LEXNAVARRA
47E/2024 FORU AGINDUA, OTSAILAREN 29KOA, LANDA GARAPENEKO ETA INGURUMENEKO KONTSEILARIAK EMANA, MENDI ETA OIHAN-LURSAILETAKO JARDUKETAK BAIMENTZEKO PROZEDURA SINPLIFIKATUAK ARAUTZEN DITUENA
BON N.º 61 - 21/03/2024
- ZIOEN AZALPENA
- Artikulu bakarra. Xedapena onestea.
I. KAPITULUA. XEDAPEN OROKORRAK
- 1. artikulua. Xedea eta aplikazioeremua.
- 2. artikulua. Definizioak.
- 3. artikulua. Oihangintzakudeaketaren oinarrizko printzipioak.
II. KAPITULUA. BASOBERRITZEAK, BASOAK HOBETZEKO LANAK ETA MERKATARITZABALIORIK GABEKO ZUHAITZAK MOZTEA
1. ATALA. BASOBERRITZEAK
- 4. artikulua. Baimena behar duten jarduketak.
- 5. artikulua. Erantzukizunpeko adierazpena behar duten jarduketak.
- 6. artikulua. Aurretiazko komunikazioa egin beharra duten jarduketak.
- 7. artikulua. Dokumentazioa.
2. ATALA. SASTRAKAK KENTZEA
- 8. artikulua. Baimena behar duten jarduketak.
- 9. artikulua. Erantzukizunpeko adierazpena behar duten jarduketak.
- 10. artikulua. Baimenik eta erantzukizunpeko adierazpenik behar ez duten jarduketak.
3. ATALA. KIMAKETAK
- 11. artikulua. Baimena behar duten jarduketak.
- 12. artikulua. Erantzukizunpeko adierazpena behar duten jarduketak.
- 13. artikulua. Baimenik eta erantzukizunpeko adierazpenik behar ez duten jarduketak.
4. ATALA. MERKATARITZABALIORIK GABEKO ZUHAITZ BARREIATUAK MOZTEA
- 14. artikulua. Erantzukizunpeko adierazpena behar duten jarduketak.
5. ATALA. MERKATARITZABALIORIK GABEKO BASOGINTZATRATAMENDUAK BASOMASETAN
- 15. artikulua. Baimena behar duten jarduketak.
- 16. artikulua. Aurretiazko komunikazioa egin beharra duten jarduketak.
- 17. artikulua. Dokumentazioa.
III. KAPITULUA. BASOAZPIEGITURAK
1. ATALA. BASOBIDEAK ERAIKITZEA
- 18. artikulua. Baimena behar duten jarduketak.
2. ATALA. BASOBIDEAK ZAINTZEA
- 19. artikulua. Baimena behar duten jarduketak.
- 20. artikulua. Erantzukizunpeko adierazpena behar duten jarduketak.
- 21. artikulua. Baimenik eta erantzukizunpeko adierazpenik behar ez duten jarduketak.
- 22. artikulua. Bestelako baimenak.
3. ATALA. ITXITURAK ETA BESTELAKO BASOAZPIEGITURAK
- 23. artikulua. Baimena behar duten jarduketak.
- 24. artikulua. Erantzukizunpeko adierazpena behar duten jarduketak.
- 25. artikulua. Baimenik eta erantzukizunpeko adierazpenik behar ez duten jarduketak.
- 26. artikulua. Bestelako baimenak.
IV. KAPITULUA. ERANTZUKIZUNPEKO ADIERAZPENA IZAPIDETZEA
- 27. artikulua. Erantzukizunpeko adierazpena egiteko izapideak.
- 28. artikulua. Erantzukizunpeko adierazpenaren eredua.
V. KAPITULUA. AURRETIAZKO KOMUNIKAZIOA IZAPIDETZEA
- 29. artikulua. Aurretiazko komunikazioaren izapideak.
- Lehen xedapen gehigarria. Dokumentuen irisgarritasuna.
