(ir al contenido)

navarra.es

Castellano | Euskara | Français | English

LEXNAVARRA


Versión para imprimir
Versión en castellano

15/2025 FORU DEKRETUA, OTSAILAREN 26KOA, NAFARROAKO FORU KOMUNITATEKO JOKO ETA APUSTUEN ERREGELAMENDU OROKORRA ONESTEN DUENA

BON N.º 59 - 24/03/2025

  I. TITULUA. XEDAPEN OROKORRAK

  I. KAPITULUA. XEDEA, EREMUA ETA ARAUBIDE JURIDIKOA

  II. KAPITULUA. JOKOAREN ANTOLAMENDUA

  III. KAPITULUA. PLANGINTZA ETA JOKO ARDURATSUA

  LEHENBIZIKO ATALA. PLANGINTZA

  BIGARREN ATALA. JOKO ARDURATSUA

  IV. KAPITULUA. JOKALARIAK

  LEHENBIZIKO ATALA. KONTZEPTUA, ESKUBIDEAK ETA BETEBEHARRAK

  BIGARREN ATALA. JOKOAREN MUGAK

  HIRUGARREN ATALA. NAFARROAKO JOKORAKO SARBIDEKO INTERDIKZIOEN ERREGISTROA

  LAUGARREN ATALA. JOKOAREN SARBIDEAREN ETA PARTEHARTZEAREN KONTROLA

  V. KAPITULUA. JOKOAREKIN LOTUTAKO ENPRESAK

  LEHENBIZIKO ATALA. JOKOENPRESAK

  BIGARREN ATALA. JOKOENPRESA OSAGARRIAK

  VI. KAPITULUA. JOKOAREN PUBLIZITATEA, BABESLETZA ETA SUSTAPENA

  LEHENBIZIKO ATALA. ARAUBIDE JURIDIKOA ETA PRINTZIPIO OROKORRAK

  BIGARREN ATALA. MUGAK ETA DEBEKUAK

  HIRUGARREN ATALA. KOMUNIKAZIO PROZEDURA

  VII. KAPITULUA. JOKORAKO MATERIALAK

  LEHENBIZIKO ATALA. KONTZEPTUA, SAILKAPENA ETA HOMOLOGAZIOA

  VIII. KAPITULUA. JOKOAREN KONTROLA ETA IKUSKAPENA

  LEHENBIZIKO ATALA. NAFARROAKO JOKOEN ETA APUSTUEN ERREGISTROA

  BIGARREN ATALA. KONTROL JARDUERAK

  HIRUGARREN ATALA. SARIAK ETA ITZULKETAK

  IX. KAPITULUA. ZEHAPEN ARAUBIDEA

  II. TITULUA. NAFARROAKO JOKO ETA APUSTUEN KATALOGOA

  I. KAPITULUA. EDUKIA ETA ANTOLAKETA

  II. KAPITULUA. APOSTUAK

  LEHENBIZIKO ATALA. DEFINIZIOAK ETA MATERIALAK

  BIGARREN ATALA. GARAPENERAKO FUNTSEZKO ARAUAK

  HIRUGARREN ATALA. MUGAK ETA PLANGINTZA NEURRIAK

  LAUGARREN ATALA. MODALITATEAK

  BOSGARREN ATALA. APUSTU TRADIZIONALAK

  III. KAPITULUA. BINGOA

  LEHENDABIZIKO ATALA. XEDAPEN OROKORRAK

  BIGARREN ATALA. ARAUAK, KONBINAZIO IRABAZLEAK ETA SARIAK

  HIRUGARREN ATALA. MUGAK

  LAUGARREN ATALA. BINGO TRADIZIONALAREN MODALITATEA

  IV. KAPITULUA. TXARTELAK

  V. KAPITULUA. LOTERIAK

  LEHENBIZIKO ATALA. DESKRIBAPENA, ANTOLAKETA ETA PARTEHARTZEA

  BIGARREN ATALA. ZOZKETAK ETA SARIAK

  HIRUGARREN ATALA. BERMEAK, ERANTZUKIZUNAK ETA MUGAK

  VI. KAPITULUA. JOKOMAKINAK

  LEHENBIZIKO ATALA. DESKRIBAPENA, ANTOLAKETA ETA JOKOAN PARTE HARTZEKO MODUAK

  BIGARREN ATALA. MODALITATEAK

  HIRUGARREN ATALA. KONFIGURAZIO TEKNIKOAK ETA SARIEN PLANA

  LAUGARREN ATALA. JOKOMAKINAK USTIATZEKO ARAUBIDEA

  BOSGARREN ATALA. JOKOMAKINAK INSTALATZEKO ARAUBIDEA

  SEIGARREN ATALA. JOKOMAKINEN FUNTZIONAMENDUAREN ARAUBIDEA

  VII. KAPITULUA. ZOZKETAK, TONBOLAK ETA AUSAZKO KONBINAZIOAK

  LEHENBIZIKO ATALA. XEDAPEN OROKORRAK

  BIGARREN ATALA. ANTOLAMENDUA

  HIRUGARREN ATALA. BAIMENA

  LAUGARREN ATALA. MUGAK

  III. TITULUA. JOKOA BANATZEKO KANALAK

  I. KAPITULUA. JOKO PRESENTZIALA

  LEHENBIZIKO ATALA. JOKOLOKALEN XEDAPEN KOMUNAK

  BIGARREN ATALA. JOKOLOKALEN AURREKO KONTSULTA ETA BAIMENA

  HIRUGARREN ATALA. BINGOETARAKO XEDAPEN ESPEZIFIKOAK

  LAUGARREN ATALA. JOKOARETOEN XEDAPEN ESPEZIFIKOAK

  BOSGARREN ATALA. KIROLAPUSTUETARAKO LOKALEN BERARIAZKO XEDAPENAK

  SEIGARREN ATALA. JOKORAKO GAITUTAKO BESTE LOKAL BATZUK

  II. KAPITULUA. JOKO EZPRESENTZIALA

  LEHENBIZIKO ATALA. ERABILTZAILEARENTZAKO INFORMAZIOA ETA ZERBITZUAK

  BIGARREN ATALA. JOKOAN PARTE HARTZEKO KONTROLAK

  HIRUGARREN ATALA. JOKO EZPRESENTZIALEKO JOKOAREN KONTUA

  I. ERANSKINA. JOKORAKO MATERIALEN ZEHAZTAPEN TEKNIKOAK

  I. KAPITULUA. XEDAPEN TEKNIKO OROKORRAK

  LEHENBIZIKO ATALA. JOKOSISTEMA TEKNIKOAK

  BIGARREN ATALA. JOKOAREN KUDEAKETA INTEGRALEKO SISTEMAK

  HIRUGARREN ATALA. INTERKONEXIOSISTEMAK

  LAUGARREN ATALA. JOKO EZPRESENTZIALA USTIATZEKO SISTEMA INTEGRALAK

  II. KAPITULUA. BERARIAZKO XEDAPEN TEKNIKOAK

  LEHENBIZIKO ATALA. APUSTUAK

  BIGARREN ATALA. BINGO TRADIZIONALA

  HIRUGARREN ATALA. JOKOMAKINAK

  III. KAPITULUA. DOKUMENTAZIO TEKNIKOA ETA HOMOLOGAZIOPROTOKOLOAK

  LEHENBIZIKO ATALA. JOKOSISTEMA TEKNIKOAK HOMOLOGATZEA

  BIGARREN ATALA. JOKOMAKINEN HOMOLOGAZIOA

  HIRUGARREN ATALA. MODELO HOMOLOGATUAK ALDATZEA

ZIOEN AZALPENA

Kasino, joko eta apustuen arloan Nafarroari dagozkion eskumen esklusiboen esparruan, hala xedatuta baitago Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 44.16 artikuluan, eta gai horri buruzko legegintzako ahalmena baliatuz, Nafarroako Parlamentuak Jokoari buruzko abenduaren 14ko 16/2006 Foru Legea onetsi zuen.

Foru lege horrek lege esparru berri bat eratzen du, bide ematen duena arlo horretako arauetan beharrezko egokitzapena egiteko, eta aukera ematen duena jokoaren inguruko politika oraingo inguruabarretara egokituz garatzeko, eskuarki eta sistematikoki heltzen baitzaie Nafarroako jokoaren eta apustuen jarduerei, printzipio orokorrak zehaztuz jarduera horiek antolatzeko eta, ondoren, erregelamendu bidezko garapena egiteko.

Lege hori garatzeko, zenbait arau onesten joan dira jokoaren eta apustuen alderdi orokorrak eta antolaketakoak arautzeko, bai eta jokoaren eta apustuen modalitate batzuen berariazko erregelamenduak ere, eta horrek denak osatzen du, abenduaren 14ko 16/2006 Foru Legearen aurreko beste xedapen batzuekin batera, Nafarroako Foru Komunitatean sektore hori arautzeko esparrua.

Hala ere, esparru arautzaile horrek irismen mugatua du, jardueraren eremu batzuk antolamendu espezifikorik gabe gelditu baitira. Bestalde, ondoriozko erregulazioa, egun, sobera sakabanatuta dago, eta formulazio desberdinak jasotzen ditu jokoaren sektore batean baino gehiagotan komunak diren alderdietarako. Azkenik, oraindik ere badira zenbait arau, egokitu behar direnak sinplifikazioaren, prozedura ekonomiaren, eraginkortasunaren eta administrazio efizientziaren printzipioetara.

Foru dekretu honek gabezia eta disfuntzio horiek zuzendu nahi ditu, testu bakar eta koherente batean integratuz urtarrilaren 24ko 5/2011 Foru Dekretuaren bidez onetsitako Nafarroako Joko eta Apustuen Katalogoan sartutako joko modalitateen erregelamendu espezifikoak.

Proiektuak honako hauek ditu: zioen azalpena, hiru titulu, bi xedapen gehigarri, sei xedapen iragankor, xedapen indargabetzaile bat, bi azken xedapen eta eranskin bat.

I. tituluak araudi orokorra jasotzen du, joko modalitate guztietarako xedapen komunak jasotzen dituena, eta bederatzi kapitulu ditu: I. kapitulua: Xedea, eremua eta araubide juridikoa; II. kapitulua: Jokoaren antolamendua; III. kapitulua: Plangintza eta joko arduratsua; IV. kapitulua: Jokalariak; V. kapitulua: Jokoarekin lotutako enpresak; VI. kapitulua: Jokoaren publizitatea, babesletza eta sustapena; VII. kapitulua: Jokorako materialak; VIII. kapitulua: Jokoaren kontrola eta ikuskapena; IX. kapitulua: Zehapen araubidea.

II. tituluak joko sektore bakoitzaren berariazko araudia biltzen du, zazpi kapitulutan: I. kapitulua: Edukia eta antolaketa; II. kapitulua: Apustuak; III. kapitulua: Bingoa; IV. kapitulua: Txartelak; V. kapitulua: Loteriak; VI. kapitulua: Joko makinak; VII. kapitulua: Zozketak, tonbolak eta ausazko konbinazioak.

III. tituluak jokoa banatzeko kanalaren araberako erregelamentazioa biltzen du, bi kapitulutan: I. kapitulua: Joko presentziala; II. kapitulua: Joko ez-presentziala.

Eranskinean, joko eta apustuen modalitateak haien oinarrizko arauak eta zehaztapen teknikoak garatzen dira, bai eta, kasua zein den, berariazko araudiari jarraikiz haiek antolatu eta egiteko ezartzen diren murriztapenak eta mugapenak ere.

Arau honek betetzen du Europako Parlamentuaren eta Kontseiluaren 2015eko irailaren 9ko 2015/1535 (EB) Zuzentaraua, zeinaren bidez informazio prozedura bat ezartzen baita informazio gizartearen zerbitzuei buruzko erregelamentazio teknikoen eta arauen arloan.

Hori horrela, Nafarroako Kontseiluari entzunda, Barneko, Funtzio Publikoko eta Justiziako kontseilariak proposatuta eta Nafarroako Gobernuak 2025eko otsailaren 26an egin bilkuran hartutako erabakiaren bat.

DEKRETATZEN DUT:

Artikulu bakarra

Nafarroako Foru Komunitateko Joko eta Apustuen Erregelamendu Orokorra onesten da. Ondotik zehazten da haren testua.

Lehenengo xedapen gehigarria. Genero neutraltasuna.

Ulertuko da foru dekretu honetako gaztelaniazko terminologiak, erabiltzaile, jokalari eta parte-hartzaileak aipatzen dituenean, genero guztiak biltzen dituela, eta hala, genero neutraltasuna duela testuaren idazketa guztiak.

Bigarren xedapen gehigarria. Nafarroako Jokoen eta Apustuen Erregistroko datuen migrazioa.

Nafarroako Jokoen eta Apustuen Erregistroko erregistro-datuak I. tituluko VIII. kapituluko I. atalean araututako erregistroko kasuan kasuko atalaren parte izatera igaroko dira (erregistro hori araututa dago 4/2011 Foru Dekretuan, zeinaren bidez sortzen baita Nafarroako Jokoen eta Apustuen Erregistroa).

Lehenengo xedapen iragankorra. Indarreko baimenen araubidea.

Aurreko erregulazioari jarraituz emandako baimenek indarrean jarraituko dute indarraldia amaitu arte. Beranduenez, iraungi baino bi hilabete lehenago eska daiteke berritzea. Eskatzaileek frogatu beharko dute, eskaera egitean, indarreko araudian ezarritako baldintzak betetzen dituztela. Aurrekoa gorabehera, berritze horietan ezin izanen da eskatu gutxieneko tarteei buruzko baldintzak betetzeko, baldin eta indarrean ez bazeuden berritzearen xedeko baimena ematean.

Bigarren xedapen iragankorra. Sarrerakontrola.

Joko-lokalek 12 hilabeteko epea izanen dute gehienez ere, erregelamendu honek indarra hartu eta biharamunetik hasita, sarrera-kontrola ezarrita eta funtzionamenduan edukitzeko erregelamendu honen 24. artikuluan ezarritakoaren arabera.

Hirugarren xedapen iragankorra. Neurrien plana.

Joko- eta apustu-enpresek 6 hilabeteko epea izanen dute gehienez ere, erregelamendu honek indarra hartu eta biharamunetik hasita, neurrien plan bat prestatzeko erregelamendu honen 7. artikuluan ezarritakoaren arabera.

Laugarren xedapen iragankorra. Apustuak kudeatzeko sistemak eta apustumakina lagungarriak.

Apustuak kudeatzeko sistemak eta apustu-makina lagungarriak homologatuta baldin badaude erregelamendu honek indarra hartu baino lehenagotik, 12 hilabeteko epea izanen dute gehienez ere, erregelamenduak indarra hartu eta biharamunetik hasita, I. eranskineko 26. edo 27. artikuluetan ezarritako prozedura betetzeko, kasua zein den, I. eranskineko 9. artikuluan ezarritakora egokitzeko osagai teknikoak bereganatzeko.

Bosgarren xedapen iragankorra. Bingo jokoaren sarien plana eta konbinazio irabazleak.

Bingo-enpresek bingo jokoaren behin-behineko modalitateak baldin badituzte foru dekretu honek indarra hartzean, 6 hilabeteko epea izanen dute gehienez, foru dekretu honek indarra hartu eta biharamunetik hasita, sarien plana eta konbinazio irabazleak aurkezteko, foru dekretu honen 99. artikuluan ezarritako moduari jarraituz.

Seigarren xedapen iragankorra. Kanpoko interkonexio sistemak.

Joko-lokal desberdinen arteko joko-makinen interkonexio sistemak kendu egin beharko dira 6 hilabeteko epean gehienez, foru dekretu honek indarra hartu eta biharamunetik hasita.

Xedapen indargabetzailea. Indargabetzen diren arauak.

Indarrik gabe gelditzen dira foru dekretu honetan xedatutakoaren kontra dauden maila bereko edo beheragoko xedapen guztiak, eta berariaz, honako hauek:

a) 5/2011 Foru Dekretua, urtarrilaren 24koa, Nafarroako Joko eta Apustuen Katalogoa onesten duena.

b) 4/2011 Foru Dekretua, urtarrilaren 24koa, Nafarroako Jokoen eta Apustuen Erregistroa sortu eta haren antolaketa eta funtzionamendua arautzen dituena.

c) 181/1990 Foru Dekretua, uztailaren 31koa, Joko-makinetarako Arautegia onesten duena.

d) 94/1991 Foru Dekretua, martxoaren 21ekoa, Zozketen, tonbolen eta ausazko konbinazioen Erregelamendua onesten duena.

e) 72/2010 Foru Dekretua, azaroaren 15ekoa, Joko-makinen Erregelamendua onetsi duen uztailaren 31ko 181/1990 Foru Dekretua eta Joko-aretoen Erregelamendua onesten duen abuztuaren 30eko 270/1999 Foru Dekretua aldatzen dituena eta Nafarroako Foru Komunitatean joko-makinen ezaugarriak eta instalazio baldintzak arautzen dituena.

f) 73/2010 Foru Dekretua, azaroaren 15ekoa, Nafarroako Bingoen Erregelamendua onesten duena.

g) 270/1999 Foru Dekretua, abuztuaren 30ekoa, Joko-aretoen Erregelamendua onesten duena.

h) 519/2011 Foru Agindua, ekainaren 27koa, Lehendakaritza, Justizia eta Barneko kontseilariak emana, bingo joko tradizionalaren modalitatea Nafarroako Joko eta Apustuen Katalogoan inskribatzea xedatzen duena eta jokoaren bilakaerarako funtsezko baldintza eta arauak ezartzen dituena.

i) 128/2012 Foru Agindua, martxoaren 30ekoa, Lehendakaritzako, Administrazio Publikoetako eta Barneko Departamentuko kontseilariak emana, saria jenerotan ematen duten joko makinak ("garabiak" izenekoak) arautzen dituena.

j) 55/2000 Foru Agindua, apirilaren 13koa, Lehendakaritza, Justizia eta Barneko kontseilariak emana, Joko eta jolas aretoek autobabesa izateko esparru plana onesten duena.

Azken xedapenetako lehena. Erregelamendu bidezko garapenerako gaikuntza.

Gaikuntza ematen zaio jokoaren arloan eskumena duen departamentuko titularrari behar diren xedapen orokorrak eman ditzan foru dekretu honetan ezarritakoa erregelamenduz garatzeko.

Azken xedapenetako bigarrena. Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

NAFARROAKO FORU KOMUNITATEKO JOKO ETA APUSTUEN ERREGELAMENDU OROKORRA

I. TITULUA. XEDAPEN OROKORRAK

I. KAPITULUA. XEDEA, EREMUA ETA ARAUBIDE JURIDIKOA

1. artikulua. Xedea eta aplikazio eremua.

1. Foru dekretu honen xedea da Jokoari buruzko abenduaren 14ko 16/2006 Foru Legea garatzea, joko eta apustuen antolaketari, ustiaketari eta praktikari dagokienez, Nafarroako Foru Komunitatearen eskumenen esparruan.

2. Foru dekretu honetako xedapenak honako hauei aplikatuko zaizkie:

a) Nafarroako Joko eta Apustuen Katalogoko joko eta apustu guztiei, modalitatea edozein dela ere, bai modu presentzialean establezimendu fisikoetan egiten direnei, bai urrutitik kanal elektronikoak, informatikoak, telematikoak edo interaktiboak erabiliz egiten direnei,

b) Joko-enpresei, edo jokoarekin lotuta daudenei.

c) Jokoa edo apustuak egiten diren leku, lokal edo establezimenduei.

3. Honako hauek foru dekretu honen aplikazio esparrutik kanpo geratuko dira:

a) Denbora-pasa edo josteta hutseko joko edo apustuak, hain zuzen ere, betebehar ekonomikorik sortzen ez dutenak eta, halaber, Nafarroako Foru Komunitateko Administrazioaren arabera gizartean oihartzun gutxi dutenak edo eginbehar ekonomikoei dagokienez garrantzi gutxikoak direnak.

b) Kirol jokoak edo lehiaketak, irabazi-asmoa izan zein ez, ezertan galarazi gabe haietaz egiten diren apustuak.

c) Makina automatikoak, mekanikoki egiten dituztenak erosleak aldez aurretik hautatutako produktu, salgai edo zerbitzu zehatzenen salmentak edo eskualdaketak, baldin eta sartutako dirua makinan haietarako ezarritakoarekin bat badator eta zehaztasunez ateratzen badira, inongo gertaera, apustu, ausazko konbinazio edo ausazko jokoren mende egon gabe.

d) Jolas-makinak, inongo sari zuzenik edo zeharkakorik ematen ez dutenak, salbu eta erabiltzeko denbora errepikatzekoa.

2. artikulua. Araubide juridikoa.

1. Nafarroako Foru Komunitatearen eremuan joko eta apustuak antolatu, merkaturatu, ustiatu eta egitean, bete beharko dira Jokoari buruzko abenduaren 14ko 16/2006 Foru Legeko arauak, foru dekretu hau eta aplikatu beharreko xedapen orokor edo osagarri guztiak.

2. Jokoak eta apustuak baimentzeko, ezinbestekoa izanen da aldez aurretik Nafarroako Joko eta Apustuen Katalogoan sartuta egotea, baina horrek ez du inola ere baimen ondoriorik sortuko jokoak eta apustuak antolatu, ustiatu eta egiteko.

3. Honako hau dagokio Nafarroako Foru Komunitateko Administrazioan joko eta apustuen arloan eskumena duen departamentuko titularrari:

a) Katalogatutako jokoen modalitateak eta haien oinarrizko arauak onetsi, aldatu eta sartzea, baita, kasua zein den, haiek antolatu eta egiteko ezartzen diren murriztapenak eta mugapenak ere.

b) Haien zehaztapen teknikoak onetsi eta aldatzea.

c) Zenbateko hauek eguneratzea: partiden eta apustuen prezioak, sariak eta bildutakotik zer portzentaje bideratzen den sarietara, sustapeneko oparien balioa eta bermeen tarteak eta zenbatekoak ezartzea.

4. Zuzenbide pribatukoak dira joko-enpresek eta joko eta apustuak egiten diren leku, lokal eta establezimenduen enpresa titularrek joko eta apustuak egiteko osagai, sistema eta materialen enpresa hornitzaileekin dituzten harremanak, baita apustuen xedeko gertakariak ere.

II. KAPITULUA. JOKOAREN ANTOLAMENDUA

3. artikulua. Baimen araubidea.

1. Nafarroako Foru Komunitateko Administrazioaren eta haren mendeko erakundeen edo joko-enpresen esku egonen da, bakar-bakarrik, joko-enpresek katalogatutako joko edo apustuak antolatu eta ustiatzea eta haiek egiteko lokal, establezimendu edo lekuak ireki edo erabiltzea. Joko modalitate jakin batzuetan, pertsona fisiko edo juridikoek ere egiten ahalko dute, salbuespen gisa eta aldi baterako, baina horretarako, jokoa arautzen duen agintaritzak emandako administrazio baimena beharko dute aldez aurretik.

2. Jokoaren zenbait modalitate komunikazio araubidearen menpe jar daiteke, edo araua aplikatzeko eremutik kanpo utzi, ikusten baldin bada haien eragin ekonomiko eta soziala txikia dela, haien sustatzaileak ez direla joko-enpresak eta kontuan izanda zein den haien azken xedea, bat etorriz jokoaren arloan eskumena duen departamentuko titularrak foru agindu bidez erregelamenduz ezarriko dituen baldintzekin.

3. Jokoak edo apustuak antolatu eta ustiatu nahi dituzten joko-enpresek dagokien gaikuntza-titulua eskuratu beharko dute, erregelamendu honetan ezarritakoarekin bat.

4. artikulua. Jokoa Arautzeko Agintaritza.

Foru dekretu honen ondorioetarako, Barne Zuzendaritza Nagusia izanen da Jokoa Arautzeko Agintaritza, hari baitagozkio eskumen eta eginkizun hauek:

a) Joko eta apustuen gaineko politika publikoak zuzentzea.

b) Joko-enpresak baimentzea, gaikuntza ematea saio laborategi eta ikuskapen entitateei eta haiek Nafarroako Jokoen eta Apustuen Erregistroan inskribatzea.

c) Baimenak ematea joko eta apustuak antolatu eta ustiatzeko eta jokoetarako lokalak jarri eta funtzionamenduan hasteko.

d) Antolamendu eta funtzionamendu arauak onestea, enpresak joko edo modalitate baterako proposatzen dituenak.

e) Protokoloak onestea jokoa antolatu, ustiatu eta egiteko materialak homologatu eta ikuskatzeko, ereduak edo tipoak homologatzeko, material osagarriak ikuskatzeko eta indarreko araudia betetzen dela egiaztatu eta baieztatzeko.

f) Erabiltzaileek joko-enpresen kontra jartzen dituzten erreklamazioak ebaztea, baldin eta Nafarroako Foru Komunitateko Administrazioak gaikuntza eman badie erregelamendu honetan ezarritakoarekin bat.

g) Joko eta apustuen arloko kontrola eta ikuskapena, baita zehatzeko ahalmena ere, kautelazko neurriak hartu eta berrestekoa barne, zehapenak ezartzea ez baldin badagokie beste organo batzuei.

5. artikulua. Nafarroako Jokoaren Kontseilua.

1. Nafarroako Jokoaren Kontseilua kontsultatzeko eta parte hartzeko organo bat da, joko eta apustuen arloetarako dagoena Nafarroako Foru Komunitateko Administrazioaren barnean. Bertan, Nafarroako Foru Komunitateko Administrazioan joko eta apustuei dagokienez eskumena duen departamentuak hartzen du parte, baita jokoarekin zerikusia duten eskumenak dituztenek ere, edo, joko eta apustuei begira enpresa, sindikatu edo gizarte interesak ordezkatzen dituzten erakundeetatik.

2. Haren osaera eta funtzionamendurako, men eginen zaio berariazko arauari.

III. KAPITULUA. PLANGINTZA ETA JOKO ARDURATSUA

LEHENBIZIKO ATALA. PLANGINTZA

6. artikulua. Irizpideak eta neurriak.

Joko eta apustuen plangintzan, Jokoari buruzko abenduaren 14ko 16/2006 Foru Legearen 8. artikuluan zehaztutako irizpideak hartuko dira kontuan, bai eta foru dekretu honetan eta hura garatzeko arauetan adierazten diren neurri zehatzak ere.

BIGARREN ATALA. JOKO ARDURATSUA

7. artikulua. Joko arduratsuaren kontzeptua eta sustapena.

1. Joko arduratsutzat jotzen da arauei, prestakuntzari eta informazioei buruzko neurrien multzo bat, bide ematen diona erabiltzaileari modu kontrolatuan jokatzeko, arrazoibidez eta zentzuz hautatuz jokoaren aukerak, jokorako gastua eta jokoaren denbora, kontuan izanda zer egoeratan eta inguruabarretan dagoen.

2. Joko-enpresek eta joko- eta apustu-baimenen titular direnek neurri-plan bat prestatu behar dute jokoak pertsonengan sor litzakeen balizko efektu kaltegarriak samurtzeko, eta jokoen eta apustuen jarduera gidatzen duten printzipioak jaso behar dituzte.

3. Kasu guztietan, Nafarroako Foru Komunitatearen lurralde-esparruan soilik jarduten duten joko- eta apustu-enpresek, bai eta joko-atari edo -webguneen titularrek ere, honako ekintzez arduratu behar dute:

a) Arrisku-taldeei behar bezalako arreta ematea.

b) Beharrezkoa den informazioa eskaintzea, parte-hartzaileek modua izan dezaten hautaketa arduratsu bat egiteko. Halaber sustatuko da joko-jarduera eta horrekiko jarrera neurritsua eta arduratsua izan daitezela, ez konpultsiboak.

c) Jakinaraztea parte-hartzea eta sarbidea debekatuta dituztela adingabeek eta Nafarroako Jokorako Sarbideko Interdikzioen Erregistroan sartutakoek, baita, kasua bada, harekin interkonexioa duten guztietan sartutakoek ere, foru dekretu honen 23. artikuluan ezarritakoarekin bat, eta beharrezko kontrol mekanismoak ezartzea debeku horiek bermatzeko. Horretarako, afixa bat beharko dute paratuta eduki ikusteko moduko toki batean, lokalaren barruan bai eta kanpoan ere, adierazten duena adingabeek eta debekudunen erregistroan inskribatuta dauden pertsonek debeku dutela apustuetan parte hartzea.

d) Beren langileei prestakuntza-ikastaroak ematea joko arduratsuaren jardunari eta joko problematiko eta patologikoaren prebentzioari buruz.

e) Ikusteko moduko toki batean adieraztea nora jo daitekeen ludopatia-problema bat edukiz gero.

f) Ongi ikusten den toki batean ematea Nafarroako Gobernuak jokoaren adikzioaz egiten dituen sentsibilizazio-kanpainen berri eta Drogei buruzko Plan Nazionalean egiten direnen berri. Osasun Departamentuan adikzioen prebentzioaren arloan eskumenak dituen erakundeak helaraziko die informazio hori joko- eta apustu-enpresei.

4. Joko-jarduerak erantzukizun sozial korporatiboaren oharmenez egin behar dituzte joko- eta apustu-enpresek, enpresa-jardun ireki eta gardenen bitartez, zeinak oinarritu behar baitira balio etikoetan eta enplegatuekiko, parte-hartzaileekiko, gizarte osoarekiko eta ingurumenarekiko begirunean.

5. Joko-enpresek aukera eskaini behar diete parte-hartzaileei beren gordailuei borondatez mugak ezartzeko, orokortasunez ezarritako zenbatekoak baino zenbateko txikiagoetan.

6. Joko problematikoaren eta patologikoaren prebentziorako ekintzek, jokalariei edo erabiltzaileei buruzko informazioa trukatzea ekarriz gero, errespetatu beharko dute datu pertsonalak babestearen eta eskubide digitalak bermatzearen alorreko araubidea.

8. artikulua. Joko arduratsurako Nafarroako estrategia.

Nafarroako Foru Komunitateko Administrazioak estrategia bat diseinatuko du joko arduratsurako, non esparru egoki bat ezarriko baita jokoaren ekimenak era planifikatuan eta koordinatuan garatu eta eskaintzeko. Haren oinarrian egonen den politika publikoko ikuspegiak kontuan izanen du jokoak ertz asko dituela eta era askotako konponbideak behar dituela, helburu izanen dutenak erabiltzaileen eta familien joko arazoak konpontzea eta tratamendua eta sostengua ematea adikzioa dutenei.

Estrategia horrek bat eginen du Osasun Departamentuko Adikzioak prebenitzeko planaren helburuekin.

9. artikulua. Informazioa.

1. Joko arduratsuaren arauei buruzko informazio eguneratu eta egiazko guztia eman beharko diete erabiltzaileei jokoa modu presentzialean nahiz kanal elektronikoak, informatikoak telematikoak edo interaktiboak erabiliz ustiatzeko baimena duten enpresek eta, kasua bada, haietarako euskarri diren komunikabideen operadoreek.

2. Informazio hori joko- edo apustu-makinetako pantailetan azal daiteke, era birtualean, jendeak ikusteko moduan martxan ez daudenean.

10. artikulua. Maileguak.

1. Joko-enpresek ez dute zilegi izanen jokalariei mailegurik ematea, ez eta beste edozein kreditu-motarik ere, ez eta haiei hobaririk, doako partidarik edo diru bihurtzeko moduko elementurik ematea edo kredituak edo maileguak lortzeko produktu finantzarioak iragartzerik ere.

2 Hobaritzat hartuko da partida baten prezioa, ordaintzeko koefizientea edo apustuaren kuota gutxitzea, murriztea edo beherapena edo deskontua egitea haietan.

11. artikulua. Finantza produktuen publizitatea.

Jokatzeko baimendutako leku, lokal eta establezimenduek ezin izanen dute kredituak edo maileguak lortzeko finantza produktuen publizitaterik egin.

IV. KAPITULUA. JOKALARIAK

LEHENBIZIKO ATALA. KONTZEPTUA, ESKUBIDEAK ETA BETEBEHARRAK

12. artikulua. Kontzeptua.

Foru dekretu honen ondorioetarako, jokalaritzat hartzen dira joko edo apustuetan erabiltzaile gisa aritzen edo parte hartzen duten pertsona fisikoak.

13. artikulua. Jokalarien eskubide eta betebeharrak.

1. Kontsumitzaile edo erabiltzaile gisa dagozkien eskubideez gain, jokalariek eskubide hauek ere izanen dituzte joko-enpresaren aurrean, jokoaren establezimenduaren enpresa titularraren aurrean eta haien zerbitzuk langileen aurrean:

a) Errespetuzko tratua jasotzeko, adeitasunezko arauekin bat.

b) Jokoan parte hartzeko, eta, hala badagokio, horretarako behar diren osagaiak erabiltzeko, partidaren prezioaren arabera.

c) Behar den informazioa jasotzeko, joko edo apustua egin ahal izateko eta joko arduratsuari buruz.

d) Askatasunez jokatzeko, derrigortzerik edo mehatxurik gabe.

e) Jokoaren arauei jarraituz jokatzeko.

f) Dagozkien sariak kobratzeko, joko edo apustu bakoitzaren berariazko araudiaren arabera.

g) Joko-enpresaren identitatea ezagutzeko, bai eta arau-hausteen berri emateko edo errekalamzioak aurkezteko behar diren datuak ere.

h) Une oro jakiteko zenbat jokatu duen edo zenbateko apustua egin duen euskarri elektronikoaren bidez egiten diren joko edo apustuetan, eta, aplikatu beharreko araudian ezarritako kasuetan, zenbateko saldoa duen bere jokalari-kontuan.

i) Erreklamazioak egiteko Jokoa Arautzeko Agintaritzan joko-enpresen erabakien kontra, edo joko-establezimenduen titularren kontra, beren interesak ukitzen badira.

2. Jokalariek joko eta apustuen arauak eta joko arduratsuaren printzipioak errespetatu behar dituzte, eta behar bezala erabili jokatzeko makinak eta bestelako elementuak eta sistemak.

14. artikulua. Erreklamazioak.

1. Erregelamendu honen ondorioetarako, erreklamaziotzat hartuko da erabiltzaileak Jokoa Arautzeko Agintaritzari egiten dion jakinarazpena, non adierazten baitu badagoela gatazka edo desadostasun bat erabili duen jokoa ustiatzen duen enpresarekin.

2. Nafarroako Foru Komunitatean joko eta apustuak egiteko baimendutako establezimenduen titular guztiek, pertsona fisikoak edo juridikoak izan, egiazko informazioa eman behar diete kontsumitzaileei indarreko araudiarekin bat erreklamazioa aurkezteko bideari buruz.

3. Erreklamazioaren edukiak zuzenean ukitzen badu jokoaren edo apustuaren gaia, edo haren helburua baldin bada salatzea joko eta apustuen establezimenduan sartzea debekatu dutela edo hortik kanporatu dutela, artikulu honen 5., 6. eta 7. apartatuetan jasotako prozedura beteko da. Gainerako kasuetan, erreklamazioak egiteko prozedura orokorrari jarraituko zaio.

4. Honako kasu hauetan ezin da erreklamaziorik aurkeztu Jokoa Arautzeko Agintaritzan:

a) Gatazka bat dagoenean, soilik, enpresaren eta erabiltzailearen kontratua dela eta.

b) Gatazka bat dagoenean baimendu gabeko joko edo apustuengatik edo baimendu gabeko enpresek ustiatutako joko edo apustuengatik.

c) Gatazka bat dagoenean baimendutako joko edo apustuekin erregulazioaren beste eremu batzuetan.

d) Gatazka bat dagoenean jokoaren ondasun edo zerbitzu osagarriak erabiltzeagatik, eragin zuzena ez badute haren gainean.

5. Erreklamazioa ekarri duena gertatu eta hurrengo hamar egun balioduneko epean, erabiltzaileak erreklamazio orria aurkeztu behar du joko-enpresan, eta garbi adierazi bere eskaera eta horren arrazoiak.

6. Joko-enpresak erreklamazioa ebatzi ondoren, hilabeteko epean, edo, hala badagokio, hura aurkeztu eta hilabete igaro ondoren hark erabakirik jakinarazi gabe, erabiltzaileak Jokoa Arautzeko Agintaritzan aurkezten ahalko du berriz erreklamazioa. Gutxienez, honako dokumentazio hau erantsi beharko du:

a) Jokoan parte hartu duela egiaztatzen duen txartelaren, tiketaren, inprimakiaren edo bestelako tresnaren kopia, irakurtzeko moduan, baita gertatutakoa hobeki baloratzeko balio duten dokumentu edo froga guztiena eta informazio-liburuxkena ere.

b) Joko-enpresan edo joko-establezimenduaren enpresa titularrean erreklamazioa aurkeztu izanaren egiaztagiria, hark adierazitako prozeduraren arabera, eta, hala badagokio, jasotako erantzunaren kopia.

7. Jokoa Arautzeko Agintaritzak gehienez ere hiru hilabeteko epean ebatzi beharko du egindako erreklamazioa.

8. Erreklamazio-idazkian azaldutako egitateetatik ondorioztatzen baldin bada badaudela jokoaren arloko arau-hausteen zantzuak, Jokoa Arautzeko Agintaritzak ikuskapen- eta kontrol-zerbitzuei helaraziko die espedientea, egin beharreko ikerketak egin ditzaten, eta, hala badagokio, bidezko zehapen-espedientea irekitzea proposa dezaten.

BIGARREN ATALA. JOKOAREN MUGAK

15. artikulua. Joko eta apustuetarako lokaletara sartzeko debekua.

1. Honako hauek debekatuta dute joko-lokaletara sartzea:

a) Adingabeak. Adingabeek sarbidea debeku dutela adierazi beharko da lokaleko sarreran eta web orriaren atarian, argi eta ongi ikusteko moduan.

b) Epai judizial irmo bidez, nagusiki edo modu osagarrian, jokorako sarbidea mugatuta duten pertsonak eta desgaitasuna duten pertsonak, baldin eta ebazpen judizial bidez laguntza-neurrien mende badaude eta horrek jokoetan eta apustuetan libreki parte hartzeari eragiten badio.

c) Armekin eta arma gisa erabil daitezkeen objektuekin sartu nahi duen edonor.

d) Nafarroako Jokorako Sarbideko Interdikzioen Erregistroan inskribatutako pertsonak, eta foru dekretu honen 23. artikuluaren arabera erregistro horrekin lotuta daudenetan inskribatutakoak.

e) Horditasun edo erotasun sintomak dituzten pertsonak, edo substantzia psikotropikoen eraginpean daudela erakusten dutenak, edo oldarkor edo bortitz jokatzen dutenak, ordena, lasaitasuna eta jokoen garapena hautsiz.

