(ir al contenido)

navarra.es

Castellano | Euskara | Français | English

LEXNAVARRA


Versión para imprimir

Versión en castellano

94/2022 FORU DEKRETUA, URRIAREN 26KOA, ZEINAREN BIDEZ ONESTEN BAITA LAGUN EGITEKO ANIMALIAK NAFARROAN BABESTEARI BURUZKO APIRILAREN 4KO 19/2019 FORU LEGEA GARATZEKO ERREGELAMENDUA.

BON N.º 238 - 29/11/2022



  ATARIKO TITULUA. XEDAPEN OROKORRAK


  I. TITULUA. LAGUN EGITEKO ANIMALIEN IDENTIFIKAZIOA

  I. KAPITULUA. ANIMALIEN IDENTIFIKAZIOA

  II. KAPITULUA. LAGUN EGITEKO ANIMALIEN IDENTIFIKAZIORAKO NAFARROAKO ERREGISTROA (LEAINE)

  III. KAPITULUA. GAITUTAKO ALBAITARIAK


  II. TITULUA. LAGUN EGITEKO ANIMALIEN OSASUN KONTROLAK

  I. KAPITULUA. NAHITAEZKO TRATAMENDUAK ETA NAHITAEZ AITORTU BEHARREKO GAIXOTASUNAK

  II. KAPITULUA. NAHITAEZKO OSASUN AZTERKETA ETA KONTROLA


  III. TITULUA. LAGUN EGITEKO ANIMALIEN ZENTROAK

  I. KAPITULUA. XEDAPEN OROKORRAK

  II. KAPITULUA. ZENTROAK BAIMENTZEA ETA ERREGISTRATZEA

  III. KAPITULUA. ZENTROEN FUNTZIONAMENDUBALDINTZA OROKORRAK

  IV. KAPITULUA. BALDINTZA GEHIGARRIAK, ZENTROMOTAREN ARABERA


  IV. TITULUA. ANIMALIAK MANEIATZEKO PRESTAKUNTZA ETA GAIKUNTZA

  I. KAPITULUA. ANIMALIAK MANEIATZEN DITUZTEN LANGILEAK

  II. KAPITULUA. PRESTAKUNTZAERAKUNDEAK

  III. KAPITULUA. PRESTAKUNTZA PROGRAMAK

  IV. KAPITULUA. GAIKUNTZAZIURTAGIRI OFIZIALA

  V. KAPITULUA. PRESTAKUNTZAERAKUNDEEN ETA IKASTAROEN ERREGISTROA


  V. TITULUA. ZAKURTREBATZAILEAK

  I. KAPITULUA. ZAKURTREBATZAILE EGIAZTATUAK

  II. KAPITULUA. ZAKURTREBATZAILE EGIAZTATUEN ERREGISTROA


  VI. TITULUA. ANIMALIEN POPULAZIOAK KONTROLATZEA

  I. KAPITULUA. KATUKOLONIAK

  II. KAPITULUA. HIRIKO HEGAZTIAK


  VII. TITULUA. ANIMALIAK BABESTEKO ETA DEFENDATZEKO ELKARTEAK ETA ERAKUNDE LAGUNTZAILEAK

  I. KAPITULUA. ANIMALIAK BABESTEKO ETA DEFENDATZEKO ELKARTEEN ETA ERAKUNDE LAGUNTZAILEEN ERREGISTROA

  II. KAPITULUA. ERAKUNDE LAGUNTZAILEAK


  VIII. TITULUA. ARAUHAUSLEAK


  IX. TITULUA. ANIMALIEN BABESERAKO AHOLKU KOMITEA


  X. TITULUA. 19/2019 FORU LEGEAREN ARAUHAUSTEAK

  1. ERANSKINA. LAGUN EGITEKO ANIMALIEN IDENTIFIKAZIORAKO NAFARROAKO ERREGISTROA

  BILDUMA PARTIKULARRA IZATEKO BEHAR DIREN ANIMALIEN KOPURUA

  3. ERANSKINA. LAGUN EGITEKO ANIMALIEN ZENTROEN ERREGISTROA

  4. ERANSKINA. ERREGISTROLIBURUA

  5. ERANSKINA. HIGIENE, OSASUN ETA ONGIZATEPROGRAMA

  6. ERANSKINA. URTEKO TXOSTENA

  7. ERANSKINA. PRESTAKUNTZA

  8. ERANSKINA. PRESTAKUNTZAERAKUNDEEN ETA IKASTAROEN ERREGISTROA

  9. ERANSKINA. ZAKURTREBATZAILEEN ERREGISTROA

  10. ERANSKINA. ANIMALIAK BABESTEKO ETA DEFENDATZEKO ELKARTEEN ETA ERAKUNDE LAGUNTZAILEEN ERREGISTROA

  11. ERANSKINA. ARAUHAUSLEEN ERREGISTROA


Zioen azalpena

2019ko apirilaren 11n, Lagun egiteko animaliak Nafarroan babesteari buruzko apirilaren 4ko 19/2019 Foru Legea argitaratu zen 71. Nafarroako Aldizkari Ofizialean. Lege horrek 2019ko uztailaren 11n hartu zuen indarra, eta oinarrizko helburu hauek ditu:

1. Bere aplikazio eremuan sartzen diren animalien babes- eta ongizate-maila ahal den handiena lortzea.

2. Animalientzako tratu egokia bermatzea, tratu txarren edo sufrimendu egoerak ekidinez, haiei baldintza higieniko-sanitario ezin hobeak bermatuz eta aukera emanez animalien espeziearen, adinaren eta jardueraren araberako jokabidea eduki ahal dezaten.

3. Animalien edukitze arduratsua sustatzea, abandonuaren aurka borrokatuz, identifikazioa, adopzioa, esterilizazioa, hazkuntza eta ugalkortasunaren kontrola arautuz eta animalien populazioaren kontrola haien hilketan gauzatzen diren metodoen bidez ez egitea lortuz.

4. Animalien babesari buruzko prestakuntza-, zabalkunde- eta informazio-jarduerak sustatzea, jabeei animalien etologiari eta gobernatzeari buruzko heziketa emanez.

Helburu horiek lortzeko eta foru legea behar bezala aplikatzeko, erregelamendu bidezko garapen zehatza behar da, bertan araututako alderdi asko argitu eta zehaztu behar baitira, helburuak beteko direla bermatzeko.

Foru legeak, bigarren xedapen iragankorrean, ahalmena ematen dio Nafarroako Gobernuari erregelamendu bidez gara dezan.

19/2019 Foru Legearen lehen xedapen iragankorra betez, urriaren 23ko 258/2019 Foru Dekretuak, zeinaren bidez Landa Garapeneko eta Ingurumeneko Departamentuaren egitura organikoa onesten baita, Animalien Ongizaterako Atala sortu zuen, Nekazaritza eta Abeltzaintza Zuzendaritza Nagusiko Abeltzaintza Zerbitzuaren menpean. 19/2019 Foru Legeak berak esleitzen dio atal horri legean ezarritakoa betearazteko, koordinatzeko, kontrolatzeko eta garatzeko eginkizuna.

Bestalde, hirugarren xedapen iragankorrak zehazten du Nafarroako udalek, udal erakundeek edo eskualdeek beren ordenantzak foru legearen xedapenetara egokituko dituztela; izan ere, foru legean araututakoa behar bezala zehaztu eta garatu behar da ordenantza horiek idazteko.

Horregatik guztiagatik, foru legea erregelamendu bidez garatzeko, erregelamendu bat onetsi behar da, apirilaren 4ko 19/2019 Foru Legean bertan erregelamendu bidez garatzekoak diren alderdi guztiak arautzeko.

Erregelamenduak hamaika titulu ditu, horietako bat atarikoa eta hamaika eranskin.

Atariko tituluan (Xedapen orokorrak), erregelamenduaren xedea, aplikazio-eremua -lagun egiteko animaliak- eta artikuluetan aplikatzen diren definizioak zehazten dira, lortu nahi diren helburuetarako erabilitako kontzeptuak ulergarriagoak izan daitezen.

I. tituluan (Lagun egiteko animalien identifikazioa Nafarroan), araututa daude animaliak adin jakin bat baino lehen identifikatzeko betebeharra eta gaitutako albaitari batek egin beharreko identifikazio-prozedura, eta gaikuntza horretarako betekizunak zehazten dira. Bestalde, funtzionamendu- eta kudeaketa-araubidea ezartzen du Lagun Egiteko Animalien Nafarroako Erregistrorako (LEAINE), lagun egiteko animaliak kontrolatzeko eta edukitza arduratsua bermatzeko.

II. tituluan (Lagun egiteko animalien osasun kontrolak), nahitaezko osasun kontrolak arautzen dira; horien artean, xehetasun handiagoz sartzen dira amorruaren aurkako txertaketa eta nagusiki animaliei eragiten dieten beste gaixotasun batzuen kontrola. Horretaz gain, nahitaezko eta urteroko albaitaritza-azterketa bat ezartzen du zakur, katu eta hudoentzat, osasuna kontrolatzeko metodo gisa.

III. tituluan (Lagun egiteko animalien zentroak), jasota daude zer baldintza eta betekizun orokor bete behar dituzten espezie jakin batzuk hartzen dituzten animalia-zentroek, haien helburuaren arabera sailkatzen dira, eta horietako bakoitzerako betekizun espezifikoak ezartzen. Gainera, zehazten da zer prozedura behar den haiek baimentzeko eta inskribatzeko gune zoologikoen zentroen erregistroan, zeina sartuta baitago martxoaren 26ko 479/2004 Errege Dekretuaren 3. artikuluan ezarritako Abeltzaintzako Ustiategien Erregistro Orokorrean.

IV. tituluan (Lagun egiteko animaliak maneiatzeko eta zaintzeko prestakuntza eta gaikuntza), ezartzen da gutxienez zer prestakuntza den egokia animaliekin kontaktuan dagoen zentro batean lan egiten duen edozein pertsonarentzat, animaliak behar bezala zaindu eta maneiatzeko. Arautzen da zer baimen behar duten entitateek prestakuntza emateko eta zer eduki izan behar duten gutxienez prestakuntza-programek eta -ikastaroek. Baimendutako prestakuntza-erakundeen erregistroa sortzen da.

V. tituluan (Zakur-trebatzaileak), zehazten da zer akreditazio behar duten zakurrak trebatzen dituzten pertsonek, aitortza izateko eta erregistro batean inskribatzeko. Horretarako, Zakur-trebatzaileen Nafarroako Erregistroa sortzen da, eta bertan inskribatuko dira zakurrak trebatzeko gaikuntzaren ziurtagiri ofiziala duten pertsonak.

VI. tituluan (Animalien populazioak kontrolatzea), katu-koloniak sortzeko baldintzak zehazten dira, kontuan hartuta zer baldintza diren egokiak kokapen, higiene eta osasun aldetik animalia horien kudeaketa etikoa egiteko. Horretaz gain, hiriko usoak kontrolatzeko baimendutako prozedurak ezartzen dira, animalia horiek kalterik jasan ez dezaten edo arrazoirik gabe hil ez ditzaten.

VII. tituluan (Animaliak babesteko eta defendatzeko elkarteak eta erakunde laguntzaileak), honako hauek sortu eta arautzen dira: animaliak babesteko eta defendatzeko elkarteen eta erakunde laguntzaileen erregistroa, animaliak babesten dituzten elkarteek erakunde laguntzaile gisa onartuak izateko bete behar dituzten baldintzak, eta elkarte eta erakunde horiek erregistroan inskribatzeko prozedura, besteak beste, hitzarmenak sinatu edo foru administrazioaren dirulaguntzak jaso ahal izateko.

VIII. tituluan (Arau-hausleak), zehazten da nola inskribatuko diren erregistro batean administrazio-zehapen edo zehapen penal baten ondorioz animaliak edukitzeko desgaituta dauden pertsona guztiak, horrela saihestuko baita erregistroan jasota dagoenak animaliaren bat edukitzea edo animalia biziekin zerikusia duen edozein lanbide, ofizio edo merkataritzatan aritzea.

IX. tituluan (Animalien Babeserako Aholku Komitea), kide anitzeko organo horren osaera eta funtzionamendua zehazten dira. Organo horren helburu nagusia da ekintzak aztertu eta proposatzea lagun egiteko animaliak arduraz edukitzeko eta haien tratu txarren eta abandonuaren aurka borrokatzeko; horretarako, bermatuko da Nafarroan animaliak babestea helburu duten erakundeek parte hartzen dutela.

X. tituluan (19/2919 Foru Legearen arau-hausteak), beharrezko aurreikuspenak jasotzen dira foru legean jasotako arau-hausteengatik ezarritako zehapenetatik datozen diru-sarreren xedeari dagokionez.

Foru dekretu honek, bere aldetik, xedapen gehigarri, xedapen iragankor, azken xedapen eta xedapen indargabetzaile hauek ditu.

Lehen xedapen gehigarrian, erreferentzia egiten zaio Landa Garapen, Ingurumen eta Toki Administrazioko kontseilariaren apirilaren 12ko 104/2013 Foru Aginduaren aldaketari (foru lege horren bidez Nafarroako gune zoologikoen baimena, sailkapena, erregistroa eta kontrol zoosanitarioa arautzen dira), bertatik kentzeko lagun egiteko animalien gune zoologikoei egiten zaizkien aipamenak.

Bigarren xedapen gehigarrian jasotzen da beharrezkoa dela foru dekretuan aurreikusitako neurrien aplikazioa egokitzea urte bakoitzeko Nafarroako aurrekontu orokorretan ezartzen diren aurrekontu-baliabideetara eta aurrekontu-egonkortasunari buruzko araudira.

Xedapen iragankorrek epeak ezartzen dituzte lagun egiteko animalien egungo zentroak edo baimentzeke daudenak foru dekretu honetan ezarritako betekizunetara egokitzeko, osasun kartilla animalia identifikatzeko pasaportearekin ordezkatzeko eta esterilizatutako katu feralak identifikatzeko.

Xedapen indargabetzaileak indarrik gabe uzten ditu foru dekretu honek ukitutako arauak.

Horrenbestez, Landa Garapeneko eta Ingurumeneko kontseilariak proposaturik, Nafarroako Kontseiluarekin bat, eta Nafarroako Gobernuak bi mila eta hogeita biko urriaren hogeita seian egindako bilkuran hartutako Erabakiarekin bat.

DEKRETATZEN DUT:

Artikulu bakarra. Lagun egiteko animaliak Nafarroan babesteari buruzko apirilaren 4ko 19/2019 Foru Legea garatzen duen Erregelamendua onestea.

Lagun egiteko animaliak Nafarroan babesteari buruzko apirilaren 4ko 19/2019 Foru Legea garatzeko Erregelamendua onesten da; haren testua foru dekretu honen ondoren eransten da.

Lehenengo Xedapen Gehigarria. Nafarroako gune zoologikoen baimena, sailkapena, erregistroa eta kontrol zoosanitarioa arautzen duen apirilaren 12ko 104/2013 Foru Agindua aldatzea.

Aldatzen da Landa Garapeneko, Ingurumeneko eta Toki Administrazioko kontseilariaren apirilaren 12ko 104/2013 Foru Agindua, Nafarroako gune zoologikoen baimena, sailkapena, erregistroa eta kontrol zoosanitarioa arautzen duena, bere aplikazio-eremutik kanpo uzten baititu lagun egiteko animalien zentroak, baldin eta erregelamenduaren 22. artikuluan definitutako animaliak badituzte, eta ondoriorik gabe gelditzen da zentro horiei dagokienez foru dekretu honen bidez onesten den erregelamenduan xedatutakoa urratzen duen edozein artikulu.

Bigarren Xedapen Gehigarria. Aurrekontuegonkortasunari buruzko araudiaren mende egotea.

Apirilaren 4ko 19/2019 Foru Legearen lehen xedapen iragankorrean ezarritakoarekin bat etorriz, foru dekretu honetan aurreikusitako neurriak aplikatzeko, finantza-nahikotasuna bermatuko da, honako hauen menpe: urtero Nafarroako Aurrekontu Orokorretan ezartzen diren aurrekontu-baliabideak, urte anitzeko programazioa eta aurrekontu egonkortasunaren araudia.

Lehenengo Xedapen Iragankorra. Osasun txartela ordeztea.

Osasun kontseilariak amorruaren aurkako txertaketa arautzeko 1994ko irailaren 19an emaniko Foru Aginduak ezarritako osasun txartelak bi urteko epean utziko dio indarrean egoteari, foru dekretu hau indarrean sartzen denetik aurrera. Epe horretan, jabeak osasun txartela ordeztu beharko du animalia identifikatzeko pasaportearekin edo, hala badagokio, animalia identifikatzeko agiriarekin. Albaitariak ordeztuko ditu, foru dekretu honek indarrean hartu ondoren lehen txertaketa egiten denean. Animaliaren jabeak ordeztutako txartela gorde beharko du, orain arte jasotako tratamenduak eta txertoak egiaztatzeko.

Bigarren Xedapen Iragankorra. Dauden zentroak erregularizatzea.

Lagun egiteko animalien zentroen titularrek, jarduera gauzatzeko baimenduta eta erregistratuta daudenean, beren instalazioak erregularizatu eta egokitu beharko dituzte foru dekretu honetan ezarritako betekizun eta baldintzetara, honako epe hauetan:

1. 32.1.b eta 32.1.c artikuluetan araututako kokapenaren arloko baldintzei dagokienez, 2023ko maiatzaren 17a baino lehen egokitu beharko dira.

2. Lagun egiteko animalien beste zentro batzuei edo 32.1.a artikuluan arautzen diren abeltzaintzako ustiategiei dagokienez, foru dekretu honek indarra hartzean duten kokapenean jarraitzen ahalko dute.

3. Animaliak edukitzeko esparruen neurriei buruzko betekizunak ez zaizkie galdatuko foru dekretu honek indarra hartzean baimenduta eta erregistratuta dauden zentroei, salbu eta aldaketaren bat egin nahi bada titulartasunean, instalazioetan, edukieran edo jardueran; kasu horretan, zentroa foru dekretuan eskatutako neurrietara egokitu beharko da.

4. Zentroen baldintza higieniko-sanitarioetara eta biosegurtasunekoetara egokitu beharko dira egungo zentroak, gehienez ere hamabi hilabeteko epean, foru dekretu honek indarra hartzen duenetik aurrera.

5. Indarrik gabe geldituko dira ezarritako baldintzak betetzen ez dituzten baimenak, zehaztutako epeak igaro ondoren, eta zentroei ofizioz emanen zaie baja erregistroan, interesdunei entzun ondoren.

Hirugarren Xedapen Iragankorra. Baimena lortzeko zain dauden zentroak.

1. Zentroek foru dekretu honek indarra hartu aurretik baimena eta erregistroa eskatu eta dagokion baimena eta erregistroa emateko zain daudenean, baimena eman dakieke aurreko araudian eskatutako baldintzak betez gero, baina foru dekretu honetan eskatutako baldintzak betetzeko epeei dagokienez bigarren xedapen iragankorrean ezarritakoari jarraikiz.

2. Indarrik gabe geldituko dira ezarritako baldintzak betetzen ez dituzten baimenak, zehaztutako epeak igaro ondoren, eta zentroei ofizioz emanen zaie baja erregistroan, interesdunei entzun ondoren.

Laugarren Xedapen Iragankorra. Katu feralak identifikatzea.

Katu feral esterilizatuak foru dekretu honek indarra hartzen duen egunean identifikatu gabe badaude, harrapatzen diren unean identifikatuko dira, bai osasun jarduerak egiteko, bai lekualdatzeko, bai kasuan kasuko katu-kolonian esku hartzeko beste edozein arrazoirengatik.

Xedapen Indargabetzaile Bakarra. Indarrik gabe gelditzen dira foru dekretu honetan xedatutakoari kontra egiten dioten maila bereko edo apalagoko xedapen guztiak, eta bereziki hauek:

1. 370/1992 Foru Dekretua, azaroaren 9koa, Nafarroako Foru Komunitatean zakurren identifikazioa arautzen duena.

2. 1994ko irailaren 19ko Foru Agindua, Osasun kontseilariaren, amorruaren aurkako txertaketa arautzen duena.

Azken Xedapenetako Lehena. Garapena eta aplikazioa.

Landa Garapeneko eta Ingurumeneko kontseilariari ahalmena ematen zaio, bere eskumenen esparruan, foru dekretu hau garatu eta aplikatzeko behar diren xedapenak eman ditzan.

Azken Xedapenetako Bigarrena. Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2022ko urriaren 26an.-Nafarroako Gobernuko lehendakaria, María Chivite Navascués.-Landa Garapeneko eta Ingurumeneko kontseilaria, Itziar Gómez López.

LAGUN EGITEKO ANIMALIAK NAFARROAN BABESTEARI BURUZKO APIRILAREN 4KO 19/2019 FORU LEGEA GARATZEN DUEN ERREGELAMENDUA

ATARIKO TITULUA. XEDAPEN OROKORRAK

1. artikulua . Xedea.

Erregelamendu honen xedea da Lagun egiteko animaliak Nafarroan babesteari buruzko apirilaren 4ko 19/2019 Foru Legea garatzea.

2. artikulua . Aplikazioeremua.

Erregelamendu honetan xedatutakoa Nafarroan bizi diren lagun egiteko animaliei aplikatuko zaie, bai eta erregelamendu honetan Nafarroako Foru Komunitatearen esparruan araututako jardueraren bat duten edo egiten duten entitate eta pertsonei ere.

3. artikulua . Definizioak.

Lagun egiteko animaliak Nafarroan babesteari buruzko apirilaren 4ko 19/2019 Foru Legean jasotako definizioez gain, erregelamendu honen ondorioetarako, definizio hauek hartuko dira kontuan:

1. Identifikazioa: prozedura honen bidez, lagun egiteko animalia bati mikrotxip bat ezartzen zaio identifikazio-kode bakarrarekin, edo, hori ezinezkoa denean, 5. artikuluan adierazitako identifikazio-metodo batekin, Lagun Egiteko Animalien Identifikaziorako Nafarroako Erregistroan inskribatzen da eta animalia identifikatzeko pasaportea ematen zaio, edo, hala badagokio, animalia identifikatzeko agiria, haren edukitza edo jabetza pertsona fisiko edo juridiko batekin lotu ahal izateko.

2. Banakako identifikazio-kodea: lagun egiteko animalia bat identifikatzeko eta gainerakoetatik bereizteko aukera ematen duen erlazio alfanumerikoa.

3. Transponderra edo mikrotxipa: gailu elektromagnetiko bat daraman kapsula inertea; horrek banakako identifikazio-kodea du, bateragarria dena ISO 11.784 arauarekin edo une bakoitzean indarrean dagoen arauarekin, eta irakurgailu espezifiko batek irakur dezakeena.

4. Irakurgailua: animalia bat identifikatzeko erabiltzen diren transponderretan edo mikrotxipetan dagoen informazioa berreskuratzeko gai den eta ISO 11.785 araua edo une bakoitzean indarrean dagoen araua betetzen duen tresna.

5. Lagun Egiteko Animalien Identifikaziorako Nafarroako Erregistroa (LEAINE): datu-base informatizatua, animaliak eta jabeak identifikatzeko datuak dituena. Arriskutsuak izan daitezkeen lagun egiteko animaliak barne hartzen ditu, eta hori jasotzen, bat etorriz Arriskutsuak izan daitezkeen animaliak edukitzeko araubide juridikoari buruzko abenduaren 23ko 50/1999 Legearen 6.3 artikuluarekin edo indarrean dagoen araudi aplikagarriarekin.

6. Animalia identifikatzeko pasaportea: lagun egiteko animalia baten banakako identifikazioa bermatzen duen dokumentua, bat egiten duena 577/2013 (EB) Betearazpen Erregelamenduaren III. eranskinean edo haren ordezko araudian ezarritako ereduarekin. Definizio honen barnean sartzen da animalia identifikatzeko agiria, baldin eta, animalia identifikatzeko pasaporteaz bestelakoa izanik eta indarrean dagoen araudia betez, hura ordezten badu.

7. Animalia identifikatua: ISO 11.785 irakurgailu batek irakur dezakeen ISO 11.784 transponder bat daramana, inskribatuta dagoena Lagun Egiteko Animalien Identifikaziorako Nafarroako Erregistroan edo beste autonomia-erkidego batean ofizialki onartutako erregistroan, eta animalia identifikatzeko pasaportea duena, edo, hala badagokio, animalia identifikatzeko agiria. Animalia identifikatu gabekotzat joko da, baldin eta elementu horietako bat ez badu.

8. Bizilekua: hiru hilabete edo gehiago jarraian Nafarroan bizi bada, ulertuko da animaliak Nafarroan duela bizilekua. Behar bezala justifikatutako eta egiaztatutako arrazoiengatik uler daiteke animalia bat ez dela Nafarroan bizi, nahiz eta jarraian hiru hilabete edo gehiago bertan egon, baina inoiz ez sei hilabete baino gehiago baldin badago.

9. Katu ferala: hiri- edo landa-ingurunean askatasunean bizi den eta baimendutako katu-kolonia baten parte den katua.

10. Albaitaria: albaitaritzako lizentziaduna edo graduduna, une bakoitzean Nafarroan bere lanbidean legez jarduteko aukera ematen dioten baldintzak betetzen dituena.

11. Gaitutako edo baimendutako albaitaria: albaitari bat, agintaritza eskudunaren baimena daukana, erregelamendu honetan garatzen diren identifikazio-funtzioak betetzeko.

12. Establezimendua: animaliak aldi baterako edo modu iraunkorrean dituen instalazio edo eraikuntza oro, edo, aire zabaleko hazkuntzaren kasuan, ingurune edo leku oro, salbu eta lagun egiteko animalien bilduma partikulartzat jotako lagun egiteko animaliak dituzten leku edo etxeak.

13. Animalien bidezko esku-hartzea: esku-hartze sozialaren, soziosanitarioaren edo hezkuntzakoaren arloko esku-hartzeak, barne hartzen dutenak bereziki hautatutako eta entrenatutako animalien parte-hartzea, pertsonen hobekuntza terapeutikoa, soziala eta/edo hezkuntzakoa bultzatzeko.