- Azken xedapenetako lehena. Jarduketak etetea.
- Azken xedapenetako bigarrena. Indarra hartzea.
Nafarroako Oihan-ondarea Babestu eta Garatzeari buruzko abenduaren 31ko 13/1990 Foru Legean eta ondorengo aldaketetan, oinarrizko helburutzat ezartzen da oihanetako ingurune naturala eta egoera ekologikoak zaintzea eta hobetzea.
Nafarroako Oihan-ondarea Babestu eta Garatzeari buruzko abenduaren 31ko 13/1990 Foru Legearen 6. artikuluak betebehartzat ezartzen du mendiak beren izaerari dagokion bezala zaindu eta erabiltzea, eta, horregatik, Nafarroako Foru Komunitatearen ardurapean izanen dira, lege horretan ezartzen diren baldintzetan.
Arau horren 45. artikuluaren laugarren apartatuan ezartzen denez, oihangintza-administrazioak onetsi beharko ditu basoberritzeko proiektuak, salbu eta onura publikokoak edo babesleak edo foru-lege honen 7. artikuluan arautuak ez diren eta administrazioak berak onetsitako kudeaketa-tresna bat duten mendien kasuan, betiere aipatutako tresnak agintzen duenari lotuz gauzatzen badira proiektuak; halakoetan, aldez aurretik jakinaraztea izanen da betebehar bakarra.
Bestalde, 67. artikuluaren hirugarren apartatuan ezartzen denez, oihanzaintzako hobekuntza-lanak, hala nola bakantzeak, sastrakak garbitzea, kimaketak eta merkataritzako aprobetxamendurik ez duten gainerako tratamenduak, onetsitako aprobetxamendu- eta hobekuntza-planaren edo jarduketa-planaren arabera eginen dira. Horrelako planik ez badago, edo hobekuntzak ez badaude planetan sarturik, oihangintza-administrazioaren baimen espresua beharko da.
Baso-azpiegiturei dagokienez, 13/1990 Foru Legearen 4. artikuluan menditzat jotzen dira, lursailak bezala, mendiaren kudeaketarako eta erabilerarako eraikinak eta azpiegiturak ere. Hala, batzuk bakarrik aipatzearren, oihan-lurretan dauden pista, itxitura eta idoiak ere, betiere mendiaren kudeaketari eta erabilerei lotzen bazaizkie, Foru Komunitatearen ardurapean izanen dira, 6. artikuluaren arabera. Testuinguru horretan, 75 k) artikuluak administrazioko arau-haustetzat jotzen du egurra ateratzeko bideak, pistak edo beste edozein obra egitea, ez badago antolakuntzako proiektuetan aurreikusirik edo ez bada oihangintza-administrazioak espresuki baimendua.
Nafarroako Oihan-ondarea Babestu eta Garatzeari buruzko abenduaren 31ko 13/1990 Foru Legearen azken xedapenetako bigarrenak Nafarroako Gobernuari ahalmena ematen dio foru-lege hori aurrera eraman eta betetzeko behar diren xedapen guztiak eman ditzan. Hala, otsailaren 17ko 59/1992 Foru Dekretuaren bidez, Mendien Erregelamendua onetsi zen foru-lege hori garatzeko, eta oihangintza-administrazioaren ardurapeko jarduketen alderdi batzuk arautu ziren. Foru-dekretu horren azken xedapenetako lehenean, ingurumen-gaien ardura duen departamentuko titularrari ahalmena ematen dio foru-lege hori aurrera eraman eta betetzeko behar diren xedapen guztiak eman ditzan.
Adierazitako araudiarekin bat etorriz (legeak eta erregelamenduak), oihangintza-administrazioak mendi- edo oihan-lursailetan hainbat jarduketa egiteko eskaerak izapidetu izan ditu. Haietako batzuk ez daude babestuta baimen bat izapidetzea eskatzen duen ezein agindutan, eta beste batzuek, berriz, nahiz eta baimena behar izan, garrantzi txikiagoa dute, eta administrazio-baimenaren prozedura sinplifikatuen bidez kudea daitezke; adibidez, erantzukizunpeko adierazpen bat aurkeztuz edo aurretiazko komunikazioko sistemaren bidez.