2. Nafarroako Foru Komunitateko Administrazioan joko eta apustuen arloan eskumena duen departamentuaren titularrari dagokio sarbiderako beste baldintza edo debeku batzuk baimentzea, foru dekretu honetan araututakoez bestelakoak, baina horiek ez dira inola ere arbitrarioak edo diskriminatzaileak izanen eta ez dute oinarrizko eskubiderik urratuko.

3. Nafarroako Foru Komunitateko Administrazioak honako hauei debekatzen ahalko die jokatzea eta jokoa egiten den lokal edo lekuetara sartzea:

a) Jokoaren arloko arau-xedapenak hausteagatik zehapena jaso dutenei.

b) Beren borondatez hori eskatzen dutenei, harik eta, orobat borondatez, debeku hori kentzea eskatzen duten arte. Sartzeko debekutik debekua kentzen den bitartean erregelamendu honen 21. artikuluan ezarritako epea igaro beharko da.

4. Joko-enpresek, artikulu honetan aipatutakoez bestelako baldintza edo debekuak ezarri nahi izanez gero joko-lokaletara sartzeko, horretarako baimena eskatu beharko diote Nafarroako Foru Komunitateko Administrazioaren organo eskudunari.

16. artikulua. Jokoa eta apustuak debekatzea.

1. Foru dekretu honen 15. artikuluan aurreikusitako kasuetako batean dauden pertsonek debekatuta dute jokoa eta apustuak egitea.

2. Honako muga hauek ezartzen dira jokoari eta apustuei dagokienez:

a) Jokoak antolatu edo ustiatzeko baimenduta dagoen enpresa baten titularrek eta akziodun edo partaideek, bai eta horren zuzendaritzako langileek, enplegatuek, bai eta ezkontideek, lehen graduko aurreko nahiz ondorengo ahaideek ezin izanen dute jokalari gisa parte hartu hark antolatu edo ustiaturiko joko edo apustuetan.

Muga hori, halaber, joko eta apustuak egiteko baimena duten establezimenduen enpresa titularrei eta bertako langileei aplikatuko zaie, haien ardurapeko lokale(ta)rako edo lanean aritzen direne(ta)rako.

b) Kirolariek, entrenatzaileek edo kirol-ekitaldi edo -jarduera batean zuzenean parte hartzen duten beste batzuek, barne daudela ekitaldi edo kirol-jarduera horietan jarduten duten epaileak eta arbitroak, eta haien erabakien aurkako errekurtsoak ebazten dituztenek, bai eta halakoetan parte hartzen duten kirol-erakundeetako zuzendariek ere, ezin izanen dute ekitaldi horien gaineko apusturik egin.

3. Foru dekretu honen ondorioetarako, artikulu honetako aurreko apartatuan aipatzen diren pertsonek egindako jokaldiek eta apustuek ez dute baliorik izanen.

4. Alde batera utzi gabe egindako jokaldia edo apustua baliogabetu daitekeela, joko-enpresek Jokoa Arautzeko Agintaritzari jakinarazi beharko diote gertatutakoa, artikulu honen 1. eta 2. apartatuetan adierazitako inguruabarren bat gertatzen dela jakiten dutenean.

HIRUGARREN ATALA. NAFARROAKO JOKORAKO SARBIDEKO INTERDIKZIOEN ERREGISTROA

17. artikulua. Xedea.

1. Jokoari buruzko abenduaren 14ko 16/2006 Foru Legean eta hura garatzen duten xedapenetan jasotako aurreikuspenak benetan betetzen direla bermatzeko, Nafarroako Jokorako Sarbideko Interdikzioen Erregistroa sortzen da joko-lokaletan bisitariak eta jokalariak onartzeari dagokionez.

2. Jokoa Arautzeko Agintaritzaren ebazpenaren bidez, eta horretarako instruitutako espedientearen ondorioz, pertsona hauek inskribatuko dira aipatutako erregistroan:

a) Borondatez eskatzen dutenak.

b) Jokoari buruzko abenduaren 14ko 16/2006 Foru Legean aurreikusitako arau-hauste astun edo oso astunagatik jasotako zehapen espediente baten ondorioz joko-lokaletan sartzeko debekuarekin zehatuak izan direnak, zehapena irmoa denean eta haren indarraldirako ezartzen den denboran.

c) Debekatuta dutenak, epai judizial irmo bidez, nagusiki edo modu osagarrian, jokorako sarbidea mugatuta duten pertsonak eta desgaitasuna duten pertsonak, baldin eta ebazpen judizial bidez laguntza-neurrien mende badaude eta horrek jokoetan eta apustuetan libreki parte hartzeari eragiten badio.

18. artikulua. Inskripzioaren edukia.

Erregistroak datu hauek jasoko ditu kasuan kasuko pertsonari buruz:

a) Izen-abizenak.

b) Nortasun Agiri Nazionalaren zenbakia, edo horren balio bereko beste identifikazio agiri batena.

c) Jaioteguna.

d) Bizilekua eta udalerria.

e) Irismena.

f) Inskripzio-data.

g) Jakinarazpenetarako helbide elektronikoa.

19. artikulua. Norberaren borondatez inskribatzeko prozedura.

Beren borondatez erregistroan inskribatzeko eskatzen dutenek Jokoa Arautzeko Agintaritzan egiten ahalko dute inskripzioa, horretarako prestatutako eredu ofiziala erabiliz.

20. artikulua. Ofizioz inskribatzeko prozedura.

1. 17.2 artikuluko b eta c apartatuetan aurreikusitako kasuetan, inskripzioa ofizioz eginen da.

2. Kasuan kasuko pertsonaz gain, hirugarrenek ere egin dezakete inskripzioa egiteko arrazoia badagoelako jakinarazpena. Jakinarazpenarekin batera, inskripzioaren arrazoi objektiboa dakarren administrazio-ebazpenaren kopia edo ebazpen judizialaren lekukotza aurkeztuko da.

3. Komunikazioa eta eransten diren dokumentuak Jokoa Arautzeko Agintaritzari aurkeztu beharko zaizkio.

4. Prozeduraren hasieraren berri emanen zaie komunikatzaileari eta inskribatzen den pertsonari, hamar egun balioduneko epean egokitzat jotzen dutena alega dezaten.

5. Epe hori igaro ondoren, eta egindako alegazioak ikusita, Jokoa Arautzeko Agintaritzak ebazpen arrazoitua emanen du, inskripzioa egiteko edo ukatzeko. Ebazpen hori komunikatzaileari jakinaraziko zaio, baita inskribatu denari ere.

21. artikulua. Inskripzioen indarraldia eta ezabatzea.

1. Foru dekretu honen 19. artikuluaren babesean egindako inskripzioak pertsona interesdunak eskatuta ezabatzen ahalko dira, betiere inskripzioa egin zenetik sei hilabete igaro badira.

2. Gainerako inskripzioek oinarri dituzten xedapenetan ezarritako iraupena izanen dute. Iraupena mugagabea izanen da, beste bat aipatzen ez bada.

3. Inskripzioak ezabatzeko, pertsona hartzaileak berariaz eskatu beharko du. Eskaera horrekin batera, inskripzioa ezabatzea justifikatzen duen arrazoi objektiboa azaltzen duen dokumentazioa aurkeztu beharko da.

4. Jokoa Arautzeko Agintaritzak erabakiko du inskripzioak ezabatzea, eta inskripzioaren xede den pertsonari jakinaraziko zaio, bai eta inskripzioa eskatu duten hirugarrenei ere. Hiru hilabete igarotzen badira berariazko ebazpenik eman gabe, ulertuko da ezabatzeko eskaera onartu dela.

22. artikulua. Erregistrorako sarbidea eta estatistikak.

1. Foru dekretu honen 24. eta 25. artikuluetan ezarritakoa alde batera utzi gabe, erregistroko informazioa isilpekoa izanen da, eta jokoa eta apustuak ikuskatzeko eta kontrolatzeko zerbitzuei edo agintaritza eskudunei soilik jakinarazten ahalko zaie, bat etorriz Arau-hauste penalak prebenitzeko, detektatzeko, ikertzeko eta epaitzeko eta zehapen penalak betearazteko tratatzen diren datu pertsonalak babesteari buruzko maiatzaren 26ko 7/2021 Lege Organikoarekin.

2. Aurrekoa gorabehera, erregistroko datuak laga daitezke estatistikarako edo gizarte arloko ikerketarako. Kasu horietan, ematen den informazioak ezin izanen du datu indibidualizaturik izan, bide ematen duenik inskribatutako pertsonak identifikatzeko.

23. artikulua. Erregistroen koordinazioa eta interkonexioa.

Jokoa Arautzeko Agintaritzak ahaleginak eginen ditu Nafarroako Jokorako Sarbideko Interdikzioen Erregistroa koordinatuta egon dadin Estatuko Administrazio Orokorraren edo autonomia-erkidegoetako administrazioen erregistro baliokideekin, bat etorriz datuen komunikaziorako edo erregistroen interkonexiorako formalizatzen diren hitzarmenekin.

LAUGARREN ATALA. JOKOAREN SARBIDEAREN ETA PARTE-HARTZEAREN KONTROLA

24. artikulua. Jokolokaletarako sarbidearen kontrola.

1. Foru dekretu honen 162. artikuluan aipatzen diren lokal guztietan, onarpen- eta kontrol-zerbitzu bat egonen da sarrera galarazteko hemezortzi urtetik beherakoei eta Nafarroako Jokorako Sarbideko Interdikzioen Erregistroan eta aurreko artikuluaren arabera hari lotutako erregistroetan sartuta dauden pertsonei, bai eta foru dekretu honen 15. artikuluan aurreikusitako baldintzak eta eskakizunak betearazteko ere.

2. Aurreko apartatuan adierazitako sarbide-debekuak egiaztatzeko, sarrera-kontrolak sistema informatiko bat izan beharko du, aukera ematen duena Nafarroako Jokorako Sarbideko Interdikzioen Erregistroarekin konektatzeko eta adin-nagusitasuna egiaztatzeko, jokoaren arloan eskumena duen departamentuak ezarritako zehaztapen teknikoei jarraituz.

3. Sarrera- eta kontrol-zerbitzuak establezimendura sartzeko ate ondoetan egonen dira, halako eran non inor ez baita sartuko lokalaren barrura onarpen-zerbitzutik nahitaez igaro gabe. Jartzen diren elementuek ez dute pasabidea oztopatu behar larrialdi-egoera batean, eta ezin dute ebakuazio-bideen zabalera murriztu.

4. Onarpen-zerbitzuaz arduratzen diren langileek aldez aurretik identifikatu beharko dituzte bertara sartu nahi duten pertsona guztiak. Horretarako, NANa, AIZa, pasaportea edo baliokidea erakutsi beharko zaie, artikulu honen lehen paragrafoan ezarritakoa betetzen duten egiaztatzeko.

Lokalak sistema automatizatuak baldin baditu bermatzeko erabiltzaileen nortasuna behar bezala egiaztatzen dela, erabiltzailea sisteman erregistratzen denean eginen da aurreko paragrafoan eskatutako identifikazioa.

5. Aurreko paragrafoan aipatutako dokumentazio pertsonalean jasotako datuak egiaztatu ondoren, bisitari bakoitzari erregistro-fitxa bat ireki beharko zaio lokalera lehen aldiz joaten denean. Fitxa horretan, gutxienez, honako datu hauek agertuko dira:

a) Izena eta bi deiturak.

b) NANaren, AIZaren, pasaportearen edo baliokidearen zenbakia.

c) Jaioteguna.

d) Erregistro-fitxa irekitzeko data.

6. Artikulu honetan jasotako aurreikuspenaren ondorioz pertsona fisikoen datu pertsonalen tratamenduak egin ahal izateko, zorrotz bete beharko da xedatuta dagoena Datuak Babesteko Erregelamendu Orokorrean eta Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoan edo hura ordezten duten arauetan.

7. Datuak Babesteko Erregelamendu Orokorrari jarraituz, erregelamendu horren 9. artikuluan xedatutakoaren arabera egin beharko da datu pertsonalen kategoria berezien tratamendua. Hala, interesdunaren berariazko adostasuna beharko da datu pertsonal horien tratamendua egiteko zehaztutako helburu batekin edo gehiagorekin.

8. Fitxategi horretakoa izateak ez du salbuesten lokalerako sarrera guztietan egiaztapena egin behar izatetik, aldez aurretik eta nahitaez, Jokoa Arautzeko Agintaritzak ezartzen duen prozeduraren bidez, Nafarroako Jokorako Sarbideko Interdikzioen Erregistroan sartuta dauden ala ez egiaztatzeko.

9. Jokoa Arautzeko Agintaritzak aldez aurretik homologatuta eta baimenduta, eta artikulu honen 1. apartatuan xedatutakoa ezertan galarazi gabe, erabiltzaileak identifikatzeko, erregistratzeko eta onartzeko eginkizunetan laguntzeko, sistema informatikoak erabil daitezke pertsonen nortasuna zalantzarik gabe bermatzeko.

10. Jokalariak edo bisitariak Espainiako NANa, AIZa edo pasaportea ez den beste dokumentu batekin identifikatzen badira, establezimenduaren onarpen-zerbitzuko langileek egiaztatu beharko dute adina.

11. Jokoa Arautzeko Agintaritzak web-esteka bat jarriko du onarpen-zerbitzu bat eduki behar duten lokalen instalazio- eta funtzionamendu-baimenaren titular diren enpresen eskura, foru dekretu honen 15.1.a) eta 17. artikuluetan aurreikusitako baldintzak eta eskakizunak bete ahal izateko, jokoaren arloan eskumena duen departamentuak jasotako zehaztapen teknikoei jarraituz.

12. Onarpen-zerbitzu bat ezarri behar duten lokaletako langile guztiek erantzukizunez adierazi beharko dute prestakuntza espezifikoa jaso dutela kontrolatzeko eta onartzeko betebeharrei buruz, bai eta establezimenduan artikulu honen 2. apartatuan ezarritakoaren arabera instalatutako sistema informatikoen funtzionamenduari buruz ere, eta, halakorik izanez gero, 9. apartatuan adierazitako sistemen funtzionamenduari buruz.

25. artikulua. Joko ezpresentzialerako sarbidearen kontrola.

1. Joko ez-presentzialeko modalitateak kanal elektroniko, informatiko, telematiko eta interaktiboen bidez ustiatzen dituzten joko-enpresek sistema informatiko bat izan beharko dute, jokalaria identifikatzeko eta jokoan aritzeko debekurik ez duela egiaztatzeko.

2. Jokoa Arautzeko Agintaritzak behar diren antolaketa, baliabideak eta softwarea izanen ditu parte-hartzaileak baliozkotzeko pasabideak ezartzeko, egiaztatze aldera horiek adin nagusikoak direla, Nafarroako Jokorako Sarbideko Interdikzioen Erregistroan inskribatuta ez daudela eta egoitza fiskala Nafarroan dutela.

V. KAPITULUA. JOKOAREKIN LOTUTAKO ENPRESAK

LEHENBIZIKO ATALA. JOKO-ENPRESAK

26. artikulua. Kontzeptua.

1. Foru dekretu honen ondorioetarako, joko-enpresatzat hartuko da, jokoak edo apustuak antolatzeko eta ustiatzeko gaitzen duen titulu bat izanik, Nafarroako Jokoen eta Apustuen Erregistroan inskribatuta dagoen pertsona fisiko edo juridikoa.

Hala ere, Nafarroako Foru Komunitatearen lurralde-eremuan jokoak eta apustuak ustiatzeko, dela joko-lokaletan edo beste establezimendu batzuetan, dela kanal elektroniko, informatiko, telematiko edo interaktiboen bidez, kasuan kasuko baimenak lortu beharko dira, erregelamendu honetan xedatutakoari jarraituz.

2. Ez dira joko-enpresatzat hartuko erregelamendu honetan ezarritako baldintzetan noizean behin joko modalitateak (hala nola zozketak, tonbolak edo ausazko konbinazioak) antolatzen edo ustiatzen dituzten pertsona fisiko edo juridikoak.

27. artikulua. Betebehar orokorrak.

1. Pertsona fisiko edo juridikoak joko-enpresa izateko baimentzen ahalko dira, baldin eta, merkataritza- eta tributu-ordenamenduek eskatutako betekizunak betetzeaz gain, jokoa eta apustuak antolatzeko eta ustiatzeko desgaikuntza-kasuren batean ez badaude, Jokoari buruzko abenduaren 14ko 16/2006 Foru Legearen 16. artikuluan aurreikusitakoaren arabera, eta honako baldintza hauek betetzen badituzte:

a) Bere jarduera gauzatzeko behar diren giza baliabideak eta baliabide tekniko eta materialak izatea.

b) Nafarroako Foru Ogasunaren aldeko fidantza bat eratu eta gordailutzea, erregelamendu honen 29. artikuluan adierazitako moduan eta zenbatekoekin.

c) Kaudimen ekonomikoa eta finantzarioa frogatzea.

d) Zerga betebeharrak eguneratuta izatea, baita Gizarte Segurantzarekikoak ere, indarra duten xedapenetan ezarritakoak.

e) Atzerriko kapitalaren partaidetza atzerriko inbertsioen arloan indarra duen legerian ezarritakora egokitzea.

2. Enpresek aurreko paragrafoan adierazitako betekizunez gain, ondotik zehazten diren beste horiek ere bete beharko dituzte, baldin eta baliabide elektroniko, informatiko, telematiko eta interaktiboen bidez antolatu eta ustiatu nahi badituzte bingo jokoa, apustuak, ausazko joko-makinak edo edozein motatako jokoak, eta merkataritza-sozietatearen forma hartzen badute:

a) Sozietatearen kapitala guztiz harpidetuta eta ordainduta izatea, partaidetza sozialetan edo akzio izendunetan banatuta.

b) Helburu sozial bakarra eta esklusiboa izatea antolatu eta ustiatu behar dituen jokoak antolatu eta ustiatzea, eta horiek garatzeko beharrezkoak diren jarduera osagarriak egitea.

c) Gutxieneko kapital sozial hau izatea: 60.000 euro bingo jokoa ustiatzeko,120.000 euro joko-makinak eta ausazkoak ustiatzeko, eta 2.000.000 euro apustuak ustiatzeko.

28. artikulua. Betebehar orokorrak.

1. Baimenduta dauden joko modalitatearen araudi espezifikoan ezarritako betebeharrak alde batera utzita, joko-enpresek honako hau jakinarazi beharko diote Jokoa Arautzeko Agintaritzari:

a) Sozietate-izenean, marka komertzialean eta helbidean izandako aldaketak eta kapital sozialean eta helburu sozialean izandakoak, bai eta administratzaileen eta ahaldunen eta enpresako zuzendaritza- edo ordezkaritza-organoetako gainerako kideen kopuruari edo titulartasunari eragiten diotenak ere, hilabeteko epean, aldaketa egiten denetik zenbatzen hasita.

b) Akzioen edo sozietate-partaidetzen eskualdaketak, benetan amaitu baino hilabete lehenago.

c) Bere izenean baimendutako joko-lokalen behin-behineko edo behin betiko itxierak.

d) Jokoa Arautzeko Agintaritzak gaikuntza-titulua edo baimena ematean kontuan hartutako betekizunen eta baldintzen edozein aldaketa.

e) Kontrol-, koordinazio- edo estatistika-lanak egiteko eskatzen zaien informazio guztia.

2. Baldin eta Jokoari buruzko abenduaren 14ko 16/2006 Foru Legearen arabera joko eta apustuak antolatu eta ustiatzetik desgaitua izateko kasuren batean gelditzen bada administratzaile eta ahaldun bat, zuzendaritza batzordeko eta administrazio kontseiluko kide bat edo joko-enpresetako negozioko kudeaketa eta zuzendaritza eta administrazioko kargu bat eta antzeko izaera duten zuzendaritza organoetako kide bat, eta inguruabar hori antzematen denetik gehienez hiru hilabeteko epean pertsona hori ordezten ez bada, eman diren ustiatzeko baimenak galduko dira, baimen horrekin ireki ziren lokal edo establezimenduak itxiko dira, enpresa jokoa antolatzeko ezgaituta geratuko da eta kausa horretan dagoen pertsona, bere aldetik, ezgaituta geratuko da bere lanbide jarduera jokoaren eta apustuen arloko enpresa eta establezimenduetan jarduteko. Ezin izanen da berriz eskatu bost urte iragan arte.

3. Joko-enpresek Nafarroako Foru Ogasunari jakinarazi beharko diote, hark zehaztutako moduan eta epeetan, 3.000 euroko edo hortik gorako zenbatekoa duten sari esleituen zerrenda, eta, gainera, nor diren sari horiek irabazi dituzten jokalariak; jokalariei horren berri emanen zaie.

29. artikulua. Fidantzak.

1. Jarduerari ekin aurretik, joko-enpresak fidantza bat eratu beharko du Nafarroako Foru Ogasunaren alde, baldintza eta zenbateko hauekin:

2. Erregelamendu honetan eskatzen den fidantza esku-dirutan, banku-abalaren bidez edo banakako kauzio polizaren bidez ordaintzen ahalko da eta Jokoari buruzko abenduaren 14ko 16/2006 Foru Legean ezarritako betebeharrei lotuta geldituko da, bereziki, sariak ordaintzeari, zehapen araubidea aplikatzearen ondoriozko erantzukizunak hartzeari eta jokoaren eta apustuen gaineko tributu berariazkoen ondoriozko betebeharrei lotuak.

Fidantza abal baten bidez egiten denean, ezin izanen da Foru Berriari buruzko 525 Legeak aipatzen duen eskusio onura erabili.

3. Fidantzaren kopurua murrizten bada, fidantza hori eratu duen enpresak gehienez bi hilabeteko epea izanen du nahitaezko kopuruan osatzeko, eta aipatu epe horretan berrezartzen ez bada baimena baliogabetuko da.

4. Fidantza iraungiko da hura jartzea ekarri zuten arrazoiak desagertuz gero, eta fidantzak loturik duen bete gabeko erantzukizunik ez dagoela egiaztatu ondoren. Fidantza iraungita, itzuli eginen da, litekeen likidazioa egin ondoren.

30. artikulua. Gaitzen duten tituluak.

1. Modu presentzialean joko edo joko-modalitate bat edo batzuk antolatu eta ustiatu nahi dituen pertsona fisikoak edo juridikoak Jokoa Arautzeko Agintaritzari eskatu beharko dio joko-operadore izateko gaikuntza-titulua.

2. Gaikuntza-tituluak lortzeko eskaerekin batera, foru dekretu honen 31. artikuluan eta, hala badagokio, 32. artikuluan kasu bakoitzerako adierazitako dokumentazioa aurkeztu beharko da.

3. Prozedura bideratu eta foru dekretu honen 27. artikuluan ezarritako baldintzak betetzen direla egiaztatu ondoren, Jokoa Arautzeko Agintaritzak gaikuntza-titulua emanen du, eta ofizioz eginen ditu kasuan kasuko inskripzioak Nafarroako Jokoen eta Apustuen Erregistroan.

4. Ebazpena, gehienez ere, hiru hilabeteko epean jakinaraziko da, eskaera tramitatzeko eskumena duen organoaren erregistroan sartu zen egunean hasita.

Epea onesteko edo ezesteko ebazpen espresurik eman eta jakinarazi gabe iraungita, interesdunak zilegi izanen du baimena ezetsitzat emateko, administrazioaren isiltasunagatik.

5. Eska dakizkiokeen beste lizentzia eta baimen guztiak eduki behar badira ere, gaikuntza-titulua emateak ahalmena emanen dio titularrari emakidaren joko modalitatea antolatu eta ustiatzeko, baimenean ezarritako baldintzetan eta mugekin.

31. artikulua. Dokumentazio orokorra.

Edozein joko mota antolatzeko eta ustiatzeko gaitzen duen tituluaren eskaerarekin batera, honako dokumentazio hau aurkeztu beharko da:

a) Jokoari buruzko abenduaren 14ko 16/2006 Foru Legearen 16. artikuluko 3. apartatuan aipatzen diren pertsonen erantzukizunpeko adierazpena, zehazten duena jokoa eta apustuak antolatzeko eta ustiatzeko ezgaituta ez daudela.

b) Enpresak bere jarduera gauzatzeko dituen giza baliabideak, baliabide teknikoak eta materialak deskribatzen dituen memoria.

c) Nafarroako Foru Komunitateko Ogasunaren aldeko fidantza foru dekretu honen 29. artikuluan ezarritakoaren arabera eratu eta gordailutu izanaren egiaztagiria.

d) Pertsona juridikoen kasuan, sozietatearen eratze-eskrituraren eta estatutuen kopia konpultsatua edo notarioaren testigantza.

e) Sozietatea Merkataritza Erregistroan edo baliokidean inskribatu izanaren ziurtagiria, pertsona juridikoen kasuan.

f) Pertsona fisiko eskatzailearen eta, hala badagokio, bazkideen edo akziodunen adierazpena, zehazten duena Foru Komunitateko beste joko-enpresa batzuetan parte hartzeaz erregelamendu honetan aurreikusitako mugak betetzen direla.

g) Pertsona juridiko eskatzailearen organo eskudunaren ziurtagiria, bazkideen eta partaidetza-kuoten zerrendari eta kapital sozialaren zenbatekoari buruzkoa.

h) Enpresaren kaudimen ekonomikoari eta finantza kaudimenari buruzko txostena, finantza-entitate batek egina.

32. artikulua. Dokumentazio osagarria.

Nolanahi ere, Jokoa Arautzeko Agintaritzak eskatzen ahalko du aurkez daitezela zigor-aurrekarien ziurtagiriak eta behar diren dokumentu guztiak, egiaztatze aldera foru dekretu honen 27. artikuluan adierazitako baldintzak betetzen direla.

33. artikulua. Bingo jokoa antolatzeko eta ustiatzeko berariazko dokumentazioa.

Bingo jokoa antolatzeko eta ustiatzeko gaikuntza-tituluaren eskaerarekin batera, foru dekretu honen 31. artikuluan eta, hala badagokio, 32. artikuluan zerrendatutako dokumentuez gain, dokumentu bat aurkeztu beharko da, jasotzen duena eskatutako bingo modalitatean aritzeko enpresak antolamenduaz eta funtzionamenduaz ezarritako arauen proposamena.

34. artikulua. Apustuak antolatzeko eta ustiatzeko berariazko dokumentazioa.

Apustuak antolatzeko eta ustiatzeko gaitzen duen tituluaren eskaerarekin batera, foru dekretu honen 31. artikuluan eta, hala badagokio, 32. artikuluan zerrendatutako dokumentuez gain, honako hauek ere aurkeztu beharko dira:

a) Segurtasun informatikoaren ikuskaritzetan kreditatuta dauden langileak dituen ikuskaritza-enpresa baten ziurtagiria, apustuen antolaketa eta merkaturatzerako aurreikusita dagoen sistema informatikoaren kaudimen teknikoari buruz.

b) Ustiapen proiektua, gutxienez honako hauek osatu behar dutena:

b.1. Enpresaren jarduera azaltzen duen memoria. Antolaketako alderdiak, erabilgarri dauden baliabideak, eta, bidezkoa bada, jokoaren eta apustuen sektorean duen enpresa-esperientzia azaldu behar dira.

b.2. Aurreikusitako apustuen antolaketa eta merkaturatzea azaltzeko memoria. Memoria horretan, apustuen xede diren gertakari edo ekitaldi motak azalduko dira, baita jarduera antolatzeko, kudeatzeko, zabaltzeko eta kontrolatzeko erabili nahi diren sistema, toki, lokal eta establezimenduak nahiz bitarteko eta prozedurak ere.

b.3. Ezarpen plana. Multzoan hartuta koherentea eta harmonikoa izanen da, eta ustiapen proiektuaren araberako proportzioa zainduko du, bereziki hurrengo atalean aurreikusita dagoen negozio planaren araberakoa. Zerbitzuan jarri nahi diren apustu denden eta guneen kopurua eta lurralde banaketa azaldu beharko dira, apustu makina osagarriak jarri nahi diren ostalaritza lokalen kopurua eta banaketa eta Nafarroako Foru Komunitatean ustiatu nahi diren apustu makinen guztizko kopurua.

b.4. Apustu-dendarik ezartzen ez bada, enpresak proposamen bat aurkeztu beharko du antolaketari eta funtzionamenduari buruzko arauei buruz, bermatu dadin erabiltzaileei arreta emanen zaiela, sor litezkeen erreklamazioei erantzunen zaiela eta, hala badagokio, kapitalak zuritzea eta terrorismoa finantzatzea prebenitzeko araudian ezarritakoak baino sari handiagoak ordainduko direla.

b.5. Negozio-plana, gutxienez honako hauek jasoko dituena: proiektuaren bideragarritasuna, programa eta proiektua ezartzeko faseak, inbertsio-plana, aurreikusitako lanpostuak eta langileak hautatzeko eta prestatzeko plana.

b.6. Enpresak apustuak egiteko antolamenduaz eta funtzionamenduaz ezarritako arauen proposamena.

b.7. Erabiliko diren teknologia, sistema eta elementuak, haien funtzionamenduaren segurtasuna eta informazioaren segurtasuna bereziki aipatuta.

b.8. Apustuak zein establezimendu edo lokaletan merkaturatuko diren, horien kalitatea eta segurtasun neurriak.

b.9. Apustuetarako establezimendu, lokal edo guneen funtzionamenduko ordutegiaren proposamena.

35. artikulua. Lehiaketa publiko bidez baimentzeko prozedura.

1. Noiz eta, Jokoari buruzko abenduaren 14ko 16/2006 Foru Legearen 8. artikuluan aurreikusitakoa aplikatuz, jokoaren eta apustuen jardueraren eremu jakin batean gaitzen duten tituluen guztizko kopurua mugatzen baita, lehiaketa publiko bidez ebatziko da titulu horiek ematea.

2. Lehiaketa publikorako deialdia Jokoa Arautzeko Agintaritzaren ebazpen bidez eginen da. Ebazpen hori Nafarroako Aldizkari Ofizialean argitaratuko da, eta bertan lehiaketaren oinarriak jasoko dira.

3. Deialdiaren aginduak eskaerak aurkezteko epea ezarriko du, gutxienez hilabetekoa eta gehienez hiru hilabetekoa izanen dena, bai eta eskaeran jaso beharreko datuak eta eskatzaileek aurkeztu beharreko dokumentazioa ere.

4. Lehiaketaren deialdiaren aginduak esleipenerako irizpide objektiboak zehaztuko ditu. Honako hauek izanen dira:

a) Kaudimena, profesionala nahiz finantzarioa.

b) Negozio-plana, gutxienez honako hauek jasoko dituena: proiektuaren bideragarritasuna, inbertsio-programa, proiektua ezartzeko faseak, aurreikusitako lanpostuak eta langileak hautatzeko eta prestatzeko plana.

c) Ezarri beharreko jokoaren osagaiek eta sistemek duten teknologia eta segurtasuna. Jokorako materialaren kalitatea eta aldizkako azterketak.

d) Proiektatutako kontrol- eta segurtasun-neurriak eta, hala badagokio, erabiltzaileak kontrolatzeko eta onartzeko sistemak.

e) Joko arduratsurako neurriak.

f) Instalazioen kalitatea eta, hala badagokio, aurreikusten diren zerbitzu osagarriak.

g) Legez baimendutako kasuan kasuko joko modalitateak ustiatzeko esperientzia.

5. Dena delako jardueran aritzeko joko-establezimendu bat ireki behar denean, gaikuntza-titulua esleitzeko lehiaketa ebatzi aurretik, ukitutako udalen txostena beharko da, instalazioa egokia den ala ez azaltzeko, hirigintza arloko gaiak aintzat hartuta. Txosten hori hilabeteko epean egin beharko da.

6. Nahitaezko txostenak eman ondoren, eta espedientea hobeki ebazteko behar diren dokumentuak bildu ondoren, Jokoa Arautzeko Agintaritzak ebazpena emanen du lehiaketa esleitzeko edo esleitu gabe uzteko. Nolanahi ere, lehiaketa ebazteko eta jakinarazteko epea ez da sei hilabetetik gorakoa izanen, deialdia argitaratzen denetik kontatzen hasita.

7. Emandako gaikuntza-tituluak bere indarraldia jasoko du, eta ezin izanen da eskualdatu.

36. artikulua. Gaikuntzatituluen indarraldia, azkentzea eta aldatzea.

1. Joko-enpresen gaikuntza-tituluak ezin izanen dira hirugarren pertsonen bitartez laga edo ustiatu, eta inter vivos bidez eskualdaezinak izanen dira.

2. Joko-enpresen gaikuntza-tituluak hamar urterako emanen dira, eta iraupen bereko aldietarako berrituko dira, baldin eta berritzeko unean indarrean dagoen araudian ezarritako baldintzak betetzen badira. Indarrean dagoen titulua iraungi baino sei hilabete lehenago eskatu beharko da berritzea.

Lehiaketa publikoko prozedurari lotutako gaikuntza-tituluek esleipen-ebazpenean ezarritako indarraldia izanen dute.

3. Kapitulu honetan araututako gaikuntza-tituluak arrazoi hauengatik azkentzen dira:

a) Iraungitzeagatik, eman zenetik urtebeteko epean baimendutako jarduera hasi ez delako edo jarduera urtebetetik gorako epean eten delako.

b) Interesdunak Jokoa Arautzeko Agintaritzari idatziz uko egiteagatik.

c) Enpresa borondatez edo legez desegiteagatik. Titularra edo enpresako bazkide edo partaideren bat hiltzen bada, oinordetza arloko zuzenbide pribatuko arauekin bat etorriz izapideak egin ondoren, kausadunak Jokoa Arautzeko Agintaritzaren nahitaezko gaikuntza-tituluak eskatu beharko ditu, bi hilabeteko epean.

d) Baliogabetzeagatik edo administrazio-zehapen irmoagatik.

4. Kapitulu honetan araututako gaikuntza-tituluak honako kasu hauetan baliogabetzen ahalko dira, interesdunari entzun ondoren:

a) Fidantzak ezarritako epean ez berrezartzeagatik, fidantzaren zenbatekoa murriztu denean.

b) Titulua ematea ekarri zuten baldintzak, titularrari edo lokalari buruzkoak, betetzeari uzteagatik.

c) Baimenen titularrei eta bazkide edo administratzaileei buruzko aginduak, erregelamendu honen 31. artikuluan eta hurrengoetan aipatutakoak, betetzeari uzteagatik.

5. Gaikuntza-tituluan ezarritako baldintzak aldatzeko, Jokoa Arautzeko Agintaritzaren baimena beharko da. Baimen hori ezetsitzat joko da hiru hilabete igarotzen badira berariazko ebazpena jakinarazi gabe.

BIGARREN ATALA. JOKO-ENPRESA OSAGARRIAK

37. artikulua. Kontzeptua.

Foru dekretu honen ondorioetarako, joko-enpresa osagarritzat hartuko dira Nafarroako Jokoen eta Apustuen Erregistroan inskribatuta dauden entitateak, beren helburua baldin bada jarduera hauetakoren bat gauzatzea:

a) Jokorako materialak fabrikatzea edo merkaturatzea.

b) Behar diren probak eta entseguak egitea egiaztatzeko jokorako materialak indarrean dauden xedapenetara egokitzen direla.

c) Ikuskapen teknikoak egitea egiaztatzeko jokorako materialek behar bezala funtzionatzen dutela.

38. artikulua. Baldintzak.

1. Oro har, joko-enpresa osagarriek honako baldintza hauek bete beharko dituzte:

a) Beren jardueran aritzeko gaitasun nahikoa eta horretarako behar diren baliabideak izatea.

b) Jardueran aritzeko, merkataritza eta zerga arloetako araudian ezarritako errekerimenduak betetzea.

c) Joko eta apustuen arloko xedapen arautzaileetan ezartzen diren gainerako baldintzak.

2. Jokorako materialak indarrean dauden xedapenetara egokitzen direla egiaztatzeko behar diren probak eta entseguak egiten dituzten enpresek, artikulu honen lehenengo apartatuan adierazitakoez gain, honako baldintza hauek ere bete beharko dituzte:

a) Jokorako materialak indarrean dauden xedapenetara egokitzen direla egiaztatzeko behar diren probak eta entseguak egiteko egiaztagiria izatea, Egiaztatze Erakunde Nazionalak (EEN) edo estatuko edo nazioarteko beste erakunde egiaztatzaile batzuek emandakoa.

b) Entseguetako emaitzak isilpean edukitzea.

c) Erantzukizun zibileko asegurua izatea, laborategiaren entitate titularra pribatua baldin bada.

3. Jokorako materialak ikuskatzen dituzten erakundeek, artikulu honen lehenengo apartatuan adierazitakoez gain, honako baldintza hauek ere bete beharko dituzte:

a) Jokorako materialek behar bezala funtzionatzen dutela egiaztatzeko behar diren ikuskapen teknikoak egiteko egiaztagiria izatea, Egiaztatze Erakunde Nazionalak (EEN) edo estatuko edo nazioarteko beste erakunde egiaztatzaile batzuek emandakoa.

b) Ikuskapenen emaitzak isilpean edukitzea.

39. artikulua. Gaikuntzatitulua.

1. Nafarroako Jokoen eta Apustuen Erregistroko inskripzioa nahikoa gaikuntza-titulu izanen da Nafarroako Foru Komunitatean bere jarduerak gauzatzeko.

2. Nolanahi ere, Jokoa Arautzeko Agintaritzak eskatzen ahalko du behar diren dokumentu guztiak aurkez daitezela egiaztatzeko foru dekretu honen 38. artikuluan adierazitako baldintzak betetzen direla.

