LEXNAVARRA
241/2023 FORU DEKRETUA, AZAROAREN 15EKOA, ETXEBIZITZAKO, GAZTERIAKO ETA MIGRAZIO POLITIKETAKO DEPARTAMENTUAREN EGITURA ORGANIKOA EZARTZEN DUENA
BON N.º 244 - 23/11/2023
I. KAPITULUA. XEDAPEN OROKORRAK
- 1. artikulua. Etxebizitzako, Gazteriako eta Migrazio Politiketako Departamentuaren eskumenen esparrua.
- 2. artikulua. Etxebizitzako, Gazteriako eta Migrazio Politiketako Departamentuko titularra.
- 3. artikulua. Etxebizitzako, Gazteriako eta Migrazio Politiketako Departamentuaren antolamendu orokorra.
- 4. artikulua. Zuzendaritza nagusien eskudantziak.
- 5. artikulua. Idazkaritza Tekniko Nagusiaren eskudantziak.
- 6. artikulua. Zerbitzuen eskudantziak.
- 7. artikulua. Atalen eskudantziak.
II. KAPITULUA. ETXEBIZITZA ZUZENDARITZA NAGUSIA
1. ATALA. ESKUMENEN ESPARRU MATERIALA ETA EGITURA
- 8. artikulua. Etxebizitza Zuzendaritza Nagusiaren eskumenen esparru materiala.
- 9. artikulua. Etxebizitza Zuzendaritza Nagusiaren egitura.
2. ATALA. ETXEBIZITZA ZERBITZUA
- 10. artikulua. Etxebizitza Zerbitzuaren eskumenen esparru materiala.
- 11. artikulua. Etxebizitza Zerbitzuaren egitura.
- 12. artikulua. Laguntzen eta Plangintzaren Atalaren eskumenen esparru materiala.
- 13. artikulua. Eraikuntza Atalaren eskumenen esparru materiala.
- 14. artikulua. Etxebizitzak Birgaitzeko Atalaren eskumenen esparru materiala.
3. ATALA. BERRIKUNTZA, PARTEHARTZE, IKUSKAPEN ETA HEDAPEN ZERBITZUA
- 15. artikulua. Berrikuntza, Partehartze, Ikuskapen eta Hedapen Zerbitzuaren eskumenen esparru materiala.
- 16. artikulua. Berrikuntza, Partehartze, Ikuskapen eta Hedapen Zerbitzuaren egitura.
- 17. artikulua. Berrikuntza eta Ikuskapen Atalaren esparru material eta funtzionala.
- 18. artikulua. Partehartze eta Hedapen Atalaren esparru material eta funtzionala.
III. KAPITULUA. MIGRAZIO POLITIKETAKO ZUZENDARITZA NAGUSIA
1. ATALA. ESKUMENEN ESPARRU MATERIALA ETA EGITURA
- 19. artikulua. Migrazio Politiketako Zuzendaritza Nagusiaren esparru material eta funtzionala.
- 20. artikulua. Migrazio Politiketako Zuzendaritza Nagusiaren egitura.
2. ATALA. KARIBUMIGRATZAILEEI HARRERA ETA LAGUN EGITEKO ZERBITZUA
- 21. artikulua. KaribuMigratzaileei Harrera eta Lagun Egiteko Zerbitzuaren esparru material eta funtzionala.
- 22. artikulua. KaribuMigratzaileei Harrera eta Lagun Egiteko Zerbitzuaren egitura.
- 23. artikulua. Harrera Atalaren esparru material eta funtzionala.
- 24. artikulua. Lagun Egiteko eta Kulturen arteko Bitartekaritzarako Atalaren esparru material eta funtzionala.
3. ATALA. AYLLUKULTUREN ARTEKO BIZIKIDETZARAKO ETA ARRAZISMOAREN ETA XENOFOBIAREN AURKAKO BORROKARAKO ZERBITZUA
- 25. artikulua. AylluKulturen arteko Bizikidetzarako eta Arrazismoaren eta Xenofobiaren aurkako Borrokarako Zerbitzuaren esparru material eta funtzionala.
IV. KAPITULUA. IDAZKARITZA TEKNIKO NAGUSIA
- 26. artikulua. Idazkaritza Tekniko Nagusiaren egitura.
- 27. artikulua. Araubide Juridikoaren Atalaren esparru material eta funtzionala.
- 28. artikulua. Ekonomia eta Aurrekontuak Kudeatzeko Atalaren esparru material eta funtzionala.
- 29. artikulua. Kudeaketa Administratiboaren Atalaren esparru material eta funtzionala.
- Lehen xedapen gehigarria. Eskumenak deskontzentratzeko baldintza orokorrak.
- Bigarren xedapen gehigarria. Etxebizitza Zuzendaritza Nagusiaren esku deskontzentratzen diren eskumenak.
- Hirugarren xedapen gehigarria. Migrazio Politiketako Zuzendaritza Nagusiaren esku deskontzentratzen diren eskumenak.
- Laugarren xedapen gehigarria. Unitateak bere horretan uztea.
- Bosgarren xedapen gehigarria. Izendapenak berrestea.
- Seigarren xedapen gehigarria. Unitateak kentzea.
- Zazpigarren xedapen gehigarria. Unitateak sortzea.
- Xedapen indargabetzaile bakarra. Arauak indargabetzea.
- Azken xedapenetako lehena. Gaikuntzak.
- Azken xedapenetako bigarrena. Garatzeko ahalmenak.
- Azken xedapenetako hirugarrena. Indarra hartzea.
Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean xedatutakoari jarraikiz, Nafarroako Gobernuari dagokio departamentu bakoitzaren egitura organikoa onestea.
Nafarroako Foru Komunitateko Lehendakariaren abuztuaren 17ko 10/2023 Foru Dekretuaren bidez, Nafarroako Foru Komunitateko Administrazioaren departamentuen egitura ezarri zen.
Era berean, abuztuaren 30eko 66/2023 Foru Dekretuaren bidez, Etxebizitzako, Gazteriako eta Migrazio Politiketako Departamentuaren oinarrizko egitura ezarri zen.
Egokia da, orain, behar bezala garatzea Foru Komunitateko Administrazioaren departamentu bakoitzaren egitura.
Etxebizitzako, Gazteriako eta Migrazio Politiketako Departamentuaren egitura organiko berria garatzea du xede foru dekretu honek.
Horrenbestez, Etxebizitzako, Gazteriako eta Migrazio Politiketako kontseilariak proposaturik, eta Nafarroako Gobernuak 2023ko azaroaren 15ean egindako bilkuran harturiko erabakiarekin bat.
DEKRETATZEN DUT:
I. KAPITULUA. XEDAPEN OROKORRAK
1. artikulua . Etxebizitzako, Gazteriako eta Migrazio Politiketako Departamentuaren eskumenen esparrua.