Azaldutakoarekin bat, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1 artikuluak ematen dizkidan eskudantziak erabiliz,
AGINTZEN DUT:
Artikulu bakarra. Xedapena onestea.
Mendi eta oihan-lursailetako jarduketak baimentzeko prozedura sinplifikatuak arautzen dituen xedapen arautzailea onesten da.
Azken xedapen bakarra. Indarra hartzea.
Foru-agindu honek Nafarroako Aldizkari Ofizialean argitaratu eta biharamunean hartuko du indarra.
I. KAPITULUA. XEDAPEN OROKORRAK
1. artikulua. Xedea eta aplikazioeremua.
Foru-agindu honen xedea da mendietan edo oihan-lursailetan honako jarduketa hauek baimentzeko prozedura sinplifikatuak ezartzea: basoberritzeak, basoak hobetzeko lanak, merkataritza-baliorik gabeko zuhaitzak moztea eta baso-azpiegiturak egitea.
Xedapen hau Nafarroako Foru Komunitateko mendi eta oihan-lursail guztietan aplikatu beharrekoa da.
Xedapen honen ondorioetarako, honako definizio hauek hartuko dira aintzat:
1. Pertsona edo entitate sustatzailea:
- Mendiaren edo oihan-lursailaren titularra edo errentaria.
- Mendia edo oihan-lursaila kudeatzearen arduraduna.
- Toki-erakundea, bai bere titulartasuneko lursailetan, bai besteren lursailetan bere eremu geografikoko zenbait pertsona edo entitate sustatzaileren eskaerak biltzen baditu, haiek ordezkatuz.
- Nafarroako Foru Komunitateko Administrazioa, kudeaketa berariaz beste titular batzuengan lagata ez daukaten bere jabetzako finketan.
2. Oihangintza-administrazioa: Nafarroako Gobernuko behar den departamentuan oihangintzaren arloan eskumenak dituen administrazio-organoa.
3. Mendien edo mendi-multzoen oihangintza-plangintzak egiteko tresna: oihangintzako antolakuntza-proiektuak/mendien antolakuntza-planak, kudeaketako plan teknikoa edo oihangintzako jarduketa-plana. Mendiaren ikuspegi globala ematen duten, haren erabilera guztiak integratzen dituzten, espazioari eta denborari dagozkien planifikazio malgua eta berrikusgarria jasotzen duten (epe ertainerako eta laburrerako) eta emaitza-kontua, neurri-egitaraua eta jarduketa-egutegia jasotzen duten dokumentu teknikoak dira. Gainera, Nafarroako egungo oihangintza-legediaren arabera, oihangintza-administrazioak onetsi behar ditu plan horiek kasu guztietan, titulartasuna edozein motatakoa dela ere.
3. artikulua. Oihangintzakudeaketaren oinarrizko printzipioak.
1. Nafarroako Foru Komunitatean dauden mendi edo oihan-lurretan jarduketak egitea eskatzen duten pertsona edo entitate sustatzaileek dagokion kudeaketa-tresnan edo oihangintza-planifikazioan adierazitakoa bete beharko dute, bai mendiei dagokienez, bai eskualde mailan.
2. Naturagune babestuak osatzen dituzten edo haien parte diren mendi edo oihan-lurren, haien babesguneen eta Natura 2000 Sarean sartzen direnen kasu espezifikoan, haien balio naturalak zaintzeari eta babesteari dagozkien jarraibideak eta araudi espezifikoa ere bete beharko dituzte.
3. Jarduketa sustatuko duen pertsona edo entitatea ez bada mendiaren edo oihan-lurraren titularra, hark ere ados egon beharko du.
