LEXNAVARRA
28/2024 FORU AGINDUA, APIRILAREN 30EKOA, LEHENDAKARITZA ETA BERDINTASUNEKO KONTSEILARIAK EMANA, LEHENDAKARITZA ETA BERDINTASUN DEPARTAMENTUAREN EGITURA ORGANIKOA EZARTZEN DUENA BULEGOEN MAILAN 
BON N.º 102 - 17/05/2024
I. KAPITULUA. XEDEA ETA EGITURA OROKORRA
- 1. artikulua. Xedea.
- 2. artikulua. Lehendakaritzako, Gobernu Irekiko eta Nafarroako Parlamentuarekiko Harremanetako Zuzendaritza Nagusiaren egitura.
- 3. artikulua. Politika Publikoen Plangintza, Koordinazio, Berrikuntza eta Ebaluazioko Zuzendaritza Nagusiaren egitura.
- 4. artikulua. Komunikazioaren eta Proiekzio Instituzionalaren Zuzendaritza Nagusiaren egitura.
- 5. artikulua. Idazkaritza Tekniko Nagusiaren egitura.
- 6. artikulua. Nafarroako Administrazio Auzitegiaren egitura.
II. KAPITULUA. LEHENDAKARITZAKO, GOBERNU IREKIKO ETA NAFARROAKO PARLAMENTUAREKIKO HARREMANETAKO ZUZENDARITZA NAGUSIA
1. ATALA. GOBERNUAREN IDAZKARITZAKO, ERAKUNDEEKIKO HARREMANETAKO ETA ARAUGINTZAKO ZERBITZUA
- 7. artikulua. Posta Eginkizunetarako Bulegoa.
- 8. artikulua. Gobernuaren Idazkaritzako eta Araugintzako Zerbitzuko Kudeaketa Juridikoaren Bulegoa .
- 9. artikulua. Elkarte, Fundazio eta Lanbide Elkargoen Bulegoa.
2. ATALA. GOBERNU IREKIAREN ETA HERRITARRENTZAKO ARRETAREN ZERBITZUA
- 10. artikulua. Herritarren Arretarako Bulegoak eta Erregistroak Koordinatzeko Bulegoa.
3. ATALA. NAFARROAKO ALDIZKARI OFIZIALAREN ATALA
- 11. artikulua. Kudeaketa Bulegoa.
- 12. artikulua. Kudeaketa Ekonomikoaren Bulegoa.
- 13. artikulua. Ekoizpen eta Zabalkunde Bulegoa.
4. ATALA. AHOLKULARITZA JURIDIKOAREN ZERBITZUA
- 13 bis artikulua. Administrazio Laguntzako Bulegoa .
III. KAPITULUA. POLITIKA PUBLIKOEN PLANGINTZA, KOORDINAZIO, BERRIKUNTZA ETA EBALUAZIOKO ZUZENDARITZA NAGUSIA
1. ATALA. NASTATNAFARROAKO ESTATISTIKA INSTITUTUA
- 14. artikulua. Komunikazio Bulegoa.
2. ATALA. ANALISI ETA PROSPEKZIO BULEGOA
- 15. artikulua. Estrategia Operatiboaren eta Partehartzearen Bulegoa.
IV. KAPITULUA. KOMUNIKAZIOAREN ETA PROIEKZIO INSTITUZIONALAREN ZUZENDARITZA NAGUSIA
1. ATALA. IDAZKARITZA BULEGOA
- 16. artikulua. Idazkaritza Bulegoa.
2. ATALA. PROIEKZIO INSTITUZIONALAREN ETA NAFARROA MARKAREN ZERBITZUA
- 17. artikulua. Argitalpenen Ekoizpen eta Diseinu Grafikorako Bulegoa.
- 18. artikulua. Argitalpenak Sustatu eta Zabaltzeko Bulegoa.
V. KAPITULUA. IDAZKARITZA TEKNIKO NAGUSIA
- 19. artikulua. Idazkaritza eta Dokumentazio Bulegoa.
- 20. artikulua. Langileriaren Kudeaketarako Bulegoa.
- 21. artikulua. Ekonomiaren eta Kontabilitatearen Kudeaketa Bulegoa.
VI. KAPITULUA. NAFARROAKO ADMINISTRAZIO AUZITEGIA
- 22. artikulua. Erregistro eta Izapide Bulegoa.
- 23. artikulua. Ebazpenen eta Administrazioarekiko Auzietarako Jurisdikzioarekiko Harremanen Bulegoa.
- Lehen xedapen gehigarria. Izendapenak.
