LEXNAVARRA
184/2024 FORU AGINDUA, EKAINAREN 6KOA, ESKUBIDE SOZIALETAKO, EKONOMIA SOZIALEKO ETA ENPLEGUKO KONTSEILARIAK EMANA, ZEINAREN BIDEZ DEPARTAMENTU HORREN ETA PERTSONEN AUTONOMIARAKO ETA GARAPENERAKO NAFARROAKO AGENTZIAREN EGITURA GARATZEN BAITA BULEGOEN ETA ATALETIK BEHERAKO UNITATEEN MAILAN
BON N.º 129 - 24/06/2024
I. KAPITULUA. XEDEA ETA EGITURA OROKORRA
- 1. artikulua. Xedea.
- 2. artikulua. Babes Sozialaren eta Garapenerako Lankidetzaren Zuzendaritza Nagusiaren egitura.
- 3. artikulua. Ekonomia Sozialeko eta Laneko Zuzendaritza Nagusiaren egitura.
- 4. artikulua. Idazkaritza Tekniko Nagusiaren egitura.
- 5. artikulua. Pertsonen Autonomiarako eta Garapenerako Nafarroako Agentziaren egitura.
II. KAPITULUA. BABES SOZIALAREN ETA GARAPENERAKO LANKIDETZAREN ZUZENDARITZA NAGUSIA
- 6. artikulua. Toki Entitateekin eta Oinarrizko Gizarte Zerbitzuekin Koordinatzeko Bulegoa.
III. KAPITULUA. EKONOMIA SOZIALEKO ETA LANEKO ZUZENDARITZA NAGUSIA
- 7. artikulua. Baimen eta Zehapenen Bulegoa.
- 8. artikulua. Lan arloko Kudeaketa Administratiboaren Bulegoa.
- 9. artikulua. Lan arloko Erregistro Publikoen Bulegoa.
- 10. artikulua. Ekonomia Sozialaren Bulegoa.
IV. KAPITULUA. IDAZKARITZA TEKNIKO NAGUSIA
- 11. artikulua. Langileriaren Kudeaketarako Bulegoa.
- 12. artikulua. Erregistro, Agiritegi eta Informazio Bulegoa.
- 13. artikulua. Administrazio Aferetarako Bulegoa.
- 14. artikulua. Aurrekontuen Kudeaketa eta Kontabilitateko Bulegoa.
V. KAPITULUA. PERTSONEN AUTONOMIARAKO ETA GARAPENERAKO NAFARROAKO AGENTZIA
1. ATALA. Balorazioen eta Zerbitzuen Zuzendariordetza
- 15. artikulua. Zorren Kudeaketa eta Kontrolaren Bulegoa.
- 16. artikulua. Desgaitasuna duten Pertsonentzako Zentroen Bulegoa.
- 17. artikulua. Banakako Arreta Programen Bulegoa.
2. ATALA. Kudeaketaren eta Baliabideen Zuzendariordetza
- 18. artikulua. Entitateekiko Koordinaziorako Bulegoa.
- 19. artikulua. Zentroetako Langileen Kudeaketarako Bulegoa.
- 20. artikulua. Horniduren Bulegoa.
- 21. artikulua. Itunen Gainbegiratze eta Kontrolerako Bulegoa.
- 22. artikulua. Administraziolana eta Zerbitzuak Koordinatzeko Bulegoa.
- 23. artikulua. Sukalde Unitatea.
- 24. artikulua. San José Zentroko Koordinazio Unitatea.
- 25. artikulua. Santo Domingo Zentroko Koordinazio Unitatea.
- 26. artikulua. Kudeaketa Administratiboaren Unitatea.
3. ATALA. Familiaren eta Adingabeen Zuzendariordetza
- 27. artikulua. Familia Bulegoa.
- 28. artikulua. Administrazio Aferetarako Bulegoa.
- 29. artikulua. Haur eta Nerabeen Eskubideen Bulegoa.
- 30. artikulua. Babesgabetasun Egoeren Balorazio Bulegoa.
- 31. artikulua. Egoitza Harreraren Bulegoa.
- 32. artikulua. Familia Harreraren eta Adopzioaren Bulegoa.
- Xedapen indargabetzaile bakarra. Arauak indargabetzea.
- Azken xedapen bakarra. Indarra hartzea.
Nafarroako Foru Komunitateko lehendakariaren abuztuaren 17ko 10/2023 Foru Dekretuaren bidez, Nafarroako Foru Komunitateko Administrazioaren departamentuen egitura ezarri zen, eta abuztuaren 30eko 71/2023 Foru Dekretuaren bidez, berriz, Eskubide Sozialetako, Ekonomia Sozialeko eta Enpleguko Departamentuaren oinarrizko egitura.
Era berean, azaroaren 15eko 251/2023 Foru Dekretuaren bidez, Eskubide Sozialetako, Ekonomia Sozialeko eta Enpleguko Departamentuaren egitura organikoa ezarri zen, eta ekainaren 5eko 60/2024 Foru Dekretuaren bidez, berriz, Pertsonen Autonomiarako eta Garapenerako Nafarroako Agentziaren estatutuak onetsi ziren.
Aipatu foru dekretuetan, departamentuaren beraren egitura organikoa arautzeaz gain, bere erakunde autonomoarena ere ezartzen da, atalaren mailara birtarte.
Foru dekretu horiek egituran eragin dituzten aldaketak direla-eta, beharrezkoa da bulegoen eta atala baino beheragoko unitateen egitura ere horiei egokitzea.
Hala ezartzen baitu bere 24.4 artikuluan abenduaren 3ko 15/2004 Foru Legeak, Nafarroako Foru Komunitateko Administrazioari buruzkoak, bulegoak eta ataletatik beherako unitateak sortu, aldatu eta kentzea, unitate horiek non sartuko diren, departamentu horretako kontseilari titularrak eginen du, foru aginduaren bidez.
Horrenbestez, Nafarroako Foru Komunitateko Administrazioari buruzko abenduaren 3ko 15/2004 Foru Legeak ematen dizkidan ahalmenak erabiliz,
AGINTZEN DUT:
I. KAPITULUA. XEDEA ETA EGITURA OROKORRA
Foru agindu honen xedea da Eskubide Sozialetako, Ekonomia Sozialeko eta Enpleguko Departamentuaren egitura garatzea bulegoen eta ataletik beherako unitateen mailan, Pertsonen Autonomiarako eta Garapenerako Nafarroako Agentziarenak barne.
2. artikulua. Babes Sozialaren eta Garapenerako Lankidetzaren Zuzendaritza Nagusiaren egitura.
Babes Sozialaren eta Garapenerako Lankidetzaren Zuzendaritza Nagusiak bulego hauek ditu bere egituran:
Oinarrizko Laguntzaren eta Gizarte Inklusioaren Zerbitzuaren mende:
- Toki Entitateekin eta Oinarrizko Gizarte Zerbitzuekin Koordinatzeko Bulegoa.
