LEXNAVARRA
113/2024 FORU AGINDUA, ABENDUAREN 12KOA, HEZKUNTZAKO KONTSEILARIAK EMANA, NAFARROAKO FORU KOMUNITATEKO IRAKASLE ERRETIRATUEN BORONDATEZKO LANKIDETZA ARAUTZEN DUENA UNIBERTSITATEAZ KANPOKO IKASTETXE PUBLIKOEN JARDUERETAN ETA ESPERIENTZIAREN SAREAN
BON N.º 10 - 16/01/2025
ATARIKO TITULUA. XEDAPEN OROKORRAK
- 1. artikulua. Xedea eta aplikazio eremua.
- 2. artikulua. Hartzaileak.
I. TITULUA. IKASTETXEEN JARDUERETAN LANKIDETZAN ARITZEA
I. KAPITULUA. IKASTETXEETAKO LANKIDETZA JARDUERAK
- 3. artikulua. Jardueren izaera.
- 4. artikulua. Jarduera motak.
II. KAPITULUA. IKASTETXEETAKO LANKIDETZA JARDUERETAN PARTE HARTZEKO PROZEDURA
- 5. artikulua. Ikastetxeek eskaera egitea.
- 6. artikulua. Hezkuntza Departamentuak argitaratzea.
- 7. artikulua. Irakasle erretiratuek eskaera egitea.
- 8. artikulua. Ikastetxeen hautatzeko prozesua.
III. KAPITULUA. ESKUBIDEAK ETA KONPROMISOAK
- 9. artikulua. Erretiratutako irakasle laguntzaileen eskubideak.
- 10. artikulua. Alderdien konpromisoak.
IV. KAPITULUA. LANKIDETZA AZKENTZEA ETA ORDEZKOEN ZERRENDA
- 11. artikulua. Lankidetza azkentzeko arrazoiak.
- 12. artikulua. Ordezkoen zerrenda.
V. KAPITULUA. JARRAIPENA, EBALUAZIOA ETA GAINBEGIRATZEA
- 13. artikulua. Urteko programazio orokorrean lankidetza txertatzea.
- 14. artikulua. Ikastetxeek jarraipena eta ebaluazioa egitea.
- 15. artikulua. Hezkuntzako Ikuskapen Zerbitzuak gainbegiratzea.
II. TITULUA. ESPERIENTZIAREN SAREA
I. KAPITULUA. OSAERA ETA JARDUERAK
- 16. artikulua. Esperientziaren Sarearen osaera.
- 17. artikulua. Jarduerak.
II. KAPITULUA. ESPERIENTZIAREN SAREAN PARTE HARTZEKO PROZEDURA
- 18. artikulua. Irakasle erretiratuek eskaera egitea.
- 19. artikulua. Hezkuntza Departamentuak jasotzea eta argitaratzea.
- 20. artikulua. Ikastetxeek eskaera egitea.
III. KAPITULUA. ESKUBIDEAK ETA KONPROMISOAK
- 21. artikulua. Esperientziaren Sarea osatzen duten irakasle erretiratuen eskubideak.
- 22. artikulua. Alderdien konpromisoak.
IV. KAPITULUA. LANKIDETZA AZKENTZEA
- 23. artikulua. Lankidetza azkentzeko arrazoiak.
V. KAPITULUA. JARRAIPENA, EBALUAZIOA ETA GAINBEGIRATZEA
- 24. artikulua. Esperientziaren Sarea osatzen duten irakasleen partehartzea txertatzea.
- 25. artikulua. Ikastetxeek jarraipena eta ebaluazioa egitea.
- 26. artikulua. Hezkuntzako Ikuskapen Zerbitzuak gainbegiratzea.
- Xedapen iragankor bakarra. Ikastetxeen jardueretan laguntzea 2024/2025 ikasturtean.
- Azken xedapenetako lehena. Aldatzeko gaikuntza.
- Azken xedapenetako bigarrena. Indarrean sartzea.
I. ERANSKINA. IKASTETXEEK ERRETIRATUTAKO IRAKASLEEN LANKIDETZA JASOTZEKO ESKAERA EGITEA
II. ERANSKINA. IKASTETXEEK HAUTATUTAKO IRAKASLE ERRETIRATUAK JAKINARAZTEA
III. ERANSKINA. IRAKASLE ERRETIRATUEN LANKIDETZA AZKENDU DELA JAKINARAZTEA
IV. ERANSKINA. IRAKASLE ERRETIRATUEN LANKIDETZA AZKENDU DELA JAKINARAZTEA
V. ERANSKINA. ESPERIENTZIAREN SAREAN PARTE HARTZEKO ESKAERA
Irakasleek hezkuntza administrazioak herritarren esku jartzen duen funtsezko zerbitzu publikoa ematen dute. Egiten duten jarduera, Espainiako Konstituzioaren 27. artikuluan aitortutako hezkuntzarako eskubidearen esparruan, gizarte demokratiko bateko bizikidetzaren oinarrizko printzipioei eragiten dien kontuetako bat da.
Hezkuntzari buruzko maiatzaren 3ko 2/2006 Lege Organikoak honako hau ezartzen du 104. artikuluko 1. apartatuan: "Irakasleek beren eginkizunaren gizarte-garrantziagatik merezi duten tratua, begirunea eta errespetua jasotzeaz arduratuko dira hezkuntza administrazioak".
