LEXNAVARRA
232E/2024 FORU AGINDUA, UZTAILAREN 31KOA, LANDA GARAPENEKO ETA INGURUMENEKO KONTSEILARIAK EMANA, ZEINAREN BIDEZ ARAUTZEN BAITA NEKAZARITZAKO AHOLKULARITZA ERAKUNDEAK AITORTZEA ETA ERREGISTRATZEA, NAFARROAKO 2023-2027 NPEPEAN EZARRITAKO NEKAZARITZAKO AHOLKULARITZA SISTEMAREN ESPARRUAN
BON N.º 174 - 27/08/2024
- ZIOEN AZALPENA
- 1. artikulua. Xedea.
- 2. artikulua. Aholkularitza zerbitzuen aplikazio esparrua eta gaiak.
- 3. artikulua. Aholkularitzaren azken hartzaileak.
- 4. artikulua. Aholkularitza entitateen betekizunak.
- 5. artikulua. Aholkularitza zerbitzuen zehaztapenak.
- 6. artikulua. Aholkularitzako entitate publikoa.
- 7. artikulua. Aholkularitzako entitate pribatuen onarpena.
- 8. artikulua. Nafarroatik kanpo onartutako entitateen aholkularitza.
- 9. artikulua. Nafarroako nekazaritzako aholkularitza entitateen erregistroa.
- 10. artikulua. Kontrola eta ikuskapena.
- 11. artikulua. Onarpena eta Erregistroko inskripzioa bertan behera uztea eta iraungitzea.
- Xedapen indargabetzaile bakarra. Indargabetutako arauak.
- Azken xedapen bakarra. Indarra hartzea.
NPEa 2023-2027 aldirako erreformatzean, onetsi egin da Europako Parlamentuaren eta Kontseiluaren 2021/2115 (EB) Erregelamendua, 2021eko abenduaren 2koa, zeinaren bidez ezartzen baitira Europar Batasuneko estatuek, Nekazaritza Politika Erkidearen esparruan (NPEaren plan estrategikoak), egin beharreko plan estrategikoetarako laguntzari buruzko arauak, eta indargabetzen baitira 1305/2013 (EB) eta 1307/2013 (EB) erregelamenduak. Aipatu laguntza Nekazaritza Bermatzeko Europako Funtsaren (NBEUF) eta Landa Garapenerako Europako Nekazaritza Funtsaren (LGENF) kargura finantzatzen da.
Erregelamendu horrek nekazaritza politika erkiderako (NPE) esparru juridiko berria ezartzen du, Batasunaren helburuak hobeki betetzeko; NPErako Batasunaren helburuak ezartzen ditu, eta estatu kideei aplikatu beharreko Batasunaren esku-hartze motak eta betekizun komunak zehazten ditu.
6. artikuluan NPEren zeharkako helburutzat aipatzen du hau: "nekazaritza eta landa eremuak modernizatzea, ezagutza, berrikuntza eta digitalizazioa sustatuta eta amankomunean jarrita nekazaritza eta landa eremuetan, eta nekazariek horiek har ditzaten sustatuta, ikerkuntzarako sarbidea, berrikuntza, ezagutza trukea eta prestakuntza hobetuz".
Erregelamendu horrek, 15. artikuluan, ustiategietarako aholkularitza zerbitzuen gutxieneko ildo orokorrak jasotzen ditu. Aurrerago, 78. artikuluan, ezagutzak trukatzeko eta informazioa zabaltzeko laguntzak jasotzen ditu; laguntza horiek berrikuntza, prestakuntza eta aholkularitza sustatzeko egoki den edozein ekintzaren kostuak estaltzen ahal dituzte, zerbitzuak ematen dituzten entitateen bitartez bideratuta.