14. Zentroaren edo establezimenduaren titularra: lagun egiteko animalien zentro baten jabea eta/edo arduraduna den edozein pertsona fisiko edo juridiko.

I. TITULUA. LAGUN EGITEKO ANIMALIEN IDENTIFIKAZIOA

I. KAPITULUA. ANIMALIEN IDENTIFIKAZIOA

4. artikulua . Identifikatzeko betebeharra.

1. Nafarroan bizi diren animalien jabeek eta/edo edukitzaileek, barne daudela lagun egiteko animalien zentroen titularrak, honako hauek identifikatu beharko dituzte nahitaez, edozein dela ere pertsona horien bizilekua:

a) Zakurrak, katuak (katu feralak barne) eta hudoak.

b) Lagun egiteko beste animalia batzuk, baldin eta haien nahitaezko txertaketa edo osasun-tratamendua ezarri bada eta teknikoki identifikatzeko modukoak badira. Ekidoei ez zaie araututakoa aplikatuko, horiek identifikazioari eta erregistroari buruzko araudi espezifikoaren arabera arautuko baitira.

c) Arriskutsuak izan daitezkeen lagun egiteko animaliak, bat etorriz Arriskutsuak izan daitezkeen animaliak edukitzeko araubide juridikoari buruzko abenduaren 23ko 50/1999 Legean edo indarrean dagoen araudi aplikagarrian aurreikusitakoarekin, baldin eta identifikazioa teknikoki egin badaiteke.

2. Aurreko apartatuan aipatutako lagun egiteko animaliak, bizilekua Nafarroan izan gabe, bertan baldin badaude aldi baterako, zer autonomia erkidegotan edo Europar Batasuneko estatutan bizi diren, hor araututakoaren arabera identifikatu beharko dira.

3. Borondatez identifikatuko dira artikulu honen 1. paragrafoan jaso ez diren eta Nafarroan bizi diren lagun egiteko animaliak, erregelamendu honetan ezarritakoaren arabera.

4. Animalia bat ezin izanen da LEAINEn inskribatu, ezarrita ez badu banakako identifikazio-kodea duen mikrotxip bat, edo banaka identifikatuta ez badago erregelamendu honetan aurreikusitako beste sistema baten bidez.

5. artikulua . Identifikaziosistema ofiziala.

1. Banakako identifikazio-sistema ofizial iraunkor bakarra da transponder edo mikrotxip homologatu bat ezartzea, LEAINEk baliozkotutako banakako identifikazio-kode bat duena.

2. Transponderrak edo mikrotxipak baldintza hauek beteko ditu:

a) Kode alfanumeriko bakar batekin programatuta egotea, zeina ezin baita aldatu eta bermatu behar baitu identifikazio bat ezin dela bikoiztu.

b) Kode alfanumerikoaren egiturak bete behar ditu ISO 11.784 arauan edo une bakoitzean indarrean dagoen arauan ezarritako baldintzak.

c) Aukera eman behar du ISO 11.785 arauarekin edo une bakoitzean indarrean dagoen arauarekin bateragarria den irakurgailu batek irakurtzeko.

d) Migrazioaren aurkako sistema bat izatea, bai eta biologikoki bateragarria den estaldura bat ere.

e) Banaka eta esterilizatuta aurkeztu behar da, eta gutxienez hiru etiketa izanen ditu kode alfanumerikoa duen barra-kodearekin.

3. Zakurren, katuen edo hudoen kasuan, mikrotxipa larruazalpetik jarriko da lepoaren ezkerraldean. Gaitutako albaitariak justifikatutako arrazoiren batengatik lepoan jarri ezin badu, bi eskapulen arteko gurutze-gunean jarriko da. Animalia identifikatzeko pasaportean edo animalia identifikatzeko agirian adieraziko da zehazki non jarri den.

4. Beste animalia-espezie batzuetan, transponderra teknikoki posible den lekuan jarriko da, ahalik eta eragozpen gutxien eraginez. Ezinezkoa bada animaliak horrela identifikatzea, eraztunak, zintak, etiketak, tatuajeak edo kode bakarra duten beste metodo batzuk erabiliz identifikatuko dira.

6. artikulua . Identifikatzeko epeak.

1. Animaliak epe hauetan identifikatuko dira:

a) Zakurrak, katuak edo hudoak, hiru hilabete bete baino lehen. Hala ere, katuen eta hudoen kasuan, identifikazioa atzeratzen ahalko da amorruaren aurkako lehen txertaketa egin arte.

b) Katu feralen kasuan, esterilizatzeko unean.

c) Beste espezie batzuetako lagun egiteko animalien kasuan, identifikazioa teknikoki posible bada, hiru hilabete bete baino lehen.

2. Animaliek identifikatuta egon beharko dute kostu bidez edo doan eskualdatu baino lehen.

3. Identifikatu gabeko animalia bat sartzen baldin bada animalien harrerako zentro batean, zentroaren izenean identifikatu beharko da, sartzen denetik gehienez ere bost egun balioduneko epean eta, kasu guztietan, edozein arrazoirengatik zentrotik atera aurretik.

4. Katu-kolonia bateko katuak identifikatuko dira hura kontrolatzeko eskumena duen udalaren, udalaz gaindiko erakundearen edo eskualdearen izenean.

7. artikulua . Identifikazioprozedura.

1. Gaitutako albaitaria da lagun egiteko animaliak identifikatzeko baimendutako bakarra.

2. Gaitutako albaitariak, animalia identifikatu aurretik, egiaztatuko du animaliak ez duela ISO 11784 mikrotxip bat ezarrita, eta jabea ez dela agertzen animaliak edukitzeko desgaitu gisa Arau-hausleen Erregistroan. Era berean, pertsona juridikoen jabetzako animalien kasuan, egiaztatuko da jabe gisa agertuko den pertsona ez dagoela Arau-hausleen Erregistro horretan.

3. Aurreko puntuan zehaztutakoa egiaztatu ondoren, gaitutako albaitariak honako hauek egin beharko ditu:

a) Animaliari transponder bat ezartzea, LEAINEn esleituta dituen identifikazio-kodeekin, animaliarentzat baliabide egokiak, aseptikoak eta kaltegarriak ez direnak erabiliz. Ezarri aurretik eta ondoren egiaztatuko du mikrotxipa behar bezala irakurtzen dela.

b) LEAINEn grabatzea animalia identifikatzeko nahitaezko datuak, erregelamendu honen 10. artikuluan ezarritako prozeduraren arabera.

c) Behar bezala beteta ematea animalia identifikatzeko pasaportea edo, hala badagokio, animalia identifikatzeko agiria.

d) Katu-kolonia bateko katu feralen eta ehizarako gaitasunarekin erregistratutako hudoen kasuan, pasaportearen edo banakako identifikazio-agiriaren ordez fitxa kliniko bat egiten ahalko da. Fitxa horretan jasoko dira identifikazioa, osasun datuak, tratamenduak, diagnostikoak eta garrantzitsutzat jotzen diren guztiak.

4. Jabeak edo edukitzaileak, ezertan galarazi gabe animaliaren identifikazio-pasaportea edo, hala badagokio, animaliaren identifikazio-agiria izateko betebeharra, animaliaren identifikazioa egiaztatzen ahalko du Nafarroako Gobernuak aitortutako txartel edo mugikorreko aplikazio baten bidez, zeinak aukera emanen baitu pasaportean edo identifikazio-agirian agertzen den informazio bera eskuratzeko.

II. KAPITULUA. LAGUN EGITEKO ANIMALIEN IDENTIFIKAZIORAKO NAFARROAKO ERREGISTROA (LEAINE)

8. artikulua . LEAINEren kudeaketa eta funtzionamendua.

1. Lagun Egiteko Animalien Identifikaziorako Nafarroako Erregistroa, LEAINE, erregistro publiko bat da, Nafarroako Gobernuan animalien ongizatearen arloko eskumena duen departamentuaren mendean. Zuzenean edo zeharka kudea daiteke, honako hauek baimendutako edozein bitartekoren bidez: Sektore Publikoaren Araubide Juridikoari buruzko urriaren 1eko 40/2015 Legea eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legea, edo horiek ordezten dituen araudia.

Hirugarren batek kudeatzen badu, hura tratamendu-eragile gisa arituko da, datu pertsonalak babesteari buruz indarrean dagoen araudian xedatutakoaren ondorioetarako.

2. Nafarroan bizi diren zakur, katu eta hudoak LEAINEn inskribatu behar dira.

3. Borondatez inskriba daitezke Nafarroan bizi diren baina identifikatzera behartuta ez dauden lagun egiteko animaliak.

4. Erregistroa datu-base informatiko bat da, erregelamendu honen 1. eranskinean jasotako datuak jasoko dituena.

5. LEAINEk atal bat izanen du arriskutsuak izan daitezkeen animaliak inskribatzeko, eta bertan sartuko da erregistro zentral informatizatua, bete behar baita Arriskutsuak izan daitezkeen animaliak edukitzeko araubide juridikoari buruzko abenduaren 23ko 50/1999 Legearen 6.3 artikuluan edo hura ordezten duen indarreko araudian xedatzen dena. Atal horretan, 1. eranskineko 4. apartatuan jasotako datuak sartuko dira, eta toki erakunde eskudunak LEAINEn sartu beharko ditu.

6. Animalien ongizatearen arloan eskumena duen departamentuak baimentzen ahalko du LEAINE lotzea ezaugarri eta helburu berak dituzten beste datu-base batzuekin, izan beste toki erakundeenak, udalerriz gaindiko erakundeenak edo eskualdeko erakundeenak edo beste autonomia-erkidego edo estatu batzuenak izan, ezertan galarazi gabe datu pertsonalak babesteko araubide juridikoa errespetatu behar dela.

7. Erregistroan honako hauek jasotzen ahalko dira jabe gisa:

a) Adin nagusiko pertsona fisikoak.

b) Honako pertsona juridiko hauek:

b.1) Estatuko segurtasun-indar eta -kidegoak, Foruzaingoa, udaltzaingoa, suhiltzaileak eta babes zibila.

b.2) Animaliak babesteko eta defendatzeko legez eratutako elkarteak eta baimendutako eta erregistratutako harrera-zentro baten titularrak.

b.3) Harrera-zentrorik izan gabe harrera-programa baimendu bat duten erakunde laguntzaileak.

b.4) Baimendutako eta erregistratutako harrera-zentro baten edo baimendutako eta erregistratutako katu-kolonien titularrak diren udalak, udalerriaz gaindiko erakundeak edo eskualdeak.

b.5) Terapiarako edo laguntzarako animaliak prestatzea, trebatzea edo edukitzea helburu duten elkarte eta erakundeak.

b.6) Animalien ongizatearen arloan eskumena duen departamentuaren ebazpen bidez berariaz baimendutako pertsona juridikoak.

8. Erregistroan, pertsona fisikoak bakarrik jasotzen ahalko dira edukitzaile gisa.

9. Kode Zibilaren 94 bis artikuluan xedatutakoaren ondorioetarako, LEAINEn agertuko dira lagun egiteko animalia baten jabearen eta edukitzailearen datuak, baldin eta haren gainean epai judizial irmo batek onartzen badu hitzarmen arauemaile bat edo zaintzari buruzko neurriak. Horretarako, jabeak edo edukitzaileak neurri horiek badirela egiaztatu beharko du, dagokion dokumentu judiziala LEAINEren organo titularrari aurkeztuta.

9. artikulua . LEAINEko sarbidea.

1. Honako hauek dute sarbidea LEAINEn:

a) Animalien erregistroari buruzko datuak sartzeko eta aldatzeko:

a.1) Nafarroako Gobernuan animalien ongizatearen arloan eskumena duen departamentuko langileak.

a.2) Hala badagokio, LEAINE kudeatzen duen erakundeko langileak.

a.3) Animaliak identifikatzeko gaitutako albaitariak.

a.4) Toki erakundeak, erregelamendu honen 14. artikuluan xedatutakoaren arabera, helburua denean LEAINEko datuak aldatzea jabearen helbideari, bizilekuari eta telefonoari/helbide elektronikoari dagokienez, eta datuak sartzea arriskutsuak izan daitezkeen animalien erregistroari dagokionez (erregelamendu honen 8. artikuluaren 5. apartatuan daude jasota).

b) Animaliaren osasun datuak sartzeko (txertaketak, gaixotasunen deklarazioa, nahitaezko tratamenduak eta esterilizazioak):

b.1) Animaliak identifikatzeko gaitutako albaitariak.

b.2) Albaitariak.

c) Erregistroko datuak kontsultatzeko:

c.1) Nafarroako Gobernuan animalien ongizatearen arloan eskumena duen departamentuko langileak.

c.2) Nafarroako Osasun Publikoaren eta Lan Osasunaren Institutuaren langileak.

c.3) Nafarroako udalak, udalaz gaindiko erakundeak eta eskualdeak.

c.4) Segurtasun-indar eta -kidegoak.

c.5) Animaliak identifikatzeko gaitutako albaitariak.

c.6) Albaitariak.

c.7) Abandonatutako animaliak hartzeko baimendutako zentroetako arduradunak.

c.8) Erakunde laguntzaileak.

c.9) Animalien jabeak, 3. apartatuan ezarritakoaren arabera.

c.10) Administrazio publikoak, agintaritza eskudunak eta erregistroan dauden datuak ezagutzeko interes legitimoa dutela egiaztatzen duten pertsona fisiko edo juridikoak.

2. LEAINEko sarbidea egin nahi bada datuak sartzeko eta egiaztatzeko, erregistroaren titularrak edo hura kudeatzen duenak baimendu beharko du aldez aurretik, eta horretarako, identifikazio-bitartekoak eta sinadura elektroniko kualifikatu eta aurreratua beharko dira.

3. LEAINEn erregistratutako animalia baten jabeak grabatutako datuak egiaztatzen ahalko ditu animaliaren mikrotxip-zenbakia eta NANa sartuta, edo identifikazio elektronikoko sistemaren bidez sartzen ahalko da. Erregistratutako datuak zuzenak ez badira, gaitutako albaitariarengana jo beharko du, akats hori zuzentzeko.

4. LEAINEn jasotako datuen sarbideak eta tratamenduak jarraituko diote, beti, Europar Batasuneko erregelamenduetan datuen babesari buruz jasotakoari eta Datu Pertsonalak Babesteko 3/2018 Lege Organikoan eta hura garatzeko araudian edo indarrean dagoen araudian xedatutakoari.

10. artikulua . LEAINEn inskribatzeko prozedura.

1. Gaitutako albaitariak animaliaren datuak inskribatuko ditu LEAINEn, mikrotxipa jarri ondoren. Inola ere ez da gaindituko bost egun balioduneko epea, jartzen denetik zenbatzen hasita.

2. Gaitutako albaitariak jabearen izenean beteko du inskripzio-orria, organo titularraren eta, hala badagokio, LEAINEren kudeatzailearen webgunean eskuragarri egonen den eskaera-ereduaren bidez, eta horren kopia bat emanen dio inskripzioa eskatzen duen pertsonari.

3. Gaitutako albaitariaren ardura da inskripzioa egiteko behar den dokumentazio guztia biltzea. Inskripzioarekin batera doazen dokumentuak digitalizatu eta LEAINEren organo kudeatzaileari bidali beharko dizkio 10 egun balioduneko epean gehienez, animaliaren datuak LEAINEn inskribatu eta hurrengo egunetik aurrera, 1. apartatuan aipatzen den moduan.

4. Jabeari egotz dakiokeen arrazoiren batengatik identifikazio-dokumentu edo -daturen bat sartzen ez bada, lagun egiteko animalia identifikatu gabekotzat joko da. Gaitutako albaitariari egotz dakiokeen arrazoiren batengatik datuak sartu ezean, identifikaziorako emandako gaikuntza errebokatzen ahalko da.

11. artikulua . LEAINEko datuak aldatzea eta eguneratzea.

1. Animalia baten jabeak albaitari gaitu bati eskatu beharko dio LEAINEn erregistratutako datu bat aldatzea, gertaera eragilea izan eta gehienez ere bost egun balioduneko epean. Honako hauek hartzen dira aldaketatzat: jabea eta/edo edukitzailea aldatzea, bizilekua aldatzea, heriotzagatik gertatutako baja, animalia galtzea, arraza aldatzea, arriskutsua izan daitekeen animaliatzat katalogatzea, eta jabearen helbidearen, posta elektronikoaren edo telefonoaren datuak eguneratzea.

2. Gaitutako albaitariak ahalik eta lasterren grabatuko du aldaketa hori LEAINEn, eta horretarako ezin izanen da bost egun balioduneko epea gainditu eskaera egiten denetik.

3. Eskatutako aldaketak dagokion frogagiria izan beharko du, telefono/posta elektronikoari buruzkoa izan ezik. 1. apartatuan aurreikusitakoa gorabehera, jabearen helbidearen, telefonoaren edo posta elektronikoaren aldaketak, bai eta animaliaren bizilekuarenak ere, gaitutako albaitarien bitartez egiten ahalko dira, edo zuzenean erregistroaren organo kudeatzailean edo bizileku berriko toki erakundean.

4. Jabeak animalia bat galdu dela jakinarazi eta justifikatu behar du, eta agintari eskudun baten aurrean eginiko salaketa aurkeztu, galdu eta 72 orduko epean.

5. Gaitutako albaitariak LEAINEri jakinarazi behar dizkio etxeko animaliei aplikatzen zaizkien txertoei, gaixotasunen deklarazioei, nahitaezko tratamenduei eta esterilizazioei buruzko datuak, hamabost egun balioduneko epean, egintza klinikoa edo gaixotasunaren diagnostikoa egiten denetik aurrera.

12. artikulua . Animalia baten jabea aldatzea.

1. Animalia baten jabea aldatzen denean, kostu bidez edo doan, gaitutako albaitariari eskatuko diote interesdunek aldaketa sartzeko; horretarako, LEAINEren organo kudeatzailearen webgunean eskuragarri egonen den eskaera-eredua erabiliko da, eta erregelamendu honen 10.2 eta 10.3 artikuluetan ezarritako prozedura beteko. Eskaerarekin batera, eskualdaketa egiaztatzen duen agiria aurkeztu beharko da, bai eta eskualdatzailearen eta eskuratzailearen identifikazio-agiriak ere.

2. Pertsona juridikoen kasuan, jabearen betebeharra izanen da LEAINEn animaliaren edukitzaile gisa agertzen den pertsonaren aldaketa jakinaraztea. Aldaketa hori aurreko apartatuan ezarritako moduan egin beharko da, eta edukitzaile berriaren identifikazio-datuak aurkeztu beharko dira.

3. Jabea edo edukitzailea aldatzeko jakinarazpenak egiten ez diren bitartean eta aldaketa inskribatzen ez den bitartean, animaliaren gaineko erantzukizuna, 19/2019 Foru Legean xedatutakoaren ondorioetarako, LEAINEn jabe gisa ageri den pertsonarena izanen da.

4. Gaitutako albaitariak jabearen aldaketa erregistratuko du, zuzenean eta bitarteko elektronikoen bidez, LEAINEn. Aldaketa hori animalia identifikatzeko pasaportean idatziko du, edo beste pasaporte bat eginen du, edo, hala badagokio, animalia identifikatzeko agiria, jabe berriaren alde, eta jasota utziko du pasaportea edo aurreko identifikazio-agiria deuseztatu dela.

13. artikulua . Banakako identifikaziokodeak.

1. Animalien ongizatearen arloan eskumena duen departamentuak edo, hala badagokio, LEAINEren organo kudeatzaileak banakako identifikazio-kodeak kontrolatu eta erregistratuko ditu, eta eskatzen dituen gaitutako albaitariari esleituko dizkio.

2. Banakako identifikazio-kodeak LEAINEn sartuko dira, kontrola egiteko, eta jasota geldituko da zein esleitu zaizkion animaliak identifikatzeko gaitutako albaitari bakoitzari.

3. Banakako identifikazio-kodea baliozkotuta geldituko da LEAINEk gaitutako albaitari bati esleitzen dionean, 19/2019 Foru Legearen 8.2 artikuluan araututakoaren arabera.

14. artikulua . Udal erroldak.

1. Udalek lagun egiteko animalien errolda bat izanen dute udalerrian erroldatutako animalien kontrol- eta zaintza-eskumenak gauzatzeko, 19/2019 Foru Legearen 22.1 artikuluan araututakoarekin bat. Erroldako datuak lortzeko, udal erakundeak LEAINEra jo beharko du.

2. Erregelamendu honen 8.4 artikuluan jasotako nahitaezko identifikazio-datuez gain, udal ordenantzek ezartzen dituzten eta 19/2019 Foru Legearen arabera nahitaezkoak ez diren beste identifikazio-elementu batzuk ere izan ditzake LEAINEk.

3. Udal erakundeek, LEAINEn nahitaezkoak ez diren identifikazio-datu berriak sartzea errazteko, bermatu beharko dute LEAINErekin bateragarriak eta elkarreragingarriak diren sistema informatikoak erabiltzen direla.

4. Udal erakundeek behar diren jarduerak eginen dituzte datu berriak sartzeko edo daudenak aldatzeko, beharrezkoa ez denean gaitutako albaitarien esku hartzea, 11.3 artikuluan ezarritakoaren arabera, LEAINEren nahitaezko identifikazio-datuak etengabe eguneratuta egoteko.

III. KAPITULUA. GAITUTAKO ALBAITARIAK

15. artikulua . Gaitutako albaitariak.

1. Nafarroako Gobernuan animalien ongizatearen arloko eskumena duen departamentuak gaitutako albaitariei dagokie lagun egiteko animaliak identifikatzea, LEAINEn inskribatzea eta, hala badagokio, animalia identifikatzeko pasaportea edo animalia identifikatzeko agiria ematea.

2. Albaitariak iraupen mugagabearekin gaituko dira, animalien ongizatearen arloan eskumenak dituen departamentuko zuzendari nagusiaren ebazpenaren bidez. Gaikuntza errebokatzen ahalko da interesdunak eskatuta edo ofizioz, interesdunari entzunaldia eman ondoren, baldin eta egiaztatzen bada gaitutako albaitariak ez dituela betetzen erregelamendu honetan aurreikusitako xedapenak, animalien ongizatearen edo osasunaren arloan aplikatzekoak diren gainerako arauetan xedatutakoa betetzen ez badu edo Albaitarien Elkargo Ofizialak desgaitzen badu.

3. Albaitariak baldintza hauek bete beharko ditu gaitua izateko:

a) Jarduneko albaitaria izatea, inskribatuta dagoena Espainiako albaitarien elkargo ofizial batean edo Europar Batasuneko edozein estatu kidetako albaitarien elkargo ofizial batean.

b) Irakurgailu homologatu bat izatea, betetzen dituena ISO 11.785 arauaren edo une bakoitzean indarrean dagoen arauaren arabera ezarritako baldintzak.

c) Mikrotxipa ezartzeko eta datuak LEAINEn erregistratzeko baliabide tekniko egokiak eta nahikoak izatea.

d) Ez egotea bateraezintasun-arrazoirik gaikuntzaren xedeko zereginak betetzeko.

e) Lanbidean jarduteko desgaitua ez izatea.

f) Sinadura elektroniko aitortua izatea.

g) Dokumentuak digitalizatzeko behar den ekipamendua izatea.

16. artikulua . Gaitzeko baldintzak eta prozedura.

1. Erregelamendu honen ondorioetarako gaikuntza eskuratu nahi duten albaitariek eskaera eginen diote Nafarroako Gobernuan animalien ongizatearen arloko eskumena duen departamentuari, animalien ongizatearen arloko eskumena duen organoaren webgunean eskuragarri egonen den eskaera-ereduaren bidez, eta honako dokumentazio hau erantsita:

a) Elkargotze-ziurtagiria, zer albaitarien elkargori dagoen atxikita, horrek emana; elkargoko egoera jasoko da, baita lanbidean jarduteko desgaikuntzarik ez dagoela ere.

b) Erantzukizunpeko adierazpena, honako hau jasotzen duena:

b.1) Aurreko artikuluaren 3. apartatuan jasotako baliabide teknikoak eta materialak dituela.

b.2) Ez dagoela bateraezintasun-arrazoirik gaikuntza eskatzen den jarduerak egiteko.

b.3) Sinadura edo zigilu elektronikoko sistema bat duela, oinarri dituena sinadurako edo zigilu elektronikoko ziurtagiri elektroniko aitortuen edo kualifikatuen sistemak (ziurtagiri horiek ziurtapen-emaileen zerrendan sartutako sinadura edo zigilu elektronikoko ziurtapen-zerbitzuen emaileek emanak izanen dira).

2. Nafarroako Gobernuan animalien ongizatearen arloan eskumena duen departamentuak gehienez ere hilabeteko epean ebatziko du eskaera hori, baimena emanez edo ukatuz, eta epe horretan bertan jakinarazi beharko da ebazpena. Era berean, jakinarazpena eginen zaio LEAINEren organo kudeatzaileari, hala badagokio. Epe horretan ebazpenik eman eta jakinarazi ez bada, interesdunak eskaera administrazio-isiltasunez baietsitzat jotzen ahalko du.

3. Gaikuntza-eskaeraren berariazko ebazpen horrek ez du administrazio bidea amaitzen, eta haren aurka, gora jotzeko errekurtsoa aurkez daiteke kontseilari eskudunari zuzenduta, hilabeteko epean, ebazpena jakinarazi eta hurrengo egunetik aurrera, ezertan galarazi gabe legez egoki den beste edozein errekurtso. Ebazpena berariazkoa ez bada, epea hiru hilabetekoa izanen da, administrazio-isiltasunaren ondorioak hasi eta hurrengo egunetik aurrera.

II. TITULUA. LAGUN EGITEKO ANIMALIEN OSASUN KONTROLAK

I. KAPITULUA. NAHITAEZKO TRATAMENDUAK ETA NAHITAEZ AITORTU BEHARREKO GAIXOTASUNAK

17. artikulua . Amorruaren aurkako txertoa.