Etxebizitzako, Gazteriako eta Migrazio Politiketako Departamentuak beteko ditu Nafarroako Foru Komunitateko Administrazioak gai hauetan esleituak dituen eskumenak:
- Etxebizitza eskuratzeko bideak sustatzea, eraikuntzen kalitatea kontrolatu eta sustatzea, eta etxebizitzak egiteko lurzoruaren merkatuan esku hartzea.
- Etxebizitzen birgaitzea.
- Gazteek gizartean aktiboki parte hartzea ahalbidetuko duten zeharkako politikak garatzea, eta gazteen topaketa, sormena eta ekintzailetza erraztuko dituzten politikak sustatzea.
- Nafarroako Gobernuak immigrazioaren arloan zehaztutako politika garatu eta koordinatzea.
- Etorkinen integrazioa.
- Aniztasun etniko eta kulturala kudeatzea.
- Indarra duten xedapenek ematen dizkioten gainerako eskudantziak.
2. artikulua . Etxebizitzako, Gazteriako eta Migrazio Politiketako Departamentuko titularra.
1. Etxebizitzako, Gazteriako eta Migrazio Politiketako Departamentuko titularrak, foru dekretu honen 1. artikuluan zehaztutako eskumenen esparruari loturik, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluan ezarritako eskudantziak beteko ditu.
2. Era berean, Etxebizitzako, Gazteriako eta Migrazio Politiketako Departamentuko titularrari dagokio Nafarroako Etxebizitza Kontseiluko buru izatea.
3. Etxebizitzako, Gazteriako eta Migrazio Politiketako Departamentuko titularrari sostengu politiko eta teknikoa emateko unitate gisa, eta zuzenean haren mende, kabinete bat dago departamentuan, Nafarroako Gobernuari eta Lehendakariari buruzko abenduaren 3ko 14/2004 Foru Legearen 19. artikuluan ezarritakoari lotua.
3. artikulua . Etxebizitzako, Gazteriako eta Migrazio Politiketako Departamentuaren antolamendu orokorra.
1. Etxebizitzako, Gazteriako eta Migrazio Politiketako Departamentuak, bere titularraren goi zuzendaritzapean, honako organo hauek izanen ditu bere egituran:
a) Etxebizitza Zuzendaritza Nagusia.
b) Migrazio Politiketako Zuzendaritza Nagusia.
c) Idazkaritza Tekniko Nagusia.
2. Halaber, Etxebizitzako, Gazteriako eta Migrazio Politiketako Departamentuari atxikitzen zaio Nafarroako Gazteriaren Institutua erakunde autonomoa.
4. artikulua . Zuzendaritza nagusien eskudantziak.
Foru dekretu honen 2. artikuluan ezarritakoa galarazi gabe, Etxebizitzako, Gazteriako eta Migrazio Politiketako Departamentuko zuzendaritza nagusiei dagokie, departamentuko titularraren goi zuzendaritzapean eta foru dekretu honetan bakoitzari esleitutako esparru materialean, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 31. eta 32. artikuluetan eta azken xedapenetako lehenbizikoan ezarritako eskudantziak erabiltzea eta, horietaz gainera, indarrean dauden xedapenek esleitzen dieten edo departamentuko titularrak agintzen dien beste edozein.
5. artikulua . Idazkaritza Tekniko Nagusiaren eskudantziak.
Etxebizitzako, Gazteriako eta Migrazio Politiketako Departamentuko Idazkaritza Tekniko Nagusiak, foru dekretu honen 1. artikuluan zehaztu den eskumen esparruan, eta Etxebizitzako, Gazteriako eta Migrazio Politiketako Departamentuko titularraren goi zuzendaritzapean, berari atxikita baitago zuzenean, honako eskudantzia hauek izanen ditu:
a) Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 33. artikuluan eta Idazkaritza Tekniko Nagusiak arautzen dituen otsailaren 21eko 29/2005 Foru Dekretuan ezarritakoak.
b) Idazkaritza Tekniko Nagusiak arautzen dituen otsailaren 21eko 29/2005 Foru Dekretuan ezarritakoak, ekonomia eta aurrekontu izaera duen arau horren 8. artikuluan ezarritakoak barne, baita langileriaren arloko eskudantziak zehazten dituen otsailaren 21eko 30/2005 Foru Dekretuaren 6. artikuluan ezarritakoak ere.
c) Genero ikuspegiaren zeharkakotasuna aplikatzea Etxebizitzako, Gazteriako eta Migrazio Politiketako Departamentuaren esparruko politikak planifikatu, kudeatu eta ebaluatzean, bat etorriz Emakumeen eta Gizonen arteko Berdintasunari buruzko apirilaren 4ko 17/2019 Foru Legearekin.
d) Indarrean dauden xedapenek esleitzen dioten edo Etxebizitzako, Gazteriako eta Migrazio Politiketako Departamentuko titularrak agintzen dion beste edozein, eta horretarako behar diren ebazpenak emanen ditu.
6. artikulua . Zerbitzuen eskudantziak.
Zerbitzuek, departamentuko goragoko organoen zuzendaritzapean eta foru dekretu honetan bakoitzari esleitutako esparru materialean, bat etorriz martxoaren 11ko 11/2019 Foru Legearen 35. artikuluarekin, eginkizun hauek izanen dituzte: beren mendeko atalak edo unitate organikoak planifikatu, koordinatu, zuzendu eta kontrolatzea; prozedurak arindu, arrazionalizatu eta sinplifikatzeko printzipioak bultzatu eta sustatzea; eta, halaber, indarra duten xedapenek berariaz esleitzen dizkieten edo Departamentuko organo eskudunek haietan deskontzentratzen edo eskuordetzen dituzten beste edozein.
7. artikulua . Atalen eskudantziak.
Atalek, departamentuko goragoko organoen zuzendaritzapean eta foru dekretu honetan bakoitzari esleitutako esparru materialean, bat etorriz martxoaren 11ko 11/2019 Foru Legearen 35. artikuluarekin, eginkizun hauek izanen dituzte: beren eskumenen esparruko lanak gauzatzea eta goragoko nagusientzako txostenak eta proposamenak egitea; beren mendeko bulegoek eta unitateek egiten dituzten lanak koordinatzea, zuzentzea eta kontrolatzea; eta, halaber, departamentuko organo eskudunek agintzen dizkieten gainerako eginkizun guztiak betetzea.
II. KAPITULUA. ETXEBIZITZA ZUZENDARITZA NAGUSIA
1. ATALA. ESKUMENEN ESPARRU MATERIALA ETA EGITURA
8. artikulua . Etxebizitza Zuzendaritza Nagusiaren eskumenen esparru materiala.