VI. KAPITULUA. JOKOAREN PUBLIZITATEA, BABESLETZA ETA SUSTAPENA

LEHENBIZIKO ATALA. ARAUBIDE JURIDIKOA ETA PRINTZIPIO OROKORRAK

40. artikulua. Araubide juridikoa.

1. Jokoari buruzko abenduaren 14ko 16/2006 Foru Legean eta erregelamendu honetan xedatutakoari jarraituz arautuko dira joko eta apustuen publizitate, babesletza eta sustapen jarduerak eta bestelako komunikazio komertzialak, bai eta joko-lokal eta enpresenak ere, baldin eta Nafarroako lurraldean jaulki, zabaldu edo banatzen badira, erabilitako euskarria edo formatua edozein dela ere.

2. Aplikatu beharko zaie, era berean, publizitatearen eta merkataritza jardunbide desleialen arloan indarrean dagoen araudi orokorra, zabalkunderako erabilitako bitarteko edo euskarriaren arabera aplikatzekoa den sektore-araudia eta, bereziki, ikus-entzunezko komunikazio-zerbitzuak eta informazio-gizartearen eta merkataritza elektronikoaren zerbitzuak arautzen dituen araudia.

Errespetatu beharko da, orobat, Emakumeen eta Gizonen arteko Berdintasunari buruzko apirilaren 4ko 17/2019 Foru Legearen 41. artikuluan xedatutakoa eta LGTBI+ Pertsonen Berdintasun Sozialari buruzko ekainaren 19ko 8/2017 Foru Legean xedatutakoa.

3. Kapitulu honetan araututako publizitate, babesletza eta sustapen jarduerak egiteko, aurretiazko komunikazio araubidea bete beharko da.

4. Administrazio eskudunak egiaztatu beharko du ezen, legez ezarritako printzipio, betebehar eta debekuak betetzeaz gainera, sustatzen direla joko-jarrera neurritsu, arduratsu eta ez-konpultsiboak, eta, betiere, mezuen bidez ohartarazten dela adingabeek jokoa debekatua dutela.

Kontuan hartu beharko dira, besteak beste, publizitatea emititzeko ordu-tarteak edo hedabideak, pertsona ospetsuak agertzearen debekua edo murriztapenak, eta babesletza- eta sustapen-jardueren erregulazioan joko-jarrera neurritsu eta ez-konpultsiboak sustatu beharra.

41. artikulua. Definizioak.

Foru dekretu honen ondorioetarako, honako definizio hauek hartuko dira kontuan, oro har:

a) Publizitate jarduera: zuzenean edo zeharka jokoa eta joko-lokaletarako sarbidea sustatzeko egindako komunikazio modua, edozein dela ere erabilitako hedabidea edo euskarria.

b) Babesletza jarduera: joko-enpresa batek ondasun, zerbitzu, jarduera, ekitaldi, programa edo beste edozein eduki finantzatzeko egiten duen zernahi ekarpen, helburua izanik haren izena, marka, irudia, jarduerak edo produktuak sustatzea.

c) Sustapen jarduera: ondasunak banatzea, zerbitzuak ematea edo beste edozein jarduketa egitea, dohainik edo prezio murriztuan, helburua izanik jokoan benetan parte hartzea sustatzea edo bezeroen leialtasuna lortzea. Horietan sartzen dira, besteak beste, hobariak, bonuak edo beste eskaintza batzuk, doakoak edo gordailu baldintzei edo joko, sari, zozketa, deskontu eta oparietan parte hartzeko baldintzei lotutakoak.

d) Iragarlea, babeslea edo sustatzailea: publizitate, babesletza edo sustapen jarduera bere intereserako egiten duen enpresa, dela bere kabuz, dela hirugarren baten bitartez.

e) Informazio komertziala: joko-enpresen eta joko-establezimenduen eta haien zerbitzu osagarrien identifikazio komertzialeko datuak komunikatzea edo zabaltzea, informazioa emate aldera soilik. Honako hauek jotzen dira informazio datutzat:

e.1. Enpresaren izen komertziala edo sozietate-izena.

e.2. Logotipoa edo anagrama.

e.3. Establezimenduaren errotulua.

e.4. Posta-helbidea, web-orria, helbide elektronikoa eta harremanetarako telefonoak.

e.5. Egiten dituzten jardueren ordutegiak.

e.6. Joko-lokalek emandako zerbitzu eta jarduera osagarrien deskribapena eta programazioa.

f) Publizitate estatikoa: hesien, markesinen, kartelen eta beste edozein hiri-altzariren bidez egiten dena, bai eta elementu mugikorren eta garraiobideen gainean jartzen dena ere, izan kolektiboak, izan iragarlearen jabetzakoak, eta hiri-altzariei atxikitako monitore edo pantailen bidez egiten dena.

g) Komunikazio komertziala: pertsona fisiko edo juridiko publiko edo pribatu batek edozein bitarteko edo euskarriren bidez egindako komunikazio mota oro, helburu duena zuzenean edo zeharka sustatzea Jokoari buruzko 16/2006 Foru Legearen aplikazio-eremuan definitutako joko jarduerak edo horiek egiten dituzten entitateak.

42. artikulua. Printzipio orokorrak.

1. Kapitulu honetan araututako publizitate, babesletza eta sustapen jarduerek printzipio hauek beteko dituzte:

a) Identifikazio-printzipioa; horren arabera, komunikazio komertzialek halakotzat erraz identifikatzeko eta ezagutzeko modukoak izan behar dute, eta argi eta garbi adierazi behar da zer joko-enpresaren izena, irudia eta/edo jarduerak sustatzen diren.

b) Egiatasun-printzipioa; horren arabera, ez da informazio faltsurik jasoko, ezta, egiazkoa izan arren, edukiagatik edo aurkezpenagatik hartzaileak oker edo nahas ditzakeen informaziorik ere. Era berean, ez da funtsezko daturik edo gertaera garrantzitsurik faltako kasuan kasuko jarduerari buruz.

c) Erantzukizun-printzipioa; horren arabera, erantzukizun soziala eduki behar da, jokoaren konplexutasuna eta izan ditzakeen ondorio kaltegarriak ukatu gabe, eta bereziki kalteberak diren edo arriskuan dauden taldeak babestu behar dira.

d) Joko arduratsuaren printzipioa; horren arabera, jokoaren diseinuarekin eta hedapenarekin orekatu behar dira jokoa aisialdiko eta entretenimenduko jarduera gisa sustatzeko egitekoa eta kontsumitzaileen nahitaezko babesa.

e) Adingabeak babesteko printzipioa; horren arabera, publizitate jarduerak ezin izanen zaizkie zuzenean edo zeharka adingabeei zuzendu, eta haien helburua ezin izanen da kolektibo hori jokoan aritzeko konbentzitzea edo jokora bultzatzea. Era berean, adingabeak babesteko araudian ezarritako aurreikuspen guztiak errespetatu beharko dira.

2. Kapitulu honetan araututako publizitate edo sustapen jarduerek mezu argi eta irakurgarri bat izan beharko dute, adierazten duena jokoa debekatuta dagoela 18 urtetik beherakoentzat eta jokatzeak adikzioa sor dezakeela. Orobat, joko-jarrera neurritsuak, ez-konpultsiboak eta arduratsuak sustatu beharko dute. Horrez gain, debeku horri eta joko arduratsuari buruzko logotipoak sartu beharko dira, Jokoa Arautzeko Agintaritzak ezartzen duen formatuaren arabera.

BIGARREN ATALA. MUGAK ETA DEBEKUAK

43. artikulua. Publizitate jardueraren mugak.

1. 42. artikuluan adierazitako printzipioei jarraikiz, debekatuta dago jokoaren eta joko-enpresa eta -establezimendu espezifikoen publizitatea egitea, baldin eta:

a) Joko-jarduerak arrakasta pertsonala, familiakoa, soziala edo profesionala adierazten duten ideiekin edo portaerekin lotzen baditu.

b) Jokatzen ez duten pertsonak arbuiatzen baditu eta jokatzen dutenei gailentasun sozial halako bat ematen badie.

c) Barne hartzen baditu jokoaren aldean ahaleginari, lanari edo ikasketari balioa kentzen dioten mezuak.

d) Jokoaren alde zuhurgabea, konpultsiboa, desordenatua, adikzio-sortzailea edo patologikoa bultzatzen badu, edo jokoaren patroi horiek estimulatzaile edo erakargarri gisa aurkezten baditu.

e) Maileguen edo beste edonolako kreditu-modalitateren eskaintzak egiten badizkie joko baten parte-hartzaileei.

f) Iradokitzen badu jokoa konponbidea edo alternatiba izan daitekeela problema pertsonal, profesional, finantzario edo hezkuntzakoetarako, bakardaderako edo depresiorako.

g) Nahasterik sortzen badu saritua izateko aukerari buruz eta iradokitzen badu jokoa errepikatzeak irabazteko probabilitatea areagotzen duela edo jokalariak trebetasunari edo esperientziari esker aukera gehiago duela irabazteko.

h) Adingabeak zuzenean edo zeharka jokora bultzatzen baditu, dela beren kabuz, dela hirugarren pertsonen bitartez, edo jokoa heldutasun-seinale gisa edo helduarora igarotzeko seinale gisa aurkezten badu.

i) Haur edo gazteen kulturari lotutako argudioak, estiloak, tipografiak, ahotsak, irudiak edo diseinuak erabiltzen baditu.

j) Komunikabideetan eta hedabideetan eduki pedagogiko espezifikoa duten edo lehentasunez adingabeei zuzenduta dauden programa edo ataletan egiten bada.

k) Batez ere adingabeek erabiltzen dituzten edo haientzat diren leku publikoetan egiten bada, edo hezkuntza- edo osasun-instalazioetan.

l) Baimendu gabeko joko modalitateak edo joko motak sustatzen baditu.

2. Artikulu honetan jasotako debekuak era guztietako publizitateetara hedatzen dira, zuzenekoak zein zeharkakoak izan, barne hartuta beren izenagatik, grafismoagatik, aurkezteko moduagatik edo beste edozein arrazoirengatik ezkutuko publizitatetzat jo daitezkeen objektu edo produktuen publizitatea.

44. artikulua. Publizitaterako debekuak.

Beti debeku izanen da:

a) Apustuen publizitatea jartzea Nafarroan egin eta osorik edo partez dirulaguntza publikoen bidez finantzatzen den edozein kirol-jardueratan.

b) Publizitatea jartzea zentro hauetatik 300 metrora baino hurbilago dauden euskarrietan: ikastetxeak, kiroldegiak, kultura, josteta edo osasun zentroak, edo joko-adikzioa, osasun mentaleko arazo larriak edo adimen-desgaitasuna duten pertsonen errehabilitaziorako lokalak.

c) Kirol-enpresen publizitatea jartzea administrazio publikoen egoitzetan, 18 urtetik beherakoentzako gune publikoetan, osasun-zentroetan, gizarte-zentroetan, zentro-soziosanitarioetan, ikastetxeetan, zinema-aretoetan eta kirol-ekitaldiak egiten diren lokal eta instalazioetan.

d) Postaz, telefonoz edo bide telematikoez publizitatea egitea, eta, oro har, publizitatea etxera igortzea.

e) Publizitatea egitea Nafarroako egunkari, aldizkari edo bestelako informazio bideetan eta Nafarroan kokatutako irrati eta telebista zentroetan 05:00etatik hurrengo eguneko 01:00 arte.

f) Foru lege honetan ezarritakoari jarraikiz diskriminaziozko jokabidetzat har daitekeena dakarren publizitatea ez-zilegia izanen da, publizitatearen gaineko legeria orokorrarekin bat.

g) Debeku da egin, emititu eta erakustea sexuaren, sexu-orientazioaren edo sexu- eta/edo genero-identitatearen arabera pertsonak gutxiesten edo goresten dituzten publizitateko iragarkiak, bai eta objektu sexual huts moduan aurkezten dituztenak eta emakumeen kontrako indarkeria justifikatu, hutsaldu edo sustatzen dutenak ere.

45. artikulua. Babesletza jardueraren mugak.

1. Argi eta garbi identifikatzeko modukoa izanen da joko-enpresak ondasun, zerbitzu, programa, jarduera edo ekitaldi babestuekin duen babesletza harremana.

2. Ez da onartuko adingabeek bakarrik parte hartzen duten edo berariaz adingabeei zuzenduta dauden jarduerak edo emanaldiak babestea.

3. Babesletza jarduera emateak edo zabaltzeak ezin izanen du bultzatu, zuzenean edo zeharka, publikoak joko jardueretan edo modalitateetan parte hartzera, eta ezin izanen da 43. artikuluan ezarritako debeku-kasuetako publizitaterik sartu.

4. Debeku da, kasu guztietan, apustu-enpresak kirol-kluben babesle izatea; bereziki, debeku da haien publizitatea jartzea kirol-jantzietan eta elastikoetan, edo kirol-instalazio eta estadioetan.

46. artikulua. Sustapen jardueraren mugak.

Jokoa sustatzeko jarduera jokoetako lokalen barnean baino ezin da egin, eta, joko ez-presentzialaren kasuan, soilik foru dekretu honetan ezarritakoaren arabera erregistratuta dauden erabiltzaileek eskura dituzten lekuetan.

47. artikulua. Merkataritzako argibideak.

Merkataritzako argibideek, betiere informazio-publizitatea bada, Jokoa Arautzeko Agintaritzaren aldez aurreko jakinarazpena beharko dute.

48. artikulua. Jokolokalen barneko publizitatea.

Joko-lokalen barnean jokoarekin zerikusia duen edozein publizitate jarduera egiten ahalko da, betiere erregelamendu honetan ezarritako printzipioak eta mugak errespetatzen baditu.

HIRUGARREN ATALA. KOMUNIKAZIO PROZEDURA

49. artikulua. Jarduerak.

Jokoaren arloan publizitate, sustapen eta babesletza jarduerak egiteko, aldez aurretik Jokoa Arautzeko Agintaritzari jakinarazi behar zaio.

50. artikulua. Epea eta edukia.

1. Jarduera sustatzen duen joko-enpresak gutxienez kanpaina edo jarduera hasi baino hilabete lehenago egin beharko du jakinarazpena.

2. Jakinarazpenean, gutxienez, honako datu hauek jaso beharko dira:

a) Nor den iragarlea, babeslea edo sustatzailea, eta publizitate-agentzia eta, hala badagokio, hedabide-agentzia.

b) Publizitate, babesletza edo sustapen jardueraren kanpainaren xedea.

c) Egin nahi den publizitatea, babesletza edo sustapena zer hedabidetan, euskarritan eta formatutan agertuko den.

d) Hedapenerako lurralde-eremua.

e) Publizitate, babesletza edo sustapena zer jarduera eta zerbitzutarako egiten den, haien ezaugarriak.

f) Kanpainaren hasiera- eta amaiera-datak.

51. artikulua. Ebazpena.

1. Jokoa Arautzeko Agintaritzak prozedura ebazteko beharrezkotzat jotzen dituen datu eta dokumentu guztiak eskatzen ahalko dizkio joko-enpresari.

2. Halaber, honako kasu hauetan debekatzen edo baldintzatzen ahalko du, hala badagokio, proposatutako jarduera:

a) Debekatzeko arrazoiren bat dagoenean edo kapitulu honetan ezarritako baldintzaren bat betetzen ez denean.

b) Prozedura ebazteko datu edo dokumentu erabakigarririk eransten ez zaionean komunikazioari edo halakorik aurkezten ez denean.

VII. KAPITULUA. JOKORAKO MATERIALAK

LEHENBIZIKO ATALA. KONTZEPTUA, SAILKAPENA ETA HOMOLOGAZIOA

52. artikulua. Kontzeptua.

1. Honako hauek hartuko dira jokorako materialtzat: jokoa garatzeko, kudeatzeko, kontrolatzeko eta praktikatzeko beharrezkoak diren elementuak, tresnak, euskarriak, terminalak, software-materiala, ekipoak, makinak edo sistema teknikoak, banatzeko kanala edozein dela ere.

2. Homologatzeko edo ikuskatzeko ondorioetarako, material horiek honela sailkatzen dira:

a) Funtsezko materialak: jokoaren garapenean edo praktikan eragin zuzena izateagatik, kasuan kasuko jokoaren araudi teknikoan ezarritako ezaugarri eta/edo funtzionalitate jakin batzuetara egokitu behar direnak. Mota honetakoak dira, besteak beste, joko-makinak, bingo-bolak ateratzeko sistemak edo ausazko zenbakiak sortzekoak eta joko eta apustuen sistema teknikoak.

b) Material osagarriak: jokoa kudeatzeko eta kontrolatzeko beharrezkoak izan arren, haren garapenean eragin zuzenik ez dutenak. Mota honetakoak dira, besteak beste, jokoan parte hartzeko tresna fisikoak (txartelak, billeteak, ordezkagiriak edo antzekoak), bingo-kartoiak, audio- edo bideo-sistemak, eta informazio-pantailak eta panelak.

3. Funtsezko materialek bat etorri beharko dute aldez aurretik homologatutako modelo edo tipoekin, edo, hala badagokio, gainditu beharko dituzte indarreko araudira egokitzen direla egiaztatzeko egiten zaizkien probak.

4. Material osagarriek edo ez-funtsezkoek ez dute aldez aurreko homologaziorik beharko. Komunikazio araubidearen mende egonen dira, Jokoa Arautzeko Agintaritzari produktuaren memoria tekniko deskribatzaile bat aurkeztuko baitzaio.

5. Aurreko apartatuetan aurreikusitako ondorioetarako, joko-enpresak eta jokoetarako establezimenduen titularrak behartuta egonen dira dokumentazioa ematera edo egin beharreko egiaztapenak onartzera, eta, hala badagokio, Jokoa Arautzeko Agintaritzak izendatutako funtzionarioei beharrezko laguntza ematera egiaztapen horiek egin ditzaten.

53. artikulua. Homologazioa eta auditoriak.

1. Jokorako materialen ereduen homologazioa administrazioaren jarduera bat da, frogatzen duena jokorako material jakin bat edo haren balizko aldaketak legezkoak direla, indarrean dagoen araudian aurreikusitako baldintza eta betekizun teknikoen arabera. Bete beharreko baldintza bat da, material hori establezimendu publikoetan ustiatu eta instalatu aurrekoa edo urruneko jokoa merkaturatzeko erabili aurrekoa.

2. Horretarako, aipatutako ereduei, homologatu aurretik, funtzionamendu entseguak egin eta jokoen ezaugarriak egiaztatu beharko dizkiete probak eta saiakuntzak egiteko gaitutako erakundeek.

3. Erakunde horiek ziurtapen-txosten bat egin beharko dute, eta bertan zehatz-mehatz adierazi beharko dute, Jokoa Arautzeko Agintaritzak ezarritako formatuan, ea ereduaren ezaugarriak eta funtzionamendua bat datozen foru dekretu honetan eta hura garatzeko xedapenetan eskatutako betekizun teknikoekin eta enpresa eskatzaileak aurkeztutako dokumentazioan jasotako zehaztapenekin.

4. Joko presentzialean erabiltzen diren joko eta apustuen unitate zentralei eta urruneko jokoak merkaturatzeko erabiltzen diren sistema teknikoei egiaztapen-ikuskapenak egin beharko zaizkie bi urtean behin, Jokoa Arautzeko Agintaritzak ezarritako protokoloen arabera.

Auditoretza, zeinaren kostua jokoa antolatzen duen enpresak hartuko baitu bere gain, jokorako materialen proba eta saiakuntzen laborategi batek egin beharko du. Laborategi hori Nafarroako Jokoen eta Apustuen Erregistroan inskribatuta egonen da, eta ez da izanen auditoretzaren xede den jokorako materialaren azken homologazio-txostena egin duena.

5. Jokorako materialen ereduak ezin izanen dira homologatu baldin eta pertsonen oinarrizko eskubideak urratzen dituzten edo indarreko araudiak debekatzen dituen elementuak edo mezuak badituzte. Bereziki, ez dira homologatuko eduki xenofobo, pornografiko edo sexistak dituzten ereduak.

54. artikulua. Homologazioprozedura.

1. Jokorako materialen modeloak homologatzeko eskaera jokorako materialak fabrikatzeko edo merkaturatzeko gaitutako enpresa batek egin beharko du.

2. Homologatzeko eskaera Jokoa Arautzeko Agintaritzan egin beharko da, eta kasuan kasuko jokoaren araudi tekniko espezifikoan adierazitako dokumentuak aurkeztu beharko dira (foru dekretu honen eranskinean jasota dago araudia).

3. Eskaera jasotakoan, Jokoa Arautzeko Agintaritzak prozedura bideratuko du ereduaren homologazioari buruzko ebazpena emateko. Horretarako, aurretiazko saiakuntza osagarriak eskatzen ahalko ditu, eta eskatzaileari galdegin bere esku jartzeko, behar den denboran, homologatu beharreko materialaren prototipo bat eta saiakuntzekin lotuta beharrezkoa den dokumentazio gehigarria.

Oso ohikoak ez diren prozedura teknikoak erabiltzen badira, enpresa fabrikatzaileak edo merkaturatzaileak baliabideak jarriko ditu homologazio-prozesuan horiek egiaztatzeko.

4. Prozedura ebazteko gehieneko epea hiru hilabetekoa izanen da.

5. Homologatutako jokorako materialen modeloak Nafarroako Jokoen eta Apustuen Erregistroko dagokion atalean inskribatuko dira.

55. artikulua. Eredu homologatuak aldatzea.

1. Ereduen aldaketak funtsezkoak edo ez-funtsezkoak izan daitezke.

2. Jokorako material jakin batzuen homologazioa arautzen duten xedapenetan ezarritakoa alde batera utzi gabe, joko presentzialaren arloan funtsezko aldaketatzat hartuko dira jatorrizko homologazio-prozeduran egiaztatu ziren joko-parametroen aldaketak.

Joko-makinen kasuan, halakotzat hartuko dira jokoaren garapena kontrolatzen duen programaren aldaketak, baldin eta lotura zuzena badute aplikatu beharreko araudian eskatutako betekizunekin (hala nola partidaren prezioa, itzulketaren ehunekoa, jokoaren abiadura, irabazien plana edo jokoaren garapenak berezko dituen beste baldintza batzuk).

Joko ez-presentzialaren arloan, funtsezko aldaketatzat hartzen dira jokoa merkaturatzeko erabiltzen diren sistema teknikoen osagai kritiko batean egiten direnak. Honako elementu hauek hartzen dira kritikotzat: barne-kontroleko sistema, ausazko zenbakien sortzailea, erabiltzailearen erregistroa edo Jokoa Arautzeko Agintaritzarekiko loturak.

Jokoa Arautzeko Agintaritzak kritikotzat jotzen ahalko ditu jokoaren sistema teknikoko beste osagai batzuk, hasieran horrela kalifikatu ez badira ere, baldin eta, arrazoituta, uste badu jokoen garapenari, parte-hartzaileen eskubideei edo interes publikoari eragiten dietela edo eragin diezaioketela.

3. Gainerako aldaketak ez-funtsezkotzat joko dira.

4. Funtsezko aldaketak egiteko, aldez aurreko baimena beharko da, eta 53. eta 54. artikuluetan ezarritako aurretiazko saiakuntzak eta homologazio-prozedura bete beharko dira.

5. Aldaketa ez-funtsezkoak aurretiazko komunikazioaren araubidearen mende egonen dira soilik. Hala, aldaketa justifikatzen duen memoria teknikoa aurkeztu beharko da, bai eta idatzizko konpromiso bat ere, zehazten duena aurreko apartatuetan funtsezkotzat hartutako elementuak ez direla aldatu.

6. Salbuespen gisa, aldaketa beharrezkoa bada erabiltzaileei edo enpresei kalte egiten dien arazo tekniko bat konpontzeko, berehala zuzentzen ahalko da gorabehera, batez ere ustiatzen ari diren joko-makinetan, behin erregistroan egoki den komunikazioa aurkeztuta.

Arazoa konpondu ondoren, edo komunikazioa egin eta gehienez ere 30 eguneko epean, egindako zuzenketa justifikatzeko dokumentazioa aurkeztuko dio enpresa fabrikatzaileak Jokoa Arautzeko Agintaritzari, aldaketa funtsezkoa izan den ala ez adierazita, eta 53. eta 54. artikuluetan ezarritako prozedurari jarraituko zaio, kasuaren arabera.

56. artikulua. Ereduak lagatzea.

1. Joko-makina edo -sistema baten eredua fabrikatzeko, inportatzeko eta merkaturatzeko gaikuntza lagatzeko, lagatzaileak aldez aurretik Jokoa Arautzeko Agintaritzari jakinarazi behar dio, lagatako eredua merkaturatu aurretik.

2. Aurreko apartatuan adierazitako gaikuntza lagako da, soil-soilik, lagatzailea eta lagapen-hartzailea Nafarroako Jokoaren Erregistroan inskribatuta badaude.

3. Komunikazioarekin batera, eredua lagatzeko kontratua edo titulua justifikatzen duen dokumentazioa aurkeztu beharko da, bai eta lagatzen den ereduko makinen zenbakiak eta serieak jasotzen dituen dokumentua ere, baldin eta ustiatzeko baimena indarrean duen makinarik badu.

57. artikulua. Homologazioak baliozkotzea.

1. Jokoa Arautzeko Agintaritzak baliozkotzen ahalko ditu Espainiako estatuan jokoaren arloan eskumena duten beste administrazio batzuek homologatutako jokorako materialen ereduak, baldin eta eredu horiek foru dekretu honetan edo hura garatzeko arauetan ezarritako baldintza teknikoak betetzen badituzte.

2. Horretarako, enpresa fabrikatzaileek edo merkaturatzaileek Jokoa Arautzeko Agintaritzari jakinarazten ahalko dizkiote arlo horretan eskumena duen beste administrazio batek homologatutako joko-ereduak edo -elementuak. Horretarako, probak eta saiakuntzak egiteko gaitutako erakunde baten ziurtagiria aurkeztu beharko dute, egiaztatzen duena aurreko apartatuan adierazitako baldintza teknikoak betetzen dituztela, erregelamendu honetan ezarritakoaren arabera.

58. artikulua. Ereduen inskripzioak deuseztatzea.

1. Joko-makinen eta joko-sistemen ereduen inskripzioa deuseztatzen ahalko da, gaikuntza-titulua duen enpresak hala eskatuta, behin Jokoa Arautzeko Agintaritzak dagokion eredua ustiatzen ari ez dela egiaztatuta.

2. Jokoa Arautzeko Agintaritzak ereduaren inskripzioa deuseztatuko du, interesdunari entzun ondoren, emakida ekarri zuten baldintza guztiak edo batzuk betetzeari uzten zaionean, ezertan galarazi gabe behar diren zehapenak ezar daitezkeela.

3. Deuseztatzeak ekarriko du makina horiek fabrikatzeko, inportatzeko, merkaturatzeko eta instalatzeko gaikuntza galtzea eta automatikoki baliorik gabe gelditzea kasuan kasuko ereduari edo joko-sistemari dagozkion makinak ustiatzeko baimenak. Erabakia hartzen duen ebazpenean ezarriko da kasuan kasuko joko-makina edo -sistemen ustiapena kentzeko epea; epe hori ezin izanen da 30 egunetik gorakoa izan.

VIII. KAPITULUA. JOKOAREN KONTROLA ETA IKUSKAPENA

LEHENBIZIKO ATALA. NAFARROAKO JOKOEN ETA APUSTUEN ERREGISTROA

59. artikulua. Xedea.

1. Nafarroako Jokoen eta Apustuen Erregistroa, aurreikusita dagoena Jokoari buruzko abenduaren 14ko 16/2006 Foru Legearen 7. artikuluan, tresna bat da jokoaren eta apustuen jarduera kudeatzeko eta kontrolatzeko. Bertan jasoko dira Nafarroako Foru Komunitatearen esparruko joko eta apustuen antolaketari eta ustiapenari lotutako jarduera horren datu garrantzitsuak.

2. Erregistroa publikoa izanen da. Interesdunek informazioa eskuratzen ahalko dute bertan agertzen diren datuei buruz, ezertan galarazi gabe datu pertsonalak babesteari eta eskubide digitalak bermatzeari buruz indarrean dagoen araudian xedatutakoa bete behar dela.

60. artikulua. Antolaketa.

Nafarroako Jokoen eta Apustuen Erregistroak liburu eta atal hauek izanen ditu:

1. I. liburua.-Joko-enpresak.

a) I. atala.-Apustuen modalitatea.

b) II. atala.-Bingoaren modalitatea.

c) III. atala.-Txartelen eta loterien modalitatea.

d) IV. atala.-Joko-makinen modalitatea.

e) V. atala.-Zozketen eta tonbolen modalitatea.

2. II. liburua.-Joko-enpresa osagarriak.

a) I. atala.-Jokorako materialak fabrikatzen eta merkaturatzen dituzten enpresak.

b) II. atala.-Jokorako materialen proba eta saiakuntzen laborategiak.

c) III. atala.-Laguntza teknikoko enpresak.

3. III. liburua.-Joko-establezimenduak.

a) I. atala.-Bingoak.

b) II. atala.-Joko-aretoak.

c) III. atala.-Kirol-apustuen lokalak.

d) IV. atala.-Beste establezimendu batzuk.

4. IV. liburua.-Jokorako materialak.

a) I. atala.-Joko-makinak.

b) II. atala.-Joko presentzialean aritzeko beste sistema batzuk.

c) III. atala.-Joko ez-presentzialean aritzeko sistemak.

d) IV. atala.-Beste material mota batzuk.

5. V. liburua.-Gaikuntza-tituluak eta baimenak.

a) I. atala.-Joko-enpresak gaitzen dituzten tituluak.

b) II. atala.-Joko-establezimenduen funtzionamendu-baimenak.

c) III. atala.-Jokoetarako baimenak.

d) IV. atala.-Joko-makinak ustiatzeko baimenak.

e) V. atala.-Joko-makinak instalatzeko baimenak.

6. VI. atala.-Joko-makinen kokalekua.

7. VII. liburua.-Zehapenen erregistroa.

61. artikulua. Inskripzioen edukia.

1. I. eta II. liburuetan egiten diren inskripzio eta idatzoharrek informazio hau izan beharko dute:

a) Enpresaren identifikazioa, helbide soziala, telefonoa, helbide elektronikoa eta erabilitako merkataritza-marka.

b) Zer jardueratarako eman den gaikuntza-titulua edo zer jarduerak justifikatzen duen inskripzioa.

c) Gaikuntza-titulua zer egunetan lortu den, hala badagokio.

d) Erregistroko inskripzio-data eta -zenbakia.

2. III. liburuan egiten diren inskripzio eta idatzoharrek informazio hau izan beharko dute:

a) Establezimenduaren helbidea.

b) Komertzialki ustiatzen duen enpresaren identifikazioa, helbide soziala, telefonoa, helbide elektronikoa eta erabilitako marka komertziala adierazita.

c) Establezimenduan baimendutako joko-jarduerak.

d) Establezimenduaren edukiera eta funtzionamendu-ordutegia.

e) Gaikuntza-titulua zer egunetan lortu den eta, hala badagokio, indarraldia.

f) Erregistroko inskripzio-data eta -zenbakia.

3. IV. liburuan egiten diren inskripzio eta idatzoharrek informazio hau izan beharko dute:

a) Enpresa fabrikatzailearen edo merkaturatzailearen identifikazioa, helbide soziala, harremanetarako telefonoa eta jakinarazpenetarako helbide elektronikoa.

b) Jokorako material mota.

c) Ereduaren izena edo kasuan kasuko materialarena eta bertsioaren identifikazioa.

d) Gehieneko sariak, sari-itzulketen ehunekoa eta partidaren edo apustuaren kostua, hala badagokio.

e) Joko-programa duen memoriaren identifikazioa eta datuak.

f) Homologazio-data eta esleitutako erregistro-inskripzioaren zenbakia.

4. V. liburuan egiten diren inskripzio eta idatzoharrek informazio hau izan beharko dute:

a) Pertsona egiaztatuaren edo enpresa baimenduaren identifikazioa, baita baimen horrekin lotutako enpresena ere.

b) Baimenaren edo egiaztapenaren xede den jardueraren edo materialaren identifikazioa eta, hala badagokio, indarraldia.

c) Zer establezimendutan ustiatzen den baimendutako jarduera edo instalatzen den jokorako materiala.

d) Erregistroan esleitutako inskripzio-zenbakia.

5. VI. liburuan egiten diren inskripzio eta idatzoharrek informazio hau izan beharko dute:

a) Instalatutako joko-makinaren identifikazioa, seriearekin, zenbakiarekin eta ereduarekin.

b) Zer establezimendutan ustiatzen den baimendutako jarduera.

6. VII. liburuan egiten diren inskripzio eta idatzoharrek informazio hau izan beharko dute:

a) Zehatutako pertsona fisiko edo juridikoaren identifikazioa.

b) Egindako falta zein den, haren data eta ordua, eta ezarritako zehapena.

c) Xedapen zehatzailearen identifikazioa eta data, eta haren irmotasuna.

d) Zehapenaren preskripzio eguna.

62. artikulua. Inskripzio prozedura.

1. Oro har, ofizioz eginen dira inskripzioak Nafarroako Jokoen eta Apustuen Erregistroan, behin baimen eta gaikuntza-tituluak emanda edo xedapen zehatzaileak irmo bihurtuta. Jokoa Arautzeko Agintaritzak izapidetu eta ebatziko ditu.

2. Alderdi batek eskatuta eginen dira inskripzioak Erregistroko II. liburuan, artikulu honen hurrengo apartatuetan adierazitako prozedurari jarraituz.

3. Jokoarekin zerikusia duten enpresek, Erregistroko II. liburuko I. atalean inskribatu nahi badute, honako agiri hauek aurkeztu beharko dituzte eskaerarekin batera:

a) Eskatzailea pertsona juridikoa bada, eskaera sinatzen duenaren ordezkaritza-ahalordearen kopia konpultsatua edo notarioaren testigantzarena.

b) Sozietatearen eratze-eskrituraren eta estatutuen kopia konpultsatua edo notarioaren testigantzarena, Merkataritza Erregistroko inskripzio-ziurtagiriarekin batera, enpresa sozietate moduan antolatzen denean.

4. Jokoarekin zerikusia duten enpresek, Erregistroko II. liburuko II. eta III. ataletan inskribatu nahi badute, eskaerarekin batera, aurreko apartatuan zerrendatutako agiriak aurkeztu beharko dituzte, eta, sozietate moduan antolatzen badira, honako agiri hauek:

a) Jarduerarako dituen baliabide teknikoak eta giza baliabideak justifikatzeko memoria.

b) Egiaztagiri bat, Egiaztatze Erakunde Nazionalak (EEN) edo estatuko edo nazioarteko beste erakunde egiaztatzaile batzuek emandakoa, jokorako materialak indarrean dauden xedapenetara egokitzen direla egiaztatzeko behar diren probak eta entseguak egiteko eta/edo laguntza teknikoko jarduerak egiteko.

5. Inskripzioa zehapen-prozedura edo prozedura judizial baten ondorioz egiten bada, espedientea bide administratiboan edo judizialean irmo bihurtutakoan eginen da inskripzioa.

6. Erregistroan jasotako daturen bat aldatuz gero, Jokoa Arautzeko Agintaritzari jakinarazi beharko zaio, erregelamendu honen 28. artikuluan ezarritakoari jarraituz.

63. artikulua. Inskripzioen indarraldia.

Inskripzioen indarraldia izanen da horien arrazoi diren baimen edo gaikuntza-tituluetan jasotakoa. Halakorik ezean, mugagabeak izanen dira.

64. artikulua. Inskripzioak deuseztatzea.

1. Erregistroko I., II. eta III. liburuetan egindako inskripzioak deuseztatu edo baliogabetzen ahalko dira, honako arrazoi hauetako bat gertatzen denean:

a) Inskripzioaren sustatzaileak eskatuta.

b) Baimena edo gaikuntza-titulua iraungitzeagatik.

2. Erregistroko IV. liburuan egindako inskripzioak deuseztatu edo baliogabetzen ahalko dira, honako arrazoi hauetako bat gertatzen denean:

a) Inskripzioaren sustatzaileak eskatuta.

b) Eskaeran edo inskribatutako materialen edo modeloen dokumentazioan datu faltsuak, irregulartasunak edo datu oker edo ez-egite funtsezkoak daudela jakiten denean.

c) Inskripzioa egin ondoren, jakiten denean inskribatutako modeloari edo materialei erregelamenduz eskatutako betebeharren bat ez dela bete.

d) Inskribatutako materiala edo modeloa zaharkitua dagoela edo erabiltzen ez dela ikusten denean.

3. Erregistroko V. liburuan egindako inskripzioak ofizioz deuseztatuko dira, inskripzio horien indarraldia amaitzeagatik edo azkentzeagatik.

4. Erregistroko VII. liburuan egindako inskripzioak ofizioz deuseztatu beharko dira, zehapenaren preskripzio epea igaro ondoren.

65. artikulua. Deuseztatzeen ondorioak.

1. Erregistroko I. liburuan egindako inskripzioak deuseztatzeak automatikoki baliogabetuko ditu enpresari emandako baimenak edo gaikuntza-tituluak, lotura dutenak joko modalitate baimendua ustiatzearekin eta jokorako establezimenduekin.

2. Erregistroko IV. liburuan egindako inskripzioak deuseztatzeak automatikoki baliogabetuko ditu deuseztatutako inskripzioaren xede den jokoa egiteko homologatutako materialak ustiatzeko eta instalatzeko baimenak. Deuseztatzearen ebazpenean zehaztuko da zein epetan erretiratu behar diren, baina epe hori ez da sei hilabetetik gorakoa izanen.

BIGARREN ATALA. KONTROL JARDUERAK

66. artikulua. Ikuskapenak.

1. Jokoarekin eta apustuekin zerikusia duten jarduerak ikuskatu eta kontrolatzeko eta, ondorioz, inkesta eta egiaztapen funtzioak betetzeko, men eginen zaio Jokoari buruzko abenduaren 14ko 16/2006 Foru Legearen 34. artikuluan xedatutakoari, bai eta foru dekretu honetan eta aplikatu beharreko xedapen orokor edo osagarri guztietan adierazitakoari ere.