Espainiako Erresumaren Nekazaritza Politika Erkidearen (NPE) 2023-2027 Plan Estrategiko Nazionalak, Batzordearen 2022ko abuztuaren 31ko C (2022) 6017 azken erabakiaren bidez onartuak, Nekazaritza Bermatzeko Europako Funtsak eta Landa Garapenerako Europako Nekazaritza Funtsak finantzatzen dituzten Batasunaren laguntzetarako, honako esku-hartze hau jasotzen du: 7202, nekazaritza ustiategientzako aholkularitza zerbitzuak, eta laguntza bat ezartzen du jarduera horiek egiten dituzten entitateentzat. Horretan, aholkularitza sistemaren ezaugarri bereziak eta Nafarroarako dituen laguntzak garatzen dira.
Ustiategientzako aholkularitza zerbitzuek alderdi ekonomikoak, ingurumenekoak eta sozialak hartu behar dituzte kontuan, nekazaritza ustiapeneko jardunbideak kontuan hartuta, eta informazio teknologiko eta zientifiko eguneratua eman behar dute, ikerketa eta berrikuntza proiektuetatik abiatuta. Hala, ustiategientzako aholkularitza zerbitzuek ekoizpen mota desberdinetara egokituta egon behar dute, nekazaritza ustiategien eta landa enpresen kudeaketa jasangarria eta errendimendu orokorra hobetzeko. Horretarako, ekonomiaren, ingurumenaren eta gizartearen dimentsioei heldu behar diete, eta NPBren plan estrategikoetan (digitalizazioa barne) ustiategietarako aurreikusitako neurrietan egin beharreko hobekuntzak zehaztu behar dituzte.
Ustiategientzako aholkularitza zerbitzuen bidez, laguntza egokia emanen da ustiategiaren garapen zikloan zehar, barne hartuta aurretiko eta hasierako ezarpena, ekoizpen ereduak kontsumitzaileen eskarietara egokitzeko bihurtzea, nekazaritza jardunbideen arloko berrikuntza, klima aldaketarekiko erresilientzia sustatzeko nekazaritza teknikak (besteak beste, nekazaritzako basogintza eta agroekologia-, animalien ongizatea hobetzea eta, behar izanez gero, gizarte laguntzako eta segurtasuneko arauak.
Hori guztia nekazaritza sisteman integratuta dago, nekazaritzako ezagutza eta berrikuntza sistemen bidez (AKIS, ingelesezko siglen arabera), eta ustiategiak kudeatzen dituzten pertsonak erdigunean jartzen eta ezagutza fluxuak hobetzen saiatzen da, eragile ugariko ikuspegi interaktibo baten bidez. Ikuspegi horrek berrikuntza, digitalizazioa eta ezagutza trukatzea bultzatzen ditu nekazaritza lehiakorragoa, adimentsuagoa eta jasangarriagoa izan dadin, eta ikerketari eta berrikuntzari esker garatutako informazio teknologiko eta zientifiko eguneratua eman ahal izateko.
Gainera, Estatu kideek aholkularitza inpartziala izan dadin zaindu behar dute, baita teknikari aholkulariak behar bezala kualifikatuta eta trebatuta egon daitezen eta interes gatazkarik izan ez dezaten ere.
Nafarroako nekazaritzan eta abeltzaintzan, ikerketa, esperimentazio eta transferentzia teknologikoetarako zerbitzuak oso hedatuta daude, eta horren froga da bi sektoreetan profesional kopurua handia dela.
2021/2115 (EB) Erregelamenduaren 15. artikuluan jasotako zerbitzuak eman nahi dituzten enpresek -Nafarroako NPEPEren esparruan 2023-2027 aldirako zehaztutako laguntzak jasotzeko aukera izan dezaten erregelamendu bereko 78. artikuluari jarraikiz- bete beharko dituzten baldintzak arautu behar dira zerbitzuek jarduera modu ordenatuan egin dezaten, eskatzaile guztiei berdintasunezko tratua berma dakien eta laguntzen orientazioa NPEPEren helburuen arabera hobetuz finantza baliabideak behar bezala erabiltzeko.