Etxebizitza Zuzendaritza Nagusiak, bere kudeaketa esparruko gaietan, foru dekretu honetan ezarritako eskudantziak izanen ditu eta, berariaz, honako eginkizun hauek beteko ditu:
a) Etxebizitza eskuratzeko bideak sustatzea.
b) Eraikuntzaren kalitatea kontrolatu eta sustatzea.
c) Lurzoruaren Foru Bankua kudeatzea, lurzorua eskuratu eta urbanizatzea barne.
d) Etxebizitza arloko politika publikoen plangintza.
e) Etxebizitza arloko kontrola eta ikuskapena.
f) Irisgarritasuna bultzatu, sustatu eta indartzea.
g) Gaur egun etxebizitzetarako dagoen ondasun higiezinen parkea zaintzea, birgaitzea, eraberritzea eta berritzea.
h) Etxebizitzaren arloko politika publikoen plangintza estrategikoa egitea, haietan herritarren parte-hartzea sustatzea, politika publikoen koordinazioaz eta kudeaketa operatiboaz arduratzea, eta politika horiek gauzatu eta ebaluatzea.
i) Etxebizitzaren eginkizun soziala ziurtatzera bideratutako programak, arauak eta sustapen jarduerak bultzatzea eta politiken kudeaketa operatiboa egitea, beste departamentuekin, administrazioekin eta erakunde publikoekin koordinatuta.
j) Pertsona fisiko eta juridikoekin eta administrazio publikoekin lankidetzan aritzea, etxebizitza sozial eta eskuragarrien parkea handitzeko, zuzkidura-bizitokiak ugaritzeko eta etxebizitzaren ondare arkitektonikoa berreskuratzeko.
k) Etxebizitzaren eginkizun soziala ziurtatzera bideratutako politikak bultzatzea, ikertzea, sustatzea, hedatzera eta ezagutzera ematea, lankidetzan arituta Nafarroako Foru Komunitateko Administrazioko gainerako departamentu eta organoekin, profesionalekin eta erakunde eta elkarte publiko zein pribatuekin.
l) Etxebizitzaren arloko politikaren plangintza, jarraipena eta ebaluazioa.
9. artikulua . Etxebizitza Zuzendaritza Nagusiaren egitura.
Etxebizitza Zuzendaritza Nagusiak zerbitzu hauek ditu bere egituran:
a) Etxebizitza Zerbitzua.
b) Berrikuntza, Parte-hartze, Ikuskapen eta Hedapen Zerbitzua.
2. ATALA. ETXEBIZITZA ZERBITZUA
10. artikulua . Etxebizitza Zerbitzuaren eskumenen esparru materiala.
Etxebizitza Zerbitzuak foru dekretu honetan ezarritako eginkizunak izanen ditu, honako arlo hauetan: etxebizitza eskuratzeko bideak sustatzea, eraikuntzaren kalitatea kontrolatzea eta sustatzea, Lurzoruaren Foru Bankua kudeatzea, lurzorua eskuratu eta urbanizatzea barne, eta etxebizitzaren arloko araudi teknikoa betetzen den ikuskatzea; baita bere jardueraren esparru materialean agintzen zaizkion beste batzuk ere.
11. artikulua . Etxebizitza Zerbitzuaren egitura.
Etxebizitza Zerbitzuak atal hauek ditu bere egituran:
a) Laguntzen eta Plangintzaren Atala.
b) Eraikuntza Atala.
c) Etxebizitzak Birgaitzeko Atala.
12. artikulua . Laguntzen eta Plangintzaren Atalaren eskumenen esparru materiala.
Laguntzen eta Plangintzaren Atalak foru dekretu honetan ezarritako eginkizunak izanen ditu etxebizitza eskuratzeko bideak bultzatzeko arloan eta, zehazki, honako hauek:
a) Eragiketa babesgarrietarako planak eta laguntzen programak prestatzea.
b) Etxebizitza babestuen salerosketarako eta alokairurako kontratuen ikus-onespen administratiboko espedienteak kudeatzea.
c) Finantza hitzarmenen formulazioan eta jarraipenean parte hartzea.
d) Etxebizitzen sustapen eta eskuratze arloko jarduketa babesgarrietarako laguntza publikoak kudeatzea, etxebizitza babestuei hala nola libreei zuzenduta.
e) Etxebizitza planak eta programak ebaluatzeko tresnak garatzea.
f) Herritarrei informazioa ematea etxebizitza eskuratzeko bideei eta etxebizitza arloko laguntzei buruz.
g) Hipoteka eta alokairu kontuetan bitartekari lana egitea.
h) Etxebizitza babestuaren eskatzaileen zentsua eta egiten diren etxebizitza adjudikazioak kudeatzea.
i) Etxebizitzak eta eraikinak lehentasunez eskuratzeko eskubideak kudeatzea.
j) Alokairuko etxeen poltsa kudeatzea.
k) Etxebizitzarako eskubide subjektiboaren ondoriozko programak kudeatzea eta tramitatzea, baita antzeko edo bestelako programak ere, zergen eremukoak izan zein ez.
l) Etxebizitza babestuen eta, hala dagokionean, libreen errentarientzako laguntza publikoak kudeatzea.
m) Etxebizitza babestua edo eskuragarria eskuratzeko -izan erosita nahiz errentan- laguntzen programak kudeatzea, Nafarroako Foru Komunitatean garatu beharrekoak, Estatuko edo Europako funtsekin.
n) Gizarte integraziorako errentako etxebizitzen programa kudeatzea.
ñ) Lurralde bulegoekin koordinatzea, etxebizitzako bulegoen bidez laguntzei buruzko informazioa, arreta eta kudeaketa eskaintzeko, leihatila bakarraren eran.
o) Indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.
13. artikulua . Eraikuntza Atalaren eskumenen esparru materiala.
Eraikuntza Atalak foru dekretu honetan ezarritako eskudantziak izanen ditu eraikuntzaren arloan, eta, zehazki, honako hauek:
a) Etxebizitzen eraikuntzarako betebehar teknikoak kontrolatzea.
b) Etxebizitzen diseinuaren eta kalitatearen araudia prestatzea.
c) Kalitateko arkitektura egiteko programak kudeatzea.
d) Etxebizitza babestuen espedienteen gaineko txostenak eta kalifikaziorako proposamenak egitea.
e) Eraikuntzako alderdiei buruzko azterlanak egitea.
f) Etxebizitzen eta zuzkidura-bizitokien formula alternatibo berritzaileak aztertzea eta horien diseinuari eta kalitateari buruzko araudia prestatzea.
g) Eraikuntza eredu industrializatu berriak ikertzea eta diseinatzea, Building & Arquitecture Institute (BAI) erakundearekin koordinatuta.
h) Nafarroako Etxebizitzen Erregistro Orokorra kudeatzea.
i) Etxebizitzen ondare publikoa kudeatzea.
j) Etxebizitza babestuaren eskatzaileen zentsuan sustapenak sartzea.
k) Etxebizitzen bizigarritasunari buruzko espedienteak kudeatzea.
l) Lehendik dagoen Eraikinaren Liburua ezartzea eta kudeatzea, baita eraikuntzaren ikuskapen teknikoarekin loturiko beste edozein programa ere.
m) Etxebizitza babestua edo eskuragarria sustatzeko laguntzen programak kudeatzea, Nafarroako Foru Komunitatean garatu beharrekoak, Estatuko edo Europako funtsekin.
n) Hirigintza txostenak proposatzea.