3. artikulua. Ekonomia Sozialeko eta Laneko Zuzendaritza Nagusiaren egitura.
Ekonomia Sozialeko eta Laneko Zuzendaritza Nagusiak bulego hauek ditu bere egituran:
Lan Zerbitzuaren mende:
- Baimen eta Zehapenen Bulegoa.
- Lan arloko Kudeaketa Administratiboaren Bulegoa.
- Lan arloko Erregistro Publikoen Bulegoa.
- Ekonomia Sozialaren Bulegoa.
4. artikulua. Idazkaritza Tekniko Nagusiaren egitura.
Eskubide Sozialetako, Ekonomia Sozialeko eta Enpleguko Departamentuko Idazkaritza Tekniko Nagusiak bulego hauek ditu bere egituran:
- Langileriaren Kudeaketarako Bulegoa.
- Erregistro, Agiritegi eta Informazio Bulegoa.
- Administrazio Aferetarako Bulegoa.
- Aurrekontuen Kudeaketa eta Kontabilitateko Bulegoa.
5. artikulua. Pertsonen Autonomiarako eta Garapenerako Nafarroako Agentziaren egitura.
1. Pertsonen Autonomiarako eta Garapenerako Nafarroako Agentziak bulego hauek ditu bere egituran:
a) Balorazioen eta Zerbitzuen Zuzendariordetzaren mende:
- Desgaitasuna duten Pertsonentzako Zentroen Bulegoa.
- Zorren Kudeaketa eta Kontrolaren Bulegoa.
- Banakako Arreta Programen Bulegoa.
b) Kudeaketaren eta Baliabideen Zuzendariordetzaren mende:
- Entitateekiko Koordinaziorako Bulegoa.
- Zentroetako Langileen Kudeaketarako Bulegoa.
- Horniduren Bulegoa.
- Itunen Gainbegiratze eta Kontrolerako Bulegoa.
c) Familiaren eta Adingabeen Zuzendariordetzaren mende:
- Familia Bulegoa.
- Administrazio Aferetarako Bulegoa.
- Haur eta Nerabeen Eskubideen Bulegoa.
- Babesgabetasun Egoeren Balorazio Bulegoa.
- Egoitza Harreraren Bulegoa.
- Familia Harreraren eta Adopzioaren Bulegoa.
2. Pertsonen Autonomiarako eta Garapenerako Nafarroako Agentziaren mendeko zentroak administrazio unitate hauetan egituratzen dira:
a) El Vergel zahar-egoitzaren mende:
- Administrazio-lana eta Zerbitzuak Koordinatzeko Unitatea.
- Sukalde Unitatea.
b) San José Zentroaren mende:
- San José Zentroko Koordinazio Unitatea.
c) Santo Domingo zahar-egoitzaren mende:
- Kudeaketa Administratiboaren Unitatea.
- Santo Domingo Zentroko Koordinazio Unitatea.
II. KAPITULUA. BABES SOZIALAREN ETA GARAPENERAKO LANKIDETZAREN ZUZENDARITZA NAGUSIA
6. artikulua. Toki Entitateekin eta Oinarrizko Gizarte Zerbitzuekin Koordinatzeko Bulegoa.
Toki Entitateekin eta Oinarrizko Gizarte Zerbitzuekin Koordinatzeko Bulegoa Gizarte Zerbitzuetako Oinarrizko Laguntza Koordinatzeko Atalari atxiki zaio, eta eginkizun hauek ditu:
a) Oinarrizko laguntzaren eta gizarte laguntzaren sareko programak eta laguntzak ezartzeko proposamen teknikoen diseinua.
b) Gizarte Zerbitzuen Zentroak ezarri eta funtzionatzen jartzeko proposamen teknikoen diseinua.
c) Toki entitateentzako dirulaguntzen deialdiak koordinatzea, segimendua egitea eta haiei buruzko informazioa ematea, eta dirulaguntza horiek kudeatu eta kontrolatzea.
d) Bere eskumenen esparruko espedienteak kudeatzea eta artxibatzea.
e) Oinarrizko laguntzaren arloan, departamentuen edo erakundeen arteko lantalde teknikoetan parte hartzea.
f) Beste edozein eginkizun, bere jarduketaren eremuan agintzen zaiona.
III. KAPITULUA. EKONOMIA SOZIALEKO ETA LANEKO ZUZENDARITZA NAGUSIA
7. artikulua. Baimen eta Zehapenen Bulegoa.
Baimen eta Zehapenen Bulegoa Lan Harremanen eta Arriskuen Prebentzioaren Atalari atxiki zaio, eta eginkizun hauek ditu:
a) Honako arlo hauei lotutako espedienteen tramitazio administratiboa:
1. Lantokiak irekitzea edo haietan lana berriz hastea.
2. Lan istripuen berri jasotzea.
3. Laneko arriskuen prebentzioaren arloko prebentzio zerbitzuak eta auditoretza-entitateak baimentzea eta erregistratzea.
4. Amiantoa dela-eta arriskua duten enpresak erregistratzea eta enpresa horien lan-plangintzak onestea.
5. Dirulaguntzak laneko arriskuen prebentzioaren arloan.
6. Zehapenak, lan arloko arau-hausteengatik.
7. Lan jarduera etetea segurtasun arrazoiengatik.
8. 2., 3. eta 4. taldeetako agente biologikoen erabilerari buruzko komunikazioak jasotzea.
9. Enpresa egiaztatuen erregistroa eta azpikontratazioen liburua gaitzea.
b) Bere jardueraren esparruan agintzen zaizkion gainerakoak.
8. artikulua. Lan arloko Kudeaketa Administratiboaren Bulegoa.
Lan arloko Kudeaketa Administratiboaren Bulegoa Lan Harremanen eta Arriskuen Prebentzioaren Atalari atxiki zaio, eta eginkizun hauek ditu:
a) Honako arlo hauei lotutako espedienteen tramitazio administratiboa:
1. Enplegu erregulazioa: ezinbestean edo arrazoi ekonomikoak, teknikoak, antolaketarenak edo produkzioari lotutakoak direla-eta egiten diren lanaldi murrizketak, etendurak eta lan harremanen azkentze kolektiboak.
2. Lan arloko eta gatazka kolektiboetako adiskidetzeak, lan prozedurak lan arloko jurisdikzioan tramitatu aurretik.
3. Grebak eta ugazaben itxierak.
4. Lan egutegia.
5. Enpresek gai hauen gainean egiten dituzten komunikazioak jasotzea: gaueko lana arautzea, lekualdatze kolektiboak eta langileen lekualdaketak nazioz gaindiko zerbitzu bat ematen denean.
6. Hamasei urtetik beherakoek ikuskizun publikoetan jarduteko lan baimenak.
b) Bere jardueraren esparruan agintzen zaizkion gainerakoak.
9. artikulua. Lan arloko Erregistro Publikoen Bulegoa.