- Bigarren xedapen gehigarria. Bulegoak kentzea.
- Xedapen indargabetzaile bakarra. Arauak indargabetzea.
- Azken xedapen bakarra. Indarra hartzea.
Nafarroako Foru Komunitateko Lehendakariaren abuztuaren 17ko 10/2023 Foru Dekretuaren bidez, Nafarroako Foru Komunitateko Administrazioaren departamentuen egitura eta departamentu bakoitzaren eskumenen esparrua finkatu ziren.
Ondoren, abuztuaren 30eko 64/2023 Foru Dekretuaren bidez, Lehendakaritza eta Berdintasun Departamentuaren oinarrizko egitura ezarri zen, zuzendaritza nagusien mailan.
Urriaren 11ko 217/2023 Foru Dekretuaren bidez, Analisi eta Prospekzio Bulegoa erakunde autonomoa sortu zen, eta haren estatutuak onetsi ziren; azaroaren 15eko 238/2023 Foru Dekretuaren bidez, berriz, Lehendakaritza eta Berdintasun Departamentuaren egitura organikoa ezarri zen, atalen mailaraino.
Horregatik, beharrezkoa da Lehendakaritza eta Berdintasun Departamentuaren egitura eta eginkizunak osatzea eta egokitzea bulegoen mailan.
Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legeak 34.4 artikuluan ezartzen du ezen, bulegoak eta ataletatik beherako unitateak sortu, aldatu eta kentzeko, unitate horiek zein departamentutan sartuko diren, hango titularraren foru agindua beharko dela.
Halaber, Analisi eta Prospekzio Bulegoa erakunde autonomoa sortu eta haren estatutuak onesten dituen urriaren 11ko 217/2023 Foru Dekretuaren 20. artikuluak ezartzen duenez, Lehendakaritza eta Berdintasun Departamentuko titularraren foru agindu bidez sortu, aldatu eta kenduko dira hango bulegoak.
Bestalde, foru agindu hau bat dator Administrazio Publikoen Administrazio Prozedura Erkideari buruzko urriaren 1eko 39/2015 Legearen 129. artikuluan aipatzen diren erregulazio onaren printzipioekin. Zehazki, premia- eta eraginkortasun-printzipioak betetzen ditu, tresna beharrezkoa eta egokia baita interes orokorrari laguntzeko eta Gobernuak Lehendakaritza eta Berdintasun Departamentuaren eskumeneko gaietan dituen politika publikoak benetan gauzatzeko. Proportzionaltasun printzipiora ere egokitzen da, ez baitago beste aukerarik departamentu honetako bulegoen mailako egitura organiko berri bat sortzeko. Segurtasun juridikoaren, gardentasunaren eta efizientziaren printzipioei dagokienez, araua bat dator printzipio horiekin, koherentea baita gainerako ordenamendu juridikoarekin, eta hortik ez da karga administratibo berririk eratortzen. Era berean, arauan argi eta garbi identifikatzen dira lortu nahi diren helburuak.
Horrenbestez, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 34.4 artikuluak ematen dizkidan ahalmenak erabiliz,
AGINTZEN DUT:
I. KAPITULUA. XEDEA ETA EGITURA OROKORRA
Foru agindu honen xedea da Lehendakaritza eta Berdintasun Departamentuaren egitura garatzea bulegoen eta ataletik beherako unitateen mailan, barnean sartuta aipatu departamentuari atxikitako erakunde autonomoenak.
2. artikulua. Lehendakaritzako, Gobernu Irekiko eta Nafarroako Parlamentuarekiko Harremanetako Zuzendaritza Nagusiaren egitura.
Lehendakaritzako, Gobernu Irekiko eta Nafarroako Parlamentuarekiko Harremanetako Zuzendaritza Nagusiak bulego hauek ditu bere egituran:
a) Gobernuaren Idazkaritzako, Erakundeekiko Harremanetako eta Araugintzako Zerbitzuaren menpe:
- Posta Eginkizunetarako Bulegoa, Gobernuaren Idazkaritza Atalari atxikia.
- Gobernuaren Idazkaritzako eta Araugintzako Zerbitzuko Kudeaketa Juridikoaren Bulegoa, Koordinazio eta Araugintza Atalari atxikia.
- Elkarte, Fundazio eta Lanbide Elkargoen Bulegoa, Koordinazio eta Araugintza Atalari atxikia.
b) Gobernu Irekiaren eta Herritarrentzako Arretaren Zerbitzuaren menpe:
- Herritarren Arretarako Bulegoak eta Erregistroak Koordinatzeko Bulegoa, Herritarren Arretarako Atalari atxikia.
c) Nafarroako Aldizkari Ofizialaren menpe:
- Kudeaketa Bulegoa.