ñ) Lurzoruaren Foru Bankua kudeatzea.
o) Indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.
14. artikulua . Etxebizitzak Birgaitzeko Atalaren eskumenen esparru materiala.
Etxebizitzak Birgaitzeko Atalak foru dekretu honetan ezarritako eskudantziak izanen ditu etxebizitzen birgaitzearen arloan, eta, zehazki, honako hauek:
a) Etxebizitzen eta eraikinen birgaitze babestuko espedienteen gaineko txostenak eta proposamenak egitea.
b) Hiri berritze eta berroneratzeko espedienteen gaineko txostenak eta proposamenak egitea.
c) Toki entitateentzat dauden laguntzak, haien etxebizitza parkea birgaitzera zuzenduak, kudeatzea.
d) Lurralde bulegoen jarduketak gainbegiratzea.
e) Etxebizitza Zerbitzuaren eta lurralde bulegoen arteko barne koordinazio teknikorako prozedurak ezartzea, eta birgaitze babestuari buruzko arauzko xedapenak interpretatzeko bere irizpideak hedatzea.
f) Etxebizitza Sozialerako Nafarroako Funtseko etxebizitzak kudeatzea eta mantentzea.
g) Esku-hartze orokorreko proiektuen esku-hartze publikoko proiektuen espedienteen gaineko txostenak eta proposamenak egitea.
h) Herritarrei informazioa ematea etxebizitzak eta eraikinak birgaitzeko laguntzei buruz.
i) Nafarroako Foru Komunitateko Administrazioko beste organo batzuekin, sozietate eta erakunde publikoekin eta toki entitateekin lankidetzan aritzea eta haiei laguntza ematea, hiri birgaitze eta berroneratzearekin lotutako arlo eta jarduera guztietan.
j) Birgaitzeko lurralde bulegoen finantzaketa kudeatzea eta ematea.
k) Hiri birgaitze, berritze eta berroneratzeko laguntzen programak kudeatzea, Nafarroako Foru Komunitatean garatu beharrekoak, Estatuko edo Europako funtsekin.
l) Txosten teknikoak egitea bere eskumenen arloko administrazio errekurtsoei eta Nafarroako Arartekoari aurkeztutako kexei buruz.
m) Indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.
3. ATALA. BERRIKUNTZA, PARTE-HARTZE, IKUSKAPEN ETA HEDAPEN ZERBITZUA
15. artikulua . Berrikuntza, Partehartze, Ikuskapen eta Hedapen Zerbitzuaren eskumenen esparru materiala.
Berrikuntza, Parte-hartze, Ikuskapen eta Hedapen Zerbitzuak foru dekretu honetan ezarritako eginkizunak izanen ditu, honako arlo hauetan: etxebizitza hutsen gaineko ikuskapena eta kontrola, sistemen kudeaketa, berrikuntza, parte-hartzea eta hedapena; baita bere jardueraren esparru materialean agintzen zaizkion beste batzuk ere.
16. artikulua . Berrikuntza, Partehartze, Ikuskapen eta Hedapen Zerbitzuaren egitura.
Berrikuntza, Parte-hartze, Ikuskapen eta Hedapen Zerbitzuak atal hauek ditu bere egituran:
a) Berrikuntza eta Ikuskapen Atala.
b) Parte-hartze eta Hedapen Atala.
17. artikulua . Berrikuntza eta Ikuskapen Atalaren esparru material eta funtzionala.
Berrikuntza eta Ikuskapen Atalak eginkizun hauek izanen ditu, etxebizitzaren gaineko ikuskapenaren eta berrikuntzaren arloan:
a) Nafarroako Foru Komunitatean etxebizitzaren arloan aplikagarri den araudia betetzen den ikertu eta egiaztatzea.
b) Etxebizitzak hutsik egoteari buruzko aztarnak berariaz egiaztatzea.
c) Indarreko legedia betetzen dela bermatzeko behin-behineko eta behin betiko neurriak hartzeko proposamenak egitea, horren barne direla legezkotasuna babestu eta berrezartzeko neurrien proposamenak.
d) Zehapen espedienteak irekitzeko proposamenak eta legezkotasuna berrezartzeko bidezkoak diren babes neurriak hartzeko proposamenak egitea.
e) Ikuskapen kanpainak programatu eta planifikatzea.
f) Etxebizitza bat hutsik dagoela deklaratzeko prozedurak tramitatzea.
g) Nafarroako Etxebizitza Errentamenduko Kontratuen Erregistroa kudeatzea.
h) Ebaluazio tresnak eta horien programak garatzea.
i) Informazioa eta elkarrizketa, etxebizitza sozial eta eskuragarrien parkea handitzea helburu, lankidetza publiko-pribatuak eta publiko-komunitarioak sortzera bideratuta dauden etxebizitza politikaren berrikuntzaren arloko proiektu, hitzarmen eta bestelako ekimenekin loturik.
j) Barne koordinazio teknikorako prozedurak ezartzea, berrikuntza proiektu eta programetan Etxebizitza Zerbitzuarekin eta beste zuzendaritza nagusiekin koordinatzeko.
k) Nafarroako Foru Komunitateko Administrazioko beste organo eta entitate batzuekin eta sozietate eta erakunde publikoekin lankidetzan aritzea eta haiei laguntza ematea, berrikuntzako proiektu eta ekimenekin lotutako arlo eta jarduera guztietan.
l) Koordinazio teknikoa etxebizitza merkatuaren erreferentzia indizeen sistema garatzeko eta, orobat, etxebizitza merkatuaren errealitatearen jarraipena eta behaketa egiteko beste tresna batzuetarako.
m) Azterlan, txosten eta argitalpen sozioekonomikoak egitea, etxebizitza politikaren arloan eragin sektoriala dutenak, kudeaketa eraginkor eta koherentea ahalbidetzeko, diagnostiko eta analisi kuantitatibo eta kualitatiboetan oinarrituta.
n) Indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.
18. artikulua . Partehartze eta Hedapen Atalaren esparru material eta funtzionala.