NPEPEren 7202 esku-hartzeak Nafarroan ezarritakoaren arabera, aholkularitza sistemaren erregulazioa honako hau izanen da:
1. Aholkularitza jarduerei dagokien zerbitzu publikoa Nafarroako Nekazaritzako Azpiegitura eta Teknologietako Institutua, SAren (INTIA SA) bidez emanen da Nafarroan. Enpresa publiko hori Nafarroako Gobernuak xede horietarako espresuki izendatua da.
2. Beste alde batetik, prozedura bat ezarriko da Nafarroako lurraldera mugatutako jardun esparrua duten nekazaritzako aholkularitzako beste entitate batzuk aitortzeko, Nafarroako nekazaritzako aholkularitzako entitateen erregistroa sortuta edo/eta mantenduta eta araututa.
3. Esku-hartzea kudeatzea. Landa Garapeneko eta Ingurumeneko Departamentuak aholkularitzarako entitate gisa aitortu eta bere erregistroan inskribatutako entitate pribatu eta/edo publikoek baino ez dute deialdian parte hartzen edo hitzarmena sinatzen ahalko, bidezkoa denaren arabera, aholkularitzarako plana gauzatzeko. Plan hori urtero eguneratuko da, laguntzak eskura dauden zuzkiduren arabera arautzeko ezarritako araudiaren arabera.
Hori dela eta, Landa Garapeneko eta Ingurumeneko Departamentuak, foru agindu honen bidez, askotariko entitateen beharrezko parte-hartzea antolatu behar du, bai eta entitate horiek Nafarroako nekazaritza ustiategiei aholku emateko sistemara sarbidea izatea ere. Horretarako, aholkularitza entitateen aitorpena eta erregistroa arautu behar ditu, NFEBHLOko 50.1.a) artikuluan jasota dagoen bezala, Nafarroak bere foru araubidearen arabera nekazaritza eta abeltzaintza arloan duen eskumen esklusiboa erabiliz.
Azaldutakoarekin bat, eta Nafarroako Gobernuari eta lehendakariari buruzko abenduaren 3ko 14/2004 Foru Legearen 41.1.g) artikuluak ematen dizkidan eskudantziak erabiliz,
AGINTZEN DUT:
Foru agindu honek, Europako Parlamentuaren eta Kontseiluaren abenduaren 2ko 2021/2115 (EB) Erregelamenduko 15. artikuluan xedatutakoaren ondorioetarako (nekazaritzako politika erkidearen esparruan estatu kideek prestatu behar dituzten plan estrategikoetarako laguntzari buruzko arauak ezartzen ditu) zera du helburutzat: nekazaritzako aholkularitza zerbitzuen ildo orokorrak biltzea. Horretarako, honako hauek egin nahi dira:
1. Nafarroako nekazaritza arloko aholkularitzaren sistema publikoa arautzea, Nafarroako Nekazaritzako Azpiegitura eta Teknologien Institutua SAren (INTIA, SA) bitartez.
2. Nekazaritzaren arloko aholkularitzako entitate pribatuak aitortzeko prozedura ezartzea, haien jarduketa esparrua Nafarroako lurraldera mugatzen bada.
3. Nekazaritzako ustiategiei aholkularitza ematen dieten entitateen Erregistroa sortu eta arautzea.
2. artikulua. Aholkularitza zerbitzuen aplikazio esparrua eta gaiak.