II. KAPITULUA. BASOBERRITZEAK, BASOAK HOBETZEKO LANAK ETA MERKATARITZA-BALIORIK GABEKO ZUHAITZAK MOZTEA
1. ATALA. BASOBERRITZEAK
4. artikulua. Baimena behar duten jarduketak.
1. Erabilera Publikoko Mendien edo Mendi Babesleen Katalogoan jasotzen diren, naturagune babestuak osatzen dituzten edo haien parte diren mendi eta oihan-lurrak, eta haien babesguneak eta Natura 2000 Sarearen barruko mendiak edo oihan-lurrak basoberritzeko proiektu orok oihangintza-administrazioaren berariazko baimena beharko dute.
2. Halaber, oihangintza-administrazioaren berariazko baimena beharko dute oihangintza-administrazioak onetsitako planifikazio-tresnarik gabeko mendi eta oihan-lurretan egiten diren basoberritze-proiektuek, baldin eta hektarea bati baino gehiagori eragiten badiote.
5. artikulua. Erantzukizunpeko adierazpena behar duten jarduketak.
Mendiak eta oihan-lurrak basoberritzeko proiektuak, hektarea bat baino gutxiagoko azalerari eragiten badiote, erantzukizunpeko adierazpenaren prozeduraren bidez onesten ahalko dira. Apartatu honetan sartzen da arboladi barreiatuak landatzea hektarea bat baino gutxiagoan, hezkuntzako helburuekin edo helburu sozialekin.
6. artikulua. Aurretiazko komunikazioa egin beharra duten jarduketak.
Gainerako mendietan edo oihan-lurretan basoberritze-proiektuak egikaritzeko, betiere oihangintza-administrazioak onetsitako plangintza-tresnak badituzte eta jarduketak haietan aurreikusiak badaude, aurretiazko komunikazio bat egin beharko da, jarduketa hasi baino bi hilabete lehenago.
1. 13/1990 Foru Legea garatzeko xedez emandako eta 59/1992 Foru Dekretuaren bidez onetsitako Mendien Erregelamenduaren 70. artikuluan adierazitakoaren arabera, hektarea bat baino gehiagoko azalerari eragiten dioten basoberritze-proiektuak sustatzen baditu pertsona edo entitate batek, hauek erantsi beharko dira eskaeran:
a) Basoberrituko den eremuaren hedadura, egoera eta mugak, sartuko diren espezieak eta lanen aurrekontua jasotzen dituen memoria teknikoa.
b) Teknikari eskudunek sinatutako proiektua, basoberrituko den lurra hamar hektareatik gorakoa bada.
2. Aurreko apartatuan adierazitakoaz gainera, mantentze-plana erantsi beharko zaio eskaerari, non zehaztu behar baitira jarduketa eta egikaritze-egutegia, zuhaitzak landatu ondorengo lehen 5 urteetarako aurreikusten diren esku-hartzeak eta mantentze-plan hori egikaritzeko konpromisoa.
2. ATALA. SASTRAKAK KENTZEA
8. artikulua. Baimena behar duten jarduketak.
Oihangintza-administrazioaren berariazko baimena behar izanen da sastraka-kentze hauetarako:
a) Baldintzetako araudiaren arabera paisaiako elementuei eragiten dieten sastraka-kentzeak. Lan horiek beste titular baten mugako lurzatietan dagoen landarediari eragiten badiote, haren adostasuna ere beharko da.
b) Berezko landaredi zurkara duten finka-ertzei eragiten dieten sastraka-kentze mekanikoak edo eskuzkoak, haiek banatzen dituzten elementuak (heskaiak) eratzen dituzten tokietan. Lan horiek beste titular baten mugako lurzatietan dagoen landarediari eragiten badiote, haren adostasuna ere beharko da.
c) Hurrengo artikuluetan barne hartzen ez diren beste sastraka-kentze batzuk.
9. artikulua. Erantzukizunpeko adierazpena behar duten jarduketak.