1. Nahitaezkoa da zakur, katu eta hudoei amorruaren aurkako txertoa jartzea urtero. Betebeharra jabeari edo edukitzaileari dagokio.

2. Lagun egiteko beste animalia-espezie batzuen txertaketa borondatezkoa izanen da, nahiz eta osasun arloko arrazoiengatik ezarri ahal izan derrigorrezkoa izanen dela.

3. Animaliei txertoa jarriko zaie, baldin eta aldez aurretik identifikatuta badaude, erregelamendu honen 3.7 artikuluan ezarritakoarekin bat.

4. Txertoak Sendagaien eta Osasun Produktuen Espainiako Agentziaren baimen ofiziala izan behar du, eta gutxienez urtebeteko immunitatea eman txertaketa egiten den egunetik aurrera.

5. Lehen txertaketa egiteko (txertoaren lehen dosia eta gehienez ere hilabeteko epean bigarren dosia), animaliak gutxienez 12 aste izan behar ditu, eta gehienez 28 aste.

6. Txertoak urtero jarriko dira. Azken txertaketatik bi urte baino gehiago igarotzen badira, ez da birtxertaketatzat hartuko, eta, beraz, lehen txertaketa egin beharko da.

7. Albaitari batek baino ezin du txertoa jarri.

8. Albaitariak, animaliari txertoa jarri aurretik, egiaztatu beharko du identifikatuta dagoela, erregelamendu honen 3.7 artikuluko definizioaren arabera, eta erabakiko du txertoa hartzeko baldintza egokiak betetzen dituen, azterketa kliniko baten bidez. Betetzen ez baditu edo animalia erasotzailea bada, ziurtagiri bat eginen du, animaliaren pasaporteari edo osasun-dokumentuari lotua. Ziurtagiri horretan jasoko da zer arrazoi kliniko dagoen txertoaren tratamendutik salbuesteko eta zenbat iraunen duen salbuespenak.

9. Albaitariak honako hauek jaso beharko ditu animalia identifikatzeko pasaportean edo, hala badagokio, animalia identifikatzeko agirian:

a) Txerto mota, noiz jarri den, izen komertziala eta lotea, txertoaren dosi bakoitzak duen etiketa itsasgarriaren bidez.

b) Hurrengo txertaketara arteko indarraldia; epe hori ezin izanen da 12 hilabetetik gorakoa izan, txertoa jartzen den egunetik aurrera.

c) Amorruaren aurkako txertaketaren zigilua, albaitarien elkargoarena.

d) Sinadura eta zigilu profesionala, baita datu hauek ere: izena, helbidea, telefono-zenbakia eta elkargokidearen zenbakia.

10. Albaitariak animaliaren txertaketa grabatuko du LEAINEren datu-basean, txertoa eman eta gehienez ere bost egun balioduneko epean, eta honako hauek adieraziko: txertoa eman den eguna, izen komertziala eta lotea.

18. artikulua . Animaliaespeziearen arabera nahitaezkoak diren tratamenduak eta txertaketak.

1. Zakurren, katuen eta hudoen jabeak edo edukitzaileak, aurreko artikuluko 1. puntuan ezarritakoaz gain, nahitaezkoa izanen du zakurren, katuen eta hudoen barneko eta kanpoko parasitoak kentzea eta txertaketa egitea, unean uneko egoera epidemiologikoa dela eta, kontuan hartuta Nafarroako Albaitarien Elkargoaren gomendio tekniko sanitarioak, animalien ongizatearen eta osasunaren arloan eskumena duen departamentuko titularraren foru agindu bidez zehazten diren gaixotasunen aurka. Foru agindu horretan ezarriko dira, halaber, txertoak jartzeko eta/edo parasitoen aurkako tratamenduak aplikatzeko jarraibideak, maiztasuna eta animalien adina.

2. Albaitari batek baino ezin du txertoa jarri eta parasitoen aurkako tratamenduak agindu. Jarduera horiek jasota geldituko dira animalia identifikatzeko dokumentazioan eta LEAINEn.

19. artikulua . Nahitaez aitortu beharreko gaixotasunen jakinarazpena.

1. Albaitariek nahitaez aitortu beharreko gaixotasun baten susmo edo diagnostiko oro jakinarazi beharko dute, 19/2019 Foru Legearen 10.4 artikuluan araututakoari jarraikiz.

2. Animalien ongizatean eta osasunean eskumena duen departamentuari eginen zaio jakinarazpena, eta bertan honako hauek zehaztuko dira: animaliaren jaioteguna, sexua, izena, identifikazio-zenbakia eta arraza, bai eta jabearen eta/edo edukitzailearen izena, NANa, helbidea eta telefonoa ere. Jakinarazpena Nafarroako Albaitarien Elkargoari ere bidaliko zaio.

3. Agintaritza eskudunak behar diren jarduketak erabakiko ditu, 19/2019 Foru Legearen 10.1 artikuluan xedatutakoarekin bat.

4. Une bakoitzean dagoen egoera epidemiologikoa kontuan izanik zehaztuko dira nahitaez deklaratu beharreko gaixotasunak, animalien ongizatearen eta osasunaren arloan eskumena duen departamentuaren titularraren foru aginduaren bidez, barne daudela Nafarroako Foru Komunitatearentzat garrantzitsuak direnak bere ezaugarri geografiko bereziengatik, bai eta jasota daudenak ere araudi nazionalean, Europako araudian eta Animalien Osasunaren Mundu Erakundearen zerrendetan.

5. Animalien ongizatean eta osasunean eskumena duen departamentuak nahitaez aitortu beharreko gaixotasun baten edozein susmo edo diagnostiko jakinaraziko dio osasun publikoaren arloko departamentu eskudunari, osasun publikoa babesteko jarduketak egin ditzan lagun egiteko animaliekin kontaktuan egoteagatik pertsonei eragiten dieten gaixotasun kutsakorren aurrean, 19/2019 Foru Legearen 22.2 artikuluan araututakoarekin bat.

II. KAPITULUA. NAHITAEZKO OSASUN AZTERKETA ETA KONTROLA

20. artikulua . Osasun azterketa eta kontrola.

1. Zakurren, katuen eta hudoen albaitaritza-azterketa egin behar da urtero, animaliaren osasuna kontrolatzeko. Kontrol hori animaliari txertoa jartzean egiten ahalko da, eta albaitariaren txosten baten bidez egiaztatu beharko da. Animaliaren pasaportean edo identifikazio-agirian jaso beharko da, eta albaitari jarduleak azterketaren data adierazi beharko du, eta haren sinadura eta elkargoaren zigilua paratu.

2. Albaitariaren azterketa nahitaezkoa da animalia bat saldu edo adoptatu aurreko 48 orduen barnean, eta albaitariaren txosten baten bidez egiaztatu beharko da, 19/2019 Foru Legearen 14. eta 16. artikuluetan ezarritakoari jarraikiz.

3. Albaitariek ez diote inolako tratamendurik edo txertorik aplikatu behar, ez eta osasun kontrolik egin ere, erregelamendu honetan ezarritakoaren arabera behar bezala identifikatuta ez dagoen animalia bati, salbu eta tartean baldin badaude osasun arrazoiak edo animaliaren ongizatekoak, albaitari jarduleak behar bezala justifikatuta eta ziurtatuta. Kasu horretan, haren edukitzaileari jakinaraziko dio hura identifikatzeko betebeharra duela.

4. Albaitariak eman eta beteko duen dokumentu edo kartilla batean jasoko dira zakurrei, katuei eta hudoei amorruaz edo nahitaezko desparasitazioaz gain jarri behar zaizkien nahitaezko txertoak, baldin eta adina dela-eta oraindik pasaportea edo animalien identifikazio-agiria eman ez bazaie.

21. artikulua . Beste neurri batzuk.

1. Debekatuta dago animalien kontzentrazioak egitea, txertoak jartzeko eta/edo identifikatzeko. Salbuespen gisa, Nafarroako Gobernuko departamentu eskudunak baimentzen ahalko ditu, eremu geografiko mugatu batean albaitaritza zerbitzurik ez izateagatik.

2. Pertsonei edo beste animalia batzuei lesioak eragin dizkieten animaliak, baldin eta lesio horiek amorrua transmititu badezakete edo animalia horrek amorrua izan dezakeela susmatzeko arrazoiak badaude, behaketan jarriko dira 19/2019 Foru Legearen 11. artikuluan ezarritakoaren arabera.

III. TITULUA. LAGUN EGITEKO ANIMALIEN ZENTROAK

I. KAPITULUA. XEDAPEN OROKORRAK

22. artikulua . Aplikazioeremua.

1. Titulu honetan araututakoa aplikatu behar zaie Nafarroan dauden lagun egiteko animalien zentroei, baldin eta lagun egiteko animalia-espezie hauek hartzen edo izaten badituzte:

a) Zakurrak, katuak, hudoak.

b) Karraskariak eta untxiak, elikagaiak produzitzeko ez badira.

c) Ornogabeak -erleak, erlastarrak, moluskuak eta krustazeoak izan ezik-.

d) Animalia urtar apaingarriak.

e) Anfibioak.

f) Narrastiak.

g) Hegazti hauek ez direnak: oiloak, indioilarrak, pintadak, ahateak, antzarak, galeperrak, usoak, faisaiak, eperrak eta estruzioniformeak (Ratitae), edo produkziorako beste edozein.

2. Titulu honetan araututakoa ez zaie aplikatuko honako hauei:

a) Gune zoologikoak, baldin eta artikulu honen 1. apartatuan jasota ez dauden lagun egiteko animaliak hartzen badituzte (gune zoologiko horiek araututa daude Landa Garapeneko, Ingurumeneko eta Toki Administrazioko kontseilariaren apirilaren 12ko 104/2013 Foru Aginduan, zeinaren bidez arautzen baitira Nafarroako gune zoologikoen baimena, sailkapena, erregistroa eta kontrol zoosanitarioa).

b) Produkziorako animalien abeltzaintzako ustiategiak.

c) Esperimentaziorako eta beste helburu zientifiko batzuetarako (irakaskuntza barne) animaliak dituzten establezimenduak.

d) Artikulu honen 1. paragrafoan zehaztutako lagun egiteko animaliak dituzten instalazioak edo etxeak, baldin eta animalia horiek jabe bakar batenak badira, merkataritza- edo irabazi-asmorik gabe edukitzen badira, eta ez badira lagun egiteko animalien bilduma partikulartzat edo harrera-etxetzat hartzen.

e) Katu-koloniak finkatzen diren tokiak.

f) Albaitaritza klinikak, ospitaleak eta zentroak, eta animalien higiene-zainketetarako zentroak.

23. artikulua . Lagun egiteko animalien zentroen sailkapena.

Lagun egiteko animalien zentroak honela sailkatzen dira, helburua zein den:

1. Lagun egiteko animaliak mantentzeko zentroak.

Lagun egiteko animaliak aldi baterako edo modu iraunkorrean ostatatzen eta mantentzen dituzten establezimenduak, zenbait jarduera edo zerbitzu egiteko, non debekatuta baitago animaliak haztea eta/edo saltzea merkataritza-jarduera gisa.

Honela sailkatzen dira:

a) Egoitzak eta zaindegiak.

Lagun egiteko animaliak hartzen, mantentzen eta zaintzen dituzten establezimenduak, denboraldi jakin baterako eta jabeen edo edukitzaileen kontura eta kargura.

b) Trebakuntza-zentroak.

Animaliak hartu eta mantentzen dituzten establezimenduak, gaua instalazioetan eman zein ez, animaliak trebatzeko.

c) Kirol jardueretarako edo zerbitzuak emateko animaliak dituzten zentroak.

Araudi honen 2. eranskineko mugetan aurreikusitakoa baino animalia gehiago dituzten edo mantentzen dituzten establezimenduak, kirol jardueretarako, ehizarako, zaintzarako, defentsako eta abereak maneiatzeko, edo kopuru txikiagoak dituztenak, hirugarrenei zerbitzuak ematen dizkietenean.

Barnean sartzen dira, halaber, esku hartzeko eta pertsonekin terapia egiteko zakurrak dituzten establezimenduak.

d) Animalien harrera-zentroa.

Irabazi-asmorik gabeko establezimenduak, titulartasun edo kudeaketa publiko edo pribatukoak, helburu dutenak abandonatutako, galdutako, konfiskatutako edo lagatako animaliak hartzea.

Honela sailkatzen dira:

d.1) Aldi baterakoak. Animaliak aldi baterako hartzea helburu duten establezimenduak, titularrei itzultzeko edo adopzioan emateko. Egonaldi laburrekoak edo luzekoak izan daitezke.

d.2) Iraunkorrak. Animaliak modu iraunkorrean hartzea eta bizitza osoan mantentzea helburu duten establezimenduak.

2. Lagun egiteko animaliak hazteko zentroa.

Titulartasun pribatuko establezimendua, 22. artikuluko 1. apartatuan aipatutako lagun egiteko animaliak mantentzen dituena haiek ugaltzeko eta kumeak saldu edo lagatzeko.

Zakurrak edo katuak hazten dituzten establezimenduak honela sailkatzen dira: noizbehinkako hazkuntza-zentroak edo zentro amateurrak eta hazkuntza profesionalerako zentroak, kontuan izanik erregelamendu honen 41.5 artikuluan ezarritako urteko kumaldia eta animalia kopurua.

3. Lagun egiteko animaliak saltzeko zentroa.

Titulartasun pribatuko establezimendua, zeinaren helburua baita lagun egiteko animaliak saltzea, 22. artikuluko 1. paragrafoan jasotakoen artetik. Jendearentzat irekita egon daiteke edo ez, eta salmentak egin daitezke establezimendu fisiko batean edo Internet bidez.

4. Lagun egiteko animalien bilduma partikularra.

22. artikuluko 1. paragrafoan zehaztutako lagun egiteko animaliak dituen lekua edo etxea, baldin eta jabe bakar batenak badira, eta horrek merkataritza-xederik eta irabazi-asmorik gabe eta jendaurrean erakutsi gabe baditu; lagun egiteko animalien zentro gisa baimendu eta erregistratu behar da, arrazoi hauengatik:

a) Animalia-kopuruak erregelamendu honen 2. eranskinean aurreikusitako mugak gainditzeagatik, edo

b) Aurreko paragrafoan aurreikusitako animalia-kopurua gainditu gabe ere, agintaritza eskudunak uste izateagatik arriskutsua izan daitekeela animalien osasunerako, animalien ongizaterako, osasun publikorako, segurtasun publikorako edo ingurumenerako.

II. KAPITULUA. ZENTROAK BAIMENTZEA ETA ERREGISTRATZEA

24. artikulua . Baimena eta erregistroa.

Aurreko artikuluan araututako lagun egiteko animalien zentroek aldez aurretik baimenduta eta erregistratuta egon behar dute beren jarduera hasteko eta garatzeko, erregelamendu honetan eta indarrean dagoen gainerako araudian ezarritakoari jarraikiz.

25. artikulua . Lagun egiteko animalien zentroen Nafarroako erregistroa.

1. Lagun egiteko animalien Nafarroako zentroak Nafarroako Gune Zoologikoen Erregistroan inskribatuko dira. Erregistro hori Abeltzaintza Ustiategien Erregistro Orokorrean (REGA) integratuta dago, zeina araututa baitago Abeltzaintza Ustiategien Erregistro Orokorra ezarri eta arautzen duen martxoaren 26ko 479/2004 Errege Dekretuaren 3. artikuluan.

2. Nafarroako Gobernuan animalien ongizatearen gaineko eskumenak dituen departamentuari esleitzen zaio kudeaketa.

3. Erregistroak erregelamendu honen 3. eranskinean jasotako gutxieneko datuak jasoko ditu.

26. artikulua . Baimentzeko eta erregistratzeko prozedura.

1. Lagun egiteko animalien zentroaren titularrak baimena eta inskripzioa eskatu beharko dizkio erregistroaren arduradunari jarduera hasi aurretik. Horretarako, eskaera bat aurkeztuko dio animalien ongizatearen arloan eskumena duen departamentuari, honako agiri hauekin batera:

a) Jarduera-lizentzia, ingurumen-baimena edo udalean aurkeztutako erantzukizunpeko adierazpena, kasua zein den aplikatzekoa den araudiaren arabera. Bertan zehaztuko da zer jarduera garatu behar d(ir)en, zer animalia mota har daitekeen eta zer edukiera dagoen animalia mota bakoitzerako, kontuan hartuta erregelamendu honetan zentro eta animalia mota bakoitzerako jasotako baldintzak.

b) Planoa edo krokisa, poligonoa, lurzatia eta koordenatu geografikoak dituena, eraikuntzen, instalazioen, gelen eta sarbideen kokapenari eta banaketari buruzkoa. Eremuak bereiziko dira, jarduera bat baino gehiago daudenean (harrera-eremuak, isolamendu-eremuak edo berrogeialdikoak, kasua zein den).

c) Memoria bat, eskatzaileak eta zentroko albaitari arduradunak sinatua, honako hauek zerrendatu eta deskribatuko dituena:

c.1) Zentro mota, erregelamendu honen 23. artikuluko sailkapenaren arabera, eta zer animalia-espezie aurreikusten duen ostatatzea, haztea eta/edo merkaturatzea.

c.2) Instalazioak, esparruak, materialak, tresnak eta langileak, eskura daudenak baldintza egokiak mantentzeko higiene, osasun eta animalien ongizatearen aldetik, kutsatzeak saihesteko eta berrogeialdia egiteko.

c.3) Erregelamendu honen 23. artikuluan ezarritako zentro motaren arabera jarduera bat baino gehiago garatu nahi badira, frogatzea instalazioak bereizita daudela, oztopo fisikoek isolatuta eta jardueren bateragarritasuna bermatzen duten sarbide independenteak dituela.

c.4) Establezimenduak animalia mota bakoitzerako eduki dezakeen gehieneko edukiera. Kontuan hartuko dira instalazioen neurriak eta animalien ezaugarri fisiologiko eta etologikoak, haien osasuna eta ongizatea bermatzeko.

c.5) Animaliei emanen zaizkien zainketak, elikadura, eta instalazioen eta esparruen garbiketa-, higiene- eta desinfekzio-protokoloak. Animalien higiene-, osasun- eta ongizate-programa ere jasoko da, bai eta albaitaritza-tratamenduak ere, hauek adierazita: immunizazioak eta desparasitazioak, erabili beharreko produktuak eta aurreikusitako osasun jarduketak.

c.6) Hazkuntza-zentroek honako hauek zehaztuko dituzte: hazkuntza-plana, ugaltzaileen hautaketa, amen eta kumeen zaintza bereziak eta gaixotasun hereditarioak prebenitzeko programa.

c.7) Sortzen diren hondakin eta azpiproduktuen kudeaketa, bereziki gorpuak ezabatzekoa.

c.8) Zentroko animaliekin lan egiten duten pertsonek eskura izanen dituzten laneko prozedura dokumentatuak.

c.9) Zentroan arriskutsuak izan daitezkeen animaliak badaude, egiaztatu beharko da badaudela azpiegitura, instalazioak, kudeaketa-prozedura eta bitarteko egokiak, horren barnean daudela animalia horiek maneiatzen behar bezala prestatutako langileak, bermatzeko animaliek ez dutela alde edo ihes eginen, edo ez zaiela kalterik eginen ez pertsonei ez animaliei.

c.10) Zentroan lan egiten duten pertsonek egindako prestakuntza-ikastaroen zerrenda, erregelamendu honen 31. artikuluan ezarritakoaren arabera.

2. Erregistroaren ardura duen agintaritza eskudunari dagokio:

a) Eskatutako baldintzak betetzen direla egiaztatzea, zer zentro motak eskatzen duen baimena, kontuan izanik aurkeztutako dokumentazioa eta establezimenduko instalazioen ikuskapena.

b) Zentroak baimentzea eta erregistroan inskribatzea, Nafarroako Gobernuan animalien ongizatearen arloko eskumena duen departamentuko zuzendaritza nagusiaren ebazpen baten bidez, aurreko puntuko kontrolaren aldeko txostena egin ondoren.

c) Zentroari erregistro-zenbaki edo identifikazio-kode bakarra ematea, modu bakarrean identifikatuko dela bermatzeko, indarrean dagoen araudiak ezartzen duenari jarraikiz.

d) Zentroa Gune Zoologikoen Erregistroan inskribatzea, kontuan hartuta zentro-mota eta hartu, hazi eta/edo merkaturatu nahi dituen animalia-espezieak, erregelamendu honetan araututakoari jarraikiz. Zentro bakoitzak sailkapen bakarra izanen du, erregistro-zenbaki batekin; hala ere, baimenduta dauden jarduera guztiak jasoko dira erregistroan.

3. Zentroaren titularrak hamar egun balioduneko epea du aurkeztutako eskaera eta/edo dokumentazioa zuzentzeko, organo eskudunak horretarako errekerimendua egin eta hurrengo egunetik zenbatzen hasita. Epe hori igaro eta zuzenketarik egin ez bada, ulertuko da eskatzaileak eskaeran atzera egin duela.

27. artikulua . Baja, etenaldia eta errebokazioa.

1. Erregistroaren ardura duen agintaritza eskuduna, interesdunari entzunaldia eman ondoren, ofizioz hasten ahalko da lagun egiteko animalien zentroen erregistrotik baja ematen zentro mota bakoitzaren baldintzak betetzen ez dituzten zentroei, erregelamendu honetan xedatutakoaren arabera.

2. Erregistroaren ardura duen agintaritza eskudunak, ofizioz, lagun egiteko animalien zentro bat ez-aktibotzat jotzen ahalko du, detektatzen badu hamabi hilabetez baino gehiagoz jarduerarik egon ez dela. Era berean, lagun egiteko animalien zentroari baja emanen zaio, baldin eta, zentroa ez-aktibotzat jo zenetik bi urte igaro ondoren, jarduera berriz hasi ez bada edo jarduerarik ezaren egoeraren luzapena eskatu ez bada, behar bezala arrazoituta, ezinbesteko arrazoiengatik.

3. Animalien ongizatearen arloan eskumena duen departamentuak jakinarazpena eginen die udalei inskripzioa ezabatzen denean lagun egiteko animalien zentroaren jardueran baja emateagatik.

4. Jarduera-lizentzia edo dagokion ingurumen-baimena iraungitzeagatik jarduera gelditzen denean, erregistroan baja emanen zaio ofizioz. Lagun egiteko animalien zentroen lizentziak iraungitzea edo baliogabetzea erabakitzen duten udalek animalien ongizatearen arloan eskumena duen departamentuari jakinaraziko diote, lehen adierazitako ondorioetarako.

5. Agintaritza eskudunak baja emateko tramiteak eginen dizkie erregistroan lagun egiteko animalien zentroei, hala eskatzen badute jarduera gelditzeagatik. Era berean, bidezkoa izanen da erregistroan baja ematea edo inskripzioa etetea hala zehazten duenean agintaritza eskudunaren ebazpen batek zehapen-espediente bat tramitatu ondoren edo hura tramitatzeko kautelazko neurri gisa.

6. Erregistroan baja emandako zentroak, berriz ere alta ematea eskatzen badute, zentro berritzat hartuko dira, eta ezarritako baimen-prozesua bete beharko dute, animalien babes, osasun eta ongizatearen arloan indarrean dagoen araudia betez.

III. KAPITULUA. ZENTROEN FUNTZIONAMENDU-BALDINTZA OROKORRAK

28. artikulua . Zentroen titularren betebeharrak.

Lagun egiteko animalien zentroen titularrek betebehar hauek izanen dituzte:

1. Lagun egiteko animalia baten edukitzaileari edo jabeari dagozkion betebeharrak eta debekuak konplitzea, 19/2019 Foru Legearen 6. eta 7. artikuluetan ezarritakoarekin bat.

2. Jarduera hasi aurretik, zentroa baimentzeko eta Gune Zoologikoen Erregistroan inskribatzeko eskatzea.

3. Baimendutako jarduerak soilik egitea, animalia-espezieekin bakarrik eta haien kopurua gainditu gabe.

4. Erregistroko datuak eguneratuta edukitzea, baimena ematea ekarri zuten baldintzen aldaketak jakinaraziz, erregelamendu honen 26. artikuluan ezarritakoarekin bat.

5. Honako hauek jakinaraztea Nafarroako Gobernuan animalien ongizatean eskumena duen departamentuari:

a) Jardueraren edozein aldaketa, horrek ekartzen duenean hura zabaltzea, lekuz aldatzea, titulartasuna aldatzea, jarduera gelditzea edo animalien baldintza higieniko-sanitarioak edo ongizate baldintzak aldatzea.

b) Zentroaren ardura duen albaitaritza-zerbitzua aldatzea.

c) Zentroan espezie berriak sartzea, dagokion baimena lortzeko.

d) Urte bakoitzeko urtarrilaren 1ean zentroan dauden animalien errolda.

6. Kudeaketa-prozedurak eta -programak garatzeaz arduratuko den albaitaritza-zerbitzu baten laguntza izatea, erregelamendu honen 29. artikuluan ezarritakoarekin bat.

7. Erregistroak edukitzea animalien trazabilitatea eta egiten dituzten jardueren kontrola bermatzeko, erregelamendu honen 30. artikuluan ezarritakoarekin bat.

8. Prestatutako eta kualifikatutako langileak izatea, erregelamendu honen 31. artikuluan ezarritakoarekin bat.

9. Baldintzak betetzea kokapenari, baldintza higieniko-sanitarioei, biosegurtasunari, eta instalazioak eta animaliak maneiatzeari dagokienez, erregelamendu honen 32., 33. eta 34. artikuluetan araututakoarekin bat, bai eta titulu honen IV. kapituluan zentro mota bakoitzerako ezarritako baldintza espezifikoak ere.

10. Animaliak, zentroaren jarduera gelditzen bada, sailkapen bereko beste zentro batera eramatea, edo animaliak aldi baterako edo modu iraunkorrean hartzeko zentro batera.

11. Baimena ematea agintaritza eskudunak kontrol ofizialak egiteko erregelamendu honetan xedatutakoa betetzen dela egiaztatzeko.

29. artikulua . Albaitaritzazerbitzua.