- Kudeaketa Ekonomikoaren Bulegoa.
- Ekoizpen eta Zabalkunde Bulegoa.
d) Aholkularitza Juridikoaren Zerbitzuaren menpe:
- Administrazio Laguntzako Bulegoa, Kudeaketa Administratiboaren Atalari atxikia .
3. artikulua. Politika Publikoen Plangintza, Koordinazio, Berrikuntza eta Ebaluazioko Zuzendaritza Nagusiaren egitura.
Politika Publikoen Plangintza, Koordinazio, Berrikuntza eta Ebaluazioko Zuzendaritza Nagusiak bulego hauek ditu bere egituran:
a) Nastat-Nafarroako Estatistika Institutuaren menpe:
- Komunikazio Bulegoa, Estatistikaren Koordinazio eta Zabalkunderako Atalari atxikia.
b) Analisi eta Prospekzio Bulegoaren menpe:
- Estrategia Operatiboaren eta Parte-hartzearen Bulegoa, Estrategia Operatiboaren eta Ebaluazioaren Atalari atxikia.
4. artikulua. Komunikazioaren eta Proiekzio Instituzionalaren Zuzendaritza Nagusiaren egitura.
Komunikazioaren eta Proiekzio Instituzionalaren Zuzendaritza Nagusiak bulego hauek ditu bere egituran:
a) Komunikazioaren eta Proiekzio Instituzionalaren Zuzendaritza Nagusiaren menpe:
- Idazkaritza Bulegoa.
b) Proiekzio Instituzionalaren eta Nafarroa Markaren Zerbitzuaren menpe:
- Argitalpenen Ekoizpen eta Diseinu Grafikorako Bulegoa, Nafarroa Markaren eta Argitalpenen Atalari atxikia.
- Argitalpenak Sustatu eta Zabaltzeko Bulegoa, Nafarroa Markaren eta Argitalpenen Atalari atxikia.
5. artikulua. Idazkaritza Tekniko Nagusiaren egitura.
Lehendakaritza eta Berdintasun Departamentuko Idazkaritza Tekniko Nagusiak bulego hauek ditu bere egituran:
- Idazkaritza eta Dokumentazio Bulegoa.
- Langileriaren Kudeaketarako Bulegoa, Gai Administratiboak eta Langileria Kudeatzeko Atalera atxikia.
- Ekonomiaren eta Kontabilitatearen Kudeaketa Bulegoa, Ekonomia Atalari atxikia.
6. artikulua. Nafarroako Administrazio Auzitegiaren egitura.
Nafarroako Administrazio Auzitegiak bulego hauek ditu bere egituran:
- Erregistro eta Izapide Bulegoa, Nafarroako Administrazio Auzitegiko Idazkaritzari atxikia.
- Ebazpenen eta Administrazioarekiko Auzietarako Jurisdikzioarekiko Harremanen Bulegoa, Nafarroako Administrazio Auzitegiko Idazkaritzari atxikia.
II. KAPITULUA. LEHENDAKARITZAKO, GOBERNU IREKIKO ETA NAFARROAKO PARLAMENTUAREKIKO HARREMANETAKO ZUZENDARITZA NAGUSIA
1. ATALA. GOBERNUAREN IDAZKARITZAKO, ERAKUNDEEKIKO HARREMANETAKO ETA ARAUGINTZAKO ZERBITZUA
7. artikulua. Posta Eginkizunetarako Bulegoa.
Posta Eginkizunetarako Bulegoak, Gobernuaren Idazkaritza Atalari atxikita, eginkizun hauek izanen ditu:
a) Foru Komunitateko Administrazioari igortzen zaizkion gutunak bildu, sailkatu eta banatzea.
b) Foruzaingoak egiten dituen segurtasun kontroletan laguntzea.
c) Foru Komunitateko Administrazioak sortzen dituen gutunak bildu, sailkatu, frankeatu eta igortzea.
d) Barneko posta bildu eta banatzea.
e) Frankeatzeko jasotzen diren objektuak kontrolatzea.
f) Egindako lanen kontabilizazioa.
g) Esparru-akordioa kontrolatu eta koordinatzea, unitate kudeatzailea den aldetik.
h) Kanpoko enpresen esku uzten diren frankeatze eta igortze lanen kontabilizazioa.
i) Herritarrei eta Administrazioko unitateei arreta eta argibideak ematea egindako igorpenei buruz.
j) Agintzen zaion beste edozein eginkizun.
