomikoak aplikatuko zaizkie, berezitasun hauekin:

- Puntuazio handiagoa sartzeko eta lanpostuak betetzeko hautaketa-prozesuei dagokien baremoan; gehienez, puntuazio osoaren beste 15 puntu, jardueraren arabera.

- Puntuazio handiagoa aldi baterako kontratazioari dagokion baremoan; gehienez, puntuazio osoaren beste %15, jardueraren arabera.

Bi kasuetan, lau hilabeteri dagokien puntuazioa zenbatuko da (5 puntu), baldin eta aldi horretan gutxienez bi guardia egiten badira, edo bi produktibitate hilabete oroz edo batez beste lau hilabetean.

Azken xedapenetako lehena. Aldatzea 110/2011 Foru Agindua, irailaren 19koa, Osasuneko kontseilariak emana, OsasunbideaNafarroako Osasun Zerbitzuan sartu eta bertako lanpostuak betetzeko prozeduretan, osasun arloko A mailako langileei izan ezik (A1 eta A2 estamentuak), aplikatu beharreko merezimendubaremoak arautzen dituena.

110/2011 Foru Agindua, irailaren 19koa, Osasuneko kontseilariak emana, Osasunbidea-Nafarroako Osasun Zerbitzuan sartu eta bertako lanpostuak betetzeko prozeduretan, osasun arloko A mailako langileei izan ezik (A1 eta A2 estamentuak), aplikatu beharreko merezimendu-baremoak arautzen dituena, honela idatzita geldituko da:

Bat. III. eranskineko 2.1. apartatua honela geldituko da idatzita:

2.1. Graduondoko prestakuntza.

- Doktore-gradua: 3 puntu.

- Unibertsitateko master ofiziala: 1,5 puntu (gehienez 3 puntu).

- Unibertsitateko aditua (aurrez aurrekoa): 0,5 puntu (gehienez 2 p untu).

- Unibertsitateko aditua (onlinekoa edo berezko titulua): 0,5 puntu (gehienez 1 puntu).

Bi. III. eranskineko 2.3. apartatua honela geldituko da idatzita:

2.3. Erakunde edo zentro publikoek eta unibertsitateek antolatutako edo egiaztatutako prestakuntza jardueretan ikasle gisa parte hartzea. Ikasketa-kreditu bakoitzeko, 0,05 puntu.

Ikastaroaren egiaztapena ordutan egiten bada, kreditu bat kontatuko da hamar orduko. Egiaztagirian orduak eta kredituak agertzen badira, ikastaroa baloratzeko, kredituak hartuko dira aintzat.

Ziurtagirian jardueraren iraupena ageri ez bada, ez da baloratuko; eta ikaslea ikasturte osoan aritu dela agertzen bada, 12 kreditu kontatuko dira.

Zatikiak hainbanatuko dira

Honako arlo hauetako prestakuntza baloratuko da: laneko arriskuen prebentzioa, informatika, emakumeen eta gizonen arteko berdintasuna, genero-indarkeria eta/edo Osasuna eta Generoari buruzko berariazko prestakuntza edo prestakuntza sektoriala.

Atal honetan, erakunde antolatzaileari buruzko betebeharrak betetzen ez dituzten prestakuntza ekintzak ere baloratuko dira, baldin eta Administrazioak aginduta egin badira edo hark homologatu baditu. Horien artean espresuki sartzen dira sindikatuek Administrazio Publikoetako Etengabeko Prestakuntzarako Akordioen barrenean antolatutakoak.

Titulu ofizialak ez dira merezimendu gisa baloratuko.

Gehienez ere 2,5 puntu emanen dira.

Hiru. III. eranskineko 2.5. apartatua honela geldituko da idatzita:

2.5. Administrazioen edo erakunde publikoen beka edo saria jaso duten lan zientifikoak edo ikerlanak egitea:

- Nazioartekoak: 1,5 bekaren hartzaileari; 0,75 puntu, taldeko kide izateagatik.