Lan arloko Erregistro Publikoen Bulegoa Ekonomia Sozialaren Atalari atxiki zaio, eta eginkizun hauek ditu:
a) Laneko hitzarmen eta akordio kolektiboak erregistratu, gordailutu eta argitaratzea.
b) Administrazio publikoen zerbitzuko langileak eta enpresako langileak ordezkatzen dituzten organoetarako hauteskundeei buruzko aktak, dimisioak, ordezkapenak eta errebokazioak gordailutzea, eta ziurtagiriak egitea.
c) Nafarroako Foru Komunitateko hauteskunde sindikaletako Jarraipen eta Kontrol Batzordeari laguntzea.
d) Sindikatuetako eta enpresa erakundeetako estatutuak gordailutzea eta horien gaineko ziurtagiriak egitea.
e) Laguntzen eta dirulaguntzen espedienteak kudeatzea.
f) Aldi baterako laneko enpresak erregistratu, baimendu eta haiei jarraipena egitea.
g) Bere jardueraren esparruan agintzen zaizkion gainerakoak.
10. artikulua. Ekonomia Sozialaren Bulegoa.
Ekonomia Sozialaren Bulegoa Ekonomia Sozialaren Atalari atxiki zaio, eta eginkizun hauek ditu:
a) Erregistro publiko hauetako espedienteen gaineko informazioa eta tramitazio administratiboa:
1. Nafarroako Kooperatiben Erregistroa.
2. Nafarroako Foru Komunitateko Lan Sozietateen Erregistro Administratiboa.
3. Nafarroako Eraldaketarako Nekazaritza Sozietateen Erregistroa.
b) Inskribatutako egintzen gaineko eta ekonomia sozialari buruzko beste ekintza batzuen gaineko erregistro-informazioa ematea eta horren gaineko estatistikak egitea.
c) Bere jardueraren esparruan agintzen zaizkion gainerakoak.
IV. KAPITULUA. IDAZKARITZA TEKNIKO NAGUSIA
11. artikulua. Langileriaren Kudeaketarako Bulegoa.
Langileriaren Kudeaketarako Bulegoa Idazkaritza Tekniko Nagusiari atxiki zaio, eta langileriaren arloan Idazkaritza Tekniko Nagusiari dagozkion eginkizun hauek ditu:
a) Langileen espedienteak ireki, mantendu eta eguneratzea.
b) Nomina bidez ordaintzen diren langileriaren gastuei buruzko dokumentuak tramitatzea.
c) Langileriari buruzko gaien kudeaketa administratibo arrunta.
d) Langileriaren inguruko arauak betetzen ote diren ikuskatzea eta kontrolatzea.
e) Langileriaren laneratzea eta puntualtasuna kontrolatzea.
f) Aparteko orduen gastuak, dietenak, joan-etorrietakoak eta gastu aldakorrak neurrizkoak direla kontrolatzea.
g) Bere eskumenen esparruko espedienteak kudeatzea eta artxibatzea.
h) Beste edozein eginkizun, bere jarduketaren eremuan agintzen zaiona.
12. artikulua. Erregistro, Agiritegi eta Informazio Bulegoa.
Erregistro, Agiritegi eta Informazio Bulegoa Idazkaritza Tekniko Nagusiari atxiki zaio, eta eginkizun hauek ditu:
a) Nafarroako Foru Komunitateko Administrazioaren erregistroen gaineko araudiak erregistro orokorrei esleitzen dizkien eginkizunak.
b) Departamentuko eta bere erakunde autonomoetako atalei banatzea bakoitzaren eskumenekoak diren espedienteak eta dokumentuak, bulegoak erregistratu ondoren.
c) Pertsonen Autonomiarako eta Garapenerako Nafarroako Agentzian artxibatzen diren departamentuko eta bere erakunde autonomoetako espedienteen artxiboa antolatzea eta mantentzea.
d) Herritarrei arreta eta informazioa ematea, aurrez aurre, telefonoz edo online, arlo horretan eskumena duten gainerako unitate organikoekin elkarlanean.
e) Beste edozein eginkizun, bere jarduketaren eremuan agintzen zaiona.
13. artikulua. Administrazio Aferetarako Bulegoa.
Administrazio Aferetarako Bulegoa Idazkaritza Tekniko Nagusiari atxiki zaio, eta eginkizun hauek ditu:
a) Foru aginduen proposamenak prestatzera zuzendutako jarduketak koordinatzea, bai eta ebazpenena ere, Departamentuarenak nahiz bere erakunde autonomoenak izan, gai-zerrendan sartu beharrekoak badira.
b) Foru aginduen eta zuzendaritza nagusien eta Pertsonen Autonomiarako eta Garapenerako Nafarroako Agentziaren ebazpenen gai-zerrenda prestatzea eta horiek antolatu eta artxibatzea.
c) Nafarroako Aldizkari Ofizialera igortzea aldizkari horretan argitaratu beharreko dokumentuak.
d) Foru aginduak eta ebazpenak jakinaraztera bideratutako jarduketak koordinatzea.
e) Bere eskumenen esparruko espedienteak kudeatzea eta artxibatzea.
f) Beste edozein eginkizun, bere jarduketaren eremuan agintzen zaiona.
14. artikulua. Aurrekontuen Kudeaketa eta Kontabilitateko Bulegoa.
Aurrekontuen Kudeaketa eta Kontabilitateko Bulegoa Ekonomia eta Aurrekontuak Kudeatzeko Atalari atxiki zaio, eta eginkizun hauek ditu:
a) Zuzendaritza nagusietako eta Pertsonen Autonomiarako eta Garapenerako Nafarroako Agentziako aurrekontuetako ordainketa eta kobraketa agiriak prestatzea, betiere aurretik saldoei buruz egin beharreko egiaztapen guztiak eginda.
b) Zuzendaritza nagusien eta Pertsonen Autonomiarako eta Garapenerako Nafarroako Agentziaren urte anitzeko gastuen jarraipena egitea.
c) Zuzendaritza nagusietako eta Pertsonen Autonomiarako eta Garapenerako Nafarroako Agentziako administrazio unitateei laguntzea aurrekontuetako ordainketa eta kobraketa agiriak prestatzen.
d) Kontu-hartzailetzako eta aurrekontuetako gaien inguruko informazioa prestatzea, behar diren txosten ekonomikoak egiteko.
e) Bere eskumenen esparruko espedienteak kudeatzea eta artxibatzea.
f) Beste edozein eginkizun, bere jarduketaren eremuan agintzen zaiona.
V. KAPITULUA. PERTSONEN AUTONOMIARAKO ETA GARAPENERAKO NAFARROAKO AGENTZIA
1. ATALA. Balorazioen eta Zerbitzuen Zuzendariordetza
15. artikulua . Zorren Kudeaketa eta Kontrolaren Bulegoa.