2. Ikuskapenak egiaztatutako egintzak edo egitateak dagokion aktan jaso beharko dira kasu guztietan.

Akta horietan jasoko dira ikuskapenaren xede diren egitateak hobeki adierazteko beharrezkoak diren datu eta inguruabar guztiak, eta haien kopia emanen zaie aktak egitean bertan dauden pertsonei. Pertsona horiek aktan jasotzen ahalko dituzte edukiari buruz egin nahi dituzten oharrak.

67. artikulua. Jokosistemak monitorizatzea eta ikuskatzea.

Joko-sistemek aukera eman beharko dute Jokoa Arautzeko Agintaritzak eta Nafarroako Foru Ogasunak joko-eragiketen eta transakzio ekonomikoen kontrola eta jarraipena denbora errealean egiteko, haien zehaztapen teknikoetan adierazitako moduan.

HIRUGARREN ATALA. SARIAK ETA ITZULKETAK

68. artikulua. Sarien izaera, banaketa eta iraungipena.

1. Sari moduan, ondasunak, eskubideak edo Espainian legezkoak diren diru-kopuruak eman daitezke, erabiltzaileentzat inolako kosturik gabe, enpresa antolatzaileak kasuan kasuko jokorako edo modalitate espezifikorako proposatutako eta Jokoa Arautzeko Agintaritzak onetsitako antolamendu- eta funtzionamendu-arauetan ezarritako moduan, baldintzetan eta lekuetan.

Gauzazko ondasun edo eskubideen sariek ez dute kargarik izanen. Enpresa antolatzaileak bere merkatu-balioa adierazi beharko du parte hartzeko txarteletan, orrietan edo euskarrietan.

2. Oro har, sariak eskudirutan, txeke adostuan edo banku-transferentzian ordainduko dira, enpresaren kontura, honako arau hauen arabera:

a) Hautatzen bada eskudirutan edo txeke adostuan ordaintzea, saria eman zuen partida edo joko-saioa amaitu eta berehala eginen da ordainketa edo emanen da txekea. Apustuen kasuan, epea ez da hogeita lau ordutik gorakoa izanen, apustuen xede den gertaeraren emaitzen baliozkotasuna zehazten denetik zenbatzen hasita.

b) Hautatutako aukera banku-transferentzia bada, saria eman duen jokoaren eguneko saioa amaitu eta hurrengo lehen egun balioduneko hogeita lau orduetan ordaindu beharko da. Jokalaria ados dagoela jaso beharko da.

3. Sariak kobratzeko eskubidea ez da iraungiko erabiltzaileak saria eskuratzeko modua duenetik hiru hilabete igaro arte, salbu eta beste epe bat ezartzen bada joko mota edo modalitate espezifiko bat arautzen duten xedapenetan.

69. artikulua. Ez ordaintzea eta ondorioak.

1. Txekea ez bada ordaintzen edo transferentzia egiten ez bada, osorik edo zati batean, jokalariak enpresa antolatzailera jotzen ahalko du zor duen zenbatekoa erreklamatzeko. Enpresak ez badio kasurik egiten erreklamazioari, jokalariak bere erreklamazioaren kopia aurkezten ahalko dio Jokoa Arautzeko Agintaritzari, eta, harekin batera, enpresak transferentzia bidezko ordainketa justifikatzeko eman zion txekea edo dokumentua aurkeztu beharko du.

Jokoa Arautzeko Agintaritzak enpresa antolatzaileari entzunen dio, eta, zorra ordaindu ez dela egiaztatu ondoren, hiru egun balioduneko epea emanen dio zordundutako zenbatekoa gordailutzeko, zeina jokalariari emanen baitzaio. Hala egin ezean, Jokoa Arautzeko Agintaritzak enpresak jarritako bermea betearaziko du, zor duen zenbatekoa ordaintzeko. Hori guztia, alderdiei dagozkien akzio zibil edo penalak alde batera utzi gabe.

2. Enpresa antolatzaileak ez badu ezarritako moduan eta egunean gauzazko ondasun edo zerbitzuei dagokien saria ematen, jokalariak zor zaion ondasuna edo zerbitzua erreklamatzen ahalko dio enpresari, eta erreklamazio hori Jokoa Arautzeko Agintaritzari helarazi. Hark aurreko apartatuan xedatutakoari jarraituko dio, eta, egokitzat jotzen duen epea igaro ondoren, enpresak jarritako bermea betearaziko du, ondasuna edo zerbitzua ordaintzeko haren merkatu-balioarekin bat.

3. Edozein arrazoi dela medio, enpresa antolatzaileak ezin baditu jokalariek lortutako sariak ordaindu, berehala etenen du bere jarduera, eta ikuskapenaz eta kontrolaz arduratzen diren funtzionarioen presentzia eskatuko du, lokalean badaude, edo, bestela, akta eginen da, zeina Jokoa Arautzeko Agintaritzari jakinaraziko baitzaio.

70. artikulua. Kontrola eta itzulketak.

1. Enpresa baimenduek hilero jakinaraziko diote Nafarroako Ogasuneko organo eskudunari aurreko hilean 3.000 eurotik gorako saria jaso duten jokalarien edo parte-hartzaileen zerrenda, haien nortasuna adierazita (izen-abizenak eta identifikazio fiskaleko zenbakia), eta sarituei horren berri emanen diete saria eman aurretik.

2. Nafarroako Foru Komunitateko Administrazioko departamentu eskudunaren titularrak neurri zehatzak ezartzen ahalko ditu kobrantzen eta ordainketen segurtasuna bermatzeko, bai eta Nafarroako Ogasunari jakinarazi behar zaizkion sarien komunikazio-prozedura eta mugak eguneratzeko ere.

3. Partida, jokaldi edo zozketa bat behin betiko baliogabetzen bada, horren partaidetza aldez aurretik ordaindu denean, edo apustu bat bertan behera gelditzen bada, matxuragatik, deskonexioagatik edo foru dekretu honetan edo jokatzeko enpresaren antolaketaz eta funtzionamenduaz onetsitako arauetan jasotako beste edozein zirkunstantziagatik, zenbateko osoa itzuli beharko zaio erabiltzaileari, eta hark ez du inolako zenbatekorik kobratzeko eskubiderik izanen bertan behera uztean edo baliogabetzean izan zitzakeen sari espektatibengatik.

Baliogabetzea behin-behinekoa denean, joko edo modalitate bakoitzerako foru dekretu honetan xedatutakoaren arabera jokatuko da.

4. Jokoa baliogabetu zenetik hiru hilabeteko epea igaro eta erabiltzailea aurkitu ezin bada jokoan parte hartzeko ordaindutako zenbatekoa itzultzeko, zenbateko hori funts baten parte izatera pasatuko da, eta horren zenbatekoak Nafarroako Foru Ogasunaren esku utzi beharko dira.

Urte natural bakoitzaren amaieran, funts hori osatzen duten zenbateko galdagarriak likidatuko dira, eta ordainketa bakarrean sartuko dira Nafarroako Foru Ogasunaren Diruzaintzan.

71. artikulua. Eskupekoak.

1. Joko-enpresen edo horretarako gaitutako lokalen enpresa titularren zerbitzura dauden langileek ezin izanen dute eskupekorik eskatu edo onartu, ez banaka, ez beren onurarako.

2. Establezimenduko langileen artean banatuko dira bezeroek beren kabuz eta hala nahita ematen dituzten eskupeko edo haborokinak, aurreko apartatuan zehaztutako enpresarekin hitzartutako maiztasunez eta banaketa irizpideekin bat.

IX. KAPITULUA. ZEHAPEN ARAUBIDEA

72. artikulua. Arauhausteak eta zehapenak.

Foru dekretu honetan xedatutakoaren aurkako arau-hausteak zehatuko dira Jokoari buruzko abenduaren 14ko 16/2006 Foru Legean edo haren ordezko arauan ezarritakoari jarraituz.

II. TITULUA. NAFARROAKO JOKO ETA APUSTUEN KATALOGOA

I. KAPITULUA. EDUKIA ETA ANTOLAKETA

73. artikulua. Edukia.

1. Nafarroako Joko eta Apustuen Katalogoan sartuko dira abenduaren 14ko 16/2006 Foru Legean araututako ezaugarriak dituzten joko eta apustu guztiak, edozein direlarik ere haiek egiteko baliabideak, materialak eta arauak, baldin eta ausazko aukerak ematen badituzte, oinarri direnak jokalariek betebehar ekonomikoak beren gain hartzeko, zori eta ziurgabetasun elementuei esker.

2. Aurreko apartatuan aipatze diren erabilitako baliabideei dagokienez, Katalogoko joko eta apustuetan parte hartzeko bi modu daude: presentziala, hau da, jokalaria joko eta apustuen establezimendu edo lokaletan azalduta, edo ez-presentziala, baliabide informatiko eta telematikoak erabilita.

Enpresek aukera ematen ahalko diete erabiltzaileei apustuak sinadura elektronikoa edo, bidezkoa bada, erabiltzailearen nortasun pertsonala egiaztatzeko balio duten antzeko beste bitarteko batzuk erabiliz formalizatzeko, bat etorriz Konfiantzazko zerbitzu elektronikoen alderdi jakin batzuk arautzen dituen azaroaren 11ko 6/2020 Legean ezarrita dagoenarekin.

3. Katalogoan ez dira sartuko pertsonen eskubideei kalte egin diezaieketen jokoak eta apustuak, ez eta Jokoari buruzko abenduaren 14ko 16/2006 Foru Legean jokoa eta apustuak arautzeko jasotako printzipio orokorren aurka egin dezaketenak ere.

74. artikulua. Katalogoaren antolaketa.

1. Katalogoak, joko edo apustu bakoitzerako, honako datu hauek jasoko ditu gutxienez:

a) Jokoaren izena.

b) Haren deskribapena edo hura garatzeko funtsezko arauak.

c) Antolaketarako eta jardunbiderako murrizketak eta mugak, hala badagokio.

d) Modalitateak, hala badagokio.

2. Katalogoan II. titulu honetan zehaztutako jokoak eta modalitateak sartuko dira, ezertan galarazi gabe foru dekretu honen 2. artikuluko 3. apartatuan xedatutakoa.

75. artikulua. Debekatutako jokoak.

Jokoak eta apustuak debekatuta egonen dira baldin eta haien formulazioan edo xede dituzten gertakarien formulazioan eskubide eta askatasunak urratzen badira, bereziki jendearen duintasunaren aurkakoak badira (zehazki, emakumeen irudi sexualizatua erabiltzen bada erakargarri gisa), pertsonek ohorea, intimitate pertsonala eta nork bere irudia izateko duten eskubideen aurkakoak badira, gazteen eta haurren babesa edo desgaitasunak dituzten pertsonen babesa urratzen badira, adingabeek edo desgaitasun psikikoak edo buruko eritasun larriak dituzten pertsonek soilik parte hartzen duteneko gertakariei buruzkoak badira, eta delituak egitean, indarreko legediak debekatutako gertakarietan edo gertakari politiko edo erlijiosoetan oinarritutako jokoak eta apustuak badira.

II. KAPITULUA. APOSTUAK

LEHENBIZIKO ATALA. DEFINIZIOAK ETA MATERIALAK

76. artikulua. Definizioak.

Foru dekretu honen eta hura garatzen duten xedapenen ondorioetarako, bertan erabiltzen diren terminoek artikulu honetan ezartzen den zentzua izanen dute.

a) Apustua: ondasunak, eskubideak edo diru-kopuruak arriskuan jartzen dituen jarduera, kontuan izanda asmatzen den ala ez joko edo gertaera baten emaitzak iragartzean. Joko edo gertaera hori, amaiera zalantzazkoa edo ausazkoa, erreala edo birtualki ordezkatua izan daiteke, eta enpresa antolatzaileak zehaztuko du aldez aurretik.

b) Apustuaren txartela edo gordekina: edukitzailea apustularia dela egiaztatzen duen euskarri fisikoa edo elektronikoa. Apustuaren datuak eta apustuaren balioztapena agertzen ditu, apustua irabaziz gero dirua kobratzeko aurkez daiteke eta, bidezkoa bada, apustuaren gaineko erreklamazioak egiteko ere bai.

c) Apustuaren koefizientea edo momioa: kontra-ordaineko apustuetan, asmatzen dutenentzako sariaren zenbatekoa zehazten duen zenbakia, jokatutako diruaren biderkatzailea baita.

d) Komisioa edo artekaritza: joko-enpresa antolatzaileari dagokion ehunekoa, elkarrekiko apustuetan hasierako funtsaren gainean edo apustu gurutzatuetan irabazitako zenbatekoen gainean.

e) Apustu-artekaria: egiaztatzen duena, gertakaria egiten den barrutian lan eginda, komisionista gisa, benetakoak eta zehatzak direla egindako diruzko apustu gurutzatuak, gertakaria antolatzen duen enpresak baimenduta.

f) Apustuak kudeatzeko sistema edo gailu mugikor osagarriak: elementu birtualak, aukera ematen dutenak apustu-artekaria ordezteko, soilik lokalari dagokionez eta kirol-ekitaldia egiten den esparruan bertaratzen diren pertsonei dagokienez.

g) Dibidendua: elkarrekiko apustuetan, irabazle bakoitzari apustu-unitateko dagokion kopurua.

h) Apustuen ustiapena: apustuak egin eta merkaturatzeko kudeaketa eta kontroleko jarduerak egitea, eta sariak ordaintzea.

i) Hasierako funtsa: elkarrekiko apustuetan apustulariek egindako apustu guztien batura.

j) Banatzeko funtsa: elkarrekiko apustuetan, irabazten duten apustularien artean sariak banatzeko erabiliko den diru-kopurua, hasierako funtsari sarietarako portzentajea aplikatuz ateratzen dena.

k) Apustua formalizatzea: apustua egin, berretsi, ordaindu eta balioztatzea.

l) Apustuaren gutxieneko eta gehieneko zenbatekoak: apustu bakoitzeko eta apustu mota bakoitzeko formalizatu daitezkeen gutxieneko eta gehieneko kopuruak.

m) Apustu-makinak: apustuak formalizatzeko makinak. Bi motatakoak izan daitezke: apustuak saltzeko terminalak edo apustu-makina lagungarriak.

n) Apustuen antolaketa: apustuak ustiatzeko proiektua egin eta ezartzea, barnean sartuta apustuak merkaturatzeko establezimendu, lokal eta elementuak, apustuak egitean jarraitu behar diren arauak, bermeak eta sistemaren segurtasuna.

o) Apustuen unitate nagusia: erabiltzaileek egindako apustuak erregistratzeko, zenbatzeko eta kudeatzeko behar diren elementu teknikoen multzoa.

p) Apustua balioztatzea: erabiltzaileari egindako apustuaren txartela edo gordekina ematea edo bere esku uztea, hori baita enpresa baimendu batek apustua erregistratu eta onartu izanaren bermea.

77. artikulua. Apustuak egiteko materialak.

1. Apustuak merkaturatzeko erabiltzen diren txartelek eta sistema teknikoek foru dekretu honen eranskinean jasotako konfigurazioa, betekizunak eta ezaugarri tekniko eta funtzionalak izan beharko dituzte.

2. Apustu-makina lagungarrien ustiapen eta instalazioan foru dekretu honetan joko-makinei aplikatzeko jasotako zehaztapenei jarraituko zaie.

BIGARREN ATALA. GARAPENERAKO FUNTSEZKO ARAUAK

78. artikulua. Antolaketa.

1. Apustuak gaitutako joko-enpresek soilik antolatu eta merkaturatzen ahalko dituzte, bat etorriz foru dekretu honetan, hura garatzeko xedapenetan eta gaitutako enpresak antolamenduaz eta funtzionamenduaz ezarritako arauetan xedatutakoarekin.

2. Honako hau dagokio gaitutako joko-enpresari:

a) Apustu-koefizienteak edo momioak finkatzea.

b) Sarietarako ehunekoa edo komisio gisa atxiki beharreko ehunekoa edo kopurua aplikatzea, zer apustu modalitate dagokion.

c) Asmatutako apustu bakoitzeko sari gisa ordaindu beharreko zenbatekoa kalkulatzea.

d) Asmatutako apustuen zenbatekoa ordaintzea eta ezeztatutako apustuen zenbatekoa itzultzea.

3. Sariak Espainian legezkoa den diruzkoak izanen dira nahitaez.

79. artikulua. Apustuen antolaketa eta funtzionamenduko arauak.

1. Apustuen antolaketa eta funtzionamenduko arauetan, modu argi eta osoan bilduko dira, eta betiere foru dekretu honetan xedatuta dagoenari jarraituz, honako hauek: apustuak formalizatzean aplikatu beharreko arauak, ezarrita dauden kopuru-mugak, emaitzen baliozkotasuna, apustu saridunak, sarien banaketa eta ordainketa eta sariak kobratzeko eskubidearen iraungipena. Kasu guztietan bete beharko dira kontsumitzaileen babesari buruzko araudia eta kontratazioaren baldintza orokorrak.

2. Aplikatu aurretik, Jokoa Arautzeko Agintaritzak jakinarazi eta baliozkotu beharko ditu antolamenduari eta funtzionamenduari buruzko arauak eta horietan egiten diren aldaketak.

3. Dokumentu horrek data eta bertsioa zehaztu beharko ditu, argi eta garbi identifikatu ahal izateko zein den aplikatu beharrekoa une bakoitzean.

80. artikulua. Apustuak formalizatzea.

Apustuak honela formalizatzen ahalko dira:

a) Modu presentzialean, establezimenduetan, apustu guneetan eta lokal edo barruti baimenduetan kokatutako apustuak saltzeko terminalen eta apustu-makina lagungarrien bitartez.

b) Modu ez-presentzialean, urrutitik, elektronika erabiliz, formatu birtualean, bitarteko interaktiboen eta kanal telematikoen bitartez.

81. artikulua. Apustuak egitea.

1. Baimenduetako establezimendu, lokal eta barrutietako mostradore edo leihatiletan formalizatzen ahalko dira apustuak. Horretarako, apustuak saltzeko eta kontrolatzeko terminalak eta apustu-makina lagungarriak baliatzen ahalko dituzte erabiltzaileek zuzenean, bai eta, joko ez-presentzialerako, banatzeko kanaletan enpresak eskaintzen dituen zerbitzuak ere.

2. Apustuak baliozko eran formalizatuko dira erabiltzeko moduan baldin badaude apustuak saltzeko terminalak eta apustu-makina lagungarriak, edo, joko ez-presentzialean, horretarako gaitutako sistema teknikoak.

3. Ulertuko da apustu bat baliozko eran formalizatuta dagoela apustulariak hala egin izanaren txartela edo gordekina jasotzen duenean.

4. Apustua egin ez dela ulertuko da, betiere, behar bezala justifikaturiko ezinbesteko arrazoiengatik ezinezkoa bada apustua balioztatu eta, ondorioz, formalizatzea.

82. artikulua. Epez kanpo egindako apustuak.

1. Elkarrekiko apustuen kasuan, apustuak haien xede diren gertakariak hasi baino lehen formalizatu beharko dira beti, eta enpresa baimenduak ixteko adierazi duen unean apustu berriak balioztatzeko aukera automatikoki blokeatu beharko da terminaletan eta makina osagarrietan (edo sistema teknikoetan, joko ez-presentzialaren kasuan).

2. Kontra-ordaineko apustuak edo apustu gurutzatuak badira, terminalek eta makina lagungarriek (edo sistema teknikoek, joko ez-presentzialaren kasuan) apustuak formalizatzeko aukera blokeatu beharko dute, apustuen xede den gertaera amaitutakoan.

Akats tekniko edo giza akats baten ondorioz apustuak formalizatu badira apustuen xede den gertaera amaitu ondoren, honela jokatuko da:

a) Apustu bakunak, kontra-ordainekoak zein gurutzatuak izan, baliogabetu eginen dira.

b) Apustu anizkoitzetan, bazter utziko dira akatsek ukitutako pronostikoak.

c) Baliogabetze horien ondoriozko zenbatekoak itzuli beharko zaizkie apustulariei, hala eskatzen badute kobratzeko eskubidea iraungi baino lehen. Epe hori igarotakoan, zenbateko horiek funts baten parte izatera pasatuko dira, eta Nafarroako Foru Ogasunaren esku jarri beharko dira.

Urte natural bakoitzaren amaieran, funts hori osatzen duten zenbateko galdagarriak likidatuko dira, eta ordainketa bakarrean sartuko dira Nafarroako Foru Ogasunaren Diruzaintzan.

83. artikulua. Apustuen xedeko gertakariak atzeratu, bertan behera utzi edo deuseztatzeak egin diren apustuen gainean dituen eraginak.

1. Enpresak apustuen antolaketari eta funtzionamenduari buruzko arauetan arautu beharko du nola jokatuko den formalizatutako apustuekin, baldin eta apustuen formalizazioaren xede diren emaitzei dagozkien gertakariak atzeratu, bertan behera utzi edo deuseztatzen badira.

2. Nolanahi ere, gertakariaren emaitzak baliogabetzat hartuko dira baldin eta atzerapenak edo bertan behera uzteak antolaketari eta funtzionamenduari buruzko arau horietan gertakariaren emaitzen balioaren ondorioetarako ezarri den gehieneko epea gainditzen badute.

3. Halaber, gertakari bat deuseztatzen denean, haren emaitzak ere deusezak direla ulertuko da.

4. Apustu batean gertakari baten edo batzuen emaitza deusezei buruzko iragarpenak badaude, iragarpen horiek ere deusezak direla ulertuko da; horrenbestez, apustua aldatuko da, eta emaitza baliodunei buruzko iragarpenekin soilik formalizatuta dagoela ulertuko da. Emaitza deusezei buruz egindako iragarpenak apustutik baztertuko dira.

5. Apustu bateko iragarpen guztiak deusezak direla ulertuz gero, apustua deuseztatu eginen da.

6. Kontra-ordaineko apustu konbinatu edo anizkoitz batean iragarpen deusezak badaude, apustu horretatik ateratzen den koefizientea edo momioa kalkulatzeko, deuseztatutako iragarpen bakoitzari bat koefizientea aplikatuko zaio.

84. artikulua. Emaitzen baliozkotasuna.

1. 85. artikuluan ezarrita dagoena gorabehera, enpresa baimenduak era berean apustuen antolaketa eta funtzionamenduko arauetan ezarri beharko du zein baldintzatan joko den baliozkotzat apustuen xede diren gertakarien emaitza, baita zein arau aplikatzen ahal diren emaitza bat, hasieran baliozkotzat jo arren, gerora aldatzen bada.

2. Enpresa baimenduak baliozko emaitzak argitaratu beharko ditu, apustuetarako lokal eta guneetan nahiz apustuak egiteko erabilitako baliabide edo sistema elkarreragileen edo urrutiko komunikazioko baliabideen bitartez.

85. artikulua. Saritutako apustuak eta sarien banaketa.

1. Apustu batek saria lortu duela ulertuko da apustu horretako iragarpenak baliozkotzat jo den emaitzarekin bat datozenean, enpresa baimenduak ezarritako apustuen antolaketa eta funtzionamenduko arauen arabera.

2. Elkarrekiko apustuetan, sarietarako erabili beharreko funtsa banatzeko funtsaren %65 izanen da gutxienez, eta banaketarako honako arau hauei jarraituko zaie:

a) Apustu bakoitzeko dibidendua, sarietarako erabili beharreko funtsa apustu saridunen kopuruarekin zatitzearen ondoriozko kopurua izanen da. Apustu bakoitzeko edozein sari zehazteko egiten diren zatiketetan, zatidura bi hamarrenekin kalkulatuko da, eta goitik edo behetik biribildu beharko da, bidezkoa dena.

b) Gertakari jakin bati buruzko elkarrekiko apustu batean asmatzailerik egon ezean, sarietarako funtsa metatu eginen da geroko antzeko gertakari bati buruzko modalitate bereko apustu baten funtsean -enpresa baimenduak erabaki beharko du-, joko eta apustuen arloan eskuduna den Nafarroako Foru Komunitateko Administrazioko organoari jakinarazi ondoren.

3. Kontra-ordaineko apustuetan, apustu bakoitzeko saria kalkulatzeko, enpresa baimenduak aldez aurretik balioztatutako koefizientea jokatutako zenbatekoarekin biderkatuko da. Hala ere:

a) Apustu bateko iragarpenen xede den gertakariaren emaitzak bi iragarpen diferente edo gehiago asmatzaile gisa onartzeko aukera ematen duenean, eta horren ondorioz iragarpen horietako bakoitzari buruz egindako apustuak saridunak direnean, apustuaren koefizientea edo momioa aldatzen ahalko da enpresa baimenduak bere antolaketa eta funtzionamenduko arauetan ondorio horietarako ezarritako erregelei jarraituz.

b) Apustu bateko iragarpen bat edo gehiago deuseztatzen direnean, lortutako saria zehazteko aplikatzen ahal den koefizientea edo momioa 83. artikuluko 6. apartatuan ezarrita dagoenaren arabera kalkulatuko da.

4. Apustu gurutzatuetan, jokalari guztiek jokatutako kopurua izanen da saria. Enpresa baimenduak apustu galtzaileen zenbatekoen %5 atxiki dezake gehienez komisio gisa.

86. artikulua. Saritutako edo baliogabetutako apustuak ordaintzea.

1. Saritutako edo baliogabetutako apustuak foru dekretu honetan xedatutakoaren arabera ordainduko dira.

2. Aurrekoa gorabehera, erabiltzaileak inolako kosturik izan gabe eginen dira sarien kobrantzak eta itzulketak kirol-apustuen lokaletan, jokorako gaitutako gainerako lokaletan eta enpresa baimenduak izan ditzakeen beste leku batzuetan, behin dagokion txartela edo gordekin fisikoa nahiz birtuala egiaztatuta, sariak banatzeko eragiketak amaitu ondoren. Dena dela, jokalariak askatasunez aukera ditzake kobrantzarako beste alternatiba batzuk, komisioen ordainketa edo kudeaketa-gastuak eska ditzaketenak.

3. Joko-lokaletan instalatutako apustu-makina lagungarriek automatikoki ordaintzen ahalko dituzte sariak, beren kabuz edo kanpoko ordaintzaileen bidez, baimendutako apustu-enpresak ezarritako mugekin. Ostalaritzako establezimenduetan instalatutako makinetan, 100 eurotik gorakoak ez diren sariak soilik ordaintzen ahalko dira eskudirutan.

87. artikulua. Apustuaren txartelak edo gordekinak.

1. Era presentzialean formalizatutako apustuetan, joko-enpresak aukera ematen ahalko dio erabiltzaileari, apustua baliozkotzen den unean, apustuari dagokion ordezkagiria inprimatzeko, edo euskarri elektroniko edo txartel batean gordetzeko, gero inprimatu ahal izateko.

2. Saritutako txartelak baliogabetuta geratuko dira sarien zenbatekoa ordaindu ondoren.

3. Enpresa baimenduak gordekin saridunak, formatu fisikoan edo elektronikoan, gutxienez bi urtez eduki beharko ditu Nafarroako Foru Ogasunean joko eta apustuen arloan eskuduna den Nafarroako Foru Komunitateko Administrazioko organoaren eskura, hura egiaztatzeko, gorabeherak ebazteko eta zerga aitorpenetan ageri diren datuekin erkatzeko.

HIRUGARREN ATALA. MUGAK ETA PLANGINTZA NEURRIAK

88. artikulua. Apustuen zenbatekoen mugak.

1. Gaitutako joko-enpresek gutxieneko zenbateko bat ezartzen ahalko dute apustua egiteko antolaketari eta funtzionamenduari buruzko arauetan.

2. Apustu bakoitzaren zenbatekoa 100 euro izanen da gehienez elkarrekiko eta kontra-ordaineko apustuetarako, eta 600 euro, aldiz, apustu gurutzatuetarako.

89. artikulua. Apustuak egiteko baimendutako lekuak.

Apustuak merkaturatu eta egiten ahalko dira, soil-soilik, foru dekretu honetan ezarritako baldintzetan eta mugekin, gaitutako joko-lokaletan eta taberna, kafetegi, jatetxe, taberna berezi edo ikuskizun-kafetegi gisa katalogatutako ostalaritza-establezimenduetan.

90. artikulua. Plangintza neurriak.

1. Enpresa bakoitzari gehienez hamar lokal baimenduko zaizkio kirol-apustuak egiteko.

2. Enpresa bakoitzak 225 apustu-makina lagungarri izan ditzake, gehienez, ostalaritza-establezimenduetan.

LAUGARREN ATALA. MODALITATEAK

91. artikulua. Modalitateak.

1. Egindako apustuengatik edo jokatutako kopuruengatik lortutako diru-sarreren banaketa kontuan hartuta, apustuak kontra-ordainekoak, elkarrekikoak edo gurutzatuak izan daitezke:

a) Kontra-ordaineko apustuetan, apustulariak enpresa baimenduaren aurka jokatzen du eta apustuaren xede den gertakariko emaitzak asmatzen dituenaren saria kalkulatzeko, apustuaren zenbatekoari enpresa baimenduak aldez aurretik ezarritako koefiziente biderkatzailea aplikatzen zaio.

b) Elkarrekiko apustuetan, enpresa baimenduak hasierako funtsari komisio baimendu bat kentzen dio, eta gainerako zatia, banatzeko funtsa, apustuaren xede den gertakariko emaitzak asmatzen dituzten apustularien artean banatzen da.

c) Apustu gurutzatuetan, enpresa baimenduak bitartekari lanak egiten ditu eta beste batzuek haien artean jokatzen dituzten kopuruak bermatzen ditu, eta lan horren trukean dagokion komisio edo artekaritza baimendua atxikitzen du.

Apustu gurutzatuetan erabiltzaileek apustu-proposamenak egiten dituzte, hau da, egin behar diren gertakarien emaitzari buruzko iragarpenak. Proposamen horiek sistemaren bitartez argitaratzen dira, sistemaren beste erabiltzaile batzuek behin-behinean onartu ahal izan ditzaten.

2. Edukiaren arabera, apustuak bakunak eta konbinatuak edo anizkoitzak izan daitezke:

a) Apustu bakunean, apustulariak gertakari baten emaitza bakar baten alde egiten du.

b) Apustu konbinatu edo anizkoitzean, apustulariak gertakari baten edo batzuen emaitza biren edo gehiagoren alde egiten du.

3. Egiten diren tokiaren arabera apustuak barnekoak edo kanpokoak izan daitezke:

a) Apustuak haien oinarri diren gertakariak egiten diren esparruaren barnean egiten badira, barnekoak dira.

b) Aldiz, apustuak beraien oinarri diren jardueretarako barrutitik kanpo egiten badira, kanpokoak dira.

Halaber, apustu-barrutietan egiten diren apustuetako batzuk ere kanpokotzat hartuko dira, hain zuzen ere, beste barruti batean egiten diren jardueretan oinarritutako apustuak, bertan apustu-xede diren beste gertakari batzuk egiten badira ere, eta joko ez-presentzialaren modalitatean egiten diren apustuak ere bai.

BOSGARREN ATALA. APUSTU TRADIZIONALAK

92. artikulua. Antolaketa eta arau espezifikoak.

1. Apustu tradizionaltzat hartuko dira euskal pilota enpresek antolatzen eta ustiatzen dituztenak Nafarroako Foru Komunitateko pilotalekuetan jokatzen diren partidetan. Enpresa horiek apustu tradizionalak ustiatzeko gaitutako joko-enpresatzat hartuko dira.

2. Apustu tradizionalak honako betekizun hauen arabera garatuko dira:

a) Apustu guztiak gaitutako artekarien bitartez egin beharko dira.

Era berean, Jokoa Arautzeko Agintaritzak apustuak kudeatzeko sistema edo gailu mugikor osagarriak baimentzen ahalko ditu, baldin eta ezarritako baldintzak betetzen badituzte eta ekitaldia antolatu duen enpresak kudeatzen baditu.

b) Partida bakoitzean ezin da egon artekari bat baino gehiago lokalak baimendua duen gehieneko edukierako 100 pertsonako edo zatikiko, eta, guztira, 18 gehienez. Sari-finaletan eta txapelketetako partidetan, artekarien kopurua gehieneko edukieraren araberakoa baino %30 handiagoa izan daiteke, baina gehienez ere 18 egon daitezke.

c) Apustu gurutzatuak gertakarira bildutakoek soilik egin ditzakete, zuzenean eta lokalean bertan.

d) Apustu gurutzatu bakoitzaren gehieneko zenbatekoa 600 euro izanen da.

e) Ekitaldia antolatzen duen enpresak egiaztagiri birtualak, orriak edo txartelak emanen dizkie apustulariei, egindako apustuen frogagiritzat hartuko direnak, baimendutako artekarien bidez edo sistema edo gailu mugikor osagarrien bidez, foru dekretu honetan ezarritako moduan eta baldintzetan, eta enpresak artekariei emandako taloitegi ofizialaren matrizean erregistratuta geratuko dira.

f) Enpresa antolatzaileak apustu irabazleen zenbatekoen %16 atxiki dezake gehienez komisio gisa.

III. KAPITULUA. BINGOA

LEHENDABIZIKO ATALA. XEDAPEN OROKORRAK

93. artikulua. Deskribapena.

1. Bingo jokoa loteria bat da, hurrenez hurrengo partidetan jokatzen dena zenbaki multzo jakin batekin; jokalariek euskarri desberdinekin hartzen dute parte, bakoitzean goitik behera eta ezkerretik eskuinera laukitxo zenbakidunen edo irudikapen grafikoak dituzten laukitxoen kopuru bera dagoela. Jokalariei euskarri horiek salduta bildutako diruaz hornitzen dira partida bakoitzeko sari arruntak, sari bereziak osatzeko funtsak erreserba eta meta daitezkeen arren. Sariak eskuratzeko, haien planean aurretik ezarritako modelo edo figurak osatu behar dira erabakitzen den ordenan ausaz ateratzen diren zenbakiekin.

2. Zer mailatako zenbakietan oinarritzen den jokoa, zein den sarien plana, zein sistema, ekipo eta elementu erabiltzen diren jokoan edo zein establezimendutan egiten den, horren araberako modalitateak izanen ditu bingo jokoak.

94. artikulua. Parte hartzeko moduak.

Bingo jokoan era presentzialean parte hartu beharko da, eta jokoa egiten den lokaletara joan beharko du jokalariak.

95. artikulua. Antolaketa eta baimena.

1. Bingo jokoa gaitutako joko-enpresek soilik antolatu eta ustiatzen ahalko dute.

2. Bingo tradizionalaren joko modalitatea egiteko interesa duen enpresak ustiatzeko baimena eskatu beharko dio Jokoa Arautzeko Agintaritzari, eta eskaerarekin batera, modalitate horren antolaketari eta funtzionamenduari buruzko arauen proposamena aurkeztu beharko du. Arau horiek honako hauek jaso beharko dituzte, modu argi eta osoan eta foru dekretu honetan xedatutakoari lotuta: bingoaren formalizazioari aplikatu beharreko arau guztiak, kartoien prezioa, konbinazio irabazleak eta sarien plana, emaitzen baliozkotasuna, sariak balioztatzeko, banatzeko eta ordaintzeko sistema eta sariak kobratzeko eskubidearen iraungipena.

3. Jokoa Arautzeko Agintaritzak baimena ematen ahalko du lokal bakoitzean bingo jokoaren modalitate bat edo sarien plan bat egiteko, baldin eta lokal horrek modalitate bakoitza garatzeko eskatzen diren baldintzak eta funtzionaltasunak betetzen baditu.

4. Bingoan jokatzeko eta ondorengo partidak antolatzeko, modalitate bakoitzean jokoa arautzen duten arauak beteko dira.

Betiere, baimenaren ebazpenean, jokoaren araubidea, ezarritako sarien plana eta baimendutako materialen ezaugarriak adieraziko dira.

96. artikulua. Materialak.

1. Bingo jokoa antolatzeko, ustiatzeko eta praktikatzeko erabilitako materialek foru dekretu honen eranskinean jasotako konfigurazioa, betekizunak eta ezaugarri tekniko eta funtzionalak izan beharko dituzte.

2. Bingo jokoan aritzeko, baimendutako kartoi edo euskarri benetakoak edo birtualak beharko dira, prezioa edo balioa aurrealdean dutela, hau da, partidan zenbakiak ausaz atera ahala jokalariak edo sistemak haiekin bat egiten duten zenbakiak markatzeko dauden euskarriak.

3. Aurrekoa alde batera utzi gabe, bingoek terminal lagungarriak eduki ditzakete jokoa kudeatzeko, garatzeko eta kontrolatzeko sistemara konektatuta. Terminal horiek automatikoki jasoko dituzte partidaren datuak, eta jokalariek parte hartzeko euskarri gisa erabiltzen ahalko dituzte, ezar daitezkeen baldintzetan eta mugekin.

BIGARREN ATALA. ARAUAK, KONBINAZIO IRABAZLEAK ETA SARIAK

97. artikulua. Bingo jokoaren arauak.

Bingo jokoa antolatu eta eginen da honako hauetan xedatutakoari jarraituz: foru dekretu hau, hura garatzeko xedapenak eta gaitutako joko-enpresak modalitate bakoitzerako antolamenduari eta funtzionamenduari buruz ezarritako arauak, Jokoa Arautzeko Agintaritzak onetsitakoak.

98. artikulua. Sarietarako ehunekoa.

1. Saritan banatu beharreko diru kopurua eskuratzen diren diru-sarreren, hau da, saldutako kartoietako aurrealdeko balioen baturaren portzentaje bat izanen da, modalitate bakoitzerako zehaztuko dena.

2. Lokal jakin batean ezarritako bingo jokoaren modalitatea aldatzen bada, saritutako konbinazioak ordaintzeko kendutako eta erreserbatutako zenbatekoak, azken saiokoak barne, erabiltzen ahalko dira edo modalitate berriko sariak eratzeko, edo jokalariei emateko, aldaketa hori egin aurretik, sari berezien programa baten arabera. Programa horren aplikazioa ez da inola ere hilabete baino gehiago luzatuko, eta Jokoa Arautzeko Agintaritzak aldez aurretik onetsi beharko du.