8. artikulua. Gobernuaren Idazkaritzako eta Araugintzako Zerbitzuko Kudeaketa Juridikoaren Bulegoa .
Gobernuaren Idazkaritzako eta Araugintzako Zerbitzuko Kudeaketa Juridikoaren Bulegoak, Koordinazio eta Araugintza Atalari atxikita, eginkizun hauek izanen ditu:
a) Txosten juridikoak egitea xedapen orokorren aurreproiektuen eta proiektuen arauen kalitatea hobetzeko.
b) Foru Komunitateko Administrazioarentzat interes komuna duten xedapen orokorren aurreproiektuak eta proiektuak prestatzea, beste unitate batzuen eskumenekoak ez badira.
c) Laguntza juridikoa ematea arauak prestatzeko prozeduretan.
d) Arautzeko teknikei buruzko jarraibideei bultzada ematea.
e) Laguntza juridikoa ematea Foru Zuzenbide Zibilaren arloan eta Nafarroako zuzenbidea oro har sustatzea.
f) Elkarte, fundazio eta lanbide elkargoen espedienteen kudeaketa juridikoa.
g) Lanbide elkargoak sortu, aldatu edo desegitearekin zerikusia duten eskumenen kudeaketa juridikoa.
h) Zerbitzuak agintzen dion beste edozein eginkizun juridiko.
9. artikulua. Elkarte, Fundazio eta Lanbide Elkargoen Bulegoa.
Elkarte, Fundazio eta Lanbide Elkargoen Bulegoak, Koordinazio eta Araugintza Atalari atxikita, eginkizun hauek izanen ditu:
a) Indarreko legediaren arabera eratzen diren Elkarte eta Federazioen Erregistroa kudeatzea, haiek batez ere Nafarroako Foru Komunitatearen eremuan jarduten dutenean.
b) Fundazioen Erregistroa, azaroaren 30eko 104/2022 Foru Dekretuak arautua, kudeatzea.
c) Nafarroako Lanbide Elkargoen eta Elkargoetako Kontseiluen Erregistroa, apirilaren 6ko 3/1998 Foru Legeak sortua, kudeatzea.
d) Erregistro horietan sartu behar duten egintzen inskripzio espedienteak tramitatzea.
e) Erregistro horietan inskribatzen diren egintzei lotutako nahitaezko dokumentazio guztia gordailutzea.
f) Publizitatea ematea erregistro idazpenei eta erregistro horretan gordailutzen den dokumentazioari.
g) Agintzen zaion beste edozein eginkizun.
2. ATALA. GOBERNU IREKIAREN ETA HERRITARRENTZAKO ARRETAREN ZERBITZUA
10. artikulua. Herritarren Arretarako Bulegoak eta Erregistroak Koordinatzeko Bulegoa.
Herritarren Arretarako Bulegoak eta Erregistroak Koordinatzeko Bulegoa, Herritarren Arretarako Atalari atxikita, erregistro kontuetan laguntza emateko bulegoa izanen da, eta eginkizun hauek izanen ditu:
a) Administrazio Publikoen Administrazio Prozedura Erkideari buruzko urriaren 1eko 39/2015 Legean erregistro kontuetan laguntza emateko bulegoentzat aurreikusitako eginkizun guztiak.
b) Arreta eta informazio lanetan laguntzea, modu inklusiboan, Iruñeko Herritarren Arretarako Bulegoan, bai aurrez aurreko baliabideen bidez, bai baliabide telefoniko eta telematikoen bidez, Nafarroako Gobernuaren teknologia berriak erabiliz, eta Nafarroako Gobernuaren erregistro orokorrean.
c) UNE 170001-2 Arauaren kudeaketa-sisteman eragile taldearen koordinatzailearen eginkizunak betetzea.
d) Bulegoetako langileen prestakuntza beharrak identifikatzea eta ataleko arduradunari jakinaraztea, irisgarritasunaren eta inklusioaren arloko prestakuntza plana sortzeko.
e) Ataleko arduradunari laguntzea irisgarritasun unibertsalaren eta inklusioaren arloan behar diren zeregin guztietan.
f) Dokumentuak jasotzea, kodetzea, kontrolatzea, bidaltzea eta haien jarraipena egitea eta erregistro-sisteman tratatzea.
g) Erregistroaren arloan laguntza emateko dauden gainerako bulegoetako arduradunekin eta departamentuetako eta erakunde autonomoetako erregistroetako arduradunekin koordinatzea.
h) Zerbitzua emateko jarraibideak prestatzea, arreta bateratua, irisgarria eta inklusiboa izan dadin.
i) Ziurtagiri digitalak egiteko eta identifikazio eta sinadura digitalerako sistemak aplikatzeko laguntza ematea.
j) Lehendakaritza eta Berdintasun Departamentuaren Erregistroaz arduratzea eta haren iragarki-taula kudeatzea.
k) Indarra duten xedapenek ematen dizkioten gainerako eginkizunak eta aurrekoekin zerikusia duen edo haien ondoriozkoa den beste edozein.
l) Agintzen zaion beste edozein eginkizun.