1. Zentroak albaitaritza-zerbitzu baten laguntza izan behar du animalien osasuna eta ongizatea kontrolatzeko.

2. Albaitaritza-zerbitzuaren ardura izanen dira:

a) Araudi honen 30. artikuluan ezarritako animalien higiene-, osasun- eta ongizate-programa egitea eta gainbegiratzea.

b) Zentroko animalien asistentzia klinikoa, tratamenduak, txertaketak, nahitaezko desparasitazioak eta zaintza epidemiologikoa egitea.

c) Zentroaren titularrari eta langileei aholkuak ematea, indarrean dagoen araudian osasunari eta animalien ongizateari buruz ezarritako betebeharrak konplitzeaz.

d) Agintaritza eskudunari jakinaraztea animalien osasun eta ongizatearekin lotutako edozein gorabehera aipagarri eta aplikatutako neurriak.

e) Ziurtagiri bat ematea animaliaren jabe berriari, salmenta-establezimendu, hazkuntza-zentro edo animaliak aldi baterako hartzeko zentro baten arduradun gisa. Ziurtagiri horretan honako hau bilduko da: animaliaren osasun-egoera, jaso beharreko zainketak, tratamenduak eta maneiu-jarraibideak, bai eta animaliaren tratu txarrek eta abandonuak dakartzaten arau-hauste eta zehapenei buruzko informazioa ere, 19/2019 Foru Legean ezarritakoarekin bat.

30. artikulua . Erregistroak eta programa dokumentatuak.

1. Zentroek honako hauek izanen dituzte, paperean edo formatu elektronikoan:

a) Erregistro-liburu bat zentroko animaliei eta emandako albaitaritza-tratamenduei buruz, gutxienez 4. eranskineko datuak jasoko dituena.

b) Animalien higiene- eta osasun-programa bat, gutxienez 5. eranskineko datuak jasoko dituena. Eguneratu egin behar da zentroak bere instalazioak aldatzen dituenean, animalia-espezie berriak sartzen dituenean, maneiu-praktikak aldatzen dituenean edo dagoen programa aldatzen ahal duen beste edozein gauza egiten duenean.

2. Lagun egiteko animaliak aldi baterako hartzeko zentroek urteko txosten bat egin beharko dute, 6. eranskinean aurreikusitako datuak bilduko dituena. Horretarako, txostenean nahitaez sartu behar diren datuen erregistro bat eduki beharko dute.

31. artikulua . Langileen prestakuntza.

1. Zentroaren titularrak bermatu behar du gaituta eta prestatuta daudela animaliekin kontaktuan lan egiten duten pertsonak, bai bertako langileak, bai zentroan laguntzen duten boluntarioak, eta behar diren jarraibideak eta aholkularitza jaso dituztela beren lana behar bezala egiteko eta zentroko higiene-, osasun- eta ongizate-programa betetzeko.

2. Animaliak zuzenean maneiatzen dituzten pertsonek izan beharko dute erregelamendu honen IV. tituluan ezarritako gaikuntza-ziurtagiri ofiziala, espezieei eta zentroaren jarduerari egokitua.

3. Langileei behar adinako prestakuntza aitortuko zaie, baldin eta egiaztatzen badute albaitaritzako lizentzia edo gradua dutela, edo animalien maneiurako eta ongizaterako trebakuntza egokia duen lanbide heziketa, eta ez dute nahitaezkoa izanen gaikuntza-ziurtagiri ofiziala izatea.

4. Aurreko 3. paragrafoan aipatzen den gaikuntza-ziurtagiri ofizialik edo prestakuntza kualifikaturik ez duten langileek lan eginen dute, soilik, eskatutako prestakuntza duten langileek edo langile kualifikatuek ikuskatuta. Hala ere, zentroaren titularrak sustatu beharko du langileek eta boluntarioek gaikuntza-ziurtagiria erdiesteko behar den prestakuntza lor dezaten.

32. artikulua . Kokalekuaren baldintzak.

1. Honako distantzia hauek egon behar dira lagun egiteko animalien zentroen artean edo horien eta beste instalazio batzuen artean (etxebizitzak edo abeltzaintzako ustiategiak):

a) Lagun egiteko animalien zentroekiko edo abeltzaintzako ustiategiekiko distantziak.

a.1) 50 metro, zentrokoak ez diren animalia-espezieak dituzten abeltzaintzako zentro edo ustiategietatik.

a.2) 200 metro, zentroko espezie-talde beretako animalia-espezieak dituzten abeltzaintzako zentro edo ustiategietatik.

b) Etxebizitzekiko distantziak.

(*) Zentroaren titularraren etxebizitza denean izan ezik.

c) Artikulu honetan jaso ez diren beste elementuekiko distantziak: ingurumenari buruzko legerian edo indarrean dauden beste arau batzuetan ezarritakoak.

2. Ez zaizkie aplikatzen a puntuan ezarritako distantzien baldintzak ganadua zaintzeko, defendatzeko eta maneiatzeko jardueretarako zentroei.

3. Salmenta-zentroei ez zaizkie aplikatzen b puntuan ezarritako distantzien baldintzak.

33. artikulua . Instalazioen baldintza higienikosanitarioak eta biosegurtasunekoak.

1. Zentroetako instalazioak eraikita eta diseinatuta egon behar dira animaliek higiene eta osasun aldetik, konfort eta biosegurtasunaren aldetik dituzten baldintzak bat etor daitezen ostatatutako espezieen behar fisiologiko eta etologikoekin. Gutxienez, honako hauek bete behar dituzte:

a) Perimetroko hesia edo sistema baliokidea izatea, pertsonen, animalien eta ibilgailuen sartu-irteerak kontrolatzeko.

b) Material iragazgaitzez, garbigarriez, erresistenteez eta animalientzat kaltegarriak ez diren materialez eginak izatea. Sabaiak eta paretak lauak izanen dira. Zoruak material irristagaitzezkoak eta lauak izanen dira, animalien jarduerarako eta garbiketa-lanetarako egokiak.

c) Aldizka eta maiz garbitzea, desinfektatuta eta intsekturik eta arratoirik gabe edukitzea, eta egoera onean mantentzea.

d) Isolatuta egotea, ahal den neurrian eta zentro motaren arabera, hegaztiak, karraskariak eta intsektuak sartzea eragozteko.

e) Egokituta egotea, tenperatura eta hezetasun erlatiboa animalientzat egokiak izan daitezen, kontuan izanik espeziea, adina eta egoera fisiologikoa. Aireztapena egokia izanen da gas-kontzentrazioa, usain txarrak edo hauts-maila handia saihesteko.

f) Instalazio itxiak eta aire zabalekoak izatea. Aire zabalekoetan, estalitako eremu bat prestatuko da, eta animaliek eremu horretara sartzeko askatasuna izanen dute, eguraldi txarretik eta eguzkitik, haizetik edo euritik babesteko.

g) Argiztapen naturala edo artifiziala izatea, eta argi- eta iluntasun-aldi egokiak errespetatzea espezie bakoitzaren behar biologiko eta etologikoak asetzeko. Kasu guztietan, argi artifizialeko iturri bat izan beharko dute, gauez instalazioak ikuskatu ahal izateko.

h) Diseinatuta egotea halako eran non animalien barrutiek edo bizitokiek ez baitute mugatuko mugitzeko askatasuna, ez baitiete sufrimendurik edo kalterik eraginen, eta babesa eskainiko baitute eguraldi txarraren edo harraparien kontra, kontuan izanik espeziea, adina eta egoera fisiologikoa.

i) Ur-hornidura izatea animalientzat, baita ura biltegiratzeko sistema bat ere, 48 orduko autonomia ziurtatuko duena eta ur garbia mantentzeko egokia izanen dena.

j) Baliabide eta tresna egokiak izatea animaliak maneiatzeko eta materialak, ibilgailuak eta eraikinak garbitu eta desinfektatzeko.

k) Leku egoki, seinaleztatu eta babestu batean gordetzea eta biltegiratzea albaitaritzako sendagaiak, sendagai-pentsuak eta bestelako produktu zoosanitarioak.

l) Berrogeialdirako leku bat edo lazareto bat izatea, animalien osasun- edo ongizate-arrazoiengatik gainerakoetatik bereizita dauden animaliak isolatzeko eta behatzeko, eta harrera-zentro, haztegi-zentro edo salmenta-zentro batean sartzen diren animaliak behatzeko, behin betiko ingresoa egin aurretik.

2. Animaliak -zakurrak edo katuak izan ezik- dauden esparru edo gelek neurri egokiak izanen dituzte ariketa fisikoa egin ahal izateko, kontuan izanik espeziea, adina eta egoera fisiologikoa, eta honako neurri hauek izan beharko dituzte:

a) Kaiolatutako animalien kasuan, esparruaren gutxieneko altuera animaliaren altuera halako 1,8 izanen da.

b) Animalia bakoitzeko gutxieneko azalera, aurreikusitako bizitokia edozein dela ere, 0,10 m²-koa izanen da pisu biziaren kg bakoitzeko; gutxieneko altuera, berriz, animaliarena baino 1,8 aldiz handiagoa, eta handiagoa izan beharko du espeziearen portaerak hala eskatzen duenean.

3. Zakur edo katuentzako esparruek gutxieneko eremu eta neurri hauek izan behar dituzte:

a) Atsedenleku estalia, isolamendu termiko egokirako itxia, animalia guztiak aldi berean etzan ahal izateko modukoa eta material egokiz isolatutako zorua duena, erraz garbitu eta desinfektatzen ahal dena.

b) Barneko edo kanpoko jarduera-eremua, atsedenlekutik aparte, eta handik sarrera libre duena, animaliei ibiltzeko, buelta emateko, etzateko eta buztana mugitzeko aukera ematen diena, esparruaren alboak edo beste animalia batzuk jo gabe.

c) Zakurrentzako ariketa-eremua, kanpoaldean, jarduera-eremutik eta atsedenlekutik aparte. Animaliak banaka edo taldeka sartzeko aukera eman behar du.

d) Katuek honako hauek izan beharko dituzte: plataforma goratuak, atzamarka egitekoak, gorozkietarako material xurgatzailea duen erretilua eta kaxa goratu bat animalia bakoitzeko atsedenlekuan, atseden hartzeko edo ezkutatzeko.

e) Esparruen gutxieneko neurriak honako hauek izanen dira:

Zakurrak.

Katuak.

e.1) Aurreko koadroetan adierazitako azalerak % 50 handituko dira esparruan dagoen animalia gehigarri bakoitzeko.

e.2) Ariketa-eremuaren azalera, 20 animalia baino gehiago daudenean, behar den azaleraren % 50 handituko da.

4. Esterilizatu gabeko zakur, katu edo hudo helduak sexuaren arabera bereiziko dira.

5. Animaliak isolatuta edo gainerako animalietatik bereizita mantenduko dira, aldi baterako eta zentroaren ardura duen albaitaritza-zerbitzuak idatziz eta berariaz adierazita, animalien osasuna edo ongizatea dela eta.

34. artikulua . Animaliak maneiatzeko baldintzak.

1. Zentroko animaliek baldintza egokiak izan behar dituzte beren segurtasunari, ongizateari eta osasunari dagokienez, kontuan izanik espeziearen behar fisiologiko eta etologikoak.

2. Lagun egiteko animalien zentroetako titularren erantzukizuna izanen da gutxienez honako baldintza hauek betetzea:

a) Animaliek elikadura osasuntsua jaso behar dute, beren adinari, espezieari eta egoera fisiologikoari egokitua, eta behar adinakoa osasun egoera ona izateko eta beharrizan fisiologikoak asetzeko.

b) Animaliak ez dira elikatu behar gizakiek jatekoak ez diren animalia-jatorriko azpiproduktu gisa kalifikatutako beste animalia batzuen zatiekin edo hondakinekin, salbu eta animalien ongizatearen arloan eskumena duen departamentuak baimendutako kasuetan, eta bat etorriz urriaren 21eko 1069/2009 (EE) Erregelamenduan edo hura ordezten duen arauan xedatutakoarekin (erregelamendu horren bidez ezarri ziren gizakiek jatekoak ez diren animalia-jatorriko azpiproduktuei eta produktu deribatuei aplikatzeko osasun arauak).

c) Animaliek etengabe izan behar dute ura eskura, behar adina eta behar adinako kalitatearekin. Edateko eta jateko behar adina aska egon beharko da, animalien arteko lehia saihesteko.

d) Etxeko edo basoko animalietatik babestuta eta isolatuta biltegiratuko dira elikagaiak, hondatu edo kutsatu ez daitezen. Pentsuak indarrean dagoen araudiaren arabera etiketatuko dira.

e) Animaliek ingurumen-aberaste egokia izanen dute, beren espezieari, adinari, egoera fisiologikoari eta behar etologikoei dagokien bezala jokatzeko.

f) Animaliak dituzten esparruek aukera eman beharko dute erraz ikusteko eta iristeko, kontrolatu ahal izateko.

g) Instalazioak eta ekipoak, baita jateko eta edateko askak ere, egoera onean eduki behar dira, eta maiz garbitu eta desinfektatu.

h) Animalien esparruak egunero garbituko dira eta gorozkiak egunero kenduko dira, salbu eta albaitariaren txosten batek justifikatutako arrazoiengatik beste maiztasun bat erabakitzen bada. Ahal dela, esparruek behar adinako inklinazioa izanen dute likidoak eta iraizkinak errazago ateratzeko, eta horiek behar bezala tratatuko dira.

i) Pertsona bat egonen da animalien egoera egunero ikuskatzeko, eta norbait gaixo edo zaurituta dagoela ematen badu, berehala jakinaraziko dio zentroko albaitaritza-zerbitzuari.

j) Bildu eta kudeatu beharko dira hondakinak, substantzia arriskutsuak eta sortutako azpiproduktuak (botiken hondakinak, ontziak, xiringak, sendagai-pentsuen hondarrak, garbitzeko eta desinfektatzeko produktuak, animalien tratamenduan sortutako beste hondakin arriskutsu batzuk, gorpuak, simaurra, etab.), indarrean dagoen araudian ezarritakoarekin bat.

35. artikulua . Animalien identifikazioa, osasun kontrola eta garraioa.

Lagun egiteko animalien zentro batean dauden animaliak:

1. Behar bezala identifikatuta egonen dira, eta osasun kontrolak, tratamenduak eta txertaketak eginen zaizkie, nahitaezkoak baldin badira erregelamendu honetan edo indarrean dagoen araudian ezarritakoaren arabera animalien osasunari edo osasun publikoari lotutako arrazoiengatik.

2. Lagun egiteko animalien zentro batetik edo batera lekualdatuz gero, animalien mugimenduari buruz indarrean dagoen araudian xedatutakoa beteko da.

IV. KAPITULUA. BALDINTZA GEHIGARRIAK, ZENTRO-MOTAREN ARABERA

36. artikulua . Zakurren egoitza edo zaindegia.

1. Instalazioetan sartzeko, animaliek identifikatuta egon behar dute, eta erregelamendu honetan ezarritako nahitaezko osasun-tratamenduak eta -kontrolak bete. Animalien jabeek edo edukitzaileek hori frogatu beharko dute animalia sartu aurretik.

2. Animalia bat gaixotzen bada, zentroko arduradunak animalia horren jabeari edo edukitzaileari jakinaraziko dio, albaitaritza-tratamendua aplikatzeko baimena eman dezan. Lokalizatzea ezinezkoa bada edo presakoa eta premiazkoa bada, zentroko albaitaritza-zerbitzuak egokitzat jotzen duen tratamendua aplikatuko du, eta animaliaren jabeari edo edukitzaileari jakinaraziko dio.

3. Pertsona batek modu partikularrean animaliak aldi baterako eta irabazi-asmoarekin ostatatzen baditu, animalien kopurua edozein dela ere, egoitzatzat edo zaindegitzat hartuko da, eta erregelamendu honetan xedatutakoa bete beharko du.

37. artikulua . Trebakuntzazentroak.

1. Instalazio propioak dituen trebakuntza-zentro edo -eskolak, 19/2019 Foru Legearen 13.h artikuluan araututakoaren arabera, animaliak trebatzeko lanak egiteko langile egiaztatuak izan behar ditu, eta Zakur-trebatzaileen Erregistroan inskribatuta egon, erregelamendu honen V. tituluan ezarritakoarekin bat.

2. Zentroak animalia bakoitzaren trebakuntza-mota jasotzen duen erregistro bat eraman behar du, animaliaren eta jabearen identifikazio-datuekin batera. Erregistro hori erregelamendu honen 30. artikuluan ezarritakoaren osagarria izanen da.

38. artikulua . Kirol jardueretarako edo zerbitzuak emateko animaliak dituen zentroa.

1. Animaliak edukitzen edo mantentzen dituen zentroak, zeinaren titularra establezimenduan dauden animalia guztien jabea baita, erregistro-liburuaren ordez -erregelamendu honen 30. artikuluan arautzen da-, animaliak identifikatzeko pasaportea edo identifikazio-agiria erabiltzen ahalko du.

2. Zentro batek hegaztiak baldin baditu aire zabaleko sarbide iraunkorrarekin, leku bat izan behar du instalazioetan osasun arrazoiengatik hegaztiak konfinatzeko eta erabat isolatzen direla bermatzeko.

39. artikulua . Animaliak aldi baterako hartzeko zentroa.

1. Honela sailkatzen dira animaliak aldi baterako hartzeko zentroak:

a) Egonaldi laburreko zentroak: animaliak gehienez 60 egun naturaleko epean hartzeko eta mantentzeko establezimenduak, jabeak berreskuratu arte, adopzioan emateko edo egonaldi luzeko zentro batera eramateko.

b) Egonaldi luzeko zentroak: animaliak denbora-mugarik gabe hartzen eta mantentzen dituzten establezimenduak, jabeak berreskuratzeko edo adopzioan emateko.

2. Animaliak aldi baterako hartzeko zentroak, erregelamendu honetan ezarritakoaz gain, bete behar du 19/2019 Foru Legearen 15. eta 16. artikuluetan -animaliak abandonatzeari, galtzeari eta adoptatzeari buruzkoak- aurreikusitakoa.

3. Egonaldi luzeko zentroak ingurumen-aberasteko material etologikoak izan behar ditu ariketa-eremuan, hala nola arrapalak, tunelak, salto egiteko listoiak, sokak, pilotak, etab.

4. Egonaldi laburreko zentroak erregelamendu honetan ezarritako baldintzak bete behar ditu, honako berezitasun hauekin:

a) Langileak ez daude behartuta erregelamendu honen 31. artikuluan ezarritako gaikuntza-ziurtagiri ofiziala edukitzera.

b) Zentroa erregelamendu honen 32. artikuluan ezarritako distantziak baino txikiagoan kokatzen ahalko da, betiere osasun-, osasun publikoko edo ingurumeneko arriskurik ez badakar edo eragozpenak eragiten ez baditu.

c) Zentroak aukera izanen du 33.1 artikuluko a eta l puntuetan ezarritakoa ez aplikatzeko, instalazioek bete behar dituzten baldintza higieniko-sanitarioei eta biosegurtasunekoei dagokienez.

d) Ez da nahitaezkoa zakurren ariketa-eremua izatea.

e) Artikulu honetan araututakoa gorabehera, egonaldi laburreko zentroek bermatu behar dute animaliak une oro beren espeziearen, arrazaren eta adinaren araberako ingurune egokian mantentzen direla, honako honi dagokionez: portaera-premiak, espazioa, airearen kalitatea, garbitasuna, tenperatura, uraren kalitatea, zarata-maila, argi-maila eta aireztapena.

5. Egonaldi laburreko zentro batean dagoen animalia, jabeak berreskuratzen ez badu, edo sartu zenetik 60 egun naturaleko epean adoptatzen ez badute, egonaldi luzeko zentro batera edo animalien harrera iraunkorreko zentro batera eramanen da, artikulu honen 10. puntuan ezarritakoa ezertan galarazi gabe. Justifikatutako arrazoiak direla medio, albaitariaren txosten baten bidez, epe handiago batean edukitzen ahalko da animalia bat zentroan, lekualdatu edo adoptatu arte.

6. Jendeak ikusteko moduko leku batean jarri behar dira animaliak adoptatzeagatik kobratzen diren zenbatekoak, eta horien berri eman behar da Interneten.

7. Zentro horietan debekatuta dago animaliak haztea, ugaltzea edo saltzea.

8. Adinez nagusi diren pertsona fisikoei baino ezin die eman harrera-zentroak animalia bat adopzioan, 19/2019 Foru Legearen 16.2 artikuluan ezarritakoarekin bat, eta haiek animaliaren jabeak izatera pasatuko dira.

9. Zentroan dauden animalien adopzioa kudeatzeko, zakurrak eta katuak bertan egoteko eskatzen diren baldintzak betetzen dituzten salmenta-establezimenduak erabiltzen ahalko dira. Salmenta-establezimenduak kobratzen ahalko ditu, soilik, kasuan kasuko animalien harrera-zentroak adopzioagatik ezarritako prezioak.

10. Zentroan dauden animaliak harrera-etxeetara eramaten ahalko dira aldi baterako, jabe gisa diharduen pertsona fisiko batek zaintzeko.

11. Harrera-etxea etxebizitza partikular bat da, animaliak aldi baterako hartzeko zentro bati lotua eta dagokion udalak baimendua. Bertan, animaliak gordetzen dira behin-behineko zaintzeko, artatzeko, arreta emateko eta baldintza higieniko-sanitario egokietan eta animalien ongizaterako baldintza egokietan mantentzeko, eta ez da lagun egiteko animaliaren zentrotzat hartzen. Dena dela, betebehar hauek bete beharko dira:

a) Baldintza minimo batzuk izan behar ditu higiene eta osasun aldetik nahiz espazio aldetik, animalien ongizatea bermatzeko. Harrera-etxe gisa etxebizitza bat baimentzeko ardura duen udalak aldizkako kontrolak eginen ditu gutxieneko baldintzak betetzen direla ziurtatzeko.

b) Animaliak hartzeko zentroaren izenean identifikatuta egonen dira, eta nahitaezko tratamendu eta txerto guztiak izanen dituzte, erregelamendu honen II. tituluan ezarritakoarekin bat.

c) Aldi berean, urtebetetik gorako sei animalia har ditzake. Kopuru hori txikiagoa izan daiteke, kasuan kasuko udalak hala erabakitzen badu, egiaztatzean betetzen ote diren beharrezko baldintzak molestiarik ez eragiteko edo jarduera osasungaitz, kaltegarri, arriskutsu edo debekaturik ez egiteko, bai eta animalien segurtasun, higiene eta ongizaterako gutxieneko baldintzak ere.

12. Harrera-zentroak, artikulu honen 8. puntuan ezarritakoa ezertan galarazi gabe, erakunde laguntzaile bati laga diezaioke abandonatutako animalia bat, baldin eta erakundea VII. tituluan araututako erakunde laguntzaileen erregistroan inskribatuta badago eta baimendutako harrera-programa bat badu, helburua izanik animaliaren sozializazioa hobetzea, bizi-kalitate hobea ematea edo, lesio fisikoak izanez gero, sendatzeko, pertsona fisiko bati adopzioan eman arte. Salbuespen gisa, Nafarroako Gobernuan animalien ongizatean eskumena duen departamentuak berariaz baimentzen ahalko du animalia bat lagatzea beste autonomia-erkidego batean baimendu eta erregistratutako animalien babes eta defentsarako elkarte bati.

13. Erakunde laguntzaile baten harrera-programak Nafarroako Gobernuan animalien ongizatean eskumenak dituen departamentuaren baimena behar du, eta, horretarako, erakunde laguntzaileak frogatuko du honako baldintza hauek betetzen dituela:

a) Programaren arduraduna den albaitari bat izatea.

b) Higiene- eta osasun-programa bat eta animaliak maneiatzekoa izatea, albaitari arduradunak sinatua.

c) Animaliak hartuko d(ir)en leku(ar)en memoria deskribatzailea egitea. Harrera-zentro baimenduak edo harrera-etxeak izan daitezke, artikulu honen 11. apartatuan ezarritakoa betetzen dutenak.

14. Baimendutako harrera-programa bat duten erakunde laguntzaileek erregistro bat izanen dute, agintaritza eskudunaren eskura, non jasoko baitira hartzen dituzten animaliak eta animalia bakoitzaren kokapen fisikoa. Erakunde laguntzailea animaliaren jabe gisa agertuko da LEAINEn, harik eta pertsona fisiko bati adopzioan ematen dion arte. Nafarroako Gobernuan animalien ongizatean eskumenak dituen departamentuak kontrolatuko du baimendutako programa, eta ez-betetzeren bat antzemanez gero, baimena kentzen ahalko dio.

40. artikulua . Animaliak modu iraunkorrean hartzeko zentroa.

1. Animaliak modu iraunkorrean hartzeko zentroak 22. artikuluko 1. paragrafoan zehaztutako animalietatik edozein izaten ahalko du, baldin eta animalia konfiskatu, abandonatu edo laga bada, eta bizitza osoan hartu eta mantentzen ahalko du.

2. Zentroan dauden animaliak ezin dira lekuz aldatu, salbu eta sailkapen bereko beste zentro batera eraman behar direnean behar bezala justifikatutako arrazoiak direla-eta, hala nola jarduera bertan behera uzteagatik.

3. Zentroan dauden animaliak ezin izanen dira merkataritza-jardueretarako erabili, eta, bereziki, merkataritzako ugalketarako edo hazkuntzarako, erosketarako, salmentarako edo lagapenerako, esperimentaziorako edo helburu zientifikoekin erabiltzeko, eta erakusteko edo entretenitzeko.

4. Instalazioak bertan dauden espezieetara egokituko dira, kontuan hartuta erregelamendu honetan eta animalia bakoitzari aplika dakiokeen indarreko araudian araututakoa.

41. artikulua . Lagun egiteko animaliak hazteko zentroa.

1. Animaliak hazteko zentroak, erregelamendu honetan ezarritakoaz gain, 19/2019 Foru Legearen 14. artikuluan ezarritakoa ere beteko du.