3. Aurreko apartatuan aipatu diren proposamena eta sari berezien programa izan ezean, edo programa onetsi ez bada, aipatu diru kopuruak Nafarroako Ogasun Publikoaren Diruzaintzan sartuko dira, modalitatea ustiatzeari utzi ondoko 48 orduko epean, eta Foru Komunitatearentzat geratuko dira.

99. artikulua. Sarien plana eta konbinazio irabazleak.

1. Sariak Espainian legezkoa den diruzkoak izanen dira nahitaez.

2. Bingo-enpresek sarien plan bat proposatuko diote Jokoa Arautzeko Agintaritzari joko modalitate eta/edo lokal bakoitzerako. Plan horrek, gutxienez, zehaztapen hauek izanen ditu:

a) Irudi edo konbinazio irabazleen izena eta deskribapena.

b) Diru-sarreren zer ehuneko bideratuko den irudi edo konbinazio irabazleetarako.

c) Kasua bada, diru-sarreren zer ehuneko bideratuko den beharrezkoak diren gordailuak edo poltsa eratzera, sarietarako zenbateko finkoak hornitzeko eta ondoren ordaintzeko.

d) Zenbateko finkoko sari bakoitzaren zenbatekoa eta hura jasotzea ekartzen duten kasuak.

3. Jokoa Arautzeko Agintaritzak hilabeteko epean ebatzi beharko du baimena ematen duen edo ukatzen duen sarien eta konbinazio irabazleen plana ezartzeko.

4. Bingo-aretoaren enpresa titularrak une bakoitzean indarrean dagoen sarien planaren berri eman beharko die erabiltzaileei, eta aurreko sarien planaren aldean aldatutako alderdiak nabarmendu beharko ditu.

HIRUGARREN ATALA. MUGAK

100. artikulua. Kartoien prezioaren mugak.

1. Gaitutako joko-enpresek gutxieneko prezio bat ezartzen ahalko dute bingo-kartoientzat antolamenduari eta funtzionamenduari buruzko arauetan.

2. Bingo-kartoiaren gehieneko prezioa ez da 10 eurotik gorakoa izanen, kartoia fisikoa edo birtuala izan.

101. artikulua. Bingoan jokatzeko baimendutako lekuak.

Bingo jokoa foru dekretu honetan ezarritako baldintzetan eta mugekin bakarrik merkaturatu eta egiten ahalko da, bingo-lokaletan.

102. artikulua. Plangintza neurriak.

1. Bingo-lokal bakoitzean instalatutako terminal lagungarrien kopurua ez da izanen edukieraren ehuneko hogei baino handiagoa, eskura dauden jokalari-postuetan neurtuta.

2. Aldi berean, partida bakoitzean eta terminal bakoitzean hirurogei kartoirekin jokatzen ahal da, gehienez ere.

LAUGARREN ATALA. BINGO TRADIZIONALAREN MODALITATEA

103. artikulua. Modalitatearen deskribapena.

1. Bingo jokoa, haborokin anizkoitzeko modalitatean, loteria bat da, irudikapen grafikoekin edo 90 zenbakitan jokatzen dena, 1 zenbakitik hasita 90 zenbakira arte, biak barne. Jokalarien joko-tresna kartoiak edo euskarri fisikoak dira, bakoitzean desberdinak diren hamabost zenbaki ageri direla. Zenbakiak hiru lerro horizontaletan antolatuta daude, lerro bakoitzean bost zenbaki daudela, eta bederatzi zutabe bertikaletan; zutabe horietan hiru zenbaki, bi edo bat egon daitezke, baina zutabe bat inoiz ere ezin da egon zenbakirik gabe.

2. Jokoaren oinarria 1etik 90era (biak barne) doazen zenbakiak edo irudikapen grafikoak ausaz, banan-banan eta hurrenez hurren ateratzea da. Horri, foru dekretu honetan xedatuta dagoenaren ondorioetarako, aurrerantzean bolak ateratzea esanen zaio.

3. Sariak lortzen dira partida bakoitzean jokalari batek -edo batzuek aldi berean- bere kartoietan osatzen dituenean sariak lortzeko aldez aurretik ezarrita dauden konbinazioak, besteek baino lehenago eta, bidezkoa bada, bola ateratzeko ezartzen den hurrenkerari jarraituta. Horretarako, jokalariak edo sistemak kartoian markatuko ditu ausaz ateratzen diren eta kanta litezkeen zenbakiekin bat datozen zenbakiak.

104. artikulua. Dirusarreretatik sarietarako erabiltzen den portzentajea.

Bingo tradizionalaren modalitatean, diru-sarreretatik sarietarako erabiltzen den portzentajea, gutxienez ere, banatutako kartoi guztiak saltzeagatik lortutako diru-sarreren zenbatekoaren %65 izanen da.

105. artikulua. Konbinazio irabazleak.

1. Bingo tradizionalaren modalitatean aritzeko gaitutako joko-lokal guztiek lerroko eta bingoko sariak lortzeko aukera eman beharko diete jokalariei. Gainerako joko modalitateak eta konbinazio irabazleak aukerakoak izanen dira, baldin eta berariaz baimenduta badaude.

2. Lerroa. Ulertuko da lerro bat osatu dela kartoi batek dituen hiru lerroetako bat -goikoa, erdikoa edo behekoa, edozein- egiten duten bost zenbakiak edo irudikapen grafikoak betetzen direnean.

3. Bingoa. Ulertuko da bingoa osatu dela kartoi batek dituen zenbaki edo irudikapen grafiko guztiak betetzen direnean.

4. Beste konbinazio irabazle batzuk. Aukerakoak izanen dira, eta baimenean ezarritakoari jarraituz arautuko dira, sarien eta konbinazio irabazleen planean ezarritakoaren arabera.

106. artikulua. Sariak lortu eta ordaintzea.

1. Partida bakoitzean sariak lortzen dira jokalari batek, edo batzuek aldi berean, beren kartoi edo euskarriak osatzen dituztenean, besteek baino lehenago eta enpresak ezarritako arauen arabera, sariak lortzeko aurrez ezarritako konbinazio edo figurak betez.

2. Sari bat lortuz gero, horren berri eman beharko dio erabiltzaileak enpresari, antolamenduari eta funtzionamenduari buruz indarra duten arauetan xedatutakoari jarraituz.

3. Konbinazio irabazle bat baino gehiago agertzen badira, sariak zati berdinetan proportzionalki banatuko dira.

4. Sariak esleitu ondoren ez da onartuko saririk erreklamatzea.

5. Sariak foru dekretu honen 68. eta 69. artikuluetan xedatutakoaren arabera ordainduko dira.

6. Nolanahi ere, jokalariei inolako kosturik ezarri gabe ordaindu beharko zaizkie sariak establezimenduan bertan eta sariak lortu diren saio berean, behin parte hartzeko kartoiak edo euskarriak egiaztatuta. Kartoi edo euskarri horiek osorik aurkeztu beharko dira, nahasterik eragin dezakeen manipulaziorik gabe.

107. artikulua. Jokalarien partehartzea.

1. Bingo tradizionalaren modalitatean parte hartu nahi dutenek aldez aurretik erosi beharko dituzte parte hartzeko kartoiak edo euskarriak, eta partida amaitzean itzuli beharko dituzte.

2. Jokalariak partidan zehar atzera egiten badu, ez zaio itzuliko erosi dituen kartoien zenbatekoa, baina beste jokalari bati ematen ahalko dizkio kartoiak.

108. artikulua. Kartoiak erosi eta saltzea.

1. Kartoiak saltzen hasi aurretik, honako hauek iragarriko dira: erabiliko den seriea edo serieak, serie horiek osatzen dituzten kartoi kopurua eta kartoien aurrealdean ageri den balioa.

2. Kartoiak hurrenez hurren salduko dira serieetako bakoitzaren barnean. Partida bakoitzean, modu hauetako edozeinetan hasiko da salmenta:

a) Serieko lehenengo zenbakiarekin, seriea hastean.

b) Aurreko partidetan saldu den azken zenbakiaren hurrengoarekin, jada hasitako serieak erabiltzen direnean.

3. Salgai dagoen serieko kartoien kopurua erabiltzaileen eskaria betetzeko nahikoa ez bada, partida bererako bigarren serie bateko kartoiak ateratzen ahalko dira, baldin eta honako baldintza hauek betetzen badira:

a) Serie berriko kartoiek lehenengo seriekoen balio berbera izan beharko dute aurrealdean.

b) Lehen serieko zein kartoirekin hasten den salmenta, haren aurreko zenbakira arteko kartoiak saltzen ahalko dira bigarren serietik. Modu horretan, partida berean ezin izanen dira bi kartoi berdin saldu.

4. Erabiltzaileek kartoiak eskudirutan ordaindu beharko dituzte, eta debekatuta egonen da kartoiak kontura entregatzea edo txekeen edo bestelako ordainbideen bitartez ordaintzea, baita erabiltzaileentzako kreditu-eragiketak egitea ere.

5. Salmenta amaitutakoan, partida hasi baino lehen, soberan egon diren kartoiak jasoko dira eta, kalkulu egokiak egin ondoren, saldu direnak iragarriko dira, baita partidan lor daitezkeen sarien zenbatekoa ere.

109. artikulua. Partidaren hasiera eta garapena.

1. Kartoien salmenta amaitu ondoren, jokalariei jakinaraziko zaie zenbat kartoi saldu diren guztira eta zer zenbateko izanen duten sariek. Jarraian, partidaren hasiera iragarriko da.

2. Partida hasi eta zenbakiak ausaz atera edo zehaztuko dira, eta jokalariei jakinaraziko zaizkie.

3. Jokalari batek lerroaren edo bingoaren konbinazio irabazlea ozenki jakinarazten duenean jokoa etenen da. Horren ondoan, zenbakia oinarri hartuta, eta euskarri informatiko baten bitartez, ustez sarituta dagoen kartoia egiaztatuko da eta egokia izanez gero saria esleituko zaio; eragiketa hori errepikatu eginen da jokaldi berean iragartzen diren kartoi guztiekin. Iragarritako kartoiak egiaztatzean ikusten bada horiek guztiak gaizki edo zehatza ez den modu batean markatu direla, jokoa berriro hasiko da irabazle gehiago ateratzen diren arte.

4. Lerro bat zuzena denean, jokoak jarraituko du bingoaren konbinazio irabazlea iragartzen den arte, eta bingoa egon dela egiaztatzen bada, partida amaitutzat emanen da, eta sarien zenbatekoa ordainduko da.

5. Bingoaren konbinazioa iragarri eta saritutako kartoi guztiak egiaztatu ondoren, konbinazio irabazle gehiagorik dagoen galdetuko da, eta zuhurtziazko denbora bat igarotzen utziko da partida berriro hasteko edo amaitutzat emateko agindua -bidezkoa dena- eman arte. Hala egiten denean, jokaldi horretan saria erreklamatzeko eskubide guztiak galdu eginen dira.

6. Sariak esleitu ondoren ez da onartuko saririk erreklamatzea.

7. Konbinazio irabazle bat baino gehiago lerro nahiz bingo gisa agertuz gero, sariak zati berdinetan banatuko dira modu proportzionalean.

110. artikulua. Partida amaitzea eta kartoiak biltzea.

1. Partida amaituko da jokalari batek edo gehiagok kartoi batean edo gehiagotan dauden zenbaki guztiak betetzen dituztenean, edo sariak ordaintzeko eskubidea ematen duten konbinazio irabazle guztiak egin direnean.

2. Partida amaitutakoan, erabilitako kartoiak bildu beharko dira, eta hurrengo partida ez da hasiko aurreko partidan erabili direnak bildu arte.

3. Partida bakoitza amaitu ondoren biltzen diren kartoiak hurrengo partidetan erabiltzeko baliogabetuta geratuko dira.

4. Saritutako kartoiak saioaren aktarekin batera gordeko dira hiru hilabetean, salbu jokalari batek jarritako erreklamazio administratiboaren edo judizialaren mendean dagoen partida bati badagozkio. Hala izanez gero, erreklamazio horri buruzko ebazpen irmoa egon eta ebazpen horretan xedatuta dagoena bete dela egiaztatu arte gordeko dira.

5. Halaber, partidak jokatzean delitu edo arau-hauste egin deneko arrazoizko zantzuak agertuz gero, salatutako gertakarien froga izan daitezkeen kartoiak gorde beharko dira. Kartoi horiek dagokion atestatuari erantsi beharko zaizkio, eta partidaren aktaren kopia batekin batera, agintari eskudunen eskura jarri beharko dira.

111. artikulua. Gorabeherak.

1. Partida bat hasi baino lehen edo, partida jokatzen ari dela, lehenengo bola atera baino lehen, gailu, ekipamendu eta instalazioetan akatsak edo matxurak gertatzen badira edo jokatzen jarraitzea eragozten duen zerbait gertatzen bada, partida behin-behinean eten eginen da, eta zuhurtziazko epe batean gertatutako arazoa konpondu ezin bada, jokalariei kartoien kostuaren zenbatekoa osorik itzuliko zaie, eta kartoiak enpresari itzuli beharko zaizkio.

2. Jokatzen jarraitzea eragozten duen gertakaria bolak ateratzen hasi ondoren eta sariren bat eman baino lehen gertatu bada, aurreko apartatuan azaldu bezala jardungo da. Aldiz, gertakari hori sortzen denerako sariren bat esleitu bada, partida behin-behinean eten eginen da, eta zuhurtziazko epe batean gertatutako arazoa konpondu ezin bada, partida jokatzen jarraituko da amaitu arte, baita eskuzko prozedurak erabiliz ere, horrela jokoaren ausazkotasuna eta garbitasuna bermatzen bada. Hori gorabehera, gertatutako arazoa edo bolak ateratzeko matxuratutako sistema edo mekanismoa konpondu ondoren, jokoa berriro hasten ahalko da berehala, partida berri bat eginez.

3. Partidak egiaztatu eta artxibatzeko sistemaren funtzionamendua eragozten duten matxura edo gertakariak egonez gero, jokoa eten eginen da eta akten liburuan dagokion eginbidea eskuz eginen da, matxura zein partidatan eta ordutan gertatu den adierazita. Saioa arrazoi horregatik eten edo amaituz gero, jokoa ez da berriro hasiko matxura edo akatsa duten elementuak konpontzen edo ordezten ez diren arte.

4. Partida bat jokatzen ari dela, zenbakiak esatean akatsen bat egiten bada, benetan atera edo zehaztu den zenbakiarekin bat ez datorren zenbaki bat iragartzean, atera den bolan edo sisteman ageri denak balio izanen du. Akats hori zuzendu beharko da, eta partida jokatzen jarraituko da gorabeheraren eginbidea akten liburuan jaso ondoren. Gauza bera eginen da monitore, pantaila edo paneletan zenbakiak erakustean akats edo hutsegiteak gertatzen badira.

IV. KAPITULUA. TXARTELAK

112. artikulua. Jokoaren deskribapena.

Txartel-jokoa joko modalitate bat da, non erabiltzaileek parte hartzen baitute eskudiruzko sarien zozketan, eta horretarako, lortutako sariaren zenbatekoa edo sinbolo edo konbinazio irabazleak ezkutuan gordetzen dituzten txartel fisikoak erosten dituzte baimendutako lekuetan.

113. artikulua. Parte hartzeko moduak.

Txartel-jokoan txartelak saltzeko baimendutako lokaletan erosten ahalko dira, modu presentzialean.

114. artikulua. Antolaketa.

1. Txartel-jokoa gaitutako joko-enpresek soilik antolatu eta ustiatzen ahalko dute.

2. Gaitutako enpresek proposamen bat aurkeztu beharko dute jokoaren antolamendua eta funtzionamendua arautzeko, Jokoa Arautzeko Agintaritzan, argi eta osorik eta foru dekretu honetan xedatutakoari lotuta:

a) Formalizazioan aplikatu beharreko arauen multzoa.

b) Txartela eskuratzearen prezio unitarioa.

c) Sarien plana; bertan, sarien zenbatekoak eta, hala badagokio, konbinazio irabazleak jasoko dira, bai eta serieen araberako banaketa ere.

d) Jaulki beharreko txartelen seriea edo serieak eta horiek osatzen dituzten unitateen kopurua.

e) Enpresak sariak ordaintzeko gaitutako tokiak.

f) Sariak kobratzeko eskubidearen iraungitze-data.

3. Enpresa baimenduek, halaber, txartelak saltzeko lokalen zerrenda bat aurkeztuko diote Jokoa Arautzeko Agintaritzari.

115. artikulua. Elementu materialak.

Txartela euskarri fisiko bat izanen da, bortxaezintasun-baldintza batzuk bete beharko dituena, txartela manipulatzea edo iruzurrez irakurtzea eragozteko; halaber, ezaugarri hauek izan beharko ditu:

a) Zenbaki edo sinbolo batzuk inprimatuta izatea, ezkutatuta daudenak erabiltzailearentzat eta banatzaileentzat, ireki edo arraspatze fisikoa egin arte.

b) Balidazio-kode bakarra eta errepikaezina izatea lote bakoitza osatzen duten txarteletan. Era berean, txartel bakoitza banaka identifikatu ahal izateko moduan seriatuta egon beharko dute.

c) Beharrezko jarraibideak izatea, txartel fisikoa irekitzeko edo arraspatzeko, edo beste edozein eragiketa egiteko, bide ematen duena sariak edo aurrez zehaztutako konbinazio edo sinboloak aztertu eta egiaztatzeko.

d) Txartelaren prezioa finkatuta edukitzea.

116. artikulua. Dirusarreretatik sarietarako erabiltzen den portzentajea.

1. Sariak Espainian legezkoa den diruzkoak izanen dira nahitaez.

2. Jokoaren modalitate presentzialean, diru-sarreretatik sarietarako erabiltzen den portzentajea, gutxienez ere, txartel guztiak saltzeagatik lortutako diru-sarreren zenbatekoaren %70 izanen da.

117. artikulua. Sariak ordaintzea eta iraungitzea.

1. Sariak foru dekretu honen 68. eta 69. artikuluetan xedatutakoaren arabera ordainduko dira.

2. Nolanahi ere, sariak kobratzean, erabiltzaileari ez zaio inolako kosturik ezarriko enpresak eskainitako lekuetan, ezertan galarazi gabe kobratzeko beste leku batzuk egon ahal izatea jokalariaren hauturako, komisioak edo kudeaketa-gastuak izan ditzaketenak.

118. artikulua. Modalitateak.

Sariak lortzeko moduari dagokionez, txartel-jokoak hiru modalitate ditu:

a) Zuzeneko saria duen txartela. Modalitate horretan, saritutako txartelak sariaren zenbatekoa ezkutuan gordetzen eta mantentzen du.

b) Sari geroratua duen txartela. Modalitate horretan, txartelak ikur edo sinbolo-multzo ezkutuak gordetzen ditu, zeinek, bere kabuz, metatuta edo konbinazioetan, sariak ekarriko baitituzte.

c) Sari mistoa duen txartela. Modalitate horretan, aurreko biak konbinatzen dira.

119. artikulua. Jokoaren arauak.

1. Jokalariak txartela eskuratu ondoren, bertan jasotako jarraibideen arabera egiaztatuko da saria dagoen ala ez.

2. Txartelean bertan agertzen ez bada, saltzeko baimendutako tokietan jendeari jakinarazi beharko zaio zein den txartelaren prezio unitarioa eta sarien plana, nola banatzen diren txartelak serieen arabera, zenbat txartel dituen serie bakoitzak, zer leku gaitu duen enpresak sariak ordaintzeko eta noiz iraungitzen den sariak kobratzeko eskubidea.

120. artikulua. Mugak eta debekuak.

1. Gaitutako joko-enpresek gutxieneko zenbateko bat ezartzen ahalko dute txartelaren preziorako antolaketari eta funtzionamenduari buruzko arauetan.

2. Sariaren gehieneko zenbatekoa ez da 1.000 eurotik gorakoa izanen.

3. Debekatuta dago 18 urtetik beherakoei txartelak saltzea.

121. artikulua. Txartelak saltzeko baimendutako lekuak.

Gaitutako joko- eta apustu-lokaletan baino ezin dira saldu txartelak, foru dekretu honetan ezarritako baldintzetan eta mugekin.

V. KAPITULUA. LOTERIAK

LEHENBIZIKO ATALA. DESKRIBAPENA, ANTOLAKETA ETA PARTE-HARTZEA

122. artikulua. Deskribapena.

Loteria zozketa batean oinarritzen den jokoa da, non zenbaki jakin bat edo gehiago ausaz atera edo zehazten baitira. Zenbaki horiekin guztiekin edo batzuekin bat datorren numerazioa duen billeteen jabeek diruzko sari bat jasotzen dute, aurretik onetsitako sarien plan baten arabera. Zozketaren egunarekin batera jokoaren esku-orrietan eta billete edo txarteletan aditzera eman beharko da plan hori.

123. artikulua. Antolaketa.

Nafarroako Foru Komunitateko lurraldean egiten diren loterien jokoa antolatzea Nafarroako Gobernuari dagokio. Nafarroako Foru Komunitateko Administrazioari lotutako edo haren mendeko zuzenbide pribatuko entitate baten bidez soilik kudeatu eta ustiatzen ahalko da, eta sozietate publikoaren forma izanen du. Loteria merkaturatzean izaera sozialeko entitateek parte hartzen ahalko dute.

124. artikulua. Parte hartzeko moduak.

1. Loteria-jokoak modu presentzialean egiten ahalko dira, txartelen salmenta fisikoaren bidez, edo modu ez-presentzialean, urrutitik, elektronika erabiliz, formatu birtualean, bitarteko interaktiboen eta kanal telematikoen bidez.

2. Txartel fisikoak jendearentzat irekitako edozein establezimenduren barruan edo haren sarbideetan saltzen ahalko dira.

125. artikulua. Elementu materialak.

1. Loteria-jokoetan aritzeko erabil litezkeen joko-sistema teknikoek foru dekretu honen eranskinean jasotako konfigurazioa, betekizunak eta ezaugarri tekniko eta funtzionalak izan beharko dituzte.

2. Billeteek dagokien loteria-jokoaren modalitatearen funtsezko ezaugarriak izan beharko dituzte, eta, bereziki, honako informazio hau eman beharko dute:

a) Modalitatearen izena eta, egokia bada, joko horren izena.

b) Billeteari dagozkion zenbakiak, eskainitako modalitatearen arabera.

c) Haien prezio unitarioa.

d) Zozketaren eguna.

e) Kontrol-zenbaki esklusibo bat, banakako identifikazioa ahalbidetzen duena.

f) Baliozkotzeko zenbakiak edo ikurrak, edo enpresa kudeatzaileak ezarri nahi dituen beste edozein baliabide.

g) Irabazi beharreko sarien zerrenda eta horiek esleitzeko modua.

Jokoaren arauen laburpena ere izan daiteke txartelaren edukiaren parte. Salmenta-puntuan jendearen eskura egon behar dute nahitaez.

3. Loterian jokatzen bada aurreikusitako edozein bitarteko edo euskarriren bidez sistema informatikoak edo telematikoak erabiliz, billete baten irudi birtual bat eskaini beharko da, aurreko apartatuan zerrendatutako informazioa erreproduzituta.

126. artikulua. Billete baliogabeak.

Honelakoetan joko da billete bat baliogabetzat:

a) Irakurtezina bada, edo aldatuta, gaizki moztuta, gaizki inprimatuta, osatu gabe, faltsututa edo oker produzituta badago.

b) Hondatuta egoteagatik ezinezkoa bada identifikazio formala egitea edo dauzkan zenbakiak egiaztatzea.

c) Erakunde kudeatzaileak duen identifikazio, baliozkotze edo kontrol kodea edo prozedura ez badator bat aurkeztutako txartelekoarekin.

d) Bat ez badator erakunde kudeatzaileak ezarritako eta indarrean dauden erregelamendu, arau eta prozedurekin.

e) Erregistratuta ez badago erakunde kudeatzailearen sistema informatiko nagusian zozketa hasi aurretik.

f) Erakunde kudeatzaileak baliogabetu duen zozketa bati badagokio.

BIGARREN ATALA. ZOZKETAK ETA SARIAK

127. artikulua. Zozketen data.

Modalitate jakin bati dagokion zozketa eginen da erakunde kudeatzaileak aldez aurretik izendatu eta iragarritako egunean eta tokian. Zozketa publikoa izanen da, eta erakunde kudeatzaileak zehazten dituen pertsonak egonen dira bertan.

128. artikulua. Zozketen emaitzak.

1. Zozketa jakin baten emaitzak berehala jasoko dira zerrenda ofizial batean, erakunde kudeatzaileak egiaztatuta. Zerrenda ofizial horrek baino ez du emanen zozketaren emaitzen fede ondorio guztietarako.

2. Urtean zehar eginen diren zozketetako emaitzak erakunde kudeatzailearen zerrenda ofizial batean jasoko dira, zeinak mekanismo egokiak ezarriko baititu zozketa horien publizitatea bermatzeko.

3. Erakunde kudeatzaileak publizitaterako erabiltzen ahalko du zozketen emaitzetako informazioa, bai eta edozein sariren irabazleek beren borondatez eskainitakoa ere. Irabazle horiek ezin izanen dute inolako zabalkunde, irudi, inprimaketa edo publizitate eskubiderik eskatu arlo horretan.

129. artikulua. Zenbaki eta konbinazio irabazleak zehaztea.

Zenbaki eta konbinazio irabazleak zehazteko, loteria-ontzi bat edo batzuk erabiliko dira, edo zenbakiak, sinboloak edo irudikapenak ausaz ateratzeko mekanismo bat, edo ausazko zenbakiak sor ditzakeen sistema informatiko bat, edo kasuan kasuko joko espezifikoari dagozkion zenbaki guztien artean irabazleak zehazten dituen beste edozein sistema.

130. artikulua. Sarien plana.

1. Sariak Espainian legezkoa den diruzkoak izanen dira nahitaez.

2. Loteria-jokoak kudeatzen dituen erakundeak zozketa bakoitzerako sarien plana onetsiko du, zeina jakinarazi beharko baita, kasu guztietan, zozketa bakoitzari dagozkion txartelak saltzen hasi aurretik.

3. Sarien planak, gutxienez, informazio hau jaso beharko du:

a) Zozketa egiteko eguna, tokia eta ordua.

b) Billetearen prezio unitarioa eta jaulkitako billeteen kopurua.

c) Zenbaki eta konbinazio irabazleak eta sariak.

d) Sariak esleitzeko modua eta tokiak.

e) Sariak kobratzeko iraungitze-epea.

f) Dagokion loteria-jokoaren modalitate zehatzaren erreferentzia.

4. Saririk handiena lortzeagatik izanen da irabazlea billetea, joko bakoitzaren modalitate espezifikoak zehazten duena ukatu gabe. Sari bakoitza ezin da behin baino gehiagotan ordaindu. Sari jakin bat irabazle bati baino gehiagori ofizialki esleituz gero, saria hainbanatuko da esleipendunen artean.

5. Ezarritako epean erreklamatu ez diren sarien zenbatekoa Nafarroako Foru Ogasunaren esku utziko da.

HIRUGARREN ATALA. BERMEAK, ERANTZUKIZUNAK ETA MUGAK

131. artikulua. Bermeak eta erantzukizunak.

1. Erakunde kudeatzaileak bermatuko du zuzenean loteria-jokoen sarien ordainketa.

2. Billete irabazle bati dagokion saria ordainduko da, soilik, billetea iraungitze-epearen barruan aurkezten bada kobratzeko.

3. Entitate kudeatzaileak ez du inolako erantzukizunik eta betebeharrik izanen billete irabazlea duen pertsonarekin, dagokion saria ordaindu ondoren edo iraungi ondoren erreklamaziorik aurkeztu gabe horretarako ezarritako epean.

4. Erreklamazio bat egiten bada baliozko billete irabazle batean oinarrituta, erakunde kudeatzailearen erantzukizuna mugatuko da billete horrengatik irabazten den sariaren zenbatekoa ordaintzera, eta, baliogabetzen bada, billetea eskuratzeagatik ordaindutako zenbatekoa ordaintzera, hargatik eragotzi gabe egintza zibilak edo penalak, horretarako biderik balego.

132. artikulua. Mugak.

1. Inork ezin du agente saltzaile gisa jardun erakunde kudeatzailearen baimenik gabe.

2. Billete bat ezin zaio saldu erabiltzaileari edo azken kontsumitzaileari haren prezio nominalaz bestelako prezio batean.

3. Debekatuta dago 18 urtetik beherakoei billeteak saltzea.

4. Debekatuta dago, halaber, loteriako billeteak jendeari saltzea leku hauetan: irakaskuntza arautua adingabeei ematen dieten ikastetxe publiko edo pribatuetan, jokalari patologikoen errehabilitaziorako zentro ofizialetan, desgaitasun intelektuala edo gaixotasun mentala duten pertsonen egoitza-zentroetan, osasun-, kirol-, kultura- eta jolas-zentroetan eta gazteen etxeetan.

VI. KAPITULUA. JOKO-MAKINAK

LEHENBIZIKO ATALA. DESKRIBAPENA, ANTOLAKETA ETA JOKOAN PARTE HARTZEKO MODUAK

133. artikulua. Deskribapena.

1. Honako hauek hartzen dira joko-makinatzat: erregelamenduz ezarritako ezaugarri eta mugak betez, partidaren prezioaren truke, makina erabili eta, jokoaren programaren edo ausazko sistema baten bidez, sari bat jasotzeko aukera ematen duten mekanismo eta gailuak, eskuzkoak edo automatikoak.

2. Joko-makinatzat hartuko dira, orobat, joko, apustu, enbite edo zorizko osagairen bat izateagatik halakotzat jotzen direnak, betiere hurrengo apartatuan aipatzen diren salbuespenetan sartuta ez badaude.

3. Joko-makinek ezin izanen dute haurren eta gazteen prestakuntza kaltetu dezakeen irudirik, mezurik edo objekturik izan, ez eta zuzenean edo zeharka Espainiako Konstituzioak eta gainerako ordenamendu juridikoak aitortutako oinarrizko eskubideak urratzen dituenik eta elementu xenofoborik, sexistarik, pornografikorik duenik edo indarkeriaren apologia egiten duenik ere.

4. Foru dekretu honen aplikazio-eremutik kanpo daude, batetik, salmenta makinak, baldin eta erosleak aurretik aukeratzen dituen produktuak, salgaiak edo beste zerbitzu jakin batzuk mekanikoki trukatu edo saldu besterik egiten ez badute, jarritako diruak bat egiten badu makinan bertan produktu horietarako adierazten den prezioarekin eta produktua zuzenean ateratzen bada, inolako baldintzaren, aposturen, ausazko konbinazioren edo zorizko jokoren pean egon gabe, eta bestetik, josteta hutseko makinak, ez badute inolako saririk ematen, ez zuzenean, ez zeharka, erabiltzeko denbora errepikatzeko aukeraz gainera.

Era berean, kanpoan geratzen dira gauzazko saria duten joko-makinak, garabi izenekoak, baldin eta gehieneko saria bi eurotik beherakoa bada. Makina horiek jolas-makinatzat hartuko dira, eta, beraz, ekainaren 5eko 37/2013 Foru Dekretuaren 2. artikuluan ezarritako araubide juridikoa aplikatuko zaie (foru dekretu horren bidez zenbait neurri hartu ziren ikuskizun publikoen eta josteta jardueren arloan Barne Merkatuko Zerbitzuei buruzko 2006/123/EE Zuzentarauaren transposizioa egiteko. Zuzentarau hori Europako Parlamentuak eta Kontseiluak eman zuten, 2006ko abenduaren 12an).

134. artikulua. Antolaketa eta parte hartzeko moduak.

1. Joko-makinen bidezko jokoa gaitutako joko-enpresek soilik antolatu eta ustiatzen ahalko dute.

2. Joko-makinen bidezko jokoan modu presentzialean parte hartuko da, makina horiek instalatuta dauden lokaletara joanen baita jokalaria.

BIGARREN ATALA. MODALITATEAK

135. artikulua. Sailkapena.

Araubide juridikoaren ondorioetarako, joko-makinak talde hauetan sailkatzen dira:

a) Gauzazko saria duten joko-makinak, edo A motakoak.

Partidaren prezioaren truke eta jokalariaren mainaren edo trebetasunaren arabera, erabiltzeko edo jokatzeko denbora bat ematen diote jokalariari eta, batzuetan, gauzazko sari bat, dela zuzenean, dela baleak, bonuak edo antzekoak metatu ondoren trukea eginez.

b) Sari programatua duten joko-makinak edo B motakoak.

Jolas-alderdia nagusi izanik, erregelamendu bidez ezarritako ezaugarri eta mugen arabera eta partidaren prezioaren truke, erabiltzeko edo jokatzeko denbora bat ematen diote jokalariari eta, joko-programaren arabera, baita diruzko sari bat ere. Sari horren balioa ezin izanen da handiagoa izan erregelamendu bidez ezarritako muga baino.

c) Beste joko modalitate batzuen makina lagungarriak.

Makina hauek, eskuzkoak edo automatikoak izan, erregelamenduz ezarritako ezaugarrien eta mugen arabera eta prezio edo apustu baten truke, erabiltzaileari aukera ematen diote beste joko modalitate batzuetan zuzenean edo zeharka parte hartzeko, betiere joko-enpresa bati haiek ustiatzeko baimena eman bazaio aldez aurretik.

136. artikulua. Sari programatua duten jokomakinak edo B motakoak.

Programatutako saria duten joko-makinak edo B motakoak honela sailkatzen dira:

a) BR motako joko-makinak.

Oinarrizko joko-makinak dira, jokalari bakar batentzakoak, eta jolas alderdia nagusitzen da apustuaren zenbatekoaren gainetik. Makina horiek joko-lokaletan eta gaitutako ostalaritza-establezimenduetan instalatzen ahalko dira.

b) BS motako joko-makinak.

Joko-makina bereziak dira, jokalari bakar batentzakoak, eta aurreko apartatuan aipatutakoak baino balio handiagoko sariak eman ditzakete. Izaera berezia dutela argi eta garbi adierazi beharko da haien aurreko taulan, eta joko-lokaletan soilik instalatzen ahalko dira.

c) BG motako joko-makinak.

Bingo jokoan oinarritutako joko-makina bereziak.

d) BM motako joko-makinak.

BR, BS edo BG motako joko-makinak dira, joko-postu bat baino gehiago dutenak eta aukera ematen dutenak bi jokalarik edo gehiagok bereiz edo batera parte hartzeko. Makina horiek joko-lokaletan soilik instalatzen ahalko dira, eta postu bakoitzean joko-konfigurazio desberdinak izaten ahalko dituzte, baina altzari bakarra osatu beharko dute eta gutxienez joko komun bat eduki beharko dute.

e) BMB motako joko-makinak.

BM makinak dira, joko komun bat dutenak edo aukera ematen dutenak jokalarien artean jokatzeko, eta bide ematen dutenak partidaren prezioa zuzenean elkarren arteko jokaldi bihurtzeko. Makina horiek bingo-aretoetan instalatzen ahalko dira.

137. artikulua. Beste joko modalitate batzuen makina lagungarriak.

Beste joko modalitate batzuen makina lagungarriak honela sailkatzen dira:

a) Txartelak edo loteriak saltzeko makinak.

Makina hauek, prezio baten truke, txartelak, kupoiak, billeteak edo antzeko joko euskarriak bete, balioztatu, erregistratu edo ematen dituzte, zeinek bide ematen baitute noizean behin diruzko edo gauzazko sari bat berehala edo beranduago lortzeko, kontuan izanda joko zehatzaren ezaugarriak, baimenaren baldintzak eta jokoaren arauak.

b) Apustu-makina lagungarriak.

Makina hauek aukera ematen diote jokalariari apustuak formalizatzeko kirol-ekitaldi baten edo beste mota bateko gertaera baten emaitzen gainean, bat etorriz joko modalitate hori arautzen duten xedapen espezifikoetan ezarritakoarekin.

HIRUGARREN ATALA. KONFIGURAZIO TEKNIKOAK ETA SARIEN PLANA

138. artikulua. Jokomakinen eta interkonexiosistemen konfigurazio teknikoak.

1. Joko-makinek eta interkonexioa ahalbidetzen duten sistemek foru dekretu honen eranskinean adierazitako konfigurazio teknikoak izan beharko dituzte.

2. Enpresa fabrikatzaileek beste mekanismo edo gailu osagarri batzuk jartzen ahalko dituzte makinetan eta interkonexio-sistemetan, funtzionamendurako komenigarritzat jotzen badituzte. Horretarako, haien funtzionaltasuna identifikatu eta deskribatuko da homologazio-prozeduran, eta egiaztatuko da ez dituztela urratzen edo kaltetzen foru dekretu honetan eskatzen diren funtsezko betekizunak eta funtzionaltasunak.

3. Makinen interkonexiorako, Jokoa Arautzeko Agintaritzaren aldez aurreko baimena beharko da. Baimen hori prozedura honen arabera emanen da:

a) Barneko interkonexio-sistemak ezartzeko baimen-prozedura hasiko da instalatuko den lokalaren enpresa titularrak eskaera egindakoan.

b) Eskaera horrekin batera memoria bat aurkeztuko da, non adieraziko baitira elkarri konektatu beharreko makinen kopurua, bakoitzaren identifikazioa, erabiliko den interkonexio-sistemaren eredua eta eman beharreko sarien zenbatekoa.

139. artikulua. Partiden prezioak eta gehieneko sariak.

1. Joko-makinetan, partidaren gehieneko prezioa honako hau izanen da:

a) BR motako makinak: euro bat.

b) BS motako makinak: 2 euro.

c) BG motako makinak: 6 euro.

d) BM motako makinetan, beren konposizioaren arabera (BR, BS edo BG) modelo bakoitzerako ezartzen dena homologazioaren ebazpenean.

e) BMB motako makinetan, aukera ematen duena partidaren prezioa zuzenean elkarren arteko jokaldi bihurtzeko.

2. Joko-makina bakoitzak gehienez sari hau ematen ahalko du:

a) BR motako makinak: 500 euro.

b) BS motako makinak: 2.000 euro.

c) BG motako makinak: 6.000 euro.

d) BM motako makinetan, beren konposizioaren arabera (BR, BS edo BG) modelo bakoitzerako ezartzen dena homologazioaren ebazpenean.

e) BMB motako makinak: makinek partida batean eman dezaketen saririk handiena izanen da BS motako makinei dagokiena.