- Estatukoak: 1 puntu bekaren hartzaileari; 0,5 puntu taldeari.

- Autonomia erkidegoenak: 0,5 puntu bekaren hartzaileari; 0,2 puntu taldeari.

Gehienez ere 3 puntu emanen dira.

Lau. III. eranskineko 2.6. apartatua honela geldituko da idatzita:

2.6. Lanak ISSNa duten aldizkari zientifiko espezializatuetan argitaratzea.

ISSNa duten aldizkari espezializatuetan argitaratutako lanak, Journal Citation Reports-ek jasotako inpaktu-faktorearen (IF) arabera:

-Baldin FI “ 3, lehenengo hiru sinatzaileak: 1 puntu. Hurrengo hirurak: 0,5 puntu.

-Baldin FI ≤ 3, lehenengo hiru sinatzaileak: 0,5 puntu. Hurrengo hirurak: 0,25 puntu.

-Inpaktu-faktorerik ez badu, lehenengo hiru sinatzaileak: 0,1 puntu. Hurrengo hirurak: 0,05 puntu.

Inpaktu-faktorea izangaiak berak frogatu beharko du, eta lanaren argitalpen urtearen gainekoa izanen da.

Gehienez ere 5 puntu emanen dira.

Bost. IV. eranskineko 2.1. honela geldituko da idatzita:

2.1. Erakunde edo zentro publikoek eta unibertsitateek antolatutako edo egiaztatutako prestakuntza jardueretan ikasle gisa parte hartzea. Ikasketa-kreditu bakoitzeko, 0,05 puntu.

Ikastaroaren egiaztapena ordutan egiten bada, kreditu bat kontatuko da hamar orduko. Egiaztagirian orduak eta kredituak agertzen badira, ikastaroa baloratzeko, kredituak hartuko dira aintzat.

Ziurtagirian jardueraren iraupena ageri ez bada, ez da baloratuko; eta ikaslea ikasturte osoan aritu dela agertzen bada, 12 kreditu kontatuko dira.

Zatikiak hainbanatuko dira.

Honako arlo hauetako prestakuntza baloratuko da: laneko arriskuen prebentzioa, informatika, emakumeen eta gizonen arteko berdintasuna, genero-indarkeria eta/edo Osasuna eta Generoari buruzko berariazko prestakuntza edo prestakuntza sektoriala.

Atal honetan, erakunde antolatzaileari buruzko betebeharrak betetzen ez dituzten prestakuntza ekintzak ere baloratuko dira, baldin eta Administrazioak aginduta egin badira edo hark homologatu baditu. Horien artean espresuki sartzen dira sindikatuek Administrazio Publikoetako Etengabeko Prestakuntzarako Akordioen barrenean antolatutakoak.

Titulu ofizialak ez dira merezimendu gisa baloratuko.

Gehienez ere, 10 puntu emanen dira.

Azken xedapenetako lehena. Aldatzea 111/2011 Foru Agindua, irailaren 19koa, Osasuneko kontseilariak emana, zeinaren bidez arautzen baitira OsasunbideaNafarroako Osasun Zerbitzuan osasun arloko A mailako langileen lanpostuetan (A1 eta A2 estamentuak) sartzeko eta lanpostu horiek betetzeko prozedurak, eta ezartzen baitira horietan aplikatu beharreko merezimendubaremoak.

111/2011 Foru Agindua, irailaren 19koa, Osasuneko kontseilariak emana, zeinaren bidez arautzen baitira Osasunbidea-Nafarroako Osasun Zerbitzuan osasun arloko A mailako langileen lanpostuetan (A.1 eta A.2 estamentuak) sartzeko eta lanpostu horiek betetzeko prozedurak, eta ezartzen baitira horietan aplikatu beharreko merezimendu-baremoak, honela idatzita geldituko da:

Bat. II. eranskineko 2.3. apartatua honela idatzita geldituko da:

2.3. Erakunde edo zentro publikoek eta unibertsitateek antolatutako edo egiaztatutako prestakuntza jardueretan ikasle gisa parte hartzea. Ikasketa-kreditu bakoitzeko, 0,025 puntu.