2. Saltzen ahalko ditu, bakar-bakarrik, bertan jaio, haurdunaldia barne, eta bere ardurapean egon diren animaliak.

3. Baimendutako salmenta-zentro bati bakarrik saltzen ahalko dizkio animaliak, edo animaliaren azken hartzailea eta jabea den pertsona fisiko edo juridiko bati.

4. Zakurren eta katuen kasuan:

a) Espazio egoki eta bereiziak izanen ditu animaliak ostatatzeko, ariketa fisikoa egiteko eta kumeez erditzeko. Erditzeko eremuak ohe lehor eta garbia izan beharko du, emeak bertan egon daitezen haurdunaldian, bai eta edoskitzaroan ere, kumeekin batera.

b) Eremuak 15.ºC eta 26.ºC artean egon behar du. Erditzeko eremuak berokuntza gehigarria izan behar du jaio ondoko lehen 10 egun naturalean.

c) Gelek edo eremuek argi naturala izan behar dute, eta animaliek argi- edo bero-iturri zuzenetik urruntzeko aukera izanen dute.

d) Emeek egunean gutxienez lau aldiz izanen dute aukera bere burua garbitzeko eta ariketa egiteko, kumeetatik aparte. Eme haurdunek eta edoskitzen ari direnek ad libitum elikadura izan behar dute, kalitate handiko elikagai batekin.

e) Animaliek kontaktu soziala izan behar dute beste animalia batzuekin eta jendearekin. Kumeak aldizka manipulatu behar dira ahalik eta lasterren, giza kontaktura ohitzeko, eta gutxienez 8 astera arte egon beharko dute amarekin eta anai-arrebekin, sozializatzen laguntzeko.

f) Animalia ugaltzaileek ez dute izan behar ondorengoei kutsa dakizkiekeen gaixotasunik edo akatsik. Ez dira ugaltzeko erabili behar sozializagaitzak edo beldurtiak diren animaliak, edo jokabide oldarkorrak dituztenak.

g) Animaliek, ugaltzaile gisa hautatuak izan aurretik, albaitaritza-azterketa, proba edo analisi bat egin behar dute, egiaztatzeko ez dutela gaixotasun kutsakorrik edo sortzetiko akatsik, arrazaren edo arraza-estandarraren arabera.

h) Animaliak gutxienez urtebete izan behar du ugaltzaile gisa erabiltzeko eta, kasu guztietan, helduaren pisua, arrazaren arabera. Hazkuntzarako emeek ezin izanen dituzte sei umealdi baino gehiago izan ugaltze-bizitzan, eta, gutxienez, urtebete igaro beharko dute erditzeen artean.

i) Ugaltze-bizitza amaitu duen emea lagatzeko, antzututa egon beharko du.

j) Erregistro bat izanen du, hazkuntza arduratsua bermatzen duten datuekin. Erregistroak honako informazio hau jasoko du animalia bakoitzari buruz: jatorria, adina, estalketa-data, estalketaren arra, azken erditze-data, azken araldia, egindako probak (arraza-estandarrekoak, sozializaziokoak, albaitaritzakoak, etab.) eta amarekin eta anai-arrebekin emandako denbora.

5. Zakurrak edo katuak hazten dituzten zentroak honela sailkatzen dira:

a) Noizbehinkako hazkuntza-zentroa edo zentro amateurra: gutxienez bi umealdi izan diren eta kumeak saldu edo laga diren tokia edo bizilekua. Aldi berean 6 eme heldu egon daitezke bertan, urtean gehienez bi umealdi izan ditzakete eta urtean 15 animalia saldu edo laga ditzakete gehienez.

b) Hazkuntza-zentro profesionala: animaliak hazteko erabiltzen den establezimendua edo lekua, noizbehinkako hazkuntza-zentroetarako edo zentro amateurretarako ezarritako mugetako edozein gainditzen duena. Zentro hori ezin da egon etxebizitza partikular batean.

6. Hazkuntza-zentro profesionalak honako neurri hauetako esparruak izan behar ditu animalia bakoitzeko:

Zakurrak.

Katuak.

Eme bakoitzak, bere kumeekin, aurreko tauletan ezarritako espazioaren bikoitza izanen du.

7. Noizbehinkako hazkuntza-zentroak edo zentro amateurrak erregelamendu honetan ezarritako baldintzak bete behar ditu, honako berezitasun hauekin:

a) Langileak ez daude behartuta erregelamendu honen 31. artikuluan ezarritako gaikuntza-ziurtagiri ofiziala edukitzera.

b) Zentroa erregelamendu honen 32. artikuluan ezarritakoak baino distantzia txikiagoan kokatzen ahalko da, betiere etxebizitza partikularra bada eta osasun, osasun publiko edo ingurumeneko arriskurik ez badakar.

c) Zentroa 33.1 artikuluko a) eta l) puntuak betetzetik salbuetsita egonen da. 33. artikuluko 1. apartatuko f) letran xedatutakoari dagokionez, salbuetsita egonen dira aire zabaleko instalazioak izateko beharra betetzetik.

d) Osasun-ikuskapenaz eta beharrezko albaitaritza-tratamenduak agintzeaz arduratuko den albaitari baten zerbitzuak izanen ditu.

e) Bermatu behar du animaliak une oro beren espeziearen, arrazaren eta adinaren araberako ingurune egokian mantentzen direla, honako honi dagokionez: portaera-premiak, espazioa, airearen kalitatea, garbitasuna, tenperatura, uraren kalitatea, zarata-maila, argi-maila eta aireztapena.

8. Erregelamendu honetan araututakoaren ondorioetarako, noizbehinkako hazkuntza-zentroa edo zentro amateurra hazkuntza profesionaleko zentrotzat hartuko da baldin eta artikulu honetako 5.a puntuan ezarritakoa baino animalia gehiago baditu edo urtean umealdi edo animalia gehiago saltzen edo lagatzen baditu.

42. artikulua . Lagun egiteko animaliak saltzeko zentroa.

1. Saltzeko zentroak, erregelamendu honetan ezarritakoaz gain, 19/2019 Foru Legearen 14. artikuluan ezarritakoa ere beteko du.

2. Animalia, azken hartzailea eta jabea izanen den pertsona fisiko edo juridiko bati baino ezin dio saldu.

3. Ezin du salmentarako eskaini baimenik eta erregistrorik ez duten hazleen animaliarik.

4. Erosleari honako hau emanen dio: animaliaren jatorrizko hazkuntza-zentroari buruzko informazioa, erregistro-zenbakia eta, zakur eta katuen kasuan, gurasoei buruzko informazioa, identifikazio-zenbakiak barne.

5. Hiru eremu bereizi izanen ditu, bata bestetik aparte:

a) Salmenta-eremua, ikusi ezin dena eremu publikotik edo merkataritza-guneetako korridoreetatik.

b) Animalia berrien behaketa- eta aklimatazio-eremua.

c) Animalia gaixoak edo susmagarriak isolatzeko eremua.

Azken bi eremuak jendearen bistatik kanpo egonen dira.

6. Akuario eta/edo terrario independenteetan dauden animaliek eremu horiek partekatzen ahalko dituzte, betiere beharrezko banantze-neurriak hartzen badira gaixotasunak hedatzea eta kutsatzea saihesteko.

7. Tenperatura denbora guztian mantenduko da 15.º C-tik 26.º C-ra bitartean.

8. Zer animaliatarako baimendu eta erregistratu zen, horiexek baino ezin du saldu. Beste animalia mota bat saldu ahal izateko, dagokion baimena eskatu beharko du.

9. Animalia bati CITES ziurtagiria eskatzen zaionean, ziurtagiri hori izan beharko du aldean establezimenduan sartzen den unean eta saldu edo lagatzen den unean.

10. Animaliak dauden esparru, akuario, terrario edo kaiolek baldintza eta espazio egokiak izan beharko dituzte, espeziearen arabera.

11. Zakurrak edo katuak beren instalazioetan daudela saldu nahi dituzten establezimenduek berariazko baimena eskatu behar diote animalien ongizatean eskumena duen departamentuari. Baimen hori lortzeko, honako hauek bete behar ditu:

a) Animaliak saltzeko dauden esparruak:

a.1) Establezimendura sartzeko atetik metro batera egonen dira gutxienez, eta eremu publikotik edo merkataritza-guneetako barne korridoreetatik ikusi ezin diren tokietan.

a.2) Ohantze xurgatzaile bat izanen dute kumeentzat.

a.3) Leku bat izanen dute animalia ezkutatu ahal izateko, nahi izanez gero.

a.4) Animaliaren informazio-fitxa bat agertuko dute honako honekin: jaioteguna, arraza, txertoak eta desparasitazioak.

a.5) Animalia bakoitzeko gutxieneko neurri hauek izanen dituzte:

b) Animaliek harreman zuzena izaten ahalko dute jendearekin, baina establezimenduko langileek gainbegiratuta.

c) Establezimenduak gehienez ere bost animalia hartzen ahalko ditu aldi berean, zakurrak eta/edo katuak izan.

d) Animaliak bere jaiotzeko hazkuntza-zentro baimendu eta erregistratutik etorriko dira zuzenean, eta azken jabeari salduko zaizkio bitartekaririk gabe. Animaliak zuzenean eramanen dira jatorrizko hazkuntza-zentrotik salmenta-establezimendura.

e) Animaliak, establezimenduan sartzeko, bere osasun-egoera egiaztatzen duen albaitaritza-ziurtagiria izan behar du, jatorrizko haztegiak emana, haztegitik irten baino 24 ordu lehenago gehienez ere.

f) Animalia batek ez baldin badu 19/2019 Foru Legearen 14. artikuluko i apartatuan ezarritako gutxieneko salmenta-adina, agintaritza eskudunak konfiska dezake, eta animalien harrera-zentro batera entregatu, adopzioan eman dezan, edo, agintaritzak baimentzen badu, jatorrizko haztegira itzul daiteke.

g) Itxita dauden orduetan edo jaiegunetan, bermatuko da animaliak zainduta eta artatuta daudela haietaz arduratuko den pertsona bat bertan egonda edo bisita eginda, egunean behin gutxienez. Bisita horiek erregistratuta geldituko dira, eta bideozaintzako sistemen edo antzekoen bidez frogatzen ahalko dira.

h) Animaliak gehienez 21 egun natural egonen dira establezimenduan, sartzen diren egunetik zenbatzen hasita. Epe hori igarota, animalia hazkuntza-zentrora itzuliko da edo animaliak hartzeko zentro batera eramanen da, adopzioan emateko.

i) Animaliak behaketa-gunean gutxienez 24 orduz egonen dira.

j) Animaliak sozializatzeko programa bat aplikatuko du, albaitari batek egina. Programak jasoko du animaliek zer harreman izanen duten pertsonekin eta beren espezieko beste animalia batzuekin.

k) Erregistro-liburuak animalien trazabilitate osoa jaso beharko du, jaiotzen direnetik jabeari eta, hala badagokio, azken jabeari saldu arte.

l) Ezin ditu arriskutsuak izan daitezkeen zakurrak saldu.

12. Artikulu honen aurreko puntuan adierazitako baldintzaren bat betetzen ez bada, establezimenduan zakurrak eta katuak daudela saltzeko baimena errebokatzen ahalko da.

13. Informazioaren gizarteko eta merkataritza elektronikoko zerbitzuen hornitzaileek (Interneteko iragarkiak), lagun egiteko animaliak saltzeko edo lagatzeko eragiketak iragartzen dituztenean, hazleen edo animaliak saltzeko zentroen iragarkiak argitaratuko dituzte, soilik, zentroaren baimen- eta erregistro-zenbakia adierazita, bai eta animaliaren identifikazioa ere, hala badagokio, 19/2019 Foru Legearen 14.f artikuluan araututakoarekin bat.

43. artikulua . Lagun egiteko animalien bilduma partikularra.

1. Lagun egiteko animalien bilduma partikularrak, kontuan izanik ezaugarriak eta edukitza-mota, erregelamendu honetan ezarritako baldintzak bete behar ditu, honako berezitasun hauekin:

a) Ez dago erregelamendu honen 30. artikuluan araututako erregistroak edukitzera behartuta.

b) Jabea ez dago behartuta erregelamendu honen 31. artikuluan ezarritako gaikuntza-ziurtagiri ofiziala edukitzera.

c) Erregelamendu honen 32. artikuluan ezarritakoak baino distantzia txikiagoan kokatzen ahalko da, betiere etxebizitza partikularra bada, osasun, osasun publiko edo ingurumeneko arriskurik ez badakar eta eragozpenik sortzen ez badu.

d) Zentroa 33.1 artikuluko a) eta l) puntuak betetzetik salbuetsita egonen da. 33. artikuluko 1. apartatuko f) letran xedatutakoari dagokionez, salbuetsita egonen dira aire zabaleko instalazioak izateko beharra betetzetik. Bermatu behar da animaliak une oro beren espeziearen, arrazaren eta adinaren araberako ingurune egokian mantentzen direla, honako honi dagokionez: portaera-premiak, espazioa, airearen kalitatea, garbitasuna, tenperatura, uraren kalitatea, zarata-maila, argi-maila eta aireztapena.

e) Osasun-ikuskapenaz eta beharrezko albaitaritza-tratamenduak agintzeaz arduratuko den albaitari baten zerbitzuak izanen ditu.

2. 2. eranskinean ezarritako kopurua gainditzen duen animalia-espezieren bat edukiz gero, nahitaezkoa izanen da espezie hori eta instalazioetan dituen gainerako animalia-espezie guztiak inskribatzea, nahiz eta horiek muga gainditu ez.

3. Ezin du jarduera ekonomikorik edo irabazi-asmokorik egin dauzkan animaliekin. Bestela, jarduerak baimenduta egon beharko du, eta zentroak erregistratuta erregelamendu honen 23. artikuluaren 1., 2. eta 3. apartatuetan aurreikusitako edozein modalitatetan, eta zentro mota bakoitzerako ezartzen diren baldintzak bete beharko ditu.

IV. TITULUA. ANIMALIAK MANEIATZEKO PRESTAKUNTZA ETA GAIKUNTZA

I. KAPITULUA. ANIMALIAK MANEIATZEN DITUZTEN LANGILEAK

44. artikulua . Animaliak maneiatzen edo zaintzen dituzten langileak.

1. Lagun egiteko animalien zentroetan animaliak maneiatzen edo zaintzen dituzten langileek honako xedapen hauek bete beharko dituzte jardueran aritzeko:

a) Animaliak zaintzeko edo maneiatzeko erregelamendu honetan araututako gaikuntza-ziurtagiri ofiziala izatea edo beharrezko kualifikazioa izatea, erregelamendu honen 31.3 artikuluan xedatutakoarekin bat.

b) Espezie bakoitza maneiatzeko arauak eta animalien ongizatea bermatzeko oinarrizko premiak ezagutzea eta betetzea.

c) Animalien agresibitatea estimulatzen edo areagotzen duen edozein jarduera edo praktika saihestea.

2. Ez daude erregelamendu honetan araututako gaikuntza-ziurtagiri ofiziala edukitzera behartuta:

a) Indar armatuetako, Estatuko segurtasun-indar eta -kidegoetako, Foruzaingoko edo udaltzaingoko zaintzaileak.

b) Katu-koloniekin lan egiten duten pertsonak.

c) Lagun egiteko animaliak irabazi-asmorik gabe edo merkataritza-asmorik gabe dituzten jabeak, lagun egiteko animalien bilduma partikularrak barne.

II. KAPITULUA. PRESTAKUNTZA-ERAKUNDEAK

45. artikulua . Baimendutako prestakuntzaerakundeak.

1. Prestakuntza-erakundeak erakunde publikoak edo pribatuak dira, helburu dutenak, besteak beste, lagun egiteko animaliak zaintzeko eta maneiatzeko prestakuntza-ikastaroak antolatzea eta ematea, irabazi-asmoarekin edo irabazi-asmorik gabe. Animalien ongizatean eskumenak dituen zuzendaritza nagusiak baimenduta egon behar dute erakunde horiek ikastaroak antolatu eta emateko.

2. Baimena lortzeko, prestakuntza-erakundeek honako hauek izan behar dituzte: behar bezala egiaztatutako irakasle espezializatuak, horretarako egokitutako instalazioak, berekiak edo kontratatuak izan, eta irakasgai hori emateko baliabide egokiak.

3. Nafarroako Gobernuan animalien ongizatean eskumenak dituen departamentuari dagokio prestakuntza-erakundeek baimentzea eta haien funtzionamendu egokia bermatzeko kontrola egitea.

4. Prestakuntza-erakundeek baimena eskatuko diote Nafarroako Gobernuan animalien ongizatearen arloan eskumenak dituen departamentuari, animalien ongizatearen arloan eskumena duen organoaren webgunean eskuragarri egonen den eskaera-ereduaren bidez, honako dokumentazio honekin batera:

a) Eskatzailearen edo ordezkariaren identifikazioa eta egiaztapena.

a.1) Pertsona fisikoen kasuan, IFZ/AIZren fotokopia, baldin eta berariaz jasota badago ez dela onartzen Administrazioak datuak kontsultatzea, urriaren 1eko 39/2015 Legearen 28.2 artikuluan ezarritakoaren arabera.

a.2) Legezko ordezkaria izanez gero, hori egiaztatzen duen agiria aurkeztu beharko da, zuzenbidean balio duen edozein bitarteko erabiliz, horren berri modu fede-emailean ematen badu edo interesdunak hala adieraziz, pertsonalki edo elektronikoki agertuz.

b) Emanen diren ikastaroetako prestakuntza-programak eta gai-zerrendak, gutxienez bete behar dituztenak III. kapituluan jasotako zehaztapenak eta gaiak.

c) Instalazioen deskribapena eta kokapena, eta ikastaroa egiteko dituen baliabide materialen zerrenda.

d) Erantzukizunpeko adierazpena, zehazteko erantzukizun zibileko aseguru-poliza bat izanen duela praktiketan erabil daitezkeen gelei eta animaliei buruz.

e) Erregelamendu honen 48. artikuluan ezarritako betebeharrak betetzeko konpromisoa.

5. Baimentzeko eskaerak, Administrazio Publikoen Administrazio Prozedura Erkideari buruzko urriaren 1eko 39/2015 Legearen 14. artikuluaren arabera, telematikoki aurkeztuko dira, sinadura elektronikoarekin, Nafarroako Gobernuaren egoitza elektronikoan egonen den formularioaren bidez, eta, era berean, horretara behartuta egonen dira prestakuntza-erakunde diren pertsona fisikoak, erregelamendu honetan eskatutako gaitasun teknikoaren eta dedikazio profesionalaren arabera.

6. Nafarroako Gobernuan animalien ongizatean eskumena duen departamentuak egoki iritzitako administrazio-kontrolak eta ikuskapenak eginen ditu, dokumentazioan jasotako datuak egiazkoak direla egiaztatzeko.

7. Animalien ongizatearen arloan eskumena duen zuzendaritza nagusiak ebazpen bidez baimendu edo ukatuko du eskaera, gehienez ere sei hilabeteko epean, eskaera aurkezten den egunetik zenbatzen hasita. Adierazitako epean berariazko ebazpenik ematen ez bada, eskaera ukatu eginen da.

8. Animalien ongizatearen arloan eskumena duen zuzendaritza nagusiak ebazpen bidez erreboka dezake prestakuntza-erakundeari emandako baimena, hari entzunaldia eman ondoren, baldin eta bere betebeharrak betetzen ez baditu eta/edo egindako kontrolen ondorioz detektatzen bada adierazitako baliabide tekniko, giza baliabide, material edo instalaziorik ez duela, zehaztutako irakasgaiak ezarritako iraupenarekin ematen ez direla edo egiaztatzen bada faltsututa daudela parte-hartzaileek jasotako prestakuntzan izandako parte-hartzeari eta aprobetxamenduari buruzko datuak.

9. Prestakuntza-erakundeek eskaerarekin batera aurkeztutako dokumentazioaren edukian izandako edozein aldaketaren berri eman beharko diote animalien ongizatearen arloan eskumena duen zuzendaritza nagusiari, aldaketa gertatu eta gehienez ere 15 eguneko epean, erakundearen baimenari eusteko.

III. KAPITULUA. PRESTAKUNTZA PROGRAMAK

46. artikulua . Prestakuntza programak.

1. Baimendutako prestakuntza-erakundeek ematen dituzten prestakuntza programek ikastaro hauek izan behar dituzte:

a) Ikastaro orokor bat, gutxienez 10 ordukoa, ezagutza orokorrak izanen dituena etologiari, fisiologiari, animalien elikadurari, higieneari, osasunari eta animalien ongizateari buruz, erregelamendu honen 7. eranskinean jasotako gai-zerrendaren arabera.

b) Ikastaro espezifiko bat, batez ere praktikoa, gutxienez 10 ordukoa, helburuei eta edukiari dagokienez egokituko dena lagun egiteko animaliak mantentzeko zentroetan, haztegi-zentroetan, salmenta-establezimenduetan edo abandonatutako animaliak hartzeko zentroetan lan egiten duten langileen behar espezifikoetara.

2. Prestakuntza programek, gainera, honako hau bete behar dute:

a) Aurrez aurre, online edo modu mistoan eman daitezke.

b) Ebaluazio sistema bat izatea, ikasleek eskuratutako ezagutza teorikoak eta praktikoak egiaztatzeko.

c) Baliabide didaktikoak erabiltzea eta metodoak eta irizpideak izatea ebaluazio ekintzak egiteko eta prestakuntzaren eta tutoretza-sistemen kalitatea kontrolatzeko.

d) Ezartzea ikastaro bakoitzeko gehienez berrogei ikasle izan daitezkeela.

e) Duten irakasleek kasuan kasuko irakasgai(ar)en arloan behar bezala egiaztatutako trebakuntza, prestakuntza eta esperientzia izatea:

e.1) Albaitaritzako lizentzia edo gradua.

e.2) Lizentzia, gradua edo ingeniaritza, animalien ongizateari buruzko masterra edo prestakuntza arautuarekin.

e.3) Beren jarduera-eremuan esperientzia aitortua duten irakasle laguntzaileak.

f) Pertsona bat ikastaroaren arduradun izendatzea.

47. artikulua . Prestakuntza ikastaroak.

1. Animalien ongizatearen arloan eskumena duen zuzendaritza nagusiak homologatu behar ditu baimendutako erakundeek ematen dituzten prestakuntza-ikastaroak, eta zuzendaritza hori arduratuko da, halaber, ikastaroen garapena kontrolatzeaz eta ikuskatzeaz.

2. Ikastaroa antolatzen duten prestakuntza-erakunde baimenduek homologazioa eskatuko diote animalien ongizatearen arloan eskumena duen zuzendaritza nagusiari, webgunean eskuragarri egonen den eskaeraren bidez.

3. Ikastaroa homologatzeko eskaerarekin batera, gutxienez, honako agiri hauek aurkeztu beharko dira:

a) Ikastaroaren memoria eta programa, honako hauek zehaztuta: moduluen edukia, unitate didaktikoak, eskola-orduak eta ikastaroa non eginen den; aurrez aurrekoa edo mistoa bada, Nafarroan egin beharko da.

b) Ikastaroa emateko ardura duen prestakuntza-erakunde baimenduaren datuak, arduraduna eta irakasleen zerrenda, haien titulazio akademikoarekin, zeina, ahal dela, izanen baita lizentzia, diploma, erdi mailako gradua edo maila baliokideko ikasketak honako hauetan: albaitaritza, zientzia biologikoak eta nekazaritza-ingeniaritza, animalien ongizatearen arloko espezializazioa eta eskola praktikoetarako egiaztatutako esperientzia profesionala.

c) Ikastaroa emateko instalazioak, baliabideak eta materiala.

d) Azterketa sistema eta ebaluazio irizpideak.

4. Homologazio eskaerak animalien ongizatearen arloan eskumena duen zuzendaritza nagusiak ebatziko ditu, ebazpen bidez. Ebazpen hori sei hilabeteko gehieneko epean emanen da, eskaera aurkezten den egunetik zenbatzen hasita, eta eskatutako homologazioa baimendu edo ukatuko du. Adierazitako epean berariazko ebazpenik ematen ez bada, eskaera baietsi eginen da.

5. Nafarroako Gobernuan animalien ongizatean eskumena duen departamentuak egoki iritzitako administrazio-kontrolak eta ikuskapenak eginen ditu, eskaeran jasotako datuak egiazkoak direla egiaztatzeko.

6. Animalien ongizatearen arloan eskumena duen zuzendaritza nagusiak erreboka dezake, ebazpen bidez, prestakuntza-erakundeari emandako homologazioa, hari entzunaldia eman ondoren, baldin eta, egindako kontrol eta ikuskapenen ondorioz, homologaziorako baldintzak betetzen ez direla detektatzen bada.

48. artikulua . Ikastaroak egitea.

1. Ikastaroaren edizio bakoitza egin baino hilabete lehenago gutxienez, prestakuntza-erakundeek jakinarazpen bat bidali behar diote animalien ongizatearen arloan eskumena duen zuzendaritza nagusiari, webgunean eskuragarri egonen den ereduaren arabera. Jakinarazpen horretan honako hauek adieraziko dira: ikastaroaren arduraduna, irakasleen zerrenda, eman beharreko modulu espezifikoa, aurreikusitako tokia, eguna eta ordutegia, prestakuntza-modalitatea eta ikasle kopurua.

2. Prestakuntza online edo mistoa bada, bermatu beharko da animalien ongizatearen arloan eskumena duen zuzendaritza nagusiak ikastaroko saio guztietarako sarbidea izanen duela. Aurrez aurrekoa izanen da azken ebaluazio proba, eta Nafarroan eginen da.

3. Prestakuntza-erakundeek irizpide objektibo eta ez-diskriminatzaileen arabera hautatuko dituzte ikastaroetako parte-hartzaileak.

4. Ikastaroa egin duen prestakuntza-erakundeak aprobetxamendu-ziurtagiri bat emanen die gutxienez eskola-orduen % 80ra joan diren eta ebaluazio proba gainditu duten parte-hartzaileei.