Irakasleak dira Nafarroako hezkuntza sistema eraikitzeko oinarri nagusietako bat. Hala ere, azken urteotan irakasleen erretiroen kopuruak gora egin duenez, galdu egin da urte askotako esperientziari esker metatutako ezagutza transferitzearen balio erantsia.
Hezkuntza Departamentuak funtsezkotzat jotzen du irakasle erretiratuen lana aintzat hartzea eta aintzatestea, bai eta Nafarroako Foru Komunitateko ikastetxe publikoen bizitzan irakasle horien borondatezko lankidetza arautzeko erabakiak hartzea ere, haien ezagutzak eta esperientzia alde batera ez uzteko. Faktore horiek aktibo ezin hobea dira ikastetxeetan egiten diren jardueren kalitatea hobetzeko. Era berean, Hezkuntza Departamentuak uste du irakasle erretiratuei on egiten ahal diela beste belaunaldi batzuekin harremanetan egoteak, eta beren autoestimua indartzen ahal dela gizartearentzat zalantzarik gabe erabilgarriak diren jardueretan zuzenean parte hartzeagatik.
Horregatik guztiagatik, beharrezkoa da esperientzia duten irakasleen talentua indartzeko baldintzak ezartzea, erretiroa hartze hutsagatik egiten duten ekarpen baliotsua alde batera ez uzteko; hori guztia Nafarroako hezkuntza sistemaren kalitate eta hobekuntza irizpideei jarraikiz. Horretarako, beharrezkoa da arau esparru bat ezartzea, erretiratutako irakasleen eta Nafarroako Foru Komunitateko unibertsitateaz kanpoko ikastetxe publikoen arteko lankidetza eraginkorra bermatu eta bultzatzeko, bai eta irakasle horien esperientzia profesionalari probetxu ateratzeko ere.
Azaldutako guztia ikusita, Nafarroako Eskola Kontseiluak nahitaezko txostena eman ondoren, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1.g) artikuluan emandako ahalmenak baliatuta,
AGINTZEN DUT:
ATARIKO TITULUA. XEDAPEN OROKORRAK
1. artikulua. Xedea eta aplikazio eremua.
1. Foru agindu honen xedea da Nafarroako Foru Komunitateko unibertsitateaz kanpoko ikastetxe publikoetako zenbait jardueratan irakasle erretiratuen borondatezko lankidetza arautzea.
2. Era berean, foru agindu honen xedea da aipatu lurralde eremuan irakasle erretiratuek osatutako Esperientziaren Sarea arautzea.
1. Foru agindu honen xedapenei atxikitzen ahalko zaizkie Hezkuntzari buruzko maiatzaren 3ko 2/2006 Lege Organikoak edo Espainiako hezkuntza sistema definitu duten aurreko beste edozein lege organikok araututako unibertsitateaz kanpoko edozein irakaskuntza kidegotako erretiratuak, funtzionarioak nahiz ikastetxe publikoetan kontratatuak.
2. Artikulu honen 1. zenbakian jasotako baldintzaz gain, erretiratuek honako baldintza hauek bete beharko dituzte:
a) Nafarroako Foru Komunitateko ikastetxe publikoren batean zerbitzuak eman izana, bizilekua edozein dela ere, edo Nafarroako Foru Komunitatean bizitzea, zerbitzuak beste erkidego bateko ikastetxe publikoetan eman izan arren.
b) Diziplinazko espedienteagatik funtzionario izaera galdu ez izana, edo, kontratatutako pertsonen kasuan, kontratua gaitasun faltagatik deuseztatu ez izana, eta funtzio publikoak betetzeko desgaituta ez egotea bi kasu horietako edozeinetan.
c) Sexu Delitugileen eta Gizakien Salerosketaren Erregistro Zentralaren ziurtagiri negatiboa edukitzea, Haurrak eta nerabeak indarkeriaren aurrean osorik babesteari buruzko ekainaren 4ko 8/2021 Lege Organikoaren 57. artikuluaren arabera.
I. TITULUA. IKASTETXEEN JARDUERETAN LANKIDETZAN ARITZEA
I. KAPITULUA. IKASTETXEETAKO LANKIDETZA JARDUERAK
3. artikulua. Jardueren izaera.
1. Irakasle erretiratuek parte hartzen duten jarduerak ez dira ordainduak izanen, eta ez dute lanpostuak betetzeko eskubiderik emanen. Jarduerek eskola orduetan ikasleekin harreman zuzena izatea ekarriz gero, jardueraz arduratzen den jarduneko irakasle baten edo batzuen erantzukizun zuzenaren pean eginen dira beti. Irakasle horiek une oro egon beharko dute jardueran.
2. Erretiratutako irakasleek ikastetxe bateko jardueretan borondatez parte hartzeak ez du inola ere ekarriko ikastetxe horri dagozkion giza baliabideak murriztea.
1. Irakasle erretiratuen borondatezko lankidetza zuzendaritza taldearen jarraibideen arabera egin beharko da, eta jardueraz arduratzen den jarduneko irakasle baten edo hainbat irakasleren zuzeneko erantzukizunpean.
2. Jardueraren ardura duten irakasleak une oro egon beharko dira ikasleak dauden jarduera guztietan, eta irakasle erretiratuari esleitu zaizkion zereginak betetzen lagunduko diote.
3. Lankidetza jarduerak ez dira inola ere izanen kasuan kasuko irakaskuntzen curriculum ofiziala osatzen duten arlo, gai, esparru, modulu edo irakasgaietako eskolak ematea.