1. Nekazaritza aholkularitzako zerbitzuak ekoizpen mota eta nekazaritza ustiategi desberdinetara egokituko dira, eta, gutxienez, honako hauek estaliko dituzte:
a) Nekazariei eta beste onuradunei NPBren plan estrategikoan ezartzen zaizkien betekizun, baldintza eta kudeaketa konpromiso guztiak, baldintzazkotasunaren arloko betekizun eta arauak eta esku-hartzeetarako baldintzak barne, bai eta NPBren plan estrategikoaren esparruan ezarritako finantza tresnei eta enpresa planei buruzko informazioa ere.
b) Estatu kideek ezarritako betekizunak, honako hauek aplikatzearen ondorioetarako: 92/43/EEE Zuzentaraua, 2000/60/EE Zuzentaraua, Europako Parlamentuaren eta Kontseiluaren 1107/2009 (EE) Erregelamenduaren 55. artikulua, Europako Parlamentuaren eta Kontseiluaren 2008/50/EE Zuzentaraua, 2009/128/EE Zuzentaraua, 2009/147/EE Zuzentaraua, Europako Parlamentuaren eta Kontseiluaren 2016/429 (EB) Erregelamendua, Europako Parlamentuaren eta Kontseiluaren 2016/2031 (EB) Erregelamendua eta Europako Parlamentuaren eta Kontseiluaren 2016/2284 (EB) Zuzentaraua.
c) Mikrobioen aurkakoekiko erresistentzia garatzea eragozten duten nekazaritza jarduerak, Batzordearen 2017ko ekainaren 29ko Komunikazioan ("Osasun bakarra" Europako ekintza plana, mikrobioen aurkakoekiko erresistentziaren aurka borrokatzeko) ezartzen den bezala.
d) Arriskuak kudeatzea eta horiei aurrea hartzea;
e) Berrikuntzari laguntzea, bereziki BAEren talde operatiboen proiektuak egiteko eta gauzatzeko, 127. artikuluaren 3. paragrafoan aurreikusten den moduan.
f) Mantenugaien kudeaketa jasangarria. Horren barruan sartzen da, beranduenez 2024tik aurrera, mantenugaientzako nekazaritza jasangarritasuneko tresna erabiltzea. Gutxienez honako hauek eskaintzen dituen edozein aplikazio digital izanen da:
- Lurzatietan dauden mantenugai nagusien balantzea;
- Mantenugaien arloko lege betekizunak;
- Lurzoruari buruzko datuak, informazioa eta eskura dauden analisiak oinarri hartuta;
- Kudeaketa eta kontrol sistema integratuari buruzko datuak, mantenugaiak kudeatzeko.
g) Lan baldintzak, enplegu-emaileen betebeharrak, laneko osasuna eta segurtasuna, eta nekazaritza komunitateetako laguntza soziala.
2. Foru agindu honen esparruan, aholkularitza entitateek aholkularitza integrala bermatu beharko dute, eta jarduera egoeraren diagnostikotik hobekuntzak proposatu eta gauzatzera hedatuko dute, Europako, Estatuko eta Autonomia Erkidegoko araudiaren arabera honako gai hauek barnean hartuta:
- 1. esparrua: NPBren plan estrategikoan ezarritako legezko kudeaketa baldintzak, baldintzazkotasunaren arloko betekizunak eta arauak eta esku-hartzeetarako baldintzak barne, bai eta NPBren plan estrategikoaren esparruan ezarritako finantza tresnei eta enpresa planei buruzko informazioa ere.
- 2. esparrua: Nekazaritzako eta ingurumeneko baldintza onei buruzko arauak, NPBren plan estrategikoan ezarritakoak, baldintzazkotasunaren arloko betekizunak eta arauak eta esku-hartzeetarako baldintzak barne, bai eta NPBren plan estrategikoaren esparruan ezarritako finantza tresnei eta enpresa planei buruzko informazioa ere.
- 3. esparrua: Gizarte baldintzazkotasunaren arauak.
- 4. esparrua: NBEUF-LGENF dirulaguntzak.
- 5. esparrua: Lehen instalaziorako aholkularitza.
- 6. esparrua: Ekoizpen ekologiko integratua.
- 7. esparrua: Izurriteen kudeaketa integratua.
- 8. esparrua: Arriskuen, emisioen eta hondakinen kudeaketa.