140. artikulua. Elkarri konektatutako jokomakinen gehieneko sariak.

1. Honako hauek izanen dira barneko interkonexio-sistemen parte diren makinek eman ditzaketen gehieneko sari metatuak:

a) Joko-aretoetan dauden B motako makinetarako: 3.000 euro.

b) Bingoetan dauden B motako makinetarako: 3.000 euro.

c) Joko-aretoetan dauden BG motako makinetarako: 15.000 euro.

d) Bingoetan dauden BG motako makinetarako: 30.000 euro.

LAUGARREN ATALA. JOKO-MAKINAK USTIATZEKO ARAUBIDEA

141. artikulua. Ustiatzeko baimena.

1. Ustiatzeko baimena administrazio-baimen bat da, makina bakoitzaren legezkotasuna babesten duena, aldez aurretik homologatutako modelo batekin bat etortzeari dagokionez, eta gaikuntza ematen diona makina horren titularra den joko-enpresari hura ustiatzeko, foru dekretu honetan ezarritako gainerako baldintzak bete ondoren.

2. A edo B motako joko-makina bat ustiatzeko, Jokoa Arautzeko Agintaritzaren ustiapen baimena lortu beharko da aldez aurretik. Eskaera joko-enpresa gaitu batek sinatu beharko du, eta harekin batera, makinaren fabrikazio-ziurtagiria aurkeztu beharko da, gutxienez datu hauek jasoko dituena:

a) Enpresa fabrikatzailearen edo inportatzailearen identifikazioa.

b) Modeloaren izena, serie-zenbakia, erregistro- edo fabrikazio-zenbakia eta Nafarroako Jokoen eta Apustuen Erregistroko inskripzio-zenbakia.

c) Makinaren joko-postuen kopurua, hala badagokio.

d) Makinaren fabrikazio-data eta salmenta-data.

3. Ustiatzeko baimena gaitutako joko-enpresei bakarrik ematen ahalko zaie, eta iraupen mugagabea izanen du. Halaber, zehaztuko da makina hori zein lokaletan instalatzen ahalko den, eta foru dekretu honen 143. artikuluan adierazitako arrazoiren batengatik azkentzen ahalko da. Baimenak indarrean jarraituko du, nahiz eta eskualdatu, baldin eta une horretan indarrean dagoen araudiak eskatzen dituen baldintzak betetzen badira.

4. Jokoa Arautzeko Agintaritzak joko-makinen ikuskapen teknikorako protokoloa ezarriko du, egiaztatze aldera makina horien funtzionamendua egokitzen dela homologazioan eta indarreko araudian eskatzen diren baldintzetara.

142. artikulua. Ustiatzeko baimenak eskuz aldatzea.

Joko-makinak ustiatzeko baimena gaitutako joko-enpresen artean soilik eskualdatzen ahalko da, enpresa eskuratzaileak aldez aurretik hala eskatuta, betiere makinaren transferentzia agiri bidez egiaztatzen bada eta aurreko titularrari emandako baimenaren aleak aurkezten badira.

143. artikulua. Ustiatzeko baimena azkentzea.

1. Ustiatzeko baimena arrazoi hauengatik azkenduko da:

a) Makinak indarreko araudiak eskatzen dituen baldintzak betetzeari uzten dionean edo arrazoi horrengatik hasitako prozeduran erregelamenduz ezarritako epean baldintza horietara egokitzen ez denean.

b) Makinaren titularra den joko-enpresak Nafarroako Jokoen eta Apustuen Erregistroan duen inskripzioa deuseztatzeagatik.

c) Dagokion erregistroan makinaren modeloaren inskripzioa deuseztatzeagatik.

d) Makinaren ustiapenari atxikitako zergak ez ordaintzeagatik.

e) Baimena lortzeko aurkeztutako dokumentazioan funtsezko daturen bat faltsua, irregularra edo zehaztugabea dela egiaztatzeagatik.

f) Joko-enpresa titularrak eskatuta, makina ustiapen komertzialetik kentzeagatik.

2. Ustiapena azkentzeko, joko-enpresa titularrak Jokoa Arautzeko Agintaritzari aurkeztu beharko dizkio aipatutako baimenaren aleak, edo hura galdu izanaren erantzukizunpeko adierazpena, bai eta jatorrizkoa aurkezteko konpromisoa ere, jatorrizkoa agertzen bada.

144. artikulua. Makinak trukatzea.

1. Makinen trukea administrazio-prozedura bat da, zeinaren bidez aldi berean baimentzen baita makina berri bat ustiatzea eta beste makina bat ustiatzeko baimena azkentzea, zerga-ondorioetarako ordezteko.

2. Horretarako, baimena ematen ahalko da ustiatzeko baimena indarrean duen B motako joko-makina bat mota eta ezaugarri berak dituen baimenik gabeko beste batekin aldatzeko, baldin eta makina horren modeloa Nafarroako Jokoen eta Apustuen Erregistroan inskribatuta badago.

3. Aurreko apartatuan aurreikusitako ondorioetarako, joko-enpresek makinak trukatzeko eskatu beharko diote Jokoa Arautzeko Agintaritzari, eta, eskaerarekin batera, aurkeztu beharko dituzte ustiatu gogo den makinaren fabrikazio-ziurtagiria eta ordeztu beharreko makina ustiatzeko baimenaren aleak.

145. artikulua. Jokomakinen dokumentazioa.

Zirkulazio-gidaren edo ustiapen-baimenaren ale egokia jarrita eduki beharko dute makinaren aurrealdean edo alboetan, ongi ikusteko moduan. Alabaina, ez da nahitaezkoa hura erakustea baimen horren edukia pantailan edo bitarteko telematikoen bidez ikusteko aukera dagoenean, Jokoa Arautzeko Agintaritzak ezartzen duen prozeduraren bidez.

BOSGARREN ATALA. JOKO-MAKINAK INSTALATZEKO ARAUBIDEA

146. artikulua. Instalazio baimena.

1. Instalatzeko baimena administrazio-baimen bat da, bermatzen duena legezkoa dela establezimendu batean gaitutako enpresa jakin baten joko-makinen instalazioa.

2. Joko-makinak establezimendu batean instalatu nahi direnean, horko jardueraren titularrak Jokoa Arautzeko Agintaritzari eskatu beharko dio establezimendu horretan makinak instalatzen dituzten enpresa operadore adina instalazio-baimen.

3. Instalatzeko baimena instalazioa egin gogo den establezimenduko jarduera ekonomikoaren titularraren alde emanen da. Bertan, instalazioa benetan egiten duen joko-enpresa identifikatuko da.

4. Instalatzeko baimena lortzeak berekin ekarriko du establezimendu horretarako baimena duen enpresa operadoreak joko-makina benetan ustiatzea. Ustiapen hori etenik gabe egin beharko da, baimena indarrean dagoen bitartean.

5. Instalazio-baimenak jendeak ikusteko moduan jarri beharko dira joko-makinak instalatuta dauden eremuan edo makinetan bertan. Alabaina, ez da halakorik eskatuko baimen horren edukia pantailan edo bitarteko telematikoen bidez ikusteko aukera dagoenean, Jokoa Arautzeko Agintaritzak ezartzen duen prozeduraren bidez.

147. artikulua. Instalatzeko baimenaren indarraldia eta iraungipena.

Instalazio baimena mugagabea izanen da, baina honako arrazoi hauengatik iraungitzen ahalko da:

a) Establezimenduko jarduera ekonomikoaren titularrak uko egiteagatik, baimenean identifikatutako joko-enpresaren adostasunarekin.

b) Establezimenduko jarduera ekonomikoaren titularrak uko egiteagatik, zeinak urte naturala amaitzean izanen baititu ondorioak, betiere uko egite hori gutxienez hiru hilabete lehenago jakinarazi bazaio Jokoa Arautzeko Agintaritzari.

Kasu horretan, Jokoa Arautzeko Agintaritzak uko egitearen jakinarazpena helaraziko dio instalazio-baimenean identifikatutako enpresa operadoreari, Administrazio Publikoen Administrazio Prozedura Erkideari buruzko urriaren 1eko 39/2015 Legearen 94. artikuluaren 4. apartatuan aurreikusitako ondorioetarako.

c) Establezimenduko jarduera ekonomikoaren titulartasuna aldatzeagatik, titular berria ekonomia jardueren gaineko zergan alta eman eta hiru hilabete igaro ondoren.

d) Joko-enpresaren alde bakarreko erabaki edo borondatez, baimendutako establezimenduan makina instalatzen ez denean baimena eman eta hamabost egun naturaleko epean, edo haren ustiapena hogeita hamar egun naturalez baino gehiagoz eteten denean.

e) Establezimenduan instalatzen diren makinen titularra den joko-enpresa desgaituta gelditzeagatik edo baja hartzeagatik Nafarroako Jokoen eta Apustuen Erregistroan.

f) Establezimenduko jarduera itxi edo aldatzeagatik, bertan abiarazitako jarduera berriak joko makinak instalatzea eragozten badu edo horiek aurreko baimenaren kopuru eta tipologiarekin bat ez datozen baldintzekin instalatzea baimentzen badu.

g) Baliogabetzeagatik eta administrazio zehapen baten ondorioz eragiteagatik, Jokoari buruzko abenduaren 14ko 16/2006 Foru Legean xedatutakoaren arabera.

h) Epailearen epaiagatik, hala erabakitzen bada.

i) Baimena lortzeko aurkeztutako dokumentazioan funtsezko daturen bat faltsua, irregularra edo zehaztugabea dela egiaztatzeagatik.

j) Titularra hiltzeagatik edo haren nortasun juridikoa iraungitzeagatik, bidezko eskualdaketak galarazi gabe.

148. artikulua. Kokaleku jakinarazpena.

1. Makinak instalatzeko baimena duen lokal batean instalatutako makinen titularra den joko-enpresa operadoreak Jokoa Arautzeko Agintaritzari jakinarazi beharko dio, makina horiek benetan instalatu aurretik, baimendutako establezimenduan instalatu nahi diren eta hortik erretiratu nahi diren joko-makinak ustiatzeko baimenaren zenbakia.

Jakinarazpenean, halaber, sarrera- eta irteera-kontagailuen datuak jaso beharko dira, eurotan adierazita, establezimenduan instalatzen den makina eta hortik kentzen dena ustiatzeko baimenari dagozkionak.

Postu anitzeko makinen kasuan, sarrera- eta irteera-kontagailuen balioa postu guztien balioen baturari dagokiona izanen da.

Jokoa Arautzeko Agintaritzak izapidetzeko sortutako bitarteko elektroniko edo telematikoen bidez egin beharko da jakinarazpen hori. Baliozkoa izanen bada, ezinbestekoa izanen da eskatzen diren datuen transkripzio osoa egitea.

2. Jokoa Arautzeko Agintaritzak iragarritako instalazioa ukatzen ahalko du, egiaztatzen badu instalazioak aplikatu beharreko araudia betetzen ez duela.

149. artikulua. Ostalaritzako establezimenduetan jokomakinak instalatzea.

Taberna, taberna berezi, kafetegi eta ikuskizun-kafetegi gisa berariaz baimendutako establezimenduetan, bi joko-makina baino ezin izanen dira instalatu; horietako bat BR motakoa izanen da, eta bestea apustu-makina lagungarri bat.

150. artikulua. Jokoaretoetan jokomakinak instalatzea.

1. Bingo gisa berariaz baimendutako lokaletan:

a) Bingoetan joko-makinak ezartzen ahal dira, establezimenduan bingoan jokatzeko dauden postuen %20 adinako makina postu gehienez ere, edo hogeita hamar jokalari postu, portzentaje horren aplikazioak kopuru txikiagoa ematen badu.

b) Bingoetan ezarritako BG motako joko makinen kopurua ez da, haiek ezarri ondoren, bingoan jokatzeko dauden postuen %10 baino handiagoa izanen, edo hamabost baino gehiago, portzentaje horren aplikazioak kopuru txikiagoa ematen badu.

c) Orobat, aurreko apartatuan xedatutakoaren ondorioz ezarrita dauden makinak zenbat diren jakinik, BR, BS eta BM motako joko makinak ezartzen ahal dira establezimenduan, artikulu honen a) apartatuan jokalari postuentzat ezarritako mugara iritsi arte.

d) BMB bingo-makina espezifikoak.

e) Nolanahi ere, apustu-makina lagungarrien kopurua ez da bost baino handiagoa izanen.

2. Joko-areto gisa berariaz baimendutako lokaletan:

a) Ezin izanen da B motako joko-makina bat eta apustu-makina lagungarri bat baino gehiago instalatu hiru metro koadro bakoitzeko kokatzen diren joko-eremuan.

b) Nolanahi ere, apustu-makina lagungarrien kopurua ez da bost baino handiagoa izanen.

3. Kirol-apustuen lokal gisa berariaz baimendutako lokaletan:

a) Ezin izanen da apustu-makina bat baino gehiago instalatu hiru metro koadro bakoitzeko, kokatuta dauden joko-eremuan.

SEIGARREN ATALA. JOKO-MAKINEN FUNTZIONAMENDUAREN ARAUBIDEA

151. artikulua. Erabiltzaileei informazioa ematea.

1. Joko-makinek informazio egiazkoa, eraginkorra eta behar adinakoa eman beharko diete erabiltzaileei honako ezaugarri hauei buruz:

a) Jokoaren arauak eta konbinazio irabazleen deskribapena.

b) Partidaren prezioa eta ordaintzeko modua.

c) Onartzen dituen txanpon, billete, fitxa, txartel edo euskarri fisiko edo elektronikoen motak eta balioak.

d) Sarietan itzuli beharreko gutxieneko ehunekoa, hala badagokio.

e) Konbinazio irabazle bakoitzari dagozkion sarien zenbatekoa eta kobratzeko modua.

f) Adingabeek erabiltzeko debekua, eta gehiegi jokatzeak adikzioa sor dezakeelako ohartarazpena.

2. Informazio hori makinen aurrealdean edo, hala badagokio, bideo-pantailan azaldu beharko da. Informazioa bideo-pantailan azaltzen denean, makinaren aurrealdean argi eta garbi adieraziko zaio erabiltzaileari informazioa nola lortu.

152. artikulua. Partidak ordaintzea, diruzko eta gauzazko sariak kobratzea.

1. Partidaren prezioa legezkoa den dirutan ordaintzen ahalko da, edo dirua ordaintzeko eta itzultzeko tiketak, euskarriak edo txartel elektronikoak erabiliz, joko-makina instalatuta dagoen establezimenduaren barruan.

2. Joko-makinek emandako sariak aurreko apartatuan aurreikusitako moduan kobratzen ahalko dira, edo foru dekretu honen 68. eta 69. artikuluetan xedatutakoaren arabera gauzatu.

3. A motako joko-makinen bidez lor daitezkeen gauzazko sariak identifikatzeko modukoak izanen ditu erabiltzaileak partida hasi aurretik. Makinak baleak edo bonuak pilatzeko aukera eskaintzen badu gero gauzazko sariekin trukatzeko, sari horiek opari mahaietan erakutsi beharko dira, eta argi eta garbi adierazi beharko da zenbat bale edo bonu behar diren horiek lortzeko.

Bale edo bonuak zer establezimendutan lortu diren, horrexetan baino ez dira emanen gauzazko sariak haien truke, eta trukean ez da dirurik emanen, inola ere.

153. artikulua. Funtzionamenduaren baldintzak eta matxurak.

1. Establezimendu batean instalatutako joko-makinak funtzionamenduan egon beharko dira establezimendu hori jendearentzat irekita dagoen ordutegi berean, eta ezein erabiltzailek ezin izanen ditu lehentasunez erabili. Matxura gertatzen denean bakarrik deskonektatzen ahalko dira, jendeari horren berri emanda, argi eta garbi, ongi ikusteko toki batean.

2. Joko-enpresak eta makinak instalatuta dauden lokalen titularrak behartuta daude makinak martxan edukitzera, funtzionamendu eta segurtasun baldintza egokietan, instalazio baimenak indarrean dirauen bitartean.

3. Akats mekaniko baten ondorioz, makinak lortutako saria osorik edo zati batean ordaintzen ez badu, negozioaren titularrak edo haren zerbitzura dauden langileek berehala ordaindu beharko dute sari hori edo hura osatzeko falta den aldea, eta jokatzeari ezin izanen zaio berriz ekin konpontzen ez den bitartean sariak ez ordaintzeko arrazoia.

4. Makinaren funtzionamendu txarra eragiten duen matxuraren bat gertatzen bada eta matxura hori unean bertan konpondu ezin bada, lokalaren arduradunak deskonektatu egin beharko du, matxuraren berri emanez makinan ongi ikusteko moduko informazioaren bidez.

5. Instalatzeko baimena lortzeak berekin ekarriko du establezimendu horretarako baimena duen enpresa operadoreak joko-makina benetan ustiatzea. Ustiapen hori etenik gabe egin beharko da, baimena indarrean dagoen bitartean.

6. Joko-makina, matxuragatik edo funtzionamendu txarragatik, aldi baterako kentzen ahalko da. 7 eguneko epean, gehienez, ustiatzen hasi beharko da berriz erretiratutako joko-makina hori edo hura ordezten duen beste bat.

154. artikulua. Debekuak eta mugak.

1. Honako hauek dute debekatuta joko-makinak jokalari gisa erabiltzea: joko-makinen enpresa operadoreen eta makina horiek instalatuta dauden establezimenduen enpresa titularren titularrek, akziodunek edo partaideek, haien zuzendariek, enplegatuek, ezkontideek eta lehen graduko aurreko eta ondorengo ahaideek.

2. Joko-makinak instalatuta dauden establezimenduen enpresa titularrek, arduradunek eta langileek eragotzi beharko diete makina horiek erabiltzea foru dekretu honetako xedapenen baten ondorioz debekatuta dutenei.

VII. KAPITULUA. ZOZKETAK, TONBOLAK ETA AUSAZKO KONBINAZIOAK

LEHENBIZIKO ATALA. XEDAPEN OROKORRAK

155. artikulua. Deskribapena, parte hartzeko modua eta materialak.

1. Zozketa joko bat da, non zozketatzen baitira aldez aurretik zehaztutako eta diru bidez trukatu ezin diren ondasun edo gauzazko eskubide bat edo batzuk, prezio jakin batean elkarren artean korrelatiboki zenbatuta edo bereizita dauden txartel, orri edo parte hartzeko beste tresna batzuk erosi dituztenen artean.

2. Tonbola jendaurrean jarritako hainbat objekturen zozketa bat da. Objektu horiek kobratzen ahal dituzte, berehala, puntuak batuz edo zozketa geroratuaren bidez, prezio jakin baten truke kasua bada lortu beharreko saria adierazita dituzten txartel edo orriak erosi dituztenek.

3. Ausazko konbinazioa joko bat da, beti egiten dena, marketineko operazioetan edo merkatuko produktu batzuen kontsumoa sustatzeko kanpainetan, elementu jakin batzuen konbinazioak epe jakin batean osatzeko, produktu bat behin eta berriro erosiz. Konbinazioen elementuak aurretik zehaztuko dira edo ausaz aterako dira, eta jokalariei iragarri edo helarazi beharko zaizkie, zeinahi bide erabiliz. Konbinazioa zozketaren arauetan ezarri bezala osatuz gero, jokalariek zuzeneko sari bat jasoko dute edo hura esleitzeko zozketa batean hartuko dute parte, onesten diren arauei jarraikiz.

4. Zozketak, tonbolak eta ausazko konbinazioak era presentzialean egiten ahalko dira, txartelak, orriak edo parte hartzeko beste tresna batzuk erosiz salmentarako baimendutako leku edo establezimenduetan, edo modu ez-presentzialean, urrutitik, elektronika erabiliz, formatu birtualean, baliabide interaktiboen eta kanal telematikoen bitartez.

5. Zozketak, tonbolak eta ausazko konbinazioak ustiatu eta egiteko erabil litezkeen joko-sistema teknikoek foru dekretu honen I. eranskinean jasotako konfigurazioa, betekizunak eta ezaugarri tekniko eta funtzionalak izan beharko dituzte.

6. Zozketak foru lege honen aplikazio-eremutik kanpo geldituko dira baldin eta haien helburu bakarra bada produktu edo zerbitzu baten publizitatea egitea edo hura sustatzea, eta diruzko, gauzazko edo zerbitzuzko sariak eskaintzen badituzte, kontraprestazio bakarra izanik kasuan kasuko produktu edo zerbitzua kontsumitzea, gainpreziorik eta tarifikazio gehigarririk gabe edo haren kontsumoa behin eta berriz errepikatu gabe, eta, hala badagokio, publizitatearen edo sustapenaren xede den erakundea bezeroa izatea eskatuta.

156. artikulua. Modalitateak.

1. Etekinen xedea kontuan hartuta, zozketak, tonbolak eta ausazko konbinazioak honela sailkatzen dira:

a) Ongintzakoak: entitate publiko edo pribatuek, toki erakundeek edo beste korporazio edo entitate batzuek antolatuta, lortutako etekinen zenbatekoa ongintzako establezimenduen lehen mailako beharrizanak asetzeko erabiltzen da.

b) Onura publikokoak edo interes sozialekoak: aurreko apartatuan aipatutako entitate, erakunde eta korporazioek antolatuta, lortutako etekinen zenbatekoa onura publiko aitortua duten helburuetara bideratzen da.

c) Interes partikularrekoak: pertsona fisiko edo juridikoek antolatuta, etekinen zenbatekoa ez da aurreko apartatuetan aurreikusitako helburuetara bideratzen.

2. Sarien zenbateko osoa kontuan hartuta, zozketak, tonbolak eta ausazko konbinazioak honela sailkatzen dira:

a) Zenbateko txikikoak: sarien zenbateko osoa 1.800 eurotik beherakoa denean.

b) Zenbateko handikoak: sarien zenbateko osoa 1.800 eurokoa edo handiagoa denean.

BIGARREN ATALA. ANTOLAMENDUA

157. artikulua. Antolamendu eta funtzionamendu arauak.

1. Zozketak, tonbolak eta ausazko konbinazioak egitean, men eginen zaio foru dekretu honetan xedatutakoari, bai eta erakunde antolatzaileak proposatutako eta Jokoa Arautzeko Agintaritzak onetsitako antolamendu- eta funtzionamendu-arauetan ezarritakoari ere.

2. Antolaketari eta funtzionamenduari buruzko arauek honako hauek jaso beharko dituzte, argi eta osorik eta foru dekretu honetan xedatutakoari lotuta:

a) Zer oinarritara egokituko den jokoa, barne daudela, tonbolen kasuan, sarien plana eta konbinazio irabazleak.

b) Zer egunetan eginen den eta bukatuko den, kasua zein den.

c) Zer ezaugarri duten txartelek, orriek edo parte hartzeko bestelako baliabideek eta zenbat diren, prezio unitarioa adierazita. Baldin eta zozketak, tonbolak edo ausazko konbinazioak egiten badira Espainiako Itsuen Erakundearen, Estatuko Loterien eta Apustuen Erakundearen edo joko eta apustuen erakunde autonomo baten zozketa-zenbakiekin konbinatuta, txartelen, orrien edo parte hartzeko beste bitarteko batzuen kopurua izanen da, gutxienez, aipatutako zozketetan finkatutako serie batekoa.

d) Eman beharreko sarien zerrenda zehatza, honako hauek adierazita: haien prezioa edo merkatu-balioa eta irabazleei esleitzeko modua, bai eta non dauden gordailututa edo ikusgai ere, ondasun higigarrien kasuan, eta finkaren egoera, mugak eta hedadura, ondasun higiezinen kasuan.

e) Zer tokitan egin behar den nork irabaziko duen zehaztuko duen zozketa, nork eginen duen eta zer egunetan egin gogo den.

f) Zer tokitan dagoen establezimendua, tonbolen kasuan.

g) Zer neurri hartu behar duen erakunde antolatzaileak guztiz bermatzeko jokoa gardentasunez garatzen dela, iruzurrak saihesteko, barne sartuta sariak erreklamatzeko iraungitze-data.

h) Zertarako erabiliko diren eskatutako zozketa edo tonbola eginda lortutako etekinak.

i) Zer pertsona dauden erakunde antolatzaileak baimenduta txartelak, orriak edo parte hartzeko beste bitarteko batzuk saltzeko.

j) Zer arauren bidez jotzen den erakunde antolatzailea ongintzakotzat, onura publikokotzat edo interes sozialekotzat, hala badagokio, zozketaren edo tonbolaren etekinak zertarako erabiliko diren adierazita, edo dagokion erakunde ofizialak emandako ziurtagiria.

HIRUGARREN ATALA. BAIMENA

158. artikulua. Zozketak, tonbolak eta ausazko konbinazioak ustiatzea.

1. Zenbateko txikiko zozketak, tonbolak eta ausazko konbinazioak ustiatzeko, Jokoa Arautzeko Agintaritzari jakinarazi beharko zaio aldez aurretik.

2. Zenbateko handiko zozketak eta tonbolak ustiatzeko, Jokoa Arautzeko Agintaritzaren aldez aurreko baimena beharko da.

159. artikulua. Baimentzeko prozedura.

1. Jakinarazpena edo, hala badagokio, baimen-eskaera aurkeztu beharko da, gutxienez, txartelak, orriak edo parte hartzeko bestelako bitartekoak saltzen edo banatzen hasi baino hilabete lehenago, eta honako agiri hauek erantsi beharko dira:

a) Zozketaren, tonbolaren edo ausazko konbinazioen antolaketa- eta funtzionamendu-proposamena.

b) Jokoan erabiliko diren txartelen, orrien edo parte hartzeko bestelako bitartekoen proiektua.

c) Erakunde antolatzaileak sarien jabetza duela egiaztatzen duten kontratuen, fakturen, tituluen edo dokumentuen kopia.

Ondasun higiezinen kasuan, dagokion Jabetza Erregistroak emandako ziurtagiria aurkeztuko da, frogatzen duena finkaren erregistro-titulartasuna antolatzailearena dela, eta bertan finkaren deskribapena eta finkaren gaineko kargarik ez dagoela jasoko da.

d) Zozketa, tonbola edo ausazko konbinazioak egin nahi badira Espainiako Itsuen Erakundeak, Estatuko Loterien eta Apustuen Erakundeak edo joko eta apustuen erakunde autonomoren batek antolatutako zozketekin konbinatuta, erakunde horrek antolatzaileari emandako baimenaren jatorrizko agiria aurkeztu beharko da.

e) Sarien balio osoaren %10eko fidantza jarri izana egiaztatzen duen ziurtagiria.

2. Jokoa Arautzeko Agintaritzak egoki dena ebatzi beharko du, gutxienez, jokoan erabiliko diren txartelak, orriak edo parte hartzeko bestelako bitartekoak saltzen edo banatzen hasi baino lau egun natural lehenago.

3. Administrazio-baimena besterenezina izanen da, eta debekatuta egonen da edozein tituluren bidez lagatzea eta hirugarren baten bidez ustiatzea.

LAUGARREN ATALA. MUGAK

160. artikulua. Saltzeko debekua.

Debekatuta dago 18 urtetik beherakoei zozketa, tonbola eta ausazko konbinazioetan parte hartzeko txartelak, orriak edo bestelako bitartekoak saltzea.

III. TITULUA. JOKOA BANATZEKO KANALAK

I. KAPITULUA. JOKO PRESENTZIALA

161. artikulua. Joko presentzialaren definizioa.

1. Joko presentzialtzat hartuko da eskatzen duena jokalaria horretarako baimendutako leku edo establezimenduetan fisikoki egotea.

2. Katalogoan joko edo modalitate jakin batzuetarako aurreikusitako salbuespenekin, joko-lokaletan baino ezin izanen da jokatu era presentzialean, bai eta beste jarduera batzuetan aritzeko nahitaezko lizentziak dituzten establezimenduetan ere, baldin eta foru dekretu honetan ezarritako betekizunak eta baldintzak betetzen badituzte eta dagokion baimena badute.

LEHENBIZIKO ATALA. JOKO-LOKALEN XEDAPEN KOMUNAK

162. artikulua. Kontzeptua eta motak.

1. Foru dekretu honen ondorioetarako, joko-lokaltzat hartuko dira jokorako edo apustuetarako berariaz baimendutako tokiak, esparruak, instalazioak edo establezimenduak, aldi baterakoak edo iraunkorrak izan.

2. Honako hauek hartzen dira joko-lokaltzat:

a) Bingo aretoak.

b) Joko-aretoak.

c) Kirol-apustuen lokalak.

3. Joko-lokalak joko nagusi batean edo gehiagotan ohikotasunez eta jarraian aritzeko erabili beharko dira. Modu osagarrian eskain daitezke beste joko batzuetarako, baina joko nagusiaren edo nagusien benetako erabilgarritasunaren baldintzapean.

163. artikulua. Jokolokalen ezaugarri eta baldintza tekniko komunak.

1. Joko-lokalek bete beharko dituzte jendearentzat zabalik dauden lokaletarako oro har ezartzen diren baldintzak. Eskainitako jokoak egiteko materialak lokalen barruan kokatu beharko dira, haien kanpoko sarbidetik isolatuta, baina haien kokapen zehatzak ez du eragozpenik ekarriko jarduera-lizentzian edo irekitzeko lizentzian ezarrita dauden ebakuazio baldintzetan eta suteen aurkako babes baldintzetan.

2. Inola ere ezin izanen da baimenik eman berariazko joko-establezimenduak zentro hauetatik 400 metrora baino hurbilago instalatzeko: adingabeei irakaskuntza arautuak ematen dizkieten ikastetxe publiko edo pribatuak, jokalari patologikoen errehabilitaziorako zentro ofizialak, adimen desgaitasuna edo gaixotasun mentala duten pertsonentzako egoitzak, osasun, kirol, kultura eta aisia zentroak eta gazteen etxeak.

Era berean, eta kasu guztietan, 400 metroko distantzia gordeko da joko-aretoen eta kirol-apustuen establezimenduen artean gutxienez.

Aurreko paragrafoan adierazitako distantzia neurtuko da, kasu guztietan, jabari publikoko bidean oinez egin daitekeen ibilbide laburrenetik.

Udal bakoitzak udal ordenantzaren bidez luzatzen ahalko du bere udalerrirako gutxieneko distantzia hori, eta udalek araudi horren berri eman beharko diote Jokoa Arautzeko Agintaritzari.

3. Foru dekretu honetan lokal mota bakoitzerako ezarritako betekizun eta baldintza espezifikoez gain, joko-lokalek honako hauek ere bete beharko dituzte, gutxienez:

a) Sarrerako ateen ondoan dagoen harrera- edo onarpen-zerbitzu informatizatu bat, sarrera eragotziko diena hemezortzi urtetik beherakoei eta Nafarroako Jokorako Sarbideko Interdikzioen Erregistroan bildutako pertsonei. Ate horietatik lokaleko joko espazio eta eremuetara sartzeko modua egonen da.

Horretarako, foru dekretu honen 24. eta 25. artikuluetan ezarritakoa alde batera utzi gabe, zerbitzuko langileek eskatzen ahalko diote establezimendura joaten diren erabiltzaile guztiei identifika daitezen.

b) Joko-eremu bat edo gehiago, hots, joko nagusi(eta)rako erabiltzen diren espazioak, eta, hala badagokio, eskuragarri dauden beste joko batzuk ustiatzeko erabiltzen diren eremuak.

Ez da joko-eremutzat hartuko harrerarako azalera, komunetarakoa, bulegoetarakoa, biltegirakoa eta jokoaren jarduera espezifikoarekin zuzenean lotuta ez dagoen beste edozein eremutarako erabiltzen dena.

c) Jendea biltzen duen era honetako establezimenduari egokitutako komunak, zerbitzuak eta instalazioak, indarra duen araudian ezarritakoaren arabera.

4. Joko-lokal bakoitzerako foru dekretu honetan ezarritako plangintza neurriak alde batera utzi gabe, zehazteko zenbat eta non kokatuko diren joko-makinak edo jokatzeko beste material batzuk, kontuan hartuko dira zenbateko azalera duen lokaleko jolas-eremuak eta zer baldintza ezarri diren jarduera eta irekierako udal lizentzietan suteetatik babesteko eta ebakuatzeko.

5. Kartelak:

a) Lokalaren barnean eta kanpoan kartel bat jarriko da, non adieraziko baita adingabeek eta Nafarroako Jokorako Sarbideko Interdikzioen Erregistro Orokorrean eta harekin konektatutakoetan izena emandako pertsonek debekatuta dutela apustuetan parte hartzea.

b) Kartel batzuk paratuko dira onarpen-zerbitzuan, ongi ikusteko moduko leku batean, adierazteko apustu-jokoetan gehiegi aritzeak adikzioa sor dezakeela, eta nora jo daitekeen ludopatia-problema bat izanez gero.

6. Debekatu egiten da joko-lokaletan alkoholdun edarien kontsumoaren publizitatea eta sustapena egitea.

164. artikulua. Jokoaren sarbidearen eta partehartzearen kontrola.

1. Joko-lokalek harrera- edo onarpen-zerbitzu bat izan beharko dute, erregelamendu honen 24. artikuluan ezarritakoarekin bat.

2. Joko-lokalen enpresa titularrek baldintzak ezartzen ahalko dizkie eskainitako jokoetan modu aktiboan parte hartzen duten pertsonei bertan jarraitzeko. Nolanahi ere, jokalarientzat erreserbatuta egonen dira joko-mahaietako eta joko-makinetako aulkiak eta tabureteak.

165. artikulua. Erabiltzaileei informazioa ematea.

1. Joko-lokalen titularrek informazio egiazkoa, osoa eta eguneratua eman beharko diete hala eskatzen duten erabiltzaileei establezimenduan eskaintzen diren jokoei buruz, horien arauei eta garatzeko moduari buruz, horietan parte hartzeko moduari buruz, konbinazio irabazleei buruz, sarien zenbatekoari eta banatzeko moduari buruz.

Gainera, honako hauen kopiak jarri beharko dituzte haien eskura: enpresaren gaikuntza-titulua eta lokala instalatzeko eta martxan jartzeko Jokoa Arautzeko Agintaritzak emandako baimena, bai eta lokalean eskaintzen diren jokoen araudi ofiziala ere.

2. Joko-lokalek kartel edo errotulu bat izanen dute sarreran, ongi ikusteko moduan, joko-lokal direla adierazita, bai eta foru dekretu honen 163. artikuluan ezarritakoa ere.

3. Lokalean instalatutako joko-makinek honako hauek jaso beharko dituzte aurrealdean edo bideo-pantailan, grafikoki, ongi ikusteko moduan eta idatziz: joko-arauak, konbinazio irabazleen deskribapena, onartzen dituzten txanponen, fitxen, txartelen edo euskarrien balio motak, partida bakoitzari dagozkion sarien zenbatekoa eta sarietan itzultzeko gutxieneko ehunekoa.

166. artikulua. Jarduteko ordutegiak.

Joko-lokalak edo -instalazioak ixteko ordutegi orokorra honako hau izanen da:

a) Bingo aretoak: 03:00.

b) Joko-aretoak: 00:30.

c) Kirol-apustuen lokalak: 00:30.

BIGARREN ATALA. JOKO-LOKALEN AURREKO KONTSULTA ETA BAIMENA

167. artikulua. Bideragarritasunaren aurreko kontsulta.

1. Joko-lokal bat instalatu eta funtzionamenduan jarri nahi duen edozein pertsona fisiko edo juridikok aurreko kontsulta bat egiten ahalko dio Jokoa Arautzeko Agintaritzari, jakiteko lokal hori egokitzen den foru dekretu honetan jasotako xedapen teknikoetara eta Jokoari buruzko 16/2006 Foru Legearen 14.6 artikuluan aipatutakora. Eskaerarekin batera, lokalaren aurreproiektua aurkeztu beharko da, teknikari eskudunak idatzi eta sinatua, honako dokumentazio hau bildu beharko duena:

a) Deskripzio-memoria bat, berariaz justifikatzen duena noraino betetzen dituen foru dekretu honetan eskatutako baldintzak instalatu gogo den lokal mota zehatzak, edo egokitzapen-obra egokiak egin ondoren betetzen ahal dituen.

b) Lokalaren kokalekuaren planoak, bai eta egungo egoeraren eta eraberritutakoaren planoak ere, lokalera sartzeko ate guztiak berariaz aipatuta.

c) Distantziak neurtzeko planoa, non grafikoki azaltzen baita zenbatekoak diren joko-aretoko ate guztien eta foru dekretu honen 163.2 artikuluan adierazitako leku hurbilenen arteko distantziak.

Planoarekin batera txosten tekniko bat aurkeztuko da, eta bertan jasoko dira egin beharreko ibilbide osoa osatzen duten zatietako bakoitzaren neurketaren emaitza partziala eta horien deskribapena.

2. Jokoa Arautzeko Agintaritzak txosten bat eskatuko die departamentu eskudunei, adierazteko betetzen diren Jokoari buruzko 16/2006 Foru Legearen 14.6 artikuluan aipatutako zentroetan ezarritako gutxieneko distantziak. Era berean, txostena eskatuko zaio joko-lokala kokatuko den herriko udalari.

3. Aurkeztutako dokumentazioa aztertu ondoren, Jokoa Arautzeko Agintaritzak eskatzaileari jakinaraziko dio lokal horrek aukera duen instalazio- eta funtzionamendu-baimena lortzeko, eta, hala badagokio, eragozpenak zehaztuko dizkio.

4. Emandako txostena erabilgarria eta indarrean izanen da, baldin eta emandako datuak egiazkoak badira eta proiektua eta haren araberako obrak txostenean egindako oharren arabera gauzatzen badira eta, betiere, aplikatu beharreko indarreko araudiaren arabera.

5. Txostena egiteak ez du inola ere ekarriko kontsultaren xede den joko-lokalaren instalaziorako eta funtzionamendurako administrazio-baimena ematea.

168. artikulua. Instalaziorako eta funtzionamendurako baimena.