Erantzukizunpeko adierazpena beharko da sastraka-kentze hauetarako:
a) Pisten eta bestelako baso-azpiegituren ertzetako sastraka-kentze mekanikoak.
b) Linea elektriko eta komunikazio-bideetan (errepideak eta trenbideak) mantentze-lanak egiteko sastraka-kentzeak.
c) Landaredi lehiakidearen garbiketak basoberritzeetan, betiere lan horiek eta haien egikaritze-baldintzak ez badira berariaz jasotzen basoberritze horretako hasierako baimenean.
d) Bestelako landaredi-kentzeak, betiere jarduketa horiek jasoak badaude oihangintza-administrazioak onetsitako plangintza-tresnetan.
Erantzukizunpeko adierazpenaren dokumentua aurkezteko beharretik salbuetsita daude oihangintza-administrazioko langileen plangintza- edo berrikuste-dokumentuaren xehetasunak nahikoa diren kasuak, kudeaketa-tresna onesteko administrazio-egintzan berariaz sartzeko lan horien berariazko egikaritze-baimena eta ondorio horietarako ezarritako baldintzak.
10. artikulua. Baimenik eta erantzukizunpeko adierazpenik behar ez duten jarduketak.
Jarduketa hauek ez dute baimenik behar:
a) Belar-landaredia (adibidez, iratzea eta asuna) kentzean oinarritzen diren larre, bazkaleku eta iralekuetako garbitze-lanak.
b) Larre eta bazkalekuetako mantentze-lanak, betiere sasiak, arrosak (Rubus sp., Rosa sp.) eta bestelako landaredi zurkarak kentzeko lanak badira.
c) Berezko landaredia zurkara duten finka-ertzei eragiten dieten sastraka-kentzeak, zuhaixkaz osatutako baso-masekin edo zuhaitz-masa jarraituekin muga egiten duten tokietan. Lan horiek beste titular baten mugako lurzatietan dagoen landarediari eragiten badiote, haren adostasuna ere beharko da.
d) Pisten eta bestelako baso-azpiegituren ertzetako eskuzko sastraka-kentzeak.
3. ATALA. KIMAKETAK
11. artikulua. Baimena behar duten jarduketak.
Zuhaitzak salbuespenez kimatzeko, barne direla lepatzea eta berriro lepatzea -teknika horiek berreskuratzeko-, oihangintza alorreko administrazioaren berariazko baimena beharko da.
12. artikulua. Erantzukizunpeko adierazpena behar duten jarduketak.
Zuhaitzak salbuespenez kimatzeko, barne direla lepatzea eta berriro lepatzea -teknika horiek berreskuratzeko-, erantzukizunpeko adierazpena beharko da, oihangintza alorreko administrazioak onetsitako plangintza-dokumentuetan barne hartuta daudenean.
Erantzukizunpeko adierazpenaren dokumentua aurkezteko betebeharretik salbuesten dira oihangintza-administrazioko langileen plangintza- edo berrikuste-dokumentuaren xehetasunak nahikoa diren kasuak, kudeaketa-tresna onesteko administrazio-egintzan berariaz sartu direlako lan horien berariazko egikaritze-baimena eta ondorio horietarako ezarritako baldintzak.
13. artikulua. Baimenik eta erantzukizunpeko adierazpenik behar ez duten jarduketak.
Ez dute oihangintza-arloko baimenik beharko fustea eratzeko eta garbitzeko kimaketek, finken mugetan egiten direnek, makineria igarotzea errazteko egiten diren kimaketek eta zuhaitzak zaintzeko kimaketek, ohiko lepatzeak zaintzekoak barne.
4. ATALA. MERKATARITZA-BALIORIK GABEKO ZUHAITZ BARREIATUAK MOZTEA
14. artikulua. Erantzukizunpeko adierazpena behar duten jarduketak.
Merkataritza-baliorik gabeko zuhaitz barreiatuak mozteko lanak, hektarea bat baino gutxiagoko azalerari eragiten badiote, erantzukizunpeko adierazpenaren prozeduraren bidez onesten ahalko dira.