Zorren Kudeaketa eta Kontrolaren Bulegoa Balorazioen eta Zerbitzuen Zuzendariordetzari atxiki zaio, eta eginkizun hauek ditu:
a) Zorraren bermeak ezartzeko edukiari eta prozesuari buruzko informazio orokorra ematea.
b) Sortu beharreko zorraren gutxi gorabeherako kalkulua egitea.
c) Zorra kudeatu, jarraitu eta kontrolatzeko administrazio-prozedura prestatzea, egoitzen erabiltzaileek egonaldien zerbitzuak finantzatzeko egin beharreko diru-ekarpenaren araudia eta gai horri lotutako gainerako araudia aplikatuz.
d) Prozedura hori ezartzea eta prozedura ongi burutzeko ardura duten pertsonekin eta entitate publiko eta pribatuekin koordinatzea.
e) Eskubide Sozialetako, Ekonomia Sozialeko eta Enpleguko Departamentuaren izenean dauden zorrak borondatezko bidean kudeatu eta kontrolatzeko prozedura prestatu, ezarri eta kudeatzea.
f) Egoitza bereki edo itunduetan arreta (iraunkorra nahiz aldi baterakoa) jasotzen dutenek eta/edo eguneko egonaldi-zerbitzuaren erabiltzaileek tarifak ez ordaintzeagatik sortzen den zorraren informazioa ematea eta zorraren kudeaketa, jarraipena eta kontrola egitea, ez-ordaintzeen protokoloarekin bat.
g) Zor eta ez-ordaintzeei buruzko kontsultei eta erreklamazioei arreta eta erantzuna ematea.
h) Zor eta ez-ordaintzeen aldaketa txostenak egitea.
i) Bere eskumenen esparruko espedienteak kudeatzea eta artxibatzea.
j) Beste edozein eginkizun, bere jarduketaren eremuan agintzen zaiona.
16. artikulua. Desgaitasuna duten Pertsonentzako Zentroen Bulegoa.
Desgaitasuna duten Pertsonentzako Zentroen Bulegoa Desgaitasuna duten Pertsonentzako Zerbitzu Atalari atxiki zaio, eta eginkizun hauek ditu:
a) Desgaitasun fisikoa, adimenaren desgaitasuna eta gaixotasun mentala duten pertsonen espedienteak baloratu, kudeatu eta tramitatzea.
b) Itxarote-zerrendak aztertzea eta irizpide objektiboak ezartzea, urritasun motaren, egoeraren larritasunaren eta kasu bakoitzaren ezaugarrien arabera eskariak lehenesteko.
c) Eskaera aztertzea eta jarduketa hobetzeko proposamenak egitea.
d) Desgaitasun fisikoa, adimenaren desgaitasuna eta gaixotasun mentala dutenak zentro berekietan eta itunduetan sartzea kudeatzea, hain zuzen ere hauetan: egoitza-zentroetan, eguneko zentroetan, gaueko zentroetan, laguntza anbulatorioko zentroetan eta aldi baterako egonaldietan.
e) Desgaitasun fisikoa, adimenaren desgaitasuna eta gaixotasun mentala duten pertsonentzako zentroetako tarifak proposatu eta eguneratzea.
f) Desgaitasun fisikoa, adimenaren desgaitasuna eta gaixotasun mentala duten pertsonentzako zentro berekietan eta itunduetan dauden beharrak aztertu eta esku-hartze egokiak proposatzea.
g) Bere eskumeneko arloetan, koordinazio eta ebaluazio prozesuetan parte hartzea.
h) Bere eskumeneko arloetan, diziplinen eta erakundeen arteko lantalde teknikoetan parte hartzea.
i) Desgaitasun fisikoa, adimenaren desgaitasuna eta gaixotasun mentala duten pertsonen arloko itunei dagozkien txostenak eta agiri teknikoak prestatzea.
j) Desgaitasun fisikoa, adimenaren desgaitasuna eta gaixotasun mentala duten pertsonen arloko itunen exekuzioaren jarraipena eta kontrola egitea.
k) Irizpideak eta baremoak egokitzea, Autonomia Pertsonala Sustatzeko eta Mendekotasun Egoeran dauden Pertsonei kasu egiteko Legea betetzen dela bermatzeko.
l) Beste edozein eginkizun, bere jarduketaren eremuan agintzen zaiona.
17. artikulua. Banakako Arreta Programen Bulegoa.
Banakako Arreta Programen Bulegoa Prestazioak Kudeatzeko Atalari atxiki zaio, eta eginkizun hauek ditu:
a) Mendekotasuna duten pertsonen banakako arreta-programei (BAP) buruzko espedienteak sortzea.
b) Espedienteak oinarrizko gizarte-zerbitzuetara bideratzea eta mendekotasuna duten pertsonen BAP proposamenak prestatzen dituzten profesionalekin koordinatzea, baita zerbitzuak emateko ardura duten atalekin ere.
c) BAP proposamenak jasotzea, BAP ebazteko proposamenak prestatzea eta espedienteak Pertsonen Autonomiarako eta Garapenerako Nafarroako Agentziako ataletara igortzea.
d) Bere eskumenen esparruko espedienteak kudeatzea eta artxibatzea.
e) Beste edozein eginkizun, bere jarduketaren eremuan agintzen zaiona.
2. ATALA. Kudeaketaren eta Baliabideen Zuzendariordetza
18. artikulua. Entitateekiko Koordinaziorako Bulegoa.
Entitateekiko Koordinaziorako Bulegoa Programen eta Dirulaguntzen Kudeaketaren Atalari atxiki zaio, eta eginkizun hauek ditu:
a) Desgaitasuna dutenekin eta hirugarren adinekoekin lan egiten duten entitateentzako dirulaguntzen deialdiak koordinatzea, segimendua egitea eta haiei buruzko informazioa ematea, eta dirulaguntza horiek kudeatu eta kontrolatzea.
b) Mugigarritasun programentzako dirulaguntzen deialdiak koordinatzea, segimendua egitea eta haiei buruzko informazioa ematea, eta dirulaguntza horiek kudeatu eta kontrolatzea.
c) Desgaitasuna dutenentzako eta hirugarren adinekoentzako laguntza teknikoak kudeatu eta kontrolatzea.
d) Bere eskumenen esparruko espedienteak kudeatzea eta artxibatzea.
e) Beste edozein eginkizun, bere jarduketaren eremuan agintzen zaiona.
19. artikulua. Zentroetako Langileen Kudeaketarako Bulegoa.