1. Joko-lokalen ustiapena egiten ahalko dute, soil-soilik, baldintza hauek betetzen dituzten joko-enpresek: lokalean garatu beharreko jarduerarako beharrezko gaikuntza-titulua izatea, Nafarroako Jokoen eta Apustuen Erregistroan inskribatuta egotea eta instalaziorako eta funtzionamendurako aldez aurreko baimena izatea.

2. Joko-lokal baten instalaziorako eta funtzionamendurako baimenak ahalmena emanen dio titularrari, ezertan galarazi gabe eska dakizkiokeen beste lizentzia eta baimen guztiak, baimenaren xede den joko-lokala irekitzeko eta zerbitzuan edukitzeko, gehienez ere urtebeteko epean, baimena ematen denetik zenbatzen hasita.

3. Instalatzeko eta jarduteko baimenak ez du inolako eskubiderik emanen baimenaren xedeko joko-lokala lekuz aldatzeko edo beste leku batean jartzeko.

169. artikulua. Izapidetzea.

1. Joko-lokal bat instalatu eta funtzionamenduan jarri nahi duten enpresek dagokien baimena eskatu beharko diote Jokoa Arautzeko Agintaritzari. Eskaerarekin batera, agiri hauek aurkeztu beharko dituzte, zehazten diren moduan eta euskarrietan:

a) Lokalaren titulartasuna edo erabilgarritasuna egiaztatzen duen agiria; ezinbesteko baldintza izan daiteke instalaziorako eta funtzionamendurako baimena lortzea.

b) Jarduera gauzatzeko behar diren giza baliabideak eta baliabide materialak eta, hala badagokio, zerbitzu osagarriak.

c) Lokalean ustiatu nahi diren jokoak eta modalitateak.

d) Txosten ekonomiko bat, egin beharreko inbertsioa eta haren bideragarritasuna frogatzen dituena. Hartan, gutxienez ere, honako hauek adieraziko dira: inbertsioaren zenbatekoa, hura finantzatzeko modua, merkatuan duen eraginari buruzko azterlana -dauden lokalen kopurua eta hurbiltasuna kontuan hartuta-, eta hurrengo hiru ekitaldietarako aurreikusten den finantza egoera.

e) Establezimenduaren oinarrizko proiektua, teknikari eskudunak idatzia, hurrengo artikuluan adierazitako moduan.

170. artikulua. Establezimenduaren proiektua.

Honako hauek osatuko dute, gutxienez, establezimenduaren oinarrizko proiektua:

a) Deskripzio-memoria bat, non nahitaez honako hauek adieraziko baitira:

- Proiektua osatzen duen dokumentazioa.

- Proiektuaren xedea.

- Aurrekariak.

- Proiektuaren deskripzioa, establezimenduaren kokalekua eta egoera orokorra, azalera eta haren banaketako guneen erabilera barne; halaber, erabilitako materialak, joko mahaien eta makineriaren banaketa eta zerbitzari eta instalazioen kokalekua eta, besteak beste, bolak ateratzeko gailuarena, pantaila argidunena, monitoreena eta jokoan aritzeko gainerako elementu beharrezko edo osagarriena, eta hartutako soluzioen justifikazioa.

- Areto, lokal eta/edo joko-eremu bakoitzaren edukierak.

- Aurrekontua.

b) Planoak, proiektuari erantsitako soluzioen ezaugarriak zehazteko moduko eskaletan:

- Establezimenduaren egoerarena.

- Kokalekuarena, eraikinaren barrenean, inguruko bide eta eraikinak azaltzen direla.

- Solairu(ar)ena, egokitu aurreko konfigurazioan eta egokitu ondokoan, banaketa barne dela; orobat, sekzioko eta xehetasun planoak, behar diren heinean.

171. artikulua. Eskaeren lehentasuna.

1. Eskaera bat baino gehiago baldin badago joko-lokal baten instalaziorako eta funtzionamendurako baimena lortzeko eta foru dekretu honetan ezarritako distantzia-mugek eragiten badiete, Jokoa Arautzeko Agintaritzak baimena emanen dio lege-eskakizunak betetzen dituen lehenengoari.

2. Eskaera bat baino gehiago baldin badago instalaziorako eta funtzionamendurako baimena lortzeko eta joko-lokal mota jakin baten baimenen guztizko kopuruari ezarritako mugak eragiten badie, lehiaketa publiko bidez ebatziko dira eskaera horiek, bat etorriz Jokoari buruzko abenduaren 14ko 16/2006 Foru Legearen 8. eta 13. artikuluetan ezarritakoarekin.

172. artikulua. Ebazpena.

1. Jokoa Arautzeko Agintaritzak txosten bat eskatuko die departamentu eskudunei, egiaztatzeko betetzen direla Jokoari buruzko 16/2006 Foru Legearen 14.6 artikuluan aipatzen diren zentroetan ezarritako gutxieneko distantziak; era berean, txosten bat eskatuko dio joko-lokala kokatuko den herriko udalari.

2. Espedientea osatuta, aurkeztutako dokumentazioa aztertuta eta proiektua foru dekretu honetan eta jokoa eta apustuak arautzen dituzten gainerako arauetan ezarritako eskakizunetara egokituta, Jokoa Arautzeko Agintaritzak hiru hilabeteko epean ebatziko du baimena ematea edo ukatzea.

3. Epea ebazpenik eman eta jakinarazi gabe iraungita, interesdunak zilegi izanen du baimena ezetsitzat emateko, administrazioaren isiltasunagatik.

4. Kasu hauetan ukatuko da baimena:

a) Indarra duen araudian ezarritako edozein beharkizun betetzen dela ez frogatzeagatik.

b) Eskaera joko plangintzara ez egokitzeagatik (plangintza hori Jokoari buruzko abenduaren 14ko 16/2006 Foru Legearen 8. artikuluan xedatutakoan oinarrituta ezarririk egonen da).

c) Esleipenduna ez izateagatik jokoaren eta apustuen jarduerari dagokion eremuan baimenak esleitzeko deitutako lehiaketa publikoan, bat etorriz Jokoari buruzko abenduaren 14ko 16/2006 Foru Legearen 13. artikuluko 2. apartatuan ezarritakoarekin.

173. artikulua. Jardueraren hasiera.

1. Joko-lokalek instalazio- eta funtzionamendu-baimenean adierazitako gehieneko epean hasi beharko dute jarduera. Epe hori proiektu bakoitzaren tamainaren arabera zehaztuko da, eta ezin izanen da urtebetetik gorakoa izan bingo, joko-areto eta kirol-apustuetarako lokaletarako.

Titularraren borondatearekin zerikusirik ez duten arrazoiengatik ezin bada funtzionamenduan jarri, titularrak egoki den luzapena eskatzen ahalko du instalazio-baimenean ezarritako epe berean, eta epea betetzea eragozten duten arrazoiak behar bezala eta zehatz-mehatz justifikatu beharko ditu.

2. Instalaziorako eta funtzionamendurako baimenaren titularra den joko-enpresak Jokoa Arautzeko Agintaritzari jakinarazi beharko dio, gutxienez hogei eguneko aurrerapenarekin, zer egunetan hasiko den joko-lokalean eginen den jarduera, eta jakinarazpenarekin batera honako dokumentazio hau aurkeztu beharko du:

a) Foru dekretu honen 29. artikuluan aipatzen den fidantza eratu eta utzi izana frogatzen duen dokumentua.

b) Teknikari eskudunak sinatutako ziurtagiria, egiaztatzen duena aurkeztutako proiektuaren arabera obra amaitu dela, eta adierazten duena, hala badagokio, organo eskudunak eskatutako neurri zuzentzaileak hartu direla.

c) Baimenaren titularra den enpresaren erantzukizunpeko adierazpena, zehazten duena behar bezala jarri direla funtzionamenduan jokoaren garapenarekin eta lokalerako sarbidearen kontrolarekin lotutako instalazio guztiak eta horretara bideratutako baliabide teknikoak.

174. artikulua. Instalaziorako eta funtzionamendurako baimenen indarraldia, eskualdaketa eta iraungitzea.

1. Joko-lokalen instalaziorako eta funtzionamendurako baimenek indarraldi mugagabea izanen dute.

2. Aurreko apartatuan xedatutakoa gorabehera, baimendutako joko-enpresei lotutako joko-lokalen instalaziorako eta funtzionamendurako baimenek gaikuntza-tituluan ezarritako indarraldi bera izanen dute.

3. Joko-lokalen instalaziorako eta funtzionamendurako baimenak ezin izanen dira hirugarren pertsonen bitartez laga edo ustiatu, eta, oro har, eskualdatzen ahalko dira gaikuntza-titulua duten eta Nafarroako Jokoen eta Apustuen Erregistroan inskribatuta dauden joko-enpresen artean.

4. Aurreko paragrafoan xedatutakoa gorabehera, lehiaketa publiko bidez joko-lokalen instalaziorako eta funtzionamendurako emandako baimenak ezin izanen dira eskualdatu.

5. Baimenak eskualdatzeko, Jokoa Arautzeko Agintaritzaren baimena beharko da. Aldez aurretik, enpresa eskuratzaileak egiaztatu beharko du foru dekretu honetan ezarritako betekizunak betetzen direla honako hauei dagokienez: lokalaren erabilgarritasuna, fidantzaren eraketa eta gordailua eta jokoaren garapenarekin lotutako instalazio guztien funtzionamendu egokia, bai eta, hala badagokio, lokalerako sarbidearen kontrola ere.

6. Kasu hauetan iraungiko dira joko-lokalen instalaziorako eta funtzionamendurako baimenak:

a) Jokoari buruzko abenduaren 14ko 16/2006 Foru Legearen 14. artikuluaren 5. apartatuan (edo hura ordezten duen arauan) adierazitako kasuetako edozein gertatzeagatik.

b) Iraungitzeagatik, jarduera hasi ez delako instalaziorako eta funtzionamendurako baimenean adierazitako epean edo jarduera urtebete baino gehiago itxi delako, kontuan hartu gabe nahita gertatu den edo beste edozein arrazoirengatik.

c) Fidantzak ezarritako epean ez berrezartzeagatik, fidantzaren zenbatekoa murriztu denean.

d) Titulua ematea ekarri zuten baldintzak, enpresa titularrari edo lokalari buruzkoak, betetzeari uzteagatik.

175. artikulua. Aldaketak.

1. Honako aldaketa hauek beharko dute Jokoa Arautzeko Agintaritzaren aldez aurreko baimena:

a) Lokaleko joko edo modalitateren baten funtzionamendua hiru hilabetetik gora eteteko.

b) Aldaketak egiteko lokalaren espazioen azaleran, banaketan edo kopuruan eta xedapenean, baita jokalari postuen arabera neurtutako edukieran ere.

c) Joko-lokalerako sarbidea kontrolatzeko erabiltzen diren sistemak aldatzeko.

2. Berariazko ebazpena eman eta jakinarazteko epea hilabetekoa da gehienez, eskaera aurkeztu eta biharamunetik kontatzen hasita. Epe hori igarotzen bada prozedura amaitzen duen ebazpena jakinarazi gabe, baietsitzat joko da.

3. Gutxienez hogei eguneko aurrerapenaz jakinarazi beharko zaizkio Jokoa Arautzeko Agintaritzari aldaketa hauek:

a) Jokoa garatzeko eta praktikatzeko behar diren materialen aldaketak.

HIRUGARREN ATALA. BINGOETARAKO XEDAPEN ESPEZIFIKOAK

176. artikulua. Jokoaren definizioa eta eskaintza.

1. Bingoak lokal mota bat dira, espazioak dituztenak nagusiki bingoan -edozein modalitatetan- ohikotasunez eta jarraian jokatzeko.

2. Lokal horietan, modu osagarrian, honako hauen bidez egiten diren jokoetan aritzen ahalko da:

a) Programatutako saria duten joko-makinak, edo BR, BS, BG, BM eta BMB motakoak.

b) Apustu-makina lagungarriak.

c) Txartel-jokoa.

177. artikulua. Plangintza neurriak.

1. Bingoek, gutxienez, eremu nagusi bat izan beharko dute, bingo jokorako berariaz mugatutakoa, eta, hala badagokio, bigarren eremu osagarri bat, joko- eta apustu-makinak instalatzeko mugatutakoa. Txartel-jokoa edozein joko-eremutan egiten ahalko da.

2. Eremu osagarri bakoitzaren azalera ez da inola handiagoa izanen ere eremu nagusiaren azalera baino.

178. artikulua. Edukiera eta funtzionaltasunak.

1. Bingoan jokatzeko eremuak edo eremuek gutxienez ehun eta berrogeita hamar jokalari-postu izan beharko dituzte, eta gehienez seiehun.

2. Eremu horiek halako moduan kokatu beharko dira, ezen jokoan parte hartzen duten jokalari guztiek beren kokalekutik ikusgai izanen baitute, zuzenean edo pantailak, panel argidunak, joko elektronikoen terminalak edo euskarriak erabilita, jokoan diren kartoiei eta sarien zenbatekoei buruzko informazioa, baita bolak aterata edo beste edozein prozedurez ausaz agertzen diren zenbakiak eta irudikapen grafikoak, eta, zein den kasua, zenbaki ordinala ere; horrela bermatuko da jokalari guztiek aldi berean izatea aukera informazioa ikusteko eta sariak kantatzeko.

3. Betiere, bingo aretoak sistema akustiko nahikoa izan beharko du jokoan diren partidak edo haietako gorabeherak guztiz helarazten direla bermatzeko.

LAUGARREN ATALA. JOKO-ARETOEN XEDAPEN ESPEZIFIKOAK

179. artikulua. Jokoaren definizioa eta eskaintza.

1. Joko-aretoak lokal mota bat dira, nagusiki erabiltzen direnak ohikotasunez eta jarraian jokatzeko programatutako saria duten joko-makinekin, "B" motakoekin.

2. Lokal horietan, osagarri gisa, honako hauek egiten ahalko dira:

a) Apustu-makina lagungarrien bidez garatutako jokoak.

b) Txartel-jokoa.

3. Joko-aretoak "joko-aretoa" izen generikoarekin ezagutuko dira, eta aurrean lokala bereizten eta identifikatzen duen izena jarriko da.

180. artikulua. Plangintza neurriak.

1. Joko-aretoek eremu nagusi mugatu bat izan beharko dute, gutxienez, programatutako saria duten joko-makinak instalatzeko, eta, hala badagokio, berariaz mugatutako eremu osagarri bat edo gehiago, apustu-makina lagungarriak instalatzeko. Txartel-jokoa edozein joko-eremutan egiten ahalko da.

2. Eremu osagarriaren azalera ez da inola handiagoa izanen ere eremu nagusiaren azalera baino.

181. artikulua. Edukiera.

Lokal horien joko eremuak edo eremuek 150 metro koadroko azalera erabilgarria izan beharko dute gutxienez.

BOSGARREN ATALA. KIROL-APUSTUETARAKO LOKALEN BERARIAZKO XEDAPENAK

182. artikulua. Jokoen definizioa eta eskaintza.

1. Kirol-apustuetarako lokalak apustuak ohikotasunez eta jarraian ustiatzeko erabiltzen diren lokalak dira.

2. Lokal horietan, osagarri gisa, honako hau egiten ahalko da:

- Txartel-jokoa.

3. Kirol-apustuetarako lokalak "kirol-apustuetarako lokala" izen generikoarekin ezagutuko dira, eta aurrean lokala bereizten eta identifikatzen duen izena jarriko da.

183. artikulua. Plangintza neurriak.

Txartel-jokoa edozein joko-eremutan egiten ahalko da.

184. artikulua. Edukiera.

Apustu-dendetako joko-eremuak gutxienez 50 metro koadroko azalera erabilgarria izan beharko du.

SEIGARREN ATALA. JOKORAKO GAITUTAKO BESTE LOKAL BATZUK

185. artikulua. Ostalaritzako establezimenduak.

1. Berariaz baimendutako tabernek, kafetegiek, taberna bereziek eta ikuskizun-kafetegiek, foru dekretu honetan ezarritako betekizunak eta baldintzak betetzen badituzte, sari programatuko joko-makinak eta apustu-makina lagungarriak instalatzen ahalko dituzte.

2. Joko-makinak aurreko apartatuan adierazitako lokalen barnean soilik kokatzen ahalko dira, haien kanpoko sarbidetik isolatuta, baina haien kokapen zehatzak ez du eragozpenik ekarriko jarduera-lizentzian edo irekitzeko lizentzian ezarrita dauden ebakuazio baldintzetan eta suteen aurkako babes baldintzetan.

3. Horrelako makinak aipatu ostalaritza-establezimenduetan instalatzerakoan, ezin dira paratu terraza edo bide publikoetan, ez eta lokalen kanpoaldean ere, ez eta ikastetxe-, unibertsitate-, osasungintza-, gizarte- edo gazteria-eraikinen barneko eta kirol-guneetako tabernetan edo kafetegietan.

4. Establezimendu horietan "BR" motako joko-makina bat eta apustu-makina lagungarri bat instalatzen ahalko dira.

II. KAPITULUA. JOKO EZ-PRESENTZIALA

186. artikulua. Kontzeptua eta banatzeko kanalak.

1. Joko ez-presentziala edo urrutikoa joko mota bat da, eskatzen ez duena jokalaria leku edo establezimendu baimenduetan fisikoki egon beharra, eta bitarteko elektroniko, informatiko, telematiko edo interaktiboen bidez egiten dena, hau da, ekipo, sistema, terminal, tresna eta software-materialak erabiliz, aukera ematen dutenak dokumentuak, datuak eta informazioak ekoizteko, biltegiratzeko edo transmititzeko, barnean daudela edozein komunikazio-sare ireki edo mugatu -telebista, Internet, telefonia finkoa eta mugikorra edo beste batzuk- edo komunikazio interaktiboa, denbora errealekoak edo geroratukoak izan.

2. Urrutiko jokorako berariaz arautzen diren baldintza espezifikoak alde batera utzi gabe, jokoa antolatu, ustiatu eta praktikatzeko, joko presentzialari aplikatu beharreko xedapen orokorrak bete beharko dira, eta, nolanahi ere, Jokoa Arautzeko Agintaritzaren baimena beharko da.

3. Honako banaketa-kanal hauetarako baino ez dira emanen gaikuntza-tituluak:

a) Interneteko sarea, webguneen bidez.

b) Telefono-zerbitzuetako testu-mezularitza bidez banatzeko sistemak, ahots bidezko komunikazio-zerbitzuak eta ikus-entzunezko komunikabideak.

187. artikulua. Joko problematikoa eta patologikoa prebenitzeko neurriak.

1. Joko ez-presentzialeko edo urrutiko jokoaren baimenen titularrek, Nafarroako Foru Komunitatearen esparruan soilik jarduten badute, honako ekintza hauek jaso beharko dituzte:

a) Arrisku-taldeei behar bezalako arreta ematea.

b) Beharrezkoa den informazioa eskaintzea, parte-hartzaileek modua izan dezaten hautaketa arduratsu bat egiteko. Halaber sustatuko da joko-jarduera eta horrekiko jarrera neurritsua eta arduratsua izan daitezela, ez konpultsiboak.

c) Jakinaraztea partaidetza eta sarrera debekatuta dituztela adingabeek eta Nafarroako Jokorako Sarbideko Interdikzioen Erregistroan sartutakoek, baita, kasua bada, harekin lotuta dauden guztietakoek ere, foru dekretu honen 23. artikuluan ezarritakoarekin bat, eta beharrezko kontrol mekanismoak ezartzea hori bermatzeko. Horretarako, adingabeek eta debekuen erregistroan inskribatutako pertsonek apustuetan parte hartzeko duten debekuaren berri emanen da.

d) Beren langileei prestakuntza-ikastaroak ematea joko arduratsuaren jardunari eta joko problematiko eta patologikoaren prebentzioari buruz.

e) Ludopatia-problema bat izanez gero nora jo daitekeen jakinaraziko da.

2. Joko-enpresek aukera eman behar diete parte-hartzaileei beren gordailuei borondatez mugak ezartzeko, foru dekretu honetan ezarritako zenbatekoak baino zenbateko txikiagoetan.

3. Joko problematikoaren eta patologikoaren prebentziorako ekintzek, jokalariei edo erabiltzaileei buruzko informazioa trukatzea ekarriz gero, errespetatu beharko dute datu pertsonalak babestearen eta eskubide digitalak bermatzearen alorreko araudia.

4. Ez da zilegi izanen jokalariei mailegurik ematea, ez eta beste edozein kreditu-motarik ere, ez eta haiei hobaririk, doako partidarik edo diru bihurtzeko moduko elementurik ematea edo kredituak edo maileguak lortzeko produktu finantzarioak iragartzerik ere.

Hobaritzat hartuko da partida baten prezioa, ordaintzeko koefizientea edo apustuaren kuota gutxitzea, murriztea edo beherapena edo deskontua egitea haietan.

LEHENBIZIKO ATALA. ERABILTZAILEARENTZAKO INFORMAZIOA ETA ZERBITZUAK

188. artikulua. Informazio orokorra.

Urrunetik merkaturatutako jokoetan aritu nahi duen edonork eskubidea izanen du kasuan kasuko banaketa-kanalera jotzeko joko horiei buruzko informazioa lortze aldera. Horretarako, jokalariari edukiak eskuratzen utzi aurretik, sistemak edo plataformak honako informazio hau emanen dio erabiltzaileari, inolako kosturik gabe:

a) Enpresaren identifikazioa, identifikazio fiskaleko zenbakia, Merkataritza Erregistroko inskripzio-zenbakia, egoitza soziala, telefono zenbakia, faxa edo enpresarekin zuzeneko komunikazio eraginkorra ezartzea ahalbidetzen duen beste edozein. Urrutiko jokoaren banaketa-kanala Internet sarea denean, enpresak helbide elektronikoa ere eman beharko du.

b) Eskaintzen diren jokoei eta horien oinarrizko arauei buruzko informazioa.

Gainera, zozketak badira, honako hauen berri eman beharko du: oinarriak gordailutu diren notarioa edo jokoaren arloan eskumena duen organo publikoa, eta notario-protokoloaren zenbakia edo esleitutako administrazio-zenbakia.

c) Informazio argia eta zehatza: jokoan parte hartzearen kostua, apustu-motak eta -mugak, eskainitako sarien zenbatekoa eta, jokoan sartzeak kostu gehigarria badakar, sariaren zenbatekoa.

d) Ohartarazpen bat, zehazteko 18 urtetik beherakoek, Nafarroako Jokorako Sarbideko Interdikzioen Erregistroan dauden pertsonek eta zerga-egoitza Nafarroatik kanpo duten pertsonek debekatuta dutela sartzea eta jokoan aritzea.

e) Jakinarazpen bat, ohartarazteko ezen, osasun agintarien arabera, neurriz kanpo jokatzeak osasunari kalte egiten diola eta ludopatia eragin dezakeela.

189. artikulua. Internet bidezko informazio eta zerbitzu espezifikoak.

1. Jokoaren banaketa-kanala Internet sarea denean, operadorearen webgunearen orri nagusian honako informazio hau agertu beharko da, ongi ikusteko moduan:

a) Foru dekretu honen 188. artikuluko a), d) eta e) letretan jasotako informazioa.

b) Jokoan parte hartzeko debekuak, foru dekretu honen 15. artikuluan ezarritakoak.

c) Jarraibideak eta agiri-ereduak eskura edukitzea, jokalaria sartzeko eta erreklamazioak aurkezteko.

d) Arduraz jokatzeko printzipioak.

e) Erabiltzailearen joko-ahalmena mugatzeko prozedurak, eguneko, asteko eta hileko gastu-mugak ezartzeko aukera emanda.

f) Jokoarekin lotutako arazoetan laguntza emateko elkarte espezializatuak. Jokoaren adikzioaren kontrako borrokan espezializatutako web orrietarako loturak jarriko dira.

2. Orri nagusian edo lotura bidez orri nagusitik zuzenean iristeko beste orri batean, honako informazio hau agertu beharko da:

a) Foru dekretu honen testu ofiziala, urrutitik eskaintzen diren jokoei aplikatu beharreko xedapenak adierazita.

b) Foru dekretu honen 188. artikuluaren b) eta c) letretan jasotako informazioa, enpresa operadorearen barne arauak edo erregelak barne, hala badagokio.

c) Nafarroako Jokorako Sarbideko Interdikzioen Erregistroan sartzeko eta erreklamazioak egiteko agiri-ereduak, webgunetik telematikoki izapidetzeko esteka bat gaituta.

3. Webguneak nahiz web orriak ez du izanen jokalariei finantza zerbitzuak emateko entitateen merkataritzako publizitaterik.

190. artikulua. Ikusentzunezko komunikabideen bidezko informazio espezifikoa.

1. Jokoa ikus-entzunezko komunikabideen bidez banatzen denean, enpresa operadoreak foru dekretu honen 188. artikuluan jasotako informazioa eman beharko die parte-hartzaileei, eta, gainera, parte hartzeko moduaren arabera, hurrengo apartatuetan adierazitakoa ere bai.

2. Telefono-zerbitzuen bidez parte hartzen bada (oinarri hartuta telefono finkoko, mugikorreko edo Interneteko deiak edo mezuen bidalketak), operadoreak honako hauek eman beharko ditu:

a) Informazio argia eta zehatza jakiteko jokorako sarbideak kosturik dakarren tarifazio gehigarriaren bidez, eta, hala badagokio, zein den tarifa hori, zergak barne, minutuko prezioa adierazita, denboraren arabera fakturatzen denean, edo deiaren guztizko prezioa, gainerako kasuetan, bereiz emanda zerbitzuaren zenbatekoa (bai sare finkoko telefonoetatik, bai mugikorretatik, bai Internetetik) edo mezuaren guztizko prezioa.

b) Hala badagokio, behar den informazioa, jakiteko zenbat linea dauden eta zenbat denbora itxaron daitekeen gehienez egindako komunikazio bakoitzean, alferrikako luzapenik egon ez dadin, jokoaren edukirako sarbidean justifikaziorik gabeko atzerapena ekar dezakeenik. Ildo horretan, Jokoa Arautzeko Agintaritzak gehieneko itxarote-denbora erabaki lezake.

3. Irrati- edo telebista-ataletako berezko zerbitzu interaktiboen bidez parte hartzen bada, Jokoa Arautzeko Agintaritzak parte-hartzaileei eman beharreko informazio espezifikoa erabakiko du.

191. artikulua. Informazio espezifikoa, telefonozerbitzuetako testumezularitzaren bitartez eta ahots bidezko komunikazio zerbitzuen bitartez.

Jokoa banatzeko kanala telefono-zerbitzua baldin bada zuzenean, oinarri hartuta telefono finkoko, mugikorreko edo Interneteko deiak edo mezuen bidalketa, enpresa operadoreak foru dekretu honen 188. artikuluan jasotako informazioa eman beharko die parte-hartzaileei, bai eta 190. artikuluaren bigarren apartatuan aurreikusitako informazio espezifikoa ere.

BIGARREN ATALA. JOKOAN PARTE HARTZEKO KONTROLAK

192. artikulua. Partehartzaileak baliozkotzeko pasabidea.

1. Jokoa Arautzeko Agintaritzak behar diren antolakuntza, baliabideak eta softwarea xedatuko ditu web ingurunean baliozkotze pasabideak ezartze aldera urrutitik merkaturatutako jokoetan parte hartu nahi duten pertsonentzat, egiaztatzeko adin nagusikoak direla, ez daudela sartuta foru dekretu honen 15. artikuluan jokoan parte hartzea debekatzeko ezarritako kausetan eta helbide fiskala Nafarroan dutela.

2. Baldin eta, administrazio publiko eskudunei egotz dakizkiekeen arrazoiengatik, parte-hartzaileak baliozkotzeko pasabideak funtzionatzeari uzten badio, enpresa operadoreek ez dute aurreko apartatuan jasotako baldintzak egiaztatu beharrik izanen konexio hori aktibo ez dagoen bitartean.

3. Aurrekoa gorabehera, deskonexioaren aurreikusitako iraupena kontuan hartuta, Jokoa Arautzeko Agintaritzak ordezko prozedura bat gaitzen ahalko du, aipatutako baldintzak betetzen direla kontrolatu ahal izateko.

4. Halaber, apustuak joko elektronikoaren modalitatean ustiatzeko erabiltzen diren plataforma teknologikoek behar diren gaitasunak izanen dituzte helbide fiskala Nafarroako Foru Komunitatean duten erabiltzaileek egindako eragiketen emaitzak bereizteko.

193. artikulua. Aldez aurreko egiaztapenak.

1. Enpresa operadoreek egiaztatuko dute aurreko artikuluan adierazitako baldintzak betetzen direla, jokalariaren kontua erregistratu eta ireki aurretik, parte-hartzaileak baliozkotzeko pasabidearekin linean konektatzeko sistemen bidez.

2. Baldintza horiek betetzen direla egiaztatu ondoren, enpresa operadoreak parte-hartzailea erregistratu eta joko-kontua irekiko du, eta erabiltzaile-izena eta sarbide-gakoa emanen dizkio.

3. Joko-kontua irekitzean, enpresa operadoreak aukera emanen dio erabiltzaileari bere joko-ahalmena mugatzeko, eguneko, asteko edo hileko gastu-mugak ezarriz.

194. artikulua. Erabiltzailearen erregistroa.

1. Jokoetan sartzeko eta parte hartzeko, parte-hartzaileak, berak eskatuta, sisteman edo plataforman inskribatu beharko du aldez aurretik, erabilitako banaketa-kanalaren arabera eta hurrengo apartatuetan aurreikusitako moduan.

2. Erabiltzaile-erregistroa erregistro bakar bat da, aukera ematen diona parte-hartzaileari operadore jakin baten joko-jardueretara sartzeko, eta besteak beste jasotzen dituena parte-hartzailea identifikatzeko aukera ematen duten datuak eta parte-hartzailearen eta joko-operadorearen artean transakzio ekonomikoak egitea ahalbidetzen dutenak.

3. Erregistratu aurretik, eta Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoan ezarritakoarekin bat, interesdun bakoitzari informazio hau eman beharko zaio berariaz, zehazki eta zalantzarik eragin gabe:

a) Haren datu pertsonalak fitxategi batean jaso eta tratatuko direla, eta kontsumitzaile eta erabiltzaile gisa hura babesteko erabiliko dela, baita sariak kobratuko dituela bermatzeko ere, eta datu horietarako sarbidea izanen dutela interesdunak berak, jokoaren arloan eskudun diren Administrazioaren organoek eta apustuak ustiatzen dituen enpresak.

b) Lortutako datuak, komunikazioak eta joko eta apustuen garapena gorde eginen direla jaso eta ondoko bi urtean.

c) Datuak eskuratzeko, zuzentzeko, mugatzeko, aurka egiteko, ezabatzeko ("ahazteko eskubidea"), eramateko eta erabaki automatizatuen tratamenduaren aurka egiteko eskubideak baliatzeko aukera.

4. Jokalari gisa erregistratzeko, erabiltzaileak honako datu hauek eman beharko dizkio enpresa operadoreari gutxienez:

a) Izena, deiturak, nortasun agiri nazionala (NANa), atzerritarraren identifikazio zenbakia (AITa), jaioteguna, helbidea eta posta elektronikoko helbidea.

b) Erabiltzaileak bere burua identifikatzeko eta apustuen sisteman parte hartzeko aukeratu duen izena edo gakoa.

5. Artikulu honetan jasotako aurreikuspenaren ondorioz pertsona fisikoen datu pertsonalen tratamenduak egin ahal izateko, zorrotz bete beharko da xedatuta dagoena Datuak Babesteko Erregelamendu Orokorrean eta Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoan edo hura ordezten duten arauetan.

HIRUGARREN ATALA. JOKO EZ-PRESENTZIALEKO JOKOAREN KONTUA

195. artikulua. Edukia eta sarbidea.

1. Jokoaren kontuan datu hauek agertuko dira, gutxienez:

a) Izena, deiturak, nortasun agiri nazionala (NANa), atzerritarraren identifikazio zenbakia (AITa), helbidea, jaioteguna eta posta elektronikoa.

b) Identifikatzailea, jokalariari bere kontuan sartzea ahalbidetzen diona.

c) Kontua irekitzea onartu zen eguna.

d) Erabiltzailearen kontua funtsez hornitzeko modua.

e) Apustuak egiteko ahalmenari jokalariak ezarritako mugak, eta onarpenaren eguna.

f) Historiala, gutxienez bi urtekoa, honako hauena: jokalariak izandako irabaziak eta galerak, jokalariaren kontura zenbat aldiz sartu den eta egindako finantza transakzioak.

2. Jokoaren kontuak banakako kontuak izanen dira, eta enpresa operadorea ezin izanen da hango funtsetara sartu, salbu jokatutako zenbatekoak ateratzeko. Gordailututako funtsak babesteko bermeak emanen ditu enpresa operadoreak, baita sarien ondoriozko diru-sarrerak egiteko ere.

3. Erabiltzailea bere jokoaren kontura sartzen den bakoitzean, enpresa operadoreek egiaztatuko dute, parte-hartzaileak baliozkotzeko pasabidearekiko online konexio-sistemaren bidez, ez dagoela sartuta Nafarroako Jokorako Sarbideko Interdikzioen Erregistroan.

4. Erabiltzailea bere jokoaren kontura sartzen den aldiro, informazioa emanen zaio jokatzeko debekuei eta joko arduratsuaren printzipioei buruz, jokoaren arloan eskudun den Administrazioak ezarritako formatuan.

196. artikulua. Funtzionamendua.

1. Jokalariak noiznahi eskatzen ahalko du bere joko ahalmenari jarritako mugak aldatzeko. Operadorea beharturik dago eskaera horiek berehalakoan onartzera.

2. Erabiltzaileak bere jokalari-kontuko funtsak sartu eta ateratzen ahalko ditu banku-mugimenduen bidez, edo Jokoa Arautzeko Agintaritzak berariaz baimendu dituen legezko beste ordainketa-bitarteko batzuen bidez.

3. Jokoan parte hartzeko, jokaldia edo apustua estaltzeko behar adinako saldoa izan beharko du jokalariak jokoaren kontuan.

4. Enpresa operadoreak jokoaren kontuan sartuko ditu sariak, bai eta baliogabetutako edo deuseztatutako jokaldien edo apustuen zenbatekoa ere, jokoa merkaturatzeko sistemaren edo plataformaren bidez emandako informazioan adierazitako epearen arabera. Jokoa Arautzeko Agintaritzak sarrerak egiteko epeak ezartzen ahalko ditu.

5. Parte-hartzaileak operadoreari eskatzen ahalko dio bere jokoaren kontuaren saldoa eta lortutako sariena transferitzeko, operadoreak eskainitako edozein ordainbideren bidez eta kostu gehigarririk gabe. Operadoreak dagokion ordainbideari agindu beharko dio funtsak transferitzeko, gehienez ere hogeita lau orduko epean.

197. artikulua. Deuseztatzea.

1. Enpresa operadoreak jokalari-kontua deuseztatu beharko du honako kasu hauetan:

a) Erabiltzaileak berariaz eskatu duenean eta ebatzi beharreko jokaldi edo apusturik eta kontuan saldorik ez duenean.

b) Egiaztatzen edo detektatzen duenean sartzeko baldintzak betetzen ez direla edo foru dekretu honetan jokoan parte hartzea debekatzeko ezarritako arrazoiren bat betetzen dela.

c) Egiaztatzen denean jokorako sarbiderako baldintza zehatzen beste edozein ez-betetze gertatu dela, jokalari-kontua irekitzeko betebeharrei dagokienez.

d) Hala erabakitzen denean Jokoa Arautzeko Agintaritzaren ebazpen bidez, enpresa operadoreak eskatuta, arrazoi sendoengatik, administrazio-espedientea izapidetu ondoren eta interesdunari entzun ondoren.

2. Halaber, enpresa operadoreak jokoaren kontua deuseztatzen ahalko du honako kasu hauetan:

a) Erabiltzailea ez bada jokalari-kontuan sartzen bi hilabeteko epean, sartzeko erabiltzaile izena eta gakoa eman zitzaizkionetik.

b) Jokalariak ez badu jokoan parte hartzen urtebeteko epean.

3. Jokalari-kontua deuseztatzeko unean jokalariaren aldeko saldo positiboa badago, enpresa operadoreak berehalakoan itzuli beharko dio kontuko saldoa, erabiltzailearentzako inolako gastu gehigarririk gabe, enpresaren antolakuntza arauetan aurreikusitako edozein bitarteko erabiliz.

198. artikulua. Gordailuen mugak.

1. Kapitulu honetan aipatutako jokoak eta apustuak antolatzeko eta ustiatzeko gaikuntza-titulua duten joko-enpresek muga ekonomikoak ezarri beharko dituzte jokoetan parte hartzen duen pertsonek egunero, astero edo hilero uzten dituzten gordailuetarako.

2. Muga horien zenbatekoak ezin izanen dira izan honako hauek baino handiagoak:

a) 600 euro eguneko zenbatekorako.

b) 1.500 euro asteko zenbatekorako.

c) 3.000 euro hileko zenbatekorako.

Aurreko paragrafoan adierazitakoaren ondorioetarako, honako hau hartuko da eguntzat: 00:00etatik 23:59ra bitarteko egun naturala; astetzat, asteleheneko 00:00etatik igandeko 23:59ra bitarteko aldia; eta hiltzat, kasuan kasuko hilaren 1eko 00:00etatik azken eguneko 23:59ra bitarteko aldia.

3. Joko-enpresek aukera eskaini behar diete parte-hartzaileei beren gordailuei borondatez mugak ezartzeko, orokortasunez ezarritako zenbatekoak baino zenbateko txikiagoetan. Parte-hartzaile bakoitzak berariaz eta banan-banan egiten ahalko du eskaera.

Joko-operadoreek berehala erantzun beharko diete eskaerei, eta, horretarako, automugaketarako behar diren sistema teknikoak garatu eta parte-hartzaileen eskura jarri beharko dituzte.

4. Parte-hartzaile bakoitzak, berariaz eta banan-banan, eskatzen ahalko die joko-operadoreei artikulu honen 3. apartatuaren arabera bere gordailu-konturako ezarritako mugetako edozein desagertzeko. Muga berriek gehienez ere hiru eguneko epean hartuko dute indarra, eskaera egiten den egunetik zenbatzen hasita.