- 9. esparrua: Banaketa kate laburrak garatzea.
- 10. esparrua: Lehiakortasuna eta digitalizazioa.
3. Esparru bakoitzean garatzen ahal diren jardueren zerrenda Aholkularitzarako Plan Orokorrean bilduko da, 5. artikuluarekin bat etorriz.
3. artikulua. Aholkularitzaren azken hartzaileak.
Europako Parlamentuaren eta Kontseiluaren 2021eko abenduaren 2ko 2021/2115 Erregelamenduaren 15. artikuluaren arabera, aholkularitza prestazioa honako hauentzat izan ahalko da:
a. Nafarroako Nekazaritzako Ustiategien Erregistroan inskribatutako nekazaritza ustiategien titular diren pertsona fisiko eta/edo juridikoak.
b. "Nekazari gazteak ezartzeko" laguntzak jasotzearen aldeko ebazpena duten gazteak.
c. Nekazaritza jarduerari ekin nahi dioten eta zerbitzuak ematen dituen entitatearekin aholkularitza kontratu espezifiko bat sinatuta duten pertsona fisikoak.
d. Beste lur-kudeatzaile batzuk (kooperatibak, eraldaketarako nekazaritza sozietateak (ENS), sozietateak, ureztatzaileen erkidegoak eta abar).
4. artikulua. Aholkularitza entitateen betekizunak.
Nafarroan onartutako aholkularitza entitateek honako baldintza hauek bete beharko dituzte:
1. Eskatzen diren esparruetan aholkularitza integraleko zerbitzuak ematea Nafarroako lurraldean inskribaturik dauden ustiategi eta pertsonei, foru agindu honen 2. eta 3. artikuluei jarraikiz.
2. Lantoki bat izatea Nafarroan.
3. Berezko nortasun juridikoa izatea eta bere estatutuetan, xede sozial gisa, nekazaritzako laguntza eta aholkularitza ematea sartzea.
4. Entitatearen inpartzialtasuna egiaztatzea. Horretarako, ez dute bere helburu eta ekintzen artean agertu behar produktu fitosanitarioen, zoosanitarioen eta ongarrien salerosketako edo hornidurako merkataritza jarduerak, ez eta haientzat berentzat diren beste hornidura edo ekipo ondasun batzuenak ere, ez eta haiekin lotutako enpresa eta entitateenak ere.
5. Aholkularien interes gatazkarik ez dagoela egiaztatzea. Horretarako, entitateak interes gatazkei dagozkien arriskuei aurre egiteko prozedura arautuko duen sistema bat ezarri beharko du, Europar Parlamentuaren eta Kontseiluaren 2018ko uztailaren 18ko 2018/1046 (EB, Euratom) Erregelamenduak, Batasunaren aurrekontu orokorrari aplikatu beharreko finantza arauei buruzkoak, 61. artikuluan ezarritakoari jarraituz.
6. Aholkularitzarako plan orokor bat izatea, foru agindu honen 5. artikuluan ezarritakoaren arabera egin beharreko aholkularitza jarduketak deskribatzen dituena.
7. 2. artikuluan definitutako aholkularitza integrala bermatuko duen lantaldea izatea, eta bertan honako hauek egotea:
a. Aholkularitzan aritzen diren langile kualifikatuak, unibertsitateko tituludunak edo lanbide arautu horietan aritzeko gaitzen duen beste edozein titulazio dutenak, gai hauetan: agronomia, albaitaritza eta ekonomia.
b. Aurreko apartatuan definitutako langile kualifikatuen %50ek esperientzia izan beharko dute aholkularitza lanetan.
c. Lantaldea arlo tematikoetan eta aholkularitza zerbitzuetan koordinatuta egonen da, honako arlo hauetan: agronomia, albaitaritza eta ekonomia.