Zentroetako Langileen Kudeaketarako Bulegoa Langileria Atalari atxiki zaio, eta eginkizun hauek ditu:
a) Bere eskumenean dauden giza-baliabideen arloan behar den koordinazioa bultzatzea, Pertsonen Autonomiarako eta Garapenerako Nafarroako Agentziaren mendeko zentroen eraginkortasuna hobetzeko asmoz.
b) Administrazio espedienteak tramitatzea betetzeko Pertsonen Autonomiarako eta Garapenerako Nafarroako Agentziaren menpeko zentroetako langileen beharrak.
c) Lan publikoaren eskaintzen barruan abian dauden deialdi publikoen segimendua egitea, bere eskumenen esparruan.
d) Espedienteak prestatzea Pertsonen Autonomiarako eta Garapenerako Nafarroako Agentziaren menpeko zentroetako plantilla organikoa egiteko.
e) Langileria Atalean dauden artxibo eta programak mantendu, eguneratu eta kontrolatzea.
f) Zentroetako absentismoa kontrolatzea.
g) Nominen prestaketa eta Gizarte Segurantzarekiko harremanak koordinatzea.
h) Beste edozein eginkizun, bere jarduketaren eremuan agintzen zaiona.
20. artikulua. Horniduren Bulegoa.
Horniduren Bulegoa Inbertsio, Obra eta Hornidura Atalari atxiki zaio, eta eginkizun hauek ditu:
a) Pertsonen Autonomiarako eta Garapenerako Nafarroako Agentziako zentro berekien hornidurak eta, hala agintzen bazaio, Eskubide Sozialetako Departamentuko eta haren organo autonomoetako beste zentro batzuenak kontratatzeko behar diren jarduketak burutzea.
b) Pertsonen Autonomiarako eta Garapenerako Nafarroako Agentziako zentro berekien hornidurak eta, hala agintzen bazaio, Eskubide Sozialetako Departamentuko eta haren organo autonomoetako beste zentro batzuenak kudeatzea eta kontrolatzea.
c) Bere eskumenen esparruko espedienteak kudeatzea eta artxibatzea.
d) Beste edozein eginkizun, bere jarduketaren eremuan agintzen zaiona.
21. artikulua. Itunen Gainbegiratze eta Kontrolerako Bulegoa.
Itunen Gainbegiratze eta Kontrolerako Bulegoa Ituntze Atalari atxiki zaio, eta eginkizun hauek ditu:
a) Pertsonen Autonomiarako eta Garapenerako Nafarroako Agentziak adingabe, adineko eta desgaitasun arloetako administrazio unitateen arduradunekin sinatutako administrazio-kontratuak, hitzarmenak, itun sozialak eta dirulaguntzak kudeatzea.
b) Ituntze Ataleko buruari laguntzea eta hura ordeztea, hura ez badago.
c) Administrazio-kontratuen, hitzarmenen, itun sozialen eta dirulaguntzen bidez emandako zerbitzuen kudeaketari buruzko jarduketak (ordainketak, ikuskapena, aurrekontuak...) gainbegiratzea, aztertzea eta kontrolatzea.
d) Bere eskumenen esparruko espedienteen eta dokumentazioaren kudeaketa gainbegiratzea eta kontrolatzea.
e) Aurrekoen antzekoa edo osagarria den beste edozein eginkizun, berariaz beste administrazio unitate bati esleitu ez bazaio, bai eta atalburuak eskuordetzen edo agintzen dion beste edozein eginkizun.
22. artikulua. Administraziolana eta Zerbitzuak Koordinatzeko Bulegoa.
Administrazio-lana eta Zerbitzuak Koordinatzeko Bulegoa El Vergel zahar-egoitzako Koordinazio Atalari atxiki zaio, eta eginkizun hauek ditu:
a) El Vergel zahar-egoitzako Koordinazio Atalari laguntza ematea egoitzaren administrazioaren kudeaketan.
b) Langileen kudeaketa eta aldi baterako kontratazioak tramitatzea, El Vergel zahar-egoitzako Koordinazio Atalarekin batera eta Pertsonen Autonomiarako eta Garapenerako Nafarroako Agentziako Langileria Atalarekin koordinatuta.
c) El Vergel zahar-egoitzako Koordinazio Atalari laguntzea langile berriei harrera, prestakuntza eta informazioa ematen.
d) El Vergel zahar-egoitzako Koordinazio Atalari laguntza ematea egoitzaren administrazio-kudeaketa gainbegiratzen eta kontrolatzen.
e) Kudeaketa informatizaturako aplikazioetan datuak sartzea gainbegiratzea eta koordinatzea.
f) Zerbitzu orokorretako lanen garapena gainbegiratzea eta zerbitzu orokorretako lana berregituratzeko jarduera-ildoak proposatzea. Horretarako, unitate honen mende egonen dira hierarkikoki zerbitzu orokorretako langileen eta zerbitzu orokorretako arduradunaren lanpostuak.
g) Sukalde Unitatearekin eta Zentroko zerbitzuen mantentze-lanen unitatearekin koordinatzea.
h) Egoitzako jarduerak garatzeko behar diren tresnen hornidura eta egoera gainbegiratzea.
i) Zerbitzu egokiak emateko, egoitzako gelak behar bezala prestatzen direla gainbegiratzea, batez ere logelak higiene-egoera onean daudela ziurtatzeko.
j) Egoiliarren ondasunen erregistroarekin eta jarraipenarekin lotutako zereginak gainbegiratzea eta kontrolatzea.
k) Salgaien eta garbiketa-produktuen eskaerak egitea eta horien jarraipena egitea.
l) Aurreko eginkizunekin loturik, El Vergel zahar-egoitzako Koordinazio Atalak eta egoitzako zuzendariak berariaz agintzen dizkiotenak.
23. artikulua. Sukalde Unitatea.
Sukalde Unitatea El Vergel zahar-egoitzako Koordinazio Atalari atxiki zaio, eta eginkizun hauek ditu:
a) Sukaldeko lan-txandak ezartzea.
b) Profesionalek sukaldean egin behar dituzten eguneroko lanak antolatzea.
c) Osasun zerbitzuek erabakitzen dituzten menuak El Vergel zahar-egoitzan ezartzea.
d) Eskaerak eta erosketak egitea eta jaki-tokia kudeatzea.
e) Egoitzako zuzendaritzarekin batera parte hartzea bere jarduerako zereginetan.
f) Sukaldearen urteko gastu-aurrekontua prestatzea eta hura betetzeko erantzukizuna bere gain hartzea.
g) Beste edozein eginkizun, bere jarduketaren esparruan agintzen zaiona.
24. artikulua. San José Zentroko Koordinazio Unitatea.