4. Irakasle erretiratuek honako jarduera hauek egiten ahalko dituzte:
a) Hitzaldiak eta beste jarduera batzuk ematea noizean behin.
b) Jarduera osagarriak eta eskolaz kanpokoak diseinatzen eta/edo gauzatzen laguntzea.
c) Irakurketa sustatzeko eta/edo eskola liburutegiak optimizatzeko programetan parte hartzea.
d) Eskolako bizikidetza hobetzeko jolasaldiak egituratzeko helburua duten jarduerak diseinatzen eta/edo antolatzen laguntzea.
e) Ikastetxeko eskola aldizkariak edo argitalpenak egiten laguntzea.
f) Txapelketak, lehiaketak, topaketak eta elkarbizitza jarduerak antolatzea.
g) Ikerketa edo berrikuntza zientifiko edo didaktikoko jarduerak egitea.
h) Ikastetxeko proiektuetan parte hartzea eta/edo laguntzea.
i) Material didaktikoak prestatzen laguntzea.
j) Laborategietan praktikak prestatzen laguntzea.
k) Ikastetxeko artxiboak mantentzeko lanetan laguntzea, ikerketa historiko, pedagogiko edo didaktikoetan aprobetxatzeko.
l) Ikastetxearen eta inguruko enpresa eta erakundeen arteko jardueretan parte hartzea.
m) Lankidetza gauzatzen ari den ikastetxearen urteko programazio orokorrean jasotako beste edozein jarduera; jarduerak, nolanahi ere, artikulu honetan ezarritako baldintzak errespetatu beharko ditu.
II. KAPITULUA. IKASTETXEETAKO LANKIDETZA JARDUERETAN PARTE HARTZEKO PROZEDURA
5. artikulua. Ikastetxeek eskaera egitea.
1. Irakasle erretiratuen lankidetza izan nahi duten ikastetxeetako zuzendaritzek Hezkuntza Departamentuari eskaera egin beharko diote lankidetza jarduera eginen den aurreko ikasturteko ekainean.
2. Eskaera egin aurretik, ikastetxeko zuzendariak eskola kontseiluari jakinarazi beharko dio hurrengo ikasturtean irakasle erretiratuen lankidetza izan nahi duela, eta kide anitzeko gobernu organo horrek erabakiko du ekimena onartzen duen ala ez.
3. Eskola kontseiluak ekimena onartuz gero, ikastetxeko zuzendariak foru agindu honen I. eranskina behar bezala beteta bidali beharko du Hezkuntza Departamentuko Ikasketak Antolatzeko Zerbitzuaren posta elektronikoko helbidera, lankidetza jarduera hasiko den aurreko ikasturteko ekainean, eta, hala badagokio, lankidetza zein hezkuntza etapatarako eskatuko den adierazi beharko du.
6. artikulua. Hezkuntza Departamentuak argitaratzea.
Ikastetxeek eskaerak bidaltzeko epea bukatu ondoren, Hezkuntza Departamentuak www.educacion.navarra.es webgunean argitaratuko du hurrengo ikasturtean irakasle erretiratuen borondatezko lankidetza jaso nahi duten ikastetxeen zerrenda, bai eta, hala badagokio, lankidetza gauzatuko den hezkuntza etapa edo etapak ere horietako bakoitzerako.
7. artikulua. Irakasle erretiratuek eskaera egitea.
1. Foru agindu honen 2. artikuluan zehaztutako baldintzak betetzen dituzten eta Hezkuntza Departamentuak argitaratutako edozein ikastetxetako jardueretan borondatez lagundu nahi duten irakasle erretiratuek dagokion ikastetxeko edo ikastetxeetako zuzendaritzan eskaera egin beharko dute.
2. Ikastetxeek interesdunei jakinaraziko diete zer lankidetza jarduera egin beharko dituzten, bai eta jarduera horien ordutegia eta egoki iritzitako beste edozein ohar ere. Informazio hori ikastetxeetako zuzendaritza taldeek zehaztutako bitartekoen bidez emanen da.
3. Ikastetxeek eskaerak jasotzeko epea iraileko lehen hiru asteak izanen dira.
4. Lankidetzan aritu nahi duten ikastetxeko edo ikastetxeetako zuzendaritzari zuzendutako irakasle erretiratuen idatzizko eskaerarekin batera, gutxienez, honako agiri hauek aurkeztu beharko dira:
a) Eskatzailearen datu pertsonalak: izen-abizenak, helbidea, helbide elektronikoa eta harremanetarako telefonoa, baita erretiroa hartu aurretik funtzioak zein irakasle kidegotan bete zituen ere, eta dagokion espezialitatea edo espezialitateak.
b) Indarreko nortasun agiri nazionalaren edo baliokidearen kopia.
c) Sexu Delitugileen eta Gizakien Salerosketaren Erregistro Zentralaren ziurtagiri negatiboa.
d) Foru agindu honen 2. artikuluan xedatutako baldintza guztiak betetzen dituela adierazten duen erantzukizunpeko adierazpena.
5. Aurreko apartatuan adierazitako agiriez gain, ikastetxeetako zuzendaritza taldeek autonomia osoa izanen dute interesdunei dokumentu gehiago aurkeztea eskatzeko, besteak beste curriculum vitaea, txostenak edo erretiratutako irakasleen merezimenduak egiaztatzeko balio duen beste edozein dokumentu.