8. Aholkularitzako langileen aldizkako prestakuntza bermatzea. Horretarako, barneko prestakuntza plan bat izan beharko da, hau da, entitateak berak edo kanpoko eragileek entitateko aholkulariei emandako prestakuntza orduak. Prestakuntza planak apartatu berezi bat izanen du, ‘aholkulariak aholkularitza sisteman sartzeari’ buruzkoa. Horretan ezarri beharko da aurretiko esperientziarik ez duten langile kontratatuak aholkulari adituen tutoretza prozesu batean sartuko direla, aholkularitza lanekin hasteko beharrezkotzat jotzen den bitartean.
9. Azpiegiturak eta baliabide materialak izatea, bai aholkularitza birtuala bai aurrez aurrekoa egin ahal izateko.
10. Jarduera osorako erregistro sistema zentralizatu bat izatea, datu hauek jasoko dituena:
a. Aholkularitzaren data eta modua (kontsulta edo bisita).
b. Aholku eman zaion pertsonaren datuak (sexuaren eta adinaren arabera bereizita).
c. Aholku ematen duen teknikariaren datuak.
d. Aholku lanaren xedeko ustiategiaren datu teknikoak eta ustiategiaren kokapen geografikoa.
e. Kontsultaren gaia.
f. Aholkua jasotzen duen ustiategi bakoitzarekin lotutako orduak eta kostuak.
g. Titular edo aholkularitza bakoitzari esleitutako tarifaren fakturak eta gastu frogagiriak.
11. Gastuak eta diru-sarrerak aholkularitza motaren arabera bereizteko aukera ematen duen kontabilitate sistema izatea. Gutxienez:
a. Ustiategiek aholkularitza entitateari ematen dizkioten aholkularitza zerbitzuak kontratatzeko kontabilitate sistema. Horretan, aholkularitza motaren araberako diru-sarrerak bereiz identifikatuko dira.
b. Gastuak aholkularitza motaren arabera bereizita identifikatzen dituen kontabilitate sistema.
12. Hirugarrenen aurrean erantzukizun zibil eta profesionaleko asegurua izatea, aholkularitza zerbitzuaren ondoriozko erreklamazioak estaltzeko. Gutxienez 300.000 euroko zenbateko bermatua izanen du. Polizak indarrean egon behar du zerbitzua indarrean dagoen bitartean.
13. Datu Pertsonalak Babesteko araudia betetzen dela bermatzen duen kudeaketa sistema ikuskatu bat izatea.
5. artikulua. Aholkularitza zerbitzuen zehaztapenak.
1. Entitate bakoitzak ematen dituen aholkularitza zerbitzuen zehaztapen teknikoak 2023-2027 aldirako Aholkularitza Plan Orokorrean definituko dira.
2. 2023-2027 aldirako Aholkularitza Plan Orokorraren eskema eta gutxieneko edukia honako hau izanen da:
a. Entitatearen aholkularitza zerbitzuaren esparruen deskribapena.
b. Egin nahi diren jardueren eta ekintzen deskribapena, aholkularitza motaren arabera, helburu, ustiategi, pertsona eta enpresei dagokienez, zerbitzuaren baldintza tekniko eta ekonomikoei dagokienez, aholkularitzari dagokionez, jardueren proposamen teknikoari eta kontsulten arretari dagokienez, jardueraren jarraipenari eta emaitzei dagokienez, eta zerbitzuaren interes handieneko eremuen definizioari dagokionez:
- Aholkularitza zerbitzuaren zehaztapen teknikoak eta prozedurak: garatutako lanen funtzionamendu orokorraren deskribapena eta informazio fluxuak eta nekazariekiko edo abeltzainekiko harremana.
- Ekintza plana aholkularitza motaren arabera. Aholkularitza mota bakoitzerako egin beharreko ekintzen definizio eta deskribapen fitxak, aurreikusitako adierazleekin (sexuaren arabera bereizita).