Parte-hartze eta Hedapen Atalak eginkizun hauek izanen ditu, komunikazioaren, hedapenaren, sistema eta aplikazio informatikoen kudeaketaren eta parte-hartzearen arloetan:
a) Proiektu eta programei publizitatea egiteko eta haiek hedatzeko kanpainak diseinatu eta programatzea, komunikazioaren arloan eskumenak dituzten organoekin koordinatuta.
b) Etxebizitza arloari dagokionez, Nafarroako Gobernuaren web ataria kudeatzea, informazio sistemen arloan eskumena duten organoekin koordinatuta.
c) Herritarrek etxebizitzaren arloko politika publikoak diseinatzen eta gauzatzen parte hartzeko bideak ezartzeko proposamenak egitea, bereziki, Nafarroako Etxebizitza Kontseiluari dagokionez.
d) Etxebizitzaren arloko parte-hartzea aztertzea eta analizatzea, Nafarroako Foru Komunitateko Administrazioko foro guztiei dagokienez.
e) Parte-hartze planak eta programak prestatzea Nafarroako Foru Komunitateko Administrazioaren etxebizitza arloko kontsulta kontseiluarentzat.
f) Parte-hartze planak eta programak prestatzea NASUVINSArekin eta beste erakunde eta entitate publiko batzuekin, etxebizitzaren arloan.
g) Etxebizitza Zuzendaritza Nagusiak udalekin, sustatzaile pribatuekin, hirugarren sektorearekin, kooperatibekin eta fundazioekin, bai eta etxebizitza sozial eta eskuragarriaren arloari lotutako beste erakunde batzuekin ere, egindako parte-hartze ekimenen jarraipena, koordinazioa eta ebaluazioa.
h) Kanpo Ekintzarako Zuzendaritza Nagusiarekin lankidetzan aritzea, etxebizitza politiketarako interesa duten gaietan.
i) Etxebizitza politikaren arloan txostenak, azterlanak eta analisi estatistikoak egin daitezen sustatzea, hargatik eragotzi gabe Etxebizitza Zuzendaritza Nagusiko atal bakoitzak bere arloko txosten estatistikoak, ebaluazioak eta jarraipenak egitea, ezta Nafarroako Estatistika Institutuaren eskumenak ere.
j) Etxebizitza politikekin eta etxe-gabeziarekin loturik dauden Estatuko, Europako eta nazioarteko erakundeekin koordinatzea.
k) Indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.
III. KAPITULUA. MIGRAZIO POLITIKETAKO ZUZENDARITZA NAGUSIA
1. ATALA. ESKUMENEN ESPARRU MATERIALA ETA EGITURA
19. artikulua . Migrazio Politiketako Zuzendaritza Nagusiaren esparru material eta funtzionala.
Migrazio Politiketako Zuzendaritza Nagusiak, bere kudeaketa esparruko gaietan, foru dekretu honetan ezarritako eskudantziak izanen ditu eta, berariaz, honako eginkizun hauek beteko ditu:
a) Migrazio politikak planifikatzea, koordinatzea eta ebaluatzea, eta, zehazki, arlo hauekin zerikusia dutenak: Nafarroan migratzaileak hartzea eta barneratzea, kulturen arteko bizikidetza hobetzea, eta arrazismoaren eta xenofobiaren aurkako borroka.
b) Migrazioen fenomenoa aztertzea, Nafarroari dagokionez.
c) Gainerako departamentuekin lankidetzan aritzea, haien eskumen esparruari eragiten dioten heinean, arlo hauekin loturiko ekintzetarako: migratzaileak hartzea eta barneratzea, kulturen arteko bizikidetza hobetzea, eta arrazismoaren eta xenofobiaren aurkako borroka.
d) Kanpo Ekintzarako Zuzendaritza Nagusiarekin elkarlanean aritzea atzerrian bizi diren nafarrentzako ekintzetan.
e) Migrazioarekin eta asiloarekin lotuta dauden Estatuko, Europako eta nazioarteko erakundeekin koordinatzea arlo hauetan: harrera, lagun egitea, kulturen arteko bizikidetza eta arrazismoaren aurkako borroka.
f) Europan migratzaileentzako eta errefuxiatuentzako jarduera humanitarioak egiten dituzten erakundeei laguntza ematea.
g) Migrazio prozesuekin eta bere eskumenen esparruan ezarri beharreko politika publikoekin loturiko beste edozein jarduera.
20. artikulua . Migrazio Politiketako Zuzendaritza Nagusiaren egitura.
Migrazio Politiketako Zuzendaritza Nagusiak zerbitzu eta atal hauek ditu bere egituran:
a) Karibu-Migratzaileei Harrera eta Lagun Egiteko Zerbitzua.
b) Ayllu-Kulturen arteko Bizikidetzarako eta Arrazismoaren eta Xenofobiaren aurkako Borrokarako Zerbitzua.
2. ATALA. KARIBU-MIGRATZAILEEI HARRERA ETA LAGUN EGITEKO ZERBITZUA
21. artikulua . KaribuMigratzaileei Harrera eta Lagun Egiteko Zerbitzuaren esparru material eta funtzionala.
Karibu-Migratzaileei Harrera eta Lagun Egiteko Zerbitzuak foru dekretu honetan ezarritako eskudantziak izanen ditu, honako gai hauetan:
a) Nafarroan migratzaileei harrera eta lagun egiteko jarduketak planifikatu eta koordinatzea.
b) Nafarroan Migratzaileei Harrera Egiteko Plana koordinatzea.
c) Migratzaileei eta aldi baterako babesaren eta nazioarteko babesaren eskatzaileei harrera eta lagun egitearekin loturiko zerbitzuak eta programak bultzatu eta sustatzea.
d) Parte hartzea tokiko, autonomia erkidegoko, Estatuko nahiz Europako administrazioetako kontseilu eta batzordeetan, migratzaileei harrera eta lagun egitearekin lotutakoetan.
e) Migratzaileei harrera eta lagun egiteaz arduratzen diren Europako programetan parte-hartzea sustatzea.
f) Gizarte erakunde guztiekiko koordinazioa sustatzea, migratzaileentzako harrera eta lagun egitea hobetzeko.
g) Migratzaileei zuzendutako prestakuntza ez-formaleko programak eta jarduerak, gaitasun pertsonalak eta sozialak eta komunikazio gaitasunak hobetzekoak, bultzatzea eta sustatzea, Nafarroan migratzaileen harrera eta lagun egiteko prozesuak errazte aldera, Nafarroako hizkuntza ofizialen ikaskuntza barne, migratzaileen egoera berezietara egokituta betiere.
h) Bere helburuak egoki betetzeko, indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.
22. artikulua . KaribuMigratzaileei Harrera eta Lagun Egiteko Zerbitzuaren egitura.
Karibu-Migratzaileei Harrera eta Lagun Egiteko Zerbitzuak atal hauek ditu bere egituran:
a) Harrera Atala.
b) Lagun Egiteko eta Kulturen arteko Bitartekaritzarako Atala.
23. artikulua . Harrera Atalaren esparru material eta funtzionala.