5. Prestakuntza-erakundeak gaikuntza-ziurtagiri ofizialak eman behar dizkie ikastaroak gainditu dituzten ikasleei.

6. Prestakuntza-erakundeak lagundu behar du animalien ongizatearen arloan eskumena duen zuzendaritza nagusiak egiten dituen administrazio-kontroletan eta ikuskapenetan, eta eskatzen zaion edozein dokumentazio eman.

IV. KAPITULUA. GAIKUNTZA-ZIURTAGIRI OFIZIALA

49. artikulua . Gaikuntzaziurtagiri ofiziala.

1. Egiaztatutako prestakuntza-erakundeak animalien ongizatearen arloan eskumena duen zuzendaritza nagusira bidali behar du, zazpi egun balioduneko epean, ikastaro bakoitza amaitzen denetik, gaikuntza-ziurtagiri ofizialak emateko eskaera, animalien ongizatearen arloan eskumena duen Nafarroako Foru Komunitateko Administrazioaren organoaren webgunean eskuragarri egonen den ereduaren bidez, aprobetxamendu-ziurtagiria eman zaien ikasleen zerrendarekin batera.

2. Gaikuntza-ziurtagiri ofiziala animalien ongizatearen arloan eskumena duen zuzendaritza nagusiak emanen du, ikasturte bakoitza amaitu ondoren.

3. Gaikuntza-ziurtagiri ofizialak 10 urteko indarraldia izanen du, eta gehienez ere iraupen bereko epeetarako berritu daiteke, baldin eta interesdunak egiaztatzen badu gutxienez 10 orduko prestakuntza homologatua jaso duela animalien ongizateari eta lagun egiteko animalien babesari buruz, epe bakoitza amaitu aurreko 3 urteetan.

4. Berritzeko eskaera egin beharko da indarraldia edo luzapenetako edozeinena amaitu baino hiru hilabete lehenago, eta interesdunak aurreko paragrafoan aipatutako prestakuntza ikastaroaren zerrenda aurkeztu beharko du. Luzapena adierazitako epean eskatzen ez bada edo prestakuntzarako baldintzak betetzen ez badira, lortutako gaitasun-ziurtagiria indarrik gabe geldituko da prozedura batean, zeinetan interesdunari entzunaldia emanen baitzaio, eta beste gaitasun-ziurtagiri bat lortu beharko da.

5. Animalien ongizatearen arloan eskumena duen zuzendaritza nagusiak trebakuntza-ziurtagiri ofizialak bidaliko dizkio erakunde prestatzaileari, ikastaroa gainditu duten pertsonei eman diezazkien.

6. Ikastaro edo modulu espezifiko batean gaikuntza-ziurtagiri ofizial bat duten pertsonek ez dute modulu orokorra berriz gainditu beharko beste ikastaro edo modulu espezifiko batean ziurtagiri bat lortzeko.

50. artikulua . Egiaztagiri ofizialaren aitortza.

1. Pertsona batek gaikuntza-ziurtagiri ofiziala eskatu ahal izateko, eginak izan behar ditu erregelamendu honek indarra hartu aurretik animalien zaintzaileentzako prestakuntza-ikastaroak, eta justifikatua gutxienez bi urteko esperientzia.

2. Eskaera egiteko eredua eskuragarri egonen da Nafarroako Foru Komunitateko Administrazioan animalien ongizatearen arloan eskumena duen organoaren webgunean, eta animalien ongizatearen arloan eskumena duen zuzendaritza nagusian aurkeztuko da, prestakuntza horren ziurtagiriarekin batera, baita esperientzia justifikatzen duen curriculum vitae zehatz eta egiaztatuarekin ere. Prestakuntza horren egokitasuna baloratu ondoren, gaikuntza-ziurtagiri ofiziala emanen da.

V. KAPITULUA. PRESTAKUNTZA-ERAKUNDEEN ETA IKASTAROEN ERREGISTROA

51. artikulua . Prestakuntzaerakundeen eta ikastaro homologatuen erregistroa.

1. Lagun egiteko animaliak zaintzeko eta maneiatzeko baimendutako prestakuntza-erakundeen eta ikastaro homologatuen erregistroa sortzen da, animalien ongizatearen arloan eskumena duen zuzendaritza nagusiari atxikita.

2. Erregistroak hiru atal izanen ditu, eta, bertan, ofizioz inskribatuko dira prestakuntza-erakundeak, ikastaroak eta emandako gaitasun-ziurtagiriak.

a) Prestakuntza-erakunde baimenduen atala.

b) Ikastaro homologatuen atala.

c) Gaikuntza-ziurtagiri ofizialen atala.

8. eranskinean jasota daude atal bakoitzak gutxienez izanen dituen datuak.

3. Erregistroa modu informatizatuan eginen da, eta indarrean dagoen araudi aplikagarriak datu pertsonalen babesari buruz ezarritako betebeharrak beteko ditu.

V. TITULUA. ZAKUR-TREBATZAILEAK

I. KAPITULUA. ZAKUR-TREBATZAILE EGIAZTATUAK

52. artikulua . Trebatzaile egiaztatuak.

1. Trebakuntzarako zentro edo eskolek, 19/2019 Foru Legearen 13.h artikuluan araututakoarekin bat, langile egiaztatuak eduki behar dituzte lagun egiteko animalien trebakuntza-lanak egiteko, ezertan galarazi gabe Arriskutsuak izan daitezkeen animaliak edukitzeko araubide juridikoari buruzko 50/1999 Legean araututakoa eta otsailaren 2ko 3/2015 Foru Legean ezarritakoa (foru lege horren bidez arautu zen desgaitasuna dutenak, laguntza-zakurrekin daudenean, gune irekietan eta mugatutako beste gune batzuetan sartu, ibili eta egoteko duten askatasuna).

2. Honako hauek daude salbuetsita titulu honetan ezarritakoa betetzetik: indar armatuetako trebatzaileak, Estatuko segurtasun-indar eta -kidegoetakoak, Foruzaingokoak, udaltzaingokoak eta ofizialki baimendutako segurtasun-enpresetakoak.

3. Ofizialki onartutako erakunde edo zentroetan lortutako titulazioa duten trebatzaileak trebatzaile egiaztatutzat hartuko dira, eta Nafarroako Zakur-trebatzaileen Erregistroan inskribatzen ahalko dira.

4. Arriskutsuak izan daitezkeen animaliak trebatzeko jasotako prestakuntzaren egiaztagiriak ez du, berez, jarduera horretan aritzeko gaitzen; izan ere, horretaz gain, bete behar dira Arriskutsuak izan daitezkeen animaliak edukitzeko araubide juridikoari buruzko abenduaren 23ko 50/1999 Legearen 7.4 artikuluan edo hura ordezten duen araudian aurreikusitako baldintzak.

II. KAPITULUA. ZAKUR-TREBATZAILE EGIAZTATUEN ERREGISTROA

53. artikulua . Nafarroako Zakurtrebatzaileen Erregistroa.

1. Nafarroako Zakur-trebatzaileen Erregistroa sortzen da, Nafarroako Gobernuan animalien ongizatean eskumenak dituen departamentuari atxikita. Erregistro horrek izaera pertsonaleko datuen babesari buruzko araudian xedatutakoa beteko du.

2. Aurreko artikuluko 3. puntuan zehaztutakoaren arabera egiaztatuta dauden pertsona fisikoak inskribatuko dira erregistroan.

3. Zakurrak trebatzeko lanak Nafarroan egiteko, dela trebakuntzarako zentroetan dela horietatik kanpo, egiaztatu beharko da artikulu honetan araututako erregistroan egina dagoela inskripzioa.

4. Erregistroak 9. eranskinean jasotako datuak izanen ditu.

54. artikulua . Inskribatzeko prozedura.

1. Erregistroko inskripzioa interesdunak eskatuko dio animalien ongizatearen arloan eskumena duen zuzendaritza nagusiari, animalien ongizatearen arloan eskumena duen departamentuan eskabide-orri bat aurkeztuta, honako dokumentazio honekin batera:

a) Trebakuntzarako gaikuntza-tituluaren edo -ziurtagiriaren kopia kautotua, agintaritza eskudun batek aitortua, eta, hala badagokio, arriskutsuak izan daitezkeen animaliak trebatzeko gaikuntza jasotzen duena.

b) Trebatzaile gisa izandako esperientziaren denbora.

c) NANaren fotokopia kautotua.

d) Identifikazio fiskaleko zenbakia edo kodea.

e) Jakinarazpenetarako helbidea eta telefonoa.

2. Animalien ongizatearen arloan eskumena duen zuzendaritza nagusiak ebatziko du eskaera, gehienez ere hiru hilabeteko epean. Epe horretan ebazpenik ematen ez bada, baietsitzat joko da.

55. artikulua . Erregistratutako trebatzaileen betebeharrak.

1. Trebatzaileen erregistroan inskribatutako pertsonak betebehar hauek ditu:

a) Lagun egiteko animalien zentroetan arituz gero, horiek baimenduta eta erregistratuta egon beharko dute.

b) Arriskutsuak izan daitezkeen animaliak edukitzeko araubide juridikoari buruzko abenduaren 23ko 50/1999 Legearen 6. artikuluan ezarritako erregistroari hiru hilean behin jakinaraztea arriskutsuak izan daitezkeen animaliak trebatzera eraman dituzten bezeroen izenen zerrenda, animalia horren identifikazioa zehaztuta.

c) Jarduera eginen den zentroaren aldaketa jakinaraztea.

56. artikulua . Erregistroko inskripzioa ezeztatzea.

1. Trebatzaileen erregistroko inskripzioa ezeztatzen ahalko da, organo eskudunak dagokion administrazio-prozedura tramitatu ondoren eta interesdunari entzunaldia emanda, honako kasu hauetan:

a) Inskripzioa egiteko balio izan zuten baldintzak eta betekizunak aldatzen direnean, Nafarroako Gobernuan animalien ongizatearen eskumena duen departamentuari aldez aurretik jakinarazi gabe.

b) Frogatzen denean betetzen ez dela erregelamendu honetan, abenduaren 23ko 50/1999 Legean edo 19/2019 Foru Legean ezarritako betebeharren bat.

VI. TITULUA. ANIMALIEN POPULAZIOAK KONTROLATZEA

I. KAPITULUA. KATU-KOLONIAK

57. artikulua . Katukoloniak sortzea.

1. Katu-kolonia bat sortu eta kontrolatzeko, errespetatu beharko dira erregelamendu honetan ezarritako kokapen-baldintzak eta betekizun higieniko eta sanitarioak.

2. Katu-kolonia bat hiri-eremu batean edo landa-eremu batean egon daiteke, baina betiere saihestu behar da animaliak ingurune natural batera sartzea, hala nola ehiza-barrutietara, faunaren aterpeetara, naturagune babestuetara eta/edo Natura 2000 Sarera, ez bada edukitzen ehiza-barruti edo -aterpearen titularraren eta/edo ingurumen-organo eskudunaren baimena, ezertan galarazi gabe beste baimen batzuk.

3. Udalak, udalaz gaindiko erakundeak edo eskualdeak du koloniaren kokalekua ezartzeko ardura. Koloniak ezin die animaliei kalterik edo arriskurik eragin, ez eta osasun publikoari, animalien osasunari, ingurumenari eta herritarren bizikidetzari ere.

4. Udal, udalaz gaindiko erakunde edo eskualde batek sortutako katu-koloniak zaindu eta kudeatuko dira, ahal dela, animaliak babesteko entitate edo elkarteekin lankidetzan, 19/2019 Foru Legearen 17.3 artikuluan araututakoari jarraikiz. Nolanahi ere, albaitariaren laguntza eta prestatutako zaintzaile-elikatzaileak izan beharko dituzte.

5. Udalak, udalaz gaindiko erakundeak edo eskualdeak katu-kolonia osatzen duten animalien gehieneko kopuru bat ezartzen ahalko du, justifikatutako arrazoiak tarteko. Kopuru hori gaindituz gero, kolonia osoa edo gehiegizko animaliak birkokatu behar dira, erregelamendu honen 60.6 artikuluan ezarritakoarekin bat.

6. Katu-kolonia bat deuseztatzeko eta haren kokapena aldatzeko, udalaren txostena beharko da, horren justifikazioa eta animaliak birkokatu beharra biltzen dituena, erregelamendu honen 60.6 artikuluan ezarritakoarekin bat.

58. artikulua . CES/R programa.

1. Koloniaren populazioa kontrolatzeko, CES/R programa aplikatuko da (atzematea, esterilizazioa eta jaregitea edo itzulera).

2. CES/R programa aplikatzeko, honako jarduketa hauek egin behar dira:

a) Prestatutako langileek atzeman behar dituzte animaliak, 19/2019 Foru Legean araututakoa betez. Ahal dela, tranpa-kaiolak erabiliko dira, eta horiek etengabe behatuko dira. Ahal den neurrian, ez zaie estresa eraginen animaliei.

b) Animaliak, albaitariaren aholkupean, atzematearen kaiola berean eramanen dira albaitariaren kontsulta edo klinika batera, Lagun egiteko animaliak Nafarroan babesteari buruzko 19/2019 Foru Legearen 6.4 eta 7.19 artikuluetan araututakoa betez.

c) Albaitari batek:

c.1) Animalien egoeraren ebaluazioa eginen du, azterketa fisiko orokor baten bidez, gaixotasunak edo patologiak baztertzeko, edo eme bat ez dagoela haurdun, horrelakoetan esterilizazioa ez baita gomendagarria. Ikusten bada animalia bat ez dagoela behar bezala esterilizatzeko, interbentzioa atzeratuko da oneratu arte.

c.2) Eutanasia aplikatzen ahalko dio animalia bati, hark gaixotasun edo lesio bat baldin badu, eragozten diona animalien ongizatearen gutxieneko parametroekin bateragarria den bizi-kalitatea izatea, sufrimendu larria eta konponezina saihesteko.

c.3) Animaliak esterilizatuko ditu.

c.4) Animaliak mikrotxip bidez identifikatuko ditu, erregelamendu honen I. tituluan araututakoarekin bat.

c.5) Animaliak markatzen ahalko ditu, belarriaren puntan zentimetro bateko zeharkako ebaki bat eginez, erregelamendu honen 62. artikuluan ezarritakoarekin bat, errazago identifikatzeko esterilizatutako katu bat, koloniaren parte dena.

c.6) Erregelamendu honen II. tituluan ezarritako nahitaezko txertoak eta desparasitazioak aplikatuko dizkie animaliei.

c.7) Animalia bakoitzari egindako albaitaritza-jarduera guztiak fitxa kliniko batean erregistratuko ditu, eta fitxa hori animalia hartzen den unean irekiko du.

d) Animaliak non atzeman ziren, hor bertan jareginen dira. Albaitariak, animaliaren egoeraren ebaluazioa egiten duenean, koloniaz arduratzen diren langileen laguntzarekin, uste baldin badu animalia bat adoptatzeko modukoa dela (sozializatutako katuak edo sozializa daitezkeenak), harrera-zentro batera edo harrera-etxe batera eramanen du.

59. artikulua . Katukolonien erregistroa.

1. Udalak, udalaz gaindiko erakundeak edo eskualdeak katu-kolonien erregistro publiko bat eramanen du, eta, bertan, gutxienez, honako informazio hau jasoko da, ezertan galarazi gabe datuak babesten dituen araudian ezarritakoa:

a) Koloniaren izena, erregistro-zenbakia, sorrera data eta osatzen duten animalien kopurua.

b) Koloniaren arduradunaren (pertsona fisikoa edo juridikoa izan), zaintzaile-elikatzaileen eta albaitari arduradunaren izena eta NANa edo IFZ, eta horiekin guztiekin harremanetan jartzeko datuak.

c) Instalazioen kokapena, mota eta kopurua: jateko eta edateko askak, etxolak, etab.

d) Animalien identifikazioa, osasun datuak, altak eta bajak.

2. Katu-kolonia bakoitzaren arduradunak jakinarazi beharko ditu datuetan gertatzen diren aldaketak, erregistroa eguneratzeko.

60. artikulua . Kokapeneko baldintzak.

1. Katu-koloniak toki hauetakoren batean egon daitezke:

a) Bide eta espazio publikoak.

b) Udal parkeak eta lorategi-eremuak.

c) Udalaren titulartasuneko orubeak eta eremuak.

d) Jabearen berariazko baimena duen edozein kokaleku pribatu, etxebizitza partikular batean izan ezik.

2. Ezin izanen da koloniarik jarri:

a) Kirol zentroetako instalazioak.

b) Zakurrentzat bereziki egokitutako guneak.

c) Jatetxeetako eta/edo taberna eta kafetegietako terrazak.

d) Osasun zentroetako instalazioak (osasun etxeak, ospitaleak eta klinikak).

e) Zahar-egoitzak eta geriatrikoak.

f) Eskola, institutu edo ikastetxeen instalazioak.

g) Haur parkeak eta haurtzaindegiak.

h) Etxebizitza partikularrak.

i) Abeltzaintzako ustiategiak, elikagaien industriak, giza kontsumorako ez diren animalia-azpiproduktuekin lan egiten duten industriak.

j) Osasun edo ingurumen arloan arriskuak sor ditzaketen beste leku batzuk.

3. Koloniek, gainera, gutxienez 100 metroko distantzia gorde beharko dute hauetatik:

a) Osasun zentroetako instalazioak (osasun etxeak, ospitaleak eta klinikak).

b) Zahar-egoitzak eta geriatrikoak.

c) Eskola, institutu edo ikastetxeen instalazioak.

d) Haur parkeak eta haurtzaindegiak.

e) Ibilgailuen trafiko handiko bideak.

f) Abeltzaintzako ustiategiak, elikagaien industriak, giza kontsumorako ez diren animalia-azpiproduktuekin lan egiten duten industriak eta, animalien osasuna dela-eta, beste batzuk.

g) Lagun egiteko animalien zentroak eta bestelako gune zoologikoak.

4. Aireportu-eremuetan, aplikatu beharreko araudiak une bakoitzean ezartzen dituen distantziak errespetatu beharko dira.

5. Udalak, udalaz gaindiko erakundeak edo eskualdeak du kokaleku jakin batean kolonia bat ezartzeko ardura, artikulu honetan araututakoarekin bat. Aukera ematen ahalko du artikulu honetako 2. eta 3. puntuetan ezarritakoa betetzen ez duten espazioetan edo distantzietan kolonia bat finkatzeko, baldin eta tartean badaude justifikatutako eta egiaztatutako arrazoiak. Beharrezko neurriak hartuko ditu erregelamendu honetako 57. artikuluko 2. eta 3. apartatuetan aurreikusitakoa betetzen dela ziurtatzeko, bereziki kolonia landa-eremu batean ezartzeko baimena ematen denean.

6. Udalak, udalaz gaindiko erakundeak edo eskualdeak kolonia bateko animaliak birkokatzen ahalko ditu, inguruneko baldintzak ez badira egokiak animaliak bertan egoteko, aldez aurretik justifikazio-txosten bat eginda eta albaitariak gainbegiratuta. Animaliak birkokatzeko, antzeko ezaugarriak dituen beste katu-kolonia bat sortuko da. Animaliak, aldi baterako, baldintza etologikoak errespetatzen dituzten esparru egokituetan egoten ahalko dira, eta ez dira kaioletan isolatuta egonen, albaitari batek berariaz adierazten ez badu.

7. Kolonia kartel baten bidez identifikatuko da eremu publikoan. Kartel horretan, gutxienez, koloniaren erregistro-zenbakia eta kolonia ez errespetatzeak dakartzan zehapenak agertu beharko dira.

61. artikulua . Kolonia mantentzea.

1. Udala, udalaz gaindiko erakundea edo eskualdea da katu-kolonien kudeaketaren eta mantentzearen arduraduna, bertako langileen bidez edo hirugarren batekin hitzartutako langileen bidez.

2. Udalak, udalaz gaindiko erakundeak edo eskualdeak berariaz baimendu eta egiaztatutako prestakuntza jaso duten pertsonak izanen dira kolonia bateko animaliak zaintzeko eta elikatzeko arduradunak.

3. Katu-koloniak, gutxienez, honako zuzkidura hauek izan behar ditu:

a) Libratzeko hondartegiak: sarbide errazeko eremuetan jarrita, garbitzeko, baina jendearen pasabideetatik urrun, ahal den guztietan, eragozpenak saihesteko.

b) Jateko eta edateko askak: garbitzeko eta desinfektatzeko material egokikoak. Ahal dela, babestuta egonen dira, zaintzaile-elikatzaileez gain beste inork ez dezan elikagairik utz. Diseinuak, ahal den neurrian, beste animalia-espezie batzuek jatea saihestuko du.

c) Animaliak aterpetzeko lekuak.

4. Animaliei pentsu lehorra baino ez zaie emanen. Pentsu hori egunero izanen dute, eta ez da inoiz lurrean utziko. Kontsumitu gabeko pentsua aldian behin kenduko da. Pentsu hezea animaliak atzemateko edo albaitariak aginduta bakarrik erabiltzen ahalko da.

5. Kolonia osatzen duten animaliak baimendutako eremu eta espazio publikoetan baino ezin dira elikatu. Ahal den neurrian, beste animalia batzuek ez dute elikagaia eskuratuko.

6. Kolonia dagoen lekuak eta inguruneak baldintza higieniko-sanitario egokietan egon behar dute, bereziki jateko eta edateko askak garbitzeari dagokionez. Baldintza higienikoen aldizkako kontrolak egin behar dira, eta agintaritza eskudunaren esku egonen den txosten batean jasoko dira.

62. artikulua . Albaitaritzako jarduerak eta kontrolak.

1. Katu-kolonia bakoitzak albaitaritza-zerbitzu bat izan behar du. Zerbitzu horrek higiene- eta osasun-programa bat ezarri behar du, gutxienez honako hauek zehazteko: esterilizazioa, desparasitazioak, gaixotasunen kontrola, nahitaezko txertaketak eta animalia gaixo edo zaurituen tratamendua. Era berean, osasun neurriak ezarriko ditu, koloniara katu berri bat iristen denean: berrogeialdia, tratamenduak eta txertoak.

2. Koloniako animalia bakoitzak fitxa kliniko bat izan behar du, eta, honako hauek jaso behar dira bertan: animaliaren identifikazioa, osasun datuak, tratamenduak, diagnostikoak eta garrantzitsutzat jotzen den guztia.

3. Animaliak udalaren, udalaz gaindiko erakundearen edo eskualdearen izenean identifikatuko dira, erregelamendu honen I. tituluan katuak identifikatzeko ezarritakoarekin bat. Animalia identifikatzeko pasaportearen ordez edo animalia identifikatzeko agiriaren ordez, aurreko puntuan adierazitako fitxa klinikoa erabil daiteke.

4. Animalien esterilizazioa albaitari profesional batek eginen du, baimendutako instalazioetan eta edozein interbentzio kirurgikoren neurriak errespetatuz. Kolonia bateko katu guztiak, ahal dela, sei hilabete bete aurretik esterilizatuko dira, edo atzematen direnean.

5. Esterilizatutako animaliak belarrian mozketa bat izanda markatzen ahalko dira, erregelamendu honen 58.c artikuluan ezarritakoaren arabera, baldin eta koloniaz arduratzen den albaitariak beharrezkotzat jotzen badu identifikatzeko eta animaliaren onurarako, berriz atzematea eta lekualdatzea eraginen liekeen estresa saihesteko. Marka egiten duen albaitariak horren berri jasoko du ziurtagiri baten bidez edo, zuzenean, animaliaren fitxan.

6. Animaliei txertoa jarriko zaie, ahal den guztietan, lagun egiteko animalien nahitaezko tratamenduei dagokienez erregelamendu honetan araututakoarekin bat. Une horretan parasitoen aurkako barneko eta kanpoko tratamendua eginen da.

7. Koloniaz arduratzen den albaitariak agintaritza eskudunari jakinaraziko dio zein diren nahitaez aitortu beharreko gaixotasunak, 48 orduko gehieneko epean. Amorrua kontrolatzeko kontingentzia-planean ezarritakoa aplikatuko da gaixotasun hori detektatuz gero.

8. Koloniako animaliaren bat hiltzeko edo eutanasia egiteko, 19/2019 Foru Legearen 12. artikuluan zehaztutakoari jarraituko zaio, horretarako ezartzen diren protokoloak betez.

63. artikulua . Ikuskapenak eta kontrolak.

1. Kolonia erregistratuta dagoen udalak, udalaz gaindiko erakundeak edo eskualdeak kontrolatu behar du erregelamendu honetan ezarritako baldintzak betetzen direla. Gutxienez, urteko kontrol bat egin behar du, bai eta dagokion txostena ere. Txosten horretan jaso behar da aplikatzekoa den araudia bete dela, koloniaren helburuak zein diren, herritarrekin izandako gorabeherak konpondu direla eta, hala badagokio, zer neurri hartu diren.

2. Udalak, udalaz gaindiko erakundeak edo eskualdeak, agiri bidez egiaztatutako kexa eta gorabeherengatik, neurri espezifikoak ezartzen ahalko ditu detektatutako egoera konpontzeko. Neurri horiek murriztaileagoak izan daitezke katu-kolonietarako oro har aurreikusitakoak baino. Beharrezkoa izanez gero, eta aldez aurretik justifikatuta, aurreikusten ahalko du koloniaren arduradunari baimena errebokatzea ere, eta kudeaketa beste arduradun bati esleitzen ahalko dio.

3. Kolonia baten sorreraren errebokazioa txosten arrazoitu batean oinarritu beharko da. Neurria hilabete lehenago jakinaraziko zaio horren arduradunari, eta kolonia osatzen duten animaliak, ahal dela, udalerri bereko beste kolonia batzuetan banatuko dira, edo kolonia berriak sortuko dira, erregelamendu honen 60.6 artikuluan ezarritakoarekin bat, betiere albaitari batek gainbegiratuta.

64. artikulua . Sentsibilizazioprotokoloak eta kanpainak.

1. Udalek, udalaz gaindiko erakundeek edo eskualdeek protokoloak ezarriko dituzte katu-kolonien kudeaketa, kontrola eta jarraipena egiteko, bai eta prestakuntza ere animaliak maneiatzen dituzten langileentzat. Gutxienez, erregelamendu honetan ezarritakoa bete behar da.