- Jarduerarako datuak erregistratzeko sistema zentralizatuaren deskribapena.
c. Aholkularitza zerbitzuan parte hartzen duen lantaldearen deskribapena:
- Lan taldeen organigrama eta definizioa, aholkularitza zerbitzu motaren arabera. Lanpostuen arabera egin beharreko lan orokorren deskribapena.
- Aholkularitzako langileak zehaztea: lanbide prestakuntza eta kontratazio urtea.
- Aholkulariek interes gatazkarik ez dutela bermatzeko sistema zehaztea. Entitatearen inpartzialtasuna akreditatzea.
d. Aurreikusitako barne prestakuntzako planaren deskribapena eta kronogramaren kalkulua:
- Ikastaro, jardunaldi, saio tekniko, barneko ezagutza trukaketa eta abarren zerrenda.
- ‘Aholkularitza sisteman langile berriak sartzeko protokoloan’ jasotako jardueren deskribapen orokorra (bereziki, aurretik esperientziarik izan ez duten aholkulariei laguntzeko apartatua garatu behar da, eta entitateak aholkularitza zerbitzuan sartzeko ezarritako tutoretza prozesuak eta trebakuntza espezifikoa deskribatu behar dira).
e. Emandako zerbitzua autoebaluatzeko sistema; sistema horretan, gutxienez, honako hauek jasoko dira: erabiltzaileek zerbitzuari egindako kexen eta iradokizunen data eta edukia, erabiltzaileei emandako erantzunen data eta deskribapena, eta entitateak hartutako neurriak eta hobekuntzak.
f. Instalazioak eta ekipamendua.
g. Kontabilitate sistemaren eta bideragarritasun plan finantzarioaren deskribapena.
6. artikulua. Aholkularitzako entitate publikoa.
Azken hartzaileei aholkularitza publikoa Nafarroan Nafarroako Nekazaritzako Azpiegitura eta Teknologien Institutuak SA (INTIA, SA) emanen die, foru agindu honen 4. eta 5. artikuluetan xedatutakoa bete beharko baitu.
7. artikulua. Aholkularitzako entitate pribatuen onarpena.
1. Nafarroan nekazaritzako aholkularitzako zerbitzuak eman nahi dituzten entitate pribatuek foru agindu honetan ezarritako betekizunak eta betebeharrak bete beharko dituzte.
2. Onartuak izateko, eskaera bat aurkeztu beharko dute Landa Garapeneko eta Ingurumeneko Departamentuko Nekazaritza Erregistroen Atalera, telematikoki, Nafarroako Gobernuaren Interneteko atariko (www.navarra.es/eu) tramiteen katalogoko fitxa egokiaren bidez. Tramitea egiteko, entitate eskatzailea egiaz bera dela egiaztatu behar da, bere ziurtagiri digitalaren bidez edo Cl@ve sistema erabiliz.
3. Eskaerekin batera honako dokumentazio hau aurkeztuko da:
a. IFK eta fundazioaren estatutuak.
b. Erantzukizun zibil eta profesionaleko aseguruaren poliza.
c. Datu Pertsonalen Babesa kudeatzeko sistema.
d. Aholkularitzarako Plan Orokorra, 5. artikuluaren arabera.
4. Eskaera jaso ondotik, egiaztatuko da eskatzaileak ezarritako baldintzak betetzen dituela eta aurreko puntuan aurreikusitako dokumentazioa aurkezten duela. Exijitutako agiriak aurkezten ez baditu, gehienez ere 10 eguneko epean zuzendu dezala errekerituko zaio interesdunari, eta ohartaraziko zaio ezen, hala egin ezean, ulertuko dela eskaera bertan behera uzten duela. Horrelakoetan, espedientea artxibatzeko ebazpena emanen da, eta jakinaraziko zaio.