Harrera Atalak eginkizun hauek izanen ditu:
a) Nafarroan Migratzaileei Harrera Egiteko Plana diseinatzea, haren jarraipena egitea eta ebaluatzea, eta hartan ezarritako programak eta jarduketak bultzatzea, beste administrazio publiko batzuekin eta entitateekin lankidetzan.
b) Migrazioen arloko oinarrizko informazio eta orientazio zerbitzua kudeatzea.
c) Nafarroako Foru Komunitateko migratzaileei atzerritartasunaren arloan arreta eta aholkularitza emateko zerbitzua kudeatzea.
d) Tokiko, eskualdeetako, Estatuko, Europako eta nazioarteko erakundeekiko koordinazioa eta lankidetza, migratzaileen harrera hobetzeko.
e) Koordinazioa eta laguntza, bere eskumenen esparruan, migratzaileei eta errefuxiatu-babesaren, aldi baterako babesaren eta nazioarteko babesaren eskatzaileei harrera egiteko sarearekiko eta migratzaileen elkarteekiko, baita pertsona horientzako harrera hobetzeko lan egiten duten gizarte erakundeekiko ere.
f) Departamentuen edo erakundeen arteko lantalde teknikoetan parte hartzea, migratzaileentzako harreraren arloan.
g) Bere eskumeneko dirulaguntza deialdiak kudeatzea, tramitatzea eta haien jarraipena eta kontrola egitea.
h) Integratzeko ahaleginari buruzko txostenak egitea, aldi baterako bizileku baimenak berritzeko prozedurei lotuta.
i) Etengabeko eta zeharkako prestakuntza, migratzaileentzako harreraren esparruan aritzen diren eragileei zuzenduta, honako gai hauei buruz: migrazioak, atzerritartasunaren gaineko araudia, nazioarteko babesa, migrazioko dolua eta familien berrelkartzea.
j) Bere helburuak egoki betetzeko, indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.
24. artikulua . Lagun Egiteko eta Kulturen arteko Bitartekaritzarako Atalaren esparru material eta funtzionala.
Lagun Egiteko eta Kulturen arteko Bitartekaritzarako Atalak eginkizun hauek izanen ditu:
a) Nafarroako Foru Komunitateko migratzaileentzako bitartekaritza komunitarioaren zerbitzua kudeatzea.
b) Nafarroan familia laguntzarik ez duten migratzaile gazteei arreta integrala emateko Kideak zerbitzua kudeatzea.
c) Bere eskumeneko programak, migratzaileei eta errefuxiatu-babesaren eta nazioarteko babesaren eskatzaileei lagun egitearekin lotutakoak, kudeatzea, tramitatzea eta haien jarraipena eta kontrola egitea.
d) Migratzaileei lagun egiteko, mentoretza eta pedagogia berritzaileetan oinarritutako programak garatzea eta sustatzea.
e) Tokiko, eskualdeetako, Estatuko, Europako eta nazioarteko erakundeekiko koordinazioa eta lankidetza, migratzaileentzako lagun egitea hobetzeko.
f) Gizarte erakundeekiko koordinazioa, migratzaileentzako lagun egitea hobetzeko.
g) Departamentuen edo erakundeen arteko lantalde teknikoetan parte hartzea, migratzaileentzako lagun egitearen eta kulturen arteko bitartekaritzaren arloan.
h) Bere eskumeneko dirulaguntza deialdiak kudeatzea, tramitatzea eta haien jarraipena eta kontrola egitea.
i) Etengabeko eta zeharkako prestakuntza, migratzaileentzako lagun egitearen eta kulturen arteko bitartekaritzaren esparruan aritzen diren eragileei zuzenduta, honako gai hauei buruz: kulturako eta kulturen arteko gaitasunak, eta kulturen arteko gatazkei aurrea hartzea eta horiek konpontzea.
j) Bere helburuak egoki betetzeko, indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.
3. ATALA. AYLLU-KULTUREN ARTEKO BIZIKIDETZARAKO ETA ARRAZISMOAREN ETA XENOFOBIAREN AURKAKO BORROKARAKO ZERBITZUA
25. artikulua . AylluKulturen arteko Bizikidetzarako eta Arrazismoaren eta Xenofobiaren aurkako Borrokarako Zerbitzuaren esparru material eta funtzionala.
Ayllu-Kulturen arteko Bizikidetzarako eta Arrazismoaren eta Xenofobiaren aurkako Borrokarako Zerbitzuak foru dekretu honetan ezarritako eskudantziak izanen ditu, honako gai hauetan:
a) Jarduketak diseinatu eta planifikatzea, Nafarroan, kulturen arteko bizikidetzaren eta arrazismoaren eta xenofobiaren aurkako borrokaren esparruan.
b) Nafarroako Kulturen arteko Bizikidetzarako Estrategia diseinatzea, koordinatzea eta haren jarraipena eta ebaluazioa egitea, eta hartan ezarritako programak eta jarduketak bultzatzea, beste administrazio publiko batzuekin eta entitateekin lankidetzan.
c) Arrazismoaren eta Xenofobiaren aurkako Borrokarako Nafarroako Plana koordinatzea eta haren jarraipena eta ebaluazioa egitea, eta hartan ezarritako programak eta jarduketak bultzatzea, beste administrazio publiko batzuekin eta entitateekin lankidetzan.
d) Arrazismoari eta xenofobiari aurre egiteko arreta zerbitzua kudeatzea.
e) Kulturen arteko bizikidetza, gizarte aniztasuna eta migrazioak balioesteko eta horien gainean sentsibilizatzeko ekintzak diseinatzea eta abian jartzea.
f) Kulturen arteko bizikidetza hobetzeko eta arrazismoaren eta xenofobiaren aurka borrokatzeko neurrietan laguntzea eta horiek koordinatzea, neurri horiek Foru Komunitateko Administrazioaren departamentuetan garatzen direnean.
g) Tokiko, eskualdeetako, Estatuko, Europako eta nazioarteko erakundeekiko koordinazioa eta lankidetza, kulturen arteko bizikidetza hobetzeko eta arrazismoaren eta xenofobiaren aurkako borrokan.
h) Toki entitateekiko koordinazioa eta laguntza, kulturen arteko bizikidetzarako eta arrazismoaren eta xenofobiaren aurkako borrokarako teknikarien sare bat ezarri eta abian jartzeko Nafarroako Foru Komunitatean.
i) Toki entitateekiko koordinazioa eta laguntza, kulturen arteko bizikidetza hobetzeko Nafarroako eskualde guztietan.
j) Kultura aniztasunaren eta dibertsitatearen balio positiboak nabarmentzeko ekimenak bultzatzea, toki entitateekin, gizarte erakundeekin eta migratzaileen elkarteekin elkarlanean.
k) Nafarroan Arrazakeriaren aurka Borrokatzeko Foru Legea garatzeko jarduketak koordinatzea.
l) Arrazismoaren aurkako Nafarroako Kontseilua sortzea, koordinatzea eta garatzea.
m) Parte hartzea tokiko, autonomia erkidegoko, Estatuko nahiz Europako administrazioetako kontseilu eta batzordeetan, kulturen arteko bizikidetzarekin eta arrazismoaren eta xenofobiaren aurkako borrokarekin lotutakoetan.
n) Nafarroako Migratzaileen Foroa antolatzea eta dinamizatzea.