6. Ikastetxeetako zuzendaritza taldeei dagokie beharrezkotzat jotzen diren eskaera eta/edo dokumentazio ereduak diseinatzea, bai eta dokumentazioa zuzentzeko epeekin edo beste edozein gertaerarekin zerikusia duten gorabeherak konpontzea ere.
7. Datuak eta/edo aurkeztutako dokumentazioa faltsuak badira, eskatzailearen parte hartzea baztertuko da, sor daitezkeen erantzukizunak gorabehera.
8. artikulua. Ikastetxeen hautatzeko prozesua.
1. Eskaerak aurkezteko epea bukatutakoan, eta eskatzaileek eskatutako dokumentazio guztia aurkeztu dutela eta foru agindu honen 2. artikuluan ezarritako baldintzak betetzen dituztela egiaztatu ondoren, zuzendaritza taldeak, oro har, eskaerak jasotzeko epea bukatu eta gehienez ere bost eskola eguneko epean ebatziko du zein irakasle arituko diren lankidetzan zehaztutako jardueretan.
2. Horretarako, zuzendaritza taldeak erabateko autonomia eta diskrezionalitatea izanen du hautaketa irizpide propioak ezartzeko, eta, besteak beste, honako hauek hartzen ahalko ditu kontuan: izangaien merezimenduak, eskatzaileek karrera profesionala zer irakasle kidegotan egin duten eta lankidetza jarduerak eginen dituzten kidegoarekiko egokitasuna.
3. Hautatutako pertsonen kopurua ikastetxeak behar dituen laguntzaileen kopurua baino handiagoa bada, zuzendaritza taldeak ordezko laguntzaileen zerrenda eginen du. Zuzendaritza talde horrek erabakiko du lehentasun ordena, ikastetxeak ezarritako hautaketa irizpideen arabera. Ordezkoen zerrenda hori ikasturte osoan egonen da indarrean, eta irakasle erretiratuen beharra betetzeko erabiltzen ahalko da baldin eta, foru agindu honen 11. artikuluan jasotako arrazoiren batengatik, irakasle erretiratu batek dagokion ikastetxearekin zuen lankidetza bukatzen badu.
4. Hartutako erabakia, bai hautatutako pertsonarena, bai ordezkoen zerrenda osa dezaketenena, ikastetxeko zuzendariak jakinaraziko die interesdunei, hautaketa prozesua bukatu eta gehienez ere bi eskola eguneko epean, oro har.
5. Jakinarazpen hori egin ondoren, ikastetxeko zuzendariak foru agindu honen II. eranskina behar bezala beteta bidaliko du Hezkuntza Departamentuko Ikasketak Antolatzeko Zerbitzuaren posta elektronikoko helbidera. Bertan, ikastetxearekin lankidetzan aritzeko hautatu diren irakasle erretiratuak jasoko dira oniritziarekin batera eta, hala badagokio, lankidetza gauzatuko den hezkuntza etapak aipatuko dira, baita ordezkoak izanen diren irakasle erretiratuen zerrenda ere, hala badagokio.
6. Hezkuntza Departamentuari jakinarazi ondoren, hautatutako irakasle erretiratuak ikastetxearekin lankidetzan hasiko dira ikastetxeko zuzendaritza taldeak horretarako zehaztutako egunetan.
7. Erretiratutako irakasleen lankidetzak ikasturte bakar bateko indarraldia izanen du. Beraz, beste ikasturte batez irakasle laguntzaileak izan nahi dituzten ikastetxeek beste eskaera bat egin beharko dute, foru agindu honen 5. artikuluan jasotako baldintzei jarraikiz.
III. KAPITULUA. ESKUBIDEAK ETA KONPROMISOAK
9. artikulua. Erretiratutako irakasle laguntzaileen eskubideak.
Ikastetxeetan borondatez laguntzen duten irakasle erretiratuek eskubide hauek izanen dituzte:
a) Laguntzaile den ikastetxeko zuzendariak agindutako edozein jardueratan askatasunez eta borondatez parte hartzea.
b) Ezein arrazoi edo baldintzatan oinarritutako diskriminaziorik gabe tratatzea.
c) Lankidetza hezkuntza giro egokian garatu ahal izatea eta bere eskubideak errespetatzea, bereziki osotasun fisiko eta moralerako eskubidea.
d) Eskolako bizikidetza eta ikasleen hezkuntza integrala hobetzeko beharrezkoa den parte-hartzea eta lankidetza jasotzea, une oro irakasle laguntzaile gisa dituen eginkizunak betez eta ikastetxeko gobernu organoek eta irakaskuntza koordinazioko organoek zehazten dituzten baldintzak betez.
e) Ikastetxeko instalazioak eta materialak erabiltzea, betiere irakasle titularren jarduera eragotzi gabe.
f) Ikastetxeko zuzendariak dagokion ordutegian jarduera egiteko eman dizkion lokal eta instalazioetara sarrera librea izatea.
g) Nafarroako Gobernuaren erantzukizun zibileko poliza orokorrak estaltzea ikastetxeko zuzendariak agindutako jarduera guztietan.
h) Nafarroako Foru Komunitateko Irakasleari Laguntzeko Zentroetako lantaldeetan, prestakuntza proiektuetan eta prestakuntza jardueretan parte hartzea, baldin eta plaza librerik badago eta jardunean dauden profesionalak baztertzea ez badakar.
i) Ikastetxeko kide anitzeko organoek zehazten dituzten bilkuretara gonbidatzea. Irakasle erretiratuek hitza izanen dute, baina ez botorik.
j) Lankidetza eteteko eskubidea, foru agindu honen 11.1.b) artikuluan jasotako baldintzetan.