2. Udalek, udalaz gaindiko erakundeek edo eskualdeek informazio-kanpainak sustatu beharko dituzte herritarren artean katu-kolonien kudeaketari buruz. Horretarako, erakunde laguntzaileen laguntza jaso dezakete.

II. KAPITULUA. HIRIKO HEGAZTIAK

65. artikulua . Usoen populazioa kontrolatzea.

1. Udalak, udalaz gaindiko erakundeak edo eskualdeak usoen populazioa kontrolatzen ahalko du, osasun- edo ingurumen-arrazoiengatik edo kontrolik gabeko ugalketak hala justifikatzen duenean. Horretarako, prebentzio- eta kontrol-alderdiak lehenetsiko ditu, hurrengo artikuluan araututako prozedura baimenduekin, hegaztientzako kaltegarriak izan daitezkeen beste neurri batzuen gainetik.

2. Higiezinen, etxebizitza hutsen, nabeen eta antzekoen jabeek behar diren neurriak hartu beharko dituzte usoen kontrolik gabeko ugaltzea saihesteko, usook habia egitea edo haztea oztopatuz. Neurri horiek ez diete inola ere kalterik edo heriotzarik eraginen hegaztiei.

66. artikulua . Baimendutako kontrolprozedurak.

1. Usoen populazioa handia edo problematikoa den lekuetan egin behar dira kontrol-prozedurak. Horretarako, kontuan hartu behar dira zenbateko kalteak egin diren eremuetan eta hurbil dauden arrisku higieniko-sanitario handiagoa duten lekuetatik (merkatuak, ikastetxeak, adinekoen edo dependentzia dutenen egoitzak eta osasun arretako zentroak).

2. Honako hauek dira baimendutako metodoak edo prozedurak:

a) Jaiotze-tasa kontrolatzea pentsu bidezko antisorgailuarekin.

Hegaztiak elikatzeko pentsu konposatuan edo arto-aleetan albaitaritzako substantzia edo sendagai bat paratzea (nikarbazina edo beste batzuk), hegaztien ugaltze-ahalmena eragozten duena. Albaitari baten aginduz erabili behar da beti, eta baimendutako enpresa batek aplikatu behar du. Ahal dela, kontrolaren xedeko espezierako janleku hautatuetan erabiliko dira.

b) Jaiotza-tasa kontrolatzea usategi ekologikoekin.

Hiri lurzoruan usategiak jartzea, ahal dela parkeetan, hegaztiek barnean egiten dezaten habia. Errunaldiko arrautzen ordez faltsuak jartzen dira, hegaztiek diferentzia ez ikusteko eta txitatzen jarraitzeko, usakumerik jaio gabe.

c) Elikagaia mugatzea.

Hegaztiek eskura dituzten elikagaiak murriztea, kanpainak eginez herritarrak sentsibilizatzeko usoei jaten emateak eragiten dituen ondorio kaltegarriei buruz.

Baimendutako eta prestatutako elikatzaileek soilik elikatu behar dituzte hegaztiak usategi ekologikoetan edo pentsu bidezko antisorgailua emateko eremuetan.

d) Babeslekuak mugatzea.

Hegaztiak lurzati publiko edo pribatuetan habiak egiteko leku edo zuloetara sar daitezen eragoztea, uxatze sare zurrun metalikoak edo gelditzearen aurkako arantzak instalatuz.

e) Harrapari naturalak.

Hegazti harrapariak hiri ingurunean sartzea, izan harrapari naturalak edo falkoneria-hegaztiak.

f) Nafarroako Gobernuan animalien ongizatean eskumenak dituen departamentuko agintaritza eskudunak baimentzen dituen beste metodo batzuk.

67. artikulua . Sentsibilizazioprotokoloak eta kanpainak.

1. Udalek, udalaz gaindiko erakundeek edo eskualdeek protokoloak ezarri beharko dituzte usoen kudeaketa, kontrola eta jarraipena egiteko, gutxienez erregelamendu honetan ezarritakoa betez.

2. Udalak, udalaz gaindiko erakundeak edo eskualdeak informazio kanpainak sustatu beharko ditu herritarren artean, animalia horiek kontrolatzeari buruz. Horretarako, erakunde laguntzaileen laguntza jasan dezake.

VII. TITULUA. ANIMALIAK BABESTEKO ETA DEFENDATZEKO ELKARTEAK ETA ERAKUNDE LAGUNTZAILEAK

I. KAPITULUA. ANIMALIAK BABESTEKO ETA DEFENDATZEKO ELKARTEEN ETA ERAKUNDE LAGUNTZAILEEN ERREGISTROA

68. artikulua . Animaliak babesteko elkarteen eta erakunde laguntzaileen erregistroa.

1. Lagun egiteko animaliak babesteko eta defendatzeko elkarteen eta erakunde laguntzaileen erregistroa sortzen da, eta bertan inskribatuko dira animaliak babesteko elkarteak eta erakunde laguntzaileak. Erregistro horren kudeaketa esleitzen zaio Nafarroako Gobernuan animalien ongizatean eskumena duen departamentuari.

2. Erregistroaren helburua da elkarren ezagutza, informazioa eta lankidetza hobetzea Nafarroako Foru Komunitateko Administrazioaren eta animaliak babesteko eta defendatzeko erakundeen artean, horren bidez honako hauek sustatzeko: lagun egiteko animaliak babesteko eta defendatzeko dibulgazioa eta prestakuntza, lagun egiteko animaliak arduraz edukitzea, abandonuaren aurkako borroka eta adopzioa bultzatzea.

3. Erregistroak bi atal ditu: lehenengoan, lagun egiteko animaliak babesteko eta defendatzeko elkarteak jasoko dira; bigarrenean, erakunde laguntzaileak.

4. Erregistroak izanen dituen datuak erregelamendu honen 10. eranskinean daude jasota.

69. artikulua . Erregistroan inskribatzea.

1. Erregistroaren lehenengo atalean inskribatzen ahalko dira indarreko legeriaren arabera eratutako elkarte, elkarteen federazio eta delegazio guztiak, baldin eta baldintza hauek betetzen badituzte:

a) Legez eratuta eta Nafarroako Elkarteen Erregistroan erregistratuta egotea.

b) Helburu nagusia animalien defentsa eta babesa izatea.

c) Nafarroan animalien babesa eta defentsa sustatzeko jarduerak egitea, besteak beste.

d) Helburuak betetzen direla bermatzeko giza baliabide eta baliabide material nahikoak eta antolamendu egokia izatea.

2. Erregistroaren bigarren atalean inskribatzen ahalko dira aurreko 1. apartatuan adierazitako baldintzak beteta honako hauek ere betetzen dituzten erakunde guztiak:

a) Benetan funtzionamenduan egotea eta Nafarroan animalien defentsaren eta babesaren aldeko jarduerak egin izana, gutxienez eskaera aurkeztu aurreko urtean. Animaliak hartzeko zentro baimendu eta erregistratu bat eduki dezakete, edo hitzarmen bat sinatuta izan harrera-zentro baten erakunde titularrarekin.

b) 78. artikuluan araututako Arau-hausleen Erregistroan jasota ez egotea aurrekariak izanik animaliekin lotutako jardueretan aritzeko aldi baterako desgaikuntza jaso izanagatik, edo animaliak edukitzeko debekua izanik, zehapen administratibo edo penal irmoaren ondorioz. Betebehar hori erakundeari zein haren gobernu- edo zuzendaritza-organoak osatzen dituzten pertsonei eska dakieke.

c) Bere forma juridikoari dagozkion betebeharrak betetzea eta zerga-betebeharrak eta Gizarte Segurantzarekikoak egunean izatea.

3. Entitateek eskatuta eginen da inskripzioa, animalien ongizatearen arloan eskumena duen Nafarroako Foru Komunitateko Administrazioaren organoaren webgunean eskuragarri egonen den eskaera-eredua erabiliz.

Animaliak babesteko eta defendatzeko elkarteek eskatzen ahalko dute, eskaera bakar batean, elkarteen erregistroko lehenengo atalean inskribatzeko, eta erakunde laguntzaile gisa aitortzeko, horrek ekarriko baitu bigarren atalean sartzea.

4. Eskaerarekin batera, agiri hauek ere aurkeztuko dira:

a) Erantzukizunpeko adierazpen bat, zehazten duena Nafarroako Elkarteen Erregistroan agertzen diren datuak eskaera egiten den unean eguneratuta daudela.

b) Erakunde eskatzailearen estatutuak, Elkarteen Erregistroan inskribatuta daudenak.

c) Entitateak eskaera egin aurreko urtean egin dituen jardueren deskribapena eta eskaera aurkezten den urterako jarduera programa.

5. Bigarren atalean erakunde laguntzaileak sartzeko eskatzen duen eskaerarekin batera, agiri hauek ere aurkeztu beharko dira:

a) Justifikazio-memoria bat, beren helburuak betetzeko dituzten baliabide material eta pertsonalei buruz.

b) Elkarteko organo eskudunak egindako ziurtagiria, elkarteko tarifak ordainduta dituzten bazkideen kopurua zehazten duena.

c) Animaliak hartzeko zentro baimendu eta erregistratu bat izanez gero, zentroaren identifikazio-datuak.

d) Erakunde publikoekin indarrean dauden hitzarmenak sinatuta izanez gero, horien kopia, bai eta horien indarraldiaren erantzukizunpeko adierazpena ere.

e) Entitateko organo eskudunak emandako ziurtagiria, non jasoko baita haren gobernu-organoek erakunde laguntzaile gisa aitortzeko eta erregistroan inskribatzeko hartutako erabakia.

f) Agintaritza eskudunak emandako ziurtagiria, egiaztatzen duena zerga-betebeharrak eta Gizarte Segurantzarekikoak egunean dituela.

g) Erantzukizunpeko adierazpena, zehazten duena erakundeak bere forma juridikoaren ondoriozko betebeharrak betetzen dituela.

h) Erakundearen erantzukizunpeko adierazpen bat, zehazten duena ez duela zehapenik jaso administrazio-ebazpen irmo baten bidez, ez eta kondena penalik ere, animalien babesari eta ongizateari buruzko araudia ez betetzeagatik, animaliekin jarduerak egiteko edo horiek edukitzeko desgaikuntza zigorrera edo debekura. Animalien ongizatearen arloan eskumena duen organoak ofizioz egiaztatuko du erakundeko gobernu- edo zuzendaritza-organoetako kideak ez daudela sartuta 78. artikuluan araututako Arau-hausleen Erregistroan, 2. apartatuko b) letran aurreikusitako betebeharra betetzen dela egiaztatzeko.

i) Beste edozein dokumentu, aurkeztu nahi dena merezimenduak edo aitortza baliarazteko egindako jardueren ondorioz.

6. Ez da Nafarroako Foru Komunitateko Administrazioaren esku dagoen dokumentazioa aurkeztu beharko, baldin eta aldaketarik izan ez badu. Kasu horretan, hura aurkeztu beharrean, dokumentuari dagokion espedientearen identifikazioa aurkezten ahalko da, eta animalien ongizatearen arloan eskumena duen organoak, era berean, eskaera egiten ahal die helburu horretarako behar diren elkarteei.

7. Inskripzio eskaerak ez baditu ezarritako beharkizunak jasotzen edo adierazitako dokumentazioa erantsita ez badu, eskaera eginen zaio delako elkarteari hamar egun balioduneko epean akatsa zuzen dezala edo aginduzko dokumentuak aurkez ditzala. Halaber, jakinaraziko zaio, hori egiten ez badu, eskaerari uko egiten diola ulertuko dela.

8. Erregistroko organo kudeatzaileak elkartearen dokumentazioaren kopia eskatzen ahalko dio Nafarroako Elkarteen Erregistroko pertsona titularrari, baldin eta beharrezkoa badu bere eginkizunak betetzeko.

70. artikulua . Erregistroan inskribatzeko prozedura.

1. Animalien ongizatearen arloan eskumena duen organoaren ebazpen bidez eginen da erregistroko inskripzioa, betiere eskatutako baldintzak betetzen direla egiaztatzen bada eta aurkeztutako dokumentazioa aztertu ondoren. Inskripzioak zehaztuko du erakundea zein ataletan inskribatzen den, eta, hala badagokio, elkartea erakunde laguntzaile gisa aitortuko da.

2. Hiru hilabetekoa izanen da ebazpena emateko eta jakinarazteko epea, eskaera aurkezten den egunetik. Ebazpena jakinarazi gabe epea iraganik, inskripzio eskaera baietsitzat joko da administrazio isiltasunaren bidez.

3. Inskripzioa ukatzen duen ebazpenaren aurka, gora jotzeko errekurtsoa jartzen ahalko da hilabeteko epean, bat etorriz Nafarroako Foru Komunitateko Administrazioari buruzko martxoaren 11ko 11/2019 Foru Legean eta administrazio-prozedura erkidea erregulatzen duen arauan aurreikusitakoarekin.

71. artikulua . Aldi baterako etenaldia eta behin betiko baja.

1. Honako arrazoi hauengatik eginen da aldi baterako etenaldia elkarteen eta erakunde laguntzaileen erregistroan eta/edo aldi baterako kenduko da erakunde laguntzaile gisa aitortzen duen titulua:

a) Titulu honetan aurreikusitako betebeharrak ez konplitzea. Kasu horretan, 6 hilabeterako izanen da, eta entitateak epe horretan bete beharko ditu bere betebeharrak.

b) Eskatzen zaizkion datuak faltsutu edo ezkutatzea, ordenamendu juridikoan ezarritako erantzukizunak ezertan ukitu gabe. Kasu horretan, etenaldia urtebetekoa izanen da haren ebazpenaren egunetik aurrera.

2. Erregistroan aldi baterako etenaldia egiteko edo erakunde laguntzailearen titulua aldi baterako kentzeko, animalien ongizatearen arloan eskumena duen organoak erabakiko du ebazpenaren bidez, erakunde interesdunari entzunaldia eman ondoren.

3. Ebazpenean zehaztuko da zer atal ukitzen duen etenaldiak. Ebazpen horren aurka, gora jotzeko errekurtsoa jartzen ahalko da, ebazpena jakinarazi eta biharamunetik hilabeteko epean.

4. Arrazoi hauetako batengatik emanen da behin betiko baja elkarte eta erakunde laguntzaileen erregistroan, atal batean nahiz bietan, eta, hala badagokio, kenduko da erakunde laguntzailearen titulua:

a) Erakundeak berak eskatu duelako, haren ordezkariak idatziz adierazita.

b) Erakundea desegin delako.

c) Sei hilabeteko epean zuzendu ez delako artikulu honen 1.a) apartatuaren ez-betetzea.

d) Eskatzen zaizkion datuak berriro faltsutu edo ezkutatu dituelako, entitatea lehenago etenaldian egon denean arrazoi horregatik, artikulu honetako b) apartatuaren arabera.

e) Erregelamendu honen 69. artikuluan ezarritako baldintzak biltzen edo betetzen ez dituela egiaztatu delako, elkarteari entzunaldia eman ondoren.

5. Animalien ongizatearen arloan eskumena duen organoak emanen du erregistroan inskribatzea edo erakunde laguntzailearen aitorpena ezeztatzen duen ebazpena, ukitutako atalak adierazita.

II. KAPITULUA. ERAKUNDE LAGUNTZAILEAK

72. artikulua . Erakunde laguntzaileen ahalmenak.

Erakunde laguntzaile gisa aitortutako animaliak babesteko eta defendatzeko elkarteek honako ahalmen hauek izanen dituzte:

a) "Nafarroako Gobernuaren erakunde laguntzailea" adierazpena erabiltzea era guztietako dokumentuetan, izenaren edo izendapenaren ondoren.

b) Hitzarmenak adostea toki erakundeekin edo Nafarroako Gobernuarekin, animaliak babesteko lanak garatzeko.

c) Nafarroako Gobernuaren edo toki erakundeen dirulaguntzak eta laguntzak jasotzen ahalko dituzte, animaliak babesteko eta defendatzeko egiten dituzten jardueretarako, bereziki lankidetza hitzarmenen ondorioz egiten dituztenetarako.

d) Agintaritza-agenteen lankidetza eta laguntza jasotzen ahalko dute administrazioarekin egindako akordioen ondoriozko kudeaketetan.

e) Nafarroako Gobernuko departamentuei eta toki erakundeei eskatzen ahalko diete ikuskapenak egin ditzatela irregulartasun zantzuak dauden kasu zehatzetan.

f) 19/2019 Foru Legetik eta ordenamendu juridikoaren gainerako arauetatik eratortzen diren gainerako ahalmenak.

73. artikulua . Erakunde laguntzaileen betebeharrak.

Erakunde laguntzaile gisa aitortutako animaliak babesteko eta defendatzeko elkarteek honako betebehar hauek izanen dituzte:

a) Entitate eta elkarte laguntzaileen erregistroan jasota egon behar diren datuak eguneratuta izatea.

b) Aktiboki parte hartzea animalien babesa eta animalien edukitze arduratsua sustatzeko prestakuntza- eta zabalkunde-programetan.

c) Abandonuaren aurka borrokatzeko, harrera egiteko eta animalien adopzioa sustatzeko programetan parte hartzea, horiek proposatzea eta garatzea.

d) Abandonatutako animaliak edo harrera-programetan daudenak biltzen, hartzen eta mantentzen laguntzea, lagun egiteko animalia-zentro gisa baimendutako harrera-zentroan aldi baterako ostatu emanez, halakorik badute. Hala badagokio, udalekin lankidetzan aritzea katu-kolonien kudeaketan.

e) Egindako jardueren memoria aurkeztea animalien ongizatearen arloan eskumena duen organoari, kasuan kasuko urte naturalaren hurrengo urteko martxoaren 31 baino lehen.

f) Egiten dituzten jarduerei buruzko txostenak ematea administrazio publikoei, haiek hala eskatzen dizkietenean.

g) Animalien ongizatearen arloan eskumena duen organoari urteko kontuak ematea, bereziki laguntzak jasotzen dituzten edo lankidetza-hitzarmenak sinatzen dituzten inskribatutako erakundeei dagokienez.

h) Agintaritza eskudunari jakinaraztea bere eskumenen erabilerari eragin diezaiokeen edozein gertaera, bereziki animalien ongizatearen arloko zehapen-ahalaren erabilerari eragin diezaiokeena.

i) 19/2019 Foru Legetik eta ordenamendu juridikoaren gainerako arauetatik eratortzen diren gainerako betebeharrak.

74. artikulua . Ikuskapenak eta kontrolak.

Animalien ongizatearen arloan eskumena duen zerbitzuak beharrezkoak diren ikuskapenak, kontrolak, jarraipena eta ikuskapenak eginen ditu, egiaztatzeko beharrezko baldintzak betetzen direla Lagun egiteko animaliak babesteko eta defendatzeko elkarteen eta erakunde laguntzaileen erregistroan inskribatzeko eta erakunde laguntzaile gisa onartua izateko, bai eta aurreko artikuluan ezarritako betebeharrak ere.

75. artikulua . Lankidetzahitzarmenak.

Erakunde laguntzaileek lankidetza-hitzarmenak sinatzen ahalko dituzte administrazio publikoekin. Hitzarmen horietan aurreikusten ahalko da xedearen inguruko beste eduki batzuen artean, animaliak babesteko eta defendatzeko jarduera hauek egitea:

a) Abandonatutako, galdutako eta jabeek emandako animaliak biltzea.

b) Beren instalazioak edo hirugarrenentzat kudeatzen dituztenak erabiltzea abandonatutako, galdutako, lagatako edo administrazioak konfiskatutako animaliak hartzeko eta mantentzeko, edo osasun arrazoiengatik isolatuta egon behar dutenak.

c) Abandonatutako animalien adopzioa kudeatzea.

d) Katu-koloniak kudeatzea.

e) 19/2019 Foru Legearen espiritua eta edukia zabaltzea.

f) Alderdiek adosten dituzten eta 19/2019 Foru Legearen helburuak lortzen laguntzen duten beste jarduera batzuk.

76. artikulua . Laguntzak edo dirulaguntzak.

Ezertan galarazi gabe sinatzen diren hitzarmenen ondorioz erabakitzen diren ekarpenak eta finantzaketa, dirulaguntza-lerroak ezartzen ahalko dira erakunde laguntzaile gisa aitortutako elkarteentzat. Oinarri arautzaileak animalien ongizatearen arloan eskumena duen zuzendaritza nagusiaren ebazpen bidez onetsiko dira.

VIII. TITULUA. ARAU-HAUSLEAK

77. artikulua . Arauhausleen Erregistroa.

1. Arau-hausleen Erregistroa 19/2019 Foru Legearen 30.3 artikuluan ezarritakoaren arabera sortzen da, eta Nafarroako Gobernuan animalien ongizatearen arloan eskumena duen departamentuari atxikitzen zaio. Erregistro horrek izaera pertsonaleko datuen babesari buruzko araudian xedatutakoa beteko du.

2. Pertsona fisiko edo juridikoak ofizioz inskribatuko dira erregistroan, baldin eta desgaituak izan badira animalia biziekin lotutako lanbide, ogibide edo merkataritzan aritzeko, edo edozein jarduera egiteko edo halako animaliak edukitzeko, administrazio-zehapen baten edo zigor penal baten ondorioz, animalien babesari eta ongizateari buruz indarrean dagoen araudia ez betetzeagatik.

3. Pertsona fisiko edo juridikoak ofizioz inskribatuko dira erregistroan, halaber, baldin eta animaliak edukitzeko debekuren bat ezarri bazaie zehapen-espediente bat edo prozedura penal bat hastean, kautelazko neurri gisa.

4. Erregistroak 11. eranskinean jasotako datuak izanen ditu.

5. Erregistroa konektatuta egonen da Lagun Egiteko Animalien Identifikaziorako Nafarroako Erregistroarekin, (LEAINE), eta aurreko apartatuko datuak azken horretan ere agertuko dira.

78. artikulua . Inskribatzeko prozedura.

1. Zehatzeko ahala baliatu zuen organo eskudunak edo, hala badagokio, agintaritza eskudunak Arau-hausleen Erregistrora igorriko du aurreko artikuluan aipatutako informazio guztia, bai eta informazio horretan edo ezarritako zehapen eta/edo epai irmoetan egindako edozein aldaketa ere, zehapena irmo bihurtu edo kondena-epaiaren berri izan eta hurrengo 72 orduko epean.

2. Arau-hausleen Erregistroko aurrekari penalak ezeztatu eginen dira delituei dagokienez, legeria penalak ezartzen dituen epeetan. Administrazio-zehapenei dagokienez, epe hauetan ezeztatuko da erregistroko inskripzioa:

a) Zehapen oso astunak: ezarritako zehapena bete eta 3 urteko epean.

b) Zehapen astunak: ezarritako zehapena bete eta 2 urteko epean.

c) Zehapen arinak: ezarritako zehapena bete eta 6 hilabeteko epean.

d) Zehapen osagarriak: neurria bete eta 3 urteko epean.

79. artikulua . Erregistroa kontsultatzea.

1. Erregistroa kasu hauetan kontsultatu beharko da:

a) Animalia bat LEAINEn inskribatu aurretik, dela lehenengo identifikazioan, dela erregistroan dauden datuak aldatzean (gaitutako albaitariak, toki-erakundeak edo agintaritza eskudunak egin behar du kontsulta).

b) Baimenak eta/edo gaikuntzak tramitatzean, animaliekin lotutako jardueraren bat egiteko edo lanbide, ofizio edo merkataritzan aritzeko (agintaritza eskudunak egin behar du kontsulta).

c) Galdutako animalia bat saldu, adopzioan eman, jabeari itzuli edo animalia bat harrera-etxe batean utzi aurretik (lagun egiteko animalien zentroko arduradunak egin behar du kontsulta).

2. Udalek, arriskutsuak izan daitezkeen animaliak edukitzeko lizentziak emateko, erregistroa kontsultatuko dute interesdunaren aurrekariak ezagutzeko.

3. Erregelamendu honen 9. artikuluan ezarritakoaren arabera, pertsona eta erakunde baimenduak sartzen ahalko dira LEAINEko Arau-hausleen Erregistroko datuak kontsultatzeko. LEAINEn jasotako datuak eskuratzeko eta tratatzeko, datu pertsonalak babesteko araudian xedatutakoa beteko da beti.

IX. TITULUA. ANIMALIEN BABESERAKO AHOLKU KOMITEA

80. artikulua . Izaera, atxikipena eta araubide juridikoa.

1. Animalien Babeserako Aholku Komitea (aurrerantzean, Komitea) kontsulta- eta aholkularitza-organo bat da lagun egiteko animalien babesaren eta ongizatearen arloan, 19/2019 Foru Legearen bidez sortu zena.

2. Komitea kide anitzeko organo bat da, animalien ongizatearen arloan eskumenak dituen zuzendaritza nagusiari atxikia, funtzionamenduari dagokionez. Haren osaera eta funtzionamendua araututa daude erregelamendu honetan aurreikusitako xedapenetan eta Nafarroako Foru Komunitateko Administrazioari buruzko martxoaren 11ko 11/2019 Foru Legean aurreikusitako kide anitzeko organoei buruzko xedapenetan.

81. artikulua . Xedeak.

Komitearen helburu nagusia da lagun egiteko animalien edukitze arduratsuaren aleko eta tratu txarren eta abandonuaren aurkako ekintza nagusiak aztertzea eta proposatzea.

82. artikulua . Eginkizunak.