3. ATALA. NAFARROAKO ALDIZKARI OFIZIALAREN ATALA
11. artikulua. Kudeaketa Bulegoa.
Kudeaketa Bulegoak, Nafarroako Aldizkari Ofizialaren Atalari atxikita, honako eginkizun hauek izanen ditu:
a) Nafarroako Aldizkari Ofizialean argitaratuko diren agiriak jasotzea eta formalki balidatzea, eta haien osotasuna bermatzea egokiak iruditzen zaizkion sistema teknologikoak erabiliz.
b) Argitaratzen diren agirien benetakotasuna bermatzea, dela sinadura digitalaren bidez, dela egokia iruditzen zaion beste sistema teknologiko baten bidez.
c) Iragarkiak sailkatzea eta barne-sisteman erregistratzea, argitaratzeko behar diren datuak eta metadatuak sartuta.
d) Iragarkiak bidaltzen dituzten Administrazioko unitateei arreta eta laguntza teknikoa ematea argitalpen fase guztietan.
e) Herritarrei arreta egitea eta laguntzea, batez ere informazio bilaketan.
f) Jatorrizko agiriak kudeatu eta artxibatzeko barne sistemaren mantentze-lanak.
g) Sinplifikazio administratibora jotzea, aldian behin prozeduren egokitasuna berrikusiz.
h) Informazio egokia lortzea dokumentuak jasotzeko jarduerarekin zerikusia duten txostenak egiteko.
i) Bulegoaren langile eta baliabide beharrak bideratzea.
j) Agintzen zaion beste edozein eginkizun.
12. artikulua. Kudeaketa Ekonomikoaren Bulegoa.
Kudeaketa Ekonomikoaren Bulegoak, Nafarroako Aldizkari Ofizialaren Atalari atxikita, eginkizun hauek izanen ditu:
a) Tasa ordaindu beharra duten iragarkiak kudeatzea, fakturak bidaltzea, ordainketa egiaztatzea, derrigorrezko diru-bilketara bideratzea eta ordaingabeak Estatuko Aldizkari Ofizialera bidaltzea.
b) Entitate laguntzaileekiko harremana tasak kobratzeari dagokionez.
c) Nafarroako Aldizkari Ofizialari esleitutako aurrekontuarekin egiten diren erosketak, ordainketak eta fakturak kudeatzea.
d) Tasa ordaindu beharra duten igorleen datu baseen kudeaketa eta mantentze-lanak.
e) Dokumentuak Posta Elektroniko Seguruaren bidez (PES) bidaltzeko baimenak edo funtzionalitate baliokideko sistema korporatiboak kudeatzea.
f) Informazio egokia lortzea Nafarroako Aldizkari Ofizialaren jarduera ekonomikoarekin zerikusia duten txostenak egiteko.
g) Bere jardueraren eremuan agintzen zaizkion gainerakoak.
13. artikulua. Ekoizpen eta Zabalkunde Bulegoa.
Ekoizpen eta Zabalkunde Bulegoak, Nafarroako Aldizkari Ofizialaren Atalari atxikita, eginkizun hauek izanen ditu:
a) Argitaratu beharreko jatorrizko agirien maketazioa, Nafarroako Aldizkari Ofizialerako ezarritako ezaugarri formalei jarraikiz.
b) Eguneroko aldizkaria sortzea gaztelaniaz eta euskaraz, baita beharrezkotzat jotzen diren aldizkari bereziak ere.
c) Interes bereziko edukiak dituzten separatak sortzea.
d) Edizio sistemaren mantentze-lanak.
e) Aldizkariak Interneten eta egokitzat jotzen den beste edozein zabalkunde bidetan kargatzen direla bermatzea.
f) Edizio sistemaren eta zabalkunde sistemen teknologia eta informazioa mantentzea eta eguneratzea: web-orria, bilatzailea, alerten sistema edo beste edozein zabalkunde bide.
g) Hizkuntza erraztera eta baliabideak berrerabiltzera jotzea eta irisgarritasun arauak betetzen direla berrikustea.
h) Argitaratutako aldizkariak artxibatzea.
i) Informazio egokia lortzea dokumentuak zabaltzeko jarduerarekin eta argitalpenetarako web sarbidearekin zerikusia duten txostenak egiteko.
j) Bulegoaren langile eta baliabide beharrak bideratzea.
k) Agintzen zaion beste edozein eginkizun.