10. artikulua. Alderdien konpromisoak.
1. Ikastetxeetan borondatez laguntzen duten irakasle erretiratuek honako konpromiso hauek hartuko dituzte:
a) Ikastetxeko zuzendaritza taldeak eta laguntzen ari den jardueren ardura duten irakasleek emandako jarraibideak errespetatzea.
b) Jarduera ahalik eta arreta handienarekin garatzea, ikastetxeko irakasleen berezko funtzioak eta beharrak oztopatu gabe.
c) Lankidetza lanak adierazitako lokaletan, ordutegian eta ezarritako maiztasunarekin egitea, ikastetxearen antolaketa ez oztopatzeko.
d) Ikastetxearen antolamendu eta funtzionamendu arauak betetzea.
e) Jarduerak modu altruistan egitea, trukean inolako ordainsari ekonomikorik jaso gabe. Dena den, ikastetxeak berak ordainduko ditu lankidetzan diharduen ikastetxeko zuzendaritza taldeak esleitutako jarduera batean parte hartzeak ekar diezazkiokeen gastuak, betiere zuzendariak aldez aurretik baimendu baditu.
2. Era berean, lankidetzan ari den ikastetxeko zuzendaritza taldeak konpromiso hauek hartuko ditu:
a) Hezkuntza komunitateak erretiratutako irakasle laguntzaileak ongi har ditzan zaintzea, bizitza osoa irakasten emateak eta egun lankidetzan aritzeko borondateak merezi duten errespetua eta begirunea emanez.
b) Erretiratutako irakasle laguntzaileen parte-hartzea erraztea, ikastetxearen baliabide material eta ekonomikoak aintzat hartuta beharrezkoak diren bitartekoez hornituz.
c) Irakasle erretiratuen jarduerak hezkuntza komunitateko gainerako kideen artean sor ditzakeen gatazketan bitartekari aritzea, betiere segurtasun pertsonala eta ongizate fisiko eta psikikoa zainduz.
d) Erretiratutako irakasle laguntzaileen jardueraren jarraipena egitea eta bukaerako memorian txertatzea, dagokion ebaluazioarekin batera.
e) Hezkuntza Departamentuak emandako xedapen edo jarraibide guztiak betetzea.
3. Bestalde, Nafarroako Gobernuko Hezkuntza Departamentuak konpromisoa hartzen du ekimen hau ikastetxeen artean zabaltzeko eta parte har dezatela bultzatzeko, bai eta irakasle erretiratuen lankidetza izateko interesa duten ikastetxeen zerrenda argitaratzeko ere, foru agindu honen 6. artikuluan ezarritakoaren arabera.
IV. KAPITULUA. LANKIDETZA AZKENTZEA ETA ORDEZKOEN ZERRENDA
11. artikulua. Lankidetza azkentzeko arrazoiak.
1. Erretiratutako irakasleen lankidetza azkentzeko arrazoiak honako hauek izanen dira:
a) Lankidetzaren indarraldia bukatzea.
b) Erretiratutako irakasle laguntzaileek ikasturtean zehar edozein unetan lankidetza bukatzea eskatzea.
c) Ikastetxeko zuzendariaren erabaki arrazoitua, irakasle erretirodunen lankidetzan irregulartasunen bat edo ez-betetzeren bat gertatu bada.
2. Ikasturtean zehar erretiratutako irakasleen lankidetza horiek berariaz eskatuta edo zuzendariak irregulartasunen edo ez-betetzeen ondorioz hala erabakita azkentzen bada, ikastetxeko zuzendariak Hezkuntza Departamentuari jakinarazi beharko dio. Jakinarazpen hori, oro har, gehienez ere bost eskola eguneko epean egin beharko da, dagokion azkentzea gertatu ondoren. Horretarako, ikastetxeko zuzendariak foru agindu honen III. eranskina behar bezala beteta bidaliko du Hezkuntza Departamentuko Ikasketak Antolatzeko Zerbitzuaren helbide elektronikora. Eranskin horretan, kontratua azkentzeko arrazoia eta, hala badagokio, baja hartuko duten irakasleen izen-abizenak adieraziko dira. Ikastetxeak ordezkoen zerrenda izanez gero, abian jarri beharreko prozedura eta Hezkuntza Departamentuari helarazi beharreko jakinarazpena foru agindu honen 12. artikuluan xedatutakoaren arabera gauzatuko dira.
12. artikulua. Ordezkoen zerrenda.
1. Ikastetxe batek ordezkoen zerrenda bat badu eta ikasturtean zehar erretiratutako irakasleen lankidetza azkentzen bada horiek berariaz eskatuta edo zuzendariak irregulartasunen edo ez-betetzeen ondorioz hala erabakita, zerrenda hori erabiltzen ahalko da sortutako beharrak estaltzeko, Hezkuntza Departamentuari jakinarazi ondoren.
2. Jakinarazpen hori egin baino lehen, ikastetxeko zuzendariak zehaztu beharko du zein izanen den sortutako beharra edo beharrak beteko dituen ordezkoen zerrendako pertsona; hala, zerrendako lehentasun ordenari jarraituz, ikastetxearekin lankidetzan aritzea onartzen duen lehen pertsona izanen da. Lankidetza ez badu ordezkoen zerrendako inork onartzen, Hezkuntza Departamentuari igorri beharreko jakinarazpenean aipatu beharko da.