San José Zentroko Koordinazio Unitatea zentro horri atxiki zaio, eta honako eginkizun hauek ditu:
a) Bere ardurapeko langile berriei harrera, prestakuntza eta informazioa ematea, erreferentziazko langileen eginkizunak eta erantzukizunak adierazita, eta lan profesionala, higienea eta uniformetasuna betetzen direla gainbegiratuta.
b) Bere ardurapeko langileak kontratatzeko beharra eta baldintzak baloratzea.
c) Bere ardurapeko langileen egutegiak eta txanden, oporren, ordaindutako egunen, eguneko atsedenaldien eta abarren banaketa diseinatzea eta gainbegiratzea.
d) Bere ardurapeko langileen prestakuntza-beharrak planifikatzea eta koordinatzea.
e) Bere ardurapeko langileek erregistroak, txantiloiak eta programa informatikoa behar bezala betetzen dituztela gainbegiratzea.
f) Bere ardurapeko langileen jarduerak gainbegiratzea, eta ardurapean dituen materialak, lanabesak, erremintak eta makinak behar bezala erabiltzen direla eta efizienteak direla zaintzea, bai eta horien inbentarioa ere.
g) Bere ardurapeko langileen zereginak protokolizatzea, irizpideak bateratzeko.
h) Zentroko talde tekniko multiprofesionalarekin koordinatzea pertsonarengan zentratutako banakako arreta planen ebaluazioa eta jarraipena, bai eta eguneroko bizitzako eta aisialdiko eta denbora libreko programak ere.
i) Zentroko zuzendaria ez badago, bertan sortzen diren eguneroko gorabeherei buruzko erabaki egokiak hartzea, behar bezala funtziona dezan.
j) Zainketen plangintza diseinatzea eta behar bezala gauzatzen direla gainbegiratzea, kontuan hartuta erabiltzaileen beharrak, banakako arreta planean aurreikusitakoak.
k) Erabiltzaileari arreta ematean, pertsonarengan zentratutako arreta integralaren oinarrizko funtsak aplikatzen direla gainbegiratzea (duintasuna, autonomia, konfidentzialtasuna eta abar errespetatzea).
l) Irteeretan, ibilaldietan, gestioetan, txangoetan, jolasetan eta astialdian erabiltzaileei eman beharreko laguntza antolatzen parte hartzea.
m) Sukaldeko eta jantokiko zerbitzuak antolatzea, banatzea, koordinatzea eta gainbegiratzea (garbiketa, garbitegia eta harrera, mantentze-lanak), eta zerbitzu horien martxa ona zaintzea. Sukalde Unitatearekin koordinatuta, bere ardura izanen da otorduak behar bezala banatzea, dietak kontrolatzea, zerbitzu bereziak ematea, zerbitzua muntatu, garbitu eta kentzea.
n) Zerbitzu egokiak emateko, zentroko gelak behar bezala prestatzen direla gainbegiratzea eta kontrolatzea, batez ere logelak higiene-egoera onean daudela ziurtatzeko.
o) Zentroko zuzendaritzak eskatutako txostenak, azterlanak eta estatistikak egitea.
p) Beste edozein eginkizun, bere jarduketaren esparruan agintzen zaiona.
25. artikulua. Santo Domingo Zentroko Koordinazio Unitatea.
Santo Domingo Zentroko Koordinazio Unitatea zentro horri atxiki zaio, eta honako eginkizun hauek ditu:
a) Bere ardurapeko langile berriei harrera, prestakuntza eta informazioa ematea, erreferentziazko langileen eginkizunak eta erantzukizunak adierazita, eta lan profesionala, higienea eta uniformetasuna betetzen direla gainbegiratuta.
b) Bere ardurapeko langileak kontratatzeko beharra eta baldintzak baloratzea.
c) Bere ardurapeko langileen egutegiak eta txanden, oporren, ordaindutako egunen, eguneko atsedenaldien eta abarren banaketa diseinatzea eta gainbegiratzea.
d) Bere ardurapeko langileen prestakuntza-beharrak planifikatzea eta koordinatzea.
e) Bere ardurapeko langileek erregistroak, txantiloiak eta programa informatikoa behar bezala betetzen dituztela gainbegiratzea.
f) Bere ardurapeko langileen jarduerak gainbegiratzea, eta ardurapean dituen materialak, lanabesak, erremintak eta makinak behar bezala erabiltzen direla eta efizienteak direla zaintzea, bai eta horien inbentarioa ere.
g) Bere ardurapeko langileen zereginak protokolizatzea, irizpideak bateratzeko.
h) Zentroko talde tekniko multiprofesionalarekin koordinatzea pertsonarengan zentratutako banakako arreta planen ebaluazioa eta jarraipena, bai eta eguneroko bizitzako eta aisialdiko eta denbora libreko programak ere.
i) Zentroko zuzendaria ez badago, bertan sortzen diren eguneroko gorabeherei buruzko erabaki egokiak hartzea, behar bezala funtziona dezan.
j) Zainketen plangintza diseinatzea eta behar bezala gauzatzen direla gainbegiratzea, kontuan hartuta erabiltzaileen beharrak, banakako arreta planean aurreikusitakoak.
k) Erabiltzaileari arreta ematean, pertsonarengan zentratutako arreta integralaren oinarrizko funtsak aplikatzen direla gainbegiratzea (duintasuna, autonomia, konfidentzialtasuna eta abar errespetatzea).
l) Irteeretan, ibilaldietan, gestioetan, txangoetan, jolasetan eta astialdian erabiltzaileei eman beharreko laguntza antolatzen parte hartzea.
m) Sukaldeko eta jantokiko zerbitzuak antolatzea, banatzea, koordinatzea eta gainbegiratzea (garbiketa, garbitegia eta harrera, mantentze-lanak), eta zerbitzu horien martxa ona zaintzea. Sukalde Unitatearekin koordinatuta, bere ardura izanen da otorduak behar bezala banatzea, dietak kontrolatzea, zerbitzu bereziak ematea, zerbitzua muntatu, garbitu eta kentzea.
n) Zerbitzu egokiak emateko, zentroko gelak behar bezala prestatzen direla gainbegiratzea eta kontrolatzea, batez ere logelak higiene-egoera onean daudela ziurtatzeko.
o) Zentroko zuzendaritzak eskatutako txostenak, azterlanak eta estatistikak egitea.
p) Beste edozein eginkizun, bere jarduketaren esparruan agintzen zaiona.
26. artikulua. Kudeaketa Administratiboaren Unitatea.
Kudeaketa Administratiboaren Unitatea Santo Domingo zahar-egoitzari atxiki zaio, eta eginkizun hauek ditu:
a) Zentroaren jarduera administratiboa koordinatzea, bultzatzea eta kontrolatzea.
b) Erakunde autonomoaren zerbitzu zentralekin batera, zentroko langileekin eta erosketekin zerikusia duten espedienteak eta zentroko zuzendaritzak agintzen dizkionak tramitatzea.
c) Zentroko artxiboa antolatzea eta kudeatzea.
d) Aurrekontuen aplikaziorako eragiketen jarraipena eta barne-kontabilitatea egitea.
e) Beste edozein eginkizun, bere jarduketaren esparruan agintzen zaiona.
3. ATALA. Familiaren eta Adingabeen Zuzendariordetza
27. artikulua. Familia Bulegoa.
Familia Bulegoa Familiaren Atalari atxiki zaio, eta eginkizun hauek ditu:
a) Familia ugarien programa egiaztatzea eta koordinatzea.
b) Familia gurasobakarren programa egiaztatzea eta koordinatzea.
c) Familientzako dirulaguntzak baloratzea eta koordinatzea.
d) Bere eskumenen esparruko espedienteak kudeatzea eta artxibatzea.
e) Bere eskumenen esparruan agintzen zaion beste edozein eginkizun.