4. ATALA. AHOLKULARITZA JURIDIKOAREN ZERBITZUA
13 bis artikulua. Administrazio Laguntzako Bulegoa .
Administrazio Laguntzako Bulegoak, Kudeaketa Administratiboaren Atalari atxikita dagoenak, eginkizun hauek izanen ditu:
a) Espedienteen artxiboa antolatzea eta kontrolatzea.
b) Epaitegi eta auzitegietako jakinarazpenak kontrolatzea eta banatzea.
c) Aholkularitza Juridikoko liburutegiko liburuak katalogatzea.
d) Zerbitzuko administrazio-langileen eginkizunak koordinatzea.
e) Atalaren berezko eginkizunetan laguntzea.
f) Agintzen zaion beste edozein eginkizun.
III. KAPITULUA. POLITIKA PUBLIKOEN PLANGINTZA, KOORDINAZIO, BERRIKUNTZA ETA EBALUAZIOKO ZUZENDARITZA NAGUSIA
1. ATALA. NASTAT-NAFARROAKO ESTATISTIKA INSTITUTUA
14. artikulua. Komunikazio Bulegoa.
Komunikazio Bulegoak, Estatistikaren Koordinazio eta Zabalkunderako Atalari atxikirik, eginkizun hauek izanen ditu:
a) Nastat-Nafarroako Estatistika Institutuak informazio estatistikoa eskaintzeko dituen bide berriak sendotzea eta garatzea.
b) Nastat-Nafarroako Estatistika Institutuaren web-orriaren mantentze-lanak egitea, informazioa gaurkotzea eta eduki, forma eta diseinuak egokitzea.
c) Informazio estatistikoa egoki zabaltzeko edukiak eta formatuak egokitzea, oro har.
d) Laguntza ematea informazioa sortzeko lanetan, batez ere zabalkuntza digitala sortzeko lanetan.
e) Ereduak ezartzea, langileak autonomoak izan daitezen edozein euskarritako argitalpenak egin eta zabaltzeko.
f) Aurrekoekin loturik esleitzen zaion beste edozein.
2. ATALA. ANALISI ETA PROSPEKZIO BULEGOA
15. artikulua. Estrategia Operatiboaren eta Partehartzearen Bulegoa.
Estrategia Operatiboaren eta Parte-hartzearen Bulegoak, Estrategia Operatiboaren eta Ebaluazioaren Atalari atxikita, eginkizun hauek izanen ditu:
a) Herritarrek parte hartzeko ekintzak sustatzea, Analisi eta Prospekzio Bulegoaren jardueraren euskarri gisa.
b) Berrikuntza publikoko prozesuen plangintzan, jarraipenean eta ebaluazioan orientatzea eta lagun egitea.
c) Nafarroako Gobernuaren estrategia operatiboa diseinatzen, gauzatzen, ebaluatzen eta haren jarraipena egiten laguntzea.
d) Aipatutakoen antzekoa edo osagarria den beste edozein eginkizun, bai eta agintzen zaizkionak ere.
IV. KAPITULUA. KOMUNIKAZIOAREN ETA PROIEKZIO INSTITUZIONALAREN ZUZENDARITZA NAGUSIA
1. ATALA. IDAZKARITZA BULEGOA
16. artikulua. Idazkaritza Bulegoa.
Idazkaritza Bulegoak, Komunikazioaren eta Proiekzio Instituzionalaren Zuzendaritza Nagusiari atxikita, eginkizun hauek izanen ditu:
a) Jarduera administratiboa koordinatzeko, bultzatzeko eta kontrolatzeko lanak egitea.
b) Dokumentuen artxiboa ezarri, antolatu eta kudeatzea.
c) Komunikazioaren eta Proiekzio Instituzionalaren Zuzendaritza Nagusiak onetsitako ebazpenak erregistratzea, artxibatzea eta zaintzea.
d) Informazioa eta komunikazioa koordinatzea Lehendakaritza eta Berdintasun Departamentuko gainontzeko unitate organikoekin.
e) Aurrekoen antzekoa edo osagarria izanik, Zuzendaritza Nagusiak agintzen dion beste edozein eginkizun.