5. ATALA. MERKATARITZA-BALIORIK GABEKO BASOGINTZA-TRATAMENDUAK BASO-MASETAN
15. artikulua. Baimena behar duten jarduketak.
1. Oihangintza-administrazioaren berariazko baimena beharko da Erabilera Publikoko Mendien edo Mendi Babesleen Katalogoan jasotako, naturagune babestuak osatzen dituzten edo haien parte diren mendi eta oihan-lurretan, eta haien babesguneetan eta Natura 2000 Sarearen barruko mendietan hektarea bati baino gehiagori eragiten dioten baso-masetan merkataritza-baliorik gabeko oihangitzako tratamenduak egiteko.
2. Halaber, oihangintza-administrazioaren berariazko baimena beharko dute baso-plangintzako tresnarik ez duten hektarea batetik gorako mendi eta baso-lurretan egiten diren mota horretako oihangintza-tratamenduek.
16. artikulua. Aurretiazko komunikazioa egin beharra duten jarduketak.
Oihangintza-administrazioak onetsitako baso-plangintzako tresnak dituzten gainerako mendi edo baso-lurretan, hektarea batetik gorako baso-masetan merkataritza-baliorik gabeko oihangintza-tratamenduak egiteko, aurretiazko komunikazio bat aurkeztu beharko zaio oihangintza-administrazioari, jarduketa hasi baino bi hilabete lehenago.
Pertsona edo entitate sustatzaileak eskaerari edo aurretiazko komunikazioari erantsi beharko dio memoria tekniko bat, zeinean jasoko baitira oihangintzako tratamenduak eginen diren eremuaren hedadura, egoera eta mugak, izakinak (bolumena m³/ha, azalera basimetrikoa m²/ha), mozketa-mota eta mozketaren ehunekoa bolumenaren eta hektareako azalera basimetrikoaren arabera, salbu eta informazio hori jasoa badago oihangintza-administrazioak onetsitako baso-kudeaketako tresnan.
III. KAPITULUA. BASO-AZPIEGITURAK
1. ATALA. BASO-BIDEAK ERAIKITZEA
18. artikulua. Baimena behar duten jarduketak.
Zura ateratzeko bide berriak (aldi baterakoak) eta baso-bideak eta -pistak (iraunkorrak) egiteko, oihangintza-administrazioaren berariazko baimena beharko da. 100 metro linealetik gorako bide eta pista berri iraunkorrei dagokienez, oihangintza-administrazioak ofizioz gehituko die espedientearen izapideei ingurumen-inpaktuaren alorrean eskumena duen unitateak igorritako ingurumen-afekzioei buruzko txostena.
2. ATALA. BASO-BIDEAK ZAINTZEA
19. artikulua. Baimena behar duten jarduketak.
1. Baimena beharko da baso-bideak zaintzeko eta hobetzeko kasu hauetan:
a) Edozein motatako harri-lubeten eraikuntzan (barne direla Krainer hesiak, horma lehorrak eta metak).
b) Mendiko pistetan itzultoki eta zamaleku berriak egitea eta kaxa-zabalera handitzea.
Apartatu honetatik kanpo gelditzen dira dagoeneko baimena duten baso-aprobetxamenduei lotutako azpiegiturak.
2. Halaber, oihangintza-administrazioaren berariazko baimena beharko da hurrengo artikuluetan jasotzen ez diren mantentze-lanetarako.
20. artikulua. Erantzukizunpeko adierazpena behar duten jarduketak.
Erantzukizunpeko adierazpena beharko da baso-bideak zaintzeko eta hobetzeko kasu hauetan:
a) Bide-zoruak gogortzea, hondakin-kudeatzaile baimendu batetik material birziklatuak ekarrita.
b) Mendiko bideak hormigoitzea eta lauzatzea eta asfaltozko zoladura jartzea.
c) Gainazaleko eta lurpeko zeharkako drainatze-azpiegiturak, arekako ur-tutuak, hodiak, sakanguneak eta azaleko uren etenak eraikitzea eta drainatze-uhinbikoak jartzea, besteak beste.
d) Arekak egitea/betetzea.
e) Lehendik dauden ezpondak egokitzea.