Ikastaroaren egiaztapena ordutan egiten bada, kreditu bat kontatuko da hamar orduko. Egiaztagirian orduak eta kredituak agertzen badira, ikastaroa baloratzeko, kredituak hartuko dira aintzat.

Ziurtagirian jardueraren iraupena ageri ez bada, ez da baloratuko; eta ikaslea ikasturte osoan aritu dela agertzen bada, 12 kreditu kontatuko dira.

Zatikiak hainbanatuko dira.

Honako arlo hauetako prestakuntza baloratuko da: laneko arriskuen prebentzioa, informatika, emakumeen eta gizonen arteko berdintasuna, genero-indarkeria eta/edo Osasuna eta Generoari buruzko berariazko prestakuntza edo prestakuntza sektoriala.

Atal honetan, erakunde antolatzaileari buruzko betebeharrak betetzen ez dituzten prestakuntza ekintzak ere baloratuko dira, baldin eta Administrazioak aginduta egin badira edo hark homologatu baditu. Horien artean espresuki sartzen dira sindikatuek Administrazio Publikoetako Etengabeko Prestakuntzarako Akordioen barrenean antolatutakoak.

Titulu ofizialak ez dira merezimendu gisa baloratuko.

Osasun zientzietako espezialistek ikasle egoiliar gisa egindako prestakuntzaldiko orduak ez dira kontatuko atal honetan.

Gehienez ere 2,5 puntu emanen dira.

Bi. III. eranskineko 2.3. apartatua honela geldituko da idatzita:

2.3. Erakunde edo zentro publikoek eta unibertsitateek antolatutako edo egiaztatutako prestakuntza jardueretan ikasle gisa parte hartzea. Ikasketa-kreditu bakoitzeko, 0,025 puntu.

Ikastaroaren egiaztapena ordutan egiten bada, kreditu bat kontatuko da hamar orduko. Egiaztagirian orduak eta kredituak agertzen badira, ikastaroa baloratzeko, kredituak hartuko dira aintzat.

Ziurtagirian jardueraren iraupena ageri ez bada, ez da baloratuko; eta ikaslea ikasturte osoan aritu dela agertzen bada, 12 kreditu kontatuko dira.

Zatikiak hainbanatuko dira.

Honako arlo hauetako prestakuntza baloratuko da: laneko arriskuen prebentzioa, informatika, emakumeen eta gizonen arteko berdintasuna, genero-indarkeria eta/edo Osasuna eta Generoari buruzko berariazko prestakuntza edo prestakuntza sektoriala.

Atal honetan, erakunde antolatzaileari buruzko betebeharrak betetzen ez dituzten prestakuntza ekintzak ere baloratuko dira, baldin eta Administrazioak aginduta egin badira edo hark homologatu baditu. Horien artean espresuki sartzen dira sindikatuek Administrazio Publikoetako Etengabeko Prestakuntzarako Akordioen barrenean antolatutakoak.

Titulu ofizialak ez dira merezimendu gisa baloratuko.

Ez dira atal honetan baloratuko hobekuntza ikastaroan ikasle gisa egindako orduak, ez 2.2.3. azpiatalean adierazitako ohiz kanpoko sarbiderako prozeduraren prestakuntza osagarriko orduak, ez eta Osasun Zientzietako espezialisten prestakuntzarako egonaldia bitartean ikasle gisa egindako orduak ere.

Gehienez ere 2,5 puntu emanen dira.

Azken xedapenetako hirugarrena.-Indarra hartzea. Foru agindu honek Nafarroako Aldizkari Ofizialean argitaratzen den egunean hartuko du indarra.

Gobierno de Navarra

Contacte con nosotros | Accesibilidad | Aviso legal | Mapa web