28. artikulua. Administrazio Aferetarako Bulegoa.
Administrazio Aferetarako Bulegoa Familiaren Atalari atxiki zaio, eta eginkizun hauek ditu:
a) Espedienteetan dagoen informazioa berrikustea eta osatzea, paperean nahiz euskarri digitalean.
b) Langile teknikoei zuzendutako deiez eta programatu gabeko bisitez arduratzea, lehen iragazki bat egiteko.
c) Ebazpenen tramitazio administratiboan parte hartzea.
d) Informazio sistemetan dagoen informazioaren ustiaketa kudeatzea.
e) Zereginak administrazio-langileen artean homogeneizatzea, bai eta lan-kargaren banaketa arrazionala egitea ere.
f) Beste edozein eginkizun, bere jarduketaren esparruan agintzen zaiona.
29. artikulua. Haur eta Nerabeen Eskubideen Bulegoa.
Haur eta Nerabeen Eskubideen Bulegoa Familiaren Atalari atxiki zaio, eta eginkizun hauek ditu:
a) Familiaren eta Haur eta Nerabeen Eskubideen Atalari laguntzea zuzendariordetzaren eskumenekoak diren haurren eta nerabeen eskubideak sustatzeko zeregin guztietan.
b) Haurren eta nerabeen eskubideei buruzko departamentuko, departamentuarteko eta erakundearteko lantalde teknikoak sustatzea eta horietan parte hartzea, estatuko eta erkidegoko plan estrategikoen esparruan.
c) Administrazio publikoetako beste unitate batzuekin eta gizarte-erakundeekin lankidetzan aritzea haurren eta nerabeen eskubideak bermatzeko, proiektu komunitarioak sustatuz haurren prebentzio eta sustapenerako.
d) Haur eta nerabeen eskubideak sustatu eta haien berri zabaltzea, gizartean eta politika publikoetan aktiboki parte har dezaten sustatuz.
e) Zuzendariordetzaren plan operatiboen koordinazioa, urtekoena eta urte anitzekoena.
f) Haurtzaroaren, Nerabezaroaren eta Familiaren Zuzendariordetzak zehazten dituen jarduketa guztiak.
30. artikulua. Babesgabetasun Egoeren Balorazio Bulegoa.
Babesgabetasun Egoeren Balorazio Bulegoa Babesgabetasun Egoeren Balorazio Atalari atxiki zaio, eta eginkizun hauek ditu:
a) Babesgabetasun Egoeren Balorazio Atalari laguntza ematea haurrak eta nerabeak babesteko munduari datxezkion zeregin guztietan.
b) Laguntza eskatzen duten "gizarte sareko korapilo" guztiei aholku ematea adingabeen babesaren arloan, hots, gure komunitatean dauden oinarrizko gizarte-zerbitzuei, auzoko unitateei eta haurrei eta nerabeei laguntzeko taldeei.
c) Babesik gabeko egoeran edo babesik gabe gelditzeko arriskuan dauden adingabeen espedienteak baloratzea, kasu bakoitzaren larritasuna finkatzeko.
d) Babesik gabeko egoeran edo babesik gabe gelditzeko arriskuaren egoeran esku hartzea, eta kasuan-kasuan behar diren babeserako baliabideak aplikatzea.
e) Adingabeen babeserako neurriak eta baliabideak abian jartzeko administrazio ebazpenak emateko txostenak prestatzea.
f) Arazo sozialak dituzten adingabeak hartzeko zentroak kudeatzen dituzten entitate itunduen gainbegiratze teknikoa eta jarraipena egitea.
g) Arazo sozialak izanik, egoitzetan hartuak dauden adingabeak gainbegiratzea, laguntzea, jarraipena egitea eta kontrolatzea.
h) Txostenak idaztea eta proposamenak egitea. Familia Epaitegiarekin eta Adingabeen Fiskaltzarekin koordinatzea.
i) Egoitza-harrerako programetan dauden adingabeen familiekin, guraso-eginkizunak berreskuratzeko programak garatzea.
j) Adingabeen jarraipena egitea erakundeen babespetik atera eta gero.
k) Familietan Esku Hartzeko Programa Espezializatua baloratzea, gainbegiratzea eta haren jarraipena egitea.
l) Haurrei eta nerabeei laguntzeko taldeetara bideratutako adingabeak baloratzea, ikuskatzea eta jarraipena egitea.
m) Eguneko zentroaren lana baloratzea, gainbegiratzea eta haren jarraipena egitea.
n) Adingabekoentzako Behaketa eta Harrera Zentroaren lana baloratzea, gainbegiratzea eta haren jarraipena egitea.
o) Familientzako dirulaguntzak baloratzea eta kudeatzea, egoitzetan hartzeko alternatiba gisara.
p) Erakundeen babespetik ateratzeko bidean dauden adingabeentzako laguntza ekonomikoak baloratzea eta kudeatzea.
q) Kanpoko zentroetan hartuak dauden adingabeen egonaldietarako dirulaguntzak baloratzea eta kudeatzea.
r) Babespean dauden adingabeen datu-basearen eta Adingabeen Egoeren Erregistroaren mantentze eta eguneratze lanez arduratzea.
s) Beharrezkoa denean, espedienteak ixtea (adinez nagusi egitea, familian berriz txertatzea, etab.) edo berrirekitzea.
t) Bulegoaren lanaren euskarri diren prozesu tekniko eta administratibo guztiak garatzea.
u) Beste edozein eginkizun, bere jarduketaren esparruan agintzen zaiona.
31. artikulua. Egoitza Harreraren Bulegoa.
Egoitza Harreraren Bulegoa Zaintza Kudeatzeko eta Neurri Judizialak Betearazteko Atalari atxiki zaio, eta eginkizun hauek ditu:
a) Egoitza-harrerako programak garatzea, modalitate guztietan.
b) Egoitza-harrerako zentroak eta autonomia bultzatzeko programak kudeatzen dituzten entitate itunduen gainbegiratze teknikoa eta jarraipena egitea.
c) Egoitza-harrerako programetan dauden adingabeak gainbegiratzea, laguntzea, jarraipena egitea eta kontrolatzea.
d) Egoitza-harrerako programetan dauden adingabeen familiekin, guraso-eginkizunak berreskuratzeko programak garatzea.
e) Adingabeentzako bizitegi-alternatibak sustatzea familiaren etxera itzultzea aurreikusita ez dagoen kasuetarako.
f) Autonomia prozesuan dauden gazteei laguntzeko programak garatzea.
g) Ama gazteei eta haurdun daudenei laguntzeko programak kudeatzea eta gainbegiratzea.
h) Erreferentziazko harrera eta aholkularitza programak kudeatzea eta gainbegiratzea.