ñ) Bere eskumeneko dirulaguntza deialdiak kudeatzea, tramitatzea eta haien jarraipena eta kontrola egitea.
o) Etengabeko eta zeharkako prestakuntza, Nafarroan kulturen arteko bitartekaritzaren eta arrazismoaren eta xenofobiaren aurkako borrokaren esparruan aritzen diren profesionalei eta eragileei zuzenduta, honako gai hauei buruz: berdintasuna eta diskriminaziorik eza, arrazismoari eta xenofobiari aurrea hartzea eta horien aurkako sentsibilizazioa, eta kulturen arteko harremana eta bizikidetza.
p) Departamentuen edo erakundeen arteko lantalde teknikoetan parte hartzea, kulturen arteko bizikidetzaren eta arrazismoaren eta xenofobiaren aurkako borrokaren arloan.
q) Sentsibilizazio kanpainak eta jarduketak garatzea, Nafarroan batera bizi diren kulturek elkar ezagutzeko, migrazioen fenomenoa gizatiartzeko, eta aniztasuna Nafarroako gizartearentzako aberastasuna dela erakusteko, Nafarroa Koloretan ekimenaren bidez.
r) Jarduketak gauzatzea, Foru Komunitatean migrazioen fenomenoaren ikuspegi baikorra zabaltzeko lan egiten duten pertsona, elkarte eta entitateei aitortza egin dakien, Nafarroa Koloretan sariaren bidez.
s) Bere helburuak egoki betetzeko, indarrean dauden xedapenek esleitzen dizkioten beste batzuk, edo bere jardueraren eremuan agintzen zaizkionak.
IV. KAPITULUA. IDAZKARITZA TEKNIKO NAGUSIA
26. artikulua . Idazkaritza Tekniko Nagusiaren egitura.
Idazkaritza Tekniko Nagusiak atal hauek ditu bere egituran:
a) Araubide Juridikoaren Atala.
b) Ekonomia eta Aurrekontuak Kudeatzeko Atala.
c) Kudeaketa Administratiboaren Atala.
27. artikulua . Araubide Juridikoaren Atalaren esparru material eta funtzionala.
Araubide Juridikoaren Atalak eginkizun hauek izanen ditu:
a) Nafarroako Gobernuko departamentuko titularrak igortzen dizkion espedienteak, departamentuko gaiei buruzkoak, koordinatu eta gainbegiratzea.
b) Departamentuko titularrak ebatzi behar dituen espedienteak, departamentuaren eskumeneko gaiei buruzkoak, koordinatu eta gainbegiratzea, onets daitezen.
c) Departamentuko organoei aholkua eta laguntza juridikoa ematea.
d) Nahitaezko txosten juridikoak eta departamentuko organoek eskatzen dizkioten txostenak egitea.
e) Txosten juridikoak prestatzea departamentuko organoek ematen dituzten egintzen aurka jartzen diren errekurtso administratiboei buruz.
f) Arauak bildu eta eguneraturik mantentzea eta, orobat, interes juridikoa duen jurisprudentzia, doktrina eta informazioa bildu, hedatu eta haien jarraipena egitea.
g) Ondare-erantzukizunaren prozedurak tramitatu eta ebazteko proposatzea.
h) Bere eskumenen esparruko espedienteak kudeatzea eta artxibatzea.
i) Espedienteak prestatu eta berrikustea, organo jurisdikzionalei igortzeko.
j) Zehapen-espedienteak instruitu eta haiei jarraipena egitea.
k) Nafarroako Arartekoaren bulegoak egiten dituen eskaerak eta jarduketak kontrolatu eta horien jarraipena eta txostenak egitea.
l) Genero ikuspegiaren zeharkakotasuna aplikatzearekin loturiko eginkizunak gauzatzea departamentuaren politikak planifikatu, kudeatu eta ebaluatzean, bat etorriz Emakumeen eta Gizonen arteko Berdintasunari buruzko apirilaren 4ko 17/2019 Foru Legearekin.
m) Nafarroako Fundazioei buruzko ekainaren 30eko 13/2021 Foru Legearen 61. artikuluan ezarritakoak, departamentuaren babesletzaren menean dauden fundazioei dagokienez.
n) Idazkari tekniko nagusiak bere eskumenen esparruan agintzen dion beste edozein.
28. artikulua . Ekonomia eta Aurrekontuak Kudeatzeko Atalaren esparru material eta funtzionala.
Ekonomia eta Aurrekontuak Kudeatzeko Atalak eginkizun hauek izanen ditu:
a) Departamentuko unitate guztiei aholkuak ematea, aurrekontuen aurreproiektua eta departamentuaren epe ertaineko plan ekonomikoa prestatu behar direnean.
b) Departamentuko aurrekontuen aurreproiektua koordinatu eta tramitatzea.
c) Departamentuko aurrekontuen kudeaketari buruzko informazioa beti eguneraturik edukitzea.
d) Ordaintzeko aginduak, justifikatu beharrekoak, kudeatu, jarraitu eta justifikatzea, eta departamentuko unitateen kutxako aurrerakinen kontuak kudeatu eta kontrolatzea.
e) Departamentuko unitateen jarduera ekonomikoen kontabilitate orokorra eta aurrekontuen kontabilitatea.
f) Departamentuko unitate bakoitzari dagozkion sarrera eta gastuen espedienteak kontabilizatzea.
g) Azterlan ekonomikoak egitea.
h) Bere eskumenen esparruko espedienteak kudeatzea eta artxibatzea.
i) Idazkari tekniko nagusiak bere eskumenen esparruan agintzen dion beste edozein.
29. artikulua . Kudeaketa Administratiboaren Atalaren esparru material eta funtzionala.