5. Eskaera aztertu ondotik, Nekazaritzako Erregistroen Atalak onarpena eman edo ukatzeko ebazpen proposamena eginen du.
6. Landa Garapeneko zuzendari nagusiak onarpen eskaeraren gainean ebatziko du, arrazoiak emanda. Prozeduraren gainean ebazteko epea hiru hilabetekoa izanen da. Epea espresuki ebazpenik gabe bukatzen bada, entitate eskatzailea onartutzat joko da.
7. Behin onartuta, entitatearen inskripzioa eginen da xede horretarako sortutako Nafarroako Foru Komunitateko aholkularitza entitateen Erregistroan.
8. artikulua. Nafarroatik kanpo onartutako entitateen aholkularitza.
Nafarroan aholkularitza zerbitzuak eman nahi dituzten eta Nafarroakoa ez den beste administrazio batzuek aitortuta dauden entitateek foru agindu honetan ezarritakoa betetzen dutela justifikatu beharko dute Nekazaritza Erregistroen Atalean.
9. artikulua. Nafarroako nekazaritzako aholkularitza entitateen erregistroa.
1. Landa Garapeneko Zuzendaritza Nagusian Nafarroako aholkularitza entitateen erregistroa sortzen da. Horretan aholkularitza zerbitzu publikoa eta Nafarroan aitortutako entitate pribatuak inskribatuko dira.
2. Entitate bakoitzaren erregistro fitxan datu hauek jaso beharko dira gutxienez:
- Aholkularitza zerbitzua ematen duen entitatearen izen soziala, xede soziala, IFK, helbide soziala, telefono zenbakia eta helbide elektronikoa.
- Forma juridikoa.
- Erantzukizun zibil eta profesionaleko aseguru polizaren gutxieneko bermea.
- Datu pertsonalen babesa kudeatzeko sistema.
- 2023-2027 Aholkularitza Plan Orokorraren laburpena:
Aholkularien inpartzialtasuna eta interes gatazkarik eza egiaztatzeko sistema.
Aholkularitzan ari diren langileak, unibertsitateko titulazioa dutenak edo araututako lanbide horietan aritzeko gaitzen duen beste edozein titulazio dutenak, gai hauetan: agronomia, albaitaritza eta/edo ekonomia.
Aholkularitza lanetan esperientzia duten langileen ehunekoa.
Gai arloak eta aholkularitza zerbitzuak.
Prestakuntza planaren eskema.
Zerbitzuaren autoebaluazio sistemaren deskribapena.
Azpiegiturak eta baliabide material eskuragarriak.
Jardueraren datuak biltzeko erregistro sistema zentralizatua.
Kontabilitate sistema.
10. artikulua. Kontrola eta ikuskapena.
Landa Garapeneko eta Ingurumeneko Departamentuko Nekazarien Erregistroen Atalak behar diren kontrol eta ikuskapen jarduketak egiten ahalko ditu erregistroko datuak egiaztatzeko, eskatutako baldintzak eta aholkularitzako entitateek dituzten betebeharrak betetzen direla egiaztatzeko.
11. artikulua. Onarpena eta Erregistroko inskripzioa bertan behera uztea eta iraungitzea.
Onarpena lortzeko behar diren baldintzetako bat betetzen ez bada, entitateak hartutako betebeharretan edo konpromisoetan huts eginez gero edo fidagarritasun tekniko falta nabarmena baldin bada, entitateen onarpena eten edo iraungiko da eta kasuan kasuko entitateak Erregistroan duen inskripzioa ezabatuko da. Betiere, ukitutako entitateari entzutea emanen zaio.
Xedapen indargabetzaile bakarra. Indargabetutako arauak.
222/2014 FORU AGINDUA, uztailaren 4koa, Landa Garapeneko, Ingurumeneko eta Toki Administrazioko kontseilariak emana, ustiategiei aholkularitza emateko sistema, aholkularitza entitateen onarpena eta haien erregistroa arautzen dituena, indargabetu egiten da.
Azken xedapen bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