2. ATALA. PROIEKZIO INSTITUZIONALAREN ETA NAFARROA MARKAREN ZERBITZUA
17. artikulua. Argitalpenen Ekoizpen eta Diseinu Grafikorako Bulegoa.
Argitalpenen Ekoizpen eta Diseinu Grafikorako Bulegoak, Nafarroa Markaren eta Argitalpenen Atalari atxikita, eginkizun hauek izanen ditu:
a) Nafarroako Gobernuaren Argitalpen Funtsaren obren edizio prozesuaren tramitazio administratiboa eta jarraipena.
b) Nafarroako Gobernua ordezkatzen duten adierazpen grafikoak erakusten dituzten ohiko paper-inprimakiak argitaratzea.
c) Nafarroa Markaren eta Argitalpenen Ataleko prozesu administratiboak koordinatzea eta gauzatzea.
d) Aurrekoen antzekoa edo osagarria izanik, Nafarroa Markaren eta Argitalpenen Atalak agintzen dion beste edozein eginkizun.
18. artikulua. Argitalpenak Sustatu eta Zabaltzeko Bulegoa.
Argitalpenak Sustatu eta Zabaltzeko Bulegoak, Nafarroa Markaren eta Argitalpenen Atalari atxikita, eginkizun hauek izanen ditu:
a) Nafarroako Gobernuaren Argitalpen Funtsa kontrolatu, erakundeetan eta merkatuan banatu eta saltzea.
b) Nafarroako Gobernuko Argitalpen Funtsaren obrak sustatu eta kanpoan hedatzea.
c) Aurrekoen antzekoa edo osagarria izanik, Nafarroa Markaren eta Argitalpenen Atalak agintzen dion beste edozein eginkizun.
V. KAPITULUA. IDAZKARITZA TEKNIKO NAGUSIA
19. artikulua. Idazkaritza eta Dokumentazio Bulegoa.
Idazkaritza eta Dokumentazio Bulegoak, Idazkaritza Tekniko Nagusiari atxikita, eginkizun hauek izanen ditu:
a) Idazkaritza Tekniko Nagusian tramitatzen diren espedienteen jarraipena, artxiboa eta kontrola egitea.
b) Laguntza administratiboa ematea otsailaren 21eko 29/2005 Foru Dekretuaren 6. artikuluan xedatutako eginkizunetan (Nafarroako Foru Komunitateko Administrazioko Idazkaritza Tekniko Nagusiak arautzen dituen Erregelamendua onesten duen foru dekretua).
c) Laguntza administratiboa ematea Araubide Juridikoaren Atalari eta Gai Administratiboak eta Langileria Kudeatzeko Atalari.
d) Idazkaritza Tekniko Nagusiaren unitate eskuordetu gisa aritzea administrazio elektronikoa garatzeko eskumena duten unitateetatik bultzatzen diren lantaldeetan, eta, hori dela eta, administrazio elektronikorako tresna berrien erabileraren arloan gertatzen diren aurrerapenen berri ematea Idazkaritza Tekniko Nagusiaren gainerako unitateetako arduradun eta erabiltzaileei. Horrekin batera, jarduteko jarraibide eta prozedurak igorriko dizkie, eta, era berean, unitate horien iradokizunak, zalantzak eta beharrak helaraziko dizkie aipatutako lantaldeei.
e) Agintzen zaion beste edozein eginkizun.
20. artikulua. Langileriaren Kudeaketarako Bulegoa.
Langileriaren Kudeaketarako Bulegoak, Gai Administratiboak eta Langileria Kudeatzeko Atalari atxikita, eginkizun hauek izanen ditu:
a) Departamentuari atxikitako langileen arloko gaiak tramitatzea, otsailaren 21eko 30/2005 Foru Dekretuan ezarritakoarekin bat. Dekretu horrek Nafarroako Foru Komunitateko Administrazioko eta haren erakunde autonomoetako organo batzuetako langileriaren arloko eskudantziak zehazten ditu.
b) Agintzen zaion beste edozein eginkizun.
21. artikulua. Ekonomiaren eta Kontabilitatearen Kudeaketa Bulegoa.