21. artikulua. Baimenik eta erantzukizunpeko adierazpenik behar ez duten jarduketak.
Jarduketa hauek ez dute baimenik behar:
a) Lehendik dauden mendiko bideetako ohiko mantentze-lanak.
b) Bide-zoruak gogortzea (harrobiko materialekin), bide-zorua eta arekak hobetzea (profilatzea, berdintzea, trinkotzea) eta oinarria egokitzeko lanak egitea (eskarifikatzeak).
c) Gainazaleko eta lurpeko zeharkako drainatze-azpiegiturak, arekak, hodiak, sakanguneak, azaleko uren etenak eta drainatze-uhinbikoak garbitzea eta zaintzea, besteak beste.
22. artikulua. Bestelako baimenak.
Sektore-araudi espezifikoak (urak, errepideak, etab.) aplikatzen zaizkien mendiko bideetan egin beharreko baso-jarduketen kasuan, lanak hasi aurretik, aplikatu beharreko sektore araudi horren araberako baimena ere beharko da.
3. ATALA. ITXITURAK ETA BESTELAKO BASO-AZPIEGITURAK
23. artikulua. Baimena behar duten jarduketak.
Jarduketa hauek oihangintza-administrazioaren baimena behar dute:
a) Baso-bideetan baltsak eraikitzea. Kasu horietan, baimena baso- eta ingurumen-ondorioetara mugatzen da, eta ez du deus baimentzen jabari publiko hidraulikoaren erregelamenduan ezarritako segurtasunaren alorrean.
b) Baso-itxiturak, ganadu-mahukak eta askak eraikitzea.
c) Berezko landaredi zurkara duten baso-itxiturak ordeztea, kentzea edo zaintzea finka batetik besterako bereizketetan, 25.a artikuluan jasotzen direnak izan ezik.
d) Seinaleak, higigarriak eta mendi eta baso-lurren erabilera publikoari lotutako bestelako elementu batzuk instalatzea.
24. artikulua. Erantzukizunpeko adierazpena behar duten jarduketak.
Erantzukizunpeko adierazpena beharko da kasu hauetan, betiere lan horiek eta haien egikaritze-baldintzak ez badira berariaz jasotzen dagokion azpiegituraren hasierako baimenean.
a) Pasabide kanadarrak eraikitzea.
b) Baltsak mantentzeko jarduketak.
25. artikulua. Baimenik eta erantzukizunpeko adierazpenik behar ez duten jarduketak.
Jarduketa hauek ez dute baimenik behar:
a) Gainean landaredirik ez duten eta berezko landaredi zurkara duten baso-itxiturak ordeztea, kentzea eta mantentzea, zuhaixkaz osatutako baso-masekin edo zuhaitz-masa jarraituekin muga egiten duten tokietan.
b) Pertsonentzako igarobideak eraikitzea.
c) Atakak jartzea.
d) Pasabide kanadarrak garbitzea.
26. artikulua. Bestelako baimenak.
Sektore-araudi espezifikoak (urak, errepideak, etab.) aplikatzen zaizkien mendiko bideetan egin beharreko baso-jarduketen kasuan, lanak hasi aurretik, aplikatu beharreko sektore araudi horren araberako baimena ere beharko da.
IV. KAPITULUA. ERANTZUKIZUNPEKO ADIERAZPENA IZAPIDETZEA
27. artikulua. Erantzukizunpeko adierazpena egiteko izapideak.