3. Hezkuntza Departamentuari egin beharreko jakinarazpena, oro har, gehienez ere bost eskola eguneko epean egin beharko da, dagokion azkentzea gertatu ondoren. Horretarako, ikastetxeko zuzendariak foru agindu honen IV. eranskina behar bezala beteta bidaliko du Hezkuntza Departamentuko Ikasketak Antolatzeko Zerbitzuaren helbide elektronikora. Eranskin horretan, kontratua azkentzeko arrazoia eta, hala badagokio, baja hartuko duen irakaslearen izen-abizenak adieraziko dira, bai eta dagokion beharra beteko duen ordezkoen zerrendako pertsonaren izena, abizenak eta onespena ere.
4. Artikulu honetan xedatutakoaren ondorioetarako, ordezkoen zerrendak ikasturte bakarreko indarraldia izanen du.
V. KAPITULUA. JARRAIPENA, EBALUAZIOA ETA GAINBEGIRATZEA
13. artikulua. Urteko programazio orokorrean lankidetza txertatzea.
Irakasle erretiratuen lankidetza ikastetxearen urteko programazio orokorrean jaso beharko da. Bertan, lankidetzaren xede diren jarduerak eta horien ardura duten irakasle boluntarioak jaso beharko dira.
14. artikulua. Ikastetxeek jarraipena eta ebaluazioa egitea.
1. Ikastetxeko zuzendaritza taldeari dagokio erretiratutako irakasleen lankidetza izan duten jardueren garapen mailaren aldizkako jarraipena egitea, gutxienez hiru hilean behin.
2. Ikasturteko eskola jarduerak bukatzean, lankidetza horren azken ebaluazioa egin beharko da, eta ikasturte bukaerako memorian jaso.
15. artikulua. Hezkuntzako Ikuskapen Zerbitzuak gainbegiratzea.
Hezkuntzako Ikuskapen Zerbitzuak urteko programazio orokorra eta ikasturte bukaerako memoria gainbegiratuko ditu, foru agindu honetan ezarritakora eta erator daitezkeen xedapenetan ezarritakora egokitzen direla egiaztatzeko. Hala badagokio, ikastetxeari dagozkion zuzenketak eta doikuntzak egiteko eskatuko dio.
II. TITULUA. ESPERIENTZIAREN SAREA
I. KAPITULUA. OSAERA ETA JARDUERAK
16. artikulua. Esperientziaren Sarearen osaera.
1. Esperientziaren Sarea aditu diren gaietan irakasle edo ikertzaile gisa duten esperientzia beren borondatez partekatzea erabakitzen duten irakasle erretiratuek osatuko dute.
2. Esperientziaren Sarea osatzen duten irakasleei dagokie Nafarroako Foru Komunitateko unibertsitateaz kanpoko ikastetxe publikoetan hitzaldiak eta/edo tailerrak ematea, titulu honetan jasotako baldintzen arabera.
3. Esperientziaren Sarea Nafarroako Gobernuko Hezkuntza Departamentuko unibertsitateaz kanpoko irakasleak prestatzeko eskumena duen zuzendaritza nagusiaren mende egonen da.
1. Esperientziaren Sareko irakasle erretiratuek hitzaldiak edo tailerrak eman ahalko dituzte Nafarroako Foru Komunitateko unibertsitateaz kanpoko edozein ikastetxe publikotako irakasle, familia eta/edo ikasleentzat.
2. Esperientziaren Sareko irakasle erretiratuek parte hartzen duten jarduerak ez dira ordainduak izanen, eta ez dute lanpostuak betetzeko eskubiderik emanen. Jarduerek eskola orduetan ikasleekin harreman zuzena izatea ekarriz gero, jardueraz arduratzen den jarduneko irakasle baten edo batzuen erantzukizun zuzenaren pean eginen dira beti. Irakasle horiek une oro egon beharko dute jardueran.
3. Aurreko apartatuan xedatutakoa gorabehera, Esperientziaren Sareko irakasle erretiratuen lankidetza eskatzen duen ikastetxeak ordainduko ditu, hala badagokio, dagokion jarduera egitearen ondoriozko gastuak.
II. KAPITULUA. ESPERIENTZIAREN SAREAN PARTE HARTZEKO PROZEDURA
18. artikulua. Irakasle erretiratuek eskaera egitea.
1. Foru agindu honen 2. artikuluan zehaztutako baldintzak betetzen dituzten eta Esperientziaren Sarean borondatez lagundu nahi duten irakasle erretiratuek Hezkuntza Departamentuari eskaera egin beharko diote. Horretarako, foru agindu honen V. eranskina behar bezala beteta bidali beharko dute Hezkuntza Departamentuko Ikasketak Antolatzeko Zerbitzuaren helbide elektronikora, honako hauek adierazita, besteak beste:
a) Eskatzailearen datu pertsonalak: izen-abizenak, helbidea, helbide elektronikoa eta harremanetarako telefonoa, baita erretiroa hartu aurretik funtzioak zein irakasle kidegotan bete zituen ere, eta dagokion espezialitatea edo espezialitateak. Era berean, interesdunak ikastetxeetako zuzendariek datu pertsonal horiek eskuratzearekin ados dagoela adierazi beharko du.
b) Jardueraren izenburua.
c) Jardueraren iraupena, gutxi gorabehera.
d) Jarduera Nafarroako Foru Komunitateko zein herritan egiten ahalko den.
e) Kolektibo hartzailea.
f) Jarduera egiteko behar diren baliabide materialak edo teknikoak.
g) Jardueraren laburpena, gehienez ere hogei lerrokoa.