Ekonomiaren eta Kontabilitatearen Kudeaketa Bulegoak, Ekonomia Atalari atxikita, eginkizun hauek izanen ditu:
a) Departamentuari dagozkion gastuen eta diru-sarreren espedienteak kontrolatu, jarraipena egin eta kontabilizatzea.
b) Esleipen kodeak prestatzea fakturak kontabilizatzeko eta kodea kudeaketa zentroari jakinaraztea.
c) Kutxako aurrerakinen kontuak eta justifikatu beharreko ordainketa-aginduen koordinazioa, jarraipena eta kontrola.
d) Departamentuari esleitutako aurrekontua nola betearazten den kontrolatzen laguntzea.
e) Kontabilitateko informazioa artxibatu, gorde eta kontrolatzea.
f) Agintzen zaion beste edozein eginkizun.
VI. KAPITULUA. NAFARROAKO ADMINISTRAZIO AUZITEGIA
22. artikulua. Erregistro eta Izapide Bulegoa.
Erregistro eta Izapide Bulegoak, Nafarroako Administrazio Auzitegiko Idazkaritzari atxikita, eginkizun hauek izanen ditu:
a) Auzitegiko Idazkaritzan aurkeztutako dokumentuak erregistratzea.
b) Espedienteak ireki eta erregistratzea.
c) Aurkeztutako dokumentazioa aztertu, sailkatu eta banatzea.
d) Auzitegian telefonoz nahiz beste edozein bidez eskatzen diren argibideak ematea.
e) Ematen diren probidentziak transkribatu eta jakinaraztea.
f) Hartu izanaren agiriak jaso eta epeen konputua kontrolatzea.
g) Beste erakunde batzuekiko harremanak.
h) Agintzen zaion beste edozein eginkizun.
23. artikulua. Ebazpenen eta Administrazioarekiko Auzietarako Jurisdikzioarekiko Harremanen Bulegoa.
Ebazpenen eta Administrazioarekiko Auzietarako Jurisdikzioarekiko Harremanen Bulegoak, Nafarroako Administrazio Auzitegiko Idazkaritzari atxikita, eginkizun hauek izanen ditu:
a) Auzitegiak emandako ebazpenak transkribatu eta jakinaraztea.
b) Ebazpenen jakinarazpenak hartu izanaren agiriak jaso eta kontrolatzea.
c) Administrazioarekiko auzien organo jurisdikzionalei bidali beharreko espedienteak prestatzea.
d) Administrazioarekiko auzi-errekurtsoen kasuan, interesdunak epatzeko probidentziak jakinaraztea.
e) Nafarroako Administrazio Auzitegiko artxiboa kudeatzea.
f) Auzitegiaren kudeaketa ekonomikoari dagozkion kontabilitateko dokumentuak prestatzea.
g) Agintzen zaion beste edozein eginkizun.
Lehen xedapen gehigarria. Izendapenak.
1. Foru agindu honetan ezarritako egituraren arabera izen berari eusten dioten bulegoetako buruen izendapenak berresten dira, haiek egin zireneko baldintza berberetan.
2. Honako izendapen hauek berresten dira, egin ziren baldintza berberetan:
Analisi eta Prospekzio Bulegoan:
- Plangintza Dokumentuak Sortu eta Zabaltzeko Bulegoko buruak, aurrerantzean, Estrategia Operatiboaren eta Parte-hartzearen Bulegoko burutza beteko du.
Bigarren xedapen gehigarria. Bulegoak kentzea.
1. Honako bulego hau kentzen da Lehendakaritzako, Gobernu Irekiko eta Nafarroako Parlamentuarekiko Harremanetako Zuzendaritza Nagusitik:
- Jendearentzako Argibideen eta Erregistro Orokorraren Bulegoa.
2. Honako unitate hauek kentzen dira Politika Publikoen Plangintza, Koordinazio, Berrikuntza eta Ebaluazioko Zuzendaritza Nagusiko Analisi eta Prospekzio Bulegotik:
- Plangintza Dokumentuak Sortu eta Zabaltzeko Bulegoa.
- Proiektuak Kudeatu eta Jarraitzeko Bulegoa.
- Plan Orokorrak Koordinatzeko Bulegoa.
Xedapen indargabetzaile bakarra. Arauak indargabetzea.
Indargabetuta geratzen dira foru agindu honetan ezarritakoari aurka egiten dioten maila bereko edo beheragoko xedapen guztiak, eta, bereziki, maiatzaren 21eko 88/2021 Foru Agindua, Lehendakaritzako, Berdintasuneko, Funtzio Publikoko eta Barneko kontseilariak emana, zeinaren bidez ezartzen baita Lehendakaritzako, Berdintasuneko, Funtzio Publikoko eta Barneko Departamentuaren egitura organikoa bulegoen mailan, Lehendakaritza eta Berdintasun Departamentuaren eskumen esparruari dagokionez.
Azken xedapen bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