Izapide hauek bete beharko dira erantzukizunpeko adierazpen bat aurkeztuz baimentzen ahal diren eta xedapen honetan aurreikusten diren kasuetan:
a) Pertsona edo entitate sustatzaileak hauen berri eman behar dio Basozainak-Ingurumena Zaintzeko Taldeari: zer jarduketa egin nahi dituen, haien azalpen zehatza, zer sasoi edo datatan egitea aurreikusten duen eta zer tokitan eginen diren, tokian bertan egiaztatzeko.
b) Komunikazioa jaso ondotik, Basozainak-Ingurumena Zaintzeko Taldeak egiaztatuko du jarduketak bat datozen foru-agindu honetan aurreikusitako kasuekin, eta erantzukizunpeko adierazpena sinatuko du, pertsona edo entitate sustatzailearekin batera.
c) Basozainak-Ingurumena Zaintzeko Atalak erantzukizunpeko adierazpena igorriko dio oihangintza-administrazioari.
d) Foru-agindu honetan erantzukizunpeko adierazpenaren bidez eta oihangintzako gaietan eskumena duen zerbitzuko zuzendariaren ebazpen bidez baimentzeko sistemei buruz adierazten dena alde batera utzita, mendi eta baso-lurretako jarduketak debekatzen ahalko dira espezie babestuak daudenean, sute-arriskua dagoenean edo bestelako ingurumen-balio batzuk daudenean.
28. artikulua. Erantzukizunpeko adierazpenaren eredua.
Mendi eta baso-lurretako jarduketa-mota bakoitzerako erantzukizunpeko adierazpenaren ereduak definituko dira lanak arautzen dituzten administrazio-prozeduretan.
V. KAPITULUA. AURRETIAZKO KOMUNIKAZIOA IZAPIDETZEA
29. artikulua. Aurretiazko komunikazioaren izapideak.
Izapide hauek bete beharko dira aurretiazko komunikazio bat aurkeztuz baimentzen ahal diren eta xedapen honetan aurreikusten diren kasuetan:
a) Pertsona edo entitate sustatzaileak eskabide orokor bat aurkeztu beharko dio Nafarroako Gobernuari (oihangintza-administrazioari zuzendua), foru-agindu honetan jarduketa horretarako ezartzen diren dokumentuekin batera.
b) Behar den dokumentazio guztia aurkeztu ez bada, egoera horren berri emanen zaio pertsona edo entitate sustatzaileari, eta 15 egun balioduneko epea izanen du dokumentazio hori osatzeko. Epe horretan ez badu aurkezten falta den dokumentazioa, izapidea bertan behera utzi duela joko da, eta espedientea artxibatuko. Era berean, unitate izapidegileak aukera izanen du edozein dokumentazio osagarri jasotzeko.
c) Komunikaziotik bi hilabete igaro eta ez bada jakinarazi ez dagoela osorik, lanekin hasten ahalko da.
d) Foru-agindu honetan aurretiazko komunikazio baten bidez eta oihangintzako gaietan eskumena duen zerbitzuko zuzendariaren ebazpen bidez baimentzeko sistemei buruz adierazten dena alde batera utzita, mendi eta baso-lurretako jarduketak debekatzen ahalko dira espezie babestuak daudenean, sute-arriskua dagoenean edo bestelako natura-balio batzuk daudenean.
Lehen xedapen gehigarria. Dokumentuen irisgarritasuna.
Desgaitasunen bat duten pertsonek beren ongizate soziala eta pertsonala sustatzeko duten eskubidea betetzen dela bermatzeko, foru-agindu honen aplikaziotik eratorritako dokumentuek irisgarritasun-estandarrak beteko dituzte diseinuan, desgaitasunen bat duten pertsonen premiak kontuan hartuz.
Azken xedapenetako lehena. Jarduketak etetea.
Mendi eta baso-lurretako edozein jarduketa eteten ahalko da oihangintza-administrazioaren berariazko ebazpen bidez, espezie babestuak daudenean, sute-arriskua dagoenean edo bestelako ingurumen-balio batzuk daudenean.
Azken xedapenetako bigarrena. Indarra hartzea.
Foru-agindu honek Nafarroako Aldizkari Ofizialean argitaratu eta biharamunean hartuko du indarra.