2. Era berean, aipatutako eranskinean adierazi beharko da hitzaldia eta/edo tailerra banaka edo taldean emanen den. Taldean emanez gero, jarduera egiten parte hartuko duten irakasleen datu pertsonalak jaso beharko dira, eta ikastetxeetako zuzendariek datu pertsonal horiek eskuratzearekin ados daudela adierazi beharko dute.
3. Artikulu honetan aipatutako eranskinari dagokionez, Esperientziaren Sarean parte hartu nahi duten irakasle erretiratuek egin nahi dituzten jarduera adina eranskin bete beharko dituzte.
4. V. eranskinaz gain, eskatzaileek honako agiri hauek txertatu beharko dituzte Hezkuntza Departamentuari egin beharreko jakinarazpenean:
a) Indarreko nortasun agiri nazionalaren edo baliokidearen kopia.
b) Sexu Delitugileen eta Gizakien Salerosketaren Erregistro Zentralaren ziurtagiri negatiboa.
c) Foru agindu honen 2. artikuluan xedatutako baldintza guztiak betetzen dituela adierazten duen erantzukizunpeko adierazpena.
Taldean egindako lankidetzen kasuan, 4. apartatu honetan zerrendatutako agiriak aurkeztu beharko dituzte hitzaldia eta/edo tailerra emanen duten pertsona guztiek.
5. Datuak eta/edo aurkeztutako dokumentazioa faltsuak badira, eskatzailearen parte hartzea baztertuko da, sor daitezkeen erantzukizunak gorabehera.
6. Artikulu honetan aipatutako eskaera urteko edozein unetan egiten ahalko da, inolako denbora mugarik gabe.
19. artikulua. Hezkuntza Departamentuak jasotzea eta argitaratzea.
1. Hezkuntza Departamentuko unibertsitateaz kanpoko irakasleak prestatzeko eskumena duen atalari dagokio egiaztatzea eskatzaileek eskatutako agiri guztiak aurkeztu dituztela eta foru agindu honen 2. artikuluan ezarritako baldintza guztiak betetzen dituztela.
2. Arestian aipatutako baldintzak betetzen dituzten irakasle erretiratu eskatzaileak Esperientziaren Sarearen datu basean sartuko dira. Datu base horretan agertuko dira harik eta, foru agindu honen 23. artikuluan jasotako baldintzetan, sare horretan parte hartzeri uzteko borondatea adierazten duten arte.
3. Hezkuntza Departamentuak www.educacion.navarra.es webgunean argitaratuko du Esperientziaren Sarean sartuz doazen jardueren zerrenda, hezkuntza komunitate osoari informazioa emateko.
4. Aurrekoa gorabehera, eta argitaratze horren ondorioetarako, ikastetxeetako zuzendariek soilik eskuratzen ahalko dituzte Esperientziaren Sarea osatzen duten irakasleen datu pertsonalak, egokitzat jotzen dituztenekin harremanetan jarri ahal izateko.
20. artikulua. Ikastetxeek eskaera egitea.
1. Hezkuntza Departamentuak argitaratutako hitzaldi eta/edo tailerren zerrenda ikusita, jarduera horietakoren bat egin nahi duten ikastetxeetako zuzendariak Esperientziaren Sareko dagokion pertsonekin harremanetan jarri beharko dira jarduera egiteko baldintzak ezartzeko, hala nola eguna, ordutegia eta egokitzat jotzen den beste edozein kontu.
2. Jarduera egin ondoren, ikastetxeko zuzendariak Hezkuntza Departamentuari jakinarazi beharko dio. Jakinarazpen hori egiteko, mezu elektroniko bat bidaliko du Hezkuntza Departamentuko Ikasketak Antolatzeko Zerbitzuaren posta elektronikoko helbidera. Mezu horretan, ikastetxean esku hartu duten eta Esperientziaren Sareko kide diren irakasle erretiratuak aipatuko dira, bai eta zer jarduera egin duten ere.
III. KAPITULUA. ESKUBIDEAK ETA KONPROMISOAK
21. artikulua. Esperientziaren Sarea osatzen duten irakasle erretiratuen eskubideak.
Esperientziaren Sarea osatzen duten irakasle erretiratuek eskubide hauek izanen dituzte:
a) Hitzaldiak eta/edo tailerrak ematen askatasunez eta borondatez parte hartzea.
b) Ezein arrazoi edo baldintzatan oinarritutako diskriminaziorik gabe tratatzea.
c) Lankidetza hezkuntza giro egokian garatu ahal izatea eta bere eskubideak errespetatzea, bereziki osotasun fisiko eta moralerako eskubidea.
d) Ikastetxeko zuzendariak dagokion ordutegian jarduera egiteko eman dizkion lokal eta instalazioetara sarrera librea izatea.
e) Nafarroako Gobernuaren erantzukizun zibileko poliza orokorrak estaltzea ikastetxeko zuzendariak eskatutako hitzaldi edo tailer guztietan.
f) Lankidetza eteteko eskubidea, foru agindu honen 23. artikuluan jasotako baldintzetan.
22. artikulua. Alderdien konpromisoak.