1. Komiteak honako eginkizun hauek izanen ditu:

a) Aholkularitzakoa, honako hauei buruzko txostenak eta irizpenak emanen baititu:

a.1) Animalien defentsa eta babesa arautzeko foru lege aurreproiektuak eta xedapen orokorren proiektuak.

a.2) Animalien defentsarekin eta babesarekin zerikusia duten planak eta programak.

a.3) Animalien defentsaren eta babesaren arloko jarduketen urteko programa eta kasuko urteko memoria.

b) Kontsultakoa da, irizpenak eta txostenak eginen baititu Nafarroako Gobernuak edota haren departamentuek egiten dizkioten galdeei buruz.

c) Parte hartzekoa, bertan eztabaidatuko baita tokiko, udalaz gaindiko edo eskualdeko erakundeek eta animaliak babestearekin eta babestearekin zerikusia duten erakundeek egiten dizkioten proposamen edo ekimenei buruz, honako hauei dagokienez:

c.1) Animalien defentsarekin eta babesarekin zerikusia duten planak, programak edo neurriak.

c.2) Animalien babesean eta defentsan esku hartzen duten agenteen arteko jardunak koordinatzea.

c.3) Animalien defentsarekin eta babesarekin zerikusia duten ikerketa-programak, biltzarrak, mintegiak edo antzeko beste batzuk.

c.4) Legezko eta erregelamenduzko xedapenek berariaz esleitzen dizkioten gaiak.

83. artikulua . Osaera.

1. Komiteak kide hauek izanen ditu:

a) Animalien ongizatearen arloan eskumena duen zuzendari nagusia; Komiteko burua izanen da.

b) Animalien ongizatearen arloan eskumena duen departamentuko bi ordezkari; horietako bat Komiteko buruordea izanen da. Buruordea buruaren ordez arituko da hura kanpoan dagoenean, edo gaixo, edo haren lanpostua aldi baterako hutsik dagoenean. Halaber, buruak esleitzen dizkion eginkizunak izanen ditu.

c) Ingurumen, osasun publiko, hezkuntza eta barne arloko gaietan eskumenak dituzten Nafarroako Gobernuko departamentuko lau ordezkari.

d) Nafarroako Udal eta Kontzejuen Federazioko hiru ordezkari.

e) Nafarroako Albaitarien Elkargoko ordezkari bat.

f) Erakunde laguntzaile gisa aitortutako animaliak babesteko eta defendatzeko elkarteen hiru ordezkari. Erakundeek hiru titular eta hiru ordezko aukeratuko dituzte.

g) Nafarroako Gobernuaren kasuan kasuko erregistroan inskribatutako ehiztarien elkarte nagusien bi ordezkari.

h) Nafarroako Gobernuaren kasuan kasuko erregistroan inskribatutako hazle eta trebatzaileen elkarte nagusien ordezkari bat.

i) Guardia Zibileko Natura Babesteko Zerbitzuko (SEPRONA) ordezkari bat.

j) Foruzaingoko Ingurumena Babesteko Brigadako ordezkari bat.

2. Adituak ere joaten ahalko dira bileretara, gaian duten ezagutza bereziagatik, buruak hala iritziz gero, edo edozein kidek proposatuta eta buruak onartuta, eta kasuan kasuko bilkuran entzun beharko zaie.

3. Komiteko idazkaria Zuzenbidean lizentziatutako pertsona bat izanen da, animalien ongizatearen arloan eskumena duen departamentuko funtzionarioa izanen dena. Hitza izanen du, baina botorik ez.

4. Animalien defentsaren eta babesaren arloan eskumena duen departamentuko kontseilariak izendatuko ditu Komiteko kideak, lau urterako, ordezkatutako organismoen proposamenak, halakorik egiten badute, kontuan hartuta.

84. artikulua . Deialdiak.

1. Bilkuretarako deialdiak buruak eginen ditu egoki deritzonean edo, bidezko bada, Komiteko kideen herenak proposatuta. Deialdi horiei jorratu nahi diren gaien zerrenda erantsi beharko zaie.

2. Deialdia egiteko, jakinarazpen elektronikoa bidaliko zaio Komitea osatzen duen pertsona bakoitzari, bakoitzak emandako helbide elektronikora, deialdia egiteko aurreikusitako eguna baino 6 egun baliodun lehenago. Salbuespen gisa, epe hori gutxienez 48 ordura murrizten ahalko da, deialdia bitarteko elektronikoen bidez bidaliz gero, buruaren iritziz presazko arrazoiak badaude.

3. Deialdian bilkuraren eguna, ordua eta tokia adieraziko dira, baita gai-zerrenda ere.

4. Posible bada, deialdiak bitarteko elektronikoen bidez bidaliko zaizkie kide anitzeko organoko kideei. Bertan gai-zerrenda jasoko da, eta, horrekin batera, hura eztabaidatzeko beharrezkoa den dokumentazioa erantsi, ahal denean, eta bilkura zer egoeratan izanen den zehaztu. Bilkura urrutikoa baldin bada, konexio sistema adieraziko da, eta, kasuan kasuan, bileran parte hartzeko behar diren bitarteko teknikoak non aurki daitezkeen zehaztu.

5. Ezin izanen da eztabaidatu edo erabaki gai-zerrendan sartua ez dagoen deus, salbu, kide anitzeko organoko kide guztiak bildurik daudela, gaia presazko deklaratzen bada, gehiengoak horren aldeko botoa emanda.

85. artikulua . Eraketa eta erabakiak hartzea.

1. Komitearen eraketa baliozkoa izan dadin, bilkurak egin, eztabaidatu eta erabakiak hartzeari dagokionez, beharrezkoa izanen da buruak eta idazkariak edo haien ordezkoek parte hartzea, bertaratuz edo urrutitik, baita Komiteko kideen bi herenek ere.

2. Aurreko paragrafoan esandakoa gorabehera, bilkurak irekitzen ahalko dira, aurretik deialdirik egin beharrik gabe, Komiteko kide guztiak bildurik direla aho batez erabakitzen badute ekitaldia bilkuratzat hartzea.

3. Komiteko buruak bilkurak bertan behera utz ditzake. Hala denean, bilkurak zer egunetan eta ordutan jarraituko duen adierazi behar du. Edonola ere, bilkura jarraitzeko ez da beste deialdi formal idatzi bat egin beharko.

4. Erabakiak botoen gehiengoaren bidez hartuko dira. Urrutitik parte hartzen denean, erabakiak kide anitzeko organoaren egoitzan hartutzat joko dira, eta, halakorik ezean, burua dagoen tokian.

5. Organoko kideek aurkako botoa ematen badute edo abstenitzen badira, ez dute beren gain hartuko erabakietatik erator daitekeen erantzukizunik.

6. Bidezko interes baten titulartasuna frogatzen dutenek kide anitzeko organo bateko idazkariarengana jotzen ahal dute erabakien ziurtagiria eskuratzeko. Ziurtagiria elektronikoki bidaliko da, salbu interesdunak berariaz kontrakoa azaltzen badu, eta ez badago behartuta administrazioarekin harremana modu horretan izatera.

7. Komiteak gutxienez bilkura bat eginen du urtean.

8. Adituak joaten ahalko dira Komitearen bilkuretara, Komiteko buruak beharrezkotzat jotzen baditu aholku emateko, edo Komiteko kideetako edozeinek proposatuta eta Komiteko buruak onartuta.

9. Komitearen baitan batzordeak eratzen ahalko dira, komeni denean, gai jakin batzuk lantzeko.

X. TITULUA. 19/2019 FORU LEGEAREN ARAU-HAUSTEAK

86. artikulua . Zehapenen dirusarreren xedea.

1. 19/2019 Foru Legearen 33. artikuluak xedatzen duenez, toki- eta autonomia-administrazioek foru lege horren arau-hausteen zehapenetatik datozen diru-sarrerak bideratu beharko dira animalien babesa sustatzea xede duten jarduketetara.

2. Animalien babesa sustatzeko jarduera hauek finantza daitezke zehapenen diru-sarrerekin, osorik edo zati batean:

a) Edukitze arduratsuari buruzko publizitate-, dibulgazio- eta prestakuntza-jarduerak.

b) Animaliak maneiatzeko prestakuntza- eta gaikuntza-jarduerak.

c) Laguntza-ildoak sortzea hainbat erakunderentzat, animaliak babesteko ekintzak egin ditzaten.

d) Katu-kolonien eta/edo lagun egiteko animaliak hartzeko zentroen funtzionamendu- eta mantentze-gastuak finantzatzea.

e) Lagun egiteko animaliak aldi baterako hartzeko instalazioak handitzea edo hobetzea eta inbertsio berriak finantzatzea.

3. Toki administrazioak eta animalien ongizatearen arloan eskumena duen departamentuak, urte bakoitza amaitzean, memoria bat eginen dute, eta, bertan, bildutako zenbatekoak eta zenbateko horien xedea adieraziko dituzte, egindako jarduerak eta lortutako emaitzak zehaztuta.

87. artikulua . Isun gisako zehapenak.

1. 19/2019 Foru Legean aurreikusitako arau-hausteak egiteagatik Nafarroako Foru Komunitateko Administrazioak isun gisa ezarritako zehapenak Nafarroako Aurrekontu Orokorretako diru-sarreren partida batean sartuko dira, zeinak helburu izanen baitu aurreko artikuluan jasotako jarduerak egitea.

2. Ondorio horietarako zenbatuko dira bai ingurumenaren arloko eskumena duten organoek borondatezko epean jasotako diru-kopuruak bai ezarritako zehapenen ondorioz diru-bilketarako organoek epe exekutiboan jasotakoak.

3. Erregelamendu honetan aurreikusitako animalien babesa sustatzeko neurrien eta jardueren finantzaketari lotuta egonen dira diru-sarrera horiek.

4. Aipatutako diru-sarrerei dagozkien zuzkidurak dituzten gastu-partidak bereizita integratzen dira animalien ongizatearen arloan eskumena duen departamentuaren aurrekontuan edo toki erakundearen aurrekontuan, eta aurrekontu-ekitaldi bakoitzean ezarritako zehapenengatik bildutako zenbateko errealek osatuko dituzte:

a) Aurreko urteko lehenengo seihilekoa.

b) a) apartatuan adierazitakoaren aurreko urtearen bigarren seihilekoa.

1. ERANSKINA. LAGUN EGITEKO ANIMALIEN IDENTIFIKAZIORAKO NAFARROAKO ERREGISTROA

1. ERANSKINA

Erregistroak honako datu hauek izanen ditu gutxienez:

1. Animaliari buruz:

a) Mikrotxipa identifikatzeko kodea.

b) Pasaportearen edo identifikazio-agiriaren zenbakia.

c) Espeziea.

d) Arraza. Mestizoa bada, gurasoen arrazak zehaztuko dira.

e) Sexua. Animalia esterilizatuta dagoen zehaztuko da.

f) Jaioteguna.

g) Izena.

h) Gaitasuna.

i) Bizilekuaren helbidea.

j) Identifikazio data.

k) Mikrotxipa non dagoen.

l) Animalia identifikatzeko beste ezaugarri batzuk: ilajea, kolorea, etab.

m) Beste identifikazio-metodo batzuk, mikrotxipa ez direnak.

n) Jasotako nahitaezko txertaketak.

o) Nahitaez aitortu beharreko gaixotasunak.

p) Arriskutsua izan daitekeen animalia den ala ez:

a) Erasoak.

b) Animaliaren ezaugarriak.

c) Animaliaren destinoa.

d) Animaliaren osasun ziurtagiria, indarraldiko datarekin.

e) Hartutako kautela-neurriak edo prebentzio-neurriak.

q) Animalia noiz eman/saldu zen.

r) Heriotzaren data eta arrazoia.

s) Noiz jakinarazi zen galdu/abandonatu/ebatsi zela.

2. Jabeari buruz:

a) Pertsona juridikoaren izen-abizenak edo sozietate-izena.

b) NAN/IFZ eta, pertsona juridikoa izanez gero, legezko ordezkariaren NANa, izen-abizenak, telefonoa eta helbide elektronikoa.

c) Sexua.

d) Helbidea.

e) Harremanetarako telefonoa.

f) Posta elektronikoaren helbidea.

g) Animaliaren edukitzaile den pertsona fisikoaren datuak (agintaritza judizialaren deklarazioaren bidez animalia zaintzeaz arduratzen diren pertsona juridikoak):

a) NANa/IFZ:

b) Sexua.

c) Helbidea.

d) Harremanetarako telefonoak.

e) Helbide elektronikoa.

f) Epaiaren/autoaren data eta epaitegia.

g) Hitzarmen arautzailearen data.

3. Gaitutako albaitariari buruz:

a) Izen-deiturak.

b) Elkargokide zenbakia.

c) Harremanetarako telefonoa.

d) Posta elektronikoaren helbidea.

e) Lantokiaren, klinikaren, ospitalearen eta abarren izena eta helbidea.

4. Arriskutsuak izan daitezkeen animaliei buruz:

a) Noiz eman den animalia edukitzeko udal lizentzia.

b) Udal lizentziaren iraungitze-data.

c) Nahitaezko aseguru-poliza:

-Aseguru konpainia.

-Estalitako zenbatekoa.

-Poliza zenbakia.

2. ERANSKINA

BILDUMA PARTIKULARRA IZATEKO BEHAR DIREN ANIMALIEN KOPURUA

BILDUMA PARTIKULARRA IZATEKO BEHAR DIREN ANIMALIEN KOPURUA

(*) 3 hilabetetik gorako animaliak.

3. ERANSKINA. LAGUN EGITEKO ANIMALIEN ZENTROEN ERREGISTROA

3. ERANSKINA

Erregistroak honako datu hauek izanen ditu gutxienez:

1. Zentroari buruz.

a) Zentroaren datuak: identifikazio-kodea edo -zenbakia, 23. artikuluan ezarritakoaren araberako sailkapena, helbidea, zentroko telefonoa.

b) Gune zoologikoaren titularraren datuak: izen-abizenak edo sozietatearen izena, identifikazio fiskaleko zenbakia edo kodea (IFZ edo IFK), helbidea, posta-kodea, udalerria, probintzia, telefonoa, helbide elektronikoa, ordezkariaren datuak: izena eta bi abizenak, NANa, harremanetarako telefonoa, helbide elektronikoa.

c) Zentroaren ardura duen albaitariaren datuak: izen-abizenak, elkargokide-zenbakia, IFZ, helbidea, posta-kodea, udalerria, probintzia eta telefonoa.

d) Egoera erregistroan (alta, inaktiboa, baja).

e) Egindako kontrolak.

2. Animaliei buruzkoak.

a) Zentroan dauden espezieak.

b) Espezie bakoitzak daukan kokapen nagusiaren eta sekundarioaren datuak: helbidea, posta-kodea, udalerria eta probintzia.

c) Zentroko animalien errolda eta azken eguneratzearen data.

d) Zentroko gehieneko edukiera.

4. ERANSKINA. ERREGISTRO-LIBURUA

4. ERANSKINA

1. ANIMALIEN ERREGISTROA:

a) Banakako edo loteko identifikazio-kodea.

b) Sarrera establezimenduan: data, jatorrizko zentroaren erregistro-zenbakia eta osasun dokumentazioa edo merkataritza dokumentua.

c) Irteera establezimendutik: data, helmugako tokiko edo zentroko erregistro-zenbakia eta osasun ziurtagiriaren edo merkataritza dokumentuaren zenbakia.

d) Heriotza data.

e) Animaliak aldi baterako mantentzeko zentroetan, animaliaren jabearen eta/edo animalia adoptatzen duen partikularraren datuak.

f) Hautemandako gaixotasunei buruzko agiria, albaitari arduradunak sinatuta.

g) Erosketaren faktura edo hazlearen edo aurreko jabearen lagapen dokumentua.

h) Animalien legezko jatorria eta merkaturatzea egiaztatzen duten CITES agiriak, babestutako espezieen kasuan, edo nazioko legeek edo nazioarteko itunek araututako merkataritzarako dokumentazioa.

i) Animaliak identifikatzeko agiria, aldi baterako ostatatuta daudenean.

2. Albaitaritza-tratamenduen erregistroa:

a) Noiz eman zen.

b) Sendagaiaren identifikazioa.

c) Animaliaren edo animalia-taldearen identifikazioa.

d) Albaitariaren identifikazioa eta sinadura.

3. Bisiten erregistroa: salmenta-establezimenduak izan ezik.

a) Pertsonen identifikazioa, data, arrazoia.

b) Ibilgailuen identifikazioa, matrikula.

4. 1., 2. eta 3. puntuetako informazioa eta dokumentuak gutxienez hiru urtez gorde beharko dira.

5. ERANSKINA. HIGIENE-, OSASUN- ETA ONGIZATE-PROGRAMA

5. ERANSKINA

1. Nahitaez aitortu beharreko gaixotasunen kontrola, osasun kontrolak, txertaketak eta animalien desparasitazioak. Antibiotikoak zentzuz erabiltzea.

2. Gorpuak, azpiproduktuak eta hondakin arriskutsuak biltzeko eta biltegiratzeko sistema.

3. Instalazioak eta materialak garbitzeko eta desinfektatzeko prozedurak, eta intsektuak eta arratoiak hiltzekoak.

4. Animalien sarrera- eta irteera-protokoloak.

5. Idatzizko prozedurak eta jarraibideak animaliek jaso behar dituzten zainketei buruz eta instalazioen eta ekipoen mantentze-lanei buruz.

6. Animalien ongizaterako plana, honako hauek biltzen dituena: ingurumen- eta egitura-baldintzen kontrola, arrisku-faktoreak eta arrisku horien gainean hartu beharreko neurriak.

6. ERANSKINA. URTEKO TXOSTENA

6. ERANSKINA

Hona hemen urteko txostenaren gutxieneko edukia:

1. Animalia kopurua:

a) Guztira urtean.

b) Hilabeteko.

c) Espezieen arabera.

d) Identifikazioa, hala badagokio.

e) Animaliak esterilizatuta dauden ala ez.

2. Animalien sarrera. Jatorria:

a) Jabeak entregatutakoak eta arrazoia.

b) Segurtasun-indar eta -kidegoek, udaltzaingoak edo Ingurumena Zaintzeko Atalak emandakoak.

c) Hirugarrenek emandakoak (eremu publikoan, landan, etab. jasota) edo zentroko langileek bildutakoak.

d) Agindu judizial bidez jasoak.

e) Adopzioan entregatuta zentrora itzultzen diren animaliak, eta arrazoia.

f) Arraza, gutxi gorabeherako adina eta tamaina.

3. Animalien irteera. Destinoak:

a) Jabeari itzultzea.

b) Adopzioan emandakoak.

c) Beste zentro batzuetara bideratuak.

d) Gaixotasunagatik edo kausa naturalengatik hildakoak.

e) Eutanasiaz hildakoak.

f) Katu-kolonietan kokatuak.

g) Zentroan jarraitzen dute (zentroaren titularrak aldi baterako etxeetan edukitzeko emandakoak barne, betiere zentro bati lotuta badaude eta gune zoologikoaren titularraren erantzukizunpean jarduten badute).

h) Beste batzuk: adierazi zein.

4. Bestelako informazioa:

a) Jasoko da aurkitu den animalia jabeari itzultzen saiatu den, eta halakorik egin ez bada, horren arrazoia.

b) Zentroan jaiotako animaliak: kopurua, destinoa.

7. ERANSKINA. PRESTAKUNTZA

7. ERANSKINA

-Modulu orokorraren programa:

a) Honako honi buruzko araudia: animalien ongizatea, animalien edukitze arduratsua eta animaliak zaintzeaz eta maneiatzeaz arduratzen diren langileen prestakuntza. Foru araudia, 19/2019 Foru Legea. Araudi nazionala, arriskutsuak izan daitezkeen animaliak edukitzea. Europar Batasuneko legeria. Udal ordenantzak.

b) Animalien anatomia eta fisiologia. Elikadura eta nutrizioa. Animalien portaera. Kontzeptu hauek: animalien ongizatea, osasuna, estresa, gaixotasuna, animalien osasuna, higienea, biosegurtasuna eta zoonosia. Giza osasunarekin duen harremana.

c) Animalien ongizatearen alderdi praktikoak. Animaliak maneiatzea eta animalien portaera. Lehen sorospenak, animalien lesioei eta gaixotasunei aurre egitea. Tratamenduak, txertaketak, osasun programak, eutanasia eta sakrifizioa, identifikazioa, erregistroa, osasun dokumentazioa.

d) Instalazioak, eraikuntzak, ostatuak eta ekipoak maneiatzea. Zentro bateko erregistroak eta dokumentazioa. Albaitaritza-tratamenduen erabilera zuhurra eta horiekiko erresistentzia, erresistentzia antibiotikoa eta ondorioak. Hondakinen eta azpiproduktuen kudeaketa.

e) Laneko segurtasuna. Animaliekin lan egiten duten langileentzako segurtasun-irizpideak. Horien garrantzia eta animalien ongizatearekin duten lotura.

-Modulu espezifikoen programa.

Programaren edukia zentro motara egokitu beharko da, hau da, lagun egiteko animaliak mantentzeko zentroetara, haztegietara eta salmenta-establezimenduetara.

a) Lagun egiteko animaliak Espeziearen araberako ezaugarri etologikoak. Ostatua, elikadura eta higiene- eta osasun-tratamenduak.

b) Lagun egiteko animalien zentroak. Legeria.

c) Espezie babestuak. CITES hitzarmena.

d) Espezie exotikoak. Ostatua, elikadura, maneiua eta zainketak.

e) Hazkuntza, ugalketa eta salmenta. Maneiua eta instalazioak.

f) Identifikazioa. Garraioa, ongizate-baldintzak, dokumentazioa, garbiketa.

g) Kasu praktikoei buruzko lantegiak.

-Animalien harrera-zentroetan lan egiten duten langileen kasuan:

a) Lagun egiteko animaliak atzemateko teknikak.

b) Animaliei eusteko teknikak, ostatua eta garraioa.

c) Harrera-zentroak. Instalazioak. Elikadura. Animaliak maneiatzea eta zaintzea. Osasunaren zainketa. Arreta etologikoa.

d) Animalien populazioak. Populazioa kontrolatzea eta edukitze arduratsuari buruzko hezkuntza.

e) Laneko arriskuen prebentzioa.

8. ERANSKINA. PRESTAKUNTZA-ERAKUNDEEN ETA IKASTAROEN ERREGISTROA

8. ERANSKINA

Erregistroak honako datu hauek izanen ditu gutxienez:

1. Prestakuntza-erakunde baimenduen atala:

a) Erakundearen datuak, identifikazioa, AIZ eta harremanetarako datuak.

b) Baimena eman den eguna.

c) Zer prestakuntza programatarako dagoen baimenduta.

d) Baimenaren baliozkotasunaren data.

2. Ikastaro homologatuen atala, honako datu hauekin:

a) Prestakuntza ematen duen erakunde baimenduaren izena.

b) Ikastaro mota.

c) Noiz den.

d) Herria.

e) Eskola-orduak.

f) Ebaluazio-proba gainditu duten ikasleen zerrenda.

3. Gaikuntza-ziurtagiri ofizialen atala. Honako datu hauek jasoko ditu:

a) Ikaslearen izena, abizenak, IFZ eta harremanetarako datuak.

b) Baliozkotasunaren amaieraren data.

c) Jaulkipen data.

d) Gaikuntza mota.

e) Egindako prestakuntza-jarduera.

9. ERANSKINA. ZAKUR-TREBATZAILEEN ERREGISTROA

9. ERANSKINA

Erregistroak datu hauek izanen ditu:

a) Izena, abizenak, NAN/IFZ, sexua.

b) Helbidea, harremanetarako telefonoa, helbide elektronikoa.

c) Jaulkipen data, erakunde emailea eta gaikuntza-ziurtagiriaren edo -tituluaren indarraldia.

d) Trebakuntza non egiten den (zentro baimendua edo beste ingurune batzuk).

10. ERANSKINA. ANIMALIAK BABESTEKO ETA DEFENDATZEKO ELKARTEEN ETA ERAKUNDE LAGUNTZAILEEN ERREGISTROA

10. ERANSKINA

1. Honako hauek izanen dira erregistroak elkarte eta erakunde laguntzaile bakoitzari buruz jasoko dituen gutxieneko datuak:

a) Lehenengo atala: babesteko eta defendatzeko elkarteak.

-Izena.

-IFK.

-Nafarroako Elkarteen Erregistroko inskripzio zenbakia eta data.

-Zuzendaritza-organoaren kideak eta ordezkaria.

-Jarduerak.

-Egoitza soziala eta egoitza Nafarroan.

-Harremanetarako datuak: posta elektronikoa, telefonoa, harremanetarako pertsona.

b) Bigarren atala: erakunde laguntzaileak.

-Izena.

-IFK.

-Dagokion erregistroko inskripzio-zenbakia eta -data.

-Zuzendaritza-organoaren kideak eta ordezkaria.

-Jarduerak.

-Egoitza soziala eta egoitza Nafarroan.

-Harremanetarako datuak: posta elektronikoa, telefonoa, harremanetarako pertsona.

-Erakunde laguntzailearen deklarazioaren data.

-Sinatutako lankidetza-hitzarmenak.

-Erakundearen animalien harrera-zentroak.

-Beste batzuk.

2. Inskripzioan eragina izan dezakeen edozein datu-aldaketa Abeltzaintza Zerbitzuari jakinarazi beharko zaio, aldaketa gertatu eta hamar egun balioduneko epean gehienez ere.

3. Dagokion ebazpenaren bidez erakunde laguntzailearen deklarazioa errebokatzeak berekin ekarriko du erakunde laguntzailearen titulua kentzea eta erregistroko erakunde laguntzaileen atalean baja ematea.

11. ERANSKINA. ARAU-HAUSLEEN ERREGISTROA

11. ERANSKINA

Erregistroko datuak.

Erregistroak honako datu hauek izanen ditu gutxienez:

a) Izena, abizenak, NAN/IFZ, sexua.

b) Arau-haustearen xede den animalia-espeziea.

c) Arau-hauste mota, larritasuna, tokia eta data.

d) Zehapen/delitu mota.

e) Desgaikuntzaren hasiera eguna.

f) Desgaikuntzaren amaiera eguna.

g) Hartutako kautelazko neurriak.

h) Zehatzeko ahala erabili duen organo eskuduna edo epaia eman zuen organo judiziala.

i) Zehapenaren edo delituaren erregistroko ezeztapenaren data.

Iragarkiaren kodea: F2214330

Gobierno de Navarra

Contacte con nosotros | Accesibilidad | Aviso legal | Mapa web