i) Bulegoaren lanaren euskarri diren prozedura eta agiri tekniko eta administratiboak garatzea.
j) Babesgabetasun Egoeren Balorazio Bulegoarekin koordinatzea bulego horrek bideratzen dituen adingabeei arreta emateko.
k) Neurri Judizialak Betearazteko Bulegoarekin koordinatzea egoitza-baliabideetan artatzen diren adingabeei ezarritako neurri judizialak betetzeari begira.
l) Familia Harreraren eta Adopzioaren Bulegoarekin koordinatzea egoitza-baliabideetan artatzen diren adingabeentzat dauden familia harrera motak sustatzeko, bai eta, harrera edo adopzio familiekin bizikidetza eteten den kasuetan, egoitza-arreta behar duten adingabeei arreta emateko ere.
m) Babesgabetasun Egoeren Balorazio Bulegoarekin, Neurri Judizialak Betearazteko Bulegoarekin eta Familia Harreraren eta Adopzioaren Bulegoarekin koordinatzea partekatzen dituzten prozedurak prestatzeko, beharrizan berriak baloratzeko, partekatzen dituzten baliabideak antolatzeko eta agindu zaizkien beste eginkizun batzuetarako.
n) Beste baliabide komunitario batzuekin koordinatzea adingabeei eta haien familiei arreta egokia ematen zaiela sustatzeko, batez ere familian berriz integratzeko prozesuetan.
o) Beste autonomia erkidegoekin koordinatzea espedienteak elkarri eskualdatzeko.
p) Epaitegiekin, fiskaltzarekin eta segurtasun indarrekin koordinatzea.
q) Egoitza-neurrien bidez artatzen diren adingabeen espedienteak kudeatzea.
r) Autonomia prozesuan dauden gazteei laguntzeko programatik eta egoitza-baliabideetatik emandako arretari buruzko datu estatistikoak prestatzea.
s) Esku hartzeko ereduak eta edukiak eguneratzea, bai autonomia prozesuan dauden gazteei laguntzeko programetakoak, bai egoitza-harrerari dagozkionak.
t) Beste edozein eginkizun, bere jarduketaren esparruan agintzen zaiona.
32. artikulua. Familia Harreraren eta Adopzioaren Bulegoa.
Familia Harreraren eta Adopzioaren Bulegoa Zaintza Kudeatzeko eta Neurri Judizialak Betearazteko Atalari atxiki zaio, eta eginkizun hauek ditu:
a) Adopzioaren eta harreraren arloan interesa duten pertsonei informazioa eta aholku ematea.
b) Familia harrerarako modalitate guztiak kudeatzea: aldi baterakoa, iraunkorra, presakoa, espezializatua, erreferentziazkoa, arnasgune gisakoa eta abar.
c) Familia harrerari eta adopzioari laguntzeko zerbitzua kudeatzea.
d) Familiaren Atalarekin koordinatzea familia harrerarako dagoen Familia Elkartzeko Gune espezifikoa kudeatzeko asmoz.
e) Familia harrera eta adopzioa eskatzen duten pertsonen balorazio psikosoziala egitea eta, hala badagokio, egokitasunaren ziurtagiriak eta jarraipena egiteko konpromiso agiriak luzatzea.
f) Familia batean hartzen edo adoptatzen ahal diren adingabeen espedienteak baloratu eta jarraitzea.
g) Familian esku hartzeko planak egitea, behin betiko neurriak zehazteari begira.
h) Adopzio espedienteak tramitatzea eskumena duten agintarien aurrean, adopziorako txosten eta proposamenak prestatzea eta familia harrerak formalizatzea.
i) Adopzioaren ondoko jarraipena egitea eta adoptatutako adingabeen jatorrizko herrialdeek finkatutako epeetan egin beharreko txostenak prestatzea.
j) Familiei eta adoptatzen edo familian hartzen diren pertsonei lagun egitea eta prestakuntza eta arreta ematea.
k) Harreraren eta adopzioaren arloko koordinazioa eta lankidetza teknikoa, bai Nafarroan berean (hezkuntza eta osasun baliabideak, eta abar), bai beste autonomia erkidego batzuekin.
l) Babesgabetasun Egoeren Balorazio Bulegoarekin koordinatzea bulego horrek bideratzen dituen adingabeei arreta emateko.
m) Neurri Judizialak Betearazteko Bulegoarekin koordinatzea familia batean hartuak edo adoptatuak diren adingabeei ezarritako neurri judizialak betetzeari begira.
n) Egoitza Harreraren Bulegoarekin koordinatzea egoitza-baliabideetan artatzen diren adingabeentzat dauden familia harrera motak sustatzeko, bai eta, harrera edo adopzio familiekin bizikidetza eteten den kasuetan, egoitza-arreta behar duten adingabeei arreta emateko ere.
o) Babesgabetasun Egoeren Balorazio Bulegoarekin, Neurri Judizialak Betearazteko Bulegoarekin eta Familia Harreraren eta Adopzioaren Bulegoarekin koordinatzea partekatzen dituzten prozedurak prestatzeko, beharrizan berriak baloratzeko, partekatzen dituzten baliabideak antolatzeko eta agindu zaizkien beste eginkizun batzuetarako.
p) Beste baliabide komunitario batzuekin koordinatzea adingabeei eta haien familiei arreta egokia ematen zaiela sustatzeko, batez ere familian berriz integratzeko prozesuetan.
q) Familia harrerarekin eta adopzioarekin lotutako elkarteekin koordinatzea.
r) Esleitu zaizkion gaien gaineko administrazio espedienteak kudeatzea.
s) Adingabeen jatorrizko herrialde bakoitzean adopzioa egiteko eskatzen diren tramitazio baldintza eta eskakizun partikularrekin datu-base bat prestatzea eta eguneraturik izatea.
t) Nafarroako Adopzioen Erregistroa eguneraturik izatea.
u) Familia Epaitegiarekin eta Adingabeen Fiskaltzarekin koordinatzea.
v) Nafarroako Gizarte Zerbitzu Orokorren Zorroan familia harreraren eta adopzioaren arlorako jasota dauden prestazioak kudeatzea.
w) Bulegoaren lanaren euskarri diren prozedura eta agiri tekniko eta administratiboak garatzea.
x) Familia harrerari eta adopzioari buruzko Nafarroako datu estatistikoak prestatzea.
y) Beste edozein eginkizun, bere jarduketaren esparruan agintzen zaiona.
Xedapen indargabetzaile bakarra. Arauak indargabetzea.
Indargabetu egiten dira foru agindu honetan xedatutakoari aurka egiten dioten maila bereko edo apalagoko xedapen guztiak, eta zehazki Eskubide Sozialetako kontseilariaren abenduaren 15eko 305/2015 Foru Agindua. Haren bidez departamentu horretako eta haren erakunde autonomoetako bulegoen eta atala baino maila beheragoko unitateen egitura garatu zen.
Azken xedapen bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