1. Esperientziaren Sarea osatzen duten irakasle erretiratuek konpromiso hauek izanen dituzte:
a) Hitzaldiak eta/edo tailerrak ematea adierazitako lokaletan eta ordutegian.
b) Jarduerak modu altruistan egitea, trukean inolako ordainsari ekonomikorik jaso gabe. Aurrekoa gorabehera, Esperientziaren Sareko irakasle erretiratuen lankidetza eskatzen duen ikastetxeak ordainduko ditu, hala badagokio, dagokion jarduera egitearen ondoriozko gastuak.
2. Era berean, Esperientziaren Sareko irakasleen parte-hartzea eskatu duen ikastetxeko zuzendaritza taldeak konpromiso hauek izanen ditu:
a) Hezkuntza komunitateak Esperientziaren Sarea osatzen duten irakasleak ongi har ditzan zaintzea, bizitza osoa irakasten emateak eta egun lankidetzan aritzeko borondateak merezi duten errespetua eta begirunea emanez.
b) Esperientziaren Sarea osatzen duten irakasleen parte-hartzea erraztea, ikastetxearen baliabide material eta ekonomikoak aintzat hartuta beharrezkoak diren bitartekoez hornituz.
c) Hezkuntza Departamentuak emandako xedapen edo jarraibide guztiak betetzea.
3. Bestalde, Nafarroako Gobernuko Hezkuntza Departamentuak konpromiso hauek izanen ditu:
a) Esperientziaren Sarearen ekimena ikastetxeetan zabaltzea eta parte har dezatela bultzatzea.
b) Esperientziaren Sarea osatzen duten pertsonen datu basea sortzea eta eguneratuta mantentzea.
IV. KAPITULUA. LANKIDETZA AZKENTZEA
23. artikulua. Lankidetza azkentzeko arrazoiak.
1. Erretiratutako irakasleen lankidetza azkentzeko arrazoiak honako hauek izanen dira:
a) Esperientziaren Sarea osatzen duten irakasleek berariaz eskatzea, Hezkuntza Departamentuko Ikasketak Antolatzeko Zerbitzuaren posta elektronikoko helbidera mezu elektroniko bat bidalita.
b) Hezkuntza Departamentuaren erabaki arrazoitua, irakasle erretirodunen lankidetzan irregulartasunen bat edo ez-betetzeren bat gertatu bada. Interesdunari jakinarazi beharko zaio.
2. Esperientziaren Sarea osatzen duten irakasleei dagokie jarduera bat egiteko edo ez egiteko konpromisoa hartzea. Jarduera bat egiteari uko egitea ez da azkentzeko arrazoitzat hartuko, eta ez dio eraginen etorkizunean Esperientziaren Sarean parte hartzeari.
V. KAPITULUA. JARRAIPENA, EBALUAZIOA ETA GAINBEGIRATZEA
24. artikulua. Esperientziaren Sarea osatzen duten irakasleen partehartzea txertatzea.
Ikastetxeetan Esperientziaren Sareko irakasle erretiratuen lankidetza izateko borondatea ikastetxearen urteko programazio orokorrean jaso beharko da.
25. artikulua. Ikastetxeek jarraipena eta ebaluazioa egitea.
Esperientziaren Sarea osatzen duten irakasleen lankidetza jaso duen ikastetxeko zuzendaritza taldeari dagokio lankidetza horren azken ebaluazioa egitea. Ebaluazio hori ikasturte bukaerako memorian txertatu beharko da.
26. artikulua. Hezkuntzako Ikuskapen Zerbitzuak gainbegiratzea.
Hezkuntzako Ikuskapen Zerbitzuak urteko programazio orokorra eta ikasturte bukaerako memoria gainbegiratuko ditu, foru agindu honetan ezarritakora eta erator daitezkeen xedapenetan ezarritakora egokitzen direla egiaztatzeko. Hala badagokio, ikastetxeari dagozkion zuzenketak eta doikuntzak egiteko eskatuko dio.
Xedapen iragankor bakarra. Ikastetxeen jardueretan laguntzea 2024/2025 ikasturtean.
1. 2024/2025 ikasturtean zehar ikastetxe batean lankidetzan ari diren irakasle erretiratuek laguntza ematen jarraitzen ahalko dute ikasturtea bukatu arte.
2. Aurreko apartatuan jasotakoa gorabehera, hurrengo ikasturteetan ikastetxeetako jardueretan parte hartzen jarraitu nahi duten irakasle erretiratuek foru agindu honetan ezarritako prozedurari jarraitu beharko diote.
Azken xedapenetako lehena. Aldatzeko gaikuntza.
Ikasketak antolatzearen arloko zuzendari nagusiari foru agindu honen eranskinak aldatzeko gaikuntza ematen zaio.
Azken xedapenetako bigarrena. Indarrean sartzea.
Foru agindu hau Nafarroako Aldizkari Ofizialean argitaratu eta hurrengo egunean sartuko da indarrean.
I. ERANSKINA. IKASTETXEEK ERRETIRATUTAKO IRAKASLEEN LANKIDETZA JASOTZEKO ESKAERA EGITEA
II. ERANSKINA. IKASTETXEEK HAUTATUTAKO IRAKASLE ERRETIRATUAK JAKINARAZTEA
III. ERANSKINA. IRAKASLE ERRETIRATUEN LANKIDETZA AZKENDU DELA JAKINARAZTEA
IV. ERANSKINA. IRAKASLE ERRETIRATUEN LANKIDETZA AZKENDU DELA JAKINARAZTEA
V. ERANSKINA. ESPERIENTZIAREN SAREAN PARTE HARTZEKO ESKAERA