Kudeaketa Administratiboaren Atalak eginkizun hauek izanen ditu:
a) Idazkaritza Tekniko Nagusiari langileen arloan esleitutako gaien kudeaketa administratiboa.
b) Material suntsigarri eta inbentariagarria erostea.
c) Agiriak konpultsatzea.
d) Agirien sarrera-irteeren erregistroaz arduratzea.
e) Laguntza administratiboa ematea Idazkaritza Tekniko Nagusiaren unitate organikoei.
f) Behar den guztia prestatzea departamentuaren zerbitzu administratibo eta orokorrek funtzionamendu egokia izan dezaten.
g) Departamentuko agiriak erregistratu, artxibatu, zaindu eta gordetzeko zereginak gainbegiratzea.
h) Departamentuko zerbitzuei eta herritarrei bermatzea espedienteak lokalizaturik eta eskuragarri daudela, eta, orobat, ikusteko, maileguan hartzeko edo kontsultatzeko moduan.
i) Nafarroako Foru Komunitateko Administrazioaren datu-babeseko eta informazioaren segurtasuneko politikan zehaztutako informazioaren segurtasun arduradunaren eginkizunak betetzea, betiere departamentuaren eremuaren barnean, informazioaren segurtasunari buruzko indarreko araudia betetzen dela segurtatzeko eta zaintzeko, barnean dela datu pertsonalen babesa.
j) Departamentuko gainerako organoei laguntzea, Nafarroan desgaitasuna dutenei arreta emateari eta beren eskubideak bermatzeari buruzko azaroaren 28ko 31/2022 Foru Legea aplikatzeko.
k) Informazio publikoa kudeatzeko ardura duten unitateak koordinatzea, Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen 8. artikuluak ezarritakoaren arabera.
l) Departamentuko gainerako organoekiko koordinazioa eta laguntza, herritarren parte-hartzeari dagokionez.
m) Idazkari tekniko nagusiak agintzen dion beste edozein.
Lehen xedapen gehigarria. Eskumenak deskontzentratzeko baldintza orokorrak.
1. Indarra duten arauek organo bati ematen dizkioten eskumenak hierarkian mendeko diren beste organo batzuengan deskontzentratzen ahal dira, Nafarroako Aldizkari Ofizialean argitaratuko den xedapen orokor baten bitartez, galarazi gabe eskumenak esleitzeko arauetan finkatutako baldintzak bete beharra.
2. Etxebizitzako, Gazteriako eta Migrazio Politiketako Departamentuko titularrak indarrik gabe uzten ahalko du xedapen gehigarri honetan aipatzen den eskumenen deskontzentrazioa, Nafarroako Aldizkari Ofizialean argitaratu beharko den foru agindu baten bidez.
Bigarren xedapen gehigarria. Etxebizitza Zuzendaritza Nagusiaren esku deskontzentratzen diren eskumenak.
Etxebizitza zuzendari nagusiaren esku uzten dira, bere eskumenen esparru materialean, indarra duen araudiak Etxebizitzako, Gazteriako eta Migrazio Politiketako Departamentuko titularrari arlo hauetan esleitzen dizkion eskumen administratiboen titulartasuna eta erabilera: dirulaguntzak, kontratazioa, enkarguak eta zehapen espedienteen gainekoa, barnean direla gastuak baimentzea eta xedatzea eta ordaintzeko betebeharrak aitortzea.
Hirugarren xedapen gehigarria. Migrazio Politiketako Zuzendaritza Nagusiaren esku deskontzentratzen diren eskumenak.
Migrazio Politiketako zuzendari nagusiaren esku uzten dira, bere eskumenen esparru materialean, indarra duen araudiak Etxebizitzako, Gazteriako eta Migrazio Politiketako Departamentuko titularrari arlo hauetan esleitzen dizkion eskumen administratiboen titulartasuna eta erabilera: dirulaguntzak, kontratazioa eta enkarguak, barnean direla gastuak baimentzea eta xedatzea eta ordaintzeko betebeharrak aitortzea.
Laugarren xedapen gehigarria. Unitateak bere horretan uztea.
Foru dekretu hau garatzeko neurriak hartu bitartean, atalarena baino maila txikiagokoak diren unitate organikoek berdin segituko dute eta oraingo izenari eta eginkizunei eutsiko diete. Behin-behinekoz egitura berriko organoei atxikiko zaizkie, orain arte betetzen zituzten eginkizunen arabera.
Bosgarren xedapen gehigarria. Izendapenak berrestea.
Berretsi egiten dira foru dekretu honetan ezarritako egituran lehengo izenari eusten dioten burutzen izendapenak, egin ziren baldintza berberetan, baita Programen Hedapenerako eta Ikuskapenerako Zerbitzuko zuzendariarena ere, aurrerantzean Berrikuntza, Parte-hartze, Ikuskapen eta Hedapen Zerbitzuko zuzendari postua beteko baitu.
Seigarren xedapen gehigarria. Unitateak kentzea.
Unitate hauek kentzen dira:
a) Programen Hedapenerako eta Ikuskapenerako Zerbitzua.
b) Ikuskapen Atala.
c) Programen Hedapenerako Atala.
Zazpigarren xedapen gehigarria. Unitateak sortzea.
Unitate hauek sortzen dira:
a) Etxebizitzak Birgaitzeko Atala, zeinaren burutza beteko baitu A edo B mailako funtzionario batek.
b) Berrikuntza, Parte-hartze, Ikuskapen eta Hedapen Zerbitzua.
c) Berrikuntza eta Ikuskapen Atala, zeinaren burutza beteko baitu A edo B mailako funtzionario batek.
d) Parte-hartze eta Hedapen Atala, zeinaren burutza beteko baitu A edo B mailako funtzionario batek.
Xedapen indargabetzaile bakarra. Arauak indargabetzea.
Indarrik gabe uzten dira, foru dekretu honen kontra doan orotan eta Etxebizitzako, Gazteriako eta Migrazio Politiketako Departamentuaren eskumenen esparruari dagokionez, honako hauek: 269/2019 Foru Dekretua, urriaren 30ekoa, Lurralde Antolamenduko, Etxebizitzako, Paisaiako eta Proiektu Estrategikoetako Departamentuaren egitura organikoa ezartzen duena; 266/2019 Foru Dekretua, urriaren 30ekoa, Migrazio Politiketako eta Justiziako Departamentuaren egitura organikoa ezartzen duena, eta foru dekretu honetan xedaturikoari aurka egiten dioten maila bereko edo beheragoko xedapen guztiak.
Azken xedapenetako lehena. Gaikuntzak.
Barneko, Funtzio Publikoko eta Justiziako Departamentuko eta Ekonomia eta Ogasuneko Departamentuko titularrei gaikuntza ematen zaie behar diren xedapen guztiak eman ditzaten foru dekretu honetan xedatutakoa garatu eta betetzeko, eta bidezkoak diren langileen eta baliabide ekonomiko eta materialen esleipena eta banaketa egin dezaten.
Azken xedapenetako bigarrena. Garatzeko ahalmenak.
Ahalmena ematen zaio Etxebizitzako, Gazteriako eta Migrazio Politiketako Departamentuko titularrari foru dekretu honetan ezarritakoa garatzeko behar diren xedapenak eman ditzan.
Azken xedapenetako hirugarrena. Indarra hartzea.
Foru dekretu honek Nafarroako Aldizkari Ofizialean argitaratu eta biharamunean hartuko du indarra.