5. Ezin izanen da eskatu aurreko apartatuan aurreikusitakoaren arabera parte-hartzaileak ezarritako mugak handitzea, muga horiek azkenekoz handitu zirenetik hiru hilabete igaro ez badira.

I. ERANSKINA. JOKORAKO MATERIALEN ZEHAZTAPEN TEKNIKOAK

I. KAPITULUA. XEDAPEN TEKNIKO OROKORRAK

LEHENBIZIKO ATALA. JOKO-SISTEMA TEKNIKOAK

1. artikulua. Kontzeptuak, motak eta aplikazioeremua.

1. Joko-sistema teknikotzat hartuko da jokoaren jarduera antolatzea, ustiatzea eta garatzea ahalbidetzen duten ekipo, sistema, terminal, tresna eta software-materialen multzoa.

2. Foru dekretu honen ondorioetarako, joko-sistema tekniko hauek bereizten dira:

a) Jokoaren kudeaketa integralerako sistemak: joko modalitate jakin bat merkaturatzeko gaitutako enpresa antolatzaileak erabiltzen dituen sistema informatikoak, modalitate hori antolatzeko, osorik ustiatzeko eta praktikatzeko beharrezkoak diren eragiketen euskarri direnak.

b) Interkonexio-sistemak: joko-makinen multzo bat elkarrekin establezimendu beraren barruan konektatzea ahalbidetzen duten sistemak.

c) Joko ez-presentziala ustiatzeko sistema integralak: jokoa baliabide elektroniko, informatiko, telematiko edo interaktiboen bidez antolatzeko, ustiatzeko eta praktikatzeko diseinatutako sistemak.

3. Jokoaren izaerak hala eskatzen duenean, modu subsidiarioan aplikatuko dira kapitulu honetan joko-sistema teknikoen ezaugarriak, betekizunak, elementuak eta funtzionaltasunak arautzen dituzten xedapenak, joko jakin baterako edo joko modalitate jakin baterako berariaz ezarritako xedapen teknikoei dagokienez.

BIGARREN ATALA. JOKOAREN KUDEAKETA INTEGRALEKO SISTEMAK

2. artikulua. Funtzionaltasunak.

1. Jokoaren kudeaketa integraleko sistemen konfigurazio teknikoak honako baldintza hauek betetzea ahalbidetu beharko du:

a) Egindako apustuen eragiketen erregistroari buruzko trazabilitaterako mekanismoak izatea, halako moduz non bermatuko baita eragiketa guztien historia, kokapena eta ibilbidea ezagutzea, segida kate osoan, baita sistemak biltegiratutako edozein eragiketa osoki berreraikitzeko ahalmena ere.

b) Ahultasunak berehalakoan zehazteko eta zuzentzeko aukera ematea.

c) Babesa emateko elikadura sistemak izatea, bermatuko dutenak ekipoek eta plataformek funtzionatzen segituko dutela nahiz eta matxura bat izan hornikuntza elektrikoan.

d) Egiten diren joko jarduerei dagozkien datu guztiak integratzea Jokoen Unitate Nagusian, erabilitako kanala edo modalitatea edozein izanik ere.

e) Nafarroako Foru Komunitatean joko-sistemak ustiatzeko zerbitzariek konexioa izan beharko dute Jokoen Unitate Nagusiarekin.

f) Bermatzea Jokoa Arautzeko Agintaritzak eskuragarri duela jokoaren eta haren emaitzen ikuskapena, kontrola eta jarraipena egitea.

g) Bide ematea linea bidezko konexioak egiteko administrazio publikoekin, egiaztatu dadin erabiltzaileak jokoan sartzeko baldintzak betetzen direla.

h) Joko-sisteman konexio informatiko seguru bat sartzea, zehaztuko diren administrazioen sistemekin bateragarria, egindako joko-eragiketen erregistroen kontrola eta jarraipena egiteko. Hori guztia, Jokoa Arautzeko Agintaritzak ezarritako edukiarekin eta formatuarekin bat.

i) Transakzio ekonomikoen sistema bat izatea, bermatzen duena apustuen ordainketa, sarien kobrantza eta apustuan jarritako edo jokatutako zenbatekoen itzulketa gauzatuko direla jokalariaren kontuaren bitartez, jokoaren izaerak hala eskatzen duenean.

j) Jokoaren alorrean eskumena duen departamentuaren titularraren agindu bidez zehazten diren gainerako baldintza teknikoak.

2. Jokoaren kudeaketa integraleko sistemek Jokoen Unitate Nagusiaren erreplika bat izan beharko dute, sistema nagusiaren edozein funtzionamendu okerren aurrean jokoaren jarduerarekin jarraitu ahal izateko.

3. artikulua. Jokoen Unitate Nagusiaren betekizun teknikoak.

1. Jokoaren kudeaketa integraleko sistemek Jokoen Unitate Nagusi bat izan beharko dute, honako hauek ahalbidetzeko:

a) Honako hauek erregistratzea, jokoaren izaerak hala ahalbidetzen duenean: unitatera konektatutako ekipo eta erabiltzaileek egindako joko-jarduera edo -eragiketa guztiak, apustuen eta zozketen gaineko eragiketak eta emaitzak, sarien banaketa, erabiltzaile-erregistroaren eta joko-kontuen gaineko eragiketak, datu erantsiak eta kontrolekoak eta joko-plataformaren funtzionamendu-gertaerak.

b) Jokoaren jarduerek behar bezala funtzionatzen dutela bermatzea.

c) Une oro egiaztatzea, hala behar izanez gero, egindako eragiketak, horietan parte hartu duten pertsonak eta haien emaitzak, horretarako bide ematen badu jokoaren izaerak, eta haren bidez egindako jarduketa edo eragiketa guztiak modu fidagarrian berreraikitzea.

2. Joko-enpresa gaituek ziurtatu beharko dute beharrezkoak diren segurtasun-kopiak daudela eta edozein gorabeheraren aurrean neurri teknikoak eta kontingentzia-planak aplikatzen direla datuak berreskuratu ahal izateko. Halaber, beren Jokoen Unitate Nagusiaren erreplika bat eduki beharko dute, unitate nagusia zerbitzutik kanpo dagoenean jokoaren jarduera berme guztiekin normaltasunez garatu ahal izateko.

3. Jokoa Arautzeko Agintaritzak modua izanen du Jokoen Unitate Nagusia monitorizatu ahal izateko Nafarroako Foru Komunitatetik, haren kokapena edozein dela ere. Operadoreak utziko die Nafarroako Foru Komunitateko Administrazioan jokoa ikuskatzeko eta kontrolatzeko ardura duten funtzionarioei bulego horietara sartzen, kontuan izan gabe non dauden, aurrez aurreko ikuskapenak egin ditzaten Jokoen Unitate Nagusiaren bitarteko fisikoen edozein kokalekutan.

4. Jokoen Unitate Nagusiak eta haren erreplikak konexio informatiko seguruak izanen dituzte, eta Jokoa Arautzeko Agintaritzaren eta Nafarroako Foru Ogasunaren sistemekin bateragarriak. Konexio horiek aukera emanen dute, denbora errealean, kontrola eta jarraipena egiteko gauzatutako joko-jarduerari, emandako sariei eta haietan parte hartzen duten eta saritzen diren pertsonen nortasunari, hala eskatuz gero, bai eta, hala badagokio, jokoak ezeztatzearen ondorioz itzultzen diren sariei ere, hargatik eragotzi gabe ikuskapen presentzialak egiteko aukera.

5. Jokoen Unitate Nagusia eta haren erreplika une oro sarrera-kontrola eta zaintza duten tokietan instalatuta egonen dira, eta gaitutako joko-enpresa arduratuko da haiek jagoteaz.

HIRUGARREN ATALA. INTERKONEXIO-SISTEMAK

4. artikulua. Barneko interkonexiosistemak.

1. Baldintza hauek bete beharko dira elkarri konektatuta edukitzeko joko-lokal beraren barnean sari programatua duten joko-makinak edo B motakoak:

a) Makinen interkonexioagatik lortzen ahal den sari metatuaren zenbatekoak ez du ekarriko makina bakoitzak bereiz ematen dituen sarien ehunekoa murriztea.

b) Elkarri konektatutako makina bakoitzean berariaz adierazi beharko da ematen ahalko duen gehieneko saria, bai eta elkarri konektatutako makinetan une bakoitzean metatutako zenbatekoa ere.

c) Interkonexio-sistema bakoitzak gutxienez hiru makina edo joko-postu izan beharko ditu. Makina bakoitza interkonexio-sistema bakar baten parte baino ezin da izan.

d) Saria bakarra eta komuna izanen da elkarri konektatutako makina guztietarako.

LAUGARREN ATALA. JOKO EZ-PRESENTZIALA USTIATZEKO SISTEMA INTEGRALAK

5. artikulua. Betebehar orokorrak.

1. Joko ez-presentziala ustiatzeko sistema integralek honako baldintza hauek bete beharko dituzte:

a) Jokoaren eta haren prozeduraren fidagarritasuna, segurtasuna eta gardentasuna segurtatzea, baita haren ondoriozko finantza transakzioenak ere.

b) Esku hartzen duten pertsonen eta jasotako datu pertsonalen segurtasuna eta konfidentzialtasuna bermatzea, eta jokalariarekin izaten diren komunikazioen segurtasuna bermatzeko mekanismoak izatea.

c) Ziurtatzea jokalariak erabilitako gailuetatik independentea izanen dela egindako jokaldiaren edo apustuaren emaitza.

d) Ziurtatzea egindako jokaldiaren edo apustuaren emaitzari ez diola eraginen sistema telematiko bidezko konexioaren kalitateak edo jokalariaren urrutiko konexioak edo joko-sistemaren eta jokalariek erabilitako gailuaren arteko komunikazio-kanalaren beste edozein ezaugarrik.

e) Behin formalizatuta, aukera ematea jokaldiaren edo apustuaren berrespen elektronikoa lortzeko, horietarako ezarritako gutxieneko edukiarekin.

f) Sariak ordainduko direla bermatzea, baita jokatutako zenbatekoak itzuliko direla ere, jokaldiak edo apustuak bertan behera uzten badira.

6. artikulua. Ezaugarriak eta elementu teknikoak.

1. Joko ez-presentziala ustiatzeko sistema integralek Jokoen Unitate Nagusi bat izan beharko dute, eranskin honen 3. artikuluan ezarritako baldintzetan, bai eta erabiltzaileek jokoan duten parte-hartzea kontrolatzeko beharrezkoak diren osagaiak eta mekanismoak ere, foru dekretu honen 193. artikulutik 197.era bitartean (biak barne) adierazitako ezaugarrien eta baldintzen arabera.

2. Ausazko zenbakien sortzaile bat erabiltzen denean, sortutako zenbakiak ezin izanen dira aurreikusi, ezin izanen dira zehaztu eta ezin izanen dira erreproduzitu haien serieak; eskalatze-metodoak linealak izanen dira eta alborapenik, patroirik edo aurreikusgarritasunik gabeak, eta jokoaren sinboloak edo emaitzak transkribatzeko metodoa ez da egonen ausazko zenbakien sortzailetik eratorritako zenbaki-balioez bestelako faktore baten eraginpean edo kontrolpean.

3. Sarbide fisikorako eta logikorako protokolo bat ezarriko da, eta bertan jasoko dira hura kontrolatzeko prozedurak, sartzeko baimena duten pertsonen zerrenda eta sistemetan egin ditzaketen eragiketak. Gutxienez bi urtez gorde beharko dira Jokoen Unitate Nagusira, haren erreplikara eta barne-kontroleko sistemara sartzeko erregistroak.

4. Joko bakar batean aldi berean merkaturatze- edo interakzio-kanal desberdinak erabiltzen badira parte-hartzaileekin, joko-enpresak pasabideak, interfazeak edo komunikazio-kanalak ezarri beharko ditu jokoan parte hartzeko edo elkarreragiteko bitarteko guztien artean, Jokoa Arautzeko Agintaritzak sarbidea izan dezan egin diren eragiketa eta transakzio guztietan, edozein dela ere erabilitako bidea.

5. Kontingentzia teknologikoko plan bat eduki beharko du, zerbitzuaren jarraitutasuna bermatzeko behar diren neurri teknikoak, giza neurriak eta antolaketa-neurriak jasotzen dituena, eta inoiz ere ez dituena galduko jokoen garapenari, parte-hartzaileen eskubideei edo interes publikoari eragiten dieten edo eragin diezaieketen datuak edo transakzioak.

7. artikulua. Jokoen Unitate Nagusia.

Jokoen Unitate Nagusia egokitu beharko da jokoak merkaturatzeko eta parte-hartzaileekiko interakziorako kanaletara, bermatuta geldi dadin egindako joko-eragiketa guztiak atzematen eta erregistratzen direla, honako hauek ziurtatuz:

a) Parte-hartzaileek beren joko-sistemekin egiten dituzten komunikazioen osotasuna eta konfidentzialtasuna, bai eta joko-sistemen osagaien artean eta, bereziki, Jokoen Unitate Nagusiarekin eta haren erreplikarekin egiten diren datuen komunikazioak ere.

b) Egiten diren joko-eragiketa eta transakzio ekonomiko guztien trazabilitatea eta erregistroa, erregistratutako joko-eragiketak eta transakzioak fideltasunez berregiteko moduan.

c) Datu-base seguru batean honako hauek atzematea, erregistratzea eta gordetzea: joko-eragiketak; parte-hartzea pagatzea eta lortutako sariak kobratzea; erabiltzaileen eta jokoaren erregistroak, eta zerbitzuaren gorabeherak eta etenaldiak edo jokoak desgaitzea. Erregistro horiek gutxienez lau urtez gorde beharko dira.

d) Joko-sistemaren babes fisikoa eta logikoa, eta baimenik ez duen edozein sarrera eragoztea.

8. artikulua. Webgunea.

Joko-enpresek webgunea izanen dute, eta hara iristeko domeinuaren izenak enpresaren merkataritzako marka identifikatuko du, eta ".es" motako domeinua edukiko. Web orria ezin izanen da webgune horretakoak ez diren beste batzuetara berbideratu, salbu domeinu nagusiaren edo web orria identifikatzen duen merkataritzako markaren domeinuaren azpidomeinuetara.

II. KAPITULUA. BERARIAZKO XEDAPEN TEKNIKOAK

LEHENBIZIKO ATALA. APUSTUAK

9. artikulua. Apustuetarako makinen betekizunak.

1. Apustuak saltzeko terminalak eta apustu-makina lagungarriak apustuen unitate nagusiarekin lotuta egonen dira eta bide emanen dute apustuak egin eta balioztatzeko. Horretarako, apustuaren txartela edo gordekina emanen dute.

2. Apustu-makina lagungarriak automatikoak izanen dira, eta prestatuta egonen dira apustua formalizatzeko, bidezkoa bada kobrantzako eta ordainketako txartelak kudeatzeko, eta haien funtzionaltasun guztiak betetzeko. Jokalariak beste inoren esku-hartzerik gabe maneiatuko ditu.

3. Bingo, joko-areto eta kirol-apustuetarako lokalez bestelako lokal baimenduetan instalatutakoek erabilerarako dituzten elementu teknikoek behartuko dute erabiltzailea bere burua identifikatzera, hirugarrenen esku-hartzerik gabe, aldez aurretik eta nahitaez, egiaztatze aldera Nafarroako Jokorako Sarbideko Interdikzioen Erregistroan sartuta dauden edo ez eta adinez nagusiak direla.

Dituzten elementu teknikoei esker, joko-partidak amaitu ondoren eta erabiltzen ari ez diren bitartean, atsedenean egonen dira, soinu-, ikusmen- edo argi-estimulurik eman gabe.

Betekizun horiek egiaztatzeko, jokoaren alorrean eskumena duen departamentuak ezarriko ditu zehaztapen teknikoak.

4. Apustuak saltzeko terminalak operadore batek maneiatuko ditu, zeinak ez du zerikusirik izanen jokalariarekin eta jardunen baitu terminalak instalatuta dauden establezimenduan.

5. Makinetan, modu argian eta ikusteko moduan agerrarazi beharko da adingabeek debekatuta dutela apustuetan parte hartzea eta jokatzeak adikzioa edo ludopatia sortzen ahal duela.

6. Apustu-makina lagungarriak eta apustuak saltzeko terminalak ez dira banaka homologatuko, baizik eta joko-sistema teknikoaren osagai gisa.

10. artikulua. Apustuaren txartela edo gordekinen betekizunak.

1. Apustuaren txartelek edo gordekinek segurtasun neurriak eta benetakotasuneko eta iruzurraren aurkako bermeak izan beharko dituzte, horretarako erabiliz paper ez-estandarraren kalitateak, ur-markak, segurtasun-tintak edo mikrotestuak, edo, oro har, teknologikoki eskuragarri dagoen eta lortu nahi den erabilerarako egokia den beste edozein gailuren bidez.

2. Apustuaren txartela edo gordekinak gutxienez honako alderdi hauek egiaztatuko ditu:

a) Apustuak ustiatzeko baimenduta dagoen enpresaren identifikazioa, bere identifikazio fiskaleko zenbakia eta Nafarroako Jokoen eta Apustuen Erregistroko inskripzioaren zenbakia adierazita.

b) Apustua zein terminal edo makina lagungarritan egin den, haren identifikazioa.

c) Apustua zein gertakariri buruz egin den.

d) Egindako apustuaren modalitatea eta zenbatekoa.

e) Apustuaren koefizientea, halakorik bada.

f) Egindako iragarpena.

g) Apustua formalizatu deneko ordua, eguna, hilabetea eta urtea.

h) Apustuaren txartela edo gordekina modu bakar eta esklusiboan identifikatu ahal izateko zenbakia edo konbinazio alfanumerikoa eta barra-kodea.

3. Txartela edo gordekinean jokatzeak adikzioa edo ludopatia sortzen ahal duela adierazteko oharra agerrarazten ahalko du.

BIGARREN ATALA. BINGO TRADIZIONALA

11. artikulua. Kartoiak.

1. Kartoi errealak jokalariek markatzen ahal dituzten materialez egindakoak izanen dira, Nafarroako Foru Ogasunak emanen ditu eta produktu estankatuak izanen dira, kontrabandoaren gaineko legerian aurreikusitako ondorioetarako.

2. Aurreko apartatuan xedatutakoa gorabehera, aretoan kartoiak inprimatze sistemak erabiliz jaulkitzeko baimena ematen ahal da, sistemaren fidagarritasuna eta segurtasuna ziurtatzeko eta tributazioaren bermea babesteko ezartzen diren baldintzak betez gero.

12. artikulua. Zenbakiak edo irudikapen grafikoak ateratzeko sistema eta mekanismo osagarriak.

1. Ekipo elektromekanikoak erabiltzen ahal dira kartoietan markatu beharreko zenbakiak edo irudikapen grafikoak ateratzeko, bola zenbakidunak ausaz aterata, edo ekipo elektronikoak, zenbaki horiez ausaz sortzeko.

2. Partidak jokatzean, beharrezkoa den modalitateetan, aurreko apartatuan xedatutakoaren arabera ateratzen den zenbakia megafoniaz iragartzeko, esatari bat egoten ahal da edo irakurri eta hitz egiteko gailu automatikoak erabiltzen ahal dira.

13. artikulua. Partidak Egiaztatzeko eta Artxibatzeko Sistema (PEAS).

PEAS sistema informatiko bat da, azken hemezortzietako hilabetean jasotako informazioa bilduko duena. Saio bakoitzaren akta bitarteko elektronikoak erabiliz eginen da. Aktaren aurretik, saioa hasi zen eguna eta ordua aipatzen dituen hasierako eginbidea joanen da. Akta partidetako bakoitza jokatzen den bitartean idatziko da, eta saio bakoitzaren bilakaera azaldu beharko da. Saioa amaitzean itxierako eginbide bat agertuko da. Bi eginbideetan eta, oro har, egiten diren eginbide guztietan, enpresak ondorio horretarako izendatzen duen langilearen sinadura eta nortasun agiri nazionalaren edo baliokidearen zenbakia agerraraziko dira.

Aktan, partida bakoitzerako, honako hau jasoko da: partidaren ordena-zenbakia, erabilitako kartoien aurrealdean ageri den balioa, saldutako kartoien kopurua (seriea eta hasierako nahiz amaierako ordena-zenbakia adierazita), bildutako kopuru osoa eta partidan ordaindu behar diren edo, bidezkoa bada, ordaintzen ahal diren sariei dagozkien kopuruak, bolak zein ordenatan atera diren, bola bakoitzari dagokion zenbakia adierazita eta partida bakoitzean emandako sarien zenbatekoa, baita, aurreko apartatuan aipatu diren baldintzetan egindako eginbide bereizien bidez, gorabeherak eta jokalarien erreklamazioak ere, halakorik egonez gero.

14. artikulua. Sarien liburua.

1. Sarien liburuak azken lau urteetan sortutako informazioa bilduko du, eta honako hauek jasoko ditu, formatu fisikoan edo elektronikoan: 3.000 euro garbitik gorako sariak (bidezkoa bada, bingo jokoan lortutako sarien zenbatekoa kargatzen duten zuzeneko tributuak kendu ondoren) lortu dituzten jokalarien nortasuna (izen-abizenak eta identifikazio fiskaleko zenbakia), lortutako sariaren zenbateko zehatza, lortu den data eta hartzailearen sinadura.

2. Sarien liburuan eta PEASen jasotako informaziora honako hauek baino ez dute sarbidea izanen: baimenaren enpresa titularrak, Nafarroako Foru Komunitateko Administrazioko funtzionarioek, jokoaren eta haren tributuen ikuskapena eta kontrola beren gain hartzen duten funtzionarioek eta organo judizialek.

15. artikulua. Administrazioarekin komunikatzeko sistemak.

Baimendutako enpresak konexio informatiko bat jarri beharko du PEASen eta Nafarroako Foru Komunitateko jokoaren, apustuen eta tributuen arloko organo eskudunen artean, horiek saio eta partida bakoitzeko datu hauek denbora errealean ezagutu ahal izan ditzaten:

a) Saio bakoitzean:

a.1. Jokatutako partiden kopurua.

a.2. Saldutako kartoi kopurua.

a.3. Kartoien salmentatik bildutako dirua.

a.4. Sarietarako zenbatekoa.

a.5. Zergetarako eta zerga-tasetarako zenbatekoa.

b) Partida bakoitzean:

b.1. Hasiera-data eta -ordua.

b.2. Kartoien salmentatik bildutako dirua.

b.3. Sarietarako zenbatekoa.

b.4. Zergetarako eta zerga-tasetarako zenbatekoa.

b.5. Saldutako kartoien zenbakia, ageriko balioa eta seriea.

b.6. Bolak zein ordenatan atera diren, bola bakoitzari dagokion zenbakia adierazita.

b.7. Emandako sarien zenbatekoa.

c) Denbora-aldietarako:

c.1. Saldutako kartoien zenbakia eta ageriko balioa.

c.2. Kartoien salmentatik bildutako dirua.

c.3. Win-a (bildutako zenbatekoaren eta sarietan emandako zenbatekoaren arteko aldea).

HIRUGARREN ATALA. JOKO-MAKINAK

16. artikulua. Jokoprograma.

Foru dekretu honen ondorioetarako, joko-programatzat hartzen da softwarea edo sententzia-multzoa, programazio-lengoaian, biltegiratzeko gailu batean edo gehiagotan gordetzen dena, makina baten jokoaren garapena kontrolatzen duena eta lotura zuzena duena jokoaren arloan aplikatu beharreko araudiak eskatzen dituen betekizunekin.

17. artikulua. Gauzazko saria duten jokomakinak, edo A motakoak.

Gauzazko saria duten joko-makinak edo A motakoak ustiatzean, gutxienez partida guztien balioaren ehuneko berrogeita hamar itzuli beharko dute sarietan.

18. artikulua. B motako makinak.

1. Programatutako saria duten B motako joko-makinek honako baldintza hauek bete beharko dituzte:

a) BR motako makina bakoitzak berrogei mila partidako ziklo bakoitzean egindako partiden balioaren ehuneko 70 itzuli beharko du gutxienez sarietan.

b) BS motako makina bakoitzak berrogei mila partidako ziklo bakoitzean egindako partiden balioaren ehuneko 70 itzuli beharko du gutxienez sarietan.

c) Balizko konbinazio guztietatik ondorioztatzen den partida estatistikaren arabera, BG motako makina bakoitzak duen sarien itzulketa portzentajea ez da izanen egindako apustu guztien %80tik beherakoa.

d) Joko-programak ezin izanen du ezarritako gehieneko saria baino zenbateko handiagoa lortzea ahalbidetzen duen inolako kateamendurik edo sari-segidarik eragin, eta partida batean lortutako edozein sari kobratzeko, ezin izanen du txanpon edo kreditu gehigarriak gastatzeko baldintzarik jarri.

e) Partidaren batez besteko iraupena ez da 3 segundo baino laburragoa izanen, eta 30 minutuko aldietan zenbatuko da.

f) Erabiltzaileak edozein unetan berreskuratzen ahalko du metatutako zenbatekoa, betiere partidak irauten duen bitartean ez bada.

g) Makinen kreditu-kontagailuak ez du onartuko 10 eurotik gorako metaketa.

h) Lortu arren, ordaindu ez diren eta sarien markagailuan metatuta dauden sarien zenbatekoa erreserbako kontagailura eramaten ahalko da edozein unetan. Horrek atera eta berriro lortzea edo kredituen kontagailura eramatea ahalbidetuko du, jokalariak nahi badu eta berariaz eskatzen badu. Bestela, kredituen kontagailura eramanen du zuzenean, jokalariak nahi badu eta berariaz eskatzen badu; kasu horretan, horretarako lehen aipatu den muga errespetatuko da.

Ostalaritza-establezimenduetan instalatutako BR motako makinek ezin izanen dute inolako soinu-gailurik instalatuta izan, baldin eta gailu horien helburua bada bertaratzen diren pertsonen arreta erakartzea apeu gisa jokalaririk ez dagoen bitartean.

2 BM motako joko makinak BR, BS edo BG motako joko-makinak dira, joko-postu bat baino gehiago dutenak eta aukera ematen dutenak bi jokalarik edo gehiagok bereiz edo batera parte hartzeko.

Postu anitzeko edo BM motako makinek, BR, BS edo BG motako joko-makinez osatutakoek, sarietako itzulketen ehunekoari dagokionez, kasuan kasuko makina motarentzat ezarritakoari jarraituko diote.

BMB motako makinetan, balizko konbinazio guztietatik ateratzen den partida estatistikaren arabera, sarietan itzultzen den portzentajea ez da makinan guztira egindako apustuen %80 baino gutxiago izanen.

3. Diru-zorroek txanponak edo billeteak onartzen ahalko dituzte baldin eta haien balio nominala ez bada makina mota bakoitzerako partidaren gehieneko prezioa halako berrogeita hamar baino handiagoa, foru dekretu honen 139. artikuluan ezarritakoaren arabera.

19. artikulua. Kontagailuak eta ohartarazleak.

1. Joko-makinek honako baldintza hauek betetzen dituzten kontagailu elektronikoak izan beharko dituzte:

a) Administrazioak bere kabuz eta zuzenean irakurtzeko aukera ematea.

b) Horiek instalatuta dituen makina identifikatzea.

c) Seriatuta eta edozein manipulazioren aurka babestuta egotea.

d) Datuak memorian biltegiratuta izatea, nahiz eta makina deskonektatuta egon, eta makina erabiltzea eragoztea, kontagailuan matxura badago edo hori deskonektatuta badago.

e) Honako hauei buruzko datuak gordetzea, modu iraunkorrean eta lehenengo instalazioa egin zenetik metatuta, eta urtez urte banakatuta: egindako partiden edo apustuen kopurua, bildutako edo sartutako dirua, emandako sariak eta haien ehunekoa.

2. Horrelako makinei atxikitako kontagailuak Estatuko araudian aurreikusitako kontrol metrologikoaren mende daude.

3. Artikulu honetako 1. apartatuan aipatzen diren kontagailuak instalatzea ez da nahitaezkoa izanen aldez aurretik baimendutako sistema informatiko zentral batera konektatuta dauden makinetarako, baldin eta sistema horretan erregistratuta geratzen badira artikulu honetan oro har eskatzen diren funtzionaltasun berberak.

20. artikulua. Segurtasun gailuak.

1. Joko-makinek segurtasun-gailu hauek izanen dituzte:

a) Makinaren funtzionamendua eta erabilera eragozten dutenak edo makina automatikoki deskonektatzen dutenak, behar bezala funtzionatzen ez dutenean nahitaezko kontagailuek edo, hala badagokio, horien ordezko sistema informatikoak.

b) Kontagailuak manipulatzea eragozten dutenak, haien memoria babesten dutenak, baita korronte elektrikoa eteten denean ere, eta edozein partida berriz hastea ahalbidetzen dutenak etenaldiaren unean zegoen egoeran.

c) Jokoaren memoria bere osotasunean babesteko mekanismoak, memoria manipulatzen saiatzen bada.

2. Arrabol-makinek, gainera, honako hauek izan beharko dituzte:

a) Gailu bat, makinari bide ematen diona arrabolen bira osoa egiteko, eta, hala badagokio, lortutako sariaren ordainketa-zikloa osatzeko, energia eten ondoren makinara itzultzen denean.

b) Makina automatikoki deskonektatzen duen gailu bat, edozein arrazoirengatik arrabolak libreki biratzen ez badira.

c) Gailu bat, ausaz aldatuko dituena biraketa-abiadurak gutxienez bi arraboletan eta, nahitaez, horietako lehenengoan, saiheste aldera arrabol mekanikoen makinetan errepikapen estatistikoak.

21. artikulua. Fabrikamarkak.

1. Joko-makinek CE marka eta adostasun-adierazpenak izan beharko dituzte, ezarrita daudenak honako hauei buruzko Europako xedapenetan: bateragarritasun elektromagnetikoa, material elektrikoaren merkaturatzea, tresna elektriko eta elektronikoetan substantzia arriskutsu jakin batzuk erabiltzeko murrizketak eta ekipo erradioelektrikoak merkaturatzea.

2. Errazago identifikatzeko, merkaturatu aurretik, enpresa fabrikatzaileak honako datu hauek grabatu beharko ditu makina bakoitzean, modu ezabaezinean, ikusteko moduan eta argi irakurtzeko moduan:

a) Fabrikatzaileak Nafarroako Jokoen eta Apustuen Erregistroan duen inskripzio zenbakia.

b) Modeloak erregistro horretan duen inskripzio-zenbakia.

c) Makinaren fabrikazio-seriea eta -zenbakia.

d) Modeloaren izena.

III. KAPITULUA. DOKUMENTAZIO TEKNIKOA ETA HOMOLOGAZIO-PROTOKOLOAK

LEHENBIZIKO ATALA. JOKO-SISTEMA TEKNIKOAK HOMOLOGATZEA

22. artikulua. Modeloen hasierako homologazioa.

1. Joko-sistema teknikoak homologatzeko eskaerak, gutxienez, honako hauek jaso beharko ditu:

a) Modeloaren izen komertziala eta joko-sistemaren eta hura osatzen duten jokoen bertsioa(k).

b) Enpresa fabrikatzailearen edo merkaturatzailearen izena eta Nafarroako Jokoen eta Apustuen Erregistroko inskripzio-zenbakia.

c) Adierazpen bat, esaten duena homologatu nahi den joko-sistemaren ereduak indarrean dagoen araudia betetzen duela.

d) Jokoa Arautzeko Agintaritzaren ebazpen bidez zehazten diren gainerakoak.

2. Homologazio eskaerari agiri hauek erantsi behar zaizkio:

a) Joko-sistema osatzen duten funtzionalitateak eta elementu teknikoak deskribatzea, baita dituen jokoak eta horiek erabiltzeko modua ere, ausazko elementuak dituen adierazita.

b) Jokorako baimendutako lokaletan instalatzeko terminalak baldin baditu joko-sistemak, terminalen ezaugarrien deskribapena.

c) Egiaztapen-txosten bat, probak eta saiakuntzak egiteko gaitutako erakundeak emana, eskatutako baimenari dagozkion baldintza teknikoak betetzeari buruzkoa.

23. artikulua. Protokoloak.

Entitate gaituak egindako ziurtapen-txostenak argi eta garbi zehaztu beharko du ea ereduaren ezaugarriak eta funtzionamendua bat datozen foru dekretu honetan eta hura garatzeko xedapenetan eskatutako betekizun tekniko eta funtzionalekin, bai eta enpresa eskatzaileak aurkeztutako dokumentazioan jasotako zehaztapenekin ere.

BIGARREN ATALA. JOKO-MAKINEN HOMOLOGAZIOA

24. artikulua. Jokomakinen hasierako homologazioa.

1. Joko-makinak homologatzeko eskaerak, gutxienez, honako hauek jaso beharko ditu:

a) Modeloaren izen komertziala eta joko-programen bertsioa(k). Ondorio horietarako, joko-programatzat hartzen da softwarea edo sententzia-multzoa, programazio-lengoaian, biltegiratzeko gailu batean edo gehiagotan gordetzen dena, makina baten jokoaren garapena kontrolatzen duena eta lotura zuzena duena aplikatu beharreko araudiak eskatzen dituen betekizunekin.

b) Adierazpen bat, esaten duena homologatu nahi den joko-sistemaren ereduak indarrean dagoen araudia betetzen duela.

c) Adierazpen bat, esaten duena behe-tentsioaren arloan indarrean dagoen erregelamendu elektroteknikoa eta horren jarraibide osagarriak betetzen direla.

d) Jokoa Arautzeko Agintaritzaren ebazpen bidez zehazten diren gainerakoak.

2. Homologazio eskaerari agiri hauek erantsi behar zaizkio:

a) Makinaren eta haren altzarien, kabineteen eta postu-posizioen behar adina argazki, makinaren neurriak adierazita.

b) Makinaren eta haren sistema elektrikoaren planoak.

c) Makinaren eskuliburu teknikoa, funtzionatzeko eta jokatzeko modua azaltzen duena.

d) Egiaztapen-txosten bat, probak eta saiakuntzak egiteko gaitutako erakundeak emana, eskatutako baimenari dagozkion baldintza teknikoak betetzeari buruzkoa.

e) Adierazpen bat, esaten duena homologatzea eskatzen den makina-modeloak erregelamendu hau betetzen duela.

f) Funtsezko parametroen laburpena, eredu ofiziala erabilita.

3. B motako joko-makinen kasuan, aurreko dokumentazioaz gain, eskaerarekin batera memoria bat aurkeztu beharko da, alderdi hauek deskribatu eta azaltzeko:

a) Partiden prezioa(k) eta makinak eman dezakeen gehieneko saria, bai eta irabazien planaren eta sarien deskribapena ere, makinak eman ditzakeen “poltsak” edo “jackpot”-ak barne, horiek lortzeko prozedura zehaztuta.

b) Sarien itzulketaren ehunekoa, portzentaje hori kalkulatzeko egin beharreko zikloa edo partida-kopurua zehaztuta.

c) Sarien ehunekoa aldatzea ahalbidetzen duten mekanismoak edo gailuak dauden ala ez, ehuneko hori adierazita.

d) Makinak duen beste edozein mekanismo edo gailu, nola funtzionatzen duen zehaztuta.

e) Joko-programaren softwarea identifikatzea, gutxienez honako algoritmo hauetatik biren bidez: CRC32, MD5 eta/edo SHA1, hura duen gailuaren edo elementuaren izena adierazita. Algoritmo horiek ordezten ahalko dira eguneratzeko, Jokoa Arautzeko Agintaritzaren ebazpen bidez.

f) Estalkia identifikatzeko eredua, zeina itsatsita egonen baita joko-programa gordetzen duten memoria, mikrokontrolagailu, disko gogor, DVD edo bestelako gailuetako bakoitzaren gainean.

g) Makinari erantsitako joko(ar)en deskribapena.

h) Modeloak duen kontagailu mota homologatuaren deskribapena.

25. artikulua. Protokoloak.

1. Entitate gaituak egindako ziurtapen-txostenak argi eta garbi zehaztu beharko du ea ereduaren ezaugarriak eta funtzionamendua bat datozen foru dekretu honetan eta hura garatzeko xedapenetan eskatutako betekizun tekniko eta funtzionalekin, bai eta enpresa eskatzaileak aurkeztutako dokumentazioan jasotako zehaztapenekin ere.

2. Nolanahi ere, enpresa fabrikatzailea behartuta egonen da Jokoa Arautzeko Agintaritzari identifikazio- eta egiaztapen-elementuetarako sarbide independentea ematera eta, eredua merkaturatu aurretik, doan ematera makinari erantsitako joko-memoriak eta kontagailuak irakurtzeko behar den material teknikoa, bai eta irakurketa-protokoloak ere.

HIRUGARREN ATALA. MODELO HOMOLOGATUAK ALDATZEA

26. artikulua. Eredu homologatuen funtsezko aldaketa.

Funtsezko aldaketak homologatzeko eskaera sustatzen duen enpresak agiri hauek aurkeztu beharko ditu:

a) Aldaketa azaldu eta deskribatzeko memoria teknikoa, aldatutako gailu edo jokoen sinadura digitalak jasoko dituena.

b) Egiaztapen-txosten bat, probak eta saiakuntzak egiteko gaitutako erakundeak emana, eskatutako baimenari dagozkion baldintza teknikoak betetzeari buruzkoa.

27. artikulua. Eredu homologatuen aldaketa ezfuntsezkoa.

Aldaketa ez-funtsezkoak homologatzeko komunikazioa sustatzen duen enpresak agiri hauek aurkeztu beharko ditu:

a) Aldaketa azaldu eta deskribatzeko memoria teknikoa; hala badagokio, joko-programaren bertsioaren aldaketa eta algoritmoak adieraziko dira, ereduaren hasierako homologazio-prozeduran erregistratutakoekin alderatuta.

b) Erantzukizunpeko adierazpena, esaten duena aldaketa ez dela funtsezkotzat jotzen, foru dekretu honen 55. artikuluan ezarritakoarekin bat.

Gobierno de Navarra

Contacte con nosotros | Accesibilidad | Aviso legal | Mapa web